Vanneihsangi 10

VANNEIHSANGI (10)

Ziaktu: Toni Râlte

(Adds hi tumah click turin ka nawrlui lo che u a. Mahse, buai chung chungin hah pawh sawi lovin kan ziak ve a. Inclick sak ringawt hi chu a harsa em em lovin ka hria..😊

"Aw ka dam e. Teh hlawl che chuan" ka ti a. 

"I reh em a..tak taka ka fanu pawh i rawn en duh si lo.." A rawn ti niah niah a.

"Ka buai ve lutuk a, remchang hmasa berah ka rawn en ve dawn nia" ka ti ta ringawt. 

"Nia, kawr te pawh i leisak ve ang chu" a tih chuan ka nui ve ringawt. Thian chu kan ni thei maithei. Thian tha tak erawh kan ni leh thei tawh lo vang. Kan inkarah hnawk leh tlazep a tam tawh mah mah. Mahse, min lo bia a nih chuan biak chhiat erawh ka tum hran lo. 

Michaela pa te pek tur pawisa chu kan dah chhuak a, zanah Va pek kan tum. Tha chu na ve deuh mah se, duh aiin kan lo khawih na ve deuh si a,buaia hmingchhiat ai chuan tiin a rawtna kha kan pawm lo thei lo a ni. Eirawng kan bawl laiin Esi leh Rini te an rawn peng hlawl! Zira inbual zo a inthlak lai a ni a. Ka lo dawngsawng a. Esi hmel chu a nguiin a thinrim hmel angreng. 

Zira rawn chhuak chu thip zetin a lo melh a. Zira chuan pangngai takin,"In lo peng kawi ni maw? Khaw nge inkal a?" A ti a. Lukira erawh Nu Saii te inah a chho lawk.

"Tun bak hi ka hmel hmuh inring tawh suh. Kha..i thil min leisak ho hi la let rawh" tiin a bag atang chuan Zira'n online-a a chahsak leh special day vela a gift pek ho chu a rawn phawrh ta mai a. Zira mitmeng pawh a danglam deuh. Mahse, a insum thei viau.

"Ka pek tawh che a nia, i ta an ni tawh. I duh tawh loh chuan paih mai rawh" a ti ta nghut a. 

Esi a ter at,"Nanga thil hi ka kawl duh hleinem. I duh leh paih zawk rawh. Eng atan mah ka ti lo" a ti hlaih hlaih a. A biang a tai hlar mai. Tun tuma an buaina dik tak hi Zira'n a sawi loh vangin engmah kan hriatpui lo, a hma ang bawka thikthu vanga intauhsan mai mai emaw kan ti. A lo ni bik lo a ni maithei ni.

Zira chuan zaidam zet hian,"Aw le. Dah la, ka lo paih dawn nia..thingpui induh em? Rini, in r'u aw" a ti a. A chezia leh a tawng dan chu kei pawn mak ka ti rilru viau. A hma angin an inbakkaih leh kha ka lo ring deuh a nia. 

"Nanga thingpui siam kha kan in peih lo. I tenawm em mai. Kan inthen chhung reiloteah pawh hmeichhe dang i lo kawp thei a nia. I lo mak khawp mai" Esi chuan a ti bawrh bawrh a. Zira chu a khi suk, Esi hmachhawn zawnga thuthmun remin,"Tu pawn limit hi kan nei ve alawm, Es, a hma anga i laka tlawma zui duan duan reng che kha ka bansan tawh alawm. I duh hun huna i thena tawngkam chhe deuh deuha i ankhum tur ka ni lo a ni..hrethiam rawh" a ti ta fak fak a.

"Ka thinrim chhan i hria alawm..ka thikthu chhiatzia i hria " Esi chuan a ti leh a. A tah a chhuah hmel hle.

"Ka hria alawm..a rualkhai lo deuh a ni. Thiante tupawh i thik a, ka contact list-a hmeichhe number i block thul, awmngaihna min hriattir lo ve em a ni. I duh duh danin i awm thung sia,mipa te nen chaw eikhawm leh picnic tih vela inchhuaha ka sawisel ve pawn inthen i cho nghal zel a. Nang chuan i duh duh i thik thei, kei chuan tumah ka thik ve thiang lo. Ka duhtawk ta a nih kha.." zira chuan a ti nghet charh charh a. Tun tum zet chu a thutak bawk a, Zirdula chu ka tan ru khawp mai. Esi awmdan em em kha a dawngsawngtu tan a hrehawm ve dawn em a ni. 

Esi chuan, "A lo nih vel chu a..nang angin ka lerh ve hleinem..i bialnu nuthlawi nen chuan hlim deuhin awm rawh u" A ti nghat a. Kimi chungchangte chu a lo hre leh daih tawh a nih awm chu. Zira lah chuan, tiel rawngkai ni miah si lo hian,"Ka lawm e" a lo ti sup. 

Esi te tan eng han tih vak theih ni hek lo, Rini chuan hawn a rawt a. An kal hmain,"E taka! Tp,in luah tur pawh kha ka hmu thei maithei aw. Lo nghak hram hram se" a ti a. Ka lo bu nghut. Esi chuan ner sak chungin,"Vanneihsangi tih vel, Kimi tih vel inhan buaipui a nia..inva tlahniam sawt tak" a ti kher a. Mahse, ka chhan hmain, Zira'n, "Haw mai teh u. Khatiang mi dang hnuaichhiahna thu kha kan ngaithla peih lo. Esi, ka thinlung hneh i tum dan hi a dangdai em a, min tihel telh telh zawk mai. A pawi khawp mai. Inenkawltha ang che " a ti ta hmak a. An chhuak zui nghal.

"Tun tum in inthen chu inva thutak ve" ka ti a. A nui huk, "Limit a pelh tawh hi chuan tihluih a har ve lutuk. Inbulah pawh ka sawi duh lo a nih kha..sawi reng te hi a zahthlak ve a. Tikhan inhria a ni mai" a ti duah a. Dal a kang nghal sar sar. 

Nenei'n a lo call a. "Vawiin i titha em?" A ti a.

"Pangngai..eng nge i tih?" Ka ti a.

"Kawr ka zai a, pahnih ka zai chhia..mahse, a fuh chho ve zel" a rawn ti a.

"I khua a sik leh em?" Ka ti a.

"Sik lo. Ka lu na a la awm deuh a, a bak chu ka tha. Zanah lo kal tawh la" a ti zawm zat a.

"Dawn chiang e" ka ti a. Kan dah ta a. Zosangi te pawh an rawn haw a, tui ka dawh lai tak a ni bawk a. "In va tlai ve" ka lo ti ve a.

Zosangi chuan,"Nia, U Tei hi ka nghak ve leh a .." A ti a. A nui hmel hi chu a mawi reuh ngawt mai. Min kal pelh hnuah,"Zanah lo leng u la" a rawn ti leh sap a. Ka bu ve ringawt. Kan leng awm si lo va. 

Zanriah ei laiin Zira leh Esi vel kan sawina lamah Lukira leh Alicia chungchang kan sawi ve leh a. "Nangni hi inla inbe lo mi!" Kan tih chuan, "Amah hi chuan mi rawn biak zeuh a ching, mahse ,ka chhang ngai lo. Rsa nen khan an la inkawm reng a, ka ngaihven peih lo" a ti mai a.

"Bteii saw i duh ve tak tak mi a? Nang hi i chhaih mai mai ang e, a la naupang si" Zira'n a tih chuan, "Duh loh i bem ngai mi!" A lo ti hluk a. 

"Alicia rawn let se, i thlauhthla leh mai ang tih a hlauhawm alawm" a ti a.

"Hmeichhe naupang a nia..tihnat chi pawh a nih loh saw..min ring rawh, ka tina lo vang" Lukira chuan a ti nghut a. Ka lo nui.

Sawma pawh in lamah an enkawl a, a chhuak ngai miah lo. A tha zawk. Music lam a tuichilh leh tan bawk a, tihian atchilh daih se mi pawi a sawi lo zawk ang. Nupui nei chi ni pawhin ka hre lo. A hlauhawm thei em mai. 

Michaela te ina luh chu kan hreh ve deuh naa, va pek ngei a ngai bawk si. Kan tawi kan tawi hnuah kan va lut ta thâwr a. An lo awm kim thap lehnghal. Michaela chuan min melh no lo khawp mai. Ka ngaipawimawh hran lo, "Hei pawisa kha aw" tiin dawhkanah ka dah a. "Kan chhuak leh mai ang." Tih leh chhuah kan rual nghal a. A pa chuan,"Ka fapa hi in kut hmawr pawhin lo khawih tawh suh ang che u..a chiang em?" A ti thar thar a. 

Lehhawiin,"A ze danglam leh danglam lohin a la hril ang chu" ka ti ve ngat. 

"Inchhirna reng reng inla nei lo ni maw? Ngawi tak r'u, a lehpek a awm anih chuan, jail bang inzut ngei ang" a ti khar khar a.

"Ni rawh se. I fapa kha fapa tha tak ni turin i lo enkawl dawn nia..nih phawt u" Zira'n a ti a. Kan chhuak zui nghal. An tawng bawrh bawrh chu kan hria. Zah vak a tulna kan hre bik lo. Dik lo fai vek ni ila zahna pawh kan lantir ve mahna le. Mai mai a . 

Kimi te chuan chaw an lo ei mek avangin Nenei te inah kan tlang a. Tv an lo en thap. Apuia te unau chu ka thil leisak ka pe a. An lawm thiam thin teh e. Nu sangi chuan,"Michaela pa te chu pawisa chu inpe ta em ni?" A ti a.

Kan pek thu kan sawi chuan,"Fimkhur tawh r'u aw. An duh sa em mai, an zia saw a hlauhawm" a ti a. 

Hmalam hun hriat ni hek suh. In luah tur chungchang kan sawi ta daih a. Nenei chuan,"Awii kei chu insawn reng hi ka ning tawh eee..tukinah kan in luahna pa a rawn kal a, kan in chung chiah khi a luahtute khi thla tharah an chhuak dawn a, mahse, in khi an siam tha dawn a, thawm ngai a awm deuh a niang, an siam that hnu chuan a luah theih dawn a niawm e. Luah mai ka duh, to deuh mah se " a ti niah niah a. A nu pawh chuan,"Nia, bakah naupangho school luhna vel ber hian min tibuai. He mi vengah tho chuan awm se thuhran. Veng dang chu a buaithlak ve em a" a lo ti a. A dik ka tihpui reng mai. 

Nenei'n thingpui háng a chhuang dawn chiah tihin Kimi te in lam atang chuan Bteii a rawn tak tuar mai a, kan tho suau. Kimi pawh a rak ve nghal bawk. Bteii chuan," A sa lutuk" a ti tuar a, kan tlan phei nghal. Chhuatah Bteii chu a lo tlu niaih a, Kimi'n chawhtawlhah tui chuan a mal chu a lo leih mek. 

"Eng nge thleng?" Kan ti a.

"Hei, bawnghnute in a intih buak a, a mal hi a kang a " Thlabar zetin Kimi chuan a lo ti a. Bteii chu a mittui a pherh nuaih mai. Lukira chuan rang takin Bteii kekawr chu a phelhsak a, a kanna lai lah chu a kap bul bawr vel a lo ni a. A sen tur mai. Nenei chu hmanhmawh taka in chunga tlan chhoin tui vawt a rawn la a, Bteii kanna laiah chuan a dep ta a. Bawnghnute lah chu chhuatah a la baw nuai bawk si. Bawnghnute kher hi chu a kang nasa si a, Bteii chu a ngaihtuahawm mang e. Lukira'n a pawm tho a, thutthleng seiah a muttir a. Nu sangi chuan, "Saphai thau kha ka la nei em le..Nene, va en lawk teh" a lo ti vat a. Nenei a kal nghal. A rawn keng a, Lukira chuan a hnawihsak ta a. Bteii pawh a tap tawh lo. A bawnghnute chhuan suan thlak a tumna lamah a a pial thut a, a inbuak a lo nia. 

"Kekawr chu ha tawh rih lo mai rawh. A bet palh ang" Lukira chuan a ti a. Puan ven nuam deuh Kimi'n a va laksak a, a ventir ta a. Nachhawkna an eitir bawk a. A zia mai turah ngai ang. Nenei te in lamah kei chu ka phei ta rih a. Thingpui háng kan in a. Apuia te chuan lehkha an zir a, Nu Sangi erawh chuan dawra dah tur tiin mei a zial a. Nenei chuan a lo tawnsak zel bawk a. Sawma chungchangte kan sawi ta vel mai mai. An khawngaih ve thute pawh an sawi. 

"Taka! Kan in hlui luahtute chu in va kawm ve tawh em?" Nenei chuan a ti a. 

"Umm, an fel reuh reng, kan la inkawm tam lo" ka ti a.

"An chhe lo em" a ti sap a.

"An tluk lo che" ka ti sup a. Kan nui dun a. 

"Chuan, kar tawpah chuan i haw ang maw?" A ti a. 

"Ka la tum deuh a, lo zin ve la" ka tih chuan a nui hawk a. "Cham rei suh aw. Thil thleng a awm leh ang e" a ti a. A sawi dik reng. Awm loh kar hlekah pawh thil thleng hi a awm ve hman ziah. Dar 9 rik hma deuhin Nu Sangi leh a fate chuan min mutsan a. Thutthleng seiah insi chátin kan mu dun a, Tv kan en pah..ni lo, kan en hman vak lo, kan infawp deuh reng mai. A rem lohna hmunah lah hian châkna lah hi a chhuak ut ut zel a. Ninawm. 

Zira'n kawngka a rawn hawng thut a, kan va phu chiang tak. Kan inkiss lai tak a la ni zui. A khi thaw a, "Sorry, Bteii saw na a ti riau a, Damdawiinah kan va kalpui lawk mai dawn mawni kan tia" a rawn ti a. 

"Eng motorin" ka ti a.

"Kimi'n a thianpa a bia a. A rawn thleng tep ang. Ka rawn hrilh ve mai mai che u, Kan rawn lam haw ang che" tiin min rawn en a. Kan va phei ve leh a. Bteii chu a khuate a lo sik chu niin, a na riau a nih dawn hi. Kar loah Kimi thianpa pawh chu a rawn thleng a, Zira leh Lukira ten Bteii chu an zawn chho a, a ke pawh a ram tha ngam tlat lo. Kan han thlah liam a. A buaithlak khawp mai. Unaua in luah ve mai an ni bawk si a. Keini pawh let thla lehin, a ngaite bawkin kan mu leh a. Zan a rei ve deuh tawh a, tawng pawh kan tawng ring vak ngam lo. Kan inkhawih leh seuh seuh mai. Ani pawh a meng phelh phang mai a; a meng de sar sar mai. A biang a tai tēk bawk nen, Han chinleh hrep ka va chak tak.

"Hawh, Kan inah phei lawk ila" ka ti sur sur a. Ka darah a rawn piai hlak, "Insum thin rawh" a ti hlak a. Kan nui dun hak hak a. A hrehawm nuam si..ninawm a. 

"I nu te chuan engmah an la sawi lo mi?" A ti a.

."Sawi tawh lo, an inrawlh tawh lo vang" ka ti mai a.

"Lehlamah chuan an sawi kha a dik alawm. Ka to chhuahna hi a chhuanawm loh ve em a ni. Ka dem miah lo, i chhungte kha. Ka pa diktak hi ka hre chak thin khawp mai" a ti nuah nuah a. 

"zawn chhuah dan hi chu a awm mai lo'ng maw?" Ka tih rualin ka inchhir nghal. A nu chanchin ka hre ve vek si. 

"Pu Mawia khan min hmangaih nise chuan ka pa dik tak anga pawm thlap kha harsa ka ti miah lo asin" a ti sap a. Ka va kuah a, "Engkim a tha vek mai ang. Pa i mamawh hleinem, i nu a awm alawm" ka ti a. 

"Nia, ka nu hi awm lo se kei pawh ka thi ve daih ang" a ti a. "Thih thu sawi suh" tiin ka fawp a. 

Zira te pawh an rawn let leh ta a. Kimi'n a riahpui nghal dawn vangin Nenei te inah an rawn tlang a. Lukira a cool hle. Thingpui kan in leh hnuah hawn zai kan rel ve ta a. Bteii chu a, rilru a tinuam lo deuh. Fiamthu titak deuhin Zira chuan,"Lukira chan tur a bo maithei ni..a kanna lai kha a pilril sia" a ti pek a. Lukira pawh a khi ve suk. 

A tuk kan test chu keima tawkah ka thiam ve reng. Ka zir lo naa, ka hriat ve zawng a lo ni bawk a. Lunch break-ah Nenei nen kan inbia a. 

"Class inla neih ka ring sia, enteh, anu nau Anuteii'n min rawn zawng chhuak a. Kha, i hria em? MAteii a tih kha..chung vel chu hei kan la ni nuai mai" a rawn ti a. A hlim hmel kher mai. 

"A va lawmawm ve. Chuan engtin" ka ti a.

"Ih, Anu nen an inkuah a, an tap reng mai. Tlaiah an in lamah chaw kan ei phei dawn a. Kan in luahte kha te a ti lutuk a, kan in hnuaiah awm ang che u a tia" a rawn ti a.

."khawi vengah nge an awm?" Ka ti vat.

"Kulikawnah daih a nia. Mahse, kan luah kher lo vang, anu hian a duh ka ring lo. Nuteii te chu an hausak hmel tawp. An pa pawh a fel hmel lutuk" a ti sar sar a. A mood a tha tih a hriat hle. Ka lawmpui kei pawn. Mahse, Kulikawn daih daihah chuan awm lo se ka duh. Lenna a hla dawn si. 

Msi zia a zawi riau mai. Ni danga a phur theih tehreng nen. "Ti nge i mood a va off hmel..i bialpa nen in inthen mi!" Ka ti a. A nui vak vak.

"Then tur bialpa ka nei ve leuh, tak taka ka tha reng, nizan ka mu tlem lutuk a, chuvang a niang. Nenei nen inla tha em?" A ti duah a. Kan titi ve apianga Nenei a sawi ziah hi mak ka ti deuh. 

"Umm la tha ve zel e. Ti nge?" Ka ti a.

"Ka ti mai mai. Ka lo vei ve tawp, ka khawngaih em a" a ti ringawt a. 

"I fel thin" ka ti mai a. Class room lam kan pan ta nghal a. Teteii leh mipa thenkhat ho an lo thu bial leh taih a, an nui leh ham ham thin. Teteii chu hmeichhe awmchhun e ti lo chuan a tawng leh char char a, amah lah hi nui miah si lo va fiamthu thawh thiam a nia. Ka va thu ve a. Min rawn melh ang hë haw a, "Tpa pawh hi a nei te miah lo vang" a'n ti ngawt a! A bula thu Dina a khek tuar. 

"Engvang chuan?" Ka lo ti hû a. 

"Class kan tan tirha bungrua kan thiar ni khan chapal i rawn bun a, i kezungpui kha ka hmu alawm" a ti ta mai a. Kan nui dar dar mai. 

Ka melh vang vang a ,"Nang pawh a vûm miah lo" ka ti ve salh a. 

"I chiang maw?" A ti há a. "I chal kha a phek em mai" ka ti ve a. Kan nui leh vak vak. Zahmawh sawi hi sim a har a nih hi maw. A pawi loah ngai tawh mai ang. Chutiang chuan rak thin mah se, Teteii chu tuman kan zuam phahin kan hmuh nikhua loh phah chuang loin ka hria. Amah a hmel that bakah leh a thiam thei si, mi tupawh a kawm thei vek zel hi kan ngainatna chhan pawh a niawm e. 

Tehlimi a rawn peng haw a, "Ti nge nizan kha inrawn len loh? Zanin chu lo kal tawh r'u aw. Ka birthday a nia" a rawn ti siam siam a. 

"Lutuk" ka lo ti var. Nenei te a nuteii te in lamah chaw an va ei daih a, an riak nghal dawn bawk si nen, va len chu pawi ka ti lo nasa. Kimi te lah damdawiinah an awm bawk si. A dawra thawk a nauten chaw leh mamawh chu an va pe thei a, a zia viau e. Bteii pawh a dam vat turah ngai ang. 

"Bteii dam loh hlana birthday lo lawm vel hi nuam pawh ka ti lo" Lukira'n a tih chuan,"I ho! Engtin i va awm dawn pawh ni hlei lo, eng pawh hi enjoy ve tum zel a tha" ZIra'n a lo ti vat a. Thleng ka sil zawhah ka inthlak khawmawi ve a, kekawrbul nen tlawnga va len kha nuam ka ti lo a ni. 

"Eng nge kan pek ve ang, a birthday a ni ve sia" ka tih chuan, "Ho mai mai, kan hre lawk tawh lo a, a beisei bik lo vang" Zira'n a lo ti vat a. Lungmuang tak chuan kan phei ta dial a. 

An ni pawh chaw an lo ei kham tawh a, Zosangi chuan a lu a lo hru hul mek a. Tehlimi erawh a lo thu diai a. "Mi dang pawh ka sawm lem lo, chaw eia sawm che u ka tum zawk a, mahse, kan bang tlai leh awm sia ka tia.." a lo ti sawt sawt a.

"A pawi hleinem..tihian kan lawm a ni mai" Lukira'n a ti a. 

Min rawn melh kual ralh ralh a, nui sáng chungin, "A sehhmeh tur bawngsa kan kang dawn nia" a ti sep a. Kan tihtur a hriat ta hle. Zira hmelah phurna a lang ngjal. Kei erawh Nenei ka hrechhuak nghal vat. Ka in tawh rih dawn loh thu ka lo sawi ve tawh si..mahse, naktukah kan department bik kan chawl a. A tuka test tur atan study leave kan dil kha a nia. Zu chu ka hnar zawh leh pawh ka ring lo. Bakah Amawii te ang mai mai a ni dawn lo tih ka hria. Nenei chuan a hre bik lo vang. Nghei tawp hi a har ve em a ni. Bawngsa chu ka sawngbawl a, Zosangi'n min lo pui bawk. A nuam tan e. Lukira ngui pawh a nui a nui ve leh tawh e. Bawngsa fry pah chuan, Kan lem ta hlek hlek a. Black dog um khat leh Vodka an lo nei ngei. Keini Amawii bak hmu phak lo tan chuan hnar a har ve riau. 

"Bethsy khan a duh ve theih che nen, i sual ve e" a ti sap a.

"Sual pawh ni lo, a buaithlak ve em alawm" ka ti ta ringawt a. 

"Ih maw, in nih lai khan i pic hi a lar thei tawp, kan groupah kei pawn ka la kawl maithei, pakhat chu" a ti leh sar sar a. Ka nui hawk. A va zahthlak tak. 

"Naa..ka va zak" ka ti a.

"A ho e, zak suh. I chhe lo ve alawm" a ti nghat a. Ka nui pút pût ringawt.

"I chhe lo ka ti kei pawn" ka ti ve ringawt. A nui sak a, a nui hmel hmuh hi a nuam thin viau. Kei hi 5'10 ft ka ni a. Ka sam hi sawi tawh ang khan a kir, kir buk luai erawh a ni hran lo. A dum hle bawk. ka thau lo va, cher tak pawh ka ni lo. Sek phiar lam ka ni ve, Six pack te pawh tlem lai khan ka nei ve hman. Ka mithmul a buk a, ka meng lian bawk. Ka hmui hi a chhah lek lek a, ka kareh hi a zau lam lek lek bawk. Hmel tha e tia sawi zui chi zawng ka ni hran lo. Mahse, mak deuhin ka star ruk deuhte hian min lo duh ve mial zel! 

Tehlimi te pawh an inkawm tui khawp mai. Bawngsa pawh kan phit hmasa bawk a, a hmin chho ve mai. Dar 9 dawnah chuan a ei theih ve ta mai e. Chhuatah pher phahin kan thu bial laih a. Titi pawh a nuam chho tan hle. Zira erawh a phone a hmet deuh reng mai,kimi nen an intext a ni ngei ang. 

A tam bawk a. Kan thli mawlh mawlh mai. Tehlimi leh zosangi lah chu an in thei ve zëk a. Tehlimi phei chu a la harh kar maiin ka hria. Ka phone a ri ta. Nenei a lo ni. Ka kalsawn vat a. 

"Ti nge i va online thei lo ve..lehkha i zir mi?" A ti a. 

"Aaa..ih, hei Thenawmte inah kan leng a, tehlimi birthday a nia, kan lawm ve a" ka ti a. Tawng ka fimkhur hle. 

A ngawi dat a. "Invaiin maw?" A ti a.

"Umm" ka ti ringawt.

"Zu i in em?" A ti sap a. Ka îp chawih.

"In nang, ka in dawn tawh lo ka tih kha" ka ti hmiah. Inhniala inhauh ai chuan dawt ka sawi ta mai.

"A tha..hei anu te chu an mu tawh a. Nuteii fate nen kan la meng a, an fel khawp mai. An in hnuai luah tur chuan min sawm reng a, Anu pawh hian a duh deuhin ka hria" a ti a. 

"A hla ve ee..lo lenna tur" ka ti ringawt a.

"Nia, kei chuan engmah ka la sawi ve lo. An hausa bawk sia,..nuam pawh ka ti vak lo. " a tih mek laiin, Zosangi bathroom kal tur chuan, ring leng lawng hian, "Lal Tp, tikhan min biaksan ziah suh. I no saw va thli khat vat rawh.." a rawn ti ta mai a. Ka kalsawn hman tawh si lo. Ka nui naa, ka lung chu a va awi chiah lo tak. Mi mah inthup vr hram hram nak alaia..

"Tu nge a?!zu i in reng sia" Nenei aw chang fak ka hre zui nghal.

"Zosangi nih kha.kan in lo , a uang mai mai nih kha..hei kan haw tep..hawn veleh ka lo bia ang che..muah, love u " ka ti sawk sawk a. Ka dah daih. A lungawi lo teh ang chu.

Mood a dik hleithei tawh lo. Mahse, kan han in belh leh takah chuan, tlemin kan zia deuh. Lukira khan a birh ngut ngut ka ti reng a, thutthleng seiah a muhil ringawt. A die a nih ber chu. Ani Bteii vanga a rilru nuam lo khan ngawi rengin a in tluk tluk a, a zo lo a niang. Tehlimi rui ve thei lo emaw ka tih pawh kha a zung tur a han tho chu a pai khet khet mai. "A va mak e aw" a ti hlak a. Kan lo nuih. Zosangi erawh a meng phelh phang tawh a, a tai hlar mai. Mi rawn nek foul tan viau bawk. Zira lah a phone a khawih char char bawk si. Ka malchungah te chuan a ke a rawn hlang uaih uaih a. Mahse, ka khawih lem lo. 

Dar 11 a pel tawh. Zira chuan, "Haw ila" a ti thut a. Lukira a va kaitho nghal. Tehlimi pawh a muhil tawh. 

"Nang chu la awm rawh. Ka la muhil thei dawn lo" Zosangi chuan a ti sar sar a. Zira leh Lukira chu an ding a. 

"A tlai tawh e..mu tawh zawk la" ka ti a. Zira te lah chuan min kalsan nul nul si. 

"Naktuk ka kal dawn lo..a ho em mai" tiin min pawt tlat! A va buaithlak 🤭🤣

Zira te lah an kal tawh si. Laklawh zetin ka thu a, Ka rilruah Nenei a rawn lang nghal. Pakhati lah chuan min nek na tawlh tawlh si. A lo itawmin a tituai roh bawk si. Mipa thisen a lum lo thei lo. Mahse, chutia keuh ngawt chu ka duh bik si lo. Ka banah rawn vuanin ka awmah chuan a bei deuh a, min chhoh melh sar sar chungin,"Ih maw, Bethsy nen in nih lai khan ka star thei tawp che" a ti ta a. Ka rum nghut. 

"Chuan, bialnu i nei mek tiraw?" A ti leh ser ser a.

"Umn nei ve e" ka ti a. 

"Kei chu kan inthenna a la rei lo, mipa hi chu intenawm em mai" a ti nghat a.

"Pawi ve..a tenawm i tawng fuh a nih chu " ka ti a. Ka kokiah zawi zet hian a lu a rawn dah a, ka hawn chu rem a tih loh hmel kher mai. Hnai taka min melh sawr sawrin,"Bialnu i lo nei hman kher chu a pawi e" a ti leh a. A aw pawh a thám chhal mai. A hmui tuihnai zet chuan fawh a cho nasa mai si. Kei lah harhfim bik hek lo le, eng dang sawi tawh lo chuan ka fawp ta hmiah a. Min chhanglet rang kher mai. A duhthawh tan tán viau bawk. Mahse, Nenei hmel ka mitthlaah a rawn lang zawk a. Ka namsawn nghal. Vanneihsangi phatsan chu harsa ka ti ve tlat! Mapuii zawk kha chu han pelhesan zawk chang ka nei thin asin le..Vanneihsangi hian engtiang chiahin nge ka lakah thiltihtheih a neih ni. Hrilhhai hmel angreng taka min melhin,"I mak" a ti nghat a. Ka nui suk a.

"Ka va haw phei ve ang e. Nang pawh muhil rawh. Zingah a hrehawm palh ang" ka ti a. Ka ding a, a mitmeng dava riai chu melh loh hram ka tum. A itawm lutuk tlat! 

"I tih tlat chuan le.." Tiin a rawn ding pai khat khat a, a sam chu tuai mamin, "Duh aiin ka kai" a ti sep a. 

"Nih kha" ka ti ringawt. Kan inmang tha zui ta a. Pawn boruak hip chuan ka ding vang vang phawt. Ka va chesual teuh ve aw..inah ka lut a, a lo reh thap tawh. Rooma ka luh chuan Zira'n a phone a lo la hmet! 

"I keuh elo?" A ti nghut a. Ka nui hawk.

"Aih, ka rinawm alawm kei chu" ka ti a. A rum nghut ringawt. Ha ka nawt a, ka mu ve nghal. Nenei msg a lo awm va mai.

"I leng rei tawh ee..U Tri, ka ngaihtuah che. Min phatsan lo tiraw?" Tih a ni. Min dek khawp mai. 

"Ka mu chiah. Ka phatsan lo che tih chu van khian min hriatpui e" ka va ti kher a. A seen nghal. Min lo la nghak ngat ngat chu ka khawngaih reuh.

"Ka tawngtai vang a nih chu, i pelhe loh nan ka tawngtai alawm" a rawn tih chuan ka khi vur vur..lalduhawm leh!

"A tlai tawh sia, muhil tawh la..ka ngaihtuahawm loh" ka ti a.

"Nia, min lo thlah rawh. Chuan, naktuk inchawlh dawn chuan, ka lo leng ang..min lo hruai la..in kha ka tihfelsak dawn che u nia.." A rawn ti reuh a. Ka bulah awm se ka fawp nawk nawk chak. Kan inmang tha hnuah kei pawh ka mu zui ve nghal. 

Pentawng a awm vak lo a, a zia deuh, ka erawh a tui lo chhiava a ni. Zira te kal hnuah ka intifai a. Ka inhruk hul laiin Zosangi'n min rawn au lang lang a. "Lo leng rawh" a ti a.

"Nakinah aw" ka ti ve mai a. Nenei te pawh in an thleng deuh chauh a. Va lam chuk chuk chu ka ti deuh a. Sawma ka han hmu ve lawk a. A lo tha viau tawh. Nenei hming erawh a sawi leh hram. Muangmarin Nenei lam tur chuan ka chhuak ta a. Ka va thlen chuan chhuat a lo nawt mek a. " ka nawt zo ang a, ka hman a ni mai" a ti a. Nu Sangi pawh a hrilh sa a niang. Engmah a sawi lo. Ka nghah pahin Kimi ka call a,"Naktukah chuan chhuah theih kan inbeisei e" a ti a. Va kan ve hram pawh tha ka tih rualin, Nenei nen chance neih ka chak ve bawk si. Lukira te an peng haw dawn tho a, kei chu min hriatthiam tho ka ring. Nenei a inpeih a, kan chhuak ta a. Jocker pants a bawp khal zet tilang chiang fahran tur a ha a, crocs bunin, tshirt grey a ha bawk. A simple thei a, a mawi tho bawk si. 

In kan thleng chu a hawi vak vak a, a hnawk em em lo nia ka hriat kha ani chuan hnawk a ti nge , a che nghal zung zung a. A hmasa berah room lam kan tifel a, thawmhnaw te chu a thlep fel vek a, kei erawh ka lo hawi ka lo hawi ringawt. Bed sheet te chu kan pathum chuan min thlaksak vek a. Nula khum siam nge nge, mut inthahrunawm khawpin a mar! Pindan a tihfel meuh chuan thingpui in a hun der. Ka lo lum thung a, sitting room leh choka a bei leh ta a. Ka theih ang anga puih ve ka duh viau a, ka zei hawi meuh si lo. Kan cousin case bal khak tlur te chu a thlak vek a. Kan awm atangin vawi hnih bak kan thlak ka la hre lo. Hmun an phiat chu nitin kan phiat ve tih sawi pawh a zahthlak. Kan hawl kim lo thin tih a lang reng mai. Choka bungbel a rem thata a nawh fai lai chuan, Zosangi a lo lut a. Nenei a hmuh chuan a tawi deuh a, "Lo kal rawh" ka lo ti vat a. Nenei nen chuan an inmelh zawk ringawt.

"In tifai turin nula i chhawr tawp law..keini pawh kan awm a, min koh mai tur lawm le" a ti a. 

"Chhawr lo e..min tihfaisak zawk a nih hi..nenei a nih hi, ka bialnu...Nene, Zosangi, kan thenawm nula" ka ti zung zung a. Zosangi hmela danglam chu ka hmuh hmaih loh. Nenei mit fing tak khan a lo hmu ve hman ang tih erawh ka hlau deuh. 

"Aa..ka rawn kal lawk mai mai. Nangmahin i awm emaw ka tia,.thingpui inpuiah lo sawm che ka tum a.." A ti niah niah a.

"Lo thu ve rawh.." Ka ti leh tawp a. Han biak lumlam vak dan ka hre lo. 

"Lulian, Bangla sahbawn han lei lawk la..dekchi ho hi ka'n nawt a nge" Nenei chuan a ti a. Ka chhuak nghal vut. Ka rei hran lo, ka zuk let leh chuan, Zosangi a lo awm tawh lo. 

Sahbawn ka pek pah chuan ngun zet hian min melh a, ka lai deuh, "Eng nge?" Ka ti hú a.

"Engmah.." A ti mai a. A thinrim lo chuan ka hria. Chawhnu dar 3 rik dawnah meuh chuan kan in chu in thar a ni ringawt. Nenei chet fel dan chuan ka lung a va dum tak e aw. Ka nu pawn hre chiang se a lawm viau ang. In chhungkhur che fel a ngaisang sia. 

A hmai a va phih fai a. Thutthleng seiah kan thu dun a. 

"Nizanah kha nu nen khan engtin nge inawm?" A ti ta a. Ka phawk hru mai.

"Engtinmah..ti nge?" Insum ru zetin ka ti a.

"Hnaih tam lo la ka duh..i hrethiam em?" Tiin ka mitah tak a rawn melh kal a. A va zahawm si em..

"Thian alawm" ka ti hram a.

"A ngaizawng che tih ka hria.." A ti nghat a.

"A ho em mai" tih pahin ka kuah thawk a. Ka fawp nghal nawk nawk. 

A tal aih aih a. A tal na hran lo. Ka fawp lui zel a, min chhang let chung siin min nam pah tho a…

Aw thian kharh thawm kan hriat rualin kan inthlah vat..kawngka bula ding kan va hmuh rual chuan kan ding rual thawt..

Malsawmtluanga chu thinrim hmai sen teuhin a lo ding khur hlawk hlawk a..! 

(Vawiin chu a tam thei lo a ni e. Online class a rei deuh a 😊