Judy 2

MISS JUDY..(2)

Ziaktu: Toni Râlte

Ka inbual zawh chuan ka thil tawn chu ka chhungte ka hrilh ve thuphung a. Ka pa chu a ngawi vung vung, ka nu erawh chuan,"A va mak awm ve aw. I ko hawng ngei chuan i hria a maw?" A lo ti a.

"Ka hrethiam tawh bik lo. A tawng tawh bawk si lo. Ka rawn haw ve tawp a" ka ti a. Ka pa chuan, "I ko haw zo lo a niang. Mi dang bulah sawi suh, mi an kamtam sia, an ngai eng emaw palh ang" a lo ti dam thlup a. Buanga'n min lo call leh sek tawh. 

"Aw" ka tih chuan, "Kal hmain lem lawk ila, U lalrama'n a nei a niawm e" a rawn ti a. He pa hi chu aw. Chintawk hre reng reng lo mai. Ka e aw liam ringawt. Kei chu a awm lo a nih chuan ka in lo thei viau. Keimahni ngeiin kan bilh loh phei chu ka in ngam vak lo. Yeast an pawlh nasa thin mah mah ka tia. 

Ka inthlak a, thawmhnaw lamah hian ka buai tehchiam lo naa, ka farnu hi hetiang lamah a mit a lerh ve reuh a, Aizawl atang hian min rawn hawn leh nual zel. Keiman ka lei hi a tam lo khawp mai. Khua a lum lutuk tawh lo va, boruak a nuam tawk hle. Hruaii te hi veng chhak lamah an awm a, an in pawh a han fâl deuh. Chutia nula thalai lehnghal thi thut chu lumen pawh kan tam viau ka ring. Ka chhuah dawn chuan ka nu chuan, "Miss kha i sawm theihnghilh ang e aw. I nu Rengi'n a rawn ngen nasat em che kha" awmze nei zet hian a rawn ti lang lang a. Ka kiai suk. Nu Chami in bawk ka pan leh phawt. Zaua nen kan thleng rual deuhthaw. A nui vur vur a, "Ka pain palai kan tir ang a tih kha..pa ka nihsan dawn che " a ti thur thur a. Ka nui ve ringawt. A lawmpuiawm e. Buanga leh Rema te'n an châk ngang si a, U Lalrama ta chu Buanga'n a zuk la a, kan khuaah hi chuan mahni in tur hi kan bilh mai zel avangin zawrh a hlawk tehchiam lo va, a to pawh a to lem lo. An rawn let vat a. Peg 2 theuh chuan kan han lem leh hlak kha. Judy sawm phei a ngaih thu ka sawi chuan an phur nasa mai a. 

"Khawpui nula te an ni sia, tih huam kha an ning ve thei. Insum hram thin r'u" ka ti a. Rema hi a phur mah mah thin a, an ten a hauhawm. Hmeichhe ten nih hi ka hlauh zawng tak a nia, pakhatin an ten tawh hi chu an inhrilh darh thin nge mawni, an ten suau suau tawh mai zel a. A zia lo riau. VCP te in kawt kan thlen chuan, "Miss judy, i inpeih tawh em?" Ka ti a. Kawngka ka hawng nghal bawk. Pindan atang chuan puan bih mawlh mawlh chungin a rawn chhuak a. Kawr pawl duk, a dum rawngkai lek lek , a nghawng zau angreng tak a ha a. Puan dum plain a bih bawk. Flat dum a bun a, a simple khawp mai. Bag lian vak lo a ak bawk. 

"Intlaivar dawn em?" A ti a.

"Aw var ve ang chu" ka ti a.

"Awii kei hi ka peih ang em aw..naktukah insawn phei kan tum sia" a ti a.

"Naktuk te chu i insawn thei nang, a ruang ni a nia" ka lo ti a. A ngawi zui daih. Kan chhuak a, ka lo sawi lawk vang nge, ka thiante chu an zúm riau! Kei lah thu tam ka pai teuh mai si lo va, ngawi rengin kan inzui hul hul ringawt. 

Mahse, A insum zo ta lo nge, Rema chuan, "Miss chu i fel hle mai. " a ti ta a. 

"Judy tiin min ko r'u, ka fel lo lutuk" a ti fiah fel fak a. 

"I insawn hunah kan rawn pui ve dawn che nia" Buanga'n a ti a. 

"A va lawmawm dawn ve aw. Mahse, bungrua tihtham vak ka nei lo" a ti leh a. Mi dang kal ve turte pawh kan hmaah an kal a, eng tak sawi ang maw an nui leh huk huk zel a. Hruaii te in peng kan thlen chuan,"Awii, ka zun a chhuak e..chhuah sek a zahthlak dawn sia.." A ti a. Hruaii te thenawm Pu Zama te inah chuan ka luhpui a, a va zung ta a. An bathroom light a lo chhia nge mawni, a va inpal ri nawk nawk mai. 

"I tha em?" ka ti a.

"A thim lutuk a" a rawn ti a. Ka lo nghak. A rawn chhuak ve thei hram e. A kut a va sil leh te te a, kan chhuak leh ta a. Zawi sap hian, "Ka hlau hman alawm le" a ti a. Ka lo nui huk ringawt. Zai thawm pawh a tha viau mai. Tap thawm nen,.Hruaii hi nula hmel fai tak, tuallim ve tak a ni a. Sawisep a kai ka hre ngai lo. Kohhranah pawh a inhmang tehchiam lo. A rai tih thawm hi chu ka hre thawi ve tawh a, tu fa nge a pai erawh ka hre hauh lo. A nau pai tihtlak nan damdawi a bar tak tak a nih chuan, a pawi hle mai. Unau pathum an ni a,ani hi a upa ber a ni nghe nghe. Ngaihzawng a neih sawi tur ka hre miah lo bawk. Kan hruaitute chuan min lo dawngsawng vat a. An fel thin a nia. Mipa leh hmeichhia kan inthut pawlh ngai lo va. Judy chu kan khaw nula senior U puii te rualin a lut a. Keini pawh kan inzui lut ve nghal. Khuang pu hnung chiah a lo awl tawh lehnghal. Hruaii te in hi a lian vak lo reng reng bawk a. Ka tawngtai zo ka hawi chhuak chiah chu ka hma zawnah tak Judy chu a lo thu ve reng a. Chhuat lam a melh ran mai. A zak ve te pawh a ni maithei. Tap thawm chu a han ta deuh a. Hruaii thih chhanah khan, 'Lungphuchawl' tih an ziak ngawt a. A thih chhan dik tak hriat a chakawm mang e. Hla hi ka hre tam vak lo va. Tin, ka zai thiam lo lulai em a, mi hriata zai te hi ka zak thin. Mahse, mipa hlang kan thu a ni bawk a, ka bass ve hum hum mai. Kan thil in kha tlemin a thawk ve bawk nen, zahzumna zualpui chu a bo deuh e. 

Judy pawh a zai ve ta. Ka bula thu Buanga chuan a phone phawrh ru zál zâlin a hmet leh zaih zaih tawh. Ka nghawk sawk a, ring zetin kan hla sak ni lo pui a la rawn sa ul ul zui. An melh thup takah chuan a sa sual tih a inhria nge, a kun nghal hmak. Kan khuangpu pawh a khi vur vur mai. Judy tih loh hmeichheho chu an khi thá vek. Judy erawh a intimak thei ngei mai, a zai hmiah hmiah mai. Thusawi neuh neuh nen, zai nen nen zing dar 1 chu kan thu thleng ve thei mai e. Thingpui leh ar sawhchiar an rawn sem a. Ei leh in hunah hi chuan tumah kan zai lui hleithei lo. Thingtlang chauh pawh hi kan ni bik lo. Khawpui ho pawh hi eng emaw ruai siam leh hnatlan nikhuaa chaw fâk hunah pawh an danglam ve tho. Mizo zia ka ti mai. Keini pawh kan ineipuar hnuah zun ram thiarin kan chhuak ta a. Meizialte chu zuin kan han tei harh a. Hruaii te in chhak deuhah hian Middle School a awm a. Sunday tlai velah hian tleirawl ho an leng ve thin. Mei zua kan din ho mek lai chuan School tlang atanga lo chhuak ni maiin ka hria, Sihal a ú ruah ruah a. Chutia a ú zawh rual chuan khaw chhunga ui ho te chu an bauh chuah chuah mai. Buanga chuan, "Hruaii thla hi a hráng ang em le?" A ti ta roh a! Kan thum hak. 

Rema chuan, "A hrân duh hmel ka ti kei pawh. Nula a ni bawk sia" a ti sur sur a. Kan thusawi mai mai chu aw. An chhungten an hre ve ang tih a hlauhawm zawk e a. Judy leh U Puii te rawn phei chu ka va hmu a. Zaua chuan, "Kan miss thar chu a fel ka ti tak tak.." A ti sup a. Ka ngawi reng. An lo phei zel a, kan piah lawka zun in an siamah chuan an va zung a. Judy zung lai chu a rak deuh thawt a, kan va hawi thup. A puan pawh bih tha hman lo hian a rawn inpal phei nawk nawk a. A puan bih hnuaia a boxer pawh a lang huai mai. A chawn varzia mai chu aw..zan thimah pawh a paw phak mai. A thlabar hmel em vang chuan, "Eng nge ni ta?" Ka ti vat a. A thaw a rang hle..

"Awii ka hlau lutuk. Ka zun lai khan a thlanga thing kung kha a insawi vak vak alawm..U Puii lah hi min lo kalsan daih a" tiin U Puii chu a melh a. Rema la kainam ta pek chu a va phei sauh sauh a, "Khawi lai thing khu nge?" A ti lung lung a. 

."Rawn phei mai teh..i tawng ring si" ka va ti vat a. 

Judy chuan ka banah a rawn vuan a. A kut a dai ngiak mai. A nem no ngiak mai. 

"U ngur, khawngaihin min lo thlah mai teh a.." A ti ta chawt a. Mi dang an awm ve thup si, ka inthlahrung letling. Mahse, chuti na na na chu tiin, ka thiante bulah, "Ka va thlah lawk ang e" ka ti a. 

"Kal ila" tiin Judy chu ka melh a. Kan kal nghal. Ka ban puamah lah chuan a la vuan reng a, ka thingthla duh bik lo. A hlau hle a nih ka ring. Bakah khualkhua te a ni ve bawk nen..Hruaii te in panna peng kan thlen chuan, hnunglam a hawi zuk zuk reng a, "Eng nge?" Ka ti nghut a.

"Engmah.min zui takin ka ti mai mai" a ti ringawt a.

A thla a muang lo hle tih ka hriat chuan,"Engmah hlauh tur a awm lo. Thlamuang deuhin awm rawh. Kan khuaah thlahrang a awm ve ngai lo" ka ti ta ngawt a. A nui ta hak a. Kei pawh ka nui ve. 

Min tawk zawngin mi pahnih an lo chho mek a, U Siama te an niin ka hria. "E! Inhaw tawh mai dawn elo!" U Siama chuan a ti a. Min melh tawn rulh rulh. 

"Hei miss hi ka thlah lawk dawn anih hi..ka rawn kal leh ang kei chu" ka ti a. Kan kal leh tur chu, "Ngura, hlah miah suh" a rawn ti ngawt a. Ani hi zawng fiamthu duh ngang hi a nia. Judy chuan, "Eng nge a sawi a?'a ti ha a.

" Engmah a uang mai mai anih kha" ka ti mai a.

"Ih, nangmah kher min thlah tura ka tih chhan che chu i rintlak berin ka hria a. Eng emaw zawngin lo ngai lo la, Mipa dang chu ka hnaih hreh deuh a" a ti ta a. 

"Aw ka hrethiam alawm" ka ti leh mai a.

"Ka bialpa chuan min hmu se min khawngaih ngawt ang" a ti leh sap a.

"I lo hruai ve lo nih chu mawle.." Ka ti a. Ngeiawm zawng pawn ka sawi chuang lo.

"A awm peih teuh lo vang, hetah chuan..Awii...U Ngur" a ti thut a, min rawn pawm titih. Amah a lian vak si lo va, kei ka lo palian ve deuh tho nen, ka lo pawm ve chawt chu ka pawm kang deuh awk a. Ka hamhaih ve deuh alawm le.." Eng nge a?" Ka ti nghut a.

Min thlah vat, insiamtha chungin, "Thil ka hmuh sual anih kha..ka dawih lutuk hi thil hmuhsual ka hrat lutuk" a ti sawk sawk a. Ka nuih a tiza deuh.

"Nangmahah in luahte chu i la tum chu a ni sia..engtia awm nge i tum?" Fiamthu titih hian ka ti a.

"Aa..ka awm ve thei mai ang. Mi hrawn ringawt kha fel mah se, a nuam lo ve alawm..riahpui tur chu kan naupangte pawh ka sawm mai ang" a ti niah niah a.

"Inleng i ngah thin ngawt ang" a hmaa a phone hman ngaihtuah chung chuan ka ti a.

Za vak lova nui chungin," Nia, mahse, inleng neih hi ka peih vak lo" a ti ta a. A thlen in kan thleng ta bawk a. 

"Ka lawm e aw. Muttui, tlaivar nuam" a ti sep a.

"Aw muttui le..hlauh tur a awm lo a nia" ka ti a. A luh fel hnuah ka chho leh ta hnak hnak a. Judy chu zirtirtu thar a ni. Kei ber kher min ringngama min nel ve chu lawm tur nge lawm loh tur pawh ka hrethiam chiah lo. Ka ngaihzawn a ring lo nge mawni dawn ni. Nia, ngaihzawn tumna rilru ka pu hran hauh lo. Ka nuna romantic mood awm ve hi a zo tawh a niang e. 

A tuka thlan kan lai haw chu Judy te leh mi dang thenkhat a in luah tura inthiar mek chu ka tawk a. A va luah lut chak tawh awm em em. Ka be lo. Ka inbual a, ka muhil ve zuai. Mumang mak deuh ka la nei zui! Kan khaw kawtchhuahah hian nghah nei niawm takin ka lo thu a, silai hi ka bulah ka tung bawk. Reivakloah ka hnung lam atang hian, "U Ngur" a rawn ti a. Ka hawi vat. Kan vui liam tak Hruaii kha a lo nia! 

."Ehe! I thi tawh sia" hi ka lo tia. Min rawn pan a. Lungchhiat hmel zet hian, "Ka naute kha..ka naute kha" a ti sep sep a. A ngaihna hre mang lo zeta ka melh reng lai chuan, "Chu!a lo kal.." Thlabar hmel zeta tiin ka piah dinglamah hian a lo tlan phei chawn chawn a. Chutih mek lai chuan kawng chhak atang chuan Hruaii patea , Pa Thana kan tih mai hi a rawn chhuk thauh thauh mai a. Min hmuh chuan a ding chut a, "Ngura, Hruaii i lo hmu em?" a lo tia..

Ka chhan dawn lai takin, ka nuin, "Mama, intiharh tawh la, zanriah ei a hun tawh asin" a rawn ti a. Ka mumang chu ka thanharhsan ta a. Mak ka ti reuh mang e aw. Hruaii thih danah thil fel lo a awm em mawni dawn le..sawi chhuah erawh ka tum lem lo. Zanriah kan ei laiin, "Hruaii chu a uiawm ka ti ee..nula fel leh nungchang zawiawi tak a ni sia" ka nu chuan a ti a. Ka pain , "Ni ngawt mai. A thih dan lah hi fel faka sawi thei an awm hlek lo lehnghal" a lo ti chuar chuar a. Engmah ka sawi ve lo.

Buanga'n min lo sawm a, Nu Chami in tlawh loin kan kal ta mai. Zaua erawh a kawng a herh pek a! A mu tlawn reng mai. Zai a nuam leh viau mai. Judy pawh Kan veng tlangval keini aia nau ve deuh Rinpuia nen an rawn kal dun a, mahse, hmeichhe thutna lam a pan a. Rinpuia chu ka ngaihbel nge a hmai a uang riuain ka hre pek! Ani hi a luck ve reuh a, a hmai a faiin a ngo piak a, a intuaifai peih bawk nen. College zo loin a rawn haw a, Kan khaw dawrkai hlunte fapa mal a ni bawk a, hnathawk em em loin tihian nuamsa tak chuan a la awm ve thei zel a. Aizawl atanga a rawn hawn tirh phei kha chuan, tleirawl râl an ti mai a, tleirawl tlema hmel këu deuh chu a keuh zung zung ni tur a ni. Min kawm rual chiah lo bawk a, kan inbe ngai mang lo. Judy chu ka va melh zawk a, min lo en ve chiah. Ka mit ka la ta vat. 

Khawhar in riah hi chu keini aia nau deuhte tihturah kan ngai ve ta deuh a, mi pawn min phút em em tawh lo. Ban rualin kan haw nghal a. Kan thenawm hnai ami Nuteii te thianho nen kan hawng za a, kan hnungah Judy leh Rinpuia te chu an rawn kal ve bawk. Rinpuia chuan fiamthu a thawh nge, Judy chu a nui har har a. Eng nge maw a nui ri pawh chu ka bengah a rin viau ni. Kei hi ka dik lo zawk em mawni le.. Ka inngaihtuah buai lai takin min rawn su thawi thuak a, "Oh! sorry" Judy aw tliang ral chuan a ti zauh a, min rawn melh zauh bawk. Engahmah min ngaih loh hmel deuh hian Rinpuia nen chuan an kal zui leh ta daih a. Rinpuia banah a vuan tih pawh chiang takin ka va hmu..a hmelhriat loh ang leka min en leh thei ta chu mak ka ti deuh! Tin, eng emaw na tel deuh a awm bawk..hei erawh ka hrethiam lo. Rinpuia chu ka thik tihna em ni ang? Ni lul lo ve. In ka thleng a, ka nuin vaimim a lo la chhum a, a la hma ve deuh bawk nen. Kei erawh roomah lutin ka inthlak a, ka mu hmak. Phone khawihin pawimawh deuh tur te ka han chhiar leh thuak thuak a.

Rinpuia status chu ka tum loh deuhin ka la en zui a!

"Ka va hlim em!" Tih të mai hi! Chu thu tawite chuan min khawih ka ti dawn nge, min deng dawt ka ti zawk dawn. Sawi thiam a har riau mai. A hlim ëm chhan chu hriain ka inhria a, ka ngaihbel a ni bawk ang chu. Chu hlimna chu ka thinlungin a tawmpui thei ta hlek lo mai. Chhei! Kei hian Judy hi ka lo duh ru reng a ni mai lo maw?! Ni lo hram teh se. Khawpui nulaah pawh induhtawk ve tak, bialpa a neih thu pawh min sawi khum ngattu kha ka duh ang maw? A teuh lo. Phone ka dah daih a, muthilh tumin ka maimichhing ta vang vang a. Chawhnua ka mumang kha ka ngaihtuahnaah a rawn lut nghal a. 

Hruaii patea Pa Thana kha zaninah pawh chhungkaw aiawhin a din nghe nghe kha. Hruaii te kawmthlang lawkah an awm a. Hruaii pa hi an upa ber a ni a, pa Thana nen an inkarah hmeichhe pahnih an awm bawk. Pa Thana te chuan fa pahnih an nei a, annu hi a taksa lam harsatna vangin Doctor ten nau pai an phal tawh lo a niawm e. Pa Thana mizia te ka han chhut a, pa hram tlahawlh ve thei tak, taima angreng tak ni bawk, khaw chhung chanchin hre thei deuh mai pa bengvar deuh mai a ni. Mi sual niin ka hre lo. Mahse, ka mumangah khan engvangin nge Hruaii khan a hlauh em em..a naute te kha a sawi a. Nau chu a lo pai tak tak ngei anih ka ring. A patea hian a tihtlaktir em ni ang? Engvangin nge a tihtlaktir ang? Ka thu hluai a! Ka ngaihtuahna zet chu aw..Hruaii chuan a pa nau fa a pai ang maw?! Thil ni thei a ni dawn em ni?! Tui ka in a. Ka mu tha leh ta a. 

Ka mutui khawp mai.

Kan inchhungkhatin kan inthenawm hnai lem lo bawk a, Ka pain kan leipui lama kan thlai thenkhat zuk la turin min ti sia, Khawhar in lama lan ve an duh vang a ni pakhat a. Kei pawh chu kal turin ka insiam a. Kan leipui pana ka kal mek laiin Rinpuia leh a thianpa Puia te hi peng atangin an rawn chhuak ve hlawl a. 

Mahse, inbe ngai lo a thuchang, kan inbe chuang lo.Ka hre leh si, Rinpuia te huanah an kal dawn a ni maithei, an huan pawh sawlai lawk saw a ni nghe nghe, vawiin taka hna te a thawh ve dawn ni.. Ka pensan dawn lai takin, Puia chuan,"Fawh a nuam ngawt lo maw?" A ti zauh a..

Ka bengah a ring nge, ka hriat tur ngei turin a sawi ring zawk ka hre lo "Vanram ka fang emaw ka ti hial" Rinpuia chuan a ti ta a. Ka thin a dek zawk. Mahse, ka pensan tak avangin ka hre zui ta lo. Judy chu a va sihhnip awm ve aw! Rinpuia te ang insawithei leh uang chi ber kher lakah te a lo inphal rai le? Ka hmuh dan a hniam rawih rawih thei mawle! Mak ka ti bawk si. Amaha a awm phei chuan RInpuia hian a riahchilh hreh dawn hlek si lo. Aa khai! Ka ngaihtuah tur a ni lo, ka ngaihven ve tur pawh a ni hek lo. A nun a nia, a duh dan danin a nun chu hmang ang hmiang. A ho em mai. Leipui ka thlen takah chuan Judy lam ka ngaihtuah zui ta lo va. 

Zanah chuan Nu Chami inah kalin, Zaua pawh kal kun du du chungin a rawn thleng ve chho ve a. 

"Zanin chu off mai ang u hmiang" Rema chuan a ti a.

Pawi kan lo ti vak lo nge kan hnial lo. Thalai kan tam ve bawk nen, kan langsar vak lo turah ngai ang. Nu Chami kan rim a ni ringawt. Dar 9 bawr velah ka haw a. Ka mu nghal mai. Ka mut erawh a chhuak hran lo. 

"U Ngur, ti nge zanin i lo kal loh?" Rawn titu chu a number ka save lo. A dp ka en a, Hruaii te veng lam nula ti ila, a la upa lem lo, Biteii a lo nia! Min rawn be ve teh tlat chu mak ka ti viau. Tualpui lam atanga min rawn betu kha chu a la reh. 

"Nia, kan thulh ta mai" ka va ti ngawt a.

"I awm lo va, a reh ruai alawm" a la rawn ti deuh deuh. Biak pawh kan inbe ngai mang si lo .

"A va mak awm ve aw" ka ti ringawt a.

"Mak vak ami? I mu tawh em? Ka tibuai che em?" A rawn inthlahrung thiam vel hle.

"Mu a, mahse, mut a chhuak lo anih hi" ka ti ve mai a.

"Zanin chu maw thil nuihzatthlak deuh a thleng a. I chán ropui khawp mai" a rawn tih chuan, "Eng chu maw?" Ka va ti vat.

"Kan miss thar a che bon rap mai mawle. Rinpuia'n engtin emaw a lo sawi ni tur a ni. Pawna Rinpuia ding lai kha a va pan sawk sawk a, a beng thuai mai mawle.. Kan en thup mai" a rawn tih chuan, mak ka tih bakah nuam tih lohna riau ka nei. 

"Ti nge a ben ringawt a?" ka ti a.

"Aw..kan Lalrinpuia'n insawitheihnan a lo hmang lehpek mawle..dawthei ropui sia. Miss thar chuan a ngam biah biah khawp mai." A rawn ti a. Ka khi suk. RInpuia tlawm lai hmel chu ka hmu chák ve mang e. A insawithei rei tawh a, hetiang hi chu tawk tur pawh a ni ve bawk a ni. Chhun lama Judy ka lo zeldin dan nen chuan a danglam leh ta daih mai. 

"I muhil ami?" A rawn ti leh a, ka harh zawk. "Muhil lo e. Ti nge min lo biak?" Ka ti ta nge nge a. Ka va zei lo ve tak.

"Aw ka be chak che. I induh si" a ti ngei! Biteii chu nula te lam, ngo ving veng, nepnawi dawr nghak thin a nia. A sualna leh that lohna sawi tur ka hre hran lo. Kohhranah pawh a inhmang ve viau mai.

"Ka induh pawh ka hre lo e a" ka ti a.

"Naktuk zan chu min lo sawm phei ve r'u aw ka lo nghak ang che u" a rawn ti a. A hnu reivak loah kan inmang tha ta a.

Mut mai tuma phone ka dah dawn lai takin Rinpuia hian, "Tlangval senior ve lai si, i va kamtam ve. " a rawn ti táwng mai a. Ka thin a khei zak mai.

"Ve ringawt che chuan, eng thilah chuan nge ka kamtam a?" Ka va ti ve ngat a. Msg type te hi ka nin thin vangin min chhanna tur a type mek laiin ka call ta a. 

"Rinpui, i msg kha eng nge a awmzia?" Ka va ti ve táwng a.

"Aw..i hria ang chu. Miss Judy nen in inkawm ve thin a, vawiina Puia nena kan sawi dun kha i lo hrilh a, nangmah vangin ka mualpho tih hre rawh. Mipa ve si" a rawn ti zawt zawt a. Ka bulah chuan awm se ka tham nawk ang mawle. Chaltlai lutuk.

"Amah Judy zawt ta che. Ka hrilh leh hrilh lohte chu..ve ringawt che chuan, Judy chungchang insawi tih pawh ka lo hre ve hleinem" insum tak chungin ka ti a.

"Pha buai lo mai rawh. Nngmah bak hrilh thei tur an awm lo" a ti leh kher a, "Hmaichhanah kan sawi fel dawn nia. Mang tha phawt" tiin phone ka dah a. Ka sa pup pup mai. Mi tha tak chu ka ni lo, mahse, tumah ka tibuai ngai lo va, khatiang buaina holam zet anga ngaih theih, mahse, mi ngaiha kamtam ka nihna tur ni si ang phei kha chu ka vawikhat tawnna a ni . ka lawm lo viau mai. 

A tuka tukthuan kan ei laiin ka sawi lo thei ta lo va. Ka pa chuan,"Ngawihsan mai mai rawh. Saw nau saw a inlek ve riau a, Judy'n a lo do chu a that viau chu.." A ti duh lek a. 

Ka nu erawh hmeichhia tih takah,"Mawina, Sawi fel rawh. A tawng thei sia, miin ni lo loin an hre dawn che asin" a lo ti a. A sarhu laiin thinrim ve deuh mah ila, tunah chuan ka dai leh viau tawh a. A naupangchhia leh deuha ka hriat vangin bawhzui ka tum ta lo. An ngaih ngaihin ngai mai teh se. 

Apeki School kal tur chuan thlah a ngiat leh ta tlat! Bike hi ka kawl ve naa, khalh chhuak khat tak ka ni. Tualpui ram depa lo kan neih tum kha chuan ka hawl ve nasa a, tunah chuan hawl chhuahna tur a vang riau si a, khawhar takin a ding reng ringawt mai a ni. A nuar leh mai ang tih ka nuin a hlau si, "Han thlah mai rawh" a ti a. An school hi a hla ve bawk nen, bike chu ka hrufai thuak thuak a. Apeki thlah tur chuan ka chhuak ta a. School kan thlen chuan naupang an lo tlan kawi leh nuk nuk mai. An uniform te lah hi a chuar thei mai sia aw. Apeki chhuk hnua kal leh mai ka tum lai takin Miss Judy pawh a rawn thleng chho ve chiah a. Smart pant dum a ha a, a lang zahawm hle. A sam chu a thlah hniang bawk. Min hmuh chuan a ding dat a. Sawi duh nei hmel a pu a. 

"Eng nge i lo tih a?" A ti ta a.

."Kan naute ka lo thlah lawk" ka ti ve mai a.

"Nih chu.." A ti liam puat a. Kei pawh ka tlan thla ve nghal. Biteii dawrah chuan ka peng kawi a, keimah zawk chu ka lai deuh hú mai. "Vawiin eng nge i tih dawn?" A ti a. 

."Zaua te in siam a ngai a. Ka pui ve ang" ka ti a. Kuhva min theh chu ka hmawm zauh a. Min melh dan chu ka man ve thiam khawp mai. Min haw hran lo. Min star thar thut tihna mawni dawn le..rei awm loin ka chhuak leh nghal a. 

Nilengin Zaua te nupa room tur siamin kan phe buai a. Ani lah a la che hleithei si lo. Mahse,a hahthlak lem loh e. Zanah chuan khawhar in lam kan pan ve leh ta thám thám a. Biteii khan min chah ngun bawk nen, kan sawm phei a. Hruaii te kawtah chuan Rinpuia leh Puia te pawh an lo ding a. An piah lawkah Judy leh a in luahna bul lawk ami Zuii an lo ding bawk. Rinpuia'n min hmuh rual chuan, mei nei zet hian,"Senior kamtam" a ti hluk a. A rui deuh tih a mitmengah pawh a hriat. Hria angin ka lang duh lo va. Biteii lam hawiin, "Zuii te rual sawn lut la" ka ti a. A bu nghat. 

"U Ngur, ka lawm lo hle tih i hre dawn nia" Rinpuia tehsek chu aw! A va hun lo tak. 

"Engah chuan nge i lawm loh ve ringawt!" Ka ti ta nge nge a. 

"I kamtam em avang khan..ani saw i ngaizawng sia, aniin eng atanmah a ti si lo che a, i rilru nain dawt dawtin min lo sawi tih hriat reng..ka lawm lo teh a nia. Mipa ve si" a ti nang nang a. 

"Tuai ang maiin khatin tawng cheh hlek suh. Amah saw zawt rawh ka tih kha.." Ka ti a. Ka insum theih loh ka hlau deuh tlat! Mipa zaidama sawi chu ka ni ve thin, mahse, a leila zawng leh min dek zawng thil hi a awm ve tlat a. 

A khi sâwng a. "Zawt mah ila a sawi duh nang. Nangmah vangin kan inkar a chhe vek a nih hi..i phutawk hre tawh ang che" a ti leh sak a. Buanga'n a va pan hnai a, "Hei,naupang, kha kha aia upa te biak dan tur em ni? Tu nge maw nia i inhriat reuh chu le?" A va ti ve ta salh a. 

A la tlawm duh hauh lo, kan thawm a ring ve deuh si nen , an rawn dak hiang tawh a. Nuam lo ka ti viau. Judy te pawh chu an rawn hawi reng a, Biteii pawh bangbo zetin a ding ngawi ve hle hle mai. 

"Ve khanglang a che. In upat vang ringawt khan ka zahna chhan tur che u a awm lo..nang pathlawi phei kha chu ek tlukah pawh ka ngai lo che" Rinpuia'n a ti zo awrh, A bek a ri bur. Buanga pate thin a thawk a ni mai. An rawn tlan khawm ta huk a, Buanga chu keini chuan kan chelh nghal. Rinpuia chuan posi lain ,"Invai khan ka cho che u, ve mai mai che u chuan le..mi mawl lehkhathiam loin min han hnek ve khanglan chu" tiin a rawn vai fua a. A kut chu ka lo mansak chawt. 

"Rinpui, duhtawk rawh. I zahpuiawm mah mah e ..haw la, zuk mu lum daih rawh" ka ti nghut a. Min hual thup tawh si a, a zahthlak em mai. Ani rui lungpuam tawh si chu khap daih theih awzawng a ni lo. A pawr telh telh mai si.

"He pa, Ngurhmingliana hian Judy bulah dawt dawtin min lo sawi a, Judyin mi tam tak hmaah min timualpho a, ka lawm lo a ni mai. Ka hmeichhe khawih tawh zat pawh a dam chhunga khawih ve thei lo tur hian min ti mai mai suh se. I kum zat aia tam kha hmeichhia ka mutpui tawh.." Tiin ka hming pum ngatin min han ko leh kher a. Buanga leh Rema an za zak tih ka hria. Mahse, insum hram ka la duh fan a.

"I harhfim hunah tha tetein kan la sawi dun dawn nia. Zuk haw phawt teh, hei buaina i siam ringawt a nia,Puia, hawnpui rawh" tiin Puia chu ka melh a. Ani pawn hawnpui a tum ngial a. A thei si lo.

"Kha! Thiamthu sawi tur pawh i neih chai loh kha. Mi mawlpa, mistiri ve mai mai hian min khin theih inring buai duh suh..nanga cho phak ka ni lo ve. Lalliana fapa Lalrinpuia ka nih hi.. " a ti lung lung a. A zia kan hriatsa vangin a chapona te chu ngaihthlak liam a har lutuk lo. Hruaitu pakhat chuan ,"I va mawl ve.. Haw rawh. He laiah buaina rawn siam suh" tiin a nam a. 

"Ngurhminglian, Miss Judy khan ek paih tlukah pawh a ngai lo che. Kan inkar tihchhiat tumin mipa ve si, dawt te i lo hrilh kual a. Mistiri tih awm tawk lek a ni.." A tih leh takah chuan zilh ve hlek chu tha ka ti ta a. Ka va pan a, ami tham loh ang taka chungtlak vein, "Inring rawh ..hnek thamah ka ngai lo che a , ka beng dawn che nia" tih leh ben ka rual a. A awk rawp mai. Ka ben chu a na thawkhat a niang e. 

"Buang, haw ang u. A zahthlak em mai…" tiin ka thiante chu ka va melh a. Judy pawh ka va melh tel. A ding khawng reng a, thinrim hmel a pu. Ani sawn thudik a hria..mahse,a ngawi!

"Miss Judy, i bialpa hi thudik i lo hrilh dawn nia. Mistiri kamtam ka nih leh nih loh chu..chuan, fimkhur ang che" ka ti hniam raih a. A bula ding Biteii chu melhin, "Bite, kal ang" ka ti nghut a. Kan YMA president va thlek chungin,"Pu Hruai, a zia lo hle mai. Buaina kan rawn siam ringawt a..pawi ka ti lutuk ania. Kan haw mai ang e" ka ti a. Lehhawi tawh hlek loin kan kal san ta a. Rinpuia'n ,"Min thlah r'u, zawngho, hmela kha ka khawih ve dawn" a tih tuar tuar chu kan hria. Engmah kan sawi lo. Ni e, nasa takin zaninah khan ka thin a rim a ni. Hmeichhia kha awm lo se, Rinpuia kha na lua awm loin ka nghaisa ngei ang. Hruaitute leh hmeichheho awm ve kha zahawm ka tih em vang chauhin ka inthunun a ni. Tin, ka zak bawk. Hetiang hi ka pian a hnu lamah kan khuaah ka la tawng ngai lo. Hmeichhia vanga buaina a la ni zui! Judyin thudik a sawi theih reng laia a ngawi hmak khan min run hle bawk. A chhan sawi ber tur awm si loin ka na ru nget nget mai .

In ka thlenin an lo mu thap tawh a, kei pawh ka mu zui ve nghal. Ka la lum pup pup mai. Biteii nen kan intext zuai a, keia thinur inhrikthlak ngaihna hre bawk si lo, rilru fim lo zet chuan Biteii chu ka bem ta ngawt a nih kha! Ani lah min duh sa a lo ni bawk nen. Lapuii boral hnuah bialnu thar ka nei ve leh ta chu a nia. A chhan dik tak erawh Miss Judy vang a ni daih! Ni e, he hmeichhe lakah hian ka lawm lo a ni. Eng emaw beisei ka nei a,a thlentir si lo. Biteii hmanga ka tihtheih entir ka duh a, He hmeichhia hi ka laka tlawmtir ka duh tlat! Ni e, zaninah khan chiang takin ka hria. Miss Judy chu ka ngaizawng a ni…

(Tawk phawts 🤣