Vanneihsangi 16

VANNEIHSANGI (16)

Ziaktu: Toni Râlte

(Adds kha aw) 

Ka nu chuan, Ka putea a ni a call ni. A nuta , a nau mipa pute Siama a ni a call! A mak ka va ti em. A ring ral ral a. Nenei leh Mami pawn an lo ngaichang ran mai a. Kei lah ka lungphu a rang nasa. 

"Hello," putea aw thum dût ri chu thinphu dep depin kan ngaithla a. Ka nu chuan, "Hmana i buaina kha chingfel thei dawnin ka inhria. Mate" a ti dam diai a.

"Eng kha maw?" Putea chuan a ti sup a.

"In nupa in inthen hialna chhan kha mawle" ka nuin a tih rual chuan, Putea chuan,"Maw?! Tak tak em?" A ti hlut a. 

"Aw.. I lo inrinhlelh rukna kha a thleng dik ta niin ka hria" ka nu chuan zaidawh zet hian a ti a. Nenei chu ka va melh a, a pháwkin a hlauhthawn hmel kher mai. A bulah ka va thu ta a. Apuia leh Gaby te pawh kan boruak dik lo chu an hrethiam ve nge, an ngawi dák mai. 

"Nakinah chiang zawkin kan inbe dawn nia. Amah pawh hi zawh duh ka ngah rih a. Ngaihthain lo awm phawt rawh aw" ka nu in a tih leh hnuah phone chu a dah ta a. Kan thaw sang sang ni maiin ka hria. Ka nu chuan kei leh Nenei chu min melh ralh ralh a.

"Nene, kum engzat chiah maw i nih?" A ti a. 

Nenei chuan,"Kum 20 ka ni tawh" a lo ti sap a. 

"Engtik thlaah nge i pian?" Ka nu chuan a ti leh a.

"June ni 13-ah" a ti ban charh a. Nuam lo a tih hmel hle. 

Nelawm taka nuiin ka nu chuan,"Ka nau chiah nen hian danglamna innei miah lo. A ruka kan unau buaina a ni thin a. I nu khan thil zawng zawng a hrilh che em ka hre lo va, mahse, ka thinlungin dik nia a hriat hi ka zawh dawn. Nene, ka nau hi i pa a nih ka beisei tlat a ni. Thawnthu sei tak a ni bawk" a ti ta duah a. Ka nu chu a phur nge a lungngai ka hrethiam lo. Kei chu ka thluak a mang. Ka buai nuai nuai a, fim takin engmah ka ngaihtuah thei lo.

"Nene, ka ril a tam" Apuia tih ri kan hriat rual chuan, ka nu chuan "Awiii! Bawiha, kan lo mangnghilh daih a nih pek hi. Mami, siam vat ang. Chaw ei khamah kan sawi zawm dawn nia" a ti sawk sawk a. Chaw ei chu an siam ta sawk sawk a, Nenei pawh a che ve nghal zat. A rilru kaptu a awm tih erawh hai rual a ni lo. Kei ngei pawn mawlhtu ka nei tlat a ni. Chaw chu kan ei ta a, Apuia leh Gaby pawh anmahniin an ei ve a. Gaby tak chu Nenei'n a la barh zauh zauh. "Nu,putea fa a nih ngawt dan ka ngaihtuah thiam lo" ka ti ta hlawl a. Min rawn melh zauh a, "Inhriat ve loh hian buaina tam tak kan nei tawh alawm. Nenei pian lai velte chuan nang chu kum 4 chauh alawm i la nih. I putea pawh khatih lai kha chuan a la naupang. Nenei chanchin min rawn hrilh atang khan eng emaw ka thinlunga riak reng a awm reng a ni. A chhan ka hre mai si lo va" a ti siam siam a. Ka nu hi chu nu thinchhia leh vin ve deuh hlak hlak thin a ni naa, mi ngainat a hlawh viau tho mai. A thil sawi duhdan pawh zep nei tit tet chi a ni vak lo. Kan ei kham a, ka puar viau naa, Nenei ei tlem lutuk chuan min kap deuh. A tan ei luih a harsa rih viau aniang e. Apuia erawh ka rin ai daihin a ei hnem a, a lawmawm hle. Thleng chu Nenei'n a seng fel zung zung a, Mami'n ,"lo thu mai mai rawh" a tih pawh chuan a awl duh bik lo. Mami nen hian an kum a inrual chiah a, mahse, a thlain Mami a naupang zawk. Mami'n thleng a sil lai chuan keini kan lo thu thap a. Ngaihchan eng emawni kan nei run hlawm mai. Ka nu kan ngaichang ru thap ni berin ka hria. 

Apuia leh Gaby chuan Nenei phone-ah video an en a. An tlei viau. Putea'n ka nu chu a lo call a, a za zek zek a ni ngei ang. Ka nu erawh chuan,"Lo dawhthei rawh ka tih kha. Amah pawh a thawng ve rih a, hmanhmawh khu ruaia chinfel chi a ni hleinem " a ti dam thliam a. Putea pawn a dah ve mai. Pute Siama hi ka nu nau chiah niin, fa pahnih a nei tawh a. Kan kawmthlang lawkah an chhungkuain an khawsa ve mek a ni. Pa hmeltha leh lian tak, an sawi hmangin an tlangval lai chuan Hualtu tlangval hmeltha leh tlawmngaia sawi a ni thin a niawm e. Lehkha pawh an hunlaia PU thleng kha a zir ve nghe nghe a, Nupui a ruk vangin a bang ta a. Mahse, a nupui ruk chu ka puten an duh lo aniang, an innei ta lo va. Lehkha pawh zir zawm ta lovin ram hna a thawk chho a, tichuan, tuna a nupui hi neiin tihian an khawsa chho ta zel a ni. Ka nute unau zinga ka nel leh ngainat ber a ni a, a hnung zuiin ramah pawh ka kal ve fo mai. A ramvachal ve riau a, tin, inchhangbung tih takah ka nu nen pawh hian an inunau bik a, engkimah ka u ka u a ni vek zel a ni. 

"Nu, Sawi tawh la" Mami thleng sil zo a rawn thut rual chuan ka ti nghal táwng a. A aw a thian kharh a. 

"Nene, i nuin ka sawi tur hi a hrilh lo che a nih pawhin i nu kha dem suh aw. Keini chuan kan hrethiam em em a nia" a ti te te a.

Nenei erawh a ngawi reng thung. Ka nu chuan hetiang hian ka putea te chanchin chu a sawi ta a. 

"Siama'n PU a zir lai khan kum laklawhah nupui a rawn ru thut a. A rawn ru ti ila, a luhkhung a ni zawk mah awm e. Chanchin kan hriat chuan ka pa ten an zuk ngaihven ta vat a. Dik tak chuan lehkha a thiam thei a, ka nu leh pate innghahna pawh kha a ni ve a. Chutia naupangtea nupui a han luhkhung ringawt chu ka pa ngaihdan a ni vak lo. An zuk ngaihven an rawn haw chuan Siama chu an rawn hruai haw nghal a. Kan zilh ta hrep hlawm a. Chutah chuan a nia a nupui luhkhung chu KS a ni tih ka pain a sawi ni. Khatih hun lai khan KS chu kan hmuh dan tunlai aiin a la hniam a, hurherh vang hrim hrima inzuar nia ngaihna chen kha kan la nei a ni. Ka pa hi a thinrim khawp a, ka ni te leh ka patea te ho pawh an sa viau. Sawi tawh angin Siama kha kan innghahna a ni ve miau si a. Chutihlai chuan Bawiha hian tawng a thiam viau tawh. Siama chuan, " Ka hmangaih alawm. Min neihtir ula, Zirna chu ka tan tha leh mai ang" tiin ka pa te a ngen a. An thin a rim telh telh thung si. Bakah a bialnu kha amah aiin a upa zawk bawk si, chuta chhapah mahni inzuar a lo nihnaah ka nu phei chu a rilru na a tap a tap nghe nghe. Kan khua a la te si a, khawtlangin an hriat huna an zah dan tur te ngaihtuahin Siama chu Aizawla a chhuk pawh an phalsak ta lo va. A lung a lengin zu te hial a in chhoh phah ta a. Zan khat a leng chu haw loin Aizawlah a lo tlang daih mai a lo nia! A bialnu bawk chu a zuk luhkhung leh ta a ni.Ka pa thin a rim em em mai a. Amah ngei zuk kal lehin a bialnu inah chuan an zuk inbakkaih viau a niawm e. A bialnu pawh chu biain, "Engtikahmah in innei dawn chuang lo, min hrethiam la, lo hnar hram teh" tiin a ngen ta a. A bialnu kha mahni inzuar mahnise, hmeichhe pangngai tak mai a lo ni a. Siama chu tha taka hrilhin a lo hnar ta a. A in luahna te pawh a sawn ta hial a niawm e. Chu hmeichhia chu Nene, i nu a ni. Zep nei loin ka'n sawi law law ang e. Bawiha'n i chungchang thu min hrilh leh i nu hming ka hriat takah khan min kap tlat a. Bawiha han zawh chik vak kha nuam ka ti chiah si lo va, nangmah ngei hmuh chea biak che hi a chak ta em em a ni. Tihian ka hmu ta che a, ka ngaihbel vang lam ni hran loin i hmelhmaiah hian Siama naupan lai hmel a lang tlat a ni. Chuan kan sawi zel ang e. Siama chuan Sangi awmna a hriat tak loah chuan han bawhzui vak ngaihna a hre ta lo va. Mahse, zirna erawh a chhunzawm duh ta lo a ni. Ka pa nen hian kum khat dawn chu pangngai takin an inbe hleithei lo. Ka pa kha zep nak emaw pa chimlim leh khirh ve tak a ni bawk nen, Kei a u te zinga a ngainat ber hi Siama chuan min belbulin engkim min hrilh thin. An inruk ve zuai atanga thla 6 a ral leh takah khan Aizawlah lehkha pawimawh tifelin a zuk kal a. Chutah chuan Sangi inentir haw lam a hmu ta hlauh mai! Sangi chu a lo rai reng chu niin, Siama chuan a zui ru ta a. Mi tlem deuhnaah va nangchingin Sangi pawn mak a ti hle a niawm e. 

"Ka fa tiraw?" Tia a zawh chuan, "Aih, tu fa mah a ni lo. Min dawrtu tu emaw ber fa a ni " a lo ti ta tlat mai a. Mahse, Siama chuan awih harsa a ti khawp mai. Sangi chuan nasa taka a hnar avangin a inah em chuan a zui lut ta lo va. Mahse, a in awmna a hriat tawh vangin hmalak erawh a tum tih ka bulah a sawi. Sangi dul puar dan enin leh an inruk hun lai ngaihtuah khan a fa a nih theihna lai kha a awm miau si a. Kan khuaah a rawn haw leh phawt a, ka pa te bulah Sangi'n a fa a pai thu a sawi ngial a. Mahse, ka pa chuan a hnial fithla thak a ni. Siama thinrim chu in atanga chhuakin kan bulah rei tak chhung a khawsa nghe nghe. Kan bula a awm lai rengin Sangi zuk hmua ngaihven leh turin i pa nen an zuk kal ta a. Mahse, Sangi chuan pasal a lo nei tawh si! Lunghnur leh rilru na takin a rawn haw a. Khati chung khan Sangi a demna thu kam khat mah a chhak chhuak ngai lo. A hmangaih takzet tih hi ka chiang. Sangi berin pasal a neih takah khan hun a kal a, nupui a nei ve ta mai zawk a ni. Tichuan, Bawiha, i pu khan a thih hma khan i putea bulah chuan, "Ni e, Sangi naupai kha kei pawn i fa ngei a nih ka ring e. I hmangaih em em chungin ka hnarsak che a. Amah Sangi chungah ngei pawh rawng takin ka che a. Ka inchhir takzet a ni. Khawngaihin i fa a nih i ring takzet a nih chuan lo zawng chhuak la, i hnam hming hi i puttir ngei ngei dawn nia" a ti a. Kha khan Siama thinlung mu hnu kai tho lehin Sangi zwn chhuah leh tumin hma a la a. Mahse, Sangi te awmna reng reng a hre thei ta si lo. Tikhian rilru inkháp reng rengin a khawsa ta a ni. Nene, I nu khan hetiang lam thu hi vawikhat tal a sawi em?" Tiin Nenei a melh a. Nenei erawh a lo phu deuh zawk. A lo ngaithla tui deuh a ni maithei ni. 

"A..ih, aih, hrilh ngai miah lo" a ti bah nak a. 

"Ka ring reng a ni. I nu kha a rilru a na ve ngawt ang. Siama kha a hmangaih ve tho si a, Ka pa vang vek a ni. Lehlamah Nene, ka pa pawh hi i tan chuan demawm viau mah se; a hun lai kha chuan a khawngaihthlakin a demawm em em hran loh asin..tikhan ka sawi tur chu ka sawi zo tawh e. Siama chuan hmu ve che se a thinlung takin a pawm thlap ngei ang che" ka nu chuan a ti ta dap dap a. Ka lo thaw hawk ringawt. Engtin nge chutiang chu a nih theih le?! Nenei chu ka cousin a ni tihna a ni dawn a! Ka duh lo. Ni e, chhungkhat nih ka duh lo. Ka pain a hriat chuan kan hmalam hun a thim thei, a chhan chu ka pu ang chiaha puithuna ngai thutak a ni ve a. Ka pu phei chuan hria se a remti dawn lo hulhual. "Chhungkhat inneih chu an fateah piansualna a awm thin" tih thu changvawn pha zing ami kha a ni miau a. Nenei nen kan hmalam hun a thim dawn ai chuan mi hrang hlak nih ka duh zawk. 

"A nih chuan engtin nge ka awm ang. ?" Nenei chuan a ti hlawl a. A hrilhhai a, a hamhaih tih ka hria. A dik ang, a thawng lo thei bik lo. 

Ka nu chuan, "Ka hre lo. Siama hi chuan hria che se, inhmu ula ka duh. A rilru kap tlattu kha i ni miau si a. Mahse, tlangzarh induh lo a nih pawhin kei chuan ka ka ka chip thei" a ti nghet charh a. Ka ngaihtuahna a hria a ni maithei.

"Mahse, nu, mi dang fa a ni ve thei tho asin. Putea nen hmehbel i tum nghal ngawt a" ka la ti hram a.

"Aih, ka thinlung hian min hrilh ka tih chu! A mak khawp mai. Nene, i nu boral chu pawi ka va ti tehlul em..ani chu la dam se, thudik ka sawi tih pawh inhre mai tur" a ti zawi raih a. Ka nu hi chuan dawt muhlum ringawt a sawi chu ka ring lo.

" Ka pa chu i nau maw lo ni?" Nenei chuan ka nu a melh a. A mitmeng chu hriatthiam a har. Pawi a ti nge a phur nge pawh ka hrethiam lo. 

Ka nu chuan, "Tihian ti ang u aw. Siama hi naktukah lo chhuk se, medical test te innei ang a. DNA te pawh a tul chuan intest ang a. Nene, 'ka pa' tia koh tur nei lo ringawta i hmalam hun i hman tawh loh ringawt pawh a tha asin. Eng nge i ngaihdan?" A ti ta a. Chu aia rawtna tha chu a hre bik lo nge, "Ni e, tha i tih ang ang kha a ni mai. U Tri, min va thlah tawh la, Gabby hi a mut a chhuak tan tlat" tiin a nau chu a melh zauh a. Bakah amaha awma inngaihtuah a duh ve a nih ka ring. Kum naupangte ni chunga a hun tawn hrang hrangte amah thawng dawt thei thil an ni vek a, a chhel hi ka ti thlawt. 

"Nene, hrehawm ti suh aw. Tupawh nila, ka ngaina che. Bawiha nen in inkar pawh a danglam phah lo turah ngai ang" ka nu chuan a ti zui lawm lawm a. Mittui ting deuh pam hian,"Ka lawm e. Kei pawn ka hmuh che khan Anu ka hrechhuak nghal. Ka pa tal hi hriat chhuah ve ka chak thin a, ka rin loh lutuk thil a thlen vang hian min thawng ve deuh a ni. Kan va haw phawt ang e" a ti dat dat a. A tawngkamte hi a puitlingin a fel át reuh thin a. 

Kan chhuak ta a, a vawt sûk mai. Gabby chu a pawm a, Apuia chu ka hmaah a kal thung. Kan inphur phei leh ta phawt a. In kan thlen chuan, "Eng nge i ngaihtuah?" Ka ti a. 

"Ka hrethiam lo, engmah ka ngaihtuah thiam lo. Anu khan ti nge engmah min lo hrilh loh tihah ka buai. Ti nge a zep kher le? A pawimawh tehlul nen" a ti mial mial a. A dik ang. Ti nge Nu Sangi khan a fanu chu a pa tu nge tih tal a hrilh mai loh le? Falak nihtir a duh chhanah hian a phenah eng emaw a awm tihna a ni thei ang em? Heng zawhna chhang thei tur chu nu Sangi chauh a ni. Ani lah koh eih phak a ni tawh bawk si lo. 

"Ka haw dawn nge ka leng dawn" ka ti a. 

"Pawi i tih loh chuan, haw mai la. I nute pawn biak che an duh ang. Min ngaihtuah suh aw ka tha a nia. " a ti sap a. Ka nawrlui duh bik lo. Ka fawp zauh a, kan inmang tha ta a. 

Ina ka va luh leh chuan ka nu chuan putea chu a lo be mek a. Ka thaw a pik zual. Ka pa te chhung lamin hre ta se, an khirh si. Bakah ka nute lam pawn kei leh ani inkawp zel chu an remti thei dawn em ni? Nenei'n a pa dik tak hrechhuak se ka tih ve ngawih ngawih laiin kan chhungkhat hnai em em a nih ka ring phak ngai lo. Mang lamah pawh ka la mangphan pha ngai lo. Ka nu chuan, "I putea chu a lo chhuk dawn e. A thawng ve khawp mai" a ti a. 

"Nu, ka pa la hrilh suh aw" ka ti ta chawt a. 

"Aw, engmah ka sawi lo vang. Kei pawh ka rilru a buai ve khawp mai. I piteiin a hriat hunah engtin tak dawngsawng ang maw?" A ti ve vawng vawng a. Putea nupui Pite Zuali hi mi fel tak, ka nute pawh en mi hrang lo tak a ni a. Kei pawh min duat ve hle. An sawi danin putea nen hian inngaihzawnna em em pawh nei loin chhungkhat ten an sawiremsak an ti mai a. Mahse, Piteii hian putea chu a hmangaihin a chawimawi khawp chuan ka hria. 

Ka mu ta daih a. Muthilh erawh a har duh khawp mai. Hmalam hun ka ngaihtuah chuan a thim mup ni maiin ka hria. Nenei tak pawh a va ngaihtuahawm tak. A muhil bikin ka ring hauh lo mai. 

A tukah putea chu a rawn chhuk ta a. In chhunga a rawn lut chu ka lo melh vang vang a, Nenei pa ni ta se, ding dun se an inang ve deuh dawn a nih hi ka ti rilru a. Kimi pawn, "Unau inang ,nupa chu an inang thin an tih kha" tiin Nenei nen min fiam tawh tak kha mawle. Cousin na na na chu kan lo inang deuh tihna em ni ang? Tin, thil ka hrechhuak bawk. Nu Sangi'n kan khaw hming a hriat khan, ka chhungte hming min zawh tak kha mawle. Mahse, khami hnu khan ngaihbel theih tur engmah ka hre chuang lo. Ka chhui lut thiam tawh lo. Amah hi la dam se engkim a fel mai tur. 

Ka nu chuan a lo dawngsawng vat a. Nenei nen kan inkar a lo hre sa vek tawh bawk a, "Bawiha, pawi i ti em?" A ti ta a.

"Ka hrethiam lo. A pa diktak hria se tih ka duh thin a. Mahse, nang kher chu ka beisei lo che" ka ti hmiah. Ka sawi dik lo hran lo. 

"Nia, a dik ang. Nunhlui sawi chhuah fo hi a tul ber si lo va, a ruka min mawlh rengtu mahnise, ka u bulah bak ka sawi ngai lo. A thawng ang che u tih ka ring a ni. Mahse, bawiha, ka fa a ni ngei a nih chuan ka awmpui duh dawn a.." A ti dat a, ka lo ngawi reng. "Engtin nge in inkar hi ni ang tihah erawh ka u nen kan buai thung" a tih zawm a. 

"Awmpui kha a duh kher lo ve thei. Lehlamah a naute pahnih mi hrang fa a enkawl a. Tihhautak che u a duh lo vang. Pute, engpawhnise ,neih ka duh. I fanu tak tak pawh nise ka pawisa lo. Ka nei dawn" ka ti ta mawlh mawlh a. Kan inkawmngeih tho bawk a, chutin a bulah sawi ngam loh ka nei em em hran lo. 

"Ni e, engpawhnise, pafa kan ni takzet a nih pawhin in inkar hi chu a khik kher ka remti chuang lo. Aa..ka hrethiam lo, engmah. Thu chiang hre phawt mai ang u" a ti hluai a. 

Nenei pawh ka va bia a, ka nu leh ani leh ka putea te nen vawiinah damdawiinah chuan kan va kal dawn a ni. Mami'n Apuia te unau a lo awmpui thung ang. Nenei te chu ka va lam a. A mit bui lák danah nizanah a tap leh tih ka hre mai. Aw..a dinhmun khirh leh harsa lutuk hi chhawk zangkhai theih ka va chak tak em..in kan luh dawn chuan ka banah a rawn vuan chat a. Mitmeng ti zet hian, "U Tri, ka zám eee" a ti sap a. A beksam huihkiansak pahin, "A tha vek ang" ka ti sup a. Ka luhpui ta a. Putea chu thutthlengah lo thuin a phone a lo hmet mek a. Kan thawm a hriat rualin a rawn hawi nghal zawk. A ding hluai mai. Nenei chu a mitah tak melhin khaw dang reng reng a hawisawn thei ta lo. Kan lo melh thap ringawt. Nenei pawn putea chu a melh ve kal a, thinrim hmel erawh a pu lo. Lungchhe hmel a pu mah zawk. Putea chu mipa zawk a ni bawk a, a harh chhuak hmasa zawkah tangin, "Nene" a ti tham tuak a. A aw chu a chhuak thei lo lek lekin ka hria. 

Nenei chuan a chil a lem khawlh a, "Aw..ih,." A ti a. Han sawi mai tur a hre lo niin ka hria. Ka nu chuan an boruak chu hrethiamin, "Ka va inthlak zuai ang a, kan kal thei a ni mai aw. Lo thu lawk r'u " a ti sawk sawk a. Kei pawh ka inthlak ve zuai. Putea chuan, "I nu thlalak ka hmu thei ang em?" A tih ri chu ka hria a. Ka nu kha chuan Nu Sangi kha a la hmu ve lo hrim hrim a, Nenei kha a zawt buangbar lo kha a nia. Nenei chuan ,"Hei hi a nia" tiin a phone a pe niawm tak a ni. Pindan atanga ka va chhuah chuan, putea chuan Nenei phone chu a lo bih vang vang a. Thawk a la hawk bawk. Nenei chu melh lehin ,"Ka fa i ni emaw ni lo emaw Zonunsangi fa i nih hrim hrim chuan ka tan i hlu hle a ni" a ti dam thlup a. Nenei erawh a ngawi tlat! Sawi tur a haihchham a ni tih ka hrethiam.

"Ka u, Sangi ngei chu a ni. Ti nge a boralte chu ka hriat ve loh le? Vawikhat tal a hmel hmuh leha chibai leh tal pawh ka chak ngawih ngawih asin..nene, i nu kha ka thinlungah a thi ngai reng reng lo asin.." tiin a kun ta ngawih ngawih a. Nenei pawh a mittui a tling pam mai. 

Ka u chuan,"Ka nau, insum rih rawh. Ka inpeih e. I kal phawt ang u. Engkim hi finfiah hrim hrim a tha e" a ti zangkhai vah a. Putea erawh chuan, "Va test pawh a tul tawh kher em ni? Nenei hi ka fa a ni lo tia doctor ten min hrilh chuan ka beiseina nung reng hi a ral ang a, hman ang khan tawrhna ka hmachhawn leh ngei ang" a ti ta mai a! Ka nu mangang hmel ka va hmu thei. 

"Chutiang ringawt a ni lo..Mama, Nenei pawh i tihrilhhai alawm. Kal phawt ang u. " tiin putea chu a zuk kuah tho a. Putea lungchhe hmel hi ka hmu khát viau asin mawle. Kan kal dawn chuan Gabby chuan a u chu a ngen titih a, mahse, Mami'n kan thenawmte naute tana a leisak teddy bear a pe vat a, a tap a bang nghal hmiah. Apuia erawh Nenei'n a phone a hnutchhiah thung a, a tlei viau. Ngaihngam takin kan chhuahsan ta a. Putea leh ka nu an inphur a, keini pahnih. Zám a va awl duh tak em. Mizoramah pawh DNA test result rang takin kan hre thei tawh a, a zia viau mai. Vawiinah ngei Vanneihsangi nen kan hmalam hun hril thui thei tak fiahna kan hmachhawn dawn chu a nia. Lungphu a rang duh ngei mai. Kan thleng a, Doctor hmu turin kan vaiin kan lut ta dial a. Mak tiin min lo en duh angreng hle. Ka nu chuan thil awmzia chu a sawi malh malh a. A kip a kawia sawi chi a ni lem lo bawk a, sawi tur chin a hre khawp mai. Doctor pawh a bu ve nghut nghut e. Ka nu nen chuan pawnah kan chhuak a, kan lo nghak ta a. An blood group chu A+ ve ve niin, a inmil phawt. 

DNA tak erawh nghah hlek a ngai a. Khawi hmun danga kal chuang lovin kan nghak ngat ngat mai. Kan nghah chhungin putea chuan Nenei chu zawhna a zawt mawlh mawlh reng a. 

Nikhua ka hriat theih tirh ata pu mawia kha ka pa chu a ni mai a. A fa ka ni lo tih erawh kum 9 vel ka nihin ka hre ta a. A zu ruih laia a sawi chhuah vang a ni. Ka nu hi vawi tam ka zawt thin. Mahse, chhanna min pe thei ngai lo. Pu Mawia kha ka pa ang tak taka pawm ka tum a. Mahse, ani khan min pawm thei si lo va, ka naute pawh hi kei chuan ka hmangaih em em , Pu Mawia fate ni mahse, mahse, ka nauten min ngaina te kha a lawm lo thin. Ka theihtawp ka chhuah a, mahse, a mit ka tlung zo ngai lo. Ka nu kha hmangaih hle lo ila chuan tlan bo daihte kha ka chak thin" a ti sep sep a. Ka nu chuan a kut a vawnsak vat, a lainat tih a lang reng mai. Putea erawh hrehawm ti ngawih ngawih hmel a pu a, a nunhlui a ngaihtuah kir ni pawhin a lang. 

"I nu khan duhthlan tur dang a nei bik lo em a tin ni. Kei zawk hi dem tur ka ni, ka lo zawng chhuak har deuh a" tih bak a sawi thei lo. Mawng kham urha kan thut hnuah Doctor chuan min ko lutin kan vaiin kan lut ta dial a. A tarmit chu lathlain, "I fanu ngei a ni e" tiin Putea chu a melh ta a. Putea hmel ka va en chuan hlimna nasa tak ka va hmu. Nenei pawh ka melh vat a, Doctor chu melh ranin a hmui a pet fan fan mai. Putea chu a harh zawk nge ni, Nenei chu a pawm thlawp a, "Ka fanu, bawihte, .." A ti tuau a. A lung a chhe hle tih a lang. Ka nu pawn a mittui a hru sawk sawk mai. Kei erawh ka ding zum zút ringawt. Nenei chu a tap khur ngat ngat a, mittui luang zawih zawih chungin, "Pa, ka pa, Anu ka va ngai em.." Tih chiah a sawi thei..an pafa inpawm lai chu doctor ho chuan kan thlir thap mai. Nenei chu ka pianpui unau ni lo mah se; inlaichinna nei kan ni ta. Mahse, engtikahmah ka unaunu angin ka en thei ngai lo vang. 

Tlaiah pawh an unauin chaw an rawn ei leh ta mai. Ka nu rawtna vek a nia. A tul ve reng reng bawk nen. Kei erawh ka ngawi ngul reng a, sawi tur a váng ka ti. Zira ten hre ve ta se mak an va ti dawn tak em..ka la hrilh lo thung. 

Ka nu chuan, "Sawma, engtia rorel chi nge maw ni dawn le. Bawiha nen lah heti hi an ni sia" a ti ta a. Ka lo bengkhawn viau mai.

"Ni ngawt mai. Rorel dan tur hriatthiam a harsa ka ti. Bawiha pa hian a hriat chuan an inzawmna hi a hnawl ngei dawn a, Lehlamah ka khawngaih bawk si che u a. Mahse, ka fanu a ni tih hrereng chunga ka tupa nupui anga en chu harsa ka ti khawp ang" a ti ta duah a. 

"Nene, inthlahrung miah loin i ngaihdan han sawi ve teh. Min vengthawng miah lo la" ka nu chuan a ti a. Nenei chu a thu tha a. Min rawn melh zauhin, "Pa ka awt em em thin a. Tunah pa ka nei tih leh ka pa chu tu nge tih ka hre ta a. Ka pain min hrethiam hram se, ka pa a nih vanga U tria nen kan inkar a tawp dawn ai chuan, pa nei lo va awm kha ka thlang zawk" a ti ta a. A inthlahrung em em tih erawh a lang thei. 

Putea pawh a bu nghut tho. Ka nu chuan min rawn en a, a mitmengin zawhna min zawt bawk.

Ka inhumruh a. "Nenei hi ka farnu ang chuan engtikah mah ka en thei dawn lo. Chuvang chuan pute, i fanu a ni tih hi he laia awmte hian hria ila a tawk mai lo em ni? Ka nupui a nih hunah te chuan i duhtawkin i duatin i fanu a nihna pawh lantir la, tuman an ringhlel lo vang. Ka pu leh ka pa ten an hriat chuan, Nenei nu Nu sangi nen an pawhthen ang che u khan min pawt then ve dawn asin. Chu chu i fanu chunga thleng turin i duh em ni?" Ka ti ta mawlh mawlh a. Ka hah vek thei. 

Putea chuan, "Aw a dik e. Bawiha i va tidik em..ka hma ka lo sial lu deuh a ni. Ka hmangaih ber Sangi nen kan ril arah hi pumbilh ka lo tum a, ka hmangaih em vang zawk a nia. Tha intih ang chu ka pawm e. Mahse, Nene, i pa ka ni tih erawh min theihnghilhsak lo hram rawh aw" tiin Ngenngawl zetin a fanu chu a melh a. Nenei chuan a pa kut chu vuanin, "Pa, ka pawm thlap che. Ka pa i ni hi ka lawm lutuk, i fanu ka ni a, chu chu a danglam dawn lo.." A ti nghet charh a. Boruak a zangkhai ta deuh e. Mami pawh ka nuin ngun taka hrilhfiahin intiamkamna a neihtir thlap mai. Kan panga chuan thurûk zep hlen tur kan kawl ta e. Zep hlen thei tak ang maw..

Putea ngenna nasa tak vangin zan pawh chu an unau chuan kan inah an riak ve a. Sitting room chhuatah an unau za leh ka putea te chu an mu ho a ni. Rei tak an pafaa an titi chu ka hre thei. Sawi tur an ngah ve ngawtin ka ring. Nenei pawn a nu hnam hming chhawm tawh loin, Khawlhring hnam a chhawm ve thei ta. Tuman , "Falak" tiin an cheksawlh leh tawh ngai lo vang. Mahse, a pa hming erawh a sawi a rem lo thung dawn a. He inlaichinna mak leh kal kual dan hi Pathian remruat te pawh a ni maithei asin. Ka farnu Nenei enkawl tur hian mipa angin ka hmangaih pawh a ni thei. A tira ka lo huphurh ruk leh hmabak thim vek tura ka ngaihna te pawh chu a dal tial tial a. Thurûk kawl chunga hmalam pan chu a harsa ang em tih pawh ka ngaihtuah thiam chuang lo. Ka awm ve tawp mai.

A tawi zawngin ka nu te leh putea te chu an haw ta a. Nenei te pawh an in lamah an phei tawh a. Kan in chu a ruak hiai mai. Khua a har duh ruk ruk ngei mai. Tehlimi te lah an haw phei tawh si. Zanah chuan hma tawkah Nenei te inah ka phei ta a. Chaw an lo ei kham ve chiah a. Gabby a lo tlei lo viau lehnghal. Chhuatah a lo nuar a. 

"Ti nge a?" Ka tih chuan, "A u in a hau anih pek kha. A u phone khawih a tibuai reng a. " a lo ti mai a. 

"Gaby, hawh le, lo kal teh. Hei, eng nge ka neih hi?" Tiin milky bar ka lei pheisak chu ka keng lang va a. A tap bang nghal hmak. Milky bar hi a duh khawp a, ka hre ve tawh viau. Min rawn pan nghal nalh a, ka mal chungah a thu tharh mai. Min mi hrang en thei tawh bik lo niin ka hria. Kei lahin ka fa ang maiin ka en titih tawh bawk. Apuia erawh Atea awm loh a chinah a zia a zawi zual a, a tawng ngai mang lo. A u rilru pawh hi a tihrehawm thin khawp mai. A u phone hi tihian a khawih reng ringawt mai a ni. A u pawn a ngaihtuah viau naa han tih vak ngaihna a hre bawk si lo. Nenei chuan ka suit leisak kha a ha a, inhmeh tak a ni. Tun hnaiah vitamin ka leisak hi a ngeih deuh nge, a mum ve káng mai a. A duhawm zual sawt mai. 

Apuia phone khawih lai chu rawn dak chhuakin, "Au Tri, nizanah Atea leh anu ka hmu asin" a ti hlawl mai. Nenei pawh a hawi phawk hle.

"A ni maw?! Eng nge an lo sawi?" Ka ti vat a. A ngawi rauh rauh a, "Ih, Anu chuan lehkha tha takin zir rawh a tia. Chuan, Atea chuan 'Nenei leh gabyy ka ngai" a lo tia. Va pan ka tum laiin an inkai a, an kal daih a" a ti a. Nenei a ngui rawih mai.

Zawi sap hian, "Nilengin a nguai ka ti reng a" a ti a. Apuia hi a la ngaihtuahawm dawn tak takin ka hria. 

"Anu leh Atea te chu hmun nuam deuhah an awm tawh alawm. Nang chuan tha takin lehkha i zir ang a, Nenei thu i awih bawk ang a. Inla inhmu leh em em ang" tiin ka han hnem ve ngial a. Phone a khawih zawm ta daih a. Gabby pawh a tho tharh a, Mami pek a teddy bear chu Nenei a inpuaktir a, a awi hlah hlah mai. Lungawi zetin kan thlir dun a. 

"Tihian kan fate an ni mai" ka tih chuan min rawn melh kâwk a. Inthlahrung hmel ka va hmu thei. 

"Dik tak chuan ka zahin ka khawngaih thin che. Heti teh hrepa buaipui ngai bialnu i nei hi" a ti sap a. 

"Tawngkam hi i thiam thei e" ka ti hluk a. 

"Ka ti tak tak alawm..i thiante ka ngaihtuah a, an ni chu an buaipui ngai loin an bialnu te zawkin an buaipui a, U kimi ngat phei chuan UZira a tilawm thiam si. Kei chu ka zei ve bawk si lo. Ka khawngaih tlat zel che" a ti malh malh a. A mal chunga ka bawp hlang chungin,"A ho e a. Hmeichhia chu duat tura siam alawm in nih. Kan inneih hunah min la duat dawn nia" ka ti ringawt a. 

"E..chuan, naktukah bazar ka duh ve sia, Gaby lah hruai chi a ni si lo va. Ka rilru a buai e" a ti hluai a. 

"Ka lo awm mai dawn mi? Nge kalpui i ngai zawk" ka ti a. 

"Apuia hi ka kalpui ang ka tia. Gaby chu i awm thiam awm si lo va" nui deuh chungin a ti a. Ka khi sak, nau han awm vel chu ka zei tehchiam dawn lo tih chu ka hria. Mahse, a tul a nihte chuan ka huphurh chuang lo va. 

"A tih ve theih mai ang. Awm vak pawh a ngaih loh hi. " tiin a nau awi chu ka va thlek a. 

"Nia a fel ve tawh lutuk, kan rei chuang lo ang a. Mi dang kuta dah daih kha ka thla a muang leh dawn si lo va" a ti a. A inthlahrung lutuk chuan mi run mah zawk. "khati vaka inthlahrun a ngai lo. Vanneihsang" ka ti nghut a. A hming puma ka koh vawikhatna..min rawn melh haw a, "Hawrwppuia min koh kher a ngai lo, Laltanpui, lukir leh lulianpa" a ti hlak a. A banah chelhin ka lamah ka kuai thlu hnawk a. A hmui ka fawp zeuh.A naute chuan Min hmu lo turah ngai ang. 

"I sam hi met hlek rawh aw, a buk mah mah tawh" tih pahin ka sam chu a rawn tham a.

"Sam met a awm lo, Lu met tih tur" ka lo ti hluk a. 

"A dik reng e a. Sam alawm an tan" a ti nghat a.

"Mët hi tan tihna a ni hleinem. Lawk, mizo tawng ka'n zirtir lawk ang che. Lo te pawh an vat thin, an vah leh an kih thluk chu thing leh mau te an ni daih. Mët chu a tihnawktu a chhehvela awm tifai tihna a nia. Sam i met thei lo, samah engmah meh tur a awm lo, Lu-ah chuan sam a to a, lu-a sam to buk tawh kha i hlep ang a, lu chu a lo fai dawn tihna.. Hrethiams ?" Ka ti kual a. A ner nak. 

"Tak taka mizo tawng hi ka thiam vak lo. MA val nge nge chu, ngaihzawn man i awm hle mai" a ti kher chu ka ngei vel lutuk a, a ban ka hmer vak. A aiah that a. A nui zui ar ar bawk. A nuih zawnga a biangsum khuar kalh pawh ka hmu chiang leh thei ta. Lalduhawm leh!😍

Dar 9 a rik meuh chuan a naute chu an muhil tawh a. Apuia phei chu a hnar sûk sûk mai. 

"In chungte khum lah chu kan la thla si lo va ,khaw nge ka riah ve dawn." Ka ti sup a. 

"I zak lo siah" a ti hlak a..

"Mawh..thutthleng seiah hian mi kan mut dawn. Kan che na thei dawn mi?" Ka tih leh phei chuan a sen tán tán a. 

"Lulianpa, rak rak suh" a ti hlak a. Ka tho thut a, lungchim em emin ma fawp ta thut a. Min chhang let rang kher mai. Nghet zeta inkuahin thutthleng seiah chuan chep zetin kan thu a. A hnute pawh a kawr chhanah ka hrual leh nasa. Kan thaw lak pawh a rang dun leh hle. 

"Tawk.." A ti tham tiak a. A hmai tai hlar chuan a awmdan a pholang chiang hle. Min thlahlel ve a, min mamawh ve em em. Mahse, insum a duh zawk tlat si a. Kei hian he hmeichhe derthawng tak si hi ka nawrlui ngam lo chu a nih hi a..pa loh vang pawh hi a lo ni ber lo. Hmangaih te'n ngenngawl taka min melh kiau chunga ,"Insum ang" an tih sap tawh chuan, han nawrluiha han bawh ruak ruak chu a har riau! Chutih a hnekin venhim an chakawm hliah hliah zel mai. 

Dar 10-ah ka hawnsan ve thei hram. 

Kan in luahah keimah chiaha ka han mu ta chu a khawharthlak takzet a ni. Dar 11-ah ka phone dahin ka maimichhing a. Kei mut hi ka awlsam angreng a. Mahse, ka mu nghet ngai lem lo thung. Ka lo muhil siar siar tawh tihin zawitea kan room kawngka inhawng ri niawm tak chuan min kai harh ta zawk a. Ka meng phut a, sitting room light chuan room lam chu a rawn chhun eng ve ruak a. Kawngka lam chu ka zuk melh zawk a. Ka thu chhuak hlawl mai..

Ka tukhum a za chuai a, ka hmulthi a ding ur ur bawk..

Mi â dahna hmunah khan an dah a ni lawm ni? Engtin nge hetah kan room kawngka bulah min hmachhawn zawnga a din kur theih?! 20 sec chhung vel chu kan inmelh ngat ngat awm e a..Malsawmtluang, min va tithlabar reuh ve mawle. .! 

Ka phone riin min tiharh zawk. Kei hian mangchhia ka lo mang a nih pek dawn hi..Nenei'n min lo call! Dar 12: 09 chiah chiah. 

Ka la vat a.

"U Tri, lo riak rawh. Vatin..ka muhil ngam lo" thlabar awrawl tih hriat ngawih ngawih hian a rawn ti a. Ka mumang ka hrechhuak nghal bawk..

(Curent a rawn thim sia. Keimahin ka awm bawk si. Ka ziah zawm rih tawh lo mai ang. 😒