Miss judy 1

MISS JUDY..(1)

Ziaktu: Toni Râlte

Ka sakhi kah chu bel chiangin ka khi vur vur a. Lian tak chu a ni lo naa, A lawmawm hranpa ve reng reng mai. Ka thianpa Buanga a rawn thleng thla ve nghal a. Lui kawrah zawn thlain kan puah dun nghal a. 

"A chek hi chu naktukah thianhoin kan ei dawn nia..Nu Chami inah" ka ti sûrh sûrh a. 

"Nia, a veilam nen" tiin a khi thaw a. Kan chan zawhah theih ang anga khungin kan phur haw ta a. Pathian zarah ka kut hi a hmui ve riau a, Kuminah ringawt pawh sanghal pathum, Sakhi 2 leh zawng 2 lai ka kap ve tawh. Ni e, Forest lam chuan hria se min talh duh maithei a ni. Mahse, kut hlei vanga kap kan ni bik lo bawk a, sanghal ngat phei chu kan buh leh thlai min suasamsaktu an ni a, kah loh chuan buh pawh tihtham kan thar dawn hauh lo. Sakhi erawh a chek hi a tui ve em mai a. Duhsak zawngte han hleh lah a nuam bawk si. Kan khua hi in 150 bawr vel lek kan la ni a, Zopui khua niin, Mamit District- a ni. Ram a la thain a la ngaw a, kan la pal darh hneh em em lo khawp mai. Sawi tawh angin thingtlangah pawh kan awmna a pilril bakah kan ram hruaitute hian min ngaihsak vak lo nge, Kawng te hi a'n chhe em em khawp a! Aizawl zin dawn chuan kar kawngah riah a ngai fo. Kawng a chhiat bakah a thui tham si a, chaw fun nen mutbu nen kan kawh chhuah a ngai thin. Tin, Aizawl service motor pawh kan nei chuang lo. Kan khaw thenawm lawk Tualpui hian sumo service an nei a, anni hi chu kan khua aiin a lian zawk bawk a, PHC te pawh a ding ve a ni. Kan khaw inkar kawng hi pumpelh kawng a awm a, a hnai angreng viau. Eng emaw nikhuaah pawh kan inlenpawh mai zel a. Kei ni aia an len zawk vang hian an inla ve deuh tih mai loh chu an khua pawh a nuam ve reng mai.

Buanga chuan, "Kan khaw middle School-a thawk tur khawpui nula a lo kal dawn an tih tak kha" thaw hlawi hlawi chungin a ti a. 

"I lo hauh leh deuh tihna em ni?" ka tih chuan a khi vur vur a. Buanga hi pathlawi a ni a, Tualpui khaw nula nen nikum Kumtirah khan inneiin, rei an inkawl hmain a chhungte nen an inngeih ta lo chu an indang ve a. A thiante pawn kan pui ve nasa khawp mai. Mahse, An nu kha a thatchhe riau mai a, Amah vek a che ta mai a. Zu han in zeuh a nei ve bawk si nen, an thu a inhmu lo zeuh zeuh ta a. Vawi khat a ram riak haw an in chu a lo hnawkin, annu lah phone khawihin a lo mu der der mai si a. Ani Buanga tlangval lai atanga felfai taka che thin mi chu a thin tertek a chhuak ta nge, a hah bawk si chu a ling ta phat mai a. An inhau chiam a, insum zo loin annu chu a beng ta a. Chu chu thinrimpuiin an nu chu an khaw lamah a tlan ta daih mai a. Kohsak leh kan tum paw'n duh miau hek lo. Koh loh na na na chu An nu te chuan bungrua an rawn la ta a. Ani Buanga pawn a lo dang hlek lo mai. An inthen chu a ni ta ringawt a. A in chu amah maia luah zui thu awm hek lo le, Nu Chami kan tih mai, a nuta te bula khawsa ve, a nutapa nupuiin hnawk a tih ruk em em chuan luah a dil ta a. A luah zui ta a, Kan teiluhna, khawiah pawh kal dawn ila kan innghahkhawmna rûn a lo ni ta a ni. Tin, zu te hi kan khuaah zuar awm ve hek lo, a in mite hian kan bilh mai zel a. Kan neihsa chu Nu Chami kan kawltir a, a inah kan dawm ho ve thin. Ani hi pasal sûn, fa pawh pahnih sûn tawh mahni mai a nih tawh vangin a khua a lo har ve thin bawk a, chutia kan leng lutte chu a lo lawm em em zawk thin. 

"Khaw nge a awm ang le?" Buanga chuan a ti leh zuk a.

"Vcp te inah a niang chu" ka lo ti mai a. Ka ngaihven vak lo. Kan khuaah middle school thleng bak School a awm lo va, Thawkkhat lai khan Privatein High School chu an han din ve bawk a, mahse, thawk tur pawh an indaih hleithei ta si lo nen , Tualpuo High School lamah an kal zawm ta mai zel a. Khua a lian lo bawk a, a awm ve tho mai. Sawrkarin min ngaihsak vak bawk si lo.

Kei hi ka puin duh taka min sak-sak Ngurhmingliana ka ni a, Ngura tiin min ko thin. Kum 32-na ka hmang ve mek a. Kan khua angah chuan tlangval senior pawl ka ni ve ta reng mai. Unau hi pahnih chiah kan ni! A chhan pawh ka nu min hringtu hian ka farnu a hrin hlimin raicheha min boralsan vang a ni. Tichuan, vanneihthlak takin ka nu laizawn ka nuteii'n ka nau chu a chawi seilian a, ani ka nuteii chu a tet laia khawsikpuia a nat vak avangin a ke hi a inseihleih a, a kal bai a. Pasal hmu zo tawh lo tura inngaiin keini unau chu min duatin fa angin min en ta a. Ka pa lungleng khawhar zualpui a kian takah khan ka pa pa ka puten, "Zaiteii hi nei mai rawh. Ani aia i fate hmangaihtu an awm dawn lo" tiin an nawr a. Ka nu nau a ni bawk nen, a tirah chuan a hnial fithla thak a niawm e. Mahse, nikhua a lo rei a, keini unau hmalam hun tur a ngaihtuah chho ta a, nuhrawn sual deuhte kan hrawn ang tih hlauin Ka nuteii chu an dil ta ngawt mai a ni. Ka nu pate lam pawn lawm takin an lo pawm a, Ka nuteii pianphunga rualban ta lo chuan pasal a hmuh zawh loh an lo hlau ve ni hmiang. Ka nu thih atanga kum 2 a liam hnuah ka nuteii leh ka pate chu an innei ve leh ta a ni. Hlim takin an khawsa zui a, Nau pawh a pai zui ve mai a, mahse, vanduaithlak takin a chhiat a. Nau vawi thum zet a chhiat hnuah Doctor ten nau pai an phalsak ta lo va. A insiam ta ringawt mai a ni. Lehlamah kan unau tana Pathian remruat pawh a ni maithei. A ma pualin fa nei se, mihring rilru chhuah hunte a awm lo thei dawn lo va, tah khan buaina a awm a hlauhawm a. Tichuan, keini unau chu a fa hrin ang chiahin min hmangaih a, keini pawn nu ang tak takin kan en a ni. Ka farnu Lateii phei chuan a nu dik tak a ni lo tih hi a hriatna a la rei lo. Kei erawh ka nu a boral khan kum 7 lai ka ni ve tawh a, engkim ka hre ve hman a ni. Ka nu chu a ke a bai naa, in chhung chet leh sekrek khawiah tu nu mahin an tluk ka ring lo. In chhungkhur fai ber lawmman, MHIP ten an huaihawt thinah pawh lawmman hi vawi 6 kan la tawh. Kan hnawk ngai lo. 

Ka pa ho ZO pa ve tak, ramvachal zet mai a ni a. Ka chhun ve naa, ka phak lo viau zawk. Lo hi a nei zau thin khawp a, ka tha a chhawr theih hma phei chuan mi hian , "Thana zawng ramhuaiin a pui a niang..lo a nei zau si, puitu awm si loin tihian tu puihna mah dawng loin a zo ve mai zel a" an ti thin. Taima rumrut, hlauh nei lo ang kha a ni. Kei pawh Pawl 12 kha ka exam ve a, ka fail hlauh mai si. Ka tui vak lo nen, ka bansan ta ringawt a. Lehlamah Aizawlah chhung hnai kan nei si lo va, Ka pu thianpa fate bulah ka han khawsa ve ringawt a, inthlahrun a na duhin anni lahin mei nei deuha min tawngkhum an lo ching ve nen..khatia mi ina awm reng ai chuan, kan khuaa ramhna thawh mai kha ka thlang ta a ni. Mahnia in han luah hrang turin kan neihin a tlinin ka hre bik bawk si lo..Ka farnu erawh tunah hian college a kal ve mek a, Ani chu keiin hna ka thawk ve thei ta bawk nen, Hostelah a awm ta zel a. Kum tawpah a lo haw chauh zel. Ka nu leh pa leh kei chauh han khawsak chu kan hulhar mah mah a, kan khua a har lutuk chu ka ni fanu fa kan awmpui a. Hmeichhe naupang kum 10 mi niin a fel ve tawh a, kan khawhar pawh a hnem viau mai. 

Ka pi leh pute an boral tawh a, inpui chu ka patea ten an luah. In kan thleng a, ka nu chuan min lo buaipui leh vat vat. 

"Khaw nge Apeki " tiin kan naute awmpui ka lam nghal a.

"Inkawibahah an rawn sawm anih kha" ka nu chuan a lo ti var. Kan sakhi sa hawn te chu a dah fel mawlh mawlh a, "A va vanneihthlak thin em..sakhi sa kan ring leh char char thei dawn a nih hi" a ti chul a. Ka pa pawh a rawn haw a. A lawm ve hmel khawp mai. 

Buanga chu a haw phei a, sa ka hleh nual a, a lawm viau mai. Ka inbual sawk sawk a. Inbual zawhah chaw ei tuina tura kan dah thattir va lem hlek tur chuan ka chhuak ta a. Kohhranah hian ka inhmang vak lo a, hnatlan nikhuaah erawh ka tel ve deuh ziah. A inkhawm leh zai lam hi ka chikat titih a, Ka va do chuang lo bawk. Ka pa hian min zilh ve zauh zauh a, mahse, tlangval puitling china ngaih kan ni ve tawh a, na tak chuan min ti ngai lem lo. Ka nu erawh chuan inkhawm tur te, fellowship turte hian min nawr chamchi thin. Tin, kum 32 lai ni ve tawh mah ila, zu ka in in, ka in tih an hriat loh hram ka duh thin. Zana kan ina ka ruih deuhte hian an mut hnu ka nghak ngat ngat zel. Ka zah dun ve khawp mai. Mahse, ka sim lem hlei lo va. 

Nu Chami in ka va thlen chuan, Buanga pawh a lo thu leh luau tawh. Rema leh Zaua an lo awm bawk. Keini pali bak hi thian dang kan kawm meuh lo. Rema chuan a thli sar sar a, buh zu tha a ni bawk a, pentawng tih vel hi a awm ve ngai lo. Kan in ta sap sap a. Nu Chami pawh ka sa hleh avangin lawmthu a sawi leh nasa mai. A chek siam atana ka tih kha ka keng nghal a, a fridge-ah kan dah a. Ani hi hmeithai e ti lo hian sum a nei phian a, mi khawngaih a hlawh bawk nen, Aizawla a thlenna thin ten an fridge la thar tha zet an pe a, TV pawh kan MLA nupuiin a leisak ngat tawh a ni. 

"Khawiah maw a thlen?" Buanga chuan ner nung chung hian a ti a..ka lo bo hman.

"VCP inah " Rema chuan a ti nghut a.

"Tu chu?" ka lo ti hû!

"Aw ka sawi kha ..Miss thar kha mawle" Buanga'n a tih chuan ka hre ve leh chiah. Ka lo ngaihsak vak lo a nih hmel. Ni e, kan khua angah chuan mikhual nula an to em em a, inleng pawh an ngah thin. Kei erawh ka dan a dang ve a, zep thu a cheng lo , Pawl 12 fail-a kan khuaa ka haw khan kan khaw thenawm Tualpui ami a u pasal nei te rawn awmpuitu Zoteii nen kan inngaizawng ve a. Kum hnih dawn kan inzui ve a ni. An khaw lama a hawn hnuah an khaw PHC-a clerk nen an inru ta daih mai a! Ka zak a, ka na vawng vawng mai. Thingtlang angah chuan kan inngaizawng tih kha an hre fur si a, tumah pawh ka hmu ngam meuh lo. Ka inkhung reng mai a ni. Khami hnu ka tlangval chhuah tak takah Lapuii nen kan inzui leh a. Kan khaw nula nungchang tha leh ze dam thlap, kan khawsak dinhmun nen pawh inchen tak a ni a. Ka chhungte pawn an duh ve khawp mai. Kum 2 leh a chanve kan inzui hnuah palai tirh tuma chhungkhat kan inrawn lai takin Lapuii te thianho lui kal chu tuiah a tlahlum ta hlauh mai a! Khami tuma ka á lo kha mak an ti! Mi zawng zawng mit ka chungah a fu thup a ni ber. Thla khat dawn kha chu a thlana kal ka sim thei lo va, zan reia va kala riah mai te ka ching chho ..a bawraw zawng erawh chuan ka tal lo hlauh. Ka chhungte pawn min hrethiam a, Lapuii nute pawn min lo lainat ve ngawih ngawih mai. Kha kha kum 3 liam taa thleng a ni a. Ka nunah hmeichhe pahnih chiahin hmun an la chang a nih chu! Ngaihzawng ka nei leh ta ngai lo. Ka pa hian, "Hetiang ringawt zawng nakinah nupui fanaute pawh i la nei duh ang a, a fel lo e" tiin Mistiri min zuitir thin a. Ka vannei a, ka thiamna lam a lo ni hlauh a ,ka tui chho ve bawk nen. Tunah chuan kan khuaah a rim pawl, an chhawr nasat pawl ber ka ni ve ta a. Ka hun awlah erawh ramvah leh lui kal ka la sim lo. Ka pa pawh a upa ve tan tawh nen, lo neih kan remti tawh lo va, dai hnaiah ka nu nen leipui neiin an feh ve thin. Hausa le lu lo mahila,kan mamawh tawk leh ei khawp kan nei thei a, ka farnu kan chawm thei bawk a, kan lawm tawk viau mai. Tin, Kumin kumtirah khan in kan sa thar ve bawk a, Assam type mai mah nise, Eirukna leh sum thianghlim lo tel miah lova in leh lo kan din thei chu kan lawm a ni.

"A hmel kha tha ka ti vak lo" Zaua chuan a lo ti boh a.

"A no thung alawm..a va no ber tak..sil loh pawn a ei tlak ang" Rema chuan a lo ti a. Ka nuih a za deuh. 

Chaw ei a hun mai dawn si a, kan inthen darh ta rih. Zanriah kan ei laiin ka nu chuan a hnar a len vut vut a. Min rawn enin, "Mama, zu i in leh a ni maw? A mak thin mang e aw..ka sawi zing tawh" a ti nghat a.

"Tlemte lawm ka in" ka ti ringawt.

"Tlemte pawh zu alawm" a ti hlak a.

Apeki'n ,"Ninawm, chaw ei laiin hau ve ziah suh" a lo ti khauh. Ka nu pawh a nui ve ringawt. Mi hi a tan thei ania..

Ka pa chuan, "Kan zirtirtu thar chu a in sak hnatlangte kha an sawi a. Mama, nang pawh i va thawh ve loh chuan" a ti chuar chuar a.

"Khawiah nge sak an tum a?" ka ti a.

"School piah lawk ram ruakah sawn a ni maithei. Hmeichhe awm nan chuan a fal deuh em aw chu ka tia, mahse, awmpui a nei dawn te pawh a niang" a ti a.

"A awm rei dawn mawni le..khawpui ho hi chuan insawn hi an kherh zung zung zel sia" ka lo ti a.

"Ka hre lo le..a fel hmel riau kha a..a tawngkam a felfai khak mai" a ti leh mai a. Kan tawng zui tawh lo. Mipa 5'9 ft ka ni a, mahni tawkah hrisel vanglai phei chuan ka chaw lak hi a tha thin viau. Hna kan thawk nasa bawk a, thau chhia kan nei hman meuh lo. Ka cher deuh em aw tih chang erawh ka nei deuh, mahse, thau erawh ka duh vak chuang lo. Ka hmel hi chu ka nu te lam ka chhun a, ka vun a ëngin hmelchhe vuakhlum tur tih ni ta se, vuakhlum hmasak pawlah chuan ka tel ka ring bik lo. Kan khaw nula zingah pawh min iai lo fe fe chu an awm ve , mahse, kan inhrechiang a, ka thian kawm vek mai bawk nen, tin, mi uang ve tak, fiamthua nulate pawh be thin ka nih avang hian tunah chuan ngaihzawn enah min en tawh hlawm lo niin ka hria. Lapuii avang khan ka thinlung kawngkhar hi a la sak tlat ve bawk a tin ni..

Ha ka kher mual mual laiin kan VCP a rawn lut hlawl mai. Ka nu chuan a lo chiau au vat a. 

"Ngura zawk hi ka rawn lenchilh lawk, Saw kan zirtirtu thar saw Pu Tlana te in hnuaiah sawn inbawl hran a tum ve deuh si a, cheisak a ngai viau mai a. Naktukah hian i rawn tlawmngai thei hram lawm ni ka rawn ti..chhuar leh eng ilo siamsak kha a ngai a" a ti chuar chuar a.

Ka pa chuan, "School bul ram ruakah khan in an sak sak dawn kha an ti sia" a lo ti vat a.

"Aa..kha zawng tihtheih a la ni chiah lo a ni. Dap ráp mai mai te chuan tih dan te pawh a awm ang a, Chutiang dap râp ina nula han chentir ngawt chu tih chi ni hek lo le" Kan VCP ,Pu Ruata chuan a ti a. 

"Naktuk chu tihtur ka nei em em lo bawk a, ka thei turah ngai ang ..mi dang sawm innei em?" Ka ti a.

"Aw..vena kha i helperah ka rawn sawm a,ani pawh a theih dawn kha maw" a ti a. Ka nuin thingpui háng a rawn dah a, "In inah maw a la thlen rih a?" Ka ti a.

"Aw..a nau tleirawl nen an nia. A fel hmel khawp mai..saw" a ti mai a.

"A thawk rei ngut ang e maw le..khawpui ho hi chu an insawn zung zung zel a" ka pa chuan a ti a.

"Ka hre bik lo le..khaw mi leh sa han induhsak ve dawn lah hian kan khua atanga zirtirtu han ni thei hi an tam lo riau bawk si a..a buaithlak a nih hi..Mami hi zir zawhtir vat rawh u, he lamah thawhtir dan kan zawng dawn nia" a lo ti mawlh mawlh a. A sawi dik viau. Zep nák emaw kan khua a pilril bawk a, lehkhathiam leh zirsang hi chhiar tham tak tak an awm a. Chhawr zui theih mang si lohin khawpuiah private school lamah te an inhlawh ve daih zel si. Tunah pawh kan Middle schoolah hian senior teacher ,lehkhathiam em em lo kan khaw mi pathum leh Tualpui khaw tlangval an ni mai a. Ani hi chuan bike a nei a, a rawn lehlang mai zel a. Tunah zirtirtu thar kan nei leh ta chauh a ni. Naupang erawh an ngah thei phian mai.

VCP leh ka pate an titi lai chuan, "Kei chu ka chhuak mai dawn sin. Min lo nghak tawh ang. Naktukah chuan ka rawn kal dawn nia" ka ti a. Ka chhuak zui nghal. Nu Chami inah bawk kan inhmukhawm leh far mai.

"Kan va rim ve lawk dawn mi?" Rema chuan a ti a. Ka chak fahran lo hle. Buanga lah a phur si a, tui fahran lo chuan ka zui ve ta ngawt. Kal hmain no khat theuh kan han lem leh sek bawk a. Kan confi chho tan viau e. Lehlamah zu hi in thiam a har viau nain, keini thianho hi rui nawi tak leh buaina siam kawngah kan tel ve ngai lo va, khaw mi te pawn zu kan in zeuh zeuh tih hre mah se, in ngai lo treat hian min treat deuh roh a. Ruih nawi vakna khawp kan nei ngai lo hrim bawk nen.

VCP kawtah chuan kan ding khawm raih a. Inleng an nei nual tih an thawm atang chuan a hriat mai. Buanga chuan,"Lut ve thawr mai ang u" tiin hma a hruai ta a. Keiin hnu ka dawl thung. Kawngka chu a kik dat dat a, VCP nupui Nu Rengi aw hian, "Lo leng r'u" a rawn ti lang lang a. Kan lut zui ve nghal. Thana te thianho an lo awm ve a. Anni hi chu khual râl kan tih mai, mikhual tawh phawt hlah tum lo ang kha an ni. Nu Rengi chuan, "E! lalbuanga te chu! Lo thu r'u.." Tiin min lo chiau au chul a. VCP nupui niawm reng a ni. A felin a bengvar thin hle. An in a zau bawk a, thutna pawh kan chang ve hram e. Ka thu chiah tihin ka hma zawna thu hmeichhia chu ka va hmu nghal a. Kekawr tlawn par arh hlei hluai a ha a, tshirt dum,a nghawng V a ha bawk. A ngozia chu sap ai pawn a ngo ang tih mai tur hi a nia! A sam chu a buang deuh a, a grey lam a pawl mah zawk em aw ka ti. A chhipah a bawk khawm a, Rangkachak thi niawm tak a awrh a, kut veilam zunglaiah rangkachak zungbun simple deuh a bun bawk. Sana lawk ber bur a bun bawk. Ka hmaa thu a nih miau avangin ka hmu chiang lo thei lo. ANi pawn min lo en ve chiah a. A nui lo va, chau hmel a pu deuhin ka hria. Ni e, Khawpui atangin thingtlang khaw pilril tak a rawn lut a, a chau viau ang. Keini lahin kan lo rim vel si, Polite ngai ve bawk si, a ning ru ngawt ang chu! Thiante chu an tawng bawrh bawrh a, Nula pawh chu a tawng ve zauh zauh. Nu Rengi a fel hlauh a, kan hmingte a hrilh zung zung a. Ka hming a sawi zawhah, "Ani hi i in chhung vel khawih tur chu a nih hi. A kuthnu a mam teh mai a nia" a ti zui sap a. A lawmawm ve viau mai.

"I rawn tlawmngai thei tur chu a lawmawm hle mai" Nula chuan a ti a. Ngawi rawh, Nu Rengi khan a hming a sawi tak e. Judy, Miss Judy a ti kher tak e. 

"Nia..zirtirtu tan te chuan kan tlawmngai mai aniang chu" ka ti ringawt. Nula han biangbiak vel hi ka thiam lungrun lem lo. Rik bawrh zel mai hi ka duh a, tin, ka tawng tam lo bawk a. 

Judy chuan thingpui a va lum a. Buanga bulah, "Hei hi insak ila, haw ang u, a chau ve dawn asin" ka ti sur sur a. 

"Ho lutuk" a lo ti ringawt lehnghal. Thingpui chu kan in a. Thana leh Siama an tawng tui viau. Thu ho mai mai sawiin an nui huah huah reng a. A chang leh Judy bulah, "Aizawlah khan Pu Challiana i hria em?" Te an ti leh thut a. Delhi-ah Raju-a i hria em ? Tih ang chauh a ni. Judy chu Venghluiah an awm a, Ka lo chettlat tawhna a nih ve vangin, "Khawi lai velah khan nge inawm?" Ka ti a.

"Mice school piah lawkah khan.." A tih chuan, "E..khami thlang lamah si khan kan awm ve thung" ka ti leh ringawt. A bak sawi thui tur ka hre em em lo.

Pu Ruata a lo haw a. Ka pa ten ka sakhi kah kha an lo hleh ve ni ngei tur a ni. A phul hlut a, "Hei ka va leng fuh lutuk, Ngura sakhi kah min hleh ve ..Judy,i ei duh em khah." Tiin Judy a melh a.

"A rep chu kan ei thin..e ..a chek pawh tui ka ti lutuk" a lo ti vat a. Ka khi suk.

"A that nasat chu, kan rëp dawn nia" Nu Rengi'n a ti a. Vcp te hian fa panga lai an nei a. Mahse,nupui pasal an nei deuh vek tawh a. A naupang pahnih an la awmpui a, pakhat hi Singapore-ah a awm ve daih nghe nghe. An te ber tleirawl ve ek ek tawh te nen an ni tlawng mai. 

Thingpui in zawh chuan hawn ka rawt ta nge nge a. Rema chuan la len a duh hmel viau naa, ka din tlat avang chuan an tho ve tuih tuih a. Thana chuan,"Kan men nghek dawn che..keini chu hawn nachang kan hre thin lo a nia" a ti phawr phawr a. Kei aiin an nau bawk a, "Thana, zan dang atan khek r'u, a chauh te pawh a chau ve ang. An lo kalna a thui tham si" ka ti ta hmiah a. Mikhual nula te hian an ning thin em em tih ka hriat vang a ni pakhat. Min chhan leh hmain kan chhuahsan ta a. Keini pawh kan in lam theuh kan pan a. Buanga leh Rema ten Judy chu an sëprawtui viau mai. Ka nui ka nui ringawt.

"Ngawi tak r'u, tisawn a awm rei ang a, kum 2 hnu velah chuan e..a phu loh hlir kan ni tawh mai ang" Zaua'n a tih chuan, a dikna chen a awm ka tia. Environment azir hi a ni ve tlat,..kei pawh Aizawlah khan awm ta reng ila, Aizawl nula ngat ka ngaizawng ve tho ang. 

Zing lamah hi chuan min kai tho hma duh ngai lo va. Chhun lamah kan lo hah ve bawk thin nen. Tukin erawh Apeki nuar thawm bengchheng zet vangin ka harh lo thei lo. Ka va tho a, chhuatah a lo nuar chu niin. Nuar rual pawh a ni tawh lo asin le aw..pangchang lutuk mai. Api chuan a lo thlem a, a pu erawh chuan, "I cha zel a, i pi reng pawn a pe ngun tawh che. Inmarble rual pawh i ni tawh lo..tukinah pawh cheng 10 man i lei a, i va cha vek a, a ni em em lo " a lo ti nghut nghut a. Marble leina a ngen tih ka hre mai. 

"Bang rawh, nula i nih tawh kha..i thianten an hmu che nge..khawmaw..tho rawh..ka pe ang che" Api chuan a ti mawlh mawlh a. A tho ve tuih tuih a. "Min duat lo si, apu phei chu a bulah pawh ka mu tawh dawn lo" a ti tuau a, a inhnit fuih fuih mai. 

"I bialpa Sanga'n a hmu che nge aw. Bialpa nei ve ur tawh si, nawrhte chu" ka ti zauh a. Rum em ema min melhin, "Nang pawh i sual..apiin a hauh che pawn ka tan tawh lo vang che" a ti hlar a. Ka nui suk. Api chuan a pe leh ta nge nge a niang,mittui hru chawt chawt chungin a chhuah leh tak nul nul kha..Khawpuiah chuan awm se ,fel tawh tak ni tur a nia sin le.aw..

Chaw ei khamah Vena sawmin Pu Tlana te in lam chu kan pan ta a. Pu Tlana hi Middle School headmaster a ni a. A pension ve dawn hnaiin ka hria. Kan khuaah chuan a awm thei pawl an ni..Annuin thingpui háng min lumsak leh te te a, kan in mek laiin ,"Ngura, hei i senior mai dawn. Nupui lam te hi ngaihsak ve tawh rawh. Kan miss thar hi ka hualsak che a nia aw" a ti bawrh bawrh a..

"I ti ang lo thin em mai" ka ti hluk ringawt. Vena chuan,"Nia, U Ngur, kan khua angah chuan senior pawl i ni tawh a nia. I thianten fa an neih khalh sup sup mai ang che" a lo ti ve a. Ka thiante hi kei aiin an naupang vek a, Buanga phei chu kum 3 laiin kan inthlau a ni. Zaua nen erawh thla 3 lekin kan inthlau thung.

"Pathian thu thu alawm" ka ti leh ringawt. An nui tut tut a. Kan in zawhah VCP a rawn lang ta bawk a, an in hnuai lam chu kan pan ta a. A zau lem lo naa, Room leh choka chu a inpingdang ve thei ang. A hmain Pu Tlana te chhungkhat nupa rek hian an luah ve tawh a, mahse, an che fel lo riau aniang. A tawp tlat. Chhuar te chu kan thiat vek a. Pu Tlana thingphel la hmantlak te chu khawmin chhuar chu awlsam takin ka siamsak a. Vena'n room lam a khawih thung. Ani hi a naupan ang aiin a themthiam riau a, kan inzui ve fo a, a mawng a zangin kei pawn helper atana ka duh ber a ni. Chhun chawlh a nih meuh chuan kan peih thuak tawh. Pu Tlana nupui chuan chana a lo chhum a, atta nen kan ei a. Judy leh a nau niawm tak pawh an rawn lang ve ta e. An zuk en kual a, an rawn chhoh leh chuan,"Inva siam rang em em..a tha lutuk" a ti ve hlut a. Pu Tlana nupui Nu siami chuan, "Kan khaw tlangval chhuanvawr pahnih te an ni tlat alawm.." Tiin min rawn melh zauh a. Ka lo nui pút pút ringawt. 

Chawhnuah chuan Judy leh a nau chuan kan zawh tawh ho chu rawng an lo hnawih ve a. Kan inbe mang lo. A nau tleirawl chu Judy ai mahin a lian zawk awm e. Mahse, a tawng dan atangin a kum a thansan tih a lang. A ri ve phawng phawng mai. A hmel erawh Judy aiin a tha lem lo, a naupanna hmel a la lang bawk a..

"Englo,ih,pu..helai thing bung hi i hmang dawn em?" A nau chuan a rawn ti a. Ka pu min tih vang chuan ka lo hawihai deuh a, Judy chuan rang deuhin, "U Ngur ti rawh..i a thin em mai" a lo ti vat a.

Ka nuih a za viau. A nau chu Mateii tiin an ko mai a. Ani chuan zah hmel deuhin, "Pa ngur..tihpalh " a ti hnuhnawh a. Min u em chu a hreh a niang. A awm ve tho e. Kum 17 pawh a la tling awm si lo va. 

Pindan lam ka khawih lai chuan Judy a rawn lut ve a. 

"U Ngur, nakinah i remchan hunah bangrelah hian perek min kilhsak rawh aw..thawmhnaw khai nan" a ti a.

"Aw le" ka ti leh tawp. An tana thawk kan ni bawk a, that an chhuah ve niin ka hria. Bathroom chu Vena nen kan khawih a, "Miss, bathroomah hian tui khai luh zel ai chuan, pipe awm se a zawm theih a, tap a vuah theih dawn sia, Pa Tlana te khian pipe an nei em han zawt la" ka ti a. Min rawn melh a, "Judy min ti ve mai la" a ti sap a. Ka bu nghut ringawt. Nula a ni si a, a awlsam thei ang ber tura tihsak ve kha kan duh si, kan peih meuh chuan khua a thim chhulh tawh a ni. Lawmthu a sawi mawlh mawlh reng a, "Ka luah hunah inlo leng thin dawn nia" a ti zauh a. Vena'n ,"Miss ,i duh aia tam inleng chu i nei ang" a lo ti vat a. Kan han nui leh rih. A hlimawm viau e. 

Zanah kan spot ngaiah kan lut khawm leh a. Zanin chu len chhuah lam kan sawi lo. Thu pawimawh tak kan ngaihtuah ngai a awm tlat a ni. Kan thianpa Zaua chuan Tualpui khaw lama a bialnu lakah sawn a thlak a lo nia! A bialnu lah tleirawltë, pasal nei rual pawh la ni mang lo a ni si. Engtia chet lak zai nge kan rel dawn tih chu kan ngaihtuah ta a. Vawiin lamah a hre ve chauh bawk a, a chhungte pawh a la hrilh hre bik lo a ni.

Buanga chuan, "Kan va ru mai ang chu..thil dang a ngai vak em mawni le?" A ti a.

Buanga'n ,"Nia, Mahse, khaw nge i tlanpui ang? In inah mi?" A lo ti ve vat a.

Zaua chuan, "Ka zak ve deuh. Ina han luhpui rup mai chu.." A ti bawk si.

"Inruk kher a ngai mi? I chhungte hrilh ila, palai va tir nghal ula a tha mai lawm..inruk buangbar vel kha a tul lo" ka ti a..

"Nia, mahse, sawn man min rawn thin loh te chuan palai tirh ngawt chi mi?" zaua chuan a ti a. 

"A ho, chutiang, a rai tih a chhungte hrilh ve se a fel a ni mai. Khaw khat kan ni bawk si lo va.." Ka ti hmawk hmawk a. Upa ber chan ka chang bawk nen ,min hnial ngam meuh lo a niang. A bialnu Atei rai thu erawh keiman a chhungte ka hrilh dawn a nih chu..ka hreh hran lo. Lehlamah Zaua chhungte hi chhungkaw pangngai an nia, Ateii pawh la naupang mah se, an fa paitu chu an hnawl ka ring lo. Kan neihsa tlem kan in leh ta bawk nen, thudang sawiin kan phul hlut a. Miss Judy pawh an sawi ve leh sek, mahse, Kei ka thengthawngah a thawk fahran lo. A chhan pawh vawiin kan hna va thawk kha, bedroom ka siam laiin Vena kha dawrah ka tir a. Ka awm ve tih hrereng chungin Judy khan phone a bia a, a thiante an ni maithei.

"Aw.. Hei an la thingtlang ve mah mah a. Boruak chu a zia viau. Inleng neih ka peih dawn der si lo va, ka leng daih zel ang..kawm vel ngai kha ka peih lo...mahni hian ka tlei tawk" a ti mawlh mawlh a. Ka ngeng a chhun ve deuh atin ni. Lehkhathiam chu a awmna hmun milin a khawsa thiam tur a ni tih ngaihdan hi ka nei ve a. Judy chu engtin emaw ka hmu ta tlat! Induh, inla ang zawngin. Amah chu ka va huain ka va ei lo em em pawh a ni lo. Mi dang manawh lo na na na chu va chimbuai kha ka tum lo chiang khawp mai. Ka thiante bulah erawh ka sawi lem lo. 

A tukah keimahin Pu Vawmkhuaia te chula sanghal chhuak thin chang turin ka chhuak a. Kal pahin Zaua te inah chuan ka peng kawi a, Ka beisei angin a nu leh pa an lo awm remchang bawk nen, Zaua sawn thlak thu chu ka hrilh ta tawp a, a nu chuan mak a tih hmel viau. A chhan chu Ateii a la naupang deuh a tih vang a ni. A pa erawh chuan, "A ranglama kan chet a ngai anih chu..nupui a hmu ve chu a lawmawm" a ti thluam mai. Zopa nge nge..

Kei pawh ramhnuaiah ka liam zui ta nghal a. Mahnia tla fal thang ka ni a. Han hlauh em em ka nei hran lo. Ka silai hi ka pain a ram zau ve tawk tak a hralhna atanga kan lei a nia. Unau kan tam lo bawk a, ram neih zau vak kha tul a ti lo nge, kei lahin ramvah ka lo tui ve bawk si. 

Pu Vawmkhuaia te thlam ka thleng a, a lo chul riap tawh. Chawhnu lam a ni tawh a. Tlak deng a nih vang nge ni erawh a la sa tha angreng. A khán tur awm te chu ka chhui a, A hnu la thar ber bulhnaiah chuan sa channa tur chu ka siam a, thut rei pawha hrehawm loh turin. Ka zawh fel meuh chuan ni pawh a tla lek lek tawh. Boruak pawh a dai tan a. Thlamah chhoin namthlakah ka thu a. Ka phone ka phawrh a, Dar 5:30 a pel tawh. Favang a intan chho tawh a, khua pawh a thim hma ta deuh e. Signal a lo awm tha phian a. Phone hi ka nei ve a ni mai a, hmang rim lo ve pawl tak ka ni ang. Youtube leh facebook video en nan ka hmang a ni ber e. Whatsappah pawh ka dp hi ka lei tirh nikum kumtir ami kha ka la hmang reng. Groupah te hian ka awm tam peih lo va, han nawia han rik hluai ka peih bawk si lo. Private msg te hi ka dawng mang lo. Thiante an ni tlawng mai. Thenkhat tlema min lo mitmei ve deuhte lah ka be rei thiam mang bawk si lo. A ho ve khawp mai. Mahse, ka group awmnaa an post hi chu hman vekvawkah ka chhiar chhuak dap thin. Kan khaw groupah chuan lutin ka han chhiar chho a. Nimin lama an postah Kan zirtirtu thar chanchin tlangpui an lo dah ve a.

"Judy. Malsawmzuali a ni a. Aizawl venghluiah an awm. Amah hi M.A (Eng), B.ed a ni a, kan Health Minister Pu Lalrinchhana farnu fa a nia,He lai hmuna a lo awm tehdaih hi thilmak tak zawng a ni e. Duh nise Khawpuiah a awm thei reng dawn si a. Engpawhnise, nula fel tak a nih a rinawm a, khua leh tuite pawn tha taka kan lo dawnsawna kan lo kawmnel a tha ang. " tiin. A posttu pawh Kan VCP a ni nghe nghe. 

Youtube video en tuma ka chhuah dawn lai mekin, private msg a lo thleng a. 

"I dam maw?" Tih ringawt. A dp ka en vat a, ka hre hauh lo mai! A hming dah dan erawh Nunui Khiangte tih a ni. Kan khuaah Nunui ka hriat ho ka mitthla a, anni lo vek. 

"Aw dam e" tiin ka reply a. Youtube ka en daih. Dar 6:30 velah zanriah ka bar a. Ka ei tui tehchiam lo, chawhmeh a lo dai deuh tawh nen..maian leh engilo ka lo la tawh bawk si lo va. Chaw eikham zial zua ka thut vang vang laiin Vau lam chu a ri deuh rawk rawk a. Sanghal thawm a nih ringin ka beng ka chhi ran a..Mahse, a rik dan chu a khat tawkin a ni tlat! Han ri bawrh bawrha inpal bawrh bawrh thawm a ni mang tlat lo..

Thla pawh a rawn chhuak tawh a. A eng viau mai . Zial tlawn hnih ka zuk zawh leh meuh chuan dar 8 pawh a ri hnai ta kuar mai. Ka sa channa tur lam chu ka pan thla ta hriau hriau a. Ka thu fel awrh tihin ka dinglam vau atang chuan sihal a rawn ú thut mai a, ka phu ve deuh. Mhase, Sihal mai mai ti rilru chungin ka thlanglam Sanghal lo chhuahna tur lam chu ka melh a. Mahse, Sihal ú a reh chiah tihin hmeichhe aw tliang leh fiah zet mai hian, "Min pui r'u..min tanpui r'u.." A rawn ti ta mai a! Ka zuang tho titih. 

Ka hawi kual nasa ngang mai. Zep loh chuan ka lungphu chu rang tak a ni. Vawi tam ramhnuaiah keimahin ka chetlain lui dungte pawh ka zawh thin. Mahse, hetiang thla ai thawm ka la hre ngai lo va, huai leh hráng ka la tawng ngai hek lo. Thla chu a ai zawm ta zel a. Vau lam nia ka hriat laiin chul mawng lam ni ten ka hre thul! A insawn chhen mai. A aw lah chu ka hriat tawh hnu a ang riau. Ka pa hian a tlangval lai khan thla hi pahnih a hruai haw tawh a. Thla hruai dawn chuan, hmulthi a ding tur a ni lo va ,aw pawh a khur tur a ni hek lo. Dawihzep tan tih chi a ni hauh lo a ni. Chu thla ai lah chu keimah chiahin ka hria chu a ni si a, ka hruai hawn ngei a va ngaih hmel ta si em…

Insangmarin ka inhumsek a. Tu nge a nih erawh ka la hre thei lo. Ka phone lah thlamah khan ka theihnghilh daih a, kawl ila chuan tu nge dam lo na deuh an awm em ni? Tia han zawh mai ka rilruk a nia. 

Silai hmawr lam hmer pahin ,"Tu nge i nih ka hre lo naa,..ka hruai hawng ang che. Lo kal rawh. Ka kapkar lum hi rawn bel teh le..engmah hlau suh" tiin ka au ta piap piap mai. A tirah khan zâm em em mah ila, keimah ka infuih ka ti mai. Ka hlauhna te chu an bo duak mai. Ka sehhel chho ti tawh mai ang..thla ai chu a rawn hnai telh telh a, ka sir vel chu a rawn vel ta thar thar ni hian ka hria. Nuam tak chu a ni lo. 

"I haw ang aw..kal hmasa rawh le..chawl hauh loin khua kan lut ang.." Ka ti a. Ka kal zui nghal..thla chu ka hmaah a kal leh kal loh pawh ka hre chuang lo. Sa chan lam chu lang zui hek lo le..thlama ka thil la dahte chu ka la a. Chawl khawmuang lo vin khaw lam ka pan ta a. Ka pa hrilh angin thla chu a khat tawkin ka be leh thin a. Sawi tur em em ka hre si lo. Kan khaw dai kan thleng a, Min tawk zawngin mi pahnih an rawn kal hlawk hlawk a. Hmuna leh Thara te an ni.

Min hmuh chuan an ding chawt a. "Kha..khaw nge inkal dawn? " ka ti a.

"Hruaii a boral a, a pa te thingzai hi kan be tlang thei si lo va kan zuk zualko dawn " an ti ta mai a! Ka thla koh kha awmzia a nei hlek lo a ni maw..Hruaii an sawi takah chuan kha thla aw tliang zet kha Hruaii aw ngei niin ka hre ta nghal a. 

Ka makti hmel thup hram hram chungin, "Khawiah nge Hruaii pa te chu an riah?" Ka ti a.

"Pu Vawmkhuaia te chul mawngah khan " an ti ta a. Hruaii chu engtia thi nge tih ka'n zawt leh hram a.

"An sawi chiang duh vak lo. A naupai tihtlak nan Damdawi a bar vak an tia, thi a put nasa lutuk a..a thihpui a niang an ti, a chhungte erawh chuan a nawmsam lohna a rei tawh an ti thung a" an ti a ..hmanhmawh takin an kal zui nghal a. Thla ka hruai haw tiin hmanhmawh em emin ka haw ve bawk a. A thlawn vek a nih mai mai chu a!

In ka thlen chuan khuang pawh a ri bauh bauh tawh. Lumen na lama va lan ve ngei chu a ngaih hmel..Ka phone a ri ral ral a, bathrooma ka lut tawh va chhuak lehin ka va la a, Nu Rengi a lo nia! "Ngurbawih, Judy rawn sawm phei ve ta che u..kalpui a nei mai si lo va " a rawn ti a. 

Tui mang lo zet hian, "Aw le" ka ti a. Inbual turin bathroomah ka lut ta a..

To be cont..