Vanneihsangi 11

VANNEIHSANGI (11)

Ziaktu: Toni Râlte

Nenei chuan ka ban a rawn vuan nghal chat. Sawma nen kan inmelh ngawt ngawt thung. A khur hlawk hlawk a, a insehruh nasa viau bawk. Tawng chhuah tum, tawng chhuak hleithei lo ang hian a hrawkah a ri bawrh bawrh bawk.

"Sawma, lo thu la" insum teuh chungin ka ti a. A mitmeng tle rul chuan min melh hlum mai ang tih hlauhawm khawpin min la melh nget nget mai si. Nenei pawh a hlauthawng tih hriat takin min hmer na viau. 

"Eng nge intih hi?" A rawn ti chhuak hlawl! Ka lo thaw hawk ringawt. 

"Mawh..mi hur pahnih. Inzak em? Kan in a nih hi..ka ringhlel reng a..tenawm dun lutuk" a aw-a huatna nasa lutuk chu a dawngsawngtu tan chuan khurhna tham a tling hial awm e. 

Mahse, zâmna ka tilang duh lo. 

"Ani nen hian kan inhmangaih a ni. A pawi khawp mai" ka ti ta a. A mitah ka melh ve kar mai. 

"Uichopa leh.." Tia min rawn pan lai chuan Nenei a rak thawt. Kei erawh ka inring ran thung. Min dinchilh ang set sawt a, ka kawr áwmah a tham a, "Ka that dawn che" a ti pawr huar a. Ka lo nuih suk..chu chuan a thin a tirim zual nge, ka bek dinglamah a hnek ta a. Palian hle e ti lo chuan a hnek a va na lem lo tak. A thinrim luat vang pawh a ni maithei..Ka khawih let chak mang e aw. Min rawn pawt leh dawrh a, "Kan in atang hian chhuak nghal ang che. Ka thian atangin i bang nghal. Ka bialnu min chuhpuitu chu tupawhnise ka hmachhawn zel ang" a ti hluk hluk a. Ka nuih a za..

"Bialnu a?! Sawma, mumang ram atang khan harh tawh rawh. Nenei hi ka bialnu, ka ta, keima ta chauh a ni. Chu chu hrereng ang che. " ka ti ta fak fak a. Nenei a va en a, ani lah chu a hmui hup chungin a lo ding sai hlawk hlawk a. 

"Kei aiin Tpa hi i duh zawk a maw? Thingtlang tlangval, rethei bawk si hi i duh zawk a maw?" A ti ta khur khur a. Mahse, Hlau hlawpa awm reng emaw tih laiin a kut a la thla a, Sawma melh ling hlar chungin,"Aw, ka hmangaih. Nang ang 100 ai pawn Tpa pakhat ka duh zawk. Ka nun atang hian kalbo rawh. Ka hmangaih ngai dawn chuang lo che" a ti ta tâwn tâwn a. A khat liam ve thawkhat tawh aniang. Nenei biang a ri thawk! A beng ve khanglang a nih chu! Nenei chu thutthleng seiah a thu hnawk. Kei erawh che lo thei lo ka ni ta. A kawr hnungah ka pawt dawrh a, a makti hamhaih laiin a hmaiah ka hnek ta siah a. A pai awt a, Chawei dawhkan bula ban ding chu a va nghet dawt mai. A hnar a thi bawk. Ka hnek fuh chiang ve em a ni. Nenei chu ka buaipui nghal a. A thinrim hle tih a hriat. Chutih lai tak chuan Zira te an rawn lut ta hlauh a. Kan hmel landan atangin thil thlen dan tur awm chu an hrethiam a niang, "A va zia lo thin ve" Zira chuan a ti nghut a. Sawma erawh a hnar thi chu tuai puat puat pahin, "Zawnga,i hre viau ang" tiin an inah min chhohsan ta a. 

"A nu a rawn hruai ngei ang" Lukira'n a ti sup a.

"A pawi lo. A nih nih kan ni tawh mai ang chu" ka lo ti a.

Thil thlen dan ka hrilh hnuah inthlak turin room an pan ta a. An rawn chhuak leh vat. "Kan pindan chu a thar a va ang ve..ehe! Kan lo hawi lo va, in thar a ni ringawt alawm" tiin Zira chuan sitting room leh choka chu a melh kual a. Lukira pawh a nui ruh ruh mai. Nenei chu lawmthu an hrilh ve luam a. Mahse, Nu Saii aw fiak thak kan hre zui nghal. Kawngka bulah dingin rum zetin min rawn melh a. A fapa vanga a danglam chak lutuk hi a mak ngawt mai. A hmangaih hle a ni ngei ang. 

"Tenawm dun lutuk. Vanneihsangi pawh mipa inah te i len ngam reng reng a! I nu siar i nu siar, Tpa pawh khati khawp khan Sawma kan buaipui a, engtin nge hetiang hi i tihtheih zawk a?" a ti chang fak fak a. 

"Sawma'n a buaipui hma khan inlaichinna kan lo nei tawh a ni" ka ti a. Thinrim pawn ka sawi lo.

"A nih tak chu!khati taka a buaipui lai khan i sawi lo anih chu..kan buai lo mai tur" a ti hlaih hlaih a.

Nenei chuan,"Ka hrilh. U Tri-a hming chu ka sawi lo, bialpa ka nei ka ti" a lo ti vat a.

"Nang te her her lah hi a..mipa i ngam mah mah. Naupangtë si..i la rai pawp ngei ang" a lo ti zëk a.

"Virginin pasal ka nei ang" a lo ti ve hmiah. 

Lukira chuan,"Nu Sai, a buaithlak a nih hi. Sawma pawh tha takin kan lo hrilhfiah dawn nia. A zia lo khawp mai. Sawi kha kan duh ve reng, mahse, Tpa thleng hian a tawrh phah kan hlau ve em a ni" a lo ti dam thlap a. 

"Chhuak rawh se a ti bur mai a. Kan fapa berin chhuak tura a tih chuan keini tan pawh tih vak ngaihna a awm lo maithei. Ka hrethiam lo le" Nu Saii chuan a ti nghat a. Ka lo ner sawk. Zira chuan,"E khai! Thiante chu dam leh tlang khatah ,thih leh ruam khatah kan tih kha mawle..Luliana a chhuah chuan keini pawh kan chhuak ve mai ang e" a lo ti nghet charh a. Lukira pawh chuan, "Ni e, kan zui ngei ang". alo ti ve hmiah. Ka thiante pahnih chu an va hlu zual em..mahse, an chhuah ve chu ka remti dawn hauh lo. Kei chu ka buai lo. Lehlamah inpawh miah lo leh thinlung inep run chunga he lai colony-a chen ve reng hi ka chák zawk zawk hran lo. Zalenna hmun apiang hi a lo nuam ber si a.

Nu Saii chu ngawi rengin a chho ta daih a. Boruak a uap kher mai. Nenei chuan," Ka va haw tawh ang e. A pawi ka ti lutuk, keimah vang vek a ni. U Tri-a class kal loh niah awmdun ve a chak thei sia, ka lo hnial phal bik lo va. Anu phei chuan hria se min hau hrep ngei ang. Keimah vang vek a ni.." A ti sawk sawk a. Ka lo vuan chat, "Kei leh nanga thiam loh pakhatmah a awm lo. Kan pahnih inkarah an lo buai zawk a nih kha..ka bialnu i nia, i rawn leng a ni mai. Man chawia kan luah a nia,. An thu vek lo..hrehawm ti miah suh." Ka ti a. Zira leh Lukira pawh chuan min lo zawm ve vat. Zira phei chuan,"Lawmthu sawi zawk tur alawm kan nih..hei in lah i tifai si..chaw ei ve nghal zawk la..zanah kan phei ho mai dawn alawm" a ti a. Mahse, a duh lo. Ka hrethiam lutuk. Ka va thlah ta a. 

"U Tri, khaw nge i awm ang? I chhuah chuan" a ti a.

"Buai suh..ka pute in pawh a awm. Bakah keimah pawn in ka luah mai ang. Mahse, zira te hian min zui ka ring" ka ti a. Ka lungngai miah lo. 

"Ka duh che" a ti teh daih a. Kawnga kal chung chuan kan han infiam leh rih. Ni e, he hmeichhiaah hian ka rilru ka nghat ve tak tak ta e. Amah vanga hloh leh chán ka inhuam dan atang hian chhungril takin ka duh ve niin ka hria. 

Zanriah kan ei laiin, Sawma U , mama a lo chhuk ve mial a. Ani hi chu a buai bawk a, kan inah pawh rawn leng lut khát tak a ni. 

"Tp, nuam lo ti suh aw. Ka nu leh ka nau hi chu hrethiam hram hram teh u, an extreme lutuk a. Hun han kal leh deuh se, an zia ve leh mai ang. Chhuah te kha i lo tum ang e aw..ka remti hlek lo a nia" a ti mawlh mawlh a. He pa hi chu a zah pawh kan zah ru thin khawp mai. 

"Nia, ka hrethiam bik lo. Nuam lo chu ka ti ve tho mai" ka lo ti a.

"A ho lutuk, bialnu in inchuh pawh ni hlei lo, i bialnu a rawn chuhpui ve ringawt che a nia. Zira, Bialnu tha deuh zawnsak teh u, hmeichhe dang rawn tlazep se a zia mai ang" a ti hlut a. 

"Nia..zosangi saw tihpui ila" Zira lah chuan a lo ti vat a. A tha viau tak ang. Mahse, Zosangi hian a lo hnawl ve lehzel si chuan, A bawraw zual ngawt ang. U Mama vang chuan rilru nuam lo zualpui chu a kiang ta deuh a. He ta chen ka chak em em vang lam aiin ka thiante ka vengthawng lo thei bik si lo va. Bakah ka pute hrawn leh pawh an buai ve bakah Nenei nen kan inhmu khat dawn si, ka zuam vak lo. Mahnia in luah lah hi a hautak ve zëk bawk sia. 

Thleng ka sil lai chuan, Zira chuan Kimi a bia a. "A va zia ve. Aw kan lo phei dawn alawm..khawiah maw chaw in ei ..e..aw le" a ti mial mial a.

A biak zawhah,"An dil a, tlaiah khan an chhuak thei hram e. Bteii pawh a zia viau tawh a nih chu" tiin Lukira a melh a. 

."Lukira pawh va be ve ta che" a ti zui hluk a.

"Phone a khawih peih hleinem..ka hmuh chák tawhzia hi, vawiin lah kan tlawh hman ta si lo. An chhuak chu a zia e" a lo ti nghut nghut a. Kan lawm a kim leh tan ta e. 

Zira chuan a phone melh chungin, "Lal Esi lah hi aw..min runluih hi a tum nasa thei. Ka engahmah a thawk tawh si lo va. Mipa rilru let hi chu hmeichhe rilru let ang lek chu kan lo ni lo a nih dawn hi..status a neih leh neih loh pawh hre lo khawpin ka enliam thei tawh a nia" a ti leh zut zut a. Nia, a mak ve reng. Khati khawpa induh, awmho lai pawha over tih tur khawpa induat hiam thin, hetia an kal hran hnua Zira'n a ngaihven ta lo lutuk hi..Lukira tak zawk hi chuan,Alicia chanchin te a la hre zeuh zeuh zawk a. Kan Zirdula erawh Esi hming hi a lamri ngai mang lo, Kimi hian a hnem thiam viau te pawh a niang e. 

Tehlimi'n tukverh atangin,"Tp, len intum em?" A rawn ti lang lang a. 

"aw..kan chhuak lawk ang" ka va ti a.

"Van pawi..ka chhuak dawn a..Zoi hi lo awmpui ru tih ka tum a" a ti niah niah a. Lukira'n min rawn melh zuk, "Eng nge a'h!" Ka ti hmuk a. A la nui zui.

"Va awmpui la..nizan pawh in inngeih em kha" a ti a.

"Chi loh, ka easy ve sia" ka lo tihsan a. Kan nui hak hak. Zira chuan,"Sawma lentir ila ni mai lawm..lo inchhai teh se" a ti ta a. Kan pawm tlang viau. Kan chhuah chhoh chuan Zira chu a va peng zawk a, Sawma chu leng turin a va hrilh a niang chu..a rawn chhuah leh chuan nuihza insum zet hian,"Ka risk dawn" a tia.." A ti! Zosangi chuan kan thiltih dan hria se min va ngei dawn rua em..ka inthiam lo ve deuh. Mahse, an lo inremin an lo induh ve phian maithei asin.

Kimi te inah kan lut hmasa a. Bteii chu thutthleng seiah a lo mu a. Kimi erawh chuan a tuk ami tur maida a lo hmet a. A fakawm ve ngawt mai. Tihian a nau zirna senso bakah a chhungte hnenah pawisa a la thawn thei a nia. Sum hlutna a hria a, a thawkrim bawk. Nuthlawi mah nise, han zuamawmna leh sawisep a kaina kan hre ngai lo bawk. Kawm a nuamin fiam a dawl bawk si. Zira hian a tisual lo maithei a ni. Lukira chi Bteii bulah a va thu chat a, ani pawn a lo ngai ve deuh tawh a niang, a lo melh no ve ngei mai. 

"ENteh, a ser ang em le. Ka duh lo e" tiin Bteii chuan a mal chu a hlim ta mai a. Lukira'n , a lo khuh tha vat. "I á siah" a ti hluk a. 

Nui hawr hawr chungin,"Ah! An hmu vek tawh tho sia" a lo la tizui! A lawmawm thei. 

Kimi chuan,"Kar tawpah hian hawn kan ngai maithei. Ka pu lungphun a nia. Ka pa hian kokim taka kal a duh ve sia" a ti siam siam a. 

"Chuti chu, ka haw ve daih ang" Zira chuan a lo ti a. Lukira nen hian West Phaileng khua ve ve an ni tih ka sawi tawh em ka hre lo. 

"Nia, haw ve daih r'u, Tpa pawh hawn a tum ni lawm ni?" Tiin Kimi chuan min rawn melh a. Ka lo bu nghat a. "Nenei a lung a leng awm" a lo ti zat a. 

Ka ding hluai a, "Ka va hmu ve tawh ang e, " ka ti a. 

Apuia leh Atea ten lehkha an lo zir a. Gabby erawh barbie khalhin a lo tlei viau. Nu Sangi chuan a hna ngai mei a lo zial leh a. Nenei erawh a naute zir lai chu a lo enpui.

"Tp, vawiin thil thleng chu a va zia lo ve aw" Nu Sangi'n a lo ti nghal a. Nenei'n a lo hrilh vek tawh tih ka hre nghal. A tha zawk, nakina mi dang ka atanga a hriat ai chuan.."nia, zia lo..mahse, a pawi lo, an hriat hun a la awm tho dawn a" ka ti mai a.

"Anuteii lah chuan an in hnuaia awm turin min nawr sek sek reng mai sia. Engtia han tih chi nge mawni dawn le?" A ti leh daih a. 

"Ka hrethiam lo. Lehlamah chuan chhungte bula awm chu a nuam zawk daih ang..mahse, Apuia te school luhna vel hi" ka lo ti ve a.

"Chu chu lawm ka buaina..bakah an pa te lam mitmei te pawh ka veng lo thei lo. An fel em em chungin, nakinah ka chanchin te han hrechiang se, min hnualsuat leh mai ang em tihte ka ngaihtuah a..ka rilru a insual nasa khawp mai" a ti mawlh mawlh a. A rilru tur chu ka hrethiam viau mai. Nenei nen kan awmna inhlat tur lam chu care ber chi pawh niin ka hre lo. Bike ka keng thla tawh dawn tho, kha lam kha chu ka buai vak lo. 

Dar 9 velah Nu Sangi leh naupangho an mu leh ta dial a. A ngaite bawkin insi chátin kan thu dun leh rial mai. A school kal lai vela a chetchhiatna te a sawi a, kan nui hak hak a, a sawi pakhat ka nuihzat deuh chu, "Footpath-ah ka thiante pathum nen chep angreng takin kan kal a. A chho ve deuh a, fur lai a ni sia, a nal bawk nen, min tawk zawng hian pa pakhat inchei smart zet hi a rawn chhuk ve mek a, kan intawk dawn chiah tihin ka thiannu a laia kal chu a tawlh hrut a, min rawn chelhna lamah ka lo inring si lo chuan ka hmaa mipa kapah tak ka han vuan chut mai a! A rak thawt a. Ka thlah lawk lo lehnghal, ka thiannu khan min vuan nghet sia..hnar a lian duh khawp mai..ka vawnsak chiang sia" tih chu a ni. (Hei hi chu a ziaktunu chetchhiat tawhna a ni pawh ka ti lo..TR 😑) 

"U Tri, bialnu engzat nge i neih tawh?" A ti leh hlawl a. Nui chungin,"Pakhat" ka ti a. Min chum taih a,"Sawi tha la" a ti a. 

"Ka chhiar dawn mi?" Tih pahin ka kutzungtang thlepin, "Mary, Lawmi, Bethsy" ka ti koh koh a. Min ngei leh si! "Lerha, em em a che" a ti salh a. Ka lo nui hawk.

"Thil ka zawt ang che aw..thudik takin min chhang la" thutak deuh hian a ti a.

"Sawi la" ka ti a. 

"Ih maw, i ex te zinga i la duh ve ber leh i rilru la tina ber khan ngaihdam rawn dil chein rawn let leh ta se, i pawm leh ang em?" A ti ta a. Mapuii chungchang a hre ta emaw ka ti hman hial. Ka chil ka lem khawlh a. A kut nel thep chul pahin, "Chutiang chu a thleng dawn lo naa, thleng pawh nise, chaw thing her lum ai chuan, chaw chhum thar hi a tui ka ti zawk" ka ti a. Min rawn melh háw a, ner sak chungin,"Awii inla ril vel e..tenawm" a ti hlak a.

Ka uang zui chák tlat, "I zûn hi ka phur zo lo, Parte, i lung ka dum ve nan chuan siâr pawh la mai nang e" tiin a beng ka va sik zauh a. Ka mala rawn tlawh zawtin,"Tenawm suh. Khatiang tawng chawrthlapui kha ka duh lo, ka zak zel" a ti a. Kan nui hawk hawk mai. 

"Hna ka neih veleh kan innei ang.." Ka ti thut a. Ka nui bawk si lo, a hamhaih tih ka hria.

"Anu thu thu " a ti a.

"Eheu! I nu law ka neih dawn?" Ka lo ti hluai a.

"Ka sawi awmzia i hre reng. Ka naute hi an la te ve sia, anu ka khawngaih alawm" a ti a. Hei chu a rilru putdan tur reng pawh a ni. Kei pawn chuti maia neih vat ka tum bik lo. Ka chhungte pawh khawsak nuamin ka la khawsaktir ve phawt ang chu le..

"I chhungte hian engtikah nge min duh ang?" A ti hlawl a. 

"An duh lo hleinem che. An fimkhur ve mai mai alawm..ka thu te chu an hnial tung dawn bik teuh lo" ka ti mai a. He lam chu sawi tam vak ka duh lo. Thingpui kan in leh hnuah kan inmang tha ta a. Infawh lah hi ka fawp zing bawk a, a zei tawh lutuk. 

A tuk test pawh ka titha pangngai. Lehkha thiam ka ni hran lo va, a rualpawk tawk leh a pawl sawn zawng hian ka lo hre ve nel nual zel a. Rual el nachang lah hi ka hre vak lo lehnghal. Ka awm ve huat huat a ni ringawt. Vawiin chu Teteii birthday a nia, lunch min treat vek, kan ei teuh mai. Tuman he nu hi chu an haw tak tak theiin ka ring lo. Nenei tlazep hman lo se chuan ka bem thuai maithei ni. Hnawl leh ngaiawh a ni mai a. Nu Saii te pawn engmah an sawi zui ta lo va, ka chhuak ta bik lo. Sawma pawh ka la hmu leh lo. Inkawmho chu a har ve tawh maithei. Duhzawng a lo inan vanga buaina hi chuan ser a siam ve tlat zel a. A pawi ngawt mai. 

Zanin chu lehkha zir ve ka tum a. Naktuk chiah test tur ka nei tawh a. A tuk lehah kan khaw lamah hawn ka tum a ni. Lukira leh Zira erawh an va leng tho. Anni hi an titak dun riau mai. Duh hun huna hmuh theiha khawih theih bialnu an nei ve ta bawk a, an birh tlut tlut mai chu a nih hi. A tha vek e. Phone pawh khawih loin ka zir ve mial mial a. Rilru tak taka han zir hi chuan thiam a lo harsa lem lo. Dar 9 a ri dawn hnai tihin Msi'n min lo call hlawl a. Zirlai lampang a lo sawi dawn emaw tih nak alaiin, "Inah i awm em?" A rawn ti a. Ka awm thu ka sawi chuan, "Ka rawn kal dawn " a ti ta mai a. Mak ka ti ru viau. Tun ang zan tlai tawh lamah lehnghal. Reivak loah a rawn lut ta a. Ruih a nei pawn ka hre lo. A hmel a ngui em em a ni tawp. 

"Lehkha te i zir bik a. I va fel ve" a ti khawmawi a. Za lo zetin a nui bawk. 

"Ka thiam loh vang alawm ka zir, nangte chuan zir i ngai tawh nang" ka lo ti a. Thutthleng seiah chuan chauh hmel zetin a thu a. Tun hnaiah a mizia hi mak ka tiin a chhan ka zawh lahin a sawi tha duh bawk si lo. Eng emaw a tawk ve a ni maithei ni.

"Tp, thih daih ka chak" a ti ta chiah a. Ka pháwk hle.

"Engvang chuan maw? Eng nge thleng?" Ka ti vat a. A chil a lem khawlh a, a kut tin a sik niap niap bawk. 

Chunglam melha a heh pet lehin, "Ka rai a!" A ti ta a. Ka melh reng ringawt. Msi kan class-a top 2 ni kumtluan, bialpa a neih kan hriat ngai loh, nungchang tha leh tu pawimah sawi ngai lo,mi dang tana inpe zo thin em em chu a rai a nih chu! Pasal a la neih miau loh vangin sawn a pai tihna.

"Awihawm loh" ka ti tak naa, a nui hak a,"Sawi a harsa hle asin" a ti sap a. A ngui chhan chu ka hre ta chu a nia. Mak erawh ka ti viau.

"Chuan, tu nge a pa?" ka ti ta tháwr a.

"Chu tak chu a ni ka buaina..ka fa paina pa chu mi pasal a nia" a ti tham chhal a.

Ka thut dan ka siamrem vat, "Mi pasal a! Engtin nge a nih theih?" ka ti nghek. Mak ka ti em a ni. A rai pawh tih tawh nak alaiin mi pawm lai fa a lo pai reng a nih awm chu! 

Chhuat lam melh ran chungin, "Huat ka duh a, ka haw thei si lo. Min bumna zawng zawngah hian kei ngei pawn thiam lohna ka nei ve tih ka hai lo. Mahse, min bum chiang em a ni" a ti te te a. A fa paina pa nen an chanchin chu a sawi ta mawlh mawlh a.

"Nikum kum lai hawl vel atang khan min rawn be thin a. Kan veng thenawmah an awm tih te ka hre chho a. Pathlawi a nih thu leh fa pahnih a neih tawh thute a sawi bawk. An veng ami ka thiannu ka zawh pawn pathlawi a nih thu tho a sawi ve a ni. A zeiin min ngaihsak thiam bawk si a, kei pawn ka lo ngaina ve ta hle a. Kan inhmuh hma hauhin inlaichinna kan nei tawh a ni. Chuan a hnuah kan inhmu ta a. A hmel chhe lo va, a palian bawk. Kan inngaizawng chho ta a. Min duat thiam em vangin kei pawn ka duh tawh lutuk. Mahse, kum tawp lamah khan 'Ka chhungten kan nu an ko leh a' tiin a rawn sawi a. Rilru na tak chungin ka biak zawm ta lo va. Amah zawk chuan min rawn be zauh zauh. Mahse, mi pawm lai a ni tawh a, kalsan tumin theihtawp ka chhuah ve a ni. Chuan, kumin march thlaah khan , 'Kan inthen' a rawn ti leh a. An nu chuan sum a chhuah thute a rawn sawi a. Mahse, khatih lai khan biak ve deuh ka nei a, ka lo ngaihsak vak lo. Rilru erawh a tithar viau. May thlaah tum loh deuhin kan inhmu leh ta a, a hma ai mah khan a lo chhe lo zualin, min be bawrh bawrh a. A hnuah min la nghah reng thu leh min theihnghilh theih loh thu te a rawn sawi leh a. Ka lo hmu ve leh kher bawk si, ka lo be ve leh ta a. Kan inbe leh ta char char a. Hmuhte pawh kan inhmu leh ta a. Kan chesual ta zauh zauh a. Damdawi min pek thin avangin ka rai lo a ni mai. Mahse, damdawi ei loh chang ka nei ta zeuh zeuh a, tihian ka rai ta hial a nih hi.. Ka rai tih ka inhriat hma lawkin , a nupui hian min lo biain min lo ankhum hrep mai a. An lo la inthen lo a niang. Mahse, mak ka tih chu kan inzui ngawrh lai khan an inah te pawh min hruai a, a fate pahnih pawh ka hmu ve vek. A nupui erawh ka hmu lo. Tah khan ka lo ring ve em em a, min bum ang tih ngaihna reng ka hre lo. Dik tak chuan bialpa ka nei ngai lo va, ka zei loh bakah han ngaihven vak dante kha ka hre lo va. Bum ka nuam viau aniang. Chutia an nuin min lo hauh hrep hnu lawkah ka rai tih ka hre ta bawk si, amah chu ka va hrilh a, "A pawi khawp mai. Kan nu a lo let leh tawh sia, titla mai rawh" min ti ta a nih chu! Na ka ti lutuk. Ka chhungte ka hrilh ngam bawk si lo. 

Mahse, vawiin tlaiah khan ka uak nasa lutuk leh ka mizia danglam nasa lutuk vangin ka nu ngaihtha loin min zwt a. Ka hrilh ta tawp a. Ka pa thinrimin kut min thlak hrep a. Ka u te pawn min beng bawk..ka nu bak tantu ka nei bawk si lo va..ka ippik lutuk leh awmngaihna ka hriat loh vangin ka tlan chhuak ta tawp a. Thih mai ka duh a, ka intihlum ngam bawk si lo. Inbunruah ka duh a, ka rawn hrechhuak hmasa ber che a, ka rawn kal ta tawp a nih hi" a ti ta dap dap a. A sawi chhung zawng ka lo inhumruh. Ka mipatpui bawkin a tina ve leh ta. Mipa hi hmeichhiate tinaa hliam tura din leh siam kan ni hauh lo asin le aw. Msi chu ka khawngaih kher mai. 

"Chuan, thla engzat nge?" Ka ti a. 

"Thla thum a tling tep..tihian mi dang hriat hlau reng rengin hun ka hmang a, class kal te hi ka huphurh ngawih ngawih zel" a ti a. A dik khawp ang.

"Engpawhnise, intihhlum lam chu ngaihtuah tawh suh. Thihna hian engmah a siam tha lo. I chhungte pawh a la sarhu ve em a, an thinrim ve rih a ni mai. An pawm theih hun che a la awm em em ang. Mangang miah suh" ka ti ve ta mawlh mawlh a.

A inhnit faih a, "Nia, an thinrimna hi awm ka ti lutuk. Tlangval pangngai laka pai ka ni bawk si lo va, bakah an innghah vena, an beiseina ve ber ka nia..ka dem lo hrim hrim" a ti a.

"Chuan, tihtlak i tum lo tiraw?" Ka ti a.

"Tum lo, ka chhungten min hnawtchhuak mah se; nau tihtlak kher chu ka theih ka ring lo. " a ti a. A zahawm khawp mai.

"Nia, titla lo la ka duh kei pawn. Nakinaha rawn piang ang a, i chhungte pawn an duat viau ang. Fa pakhat na na na te chu ee..lungngai suh. Zirna pawh tlai a awm lo, i zir tha leh ang a, i la hlawhtling em em ang" ka ti ve mial mial a. A lo luh tirh ai kha chuan a hmel hmuh pawh nuam tawh tak a ni. 

"Min bum thiam lutuk kha a ni..mak ka ti thlawt" a ti a.

"Mi bumhmang chuan mi rinawm alawm an bum thin. Nang lo pawh bum a la nei leh tho ang, Pathian atang lo chuan an sim tak tak thei lo" ka ti hmiah. A ni ngei sia, tar hur kan tih te, kawppui nei chunga lerha mi dang kawp chingte hi chu man chhuahin awmin an kawppui ten han hrem thin mah se, Pathian atang lo chuan an sim tak tak thei lo. Tin, hei hi kei ka ngaihdan takah chuan, hetianga kawppui nei chunga ngaihzawng neih chingte hian an kawppui te an hmangaih ka ti ve thei lo. Hmangaih nise an phatsan lo vang. Inphatsan hi tihpalh a ni tlat lo. Eng chhuanlam mah ka pawm ve hek lo. An chhungrila leplerhna leh hurna inmung reng kha , chhuanlam fahrah tete hmangin an pho chhuak ka ti mai. An chhungrilah kawppui te lakah tuihalna rûk pawh lo nei se; nupa nih tawh chuan nupaa chinfela siamthat theih a ni. A pehhel zawnga mi dang laka va inhrikthlak kha chhuanlam a tling lo. An beidawn tak takte chuan an kawppuite kha then mai ta se..hetiang mi tenawm hi Zoram hian kan kawl hnem fu lehnghal a..a hahthlak khawp mai.

Thingpui te ka lumsak a. Zira te lo hawn thleng a thu ve ta reng a. Ka theih ang tawkin ka fuih ve a, a ngaithla tha viau pawhin ka hria . kawngpui thleng ka han thlah a, lawmthute min hrilh ve mawlh mawlh a, tihtheih ka neih loh tehlul nen aw..

A tukah pawh class a rawn kal ve leh a. Kan thu dun. Lehkha hi chu a thiam thawkhat a ni. Kei aiin ziah tur a hre leh daih zawk. Kawm hlim a ngai bawk a. Kan inzui chawt mai. Sawn man an thing dawn a, a pai tlang dawn a ni. A huaisen khawp mai. Mahni tihsual phur ngam lo hi kan kat nuk si a. 

Zanah Nenei ka va hmuh ngei ngei a ngai. A tukah kan khuaah ka haw dawn si a. Ka nute pawh ka be tawh a. Lehlamah kan khuaa ka hawn an thlakhlelh vena pawh hi ka pa a hah lutuk a, ka chawlh reilote chhunga ka pui thei ringawt pawh kha a hlu ve a ni. Zanriah ei kham hlimah kan chhuak hmiah. Hun a uiawm kan ti deuh a niang. Kimi te hawn an tum ve bawk sia, Lukira te pawh an haw ve ringawt dawn. An haw khat ve tho bawk a, an phur ve viau tho mai. Kan chhoh mek laiin Sawma kan tawk hlawl! Mi melh run run naa, a hma ang ema nunrawng hmel kha chu a pu tawh lem lo. Lukira chuan,"I leng dawn mi!" A ti a.

"Umm, Vanneihsangi ai chuan Zosangpuii khu a lo chhe lo daih zawk alawm le" a ti lung lung a. Nenei nen kan inkar avangin ka lo lawm thung. Mahse, "Zosangi aiin a let tam takin Ka Nenei a tha zawk" ka ti rilru tho. Sawi chhuah chi ni nghal lo chuan. Kimi te in peng kawngpui bulah bawk Michaela te an lo thu leh thap. Kan rui lo bawk a. Buaina kan neih loh beisei ang. A naka Zira'n a tlawhsak pa khan, "An la rawn leng ngam ka ti..an zam lo ve hah hah hle mai" a ti thar thar a. Keini aiin kum 3 velin a nau maithei. Intiam rual ang hrimin kan ngawi hmak thung. Buaina kan cho loh vang ni loin, Michaela pa te an inrawlh leh dawn si a, thuhretu tha tak kan nei ve leh dawn si lo, kan insum mai zawk a ni.

Kimi thil lei tur a rawn chho ve mek sia, kan ding leh rih a. Zira'n dawrah a va kalpui a. An rawn let leh lam chu Michaela chuan,"Nuthlawi leh thingtlang tlangval, hahah..phutawk chu an inhre ve rem rem e" a ti ta kher a! He nau hi a tawngkam a duhtui lo thei riau mai. Khawih zal leh hlek a ngai a ni. Kimi laha duai bik lo, "Khanglang che chuan a. Nuthlawi tiin mi au nawmnah khanglang suh, thlawi 70 pawh ni ila, nangni ang chhungte thawhchhuahsa ringa pawr ve tak tak hi chu ek tlukah pawh ka ngai lo che u" a ti ta phiar phiar mai. An hrilhhai deuh nge, an melh run run ringawt. Mahse, an harh chhuah hnuah, Michaela bawk chuan,"Kan veng chhung intitawp, nangni ang thlawi zah hre tawh lo ho hian..bialpa innei thing thei si" a ti leh a. Zira thunun hman kan awm ta lo. 

"Naupang leh!" Tih leh va hnek thluk tawp a rual nghal a. An lo rui deuh sa nen, a lo zawi bawk aniang, a let hawl mai. A thiante rawn thawh suau rual chuan ka va pan vat, "Ngawi r'u, inpheksual chu a thing em mai. Michaela hian Zira hi a cho ve niin a lang a. Fair fight in aw niang, incho bawk a. Kan ti ngei ang" ka ti ta a. Zan a la rei lo bawk a, veivak an awm neuh neuh a, an rawn tawi khawmuang ve zel lehnghal. Hmeichhiate pawh an awm ve. 

Michaela chu a rawn tho a, Zira kawk chungin," zawnga, mi hnek ve law? I bialnu nuthlawi chhan chu i va tina ve.." A ti a. A jacket a phelh rap. Zira erawh a ding khawng lah a, a kut erawh a hum ruh viau. Zira hi ka ringtawk. Michaela chuan a rawn pan a, a kut a vai thuak, Zira a kun zauh a, michaela dulah tak a hnek ta dawt a. A tawlhhnung dawrh. A thiante lah fair fight ka sawi tawh vangin an ding ve reng ringawt a. Mahse, an insual tak tak hmain pa pakhat hian, "Nangni kha..kal bo vat r'u, kan veng chhungah insual kan phal lo..inzahpuiawm lutuk, tun laiah tumah an insual ngai tawh lo" a ti a. Kimi pawh chuan,"Zir, kal ang. Buaina neih a tha lo" tiin a va kai a. Michaela leh a thiante erawh an tawng thei ngei mai. Mipa sawia mawi lo khawpin Thingtlang kan nihna leh Kimi nuthlawina chu an chham zuah zuah a. Min lo khaptu khan Michaela tukhuma ben chawrh pahin,"Nangtë hi i tawng chaltlaiin aia upa zahna i tlachham hle a ni. I thiante pawh an ni tho, ka rui e inti ve khanglang a, tihian mi in lo cho kual a. Tumah in hneh tak tak si lo. Thingtlang ka hmusit e te ti ve khanglang suh..I tluk lohte vek an nih saw" a ti ta bawrh bawrh a. Chutia an pa rual zetin a tih takah chuan a thiante chu an ngawi zui ve mai. Michaela erawh a la phun zui nang nang a. Tlangval lian lam, fel hmel zet hian, "Haw rawh. Aia upaten an khap tawh hnu pawha la dak zuah zuah mai. Zahpuiawm lutuk,ka beng thle lawl lawi mai tur che nia" a ti ta zëk a. Chu pa chu a ngam ta lo nge, inla ngeng zetin an thianho chu an kalsawn ta a. Keini pawh kan chhuk ve ta nghal. Kimi a ang zui hmarh hmarh. 

Nu Sangi ka hmu mai si lo va, "khaw nge? Ka tih chuan, " Chaw ei khamah khan ka lu a hai em mai a tia..a tlu zal a.." A lo ti a. 

"A bp te check se..ani ber a dam that loh chuan a buaithlak" ka ti ve a. A ngawi reng. Apuia te lehkha zir kan vil dun a. Rin ai takin an thiamin an rilru a chak.

Atea chuan milem a siam a. Ka va enpui chu ka rilru a dek riau. An chhungkaw inkai lai lem a nia, a nu bula awl laiah chuan (?) Hi a lo dah kuau mai! Chutianga ziah nachang a hriate chu a mak reuh mang e. Nenei ka hmuh ve a, ani pawn a ngaihtuah zawm tih ka hrethei. Nu Sangi a lo tho a, ka ngaihbel nge ni a nawm loh hmel riau, "Ka bp check ve a ngai a ni. Ka zing tho te hi ka rit bur zel a, ka lu lah a hai chhu reng bawk si.." A ti a. Thingpui háng a dawt khalh khalh a. 

"Incheck up ngei ngei teh..puan i thui reng bawk sia, taksa hian a ngeih lo lutuk an tia sin" ka ti ve a. Thudang kan sawi leh hnuah , "Ka'n mu leh mai teh ang. Ka thu nghet lo em mai" tiin a va mu leh ta daih a. Apuia leh Atea te tv en pawh an muthlu reng si a, Nenei chuan a va sawn ta a. Gabby erawh a nu khan a mutpui nghal a. Kan free leh ta. Dar 9 a ri tep tawh a. Mahse, ka leng rei ve deuh ang. Zingah kan chhuak dawn lo bawk a. Chep zetin kan mu leh a, a hnute ka khal neuh neuh reng a, a ui bik lo. A khat tawkin kan inkiss reng bawk.

Kar khat han cham tur ka ni a. "A rei dawn si" a ti deuh reng mai. Min ngai ve tak tak a nih dawn hi .

"Kan inbe reng dawn tho alawm..inleng lo nei miah suh aw" ka ti a.

"Ka duh thua neia nei lo thei ka ni mi?" A ti a. Kan nui dun a. A phone hi ka check sak thin a, rinhlelh tur ka hmu ngai lo. Contact no a nei tam lo bawk a. Ka hming lah hi , Luliana tiin a save kher! 

"Taka! Kar lehah nuteii te chuan insawn phei turin min tia" a ti a. 

"Chuan" ka ti vat.

"Ka nu pawn pawi a ti ta bik lo a nih hmel. Apuia te unau chu Nuteii'n private schoolah kan admit dawn nia. Ka thiante school a nia, kum laklawh mah se, an phal ang a tia..khatiang na na na kha chu kan tia, bakah hetah kan chep ve sia" a ti niah niah a.

"A tha alawm. Rawn lenna a hla deuh dawn a ni mai a" ka ti a. Ka pawm vawng vawng. 

"Nuteii chuan lehkha zir zawm leh la min ti bawk a. IGNOU-ah te hian ka ti ve leh mai mai dawn mawni ka tia" a ti leh a.

" College pangngai kal i chak zawk lo mi?" Ka tih chuan," Ka nu ka puih a ngai alawm..bakah i thikthu a chhe sia. Kan buai mai mai ang.ka peih lo" tiin min rawn melh a. College kal dawn tak tak se ka phal pawh ka ring chuang lo, a chhe lo ve tho sia, startu a nei ve leh ngei ang a, kan buai leh dawn tih kan chiang ve ve. 

"U Tri, a nih MA hi zo ta la, eng hna nge zawn i tum deuh?" A ti sep a.

"Ih maw, Police nih hi ka aim in life a ni thin a. Mahse, tihian ka laklawh zel sia, ka hrethiam tawh lo, Hna ruak ka thawh awm chi a ni mai" ka ti ta ringawt a. 

."Eng hna pawh thawk la, rinawm la, i hlawhtling a ni mai" a ti keuh a. Ka fawp nghal. Ka lo duhthawh deuh nge ka bawh ta uaih a. Mi tur ut ut lehnghal, ani pawh a meng de sawr sawr a, a biang tai tëk chu ka chuk mawlh mawlh a, a tawp hi ka va thlenpui teuh thin tak em..a hmun hian zir thin se zawng ka ta ah ka siam tawh ngei ang mawle. Amah pawn min hnial ka ring chiah lo. A la virgin tih ka hriatna hian tlemin min thunun ve deuh bawk a. Thingpui pawh vawi hnih kan in. Michaela te nen kan buaina pawh ka hrilh ve a, "Heng vangte hian insawn chu ka duh deuh. Veng chhung mi leh sa dik tak in ni si lo va, nakinah inla tawrh phah ka hlau, mipa chu in inhlau lo ve bawk sia" a ti a. A sawi dik reng mai. 

Zira ten hawn an rawn rawt meuh chuan Dar 11 a ri der tawh. Inthlahlelh leh rinawm tura intiam dun mawlh mawlh chungin kan inthlah liam ta a. 

Mut tawh hnuah, Zira chuan, "Vawi khat tal chu ka hnek leh ang" a rawn ti hluai a. A vei ngang a niang e. Ni e, la chinzal deuh zawng a ngai chiang. Ka tho tlai angreng. Ka hmanhmawh lo bawk a. Tukthuan ei khamah kan insiam mawlh mawlh hlawm a. Mipa hi chu kan awlsam bawk a, ka ritsak vak lo khawp mai. Kan khua angah te chuan inchei vak ngai hek lo. Dar 12 sumo chhuakah Aizawl chu chhuahsanin kan khaw lam ka pan ta vang vang a. 

Ka haw dawn sia tiin ka nuin vawksa rep a lo chhum a, Ei leh nghek mai. Vawksa hi chu mizo hrawkah hi chuan a tui ve tawk a ni. Zanriah ei khamah Sanga te inah ka va leng a, a nu pawn min lo lawm hle. A fapa ang riakah hian min ngai ve bawk a. Sanga a boral tak siah chuan U Remi kha an mo ang deuhin an lo en titih a, a awm ve tho. An fapa fa paitu a ni miau si a. Fapa hring nghr nghe se an lawm lehzual ngawt ang. Chhuani pawh an en hrang chuang lo va, an khawngaih ve lehchhawng khawp mai. Dar 8 velah ka thian dangte nen kan lenluhna Rûn mawi kan tih ve mai, U Saia te inah kan lut khawm a. Pubg kan khel ta char char. Nenei ka hrilh sa tho bawk a. U Saia te hi an fate pathum nen an nupa nen an khawsa a. Min dawl zo khawp a, kan len loh chuan hrehawm an ti zawk thin. Urlawk zan kan hmanna , world cup emaw inkhel engpawh kan enna an ni zel mai. Puih an ngaih hunah kan pui ve leh dial zel bawk a. 

A tukah ka feh nghal. Ka nu ka phur a, tlan chak mi ti reng a, ka nui ka nui mai. Kan lo chu ka han thlir a, ka lungawi khawp mai. Buhte pawh an hring mawiin, zuvain zah a ngaih chuan khamkhawp kan thar leh ngei ang. Hlo thlawh hi ka thiam lutuk lo, ka sawi awmzia chu sir sawn tih angreng hi ka thiam vak lo. Ka hmazawn ami ka thlo deuh bawrh bawrh zel. Ni a sa sia, ka ût thual mai. Thlan luang zawih zawiah thawh hnua thlam namthlaka thut diai mai hi chu a va nuamin dam man hi a va awm thin tak..thlifim lah kan mamawh tawk kan dawng reng bawk si. Tuihal dangchar lai takin fanghma tuai kan han vel nawk nawk a, kan han keih hmak hmak zel te, maian baiah bawrhsaiabe, berul, samtawk leh hmarcha hring thlak pawlh nuaiin, Chaw kan han fak a. Vawksa a tui ber kan ti kan ti hi chaw eitamna a lo ni ber lo tih kan chiang hliah hliah mai. 

Nenei nen pawh kan inbe tam hman meuh lo. Zanriah ei khamah ka pu a rawn leng a. A hmel a thutak riau a, ka awm a tinuam lo deuh. Kan insengfel hnuah, "Bawiha, i bialnu chu i la then lo a ni maw?" A ti ta a. 

"Umm, then ngawtna chhan tur ka nei lo alawm" ka ti a.

"Ni e, aw..a dik alawm. A tir khan i pa nen a chawr chhuahna kan hriat khan kan ngaih a ngam zán lo deuh a, saw Thana te saw i hria ang a, a nu kha tuna i bialnu ang chiah hi a tobul a nia. Tisawn Thana pa nen an han innei a. Mipa pahnih lakah a uire ta mai kha a nia. Thana te pawh tisawn nu nei loin baihvai takin an awm phah a nih saw..thlahtute inchhui hi a hmanlai ti mah ula, mi zawng zawngah a dik vek lo pawh a ni ang. DIk a mual erawh zawng a awm thin a, kan han hlauthawng deuh mawle" a ti chuar chuar a. A sawi chu a dik lo tia hnial tumna ka nei hauh lo. Mahse, Nenei ka ring tawk ve tlat si. 

"Pu, amah hi la kawmin hre ve ula, induh ve tho ang. A nu pawh hi nu fel tak a ni bawk asin. Tisawn pa tel loin a enkawl vek a nia." Ka ti ve tang tang a. 

"Ni e, a dik ang. In lo inhmangaiha in lo induh tawhte chuan pawh then kher che u kha kan tum hleinem..marawhchu, nupui neihte chu hmanhmawh lo la, hei upa ber i nia i nu leh pate thachhang dawltu tur i ni tih hi hrereng ang che" a ti leh dap dap a. Ka lawm hle.

"Kha lamah kha chuan lungngai suh u. Neih nghal ka tum hleinem" ka ti vat a.

Ka pa chuan, "Hmanni Pu Siama nen kan titi khan hei Higher schoolah hian Tpa hi kan lo hual lawk tawp tawh a nia. Pol.sc lecturer kan nei lo va, Geography lecturer hian a kawp ringawt a. Chang dang kan thei inni lo a ti nuah nuah a..hengte hi eng nge maw i ngaihdan le?" A lo ti a.

Kum 4 liam taah khan kan khuaah Higher Secondary School hi khawtlang tangrualin an din ve rawih a. Kan mamawh ve bawk nen. Khaw mi leh sa phei chu pahnih chauh an thawk a ni. Chuvang chuan khaw mi leh sa ngei thawhtir hi an duh ve em em a, Pu Siam kha Managing board chairman a nia, min lo hual ve pawh chu a awm ka ti reng mai. 

"Hlawh a tlem awm e" ka ti a. 

"Kum tinin an san ve zel a, tumah hian 15000 an la kai ve tawh chuan ka hria. Aizawl vela private schoola 7000/8000 hlawh ai chuan, mahni in atanga Sing khat lak pawh a hlu zawk. Hna nghet i hmuh hma te chuan a thawhte pawh i thawk ve mai ang chu" ka pu chuan a lo ti vat a. Kuminah MA ka chuak dawn a. Ngaihtuahna ka la hmang thiam meuh lo. 

Thian ten min rawn sawm tawh si a, ka pu te chu ka chhuahsan ta a. Nenei nen kan inbe zuai. A nu pawh a zia tawh a, Bungrua vel an inpack tan thu a sawi a. Thawhtanah an insawn dawn si a. A ninawm ngawt ang. Insawn buai reng hi..ka pui ve thei dawn lo lehnghal. 

Sundayah chuan ka inkhawm ve a. Kan khua angah chuan inkhawm loh ngam pawh a ni lo. Aizawlah kha chuan a tuamah kha kan inkhawm ngai meuh lo. A peihawm loh ve bawk a. Inkhawm banah thei kan deng a, kan ei luai luai mai. Thingtlangah chuan chawlhniah hian tihtur a váng zual. Mama leh Samua ten khaw thenawma len an rawt a. ka nu ten an phal bawk a. Kan inkhalh chhuak ta a. Kan inhre pawh ve deuh vek bawk a, a nuam ve tho mai. Hriatpuii kan rim a, ani hi Samua star a nia, An inkawm chhungin kan lo inkhel char char. 

In ka thlen rualin Nenei'n a lo call a. 

"Min va ngai lo tak" a rawn ti nghat a. 

"Ngai reng che, i hriat kha. Kan leng ve alawm" ka ti a. Ka inthak pah a.

"Insawn chu ka va peih lo tak..i lo chhuk zanah lo leng nghal rawh aw" a ti a. 

"Lutuk, chuan i nu eng nge a an?" Ka ti a. "Hei a tha zel, a luhai pawh a sawi tawh lo..e tak! Michaeal te thianho kha inkhawm hlanin mi dawr an lo rawk a niang. An man asin" a rawn ti hliai a.

"An va thing tak..pawisa an va mamawh awm ve aw" ka ti ringawt a.

"In chungpa khan damdawi an ti ve a tia lawm..man daih rawh se, ka ning..inhmuh chang a awm lo thei si lo" a ti hlak hlak a. 

Ruk ruk em hi chu pa inti ve viau mah ila ,ka thisenin a ngam mang tlat lo. 

Tiang chuan kan khuaa ka awm chhung chu chhun lamah kan feh char char a, zanah erawh thian hoa inkhelh a ni leh mai. Nenei te pawh an insawn fel ta a, an in thar thlalak te a rawn thawn a. A zau ve deuh bakah a la thar tha viau. An lawmpuiawm viau e. Nilai zanah Samua te zu bilh kan chhuang pek a! A urh lek lek naa, a tha khawp mai. Duh aiin ka rui. Nenei ka call a, a mut a chhuak tawh si, bakah ka rui tih a hriat ka hlau ve bawk nen, ka mang tha ta ringawt. Ka la tha ang reng sia, ka tih ngai loh ang deuhin Mapuii biak a lang tlat! Ka call ta a. Vawi hnih ka call-naah a rawn la ta a. Zawi sap hian, "Ka mu tawh asin..a va pawimawh awm ve" a rawn ti a.

"I dam maw? Inpa a awm em?" Ka ti a.

"Awm lo, luiah an kal a. An lo la haw lo" a ti a. 

"Min hua mi!" Ka ti teh táwng a. 

"Nge ka huat ngawt ang che..i va ruih hmel ve" a ti a.

"Nia,rui ve mai mai..i ngaihawm ve a..ka lo bia che. In naute a tha zel maw?" Ka ti chhar chhar a.

"Umm a tha ve zel e..rui tawh suh. Khatianga tal mai mai rual i ni tawh lo" a rawn ti a. Ani hi chu min zilh a hrat ve bawk a.

"Nia, a dik alawm..nupui ka nei tep tawh asin.." Ka ti luam a. 

"A tha alawm..nei rawh. Nupui tha deuh nei rawh" a aw chu a vin lek lek. A thinrim mawni..

"Nia, nangmah ang chiaha fel ka nei dawn alawm..i lo kal ve ang chu" ka ti a. Nenei ka mitthla nghal.

."A sawi pawh i sawi zak lo e a..ka dah dawn..mang tha" tih leh dah a rual daih! Ani hi a lungawi lo chiang. Ka call nawn duh ta ëm lo. Ka lakah thikthu a la nei tih ka hriatna chuan danglamna min la thlen ve deuh. Ni e, mi bîk hi chu kan lo kawl ve vek alawm .

Nenei te pawh a nuin puan a thui zel a, Aniin a pui bawk a. A nuteii te hian pheikhawk dawr lian ve tak an nei a, chu chu nghahsak turin an ti a, min lo rawn thlap. Ka lo remti ve mai. Mahse, mipain dawr vak lo se ka la duh tho. Thikthu hi a..

Inrinni zan zanriah kan ei lai mekin ka phone a ri ral ral a. Ka va la a, Nenei a lo nia! A va laklawh e ti rilru chungin ka la ta tho a.

"Hello" ka tih rual rualin, "U Triiii...anu a thi!" A rawn ti ta mai le! 

(Monday atangin Practice teaching (Micro) kan nei dawn a. Ekhai! Min lo tawngtaipui ve u la, zirtirtu rual ho zirtir ve lehchhawng kha ka zak dawn lutuk..inhriat kha..🥺🙏