Vanneihsangi 3

VANNEIHSANGI (3)

Ziaktu: Toni Râlte

Nu Sangi chu a rawn kal hnai a,a fanu mit chu a en chiang ngang mai. Gaby a lo tal aih a, a puakna chu phelhin chhuatah a dintir a.

"I tap em ni?" A ti leh a.

"Ka pa leh a nupui an lo kal a. Apuia te unau chawmna atana a hlawh i cut sak kha titawp tur chein an rawn tia.." Nenei chuan a ti a. Nu sangi a ner sak. 

"Khanglang a! A fate alawm an nih. Engvangin nge a chawmna chu a pek loh ang?" A ti hlak hlak a. Ka awm ve chu hnawk ka intiin nuam ka ti viau lo. Mahse, Nu Sangi chuan, "Tpa chu i lo awm hlauh a, a va tihzia em..awm lo la, Nenei hian an kut a tuar leh maithei a ni" a ti a. Tlemin ka awm a nuam ta deuh.

Gaby chu thutkhawmna lamah a kai phei a. Nenei'n thingpui a chhuang nghal. Nu Sangi te bulah chuan ka va phei ve leh ringawt. Thingpui in lo va haw kha ka hreh ve laklawh si a ni ber mai.

"A hahthlak a nih hi tiraw?Tp, U mawia hi chu aw..a inhmuhchhuah hunah chuan a la inchhir ve ngawt ang" Nu Sangi chuan thawk la hawk chungin a ti a. 

"Ni e, zuin a tibuai tawh a nih kha. Nakinah a la inhmuchhuak em em ang" ka ti ve ringawt.

"A zu rui ringawt kha chu ka la tuar dam thei, a fahrawn a nih vanga Nenei kut a thlak zen kha chu ka tuar thei ta thlawt lo a ni. Tikhawp hian ka fanu hian a zah thiamin pa ang tak taka pawm ve pawh a tum a, mahse, a sual em a ni." Beidawn hmel zet hian a ti leh a. Ka hriat chak deuh hi ka zawt tawp mai dawn..engpawhni mai teh se..

"Nu sang, Nenei pa hi a dam tawh lo em ni?" Ka ti ta a. Min rawn melh kâwk , thinrim hmel erawh a pu lem lo. Za lo zeta nui chungin, "Nenei ka vahvaihpui dan hi thawnthu ngaihnawm tak a tling asin. A pa dik tak hi hria ila chuan a pa bulah ka awmtir ngei ang, hetianga rilru hrehawm leh retheih vanga zirna pawh chhunzawm thei lo khawpa awm lo tur hian" a ti duah a. Mak ka ti telh telh. Nenei chu falak tihna em ni ang? Engvangin nge Nenei pa chu an hriat loh? Ka hre chak zek zek mai, zawh sek chu ka inthlahrung ve bawk si.

Mahse, amah zawk chuan," Thenawm tlangval fel tak kan nei che u a, nakinah mi ká atanga inla hriat ai chuan, keimah ngeiin ka la hrilh dawn che u nia. Zaninah a remchan chuan" a ti ta a. Ka bu nghut. Nenei chuan thingpui rawn chawiin, Biscuit a va la leh a. "Bal chhum kan tum nen, Ka pa te vangin kan khaihlak vek" a ti sap a. 

"Hei biscuit a awm tho lawm" ka lo ti vat a. Thingpui chu ka in nghal. Thingpui dawra thawk thang a ni bawk a, A thingpui lum a sial thei khawp mai. 

Nu Sangi chuan, "Khaw maw, Nene, i phone chu, i ni te ka va bia ang e. Apuia te chu rawn dah tawh teh se " a ti a. Nenei chuan a pe nghal.

"Apuia te va lenna hi Pu Mawia farnu te tihna mi?" Nenei bulah ka ti a.

"Umm, Ka ni fel zawki a nia. Ani hi chu Aizawlah a awm lo va, an rawn zin chuan kei pawh min duat thei lutuk. Apuia te pawn an ngaina " a ti a. Sawi tur a vang leh ta raih mai. Reivak lo ka thut leh hnuah eirawngbawl a ngaih chhuanlamin ka phei ve ta a. Rawngbawl a la hun chiah lo nain awm ve reng kha sawi tur ka hre lo si, a hrehawm. Ka pheikhawk ka seng a, kan room chu ka tifel ve a, Nunzira ten mak an ti viau maithei a ni. 

Sanga nen kan inbe zuai a, Sawn man inpein, an innei dawn ta lo chu a nia. Mahse, a sawi tawh ang khan a patea te bulah a va zin rih dawn a ni. Zinbo daih kha a tha rih bawk a. Chhuani hi chuan a ngaidam thei maiin a rinawm a. A chhungte lam hian a hma ang khan an pawm leh thei ang em tih chu Sanga buaina pawh a ni. "I hlei mah mah a nih kha" ka tih chuan, an chetsual dan vel a rawn sawi a.

"Mi lo biak ve zauh zauh hi a ching a. Engah vak ka ngai lo. Pu Sawmvela boral zan khan Lalchhuani hritlang awmna kha a bet hmiah sia, U Remi nen chuan kan kal dun a. Zing dar 1 velah inhnawhpuar ang a ti tlat a, a in lam kan pan a. Ani a senchi a lo kawl chu niin, kei lahin hnar phal hek lo. Kan in dun ta a. Kan kai ta sia, 'Kal tawh lo mai ang' a tia. A khumah kan mu a. Bro, i hrethiam ang, amah lah keini aiin û mah se, hna thawk ngai lo ta na na na chu a mam ve pur bawk si, kai tawh nen ,a lo zir ve bawk sia, kan ti ta mai a ni. Chuan, chumi hnuah pawh amah pawn min rawn biain a danglam hran lo. Ruah a sur vak zanin chhunah Chhuani nen kan inhau a, keia thinrim lungawi lo kha U Remi'n min lo sawm ve bawk nen, ka va leng a. Kan ti leh a. Damdawi a ei ka ring a, a lo ei lo a nih dawn kha..a pawi ngawt mai" a ti..zu hi chu Nenei sawi ang khan thatna hi a pai tam tehchiam lo zawng a ni e. A ruih hi a nuam ve fu roh si a. Buaithlak.

Nunzira a rawn haw a. A inthlak a, rawng a bawl nghal. An va inhmu tha thei a niang, a hmel hmuh a nuam riau. 

"Teh, Bsi khan min lo be reng..ka sawi duh lo va, Esi tan pawh a thikawm ve tho" a ti a. 

"Lerha" ka lo ti nghut.

"Chulam a ni lo. Min biak tlatte chuan chhan loh a nuam hleinem" a ti a. 

"Zanin chu Nenei te inah leng ang u aw. Nu Sangi'n thawnthu a sawi dawn. Ka hre chak tawh" ka tih chuan, makti zet hian min melh a. 

."Aw..i.hre mai ang. Nenei hi kha a pa fa kha a ni lo va, chung vel chu a sawi dawn..mi ka atanga inhriat ai chuan ka hrilh ang che u a tia" ka ti leh zung zung a.

"Tha lawm..lenna tur kan nei ve ta hi a nuam zawk" a lo ti ve a. Ni e, dik tak chuan lenna tur kan hre vak ngai lo. Bialnu kan neih lahin an awmna a hla si, zan tin len peihna chi a ni si lo. Inah kan tawm sen reng zel a. Nenei thingpui lum sial zet han in sak pawh hi a nuam ve reng reng e. Tluangtea pawh a rawn thleng a, a mood a tha e. Alicia chu a kawchhung lam a tha a, tunah phei chuan ngaihtuahawm a ni lo. A lawmawm thin e. A dam vat turah ngai ang. Keini pathuma eisiam buaithlakna deuh chu, Kei leh Tluangtea hian hmarcha thak hi kan ngam mang lo va, Zira hian rapthlak khawpin a ngam thung. A bai siam hi a thak thei si, mittui nen hnaptui nena kan hawp a ngai thin a. Zanin tlaia a bawkbawn bai pawh a sa si, thak bawk si, kan si hluam hluam mai. Amah lahin engahmah a ngai bawk si lo. Lukira'n ,"Zirdul, min ngaihtuah ve deuh rawh. Chutia thak i duh viau chuan, bai i hawp rual khan hmarcha sehhmeh mai rawh" a ti a. 

."In ninawm, mipa ve si, si hluam hluam reng mai. Thak ngam hi zir r'u" a ti leh zēk! Kan thinrim chuang lo bawk a. Thak ti chung chung chuan kan ei ve leh teuh tho mai. 

Nu Sangi te tawngtai zawh awm velah kan va phei leh ta thâm thám a. Apuia te erawh kan la hmu lo. Nu Sangi chu helhkam nei tih hriat zet hian a lo vei sek a, min hmuh rual chuan, "Apuia te an rawn dah thei lo" a lo ti tâwng. 

"I be lo mi?" Ka ti a.

"Bia e, Ani chuan , " Apa in a rawn hruai. Ka va dah ang a tia' a ti a. Ka rilru a hah. A pa bula an awm chuan zu te kha an rui leh awm sia" lungchhiat hmel zet hian a ti a. Nenei chuan thleng a sil mek a, ani pawh chuan, "Nu, lungngai suh. Ka pa chu ka be dawn nia" a lo ti a. A sil zawhah a kut a hru hul sawk sawk a. A pa number chu hmet chhuakin a call ta a. A ring ral thak thak bawk si. A ni a call leh a.

."Aw ,nî, Apuia te an lo la haw lo..anu rilru a hah tawh lutuk a, Apa kha min han biaksak ve mai teh" a ti a. A dah leh nghal.

A phone a rawn ri leh vat a, "Aw" tiin a han ngaithla a, a ner sawk. 

A dah hnuah, "Ani pawn a call tlang thei lo. An rui chatthla daih a mi le? " a ti a. A awah chuan hlauhthawnna a lang bawk. 

Nunzira chuan, "Kan va lam dawn mi niang" a lo ti var a. 

"Aa..kan tibuai thin che u em mai. U Saii te ka han pun ngawt mai ang e. Anni khian min kalpui theih chuan an hlau deuh ang" tiin a chhuak a. 

Gaby chu chhuatah teddy bear khalhin a thu a, a tlei ve mual mual khawp mai. 

Tluangtea chuan, "Nene, i pa bulah an riak dawn te pawh a ni ve thei asin. Naktukah an lo dah ve mai lo'ng maw?" A ti a.

"Ka ring lo. Hmanah Anu nen an inthen hmasak pawn a lo hruai ru a, a ngaihsak leh tawh si lo va, an unauin lo hawn an tum ve a, kawng an bo a, kan buai vak tawh alawm " a ti ta a. A va manganthlak e aw. An khawngaihthlak nufa bawk si. Nu Sangi a rawn chhuk leh a. Hmel phelh phang hian ," U saii te chu Saitualah an lo zin daih alawm le..an pi leh an awmpuinu chiah an awm" a rawn ti lut a. A mangan hmel si, ka khawngaih ta em em a.

"Nu Sang, kan va lam mai ang. A buaithlak loh. Mahse, an in kan hre si lo va, Nenei hi lo kal ve se, nge nangmah zawk" ka tih chuan, "Keimah ka kal ang e. Nenei ringawt chu an hlau lo ang..nene, i nau hi lo awmpui rawh aw. Duh leh Tpa nen kan va kal ang a, ZIra, Nenei hi lo awmpui mai ta che u" a ti zung zung a. Tluangtea chuan, "Eng emaw buai thutah ka lo kal ve ang e..zira lo awm rawh se" a lo ti var a. Tiang chuan kan chhuak ta a. 

Taxi remchang kan hmu ta vat a. Bawngkawn lam pan chuan kan tlan ta vang vang a. Nu Sangi chuan, "Ka va tibuai thin che u em aw..a zahthlak si, a lawmawm bawk si" a ti a.

"A ho em mai, min tibuai lo" kan lo ti ve a. A inthlahrung lutuk chu a khawngaihthlak letling. Driver chu min lo nghak turin kan ti a. Step thui ve deuh kan zawh hnuah veilamah kan peng a. Kawng rualrem lo zet kan zawh leh hlek hnuah Assam type, tlema hlui tawh lam lo ding chu kan pan ta a. Nu Sangi chuan kawngka a kik a. A reh thiap mai. A inkalh lo bawk a, a hawng hmiah. Kan lut ta a. 

Chu in tlabal leh kawrawng zetah chuan Pu Mawia chu chhuat zau puiah chuan kekawr chauh hain a lo mu ngút mai a. A chatthla a ni ngei ang. Nu Sangi chuan room lam a va pan vat a, tumah an awm si lo! Pu Mawia chu a va sawi nghek nghek a, "U Mawi, hei u mawi, khaw nge Atea te?" A ti sek sek a. Ani Pu Mawia lah chu a rum tuah tuah a, a tep chuap chuap a. A muhil lehnghal zel si. Nu Sangi a tap thawthang a ni ringawt tawh. Lukira nen chuan Pu Mawia chu a zak tawn tawnah vuanin kan tung tho ta lawp a, hreh zeta rawn mengin mawl hmel zet hian a hawi kual ruai ruai a. Nu Sangi chuan a khabea kuai chungin, "Khawiah nge ka fate?" A ti vin ta thak mai. 

"Ka hre nang" a lo ti hú si! 

"Ani te in atangin i lak thlak kha. Khaw nge i dah? Sawi teh" a ti leh tuar tuar a. A mangang takzet tawh a ni. 

"Ka hre lo ka tih chuu...zu ka in a, engmah ka hre tawh lo" a ti hluk hluk a. Ka va hnek chak tak..

"I fate awmna pawh hre lo khawpin maw i ruih a? Misualpa, khaw nge an awm ang a?" Tap tuau chungin Nu Sangi chuan a ti leh a.

"Kal teh..nge min rawn kaihthawh ringawt. I fate awmna ka hre peih lo e. An thi tawh aniang" a tih rual chuan a biang a ri thak mai. Nu Sangi a insum hman tawh lo. Ka dem hauh lo mai. 

"Eeee..kut te mi thlak elo? Mi hurnu , nang leh i fate hi ngatanmah ka ti lo ve. Mi te chu i ben ngam khanglan le.." Tih pahin zawi nguai hian a kut a lek ve a .. Nu Sangi erawh chuan a hlau lo nasa, A naka chhuih zawtin, "I nupui ka ni tawh lo bawk a. Ka duh duh ka tithei. Tenawmpa, i fate i rilarah te ngei pawh i tibo thei a nia. Pathianin a la hrem khawp ang che...Tir'u, Tp, i kal ang u. Ka fate chu khaw nge an awm ang le.." tiin a chhuak a. Kan kal tur chu Lukira a insum zo ngang lo nge, pu Mawia sam kir balh hmel zetah chuan a zuk thâm a, "Pa ni tlak pawh i nih nek loh hi" a ti sup a. Kan chhuak nghal. Tluangtea hi hmeithai fapa ve tho a ni a, a thinrimna chu awm ka tihpui khawp mai. 

Apuia te ni amah la pheitute thlennaah kan va zawng leh a, Ani pawh chu a lo mangang viau mai. 

"Ka u kha a rawn kal a, a harhfim reng chutih lai chuan, Apuia te bulah ," Tiru, ka hruai haw ang che u. Thil leina ka pe bawk ang che u' a tia. A rawn dah ve mai turah ka ngai mawle..U Sang, pawi ka ti em mai..ka thiam loh vek a ni" a lo ti mawlh mawlh a. 

Pu Mawia U hmeichhia erawh a mitmeng a thip viau. A hmel lan dan atang pawn mi tha a ni lo tih a hriat ngawih ngawih. "Mawite,i thiam loh a ni hleinem. An pa a nia, a la ve bawk ang chu..a thuhrimin Sangi pawh helai thleng thlenga rawn zawn a ngai lo, min timualpho. An rawn haw ve leh em em ang. A pa bulah an riak dawn a ni mai a, thenawm te inah an leng te pawh a niang chu...fate hmangaihber awm hrima hetia i rawn kal" a lo ti bawrh bawrh a. Ka lo ngei ve khawp mai.

Nu Sangi a alh ve ta nge ni, "U Zai, khatin min tawngkhum hauh suh. Ka fate hi khutiang zu ngawlvei, chatthla reng bula an riah ka remti reng reng hleinem..tin, an awmna chin pawh a hre lo a nia. Mangan ve a hneka khatiang zawnga mi han tih le..mai mai ana" a ti ve ta hmak hmak a. Pi Zaii chuan, nui lui sâwngin, "Mangang mah ta che..kha tlangval pahnih i nei alawm..anni kha inzawnpuitir ta che, Tichuan, I fanu Nenei ang khan pa puh tur ber hre loin nau pai leh la..tu emaw bum thluin inchawmtir leh mai rawh.." A ti a. A thusawi chuan min deng dawt mai! 

"I lo rapthlak ber mai. I tenawm mah mah, hmanni lawkah in inthen a, tihian mipa te nen zan khaw tairekah in vak leh thei a nia..i fate i ngaihtuah tak tak vang pawh a ni tawp nang" a ti leh a, Nu Sangi insum zo tawh lo chuan tawng ngaihna hre tawh hek lo, Pi Zaii samah va kekin a chet hmain chhuatah a phih thlu dawt mai..A nau hmeichhia fel zawk khan a lo chelh vat a, "U Sang, duhtawk rawh..hrethiam rawh .ka u hi chu a ngaihna a awm lo a nih hi" a lo ti sawk sawk a. Keini pawn Nu Sangi chu kan chelh ve nghal.

Tap teuh chungin, "U Zai, ka vanduaizia leh retheihzia hretu i ni. U Mawia hi ka bum lo, aman min bum zawk a ni. Ka fanu ka phatsan theih loh vanga ka tawrhna zawng zawngte pawh hretu inni, ka vanduaina hmanga min hmusita min cheksawlh tur khawp hian inropui bik lo. I fanu tleirawlte, hnute pawh la um tha hman lo hi tlang sum a nih hi..khatin ka vanduaina hmangin min diriam ve tawh suh. I fapa lah rukru , khawtlang mite tihkhai..tin, maw ,ka fate hi ka damchhan an ni a, Ka thih thlengin ka enkawl ang. Pahrawn an hrawn lo bawk ang. Ka chunga in nutapa thiltih leh inchhungkuain min tihhrehawmna phuba hi chu Pathianin min la lasak em em ang" a ti ta sak sak a. 

"Kal ang u, Nu Sang, .." Tiin ka pawt a. 

"Ni e, va kal pui r'u, ka in chhung ngeia kut min thlak ngamtu hi inla hrechiang ve mai ang. " Pi Zaii'n a tih chuan, "Ka pi, Nu Sangi hi kan hmuh leh hriat chinah mi sual a ni lo tih kan hrechiang tawk viau e. Chuan, misual tak i ni" ka ti hmiah a. Kan chhuak ta nal nal. Apuia te chu khaw nge an kal kan hre si lo. Taxi driver pawh chu thil awmdan kan hrilh a, tlangval fel tak mai a lo nia.

"E..!ka pi, inthlahrung reng reng suh ,ka motorin kan zawng dawn nia" a ti sauh sauh a. A thlamuanthlak mang e . 

 Nunzira chanchin ka va hrilh ve a , an mangang ngawt ang an ni pawh. Pu Mawia te thenawm ho kan zuk en leh a ,an awm si lo. A hnuah step chhuah chiah dawr ami Nula chuan, "Apuia te unau chu thim hlim deuh khan U Mawia nupui thar te nen khan an lo chhuak chho alawm. A nu khan ,'A pa a rui leh tawh sia, ka va dah mai loh chuan' a tia..ka lo enzui vak lo a" a ti ta a. Nu Sangi a thlabar chho ta. A nupui thar number chu Apuia te ni fel zawk kha a va dil a,. Buaithlak chu amah Nu Sangi'n phone a nei si lo, an inah kalin kan va zawt leh a ni. Tichuan, Pu Mawia nupui Feli an tih chu ka call ta a, a switch off hmak mai! Kan try nasa, tihngaihna a awm ngang lo. 

Taxi chuan kan let leh a, kawng te chu kan han melh phei a, Apuia te unau hmel reng reng kan hmu si lo. Nu Sangi a tap reng tawh bawk si. A tawpah Driver chuan ,"Aa..ka pi, Police stationah i kal phawt mai teh ang u. An niin a ngaihna an hre deuh ang" a ti ta a. Kan zawm dual mai. Bawngkawn Police stationah kan kal ta a. Zu rim nam thur thur hian min lo dawngsawng a, a tirah chuan a vin hluk hluk mai. "Fate chutin hlamchhiah tur a ni hleinem..i zir lo a nih chu" tih velin. Mahse, Tluangtea'n fiah leh chiang kek kawka a han hrilhfiah takah chuan, a nem ta viau a. Report pawh a ziahluhsak ta a. Mahse, darkar 24 ral hma chu an zawng ngawt thei si lo. 

Nu Sangi chuan, "Ka pu , apa nupui number hi min chhuisak hram mai rawh u. Ani khan a hruai a ni" tiin Feli number chu kan pe ta a. 

"Engpawhnise, lo hlauthawng lutuk suh u. Eng em an ti lo vang. Kan hmu leh em em ang " tiin a hnem ve a. Kan chhuahsan zui nghal. In lam panin kan tlan haw a, Taxi driver lah chuan fare a la duh thak lo."Tihtheih ka nei si lo va, ka tih ve theih tawk a ni mai..ka pi, i fate chu hmu leh vat ang che..kei pawn ka lo melh kual ve dawn nia" a ti thlap mai a. Khawi hmunah pawh hian mi tha fel hi chu an lo la awm ve zel a nih hi..

Nenei'n mangang zetin, "Nu, khaw nge an awm ang le?" Tiin a lo hmachhawn nghal a. Ani pawh a tap nge ni a mitmeng a dik lo. Kan boruak chu a hrehawm kher mai. Kan in hnuaite nupa pawh an rawn lang ve a. Chet lak vak dan lah a awm si lo.

A tuk sunday a ni tho bawk a, tiin.."Hetia nghah tawp chu a fel ber lo. Kan vaiin insem darh ila , zawng tawp mai ang u." Tiin ka rawt ta tawp a. Nenei te nufa chu an muhil dawn chuang lo tih ka hrechiang em a ni. 

Ka thiante pawh chu an lo inhuam hle a. Kan inhnuai pa U Mala chuan, "Tei leh U Sangi ten in lo nghak se..Keini hoin va zawng ang u" a ti a. In nghak awm lo ringawt kha Gaby a awm bawk sia, a dik lo ve bawk a ni. Nenei pawh chu a va inthlak a. Helhkam nei tún chung chuan kan chhuak ta a. Nenei nen kan inzui a, Lukira leh Zir, U Mala erawh patling a ni bawk a, amahin a kal a. 

Zan dar 12 tlangah te chuan mi kawmkar kan la hrut zak zak a. Nenei chu ka kai a, a kal ve sauh sauh mai. Tawng pawh kan tawng hman meuh lo. Zing dar 1 a ri thuak tawh tihin Police patrolling ten min rawn hmu a. Vin thak hian ,"Eng nge he laiah intih?" An ti a. Thil awmzia ka han sawi chuan, an awih loh hmel kher mai.

An rawn chhuk sap sap , mi te chu an rawn hnim thuak thuak a, "Zu rim chu an nam lo. Mahse, a rim nam lo chi an ti ngei ang. Haw vat rawh u, kan man hma che u hian..mi thil te in lo ru ang e" Pakhat chuan a ti lar lar a.

Nenei chuan, "Ka pu, kan haw thei lo.ka nau te kan zawng a ni..khawngaihin min zawnpui ve zawk rawh u" a ti a. Zah a dawn zo lo tih ka hrethiam mai.

"I thisen a va sang e aw..nangni ang ho hi lawm indawthei si..mi.bum inthiam si" tih leh Nenei rawn hnaih chu a rual a. Nenei hlau pawh a phu dawrh, a hmaah ka va ding siah a.

"Ka pu ,engmah kan rui lo. Kan mangang em em zawk a ni. Nang pawn zu rim i nam a nih kha..nangni ang ho vang hian lawm inpolice puite hmel a balh thin" ka ti ve hmiah mai. Hah nen, thin a rim túk tawh mai a ni. 

Tawng tuma a ka a an zuau laiin an hotupa niawm tak chuan ,"Kalsan ang u..chuan dawt insawi lo anih chuan in naute chu hmu ngei ang che u" a rawn ti a. Min kalsan ta hram. 

"I tha em?" Tiin Nenei chu ka melh a. A bu nghat. A thaw hliam hliam mai. Kan hah ve bawk a ni. 

"U Tri, haw mai ang. Ka beidawng.." A ti ta thawt a. Kei pawn pawi ka ti vak lo. Zira'n min lo call ve chiah bawk a. An haw mek thu a rawn sawi a. Keini pawh in lam kan pan ve ta a. 

In awm lohna kham angreng pheia kan kal lai chuan, Kham atang chuan thaw huam huam niawm tak kan hria a, ka beng chhe ri a ni hauh lo mai. Nenei chuan hlau tih hriat zetin ka banah a rawn vuan a, Ramhuai a nih ka lo ring deuh. Nenei a tlan titih si, ka kal chak ve ringawt. Nghet zeta inkaiin kan kal leh ta hlawk hlawk a. In panna stepa kan chhuk thlak lai chuan, Keimah zawk chu ka petek ve leh ta hlauh, ka force na tawh si chuan Nenei chu ka bawh a, ani lo inring hek lo, stepah chuan kan lum titih ta mai. Mahse, kan lum thui lo. Ka pilh hrut in ka hria. Kaihthawh pahin ka inbeng thuak thuak a. A nui ta hawk mai. Kei pawh ka nui. Thing thei khawp mai. Han lum tak rawk rawk chu! 

"Kan va chesual thei tak" a ti sap a. A hah vanga a biang tai tek chu light chuan a chhun fuh bawk a, a duhawm lutuk ringawt. A nuih lai reng chuan ka lamah kuai lawpin a hmuiah ka fawp ta ringawt! Hei hi a chhan ka hre miah lo! Ka ti ve ringawt! Ka fawp rei lo thung. Mak tih hmel zetin min melh a.

"Ka tihpalh..i na em?" Ka ti lawi rút a.

"ka tha alawm..ti nge min fawh?" A ti sep a.

"Ka hre lo" tiin ka kai a. Ka chhukpui leh ta a. Ngawi rengin an inah kan lut. An lo thu thap a. An hmelah beidawnna bak hmuh tur a awm lo. Nu Sangi a tap reng bawk si. Tihtheih neih a chakawm duh khawp mai. 

Nenei'n thingpui a va lum a. Kan in leh rih a. U mala te nupa chuan min hawnsan a. Nu Sangi chuan inthlahrung takin, "Nangni pawh va haw tawh r'u, kan ngaihtuahawm loh ania. Inawm lo ang tih hi ka va hlau tak em" a ti khur dat dat a.

Tluangtea'n ," Nu Sang, nang tal chu muthilh tum la, i muthilh hunah kan phei dawn nia" a lo ti a. Ni e, Muthilh a har dawn khawp mai. 

"Ka theih pawh ka ring lo' a ti sap a. 

Nenei chuan, " Kha mihring khan a hralh daih aniang" a ti chang fak a.

Kan hawi phawk hrú..chutiang lam chuan rilru kan lo seng miah lo aniang. Ni e, An nuhrawn khan a chhuahpui miau si a. Amah lah a biak tlang theih bawk si loh. Nu Sangi chuan, "Hralh ta se, khawiah nge an kalpui tak ang..?awiii..ka nu, Atea phei chu a thaw a hah thin si a, engtin nge ka tel loin an awm tak ang?" Tiin a inhup vawng vawng a,a tap hlawp hlawp mai. Sawi tur a va vang tehlul em! 

"Naktukah Police te hnenah kan va kal leh ang a. Chanchin thar a awm mai ang. Tawngtai bak tihtheih kan nei rih lo a nih hi" Lukira'n a lo ti a. Nunzira nen chuan kan uan theih tehlul nen, sawi tur a bar kan hre lo a ni e. 

"Nu, va mu rawh..i chau lutuk ang.." Nenei chuan a ti a. Keini pawh chuan kan lo nawr ve bawk. Hreh tak chungin pindan lam a pan ta a. 

"Nene, nang pawh muthilh tum la a tha lo maw? Men reng ringawt chu" ka ti a.

Min rawn melh kiau a. "Ka muhil dawn chuang lo va..ka naute avang leh ka nu avangin" a ti sep a.

Lukira chuan, "Nene, kan meng ta sa sa, sawi nuam lo a ni tho ang a, mahse, I ni Zaii'n i nu a tawngkhum dan kha mak ka ti ee..englo, ih, i pa i hre lo mi?" A ti ta chawt a. A rilru a kap ngang a niang e. 

A heh a pet a, Nui hak chungin,"Umm, ka pa ka hre lo a ni. A chhan chu ka nu hi KS a ni thin a" a ti ta a. Ka ngaihbel nge kan thaw hawk hlawmin ka hria. 

A reh vawng vawng mai. Tluangtea pawh chuan sawi tur reng reng a hre tawh lo. Zawt fuh a inti lo nge a inthlahrun hmel ngawih ngawih mai. Mahse,Nenei chuan, "Nuam lo suh, U tluangte, inla hre dawn tho alawm. Ka nu chu a lar ve thin alawm..an hunlai chuan. Thil zawng zawng ka hre bik lo va, Ka nu min hrilh chin bak chu.." A ti dam thlap a..ka inrin hmain a kut ka va vuan chawt a, min rawn melh ralh a. Ka humsak a. Thawk la lehin, "Ka nu hi ka zahpui ngai lo va, ka dem ngai lo bawk. Khawvelah ka nu ka hmangaih ber bawk. A dinhmun angah khan ding ve ila, a kawng zawh ang kha ka zawh ve tho maithei a ni. " a ti leh a.

Zira chuan, "Pawi i tih loh chuan, Nene, i sawi vek thei a nia. Kan ngaithla thei" thutak zet hian a lo ti a. Nenei chuan a chil a lem khawlh a.

Kan lo ngaichang khiau mai …

Ka buai lutuk 🤗