Sensiari!

SENSIARI…! 

Ziaktu: Toni Râlte

"Ka thian, ka va lawmpui tak che em.. Retheihna atangin tihian i tumruh vangin i hlawhtling ta" ka best friend Vanrengi chuan min kuah chungin lungchhe zet hian a ti a. Kei pawh chu ka insut hraih. Ka mittui a tling pam bawk. Lawm vang hian a lo ţah theih tak tak dawn a nih awm hi maw. Ni e, a dik, ka nu khawlai fa, pasal a umsan hnua ka putea te chhungkua hrawn chho ta, tihduhdahna leh hmuhsitna tinreng karah pawh hmalam hun beiseina mei mit thei lo vanga ka tawrh zelna rah chu vawiinah ka seng ve ta chu a nia. High School zirtirtu-ah tling vein, Chhim lama khaw pakhatah post ka ni. Ka hringnun hman dan kal kawng pawh hi thawnthu sei tak daih a ni ngei ang a, mahse, chu chu tunah chuan kan kalsan rih mai aniang chu. Hun dangah ka nun baihvai leh chavai takin hringnun kalkawng a zawh dan chu kan la ziak dawn nia. 

Hna ka hmu tih an hriat rualin, ka piteii'n min lo call nghal a. "A lawmawm hle mai. Tunah chuan i tana kan insensona te pawh min rul let ve thei tawh ang chu.. I putea hi car loan puksak la a tha ang. A bike hi a chiang tawh lo lutuk a" a rawn ti ngam nia! Ka nui tawp.. 

"Pite, i thisen a sang ve mah mahin ka hria. Ka tan hian a thlawnin vawikhatmah inla inseng so lo ve. Mahse, ni e, ka tet lai chhunga ka hrawk inlo chawm tawhna man erawh ka rul ang che u" ka ti ve ngat a. 

"Kha.. Khati kha in nia, hna in han hmu dek dek a, chhungkua in thlauhthla nghal a, ka rin ang chiah a ni" a rawn ti zat zat a. 

"Pite, a nih engtikah nge nikhua ka hriat theih atangin kawr min lei tawh han sawi teh. Sawi tur i hria em? Ka school uniform vawikhat pawh min leisak tawh em? Exercise bu khat man tal pawh min tumsak tawh em? Primary leh Middle school ka kal lai kha chuan inlo tum ve pawh a ni mahna.. Khami man kha chu ka rul ang che u, ka lo chhut ang a" ka ti ve ta hmiah hmiah a. A ngawi reng mai. Ka off hmiah. Ka mood a rawn tichhe titih alawm le. Ni e, Nikhua ka hriata High School ka kal atang khan ka tan a thlawnin sum an sen ka hre tawh hauh lo. Inhlawh chawpin mi tual phiat, mi in tifai leh an huan thlawhfaisak tea ka inhlawhna atangin school kha ka kal ve hram hram thin. Higher Secondary ka kal erawh kha chuan kan miss hian min lainat em vangin a hostel siamah min awmtir a, a tul tul ka thawk ve thin. Miss hi ka tan pathian tenau a ni ringawt. Ka theihnghilh tawh lo vang. College ka kal takah kha chuan, Aizawlah ka chho ve tawp a. Veng pakhat mawngah, khum leh choka inzawm deuhthaw in luahin class ka kal ve a nih kha.. Chanchinbu semin leh chawlh changa mi dawra inhlawh chhoin college ka kal chhuak ve a ni. Hei hi zawng ka sawi tawh ang khan bu khat daih a ni a, sawi vek sen a ni lo. Ka peng thui tawh lo law law mai ang e. 

Ka thawhna tur hmun chu a khaw hming pawh ka hriat vawikhatna a ni. Hmar lam daihah khawsa ka nih vangin, chhim tawp lam khua chu ka tan hriat a harsa ve bawk a ni. Ka thiantha ber Vanrengi nen kan sawi dun a, Mi va hrawn ai chuan mahnia in luaha va khawsak ka duh zawk. An VCP ka be ta a, a lo fel khawp mai. An khua chu in 260 bawr vel an niawm e. High School thleng chauh School pawh a awm nghe nghe. In han luah mai tur chu min lo dapsak a, a váng riau nge ni.. "Ka nau chiahte hian in hnuai chu an nei a, mahse, hnawmhnawk dah nan an hmang a, mahse, luah theihin kan lo siam ang e' an tia.. Luah theih a nih hma chu kan bulah i khawsa ve mai aniang chu" a rawn ti a. Pawi ka ti lem lo. Pa nelawm leh biak nuam tak a ni bawk a. Tichuan, ka thawhna tur hmuna kal tur chuan ka inpuahchah chho a, bungrua ka ngah lem lo. Keimaha in luah char char mah ni ila, ka hausa lo va, bungrua tihtham ka nei hran lo. Chhung leh kua han belh tlak tak tak ka neih tawh loh vangin ka in luah pawh chu luah man ka pe fel a, ka luah tawh loh tur thu ka sawi nghal. Ka thawhna khuaa va awm deuh ngat ngat ka tum ta mai. Aizawla ka phei changin Vanrengi te bulah ka thleng tawh mai ang chu. In luah man pek ve reng a ngai dawn si a. Chutiang khawpa fahrah, vanlaia tla an tih ang kha ka ni a. Mahse, Pathian ka rinna leh ka beiseina chuan a tawpa tawpah hlawhtlinna tlang chhip min hruai thleng ve ta chu a nih hi.. Lalpa, ka lawm e. 

Ka hming hi ka nu pa, ka pu khan, Ka pa pawh an hriat si loh avang kha ni maw.. 'Vanlalhriatpuii' tiin a phuah a. Vanlal tiin tupawn min ko ta a ni. College ka zawh rualin B. Ed ka zir nghal a, Pathian zarah ka vannei thei a, ka lut ve thei zel mai. Min khawngaihtu hi min pe ziah bawk. B. Ed ka zir pahin IGNOU-ah M.A (Eng) ka zir pah a. Kum khat ka awl hnuah tuna ka hna hi ka dil ve ta rawih a, sawipuitu pawh ka nei lo. Mahse, Pathian ka nei tih chu ka innghahna a ni. A hun taka che thin Ka Pathian chuan ka tawngtaina a rawn chhang ta a ni. Vanrengi hi ka tan a hlu hle bawk. Ka theihnghilh tawh lo vang. Sumo ticket book-in a tuka ka thawhna tur khaw lama kal tur mut chuan ka mu ta vang vang a. Zanriah kha in neituten min eipui a, ka puar viau. Vanrengi te inah ka va leng zuai a, inthlahna ang deuh kan hmang a. Ka haw hnuah ka mu nghal. Ka muhil hleithei lo. Ka helhhawlh a ni ber e. 

A tukah zing tawkah ka thawhna khaw lam chu kan pan ta vang vang mai. Chhim lamah Lunglei thleng bak ka la kal lo va, engkim chu ka tan thil thar a ni. Ka sumo chuanna chu ka thawhna khaw thenawm thleng chauh a kal dawn a, mahse, VCP te khan an motorin khaw thenawmah min lo hmuak dawn a niawm e. An fel ngawt mai. Tlai dar 5 rik hma deuhin khaw thenawm chu kan thleng ta a. Mawng a na duh khawp mai. Ka hai chhulh mai. Ka beisei ang takin kawnah tak chuan VCP niawm takte chuan min lo hmuak a. Hah a dam sawng sawng mai. Kan han inchibai a. Pick up an lo kenah chuan in load lehin awm khawmuang loin an khaw lam chu kan pan leh ta nghal a. 

Vcp chu Pu Thangzova a ni a, Pa Thang tiin ka ko mai. A driver chu a nau fapa a nih thu a sawi a, tlangval ngawichawi tak a ni. Dina a tiin ka hria. Ka be bik lo. An khaw chanchin leh an nunphungte min hrilh dap dap a, ngaihnawm ka ti viau mai. Darkar khat vel kan tlan awm e. Kan thleng ta. Khaw thleng nuam tak niin ka hria, a boruak pawh a zo vah mai. Vcp inah chuan ka innghat ve ta phawt a. An nuin min lo dawngsawng a, an va fel nupa e aw. Chaw eiah min lo la nghak bawk nen, inbual hmasa loin zanriah chu kan ei ta phawt a. Ka chau ve khawp mai. Ka inbual zawh lamah phei chuan ka meng hleithei lo a ni ber e. An tlangval roomah ka mu a. Ani hi Aizawlah hnathawkin a awm a niawm e. 

A tawi zawngin sawi ila, Ka in luah tur pawh ka thlen atanga ni 4-naah an peih thei ta mai a. Bungrua min thiarpuiin engkim min tihpui vek hlawm a. A hahdamthlak mang e. An khawmi an felin, min biak lumlam an peih si, nuam ka ti sáwt viau. Ka in luah chu sawi tawh angin Vcp nau, Pa Biaka in hnuai a ni a. A lian lem lo, mahnia awm nan erawh a lian deuh zawk mah maithei. Choka leh sitting room a inzawm nghal a, room chu an ping dang ve a. Room pawh a zim over lo. Bungrua ka ngah vak lo nen, ka thawl viau zawk. An fel em a, thutthleng te pawh an dah thlap mai. In tak tak ka nei ve ta niin ka hria a, ka hlim hle. Mahnia in luah thang ka ni bawk a, hlauh leh i hi ka nei lem lo khawp a. Ka sehhel vena lam zawng tak a niawm e. Pa Biaka te hian fa pali an nei a, pickup driver Dina kha an upa ber dawttu a niawm e. An upa ber erawh nupui neiin in hrang a chang tawh a. Dina nau chiah hi mipa tho niin ani erawh Lungleiah college a kal a niawm e. An te ber an hmeichhe neihchhun ni bawk chu, Sensiari chu a ni. A hming chu a tirah mak ka ti deuh a, mahse, a nu chuan, "Ani hi chu kan hmeichhe neihchhun a nih bakah a tet lai hian a tai hlar zel a, a heh te hi a sen siah zel a, thenawmpa te hian sensiari a nih hi an ti thin a. An ko hlen ta a nih hi" a ti a. A hming dik tak erawh Malsawmsangi a ni awm e. Kei aia nau a ni a, sam dum hlap, heh sen siah, hmai dáng lam deuh, hmelhmai fuh tak a ni a. An khuaah chuan a hmeltha pawl a nih ka ring. Mahse, a mizia a zawiin a harhvang vak lo va, biak loh chuan a tawng ngai mang pawn ka hre lo, a zakzum ve pawh a ni maithei. Pawl 12 a zo lo niawm tak a ni. A bawrhsawm deuh vangin an khaw lamah hawin a pain dawr a siamsak a, chu chu a nghak ve thin. Mi sual a ni lo va, mahse, ngainat a har. A tawng tam loh vang a ni maithei. Tin, Pa Biaka te hian an nu Nu Mali nuţapa Pa Faka an awmpui bawk. Pa Faka hi pa phawk deuh, tawngkauchheh nuihzatthlak deuh a ni a. A bula awm a nuam hle. Min titlangnel bertu pawh a ni. Zu rim a nam ve zeuh zeuh a, rui chhia phei chuan ka la hmu miah lo. An chhungkua an hulhar bakah a awm thei pawl an ni a, tin, an fel em em a, thenrual pawh an ngah viau a ni. Vannei ka inti khawp mai. 

School pawh kan tan chho ta a. English subject ka la a, zep nak emaw an bil hlawm khawp mai. Mahse, teaching line ka tuina a ni bawk a, tui na ná na chuan naupangte pawh an phur ve mai zel a. Hma kan sawn ve zel e. Kan headmaster Sir Puia chu a felin, mi hriatthiamna ngah deuh a ni a. Lunglei khua a niawm e. Staff dangte erawh he mi khua an ni thung. Hmeichhe awmchhun ka ni bawk a, min duat thei sia, a nuam tawp. Presbyterian Kohhran ka ni naa, ka awmnaah an awm ve loh vangin Baptist Kohhranah ka lawi a. Khaw inlungrual lo chi an ni lo ka tihna chu kohhran hi Baptist chiah zuk awm a! Mahse, veng kar a hlat vangin Biak in pathum a awm thung. Pa Biaka te lawinaah ka lawi ve a. An felin min welcome em em hlawm a, thalai programme-ah pawh kimki hauh loin ka inhmang ve thei nghal mai a. An mi dawnsawn dan a fuh em bawk a ni. Tiang chuan thla hnih dawn chu ka kal chho ve ta a,. Zep nak emaw nula ka ni ve bawk a, inleng pawh ka nei ve deuh reng a. Hmelhriat pawh ka ngah tawh hle. Kei hi nula te chhe lo ve tak, 5'5 ft ka ni a, mahse, ka cher mah mah deuhin ka inhre thin. Ka hmel erawh tha tia sawi theih a ni hauh lo vang. Mi sawi ruk dan ka hriat pawh, "Miss, Vli chu a hmeltha lo, a nungchang a tha em a, kan hmu hmeltha vek" tih a ni. A lawmawm lamah ngai phawt teh ang. Tette atanga hmuhsitna leh diriamna atanga zi chhuak ka nih vangin ka belh phak awmchhun Pathian bel ve tlat ka nihna hian ka nun a vawng vein, mi dangte pawn zahawm min tih vena chhan niin ka hria. Pathian neitu nih hi chuan hloh leh chân reng a awm lo. 

Ni khat ka school bang, Sensiari dawra ka peng kawi chu a mit a sen râmin ka hre tlat a. Ţap hrep hmel a pu a ni. Kan inbe ngun ve tawh a, nau ang tak taka ka en vangin, "Mate, i tap elo? " ka ti a. A nui lui hak a. 

"Awihawm loh e" tiin a mit a nuai chawt chawt a. 

"A ni reng, kha i mit pawh a sen vek" ka tih chuan, "Nia, kuhva ka thelnain a per a. A na reuh tawp" a ti mai a. Ka awih hreh mang e. Mahse, han zawh chik viau kha nuam ka ti si lo, ka manawh ka lam khawm a, in lam ka pan nghal. Zanah inkhawm tur hian Sensiari hian min rawn au ral ral thin. Zanin erawh a reh tlat. Ka insiam tho a, Bible zakzehin ka han chho a, amah chu ka han hmu lo. 

"Khaw nge? " ka ti a. 

Nu Mali chuan, "A nuamsam lo mawni, chaw pawh a ei peih lo" a lo ti a. Chhuna ka hmuh dan nen ka ngaihruat kual a, eng emaw tak a tawk mawni aw ka ti deuh. Mahse, dar a rik tawh vangin ka chhuahsan leh nghal a. Ban veleh ka peng kawi leh a. Sensiari chu ka hmu leh ta chuang lo. Nu Mali leh Pa Faka an lo awm a. Nu Mali chuan, "Thingpui hang in ang.. Thu rih rawh" a tih vang chuan, ka thu ve mai a. 

Pa Faka chuan, "Vanlali hi chu i fel reuh ngawt mai. Bialpa te hi i nei ve tawh em? " a ti teh daih a. Ka khi sak. 

"Nei mai mai lo. Ka zak e a" ka ti a. Ngaihzawng hi pakhat chiah ka la nei. Chu lah chuan nupui a nei daih tawh lehnghal. 

"Kan khaw tlangval ho hi an fel ania aw. I'n awm rei ang a, a tira phu lotu che emaw i tih ho kha kum hnih hnu velah chuan i phu loh en ve vek mai ang" tih pahin a nui hawk hawk a. A sawi chu a dikna chen a awm ve reng. Nu Mali chuan thingpui no rawn chawi pheiin, "Kha.. I Pa Faka lah chuan nupui ruk a sawi reng mai a, engtia tihchi nge mawni dawn le" a ti a. Pa Faka chu ka va melh vat, "Tu? " ka ti hu a. 

"I la hre ve mai ang" uang deuh hian a ti a. Pa Faka hi pathlawi a ni a, an nute hi khaw thenawmah khan an awm a, fa pakhat an nei hman a niawm e. Nu Mali sawi danin amah Nu Mali bak han belh tur a nei bik lo aniang, Nu Mali nu leh pate an boral tawh a, an unau dangte erawh Khawthlang lamah an awm niin a sawi. 

Sensiari room kawngka a rawn rik rak a. Amah pawh mit nuai chawt chawt chungin a rawn chhuak a, "I la nuamsam chiah lo mi? " ka lo ti vat a. 

"Umm.. Ka mit a na a, bakah ka chau tawp" a ti a, bathroomah a lut zui nghal. 

A rawn chhuah leh chuan a nu chuan, "Bawihte, chaw chu mangthat nan tal tlem va bar la" a lo ti a. 

"Ka peih lo" tih leh rooma luh a rual nghal. A awm dan teh hmuk hmuk chu thinrimna nei te pawh a ang alawm. An duat ve em a, a pangchang ve te pawh a niang e. 

Khami ni leh zan atang khan Sensiari chu a danglam tlat! Kei chauh lo pawn mi dang pawn an ti. A tawng tam loh tawh sa nak alaiin biak mawlh mawlh pawha min chhan duh miah loh chang a nei a. Ngaihzawng te hi a nei ve ang a, an inthen em mawni zawk dawn le.. Ka nau ang chiaha ka lo en tawh vangin chutia a danglam chuan ka rilru a kaipeng lo thei bik lo va. Pa Biaka pawn, "Ti nge i awmdan hi? A dik lo. Vei ruk te hi i nei a ni lo maw? " a ti hial tawh a ni. 

"Ka tha alawm" tih chhanna bak a pe ngai si lo. Dawr pawh a nghak thei lo ta zeuh zeuh. Nu Mali emaw Pa Faka emaw ten an nghah chhawk thin. Pa Faka hi chu a inhlawh zeuh zeuh a, Nu Mali'n a nghah a tam zawk awm e. Dina lah inah a awm tam si lo va. Kar khat vel chu a ral tawh ang tihin, ei rawng ka bawl laiin Sensiari chu a rawn lut hlawl mai a. A hmate kha chuan a rawn leng lut ve zauh zauh reng a, hetia a danglam hnu hi chuan a hmel hmuh a khat viau tawh. Mak ti deuhin, "Ehe! Lo kal rawh.. I tha deuh tawh mi? " ka lo ti sawk sawk a. 

Thutthleng seiah chuan ngawi rengin a thu a. Ka hmarcha rawt lai chuan, "U Vl, (khaw mite hian Vanlal tih tawp aiah VL tiin min ko tam zawk) kei chu thih daih mai ka chak" a ti ta phawng mai a. Ka va melh nghal vat. 

"Eng thu nge maw i sawi le? Eng vang chuan nge thih chu i duh a? " ka ti hâ a. 

A chil a lem khawlh a. 

"Khawvel hi a tenawm em alawm" a ti sap a. Ka bangbo viau mai. 

"Bialpa i nei em ni? Mate" ka ti dam thlap a. A lu a thing nar nar a, "A teuh lo, bialpa ka nei peih teuh lo.. Hun khawhralna mai mai" a ti tlat bawk si. 

"Enteh, harsatna eng emaw tak i neiin ka hria. I sawi hreh loh chuan, ka ngaithla thei a nia" ka ti a. 

A ngawi vang vang a, a mit a khap sak sak ringawt. 

"Ka rin ber chu i ni alawm. Mahse, ka sawi thei lo. Nakinah i la hre ve mai ang" a ti ringawt a. A tho a, koh hman rual lohin a tlan chho leh daih. A va hrilhhaithlak e aw. Chumini chu Inrinni a ni a. Ka senior ve ta nge ni, chaw ka han ei tur chu chaw la lo la chhum reng reng lo mai a. Ka chhum chawp leh chuk chuk, keimahin ka nui vur vur reng mai. Khawm pawh ka inkhawm hman ta lo. Mahnia awm e ti lo hian eirawngbawl te hi ka peih phian a, chaw ei loh ngawtte, noodles chawa rin ringawtte hi ka ti ve ngai lem lo. Dar 8 a la ri lo deuh ang tihin, Dina a rawn lut a, "Mateii a rawn kal na nge? " tiin a hawi kual a. 

"Tlaiah kha chuan a rawn kal a, ngati nge? A awm na nge? " ka ti vat a. 

"Umm, zanriah ei kham hnu lawk khan a chhuak a,a rawn haw mai si lo va, ka nu ten zawng rawh an tia" a ti mai a. 

"A inkhwm chu a ni si lo a maw? " ka tih chuan, "Kekawr nen alawm a chhuah" a ti mai a. Tlaia a awmdan ka ngaihtuahin ngaihthatna chi niin ka hre lo va, "I nau hian eng emaw tak mawlhtu a nei a ni. Zawn hmuh vat a ngai a nih chu" tiin ka va inthlak sawk sawk a. Kan chhuak dun ta a. Inbe mang loin khawlai velah te kan han zawng ru deuh a, an chhungkhatte inah te pawh kan lut a, hmuh tur reng a awm lo. Ina kan va let chuan dar 9 a ri thuak tawh. Nu Mali chu a lo phi sek tawh a, pa Biaka pawh a buai ru hle tih a lang reng mai. Pa Faka pawh kan thlen hnu lawkah a rawn thleng a, "Ka hmu hauh lo" beidawn hmel zet hian a ti a. Ngaih a tha ta lo. A phone lah a keng bawk si lo. 

Pa Biaka'n Pa Thanga a biak lai takin kawngka chu a rawn inhawng rawk a, Sensiari ngei mai chu a rawn lut ta zan zan a. Kan phawk hlawm viau mai. Pa Biaka chuan phone dahin a fanu chu thinrim hmel lek lek hian a melh a,"Khawiah nge i kal a? Kan buai hmannzia i hria em? " a ti fak a. 

A pa chu a melh zawk a. "Ka intihahrh lawk alawm" a ti zawi sap a. A roomah a lut nghal. Kan hrilhhai tlang a ni e. Engvanga hetia awm hi nge maw anih le..? Khata tang phei kha chuan an veng ru deuhin ka hria. A tul ve bawk a. Kei tak pawn ka ngaihtuah leh vak zel. Ka lo ngaina tawh viau a ni maithei. 

Nilaini a ni a, School-a kan awm laiin vengthlang pitar thih thu an rawn puan vangin keini pawh chu chawhnu class kan off zui ve nghal a. Sensiari te inah ka peng zuai a, amahin a lo awm a. "Zanin chu tlaivar ve ila" ka ti a. Min rawn melh kawk a, "Aih, thil tih tur pawimawh tawk ka nei a" a ti a. Eng tak ni ang maw.. Ka sawm zui ta lem lo. Zan lamah ka kal dawn tho tiin ka insu a, Tui connection nei lo mah ila, ka in thlang lawk hi tuikhur a ni a, zia tak a ni. Tui a tha si. 

Zanah chuan Dar 9 bawr velah Tpa leh Nunzira te nen mitthi in lam chu kan pan a. Anni hi ka inleng hlun te an ni a, min ngaizawng si loin inpawh takin kan inkawm thin. Hmeichhe thian chu nei ve bawk mah ila, kawmna hun hi ka nei ve tak tak lo nen.. Kan inzui vak lo. An lo awm nual tawh a, kan lut ve nghal a. Zai pawh a nuam viau e. Zunram thiara vawi khat kan chhuak zawk bak kan thu ve char char a. Zing dar 4 a ri hnai, leilung pawh a lang ţan tawh tihin, YMA president thu lai chu tlangval pakhat hian a rawn bekbawr sur sur a, President hmel landan chu a danglam nghal kawk. An chhuak nghal vut a, ngaihbel theih tur hian pawnah chuan an phusa deuh niin ka hria. Kan zai zawhah President chu rawn lut lehin, "Hei le.. Chanchin duhawm lo tak kan dawng a, a zia lo khawp mai. Pu Biaksanga fanu Malsawmsangi, Sensiari chu nichin lawkah khan a boral a ni" a rawn ti ta mai le! Ka va pháwk tehreng em.. Kan phu suau ni berin ka hria. Kan phun sup sup bawk. Kei pawh hmanhmawh takin ka chhuak nghal, Tpa te pawn min rawn zui nghal a. Thalai tlaivar a zatve zet chu Sensiari te in lamah kan tleh phei nghal a. Kan va thlen chuan, Nu Mali a lo tap rawi rawi tawh a, thenawm pa leh va thleng hma zual ten in chu an lo singsa vel mek bawk. Mak ka va ti tehlul em.. Chet ve ngaihna pawh ka hre lo. Sensiari an zalhna lamah chuan ka phei nghal a, Thenawm nu ho bakah Pa Thanga nupui leh fate hoin an lo kil thap a. Sensiari chu muhil chiah chiah hmel a pu.. Chei pawh an la chei lo va, thlak pawh an la thlak lo. Ka zuh bawh rawp a, ka ţap ve ta chiam a. Awih a har em a ni. Ka hrilhhai takzet. Nu Mali lah a tap bang thei lo. Pa Biaka meuh pawh patling e ti lo chuan awrawl chhuahin a tap ve zawih zawih a, an fanu neihchhun a ni si a, a awm viau a ni. An han insingsak fel hnu chuan, Pa Biaka chu Pa Thanga'n a bia a, "Postmortem dawn chuan a hla angreng si a, engtia tih chi nge mawni dawn le" a tih chuan ka beng a verh zawk mai. Postmortem ngai a nih chuan a thih dan a pangngai lo tih a lang reng. Khaw thenawmah chuan PHC chu a awm a, mahse, an postmortem thei lo. Hmun dang pan a ngai dawn a. Chuvangte pawh a niang, Pa Biaka chuan, "Report thehlut lo mai ang. A buangbarthlak dawn em mai. Chhiat tawk dang an awm ve bawk nen" a ti a. Kan thut fel hnu deuhah Pa Thanga chu dingin, "Hei le.. Rin phak loh thil a thleng ta tlat mai. Kan fanu, Sensiari chuan hun lo takah khawvel a chhuahsan ta reng mai a. Mak inti tih kan hria. Keini pawn mak kan ti. A ruang hi an kawmthlang, an ek in khur bula theihai kungah khuan a lo inkhai a, A û Dina mitthi lumen haw in a rawn hmu a, ani Dina hi naktukah Lawngtlai lamah kal ngei ngei a ngaih vanga rawn haw hma a niawm e. An in bul zawngtah kung bula a zun laiin theihai zara mihring inkhai chu a zuk hmu ta a, a farnu a ni tih pawh a hre bik lo, in chhungah lutin a pa te a kai tho a, an zuk en nak chuan kan fanu Sensiari a lo ni a! A rapthlak a, a hrilhhaithlak takzet a ni. A chhan kan hre lo va, lehkha a hnutchhiah lo va, tuman a chhan reng reng kan hre lo a ni. Inlo hriat tawh angin tun hnaiah Mateii hi a awmdan a danglam deuh a, a pa nen phei chuan inentirturin kan ti fo a, mahse, a duh tlat si lo va, tihian kan rin loh leh beisei loh lutukin ama nunna ngei chu a la ta chu a nia. Keini lam tan chuan sawi tur a vang duh khawp mai" a ti dap dap a. Sensiari a inawkhlum a nih chu! Rin harsa ka va ti em.. Mahse, a hmaa ka bula a awmdan leh a tawngkam zawng zawng ka ngaihtuah let chuan a awm tihna ka nei deuh. Depression a lo nei reng emaw ni dawn le.. A pawi em mai. 

Mitthi pahnih an awm tak avang chuan Branch YMA lam pawn a section in an then ta tawp a. Pitar ai chuan thalai, nula lehnghal chuan ngaihpawimawh a hlawh deuh e. A mi den dan hi a na ve tlat a tin ni. Kei pawh Sensiari ruang chu ka kalsan lo tihtheih a ni. Nu Mali lah a khawng titih reng bawk a. Dina pawh kil khatah ri mang si loin a lo tap khur ve ngawt ngawt mai. A u leh a naute pawh an rawn tlan haw nghal a. Ka hmuh hmasakna an ni. An rawn tap nasa khawp mai. An farnu neihchhun kha a ni miau a. A u te kan nghah ve deuh bawk vangin an vui tlai hlek a. A thlan pawh an lai thuk khawp mai. Tichuan, Malsawmsangi chu vui liam a ni ta a, lei hnuaiah a taksa chu zalhin a awm ta. 

Chauh pawh sawi theih ni hek lo, mikhual leh chhungkhatte eirawngbawlsakin kan phe leh char char a. Zanah chuan chau tak ka ni. Ka meng hleithei lo. Khawhar in riak pawh an thahnem khawp mai. Kei pawh khum ka deh rual rualin ka muhil nghal. Ka harh chuan khua a lo var iar tawh. Ka in luah neitute an ni bawk nen, School pawh ka chawl ta rih a. Min hrethiam khawp mai. A thlan nghah niah pawh mi an thahnem khawp mai. Zai erawh a nuam em em lo. A thih sarhu lai chu buai ve tak ka ni. Amah ngaihna leh han ngaihtuah zuina hun pawh ka nei meuh lo. A thih atanga ni 4- a liam tawh tihin thil mak chu a thleng chho ţan ta a. Khawhar in riak pawh an la awm thap. A thih cham thleng an riak thin a lo nia, an titha khawp mai. A lum em vangin ka mut hmain ka intleuh zuai e ka tia, ka intleuh zuai zuai a, bathroom hi a chep deuh a, thlang lam ventilation hi a lehlam darthlalang a keh vangin pawnchhia ka hnawh tut a. Ka intleuh mek lai chuan a rawn thaw lut huk a, ka pawnchhe hnawh kha a lo tla daih a lo nia. Ka zawng chiam a, ka hmu zo lo. Pawn lamah a tla a ni maithei. Towel-a intuamin ventilation hnuaia darthlalang hlai lutuk lo ka char behah chuan ka va inthlek thuak a, ka hawi let rang kher mai. Ni e, ka va inen khan ka hnungah min hnungchhawn zawnga mihring ding niawm tak ka va hmuh vang a ni. Mahse, thil hmuhsual ching tak ka nih vangin ka hlau lem lo va, ka chhuak zui mai. Ka inhruhul sawk sawk a. Ka inthlak hnuah ka mu ta thek a. Bawkkhup chungin Bible ka chhiar leh thuak a. Ka tih ziah dan a ni ve a. Ka chhiar zawhah ka thu a, ka tawngtai a, chutia ka tawngtai lai mek chuan ka beng bulah, "Vanlal" a rawn ti sep a. Ka meng káwk! Ka tawngtai pawk kha ka zo hman lo. Ka bengah khan a rawn ri fiah lutuk a ni. Ka hawi kual a, ka beng chhe ri a ni maw ti rilru chungin tawngtai zo ta chuang lo chuan ka mu ta a. Phone ka khawih leh a, Groupa news vel ka chhiar laiin ka khum 3/6 ft chu a ri tek a, bang lam hawia phone en kha ka nia. Ka sir awlah chuan mi rawn mu ve niawm tak hian a ri deuh tek tek mai. Ka hawi let vat a, tumah ka hmu lo. Khum chu a che deuh lawih a, ka thu chhuak hlawl. Light ka la off lo bawk. Sawi tawh angin mahnia awm thang ka nih vangin ka dawihzep hran lo. Thlahrang, ramhuai hi an awm pawh a ni ang a, mahse, min tihbuai ngam ka ring ngai lo. Ka tihngaihna hre lo chuan tui ka in ringawt a. Ka mut chhuak kha a bo duak bawk si. Ka mu leh ta phawt a. In chung thawm erawh a reh dûk. Dar 10 a pel fel tawh a. Light ka off a, data off-in phone chu lukham hnuaiah ka rawlh a. Ka maimichhing ta vang vang a. Mahse, ka beng bulah bawk, "Vanlal" a rawn tih leh takah chuan ka meng chiang ngang mai. Choka lam light ka on tho vangin room chu a thim em em lo va. Tumah ka hmu bawk si lo. Eng emaw dik lo chu a awm niin ka hria. Ka room lamah hian bathroom a awm a, a remchang phian. Ka va zung leh ta ngawt a. Darthlalangah erawh ka inthlek duh ta bik lo. Thosilen hi ka zar ngai lo va, a lum bawk nen, thosi an awm lem lo bawk a. Bathroom atanga ka chhuak chu ka thosilen chu felfai zet hian a lo inzar a, a lo inbilh thlap vek a nih chu! Chhei! Ka la hriat ngai loh hlauhna chuan min tuam tan ta a. Mak ka ti bawk si. Thosilen chu keuin ka mu ve leh mai a. Ka kawmthlang ri rawk rawk ka hre zui nghal. Ka room thlang lawkah hian Theihai kung, Sensiari inawhhlumna pawh kha a ding a. A ri sun sun a, theihai kung niawm tak chu a insawi tan ta a. A tirah chuan engah teh vak ka ngai lo, mahse, a insawi nasat tak em vang chuan ngaihthat nan tiin tiril khur ru siin tukverh atangin ka zuk bih ta a. Theihai hi a lian lutuk lo va, lawn mai pawh harsa vak lo tur a ni. A kakpuiah tak chuan mihring niawm tak hi a lo thu a, min hnungchhawn zawnga a thut vangin tu nge a nih ka hre lo. Ka sehhelna a chhuak thut ni tur a ni. Tukverh chu ka hawng rawk rawk a, "Tu nge? " ka zuk ti a. A che eih lo. A rawn hawi hek lo. Ka en reng lai chuan ka mit a vai nge amah zawk chu a ral tial tial niin ka hria. A bo ta daih mai. Hlauhna chuan min tuam ta hlup hlup mai. Ka khum lama ka va let leh chu ka rak tuar.. Karei! Thosilen inbilh fel thlap chhungah chuan mihring a lo mu ve reng mai. A sam chu a rawn lawr a, mahse, a taksa chu puanin a khuh vek. Ka khur nasa lutuk a, chet lak nachang ka hre lo. Ka melh reng ringawt. Au chhuak turin ka aw chu a chhuak thei hlawl lo. Pawna tlan chhuak turin ka pen thei hek lo. Kawngka an rawn kik dawt dawt a, ka harh chhuak hlawl.. Ka che thei ta, a ranga rangin kawngka chu ka va hawng a. Dina a lo ni. 

"I rak tuar thawm kha ka hria a, eng nge a? I tha em? " a ti nghal. Dina chu pawm chawih mai ka duh hial.. Ka kai a, roomah ka kai lut a, ka khum chu ka kawk va.. Mahse, mak tak a ni. Ka khum chu a lo ruak hiai a, thosilen a inzar hek lo. Rizai pawh tha takin a lo inthlep fel at mai. Mak ka ti lutuk chu tawng ngaihna pawh ka hre lo. 

"Tumah an awm loh saw" a ti sup a. 

"A awm.. A mu a. Engtin nge tiang hian a awm theih? " ka ti nawk nawk a. Min rawn melh vung vung ringawt. Ka mu ngama ka rin loh vangin, "Din, lo riak ve mai teh a.. Khawngaihin" ka ti ta tawp a. A bu nghut. Choka lama thutthleng seiah chuan mut a tum a, "Aih, thutthleng kha tah hian zawn phei mai ang" ka ti tlat. Tawngmawh tih takah a bu nghut ringawt a, thutthleng sei chu zawnin ka khum bulah kan dah a. Tah chuan a mu dawn a ni. Tlemin ka tha khur pawh a zia deuh e. Tawng tawh lem loin kan mu a. Dina huhang a ngam lo nge kan huai pawh chu a rawn lang zui ta lo. Kei pawh ka muhil ve thei hram e. Zinga ka thawh chuan Dina a lo awm tawh lo. Ani hi chu a tho hma thin hrim hrim a. A chungah ka lawm khawp mai. 

School ka thlen rual chuan, Sir Chhana chuan, "Vl, in inchung nula chuan thawm a nei deuh a ni maw? An sawi tlat" a lo ti nghal ngawt a. Ka hawihai deuh. 

Sir Vala chuan, "Nia, an sawi tlat. Kan nu nau Mama te pawh an thian dunin an va riak ve a. Thawm neuh neuh an hre ve aniang.. Mahse, an sawi vak duh lo a" a lo ti vat a. 

"Ka hre ve miah lo.. Chutiang chu" ka ti tlat. Zan lama ka thil tawnte kha ka sawi chuan, Sensiari chhungte tan a mualphothlak dawna ka hriat vang a ni. Bakah nau anga ka lo en ve kha, "A thla a hrang" tia an sawi ka phal chiah lo a ni. Anni pawh chuan an sawi zui ta lem lo. Mut ka kham meuh lo va, vawiin zet chu engkim chu a boring hluah hluah. 

In chhung ka lut chiah chu ka uak nghal tuarh. A rim chhe bawk a ni. Tukverh ka hawng vat vat a, a la reh hleithei lo. Sazu thi te hi ka lo kawl reng mawni dawn ni. Sazu thawm ka hre ngai si lo. Engahmah ngai lo luiin eirel ka buatsaih a, Bawkbawn ka chan lai takin ka phone a rawn ri a. Ka han en nak chuan ka phone ka thlauh bawl! Sensiari hnen atangin call ka dawng nia! Ka thlauh rual chuan phone ri pawh a tawp ve hmak. Chemte keng chungin in chungah ka tlan chho a, Nu Mali'n hmarcha a lo mal mek a, "Nu Mal, sensiari phone kha inphum tel tiraw? " ka ti a. Ka thaw hluam bawk. Mak tih hmel deuh taka min rawn enin, "Aw phum tel e. Ti nge ni ta? " a ti a. Min melh chîk hle. 

"Aa.. Ka ti mai mai. Ka phone chu a chiang vak tawh lo va, inphum tel loh chuan ka lo hmang rih dawn mawni ka ti mai mai mawle" ka ti niah niah a. 

"A va zia lo ve aw. A pa khan, 'Phum tel vek ang. A phone hi a ngaihlu thin si a' a tia. Kan phumtel ta vek anih kha" a ti a. Engmah sawi tawh loin ka chhuk lehnghal. Ka phone chu chharin miscall chu ka en a, Sensiari number reng reng a lo awm lo. Mak pawh ka ti tawh lo. Rin dan ka nei tawh. Ka intihpachan a ngai dawn hlein ka hria. Chaw ei pawh a tui meuh lo. Dina lah chu Lawngtlai lamah an mamawh tawh em vangin a kal daih si, riahpui ka nei dawn ta lo. Mi han sawm chawt lah ngaih loh lamah an ngai ang tih ka hlau bawk si. Ka hlauh viau tak leh TPa emaw Nunzira emaw ka sawm mai ang. Zan tirah ka han leng chho ve a, thenawm khawveng an la chuangkai nak nak reng a, an khua pawh a la har em em bik lo vang chu. Ka haw tur an kawt ka thlen chuan, Pa Faka hi a rawn thleng ve chiah a, "I haw dawn mi? " a ti a. Zu rim a nam leh deuh. 

"Aw.. Ka mut a chhuak deuh tawh' ka ti mai a. 

"Nizan i rak thawm kha ka hre reng, Dina a lo kal tho sia ka tia, ka rawn kal ta lo mai a nih kha. Buaina a awm chuan min rawn ko hreh suh aw" a ti a. Ka thla a muang sawt mai. 

In chhung chu ţi ru deuhin ka lut a. Sensiari thih hlimchhawn vang nge in leng lah hi ka nei ta vak lo a, a khawharthlak angreng. Ka hmai ka phih a, ka ha ka nawh mek laiin room lama bathroom kawngka chu a ri thuai mai. Ka phu zawk a. Ka va thlek dak dak a, a lo inhawng huai a. Ka kalh ve reng kha a ni sia. Thliin a chhem hawng a ni maithei. Ha ka nawh zawhah cream te ka inhnawih zawh hnuin Bible ka chhiar leh a, Rilruah a lut mawh viau. Bible ka dah a, ka tawngtai a. Mahse, ka tawngtai mek laiin kawngkapui ka kalhna ri rak leh choka chhuata pen thawm niawm tak ka hriatna chuan ka tawngtai a ni tih min theihnghilhtir thei hial. Pen thawm chu uluk zetin ka ngaithla a, thawm dim em em, mahse, ri lo thei si lo va pen ri niin ka hria. Ka lo nghak tawp mai. Mahse, roomah a rawn lut duh reng reng si lo. Meng chung chuan Pathian ka au ta mawlh mawlh a. Ka hlauhna a reh phah chuang lo. Bible chu ka lukham sirah dahin, ka khawih pah reng bawk. Phone pawh ka en lo. Nizan lama ka mut that loh vangin ka mut chu a rawn chhuak chiai chiai a, men luih a harsa. Ka maimichhing a, ka muhil zui a niang. Mumang pawh ka nei lo. Tiharhtu awm ang maiin chiang mangkhenin ka harh a, a lo thim vek. Current a thim a ni ngei ang. Phone ka dap a, flash light ka on nghal a, ka zun lah chhuah namen lohin a chhuak a. Ka va zung a, ventilation kua atang chuan thli a rawn thaw hur hur a, hnawh leh vat a ngai a ni. Melh loh hram ka tum bawk. Mahse, mihring hi kan hlauh hian kan thil hlauh tak kha en kan chak thin nge ni, ka chhuah dawn chuan ka han melh hram a, ka ding chawt. Mit lian kel kawl pakhat chauh hian ventilation darthlalang keh them atang chuan min rawn bih kur mai.. "Awiwiiwiw… " ka rak dan tak kha ka hre lo, chu mit chu a la khap fuk zui.. Mi râp lutuk kha engtin chiah nge ka awm ka hre lo. Ka tlu niin ka hria. A bak ka hre zawm lo. Ka harh chuan ka khumah ka lo mu tawh a, Pa Biaka leh Pa Faka ka han hmu nghal. Ka thaw hawk a. 

"Eng nge i hmuh? I tha em? " Pa Biaka chuan a ti nghal var a. Ka thil hmuh kha ka ngaihtuah let zawng pawn ka mur ur ur mai. Ka tawng chhuak thei lawk lo. 

Pa Faka chuan, "Kawngka kalh lo tea i mut reng reng.. Light lah i off vek bawk si" a tih chuan, kawngka ka kalh chianzia leh light pawh ka la off hman lohzia ka hrechiang. Tu emaw chuan he thil hi a ti ngei a ni. Khua a var zui ta bawk a, Pa Biaka te ka tibuai hle mai. A inthlahrunawm. Khamini atang khan min zuitu leh a ruka min enthlatu nei ni hian ka inhre chho a, engmah nuam ka ti thei tawh lo. Mahse, inleng ka nei chho leh tan a, tlangkam atangin Sensiari thla a hrang an tih thawmte ka hria a, an ina riak ho sawi dan te pawh. Mahse, thawm bak an hre lo. Kawngka inhawng tih te, pen thawm bakah a room ni thina tap thawm niawm tak an hriat thin thu bak an sawi lo. Kei pawh chu a rukin min lo sawi tho,"Sensiari thlain a tihbuai vangin zan laiah a thidang" te min lo tia. Engmah ka sawi ve duh lem lo. Sensiari ngeiin min tibuai em tih ka hre si lo va. In leng neih lai chuan a nuam a, an han haw chiah hi ka thawk a buai vek zel. Min tibuaitu awm tawh lo mah se, hlauhnain min tuam tlat vangin thinthiin ka muhil ngai lo. Kar khat chhung vel thawm ka hriat tawh loh vang chuan ka zia chho ve viau a, ka nun pawh a pangngai leh ta deuh. Mahse, Sunday zana, Zanriah an ei kham atangin Pa Biaka pumna chu a vial ngawlh ngawlh reng mai a. Kei pawh an thawm a rin deuh vangin ka han chho ve a. A thlan fim bawl tawk tawk danah a tawrh chu a na thawkhat hlein ka ring. Rang takin Khaw thenawm PHC kan panpui nghal a. An u, Aizawl atanga lo phei leh a nau tih loh kan kal vek a ni. Anni hi an la cham ve a, a u hi Rinpuia niin an teber erawh Tluanga a ni thung. Pa Biaka chu an ziahriah ei kham atangin a pum a na thut a niawm e. Doctor a lo la awm lo zui! Mahse, Nurse senior deuh tawh a lo awm a. A han check vel a, "Tlaiah eng nge inhmeh? " a han tih chuan, "Mau pa leh chakai, vawksa leh maian bai" Nu Mali chuan a lo ti vat a. 

"Pa leh chakai hmeh kawp hi a hâng lutuk a, pum hian a zo lo ve thin a. Bakah ei sual a awl.. " tiin nachhawkna niawm tak hian a chiu nghal mawlh mawlh a. Kar loah Pa Biaka pawh chu a rawn harh tan ta a. Damdawi chawh nualin a zan azan chuan kan haw leh ta nghal a. 

In ka thlen chuan dar 11 a ri thuak tawh. Ka inphih harh a, ha te nawtin mut nghal mai ka tum. Ka chhing diar diar tawh tihin ka mutna zawn thlang lam tukverh chu a rawn kik karh karh a, daidep a niang tia ngaihruat luiin ka saisir thawk a, ka chhing zui lehnghal. Mahse, bathroom kawngkhar a inhawn rik ruai ruai avang chuan ka harh leh kawk a. Ka va en a, a lo inhawng tak tak a. Light ka in pap. Zun nghal ka duh vangin ka va lut a, ka zung zo, bathroom atanga ka khum ka pan tur chu ka ding chawt. Chhuatah chuan ke thla hi a lo awm phei thliah mai. Ke lawnga rahna tih hriat takin ke zungtang thla te pawh a awm! A huh hlap bawk. Ka khum lam a pan a, ka khum bul doormat ka dahna bulah a tawp chat. Rap zetin ka melh reng a, hlauhna chuan min ranw ţham leh ta. Ka mur ur ur mai. Mahse, zan a rei tawh a, au chhuah loh hram ka tum. Ka khum chu a nghing lawih a, a chik tet tet bawk. Tu emaw chu a mu ve a ni. Khur der der chungin ka pan a, tumah ka hmu chuang si lo. "Lalpa, min pui rawh" tiin ka rilruin ka tawngtai a. Chutah ka khum atang chuan ngik feih feih, insut hlap hlap thawm ka hre ta thut! Ka va meng zau tak. Ka khum hnuai atangin nge ka khum atangin lo chhuak ka hre lo. Phun ser ser thawm chu kil tin atangin ka hre nghal bawk. Awmngaihna ka hre lo, hmanhmawh zetin choka lam ka pan a, karei! Kawngkapui chu a lo inhawng huau mai.. Ka kalh thlap kha a ni sia, ka tlan chhuak a, ka inchhuih khut khut mai. In chungte erawh an lo reh thap tawh a, han kaihthawh ka hreh si. Ka phone ka keng bawk si lo. Ka hawi ka hawi a. Mahse, ka rilruah thil pakhat a rawn lut thut. "He thlarau niawm tak hian eng nge a duh? " tih a ni. Ka hnenah sawi duh a nei a ni mai lawng maw? Ti nge mi dang tihbuai tur tam tak an awm laia kei kher min tihbuai ni ang. Pathian hnena rilrua tawngtai mawlh mawlh chungin ka chhuk leh a, kawngka pawh a lo la inhawng reng. Ka khar a, ka kalh thlap. Ka tiril erawh khur nasa tak a ni. Rooma luh chu ka hreh ngawih ngawh. Mahse, a tul ka ti si. Thawm dim zetin ka lut a. Khum lam ka va melh nghal. A lo ruak hiai a, ke rahna thla pawh kha hmuh tur a awm tawh lo. A reh lutuk chuan mi ráp takzet. Ngam leh ngam loin khumah chuan ka inthawlh a. Ka phone ka hum ran bawk. Light pawh off loin ka mu ta a. Ka hriat loh kara ka lo muhil chu ka harh leh hlawl.. Light kha ka off miah si lo va, a lo thin daih. Mahse, choka lam light chuan a rawn chhun eng ruai tho a. Ka khum mawng lama thim deuh muk chu ka zuk hmu a, ka meng kawk. Ka tal deuh awk a., light on tumin ka ban a, mahse, "On suh" Sensiari aw chiah chiah a ni. Min hmutu awm se ka dáng sáwp sâwp in ka ring a ni. Khum mawnga thim muk ka tih kha a rawn che a, a rawn inher ta a, ka hmaah Sensiari ngei mai chu a thih nia an haktir a kawr dum leh puan an bihtir puan ropui nen ngei mai khan a ding ta zuah mai le.. A hmel tak erawh engin a chhun fuh lo va, ka hmu chiang thei lo. A sam a thlah tih erawh ka hria. Ka mang vek a, awmdan tur ka hre lo. Pathianin min awmpui a, ka thidang lo mai mai zawk a ni. 

"Eng nge i duh? " ka aw atang pawn a chhuak in ka hre lo, ka rilruin ka bia ni maiin ka hria. 

"Ka pa hi venghim rawh" a ti sap a. Ani pawh chuan ka rilruah min rawn bia niin ka hria. 

"Eng lak atangin" ka ti leh a. 

"An lak atangin.. "

"Tu te maw? " ka tih rual chuan, a ri hráwk a, bathroom kawngka a inhawng a, ventilation inhawng riin a zui leh a. Sensiari hmel reng reng hmuh tur a awm lo. Mak tak maiin ka hlauhna chu a kiam duak duak mai. He thlarau inlarna phenah hian eng emawni chu a awm a ni. Eng nge ni ta ang le? 

Khami zan atang khan ka hlauhna leh mut ka hrehna pawh a bo tan a. Tin, Mipuite pawn sensiari thla emaw a thawm emaw chungchang an sawi ta ngai lo. Sensiari thu min chah mawlh khan ka ngaihtuahna a tibuai em em a ni. Engtia hmalak tur nge ka hre si lo. Pathian hnenah pawh ka dil tawp. A reh vung vung si. Ni khat chu chawhnu kan off a, Ka peng kawi a, Nu Mali te chuan dawr an lo khar a, thingpui ka'n in teh ang tiin ka lut a, a reh ruih mai. Sensiari u leh a naute kha an zirna lamah an let tawh a, Dina lah a pickup service in a buai thei viau. In leng pawh an nei tawh meuh lo. "Nu Mal, Nu mal" tiin ka ko a. A reh tlawk tlawk ringawt. Tihngaihna ka hre ta lo va, chhuk mai tuma kawngka ka pan lai chuan, Nu Mali te nupa pindan kawngka chu rawn inhawngin, Nu Mali chu mit bui lâk hian a rawn chhuak a, a chhun mut a ni ngei ang. Nu fel a ni hrim a, min be nghal bawrh bawrh a. 

Thingpui a chhuang zui nghal bawk. Kan in dun lai chuan, "Mateii chanchin an sawi dan vel hi i hre ve tawh em? " a ti ta a. An lo hre ru ve reng a lo nih awm chu.. 

"Hre ve nual e. Mahse, ka awih lo" ka ti mai a. 

"A nuam vak lo khawp mai. Kan tan pawh. Kan bulah te hian rawn inlar zawk se a tha tur. A chang chuan amah leh amah a intihhlum hi ka ring phal thin lo" rilru nat hmel deuh hian a ti a. Ka khawngaih hle. Chutih lai tak chuan Pa Biaka huan kal a rawn hawng a, Nu Mali chuan a lo dawngsawng vat. Pa Biaka chuan, "Ka awm a nuam tlat lo, ka lu pangkhing hi a rawn na leh thin a, khaw nge nachhawkna kha le.. " tiin a hawi kual a, an pindan lam a pan a, Nu Mali chuan, " Khatah a awm lo, he tah ka dah kha.. Khawmaw" tiin an roomah chuan a va lut sawk sawk a. Nachhawkna chu a rawn keng chhuak a. 

"Ngati nge dawr i khar" an pain a tih chuan, "Nizan ka mu tha lo lutuk kha ka mu mawle. Ka harh deuh tawh e" a ti a. 

"Khaw nge Faka.. Pu Huansanga te thingzai kha a thiar ta em? " a ti leh a. 

"Aw a chhuah ve kha maw.. A va thiar ve dawn aniang chu ka ti" Nu Mali chuan a ti a. 

An chhungkaw mi angah min ngai ve deuh tawk bawk a, Thingpui in pah chuan, Pa Biaka chuan, "Faka awmdan hi ka duh lo riau, tunhnai hi a rui nasa riau mai a. Ka tan han hauh vak hi a nuam thin si lo va. Dina pawn a sawi ve nuah nuah kha, a nawi thei si a, nizan hmasaah lah khan vengchhak tlangvalho nen an lo intibuai a niawm a. Hau ve teh" tiin an nu a melh a. 

Nu Mali chuan, "Ka hau ve reng. Ngati nge mawni hetia a ruih a ruih mai ni. A bialnu ve deuh nen khan an inthen mawni ka ti deuh" a ti ve mai a. Nuam ka tih chiah loh vangin ka haw thla ta daih a. 

Zanriah ka siam mek laiin in chung te ri hluai chu ka hre pha reng a. Chhungkaw buainaa inrawlh ka duh ve lo. Ka chho ta lo. Tpa leh Nunzira an rawn leng leh a, kan inbonus ta vel a, ka chal an pen sen vek. An pen na ropui si. Tpa ex-in fanu a neih thu an sawi a, chuvanga lo cool riau a lo nia! Cheng hnih thir ka kawl chu ka va phawrh a, "Kha.. Ka ral che" ka ti a. 

"I va chhe tak" a ti hluk a. 

"I lulen ang hian zei ve la, pasal dang an neihsan lo mai ang che" ka ti a. Nunzira'n, " a dik, bakah games ringawt a ngaihtuah a, tihian an bansan leh zel. A chawh" a lo ti ve a. Kan nui hawk hawk mai. 

Ruah a rawn sur thut vangin an tlan hawng a. Kei pawh mu turin ka inpuahchah a. He khuaah hian thla 4 dawn ka awm ve ta a, ngaihzawng ka la nei lo! Thianah ka chhuah zel mai. Chutiang ngaihtuaha nui ruh ruh chunga ka mu chu current a rawn thim thut a. Ka phone ka hmet eng vat. Kawmthlangah thawm ka hre zui chat. A ri sun sun a, mahse, ui te pawh an ni thei. Mahse, kar loah ka ngaihtuahna rawn lehthal thawk turin ka khum chu a rawn nghing ta lawih mai.. Ka che zawk a. Ka inrin hmain a rawn insawi ta mai a! Ka hlauhna bo ta te kha an rawn kir leh vek, ka rak chhuak tuar chuan ka hria. Mahse, tumah an rawn lang hlek lo, a chhan chu ruahsurin ka aw chu a hliah tlat a tin ni. Khum chu a insawi dawrh dawrh a. "Duhtawk rawh" ka ti tuar a. A reh ve mai. Ka thaw hlawi hlawi a. 

Khum hnuai atang chuan a rawn insùt leh ta hlap hlap a, lungngaihna nasa tak nei ang mai a ni. 

Ţap ţuauin, "Eng nge i duh? " ka ti a. Bible ka pawm bawk. 

Choka lamah thawm chu a insawn leh daih a. Ka gas te chu a ri tak a, a alh niin ka hria. A chetin ka che ngam tawh lo hrim hrim. Ka phone ka ban de de a, Tpa emaw Nunzira emaw call ka tum a ni. Mahse, a rawn thaw fua a, Bathroom kawngka chu ka kalh reng chungin a inhawng leh ta. Ka khum nen a inep chiah ka tih kha. Kawngka a hawn rual chuan comode-ah Thu kun lup chu ka va hmu nghal. Ka hmui ka hup tawp. Khatiang reng renga ka khurh nasat leh ka lungphu ran kha ka la hre ngai lo. 

Thinrim leh hlau chung chungin, "Min tibuai tawh suh" ka ti nghek a. 

A nui ta hek hek a. A nui ri rapawmzia chu aw.. Ka mit sulh a, ka lo thi dang niin ka hria. Ka harh chuan, a lo eng uar a, current a awm tawh a niang. Dar 3 a pel fel chiah. Ka thlanin min lo bual huh hnep lehnghal. Ka thu a, "Lalpa, min venghim rawh. Ka hlau em mai. Min pui rawh, min tichak hram rawh" ka ti ta mawlh mawlh a. Chutia ka han tawngtai takah chuan, ka hlauhna chu a thep ta suai suai a, chawp leh chilha Pathian chhanna ka dawng chu Pathian hlutzia ka hriatthar phah hle. Tui takin ka muhil zui ta a. 

A tuk tlai School ka bang chu Pa Biaka te kawtah chuan an lo awm deuh niai a, eng nge awmzia ka han zawh chuan, "Faka a buai thut a, damdawiinah an phur thla a nih kha" an ti a. A va mak e aw. 

Mi an tin deuh hnuah ka han chho ve leh a, Pa Biaka chuan Nu Mali a lo hau a. "Thingzai pu turin a kal emaw tih nak alaiin tikhan zu a lo rui leh mai mai a, hetiang reng reng chu ka peih tawh lo. A hrawk kan chawm tawp a, a thawh theih ang ang pawh tih a tum si lo. A inhlawh ve lahin a hlawh pawisa sen khat pawh kan hmu ngai lo va, hmuh a hnekin a zu ruih nan a hmang lehzel a. Inthlahrunna reng reng nei bawk si lo" a ti hluk hluk a. Pa Biaka te ang pa zaidam tak thinrimna chu a awm ve viau ang ka ring. Nu Mali pawh chuan sawi vak tur a hre lo a niang. "Kei lo belh tur a nei bik si lo a nih hi" a ti ringawt. An chhungkaw boruak a nuam vak lo hle. Pa Faka erawh zan khat a zu riak a, a tukah a rawn haw leh nghal a. A zu in nasat vang a ni maithei ni. Ni 2 vel chu a mu ta deuh reng a. Pa Biaka pawn eng a sawi zui lem lo a niang. Amah lah hi pa taima rumrut chi kha a ni ve a, inah a awm ngai mang lo tihtheih a ni. 

Vengchhak lamah rei tak dam lo tawh Pi Hliri a boral leh hlauh mai a.. Ka hre ve chiang vak lo naa, tlaivar em lo pawha han lan ve ka tum tho. Khua a te a, kan inhre pawh vek nen. A nuam lo. Nunzira ten min lo sawm leh a, an bialnu te pawh an sawm. An la naupang ve lehchhawng a, nuam ka ti vak lo. Mahse, kan inkawm bawrh bawrh tho a. Zai a nuam khawp mai. Dar 1 pelh velah chuan ka pum a nuam lo riau mai a, ka ek te a chhuak ut ut mai. Nunzira te bulah,"Ka hawsan mai ang che u aw. Ka pum anuam lo tlat" ka ti a. 

"Thlah i ngai em? " an ti var a. Mahnia haw chu ka hreh ve deuh a, ka bu nghat. An pahnih bawkin min va thlah a. Inah ka chhuk nghal. Pa Biaka kha ka haw dawn pawh khan ka la hmu a, Nu Mali chu amahin a mu ngam aniang chu maw. Pa Faka pawh zan tirah kha chuan ka hmu ngei mai. Dina erawh Siaha lamah a kal leh tawh thung. 

Ka inthiar a, ka nuam huai mai. Ka sawhchiar ei kha a ni maithei. Zan a rei tawh a, thawm pawh a ring hma viau. Ka hmai ka hruk hul lai tak chuan ka chung zawn chiaha thawm chu ka hre ta a. Nui har har ri a ni. Ka beng ka chhi nawn leh ngat a.. Nu Mali nui ri ni tlatin ka hria. Chutah phun sur sur thawm ka hre leh a, eng nge a sawi erawh ka hre lo. 

"Ka tum ve alawm.. Bakah Mateii thihna a la rei lo va, kan chet vat chuan, miin min ringhlel ang. Hman zan pawh kha ka hlauhthawnzia chu a.. Pa eisual anga an sawi kha ka lawm lutuk" Nu Mali aw chu a sin vang ni maw ka hre pha. Ka ngawi ngawt ngawt. Ka thu hriat chuan awmzia a nei tih ka hrechiang em a ni. 

Pa Faka aw ngei mai hian, "Hmanni kha chu min man teuh ther ther teh e. Roomah khan rawn lut se kan nasa lo khawp ang" a ti sur sur a. Engkim chu a chiang ta. Ni e, a va chiang tehkuar em. Mahse, rapthlak ka ti lutuk. 

"A tlaivar ve leh dawn kha. Pa tlawmngai tih takah.. " Nu Mali'n a tih rual chuan, "Zankhuain hun kan nei tihna" Pa Faka'n a ti zui zat. Ka luak a chhuak ut ut. Ka rinphak loh thil tenawm leh rapthlak lutuk avang hian a nih hi Sensiari thlarau a chawlh hahdam theih loh ni.. A va mak ve. Khumah ka thu a, tihtur reng reng ka hre lo. Pathian puihna ka dil leh ta chawt mai. 

Tunah chuan hmalakna tur ruahmanna ka nei ta a. Engkim chu Pa Biaka hrilh ka duh laiin, fiahna ka nei rih si lo va, ka la ngawi rih. A pasal thlimin a nuta nen nuam an chen thin tih hi Nu Mali hmel enin rin a harsa thlawt a ni. Nu fel tawpkhawk a ni asin le.. Mahse, sual hi a chak em a ni. 

Sunday chawhnua an ina ka lut chu ka beisei ang ngeiin Pa Faka nen an lo awm a, Pa Biaka erawh a chhuak. 

"Awii nizanah Sensiari ka lo hmu a, ka mumangah.. Ka ngai lutuk. Thil mak deuh min hrilh lehnghal a" ka ti ta a. An phawk hrâ mai. Nu Mali chuan, "Eng thu nge Mateii chuan a sawi? " a ti vat a. 

"Ka pa hi min venhimsak rawh" a ti mawl e. " ka ti a. Thawk an la hawk tih ka hre thei. 

Pa Faka chuan, "A va mak awm ve. Chutiang ber kher chu.. " a ti ban chhalh a. 

"Kei chu Nu Mal, Mateii kha amaha a intihhlum ka ring lo.. Thah a nih ka ring tlat a ni. Keimahah hian rinhlelhna a awm tlat, Pa Biaka hi hrilh a, FIR thehluhtir leh hnuhnawhte hi ka duh ngawt mai. A thattu chu zalen takin a leng mai mai awm sia" ka ti ta mawlh mawlh a. Pa Faka nen an inmelh zawk. Ka chik si a, engmah hmuhhmaih ka tum lo bur. 

"A ni thei dawn mawni le.. Tu chuan nge lo that duh ang? Ka fanu pawisawilo kha" Nu Mali'n a tih chuan, ka uak lo chauh. Ka ten tih hi ka zep buangbar lo mai teh ang. 

"Zaninah ka mumangah hmu leh ila ka ti ngawt mai" ka ti a. Ka chhuk thla daih. An ngaihtuahna chu a buai ve khawpin ka ring. 

Inkhawm turin Pa Biaka ka kal rualpui thei ta hlauh a. "Pa Biak, banah min lo nghak la, thu pawimawh deuh sawi tur ka nei a" ka ti ta a. A bu nghut mai. 

Banah chuan gate-ah min lo nghak ran a. Muangchangin kan haw a, mahse, mi veivak an awm ve reng vangin ka inah ka chhukpui a. Engkim a bul atangin ka sawi ta vek a. A sen tawlh tawlh mai. A kut a hum ruh nasa bawk. Ka khawngaih hle naa, sawi zawh ka duh si. A tawpah, "Sensiari pawh hi an thah a nih ka ring a, chumi hrechhuak tur chuan nang hian min puih a ngai a ni. Lo insum hram hram rih la, a hma ang khan enliam rih la, naktukah ruahmanna ka rawn nei ang. Khawngaihin i fanu vang pawhin inthunun hram hram ang che" ka ti ta a. Patling, invawng tak a ni bawk a. A thei ngei ang tih ka ring. 

A tukah chuan ka school bang ka peng kawi leh a, Pa Biaka pawh a lo awm. 

"Vl, i sawi ang khan FIR chu ka thehlut ta mai e. Naktukah police an rawn kal dawn e" a lo ti chat a. 

"A that nasat chu, tuathattu hi an man chhuak ngei ang tih ka beisei tlat a ni" ka ti a. 

Nu Mali chuan, "Vl, engtin nge maw an han chhui vak ang le? A thihna a rei ve leh deuh tawh sia, man an harsa awm mang e" a ti a. 

"Ka mumang ka hrilh dawn alawm. Mumang pawh hi a rintlak ve fo ania" nui chungin ka ti a. Nu Mali mitmeng a danglam zawk. 

Pa Biaka pawh chuan, "Ni e, kan mi rin em em te pawh hi min vit hreh lo an lo ni fo zel a, mateii thihna phuba hi chu lakin a awm em em ang" a lo ti a. 

"Eng nge i mumang chu, min lo hrilh ve" Nu Mali chuan a ti vat a. 

"Aa.. Sawi darh chi pawh a ni rih lo. Nakinah i hre mai ang. I rin loh deuh a ni ve maithei a ni" ka ti nghat a. Ka chhuk ta daih. Khatia a ngaih tihthat loh kha kan tum ruk a ni sa reng a. Tin, Pa Biaka chu fimkhur turin ka chah nasa viau bawk. Ei leh in kawngah pawh. An dahbo ve mai ka hlau a ni. Zanriah ka ei dawn mek tihin Dina a lo chhuk a, Bowl-in maian bai a rawn keng a. "Kha ka lo suah che " a ti leh tawp. Maian bai ka ei chak lai tak a ni bawk a, ka lawm hle. Mahse, ka fimkhur seng ta lo kha a pawi thelh a ni. Ka maian bai ei lai siamtu chu Nu Mali a ni tih ka hriat chhuah meuh chuan, ka ei zo ruai tawh. Ngaihtha lo zetin thleng ka sil rawk rawk a. Ka lu rawn hai ngjal chiai chiai chu ka ngaihbel pawh a ni maithei e. Tpa ka call a, "Lo kal vat teh" ka ti a. Chaw an ei kham veleh a rawn kal nghal zat, Nunzira erawh zan len an deng daih a. 

Thil nih dan leh awmzia zawng zawng chu ka hrilh ta vek a. "Zaninah hian eng emaw tak tih an tum ngei ka ring a, chuvang chuan min puih a ngai a ni" ka ti a. Mak a ti ve khawpin ka hria. Mahse, zawhna inzawh hman a ni tawh lo, an duh dan anga chettir a, Tpa hmanga fiahna neih mai lo chu kawng dang kan nei tawh lo. Birukna a vang si. Bathroomah ka tawmtir ta ngawt a. Ruah a sur cherh cherh a, ka lu hai pawh a nasa tawh viau. Ka pum erawh a na lem lo. Tu emaw ka nghak ta ngawt chu a nia. Khumah ka mu bawk. Kawngka ka kalh lo bawk. Lo kal ngei ngei se ka duh a ni. An game-ah ngei hian awk se ka duh. Dar 9 a ri dawn hnai, TPa pawn a ning tawh ngawt ang tihah thawm dim zeta rawn pen lut chu ka hre ta a. Ka meng thei tawk tawk a ni e. Ka mut a chhuak lutuk, ka nunnain a tuar ang em tih erawh ka la ngaihtuah ve hram hram tho. Thih chu ka la duh bik lo a ni. Pa Faka ngei chu ka roomah chuan a rawn lut ta a, muhil angin ka lo awm. Min vit thut ang tih erawh ka hlau khawp mai. Ka lu chu a rawn sawi a, ka zawi vek si, ka mu nghet hle nia a hriat hnuah ka rin loh lutukin ka thawmhnaw chu a phelh ta mai a, eng nge tih a tum tih chu hrilh nawn ka ngai lo kher mai. Ka kekawr a phelh leh dawn lai tak chuan ka rak ta tuar a, ani pawh a phu zawk. Bathroom kawngka a rawn inhawng thut a, Tpa a rawn chhuak a, pa Faka chu a bawh nghal rawp. Kei chuan Pa Biaka ka call nghal a, Dina nen kar loah an rawn lang ta. Nu Mali pawh a rawn lut zui ve bawk. 

"Faka, eng thil nge tih i tum? I va tenawm ve" Pa Biaka chuan a ti a. A ngawi reng. A rui viau tih pawh ka hria. 

Nu Mali chu ka va melh a, "Maian bai kha ka ei tui khawp mai. Mahse, i rawn suak tlem deuh aniang, a thawh tur angin a thawk lo" ka ti sap a. A tawlhhnung dawrh. Pa Biaka a ding chhuak a, "Thudik engkim kan hre tawh a, Police an rawn kal mek e. Malsawm, he thil hi rin harsa ka la ti reng mai. Engtin nge i tihtheih? I rilarah i fanu nunna i la a maw? " Pa Biaka thisen zam chu a pawng tawlh tawlh mai. Tpa leh Dina chuan Pa Faka chu an phuar hlawm a, a tal nasain a rak nasa mai. 

"Khawih ka tum mai chauh a ni. Sensiari thihna nen engmah inzawmna a nei lo" a ti tuar tuar a. Dina'n a chhuih ta tawk a, a awk rawp mai. Thil chu a ni nuai mai. Kei damdawi hnathawh a la reh si lo va, Tpa'n thawmhnaw te chu min hak thattir sawk sawk a, ka lo muthlu leh lawp lawp bawk. Police lo thlen lai erawh chuan, ka harh ta deuh. 

An ţang na hle. Finfiahna kan nei bik si lo. Mahse, Uirena sualah an tlu lut tih chiang taka ka sawi takah chuan, an hmel a pha dai mai. 

Tin, vawiin tlaiah kher kher engvangin nge damdawi pawlh maian bai kha min rawn suah..? A chiang tawk viauin ka hria. 

Police-in an han dawp deuh chuan, Pu Faka chuan, "Mali, sawi vek rawh. Kut i tawrh dawn ai chuan, engkim sawi rawh" a lo ti ta a. Kan thaw huai e. 

Pi Malsawmi inpuanna:

Faka nen hian unau dik tak kan ni lo va. Unau hi pathum kan ni a. Hmeichhe awmchhun ka ni. Ka nulat chhuah tawh hnuah ka pa khawthlang zin hian Faka hi a rawn hruai haw a, nu leh pa nei lo, belh tur nei lo a ni tih a sawi. Ka pa kha mi khawngaih thei tak a ni bawk a, tichua, Faka chu kan bulah a khawsa ve ta a. A taima a, a tlawmngai a, a hawihhawm em em bawk. In khata chenho tak rengah chuan, kan lo inngaina ta hial a. A rukin kan inhmu ta thin a. Chhungte mut reh tawh hnua ka bula rawn riah zauh changte pawh a nei. Chutia fimkhur taka kan awm ve mek lai chuan, Zan khat an mu vek tawh emaw tia ka bula a rawn insawn chu ka pain min man chhuak ta a. Hnungzâng duk vek khawpin min hlap a ni. Faka pawh a hnawtchhuak nghal a, mahse, Faka nen khan kan inzawmna a thuk tawh lutuk a, chuti maia pawhthen theih kan ni lo. Ka pa mangang chuan, Tuna ka pasal U Biaka rawn zin hi kan inah a thlentir a, tha taka biain min zuar a ni ber e. U Biaka lah a uaithla lam a lo ni tawh a, kei ang nula la nalh tak chu iai phal hek lo. Min hmehbel lui chawp ta a. Amah U Biaka pawn a hria ang, Mittui tla chungin a ni ka neih ni. Ka pa ka hlau em a, tin, Faka khan.. "Tu pawh nei la, ka rawn zawng chhuak che ang a, kan innei tho ang" a tih vangin ka pa te lung tihawi nan ka nei ta ngawt kha a nia. Tihian fa te kan nei chho a, U Biaka pawh pa tha leh zaidam tawpkhawk a ni a. Kei pawn ka duhin ka ngaina ve ta hle a. Faka erawh ka theihnghilh ngai lo. Tichuan, Faka chuan min lo la chhui ru reng a, khaw thenawm ami nupuiah neiin kan khua nen kan inhnaih ta viau mai a. A hmuh pawh kan inhmu ta hial a. Lo hnar ka duh em em laiin, amah ka khawngaihna leh ka thianghlimna min laksaktu a nih vang nge ka hnar thei lo. A nupui thenin ka nuta angin kei chu min rawn bel ta a, kan pa hian ka u te a hre ve vek a, a ringhlel nghe ghe. "Ka pa fa bik a nia.. A nu a boral tawh si a, a unau dangten an ngeih si lo va" tiin dawt ka sawi ta ngawt a. Ka nu leh pate boral hnuah ka u te ho nen hian kan inbe pawp em em tawh lo va. Mahse, U biaka hian ka u te chu lo biain Faka chungchang chu a lo zawt leh ngat a. Mahse, ka u te chuan, kan tunhma nun chu lo sawi ngam bik hek lo, ka sawi ang deuh chuan an lo sawi a. Min ringhlel ta lo. Mahse, ka u te chuan min rawn biain Faka chu chhuahtir vat turin min rawn vau a ni. 

Kan fate an puitling tawh bawk a, ruahmanna kan nei ta a. U Biaka hi tihhluma he ina la chen zui zel hi kan tum dan a ni. Mahse, Vanduaithlak takin Mateii khan chhuna kan mu dun lai min rawn phawk hlauh mai a! Mahse, min hmu tih kan hre lawk bik lo. A nungchang a danglam chho a, kan ngaih a tha lo tan. Mahse, engmah a sawi chhuak chuang lo va tiin kan zawt duh bik lem lo. Fimkhur erawh kan fimkkhur khawp mai. 

Tichuan, Veng thlang pitar boral zan khan kan tan hun tha tiin Faka roomah ka mu phei a, kan pa hi pa tlawmngai tih takah a tlaivar ve deuh ziah a, chutiang hun fianrial chu kan thlahlel ve ngawih ngawih a ni. Mahse, Mateii a kal ve lo tih kan lo hrechang tawh lo va. Faka rooma nuam kan chen lai chu videoin a lo cover vek mai a, kan zawh tawh hnuah ka han hmu ta a. Kan buai ta nuai mai a ni. 

Tap chungin, "Ka pa ka hmuhtir ang. Inhre viau ang" a ti a. Faka nen kan hringnun chu a tawp dawn tih ka hai lo. Ka rilru a buai em em a, Faka pawh a buai. Mateii a rooma luh a tum chu Faka chuan va kekin hnunglam atangin a rek ta a, ani taksa chak lo sa tawh chu au pawh au thei loin kar loah a zal ta der a. Tichuan, remruatna kan siam ta zung zung a. Mi reh lai tak dar 2 bawr velah kawmthlang theihaiah harsa takin kan zu khai ta a ni.. Englaimahin ka rilru a nuam ngai lo. Mateii thla pawh hi ka hmu zeuh zeuh, ka hlau a, mahse, ka sawi ngam si lo. Faka zu in nasat chhan pawh Mateii'n a tihbuai nasat vang a ni. Kan sawi ngam si lo va, tihian kan tuar tlawk tlawk a. Mahse, A tira kan tum U Biaka dah boa he in luah erawh kan la tum reng a. Mahse, Vanlali vangin kan hlawhchham ta a nih hi.. " tiin. 

A sawi zawh rualin a biang a ri thlawp.. Pa Biaka, pa zaidam thinthawk chu a na ngang mai. An chelh bet laih laih a, chuti ni lose a nupui chu a sawisa hlum duh maiin ka ring. Mi nawlpuiin an hriat hman lohin Police te chuan an pahnih chuan an la ta a. 

"Ka haw dawn aw" Tpa chuan a ti a. Dar 1 a ri thuak tawh. 

"Riak ve mai rawh. Thutthlengah mu la" ka lo ti a. 

A nui suk. Ani hi awm lo se Faka khan min khawih mahna le.. Ka tan a hlu hle a ni. 

"U Vl, ka lawm e. Engkim a dik ta.. Ka pa kha tha takin min lo enkawlsak rawh aw" Sensiari nui sen sen chu a hla tial tial a. A bo ta. Thlamuang takin chawl tawh ang che aw.. Mate..