Vanneihsangi 13

VANNEIHSANGI (13)

Ziaktu: Toni Râlte

Zosangi ruang chu Lunglei lamah phurh phei a ni ta a. A va lainatawmin, a thihdan a va runthlak tak em. Inkawm tam hman lo mah ila, a ngainatawmin, kawm kha a nuam ve reuh asin le. Tehlimi pawh a tap nasa khawp mai. Police ho bulah chuan, "Nimin chawhnu khan," Zanin chu ka rawn haw lo maithei aw. Chaw kan ei khawm dawn a" a rawn tia. Kei pawn ngaihthat lohna ka nei hran lo. Tihian a ruang hian min deng ta mai si a" tih bak sawi tur a hre lo. Sawma hi ka la hmu miah lo. Nu Saii pawh a hmel hmaiah a hlauthawng tih a hriat hle. A fapa leh Zosangi an inkawp ve tih a hre sia, a fapa lah tunah hmuh tur a awm der si lo. Sawma hian Zosangi a that lo a nih pawhin amah pawh hi a dinhmun a derthawngin, tunah te hian a lo thi fel ve der thei tlat! Mahse, Nu Saii te chuan sawma awm loh thu erawh an sawi ri ngam lo. A ruka zawn an tum niin ka hria. Zosangi ruang bulah khan a phone chhar a ni a. Police lamin an la ta a. An chhui chhuak vat turah ngai ang. Huatna nasa tak nena thah a ang tlat. Kei phei chuan a ruang pawh ka hmu ve chuang lo, hmuh pawh ka chak nek lo ve a. Mipa e ti lo hian ráp zawng pek hi ka tina riau a. Ka awm a tinuam loin ka khua te hial a sik thei tlat zel. Nenei pawn a lo hre ve a, Mahse, eng em em a sawi hran lo. "U Sawma bak a ni lo vang" tih bak. A ruka kan ngaihdan chu puanzar a ni chai si lo. Sawma lah a khuangcherbo hmiah bawk si. Rilru a buai ru ve hle mai. 

"Zanin chu lo leng lo mai rawh aw.." zosangi ruang an hmuh atanga ni 2 a liam hnuah a rawn ti a. 

"Ngati nge?" ka tih chuan, "Nuteii leh Pa tluanga te an zin leh tawh sia, Eli hian a thiante a ko khawm leh a. Nuam i ti lo vang" a rawn tih chuan, mak ka ti deuh a.

"Eng nge a awmzia?" Ka ti he haw a.

"Danny leh Eric te hian an hau ngai si lo va. Zanah Nuteii awm loh chuan a thiante a hruai lut a, an bengchheng thei sia, zu te pawh an in thinin ka hria.." a rawn ti a. Eli a la naupan nen mak ka ti ru hle. Eric pawn hauh ve awm ania. Danny tak pawh a va ngawi thei ve mawle.

Nenei min ngenna angin ka leng ta lo va. Lehlamah engtiangin an chet thin tih erawh ka hre chak angreng. Mahse, va kal hram erawh ka tum lem lo. Rilru pangkhing zeta thutthlenga ka mut laiin, kawngka chu zawitein a rawn inahwng a. Lukira leh Zira lah Kimi te inah an leng leh daih si. Ka va hawi phei chuan ka tho nghal zawk. Sawma chu bal leh tawp em em, lu thur zet hian a rawn lut ta zan zan a. Ka melh reng ringawt. A mitmeng chu a dava-in a buai hmel kher mai. Ka harh chhuak zawk a.

"Sawma, khaw nge i kal daih a? I chhung te an mangang asin" ka ti vat a. Thutthlengah chuan chauh hmel zetin a thu hnawk a. Chhuat lam a bih ngur bawk. A awmdan chu a pangngai lo tawp mai. Ka phone chu hmetin Nu Saii number ka hmeh dawn lai takin, "Ti suh call suh" a rawn ti bul bul a. Chhuat lam a melh reng bawk si, mak ti zeta va melhin,"I hawn a ngai. An ngaihtuah lutuk che" ka ti a. 

Mitmeng á zeta min rawn melhin,"Zosangi kha ka thah a nih kha" a ti ta riap mai. A mitmeng buai zet chu a rawn fim ta tial tial a, huatna leh thinrimna hian a rawn thlak a. Awm a tinuam lo angreng hle. Mahse, chutia chet la tur ang zawng pawn a awm hran lo. 

"Hawh, haw ang. Ka chhohpui ang che" ka ti a. A che chang eih lo, Nu Saii number chu hmet chhuak lehin a ring ral ral a. Mitmeng sen rûm hian Sawma chuan min melh kul a. A zámawm lek lek. Mahse, a dik tlat lo, hetia awm ngawt chu. Nu saii'n ,"Hello" a rawn tih rual chuan ka phone chu a rawn beng thla bawl mai. A chet ranzia chu kei pawn mak ka ti. Ka hamhaih laiin min bawh thlu tawp a, ka hrawkah a rawn rek ta chat mai. Ka tluk rual khan ka fim hman a, a chak khawp mai. Mahse,ka rilru a fim hman tawh vangin tal vak loin , harsa ti zetin,"Sawma, ti suh..hetiang chu..i hawn a ngai" ka ti tawk tawk a. Nu Saii'n a lo hriat phak ngei ka beisei. Call kha a la hman miau a. 

"Zosangi ka thah ang khan ka that ve dawn che. Nang mihring vang hian ka nun a chhe vek. Vanneihsangi kha min pek mai tur a nia. I phal lo vei a, zawnga, thi rawh..thi puar rawh" tiin a rawn rek nget nget a. Thawk a sak tan. Ka mangang phat mai. Ka hneh meuh si lo, hmanraw han chuh mai tur lah a váng si, a kut chu phelh tumin ka pawt táng táng a. A nghing eih lo. Ka mitthlaah ka chhungte leh Nenei te an rawn lang hman nia! Tihian ka thi tlaw ringawt dawn a nih hi tih thlengin ka ngaihtuah hman..ka khawhmuh a thim tial tial a, ka mit sulh mai. Mahse, "Ehhee!" Tia rak thawt thawm vangin ka meng leh dat a. Sawma chu an rawn pawt leng lawp niin ka hria. A ri nghal bawrh bawrh a. Lukira'n min rawn chawi tho nawlh a. Ka khuh a chhuak, ka khuh hleithei si lo, ka hnung a chul a. A beng thek thek bawk. Nu Saii rak chul leh tap pur pawh ka hre ruai ruai. "Lulian,i tha em? Hei.." Tia ka bianga a rawn ben thek thek chuan ka lo hawi á deuh hû a. Min ngaihtuah hmel taka Lukira'n min lo melh ran ka hmuh chuan ka thi lo tih ka hrethiam nghal. Ka khuh nghal bawrh bawrh a. Tui a va la vat a. Zira erahw chuan Sawma chu a hnekin a beng niin ka hria. Ka ngaihven hleithei lo. Tui ka in takah chuan ka zia ta deuh a. Nu saii a rak tuar tuar a. "Zira, a tawk..awii..a thi ang e" a ti lawm lawm mai. Lukira chuan zira chu a va pawt dawrh a. A duhtawk ve thei chauh.

U mama a rawn lang ta bawk a. Pa Rama erawh a zin lai a ni a. Sawma chu chhuatah thisen nen inchiahpiah nuaihin a mu reng a. Mahse, a thi lo. Zira khan a khawih na hman hle mai. 

"Ani khan Zosangi a that a ni" ka ti hawk a. Nu Saii'n "Awii! Lalpa" a lo ti sap.. Mama chuan a nau chu a kai tho a. Lukira nen an kuah chho ta a. Nu Saii chuan,"Tp,inkhawngaihna ka ngen e. Khawngaihin engmah sawi lo hram r'u aw. Ka fapa hi a á tawh a nih hi.." A ti lawm lawm a. Ka ngawi reng. KA rilru a buai rih. 

Kimi chhungte an lo zin avangin an nuam ti lo an rawn haw hma hlauh a lo nia. An lo haw kha Nu Saii kan ina lo kal tum nen an lo intawk ve chiah a. An lo lut ho ta a nih kha. Tlem atlemah ka thi thelh a nih kha le..ka tha a khur der der mai. Sawma chak dan em em kha ramhuaiin a pui a nih ka ring. Thil thlen dan ka sawi chuan, Zira chuan, "Kan hrilh ngei tur a ni. A chhungte tan pawh a hlauhawm alawm le" a ti hmiah mai. Lukira erawh a ngawi reng. Inchhung khat an ni ve si a. A awm ve tho. Kei erawh ka rilru ka la hmang mumal thei lo. 

Sawma chu damdawiinah dah luh a ni a. Engtin tak awm zel ang maw..

Hetih lai mek hian ka Nenei pawn buaina a lo tawk ve tho a lo nia. Min lo call a, ka la thei si lo chu Lukira a lo call a. 

"U tluangte,U Tria ka be thei lo. Inbulah a awm em?" A lo ti tap tiau mai. Ka phone kha thutthleng hnuaiah a lo tawlh lut daih sia, ka lo ngaihven hman tawh lo a ni. 

Phone chu min pe a. "Aw nene" ka tih rualin, a rawn tap hawk mai. 

"Eng nge thleng?" Ka ti vat a.

"U Tri, Eli'n min hnawtchhuak a. Keimah vangin Danny leh Eric an insual phah bawk. Gabby nen kan in chhakah kan awm" a rawn ti ta mai. 

"Ka lo kal" tih leh phone daha tlan chhuah ka rual ta nghal a. Ka thiante ka tihrilhhai ngawt ang le. Chak zetin ka lim puat puat a. Ka thleng phei rang kher mai. Pi Ruati te in chhak kawngsirah Gaby paw chungin a lo ding ran mai. Ka mittui a hnàm sawk mai. He hmeichhia hi a va vanduai tak em..

"Lo chuang rawh" ka ti vat a. Ngawi rengin a rawn chuang ve mai. Gaby erawh a harh lo a nih hmel. Kan in lam panin ka tlanpui leh a, ka tlan chak vak lo. Gaby kan phur tel bawk nen .Ngawi rengin kan inah kan inzui lut a. Zira leh Lukira hmelah mak tihna a rawn lang nghal.

"An hnawtchhuak a" ka ti hul hak ringawt. 

Nenei chu inthlahrung em emin thutthlengah a thu a. A mittui tla chu a hru zauh zauh bawk. A nu thihna thla hnih em pawh a la liam lo va, an vakvai tan der chu a nia. Kei a bialpa ve tehchai lah hi ka nepin, ka hnenhnanpuiawm loh si..eng nge ka tih zel ang ka hrethiam ta lo khawp mai. 

Zira chuan, "An va mak ve..eng nge thleng? Nene" a ti ta a.

Insut hraihin,"Ih, zantirah gaby ka mutpui nghal daih a. Eli khan a thiante a rawn hruai lut leh a. Ka mut tawh hnuah daih, "Bawngsa va kang rawh" tiin min kai tho a. Zu sehhmehah an duh a niang. Ka va kansak a. A hmin har sia, Cookerah ka phit hmasa a. Gabby a lo harh ve leh bawk si, ka va thlem chu a rawn kal a. 'Nangni unau hi ka hne lutuk che u. He naupang lah hi tap reng mai..tikhan dah la, va kang hmin vat rawh" min tia. Gabby paw chungin ka va kang leh a. 

A hmin dawn hnai tihin a thianpa niawm tak a rawn phei a. Min rawn kuah ve ringawt a. Zu rim a nam bawk. Ka lo hau a. Mahse, min la kuah lui zel a, gabby hlau chu a tap leh a. Ka thinrim khan ka fian ken lai chuan a luah ka khawng ta a. Eli bulah a va zualko nge ni, a rawn phei a. A zu ken laiin min rawn theh a. Ka ngawi reng. Danny a rawn haw a, kan buaina vel a rawn hmuh chuan, Eli chu a kam khat ve a. Eli chu a ang ta hrep a. Erica a rawn haw ve chiah a, a nau anhla a hriat chuan, Danny nen an intibuai zui ta mai a ni. Eli chuan, "Buaina siamtu i nih hi. Chhuak rawh. Ka nute awm loh hlan hi chuan ka thu ber. Chhuak la, rawn let tawh suh" min ti ta a. Chen luih kha ka chak tawh bik lo bawk nen..ka chhuak ta mai a ni" a ti ta a. A tawp lam phei chu ka ngaithla thei tawh lo va, bathroomah ka lut daih. Ka thinrim leh rilru na chuan bang ka hnek bur ringawt. Amah aia naupang daih Eli'n chhiahhlawh ai pawha hnuaihnung zawk maha a tir kat dawr dawr leh a hmusit lutuk chu na ka tihpui lutuk. Chu Eli chu hremna pek ka chak takzet a ni. 

Ka chhuah leh chuan, "Gaby kha va mut rawh.ka khumah" ka ti nghut a. Thuawih takin a va mut ve mai a. 

Zira chuan, "Kawng dang a awm tawh lo. Inru mai rawh u" a lo ti a. Titak zetin a ni a sawi ni.

Lukira erawh chuan,"I nuteii rawn hawn hunah an rawn ko leh tho ang che. Nene, pasal i nei lo a nih chuan i naute nen indang mai r'u, kan inpui tawn zel mai dawn nia. Puan i thui thiam a, dawrah i thawk thei bawk. In awm thei ve mai ang" a lo ti thung. 

A bulah ka va thu a. A banreka hmer salhin, "Kan innei mai dawn nia. Ka nute chu naktukah ka be mai ang" ka ti nghet charh a. Chutiang thu chu a beisei lo tih min rawn melh háw danah a lang. Mahse, vakvaia tihduhdahna tuar zel turin ka kaltir dawn lo. A nuteii te chu fel mah se, saw inah sawn hlimna a hmu lo tih a taksa tlahniam dan atang pawn ka hria. Kawng chu a awm ve zel mai ang. 

"Ka naute nen chuan tu chhungkua mahin min duh lo vang" a ti sap a. 

A hmui a khur dar dar, a tah a chhuak a. A zak ve si tih ka hria. Ka kuah thawk a. A insum zo ta ngang lo a niang, a puak ta rawih a. A tap ta hlawp hlawp mai. Zira leh Lukira pawn an khawngaih takzet tih ka hre thei. Kei tak pawn insum harsa ka ti takzet a ni. Duat takin a sam ka chulsak a. Tap bawrh bawrh se a zia mai ang ka ti a ni. 

"Anu tal kha la dam se. Tihian ka vakvai lo tur" a ti tiau a. Ni e, A nu, fate hmangaihtu kher kha an la mamawh ngawih ngawih laiin engvangin nge laksak an nih bik? Pathian pawh hi a fair lo a ni tih rum rum a awl hial mai. 

A tlai ve deuh tawh bawk nen. "Ka khumah Gaby nen mu ula, Thutthlengah ka mu mai ang" ka ti a. Ka khumah Gaby te nen kan leng dawn si lo. A inthlahrun hmel viau mai a. Mahse, tihngaihna awm hek lo le. Mu tur chuan a insiam ta phawt a. Kei pawh rizai lain thutthleng sei chu ka dawh zawm a. Ka sei ve angreng sia, a nuam zawk zawk vak lo vang. Mahse, Nenei tan chuan ka tuar ve mai aniang chu. Vanneihthlak takin Gaby chu a harh zui ta miah lo a. Nenei pawh a muthilh ve theih ngei ka beisei. Kei erawh ka tal ka tal a, ka hmalam hun tur ka ngaihtuah a ni. Naktukah ka nute ka biak ngei a ngai ang. An rilru pawh a buai ve khawpin ka ring. Nupui nei tur anga ka insuangtuah chuan la hun lo chu ka ti ve reng, a bul berah eizawnna ka nei lo phawt. Mahse, MA hi chu nupui nei chung pawn ka pass ve thei maiin ka ring a, Kan khaw HSS lama ka thawh theih chuan, tlem azawng ka la lut ve ang a. Chhungkaw chawm nan chuan a tlem teh naa, tihdan chu a awm ve mai ang a. Nenei te unau li han chawm tawp chu anmahni ka huphurh lam ni lo se, ka chhungte lakah inthlahrunna chin ka nei lo thei bik lo a ni. Nu Sangi boral hma lutuk hi a pawi teh vawng vawng a nih hi. Thinlung leh tih takzetin ka hma lam hun atan ka tawngtai ve hial kha..

Gaby tap thawmin min tiharh a. Dar 7 a lo pel tawh. Nenei chuan eirawng a lo bawl mek a. Ka thiante an fel em a, inthlahrung leh kimki em em loin a awm ve theih phah a. A lawmawm. Ka inthiar laiin ka nu chu ka be ta a. Engkim ka hrilh ta vek a, pawi a tih ve hmel hle. 

"Bawiha, tlangval i ni tawh a, i hmalam hun chu i thlir thiam tawh ngei ang. An mangan leh baihvai ber laia phatsan kha chu thil thiang pawh a ni lo ang. Mahse,nupui nei thei dinhmunah i ding em tih ngaihtuah la..amah Nenei pawn rilru dangte pawh a lo pu ve thei a. Tha takin fim takin sawidun ta u la, keini lam chu min vengthawng suh" a rawn ti dap dap mai. Ka thla a muangin ka nu ka ngaihlu sawt mai. 

Tukthuan ei hmain Nenei chu Nu Ruati chuan a lo call ta a. 

"Chanchin ka lo hria a, a zia lo em mai. Vawiin chawhnuah kan rawn haw dawn a, engpawhnise, lo haw leh phawt mai la, mateii pawh kan zilh ang a. Khatia mi ina awm ringawt zawng keini tan pawh a tlawmthlak e.." A ti a. 

Nenei a ngawi reng. 

Lukira'n, "Nene, haw leh phawt la ka ti. Haw tihah engkim sawi fel turin, ka duh dan chuan in dang ve tawp r'u, i naute nen..i nuteii pawh sawipui la. Kimi te inbul pawh a la ruak reng ,in awmna atan chuan a tawk lek ang. Tpa nena inneih ngawt pawh aman engmah a la thawk bik bawk si lo, inla naupang ve tho bawk si..i nuteii te nen chengho lo va ,inpuihtawn dan zawng zawk r'u " tiin thurawn a pe a. Kei erawh tawng sual ka hlauh vangin ka ngawi reng. Nenei chuan thawk la hawkin,"Aa..inneih lam kha chu nizan pawn ka ngaihtuah nasa a, ka la duh lo. Ka sawi awmzia chu amah U Tria ka duh loh vang ni loin, an tana phurrit nih ringawt kha ka duh bik lo. Ka naute ka phatsan thei lo va, inhuam em em mahse, tun dinhmunah chuan, inneih em chu ka hreh rih a ni. A hrethiam tho ang amah pawn" tiin min rawn melh a. Sawi tur ka hre chuang lo. Ka thinrim lo va, ka lawm em em chuang lo bawk.

Zira pawh chuan, "Ni e, i nuteii te an hausa a, a sum pai ang zawngin inpuihtir hmiah rawh. Inawm thei em em ang. Tihduhdah tuara saw ta awm reng ai chuan zalen taka retheih pawh a nuam daih zawk ang" a lo ti ve a. 

"Nia, ina hawn leh chu a ngai hrim hrim, kan bungrua te pawh lak a ngai dawn alawm..tihian chaw ei kham ila, ka phei leh mai ang..Danny ka be lawk ang a" a ti a. Danny pawh a ngaihtuahawm ve tho mai, a nu fa bik ten an sual ngam chu a nia. Amah kha chu misual tak niin ka hre lo. 

Hnial tur em em ka nei lo bawk a, Nenei chu a sawi ang chuan awm phawt mai se ka duh ta mai. Lehlamah , nep ka inti ru deuh. Ka bialnu mangang leh baihvai taka a awm laiin neih pawh ka nei ngam rih lo chu a nia..aa neih chu ka ngam. A duhthlanna te a zir pawh a ni ve a. Bakah nei lui ta ngawt ila, kan chhungkaw mitmei a veng dawn lutuk a, nuam a ti dawn rih lo. 

Classah pawh eng dang ka ngaihtuah thei lo. Ka va thlah leh zuai kha a nia, An inah erawh lut lo tura min ngen vangin ka lut ta lo. Class pawh ka tlai phah nghe nghe. Msi'n ,"I va ngaihtuah mûk tak" tiin min rawn nghawk sawk a. Ka phu zuk mai. 

Lunch break laiin Msi chu engkim ka hrilh ve ta a. A khawngaih ve ngang a niang a mittui a tla lek lek nia. 

"Awii in dang chu luah daih rawh se, theih ang angin kan pui dawn nia. Ka ni hian puanthuina dawr chu a nei a, a thawhtir ve thei maithei sin. Bakah in ang deuh a nia, a nau pawh chu a hruai thei maithei, ka lo sawi ang" a ti ta mial mial a. A sawi ringawt pawh nise min hnem khawp mai. Rini pawh kha la biak leh a ngai a ni. Engtin emaw kawng a hre leh maithei asin. Mahse, Esi leh Zira inthen hnu hian kan inbe ngai ta mang lo va, a reh khawp mai. 

Kimi pawh ka be lawk sa a. An in lehlam, Nenei te luah hlui kha lo hauhsak sa deuh turin, a tet deuh vang hian tu em em mahin an en vak lo a niawm e. An unau tan chuan a tawk khawp ang. Nenei'n chanchin engmah a lo la sawi lo va, va call kha an buai lai te a nih takin tiin ka insum rih. Zanriah ei kham hma deuhin a lo call ta chiah a. Ka kham zui nghal daih. 

"Aw " ka ti sup a.

"Nuteii nen chuan kan inbia a. Ka harsatna engkim ka sawi ve a. Mahnia in luah hran ka duh thute ka sawi ve hmiah a, Pa Tluanga nen an inrawn a. Chuan, rem an ti ve ta mai. Eli pawh an hau a, mahse, a nu leh pa a zah lo em a, an hau tha vak ngam bawk si lo, chenhoa inngeih loh ai chuan tiin in luah hran mai chu pawi an ti ta lo. Chuan, Nuteii hi a inthiam lo em a. Apuia te unau school kalna hi chu ka tum zel ang a tia. A tha mai ka ti" a rawn ti ta a. Ka lawm ta deuh e. An lo sawi buai vak ang tih kha a hlauhawm ve deuh a.

"A lawmawm nasat chu. Kimi biak vat a ngai anih chu.. Lungngai lo phawt la aw. " ka ti a. Zangkhai takin min rawn chhang a. Ka awm a nuam huai e. 

Tichuan, Nenei te chu, kar tawpah an insawn ta a. Bungraw thiarna tur vel Nu Ruati ten an ngaihtuahsak vek bawk a. A zia e. Kan va pui tho a. Keini pawn. A bul atang bawkin kan inrem leh ta, insawn reng chu a ning ve tawh khawp ang. Khaw thim hmain kan inrem fel thei a, Nu Ruati chuan, "Tp, ka inthiam lo takzet a ni. Ka fanu hi ka enkawl thiam lo pawh a niang a, Nenei hrehawm ka hlauh em vang zawkin tihian in hrang ka luahtir ta mai a nia. Ka ensan dawn tihna a ni lo a nia..nang pawn min lo hrethiam hram hram dawn nia. Chuan, ka va ngaihvenin ka va kal chilh reng hman dawn lo va, nangni hoin inlo tuamhlawma inlo tawiawm loh chuan tiraw" a ti dap dap a. Nu ruati hi chu nu sual a ni hauh lo mawle.

"Ngaihtuah reng reng suh, kan lo buaipui vek ang" ka ti ve ta nghut a. Nenei chu Sum fai sing nga lai a pe a. Tin, bungrua eng emaw zat a pe bawk. Nenei chuan sing 3 chu bank-ah dah hmak a tum nghe nghe. A tha, nakin zelah a la tangkai dawn chauh si a. A tawi zawngin Gaby nen chuan an khawsa ve ta naw naw a, Apuia te erawh hostelah an la awm zel a. An zirna senso, Nu Ruati'n a tumsak vek dawn tho a, kha lam chu a lungngaihthlak lem loh e. Kei pawh ka thla a muang tan a, ka nute pawh thil awmdan ka han hrilh leh ta vek a, "Tikhan buaipuiin puih a ngaih apiangin tawiawm zel la, Pathian zarah inkutsuih hun zawng a awm em em ang" an rawn ti a. An rilru a danglam tawh nia ka hriat avangin ka lawm viau mai. Zantin kan phei dial zel a. Nenei nen pawh kan inhmuin kan inchenchilh zing telh telh a, ka ngainain ka duhna a zual tulh tulh mai. Msi khan a ni chu min lo biaksak naa, a va hla deuh ëm a, bakah Nenei hi puanthui thiam pangngai a ni bawk si lo nen, a inthlahrung a. In lamah puan han thui ve ngawt dawn se, tu vak mahin an hre bawk si lo. A laklawh ta riau a. U ZIkpuii kan biaksak leh a, tlema a hlawh tisang vein, a restaurant-ah chuan a thawk leh ta mai. Amah Nenei pawn, "Ka thiam zawng leh nuam ka tihzawng a nia. A pawi lo, hlawh tlem mah se" a ti mai a. Gaby erawh Tuikuala nau awmna school-ah a dah ve ta a. A zangkhai phah hle. A ban rualin a lam haw mai zel a. U Zikpuii lah a lo fel, mi dang zawng aiin a ban hmatir a, an dinhmun a hriat khan a khawngaihin a nau ang tak takin a en ve a, a lawmawm tak tak a ni. 

Keini pawh lehkhazir lamah kan insawrbing ve tan a. Zan lam erawh a len phei loh theih loh. Tehlimi kha a lo phei ve leh tawh a, mahse, a u te nupa an rawn tel tawh a. A u hmeichhia hi chuan engmah a thawk lo a, a pasal zawk hi he lamah a thawk a, a remchang phian mai. Zosangi thihna kha chhui chhunzawm zel a ni a. Nu Saii te min ngenna nasa tak vangin kan la au chhuak thei lo, Nenei vangin kan buai leh ta bawk nen, Mahse, kan au kher a lo ngai lo. Zosangi phone-ah khan Sawma nen an inbiakna a awm ve nual vangin Sawma chu biak a ni ta tho a, chutih rualin, Tehlimi hian rinhlelh rukna a lo nei ve tlat mai. A chhan pawh Nu saii khan Sawma awm lo kha Zosangi te inah khan a va zawng miau a. A ruala inngaizawng awm ta lo chu Tehlimi chuan a rilru a han fim takah khan a ringhlel lo thei ta lo a niang e. Police bulah a sawi ta a. Rinhlelh tur tingin Sawma lah mi á ang maiin Damdawiinah a awm bawk si. Amah Sawma erawh a inpuang duh bik lo va, thubuai erawh ziah luh a ni ta tho a. Nakinah court lamin an la chingfel ang chu..Sawma erawh dam lo , natna khuma mu a nih vangin an la hling rih lo mai chauh a ni. Man vat se, táng daih se a tha. A hlauhawm tlat!

Sunday zan dar 7 leh a chanve bawr vel a ni a. Chhun lamah ka va len nilen tawh vangin leng lo va, lehkhazir ka tum ve a. Ka inchhawp hnawk ve rum mai. Mahse, ka inbih tak tak hmain Esi'n min lo call a. 

Tap tuau chungin, "Tp, Zira ka be ngam si lo va, khawngaihtakin min lo hruai thei ang em? Falkland-ah ka awm a. Chaw ei chhuah kan tum a, mahse, Zari te hoin min kalsan vek. Keimahin mjn hnutchhiah" a rawn ti ta mai a! Mak ka ti angreng hle.

"Aw le, lo awm rawh. Ka rawn hruai ang che" ka ti a. Zira pawh ka hrilh chuang lo, hmanhmawh takin ka tlan chhuak ta a. A awmna hmun a sawi chu ka thleng a, a rawn chhuak vat. A mit a sen rám mai a. A tap tih ka hre mai. "Lo chuang la" ka tih mek laiin, "Ehee!hei pui! Vanneihsangi bialpa, thingtlang tlangval lukir kha a ni chiang. He lai hmunah te a kal thiam ve ni maw.." Eli awah chuan hmuhsitna a lang chiang kher mai. Mipa sang leh lian lam bakah hmeichhe pahnih leh mipa pahnihte nen an ni. Esi te chaw eina tur kawta an awm ve danah chaw ei chhuak tur an nih a rinawm.

"Es, lo chuang la" ka ti ta daih a. Eli chu ka chhang peih lo. 

 Esi pawh a rawn chuang ve mai a. "Nenei chu a rilru a na awm mang e, hmeichhe dang ka kawpsan e te i ti ve khanglang a. Inla luck ve lutuk" tiin a rawn nui zui leh har har a. Ka va melh zauh, a mitmeng chu a phi deuh chiai a, a harhfim lo tih a lang reng. A thawmhnaw inbel atang pawh chuan nula nungchang tha zawk zawk chu a ni hauh lo mai. A mal tawp dawn thleng kekawrbul a ha teu mai a, boot a bun a, jeans jacket nalh angreng tak hnuaiah kawr dum a ha bawk. A hmel phei chu tha se, a pian chu a nalh bawk a. Nula nalh tak te pawh a ang ve maithei. Mahse, a vanduai a. A hmeltha lo..

Ka chhang duh miah lo, engahmah ngai duh miah lohin ka bike chu ka tinung a, "Heii, Thingtlangpa, i beng a ngawng em ni? Ka biak che chuuu..Nenei i kawp vel a, ka hrilh vek ang. Chuan, ka hmuh phaka i awm hian ka mood i tichhia..mi thing deuhte hian ka nunram an tichau thin.." A rawn ti leh vak vak a. Khi suk chungin ka tlan nal nal. Thil pakhat ka rilruah a awm. Eli hian min hmuh phat atangin min mil lo tawh, Nenei bialpa ka ni tih a hriat hnuah phei chuan ka len ve apiangin Nenei hi a hnuaichhiah zual ziah. A awmzia chu He hmeichhia hian min ngaizawng! Chu chu ka ring nghet tlat..engahmah min ngai lo tak tak nise, min enliamin min nuih liam mai mai ang . khatianga mi dang hmaa min tihzah a tum danah, kei hian ka ngaihven si lo va, a chapo em vangin na a ti a. Min tihnat vea min ngaihnepzia lantir a tum. Khatianga min tawngkhum nasat poh leh min ngaihzawnzia a puangzar telh telh tihna..eng emaw tak zawng ka la ti dawn chiang e..lo inring rawh..Elizabeth..

"A mak! Ka biak che chuu" Esi awrawl chu a vin lam hret a ni. Ka lo ngaihtuah tui a talángin a sawi engmah ka lo hre lo.

"Eng nge i sawi?" Ka ti hu a. Ka tlan chak thawkhat viau. 

"Kan inah min thlah tlang rawh aw ka ti" a rawn ti nghek a. 

"Aw le" ka ti a. Inbe tawh lo chuan kan tlan vuk vuk a. Mhase, kawngsira bike leh car lo inhung a hmuh chuan, "Ding lawk" a rawn ti thawt a. Ka ding dawt. A chhuk vat a. Kei pawh ka side tha a. Ka chhuk ve mai bawk. A thiante chu an nih ka ring. Car kawngkhar chu a kik kauh kauh a, reivak loah glass chu an rawn hawng a. Zuk dah deuh pahin, "Zari, huri, tenawmnu" a zuk ti ta piap mai. Car kawngkhar a rawn inhawng nghal thuai a. Mipa lian vak lo, sa nghet lam a rwn chhuak a. A hnungah Zari chu sam hnawk niaihin a rawn chhuak ve bawk. Esi chuan a kek bu ta lawp a, Mipa chuan a lo thelh vat, kei pawh tlan pheiin Esi chu ka va pawmbet ve nghal a. 

"Zawngi, engvangin nge min rawn keh ringawt a. I va zak lo ve" Zari chuan a ti hlawih hlawih a. 

Mi dang pawh hmun dang atangin an rawn chhuak. An vaiin mipa pathum leh hmeichhe pathum an ni. 

Esi chuan khur hlawk hlawk chungin,"Min tihzahzia leh i tenawm dan hi maw..ka bialpa i lo ngaizawng a, dawta min puhin i hruai hrang a. Engtin nge i tihtheih zawk? Keimahin khutah min hnutchhiah a. Inlo mak ka ti khawp mai. Inpawi ka sawi tawp si lo va" a ti a. A hnuk a ulh deuhin ka hria. A awm ve tho mai. Tin, zu rim a nam a. A lungpuam ve pawh a ni maithei.

Zari chuan dak deuh vah hian, "I chantawk anih kha..i rui em alawm..min thik tlat a, nia..i bialpa hian keimah zawk min duh a, chutah chuan eng nge sawi buai theih i neih?" A ti ta khar khar a. 

"Dawta min puh vang a nih kha..aw..nei rawh.nei zo vek rawh. Engatanmah ka ti lo, chu zawng ai chuan ka thian anga inchhal sia hetia min phatsan thei hi mak ka ti. An sawi kha a lo dik a nih hi..a thiante bialpa a be tha thei lutuk an tih kha..tenawmnu, nangma pualin ngaihzawng i hmu zo ve lo mi?" A ti ve ta hrep a. An inbakkaih leh mai dawna ka hriat avangin, "Kal ang. Insum rawh" tiin ka kai a. 

"Kha, Tpa nen khan ni mai r'u, ani pawn a duhtui loh em kha.." zari chuan a rawn tikhanglang a. 

"Ngawi mai teh. Nang ang hmeichhia kha mipa ten kan ngainep teh mai nia" ka va ti ve hmak. Vanneihsangi avang pawn he nu hi ka mil lem lo a ni. Esi chuan Zari bula ding mipa chu, "Samuel, Zari dawtsawi i awih a, i bialnu hi min kalsanin tihian i bialnu thiannu nawm i chenpui thei a. Mipa pawh i ni lo, mawngkawhur i nih kha..tuaia" a ti ta zëk a. Samuela chu a ding zum zút ringawt. Mahse, "i ex i be leh a, in inkawp leh a nih kha..ka lawm bik lo aw..esi" a ti ve ta nghut a. Esi a nui hawk.

"Ka ex thianpa ania, hei Tpa hi, kan inbiak tawh lohzia leh kan inkawp tawh lohzia hretu a ni e.." A ti nghat a. 

"Nia a sawi dik, ka thianpa te chu an innei tep" ka lo ti ve vat. An awmdan zel ka hre chak ve bawk nen..Samua hmel chu a danglam deuh a, Zari a va melh a, Zari lah a lo meng hniam raih si. 

"Tu emaw zawk zawk hian dawt insawi a ni..a tawk,a zahthlak..haw ang u.." Tih leh car pan a rual a. An va mumal lo tak..an rui angreng bawk si. Esi pawh chu bike-ah rawn lawn lehin kan tlansan ta a.

" ka thawl huai mai" a rawn ti sap a. 

"Ngaihdam dil che se i kir leh ang em?" Ka ti a.

."kir leh ang, Phuba la turin.." A ti a. Ka lo nui ringawt. 

Esi ka thlah zo, in ka luh rualin Nenei'n min lo call nghal. 

"Khaw nge i awm?". A rawn ti chang fak.

" inah ka lut chiah, Zira ex Esii kha ka thlah a" ka ti ta duah a. 

"Tak tak em? Ngati nge falkland-ah te i kal?" A hma aia nem zawkin a rawn ti a. 

Thil awmzia chu ka sawi ta vek a. Eli'n a hrilh tih ka hrethiam nghal mai. Amah pawn a sawi leh tho a. 

"a va pawi ve, U Esii chu, aw Chung vel chu ka lo sawi mai mai. Eliin min lo hrilh sia, ka thik ve tho sia" a ti a. Kan dah ta rih. 

Zira te lo hawn chuan Esi te vel chu ka hrilh a. Kimi nen inzui ve viau tawh mah se, Esi kher hi chu a thinlungah a la thi hlen thei bik lo aniang e. A ngaihtuah hmel hle. "Zari mai mai chu, a va tenawm tak. Kan nih lai pawn kawm tawh suh, ka ti ziah a. A kawm lehzel alawm.." A ti hmarh hmarh a.

"Esi hi chuan a la duh reng chein ka hria" Lukira'n a lo ti ve a.

A nui tawi tak mai.

"Lal esi chu ka duh lo pawh a ni lo. Insiamthat a tum lo em a ni. A pawi ngawt mai" a ti ve ta nge nge a..

Lehkha pawh ka zir ta mang lo. Ka mu ta daih. 

Zing dar 6:17ah ka nuin min lo call a. Ka mutui viau asin mawle..

"Bawiha, I pu lungphu tha lo a chhuak leh a. Tun tum chu a serious riau mai a. Kha lamah khan kan rawn phur thla dawn a. Class pawh vawiin chu kal lo mai ta che" a rawn ti a. Ka thaw hawk. Ka pu hi a hrisel viau nain, a lungphu tha lo hi a khat tawkin a chhuak leh thut thin a. A pawi tak tak a ni. 

Class ka kal dawn chuang lo tiin ka mu leh a. Ka harh meuh chuan dar 7 a lo pel duai tawh. 

Ka tho a, ka thiante chu chanchin ka hrilh ve a. An ni erawh class an kal dawn a ni. Nenei ka va hrilh ve nghal a. 

" A va pawi ve..mahse, U Tri, Nenei hi an rin ang ka ni lo tih lantirna remchang tak a nih i ring em? Rem i tih chuan" a rawn ti sap a. Ka nui suk mai. 

"Vanlal Confi, lantir mawlh teh aw.." Ka va ti a..

"Min mawlh reng thintu tihkianna tha tak a nih ka beisei tlat a ni" a rawn ti leh a. A nui sen sen hmel ka mitthla vang vang mai. 

(Hman leh hman loa ziah a nia. A tawi rawn ti lo ula aw. 😊