Vanneihsangi 14

VANNEIHSANGI (14)

Ziaktu: Toni Rálte

Ka inpeih hnuah ka pute hmuak tur chuan ka va phei ta a. An ni pawh an rawn thleng har lo. Ka pu chu kan zawn lut a, Doctor ten an han en vat vat a. Rin ang ngeiin an admit . Nuteii'n a awmpui dawn a ni. Ka nu leh pa leh nuteii ten an rawn kalpui kha a nia. Admit an rinsa avangin mamawh pawh an lo keng nghal vek a, a zia viau. Ka pu chu ka rin aiin a chau. An rawn phur thla a ni ve bawk a. Mahse, an han enkawl deuh a, a han mut hahdam chuan a thaw lak pawh a zia chho ta viau a. Ka nu nen kan thutpui a, ka pa leh nuteii te erawh chhungte inah an kal rih a.

"Nenei te chu an tha zel maw?" Ka nu chuan a ti a. 

"Aw tha ve zel e. Inhmu ula ka duh asin le..haw leh nghal intum sia" ka ti nuah nuah a. 

"Ni ngawt mai, kei pawh ka hmu chak ve asin le.." A ti ve mai a. Nenei lahin chhunah chuan hna a thawk si. A hmelthat leh duhawmzia te hi hmu ve hrim hrim se ka ti asin le aw. 

Ka nu leh pate haw hnuah reivak lo ka thu a, ka pu pawh ka hawn dawnah chuan a rawn harh ve a, mahse, a la tawng peih lo. Patea nupui nuteii hi mo fel ve tak chu niin ka hria. Ka nite ai mahin ka pu hi a ngaihsak zawk mah awm e. Ka pu pawn a ngainain, engkimah a rawn leh in chhungkhur pawh hi a kutah a dah a ni. Nuteii lahin a enkawl zo mai si a, ka pa te unau pawh hian an unau ang chiahin an en ti mai ang. Tin, patea ai hian kum 5-in a upa bawk a, a puitling zawk bawk nen. Mo thain chhungkua a huikhawm a, mo sualin chhungkua a paldarh an lo tih thin hi a dik ve hle dawnin ka hria. Ka hmu ve miau a. Ka nu u, ka pu nupui hi ka nuteii letling chiah a ni tlat a. Tunah phei chuan an chhungkua leh ka nu te chhungkua hi chhungkhat an ni tih pawh a hriat vak loh. Piteii chhungte lam hi an inah an lal hle a ni mai. Ka pu thiam loh leh nep vang ni pakhat mah se, Tihah chuan ka patea hi ka pate unaua naupang ber, puitling lo ve tak a ni chungin ka nuteii hian a kaihruai thiam a, tihian chhungkua min phuar khawm tho mai. Mo sual deuh chuan hnial khan an hre leh tho ang. Ka pate unau hi an thahnem viau a, pa 7 lai an ni. Ka pa hi upa ber atanga chhiara pathumna a ni. Chutiang taka chhungkaw hung ve chu kan ni a, Nuteii hian a tilawm thei vek. Engkimah an tlan luhna, an vuivaina an thlenna a ni zel thei a. Hetiang taka mo tha leh fel hi chu an tam em em ka ring lo. Mi te chu an nute chhung lam nen an inhnaih zawk an ti a ni ngai a, keini erawh ka nu te chhung lam aiin ka pa chhungte lam kan bel mah zawkin kan hnaih zawk. A chhan chu sawi tawh angin ka nu nutapa nupui ka piteii khan min huikhawm chu sawi loh, ama chhungte lam a hre hlur a, kan lal lo ve em a. In pui an luah ve bawk si, ka pi leh pute an boral tawh bawk nen, kan intlawhpawh vak lo khawp mai. Chhiat thatah erawh kan la inhre ve hram hram. A tha tho mai ti tawh mai ang.

Chaw chu ka ni ten an rawn dah dawn a. "Ka lo riahpui mai dawn mi!" Nuteii bula ka tih chuan, "Aa..zanin chu ka'n riahpui phawt ang e. Class i chawl tawh sia, i kal leh thei lo palh ang" a ti deuh tlat a. Tlai dar 4 velah ka hawnsan ta a. Thiante pawh an lo haw tawh a. Chanchin min lo zawt ve luam a. Ngaihtuahawm lutuk a ni lo bawk a, chutin min kap em em hran lo. Zanriah kan ei hma deuhin, Tehlimi u nupui, U zuali'n chawhmeh min lo suah hlauh mai. Sangha thar lam zet chhum han a ni a. Kan va ei khat tak. Ei chak ve tho mah ila, chawlhniah chuan vawksa nge nge kan ti lehzel a, kar laklawhah pawisa renna avangin kan lei ngam tawh thin si lo. "Puia thiante lui kalin min pe ve teuh a, kan ei seng lo" a ti a. Kan tan vanneihna a ni ringawt mai. A ei pawh kan eitui e. 

Zanah Nenei ka rim a ngai tawh. Kan chhuak ta dial a. Ka va thlen chuan Gaby chaw a lo hrai mek chauh a. "Ngati nge i va tlai ve" ka tih chuan, "Awii a nuar tlat a. Chaw ka ei laiin..tunah a tám leh sia.." A lo ti hliai a. Gaby chu a nuar nasa a niang a mit pawh a bui lák mai. Gaby ka hmuh apiang hian nuam tih lohna ka nei ziah! A chhan chu ka lainat vang a ni. Nu leh pa nei lo tur chuan a la nau deuh ëm a ni. A nulat hunah pawh a nu hmel a hre miah dawn lo tihna a nia. A thih sarhu pawh a hre chhuak zo tawh lo vang. Apuia te tak pawh hian an upat hnuah chuan, a nu thih hun kha an hrechhuak zo kher ang nge maw…

An inhrai zawhah, a silfai sawk sawk a. "Ka nenen ang che aw" a u chuan a ti a.

"Aih..Amma bulah" tiin a tap leh dawn ta mai. Zanin hi a dan a dang tlat. Nenei chuan min rawn melh zawk a. Sawi tur ka hre si lo. 

"Gaby. Hawh le, thil lei ang aw..sweet kan lei ang.." Tiin ka ban a. Min melh run run a, min ban ve mai. Naupang khrih ve tak, mi dangin an lak hleihtheih loh a ni ve a. Kimi leh Bteii te erawh a duh ve, kei pawh min hmuh zin ve tawh vang a ni maithei. Ka pawm a, ka sawi tawh si nen, dawr lam ka panpui ta a. Chocolate kan va lei a. Ka be ve mawlh mawlh a, min chhang lem hlei lo. 

Michaela ka tawk thut, a leng chhuak tur a ni maithei. Min rawn melh hráwk a, engahmah ka ngai lo. A thiante an awm lo bawk a, a pawr lo khawp mai. Ka hlau lo nasa mai si. Ina kan luh leh chuan Nenei chuan thawmhnaw a lo thlep fel mek a. 

"Nene, kheh kheh" tiin Chocolate chu a u a va pe a. A lo khehsak vat a. Thutthleng sei pakhat zawkah va thu tharhin, engmah sawi tawh loin chocolate chu a ei ta mial mial a. 

"Ka nu ten an hmu ve chak lutuk che a" ka ti a. A bulah ka thu nghal.

."Nia, an haw leh daih a, ka hmu ve chak tho kei pawn" a lo ti sap a.

"Ka pu chu engtik nge kan kan ang" ka tih chuan, "Chawlh hi ka nei ve thei si lo, zanah ti dawn ila Gaby awm bawk si, buaithlak e" a ti niah niah a.

"Sunday thleng an awm maithei asin. An awm loh pawn tihdan a awm mai ang. Hmu ve hrim hrim la ka duh a" ka ti a.

."Nia, i pu ber kha ka hmu duh. Sawi duhte pawh a nei ve maithei asin" a ti a, min rawn melh zawk. 

"E tak! Apuia te wardenin min lo bia a, Atea lungleng a tap thin niawm tak a ni. Zan 3 lai chu an buaipui a niawm e. A mumangah anu a lo hmu thin aniang. An mangang riau a. Engtin nge ka tih dawn pawh ka hre lo" a ti mawlh mawlh a. 

"A va pawi ve aw. Va lak chhuah chi a ni awm si lo" ka ti a.

"Nia, Nuteii pawh ka hrilh tho a, tihvak ngaihna a hre lo a niang." A ti mai a.

"E! Chuan, nizan khan Eli chuan engtin chiah nge a lo sawi?" Ka tih chuan, "Ka phone kha en la" a lo ti sap a. A phone chu ka ban nghal. Eli chuan, "Vanneihsang, ka sawi tur hi ngun takin lo ngaithla rawh. I bialpa Tpa leh hmeichhe pakhat an ck a nia. A bialnu nghet zawk pawh a ni maithei. Falkland-ah daih daih ka hmu dun a, an inphur nghe nghe. Tpa chu ka hau a, mahse, chhan pawh min chhang ngam lo. Then hmak rawh." A lo ti! Ka khi suk ringawt. Lehlamah mi dang ngaihdanah chuan inngaizawng kha kan ang ve riau a, zan a lo ni kher bawk nen. 

"Chuan i awih ta mai mi?" Ka ti a.

"Awih ve deuh mai e. I lo len loh zan a ni kher bawk sia." A ti a. A biangah ka va chuk zauh a,"Kawpsan phal pawh i ni mi?" Ka ti sup a. Mawi zeta nuiin min rawn melh a, "Min kawp tak tak la chuan ka nasa viau ang." A ti nghat a.

"Zari kha a tenawm ka ti khawp mai. A hmaa ka lo rindan nen a inang chiah" ka ti daih a. 

"Umm, a thiannu nen min lo hauh pawh khan amah zawk kha a tawng nasa ber berah a tang a. U malawmi paw'n, 'A bialpa zawk te pawh a ang alawm le' a ti hial alawm. A mizia a mak ve khawp mai" a ti seuh seuh a. 

"Tiang kha chu ni ve suh aw. Bakah ka thikthu a chhia ka tih kha. Zira leh Lukira pawh hi a tul feah lo chuan be suh" ka'n ti ngawt a. Nui har har chungin, "Em em a che..a hranpain ka be ngai lo. Ka nuta te ang maiin ka ngai ,an ni pahnih hi chu" a ti a. A biang tai tëk vang chuan a duhawm lehzual. A thawmhnaw thleh fel chu a va dah lut a. Thingpui hang a chhuang nghal. 

Ka kekawr hman thiam ka ha bawk a, ka ha rim bawk nen, a khel sir thuina pet chu ka zuk hmu fuh a, ka kal dawn khan ka hmu miah si lo. "Ehe! Hei a tet a nih hi..Nene, thui zuai la" ka ti a. 

"He kekawr lah hi i ha peih siah, mipa ho hi chu inawlsam leh lutuk a, a tha lo. Khawi hlip rawh" a ti nghal zung zung a. Ka hlip a, boxer ka ha tho bawk a. 

Thingpui a rawn dah leh te te hnuah a va thui ta a. "I ha ngun sia, a kap vel pawh hi ka'n thui nawn vek ang nge" a ti a. Ka lung hi a va dum thin tak. 

Gaby chuan a u phone a khawih a, Estheri hla 'Vande mataram' chu thiam leh thiam loin a zaipui ar ar a. 

Kekawr chu a thui zo a, min rawn pe a. "Ka la ha peih lo. Gaby hi timu tawh la" awmze nei zet hian ka ti a. Ka nui suk bawk. 

"A la hlim ve em hi a" a ti mai a. Khua a lum vak tawh lo naa, Nenei te in hi a ûp reuh bawk a, zanah hi chuan a lum deuh mah zawk thin. Ani pawh chuan tshirt uk, a vun kap eng zet hain, kekawr bul a khup khuh lo a ha a. A chawn sei thlarh leh ngo zet chu ka hmu tuihnai riau. He ta an awm hnu hian chance chu duhthusamin kan ngah. Mahse, min khenthlak dan a thiam riau zel a, "U Tri, kan innei ngei ngei lo maithei. He ti mai hi ka ni tawh a, lo innei ta lo ila, ka dinhmun chhiatzia i hria a, ka virgin tawh loh zel phei chuan mipa dangin min ngaihlu thei ang em? Chu chu min ngaihtuahpui la, insum zawk ang" a ti thin. A dik ka tih rualin kan zalen si a, insum chu a harsa thin khawp mai. Thingpui chu ka in a. Kimi te thawm pawh a ring leh viau. In chung chhuat hi slab a ni bawk a, thawm an hre thei lo nen, woofer-ah zai playin an ri ve reng zel a. Gaby hi a vannei a, a muthilh tawh chuan a mu nghet phian zel bawk a.

"Vawiin chu Danny-an min lo bia a. Kha mi an insual tuk tuk lehah khan a u awmnaah a zin daih a, vawiinah a rawn haw ve chiah a niang. Ka lo leng dawn a tia" a ti sep sep a.

"A tha alawm. Nangmah tantu awmchhun a nih ve kha. Ngaih loh lamah ngai lo la, I Pa Tluanga sawn an nu saw a ngam vak lo mawni ka ti. Ama fabik te hi an lal lo e" ka ti nuah nuah a.

"Umm, Nuteii hi a zei ve a, an pa saw a tithiam lutuk. Danny u pawh a rawn hawn duh loh chhan chu Eli nen hian an inngeih hlawl lo va, chu ai chuan phaia mahnia in luaha awm kha a duh zawk alawm"a ti ve mai a.

" I nuteii saw a chhe lo ve em a, i pa Tluanga lah a upa ve lam a ni tawh sia, chuvang a ni ve pakhat ang" ka ti ringawt. Nia, han en mai chuan nupa pawh an ang lo. Nu Ruati chu Nu Sangi ang deuh khan a ngo sar a, a nu lianin a tha suah a ni tawp mai. Pa Tluanga erawh a palian ve tho naa, en chian hian a tar riau. A hmaifang chu a chhe em rm bik lo. A tan Nu Ruati chu a tha ve bawk a ni.

Gaby chu a zai reng emaw tih laiin chocolate a ei bang keng chung chuan thutthleng seiah chuan a muthlu bám mai a. A lainatawm zawk e a. Nenei chuan dimtein a va pawm a, khumah a va mut ta a. zun a cheh tawh lo va, a tha viau mai. A rawn thu leh chu ka lo pawm chawt a, a tang lem bik lo. Ka fawp leh ta phawt a. Han infawh hlek hi chuan mipa hi chu kan mar nghal tung ringawt zel a! A buaithlak. Min bawh zawngin ka pawt hnai a. Ka thu mu deuh bawk. A kawng fek rát chu chulin, a awmbawr ka dap chho leh a. Hetiang hi chu a hnar ngai bik lo. A tawpna tak hi a voh thei em a ni. Ka thaw ham ham a, ani pawh a thaw a rang ve hle. 

."Ti mai ang" ka ti thám tuak a. Ka mitmeng pawh a phelh leh phung tawh ang chu..

"Aih" a ti nghat a. A inla hrang nghal. A thin erawh a rim lo. Ka thiante leh mi dang kan inngaizawng tih hriate hi chuan sex hmang tawhah min ngaih vek ka ring. A ni si lo. Mahse, ka pa loh vang leh ka zei loh vang erawh ani bik lo. Amah hian min hnar thiam thin em a ni. Tihnat harsa tak a lo ni bawk nen, sex tel lo hian hlim takin a lo inngaihzawn theih tih hi ka chiang ta viau mai.

Kimi te in lama tawng ri chu a ring riau mai. Anmahni ni lova kan hriat vangin intiam rual ang hrimin kan va phei ta vat a. Kan va luh chuan, mipa lian leh cher lam, khabe hmul nei leh a thianpa niawm tak hang chhe ve beh tak te hian Kimi an lo dinchilh ran mai a. 

Khabe hmul neia chu a thinrim hmel riau, "Hmeichhe mak tak chu i ni. A tu hi Maw i bialpa chu" tiin Zira leh Tluangtea chu a melh a. Kimi chuan zam loh hmel zet hian, "Ka duh duh ka ngaizawng thei aw. He laia buaina rawn siam tur hian engmah i ni lo" a lo ti hmiah mai. 

A din hnaih sauh a, a chhuk en run mai. Zira erawh Lukira'n a chelh a.

"Zothankim, khatin mi hmusit viau suh. I dawr siam theihna chhan saw tu nge? Keimah..tihian i hlawhtling ve tan a. Min hlamchhiah ringawt a maw? Tenawmnu" a ti vin ta thak a. Kimi chu za vak lo hian a nui sak a.

"Lalrinpui, zak ve teh. I puihna kha ka ngen ngai reng reng lo, i duh thuin min pui a nih kha. Tin, eng teh vak mah min tihsak lo. Khatih lai kha chuan kan la inngaizawng miau a, tunah chuan engmah inzawmna kan nei tawh lo e" a lo ti ve sak sak a. A ex a ni tih chu a hriat e.

"Zawngi, khatin min ti suh aw. Bialpa dang i neih chak vangin min then a. Ka theih hnu ve mai mai i nih hi..chutin lo chapo vak suh" a ti ta mai a. Kimi mitmeng chu a danglam zawk mai. A zahthlak ve khawp ang le.

"Hetiang mipa i nih vang hian alawm ka then che. Hmeichhe hmangaihna leh hlutna hrethiam lo, i duh duha tihkawi i tum thin vang hian ania tu hmeichhia mahin an ngaihzawn rei theih loh che. I theih hnu chu ka ni ngei e, mahse, insawitheih nana min hmang tur khawpin i ropui lo.. Chhuak rawh" a ti leh fak fak a. A hlau tehchiam lo khawpin ka hria. 

A thianpa hâng beh ve tak chuan, "Kal ang. Hetiang nuthlawi hi buaipui chiam lo teh ang" a ti nghut a. Rinpuia erawh chuan, "Tu hi maw i bialpa chu" a ti leh ngat a. 

Zira chu rawn kal hnaiin, "Keimah hi mawle..i sawi duh zawng zawng sawi rawh. " a ti chang rát a. An inmelh dun ngat ngat mai. Zira lah chuan a hlauh loh hmel ve bawk si. 

"Ka bialnu hlui i lo ngaizawng ve a. I intithei riau a ni maw? A zei i ti ve tho em? Khumlaizawlah chuan a zei harh harh ania" nuih sawh titih hian Rinpuia chuan a lo ti a. Zira a che sawk,mahse, Lukira nen kan pawt hman. A khawih hman lo. 

"Mihring leh! Mipa chu i inti ve chu a ni sia! Khatia i hmeichhe mutpuite chanchin i sawi zel vang kha a nih dawn kha, an then zel thin che. Mipa min va timualpho ve" ZIra chuan a ti khur dawt dawt a. 

Kimi pawh a tai hlar mai, a mitmeng chu a ling váwt váwt a, RInpuia chu a ten hmel kher mai. Tanwg pawh tawng tha hleithei lo chuan, "Chhuak rawh. Chhuak vang vang rawh. " tiin kawngka lam a kawk vah a. A khur deuhin ka hria. A thianpa hánga chuan a kuah chhuak ta a. Zira erawh a la tal aih aih mai. A tan pawh a zahthlakin a tlawmthlak ve ngawt ang le..Kimi chu a thu hnawk a, a hmai hupin a ngik faih faih bawk. Nenei chuan a kuah vat a. A hnungah a chulsak a. Bteii erawh a chechang lem lo. 

Zira chu mittui kar atanga rawn melhin, "Zir, pawi ka ti lutuk. Thutlukna engpawh i siam thei a nia. Ka zah khawp mai che. " a ti sap a. Zira pawh a thu tha tawh a, Kimi lam chu hawiin, "A pawi lo. Kei pawh mi thianghlim ka ni hleinem. Mahse, kha mihring khan a kalna hmun apianga a sawi anih chuan, mi dang rilrua i tlak dan tur hi ka duh lo a ni. Khawih zal deuh a ngai a nih kha" a ti ta nghut nghut a.

"A hun lai khan min zar hneh si a, kei kan pa nen kan inthen hlim rilru nat vanglai a lo ni ve bawk nen, pawisak ka lo nei lo deuh a ni. A pawi ngawt mai. " Kimi chuan aw pangngai takin a rawn ti a.

Nenei chuan, "U Kim, khatin inthiam lo lutuk suh. I hmangaih a, i duh a, i inpe a ni ve mai. I inpekna te hmusita nangmah beih leh hnuaichhiah nana hman tumtu kha mi tha leh mi rilru hrisel a ni lo zawk tihna a nih kha. Khatiang mihring rilru hniam lutuk i lo kalsan hlauh kha i tifuh lutuk" a lo ti seuh seuh a. Ka bialnu tak hi chu aw..

Zira chuan, "Ni e, Khatin ka lakah phei chuan inthiam lo lutuk suh. I nunhlui chu i ta a nia, engtin pawn i hmang thei alawm..ka thunun phak pawh a ni lo. Hrehawm ti suh. Ka ngaihdan che a ngai reng.." A lo ti ve a. Ka thianpa mah nise, ka chhuangin ka ngaisang khawp mai. Zira lehzel khan hmusitin hnualsuat se Kimi rilru nat dan tur leh mahni a inhmuh hniam dan tur chu.. Ni e, mipa te hian hmeichhiate zahawmna hi kan venhimsakin kan tihchhiatsak thei khawp mai a lo a nia. Mahni infak chu a nuam hauh lo naa, Ka ngaihzawngte a tam zawk hi sex ka hmanpui an ni. Sex chu inngaihzawnain a kentel emaw kan ti nge, sualah pawh hian kan ngai meuh tawh lo chu a nih hi. Mahse, kan hmang a, kan inthen hnuah pawh engmah ka sawi ngai lo. Ka tan a inhlan a, engvangin nge mi dang hriatah ka tlangaupui kher ang? Ka zepa ka thupsak avang khan a zahawmna ka venhimsak tihna a lo nia. Va tlangaupui ta ila, hlawkna ka neih loh bakah mipa ze dik tak niin ka hre lo va, a zah pawh ka zak. Ni e, hmeichhe virgin ngei hi chu kan ngaisang alawm. Mahse, heti zozai mipain kan hela kan nek kan nek hnua virgin zo ta lo te erawh ka hmu hniam chuang hauh lo. Tel vena kan nei miau a. Robot an ni bik lo va, an thisen a lumin an chákna a chhuak ve thei tih ka hria, kan duh kan hmu ta chëng a, kan han ngainep kuala virgin ngat lo chu kan han ti lehvel hi chu Pathian meuh pawn em ema min tih ka ring. Ka bialnu Nenei erawh a la virgin miau a, hei vang hian ka duhthu a sam zual. Inneih hmain ka tan inhlan pawh nise, neih ngei ngei tumna ka nei lian zawk hle ang. Mipa te hian rilru dik leh hrisel kan put a hun hle in ka hre ve.

Kan boruak a chuti tehnuai avang chuan kan haw hma ta ringawt. Zira han hawnpui loh kha nuam bik hek lo le. Kawnga kan kal lai chuan, "Ka la hnek tho ang. A farnu te khatiang khan mipa dangin ti ve se a lawm bik ang em?" A ti nghut nghut a. Rinpuia chu a haw hle tih a hriat mai.

Lukira chuan, "Eng dang a ni lo, Kimi a la duh si, Kimi'n a hnawl tawh si a chauhthubarawh a nih kha..mize hniam lutuk" a lo ti ve zat a. Ka ngawi reng thung.

Nenei nen kan intext a, "U Kimi kha ka khawngaih eee. A zahthlak dawn si. Awiij a hrehawm ngawt ang" a rawn ti a. 

"Ni ngawt mai. Khatiang mipa kha i tawn ve ka hlau, lo inthen ta ang ila" ka va tih chuan,"Inthen lo mai ang" a rawn ti. Ka khi leh suk mai.

A tuk chu class ka kal ve ta a. Msi nen kan inzui leh chawt mai. "Nizanah min lo bia a. Ngaihdamte min rawn dil vel mawle" a ti sar sar a.

"Chuan, engtin nge i tih?" Ka tih chuan, tumruh zeta dak vahin, "Ele! Ka lo pawmsak hmiah mai. Hetiang taka hmeichhiate infiamna atana hmangtu hi hremna pek hlak ka duh a ni. Tin, a nupui pawn thu awmzia engmah hrechiang hlei lo va, min ankhuma min sawi mualpho chiam avang hian tihnat ve ka duh hrim hrim bawk. Heti hian a hma ang khan ka ngaizawng leh ang a, an chhungkua saw ka tidarh vek dawn ani. Ka mualpho ta sa sa a, pawisak neih a tulna ka hre lo. Ka tihdarh vek hunah ka tawpsan ang" a ti ta mai a. Ka meng phawk viau. A inhmeh lo ka ti lutuk.

"Chutiangte chu a..i chhuak thei tawh si lo ang e, ani a zei hmel sia. Bakah i chhungten an hriat chuan an thinrim dawn asin" ka ti a.

A nui hak. "An hre lo turah ngai ang. Kar tawpah chhuah kan tum a. Tah chuan hmanraw thenkhat ka la khawm ang. He mi tenawmpa hian a la hre dawn alawm. A nupui chu ngei viau mah ila, ka khawngaih tho. Mahse, a pasal dem ngam loa keimah zawk min diriam chiam avang hian tihnat ve reng reng ka duh" a ti sak sak a.

."Tunah pawh a nupui hi chu a na tawk tawh viau ang. An in chhunga an awmdan i va hmu vek thei hleinem. A pasal pawh a hau ve nasa ngawtin ka ring. I hmeichhiatpui tho a nia sin" ka tih chuan, "Nih zawng a nia. Mahse, mi tenawmpa ka tihnat chuan a na tel lo thei si lo alawm. Heti taka min zah lo va, min bumtu, mualpho leh mi nuihzata min siamtu hi thawveng takin a la leng ang maw?! Kei hian bansan mah ila, mi dang a kawp leh dawn tho. Chuvang chuan ka hmingchhe ta sa sa, ka tawrhtir ve dawn a ni ringawt" a ti piap mai. A tumruh hmel si. Han khap vak dan pawh ka hre lo. Khawvel hi zawng a buaithlak a nih hi maw..

Banah ka pu ka va tlawh kawi a, a lo harh tawh a. Tawng pawh a tawng peih. 

"Bawiha, Mei ka va zu chak em" a tih chuan ka nuih a za. Zial heh ve tak kha a nia. A zu thei si lo va, a hrehawm khawpin ka ring. 

"I dam veleh i zu dawn nia. Thil te kha ei tha la, i tha vat mai ang" ka ti a.

"I bialnu pawh chu i rawn hruai ngam dawn na nge?" A ti sak mai. 

Thutak deuh zawkin, " Chhun lamah hna a thawk a, zanah lah a nau hi chhuahpui chi a ni bawk si lo nen. Ka hrethiam rih lo, ani pawn a hmu chak che alawm"ka ti ta a.

"Damdawiinah awm rei ka tum hleinem. Aizawlah pawh hian cham reng ka peih lo. Ka kawmthlang huan ka hung lah ka zo hman si lo va, Thangpuia (ka patea) hian chhunzawm nachang a hre leh ngút lo vang" a ti chuar chuar a. Nuteii nen kan innuih ringawt. Taima rumrut ang kha a ni ve bawk si. 

"Naktukah rawn hruai hram ka lo tum dawn nia aw. Lo dam tha zel rawh" ka ti a. Riahpui kha Nuteii riahpui loh chu a duh leh tlat pek lo a niawm e. A monu hi a ngai thin a nia. Ka hawnsan ta a. U Zikpuii dawrah ka peng zuai. Nenei chuan dawhkan a lo tifai mek a. A apron hak te chu a ta tur liau liaua siam niawm tak a ni. Nia, mipa thenkhat keimah ang rual te chuan bialnu, mi thingpui dawra thawk chu an iai maithei. A zahte pawh an zahpui mahna. Kei erawh chuan ka chhungril hian ka chhuang tlat nia! A chhan chu ka hausa bik lo va, Thingtlang tlangval ve tho ka nia. Ani aia ka ropuina a awm miah lo, chhungte chawmhlawmin lehkha ka la zir zui. Ani hi chuan a nau te nen an damkhawchhuah nan zah leh hrehawm pawh sawi loin a thawh awm a thawk ngam mai a. Amah ang rual hmeichhe tam tak hian an tluk lo hul hual.

Thingpui kan in dun zuai a, ka pu thusawite pawh ka hrilh a. 

"U Zikpui, naktuk tlaiah U Tria pu damdawi ina awm hian min hmuh ve ngei a duh sia, hun min siamsak thei ang em? Chawhma velah ka siam tur ang ang ka siam vek ang a" tiin a dil ta nghal a. U zikpuii hian engkim a hre ve vek tawh.

"Chutia thenkhatte pu berin order a chhuahte chuan keini tan hnial ngam pawh a nih loh chu..va kal mawlh teh" a lo ti leh thliam a. U zikpuii pawh hi an sawi danin a nu leh pate an boral tawh a, amah hi upa ber niin a naute pahnih a chawm ve tho a niawm e. Tunah chuan a hlawhtling ti mai ang, a naute pawn mahni tawkah eizawnna chhete an nei ve tawh a. Tuna a dawr hi chu amah intunnunna a ni deuh mai. A nau chiah fanu kum 10 mi hi a fa anga lain a awmpui nghe nghe a. Chuvang a niang Nenei hi a duata a harsatna pawh a hriatthiam em em ni. 

In ka thlen chuan Thiangi a lo awm ve a. Chawhmeh min suah leh a niang. 

"Sawma pawh an man dawn. " a tih ri chu ka va hre hman a. 

Lukira'n ,"Nu Saii ten an sawi mi?" A lo ti a.

"Sawi lo, U Mama hian tang se a duh a, a chhan chu mental hospitala an dah lo a nih si chuan kan chhungkaw tan pawh a hlauhawm a tia. Kei pawh ka hlau. Jail-a a tan loh chuan ka chhuak daih ang" a ti a. 

"Amah Sawma a inpuang tawh mi? " zira'n a lo ti a.

"A hranpain a inpuang lo, a tawngvaih chang hian a sawi thin a niang, kei chuan ka va hmuh ve ngai loh vangin ka hre lo. Chung vel chu nurse leh doctor ten an hre ve sia.." A ti a. Sawma chu tang mai rawh se, a den tlat. A rilru lam chian loh dan hi a thisen chhuah zawngin a kal si a, kan colony tan pawh a hlauhawm. U mala pawn a sawi ve fuk fuk tawh tak kha. 

Chaw kan ei tur chawhmeh kan hun vek tawh hnuah Lukira chaw khawrh tum chuan, "Ehe!" a ti nghek. Cooker chu a lo ruak hiai! Zira kan melh vat a. Nui vur vur chungin, "Thiangi vang vek, a lo kal lai khan chhum ka tum mek a. Ka theihnghilh daih a nih kha" a ti ta a. Kan han nui leh rih. Kan chhum chawp ta chuk chuk a. Ril a tam over lo bawk a, a zia tak a awm e. 

Zanin chu len loh kan tia, lehkha zir ve tan a ngai tlat. Lukira phei chu tihtur a dah khawl tam tawh sia, a rilru hah thu a sawi leh reng tawh. Khuma thu mu paha zirlaibu ka en lai chuan Lukira chuan call a dawng a. 

"Teh hlawl chuan" a ti sup a. A pick up ta a.

."Aw Alicia" a ti thum chhak a. Lehlam tawng ka hre thei lo. 

"A va zia lo ve. Rsa inhruaitir la..kei chu lehkha ka zir a.." A tih danah Alicia chu khawiah emaw a awm a ni ngei ang.

"Akhai! Rsa'n min thik palh ang. Bakah ka bialnuin a lo hriat chuan a la naupang sia, a rilru a na palh ang" a tih lai chuan ka lo nui ruh ruh a. 

A dah hnuah, "Hmeichhia chu an á ngawt mai" a rawn ti hlawl a. 

"Engah maw?" Ka tih chuan, "Tihian anmahni duata ngaihsaktu an thlauhthla a, an duhna lamah an kal a. A tawpah an mal hunah an duh duha tihkual theih emaw min ti hian min rawn be leh a. Ka va kal awm lo tak" a ti nuah nuah a. A sawi dik tho mai ka ti.

"Khaw nge a awm a?" Ka tih chuan, "Zampuimanga thlanah mawle. A thiannu birthday an lawm a, an rui vek sia. Nuam a ti lo a niang" a ti a. 

"Va hruai ve lawk mai la" ka tih chuan, "La single ila chuan pawi pawh ka ti lo. Bialnu ka nei tawh a, ka ex lo phurh kual vel kha tul ka ti lo. A ex te dang be mai rawh se " a ti hmak. A fair ve khawp mai. Bteii'n hria se a lawm vur vur khawp ang. 

Alicia chuan keimah min lo call leh a. Ka la lo phawt. Zira a call ve leh. Ani chuan a laksak ta a. 

"Lukir,in nu hlui chu va hruai lawk mai la..a mangan em hi" a ti dût dût a.

"Va tlawmngaihsak mai la..i petrol man ka tum ang" Lukira'n a lo ti. 

"A va buaithlak e aw. Luliana tirh dawnin hman zanah lal Esi a hruai ve bawk si, thiante ex theuh kan hruaisak aniang chu. Lehpekah Lukira'n Luliana ex a hruai ve thung ang" a ti nuah nuah a. A insiam sawk sawk a, a chhuak ta a..Lehlamah Alicia, Esi te ho nen hian inkawm ho vek kan ni thin bawk a. Inensan ringawt chu a har ve bawk a ni. 

Ka chhiar leh mawlh mawlh laiin, "Nenei hi i ti tawh em?" lukira'n a rawn ti hlawl! Ka nui chhuak hawk. 

"Ti lo. A duh lo" ka ti nghut a. 

"Ka ring reng a'h, hmeichhe danglam tak a ni. Ka farnu ang deuh hian ka en a, tina miah suh. Lulian" a ti sauh sauh a. Sawi tawh ang khan Lukira hi a nu leh pate an inthen ve tho a, Nenei nen hian an dinhmun hi inanna lai a awm ve a, va ngaihsakin va duat hluak lo mah se, a ngaihtuah ru ve hle tih ka hria. A lawm pawh ka lawm reng a ni. 

Zira rawn let lai chuan ka lo muthlu duar duar a. Lehkha zir loh laia nghate rep ang kar nisi, zir veleha mutchhuak lo kal thin hi a ngaihna pawh ka hre lo e a. Zira thawmin min tiharh a. 

"A thiante ho an rui sia, an mawl em anih kha. " a ti lung lung a. 

 Tluangtea'n, "Aman a in ve em?" A lo ti vat. 

"In nang, Alicia hi chu a fakawm ve tlat, tiang lamah hi chuan" a lo ti mai a. Lukira chu ka ngaihbel nge ngaihtha huai hmel a pu. 

"A inchhirzia pawh a sawi a sin" Zira'n a ti zauh a. 

"Nge a inchhir ve ngawt?" a lo ti hmuk a.

"Rsa khan a lo ngaizawng nasa sia, a zarin a leng peih si nen. Tluangtea lah a rawn leng khat sia, bakah ka pms lai vel khan Rsa khan min ngaihsak sia, ka rilru kha a let but but a ni ber. Mahse, min lo kawp reng sia, a nau ngeiin min hrilh a, ka zak bawk si. Tluangtea chuan chawh min ti ngawt ang a tia" Zira chuan a ti a. 

Lukira a ner sak. "Vawi tam a pms ka tuar dai a, khatih lai taka a danglam kha chhuanlam a nih chu. A rukin ka na rei asin. Mipa ka nia ka tilang duh lo a ni mai. Nia, ka hua, chawh erawh ka ti hran lovang. Rsa zawk chu ka hua, ngaihzawng nei reng chungin kan nih lai rengin min chhuhsak a. A nei tak tak duh pawh ni hlei lo. Alicia chu a vanduai hle mai" a ti a. 

"Lo letin ngaihdam dil che se engtin nge?" Ka lo ti a.

Min rawn melh zawk a, "Nangmah ngeiin mi dang theihnghilh nan mi dang hmang suh min tih kha i la hria em? Tunah hian ALicia bulah let leh ta ni ila, Bteii hi ka hrereng tawh dawn tho. Chuvang chuan na taka min hliamtu ai chuan, mi dangin min hliam laia min tihlima beiseina min neihtirtu zawk hi ka vuan ang. Bteii ka phatsan thei lo" a ti ta dap dap a. A puitlingin a thu a ril hle. Kei pawh ka ngaihdan chiah chu ni mah se ,ka zawm hleithei lo va. Mapuii vangin hmeichhe dang dang ka kawp kual a, Mapuii theihnghilh a hnëkin amah nen ka khaikhin a, an tla zawk zel si. Tikhan na ka siamsak a, ka kalsan leh a. A pawi ngawt mai. Hmeichhe pakhat vanga hmeichhe dang ka lo hliam thin kha..tunah erawh Mapuii chu beisei phak a nih tawh loh piah lamah mi danglam tak Vanneihsangi ka tawng ta a. Harsatna tam tak a tawhna hian kan inzawmna a tinghet ka ti dawn nge, a lamah min pawt hnai zel a, Mapuii hi lo thlawi lehin tlawm takin ka kiangah rawn let dawn mah se, Nenei kut ka vawnna hi ka thlah theiin ka ring tawh bik lo. 

Rilruah a lut hleithei tawh si lo va, Mu turin ka inbuatsaih ta ringawt. Ka tawngtai laiin Ka phone a ri a. Ka tawngtai zawha ka en chuan, Nenei a lo nia. Ka call back nghal.

"Apuia te wardenin min lo be leh a. Atea thaw a hah leh nasa a niawm e. U Tri, ka inthlahrung lutuk, mahse, nang lo chu tih ngam ka nei ngang si lo va, khawngaihtakin min va hruai chhuahpui thei ang em le?" A rawn ti ta a. A inthlahrung tih a hriat ngawih ngawih. Bialpate laka inthlahrun vak a ngai lo sin le aw. Nene..

Dar 10 a la ri lo deuh a, ka tho ta vat a. Ka thiante pawh thil awmzia ka hrilh a. Chanchin inhrilh leh turin ka chhuahsan ta a. Thiante pawh hi an zahawm thin ka ti. Keiman buaina tawk lo mah ila, Nenei vang hian an phar buai ve fo si a. Inthlahrun a na duh viau. 

Ka va thlen phei chuan a lo insiam diam tawh a. Gaby erawh Kimi te inah a dah. A mu nghet thin a, bakah Kimi te hi chu a ngainain a duh ve riau a. A ngaihtuahawm lo turah ngai ang. An warden ten damdawiinah an phurh chhoh tawh vangin Damdawiin kan pan nghal a. A vawt sûk tawh mai. Ka khur titih. Kan va thlen chuan, warden a call nghal a. A chungah an lo awm tawh a, kan tlan chho ve nghal a. Warden leh hmeichhe pahnih bakah Apuia te chu an lo awm thap mai.

"Engtin nge?" nenei chuan a ti khur dat a. Apuia'n a rawn kuah nghal var. 

Warden chuan, "An en mek a, a tha turah ngai ang" a lo ti ve mai a. Hmeichhe pahnihte pawh chuan, "Nia, ngaihtha deuh khan awm rawh" an lo ti ve bawk. Kan han ding ren rawn a. Nurse pakhat hi rang taka rawn tlan chhuakin room pakhatah a va lut a, Oxygen bur a rawn hnuk phei rawk rawk a, a hmanhmawh dan leh a chet dan chuan ngaih a va titha lo em..Nenei chuan ka ban a vuan nghet ngang mai. Apuia pawh a meng ve kar mai. 

Warden chu a va lut zuk a, ka zui ve nghal. Nenei te erawh lo awm rih turin ka ti a. Atea chu oxygen an lo hiptir mek a. A thawk a sak hmel hle. A hnar leh a kaah an vuah tup bawk si. An chet buai dan atangin a serious tih a lang reng mai. Doctor bulah, "Ka pu, a tha ang em?" Ka ti ta ráwih a. Min rawn melh zawkin, "Khawngaihin pawnah lo la awm rih ta che u" a ti dam thlap a. A mitmenga hlauhthawnna niawm tak kha ka hmu lian riau. Ngaihtha vak loin kan chhuak leh a. 

20 mins velah Doctor a rawn chhuak ta a. A tarmit chu lain, Warden chu a melh a. Ngui zet hian, "Theihtawp kan chhuah a, mahse, kan chhan thei ta ngang lo a ni" a ti ta a! Nenei a rak tuar. A hmui a hup leh vat a, a tlu tur chu ka lo pawm bet vat! Lalpa, a va mak ve mawle! Vanneihsangi hi i hua em ni? ! 

(Incomment hi Tpa leh a thiante hian an lo chhiar ve zel a nia. Nakinah an phalna thlapin an thlalak ka rawn tlangzarh hluai ang 😊