Vanneihsangi - 2

VANNEIHSANGI (2)

Ziaktu: Toni Râlte

Inkhel kan en zawhah kan haw ta mai. Kan awmdan a a nuam lo laklawh tawh a, anmahni kan vengthawng ve bawk si. Hrehawm an ti ve ngawtin ka ring. Pu Mawia fa a nih ve loh phei chuan,Nenei chuan a va tuar nasa dawn em tihte ka ngaihtuah mai mai. Ka khawngaih ve khawp mai. A tukah ka tho tlai ber. Nimin khan ka nute chawhmeh min lo thawn kha ka theihnghilh daih a, vawiinah lam ngei ngei a ngai. Class kal tura kan chhuah rualin Nenei pawh a hna thar zawm ve turin a rawn kal ve a. Cotton kekawr dum leh crop top ofd white a ha a, sneakers man to lo tih hriat tak tlema hlui tawh lam a dum a bun bawk. A sam chu felfai takin a lai taka bari then lehin a tawn khawm vek a. Hmuh a nuam reuh khawp mai. Amah hi ka sawi thia danin a felfai, a simple bawk si .

"U Zir, min lo kalpui,keimah chuan ka zak ee" tiin Nunzira a sawm a. 

A han kalpui a, an han intifel thei aniang,amahin a rawn let leh a. Ka beng bulah, "I melh dan hi a dik lo tan tlat" a ti sur sur a.

"Kal teh, i ninawm" ka ti hluk. Bus a lo thleng a,kan lut ve leh dial. Taka..nizan kan hawn phei hnu khan Zampuii khan min rawn text ngial a. Chhan zawng ka chhang ve a ,mahse, ka tui vak lo a ni. Ka duhzawng a ni lo, hmeichhe cher lam ai chuan tlema chubby lam hian min hîp zawk mah. Tluangtea erawh a bialnu te an chum ngai lo, model pian ang zaih an ni zel. 

Bus atanga kan chhuk chiah chu, Chaltlang lam bus atang chuan Zampuii leh Msi te chu an rawn chhuk ve a. Min biak ka hlauh nak alaiin, "Lal Tp, min lo nghak r'u" Msi chuan a rawn ti ta a. Zampuii vel chu ka thiante ka la hrilh lo. 

Kan bul an lo thlen chuan Zampuii chu en loh hram hram ka tum. Mahse, "Nge nizan khan min mutsan daih a?!" a ti ta mai a. Nunzira lo meng káwk chu ka melh hrep ringawt. 

"Ka muhil thut zel a " ka ti ta ringawt. Kan department lam panin kan kal a. Msi chuan, "Lunch ei ho ang u aw. " a ti a. Tluangtea erawh an department lamah min pensan tawh a. 

"Nia" kan ti ve mai a. Zampuii a pen hnuah Zira chuan, "In inbe thin law?" a ti ta chat a.

"Be lo be lo" ka ti hmawk hmawk a. Class room kan lut zui a. Thil dang kan sawi ta a. Kan class-ah hian star ve deuh chu ka nei thin, Teteii a nia. Venghluiah an awm a, an hausak bakah amah hi mipa ngaihsak vak lo, a patil mawni tihtheih deuh tura nu zim zem ngai lo a nia. Mipa hlir a kawm thin bawk. A hmel erawh tha ka ti. Mahse, bem lam a lang lo. Ka thutna lam ka pan lai takin, Teteii ngei mai chuan, "Tpa hi nizan ka mumangah ka hmu mawle" a lo ti lang lang a. Ka va melh a, ka khi suk ringawt.

"Mangpuiah lehnghal" a la tizui! A tawng hre phak ho chu an nui hak a. Kei pawh a za ve deuh, "A va nuam awm bik" ka va ti a.

"A mak tehdaih e, ka vei tawp si lo che a, nge ka hmuh ve ringawt che le" a ti a. A frank mah mah hi hmeichhe thenkhat tlema inla no deuh chuan an zo lo fo reng a, a thusawi avang ringawt pawh chuan thenkhat chu an lo zak leh tawh. Mipa ho erawh chuan kan lawm phian zel a..

Chhunah chuan Msi chuan min nghak tlat sia, ZIra te nen Canteen lam kan pan a, Zampuii chu a lo thu ran tawh. Mipa leh hmeichhia kan inan lohna chu, kan duhzawng loh leh iai zawng tak pawh nimahse, a langah chuan tha takin kan be ve thei zel a, hmeichhia erawh hmelhmaiah zawng zawng nen intilang thin a, biak zui ngamawm loh khawpin in tih loh zawng ngei inpe na thin. Sim ve r'u..insual lutuk 🤣 

Zampuii bulah chuan ka thu a. Rice artui chhipchhun kan chah leh ta phawt. Kan canteen hi an siam tui loh bakah an che fel lo ka tia, hman chang chuan gate bul dawrah kan han chawl daih zel. 

Nunzira chuan, "Zampui, khawi vengah nge inawm khah?" a ti khawmawi a.

."Chaltlangah..lo la leng ru aw" a lo ti ve vat a. Kei erawh sawi tur ka hre leh ta vak lo. Msi sawi ang khan a bialpa treatin min treat deuh ringawt niin ka hria a. A nuam lo reuh riau.

Eng emaw ti tiin lunch chu kan tlingtla ve thei hram a. Kal dawnin Kan khaw lama ka thianpa bialnu Chhuani'n min lo call mial a. Remchang ka ti hle.

"Awii, tp,ka rilru hah lutuk hi at mai ka hlau. Enteh, Lalnunsanga hian sawn a lo thlak a nih chu! A hrilh tawh che em?" a rawn ti nghal bawrh bawrh a.

Mak ti deuhin ,"Hrilh nang, a va mak ve" ka ti ve vat a..Sanga'n engmah min hrilh lo chu mak ka ti ve deuh.

"A hrilh ngam lo che a nih chu..a tenawm em mai. Chuti chung chuan ka hmangaih che min la ti tho a nih chu..ka chhungte lah hian an la hre lo nge, nizanah pawh a la rawn leng a..engtia awm tur nge ka hre lo" a ti a. A rilru a hah hmel khawp mai. 

"Ka van hrethiam lo em..tu lakah nge sawn chu a thlak?" zawi sup hian ka ti a.

"Kan khuaa Hindi teacher-a lo awm ve, nula senior tawh lam kha i hria em? u Remi kha" a rawn tih chuan, U Remi, nula phanchang lam, hmel eraawh chhe vak lo chu ka mitthlaah a lo lang a. A va mak mai mai e aw. Sanga aiin kum 7 dawnin a upa ang chu..

"A va mak tehdaih ve..neih a tum lo mi?Sanga chuan" ka ti a.

"Tum chuang nang..nangmah lo chu ka nei lo ang. A remchang em a, aman a lo zir ve bawk sia, kan chesual ve mai a ni..a tia, ngaihdam min dil char char" a ti a.

"Chhuan, engpawhnise, hei class kan kal leh tawh dawn a..tlaiah Sanga chu ka lo be ve chhin ang aw..in inthen hi chu ka duh lo khawp mai, in inzui rei tawh si" ka ti a. Ani pawn hrethiam takin a dah ta a. Zampuii chu an departmentah a kal tawh a. Stepa kan chhoh lai chuan, Msi chuan, "I duat lo em mai. Ngaihsak ve ta che" a ti hlar a.

"Enteh, ka duh lo. Tha deuhin hrilh mai rawh. Ka type a ni lo alawm.." ka ti ta bawl a. Ner sak chungin class-ah a lut daih. 

Nunzira'n ,"Nia, duh suh. Perek a ang em mai" a rawn ti sup a. Kan han nui leh rih a..

Tlaiah chawhmeh chu kan lam haw a. Rambo polythen khat tân an lo thawn leh a, kan ei rei leh ngawt ang.U Zikpuii dawrah chuan kan peng a. Thingpui lawng kan in a. Nenei chuan min rawn pe a, A biang a tai tëk a, a nui sâng bawk. U ZIkpuii chuan, "Heii Nenei hi min lo hmuhsak a, a lawmawm, a mawng a zang si.." a lo ti bawrh bawrh a. Ka lo lawm ve ringawt. 

Chawhmeh chu a tam deuh bawk a, Nu Sangi te leh in hnuai te nupa kan pe then ve a. Fridge kan nei si lo va, dahthat reng theih a ni si lo va. In chungte erawh an nute khuaah tukin khan an zin a. Zira a thinrim, a chhan pawh an fridge-ah kan vawksa rep lei ve kha a han dah sia, a la leh hman tawh si lo. An zin chhung sa kan hmeh dawn lo tihna a nih chu ! A va ho e aw..

"Zanin chu i pawlte an inkhel dawn sia, sawtah mi kan en leh ang" Tluangtean a ti a.

"Ni mai zel a. A nuam ve lawm" ka lo ti a. Man.utd leh Tottenham an inkhel dawn tlat a! Ka Rotea ka hmu dawn miau a ni. Miss chi a ni lul lo mai. Dar 6 pelhah chaw chu kan ei a. Kan chaw lak hi a tha thei a nia. Thleng ka sil laiin, Nu Sangi'n Zira a rawn au lang lang a. "Lo leng leh r'u aw..bane ka chhum a, inkhelh en pahin inei dawn nia" a rawn ti a. A fel thin ngawt mai. 

Kan chhuah hmain Tluangtea chuan phone a hmang a, "Eng a?! Maw? Tak tak a mi?" a tih tak dawt dawtah chuan, kan ngaih a tha vak lo. Phone a dah rual chuan, "Alicia te an accident a nih chu! Ka kal nghal a ngai" tih leh inthak a rual nghal a.

Kan insiam ve nghal. "Kan lo kal ve ang, engtia accident nge?" ka ti a.

"An picnic haw lam truck nen an insu a, kawng thlangah a nawr liam a ni awm e. Amah Alicia chu a na pawl a nia..mi dang chu an tha a niang" a ti zung zung a. A hlauhthawn hmel khawp mai. Zira chu tukverhah dakin ,"Nu Sang, hei kan thiannuin accident a tawk tlat mai a. Kan kal a ngai..a serious riau a" a va ti lung lung a. 

" A va zia lo em..Nenei hi rawn kal ve rawh se, chanchin min lo hrih ve u la aw" a rawn ti a. A bengvar hle mai. A fanu a tir vat mai a nia. Mahse, Nenei chuan a duh ka ring chiah lo. 

Kawngka kan kalh laiin Nenei chu a rawn lang ve ta mai a. Mak ka lo ti deuh, "Anuin va kalpui ve rawh. Hetiangah chuan intawiawm tur a ni ngai a ti tlat a" a ti a, a inthlahrung zawk mah niin ka hria. Tluangtea chuan, "A lawmawm lutuk" a lo ti vat a. 

Kawngpui kan chhuak a, taxi kan chang a. Rei kan din hmain a rawn tlan ta hlauh a, Hospital lam panin kan tlan ta nghal a. Zira chuan Nenei bulah Alicia chu Tluangtea bialnu a nih thute a sawi mawlh mawlh a, Lukira pawn engmah a sawi lem lo. Alicia nauin Lukira chu a rawn call leh a, Speaker a on bawk a, a rawn tap pur mai. "U tluang, a u hi a thi dawn aniang, oxygen an pe mek a" a rawn ti a. Lukira chuan tih dan vak a hre si lo, "Kan lo thleng tep aw.." a ti ringawt a. A bialnu nikhaw hre lo va a han awm meuh chuan, Mi cool leh ze nghet reih rawih pawh a awmdan a danglam vek mai. Ka khawngaih hle, "Thianpa, Pathian zarah engmaha thleng lo vang" tiin a darah ka va vuan a. A bu nghut ringawt. 

Hoapital kan thlen chuan Alicia then leh rualte pawh an lo awm nual tawh a. Tluanga nen an chungchang hi an hre ve viau tawh a, Mak an ti lem lo. Tluangtea chuan Alicia nu bulah, "Khaw nge?" a va ti chawt a. Mittui hru chawt chawt chungin, "ICU-ah an nawr lut chiah a " a lo ti a. 

Tihtheih vak awm lo nen, kan thu ve reng ringawt. Tluangtea lah a vei sek a, a kut pahnih a lu chunga dahin a chang leh bathlarah te a va chhuak leh ngawt thin. An inzui rei ve tawh si a, a hrehawm khawp ang le. Keini lah mi han hnem thiam chi kan ni bawk si lo. Nunzira chuan coffee in a rawt a, kan chhuk ta dial a. Damdawiin kawtah chuan kan thu a. 

Nenei chuan, "U Tluangte, i rilru tur ka hrethiam tawp..mahse, inngaihtuah vak vak suh. Pathianin a tidam em em ang. " a ti sep sep a.

"Nia, mahse, rilru a hah ve duh em a ni" a lo ti a.

"Esi te pawh an lo thleng tep ang, ka va hrilh kha" Nunzira chuan a ti a.

A sawi mek laiin, "E!hetah law inawm?" Lalesi aw chuan a rawn ti lang lang a. Kan hawi phei vat. A thiannu Zari leh Rini te nen an ni. Zari a hmuh rual chuan Nenei chu a kun nghal daih a. Nuam lo a ti ngei ang. An rawn thu ve a, Zira'n Coffee a va lamsak ve a. 

Ka hlauh ang ngeiin Zari chuan, "Vanneihsangi bawk chu! I va tam reuh ee..in inhre ve mi?Alicia te nen" a ti ta chiah a. Rini chuan a lo kheuh zeuh tih ka hmu, mahse, a ngaipawimawh kher lo vang.

"Nia, Anuin han kalpui ve rawh a ti tlat sia" a ti sap a. 

"A tu ber hi nge i star deuh a, an zingah hian..tumah hi an single lo nia aw" tiin Zari chu a nui a, Rini chuan a ngei ve deuh nge, "I ho thei em mai a. A rawn kal ve duh ni mai lawm" a lo ti hmak a. 

Ka insum zo lo nge, "Dik chiah,i ball a mawl em mai" ka lo ti nghut a. Nenei lah a kun tlat bawk si, boruak an tirit zo. Esi erawh a ngawi tlat, a chhan chu mi thikthu chhia a nia. A bialpa bula hmeichhe dang kal ve chu a ngaithei lehpek lo vang.

Rei vak loah kan lut leh ta a. Alicia lah a la harh thei si lo. Rilru a buai hle mai. Lukira chuan, "Min hawnsan mai r'u, kei chu ka tlaivar ve loh chuan.." a ti tlat si a. Bakah naktukah kei phei chu test ka nei si. Ka la zir eih lo lehnghal. Va thut tlaivar ve ringawt kha tlawmngaih loh vang pawh ni loin a tuk lam zirna avangin hreh tak chungin kan hawnsan ta a. Esi te pawh an haw ve nghal dawn a. An kal tur Zira'n a va thlah chuan, "Saw nu bula ka hmu leh che a nih chuan engkim a tawp ang. Mi bialpa ngaihzawn ching a nih saw" a ti hlak hlak a. Zari'n a bula a lo sawi dan ani ngei ang. Zira thin a thawk ta nge ni, "Aw i thu thu..kan thenawm nula a nih saw..mihring thaw thei tawh phawt thika inthen i cho teivet hi ka hne ta e..TPa bialnu a nih saw" a ti ta hrep a. Nenei nen kan inmelh zawk! Lalnunzira mai mai chu aw..kan inngaizawng tawp si lo va.

Zari chuan nui rah rah chungin, "Ehem! Tpa chuh! Va che rang bik ve aw..nge a hmeichhia zawk a che leh tawh" a rawn ti kual a.

An zia hi ka ei thlawt lo.

"Ele! Keiman ka bem mawle" ka ti sak a. Nenei chu ka kuah hmiah. Ani pawh a chechang lo. Titau tih hriat zetin Esi chu a kal hmak a. Rini chuan, "Hrethiam rawh..Zira, ka lo hau ang" tiin Zira chu a dinchilh a. Ani hi chu ngaihzawng nei ngai lo, thiante rawn leh inbunruahna ber a ni thin. A upa ve deuh tawh bawk a.

"A ho em mai. A duh leh thinrim se la, inhmuh ve apianga tau reng ringawt, ka hne lutuk" Zira chuan a lo ti bawrh bawrh a. A awm ve tho chuan ka hria. Keini pawh taxi kan chang a, a váng riau mai si..

"Kein phei mai ang u. " Zira la lungawi lo chuan a ti a. Kan inzui ta thám thâm a. Temple kan thlen sawn dar 12 a ri thuak tawh. Temple pelh hnu thui vak loah min tawk zawngin mipa pathum an rawn kal a, an ruih hmel angreng. Ngawi rengin kan inpel fel mai dawn emaw tih laiin, "Ks pakhat chu pahnih tan chuan a va rim dawn ve" pakhat chuan a rawn ti khanglang a, tawng ka tum chuan, Nenei'n min rawn vuan vat a, ka ngawi leh. Pakhat lubuk zet, lian angreng tak hian, "Kan lo kawl ve lawk dawn mi!" a rawn ti leh a. Zira thinrim la kal tluang bawk si chuan, "Ngawi mai mai teh" a ti hmuk a.

"I pawr a law?" tih an rual nghal a. Kan intibuai ngei dawn tih ka hre nghal. Mahni tawka thazat lai, High school kan kal hnua insual tawh ngai lo kha min rawn tiphur riau mai. 

"Ve khanglang che u chuan.. " tih paha lubuka'n min rawn pan lai chuan a hmaah ka va ding ve chat a, "Thianpa,intihbuai hi kan duh lo a nia. Mahse,min nawr tlat chuan kan hreh lo" ka ti hmiah a. Min hnek tumin a kut a rawn vai nghal, a zei vak lo chu a lawmawm angreng. Thaah chuan ka hneh kherin ka ring lo. A lian angreng si a. Kan inpawmchilh titih ta mai a. Pakhatin Nunzira a rawn pan ve bawk. Nenei'n ,"Kalsan mai ang u..U Tri" a tih pawh chu ngaihsak hleihtheih a ni tawh lo. Lubuka chu ka chhoh dâwm ta nghek a, a khabe. a ri rup,.a hup vung vung a, a sirah pheiin a kun ta ngawih ngawih a, ka hnek fuh ve viau a niang e. Pakhat ka tiatpui vel chuan min rawn tlawh nghek a, ka lo inring hman si lo, ka let hawl a. Nunzira te pawh an la inbuan let thial thial mai. Thawm kan nei ring tehchiam miah lo. Nenei lah hmeichhia e ti lo chuan a sirah a lo ding a, a au bik miah lo. Min rawn thutchilh tur chu a nakah ka tlawh ve awrh a, a thu sawp ta niah a, ka tho vat. "Fair takin aw" ka ti nghut a. A rawn tho a, posi min lak khum nghal. Min rawn bawh tur chu ka petek zauh a, ka lo hnek thawi fua, a fuh chiah lo bawk a, engtinmah a awm lo. A ban a rawn vai luap a, ka lo mansak vat a, a kapa tlawh em chu ka hreh vangin a dulah ka khupin ka do ta chat a, a dul a melh mek laiin ka theihtawpa nain a bekah ka hnek ta a. A zal ta der mai. Insual hi ka thiam hran lo va, ka hrat ve thin em a. Hneh loh nei mah ila, rilruin a ngam sarh hi chuan a tawpah kan dingchang ve leh nge nge thin. Nunzira pawn a tumpuipa chu a lo thal hneh kher mai. A pet zui tawk lehnghal. Mi tawng thawm kan hriat vangin rang takin kan insaseng ta a. Thinphu a rang duh hle..

"Awii, inhneh loh kha ka hlau lutuk a..thingfak ka zawng a, a vang sia" Thaw hlawp hlawpin Nenei chuan a ti a. Ka nuih ringawt. Nula derthawng tak chu a nih loh hmel tlat. In kan thlen chuan dar 1 rik nan 20 mins chiah a awm tawh. Nenei pawh an in lam a pan nghal a. Lawmthute chu kan han hrilh ve kha maw..kan insual a taláng nen rilruah eng dangmah a lut thei lo. 

Nunzira lah chuan, "Ka khawih pa kha a thi ang le..a che tawh miah lo a " a ti sek a. Min tihlauthawng leh hnuhnawh. Ani thinur inkhawl khawm si khan chintawk hre lek loin a lo khawih hrep chu niin. Eng em an ti lo vang chu maw..an rui bawk nen, min umzui ngam ka ring chiah lo. Nenei lahin engkim a hre ve bawk si.

Ka tho rit lûk mai. Chaw pawh tihtham kan ei lo. Lukira chanchin kan va zawt a. "ICU atangin tukin zingah an nawr chhuak e..a zia dawn a niang" a rawn ti a. Thla a muang ta deuh. Class chu phur fahran lo chuan kan kal ve leh ta poh chu a nia. Test lai ten ka lo muthlu vel..ka inziak pass pawn ka ring lo e a. Zampuii chu Msi'n a hrilh chiang tawh nge, min hnaih ta lo khawp mai. A tha zawk. A hma anga a awm ang apiang fawma, a tawpa tihnat leh ringawt kha ka duh tawh bik lo. Ka hmalam hun atan pawh a tha lo vang.

Gate bul dawrah kan han chawl daih a. 

"Esi nen chuan inla titau mi?" ka ti satliah a.

"Umm, kan la inbe lo. Ka be hmasa awm lo e" a ti hmuk a.

"Zari khan Nenei kha tikhan a sawi ve ziah a..i awih em?" ka ti a.

"Ka hre bik lo le..a sawi chiang thei sia, dawt ringawt te chu a sawi bik dawn mawni ka ti" a ti a. Paratha hlai hlep chu a hrual a.

"Nia, a tak tak a nih chuan a inhmeh lo ee " ka ti a.

"Nenei hi i duh ve deuh tanin ka hre tlat" a ti ta thut a.

"Hnapa..ngawi mai mai teh..teteii hi chhe lo ka la ti reng, ka bem tawp dawn mawni" ka ti daih a. Teteii ka star tih hi chu a hre hnehsawh tawh.

"A patil em mai a." a ti hmuk a. Ani hi chuan nu lam pang a duh thin. 

"Alicia chu dam vat se, Lukira mood chhia ka tuar peih lo" ka ti a.

"Dik chiah..ngawi leh reng ang a.." a lo ti ve a. Department lam kan pan mek laiin Sanga'n min lo call ve leh. Nimin tlai khan ka call theihnghilh daih a, bakah zanah lah kan buai leh ta bawk si nen.

"Aw sang" ka ti a.

"Chhuani'n eng nge a hrilh che? U remi vel a sawi em?" a rawn ti nghal a.

."Sawi e mawle..thianpa,i ti ang lo em mai. Ti nge i lo verh ve reng reng a?" ka ti hlut a. 

"Aaa..i hre lo a nih kha..u Remi zei zia chu e..min zar ve bawk sia, a lo remchang sia. A rai ka ring miah lo asin le..engtin nge ka tih ang? Zaninah sawn man an lo thing dawn" a rawn ti ta a.

"Nei mai la" ka tih rual chuan, "Ka duh lo" a ti hlur bawk si.

"I pa te bulah tha deuhin sawi la, Chhuani pawh ngaihdam dil nasa rawh. Zin bo daih rih la" ka ti ta a.

"Chi viau ang. Ka putea'n an in an sa dawn a, min rawn chah reng lehnghal..a lawmawm e..hei Chhuani'n min lo call, nih aw phawt" a ti zung zung a. Mipa hi chu kan awlsam thin teh e..Mahse, kei chu ka pa hian thurolum a nei ve a, "Eng hmeichhia pawh nise, mi ang lo pawh nise infa a pai a niha neih che u an duh a nih chuan innei ngei tur a ni..fate tihfahrah ka remti lo" a ti hmiah mai. A fate zingah kei hi ka nghal fal a, ka nau chiah hi hmeichhia niin, a te pahnih erawh mipa ve ve an ni thung a. Pakhat hian Class Xii a rawn pass ve tawh a, ani hi kan unaua hmeltha ber a nia, amah aia upa fe nen an inngaizawng ve a, ka nu hian a zilh nasa thei khawp mai. Sawn hi chu thlak loh hram ka duh..hehe..

In kan thlen chuan Lukira a lo awm tawh a. A lo inbual zo chiah. A hmel pawh hmuh a nuam ta deuh e. 

"Ward-ah an dah tawh a. A zia khawp mai. A nauin a awmpui dawn a" a ti a. Kan thaw ve huai mai. Chaw ei hmain Nu Sangi'n Alu bai sial zet min rawn suah a, kan in chu a en kual a, mipa chenna tih takah a kawrawngin, a felfai em em lo a. A nuih a zat hmel hle. 

"Nakinah inchawlh hunah Nenei hoin intifel dawn nia. Ani a tifai thiam alawm.." a ti a. He nu hi a va felin a va bengvar tak e aw..kan pindante chu hmu phei se a rakchhe nasa ngawt ang. Khum chu pathum a inhung ve ngei a, mahse, bed sheet te chu hmeichhia angin kan pawt mar thiam ve tawh si lo va, thwmhnaw lah kan bang hnep hnup bawk. Kan awm ve tawp a ni ber..chhuat erawh a bal ngai bik lo. Lukira hian a nawt peih bawk a. 

Nizan lam ka mu tha lo nen ,len lam pawh a lang lo. Zira erawh a va leng hram a. Nenei nen min hmehbel a tum tlat hi ka duh lo, hetia han len loh bik hi ka duh ve hrim hrim. Lukira erawh Assignment a ziak thung. 

"Lo phei ve la..Nenei hi a ngui riauin ka hria" Zirdula msg mai mai chu.

"Tihlim rawh" ka va ti a. Mahse, ka mitthlaah Nenei nui sak biangsum khuar kalh kha a rawn lang zawk..ka len ve loh vangin ngui tak tak se engtiangin nge ka dawnsawn ang ka hrethiam chiah lo. 

"Tp, kha nu nen khan in ni tak tak mi?" Esi a ni.

"Ni mai mai lo. Zira uang a nih kha" ka va ti a. Mahse, chutia Nenei duh lo deuh anga ka lang chu nuam tih lohna riau ka nei ..a mak khawp mai.

"Awii, nihpui suh. Lalzari'n a hrechiang lutuk, a thiannu bialpa a lo ngaizawng ve a, kha pa lah kha a lo lerh ve bawk nen. A kawp ta a, Zari thiannu chuan a hrechhuak a, A thawhna dawrah an va kal chilh a, an hau hrep a. An inthen chauh alawm..ngawi chawi awm tak si khan a nasa ru phian a nia aw" ka chhiar nawn..

"A ho em mai..Zari thiannu bialpa chu a dik lo a nih chu, ngati nge a kawp?" ka ti ve ngat a.

"Aw..mipa a nia..mipa te chu.." a rawn tih chuan, "Nih Nunzira hian kawp che se tu nge i dem zawk ang?" ka ti leh a.

"Ka bialpa a ni tih hrereng chungin tu emawin lo nihpui se ,chu nu chu ka hnuk hrep ang. Nunzira pawh ka dem tho ang" a rawn tih chuan…

"Hei hi alawm hmeichhiain inngaihtuah chian loh leh intihfuh loh fo chu..Nupaah pawh pasalin a nupui bialnu dang a neihsan hian a bialnu zawk indem rawn vak a, Mi pasal lerh chuan, 'Mipa a nia. Chuti khati' intihsak leh daih a..mipa ho tan kawng insialsak a ni ringawt. Ngaihzawng emaw nupui pasal nei reng chunga mi dang ngaizawnga kawp duh kha a thiam lo bur tawh, Mipa kan nih vang emaw engvang mahin kan kawppuite phatsan theihna dan kan nei bik lo..hei hi in âtna. ania. Kan mipatpui rinawm lo kan dem ve dawn pawn inlo tanin an thlavang inlo hauh zawk zel a..inhmeichhiatpui indem rawn hrep zawk zel a..chance insiamsak zel a, an tam telh telh reng hi..rinawm lo" ka va ti ta duah a..ka type thui ber a la ni maithei a ni.

"Awii, teh duah a che..i va tan awm em em ve..Nenei chu..mi bialpa lo melh tai ching chu" a rawn ti leh kher a.

"Ka tan pawh a ni lo, ka rawn sawi ve mai mai..ka'n mu tawh ang e, inpa lah chuan Nenei min rimsan daih si" ka va ti ve leh kher a..ka dah daih! A sa ngawt ang. 

Ka rin ang ngeiin a tukah Zira chuan, min chhuahchhal nghal. Ka nui ringawt. 

"Nei nghal rawh..kha nu kha ..i duh anih kha ...te a rawn ti mawle..haha..engpawhnise, min be duh miah lo khan min lo biak leh phah a.A tha ve reng reng e" a ti a. A thinrim lem lo tih a lang..

"Ka zilh hrep kha" ka ti a. 

Lukira'n ,"Kei pawn ka zilh tawh..esi awmdan em em hi chu tlem chuan siam that a ngai" a lo ti ve bawk. 

Inrinni a ni bawk a. Awm nilen leh games khelh a ni mai. Bazarna tur pawisa kan nei tawh lo. Nunzira chu Esi te ina leng turin a chhuak a, Lulira erawh Alicia kan turin. Va lan ve pawh ka duh nen, "Ngai lo, A nu ten vawiin chu lo awmpui rawh an tia..i hnawk mai mai" min ti tlat! Single chu ina awm a ni deuh tlawng mai. 

An chhuah hnuah thutthlenga ka mu zal tur chu tukverh atangin Nenei hmun phiat mek chu ka va hmu a. "Nene , ti nge vawiin?" ka va ti a.

"E..ih, U Zikpuii thiannu pa a boral a, a kal ve dawn a, kan inkhar a" a lo ti var a.

"Lo leng la" ka tih rualin ka inchhir nghal a, min chhan hmain, "Ka lo leng dawn aw" ka ti a. 

"Umm, bal kan chhum dawn nia" a rawn tia. In te tifel phawt se tiin ka nghak a. Kei pawh insangmar lehin ka pheikhawk pahnih ka va su tuih tuih a. Thawmhnaw lam hi chu a to lo bawk a, Thiangi kan suktir thin, tikhan suk man kan pe ve thin a. A remchang phian. Ka insuk zawhah Nenei te in lamah chuan ka va kal ta a.

A lo che zo thawkhat tawh a. An reh diak chu mak ka ti deuh a.

"Khaw nge mi dang?" ka ti a.

"Apuia te chu anî te an lo zin a, an phei a. Anu chuan Gaby a entir a " a lo ti fel ât .

"Ti nge Gaby chu a tha leh vak na nge?" ka ti vat a.

"Umm, nizan mut tawh hnuah a luak vak a" a ti a.

Sawi tur ka ván leh tawh. Ka ning a..

"Nizanah ti nge i lo kal ve loh?" a rawn ti ta hlauh a.

"Ka chau ve deuh a, zan hmasa kha kan mengrei ve sia" ka ti vat a.

"Nia, in insual nasa bawk sia , e tak! Kha lubuk deuh khan niminah kan dawrah a lo chawl asin..min melh run run a, min hria mawni ka tia, mahse, hre lo awm deuhin ka awm tlat a, engmah a sawi lo" a ti mawlh mawlh a.

"I hlau chiang " ka lo ti a.

"Hlau ve tho e, a lian bawk sia, mahse, a nep ee..a zei lo si" a tih chuan kan nui hawk hawk a.

Thutak deuh zawkin, "Ih, Nene, zawh duh che ka nei a" ka ti a. A thu tha vat a, "Eng" a ti sap a.

"Sawi nuam a ni lo maithei a. Zari thiannu bialpa kha i ngaizawng tak tak mi? Engmah kha i sawi ve ngai si lo va" ka ti ta bawrh a. Mipa zawh chi pawh ni lo mah se; min kap tlat a tin ni. Esi te lahin an rawn sawi sek bawk si. Ka tan tak pawh a nuam lo. 

A aw a thian kharh a. 

"I ring em?" a ti sap a. Min rawn melh kiau bawk.

"Ka hrethiam lo" ka ti ringawt a.

"Thudik chu Pathianin a hria alawm. Chuan, U Malawmi, Bawngkawna ka thawhna thin pawh sawn a hre bawk ang. Ani kha chuan min tan lutuk. Mahse, an rapthlak lutuk a, keimah pawh khan U Johny kha ka ngaizawng ve tak tak emaw ka ti hial alawm" a ti ta a. 

"Chuan" ka ti vat.

"U Johny kha U Malawmi nau U Mapuia nen an inkawm ve thin a. Dawra an rawn kal atangin kei pawh min hria a. Chuan, min lo duh ve ringawt alawm. Nitin deuhthaw a rawn kal thin a, mahse, ka duh ve lo, a chapo bakah U Malawmi'n ,'Bialnu a neih reng bakah ruihtheihthil a duh si, fimkhur rawh" min tia. Ka be tha vak ngai lo ...whatsappah te hian min rawn be reng zel a..tikhan U Zari te kha an rawn kal a,min hau hrep ringawt a ni. Ka zak ania aw..customer awm lai a ni sia. U malawmi'n a hnawtchhuak a. Ka tap tawp alawm..ka zak lutuk kha" a ti ta mial mial a. A mitmeng atangin dawt a sawi ka ring hauh lo mai. 

"Nia, An sawi huai sia ka ti mai mai..engahmah ngai suh. Johny chu a tenawm em a nih chu" ka ti a.

"Thingpui ka va lum ang e" tih leh thawh a rual a, eng nge ka hriat ka hre lo, ka pawt thu leh vat a, makti zeta min rawn melhin, "Nge?" a ti nghat a. A mitmeng fiah kelkawl chu zahawm ka tih em vangin, "Aaa. Engmah" ka ti ringawt. Ka va lai em..! 

Kawngka chu an rawn kik a. A va hawng a, a tawlh hnung dawrh. A hmui a hup bawk. Kei pawn ka va thlek ve vat a. 

Pu Mawia bawk kha a lo ni. Mahse, hmeichhe pakhat a awm ve..

An rawn lut a, Hmeichhia chuan, "Khaw nge i nu?" vin zet hian a ti a. Pu Mawia pawh chu rui vak hmel a pu lo.

"Gaby a entir" a lo ti ve mai a.

"Call nghal rawh. Rawn haw nghal rawh se" a ti ram hmak a. 

Pu Mawia chuan min rawn melh ráng ngang mai. Mahse, engahmah ka ngai duh bik lo.

"Ka call lo vang" Nenei chuan a ti ve tlat! Hmeichhia chuan, "I va zak lo ve..i nu khan a fate chawm nan u Mawia hlawh a lo beisei ngam a, Vawiinah kan han kal a, Engvangin chutiangte chu a lo beisei ve ngam? Zak thei lo nufa lutuk em mai. An inthen tawh a, engmah chan leh beisei tur an nei ve tawh lo aw"... Tiin Nenei chu a melh ling hlar a. 

Ka awm ve vang nge ka hre lo va, Nenei chu a zam bik tlat lo.

" Engvangin nge a beisei ngam loh ang ? A fate alawm an nih? Pu Mawia fate an nia, a fate chawmna tur chu a pe ve ang chu" a ti ve ta piap piap a. 

Pu Mawia a ding zawt, "Vanneihsang, Pu Mawia te min tia law? I va chaltlai sawt ta ve a" tih leh kut lek a rual leh a, mahse, hmeichhia chuan a lo dang a. Kei pawh ka kang uk hman. 

"Ka pa i ni hleinem. Ka nu pasal i nih vang chauhin ka pa tiin ka ko che..in inthen tawha ka pa ka tih reng nachhan tur che a awm lo. Min tihretheihzia ngaihtuah phei chuan" Nenei aw chu a khur dat dat mai. A thinrim hle a niang.

Pu Mawia tawng ngaihna hre tawh lo chuan, keimah chu min rawn melhin.."He pa hi i lo awmpui vel a maw? I nu ka hrilh khawp ang. Mipa i tawmpui ngam tawh a nia" a ti ta ringawt a. Ka nuih a za lek lek zawk mai. Nenei tak pawh a nui deuh. 

"I nu chu a rawn hawn veleh lo sawi la, a dilna kha han lalet rawh se, a hlawh tlem nak alaia cut vel kha ka duh hauh lo a nia..i hria em?" Hmeichhia chuan rum elkhena tiin Pu Mawia chu a kai a, chhuahpui a tum a..

"Ni e, i nu nawhchizuar kha lo hrilh ang che..nang pawh hi i nu siar i nu siar..tenawm nufa innih hi..ka hlawh hi rawn beisei ve tawh suh u" Pu Mawia chuan a ti sawk sawk a. Nenei chuan a chhang tawh lo. Rilru nat hmel zetin a ding khawng lah ringawt. An chhuah hnu chuan, "Nene,..i tha em? " tiin a kutah ka va chelh a. Min rawn melh ralh a..a mittui a tling pam mai.

"Khawi hmunah pawh min tihbuai hi an sim dawn lo a nih hi" a ti sep a.

"Ho lutuk, an rawn kal ngam tawh lo ang. Min lo ko zel tawh dawn nia..hawh ,bal chu chhum ang" tiin choka lam ka panpui ta ringawt. Dawhkana bal kan siam lai chuan, "U Tri, ka lawm e aw" a ti zawi sap a.

"Engmah ka tih loh kha" ka lo ti a.

"I ti alawm..awm lo la chuan chhan pawh ka chhang ngam leh lo vang" a ti a.

"I pa te chu ka khawih ngam bik nang" nui chungin ka ti a.

"Tu emaw hian hnehsawh zetin kan hmuh lai reng hian sawisa hrep se ka ti thin" a ti ta mai a. Chuti taka a pahrawn a hua chu a tuar nasa hle a ni tih a tilang mai. Ka lainat khawp mai.

"Tunah chuan inhim tawh alawm" ka ti a.

"Ka nu hi awm lo se chuan, ka tlanbo daih tawh ang. Ka nu vang chauhin ka tuar thin" a ti a.

Sawi zawm vak dan ka hre lo.

Mahse, "I pa dik tak a dam tawh lo mi?" ka ti ta tawp a.

A chil a lem khawlh a. A mittui a hnám sawk bawk..

"Pa ka nei hleinem" a ti zawi raih a. Makti zetin ka melh káwk..

"Ka chanchin chu ka nu chauhin a hrilh thei ang che..chuvang alawm ka nu hi ka kalsan theih loh..ka hmangaih em a ni.." a ti a..a inhnit faih bawk..

"Tawng inva hre thei lo ve..Khai! Nene, i tap elo?" Nu Sangi aw kan hriat rual chuan kan hawi rual thawt..

(Vawikhata sei deuh hi a mi ngei a na thin 🤣🥱