Vanneihsangi 12

VANNEIHSANGI (12)

Ziaktu: Toni Râlte

Ka phone ka thlauh lo chauh. "Eng a?! Eng nge i sawi?" Ka ti tuar a. 

A tap nghal hlawp hlawp a, an ri nuai nuai bawk. Phone chu a ri khep a, a tawp daih. A va mak mai mai e aw. Ka nu chuan makti angreng taka min lo enin, "Tu nge a ?" A ti a. Ka chhang lo. Nenei number chu ka dial nghal a. A ring ral ral hnuah mipa aw hian, "Hello" a rawn ti a. A aw chu a patling angreng. 

"Eng nge thil awmzia. " ka ti nghal thâwr a. A bengchheng deuh nge a kalsawn a, tlemin thawm a zawi deuh.

"A zia lo khawp mai. Pi sangi a boral a ni" a ti thum dut a.

"Engtin" ka ti vat.

"Stroke a niawm e. A rang khawp mai. Theihtawp kan chhuah a, kan chhan hman ta ngang lo a ni" a ti a. Nenei nuteii pasal anih ka ring ve ringawt.

"Nenei kha a biak hleitheih si loh a, chuan, naktukah an vui ang tiraw?" Ka ti a. 

"Aw..zaninah kan lumen ang a. Nenei a khawngaihthlak khawp mai. A thian ten in rawn tawiawm theih chuan a lawmawm viau ang" a ti a . Pa fel tak a nih hmel e.

Biak rei vak a inthlahrunawm vangin ka dah ta a. Chaw ka ei zawm ta lo. Ka ka a chawmawlh vek mai. Mak ka tih bakah awih harsa ka ti viau. Nu Sangi kha nu hrisel leh thothang tha tak ni khan ka hre si a, ka va khawngaih tak em. Ka nute chu thil awmzia ka hrilh ve zung zung a. Mak an ti ve hlein ka hria. Kei chuan Zira leh Lukira te ka be nghal a. A thawng ve khawpin ka ring. 

"Nu, ka chhuk thla nghal mai dawn sin. Nenei a mal dawn lutuk" ka ti a. 

"Aw ni e, i chhuk a hun tep tawh tho a. Bakah a khawngaihthlak em mai. Mami, i u thawmhnaw vel kha va khungsak rawh" a ti zung zung a. Kei pawh ka insiam zui nghal. Ka rilru a mang deuh a, tawng vak nachang pawh ka hre lo. Ka pa pawn engmah a sawi hran lo. Mami'n ka bag a siam zawh chuan, ka in en leh thuak thuak a. Ka nuin ka chawhmeh hawnthlak tur a lo siam ve mek bawk a. An siam zawhah bike chabi lain ka chhuak ta nghal a. Ka nu chuan min lo thlah a,"Bawiha, puitling takin zuk awm ang che. Engkimah a nachang kha zuk hria la aw. Chanchinte min lo hrilh leh dawn nia" a ti mawlh mawlh a. Kan invai liam ta. Phurh ka nei lo bawk a, ka speed a sang viau. Eng dang mah ka ngaihtuah thei lo achha a ni e. Nu Sangi chu engtin nge a thih theih? A mak ka ti em mai. Kan haw hma deuha a luhai leh rit bur reng te kha heng vangte hi a lo nih dawn hi. Ngaihthat lohna kha kan nei hauh si lo. Nenei te unau engtin nge an awm tak ang? Chu thu ka ngaihtuah chuan ka ding deuh dawt, mahse, ka tlan leh nghal a . A naute pawh kum 8 leh kum 3 lek an la ni a. Ani lah a la naupang si. Engtin nge an khawsak zel ang le? Lehlamah vanduaina karah pawh an vanneih ve lehzel nachhan chu Nu Sangi nau ten an hmuchhuak hman hi a ni. An in hluiah te khan chhiat tawk ta se..ngaihtuah ngam pawh a ni lo. Nenei nuteii te an khawsa thei a, an unau pawh ngaihtuahawm lutuk chu an ni lo ve thei tho bawk. Mahse, kan pahnih inkar te hi a danglam phah ang em? Ngaihtuah tur ka va ngahin ka rilru a va buai tak em. 

Rin aia hmain Aizawl pawh ka thleng a. Kan in lamah ka chhuk phawt a. Chawhmeh leh engilo vel chu ka dah fel a. Ka inbual leh zuai bawk. Ka harh ta vâk mai. Mahse, ka buai rukna chu Nenei nuteii te in awmna ka hre miah lo. Zira'n min lo call a, An ni pawh an rawn chhuak ve dawn chiah a niawm e. Vui hun an rawn nang hman dawn tho a, a tha vek e. Thiantha hi chu an va hlu tak em..

Nenei tihbuai leh chu hreh viau mah ila, an awmna lai ka hre si lo, ka call leh ta nge nge a. Aw chhang tiak hian min lo chhang a, a tap nasa tih a lang reng mai. Ka va lainat tak. An awmna lai bawr vel ka zawh chuan, bah nuai hian a sawi a. Ka hre thei mai. Ka chhuak zui ta nghal a. Ka va thlen chuan an lo awm nual tawh a. An lo zai thát thát mai. Ka zuk lut ve ta ráwih a. Thalai an lo thahnem hle. Ka zak ve angreng. Mahse, ruang kila meng bui lák, ka bialnu ka va hmuh chuan zahna a bo, ka pan nghal chat a. Ani pawn min lo hmu rang khawp mai. Min lo hui nghal var a. A bulah ka va thu ve chawt . ka thut rual rualin ka darah a lu nghatin, "U Trii, anu hi a mak lutuk" a ti khur dat a. A insut zui hlawp hlawp. Hnuk a ulh ve ta tlat, tih vak ngaihna erawh ka hre hran lo. A kut ka humsak ngawt ngawt ringawt. Nu Sangi chu puancheiin an lo khuh zan a. A hmai pawh an chei, a dam lai hmel nen danglamna vak a awm lo. Mitthi a ni ta ringawt mai chu awih a va har ngai ve aw. Apuia leh Atea te a nu sira hawihai zeta an thu ka va hmuh lehzel takah phei chuan ka mit ka khap sak sak ringawt. An va vanduai chungchuang em..Nenei chuan, "Anu hi ka duh lo, ti nge hetia a awm? U Trii, kaitho rawh" a ti leh tiau a. Mittui a hnám lo thei lo. 

Kuah a, a duhtawkin tap se ka duh zawk. A intap thawl ang a, a ipik zualpui pawh a reh mai ang. Nu Sangi nau niawm tak, hmeltja tak mai pawh a tap hawm hawm reng a. "A u, kan inhmuhna a la rei si lo, ka va ui tak che em..kan tan nu leh pa i nih thin kha. Ti nge kan inhmuh veleh hetia min kalsan? ENgmah pawh ka la tihsak si lo che a..mawh, a na em mai" tiin. Ni e, a tan pawh a na ngawt ang. An inhmu rei lo si. 

Zing dar 2 bawr velah Nenei chu ,"Va chhuak harh ang hmiang" ka ti a. Apuia leh a naute chu an la tawh a, an muhil aniang. Min hnial bik lo chuan min zui ve ta mai a. Keia pawh ka zun a chhuah ve tawh bakah zial zukte pawh ka chak tawh a ni. Zun in an siamah chuan ka zung a. Ani erawh a ding reng a. Boruak chu a thiangin a vawt lek lek mai. Bench lo awmah chuan ka thutpui a. 

"Thil thlen dan han sawi teh" ka ti ta a. Ka hre kimchang lo em a ni.

A insut faih a. " Ih, chawhnu lamah khan a lu a hai leh a, zanriah erawh a rawn ei a. Naktuka incheckup pawh a sawi nghe nghe. A chaw ei kham a kam thuah tur kha a pai awt awt a, ka lo vuan vat. A lu a dawm a, thutthleng seiah a thu ta a, 'I nuteii han ko teh, ka awmdan a dik tlat lo' a ti a. Ka tlan chhuak nghal. Nuteii nen kan chhuk leh chuan chhuatah a lo tlu a, Apuia ten an lo ko mek a. Rang taka bawihsawmin, Nuteii'n damdawiin panpui a sawi nghal a. Damdawiin kan panpui dawn lai pawh khan kei chuan a mar ka hmu tawh lo. Mahse, beiseina ka la nei a. Kan thlenpui a, an han en vel khan kan tlai thu leh a chahthlak tawh thu an sawi ringawt mai a ni. Tun thleng hian ka la awih thei lo" a ti ta sap sap a. Ka chil ka lem khawlh ringawt. A kut chu ka humsak a,"Nene, engpawhnise, i pawm a ngai. I nu chu a awm tawh lo. I intih pachan a ngai, i naute tan hian" ka ti a. A insehruh a, "A damchhungin vanduai reng rengin hun a hmang a. A hlim aiin a hlim loh kha a tam zawk thin. Ka duhthusamah chuan engtikah emaw anu kha nuamsa takin ka la awmtir ve ang tih kha a nia..ka tithei ta lo a nih hi" tiin a tap khur leh ngat ngat a. Ka lo kuah vawng vawng ringawt. 

"A pawi em mai tiraw?" Ka ti zawi sup a. A mittui hru chawt chawtin, "Ka naute leh nang hi chu awm lo ula, ka thih ve nghal ka ring. U Tri, ka mawhphurhna hi a sang si, ka zo dawn lo. Min phatsan lovang tiraw?" Ngenngawl zet hian a ti khur dat dat a. Nghet zeta lo kuah betin,"Chutiang thu sawi suh. Ka phatsan ngai lo vang che" ka ti nghet charh a. A mitmeng bui lák, sen rám chuan min melh vawng vawng a. 

"Ka lawm e..engtin nge kan awm zel dawn pawh ka hre lo" a ti a.

"I nuteii te nen in inhmu hman hlauh a, lehlamah chuan in vannei tho asin. An niin engkim an rel fel mai ang. Puitling takin awm la aw. I bulah ka awm zel dawn a nia" tiin ka fuih ve ngial a. A bu ve nghat mai.

Khua pawh a rawn var chho a, Nu Sangi erawh a mu tlat mai si. Ka rin aiin thalai tlaivar an tam. Khawpuiah tlawmngaihna a dal tawh an ti fo naa, a lo la dal lem lo a nih dawn hi. Nenei chu khaw var dawnah a han tap leh rawi rawi a. A nuteii nen chiah Nu Sangi thisen zawmpui ruang kil an awm a ni! An lainatawm takzet mai. 

A tawi zawngin sawi ila, Nu Sangi chu vui liam a ni ta a. Zira leh Lukira te pawn vuina hunserh an rawn nang hram e. Nenei an khawngaih ve hmel khawp mai. Phum zawhah reivak lo kan thu khawmuang ve a.

"Nene, kan va haw phei ve phawt mai ang aw. Zanah kan lo kal leh ang. Chaw ei rawh aw " ka ti a. Min chelh ngam bik lo nge, kawt thleng min rawn thlah a. Anuteii te nen pawh min inhmelhriattir tawh a, a nuteii chu a felin, nu Sangi nen an mizia a inan hmel khawp mai. Tichuan, zan lama phei leh turin kan in lam kan pan ve ta phawt a. Ka chau ve khawp mai. Zanriah pawh tihtham ka ei lo. Ka ka a tui vak tlat lo. Ka inbual chuan ka harh ve deuh hawk a. Han chhin sek pawh ka muhil tlang ang tih ka hlau sia, ka meng tang tang mai. Kan insiam mek laiin Sawma a rawn lut hlawl mai.

"Nenei te inah inkal ve dawn mi?" A ti a. A lo hre ve tawh a ni ngei ang.

"Aw..lo kal ve la" ZIra chuan a ti a. 

"Zosangi ka va sawm ang e. Ka nu te pawh an kal tawh" a ti sawk sawk a. Vawiinah khan Nu Saii te hmel ka hmu miah lo va, zan lamah an va lang ve hram dawn a nih awm chu! Khati khawpa boruak nei tawh an nia. An va kal hram chu an fakawm ka ti tho mai. Sawma chuan zosangi a va sawm a, kan lo nghak. Lehlamah Nenei laka a rilru a danglam ta chu ka tan chuan lawmawm tak a ni. Zosangi pawh chu a va sawm chhuak thei ta ngei a niang. An rawn inchhawm phei a, kan chhuak ta dial a. Sawma motorin kan kal ta a. 

"Nenei chu ka khawngaih reuh khawp mai. A la naupang sia" Sawma chuan a ti a. Zira'n a lo zawm ve nghal zat. 

Zosangi chuan min rawn en a. "Tp,i bialnu kha tiraw?" A ti há a. Sawma nen kan boruak engmah a hre ve lo tih a chiang.

"Umm " ka ti nghut a. Lukira'n thu dang a rawn sawi ta a. Sawi thui kha a hlauhawm tlat..buaina a awm leh palh ang. Kan thleng a, ngawi rengin kan lut a. Nenei te hnaihah kan va thu a, Nu Saii te pawh an lo thu langsar viau. Vawi 3 vel kan zai hnuah chhungkaw aiawhin Nenei nuteii Pi Ruati pasal Pu Tluanga chuan thu a sawi a. A felin a dam thlup mai. Pi Ruati'n a u a zawn nasat thinzia te, an tet lai chanchin tlem azawng bakah Nu Sangi chhelzia leh a naute a hmangaihzia a sawi a. A ngaihnawm hle. Pi Ruati chu a inhru zauh zauh reng a. Nenei erawh a hul ta deuh nge, chhuat lam bihin a thu ngawi ran reng mai. Zai pawh a nuam viau e. Dar 9 rik hma deuhin nizan lamah lumen a lo ni ve tawh nen,thalai an chau ange tiin ban an rawt ta a. Kan la thu khawmuang ve a. Nu Saii chuan Nenei chu rawn panin, "A pawi ngawt mai. Engpawhnise, lo lungngai lo ula, a inpuih theihna zawngah chuan engmah sawi hreh loh tur aw" tiin cheng 500 clip a pe a. A tam hmel khawp mai. He nu mizia hi mak ka la ti tawp thei lo. Khati khawp khan Nenei a huain kut hial a thlak a. Tunah lem a tha leh duam duam roh si. Nu rilru chhia leh kheuhbeuh tak chu a ni lo, a fapa a hmangaihna hian a hruai khaw lo ve mai zawk niin ka hria. Sawma pawn a va hnaih hrut hrut a, "Nia, Nene, a pawi khawp mai. Mamawhna min neih chuan sawi hreh suh aw" a ti ve duam duam a. Nenei laka a rilru kha a bo ta vek niin ka hria. Zosangi nen hian innei daih se a tha ang. A hmeh pawh an inhmeh riau mai. Khawhar in riak tur an rawn input luh thlengin kan thu ve a. Kan hawn dawn chuan Pi Ruati leh Nenei te chuan min lo thlah a. Ka banah a vuan chawt reng mai. Min ngai a, min thlahlel tih ka hria, mite avangin a bulah ka la awm tam thei si lo. Theih nise riahpui maite pawh ka chak, mahse, mi mitmei ven a ngai ve bawk si. Kan inmang tha rih ta phawt a. 

Ka taksa in khum a dek chiah chuan ka chauhzia ka hrechhuak nghal. Ka mit lah a thip hlur bawk. Msg-in ka va mang tha a. A seen lo. Ani pawh a chau viau ang. Ka muhil ta bawrh bawrh a. Dar 8 velah ka harh hlawl. Class kal lo va va len nilen leh ka tum a. Lukira te erawh class an kal ngei ngei a ngai. Kimi te pawh vawiinah an lo haw dawn a, Nu Sangi boral chu mak an ti ve khawp mai. Ral ngei pawh a tum ve kha. Chaw eikhamah ka inbual fai a, ka insiam zui nghal. Keimahin ka va tlan phei leh ta vang vang a. Min mamawh ber lai a ni a,tlanchhiatsan ka tum lo bur. Ka va thlen chuan tukverh bulah thuin a sam huh hniang chu a lo huih tha mawlh mawlh a. A mit a la bui deuh lák a, nimin lam ai chuan hmuh pawh a nuam ta deuh e. Apuia te erawh ka hmu lo. Thil an la hrethiam lutuk lo va, lehlam zawng tak chuan a zia ang. Gabby erawh a nu a ngheng tam si a, a tap deuh reng a niawm e. A lainatawm thlawt e. 

"Tp, i fel thin hle mai. I rawn lang leh thei a. " Nu Ruati chuan a ti a. A nui sáng bawk.

"Fel pawh ni lo, a ngai sia " ka ti ve mai a. Ka bulah rawn thuin, "Hei i hriat angin Nenei te unau hi heti mai hi an ni sia..engtia ro han rel chi nge pawh ka hrethiam lo..amah Nenei lah hi han sawipui vak theih a la ni rih si lo va" a ti siam siam a.

"Ni ngawt mai. Ka hrethiam lo khawp mai. Mahse, nangni inawm a, ka thla a muang ve tawp" ka ti ve luam a. Nu Ruati ti ve mai ang, ani hi a pasal nen fa pahnih an nei a, an fa u zawk hi Nenei aiin kum 3 velin a naupang maithei. Tin, Pu Tluanga hian fa bik pahnih a nei tho bawk a. A fa u zawk hmeichhia chu Delhi-ah a awm a, Nu Ruati enkawltu ti mai ang, Nu Sangi'n a chhuahsan hnua Delhi-a a zuk awmna nula leh Pu Tluanga hi unau an lo ni reng a! Delhi atanga intawnga innei zui ta an niawm e. Pu Tluanga nupui hmasa pawh hi a la dam a. Pasal a nei ve daih tawh nghe nghe. Pu Tluanga fa hmasa mipa zawk erawh hetah Nu Ruati te bulah a khawsa ve a. A fel viauin ka hria. Tichuan, nu Ruati te inah chuan an fate pathum leh an nupa nen an khawsa a nih mai chu..Pu Tluanga hi sumdawng a ni a, an in leh lo atang pwn an hausa thawkhat tih a hriat viau. Chuvang chuan Nenei te pawh ka ngaihtuah lutuk lo. Nu Ruati lahin a ngaihtuah hmel si a. 

Nenei nen kan awm hran deuh hnu chuan, "Nuteii te chuan an ina khawsa turin min tia, mahse, dik tak chuan kan chhangchhe si, ka inthlahrung , bakah kan la innel em em si lo va, an fate nen pawh" a ti a.

"Nia, an bula awm tur kha chuan an tih che u ka ring reng a. Awm ula ka duhpui bawk che u. I naute nen ringawt chuan, engtin nge inkhawsak ang?" Ka ti a. A heh a pet a, "Ka hre bik lo le. Apuia te hi chu ngaihtuahawm em em an ni tawh lo va, Gabby mawlh hi hna thawka chhuahsan chi a ni bawk si lo.." A ti niah niah a. 

"Nia..ka hrethiam tawh lo..hna chu nei tawh ila, ka nei ang che" ka ti nghet charh a. Min rawn melh zauh a, "Ka naute hi an puitlin ve deuh hma chu pasal ka neihsan theiin ka ring lo..u tri, hei hi a nia hrehawm ka tih.. Min nghah a ngai dawn a, i thei ta lo a nih pawn ka hrethiam ang che..i chhungte tan pawh ka iaiawm lehzual ngawt ang" a ti sep sep a. 

"Chu lam ngaihtuah suh. Kei pawh hna la zawng tur alawm ka nih, ka hmanhmawh hleinem. Bakah i naute thlahthlam turin ka nei dawn hleinem che. Kan pahnihin kan enkawl dawn alawm..thil ngaihtuah vak vak suh" ka ti a. Za lo zetin a nui sak a. 

Chawhnu herah ka haw phei ve ta a. Rilru a la mang deuh tlat a. Ngaihtuahna pawh sen thiam a har rih. Nenei te unau vakvai tur ngaihtuah fuh palh chuan, ka nei rawih mai dawn em mawni le te ka ti thut thut a. Retheihna tho kan hmachhawn dawn bawk si. A nuteii te bulah chuan khawsa ve phawt mai se, hunte a kal ve zel ang a, Apuia te unau an len deuh tawh hunah chuan chuti lutuka ngaihtuahawm pawh an ni bik lo ang a. Gaby pawh school te a kal ve ang a ti ten ka ngaihtuah kual a. Nu Sangi boral hma lutuk chu dem loh tur tur dem a awl leh thin. Nenei ka lo duh thuk tawhzia erawh ka hriatchian phah khawp mai. Tin, phatsan pawh a inthahrunawm letling. Ka nute ka fak, Ka rilru hliam zawngin eng thu mah an chhak chhuak lo va. Nenei an khawngaihzia leh tawiawm zel turin min fuih reng zawk. An rilru a danglam ve ta te pawh a niang e. Ka tan chuan a lawmawm khawp mai. 

A tuk lamah chuan class ka kal ve ta a. Kan internal test result pawh an lo tar vá mai. Msi zarah ka hmu sang ve reng mai. Msi tak erawh a rawn kal lo va,ani hi kan inbe zui leh miah lo mai a. Nenei te buaina kal vel vang nen, ka lo ngaihven hman bik lo a ni. Chawhma chhung chiah kan kal a. A zia khawp mai. In ka thlen veleh Nenei ka be nghal a.

"Lo call che ka lo tum deuh a, class inla kal ka ring sia" a ti a. "Umm sawi teh" ka ti nghal a.

"Ih,Apuia leh Atea te hi hostela dah an tia, kei leh Gaby hi Nuteii te inah kan khawsa bawk ang a. Tiang chuan ro an rel a" a ti mawlh mawlh a.

"A tha tho alawm tiraw? Eng nge i ngaihdan?" Ka ti a.

"ka hrethiam lo. Apuia te hi an la te ve bawk sia, ka ngaihtuah deuh" a ti a. A dik reng mai. 

"Ni ve tho mai. Mahse, hostela an awm chuan an ngaihtuahawm loh zawk lo'ng maw? I tan tak pawh" ka ti a.

"Nia, an tih ang chuan awm phawt mai ila" a ti ve mai a. 

"Zanah ka lo kal dawn em?" Ka ti a.

"Lo kal hram la ka duh. I awm hian ka hlim" a ti a. Ka khawngaih zual sawt mai. 

Zanriah kan ei a. Kimi te pawh an lo haw tawh bawk a, kan rualin an kal ve dawn a ni. Bike kan kawl vek tawh bawk a. Kalna tur chu a harsa lem lo e. Nenei bulah ka thu leh chat mai. Kimi te a hmuh rual chuan, Nenei lung a chhe zual nge, Kimi kuahin, "U kim, Anu a awm tawh lo. A mak i ti ve em?" A ti a. A tap faih faih mai. Kimi pawh chuan mittui hru chungin,"Nene, a pawi tiraw? Rin harsa ka ti khawp mai. Tap bawrh bawrh rawh" a ti a. A phanchang ve tawh bawk a. A hnem thiam khawp mai. Zai pawh a nuam leh hle. Nu Ruati ka bulah a rawn thu a, Zawi te tein Nenei te unau chunga an rorel dan chu a sawi sep sep a. Ka lo bu nghut nghut ringawt. Nenei thisen zawm awmchhun an ni tawh a, an thu chu ngaihpawimawh loh theih pawh a ni lo vein ka hria. Apuia te pawh laklawh deuh mah se; an thiante school a ni bawk a. Hostelah an lut thei dawn e. Khawngaihthlak viau mah se, Nenei tan a zangkhai phah lo thei dawn lo a ni. 

Chutiang chuan Nu Sangi thih cham an hman zawhah Nenei te unau chu in chungah an insawn chho ta a. Apuia te unau pawh hostelah an lut a. Lehlamah anni hi chu phir an ni bawk a, an awmdun tawh chuan tu vak mah an ngai lo a, a zia. Zirna lamah erawh an tlahniam deuh mai thei. Nenei leh Gabby te pawn chhungkaw thar an han nei ta phawt chu a nia. Engtin tak awm zel ang maw? Keini pawh class kan kal leh ta tauh tauh a. Msi pawh a rawn kal leh a. A dul erawh a la lang lo viau. Amah a cher leh pan mi a lo ni bawk nen. Sawn man an thing tawh a, a mipa chu a lo tang ve kawkalh vel a niawm e. Mahse, Msi'n chiang kek kawka a han sawi takah chuan a tang na ngam ta lo va, a nupui lah chuan Msi te chu a lo ankhum zēk a niawm e. A pasal chuan a la lerhsan leh awm sia. Msi nen chuan kan inkawmngeih zual a, ka bulah a inbunruakin keiin ka thiam ang tawk tawkin ka lo hnem ve bawk a. Kan inngaina ta phian mai. Kan inngaizawng emaw ti te pawh an awm nghe nghe. Ka ngaipawimawh lo. Nenei nen kan chungchangte a kip a kawiin ka hrilh ve bawk a. A khawngaih ve khawp mai. 

Nu Sangi boral atangin thla khat a liam ve ta reng mai. Nenei pawh ka va rim ve zeuh zeuh a, sawi tawh ang khan Nu Ruati te nupa hi an fel em em a, an fate lah an felin an polite hle bawk. An la nau ve deuh bawk a. Pu Tluanga fa bik mipa Danny nen pawh kan innel tawh viau. Ani hi kei ai chuan a nau deuh a, a felin Nenei pawn a nuteii fa bikte ai mahin a fak thin. Nenei chuan awm mai mai ai chuan tiin puan a thui ve tan ta a. A inzir rei hran lo, a nu a chhun nge ni a thiam ve ta mai a. Nu Ruati'n Gabby len deuh hunah zirna pangngai taka la zir tur leh dawrte pawh an la hawnsak tur thu te a sawi a. A lawm ve hle. Gabby nen an la inawm a ngai rih si a. Nakkum lamah chuan Gaby pawh school kaltir ve an tum nghe nghe. Nu Ruati fa bik ti mai ila, Pu Tluanga nen an fate kha a u zawk Eli a nia, anau Zawk hi Erica a ni bawk. Sap hming an uar ve khawp mai. A tha vek e. 

Inrinni zana ka va leng chu, Gabby a lo kaih lehpek a. Nenei chuan a pawm a, damdawi an tulh a, a ngik faih faih mai. A va lainatawm thin tak. Danny chuan, "Kan chhohpui mai dawn mawni le?" A ti a. 

Mahse, Nenei chuan,"Aa..tihian a tha ve leh mai ang. Damdawiinah pawh tih vak ngaihna an hre lo" a lo ti a. A sawi ang deuhin Gaby chu a puak hnu lawkah a muhil zui ve ta mai a. A lawmawm e. Thingpui a va lum a, Eli lehkhazir chuan, "U Nene, thingpui hmeh kan nei tawh lo, va lei lawk la" a lo ti a. Dar 8 vel chauh a nia, thingpui hmeh a ngaihna ka lo hre lem lo. Mahse, Nenei chuan hlim hmel pu takin, "Aw le" tiin min rawn mitmei zauh a, kan chhuak dun ta a. 

"Tun angah a hmeh kher a ngai mawni le" ka ti hmuk a.

"A tih dan alawm..a hmeh chhawpsak zel a ngai a" a ti mai a. Eli chu cher sang lam, ngo ve tak, hmel hriam lam a ni a. Nenei aiin a naupang zawk nain a upat hmel zawk mah. Make up a hmang nasa thei bawk a. 

"Nge a tirh ziah kher che. A aia upa i ni lehnghal" ka ti a. A nui hak a. 

 

"Lehkha an zir alawm..a ho lutuk..ka tih ve theih tawk alawm" a ti mai a. Chhang kan lei zawhah kan let leh nghal a. An garage ah chuan ka pawt lut a, "Ka fawp khat tawh che ee..ka fawp lawk dawn che" ka ti ta a. A nui hak. A dik alawm thla khat dawn kan infawp tawh lo. Ka leng zantin bik lo va, ka len zanah lah ka haw tur min thlah hian kawngka bul thleng bak a rawn kal ngai si lo va, a chhungte lah hi an mengrei thei si. Kan infawp ngai lo a ni. 

Bangah chuan ka nem bet a, duhthawh zetin ka fawp ta a. Kan duhthawh hiam hiam khawp mai. A mawngtamah ka tham a, aniin ka nghawngah rawn kuahin a rawn dingdihlip âk a. Kan thaw ham ham mai. A hnute pawh rem leh rem loin ka thamsak nawk nawk kha..

"Tawk" a ti hap a. Kei pawh ka inlahrang ve mai. A insiamtha vat vat a. Kan lut ta a. Eli chuan min lo melh hrek hrekin ka hria. Ka ngaihbel pawh a ni maithei. 

Thingpui a siam zui nghal a. A siam mek laiin Gaby a rawn tap leh si,. A va thlem leh rih a. Thingpui pawh a siam zo hman lo. Nu Ruati leh Pa Tluanga te an chhuak a, Danny pawh ka hmu lo. Gabby chu a rawn pawm chhuak a, a tap rawng rawng a, thutthlengah thutpuiin a han thlem heuh heuh a, kei pawn ka lo pui ve. Eli chu bathroom atangin a rawn chhuak a, "Khawi thingpui chu..ehe!i la siam na nge?" A ti a. A awrawl chuan ngaihno a bei vak lo. Nenei aiin kum 3 velin a naupang ka tih tawh kha. 

"Lawk, hei Gaby a tap leh sia. Ka pawlh vek tawh. Lo inthlit lawk mai ta che" Nenei chuan zaidam zet hian a ti a. 

"tap belh sia a, tap hun lo thei lutuk mai" tia phun zui hlak hlak chungin thingpui chu a siam ve mai a. Ka lo ngei rilru hle. Gaby chu a paw ta nge nge a. A khawsik a awm a nih ka ring deuh. Paw chung chuan kan pahnih in tur chu a va siam leh ta a. Eli khan min siam kep hek lo le. Eli'n Nenei a treat dan chuan min tilawm lo khawp mai. Tawng ve chi a ni si lo. Len pawh ka leng rei ta lo. Gaby a tlei lo nen. In ka thlena ka mut hnuah ka va text a, "Eli treat dan che kha ka duh hauh lo mai" ka va ti a..emoji nui lai lem a rawn dah tuar a. "A ho lutuk. " a ti a.

"Awmpui kha an nei maw ka tia..i nu boral lai vel pawh khan" ka va ti leh a.

"Um nei a, mahse, Eli nen an inhau a, a chhuak daih alawm. " a rawn ti. Eli chu a naupan ngaihtuahin a tawrhhlelhawm dawn chiang mai. 

"Gaby chu a tlei tawh em?" Ka va tih chuan, "Umm tlei e, hei a muhil leh tawh. Taka ka sawi theihnghilh daih a, naktuk chawhnuah Apuia te visit a ngai a, i lo kal ve hman ang em?" A rawn ti a. Engmah ka ti ngai chuang lo va, ka hman thu ka hrilh. 

"Ka mut a chhuak deuh tawh sia, ka mutsan ang che aw.." Tiin min rawn mang tha nghal a. Kei erawh groupah ka nawi leh zuai.. 

A tuk chawhmaah ka pheikhawk ka su leh a, bike ka sil bawk. Thiante pahnih pawh Kimi te in lamah an leng phei leh ta daih. An tlei viau mai. An ex te ve ve lah an reh vang vang mai a. Renew lam a lang ta vak lo nge ni dawn ni..Zira phei chuan, "Nuthlawi mah ni la, ka iai lo che" tih hla a sa deuh reng tawh mai. Kimi hi a felin a zau em a, kei tak pawn ka ngaina. Bteii pawh a la ri phawng phawng tak naa, Lukira hian a siam puitling tan deuh. Sawi awm leh awm loh pawh a hre ve ta viau e. Dar 1 velah Nenei te in lam chu ka phei ta a. Ka inchei nalh ve fu. Ka va thlen chuan, ani pawh a lo inpeih zan tawh a. Gaby pawh a lo bual fai diam tawh. A naute eitur vel pawh a lo lei fel vek tawh a, polythene-ah a lo dah ve ám mai. Nu Ruati chuan min lo be leh sawk sawk a, a fel hi chu a fel a ni. A hmeltha suah bawk si. Kan kal hma deuh chuan, "Kha hei hi warden hnenah deposit la aw" tiin cheng 500 note pali a pe a. Eli lo phei mek chuan, " Khatiang zah zah dahsak an ngai mawni le..bakah Nenei pawn a thawk chhuak ve tho alawm" a lo ti hmarh hmarh a. Nenei inthlahrung hmel chuan min tina zawk thei. Nu Ruati chuan, "Ngai e a, mamawh an nei ve alawm..inkan hun a khát si" a lo ti vat a.

"Kal ila .Nene" ka ti nghut a. 

Kan chhuak nghal. Gaby a pawm a, polythene a pawm tel bawk. Apuia te school chu kan zuk thleng a, visiting roomah kan nghak ta ran a. An rawn inkai phei rial chu hmuhnawm tizetin Nenei chuan a thlir a. Nenei hmel an hmuh rual chuan,an rawn tlan chan chan a. An rawn bawh chuk chuk mai. Gaby pawh zo leh zo loin an pawm nawl nawl a. Ka lo nuih vur vur ringawt. 

Eitur kan kensak chu a pe a. A then chu an ei nghal bawk. "A nuam em? Inschool chu?" Ka tih chuan, an bu nghat nghat a. "U tri, U bena'n min chhan thin a..tuman min vel ngam lo" an ti a. Mipa hi chu kan hriat deuh nge nge zel e. 

Gaby pawh a u te bula a han awm chu a hlim ve kher mai. A u te chu a ngheng chial reng a, a tlei hret hret viau bawk. 

"Lehkha tha takin zir ula, kum tawpah kan rawn hruai chhuak leh ang che u. " Nenei'n a tih lai chuan, Atea chuan, "Nene, anu a rawn kal ve dawn em?" a lo ti phawng mai. Apuia'n a lo nghawk sawk mai. A nu a thi tawh tih a theihnghilh thut a nih ka ring. Nenei erawh a kun daih a, a mittui tla chu a nau ten an hmuh a hlau a ni ngei ang. Kei tak pawh ka hrilhhai angreng khawp mai. Mahse, "Ate, in sir te an fel em." Ka ti ta daih a. 

A ngawih vung vung hnuah,"Sir Msa chu a sual, min vaw thin" a ti ta mai a. Apuia'n ,"Mawina, a ninhlei alawm" a lo ti vat a. 

"Chuan, a u pawh mizo tawng a hmang a, Miss-in a vua" Atea chuan a lo ti ve leh zat. Apuia chuan, "A har em alawm" a lo ti ve vat a. Nenei pawh a naute inhnialna avang chuan a nui ve sak mai. Inkan hun a tawp leh ta mai dawn sia. A naute chu kuahin , "Kan rawn kal leh vat ang. Thu awih ula, lehkha kha tha takin lo zir u la aw.." Tiin an chalah a fawp a. 

Atea zawk chu a lungleng deuh nge a men puau mai a, a ngen ngam chiah si lo. Apuia chuan upa zawk a nih hre takin a nau chu a kai a, "Ate, kha zawn ang..keimah chuan ka zo lo" tiin an eitur kan kensak chu an khai ta a. An lan theih chhung kan thlir a, Nenei pawh a ngui ruai mai. Bike dahna kan pan laiin, "Lo leng ve daih rih ula, duh leh chaw in ei ang a, zanah ka thlah che u ang a" ka tih chuan,"Awii an phal dawn mi?" A ti a. 

"Be chhin la ,i nuteii" ka tih chuan, A phone a phawrh a. A nuteii chu a call ve ta nghal a. "Nute, u Tri-a ten chaw eiah min sawm a, ka ei ve mai dawn mawni..i phal em?" A ti a. A inthlahrung dëk chu ka lainat thin. 

"Aw. a pawi hleinem. Mahse, Gaby kha a buaithlak dawn lo mi?" A lo ti a. "Buaithlak loh e. A tlei lutuk" a ti a. Chaw an rawn ei thei dawn ta e. Phur takin kan in lam chu kan pan ta a. Hreh miah lo va min zui mai nachhan hi a sihhnip vang lam ai mahin min thlakhlelh bakah Eli vangin an in saw nuam a ti vak bik lo niin ka hria. Mahse ,kha lam kha chu sawipui vak ka duh hran lo. In kan thleng a, Gaby pawh eitur kan leisak bawk a. A la tlei hrat hrat viau. Niminah ka nu ten chawhmeh min lo thawn bawk a, sa hmeh dawn lo mah ila; a pawi lo mai. Nenei nen chuan ei rawng kan bawl ta a. Kan bawl ti ila, aman a bawl a, ka lo vil a ni ber mai. Antam a tlak a, Bawkbawn leh samtawk a bai pawlh bawk. Chuan, dal a la awm a, alu a kang leh bawk. A che thang bawk a, a hnehsawh khawp mai. Ka duh ber chi bawkbawn a rawh a, a bawl ta a. Ka ei hnem ngawt ang. Zira te pawh an rawn haw a. Nenei te chaw lo ei tur chu an lawm ve hle mai. 

Gabby chu a hrai hmasa te te a, a mak tak tak, a tlei reuh lutuk. Min nel ve nge pawh ka hre lo. A ei puar hnuah chhuatah pher kan phahsak a, paper leh pen kan chhawpsak a, min ngaihsak lo khawp mai.

 Keini pawh kan ei ve nghal a. Hmeichhe rawngbawl kan ei khát vang nge kan chaw lak a tha khawp mai. Zira phei chu a thlan a tla buah mai a. Kei pawh ei hnem tak ka ni. 

Thleng erawh ka siltir phal lo. Keiman ka sil a. Dar 7 a la ri lo deuh. Thleng ka sil zawha zial ka zuk leh hnuah thlah tumin ka intintuah ta a. 

An in kan thlen chuan Gaby ka pawm a, ani chu a lut hmasa a. A lut chiah tih tihin , Eli aw chang zet chuan, "Bialpa te ina chaw ei, i zak lo mawni le..?" A lo ti thak mai. Kei pawh ka ding dawt. 

"Min sawm sia" Nenei chuan a lo ti dam thlap a.

."Sawm che pawh ni se, a zahthlak. Mipa ina va len du du, a hur thlakthlak lutuk" a ti ta zëk a. Ka ngaihdan a ni ta vak lo a.

"A duh vak lo a, mahse ,ka sawm lui a nih kha.. " ka lo ti ve a. Nu Ruati te chu an inkhawm a niang. Danny erawh a lo thu ve reng a.

"Lo sawm tawh suh. Eirawngbawl tur kan awm lo, ka nuin a bawl ringawt lehnghal. Mi awmpui sawm chhuah chhuah chi a ni lo" a ti hmarh hmarh a. Nenei a ngaihdan leh endan chu a chiang ta khawp mai.

"ka sawm awm e. A bialpa ka nia" ka ti ve ngat. 

"A hrim hrimin hetiang thingtlang tlangval te lo atchilh reng reng..thing lutuk" lehkha zir ve si, a va mawl tak. A mawl ka tih awmzia chu ka awm lai renga chutiang thu a sawi chu a ni. Ka zak hauh lo, a chhan chu Eli chu ka ngaisang miau lo va. Hmelchhia ka ti bawk.

Nenei chuan, "A tawk e. Eli, Ka bialpa chungchangah chuan engmah sawi theih i nei lo ve" a lo ti hmak mai. A dawhtheihnain a zo tawh bik lo a niang e. 

"A nih tak chu..vawikhatmah chaw ei chhuak tawh suh. Mi ina awm i ni tih hi hrereng rawh" a ti tuar a. A room a pan nghal. Danny chuan, "Nia, Nene, ka nu a buai phah lutuk a. Chaw chu ei chhuak tawh lo la a pawi lo. Tp, nang pawn hrethiam la tiraw?" A lo ti ve thlup a. 

Ka rilru a natpui, an baihvaizia an hre ve reng sia. Awmpui treat-a an treat nghal ngawt mai chu..Danny te chuan a duat viau khan ka hre sia. 

Gabby a mut a, rei ka thu lo, kei pawh. A nuam vak lo em a ni. Amah Nenei chuan ka mitmei a ven ka hlauh vang zawkin ka hawnsan ta a. Hna nghet neih vata Nenei neih vat chu ka tihtur ni tain ka hria. A hmabak a thim tan tlat..

Zing ka tho, ka hmai ka phih laiin Nu Saii a rawn lut a. 

"Tp, Sawma hi nizan a rawn haw miah lo, in inah a riak em ni?" A rawn ti a. A riah loh thu ka sawi chuan, "Min lo hrilh ve ziah zel asin mawle..khaw nge maw a awm ang aw. A phone tlang theih bawk si loh" a ti nuah nuah a.

"Zosangi te inah va en teh" ka lo ti var a. A kal zui nghal.

A hnu lawkah a rawn let leh a. "Zosangi nen an tlan ve mawni dawn le..Zosangi pawh nizan a haw lo. Tehlimi'n a be tlang thei bik lo" a ti a. An inru ve ngei a nih hmel e. Ka lawmpui e. 

Class rooma kan awm laiin, Zira'n min lo call a. Zirtirtu awm loh lai a ni bawk a, ka la a. "Zosangi ruang an chhar kha i hre tawh em? News group kha en teh" a rawn ti ta mai a! A dah leh nghal daih. Groupah chuan ka lut nghal a. Hetiang hian an lo post. 

"Tukin dar 10: 40 velah khan Phunchawng-a huan pakhat sirah hmeichhe ruang chhar a ni a. Rawng taka thah ni ngeiin a lang, a taksa hmuh tlak a ni meuh lo va, a hmai erawh a him pial thung. A dul zai thler niin, a rilte pawh a chhuak nasa hle. Huan neitu pa Pu Hriata leh a nupui ten an hmu hmasa ber a ni" tih a ni a. A hnuai leh deuhah, "Ruang chu tu nge a nih hriat a ni tawh a. Zosangpuii, Lunglei Chanmari a ni tih finfiah a ni tawh" tih a lo awm. Zosangpuii thlalak pangngai, a propic-a a hman an lo dah tel bawk. A va mak ngai em! Eng thil nge thleng ta hi..sawma pawh a va him awm lo em tih ka ngaihtuah mek laiin, Nenei'n,"Ramhuai a nih hi, tual a la that duh mai ang" a tih kha ka hrechhuak zawk..Zosangi chu Sawma thah a ni thei ang em? A va rapthlak em..

(Naktukah hian story a awm thei ang em ka chiang lo aw. Practice teaching kan bei chho mek si a, hun ka nei meuh lo a ni e. Inhriatthiam thin kha..) 🥰