Vanneihsangi 17

VANNEIHSANGI (17)

Ziaktu: Toni Râlte

Ka tho a, ka inthlak sawk sawk a. A vawt ngei mai. Tlan thawt phei chuan ka khur deuh. Mi veivak pawh an awm tawh lo. Hlauhna em em chu ka nei tawh lo naa, Sawma chungah eng emaw a thleng em mawni aw ka ti rilru. Thleng se Nu Saii ten an hre awm sia. A mak hle mai tih bak ka sawi thei meuh lo. Nenei chu engin nge tithlabar ka hre lo naa , a aw atang khan a hlau hle tih a lang reng mai. Kawngka ka kik a, "U Tri" a rawn ti te te a. Ka eih lauh lauh a, a rawn hawng ta rak a. Ka hmu chiah chu mak ka ti! A dáng var pap mai. Apuia leh Gaby lah chu thutthleng seiah an lo thu meng kiau bawk si. 

"Eng nge thleng a?" Kawngka kalh leh pah chuan ka ti a. 

"Ih, U Sawma te, anu te ka hmu a" a ti ban chhalh a. A chil a lem khawlh bawk. 

"Sawi chiang la" ka ti sup a. Ka lo rin ruk sa a ni bawk a, mak ka ti em em lo. Kei pawn ka hmu ve miau a. 

A naute chu, "Apui, mu leh tawh r'u le..au Tri-a a awm tawh a, hlauh tur a awm tawh lo" tiin khum lamah a va muttir te te a. Thuawih tak chuan an mu ve mai. An u ber hlauhlawpa awm ta chu anni tan pawh hlauh loh theih a ni lo vang. 

Ka bulah a rawn thu a. A thaw hak a. A kut ka lo vawnsak vat a, "Sawi la" ka ti a. 

"Kan inmang tha hnu khan phone ka dah a. Ka mut a chhuak ve deuh bawk a, ka muhil zui ve mai. Mahse, kawngka inhawng ri niawm tak ka hre ta a. Ka meng a, mahse, ka mut chu a la chhuak lutuk, maimizial an tih ang deuh khan ka awm zawk mawni ka ti. Pindan puanzar hi a che lawih lawih a. Ka en reng a. A rawn inkeu a, Anu hi a rawn lut ta mai a. Awii U Tri, a dáng vek a, kan inmelh reng ringawt. Harh chhuah ka tum a, ka au thei bawk si lo. Ka naute hi chu an muhil a, Anu chu a rawn kal hnai a, ka naute hi a melh ta vang vang a. Khatihlai kha chuan hlauhna em em pawh ka nei bik lo, mahse, anu hmai dáng bui kha chuan mi râp ve khawp mai. Chuan, tui khawihna bul tuk verh saw a rawn inhawng leh thuai a. Ka phu zawk mai. Ka harh a niang, anu chu a lo awm tawh lo. Mahse,..,(Ka kut chu a hum nghet sauh a. A khur deuh bawkin ka hria) puanzar phenah sawn hlimthla a ding run mai a. Ka va melh reng a, ka fiah ngam bik si lo. Ka maimichhing ngam bawk si lo, chuan a che hrut a. A hmai chauh hi puanzar chu keuin a rawn dak ta mai a! U Sawma a ni..ka rak chhuak ta a ni. Ka naute pawh ka rak riah an harh ve nghal a. Khatia ka au rual khan U Sawma chu a bo hmak. Ka naute an harh ve takah chuan tiin ka thawhpui ta ringawt a. Enteh, a mak lutuk, tui khawihna bul tukverh chu a lo inhawng tak tak mawle..pawnlam pawh melh ngam loin ka va khar leh a..ka rawn be ta che a nih kha." A ti ta mial mial a. Hmeichhia leh naupang tawn atan chuan a rapawm ve deuh bawk a nih chu. Dawt a sawi dawn der bawk si lo. A khurh der der danah a thauah a man a ni ngei ang. Ka thil tawn kha ka hrilh ve mai dawn mawni ka ti rilru a, mahse, a hlauhna ka belhchhahsak ang tih hlauin ka ngawi ta zawk a.

A hnu deuhah ,"Va mu la..thutthleng seiah hian ka mu mai ang" ka ti a. Mut erawh a chhuak hran lo. 

"Roomah sawn mutna phah zawk ila" inthlahrun hmel deuh hian a ti sap a. Rooma a naute nen ringawta mut pawh a hlau tawh a nih hmel. Ka pawiti hran lem lo bawk a. Kan phah dun ta a. Apuia te pawh naupang tih takah an muhil zui ve leh mai. Bakah an ni chuan engmah an hmu chuang lo bawk a. Khum bul maiah mutna chu kan phah a. Zial te ka han zu leh te te a, Ka mu ve ta a. A mak mang e, Sawma chuan eng emaw tak a tawng em mawni dawn le..la dam nise engtin nge a rawn kal ngawt ang? Mak ka tih erawh tukverh inhawng a sawi kha..Thlarau ni se a khawih thei dawn mawni le. Huai leh hrang lam hi ka la tawng ngai lo a, tawn pawh ka duh lem lo. Huaisen ka inti viau lo, mahse, hmeichhia leh naupangte bula inla huai tawk tur vel chuan ka insangmar thei. 

"U tri, muhil tawh ta che" ka ngaihtuahna chu a rawn pawtchat a. Min rawn chhuk melh a. A hmel dáng bai erawh a zia ta deuh. 

Ka uang chak tlat a. 

"Engtin nge ka bul maiah ka khawih chak em em a mu tih hre chunga ka muthilh theih ang?" Ka ti sup a. A nui ve ringawt. 

"Mi hian virgin tawh loah min ngaih i ring em?" A ti teh daih a.

"Tu chuan nge ngai ang che" ka lo ti a.

"Ka hre chuang lo, Bawngkawnah kha chuan kan thenawm nula leh tlangvalte khan min ngainep thei em a. Anu nunhlui an lo hre ve tho sia, min ngai virgin tawh lo tawp" a ti niah niah a. 

"Mi ngaihdanah buai a ngai hleinem..i virgin chuan a tawk" ka ti nghut a. 

"Naktukah chuan Gaby chu i lo awmpui thei ang maw? Ka hruai ve zawk mai dawn mawni" a ti leh sep a.

"Aa. I buai phah lutuk ang. Mi an tam tawh bawk si. Ka awm ve thei mai ang" ka ti a. Kan ngawi leh ta reng a. Ka mutchhuak a bo laklawh si. Mei ka zuk zawh leh meuh chuan Nenei muhil pawh a thaw sâk sâk tawh mai. Kei pawh ka chhing ve ta a. Sawma bawk ka rilruah a rawn lang leh thin. Ka lo chhing ve suar suar awm e. Ka harhvang ka tih tawh kha, Nenei ngik faih faih leh hrawk ri bawrh bawrh chuan min tiharh zawk, ka inlet vat a, ka tho nghal bawk. Nenei chu a hmai a lo thle sawn sek a, mangchhia a mang a ni ngei ang. 

"Hei, Nene,..i tha em?" Tiin a lu ka sawi a. A rawn meng kawk a, min rawn kuah nghal thlawp. A khurh nasatzia chu..eng thil chuan nge maw tibuai leh ta le?!

"Ka hlau lutuk." A ti tham tiak a. Tawng rin ngam a ni bawk si lo. Ka pawm tho a. "Hawh ka bulah" tiin chhuatah chuan ka pawtthla ta a. A tang bik lo. Tui ka va laksak a, a in khawlh khawlh a. A thaw halh mai. "Eng nge i mumangah i hmuh?" Ka ti a. A tho leh vut a, Apuia chu a va bawh titih a, a thawk lak dan chu a en ta reng a. Mak ti zetin ka lo melh reng ringawt. A rawn thu leh a. 

"Atea leh U Sawma'n Apuia hi kaih sawn an lo tum nasa a, ka lo pawt ve táng táng a. Apuia lah a lo tap nasa si. A mak ee..ti nge hetiang hi ka tawn ?" A ti tiau a. Khawngaihthla a la hliah hliah kher mai. A sam tuaimamsakin, ka kuai mu a. A lungphu phu dawt dawt chungah dimtein ka kut ka nghat a. Ka chul pah bawk. 

"A tha vek tawh aw. Tiang hian thlarau sualho hi mang lamah an inlar ve thin alawm..Apuia chu engtin mah a awm lo vang" ka ti sup sup a. 

"Atea thlarau a ni tak tak ang em?" A ti sap a.

"Ka ring lo, ramhuai hoin amah angin an rawn tibuai zawk che u a niang" ka ti a. Ka rin dan tak tak pawh a ni reng a. 

"Nia, ni lo hram rawh se" a ti halh a. Ngawi rengin zangthalin kan mu dun ta chawrh chawrh a. Ka insum thei ta lo va, ka va kuah a, ka lamah kuai herin ka fawp ta a. A rilru a la pe tak tak thei lo tih chu ka hre tho a, a mood thlak ka duh si. Ka fawp lui zel a, a hnuah chuan ani pawn duhthawh takin min chhang ve ta a. Khua a vawt bawk a, rizai chuan kan inkhuh hlán a. Ka duhthawh telh telh a, a tawp ka thlenpui ngei ngei tur a ni ka ti hmiah. Ka ta ni rawh se. Chu chu ka duh a ni. A hnute ka dap rawk rawk a, a lawnga ka khawih takah phei chuan insum chu harsa tak a ni. Ka chul kual zel a, ani pawn min dang lem lo. Ka bawh titih a, ani chuan ka nghawngah min kuah thung. Hnai taka melhin,"Ti ang aw" ka ti sup a. A mitmeng chu a de sawr sawr mai. A thawk lak danah a dik bik lo tih ka chiang. 

"Ka naute an harh ang" a ti sep a. 

"Harh lo vang. Zawitein " ka ti a. Min melh vawng vawng hnuah, "Ka khawngaih che.." A ti daih a. Ka che nghal hmiah. Ka tih ang ang chuan a awm ve tawp. Tawnhriat a la nei lo tih ka chiang hle. Ka ngaih a tha viau mai . Sawi tawh angin a vawt bawk a, rizai chuan kan inlukhup tlat a. Thawmhnaw pawh kan phelh hran lo. A tul ber lo bawk a. A vawikhatna chu dim em em, thawm siam mang lo chuan kan tlingtla ta a, na a ti tih erawh ka hria, thawm dim a ngai sia, ka duh angin ka che thei bik si lo a ni. Kei pawn nuam tihna em em ka nei lo. Mahse, ka ta liau liau a ni tihah ka chiang ta a, chu chauh pawh chu a tawk rih mai e. Kan va zung dun a. A zun lai chuan, "A va na ee" a ti sap a. Ka lo nui deuh. A zak hle tih pawh ka hre thei. Kan mut leh hnuah, "Ka thutiam ka bawhchhiat vawi 2-na" a ti halh a. 

"A pawi lo" ka lo ti vat. 

"Nangin pawi i tih loh chuan a tha tho a. Mahse,innei ta si lo ila ka rilru a na lehzual ngawt ang" min melh kiau chungin a ti ta a. Kei pawh ka thutak kher mai. A sam chulsakin,"Ka nei dawn che alawm..ka phatsan lo vang che' ka ti nghet charh a. A mittui a tling pam mai. 

Chutah , "Eng nge i thutiam i bawhchhiat pakhat chu" ka ti ta daih a. 

"Lehkha kha ka zir zel ang a, hna ka neih veleh Anu te ka chhuahpui ang a, nuamsa deuhin ka awmtir ang ka ti thin a. Mahse, pu Mawia khan zir zawm a phal ta si lo va, ka thutiam bawhchhiain thingpui dawrah ka inhlawh ta a nih kha.." A ti ta a. 

"I duh vanga bawhchhia pawh i nih loh chu..taka! Pu Mawia hi a la táng ve reng ang tiraw?" Ka ti hluai a. 

"Táng ang, a damchhung táng se a tha daih zawk. A lo chhuah chuan ka naute hi a rawn chuh lehvel ang a. Buaina a tam mai mai" a ti a. 

Mut a chhuak tan hurh mai. Dar 2 a ri lek lek tawh bawk. Ani pawh a chau ve deuh nge a chhing ta siar siar a. Tichuan, inkuah rialin kan muhil ta a. Ka harh chuan a lo tho tawh a, a naute bengchheng chu a lo khap mek a, "Au Tri-a a la muhil , verandaah va infiam ru le" a ti a. Ka nui suk mai. Nupa ni tawh ang mai hian ka inchan. A rawn lut a, ka meng tih a rawn hmuh chuan, "Chaw ka chhum kep ve mai che aw. Ei ve mai rawh' a ti a. Ka hnial lem lo. Mahnia eirawng inbawl vel kha ka chak zawk zawk lo e. Ka tho a, ka va inphihfai ve a. Ani chuan mut puan vel chu a thlep fel nghal mawlh mawlh a. 

Chaw kan ei laiin Apuia chuan, " Nizanah Atea ka hmu leh a. Min hruai ve a lo tum a, Nenei hian a lo phal si lo va..ka lo tap vak vak a" a ti niah niah a. Nenei nen kan inmelh relh relh. Kan hriat ve phak loh thilmak ka ti mai. Chaw pawh ka ei puar e. Eikhama a intihfel hnuah a insiam mawlh mawlh a, Apuia pawh a insiam ve bawk a. A hmel hmuh a nuam phian, am bazar dawn ani bawk a. "Nene, a nu leh Atea te thlan cheina tur kha aw..kan lei ang tiraw?" A ti leh thin a. A nu leh a nau te chu a theihnghilh lo chiang khawp mai. Gabby pawh a tifai thuak thuak a, a thawmhnaw a thlaksak bawk. Dar 10 velah kan chhuak a, Gabby chu a toys nen kan in lamah ka hawnpui ta a. A tirah kha chuan a u te kha a ngen ve a, Nenei'n , "Thil tui tawk leh kawr mawi kan lo hawn ang che. Au Tri-a hi amahin a awm dawn a, awmpui a ngai alawm..lo awmpui rawh aw" tiin a thlem a, chocolate kan leisak bawk a. A bang ve ta mai. Kan inawm thei em ang chu maw..tihtur a váng angreng sia, thutthlengah mu chungin phone ka khawih a, Gaby chu chhuatah a toys nen a awm hnawk niaih a. A tlei ve ta viau hi a u te tan pawh a hahdamthlak khawp ang. 

Nizan kan meng rei ve deuh bawk nen, ka mut chu chhuah namèn loin a chhuak ta a. Gaby ka ngaihtuah bawk si, "Bibi, i mut a chhuak em? Mu ang hmiang" ka va ti a. Min rawn en háw a. 

"Aih, a duh loo" a ti mai a. Ka meng hleithei si lo. Kawngka ka va kalh te te a. Thutthlengah chuan ka muhil ta a. Khawiahmah a kal thei dawn chuang lo a, a tah leh min kaitho mai rawh se ka ti ta ringawt. Darkar chanve dawn ka muthilh hnuah ka hmaiah a rawn chul a, ka harh zawk. 

"Nge? I mut a chhuak ve mi?" Ka ti a. Hnuai lam a melh a, ka zuk en ve chu a lo huh dup mai. Ka tho vat a. Ani bathroom kawngka kha ka lo kalh si, a kalhna kha a han hawng pha si lo va, zun a lo cheh chu niin, a kekawr chu ka hlip vat a. Kekawr hak thlak kan keng bawk si lo, gamchha kan dah tawl tawh ka ventir ringawt. Mawi a la inti em em zui! Ka nuih ka nuih mai. Thingpui ka lum a, Nenei te pawh an rawn haw tepin ka ring. A hmeh kan nei si lo, Gaby chu kawngka ka kalh hnan a, ka han lei leh rih. Thingpui ka intir zawha a han inkhualtelem leh chu a mut a chhuak ta deuh nge a zia a zawi sawt ta hle. Awih mut a ngai em lovang chu.. A muthlu ta lák lák a, dimtein ka pawm a. Ka khumah ka va mut ta a, a lu ka chul hliau hliau a. Nenei'n ,"Awih vak pawh a ngai tawh lo, a chaw ei lai te hian a muthlu láwp lâwp zel " a tih kha a dik a nih hi. A muhil zui ta sák sâk a. Sitting roomah ka pheisan leh ta a. 

Ka phone ka en leh chuan Msi msg chu ka hawng nghal a..

"Ka tum ka tihlawhtling ta e. U zuala te nupa chu an inthen ta. U Zuala zawk in atangin a chhuak" a rawn ti a. 

"Engtin nge i tih?" Ka va ti a. Voice msg sei deuh a rawn thawn a. 

Ka ngaithla ta a. 

"Kan thlalak dun an nu ka va thawn zeuh zeuh a, nizan hmasa khan kan riak dun bawk a, tah chuan, 'In nu hi i hmangaih si lo va ,ti nge i la neih reng'? Ka ti a.

" Hlawh nei a nia, bakah ka chhungte hian inthen an phal hleinem. Ka ninzia hi a. A rapthlak si, nupui ang pawn ka en thei lo' a ti a. Ka lo record vek sia, an nu ka va thawn ta vek a. Niminah khan an inhau hrep a niawm e. U Zuala chuan ngaihdam a lo dil aniang. Mahse, nizan khan U zuala nen kan inbiak dan ka va thawn leh ngat a. Kei chu engtin pawn min tihmualpho tum mah se, ka mualpho sa vek tawh si. Chuan, an nu chuan tukinah a hnawtchhuak ta a niawm e. An awmna chu a mupui pa te in a ni sia..kei chuan ka block vek tawh bawk si..a chawh ve khawp mai" a rawn ti. 

"I hlim sawt em?" Ka va tih chuan, "Ka nui ka nui kher lo va. Khawngaihna chhete mah ka nei lo va, ka hlim lo a nih pawhin ka hlim lo chuang lo. Tp, hmangaihna hi huatnaah a lo inlet thei khawp a nih dawn hi" a rawn ti a. Hei chu a dik maithei. 

"Tunah chuan i nau pai chiah ngaihtuah tawh rawh" ka va ti a. 

Eli pawn min lo text..ani hi chuan min rawn text deuh reng zawk. A rul tawk zelin ka reply a. Min hua a, mahse, a tilang ngam tawh si lo. Chu tak chu a hmaa min hmuhsitna leh min hnuaichhiahna ngaihtuah chuan nuam ka ti si. Mahse, ka tih dan chu a dik ber lo tih erawh ka hre tho. Engtikah emaw a la beidawng ang a, a reh ve mai ang ka ti ringawt. Min ngaizawng anga lan la hreh siin ka chungchang erawh a rawn ngaihven thei viau lawi a. Nenei te chanchin min zawh zeuh pawh a ching. Kan in awmna min zawt thin a. Ka hrilh duh chiah lo, a rawn leng ngam dawn tih k hre miau a, mipa ta na na na chu ka inven zawh loh hun a awm ka hlau a ni. Nenei lahin a thik ve bawk si. Eli ka tlawm emaw ka tih laiin ani pawn ka nun a tibuai ve tho a nih chu! Phuba la emaw kan intih hian kan lo la tak tak lo a, keimahni kan kan inhrem tel ve reng thin a lo ni. 

Nenei'n min lo call a, Gaby chungchangte min zawtin an lo haw mek thu a sawi. Ka nu nen kan inbe zui ve leh zat bawk. Engkim a la tha rih a, Putea pawn engmah a sawi lo. Engchen tak kal thei ang maw..

Nenei chuan jumper nalh zet min leisak a. Ka inhmeh tur pawh a hre khawp mai. Tul ka ti lo asin le..

Zanriah chu U Mala ten min sawm a, ka hnar ta bik lo. U Tei hian ei siam a thiam riau a , ka ei teuh mai. Ka chaw ei kham ka thut leh hlek hnuah ka chho a. Thiante nen pawh kan inbe zeuh zeuh, Nenei nen kan inunauna vel chu ka la hrilh lo. Hmaichhanah ka sawi ang ka tia. Nenei te in phei tura ka insiam mek laiin U Mala a rawn lut a ,"Tp, Sawma a inawkhlum a nih chu" a rawn ti a. Ka phu zawk mai. A kuhva han lei khan a han hre ve a lo nia. Nu Saii te chu Sawma ruang la tura an phei nghal thu a sawi bawk. Kan han chhuak chho ve vat a, Thalai pawh an lo tam hman hle. Kan han insingsa rawk rawk a. An chhungkhat te pawh an rawn lang tiam tiam a. Ka rilruah engvak mah a awm lo. Sawma thi chu ka lawm em em hran lo, ka lawm lo chuang lo. A nun kha a hrehawm ve em a, tibuaitu a nei ka ti mai. A harsa ve dawn em a ni. Kan boruak chhe lo se chuan kawm kha chu a nuam reng mawle. Nenei ka va hrilh ve a, a lo hlau ang tih erawh ka hlau deuh. 

"I tlaivar ve dawn em?" a ti a. 

"Tlaivar ve chu tha ka ti ..i mu ngam ang em?" ka ti a.

"Ngam lo" a ti tawl mai.

"Aw le..12 vel thleng ka awm ve ang a, ka rawn phei leh mai dawn nia" ka ti a. 

"Ka naute awmpui an ngai sia, ka lo kal ve lo mai ang" a rawn ti a. An phut pawh ka ring lem lo, a dinhmun an hre vek sia. Ruang chu dar 9 pelhah a rawn thleng a. Tap thawm a nasa khawp mai. Ka rin loh deuhin Nu ruati te nupa leh Eli te an lo kal ve a. Eli chuan min hmuh ka hlauh nen, min rawn hmu chat si, ka awmna a rawn pan ta hmiah mai. A va buaithlak tak e aw. 

"Hmuh che ka inring reng a" a la ti zui. 

Dar 11 velah,"In inah kal ila. " a rawn ti sap a. 

"Eng nge kan tih ang?" ka lo ti thung. A beisei leh rilru chu ka haider lui ve táng tâng. A ner sak a, "Thingpuite kan in ve ang chu, bakah in in ka hmu ve chak" a ti a. Sawma te in kan luah tih chu a hre sa a, Sawma te in a hre lo thung. Chuvanga zaninah pawh Sawma a ui leh sun vang em em pawh ni lo va a nute a rawn zui ve ngawt ni. Min nawr seuh seuh si a, ka zun a lo chhuak ve tawh bawk nen, kan chhuak ta a. Kan in lam chu kan pan thla ta a. Ka zung nghal a. 

Thingpui ka chhuang zui a, thutthlengah thuin min lo thlir reng a. Mi hausa fanu ni se chuan a chhe lehzual ngawt ang. A la naupan nen hian a inchei senior thei si. A make up hman nasat vang nge Nenei ai pawn a lang upa zawk hial thin reng a ni. …

"Ti nge min pehhel i tum char char reng a?" a ti ta a. 

"Ka tum em ni, a awihawm loh" ka ti nghut a. 

"Ka hrethiam ve lawm le aw. I mak ve e. ". a ti nghat a.

" I ho em mai a. " tiin thingpui ka siam a. A ding a, ka hnungah rawn dingin, min rawn kuah ta mai a. Ka thingpui thlit lai pawh ka chawl dat. 

"Ka duh che a, nang chuan min pehhelna i zawng zel a" a ti sep a. Thingpui ka thlit zawm a. Ka ngawi reng bawk. 

"Nenei nen in la ni tiraw?" a ti leh a. Ka inher a, amah chu ka namkiang a. 

"Aw. La ni e" ti chungin thingpui chu ka pe a. Thutthlengah ka va thu daih. Min zui ve mai. Ka bul chetah a rawn thu a. A perfume rim pwh a nam hak mai. 

"In zo la, nang chu i lut dawn nia. Kei chu Nenei te inah phei a ngai a" ka ti a. 

A ner nawk mai. Ngawi rengin kan in a. 

" Min duh lo tiraw?" a ti leh hak a. Tlem chuan lainatna ka nei deuh. 

"Pawi ka ti khawp mai" ka ti ringawt. 

"Engvangin nge khatia min tih?" a ti hiai a. 

."i nun sim nan" ka ti ringawt a. 

."Eng nge a awmzia?" 

"Min hmuhsitna tireh turin mawle..tumah hi hmuhsit tur a ni lo, inmamawh tawn vek kan ni.." ka ti duah a. A ngawi ta daih a. Ka tawng zui tawh bik lo. 

Thingpui in zawhah ngawi rengin kan chho a. A luh dawn chuan, "Tp, mipa mak tak i ni" a ti hawk a. Ka chhang lo. Ka kalsan ta a. 

Nenei te in ka va thlen chuan, a naute an muhil tawh a. Ani erawh tri zetin a lo thu a. Ka va khawngaih reuh tak. Thingpui lum a tum a, ka in tawh thu ka sawi a, Eli chungchang erawh ka hrilh lo. A rilru a hah ka hlau. A thik ve bawk sia. 

"Mu nghal mai ang hmiang.." ka ti a. Ka awm a nuam lo deuh tlat! Pathian zarah ka hrisel ve riau a, damdawiin pawh ka la lut lo. Mahse, Tlai atang khan chhungril khawsik ser ser ang hi ka nei a. Eng thamah ka ngaih loh luih vangin Sawma te inah ka thu ve leh ta reng bawk si nen. Ka hmelah a lang nge ni ka chal a rawn dek a, a kut chu a vawt tep. 

"I pang a lum deuhin ka hria. Nachhawkna ei rawh aw" a ti sep a, a va hai nghal rawk rawk. Kei pawn ka lo dawlh ve mai a. Khum hi Apuia te khum thin leh Nu Sangi te khum kha an la dawhzawm a. Chep zet chuan kan pali chuan a mut theih mai ang. A vawt tho bawk a, chhuata mutna phah vel kha a buangbar ka tih vangin, "Mu vek mai ang u" ka ti a. A hnial ta bik lo nge a va mu tharh a. Kei pawh ka inhlip a, thawmhnaw nena mut tup hi ka thiam vak lo. A sir berah chuan ka inthawlh ve ta than a. Ka nachhawkna ei khan min chhawk mai si lo va, ka tlun dawn titih ta mai a. Nenei pawn a hai lo va , a va tho leh a, rizai a va lakbelh a, min thuahsak a. 

"Tui ka va lum ang e, in rawh " a ti sap a. A va lum rak rak a. Ka pang a kham vek thei, ka insangmar nasa bawk a niang. Tlem chuan ka zia ta hret hret a, ti nge maw ka khua chu a sik ve ringawt ni. Chhunah khawsikna chhan tur awm engmah ka ti bawk si lo. Ka lu pawh chu na tlek tlek tak a ni. 

Tuilum chu ka in ta a. Chi a lo al hlek bawk. Min thutpui ve ta reng a. A naute erawh an mutui hle. A riahpuitu berin ka tibuai ta viau chu a nih hi. Ka in zawhah ka va zung leh a. Kan mu leh ta a, ka thlan a rawn sa chho tan ta bawk a. Rizai pawh a hnawk ta deuh. Ka mu zangthal a, ka ban lukhamin saisir zawngin a mu a, ka awmah a rawn kuah a. 

A chala fawp zauhin, "Muhil rawh" ka ti sup a. 

"Umm..i khuasik leh chuan min kaitho rawh aw" a ti a. Chhunah an bazar sia, a chau dawn tih ka hria. Kei pawh ka damdawi ei khan min hneh ta nge, Nenei muthilh hnu lawkah chuan ka muhil zui ve ta aniang. Chhuata tei thawm niawm tak vangin ka harh ta hlawl a, Ka bàn a mu churh churh mai. Nenei kham lai chuan zawitein ka bán chu ka la a. A muttui hmel khawp mai. Ka harh rual khan pen thawm niawm tak kha a reh daih. Ka zun a chhuak tho bawk a tiin zung turin ka tho a. Ka zung zo ka mu leh chiah tihin Kimi te in niin ka hria, ke pen thawm chu a ri leh ta tlak tlak a, Zan a reiin a reh tawh bawk a, ka hre chiang khawp mai. Mahse, Kimi te in daih a ni bawk a chutin ka va hlau em em lo. Sazu pawh a ni ve thei tho. Ka saisir thawk a, ka chhing leh chiah tihin Gabby hi a rawn tap chhuak hlawl mai a, ka va phu chiang tak. Nenei pawh a thu chhuak vat mai . Gaby chu a pawm vat a, a hnungzang chulin, "Dam dam.. ' a ti sep sep a. Gaby lah a tap uar telh telh, a chhan kan hre bawk si lo. Nenei pawh a mangan hmel hle. Chutia a tah lai tak chuan Kimi te in lam bawk chu a ri bur mai a! Ka sawi thiam dan berin dawhkan emaw hi kuai thlu thawk se chutiang chu a ni. Apuia pawh a rawn thu ve hlawl a, Nenei a meng phawk tawh nasa. A hlau hle tih a lang reng..han tih vak ngaihna chu a awm chuang der si lo. Gaby pawh a tap bang tan ta a. Mu chungin Nenei chuan a thlem heuh heuh a. Kei erawh ka mutchhuak a bo vek. Sawma thih dan ka ngaibtuah a, a thla pawh hrang se thil awm lo a ni hauh lo. Mahse, tawn erawh ka duh hauh lo. Ka ngaihtuah vak vak a, ka lo muhil ve daih aniang, ka banpuam a rawn sik vawt vawt a, ka meng kawk a. Nenei lam ka va hawi chuan min lo melh kar a, thlabarna hlirin a khat. Mitmei hian choka lam chu min kawhhmuh a, ka hawi vat. Puanzar phena tu emaw ding run chu ka va hmu ve ta chiah! Ka lung a phu ve dawt mai le. Hmuh sual lah a ni der si lo. Mipa alawm ka nih leh tiin ka tho a, a chechang eih chuang lo.

" Tu nge i nih?" ka ti nghut a. Ka aw chu a khur deuhin ka hria. Ka zám lo ka tih chuan dawt ka sawi. A che ta hrut a, puanzar a phe lawp a, Nenei a rak tuar..hlimthla chu a bo ta hmak mai. Nenei chuan min kuah bet a, a khur zawih zawih mai. A hlauh em vangin min tihuai letling. Ka bialnu a ni miau a. A tap pur bawk si. A naute erawh mak takin an mutui em em thung. Thawm leh hmuh engmah chu kan nei zui ta lo. Muthilh erawh a har zui angreng. Thinthi dapa muthilh a chakawm asin le aw. 

A tukah pawh thawh kan hai ta reng a. Apuia te unau thawmah kan harh ve chauh. An fel ve reng reng, an unauin Nenei phone an lo en a. Min kaitho bik miah lo. Ka lu a rit búr mai. Ka luak a chhuak hle bawk. Kan tho ve a. Ka zawi nguai bawk. Tukthuan pawh ka ei leh ta a. 

"Lo awm phei mai rawh.." a tih chuan ka melh kâwk a. Thinrima melh erawh ka ni lo. Amah leh a naute nen chauha awm chu a zuam tawh lo tih a lang. A awm ve tho mai. Mahse, kan in luahna te fapa, kan kawm ve fo thin a boral a. Han rehsan hmak chu nuam ka ti chiah si lo. Zira leh Lukira pawn a boral laia an awm lo chu pawi an ti ve viau mai. 

Vui zawh awm velah ka va phei ta phawt a. Chawhma chhung zawng kha ka mu a ni deuh mai. Ka khua lah chu a sik ser ser reng mai a. A mak hle mai. Ka nute erawh ka la hrilh duh rih lo. An mangang leh vak ang. Nenei ngenna anga awm mai chu ka tum ve ta mai a. Keimahin awm ila ka khua a sik ve reng bawk si, Nu Saii te pawn an hriatthiam tho ka ring. Bakah an milian a, lenpuitu an thahnem em a, keini lan leh lan loh chu a lang vakin ka ring lo. Ka la cham ve tih pawh a hre kher dawn mawni..ka thawmhnaw thenkhat kengin mi reh lai chuhin ka phei ta a. Chawhmeh siam loh kan la kawl ho ka keng phei vek bawk. Mas leh kumthar inkar chu kan chengho dawn a nih ber mai chu.

Zanah pawh ka khua a rawn sik leh deuh vangin a tukah inentir ka tum ta a. Thisen te laktir ve ila, a chhan tal hriat a chakawm. Kan han awmkhawm ta chu kan hlim phian mai. Nenei erawh a ti deuh hru rengin ka hria. A awm ve tho e. An in chungte nen thawm a inhriat vak theih bawk si loh a. Ka nute nen pawh kan inbia a, ka hrilh ve vek a. An rindan sa a ni deuh bawk a, mak an ti lem lo. Ka khawsik pawh chu ka sawi ta nge nge. 

"Inentir ngei ngei rawh. Naktuk 23 a ni tawh. Hun a tam tawh lo" a rawn ti nghal mai reng a. 

A naute kalsan chi ni hek lo, keimahin inentir tur chuan ka kal ta a. Damdawi min chawh tawp ringawt. Malaria erawh ka ni lo thung. Urlawkniah ka chhuah peih loh takin tiin chawhmeh tur vawksa leh bawngsa ka lei nual a. Chawhmeh dang pawh, bazar hi chu kan thianho in kan luahah incharge ka ni bawk a, ka lei thiam ve reuh lutuk. Gaby te unau ei tur ang chi ka lei haw nual bawk. Ka hlim haw vur vur viau mai, nuam ka ti. Nenei nen nupa kan ang si. In ka thlen chuan min lo dawngsawng vat a, chawhmeh ka lei nualte chu a inthlahrung leh tawh tih ka hre mai. Mahse, ka khap nasa bawk a, a sawi chhuak ta em lo. Ka inbualna tur tui a lum a, sa ver vawrin ka inbual a, ka harh ta deuh e. Eirawng kan bawl dun a, a naute lah an tlei si. Hetiang boruak leh hun hi a nawmdan ka sawifiah thiam chiah bik lo. 

"I khua a har takin i thiante pawh sawm ve la..hmanna tur te an lo duh ve viau maithei a" a ti a. 

"Tian a nuam tho lawm" ka ti mai a. 

Min melh ralh ralh chungin,"Zu tel lova hman i hreh em?" a ti sap a. Ka va melh ve vak, ka nui hawk a. 

."ka in lo thei. A ho em mai" ka ti mai a. Mahse, a vawt thei sia, mut dawna lem sek tur te chu awm remchang se ka hnar miah lo vang. Amah Nenei pawn min khawngaih deuh niin ka hria. A inthlahrun vang a ni leh tho ang. 

Urlawk zan pawh chu kan pali chuan kan hmang ve ta mai. Bawngsa kan kang ve a. Nenei'n atta a kang a. A kan mek laiin U Sanga'n min lo call mial mai. Ani hi a haw lo mawni le. A lo haw lo tak tak a, "In inah ka rawn kal a,i lo awm si lo" a rawn tih chuan phur zetin ka awmna ka sawi ta a. Ani a thianpa nen hmanpui tur nei bik lo chu min lo tlawh an tum a lo nia. A va zia tak. Nenei pawh ka zah zo tawh lo, ani pawn a hrethiam ve nge. Nui sak chungin,"I lawm awm..in tam lo la aw" a ti a. A naute hmuh loh hlanin ka fawp zauh. U Sanga te chu an rawn thleng a. A thianpa lah kan khuaa awm ve reng tawh U Dina a lo nia. An ni pawh an tlangnel ve nghal khawp mai. Hmeichhia an ngaihsak vak bik lo bawk a. Apuia leh Nenei te chu thil kan eitir zawhah Nenei chuan a va mutpui ta rih a. Keinin kan lo thli..! Ka khi vur vur reng mai. Nenei lo thawh leh chuan kan nuam tan viau. Ani pawh a fel reuh a, u Sanga te nuam tih lohna tur ang zawngin a awm bik lo. U Dina lah fiamthu duh a ni bawk a, kan nui hawk hawk reng mai. Tiang chuan khawhar lo takin urlawk zan chu kan hmang ve ta. Mut pawh a tui. Ka sawi leh hram duh chu, Nenei virgin ka hawnsak tuk tlaiah khan a period tut a. Kan la ti leh miah lo. Timing vak lo khawp mai..hehe..

Christmas ni pawh chu zing kara Nu Sangi leh Atea te thlan kan va chei bak chu inah awmin kan inawm heuh heuh a ni mai e. Kan khuaah chuan awm ila ka inkhawm ngei awm sia. 

"Ka tet lai, Apuia te la pian ve hma kha chuan , inkhawm kha nuam ka ti thei lutuk. Ss pawh ka kaikim thlap zel. Mahse, ka pain min tihretheih chho tak hnu khan thawmhnaw te kha ka nei vak si lo a, ka nu hlawh ve lah in chhungkhur leh ka naute fee-ah a zo zel sia. Ka hlawh ve lah ka tan ka hmang ngam bawk si lo, ka inkhawm lohna a rei tawh khawp mai" a ti malh malh a. Ka hriatthiampui viau mai. 

"Kan inneih hunah chuan Rossary te pawh i ngaihlu ngawt ang" ka ti zauh a. A khi ve sak ringawt. Kan inning thei lo va, kan inhau lo bawk. Thian ang maia inkawmin engkim kan sawi dun a. Kan hlim dun ve em em tawp mai a ni. Chutiang chuan Christmas kan hmang ral a. Ruaitheh niah erawh kan inchei a, Apuia te hruaiin kan tlan chhuak ve mai mai a. Kawn chei te enin thla te kan la ve a. Kan hlim ve khawp mai. Hmelhriat pawh ka hmu ve zeuh zeuh. Nupui ka nei tawh emaw ti te pawh an awm. Ka insawifiah peih vel lo e a. 

A period zo ta bawk a. "Ka rai ang e" ti chung siin, Vawi khatin vawi hnih a hring tih angin Chumi zan chuan a vawi hnih nan naupang muthilh hnuah kan che leh a. A vawi khatna a ni ta lo bawk a,thawm ka dim ta vak lo bawk a, ani pawh a hma ang em em chuan a na ta lo va. Kan lawm a kim e. 

Ni 27-ah kan in ka va tlawh zuai a. Ni 29-ah thiante an lo hawn dawn vang a ni pakhat. Kimi ten kum thar an rawn hmanh dawn miau a. Ka pa pawh tihtakzeta ka dil vangin kum thar pawh ka hmang ve leh thei dawn e. Hlim tak ka ni. Ka khawsik a awm ta vak lo va, tin, thlahrangin min tibuai leh ta lo bawk. Nu Saii te inah ka peng ve zuai a. An la ngui khawp mai. Thupha te ka han chawi ve ngial a, ka khawsik thu te ka sawi ta ngawt kha..an hrethiam ve tho aniang. Zira te an rawn thleng ve ta a. Kimi te pawh a tukah an rawn thleng. A nuam chho tan ta viau e. Nenei pawh a hlimin a phur ve hle. Kumhlui thlah zan chu Kimi te ina hman kan tithlu a. A zau deuh zawk vang a ni pakhat a. Thiante nen kan han inhmu leh ta chu sawi tur a tam angreng. Sawma chungchang atanga Nenei pa dik tak ka sawi ta zar zar a. Mak an tiin a thawng ve khawp mai. Sawma tak chu mak an ti vak lo. Zira'n, "Kei pawh min lo tlawh alawm" a ti mai a. A sawi tha duh vak lo. Nenei pa dik tak erawh chuan a thawng takzet a ni. Mahse, kan thutlukna erawh min pawmpui thung. 

Ni 30 zanah Kan va phei ta thám thám a. Nenei tak hian a la hlauh deuh vangin ka la riahpui tho a. Zira leh Lukira pawh chuan Kimi te awmchilh ve rih mai chu an sawi nuah nuah mai. A nuam ngawt ang. Kan inpawh vek tawh tho sia. 

Ni 30 zan Nenei nen kan mu dun chu engvang kher nge pawh ka hre lo, kan han che dun chu ani leh ni lo angin a duhthawh reuh tán tán viau mai a. Kei atan lah lawmna a lo ni si. Min fawh dante chu a thukin a ril zual niin ka hria. Kei pawh ka awm mai mai lo khawp mai. Gabby pawh a harh phah! A va buaithlak tak. A tep chep chep a, a muhil zui leh hram. Kan thaw huai e, nuih a za duh bawk si. 

Kum hlui thlah ni a ni ta. A ruka kan sawi angin Kan thian thum chuan kan down ta a. Lukira hian a bike chiangkuan loh vangin a rawn hawl thla lo va. Zira nen an inphur a. Keiin ruckshack akin ka zui. Lak nual kan tum ve deuh a. Kimi hian a in ve zeuh zeuh a, Bteii leh Nenei chu a rimah pawh an uak nghal..

Kan duh ang zat lain phur zetin kan tlan haw leh a. Hunthar lei tlahniam kan tlan lai khuan Truck bang sang a rawn tlan thla boh boh a. Ka hel a, ka tlan chak miah lo. Kawngsir atanga rul rawn tleng chhuak zawk chuan ka balance a tibuai ta tlat a, ka che zawk a, ka tleng ta mai a. Truck bangsang hnunga lo tlan Bolero chu ka va ngheng dawt mai. Rak tuar thawm ka hriat rualin a thim ta vek mai….

(Indiet hi a ho. Khawvelah hian mi cher aiin tlema thau deuh hi an itawm zawk 🥱😒