Vanneihsangi 15

VANNEIHSANGI (15)

Ziaktu: Toni Râlte

Nenei chu a khur ngawt ngawt ringawt a. Tah pawh a tap thei lo. Warden te lahin engtia han tih vak dan an hre si lo va. Ka chet a ngai. Ka thiante ka be phawt a, an rawn kal nghal ang. Nu Ruati ka be leh ta a, pawi a tih hmel takzet. "Nu Ruat, engtin nge niang le? Nenei te in luah lah a te si, veng chhungin an la hre pawp vak bawk si lo. A ruang hi khawiah nge kan nghah tak ang" ka ti a.

A ngawih vang vang hnuah,"Kan inah pawh a rem lohna a awm lo va. A nite lam hi an rawn dikdák ang em le aw" a ti ringawt a. Atea ruang an sawngbawl chhungin, Nenei chu,, "Tunah chuan tap hman i la ni lo, Atea te ni i be thei ang em? " ka ti a. 

Khur dar dar chungin, a phone min pe. Niteii tia a save chu ka call ta a. Atea boral chungchang ka hrilh rual chuan a tap nghal hawk. Nu Sangi boral khan Pu Mawia chhungte lam kha ka hmu miah lo va, an hre lo pawh a ni mahna. 

Atea ni chuan, "Nenei te tihdan dan a ni mai e. A ruang nghahna tur chu" a tih chuan, harsatna a awm lo turah ka ngai a. Nu Ruati be lehin, "In inah i nghat mai ang u hmiang. Nenei lah a biak tlak rih si lo va" ka ti ta râwih a. Tun ang em ema ka lungchhiat leh Ka mihringpui ka khawngaih hi ka tawn leh tawh pawh ka ring lo. A ruang an inchuh vang ni miah lovin an in tet leh tu khaw khain an hriat loh vang chauhin mi dang ka biaksak a nia! Mihring ve lem tan chuan a tlawmthlak bakah a na takzet a ni. Nu Ruati chuan a remti bawk a. Atea ruang an sawngbawl zawhah chuan, Ambulance-in Nu Ruati te in kan panpui ta a. Zira te an lo thleng phei tawh a, Kimi leh Bteii an rawn tel bawk. Gaby chu Kimi'n a pua a, Nenei chunga an thatna hi keimah ngeiin ka la rulhsak ang mawle. Nu Saii te pawh an rawn thleng phei ve nia! He nu hi nu sual a ni lo ka tih tawh kha. 

Nu Ruati te in chu an lo siksawi vak lo a, a lian tha tawk tho bawk nen. Anmahni chhungkua an milian bawk a, Nenei te unau hre miah lo thalai pawh an tam ngawtin ka ring. A lawmawm vek tho mai. Atea chu khumah zalh a ni ta a. Muhil ang mai a ni. Sawi hmaih hauh loh tur chu a ruang kan phurh thlak chhung zawng Apuia'n a kutah a vuan tlat mai! Hmuh hrehawm tak a ni. Hmeichhe pahnih an miss te phei kha chu an mittui an hru reng mai. Mipa mah ni ila kei pawn insum harsa ka ti takzet. Nenei erawh rilru mang kan tih ang mai hian a awm. A ngawi reng a, a en ngai a en tlawk tlawk ringawt. Duh ang thálin ka la buaipui hman bawk si lo. Ruang kilin kan thianho bakah nu Ruati, Danny leh an warden kha kan thu a. Nu Ruati a tap hawm hawm mai.

"Ate, bawihte, ka va lainat tak che em..mahse, i nu bulah i kal dawn bik a. Ka u, hei Atea a lo kal aw. Lo duat rawh aw...i ngaih em kha" tiin. Hmanni lawkah nu ber Nu Sangi chu nat lawk pawh awm hlek loin a boral a. An lusun khawharna pawh a la reh hman lo tihin a fapa naupang zawkin zan khat thilthuah a zui ve leh ta si a. Ngawi teh u, Pathian pawh hi a fair tawk lo tihna em ni ang? An mamawh ngawih ngawih laiin an nu ber, an innghahna chu a laksak a, tunah mipa naupang pawisawilo..a mak a ni. Mi hausa leh an tel lo pawha mi dang an awm theihna tur dam sen lul ka hmu a, Nenei te chunga khawdur hi a chhah bik ka ti lo thei lo. Ka nupui a la ni hauh lo, mahse, keimah chauh an innghahna ka ni ta. 

"Ate, hei hi chu a ni thei lo. Min ngaih em kha. Hei i bulah ka awm reng asin. I tider mai mai tiraw? Hetiang fiamthu chu thawh suh. 'Nene, mas hunah anu thlan chei ang u aw' te i tih kha..i thlan chei tel ve kan duh hleinem..tho vat rawh.Rammuansang.." nenei chuan Atea lu chu a sawi nawk nawk a. Tumah insum zo kan awm ta lo. Kimi leh Bteii phei chu awrawl chhuahin a ni an tah ni. Lukira pawh a kun chhal a, a muttui a hru mawlh mawlh mai. 

Hrilhhai zeta min rawn melhin, "U Tri, enteh, Atea hian a tifiam tiraw..hostel atanga chhuah a chak vangin lem a chang mai mai tiraw?" A ti sap a. Ka mittui chu dan zawh a va har si em..a kutah ka vuan a. Ka darah ka kuah bei a, "Nene, hrethiam rawh..khawngaihin" tih bak ka sawi thei lo. A rawn baw ta hawk a. A nau ruang chu bawhin, "Ate..bawihte, aih, ka phal lo. Anu pawh a awm tawh si lo, Nang lehzel chu kal suh. Mawh..Lalpa, ti nge tihian min tih bik? Anu min laksak a, tunah ka nau. I va sual ve..mi dang thihtir ve mai ta che. Engtin nge Apuia te nen kan awm tak ang. Lalpa, ti nge? A fair lo em mai..Anu ...nu, Ka ngai lutuk che. Nula puitling pawh ka la nih loh hi, ti nge ka naute enkawl tur hian min kalsan? ENgmah ka tithei hleinem.." A nu leh a nau chham pawlha a han rak tuar tuar takah meuh phei chuan, Nenei te dinhmun la hre ngai miah lo thalai thu khupte pawh an inhru sup sup mai. A na em a ni tiraw? Nene,. Tap rawh aw, Duatte, tap bawrh bawrh rawh. Thihna hi chu a na lutuk a ni. Hnem dan che ka hre lo, ka thiam hek lo. Ka thu chu nise I nu leh Atea hi an la dam ngei ang. 

Apuia erawh a bianga mittui luang chungin, a nau kut chu a vuan a, "Ate..tho rawh. I bulah ka kal ve duh. Min hruai ve rawh.." A ti a ti ringawt mai. Phirah pawh englaipawha inzui chawt, a tak leh a mei ang mai, inngeih em em, thian dang kawm ngai eih lo an ni si a. Apuia la khawhar turzia ka ngaihtuah hian ka ipik lawk. Vanduai zingah hian an vanduai ber mai awm e. 

Zai zawhah Warden kha dingin, Atea nat dan vel a sawi a. "Zanriah ei kham hlim atang khan a thaw a sak tan tawh a. Mahse, a zia leh deuh vang khan mu hma turin ka ti a. Thuawih takin a mu ve mai a. Mahse, a hnuah APuia hian min rawn kaitho ta a. 'Sir, Atea a thaw vak vak..a thaw a hah leh a' a rawn ti a. Rang takin kan han bawihsawm a, damdawiinah chhohpuiin tiang khan a kal zui ta mai a ni. Atea te hi kan naupang zinga thuawih ber leh ngainatawm ber pawl an ni a. Zep nâk emaw an school lo luh tawhnain a zir lo ve bawk a, English lamah an blind deuh a. An thianten fiamthu thawh nana an hman tumin Atea hian a sawi ka la hriatreng chu, " Apui, nakinah chuan kan thiante hian min nuihzat tawh loin an home work tihsak tur ten min la ngen ang tiraw?" A tih kha a ni. Apuia hi upa zawk tih takah a nau hi a ngaihtuah em em a, Atea ai hian a kaw hlek bawk a. Mut tawh hnuah te hian zawi tete hian a nau hi a thiam ang ang a zirtir ve lehchhawng thin. Chutiang taka unau inhmangaih leh zirtirtute zah thiam chu an ni. Zirtirtute kan han titi ho chang pawn an unau hi kan sawi tel ngei ngei thin. An thiam loh min zawt hreh lo va, an thiante nuih leh hmuhsit pawh huamin thiam tum takin an inzir ve thin a ni. " tiin. Ani pawh a sawi tha hleithei lo, a hnuk a ulh ve deuh tlat mai. 

Hla pathum vel kan sak hnuah Nenei chu a ding ta hluai a. Mak ka ti deuh. Zawi muangin a lai hawl deuhah chuan a va kal phei chhat chhat a. Mit bui lákin a hrawk a thian káwk a. 

"Aw le, zaninah thalai leh nu leh pate inlo kal khawm a. Kan lawm takzet a ni. Kan chhungkaw chanchin hi tlem sawi ve a thain ka hria a. Min khawngaih ka duh vang ni loin, He lai hmuna ka nau ruang nghah a ni daihte hi inhriat fuh loh takin ka tia...ih, Kei hi Vanneihsangi ka nia. Atea hi ka nau a ni. Ka hming phuahtu hi ka nu a nia, mahse, ka pu zo lo khawp mai ..(A kun a, a khur ngat ngat, rawn dak chhuak lehin a mittui a luang a) mi vanduai ber ka ni. Hmanni maia tuna kan awmna hnuaia nu pakhat ruang kan vui kha ka nu a ni a. Pa kan nei tawh lo. Ka nu kha kan nu leh pa a ni a. Kan innghahna a ni. Mahse, tikhan a boral a. (A inhnit leh faih a. Insum tum takin a dak deuh a..) Ka naute nen kan vakvai ta a. Pi Ruati hi ka nuteii, ka nu nau a ni. An ni hian min khawngaihin engkimah min chhawmdawl a. An inah pawh kan han awm ve reng a, mahse, Keimah hian puitlin lam pan ka duh vangin Sawtah Tuikualah sawn ka nau kum 3 mi nen in luahin kan khawsa ve a. Apuia leh Atea te erawh hostelah awmin, an awmna senso zawng zawng hi Nuteii ten min tumsak vek a ni. Chuan, kan in luah a tet em avangin hetah ka nau ruang chu Pa Tluanga ten nghah min phalsak a. Ka lawm em em a. Chuan, min hre ngai miah lo, kan unau hmel pawh la hmu ngai lo thalai heti zozai min hnem tura inlo kal hi mak ka tiin, a ropui ka ti takzet a. Pa Tluanga te chhungkaw chungah leh Kulikawn branch YMA te chungah lawmthu ka sawi e.." A ti dap dap a. A insum thei ta viau. Chhuang zetin ka lo melh vawng vawng mai. Ani ang rual mi dang hian sawtianga an sawi chhuah theih ka ring lo. A puitling ka tih tawh kha. A nu khan a hrual nasa bawk a. Retheihna leh tihduhdahna atanga seilian hi chu sual lam kawng an zawh loh paw'n, mi chhel leh puitling takah an inchher hriam thin. Ka bulah a rawn thu leh a, "I sawi tha lutuk e" ka lo ti vat. A nui lui sak a. A nau hmai chulin a thlek vang vang mai. 

Rin aiin khua pawh a var hma. Tumah muthlu pawh ka hmu lo. An fel takzet a ni. Gaby erawh khumah an muttir tawh a. Kimi te unau pawh an fakawm takzet a ni. Khua a lo var a, Nenei lungchhia a rawn zual leh tan a. A chauh hmel tawh takzet a ni. A khat tawkin a tap kal reng kha a nia. A nu thih lai ai mah khan a tap nasa zawkin ka hria. 

Apuia pawh a meng tlang ve thak nia! A chau reuh ngawt ang le. Tukthuan chu veng chhung tlawmngaite bawl kan ei a. Ei khamah kan va inthlak zuai a. Awm khawmuang loin kan let leh nghal. Nenei erawh chaw a ei thei si lo va, energy drinks ka in luihtir hram. A chau tih a hmelah pawh a lang reng mai. Vuina hunserh chu kan hmang chho tan a. Chhungkaw aiawhin Nu Ruati'n thu a sawi a. A sawi fiah tha khawp mai. Nu Ruati te milen vang ni maw, Mipui pawh an thanem khawp mai. Zai pawh a nuam e. Tichuan, Atea chu ropui taka vui niin, thlan khur thuk taka phum a ni ta. 

A tawi zawngin Atea thih sarhu lai chu Nu Ruati te in lamah kan cheng kual tam khawp mai. Ka thiante pawn min tawiawm tha takzet. Vuivaina reng ka nei lo. Nu Saii te pawh a khat tawkin an lang ve reng bawk a. Sawma kha mental hospitalah an dah lut tawh a. Enkawl dam a nih hnuah hremna a hmu dawn chauh a niawm e. A hmabak a eng lo ve khawp mai .A thah chhan lah kan hre si lo. Atea ralna sum pawh Nu Ruati te chuan Nenei kutah an dah zel a. Misual tak zawng an ni lo mawle. An fate an ngam lo deuh mai pawh a. Eli erawh ka hmu tam lo khawp mai. Erica leh Danny chu ka hmu zauh zauh. Danny tak phei chuan Nenei pawh a ngaihsak khawp mai. Atea thih chamah chuan kan phei leh dial a. Inleng pawh an awm leh diah diah mai. Khawpuiah hi chuan, mi kan buai tawh a, han inlenpui hi a harsa ve tawh a. Thingtlangah chuan thih chamah chuan kan la intawiawm tha viau mai. 

Nu Ruati min sawm angin tlaiah kan thianho chuan chaw kan ei ve a. Kan ei mek laiin Eli a rawn lut a. A inchei punk leh hle mai. Kan ei mek lai chuan kan hmaah a rawn ding ren rawn a. 

"Vanneihsangi thih inlawm a ni maw?" A ti ta mai a! A rui deuh tih a mitmeng atang pawn a hriat khawp mai. Nu Ruati chuan,"I va zak lo tak. Va inthlak la, rawn ei ve nghal ang che" a lo ti fak a. 

Nui hak hak chungin keimah bik chu min rawn dinchilh a, "Sa inhmeh khat awm sia, nuam i tiawm mang e. " a ti hlang hlang a. A nu leh pate chu awm lo se ka chhang ang. Chhan tlak loh anga ngaiin ka ei zawm hmiah hmiah. Hetia engahmah ngai lo ang deuha ka awm khum hian a na a ti tih ka hre bawk a, ka rin ang ngeiin a tuar thiam lo leh hle. 

."Hei, thingtlangpa, min chhang ta che. I beng a chhet a mi?" A ti tuar a. A pain, "Zonunmawi, i va ninawm teh sek ve. I zahpuiawm mah mah. I roomah va awm rawh" a lo ti chang hmak a. 

A kal hnalh hnalh a. Ka melh duh lo lui tlat thung. Nu Ruati chuan thupha a chawi mawlh mawlh a. Eng em em ka sawi ve lo. Tum nghet tak erawh ka nei. Zaninah ngei hian he Elizabeth hi ka tlawm ngei ngei tur a ni. Ka rilruin ka vawng rauh rauh mai. Chaw ei khamah thenawm khawvengte an rawn leng ve a. An tam lem lo. Nenei phone atangin Eli number chu ka la tawh a. Rilru a kap ve tlat mai. 

Eli chu ka mitmei ru ran a. Inchei angreng takin a chhuak leh ta nalh mai. Chhuah ve nghal vut kha an ngaih a tha lo vang tih ka hlau deuh si. Mawnga hawlh ang zawk zawkin ka awm. Zira te erawh Kimi te nen an haw tawh a. Nenei chiah venthawn tur ka nei. Eli chhuah atanga 3mins velah Nenei hnenah chhuanlam siamin hmanhmawh zetin ka chhuak ta a. Nenei hmela ngaihthat lohna lo lang kha chu nakinah ka sawifiahsak mai ang ka ti ta ringawt mai. Pawn ka thlen chuan Eli hmel reng reng ka hmu lo. Kawngpui lamah ka chhuak chho a, ka lung a phu dup dup bawk. Ka beisei ka hmu ta. Kawngpui chhuah chhoh chiahah chuan Eli chu a lo ding váng mai. Nghah a nei tih a lang. Min hmuh chuan a ner sak a. A hawi tau nghat bawk. 

A bulah ka ding a, "Tu nge i nghah?" Ka ti sup a. 

"Ka duh duh" a ti hmak. Ka rin sa kha a ni tho a. 

"I kalna turah chuan ka va dah dawn che mi?" ka ti a. 

A ner nasa mai. "Nanga phurhah ka chuang duh lo " a ti fiak thak a. Ka lo nui hawk. 

"A tha lawm..hun hman nuam le" ka ti a. Ka tlan zui nghal daih. Mahse, a piah kawiah ka ding. Ka nghak dawn a ni. 5 mins pawh a ral hmain an rawn tlan phei ta a. A front seat-ah a thu vang mai. Mi dang chuang ve an awm pawn ka hre lo. Min tlan pelh rualin ka um ve nghal. Mahse, ka um zui tih an hriat chuan buaina a awm ka hlau deuh si, ka'n tlan muang leh rih a. Mahse, anmahni hmu pha tawk zel chuan ka tlan thung. Zampuimanga thlan lam an pan tlat mai. Falkland lamah tlanin, kei pawn ka zui ve zel a. An awmdan azirin ka chet lak dan tur pawh thlak ka tum tho mai. Ka rin loh deuhin kawng laklawhah an ding ta mai a. Ka tlan pel ringawt. Ka lo nghak ren rawn a, an rawn lang thei si lo va, ka va let leh ta a. Kawng sir zau laiah car chu parkin, anmahni erawh Car piah lawk tlema penhleh deuhah chuan an awmin ka hria. Ke-in ka va pan ta tham tham a. Zu an lo in dun mek. Mipa chu thau lam, zu heh hmel fahran, pian thing zet mai a ni. A tawng suam suam bawk. Eli chuan hnehsawh zetin a in piap piap a. 

"E! Khatah khan law inawm a? He pa hi maw i bialpa chu?" ka tih chuan an va phu chiang tak. 

Eli mitmeng phei chu hmuhnawm tak a ni. Ka nui sáng thung si. Mipa chuan, "Tu nge i nih a?" A lo ti hmuk a. 

"Kha nu kha zawt la tinia.." Ka lo ti mai si. 

Eli chuan thinrim hmel zet hian,"Nang mihring, Zawnga, eng nge i rawn tih a?" A ti khar khar a. A thil in khan a hneh tan deuh bawk nen, a ling hlar mai. 

"Eli, tu nge he pa hi?" Mipa chuan a ti leh a.

"Mi mawl, thingtlang mi a nih hi. Eng atanmah ka ti lo" a ti hlaih hlaih a. 

"Wow! Mipa dang bulah chuan engmah lo mai maw ka lo nih leh tawh a! I chhuah hma lawka kan chet dan kha i theihnghilh ta mai em ni?" Ka ti kual vel a. Nuam ka va ti ru tak. 

Mipa chuan Eli chu rum angreng taka melhin, "Ka rin ang chiah. Hmeichhe tenawm lutuk" a ti hluk a.

Eli thinrim lutuk chu a tawng hleithei tawh lo. "Thianpa, a zia lo hle mai. Mahse,ani hi ka bialnu a nia" tiin mipa chu ka melh a. 

Thinrim meng rum ul chungin, "Zawngi leh! Tihian min dig char char a. Bialpa nei reng si..i hre viau ang" tih leh kal a rual ta mai a. A rui ve deuh bawk nen, a pai khut khut mai. Eli chuan, "Aldrin, dawt a nih kha. He mihring hi kan awmpuinu bialpa alawm..kan ni lo. " a ti tuar tuar a. Mahse, a ruih hnan bawk nen, Aldrina chu a kal daih. A car tlan liam hnu chuan a reh dûk a. Ka kawr awmah a rawn tham a, min sawi nawk nawk chungin, "Hmela, zawnga, eng nge i hriat a? I va zak thei lo ve a. " a ti nghek nghek a. Ka lo nui hawk hawk. A mitmeng chu a alh phat phat mai. A kut chu ka chelh thut a, ka lamah na zetin ka pawt dawrh a. A phu zawk mai. Hmai thal ha hian min melh chho a, a zu in nrn a thinrim nen a sen táwn táwn mai. Thla lah chu a eng mai si. Engmah sawi tawh loin ka fawp ta hmiah a..

A makti hamhaih chhung chuan ka ri buan buan a. Min nam sawn dawrh a, thinrim engphiar hian, "Tenawm pa leh" a ti tuar a. Mahse, a mitmeng a danglam tlat. Ka hai der si lo. A hmuhsit thingtlangpa, a nuihsawh thin tihtheih hi a hre dawn alawm. A kawngah ka va kuah chat a, a chechang lo. Nghet zeta a bek tawn tawna chelhin, ka fawp leh ngawng ngawng a. Min chhang let! Ka sawi reng kha..duhthawh leh na zet zeta ka fawh hnuah hnim chungah chuan ka nam thlu a, kei aiin a hmanhmawh tawh zawk. Ka zuk bawh rawp a, a tukhum sama keh pahin, "Elizabeth, engvangin nge min hmusit anga lan i tum? A ruka min duhzia hi ka hai hleinem..ka sawi dik tiraw? Nang hian min duh a ni tiraw?" Ka ti nghut nghut a. 

Thaw ham ham chungin, "Aw..ni e, a dik. Vanneihsangi, fahrah mi rethei lutuk i duh zawk alawm" a ti hap a. Ka nui chhuak tep. Ani hi duhna leh itna pakhatmah ka nei lo. Ka ten ngawih ngawih zawk. Ka thawhsan a. Hrilhhai zetin min rawn melh a. "Tho rawh. Ka thlah haw ang che" ka ti a. 

"Eng nge awmzia?" A ti khur dat a. 

"Ka khawih duh hleinem che. Thudik ka hriat duh vang alawm khatia ka chet..tho rawh" ka ti leh a. A rawn ding chhuak a, a zia a zawi kher mai. 

"Tp,.." A ti a. A sawi tum a sawi ngam lo. Ka hria. Sawi lo se a tha zawk. 

Bike ka tinung a, "Lo lawn rawh" ka ti leh hmuk a. Ngawi rengin a rawn chuang a, ka tlan zui nghal. Kan inbe zui tawh lo. Kei erawh ka hlim veng veng mai. Ti hi chuan engtikahmah hmusit tak leh tham lo takin min be leh tawh ngai lo vang. An in kawtah ka ding dat a, a chhuk a, a ding leh reng. A mitah tak melhin, "Mang tha le..Inenkawl tha la" tiin ka buk khum nghat a. Ka tlansan vang vang. 

Mut dawnah Nenei bulah thudik ka sawi ta vek a. Ka thiltih dan chu naupangchhia viau mah se; hmeichhe zia hi danglam viau mah se; a inang tlang thin viau tih ka hre ve tawh miau a. Ni e, ELi hian ka laka a rilru puthmang a lan a hlauh luatah min hua leh min hmusit angin a lang mai mai a ni. Ka khawih tawh a, Ka duh loh thu leh ka hnawl thu engmah ka sawi hran lo bawk. Kan inhmuh leh hunah chuan a zia a zawi raih tawh ang. A chhan chu ka lakah beisei a nei ngam tawh miau a, a beiseina tichhe tura a ze tha lo lantir chu a duh bik hauh lo vang. Hmeichhe chapo leh mi dang hnuaichhiah ching tak mahnise, thinlung a nei ve miau a. Chu chu a chak lohna a ni. 

Nenei chuan, "Ni 2 liam leh se, inah ka haw tawh ang. Nuteii pawh ka be tawh" a rawn ti a. A lawmawm e. 

"Chuan, Ih, Nuteii'n Tuikuala inphei leh veleh Kohhranah inlawmluhtir rawh u a tia.. " a ti a. 

Nia, hei hi kan buai rukna pakhat kha a nia. Tuikualah khan Atea kha phur phei dawn ringawt ila, Nu Sangi damlai pawh khan Kohhranah hming an lo la ziak lut lo reng reng a lo nia. Nu Sangi ruang vui dawn pawh khan an buai deuh reng a, mahse, Nu Ruati te an challang bawk a, an ngen nasat em vangin vui dan pangngaiin an vui thei hram kha a nia. Kohhran hi chu belh ve hrim hrim a tha. Keini hi Catholic kan nia. Christian name mawi deuh pawh ka nei tat! Ka sawi lo mai ang. Nenei te erawh presbyterian-ah an lawi ang. 

Class pawh kan kal leh tan tawh a. Hunpui pawh a hnai chho ta. Boruak pawh vawt chho tan khawp mai. Class pawh kan chawl tep tawh e. Nakkumah kan exam ang a, ka pass anih chuan MA ka chhuak ve dawn chu a ni ta reng mai. Nenei te unau vang pawn he lamah Christmas hman chu a chakawm khawp mai. Ka pa hian a remti ang em aw..Taka! Ka pu kha ni 4 hnuah a chhuak a, Nenei ten buaina an tawk leh nen, hmuh pwh an inhmu thei ta lo kha a nia. Ka nu te ka han hrilh khan, "A va vanduai bawk ve le..Nenei chu aw" ka nu pawn a ti ve vawng vawng mai. Amah sawiselna leh iaina lam chu an sawi tawh ngai lo. 

Msi pawh a dul a lang ve ruak tawh a, dul vun pan mi a ni a, a la puar vak lo zawk. Atea vui ni pawh khan a rawn kal ve nghe nghe. A fel thin khawp mai. Ka bula a tum dan a sawi ang khan a lo awm niawm tak a ni. " kan la tha rih, chet ka la tep" a ti mai a. Tul tihpui viau lo mah ila; a duhdan a ni miau si a. Inkhap hleihtheih pawh a ni lo. Lehlamah mualpho vek tawh tho chuan a ngaihdan ang hi tawmpui chu a awl ve viau ang. Kha pa mi tenawm lutuk kha hremna pek chu a chakawm ve em bawk a ni. 

"Lulian, he lamah mas hman i tum em?" lukira'n a tih chuan, "Ka hre lo, ka pa ka la be lo va" ka ti mai a. 

"Hmang rawh. Nenei te an khawngaihthlak" a ti hluk a.

."Chu chu lawm..nangni?" Ka tih chuan, "Kimi te an haw daih dawn a, hman ve ringawt chu a ho e" a ti mai a. Kimi te chu haw lo se ka va ti tak..

"An ni lehzel an hawn dawn chuan Nenei te an va khawngaihthlak zual dawn ve" ka ti a.

"Chuvang reng, haw suh. I awmchilh mai ang a" a ti leh mai a. Zira pawn, "Nia, luhkhung rih mai rawh" a lo ti a. Ka khi vur vur. Ka pa chu tha takin dil ila a phal tho ka ring. Nenei ka thlakhlelh piah lamah an chavai dawn lutuk a, an khua a har dawn bawk nen. Ka khawngaih em a ni. Mahse, Zira leh Lukira la awm ve hram se chu ka duh khawp mai. Thian dang han kawm em em ka nei bawk si lo va. 

Ka pa ka biak chuan,"Nia, i hman chu ka ring sa deuh a. Marawhchu, Kum thar lam erawh i pu hian chhungkaw kima hman a ti deuh tlat mai a. A hriselna lam a tlahniam ve deuh bawk a, a kum lehah chuan kan kim tawh loh takin a ti deuh tlat mai a. " a rawn ti chuar chuar a. 

Kum thar chhung ringawt chu Nenei te pawh an lo awm ve thei mai turah ka ngai deuh. Ka han chamrei dawn chuang lo va. Rilru a nuam huai e. Nenei te pawh an lo phei tawh a, Apuia erawh hostelah a lut leh tawh a. A rawn chhuak leh tep tawh zawkin a rinawm. Atea ni fel zawk khan ruang a rawn nang hman hram a, a ni sual zawk erawh a hmel kan hmu lo. Ka beisei lo hrim hrim bawk a. Pu Mawia pawh an zuk hrilh ve ngeiin a rinawm a. Engtin tak ngai ve ang maw? Zu a in tawh lo ngei ang a, rilru fim taka a inngaihtuah chuan a thiltih dik lohzia te a hrechhuak ve ngei ang a, a inchhir ve tawh em emin ka ring a ni. 

"Eli chuan min be chhe vak tawh miah lo. Bakah a zia pwh a zawi tawp. Mahse, kan inbe em em lo a" Nenei chuan a ti a. Ka lo khi suk. Kha kha a ni mai. 

"I thik em?" Ka tih chuan, "I fawp kher a. Thik ve e" a ti nghat a. A biang va khawih zauhin, "Ka insum theihzia kha mak ka ti" ka ti a. 

"Keimah a nih loh vang a nih kha" a ti leh kher. A hnar ka tuaisak a. 

"E taka! Ih maw, kum thar lamah chuan ka pawisa la khawl ve hian dawr ka siam ve mai dawn mawni aw ka tia. U zikpuii khan a dawr khi khar a tum a. Sumdawnna dang beih a tum a niang. A dawr khi ka kharsak dawn mawni ka ti. Instalment-in a phal a" a ti ta a. A thutak viau bawk.

"A tha alawm..tha i tih ang kha a ni mai. Mahse, sum khawlsa i ngah tawh em ni?" Ka ti a. 

"Atea ralna leh Anu ralna te, Nuteii te min pek bakah a hmaa Ministerin min pekte kha a la tling khawm nual alawm. Ka la khawih che lo hrim hrim " a ti mai a. 

"U Zikpuii chuan engzatin nge a phal?" Ka ti a.

"A la sawi chiang lo, keimah ka nih dawn kha chuan min tlawm te pawh a tum ve a. A fel ngawt mai. Dawr ka run ve theih chuan, kan zia ve zel mai ang. " a ti mawlh mawlh a. Nula puitling tak, kei ai maha upa a nih duh hmel thin. Puitlin kawngah ka phak lo khawp mai. 

"Apuia hi warden ten engmah an rawn sawi lem lo mi!" Thingpui a lum lai chuan ka ti a.

"A lunglenzia leh a khawharzia chu an rawn sawi zeuh zeuh. Mahse, an warden kha a fel khawp a, a bulah a riahtir a, engkimah a buaipui a. A lawmawm tak tak" a ti siam siam a. An vannei chho ve dawn ta a niang e. Ka lawmpui khawp mai.

"E chuan, Hetah Christmas ka hmang dawn a. Zira te an haw daih dawn sia, ka rawn awm phei ve mai dawn sin" ka ti a. Ka nui deuh bawk. 

"i insum thei ang maw?" A ti daih! .

"Theih loh leh kan ti mai ang chu" ka tih chuan a ner sak a.

"Zak lo siah" a ti hlak. 

"A nih chuan, in chungte khum chuang khi lak thlak a ngai dawn a nih chu. I mutna tur" a ti sap a. 

"I naute mu se, kan pahnihin mu dun mai ila" ka ti leh a. Min chhiat khum vak ringawt. 

"Mahse, kum thar erawh ka hawn a ngai dawn a. Inlo awm ve thei mai ang chu tiraw!" Ka tih chuan, "Thei mai ang. Ka naute an awm chuan kei chu ka ngaihtuahawm loh. Nuteii te in lamah pawh kan va awm rih mai ang chu..I awm loha ka hlauh ber zawk chu mipa an lo leng ang tih hi" a ti a. Ka va melh zawk a, min lo melh ve kar. A hmeltha lutuk. A hmel tha mah mah a ni. 

Gabby muhil a rawn harh a, a riat niah niah a, a ngik faih faih bawk. A va pawm vat a. "Maaa..maaa.." Tiin a tap dawn ta mai a. Nenei chuan, "Hmm..dam dam, ama kha maw a lo haw tep aw..mu mu ti leh rawh le" tiin a sam chu a chulsak hliau hliau a. A mumangah a nu a hmu a nih ka ring deuh. Tihian Nenei fa ang chu a ni mai si a. Fa enkawl pawh a thiam viauin ka ring. 

Class kal tawp ni chuan kan inchibai hlawm liam liam a. Teteii pawn chiang zeta min melh kalin, "Kan kal ho chhung zawng ka bem ngam ta lo che chu a nia" a ti nghat a. Mak ka lo ti nasa mai.

"Eng nge a awmzia?" Ka ti hû a. 

"Mipa hi an tam a ni. Mahse, nangmaha mipa nihphung nei erawh an tam lo. Nang chu mipa i ni tlat. Hloh miah suh. " a ti ta duah a. 

"Min duh tihna ni maw?" Uang zetin ka ti a.

"Duh thin che ,mahse, ka chik ka chik che a, hmeichhia i ngaihsak loh danah bialnu nghet i nei tawh niin ka hria. Tihian thian ni zawk ang. A tha zawk" a ti dam thlap a. Nenei la tel hma kha chu nise, ka va bem dawn chiang tak. Mahse, Teteii chu tunah chuan thian tak tak ang bakin ka en thei chuang miah lo. A chhan chu Nenei a awm tawh tlat! 

A tukah Zira leh Lukira te chu an bazar ve a. An chhungte thil tur vel an en a ni maithei. Ka nu te pawh naktuk tuk lehah an lo chhuk dawn a, ka nau nen. An rawn bazar dawn. Ka kalpui ngei an ngai ang. Ka nu duh angin Nenei pawn ka nu te a hmu ve thei dawn ta. Zira leh Lukira te chu sumo counter thleng ka va thlah a, an ngaihawm vung vung dawn khawp mai. Kimi te erawh kar tawpah an haw dawn thung a. Kum thar lama inhmu leh turin kan invai liam ta a. 

In pawh a ruak hiaiin ka hria. Nenei te lah hunpui dawn a nih vang nge hun awl a nei hleithri tawh lo va , an dawrah an buai nuai nuai khawp mai. Ka nu te pawh a tukah chuan an rawn chhuk ta a. Kan inah ka thiante an awm ta lo bawk a, an rawn thleng ta mai. Mami a che peih bawk a, in pawh a fai leh kuar mai. Zanah Nenei te inah ka lensan daih a, an hmu ve chak tawh khawp mai. A tukah kan nufazain kan bazar ta a, Ka lo intitlangval ve tawh bawk aniang. Ka nuin lei ve la a tih bak ka ngen meuh tawh lo. A pawisa faiin Christmas chhunga ka tla tur min pe bawk a, a zia viau. Mahse, Nneei tan eng emaw tal leisak ve ka duh a, amah ringawt chu tih chi niin ka hre si lo, Gaby leh Apuia te pawh kawrlum ka leisak ve ve a, Mami vekin a thlang. Thil ka lei thiam vak lo bawk a. Nenei tan erawh polar suit, man to ve deuh hlek ka leisak a. A inhmeh lehpek ang chu. 

In kan thleng a, kan han intifel a. Ka nuin eirawng a bawl zui nghal. Nenei te unauin chaw an rawn ei dawn vangin chawhmeh pawh kan lei nual mai. Ka nuin sawm a ti deuh tlat si a. Dar 6 pelhah kan inpeih thei chauh. Nenei te hruai tur chuan ka chhuak ta a. A lo inhmakhua ve bawk a, a lo inpeih at tawh mai. Apuia pawh a lo chhuak tawh a. An pathum chuan ka phur phei ta a. Chhungkua te pawh kan ang alawm le. 

Kawngka ka hawng a, "Nu" tiin ka lut nghal a. Ka nu chu a lu towela tuam chungin room atangin a rawn chhuak a, Apuia ka kai a, Nenei erawh chuan Gaby a pawm thung. Nenei leh ka nu chu an inhmachhawn ta ran a. Boruak chu reilote chhung a reh! 

Ka nu chuan, "Nene, ka hmu che chu ka va lawm ve aw" tiin a kut a phar chhuak a.

Nenei pawh chuan, "Kei deuh.. Ka lawm e" tiin ka nu kut chu a vuan ve a. 

Ka nu mitmeng chu ka chhiar thiam chiah lo. Nenei huatna leh mil lohna ka hmu lo naa, hriatthiam theih mang loh eng emaw inphum ru a awm tlat! Ka ngaihbel em mawni zawk le aw. Mami leh Nenei pawh an inchibai ve zui a. Naupang lawm tak a ni bawk a, Gaby chu a chhawnchhaih nghal bawrh bawrh a. Ka beisei aiin Gaby pawn a ngaina. Apuia erawh Atea thihna khan a la nghawng bawk a, a thu zum reng ringawt. Tih vak ngaihna a awm lo. Chaw ei hma deuhin kan han thu hahdam rih a. Ka nu chu ka va en apiangin, Ngun zetin Nenei a lo melh thin. A hmuh tawh hnu ang a ti a ni maithei ni. 

Chaw ei siam ka rawt dawn chiah tihin, "Nene, i pa hi ka hre maithei a ni" ka nu chuan a ti ta mai a! Mak ti zetin kan vai mai chuan ka nu chu kan melh ta thap a..

"Engtin?" Nenei aw chu a ri chang chang a ni mai.

Thawk la halhin, Ka nu chuan, "Ka hmuh phat che khan tu emaw ka hrechhuak nghal a ni. Chu pa chu Bawiha pawh hian a hre lutuk" a ti sap a. Ka lo hawihai nasa.

"Eng nge i sawi awmzia ? Nu" ka ti vat a.

"Nenei mitmeng, a hnar , a hmui leh a hmel landan hrim hrim hi ngun takin en la, tu emaw i hrechhuak ve lo em ni?" a ti halh a. A hmelah lah chuan ngaihthatna tur reng ka hmu bawk si lo. Nenei hrilhhai hmel zet chu uluk zetin ka melh a. Mahse ka thluak a buai em a, tumah ka mitthlain ka hrechhuak zo lo. 

Ka nu chuan,"Bawiha, i demawm loh. Chuan, Nene, i nu pawh hi nu hmeltha tak a ni ngei ang a, i pa pawh a hmeltha asin" a ti kual leh a. Ka dawhthei ta vak lo.

"Pehhel loin sawi mai la mawle.." Ka lo ti hmuk a. Ka aw pawn ngaihno a bei vak tawh lo.

"A ni ngei em tih ka chiang bik tlat lo a tin ni.. Mahse, ka hmuh phata ka hriat chhuah danah ka thinlung hian a dik tih min hrilh tlat..Nene, i pa chu i hre duh em?" A han ti leh te te a. Ka tho daih. Mi zaidam ka ni lo bawk a, chutia pehhel kual chu ka nin zawng tak a ni.

"Aw khawngaihin" Nenei chuan a ti sep a. 

"Aw le..mahse ka chian ngam loh avangin amah ka be phawt ang " ka nu aw chu a ring lo naa, ka bengah chuan ring tak a ni. 

 

A phone chu a hmet malh malh a. Ka zuk bihpui ve a. A call tum number ka zuk hmuh chuan ka meng káwk. ! Khai awww!!

(Chakai ka va ei chak tak em 🥺🥲🤤