Rosangpuia 9

ROSANGPUIA.. (9) 

Ziaktu: Toni Râlte

ROSANGPUIA.. 

"Kan naupan lai chuan ka pa kha officer emaw ka ti thin. A chhan chu kan hausa miau a. Kan hausak chhan kha sawrkar hna a thawh vang emaw ka ti thin. Mahse, kan han thanglian chho a, kum 12 vel ka nih chuan, ka pa chuan sawrkar hna a thawk lo va, Sumdawng mi a ni tih ka hrethiam ta chauh a. Ka pa chu in hmun lo ram vel commission thin a ni tih ka hre ta a. A lo hlawk ve reuh em a lo nia. Partner a nei a, Pa Thangluaia a ni a. Kan inah te pawh a rawn kal fo mai, kan innel viau. Unau hi i hriat tawh angin pahnih chiah kan ni a. A chhan pawh ka nu hrisel loh vang a ni. Ka nau ka farnu nen chuan kan inkawmngeihin thian dang kan kawp ngai meuh lo. Lehkha kan thiam dun a, ka pa kha pa invawng tak a ni bawk a. Kan zahin a thu pawh kan awih hle thin. Hun a kal ve zel a, in te kan han sa thar a, kan vengah chuan a nei pawl leh hausa pawla ngaih kan ni ve reng mai. Ka pa kha a hahin a thawkrim reng bawk a. Kum 18 ka tlin kumin ka pa chu a kal thlak ngaiin a awm ta a. Kan buai chho ta a ni. 

Ka pa kal thlaksak thei tur kan zawng a, Kei khan ka pe phal reng a, mahse, Doctor ten, "A fit tawk lo" min ti tlat! A chhan pawh natna benvawn ka nei ve a, ruhseh vang hian ka tet lai atangin buaina kan tawk fo tawh a ni. Tin, ka la naupang ve bawk nen. Mangang takin ka nu chuan ka pa kal thlaktu tur a zawng thin a. Ka pa lah a chau telh telh mai bawk si. Vanneihthlak takin Pa Thanga, ka pa sumdawnpui thin khan ka pa kal chu a pe thei dawn ta hlauh mai. Vellore-ah ka nu te nen an pathum chuan an chhuk ta a. An zuk thangrei khawp mai. Keini unau erawh ka pa farnu ka nî Vani'n min awmpui a. Ka'n peng leh lawk ang a. Ka nu hi mizo dik tak a ni lo va, Manipur meitei kan tih ang kha a ni. Ka pa sumdawnna lamah an intawng a, an inhmel duh nghal a. Ka nu hian a chhungte remti lo chung ka pa a rawn zui hawng a niawm e. A chhungte chanchin chu a hre zui ta lo. Chuvang chuan ka nu chhungte han belh tur kan nei lo a ni. Ka pa pawh Thingsai khaw chhuak a ni a, a nu leh pate an dam rei lo va, unau hi pathum an ni a. Ka pa hi a milai niin a u mipa chu Lungleiah sawn nupui fanau neiin a khawsa a. An khawsa thei phian. Chuan, an te ber ka ni Vani chuan hetah Aizawlah pasal nei vein amah Ka ni hi vanneihthlak takin sawrkar office pakhatah 4th grade-in a awm ve a. An pa erawh chuan engmah a thawk lo. Tunah chuan ka ni chu khawvelah a awm tawh lo a ni. I la hre maithei a, hman kuma nu pakhat, a pasal zu ruiin a sawisak hlum kha ka ni chu a ni. Ka pa te Vellore thang lai kha chuan ka ni kha an pa nen an inthen lai a ni hlauh a, kan inah bak tlanna tur a nei lo bawk a, tikhan keini unau min awmpui pah thei a. An pa ten an rawn koh pawn keimahni vangin a haw rih loh phah a ni. Tin, Pa Thanga nupui hian min rawn ngaihtuah ve hle thin bawk. 

Pa Thanga te chhungkua hian pawimawhna lian tak an neih avangin ka'n sawi kai leh lawk ang a. Pa Thanga hi kan veng thenawm lawka khawsa niin, a nupui fanau te nen in lian tawkah an chengho a. An hausa khawp mai. A nupui hi Nu Mawi kan ti mai zel a. Nelawm deuh, lian zeh zuah deuh mai a ni. Fapa pahnih leh fanu pakhat an nei a. An fate nen pawh kan innelin kan inkawm ve zeuh zeuh. An fanu erawh vawikhat chiah ka la hmu thung a. Shillongah convent-ah an dah thin. Chutiang chu an chhungkaw khawsak a ni a, Nu Mawii hi a felin kan chungah a tha thin hle. Ka pa te chu thla 4 dawn an zuk awm a. Sum leh pai pawh an insengso nasa khawp mai. Pa Thanga te pawisa pawh kan puk nual a niawm e. Tichuan, dam takin an rawn hawng ta a, Chhungkua kan hlim leh thei ta a, ka ni pawh a pasal nen innei lehin a haw ve leh ta bawk a. Ka ni kha ka ngai thin ngawt mai. Kan unau kha min hmangaihin min duat takzet a ni. Ka pa hian a ngaihtuah ve bawk a, eng emaw buai harsat tawk se ka pa bak a rawn pur ngai lo reng bawk. 

Ka pa khan Pa Thanga te sum a puksak bakah Pa Thanga'n a kal a pek khan inremsiamna mak tak an lo nei ru reng a! Chu chu a ni tun thlenga ka nun tibuaitu chu. Agreement an lo sign fel thlap mai. Chu erawh nakinah ka sawi zawm ang. Ka pa chuan theihtawp chhuahin a pawisa puk chu rulh leh tumin a thawk a, mahse, vanduai asiamin amah anga sumdawng, harhvang leh fit zek zawk an lo chhuak ve zel a. A sumdawnna chu a tluang lo chho tan ta a. In hmu leh ram commission mai tur a ván tak em vangin sumdawnna dang bun tumin hma a la chho tan a. Pa Thanga sum bawk chu bultan nan a thamsak leh a. Kan veng kawnah hotel lian vak lo hmanga bultanin sumdawnna chu a'n tan chho leh a. Ka nu pawn theihtawpin a tawiawm ve bawk. Meitei tih takah ka nu hian ei siam a thiam khawp a, mi dang pawh chhawr lem loin an nupa chuan Hotel chu an luahlum a, keini unau erawh kan fel ve thawkhat tawh bawk a, kan harsatna hrethiamin in lamah kan lo khawsa ve naw naw thin. Kum 19 ka tling ve ta a, ngaihzawngte pawh ka nei ve tawh. Mahse, chutia han serious em em ka la nei lem lo. Ka piancham a lo thleng a, ka pa chuan min lawmsak ngei a duh a. Pa Thanga te bakah ka ni te chhungkua sawmin kan inah chaw kan ei khawm ve a, Khami ni kha bo daih se tuna ka buaina hi a bo mai tur.. 

Kan mi sawmte chu an rawn lut tak tak a, kan inhre pawp sa vek a, kan inkawm nghal bawrh bawrh mai. Zanriah ei hma deuhin Nu Mawii leh a fanu Mapuii te pawh an rawn thleng ta a. Mapuii chu ka vawi hnih hmuhna chiah a ni. Kan han inhmu chiah chu ţekin min deng ta emaw tih mai tur hian ka ţek chhawk thei nia! Khatih laia ka hmeichhe hmuh tawhah chuan Mapuii aia hmeltha leh piannalh kha ka la hmu ngai reng reng lo. Ani pawn min melh ngawt ngawt mai. Awm ve dangte pawh chuan an hrethiam aniang, engtin chuan min ti lo. Zanriah kan ei a, Mapuii chu ka bulah a rawn thu ve chat a. Ka khur thei hial mai! Ka lai vek. Chaw kha ka ei puar leh puar loh pawh ka hre lo. Mahse, mak takin vawikhatmah kan inbe lo. Kan ngam lo! Kan inhîp tawnna chu a chak em em thung si. Khami zan atang khan Mapuii chu ka vei ta bur a. A hrehawm thlawt, englai pawn a hmel kha ka mitthlaah ka hmu a ni ber. Lehkha ka zir tha thei lo bawk. Convent-a awm tawh loin he lamah zirna a rawn zawm tawh dawn bawk a, chance ka neih theih mai ka inring. Mahse, ka rilru chu ka nu takngial pawh ka hrilh lo a ni. Hun a kal a, College zirlai ka ni tawh a. Mapuii nen kan college kalna erawh a inang lo. Hmuh leh ka chak em em a, ka leng ngam bawk si lo. Mahse, Ni khat chu ka nu leh pate leh ka naute chu Hotel lamah an awm a. Keimahin in ka nghak a, kan room ka chingfel a. Sawi tawh angin ka pa kha mi invawng tak a nih vangin hnawk leh bal tih vel a ngaithei lo. Kei pawn ka chhun a, ka felfai thlarh zel. Chutia mahnia ka awm melh melh lai chuan, Kawngka an rawn kik a, ka va hawn nak chuan Mapuii chu a lo ding reng mai. Mak ka ti lutuk. 

"Ka lo lut thei ang em? " a ti a. Ka hamhaih vek. Ka sawm lohin a rawn lut a. Kawngka pawh amahin a kalh nghal. Awmdan tur ka hre vak lo va, amah zawk chuan ka roomah min kai lut a. Khumah min nam thu a. Ka melh reng ringawt. 

"Ih maw.. Khami zan atang khan nangmah chauh ka ngaihtuah a" a ti ta a. Mipa zawk alawm ka nih le tiin ka inhumsek a, "Kan inang chiah a nih chu" ka ti ve ta phawng a. Ka bulah a rawn thu a. 

"Min duh em? " a ti ta mai a. 

"Duh e, ka duh che" ka ti hmiah. Ka duh em a ni. 

"Kei pawn ka duh che" a tih chuan, chet ka la ta a. Ka kuah a, khumah chuan ka bawhthlu nghal a. A ţang eih lo. Virgin ve ve chu kan chesual ta ringawt. Mahse, zirtir chawp ka ngai bik lo. Mipa ka ni miau a! Thil kha a thleng ve tawp a ni ber e. 

A hnuah, engtin nge a rawn kal theih tihte ka zawt hnuhnawh a. 

"Ka nu nen kan chhuak a, In Hotelah kan lut a. Mi dang zawng an awm vek tih ka hmuh khan, inah nangmah chiaha i awm laia rawn kal ka duh ta em em a, ka nu bulah chhuanlam siamin ka chhuak a. Ka rawn kal tawp mai a ni" a ti. Hmeichhe tumtlang tak, nghet zet mai a niin ka hria. 

A tawi zawngin Mapuii nen chuan kan inngaizawng ta a. Mahse, chhungte lakah kan la inthup ve ngat ngat. Kan la zak ve miau a. Phone kan nei chho a, thil a awlsam chho a. Hmun dangah kan inhmu ta fo a. Zep thu a cheng lo, sex pawh kan hmang nasa. Damdawi ei nachang a hre lo va, kei lahin an ei thin tih pawh ka hre bik bawk si lo. A rai lo kha a mak ngawt mai. Kum 1 dawn kan inthup hnuah kan chhungte pawn an hre lo thei ta lo va. Ka pa chuan min hau lo. Pa Thanga pawn Mapuii chu a hau bik lo. Min pawm ve veah kan ngai a, kan hlim hle. 

Kan beisei phak hauh loh vanduaina chuan min rawn chim buai leh ta a. Ka pa khan Pa Thanga pawisa a puk kha a la rul zo thei lo va, a kal a pek vanga an inremsiamna erawh kan hre ve lo. Zirtawpni zinga ka nuin kaihthawh a va tum chu a kai tho zo ta reng reng lo mai a. Rang takin Damdawiin kan pan pui a. Mahse, chhan hman a ni tawh lo. Ka pa chu lungphuchawlin a boral ta a nih chu! Hriatthiam harsa ka la ti reng.. Kan dawm hlum loh leh kan biak hman loha a kal chu engtikahmah ka hriatthiam theih ka ring lo. Ka nu pawh a at phah thelh a, ka pa thihna chuan veng chhung pawh a nghawng na hle awm e. Kei chu khatih lai khan ka mang vek a, kan awmdan tak kha ka ngaihruat thiam tawh mang lo. Mak ka ti em em tih chiah ka hria. 

Ka pa thihna thla thum a liam awrh tihin, Ka nu hian min ko a. Chutah chuan, ka pa thurochhiah min hrilh ta a ni. Pa Thanga pawisa kha an lo puk nasat bakah Pa Thanga khan a kal kha a pe ringawt lo va, sawi tawh angin inremsiamna an lo nei ka tih kha. Pa Thanga pawisa tak chu nuai 5 bawr vel kan la ba a, Mahse, a kal a pekna man erawh keima rulh tur a lo ni. Chu chu a nia mak chu! Vellore-a an inremsiamna kha an thlak leh a, chutah chuan ka hming a lang ve ta a ni. 

"Thangluaia fanu neihchhun Mapuii hi Ka fapa Rosangpuia hian nupuia a nei lo a nih chuan, Ka in leh lo, ka ram leh Bank-a ka pawisa dah zawng zawngte hi Thangluaia kutah a lut vek ang. Hei hi ka dam theih nana Thangluaia'n a kal min pek, ka rulhletna tur a ni. Rosangpuia hian Lalrinawmi a nei a nih chuan, Thangluaia pawisa ka batte bakah ka in leh lo, ka ro zawng zawngte hi Rosangpuia leh Lalrinawmi ta tur an ni thung ang. Engpawh thleng se, Ka fapa hian a pa thurochhiah hi a tihlawhtling ngei tur a ni" tih thu a lo ni. Hei hi Mapuii nen kan inngaihzawn hnua an siam that a niawm e. Mak ka ti nasa mai a. Pa Thanga thiltih dan chuan eng emaw ngaihthat lohna riau min neihtir lo thei lo a ni. Mapuii nen kan la inngaizawng reng a, inneih hial pawh kan sawi dun fo. Chumi phena kan pahnih chungchanga ka pa te inremsiamna chu kan lo hre ngai lo a lo ni. 

Ka nu bulah, "Ka nei ang a a ni mai lawm. Mahse, a hmingin eizawnna te ka nei ve phawt ang a" ka ti a. 

Ka nu pawh chuan, "Ni e, I Pa Thanga hi kan chhungkaw thian emaw ka lo ti a. Hetianga inremsiamna a neihpui danah sum leh pai bak ngaihtuah a nei lo tih ka chiang.. Rilru nei takin awm ang che" tiin min chah a ni. Mahse, Mapuii ka hmangaih miau vangin engmah huphurh em em ka nei lo. 

Hun a kal leh hlek a, Thil thleng chu a mak chho ta a. Mapuii chu ka lak atangin a hla ta tlat mai a. A ngaihna reng ka hrethiam ta lo. Chutih a hnekin college a zawh hma hmain Pa Thanga chuan Dubai-ah a chhuktir a, hna a zuk thawk niawm tak a ni. Ka mangang tan ta a. Amah Mapuii ka duh leh hmangaih vanga ka natna piahlamah kan in leh lo kan chán ngei dawna ngaihna chuan zan pawh min timuhil thei ngai lo. Ka pa thu min hnutchhiah chuan nitin min ei chhe mek chu a ni ta. Mahse, ka nu kha nu chak leh fing ve tak mai a ni a. Ka pa nena hah leh rim taka an thawh hmanga in leh lo an din, in hmun tha leh in pawh tha ve tawk tak chu chân a tum lo ve bur mai a. Ruahmanna a nei ve ta a ni. Pa Thanga nau chiah mipa hi an nu nen fa an neih duah hnuah an inthen hlauh mai a. A chhan nia an sawi dan chuan a nupui kha chhul tha lo aniawm e. Chu chu dawm reng peih loin Pa Thanga nau Pu Siama chuan a chhuahsan ta a. An nu leh a fate pathum erawh an inah chuan an khawsa zui a. Amah Pu Siama zawk chu a chhuak ta a niawm e. Chu chu ka nu chuan remchangah hmang ve chatin tlang rel pawh dawn zo loin pasala neih tumin a vehthlem chho ta a. Hei hi Mami nen pawh kan hriatpui vek a ni. Kan phalna thlapa ti a ni bawk. Ka nu kha a la valai bakah a vun a no nalhin, a mam a. A hmelchhe si lo nen, tlangval pangngai tan pawh iaiawm loh tak a la ni ve a, Pu Siama pawn a lo hnar phal ikhaw lo mai a. Kar loah an inzawm nghet a, kan inah hial Pu Siama chu a rawn lut ta a nih kha. Ka pahrawn ngei chu. Pa Thanga chuan a duh lo hle mai a, ka nu pawh a ringhlel nghe nghe, mahse, ka nu chuan, "Kan inhmangaihnaah hian engmah sawi tur i nei ve lo" a tih hmiah vang leh Pu siama lahin ka nu thlavang a hauh nat em vangin a sawi kawi ngam ta bik lo va. A enliam ve ta ringawt a ni. Hetih lai hian Mapuii nen kan inthen vangin kei chu ka chhe hle a, ka na hle tawh.. Zirna lamah pawh rilru ka pe hleithei lo. Mapuii nen kan inthen chu Pa Thanga remruat vek a nih rinna ka la nei fan a, Mahse, Mapuii ka biak pawh theih miau loh vangin kawng erawh ping tak a ni. Pa Thanga lah chuan ram a la duai duai reng a, hausa tawh tak an ni. Duhamin chinlem a nei lo an tih angin a thianpa a sumdawnpui thin ngeiin a thihsan, in leh lo pawh a it lehzel chu a nia. Chumi laka kan him nan ka nuin a zahawmna dahkhamin pasal a nei ta reng a nih kha. Ni e, khatih lai khan ka nu chuan dem a hlawhin sawisel a hlawh nasa a, sihhnip, leplerh pasalte lung pawh phun hmaa pasal dang nei tiin an sawi nasa thin. Vawiin thlenga mi thenkhatin kan chhungkaw thu hla an hriat dan pawh a ni ta reng a. Mahse, thudik lo hulhual a ni. 

Pa Siama chu a tha hruah hruah hle a. Ka nu chu a hmangaih ve tak tak ni pawhin ka hria. Keini pawn kan en hrang lem lo. Mami khawih a tum tihte kha chu dawt muhlum a nih kha.. Master degree ka zir laiin ka nuin Pa Thanga hnen atanga vauna a dawn thu min hrilh ta a. 

"I fapain ka fanu, na taka a hliam vanga a man inpek tur pawh hi sang tak a ni a. Mahse, hei chu ka ngaizam lui mai ang. Tunah chuan kan hun tiam a ral dawn tawh a, I pasal hnena ka kal ka pekna man ni lo, ka pawisa inpuk hrim hrim kha a hlawmin vawikhatah min rawn pe u la, tichuan, kan inremsiamna dang tihhlawhtlin nan kha chuan hun ka pek belh ang che u" tiin. Ka thinrim a, ka puakkeh lo chauh. Tihtheih ka la nei si lo. Ka nu khan hotel kha a la siam kal ve reng a, Pa Siama pawn a pui thin. Mahse, pawisa hlawm nuai chuang han inpe hmak tur chuan a harsa lam deuh a ni. Pu Thanga lahin ukil nei tha a inti si a. Min hnehchhuh thei reng tih hriaiin ka nu nen ruahmanna kan siam dun ta a. Tuna ka pa ac-a sum la tlingkhawm te leh la nu pawisa la kawlte hmang hian keiin eizawnna bul tan ila, Pu Thanga hnenah erawh chhuanlam kan siam mai ang a. Kei leh ka farnu chu in atanga chhuakin kan bibi rih ang a, ka nuin a theih chen chen Pu Thanga chu lo chelh se, tichuan, kei ka hlawhtlin hunah a bo abang awm lova pekkir leh vek bakah kan in leh lo pawh hmuh kir leh vek kan tum ta a ni. Hetia kan tih chhan chu khatih lai khan vanneihthlak takin ka pa thian hlui vai pu Sharma hian min rawn be pawp a, min puih a inhuam thu bakah mizoramah sumdawnna rawn bun a tum a, phungbawmah min rawn sawm ve a ni. Chu chu remchanga hman kan tum ta a ni. Tin, Pu Siama hian ka nu a hmangaih takzet a vangin ka nu pawn kan harsat rukna chu hrilh mai a pawiti ta lo va, kan lama a tan theih phawt chuan kawngro a su em em dawn bawk nen. Engkim a hrilh ta vek a. Amah Pa Siama lah a û lo ngei sa tawh nen a thinrim ber berah a tang ta zawk a. Kan ruahmannah pawh min puitu ber a ni ta zawk a ni. Hmingchhiat pawh inhuamin tikhan ka nau nen kan chhuak ta a. Pa Thanga hriat ve loha ka pain ka nau tan liau liaua in a leisakah kan khawsa ta a. Mi zawng zawngin, "Mami (ka farnu) kha a pahrawnin khawih a tum thin a, chu chu duh loin a u in a chhuahpui" tih chu min sawi dan a ni. Pa Siama tan a thangtlawmthlak em em rualin kawngro su thei ber a ni lawi a. Pa Thanga pawn thuthang a lo hre ta ngei a, ka nu nen inbiakna neiin, "I nau hi jail-a khung i duh loh chuan, pawisa chungchang chu rawn sawi ri tawh suh. Ka ba ral dawn lo. Ka pek theih hun che erawh i nghak ve tur a ni. I nau i hmangaiha inchhungkaw mualpho i duh loh chuan" tiin a vau ve ta a. An mamawh em em lo bawk a, Pu Thanga pawh inhnukdawkin Pa Siama avang chauhin ka nu chu a nghak leh ta a ni. Mahse, Mapuii nena kan chungchanga an thu inremsiamna erawh a la awm reng tih ka nu a hrilh. Kan in leh lo chu neih a tum nghet khawp mai. Ka ngaihtuah thin a, ka pa khan engvanga khatianga atthlak lutuka inremsiamna a lo neihpui le tih ka inzawt thin. Mahse, ka ngaihtuah chiang a. A kal thlak nan khan a nuaia nuai tel an sengral a, savings a lo ngah lutuk lo bawk nen. A han dam that hnuah lah a sumdawnna hlawk tak kha mi dangin an khawih khalh ta zel si a, mangang takn hotel a din a, chu pawh mi sum leh pai hmangin. Duhthlan tur chuang kha a nei bik lo ni berin ka hria. A nupui leh fate tana a tihtheih tawka ngaiin kei leh Mapuii induhzia a lo hre bawk nen, tikhan risk lain a in leh lo a dahkham ta mai niin ka hria. A sum leh pai ang zawngin a rul zo thei bawk si lo nen.. Ka dem viau dawnin ka khawngaih. A rilru hrehawm dan tur leh ka laka a inthiam loh dan tur kha. Tin, khatiang inremsiamna an neih hnu lawkah a thi dawn tih a inhre kher lo ang a, tin, Mapuii leh kei kan inthena hetia Mapuii a kalbo hi a ring bik miah lo bawk a. Thangluaia thluak chu kan lo pha lo tlang hle a lo ni. Mahse, ka intiam ve a. Ka pa thurochhiah thiata zalen taka kan nun theih nan ka theihtawp ka chhuah ang tiin ka intiam a ni. 

Tikhan phaiah ka chhuk a, Mami pawh hostelah ka daj lut ta bawk. Pu Sharma zarah ei leh in siam lamah rim takin ka thawk a, Ka theih ang angin sum ka dekchhuak bawk. Heta ka phai awm lai hian ania Valpuia te nen pawh kan inhriat tak ni. Ka awm rei hman a, a bel pawh ka bel khawp mai. Beiseina ka nei tlat a, ka mitthla a, ka pan a, ke ka pen a. A tawpah chuan ka lo mitthla leh ka duhthusam chu ka tihhlawhtling ta a nih kha.. Mapuii chanchin ka hre tawh ngai lo va, tin, amah ka duhna leh hmangaihna te kha huatnaah an chang zo tawh bawk. A pa thu a hnial hreh vanga kal bo pawh nise min biak pawh dan kawng a awm. A reh ngawih ngawih a, kei hi an chhungkaw hmanrua lek niin ka inhre ta reng a. Mapuii hi a pain kei min hneh turin a rawn tir niah ka ngai bawk. Chutiang taka min hmusita hmanruaa min hmangtu chu ka tan pawh engmah a ni ta lo va, theihnghilh erawh ka theihnghilh ngai lo. Ka la hmangaih vang ni loin ka huat vang zawkin. Phuba lak ngei pawh ka tum a ni. 

Tichuan, a tawi zawngin Pathian zarah leh ka thawhrimna zarah hlawhtlinna kawng chu ka pawh ve tan ta a. Dawr lian ve tawk tak siamin, eisiam thiam zingah pawh top chin thah ka ruai a, keiin ka pui zeuh zeuh bawk. Gym saw chu ka thianpa pate ta ka khawchhawnsak a nih saw.. Rin ai takin saw pawh sawn sum min peipunsak a, ka tluang chho ve khawp mai. Ka sawi hmaih loh tur chu ka phai awm chhunga ka sum hmuh ang angte hi ka nau zirna senso bakah ka nu kutah ka thawn zel thin. Aniin lo peipung ve lehin, phaia ka awm laiin Pu Thanga sum fai kan bat chu a lo tlak ta vek a. Tunah chuan in leh lo humhim chiah ka hmabak ta a ni. Pa Siama kha kan lam a tan em vang leh a û nen an inhuat zui tak avangin a û hian a tuithlar ta hial a. Tin, a nupui hmasa kha a boral tak avangin a fa naupang ber chuan a rawn bel ta bawk. Pawi kan ti lo. Ka nu phei chuan a duatpui lutuk. Pa Siama saw ka pa ni lo mah se, kan chhungkaw tan a hlu ve em em tlat a ni. A nupui hmasak laka a thiltih dan erawh kha chu a dik miah lo thung. Tichuan, Mizoramah rawn letin sumdawnna te pawh ka han bun fel a, mi ten min hre ve tan ta tihin Pa Thanga chuan buaina a rawn nei chho leh ta a ni. Mizorama ka rawn haw tih an hriat rualin Mapuii chuan min rawn be pawp nghal a, Ka inah ngei min rawn kal chilhin, engkim chu a pa remruat a ni tih leh a pa thu a zawm loh chuan, keini chhungkua nunna thlengin a tawrh theih tur thu hmangin a vau tih min hrilh a. Ka awih miah lo thung. Mahse, tha takin ka lo dawngsawng a, khatih lai khan nangmah ka vei hun lai a nih tawh vangin a lakah feelings chhetemah ka nei tawh lo a ni. Nang ka vei dan che hi chu nakinah ka sawi ang. Tichuan, Chumi zan chuan Mapuii chu ka va thlah haw thlap. An inah erawh ka lut ve lo. A tuk zanah kan inah rawn kal lehin ka eisiam tura Nu Madini te ka lak hma a ni a. Ka nau lah excursion-a an zin lai a ni bawk nen, keimahin ka khawsa a. 

"Engpawhnise, inthlah nan zanriah kil dun ang" tia min ngenna chu hnar ta bik lo chuan, ka dawrah zanriah chu kan kil dun ta a. Mahse, engtik laiin nge ka eiturah damdawi a lo phul ka hre bik lo, kan zanriah ei kham atang chuan ka hai chhawlh mai a. Wine ka lem hnem deuh vangah ka puh naa, ka awm dan chu a dik lo tih ka hria. Ka dawrah sawn Cabin paruk chu ka dah ve a, mahse, emergency tak tak atan lo chuan kan book tir ngai lo. Ka awmdan a danglam em vang chuan, ka inkhalh haw thei pawhin ka ring lo. Mapuii chuan ka manager te biain Cabin-ah chuan min kuah lut ta a. Engtin chiah nge min suasam ka hre lo. A tuka ka harh chuan saruak vekin kan pahnihin kan lo mu! Zan lama thil thleng engmah ka hre lo. 

A haw a. Thil thleng kha a dik ka tih loh vangin ka ngaihven zui ta miah lo. Mahse, thla khat a liam hnuah, "Ka rai" a rawn ti ta a. Ka phawk hle. Rin harsa ka ti a, lehlamah khami zan khan sex kan hman ngei ka ring bawk si. Ka pa thurochhiah ka ngaihtuahin eng emaw thil inphum ru niin ka hre bawk si. Ka nu ka va rawn a, ani pawn a lo ring bik lo. Mahse, Mapuii chuan min puh miau avangin dan a sawt lo va, ka ngawi reng ringawt. Pa Thanga ngei ka inah rawn kalin min rawn dawr ta a. 

"Inmualpho tam hmaa inneih mai hi a finthlak zawk ang e. Ni e, mi duhâm ka ni a, ka fanu nen in inkarah game ka khel tih ka zep lo e. Mapuii kha a duh lo chung ka dahbo lui a, a chhan chu in in leh lo neihsak che u ka duh vangin. Mahse, tihian a rawn haw a, nang lo hmangaih a la nei thei si lo va, a tawpah fa hial inpai ta a. Tihtheih ka nei ta lo. I pa thurochhiah ang khan engkim hi innupa ta tur a ni e" a rawn ti dap dap a. Mi rilru nem tak chu ni ila ka awihsak ngei ang. Mahse, ka pa zia ka chhawm, thinlung sak leh paukhauh khan min chhanhim ka ti mai. Pu Thanga chu ka ring hlawl lo a ni ber e. 

"Ni e, ka lo inngaihtuah ang e, tunah thut thut chuan ka sumdawnna hi ka la bun nghet chiah lo va, lo nghak rih hram r'u" tiin ka thlah a. Ngaihtha takin a hawng ta. A hma zawnga min vaua hmanhmawh tura min tur ruaitu khan dawhtheih a thlang leh ta tlat! Hei hian chhan a nei ngei ang. Ni e, Pathian zarah ka lo hlawhtlingin, ka sum hráwm pawh a lo na ve ta a. Mi hriat hlawhin nula thenkhatin an zar pawl ka ni ve ta bawk nen.. A makpa ni turin min duh leh huam huam tawh a nih ka ring. Min rawn tur dawn anga a lan chuan, kan awmna in chu sak that ka rilruk thu ka sawi zel a. Ka sa tha ngei bawk. Tisawn ka duhthusam ang takin in pawh ka din ta a. 

Mapuii erawh a rukin ka chhui thung. Ka fa nihtir loh hram dan ngaihtuahin ka buai a, Dubai lama ka hmelhriatte ho ka han zawt a, an lo hre vak lo. A tawpa tawpah ka hmelhriatte hmelhriat ve lehchhawngin Rinawmi a hriat thu an rawn sawi ta a. Tichuan, ka zawt chhuak ta dap mai. Mapuii chu mizo pawh inti duh loin khu laiah chuan a lo zuk cheng a lo nia. Casino-ah thawkin hnam dang kawpin, a tawpah phei chuan stripper-ah a chhuak ta hial a! Sum erawh a hai lut thei zêk awm e. Casino-a thawk ve pakhat nen in luah dunin an cheng dun a, nupa ang an nih mai chu.. Chutiang taka tal hiar chuan a khawsa a, mahse, A chhan tuman an hriat lohin Mizoramah a rawn thlawk haw leh ta tawp a niawm e. A bialpa lah a hna atanga bangin an ramah a haw daih bawk. Chutiang teh nuai a nih vang chuan, Mapuii fa pai mek chu ka fa a nih ka ring ta lo va. Mahse, engtin nge thudik ka hailan ang tihah ka buai thung. Chutia ka buai neuh neuh chhung chuan thla pawh a lo kal ve zel a, Mapuii chuan ka rin ang ngeiin thla 7-ah nau a hring ta a. Thlakim lo va nau piang a an loh bakah a duhawmin a hrisel em em tlat a ni. Kha naute kha a nia ka dp-a ka hman kha.. An laka intihrinawm ka duh vang leh ka chet thawh dan an hriatthiam loh nan dp-ah ka hmang a nih kha. Mahse, ka nu nen kan sawi dunin ruahmanna kan nei vek tawh. Naute DNA leh ka DNA test kan tum a ni. Mahse, a awlsam dawn hauh lo thung. He thil hi kan tihtheih hlauh chuan, ka pa Thurochhiah lak atang khan ka zalen theiin ka ring a ni. A chhan chu ka nupui tur berin mi dang fa a pai miau a! Mahse, buaina ka tawk chho ta a, ka nu a dam lo ta tlat! Ka sawi hmaih hauh loh tur pakhat, phaia ka awm lai khan Mami chhul hi a cancer a, a chhul an paihsak tawh a ni. I lo hre tawh maithei. Chutiang tehnuai karah ka nau chuan hmangaihtu a tawng ve ta hlauh a. Nau a pai thei tawh lo tih hrereng chunga nupui atana duhtu Opa chu ka nau pawn a hmangaih em em tih ka hria. An inneih ka remtihsak lo thei ta lo a. Mahse, ka damchhung chuan an rethei ngai lo vang. 

Tichuan, ka nu a dam lo ta si a, theihtawp chhuah mah ila, a cancer hrik kha a lo tai darh nasa hman tawh lutuk tlat. Rilru hah leh chawl lo reng renga a hun hman thinna rah kha a rawn lang ka ti mai. A chhe nghal bawih bawih a ni ber e. Theihtawp chhuahin a nunna chu chelhsak tum mah ila, khawvel suma lei theih loh nunna chu Pathianin a ang chhungah a lalut ta a. Ka pa thihna ai khan ka tuar na zawk. Mite chuan ka nu nen inhuaa in mihran taah min ngai thin. A teuh lo, englai pawhin kan inhnaih a, ka kianga a awm loh lai pawhin ka tan a tawngtai reng thin. A thih chhanah hian Pu Thangluaia te pafa hian inrawlhna an nei ka ti lo thei lo va, rilru chawl lo reng renga ka nu an siamna man hi an la rulh ve ngei a ngaiin ka hria. Ka nu khan a thih dawn hnaihah khan, "I pa thurochhiah kha kei chuan ka hlen zo ta lo va. Nangin i rawn chhunzawm a niang chu. Mahse, i duhdan zelin i che dawn nia. Rilru nuam lo leh nupui fanaute laka inthlahrung reng renga i pa siamtute laka i chet dan tur chu fim takin ngaihtuah ang che.Mapuii fa pawm hi i rilarah ngei a nih erawh chuan, i nei ngei tur a ni " tiin min chah a. Ani pawn phuba la turin min duh niin ka hria. A kal ta a, ka nu chu.. Ka ngai thin. Nu chak tak zawng a va ni chiang tak. Pa Siama leh a fapa pawn an sûn em em a, ka nu kha an tan a sual ngai lo reng bawk a. Tichuan, hma ka la chho a, ka pa thurochhiah tidanglam thei tur ukil ka zawng a. Mahse, Pa Thanga leh a ukilte an fin kherek em vangin an hmachhawn ngam thin lo. Rem ka ruat ta a, ka nuin ka hminga in leh lo a dah tawh chu tidanglamin Pa Siama te pafa hmingin ka thlak ta a. Pa Siama te pafa in leh lo a ni ta. Chu thu Pu Thanga'n a lo hriat chuan ka game a ni tih a rawn hrethiam nghal a, a thinrim bawk. Min laksak leh chuan tur in leh lo a nei ta tlat si lo va. Tuna ka awmna lah keiman ka lei angin kan khawih danglam vek tawh si. Ka pa min hnutchhiah in leh lo, ram te chu A nau Pu Siama te ta a ni tawh si a. An unau indawr danah buaina ka nei ta lo. Amah Pa Siama pawh ka hrilh sa vek a, a rawn chuhbuai dawn tiin, saw in leh lo saw chán mah se, an pafa inbenbelna tur chu tihsak ka tum tho tih pawh ka hrilh tel. Engtin nge an indawr zui ka hre ta lo va, a rilru a buai viauin a rinawm. 

Mahse, tuna ka buaina chu, Mapuii kha ka nei ta si lo va, a fa pawh a lian ve tawh viau. Neih theihna tur thurochhiah lah tihdanglam ni lo mah se; an pafa tum ber in leh lo kha ka ta a ni tawh si lo va, mahse, a finga fing ta ngang chu Mapuii chuan, "Ka fa pawm lai hi i fa ngei a ni a, i pawm duh lo tiin media ka hrilh ang. I lar dan mak tak avangin mipa nunrâwng tia hriat i ni ang a, tumah i nupui ni duh an awm lo ang a, i sumdawnnaah pawh i tluang hek lo vang" tiin min la rawn vau ve a. Ka hlau miah lo naa.. Ka fa ngei lo ni ta se… Ka nu khan naupang tihfahrah a duh lo a, min chah lawm lawm kha a ni si a. Ka fa a ni lo tih prove-na ka nei si lo a, hei hi la buaina chu a ni ta a. Thla 7-a nau piang ka hre nual, hrisel tha pangngai tak pawh an awm ve tho a. Mapuii hian ka fa a lo pai tak tak em ni ang tih ka ngaihtuah chang hian nang i lo awm tawh si a, ka buai chhe lo chauh a ni. Mahse, tichung chung pawh hian ka fa a lo pai a nih pawhin amah ka duh lo, ka fa erawh enkawl ka duh dawn a. Heng zawng zawng hi i hriat ve loh chuan, nakinah mi dang ka atanga i hriat hunah a nghawng na dawn che a, chuvang chuan engkim huamin ka hrilh ta che a nih hi.. Chân che ka duh lo va, mahse, ka fa thlauhthlak ka duh chuang lo. Chumi inkara dintir chea tihnat che ka duh hauh lo.. Nula rilru tluang tak i ni a, min hriatthiam beisei chung leh ka lama i tan theih beiseiin ka inpuang ta a ni e"... 

Engkim chu a reh tlawk tlawk mai. Hmalam ka melh a, ka chiâi vek. Rosangpuia nun hman dan tehhrep chu ka lainat a, a tawp lam erawh chuan min tilaklawh thung si. Damdawiina rawn call tu kha Mapuii ngei chu a nih dawn kha.. Sawi mai tur ka hre lo. 

"Ih.. Chuan, engtia chet lak nge i tum? " ka ti ta ringawt a. 

Ka kut a rawn hum a, "DNA kha ka la tum tluang zel a, mahse, Mapuii te lamin an remti si lo a ni. " a ti a. Ka chhing sawk. 

"Kan inzawm hma thil thleng a ni a, sawi tur ka hre lo. Mahse, i fa ni lo hram se ka ti" ka ti hmiah. 

"Kei pawhin… media tih velin an sawi chu ka ngaipawimawh lo. Ka fa ni ta si se, ka hlam chhiah chuan ka inthiam thei dawn si lo va. Engkim hi chiang taka hriat ka duh khawp mai" a ti a. 

"An rem tih loh ngawt theih a ni em ni? " ka ti hâ a. 

"Aw an remtihna lak a ngai ve tlat a tin ni.. " a ti thawp sup a. A rilruah mawlhtu a nei tih a hriat hle. 

"Rin dan ka nei.. Sangpui, Mapuii rawn haw thut chhan kha a rai sa tawh ang a, nang i lo hlawhtling ta bawk nen, a paa puh tum chein tikhan chet a la a niang. Chutiang ni lo se, engvangin nge a rawn haw thut ang? " ka ti ta mawlh mawlh a. 

"Hei hi a tira ka ngaihtuah dan pawh a ni. Mahse, a rai tih a hriat rual khan a duh lo a nih phawt chuan a paih thei. A chhungte hriat miah lohin.. Chutiang chung chung chuan engvangin nge a rawn haw thut kher ang? " a ti a. Kan rilru a va buai dun tak. 

"Tunah an rawn tibuai leh tawh che em ni? " ka tih chuan, "Mapuii zawk hian min rawn zim leh ţan a.. Thu lungkuai tak tak hmangin.. Ka rilru tihnem a tum." a ti a. 

"I nghing em? " ka ti sap a. 

Min rawn melhin, "Lungpui ka ni ka ti lo, mahse, vawikhat pawh Mapuii vangin ka nghing lo" a ti nghet charh. Mapuii chu buaina a ni lo va, naute zawk chu a nih ber chu. Ni e, ama fa a nih chuan a thlauhthla lo tawp ang. Rosangpuia nen rei la inhre lo mah ila, a chhungril thatna leh ziarang chu hmu thiam tanin ka inhre ve tawh. Kan boruak ipik lutuk chuan ka thlanfim te a rawn siam thei nia.. 

Tihzangkhai nan, "Buaina chu hmachhawn tawp phawt mai ang.. Chuan, kei chu engtik laiin min lo vei? " ka ti ta a. A nui hawk. Hmalam a melh vang vang a, a heh a liak zauh bawk. 

"I hria em ka hre tawh lo va, Restaurant-ah i thiannu nen inlo chawl a, keini pawh in piah lawkah kan thu ve. In chhuah hnu lawkah i purse i thlauh tih ka va hmu a, ka va chhar a, i biak theihna ka zawng a, ka hmu si lo. Mahse, a hnu deuhah in rawn lang leh a, in rawn zawng ta a. Ka lo pe ta che a nih kha.. Khata tang khan ka vei che. Hmeltha ka tih chi i nia.. Mahse, ka hmuh tawh loh che vangin ka lo hrereng lem lo che a. Phaia ka awm hnua Valpuia te nen kan inhriat takah khan.. A bialnu i nih thu ka hre ve ta a. A rukin ka na ngawt thin asin. Mahse, mipa ka nia, ka tilang ngai lo. A bak chu i hriat tawh kha" a ti ta mawlh mawlh a. Ka ngaibtuah let a, Cindy nen kan chawlh tumin ka purse chu ka tibo ngei a, kan va kal leh khan tlangval sang lamin min pek tak kha mawle.. Enghelh ka neih loh lai a ni a, a hmel pawh ka lo chik em em lo kha a nia. Amah ngei a lo nih dawn chu… 

"Chuan, nih i buaina hi ka pa te ka hrilh dawn em? " ka ti a. 

"Hei tak hi ka buaina a ni. Hmanni lawka i pasal neih inthulh a, tikhawp khan mualphonain a zui che a. Tunah mualpho leh sawizui mai theih tur dinhmunah i ding tih hria se.. Hmuh che pawh hi min phalsak ka ring tawh lo a ni" a ti ta a. Dik ka ti. Hria se ka pa ngawltawt chhuah hian inhmuh min remtihsak ka ring tawh lo. Buaina an duh tawh lo. Kei pawn ka duh tawh lo. 

"Mahse, engkim ka sawi a. Ka thawl hawk. " a tih chuan ka khawngaih. A rukin a lo pai ngat ngat tihna a nia. 

"Kawng eng emaw i dap a ngai a ni mai" tiin a laka ka innghahzia ka sawi a. 

"Chutin ka hun ka khawhral mai mai dawn hleinem. Remchang ka la dap ve reng a nia. Chumi hma chu khawngahin lo dawhthei ang che aw" ngenngawl takin a ti a. Ka bu nghat. Duh em em hian min rawn fawp a, ka chhang let chiang kher mai. Kan boruak uap tak pawh chu zawi zawiin a kiang ta a. Amahah hian him riaua ka inhriatna hi Valpuia lakah khan ka nei ngai lo. A thuruk leh a buaina zawng zawng min hrilh ngam danah min ringtawkin min duh ve tak tak ni pawhin ka hria.. Ka lawm rualin, a buaina chu chinfel vat ni se ka duh takzet bawk a ni. 

A haw hnuah pawh ka muhil har viau mai. 

Thawh ka hai ngei.. Mahse, ka tlai chhe hran lo ve. Khua a duai deuh vang nge ka ke chu a rawn mar leh deuh a, inkhawm pui chiah ka ngai lo. Ka nute pawn min hrethiam viau e. Tukthuan kan ei kham, thleng kan sengfel laiin U Pari inthiar zo rawn chhuak chuan, "Ehhe! Dingpui, i hmu ve tawh em? Rosangpuia hian fa a lo nei reng alawm le. A fa chu a pawm duh lo va, a fa paitu rilru nain an thuruk a rawn puang vek mai" a ti lar lar a. Ka bowl ken lai ka thlauh bawl mai. Ka nute pawh an phawk hra.. Thil chu a va thleng rang bawk ve mawle.. Engtin nge? 

"Tak tak em ni? " ka pa chuan u Pari leh kei min melh tawn a. 

U Pari chuan, " tak tak a ni ngei ang. Dingpuii pawh a hming sawi chiah lo mah se, a rawn kher tel ve. Fa a nei tih hrereng chungin Rosangpuia hi a kherh char char a, a fa pawh a fa a ni lo tia pawm turin a fuih a.. Ti lamin an sawi.. " a ti a. Ka thaw a tawp mai dawn. Ka zak leh hrilhhai lutuk chu engmah ka ti thei lo. Ka ding khawng reng ringawt. 

"Rodingpui, thudik a ni em? " ka pain ka hmingpuma min koh vawikhatna a niawm e. 

"Ka hre lo" tih chiah ka sawi thei.. Ka pa ka va melh chuan, Rosangpuia nen kan inzawmna chu a derthawngin nizana kan inngenna te chu engmah lo maiah a chang ta tih ka va hre thei.. 

Rosangpui, eng emaw tak i tih a ngai a ni.. Khawngaihin..