Rosangpuia Last

ROSANGPUIA (Last)

Ziaktu: Toni Râlte

"Duatpui, tho ve tawh la" ka chalah a rawn fawp zauh a. Ka meng diar diar a, ani chu a lo tharlam leh sar tawh. Inneih tukah thawh ka hai vel chu a nia! Mahse, ka hrawn turte hi ka lo nel tawhte an nia. Ka zak em em hran lo. Ka tho a, in hnuaiah chhukin nu Madini te ka pui ve zui a. Mami te pawh kar khat vel an la cham dawn a. A hlimawm e. Pasal nei, kawppui nei ka ni ve ta reng chu a nia. Chutah pawh mizo mipa hlawhtling, lar ve tak, hmeltha leh hausa ka la nei zui a! Pathian malsawmna ka dawng nasa hle mai. Honeymoon hman a sawi ri naa, ka pa dinhmun ngaihtuah chungin ka pawm ta lo kha a nia. Bakah amah a buai ve bawk si, tihkhaihlak kha a tul berin ka hre lo a ni. Mami nen pawh laizawn ang chiahin kan inen a, Nu Madini leh Pa Zaia te lah ka lakah an felin fanu ang tak takin min en bawk. Ka dinhmun hi tupawn neih an chak ve theuhin ka ring. Rogera chu a u a la tet ve tho vangin ka awm nasa a, tihtur em em ka nei rih lo bawk nen, a nuin tihian a kalbosan ringawt chu a nia. Tui taka a muhil lai te hi lainat takin ka thlir vawng vawng thin. College kan la tan lo deuh a, Mami te chhuk hnuah phei chu kan pa hnathawkin a chhuak thin a. Tihtur em em awm hek lo, ka nute in lamah ka leng phei zeuh zeuh. In chhung khawih leh tihfai hi chu ka kutah ka dah a. Eirawngbawl erawh Nu Madini'n, "I tih ve lehzel chuan tihtur ka nei ve nang" a ti khauh fung mai si a. A inthlahrun loh nan ka chuhpui vak lo. A chang chuan dawrah ka kal ve zeuh zeuh bawk a, Hotel pawh an thawm zo thawkhat tawh a. A hawnna neih hun erawh an la siamfel lo thung. Hnathawk tur a rawih dawn chuan advertisement a chhuah a, diltu chu ka rin phak bakin an tam! Láni te pahnih kha duhsak ve turin ka hrilh hram. A hre ve reng ang chu maw. Rami pawh dil ve rawh kan ti tak naa, Ka u in" Ka nu hnaa a kal hlanin tu nge in nghak ang? Bakah Remi te pawh rawn awm phei se, Remi a hah lutuk ang" a ti deuh tlat! Hotela a bialnu thawhtir chu a duh vak lo ni tur a ni.  

Malsawma kha phaiah a chhuk leh tawh a. Kan inneih pawn rawn lang ngam tur a ni lo bawk a, a hmel kan hmu lo. Valpuia chu a bawraw sawt em vangin a pa mangangin TNT-ah a dah lut tawp a. A rawn tha chhuak ve em ang chu maw. He thil phenah hian ka hming lamrik a la nih fo avangin nuam erawh ka ti lo thin hle. Kimi pawh a hna kha a nghet lo bawk a, Zirtirtu hna a dil ve kha a tling hlauh mai a. Mahse, Reiek lamah a awm a ngai thung. Chawlhni hmangin a rawn haw zeuh zeuh thei dawn a, hna nghet a ni bawk a. Ka lawmpui khawp mai. Zami erawh a bialpa nen inneih an tintuah ve tan a, kum laihawlah an insuih ve ang chu. Cindy pawh a fa nen an inpuiah an la khawsa ve zel a. A naute leikang deuh se hna min rawn dil tur thu te a sawi ve a. Kan pa pawn a lo khawngaih ve nge Dawrah hian Manager kan mamawh dawn alawm a ti ve mai a. Cindy chu lehkhathiam anih bakah amah a hmelthain a polite a, mi a dawr thiam bawk a, Manager ni tur pawn a tling viauin ka hria. Chutiang hringnun a kual vel chhung chuan class kan tan ni a rawn theng ta a. Zingkarah ka inbual sar sar a. Tukthuan ei hmain ka insiam a, ka inchei min hmuh chuan,.. 

"Khaw nge i kal dawn? " a ti nghut a. 

"College kan tan tawh dawn alawm" ka lo ti a. A ding a, min rawn thlekin, "Kal i tum a maw?! " a ti sup a. 

"Tum" ka ti ringawt. Min rawn kuai her a, ka mitah tak enin, " Ka nupui hi ka chawm zo lo em ni? Engvangin nge hna thawh ve a tum? " a ti ta a. 

"Ban ringawt chu a uiawm alawm le.. Engmah tihtur ka neih chuan loh hi" ka lo ti a. 

"Nupui i ni. I pasal hnathawk bang lo lawma lo dawngsawng tur i ni. " a ti nghet charh a. 

. "I ngaihdan kha a hmanlai tawh. Thawh neih ve loh hi ka duh hleinem. Inthen thut te pawh a awm thei" ka tih mek laiin, "Inthen thu hi vawikhatmah sawi tawh suh" a ti thak a. Ka ngawi hmak. 

"Ka ngaihdan chuan mipa ka ni a, ka nupui fanaute tan ka thawk ang. Kei hian hnathawh nei lo ni ila thawk zawk chu ni la ka hrethiam.. Mahse, ka dam chhung leh ka thih hnu thleng pawn i rethei dawn lo"nem deuh zawk hian a ti a. 

"Mahse, engmah ka ti chuang lo va.. " ka ti a. 

"Engkim ti turin ka nei hleinem che, chhungkua min dinpuia ka kianga awm reng turin alawm ka neih che" a ti a. Nuam chu ka ti vak lo. Mahse, han ban ngawt chu a nghet lo ni tho mah ila ka ui ve bawk si. Ka rilru a insual nasa khawp mai. 

"Ka nawrlui lo che.. I duhthlanna a ni e" tiin a chhuak ta a. Tannni te a ni si a, ka zuk kal phawt ange tiin thutlukna ka siam ta a. Tukthuan ei khamah ka chhuak ta a. A lungawi lo viau ang tih chu ka ring deuh tho. Ka pasal neih an lo hre ve bawk a, ka pasal lah an lo hre em em bawk a, naupangho pawn min chhaih dar dar ve reng mai. A hlimawm e. Atea nen lunch kan ei dun leh a. Helhkham nei hmel a pu deuha ka hriat vangin, "I tha em? " ka ti a. 

"Tha vak lo. Ka zâm a ni ber mai. Zaninah ka chhungte bulah ka inpuang dawn a" a ti a. Ka lo huphurhpui ve kher mai. 

"An pawm i ring em? " ka tih chuan a lu a thing a. Api kha kumtawp kan buai lai bawr khan a boral a, ka va lang ve thei ta ngang lo a ni. 

"Engkim a tha vek mai ang. Huaisen takin aw" tiin a kut ka va vuan a. Tumruh hmel takin min rawn melh a. "Ka theihtawp ka chhuah ang" a ti ve sup a. Ka khawngaih takzet a ni. 

Tlaiah kan ban hma deuh vangin ka nu te inah ka tlang zuai a. Ka pa ka va hmu nghal. Rosangpuia nen kan hna vanga kan inhnial dante ka sawi mawlh mawlh a. 

Ka nu chuan, "Ban ngawt chu a uiawm deuh lo maw? Mahse, i pasalin a tih miau chuan ban pawh a pawi chuang lo va" a ti a. Ka pa erawh chuan chau aw zet hian, " I pasal ngaihdan ka tawmpui.. Buaina te i tawh leh phah ang tih ka hlau. Bang mai rawh" a ti thung. Ka rilru a buai takzet a ni.  

U Lawma te chungchang kan sawi ta daih a. An hre ve vek tawh a. Rami te pawn an zep ta bik lo. U pari vanga a thinrim leh lungleng khawhar ve bawk si khan Rami chu a hmu duhawm tan a, Rami lahin a hnua a sawi danin, "U pari nen khan innei dawn lo se chuan Mama kha ka ngaizawng miah lo vang. A rukin ka duh tawh" a ti mai si. Chutiang rilru lo pu tawn chu an han inhnaih khan an inzep thei ta lo va, an puakkeh dun ta a ni. Mahse, U Lawma te inthenna a la rei loh bakah thenawm khawvengte mitmei ven a na ve bawk si a, inneih tak erawh chu an la sawi lo. Ka u tan pawh a zahthlak ve bawk alawm. In khata cheng dun reng ta na na na chu an lo chesual ang a, an mualpho ang tih ka hlauhpui viau. Mahse, ka uin, "Pari ang a ni ve lo" a tih danah Rami chu a la him niin ka ngai a, ka ngaih a ngam leh deuh e. Virgin ngeia pasal neih hlutzia chu ka pasal kha a lawmin a hlim em mai. Kha ringawt pawh kha a hlutna a ni tawh hrim hrim e. 

Inah ka haw phei a. Nu Madini ka pui ve nghal. Rogera a ngaihzia te a sawi niah niah a, Ka hriatthiam loh chu Rosangpuia khan fa anga enkawl a duh thu a sawi a. Keiin ka lo pawm lo va. Mami ten an la leh kher hi. Nu Madini te nupa pawn an enkawl thei tho sia. A chang chuan naupang lainatna nei lo angah inngaiin hrehawm ka ti thin a. Mahse, Rogera pa hminga Rosangpuia dah leh fa tak tak anga enkawl kha nakin hun ka thlir leh Mapuii ten a chunga an thiltih dan ka ngaituahin ka remti thei thlawt lo a ni.. duh leh sual min ti mai rawh se. Nakinah dama kan awm chuan fate kan nei ve ang a,Mapuii kha rawn let lehin a pa te nen buaina an la rawn siam thei . Mapuii fapa vanga ka fate hmakhua a chhiat ka phal lo. 

Rosangpuia lo haw chu hlim takin ka lo dawngsawng a. A chauh hmel angreng. A ngawi reng a, a harhvang lo hle. A inbual chhungin a thawmhnaw hak tur ka laksak a,khumah ka dah a. In hnuaiah ka chhuhsan leh a. 

Zanriah ei dawna a rawn chhuk chuan ka thawmhnaw dahsak ha loin thawmhnaw dang a rawn ha a. Min tiphu deuh. Mahse, engmah ka sawi lo. Chaw kan ei chhung zawng a tawng lo. Thinrimna a nei a nih ka ring. College ka kal luih vangin. Zanriah ei khamah call a dawng a, a va be daih a. Kei erawh kan intihfel zawhah in chungah chhoin laptop onin movie ka en ta daih a. Khuma thawmhnaw ka dahsak pawh a la awm. A hnu reivak loah a rawn chho ve a. 

"Ka thawmhnaw dahsak che chu i ha peih lo ni maw?" ka ti nghat a. A ngawi reng.

"I lungawi lo em ni? Ka hna ka bansan dawn tih hrilh ta che ila i lungawi tawh ang em?" ka ti a. A rawn hawi zawk. A mitmeng pawh a danglam ta deuh.

"A tha alawm. Mahse, nawrluih vang che ni lo se" a ti dam thlup a.

"Ka pa thurawn ka va la alawm. Naktukah banna ka thehlut ang" ka ti a. Min rawn kuah a. "Ka lawm e. " a ti sup a. 

"I thawmhnaw kha hlip la,hei hi ha rawh" tiin khuma ka dah chhuahsak chu ka kawk a. Min melh run run chungin a hlip a,a inthlak ta a. Ka nuih a za deuh. A titau vel chu a naupangchhia mah mah. Patling lo lutuk. Kan pahnihin movie kan en dun a, kan mu tlai angreng. 

Ka thawh hma hian a lo tho diam tawh zel a, ka thawh khalh thei ngai lo. Banna thehlut turin ka chhuak a. Ka ui ve reng. Mahse, buaina siam ai chuan tiin risk ka la a nih hi. Atea te leh mi dang pawn mak an ti khawp mai a. "Kan pa hna hi ka thawhpui ve loh chuan,a buai ve sia" tih chu ka chhuanlam a ni. Atea chuan ka haw tur min rawn thlah a. Nizan lam chanchin ka zawt chak viau, ka rilru hria niawm takin, "Ka pa chuan a pawm thei lo va, ka bansan lo a nih chuan min chenpui theih loh tur thu a sawi a. Ka nu erawh a nem. In luah tur ka zawng tan mai ang chu" a ti sup a. Chhungkaw inthendarh phahna tur khawp hial piansual rukna a nei chu ka lainat takzet a ni.

"Tihtheih ka neih chuan min hrilh hreh suh aw" tiin kan inthlah liam ta a. Ka rilruah a awm ve reng mai. Dawrah ka peng ve zuai a,an lo buai leh hle. Gym lam hi chu ka tlawh mang lo. Coffee ka in a, ka thutna bulah chuan Mizo milar , zaithiam ve deuh leh a thiannte niawm tak hi an rawn thu ve a. Phone ka lo khawih mial mial. Ka in zawh chuan a hotel va enpui ve mai mai tumin ka tho a, ka thawh paha chair ka nawr chu kan milarnu lassi in lai tak a lo ni nge, kei lah ka lo fimkhur lo nen ka nawr na ve deuh si,a rak tuar. Kei pawn ka va en ve nghal.

"I va mawl ve. Hei ka intihbuak hi" a ti a. 

"Ka tihpalh lutuk,min ngaidam rawh.." tiin tissue paper chuan hruksak ka tum a.ka kut chu a vai per lawp.

"I kut bawlhhlawh khan ka kawr man tam hi rawn si hlek suh. Nangni ang ho hi lawm manners hre lo lutuk. " a ti leh ta chiam a. Mapuia a rawn phei vat a. Kei chu min enin,"Ka pi,i tha em?" a ti a. 

Ka bu nghat.

Milari chuan," Ani kha i zawh daih a, Manager mawl tak i nih dawn hi. Programme ka la nei asin..engtin nge ka tih ang a" a ti vin tuar tuar a. Mi dang chawl ve te pawn an en duh kher mai. A kawr chu ka melh chiang a, "I kawr ang chiah kha ka va leitir lawk ang ..khawi dawrah nge i lei le?" ka ti a.

"Ve a! I va chapo ve..i lei pha dawn mawni le" a ti leh hlak a. A thiante pawh chuan nasa an tih hmel ve thoin la hria. A pawnlam landanah a fel hmela a nuih mawi tehlul nen.

"Mapui, staff pakhat tir lawk mai ta che. Hetiang chiah hi va laktir mai rawh" ka ti a. A bu nghut a. Asanga a tir nghal a. Ka chetdan chuan a tihamhaih deuh nge, a zahzelah "He dawr neitupa hi awm se chuan i zak chem chem ngei ang. Zaninah a mikhualte hmaa zai tura a sawm ka nia sin" intithei zetin a ti a. Dawr thlang lam hall-ah hian Ram dang atanga lo kalte tan show a buatsaih thin a. Vawiinah an lo thleng dawn tih kha zingah a sawi tak e.

"Ngaihdam ka lo dil dawn nia" ka ti ve mai a.

"A ngaidam kher lo vang che. A chhan chu a tan ka hlu viau a nia " ngeiawm zeta a rawn tih chuan, ka thin a thawk ve ta phat a. A nupui ka ni tih engtin nge a hriat loh theih? Hrereng chungin min tiel tihna em ni? Rosangpuia ka call nghal a.

"Aw Duatpui"

"Shalomi hi zanina i mikhualte zaisak turin i sawm em ni?" ka ti chang fak a.

"Aw..mi dang pahnih nen..ti nge?" a rawn ti a.

"A aiawh tur ruat ang che. A aiawh atan Lci ka be nghal ang. A chiang em?" ka ti leh hmiah. A ngaihna a hre vak lo aniang,, mahse, "Okay, i duh dan angin le..honey" a rawn ti dam thlup a . Nakinah ka la hrilhfiah mai ang chu. Phone ka dah chu rum em emin min lo melh a.

"Zanin i programme chu a bo ta..mahse, kawr thar chu i nei thei tho ang.." ka ti sak a. A hrilhhai hmel kha hmuh a va nuam tak.

"Chutin i ti ngawt thei lo nang hian" a ti tuar.

"Ka pasal chuan ka thu hi a chang chuan zawm nuam a ti viau zel a nia. Ni hman nuam le" tiin ka bag ka la a.ka chhuak nal nal. Min sawi zui dan tur ka hre chak hran lo. Ka thinrim a ni mai. Miin chaldelh leh dengkhawng zet zeta min tawngkhum hian hrehawm ka ti a, na ka ti bawk thin. Tunah chuan ka pasal zarah chutiang hmuhsitna chu ka tuar liam mai mai tawh bik lo vang. Chapo erawh ka hlau ve tho mai. Hotel ka thlen veleh thil awmzia chu ka hrilh nghal char char a, A bu nghut nghut ringawt. Ka thutlukna chu a pawm ve thliam a nih hmel. Hotel pawh kar tharah chuan hawn theih turin an ruahman ta a. Sawm bik te nen programme hlimawm tak siam a tum ve a ni. Kei lah hian tihpui theih ka nei tam lo ve bawk si. 

Zanriah kan ei kham fel hlawt tihin U Remi'n min lo call a. "Mate,.ka pa a awm ta lo" a rawn ti! Ka phone ka thauh tawp. Sangpuia chuan min rawn kuah vat a. Ka hamhaih vek. A rang teh thut lutuk. Niminah pawh a la tawng theih ve kha. Engtin nge? VAwiin ka tlawh loh ni ber kherah lehnghal..engtin nge? Engvang nge? Rosangpuia chuan min buaipui vek, ka thawmhnaw min thlaksak a, ka mawl huih mai. Nu Madini te pawn min zui ve tih erawh ka hria. Kan in kan theng phei chu an lo tam tawh viau mai. Tap vawng vawng thawm nen , An ri nuai nuai mai. Ka pa mutna lamah min kuah phei a, ka khur hlawk hlawk mai. A la kal dawn tih hriat lawk mah nise,a taka min han den meuh chuan a na vawng vawng em mai. Ka pa taksa chu bawhin nasa takin ka tap a. Ka nu lah a tap bang thei lo. Ka pa chu dar 4 vel atang khan a dinhmun a hniam deuh a, nurse koin oxygen an pek bakah nachhawkna ten an chiu a. Zanriah an ei kham hnu lawkah a rawn thaw hrawk hrawk a, damdawiin panpui an tum mek laiin ka pa mar chu nurse chuan a hmu zo ta tlat lo va. Theihtawp chhuaha an han bawihsawm pawn ka pa chu a lo kal fel tawh a ni. A hrilhhaithlak lu deuh e a..ka pa.. I lo awm ve a, i mut ringawt pawh khan kan kimin kan thla a muang asin. Mahse,natna awm tawh lohna van hmun nuamah hlim takin awm tawh rawh aw..

Ka pa thih sarhu chhung chu Kan in lamah hun ka hmang a. Sangpuia pawn a remti bawk. Ani pawh a hun awl apiangah a rawn lang reng bawk. Ka nu a khawngaihthlak zual ta a ni. Mahse,a sarhu lai a ni a, khawhar a la hre vak lo zawk a. Nakin zel ka ngaihtuah a, ka lainat ngawih ngawih. Ka pa thihna vangin hotel hawn pawh a sawn ta a. Min hrethiam thin ngawt mai. 

March thla kan chuangkai leh ta a. Kei pawh ka pasal inah ka phei leh tawh a. Thil dangin min tlak buak tan a. U pari kha a lo rai ve tak tak a lo nia. A puar ve riau lehnghal. Ka u fa ngei chu a nih kei pawn ka ring tan. Titla lo va a pai tlang ve pawh chu a lawmawm reng reng e. A inchhir thu leh Lawma hnena ngaihdam dil a chakzia te kan hre chho a, mahse, ka u rilru a let tawh. Rai a lo haw ve bawk nen, a chhe rawk rawk mai. Vawi khat phei chu an vaccine la tur ka nuin a lo hmu a, a chhiat em vangin a lainat chuan Rs. 2000 a lo pe a. "I pasal ber hi a rilru a la khauh tlat si a, kan tan tihngaihna a awm lo a ni. Naute i neih dawnah chuan senso leh inmamawh zawng zawng chu kan lo tum vek ang" a lo ti a ni. Chubak chu ka nu tan pawh tihtheih vak a awm lo. U Lawma hi nawrluih chi a ni miah si lo.

Tin, Hotel pawh tluang takin kan hawng ta a. Milian leh mi challang deuhte sawmin, kan tam lutuk lo naa programme hlung tak kan hmang thei. Room a tam lo naa, Aizawl atan chuan 5star a ni ve thei mai ang chu. Luah man pawh a to viau. Hnam dang rawn zinten an luah ber ka ring. Mizo mi nawlpui tan chuan a to lam deuh chu a ni. Tin, hotela thawk turte kha a la vek tawh a. Training kar khat chhung an neih hnuah an hmun theuh an luah ta a. Lani leh a bialpa pawh an thawk ve a, ka lawmpui hle. Kei aiin an lawm a, min hmuh tawh chuan lawmthu an sawi reng mai. Manager chu Cindy chuan a rawn dil ve ta tak tak a. A fa kha a la nau viau naa, a nuin ,"tihian kan fa a ni mai. Nula leh rawh..ngaihtuah suh" tiin a nawr ta tlat a. A rawn dil ve ta a ni. A thiamna a sangin a thawh chi tak a ni bawk a. Rosangpuia ka ngensak ve bawk nen, a manager ta luah mai. Mapuia khan Hotel meuh chu a lo zuam leh lo deuh aniawm e. A awm ve tho mai.

A rim ka hriat rual chuan ka ner sawk.

"Nizanah pawh i rawn nam haw tawh..ti ziah nge a?" ka ti hmarh hmarh a. Nia, kartir atang khan a awmdan hi a danglam tlatin ka hria a. Mawlhtu nei niawm tak hian a melh ngaite a melh vung vung thin a. Thawk te hi a la leh hulh thin. "Rilru hahna i nei em ni?" tia ka zawh chang lahin, " ka tha e" a ti zel si. Ka pa ka sun zo chuah a, ka dam ve tan dawn tihin tihian ka pasal ber a awm leh si.

"Ka rui duh a ni mai" a ti nghut a. Min chhan dan chuan mi run kher mai.

"A nih chu" ka ti nghat a. In hnuaiah ka chhuksan a.Tv ka en ta daih. Ka lungawi tehchiam lo khawp mai. Mut hmunah lehlam kan inhawisan ve ve bawk. Mahse, Zingah chuan ka chalah rawn fawpin " morning duatpui" a rawn ti leh tho. A awmdan hi ka hrethiam thlawt lo. Ina awm reng ringawt chu ka nin deuh vangin a phalnain dawrah ka kal ve zeuh zeuh ta a. Mapuia ka pui a,ani pawn nuam a tiin a lawm ve hlein ka hria. Ka pa a boral ta si a, ka nu te chu an khua a har lehzual ngawt ang. Ka u dawr a nghak nitin a, Rami'n in ngjakin ka nu a hna a kal leh bawk a. Bawihtea chu awm lo phei se ka nu hi a â mai thei a ni. 

Zan khat chu ," Nau hi ka pai chak tawh e" ka ti thut a. Min rawn melh rang kher mai. A mitmengah chuan eng emawni inmûng a awm. Ka hrethiam si lo.

"Ngati nge?" a ti zawi sup a.

"Aw ka khua a har thei sia, bakah inneih tawh berte chuan fa bak beisei tur dang a vâng ee" ka ti a.

"Rogera pawh i enkawl duh chuang hleinem" a ti ta a. 

"Ka duh lo a ni lo. I hriat kha. Chu chu a nia ka sawi tum, Nu madini ten an duatin an ngai ngawih ngawih a, ti nge Mami te kutah i dah kher? Phir pawm ang mai an nih khu..rogera ka pawm theih lohna tak chu i hnam hming chhawma a pa hminga i hming chuantir kha a ni. Nakinah ka fate nen buaina a awm ka hlau . Mapuii te pafa chetdan kan hmu tawh sia" ka ti ta duah a. Tukverh lam a melh vung vung a.

"Fa neih te chu kan thu a ni hleinem" a ti nghut a.

"Nge maw i lungawi loh ve ringawt le" ka ti nghat a. Ka lo beisei dan chuan,"Nia kei pawn fa ka awt tawh. Pai vat rawh" a tih ka lo ring a. Mahse, a thinrim daih. ENg thil chiah hian nge tibuai le?! 

"Ka thinrim lo" ti leh nghutin a phone a la a, a chhuk daih. A hnua ka zuk chhukin a lo awm si lo va. "A chhuak a" Pa zaia'n a lo ti. Chumi zan chuan zankhuain a lo haw lo. Kan pa awmdan hi ka hrethiam ta lo hle mai.

"Khaw nge i riah?" a tuk tlai a lo hawnin ka ti a. Ka aw pawh a vin tha khawp mai.

"Hotelah" a ti chhum hmuk.

"Tu nen?" ka inrin hmain ka ti a.

"Miriami nen" a ti ta mai a! Ka kang dawrh mai. 

"Eng a? Hmeichhia i riahpui a maw? ENgtin nge i theih zawk?" ka ti tuar tuar a. 

"Inbengdai rawh. Ka rui lutuk a, engmah ka hre lo a nih kha" a ti a. Ka thinrim leh rilru natzia chu aw. Kan inneihna la rei lohzia ka ngaihtuah a, engtin nge tiang hian min treat theih? Min neih loh hlaua min nawr sek tu khan hmeichhia a riahpui leh thei ta der chu a nia! Ka pasal hian eng game nge a khelh tak le? Zankhuain ka titau a. Ka be lo. 

Khata tang khan kan nupa inkar chu tu khaw kha hriatpui si lohin a alh hlep hlep a, Zana rawn hawn loh zeuh zeuh a ching bawk. Mak ka ti em a, ka nat tur ang pawn ka la na lo zawk niin ka hria. Tumah ka hrilh ngam si lo. Zan khat chu Cindy in min lo call a, "Ding, ka sawi tur chu a awm miah lo a. Mahse, inpa hi a rawn riak zeuh zeuh a, hmeichhe hran hran a rawn hruai bawk sia..inboruak a tha lo em ni?" a rawn ti..ka tah chhuak lutuk chu ka dah tawp. He thil hi engtin nge a thlen theih? Rosangpuia hian ka lakah eng nge a duh? Min nei te te a, tihian leplerh takin a khawsa leh si a maw? Chuti chung chuan mi dangin an hria ang tih hlau reng reng ka la awm a. Ka pasalin hmeichhe dang a kawp tih miin an hriat huna ka vanduaizia an sawizui tur chu ka duh lo. Mi hmuhsit leh khawngaih nih ka duh lo. Kum chanve pawh kan inneih hmain ka pasal vangin ka tap ta fo mai le..a rawn haw chhunah lah biak ngam awm loh khawp ten a tûm a. Ka dawr nghak ina haw peih lo va cabin-a ka riah ve tum erawh chuan, Zan dar 11-ah a rawn kal a, thinrim taka min kaithoin min hruai haw leh a ni. Ka laka thikthu la tichhe tho siin mi dang a kawp tihna a nia. Min duhkhawp lo tihna em ni? Ka zei ve loh vang em ni ang? A chhan ka hriat si loh chuan nitin min hliam chu a nih hi..ka inchhirin ban a chen takmeuh a ni. Ka zing tho chu ka rit luk a, Rosangpuia erawh Gauhati-ah a zin a. Naktukah a rawn haw dawn a ni. Ka lu hai chhu avang chuan ka inthing nawk nawk a. Nu Madini chaw chhum mek rawn phit thut rim chuan ka hnar a rawn verh a. Ka uak ta tuar tuar mai. Ka va luak ta nge nge a. Ka chhuak leh chu Nu Madini chuan ,"Mate, i ruak lo te hi a ni lo maw?" a ti ta a. Kan nupa inkar boruak vangin ka thlabi hun pawh ka lo hrechang tawh lo kha a nia. Thla hmasa khan ka period lo tih ka hre chhuak zui nghal. Kan kawmchhak lawka damdawi dawrah test kit ka han lei nghal a. Hmanhmawh deuhin ka va intest ta a. Ka rai! 

Nu Madini leh Pa Zaia te chuan min kuah a, min lawmpui takzet tih ka hria. Kei pawh ka pasal vanga ka natna hrechang lek loin ka nui ve. Kan nupa nun boruak hi Nu Madini te bulah chuan ka thup ve hram.hram zel a, hriat erawh an hre tho ang. A riak chhuak zing em mai. 

"Sangpuia chu lo la hrilh suu aw. Ka lo surprise dawn nia" ka ti a. He thil hian kan inkar pawh a tidanglam maithei asin. Ka nute pawh ka va hrilh ve a, ani zawng a hnuk a ulh leh tawh. A lawm erawh min lawmpui khawp mai. 

Tlai dar 3 pelh hlekah Rosangpuia chu a rawn thleng a,. Roomah ka lo nghak ran a. A rawn lut chiah chu hlim em emin ,"Surprise .." tih pahin test kit chu ka lek ta va a. A hamhaih deuh niin ka hria. A melh vung vung a. 

"Naute kan nei dawn" ka ti leh a. Ka nui sang bawk. A bag chu a thlauh tawp a. Ka mitah tak chiang zeta min melhin, "Tu fa nge?" a ti ta a! Boruak chu a reh dûk mai. Makti em ema ka pasal chu melhin ," Kha zawhna kha engvangin nge min zawh?i fa a nih lohin tu fa nge a nih ang?" ka ti ta a. Thinrim hmel zeta min melhin, "Nawhchizuar" a ti sup. Ka puakkeh a ni ber e. A natzia chu ka thaw thei lo lek lek. Awmngaihna tak pawh ka hre lo. ENgtin nge khatiang kha a sawi theih ? Ka fa pai chu a fa a ni lo tih a sawi a maw? ENgvangin nge ka pasal hi hetia a awm ?! A mak em mai..a inbual zo a. A insiam a, a chhuak, a chhuah dawnin ,"Zanin atangin mikhual roomah mu ang che" min ti! Chhuat bihin ka inpet fan fan ringawt. Ka tuar zo ta lo. Khumah bawkin ka tap ta zawih zawih a...Lalpa, mi vanduai Dingpuii hi rawn tihlum ve mai teh. Zanriah ka ei lo. Nu Madini chuan kan boruak chu a hrethiam ta a ni ngei ang. A rawn chho a.

"Kan naua chungah hian eng emaw tak a thleng a ni. Engmah ka hai lo. Tuar hram hram rawh aw..a tha leh vek ang" tih chu min hnem theihna awmchhun a ni mai e. 

Chhuatah thuin khum ka ngheng a. Ka tah nasat vangin ka aw pawh chu a chhuak tha thei tawh lo a ni ber e. Ka pum chu ka dap a, hetah hian Rosangpuia nen kan fa a awm asin. Mahse,a pa chuan a pa nih a duh lo. Hetiang rilru neihtirtu hi tu nge? A hmeichhe kawpte maw?! Kan inneih ni ka ngaihtuah a, ka pa hlim hmel leh nui hmel te..ka tana mittui sengtute hmelte..engkim kha. Ka pa duhthusam ka tihlawhtling tawh a, ani pawh a chawl hahdam tawh a. ENgvangin nge ka dam ve reng ang? Kan inneihna kehchhe mek siamthatu a nih ka beiseina pawh hnawl a nihte chuan engvangin nge ka dam ve reng ang? Ka dam a tul tawh lo. Ka vanduai tawh dan zawng zawngte , tuna kan pain a kawp thin hmeichhia ten min hmuhsit dan turte, ni e, an sawi thin kha a lo dik chiah a ni. "Hmangaih te pawh venghim zo lo hmeichhe derthawng leh nep tak" ..aw ka ni chiah e. Ka venghim zo lo a, Valpuia'n mualphothlak takin min phatsan a, tunah ka pasal chuan ka pum chhunga a fa ngei pawh a hnawl leh ta..ka tho lawk a, Drawer-a blade ka dah chu va la chhuakin, ka rilru ka thlak leh hlauin ka ban veilam banrek chu ka zai ta hawk a. Thisen rawn chhuak pur pur chu melhin ka lu a rawn hai chho a, engkim chu a thim ta riai riai mai. Boruakah ka kang nawlh a, rak nawk nawk thawm leh tap thawm niawm tak te ka hre leh..a bak ka hre zui ta lo. Ka harh leh chuan a eng lutuk chu ka meng tha ngam lo va. Ka mit ka khap sawk sawk. Ceiling var pup chu ka han hmu a, kan room emaw ka ti hman a. Mahse, Kawrfual var ha ka hmuh chuan damdawiinah ka awm tih ka hrethiam ta. Vai riaiin ka hawi kual a, ka nu leh Rami ka hmu. Nu Madini ka han hmu bawk. Ka chal chu a rawn dek a, ka han en vat. Ka pasal a ni. Meng sen rum chungin min lo melh tlawk tlawk a. A hmel ka hmuh rualin ka mittui a rawn luang lum puat..

"A tha vek tawh ania. A taksa a la chau rih a nih kha..a naute pawh a tha e" Doctor tih ri chu ka hria a, ka chhing sawk. Zawi sap hian, "Ti nge min thihtir loh?" ka ti a. Ka nu chuan ka kut a rawn vuan vat . ka pasal erawh ka khum bawhin a khur ngat ngat. A nui a ni maithei. Ka thi lo chu pawi a ti hle aniang. Chuvanga tap te pawh a ni maithei ni..

"Mate, tiang hian awm tawh suh aw..i naute i ngaihtuah lo em ni? I pasal pawh" ka nu chuan a ti mawlh mawlh a. Ka nui ringawt. Rosangpuia chu a rawn dak chhuak a, tap hrep hmel a pu. Sawi tur nei niawm takin a ang zuau a, mahse, a ngawi leh daih..zan khat ka riak leh a. Ka pasal chuan zunram a thiar tih loh chu min chhuahsan eih lo. Rami a awm tel ve bawk. In lama inenkawl turin kan chhuak a. Engvanga ka nunna lak tum nge ka nih ka nuten min zawh hunah eng nge ka sawi ang? Ni lo, Rosangpuia hi ka chhuahsan dawn. In kan thlen rual chuan chau leh pen pawh pen tha thei lo chungin ka inthlak a, ka tlu lek lek mai. Inbual ka duh viau naa, ka nute inah ka inbual tawh mai ang chu. 

."Khawiah nge i kal dawn?" a tih chu ka chhang lo.

Ka u ka call a,"Min lo hruai rawh" ka ti a.ka phone hman lai chu a rawn pawtthla lawp..

"Ti suh..khawngaihin" a ti hrâwk a.

"I nupui nih ka duh tawh lo" ka ti sap a. Ka mittui ka khap per sak .

" Thil ka lo va tisual nasa em . .ngaihdam tlak ka ni lo maithei. Mahse, ka nun kha hremhmun ang mai a ni asin..Buma ka awm leh vang a ni. Ka pawikhawih kha a nasa em mai. Ni e, Dingpui, hrem tlak ka ni e" a ti mai a. Ka melh reng ringawt.

Ngam leh ngam loin ka kut chu a rawn vuan a. 

"I la hria em? Urlawk zana ka va hmuh kha Mapuii a ni. Ani khan vawiina kan nun hremhmuna chantir theihna tur thu rapthlak tak min lo hrilh a. Ani kha Dawr atanga a tlan bo kha ram dangah a lo la kal awzawng lo mai a. A awmna erawh a sawi duh lo. Tah khan , " I tana thu dengkhawng leh rapthlak tak ka sawi dawn a. Lo dawhthei hram ang che. Ka pa khan ka nau pai lai kha i fa anga puhtir tum chea min kaltir dawn khan..'Ani sawn fa a nei thei dawn lo va. A fa neihchhun chu a duatin a ngaihlu hle dawn a. A tan engkim a dah dawn a, i tan chuan pheichham a ni ringawt dawn' a ti a. 

"Fa a nei thei lo a?!" tia ka zawh chuan, "Amah Rosangpuia pa khan ,Rosangpuia kum 16 a nih kum khan ka bulah a sawi tlat a ni. A fapin fa a neih theih loh tur hi. Chuvang a nia khatiang inremsiamna dangdai tak kha ka neihpui ni..fa a neih theih dawn loh vangin a in leh lo bakah a thawhchhuah engkim kha i pual vek a ni dawn miau a" a ti ta mai a. Chu chu tuna ka hrilh chhan che chu, ngen duh che ka nei a ni. Ka pa hian ka fapa hi lak ngei a la tum dawn a ,sumdawn nan hman a tum dawn a ni. Kei chuan ka veng him zo lo va; Tin, ka bula ka awmtir chuan min chhuhluih hun a la awm tho tho dawn a. Chuvang chuan ka fapa hi khawngaihin i fa angin la mai la, a pa hming pu la, i ta a ni kumkhua tawh ang. Kei hian ka chuhpui lo vang che. Inremna min neihpui theih dawn phawt chuan, ka kal bo ang a, Mizoramah ka rawn lang leh tawh lo vang. Fa i nei thei lo va, ani hi i fa a ni mai. A nu erawh tuman an ngaihven hran lo vang. Nang chauh hian ka fapa hi min venhimsak thei a ni" tiin min hrilh ta a.

Kei chuan i ngaihdan hriat phawt ka duh a. Tin, fa ka nei thei lo takzet em tih pawh fiah ka duh. Mapuii sawi a nih vang khan ka ringhlel a ni. Tichuan, ni 26-ah khan Test nei turin ka va kal ta a. Test chu ka va nei ta a. Dik tak chuan ka hlauthawng a ni. A chhan chu ka rawlthar chhuah hlim kum 13 bawr ka nih thleng khan ka serh hi a inlip thei lo va, ka tet lai pawn Doctor min panpui tawh a ni. Tichuan, Result ka hre ta a."Fa i nei thei dawn tlat lo mai" tih chu. Ka na vawng vawng a, ka kehchhia a ni ber mai. Chuta karah Valpuia vangin buaina ka tawk chho a, khatih laia ka rawn lan khatzia te,ka taksa chhiatzia te kha i hria ang. Mahse, ka then thei si lo che a. Fa ka neihpui thei dawn lo che tih lah ka hrilh ngam bawk si lo che a. Awmngaihna kha ka hre mang lo. Mapuii lah chuan min rawn nawr sek ve reng bawk si. A lakah ba ka nei hauh lo. Rogera chungchang ka sawipui hma che khan Mapuii chuan min vau ta a. Rogera ka enkawl loh chuan i bulah fa ka nei thei lo tih a sawi dawn tiin..ka mangang takzet a ni. Ka sawipui ta reng che a, mahse, nangin i lo pawm thei bik si lo. Khatih laia ka nun kha thihsan daih ka chakzia i hre lo vang. Mapuii bulah chuan, 'Kan inneih tirh sarhu chhung chu ka farnu ten an enkawl rih tur thu ka hrilh ta a. A awih ve nge,a pawm ta a. Tunah hian Rogera pa hmingah ka hming a chuang tawh a ni. A chhan chu ka thuruk i hriat ka hlauh luatah ka sign lo thei ta lo a ni. Min nei duh lo ang a, min hnualsuat ang tih kha ka hlau em a ni. Inneih hnuah ka hrilh ang tiin kan innei ta a. Mahse, hrilh tur chein huaisenna ka nei thlawt si lo, ka hma sial takin ka nei lui che a, engtikahmah ka fa i pai dawn lo tih hrereng chunga hlim luihna kha ka tan chuan thihna ai pawn a hrehawm zawk hial ang.

Tichuan, fa neih i chak thu i sawi ta a. Khatah chiah khan ka thuruk ka sawi ngam loh vanga vuaklet ka tuar chho ta tih ka hria. Ka rilru hrehawm leh mangang chuan a ni lo lam kawng zawhin, ka hlat phah ta che a. ENglai mahin ka ngaihtuahna i chhuahsan ngai lo. Ka hma ka sial luat vanga i tawrhna chu ka hmu lui thei ta ngang lo va. Hmeichhe hrang hrang kawp kual anga langin ka che ta a. Mahse, Pathian hming chhalin khang hmeichhia te kha mutpui chu sawi loh, khawih pawh ka khawih ngai lo. Ka hmanrua an ni a, pawisa ka pe a, mualpho kha pawi an ti ve lo. Tha taka sawipui chea kal tir tur che ka nih laiin ka tihsual leh ka hmasial vang chuan hremna tuar tlak ka ni tih inhriain min haw ngawih ngawih chungin min chhuahsan la ka duh a ni. I tawrhna zawng zawng kha pakhatmah ka hai lo ,ka hmangaihna che pawh a la dai eih lo. Chutichung chuan min hmangaihna te kha bo vek se, ka hnena rawn kir leh tawh lo turin kal la ka duh a, mahse, dawra i riah ringawt zante khan awmngaihna ka hre leh si lo va. Ka rawn hruai leh che a nih kha. A chang leh ngaihtuahna dik lo neiin khatianga ka awm khum che vanga i rilru na tal buai hian Mapuia chu i ngaizawng ta angah te ka ngai lek lek thin. Chutiang a thlen erawh ka hlau ngawih ngawih thung si.

Nau i pai thu min hrilh khan ka kehchhe ta vek a! A chhan chu keiin fa ka nei thei lo va, tu fa nge i pai ang tih ka ngaihtuah a.ka na a, ka na takzet. In atanga ka chhuah hnu khan motorah fim taka inngaihtuahin, Ka hmelhriat tha tak mai Doctor Hmunsiama rawn hawn lai a ni tih ka hrechhuak a, Beidawn nan tal intest leh teh ang tiin ka va pan ta a. Ka chungchang leh nau i pai dante ka sawi vek a. A pawimawhzia hriain min test ta chuk chuk a. Result ka hriat hmain Nu Madini'n min rawn call a, i ban i zai thu a rawn sawi khan ka buai ta vek a. Ka rawn tlan haw ta a. I thih loh nana ka tawngtai zat kha Pathian pawh hian a hre seng ang em ka ti hial asin..ka fa pai loin mi dang fa lo pai tak tak pawh ni la,i thih hi ka phal chuang lo vang. Doctor ten an bawihsawm chhung che khan Dr. Hmuna chuan min lo callin,"Fa te chu i nei thei chiang e. A hmaa i doctor pan kha tu nge anih lo sawi teh. Hetiang kumkhaw chawr lohna tur thila a fimkhur tawk loh vang hian action lak ka duh" a rawn ti ta a. Khata ka nun kha hlim si, inchhir bawk siin ka khat a. Ka pi ,i nu bulah engkim ka sawi ta vek a. Min hrethiam lutuk kha ka fak tawp thei lo..tikhan engkim i hre ta a..mahse, chhuahsan tlaka min ngaia ka nupui nih i duh tawh loh chuan i duhthlanna ka zahsak ang che. Hmeichhe chak tak tan pawh tawrh dam a har ve dawn tih ka chiang tlat a ni" 

Ka pasal thusawi tinte chuan min rawn kher hlawk hlawk ni maiin ka hria. A chang leh ka khawngaih a,a chang leh a dawihzep vang in ka haw bawk. Ni e, engkim a tirah min hrilh nise hetiang teh hrep hi a thleng lo tur..khati taka tawrhna min pek avang erawh kha chuan rulhlet ve ngei ka duh..

"I sawi dik alawm.ka tuihal leh khawhar em vangin Mapuia kha ka belbul alawm..tuna ka pai lai pawh hi a fa a nih ngei ka beisei" ka tih chuan a ding hluai a! A khur chu ka hmu reng a. A kut a humruh a, thisen zam te chu a pawng tawlh tawlh mai. A lu a han dawm leh ringawt thin. Ka lo melh kar mai si ..a mita mittui tling chungin,.."Ka tihsual man chu ka tuar ngei tur alawm..i fa pai chu a pa chu tupawh ni rawh se, ka pawm e" a ti ta a. Ka melh ngawih ngawih, ka mittui a tla a, ani pawh a hmai a hup a, min rawn melh ve. Heti taka min lo hmangaih anih chuan engvangin nge ka lakah khan zep i neih?Rosangpui..i mawl lutuk..

Ka thaw hawk a. "Prank a nih kha..tikhan kan inthungrul chiah" ka ti ta a. A na tuar hmel chu ka enrei thei ngang lo a ni.

Ringhlel si, ring tho si hmel pu chung hian ," Rodingpui, dawt a ni em?" a ti khur dawt a.

"Ka pasal bak mipa dang mutpui hi ka tum reng reng hleinem.." ka ti a. Min rawn pawm thawk a, ka lo kuah let vek. A mi pek tawrhna zawng zawngte kha engtik laiin a bo ka hre lo. Khatih lai khan kan lo inhrem tawn mai mai zawk a lo ni. A dawihzep vang vek a ni.

."Ka inbual duh" ka ti zawi sep a.

"Lutuk, tuilum ka va siam ang e" tiin a tho vut a. Bathtub-ah min pawm lut a, tuilum sa ver vawra ka han inchiah chuan ka hahdam sawng sawng mai. Ka sam a suk lai chuan, "Khang hmeichhia kha i khawih lo takzet maw?" ka ti a.

"Ka damchhunga Pathian hming meuh chhala thil ka sawi ve vawikhatna a nia. I awih mai a ngai ang" a ti a. Ka lo nui hawk.

"Mahse, an bangbo awm.. I khawih loh chuan" ka ti a.

"Zu ka in vak a, ka die san zel alawm. A tukah an hawn dawnin pawisa ka pe thin" a ti. An hawihil ve ngawt ang chu..mahse, khang a chetdan atthlak tak avang khan nakinah buaina kan la hmachhawn maithei a ni. Ka inbual zawhah min hruhul leh vek a, ka sam a chhemro bawk. Ka inthlak fel hnuah chokaah a zuk chhuk a, buhhawp a zuk siam a, sa varin min rawn kensak leh. Duhthusam ang zelin a che leh si..ka ning he pa hi a..

Boruak tha ta chu keini nupa chauhin kan hlimpui lo va, Nu Madini te hlei hlei an hlim. Ka nute pawh. Mapuii chu tunah khaw nge a awm ka zawt a. A hriat loh thu leh a biak tlang theih tawh loh thu min hrilh. An pafa ruahmanna vek a nih ka va ring tak. Chetlak dan pawh an thiam reng reng e a. Ramhuaiin a pui a niang.

Hun nuam leh hlimawm tak kan hmang chho ta a. Pasal neih nawmna ka tem chho ve ta mek e.

Kum 3 a liam meuh chuan , Naute duhawm tak leh hmeltha em em Loicy Hmangaihzuali pawm chungin a pa car khalh mekah kan chuang mek a, ka nu te in lam kan pan mek a ni. Ka u Lawma leh U Pari te fanu Lalmuanpuii piancham lawm turin kan kal mek a nih hi. Ni e, a nu U Pari'n a hrin atanga kar khat lekah naute duhawm tak chu U Lawma te kutah dahin an hnutchhiah ta kha a nia. Rami'n a chawi seilian ta a ni. Thla 7 hnuah U Lawma leh Rami chu an innei zui ve nghal a. Ka nu pawh pension ve tawhin in an sa tha a, an in hnuaiah U Ruata te chhungkua insawn pheiin an in kha an thawmntha bawk a, man chawiin mi an luahtir a. U ruata pawh a hnaah a nghet chho ta bawk. Ka u Lawma dawr pawh a lian tawhin dawrkai hlawk ber pawl a ni ta a. Rami erawh a hna ngai house wife hna chu a la thawk zui ta zel a. Bawihtea pawh Middle School a chhuak ve tep tawh e. U pari chu khatia a naute a pek tak hnu khan pasal a um a, Mahse,a nei fuh vak lo a nih hmel. A pasal kut tuarin a duk cher chur reng mai a. An inah lah an nuta neihchhunin nupui nei tawhin an monu chuan sawrkar hna a thawk si a, a lal nasa mai si. A let ngam tawh si lo. Mi inhnuaiah rethei bakberhin a fa sen nen inchhir leh rethei reng rengin hun a hmang chho ta a. An pa lah a thatchhe ve bawk si, fa pawm chunga rora a chhu thin chu U Lawma'n a lo khawngaih ve deuh nge, "Fanu min pek vanga ka rulh letna atan che" tiin Rs. 10000 a lo pe a niawm e. Chutah chuan U Pari chuan a inchhirzia leh a duham leh rilru chhiat vanga a tawrhna te chu mittui tla zawih zawihin a lo hrilh ve a. Engkim kha a nu remruat vek a nih thu te pawh a sawi. Tunah a nu chuan ama fanu ngei pawh chu thlauhthlain a famo hlawh nei chu a pâk leh huam tawh a, chu mawlh chuan Pari pawh a tina hle aniawm e. ENgkim a tlai tawh si a! 

Valpuia erawh TNT-a a awm hnu thla thum lekah khan ka nun ka sim tawh ang a tih vangin an la chhuak a. Reivak loah nupui a nei leh a, a farnu te nen an inngeih loh vangin a puzawnte in hnuai luahin an khawsa ve a. A hna kha a chân ta si a. A nupui thawh chhuah ringin an khawsa a, nupui chhungte thuhnuaiah awmin an uiteah a tang chho a. A nupui lahin a uiresan fo a niawm e. Mahse, a then ngam lo nge, fa an lo neih tawh vang, a dawh ta zel chu a nih hi..amah hmutu te chuan Valpuia a ni tih pawh hriat tawj loh khawpin a tar tawh an ti! A that laia a chet danin a vuakletna chu a na viau ngei ang le…

Cindy erawh pasal a la nei ta lo. Nuthlawi mah nise, nun invawng tak leh zahawm takin a awm chho a, kan hotelah a la thawk reng a. A fapa erawh a chhungten an khawih tam zawk awm e. A hun takah inchhira kir leh nachang a hria a, a vannei ta a nih hi..ka thian a nihna kha a la bo lo bawk a, ser awm tawh mah se, induhsakna nen kan la inhmachhawn ve thei zel e.

Tin, Kimi'n pasal a nei dawn. Kar thar lo awm turah mai khian a ni nghe nghe. Zami te pawn fa pahnih an nei leh tawh. A kum zawnin an piang bawk nen,a buai ve thei khawp mai..

Malsawma chanchin erawh kan hre ta ngai lo. A thi tawh a niang. Mapuii te pawh thehmeh ang a ni. A reh vang vang mai. Pu Thangluaia erawh thluak cancer vangin tunah hian Cancer hospitalah enkawl mek a ni thung. A upa tawh bawk nen,a thi har lo vang. 

Mami te chhungkua pawh Aizawlah kumin kumtir khan an rawn chho a. An fate pawh an lian ve tawh. Rogera phei chu hmeltha tak a ni. Kan inah a chengkual tam mah zawk a, kei pawn ka hmu mawh lem lo. Tin, Loicy hi duat namen loin a duat bawk. Vawiin pawh min zui ve a tum naa, A incheck up hun a lo ni sia. A rawn tel ve ta lo. Mizo nula hmeltha tak leh Arab thlahpawlh a ni bawk a, A tlangval hunah chuan a ngaihtuahawm khawp ang. A hmelthat dan a chiang kek kuk em mai. Kei tak pawn a nu thiltih dan tenawm tak kha hriat chhuah chang nei mah ila, min ngainat em vangin ka hnualsuat thei lo. Ka fapa ni si loin Rosangpuia hi a pa hminga ziah a ni miau si a, Chu erawh Mami pasal Kima khan thlak danglam a la tum thu a sawi. Tuman an rawn ngaihven tawh lem lo bawk a. Rosangpuia pawn pawi a ti lo. 

Ka nute in kan thleng a, Amuani a rawn dak nghal vat a. Loicy pawh a ter leh at mai. Kan chhuah rualin an inpawm nghal a, hmuhnawm ti taka kan thlir laiin Bawihtea a rawn lang ve a.

"Tu nge ka duat zawk ang aw…" a ti kual vel a. A naute pahnih chuan nui hawk hawk chungin a u chu an pan a..an inkuah khawm ta raih a..

Rosangpuia'n ka beng bulah,"Loicy chhang hi siam leh a hun tawh viau a ni" a rawn ti sup a. 

A tawp ta.

(Zawm theihna tur tam tak a awm tih ka hria e. Thawnthu thar ka ziah leh tawh a ngai rih sia. Laklawh deuhin ka titawp ta rih. Nakin deuhah khang naupang puitlin lai vel kha a season ang pawn kan la ziak leh maithei a ni. Rosangpuia lo chhiar thinte zawng zawng..ka lawm vek e. 🥰😍