Vanneihsangi (1)

VANNEIHSANGI .. (1)

Ziaktu: Toni Râlte

(Thawnthu thar kan hmu leh dawn a, adds kha khawngaihin min lo click sak leh hram hram u la, inclick khan 10 sec vel innghak ve hram dawn nia..inpuitawn zel ang aw 😍

Kawngka ka hawng a, ka lut chiah tihin, "Lulian, dal ka chah theihnghilh daih che. Dal dal deuh hmeh phawt mai ang u. Vawiin tlai chu" Nunzira chuan a lo ti nghal lung lung a. Tluangtea inbual zo a rawn chhuak ve chiah bawk. Ka thil lei ho chu dawhkanah dahin ka remfel nghal zung zung a. Vawksa rep chu lekin,"Siam nghal ila" ka ti a.

Zira chuan,"Tul lo, a uiawm..sunday chawhmehah kha chu, khawi in chungte fridge-ah ka han dah nghal ang e" tih leh min chhuh a rual nghal a. Engmah ka sawi zui tawh lem lo.

Laltanpuia ka ni a, Aizawlah hian kum 2 chu tihian kan thian hoin in kan in luah tawm a. Mzu-ah MA (pol.sc) ka zir ve mek a, College kal lai khan ka pute inah ka awm thin a, Mahse, in an sak tak vangin kei lah lehkha zir nasat a ngai ve bawk si nen, tihian ka thiante pahnih nen Tuikualah in kan luah ve ta rawih a. Nunziria hian MA (Hist) zirin, Vanneihtluanga, Tluangte tia kan koh hian M.com a zir thung. University hostel kan chang si lo va, College atanga inkawm chho ngar ngar, Aizawl khua ni hlawm ta bawk si lo chu sawihoin in kan inluah tawm ta tawp mai a ni. Kan in luah hi kawngpui atangin a hla lutuk lo va, Tluangtea nuteii pasalte in hnuai a ni nghe nghe. Pathum awmna atan chuan a zau mah mah zawk a, bungrua kan nei lo angreng si, thawl hek hawk tak kan ni. Nunzira leh Tluangtea te hi kei aiin kum khatin an upa a, naupangber mah ni ila, inthliarna kan nei lem lo. Ka lian ber thung a, ka naupanna leh ka puitlin tawk lohna erawh a lang zauh zauh. Ka mizia hi harhvang tih dawna za zek zek ni si lo, thian kawmte azira phur hluaia ngui rawih thin mi ka ni a. Fiamthu ka duh vein a uante pawh ka uang nasa ve thin, Thianzahoa an kah rawn pawl ka ni fo a, ka zak ngai lem lo. Kan unau zinga a upa ber ka nih vangin ka nu leh pate min beiseina a sang lo thei lo va, ka inngaihtuah nasat chang chuan ka rilru a hah thin. Ka nun a ho ve angreng sia. 

Nunzira hi kan mizia a inang deuh a, kan pahnih hian videoa coverin hla te hi uang deuh deuha sak kan ching thin. Tluangtea erawh kan zia aiin a dang deuh, a cool reih a, han uan ve chang nei mah se, a ze zawi raih avang chuan pal ngam loh chin pawh kan nei ve fo. A zahawm ka ti mai. Tin, upa chan a chang thiam a, eng emaw buainaah pawh a zaizaptu ber a ni châwk..mahse, inla fela intimitak chi erawh a ni hauh lo thung.

Tluangtea nen hian kan sam a kir ve ve a, Lukir tiin thian tam zawkte chuan min ko thin. Mahse, Kan eih rual lauh lauh zel avang hian, Nunzira hian 'Lulian' tiin min ko a, Luliana ka ni ta zel mai. Tluangtea erawh Lukira a nih zawm zel thung. Kan in luah hi thla khata 1500 man lek a nia, a remchang phian, Rs.500 theuh kan thawh mai zel a, Mess fees atan 500 theuh bawk kan thawhkhawm leh a. Tlangval chaw heh rual leh thaza rual lek pathumin thla khata ei leh in mana 1500 lek han rin chu thla tawp lamah hi chuan kan ro vawng vawng tawh zel. Zep nâk emaw chhungkaw hausa leh awmthei atanga chhuak kan ni lo vek bawk nen. Nitin class kal ngai, thawmthaw leh eng ilo mamawh ve bawk si, pocket money neih loh lutuk nuam bawk si lo chuan ei leh inah min inhrëktir lo thei lo a ni. Kei hi kan inah pawh eirawngbawl ngai lem lo, Sa erawh ka peih changa siam thin ka ni a, Hetah chuan Sa kan hmeh dawn chuan ka siam ziah. A dang bai leh kan vel chu Nunzira'n a siam a. Lukira erawh in chhung chet a kutah kan dah thung. Kei chu sa kan hmeh loh niah chuan tui khai leh bazar a ni deuh mai. Inphutna kan nei em em lo va, kan intir bawrh bawrh zel bawk a. Hmeichhe ho buaina ang kha kan nei ve vak lo. 

Nunzira chuan alu kan pahin phone a be mawlh mawlh a. "Aw..a bulah pawh ka sawi reng a, a awih duh tlat lo a nih kha. A â em alawm ..khatiangte lo thik" a ti hluk hluk a. A bialnu Esi thiannu Lalrini nen an inbia tih ka hre mai. Esi nen hian kum 1 an inzui ve tawh a, duh pawh an induh viau. Esi hi a thikthu a chhe bonra a, an buai leh zeuh thin. Kan Nunzira lah hmeichhe hoin an kawm duh chi, fiamthu duh tak a ni si a. An inhau zing thei viau. 

"Esi chuan tu nge a thik leh a?" a biak zawh chuan ka ti a.

"Bsi kha mawle..thing tak tak. Ka ning tep zel, LalEsi awmdan hi chu" a ti leh hmuk hmuk a. Lukira inthlak zo lo chhuak chuan,"Nang pawh i mak ve lawm. A thikthu chhiatzia i hre reng a, hmeichhe dang bulah i awm ve zel anih kha" a lo ti a. 

Nunzira a chek hluk ringawt. Lukira pawh hian bialnu a nei a, Alicia a nia. An ni hi chu an zia a inang deuh a, an inhau ve vak ngai lo. Mahse, an tihtauh hian kar khat te an inbe lo tawp thung. Thian inkawmho vek kan ni a, Esi leh Alicia pawh an inkawmngeih tho. Kei erawh ka single lai tak a ni a. Ka vanduai ti mai ila, Class xii ka pass tirha ka bialnu nen khan college ka kal chhung zawng tihtheih deuhthaw khan kan inngaizawng a. A hming chu Mapuii a ni. Han hleiin harhvang viau mah ila, Ngaihzawng nghet ka neih vawikhatna a nih bawk avangin ka rinawm ve viau. Mahse, ka college kum hnihna vel atang khan khawpui nun ka zo bik lo nge zu han ruiha han teikual te kha ka ching chho a, Mapuii lah kei aia upa, ka thatna duh em emtu a ni bawk nen, min zilh awl lo va, ani duhdan chuan college ka chhuah ruala inneih a duh a ni. Mahse, kei lah thalai thisen lum tan mek chauh ka ni ve a, nupui neih nghal ngawt kha ka chhungte lakah pawh inthlahrunawm ka ti ve si. Tikhan kan buai chho zel a, Mapuii chu ka ruih lungpuam laiin ka then ta a. Kei pawn bialnu dang ka nei ve zat. A tuar na em em a, tun hnu hian hrehawm ka ti thin. Tikhan a khawhar leh ka laka beidawng khan bialpa a lo nei ve ta a, vawiin thlengin kan inthen ta chu a nia. Tin, nikum kum tawpah khan Mapuii leh a bialpa chu an innei ta bawk. Mi dang ta a han nih chiah khan ka rin aiin ka tuar na a, thiante leh chhungte lakah pawh ka inthup zo meuh lo chu a ni. Ka rilru na beidawng leh khawhar khan hmeichhe chi hrang hrang be chhoin, tu amah chu ka kawp nghet thei chuang lem hlei lo va , hmeichhia ka tina tam lekfang a ni. Chuvang chuan tunah chuan insiamthat tumin ka single ta rih a. Biak erawh ka ngah tho mai.

A tuk Holiday a ni bawk a. Kan mengrei leh hle. Games khelin kei pawh dar 2 thleng ka meng. Zingah dar 9 bawrah ka tho a, chaw chhuangin chawhmeh ka tilum nghal a. Anni pawh an rawn tho ve a. Phak chuapa tukthuan kan kil lai chuan, Inneitunu a rawn chhuk a. 

"Vawiin engmah inti lo vang tiraw?" a ti a. Nu lianpui, nelawm zet mai a ni.

Lukira chuan,"Ti lo vang, ti nge a?" a lo ti vat a.

"Hei inthenawm hi an rawn luahlut dawn a. Bungrua vel lo thiarpui ve ula ka ti mai mai. Sawma te an awm bawk si lo" a ti a. Kan tukverh atangin thenawm in ruak chu chiang takin a lang thei a. Kan in luahna te in tho hi a nia. An in luahna manah ringawt pawh hian sum chu an hailut nualin ka ring. 

"Nia, kan lo pui dawn nia" Nunzira chuan a lo ti a.

A chho leh nghal. Kan in luahna te chhungkua hi an pi tar tawh tak bakah, an nupa leh an fapa te pahnih an ni deuh tlawng a. An fanu hi kum 3 zet phaiah a awm tawh a. A rawn haw ngai loh vangin kan la hmu lo. Awmpui an nei a, Thiangi a nia. Nunzira hi a ngaizawng deuh a,chawhmeh min rawn suah zing thei viau. A zia phian mai. 

Thleng sil hi chu ka pual ania. Ka sil zawhah kuhva eiin zial ka pak talh talh a. Dam man hi a va awm hliah hliah thin tak. Dar 11 velah thenawmte in luah tur te chu an rawn thleng a. Nu Saii'n min lo auh vangin kan chhuak dial a. Bungrua chu kan han thiarpui ve a. An in luh dawn chuan kan in luah hi kal tlang a ngai a, kan in luah hnuai atanga peng lehin stepah an chho a, chuan in a ni nghal mai. 

"Nu,khawi kha chu a rit em mai ,ka lo khai ang" Hmeichhe aw tliang mawi zet ka hriat chuan aw lo chhuahna lam chu ka hawi vat a. Ka piah sir veilamah chuan Tleirawl ti ila, nulaa chhiar theih chu a ni tawh reng mai. Sam dum hlap, a lai taka bari then , hmelhmai fai leh ngo ve tawk tak, hmai hlai lam deuh hian a bula a nu ni ngei tur chu a lo dinchilh ran a. A sang lem lo, 5'2 ft vel bawr a ni maithei. Cher lam aiin a ria chum bat a, a hnute leh a mawngbawr chu a lian tha reuh hle. Kekawr dum loose hek hawk a ha a, tshirt sakhi rawng a ha bawk. Chapal a bun leh tawp a. Mahse, a inhmeh viau. Chuti taka ka lo thlir ngun chu Nunzira'n min rawn nghawk sawk a. "Lerha" a ti sup. Ka nui hawk a. Ka chelh mek parcel chu ka pu a, an in lam chu ka panpui ta a. An in chu kan in tiat vel a ni maithei. Bungrua erawh kei ni ngawt ai chuan an ngah. Vawi thum kan vei hnuah kan thiar zo titih a. Khum leh thutthleng erawh kan zawn a. In chhung an rawn luh takah chuan, Nu ber bakah kha nula tih loh mipa naupang pahnih inang zet zet leh hmeichhe naupang kum 3 bawr vel tur an ni. Pa ber ka hmu lo. An chhangchhe viau mai. Nu ber chuan,"Kan va lawm tak em..intlangval hle mai. Min thiarsaktu an awm awm si lo va,tiin ka lo lungngai lutuk a. " a ti siam siam a. Nula erawh parcel thenkhat chu a hung rem a, Lukira chuan,"Aa, a ho lutuk. Inthenawm tur kan nia. Saw lai saw kan luah ve a" tiin tukverh atang chuan a kawk a. 

"Rem fel ila.. A hnawkhnai em mai" Nunzira'n a ti a, kan che lehnghal. An bungraw lian tham deuh kan rem thatsak leh vek a. Naupangte lah chu an hlei ve bawk si. Kan ri nuai nuai mai. Chawhnu lamah chuan a zualpui chu an inrem zo ve thei ta a. 

Nu ber chuan,"Kei hi Sangi ka nia..nu Sang min ti mai r'u, chuan Hei ka fanu upa ber hi Vanneihsangi a nia. A naute koh dan ang hian mi hian an ko ta vek a. Nene an ti thin a, chuan hei phir te hi hei zawk hi Apuia a nia, a nau zawk hi Atea a ni bawk a, kan te ber kan model hi Gaby a nih hi..nangni inhmingte min hrilh ve ula"a ti bawrh bawrh a. A nelawmin, kum 45-48 bawr vel a ni maithei. Vanneihsangi chuan a chhun hle tih a hriat bawk. Nu hmeltha tak a ni. Keini pawh chu kan thiampuipa Nunzira'n introduction a han pe zar zar a. Ka hming a sawi lai taka Nenei'n min lo melh chuan ka lai ve ringawt! Hmm..a lerhthlak em mai a. 

Tihtur em em a awm tawh lo bawk a , Nu Sangi chuan,"Thingpui in rawh u han ti dawn ila, kan la hnawkhnai si. Zanah lo leng ru aw" tiin kan kal tur min thlah a. Vanneihsangi chu vawikhatmah a tawng lo. A zak a ni mahna. 

In kan thlen chuan, "A chhiat loh reuh kha" Zirdula chuan a ti leh sur sur a. He pa tak hi chu a..

"Nia , chhe vak lo. Mahse, a pian kha a lerh hmel ka ti" ka lo ti daih a. Nia, a lian vak si lo va, a hnute leh a mawng a lian si, ka ngai lerh deuh tlat. Hetiang pian nei ka hriat ho hi an lerh tlangpui bawk nen. 

Eirawng kan bawl zui a. Ka nuin min lo call a, "Naktukah chawhmeh kan rawn thawn ang, counterah lo lam mai rawh aw" a rawn tih chuan ka lawm hle. Pathian zarah ka nu leh pa te hi an hrisel ve a, leipui hi kumtin kan nei thin a. Ka nute kut a hmui ve bawk a, hralh chhuah tham thlai hi kan thar ziah a ni. Kan chhungkuaah sawrkar hnathawk kan awm lo naa, ka pa taimak leh thawhrim vangin nikum kumtir khan in pawh tha tak kan sa ve tawh a. Thiante hruai nan pawha zahpuiawm lo tak a ni ve a ni.

Artui a kan lai takin Thiangi a rawn lang leh a, "Azir, mautuai rep ka bai a, ei ve ru" a rawn ti lang lang a. Nunzira hian a ning ru thin naa, a zarah chawhmeh tui deuh kan ei zin phah si, be tha ve rawh kan ti tlat a. A be chhe ngam bik lo.

"I va fel thin tak..tui leh ngawt ang" tiin bowlah a ruak a, a sil sak nghal vek a. 

Thiangi chu tukverhah dakin in luah thar lam chu a va thlek a.

"Tuna lo luah tharte saw an khawngaihthlak tawp, an pa ber sawn nupui dang a neihsan daih a, an inah a hruai lut sia. Tisawn an nufain a hnawtchhuak daih a nih chu! Sual ka ti em mai" a ti nghat nghat a. 

"An sawi mi?" ka lo ti hû a!

"Aw..a nu saw ka pi te nen hian hla ve deuh atangin an inchhung ve deuh aniang, In pawh saw luah man an free dawn alawm" a ti a. Kan inneitupa Pu Hmingliana leh Pi Saitluangi te hi mak ve deuh chu an pahnih hian officer an ni ve ve a, Kohhran hi an bel tehchiam lo naa, mi harsa leh puih ngai hi an hre thei khawp mai. Kan awmna chung chiah luahtu te pawh hi an pa ber a dam loh tumin a bawksawp rei ve angreng sia, in luah man thla hnih an free tawp tawh bawk , keini luah pawh hi mi dang in chu nise, 2500 aiin a tlawm thei lo hrim hrim. Mahse, kan dinhmunte min han hriatsak takah khan 500 theuha chawi theih tur khan min remsiamsak a, Tui bill erawh kan chawi ve. An fel ka ti thei khawp mai. Nenei te luah chung chiah erawh saw chu a that bakah a luahtuten eizawnna pangngai an nei bawk a, 3000 in an luah a. Kan awmna hnuai chiah hi nupa rek ten luah vein anni pawh hian 2000 an chawi. Vannei lellawl tak kan ni. Tin, in an ngah angreng a, an fapa Sawma'n a sawi danin, thla tina in luah man lo lut khawm hi 30000 bawr vel aniang a tia. An nu leh paten hna an nei ve ve bawk si..an hausak dan tur hi..Sawma hi keini aiin a u hlek a, a u leh erawh kan kawm rual lo, ani pawh Chanmari-ah sawn Smart phone dawr lian zet a nei a. Sawma erawh an blacksheep a ni ve deuh nge, engmah a thawk lem lo. Music lam a tui a, jam roomah a tawm deuh reng mai.

"An va khawngaihthlak tak ve..khawi vengah nge a hmain an awm ?" Lukira'n a lo ti ve a.

Thiangi chuan,"Bawngkawnah an ti..Chhungte belhtur an nei tawh lo aniang" a ti mai a. Thiangi hi Darzo atanga rawn awm a ni a. Hang lam deuh, hmaifang erawh chhe hran lo a ni. A zia hi ri ve bawrh bawrh chi, mi mitmei veng thiam vak lo a ni. 

Chaw ei khamah Lukira chu a insiam ruk ruk a, Alicia nen an inhmu dawn a nih ka ring. Zirdula nen erawh kan thu mai mai a. Lehkha hi kan zir tha meuh lo khawp mai. Eng emaw ti tiin 2nd sem thleng kha chu kan pass ve mai a. Exam a la hnai vak lo bawk a, kan inthlahdah riau. 

"Hawh ve leng mai mai ang" Nunzira chuan a ti a. Kan thenawm tharte a sawina a ni tih ka hre mai.

"Pawi hleinem" tih pahin ka tho a, ka inpeih nghal der. Mipa tih takah thawmhnawah hian a buai lo ber pawl ka nih ka ring. Half pant hi ka uar viau a, class kalnaah pawh pheikhawk ngai hi kar tluan deuhthaw bun chang ka nei. Tu vak mahin min notice lo bawk a, a zia viau. Kan chhuak a, Kawngka pawh kik lem lo chuan,"Kan lo leng dawn" tih leh Nunzira chuan luh a rual a. Ka zui ve nghal zat.

Nenei chuan thleng a lo sil mek a, phir unaute chuan tv an lo en bawk. A nu erawh ka hmu mai lo.

"Lo leng r'u..anu chu a inthiar lawk a" Nenei chuan a lo ti ve mial a. A aw a tliang kher mai. Kan thu a, tv chu kan en ve mai mai. Apuia leh Atea chu ka hre hrang tawh lem si lo va, "Apuite' ka ti a. An lo hawi rual thawt. Ka nuih vur vur a. Cheng 10 ka la ah ve chu pein," Kha induhzawng han lei r'u" ka'n ti ngawt a. Engvanga khatia ti nge ka nih pawh ka inhre lo. 

"Kan lawm e" tih leh tlan chhuah an rual nghal a. Nenei'n ," Kawngpui kan suu aw" a tih pawh chu an hre hman kher lo vang. Nu Sangi inthiar zo chu a lo chhuak a. Zozial ngei mai a petkawh vah mai.

"Inva fel ve ..thu ve reng r'u, thingpui te kan in dawn nia" a ti siam siam a. Nenei thleng sil zo pawh a rawn phei a. Thutna dang awm ta lo chu ka bulah a rawn thu ve a. A sam chu a huh hliam mai. 

"Inawm ve reng ang tiraw? Nu sang" Zira chuan a ti a. Sawi tur ka lo ngaihtuah lai tak..

"Umm..awm ve reng chu a ngaih hmel. Mahse, eizawnna tur hi kan la ngaihtuah fel lo deuh a. A buaithlak khawp mai" a ti a. A hmel pawh a ngui rawih mai.

"Aa..Pathian zarah a awm ve zel mai ang. Nene, Class engzat nge i zir tawh?" tiin Nenei lam chu a hawi a. Hreh hmel zet hian, "Class xii thleng ka kal a..ka kal tawh lo" a ti ban chhalh a. 

A nu chuan,"Nia, kan harsa lutuk a, a naute zirna senso nen , ka zawmtir ta lo ringawt a nih kha..lehkha a thiam tehlul nen" a lo ti ve a. Harsatna leh retheihna vanga zirna chhunzawm theih loh hi thil hrehawm tak tur niin ka hria. Chutiang ni lo va, hetia kan la zir zel thei te hi lawmthu sawi ngawih ngawih tlak a ni.

"Chuan, eng nge i tih thin?" ka lo ti ve sup a.

"Aa..a rem rem ka thawk ti ila, Bawngkawnah kha chuan Restaurant-ah ka thawk a. " a ti a. A zah hmel hle mai.

"He tah pawh thawhna a awm maithei. Khi kawmchhak lawkah khian U ZIkpuii dawr a awm alawm, hnathawk a duh thu a sawi ve ziah kha.." Zira chuan a rawn ti var a. He pa hi chu a bengvar thin teh e. Nu Sangi chuan a ngaihven hmel hle, "Han sawi chiang teh, a thawh ve chi a nih chuan a va lawmawm dawn ve" a ti ta chiah a.

"Restaurant tho a nia, College naupangte pawh an chawl ve thin. Kan class bang hi kan chawl ve zauh zauh zel a, thawktu an indaih vak lo nge ka duh em mai a ti thin a. Hlawh chu engzat nge a pek ka hre chiah lo. Khi..kawngpui chhuah chiah dinglamah khian chhoh hlekin a lo awm nghal " a ti ta zung zung a.

"Naktukah min lo sawisak ula a va lawmawm dawn..inremchan chuan" Nu Sangi chuan inthlahrun hmel lek lek hian a ti a.

"Aw..kan lo sawi dawn nia..a lawm viau ang amah pawh..bakah U ZIkpuii chu a fel a, hrawn a hrehawm loh viau ang" Zira bawk chuan a ti leh sawk sawk a. 

Kei erawh ka nel vak lohte bulah chuan chengkawl ang mai ka ni thin. Sawi tur em em ka hre ve ngai lo. 

"A thawh theih hlauh chuan a zia dawn em asin. Kan in a tangin a hnai bawk nen. U Saii kha chuan lángin in chhung hi rawn tifai thin se a ti tak naa, in luah man min free tawh a, tihbuai zel kha nuam ka ti lo. A puih ang zawng ten pui zawk se a tha zawk.." Nu Sangi chuan a ti a. An dinhmun a chhe ve viau a nih ka ring. Phir te kha an rawn let tawh a. An nung vat vat ngei mai. 

Nenei chu a tho nalh a, "Thingpui hâng ka'n lum ang e aw" a ti sep a. 

"Nu sang, Nu Saii te nen hian chhungkhat in ni tihna mi?" ka ti a. Zawh sual erawh ka hlau viau.

Kuhva hmawm zauh pahin," U Saii nu leh Ka pu hi unau an nia. Keimahni lam hian kan pawh tha ngam lo zawk a, an hausa ve bawk nen. Mahse, an felin min ngaihven reng a, pawisa fai te pawh min pek chang an nei . Harsatna kan tawk ta thut sia, an in hi luah mai turin min ti ta a. Tihian kan rawn lut ta rawih chu a nih hi" a ti a. An harsatna chu eng tak ni ang maw? A pasal chuan hmeichhe dang a hruai lut tak tak a niang. 

Nenei thingpui hâng siam pawh a tui khawp mai. Dar 9 a ri dawn hnai tihah kan haw phei ve ta a. Mut hnuah, "Nenei saw bem la, tha ve lawm..a chhiat vak loh saw" Zira chuan a ti a.

Ka chek hluk ringawt. Games ka khelhsan daih. 

A tuka class kan kal tur bus kan nghah chhungin U zikpuii chu Zira chuan a va biaksak a, awlsamtein an va inbe fel a niang, a tuk lama thawk nghal turin an inti fel ta a. A tangkai thin ngawt mai. Bus a lo thleng a, kan lut dial a, hla ka ngaithla leh daih. 

"Tp, startu che ka hria nia aw" kan class ami Msi chuan a ti sar sar a.

"Tu?" ka lo ti leh hû!

"MSW lam mi daih a nia, i hmu zing tawh ang ,hmuh chu" pehhel si hian a ti kual a.

"Sawi vat mai teh" ka tih chuan," Zampuii kha. Hria em? Ka hawpui thin kha " mitko san zauh zauh chung chuan a ti ta a. Ka lo nui hawk hawk. Zampuii chu cher ve angreng tak, sang ve tawk tak a ni a. A hmel chu tha em em tia sawi tur a ni lo nain a va chhe ve tihtur lah a ni hek lo. A ngo a, chu chu a ni deuh mai. 

"Chuan, ni ru aw" Msi cbuan a la ti zui!

"Ringawt a che. Ka single rih dawn..bialnu ka nei peih rih lo" ka ti a. Zep loh chuan Zampuii chu ka duhzawng a ni tlat lo a tin ni. 

A hmui a tipawrh a, "I ho mai mai , ka sawi dawn tho..zanah a lo bia ang che. Tha deuhin lo chhang ang che. Bialpa a la nei ngai lo va, tina miah suh" tiin ka chhan leh hmain a kal daih. A va á mai mai tak e aw..

A ngaite bawkin tlaiah bus-in kan haw leh vang vang a. Khua a lum phei chuan kan chau ve rawih thei. Tui an lo sem bawk nen, bathrooma dah tur ka khai char char a, Lukira'n chhuat a nawt thung, Zira erawh eirawng a bawl sur sur a. Ka inbual zo thutkhawmna lama ka phei chu phir unaute kha an rawn lut ve chiah. 

"Apuite, lo kal r'u. " tiin ka hui vat a. Naupang hi ka lawm ve riau a, han chhawnchhaih dan erawh ka hre vak lo .

"School inkal em?" ka ti a.

"Umm..kan school thar chu a nuam lo rapthlak, an tlem si" pakhat chuan a ti a.

Sawrkar Schoolah he lamah an inluhtir thei hram a ni ngei ang..heta tanga Bawngkawna school va kal tur chuan a ngaihna a awm lo. Naupang an la ni bawk si.

"Lawkin, Tu zawk nge Apuia?" ka ti a. Kawr sen ha zawk chu a phar vat. 

"Ih, min hriatpawlh zel ami?" a ti ta reuh a.

"Umm,in inang em alawm..engtin nge kan hriat hran ang che u aw.." ka tih vang vang laiin, Kawr pawl ha zawk Atea chuan," Ih, Nenei chuan heta tang hian min hria" a lo ti vat a. A nghawng a khawih a, khuavang a lo awm kalh mai. 

."Aw a tha e, ka hrehrang tawh ang che u. Chuan, kum engzat nge innih tawh khah" ka ti leh a.

A rualin, "Kum 8" an ti a. An aw chenin a inang si, a buaithlak mang e. Nenei nen chuan an va inthlau awm em em. Nenei hi a nu fabik a ni maithei ni. Inzawh dawt lah a nuam dawn si lo va. Nunzira chuan sikhar lei turin a tir a, cheng 5 ve ve a pe bawk. An rawn let leh chuan,"Apa kan hmu a..mahse, min hmu ve lo aniang" an rawn ti lut a. ENgtin emaw ka lo awm, ka lo lainat ve tawp. 

"Bawngkawnah khan apa te nen inawm ho em?" ka tih chuan, Atea zawk chuan,"Aw. Mahse, zu a rui reng zel " a lo ti a.APuia chu upa zawk tih takah a fing deuh nge a nau chu a nghawk a. Mahse, Atea chuan a hrethiam lo.

"Chuan, Apa khan hmeichhe dang a rawn hruai lut ami?" Zira chuan a rawn ti ve a.

Apuia chuan,"Umm, chuan anu te nen kan chhuak daih a" a ti a. Zawh belh vak a nuam lo. A nuin a rawn ko ta bawk a, chumi pah chuan Nunzira chuan tukverh atangin,"Nu Sang, Nenei chu U ZIkpuii chuan naktuk atangin lo thawk rawh se a tih kha aw" a va ti lung lung a..

"Zanah lo leng leh ru aw..lawmthu sawi nan thingpui sial deuh kan lo lum ang" nu Sangi chuan a ti a. 

Zanriah kan ei laiin Nunzira bialnu Esi leh a thiannu Zari te an rawn lut hlawl mai.! Kan phawk hru nghe nghe..

"eng nge in rawn tih dawn? " Zira awki chuan ngaihno a bei vak lo.

"kan lo peng kawi. Kan haw dawn a" Esi chuan a ti ve mai a.

Lukira'n ,"Lo ei ve ru" a lo ti vat.

"Chawhmeh innei lo em mai a" Nui chungin Esi'n a ti a. 

Kawngka a ri rak a, "In ei mek elo" ti chungin Vanneihsangi a rawn lut ve chiah, Bowl a rawn keng va bawk. Lai zet hian,"Hei anuin va suah rawh a tia" tiin a thil ken lai chu dawhkanah a nghat a. A la khu vat vat mai. Maian bai thar a ni a, a tui ngawt ang. Lukira'n,"Kan va lawm ve..in ei ve dawn tawh em?"a ti var a.

"Aw ei ve dawn hnai, eitui u aw" tih leh chhuah a tum lai takin, Esi thiannu Zari chuan,"Ehe! Vanneihsangi ni chiang..awii tehdaih che chuan" a ti hlut a. Nenei pawh chu a ding dat a, Zari chu rawn enin,"Awii ,U Zari chu! A va mak ve" a ti ve hliai a.

Zari chuan nuihzat hmel lek lek hian, "I thawhna thingpui dawrah khan i thawk tawh na nge? Niminah kan chawl a, ka hmu si lo che a" a ti leh kalh a.

"Aw,hei kan insawn daih a..thawk tawh lo" a lo ti ve mai a. 

"Johnyan a lo la be ngai che em?" Zari chuan a ti a.

"Be tawh ngai lo..chaw kan ei tawh dawn sia, ka kal mai ang..nih phawt u" tiin min rawn melh zauh a. A chhuak nghal. 

Nunzira chuan,"In inhria law?" tiin Zari a en a. 

"Ka thiannu bialpa a lo ngaizawng ve tawh lawm..hmanah kan tim hrep a, min hlauh em kha.." tiin a nui zui har har a. Zari hi kan thianho zingah a tal tam vak lo a, kei tak phei chuan ka ngaina lo. A zia hi ka ei lo a ni ber. A chapo ve riau a, bakah a thiante bialpa a be tha thei lutuk an ti bawk..a thil sawi dan hrim hrim hi mei a nei thin, ka sawi thiam chiah lo. 

Kan kham fel hnuah Nunzira chuan Esi te chu a va thlah a,. Kein. Lirthei hi kan khaw lamah chuan kan nei ve vek, Aizawlah kan keng ta lo mai pawha..kei khan ken ka tum zet a, pathum kan ni si a, nuam ka ti leh ta lo a ni. 

Lukira chaw eikham zial zu mek chuan," Zanin inkhel tur kha dar engzat nge? " a ti a.

"8:30 a ni lo maw? Khaw nge en i tum" ka ti a.

"Ka hre lo, phone atanga en hi chu a muang lutuk a, ka ning..Thenawm tharte sawn tv an nei tiraw?" a ti hluai a.

"Nei e, mahse, an en ve peih kher nang" ka ti mai a. Inkhel hi chu kan miss ngai vak lo. Kan thiam em em azeng pawh a ni lo. Cristiano Ronaldo fan ruhkawl ka ni a, a khelhna club apiang ka tan tawp mai . Zanin pawh ka en ngei a ngai ang. 

Nunzira a rawn let a, "Nenei te inah inkhel en ang u" a ti nghal thawr. 

"Pawi hleinem" kan lo ti rual a.

Kan chhuak zui a ni mai. Kan awlsam ve ngawt mai.Kan va luh chuan an lo tawngtai mek chu niin kan chhuak leh zal zal a, kan nui thaw mai. AN zawh rualin kan lut ve leh tawp. Kan chim chin hi a sang ve thin a nia. 

Min lo be tha leh hle tho a, Zira chuan,"Nu Sang, Zanin chu inkhel en ang u aw..Noodles te kan chhum dawn nia. Nuam ve lawm" a ti leh bawrh bawrh a. Zira leh Nu Sangi hi an inzu-ra riau. 

"Ni tuk e, kan khawhar min rawn hnem thin a, a lawmawm . Nenei pawn a en ziah alawm..inkhel chu" a tih chuan, Nenei ka va melh a, "eng nge i tan?" ka ti sup a.

"Chelsea " a ti vat a. Kei pawh ka ni ve tho. A nuam riau. "Kan tan a inang a nih chu" ka tih chuan a nui sak a, a biangsum a khuar kalh. Zari sawi hmang khan mi bialpa a lo ngaizawng tak tak em mawni dawn le? A hmel en hi chuan rin a harsa deuh. 

Apuia te nau Gaby chu a tlei lo riau mai a, a nu chuan,"Ngati nge aw..khaw maw i pang" tiin a han dek a. 

"Nene, damdawi kha hmanhmawhin" a ti a, a thlabar hmel riau. Nenei a tho vat a, damdawi a rawn la a, Gaby chu a nu chuan a tulh a. "Ka ne nen ang che aw" tiin a paw nghal a. 

"A khua a sik ni maw?" Lukira chuan a ti a.

"Umm..aa..ani zawng a vanduai a, a kaih thin a. A chal veilama kutchuk hi a sen tawh chuan a kaih vak zel a..a buaithlak lutuk". A nu chuan a ti a, a awi dârh dârh a. 

Nenei chuan," Thingpui háng" tiin min rawn melh kual a. Tluangtea hi a hang in ngai lo, a thlum duh over a nia. "Kei chu a thlum aw" a ti zauh a. Choka lam a pan zui nghal.

Dar 8 rik hmain phir unaute chu an muhil ta daih a . Nu Sangi pawh chuan ," tikhan lo en mai r'u aw..Duati hi a nuamsam si lo va, ka'n mutpui mai ang e" tiin roomah min luhsan ta a. A nu a awm tak loah chuan Nenei chu a zah leh hmel kher mai. A lai deuh tawp a ni ber mai. 

"Nene, class xii khaw nge i kal?" ka ti a.min rawn melh zawk a, "Chaltlangah a nia.." a ti zawi sap.

"Chuan , i nu hian eng nge a thawh thin?" sawi tur ka hre si lo, ka be chak si kha a ni ber mai.

"Puan a thui thin a, a hma chuan a thiannu dawrah a thawk ve thin a..mahse, a theih tawh si loh a" a ti niah niah a.

"Nakinah miin an hria ang a, an la thuitir mai ang" ka ti ringawt.

Inkhel a chhuak ta. Chelsea leh Man.city an ni bawk a, tan a na duh hle. Nenei pawh a tang bawk aniang, a inrin hmain a au veleh that thin. Nunzira erawh a en hman meuh lo, Esi nen an intext leh tawh a niang. 

"Noodles chu kan chhum dawn lo mi?" 1st half a zawh chuan Zira chuan a rawn ti a.

"Han lei la" ka tih chuan, min rawn melh kawk, "Nenei nen khan han lei r'u,ka lo show ang. Spicy pakhat leh Ramen pahnih kan kham ang" tih leh pawisa phawrh a rual a. 

Nenei hming a sawi tawh si, "Hawh,lo kal ve la" tiin ka va melh a..eng emaw sawi tum niawm takin a ang zuau a. Mahse, chip lehin a tho ta nalh a. Kan inzui chhuak ta. Kan awmna hi a zia vena chu kawngpui chhuah chhoh chiah hian dawr a lo awm nghal a. Zanah pawh an inhawng rei thin a. Kan buai vak lo. Nunzira sawi ang chu kan lei a, keima pawisain cigaratte ka lei bawk. Aman pek ka tum chuan, Nenei chuan ,"Khawi ka lo pe ang" a ti a.

"Ngai lo, Nunzira'n a show ve alawm" ka ti vat a. Kan inpek fel hnuah kan chhuak a, Step thui vak lo kan zawh lai chuan Lungte a rap hrual nge, "Awiii" tih leh min rawn pawh a rual a, ka lo pawt let vat, tlema tlemah a lum lo chauh a ni. Kan taksa a indeh chiah khan mak takin ka de chhawk thei nia mawle! Hetiang feelings hi tu hmeichia mahin min la neihtir ngai lo. 

"Ka van tlu teuh.." aw khur lek lekin a ti a.

"I hawi nasa lutuk a nih kha" ka lo ti fiamthu a, a nui ve ringawt.

"Ih, U Tri, (t hi a hnuai chhun han ka nei lo va, Tri hi ka hman a ngai aw..hrethiam mai r'u) i sam hi i tikir chawp ami?" a ti sap a. Tuman Tri-a tiin min la ko ngai lo. Tpa emaw Tanpui tiin min ko thin. 

"Aih, a kir ve sa tawp..ka pianpui" tiin ka nui hak a.

"Chu! Tun lai ho anga tihkir chawp ve pawh a ngai dawn lo nih chu" a ti leh a.

"Nia, a zia reng a, mahse, samkir an uar loh hunah a hrehawm ngawt ang" ka tih chuan za deuhin a nui hawk hawk a. An inkawt kan thlen chuan a kut ka vawnna ka thlah chauh, ka la vuan reng tih ka lo hrechang miah lo! thing thla bik hek lo le..

Kan lut a. Nunzira min lo melh dan vel chu ka ngei..ka nui ringawt . Tluangtea erawh a phone a khawih a. 

"Nene, Tpa hian noodles siam chu a thiam lutuk..siamtir daih rawh" Zira'n a tih chuan, "Mawina, amah hi lawm thiam" ka ti ve vat. Nenei chuan nui chungin noodles chu a kheh a, ka kheh pui ve nghal. Chutih lai tak chuan, kawngka chu kik buangbar lovin a rawn intheh hawng thuai a. Kan hawi rual thawt. Nenei chu a tho nghal vat a. Kawngkaah chuan zu rui tih hriat zet, hnar tawk hlar tawh, dul kiar leh mawng zuih tut hi pai khut khut chung hian a rawn lut ta a. 

"Pa" Nenei chuan a ti sap a. Chu pa chuan rawn pan hnaiin, "Vanneihsang, khaw nge i nu ?" pawr zet hian a ti a.

"A mu tawh" a ti zawi sap a. Keini ho chu min melh kualin ," Inleng ka nei e te i tia lawm..naupang i la nih hi.." tih leh Nenei chhisama keh a rual ta mai a. Ka bul maia chutiang thil thleng chu ka en liam thei awzawng lo mai. Rang zetin a kut chu ka mansak a, ka thinthlaksak lawp..min rawn en a, "Tu nge i nih a?zawnga" a ti pawr huar a. A tawng ring bawk nen, Pindan atang chuan Nu Sangi a rawn chhuak ta a.

"U mawi, eng thil nge i tih a? Eng nge i lo tih dawn?" lungawi lo tih hriat zet hian a ti a.

"Ka duh leh ka rawn kal ang a..ka fate ka hmu duh a ni mai a ni..khaw nge ka fate" a ti a. A la ding pai khut khut bawk.

 Nenei chu ka sirah dingin ka ban a rawn vuan dam thlap a, a hlauthawng takzet tih leh a zak hle tih a lang. 

"An mu tawh. Chuan zu rui chung chuan min rawn pal tawh suh aw..chhuak rawh" Nu Sangi awrawl pawh a ring ta..

"Hhahaha..Zonunsang, i pasal hi min hnawtchhuak a maw?! Min va zah lo ve" tih leh khawih a tum leh ta mai a. Nunzira leh Tluangtea an rawn ding rual thawih..intiamrual ang hrimin chu pa chu an chelh bet ta hmiah a.

"Tu te nge in inlengte hi? Innufa chuan nuam inti hle mai maw? Khaw maw min thlah r'u, inva zak lo ve.." Pu Mawia chuan a ti bawrh bawrh a. Nu Sangi pawh chu a zak tih a lang. 

"Zira, khawngaihin hruai chhuak teh u..ka fate an harh palh ang" tiin Nunzira a melh a. An pahnih chuan an kai chhuak a, A la au lung lung mai. Kawngka chu Nunzira chuan a kalh ta hmiah a. 

Nu Sangi chu thutthleng seiah a thu hnawk a. Nenei pawh chairah a thu thla. Rilru hah hmel leh inthlahrun hmel em em hian, Nu Sangi chuan.."A zahthlak hle mai. Engtin nge kan awmna pawh a lo hriat ni?ani kha ka pasal hlui chu a nih kha.." tiin keini ho chu min melh kual a..

"A rui em a nih kha..engahmah ngai suh" Tluangtea chuan a lo ti var a.

"Nia, inlo awm hlauh a..chuti ni lose kei emaw Nenei emaw hian a kut kan tuar leh ngei ang..ka lawm lutuk a nia" Nu Sangi chuan a ti a..

Thil dang kan sawi ta saih. Nenei nen chuan noodles bawk chu kan buaipui a. Zawi sap hian ," Zu hi ka hua" a ti a.

"Nia" ka ti ringawt.

"In ve miah suh" a ti leh a.

"Ka in ve zeuh zeuh" ka ti leh hmiah. Dawt sawi kual ka peih lo.

"I nupui leh fate an khawngaihthlak dawn anih chu" a ti nghat a.

"Nupui neih hnuah te chuan ka in tawh bik nang" ka ti a. A khi sak ringawt.

"I pa khan kut a thlak thin che maw?" ka ti a. A zak ang tih ka lo ngaihtuah chang lo a ni.

Mitmeng ngui tak hian ,"Ani kha ka pa a ni hleinem..ka nu pasal a nih kha" a ti zawi sap a..

(Muttui u 🥰