Rosangpuia 8

ROSANGPUIA.. (8)

Ziaktu: Toni Râlte

Zanriah chu ka ei tui leh kher mai. Nu Madini eisiam thiamzia kan sawi sap sap mai. Mami chu a tawng duhin a nelawm kher mai a, Opa lah a nui huah huah reng bawk. Rosangpuia nen unau an ni ang tih rin harsa khawpin Mami chu a tawng duh ve a, a û erawh biak loh chuan sawi tur reng hre lo a ni thung si. Mahse, mipa tawng tam deuh ai chuan ka duh daih zawk. Zanriah ei khamah in chung zawlah kan chho dial a, boruak a nuamin arsi a pe iar a, van pawh a thiang kûk mai. Aizawl veng thenkhat pe un mai thlir pah chuan kan titi siam siam a, Mami chuan, "Naktuk tuk lehah kan haw dawn sia, ka ngai ngawt ang che. Ka u hi khawngaihin lo enkawl tha rawh aw" a ti mawlh mawlh a. Rosangpuia leh Opa erawh kan hlat deuhah an ding a. Kan thusawi an hre pha chiah lo vang. 

"Enkawl hleihtheih pawh a nih loh saw. Amah hian thei a inti tawk ve a" ka ti a. A nui hak hak. 

"A dik ang, induhtawk ve tak hi a nia. I dawm thiam a ngai dawn teh mai a nia" a ti a. 

"Mam, a nih Julie i hre ngai em? I u ex" ka ti phawng a. Min rawn melh zauh a, a nuih a zat hmel kher mai. 

"Hria e. Kan Julie kha chu a ngaihna a awm lo. A atchilh zawngin a kal pek a" a ti zui bawrh bawrh a. A jail tan vel thu erawh a hriat tawh tho ka rin vangin ka sawi duh lem lo. 

"A nih I U dawra thawk Azuali ve thung kha le" ka ti a. 

"Hria e, ka û nen kan inhauh phah hrep tawh. I rawn lan hma khan Azuali kha kei ka lo khawngaih deuh hman a, ka u chu khawngaihna lantir turin ka ti a, a lo duh lo nasa mai si a. Kan inhnial hrep alawm" a ti leh mawlh mawlh a. 

"I nu boral kha a tuar hlein ka hria.. I u hian" ka ti ta daih a. Mami hmel pawh a ngui sawt. 

"Umm.. Tuar tur chu a nia lawm.. Kan chhungkaw chungchanga thuthang thenkhat chu i hre tawh maithei. Mahse, i hriat chin chu thudik a awm ka ring lo" a ti ta mai a. Makti deuha melhin, "Ka hriatho hi a dik lo a maw? I nu pasal vangin in unauin in indang tih vel hi" ka ti ta tawp a. A khi sak. 

"Chutiang chuan thu thang se kan duh zawk alawm.. Chutiang chu kan chhungkaw than dan a ni. Mahse, engmah a dik lo, hei chu ka u in a la hrilhfiah vek chein ka ring. Chuan, khawngaihin ka u hi phatsan lo hram ang che" ngenngawl zet hian a ti ta a. Ti nge hetiang thu hi an unau ka atanga ka hriat fo le? 

"Insawi chiang duh thin si lo va, rilru put dan thiam a har" ka ti hmiah a. 

"Ka û chet khalh ka duh lo alawm. Ih maw, hei hi hrereng la ka duh. Ka u-in tihtakzeta a buaipui hmeichhe awmchhun i ni tih hi.. U Valpuia nen inchungchangte kha ka hre ve vek alawm. " a ti a. Ka thaw hak ringawt. 

"Mahse, a chang chuan ka hrethiam lo.. Engmah hi" ka ti hlawl. Ka bangbo thin takzet a ni. 

"Ka hrethiam che alawm. A hunah engkim i la hre vek mai ang" a ti sap a. 

Phur hmel zet hian, "E! Chuan, naute kan nei dawn asin" a ti leh daih a. Ka lo hawihai viau. 

"Eng.. Engtikah? " ka ti bah nak a. 

"Naktukah kan tifel ang.. A duhawm teh asin" a ti a. Fa lák (adopt) an tum tih ka hrethiam nghal. 

"Mam, ngaih loh lamah ngai lo la.. Ih, fa hi tu zawkin nge nei thei lo che u? " ka ti ta tawp a. Ka inthlahrung angreng viau. Hmel hlim taka min melhin, "Keimah hian mawle.. Ka chhul an paih tawh alawm.. Chhul cancer ka nei a, chuvang chuan min paihsak tawh a ni" a ti fiah ta kalh a. Thil thar leh bawk. 

"A pawi ka ti hle mai. Sawi tur pawh ka hre lo" ka ti a. 

Hlim hmel pu deuh hian, "A ho lutuk, inthlahrung suh. Ka pawm thiam vek tawh. Kan pa hi ka khawngaih zawk a. Mahse, ani pawn a pawm thiam lutuk" a ti sar sar a. Ka lo nuam ve huai mai. Opa te pawh an rawn phei ve a. Rosangpuia hmel chu a tak leh run tawh. Ka awm a tinuam lo. Ka kawnga rawn kuah pahin hmalam a thlir a, "Eng nge ka farnu chuan a lo hrilh che a? " a ti a. 

"Engvak mah.. I sualzia vel te" ka ti a. A nui hawk hawk. 

"Kan inhualna tur chungchang insawi lo em ni? " a ti a. Mami nen kan indet ralh. 

"Inhualna hranpa neih kher hi a tul ber mawni le.. Mi naran ve mai ka nih hi" ka ti a. Ka kawng chu a rawn hmer na hret a, ka lo îp chawih. 

"Min hretu zawng zawngten ka nupui hual i ni tih hi hria se ka duh a ni" a ti nghet charh a. Engtin emawni ka awm. 

"Tha i tih ang chuan a ni mai alawm" ka ti ve ta nge nge a. 

"Mahse, i chhungte i be tawh em ni? " a ti a. 

"Be chiah lo" ka ti tawi ták a. 

"Be phawt rawh. Chumi hma chuan engkim i hre bawk ang" a ti leh a. Hriatthiam theih te hian sawi ve thin mai se aw.. 

Opa chuan, "Naktuk chu min va kalpui hman la ka duh tehlul nen" tiin topic dang a rawn zep ta hlauh a. 

"Ni ngawt mai. Ka dam a la pan deuh sia, hna ka ngah bawk si. " a ti ve mai a. 

Mami chuan, "Ka kut ngei hian ka pawm chak tawh a ni" tiin a nui var var a, an pa chuan duh hmel em emin a melh bawk. An awhawm reuh em mai. Sangpuia pawh chuan a farnu hlim hmel chu thlek pahin, "Ka beiseipui che.. Ka naute" a ti sup a. Kei pawn ka lo lawmpui ve em em tawp. 

Ka nuin min lo call a, "I laklawh loh chuan i lo haw tawh mai dawn mawni le.. Hei Buaina kan tawk tlat" a rawn ti a, a aw atang pawh chuan eng emaw inphumru a awm tlat. Hlauhthawnnain ka khat nghal a. Sangpuia ka melh a, "In lamah buaina an tawk a nih hmel. Ka haw phawt mai ang" ka ti a. 

"Lo kal rawh" tiin min kai nghal a, Mami te nupa chu ka vai a, "Lo damtha ru aw. Kan inhmu leh vat dawn nia" ka ti a, anni pawn, "Inenkawltha la, kan inhmu leh vat dawn nia" an ti ve bawk. Ka hmanhmawh si a, tha tak pawn kan inthlah hman ta lo chu a nih hi. Rosangpuia pawh a tlan chak viau, a damkawr sia, ka lo îp deuh. 

Kan tawng dun miah lo. 

In kawtah a ding a, "Ka lo lut ve lo ang. A nih aw.. Va chingfel ang che" tiin ka biangah a rawn fawp zauh a. Kei pawh vai riaiin ka chhuak ve nghal. In chhung ka va luh rual chuan, U Lawma'n U Pari hmaiah a lo beng thlawp mai a. U pari chu a tlu thlawrh. Ka u hian hmeichhe kut thlak a hreh tehlul nen, eng thil phiangsen nge thleng le.. 

"Eng nge thleng? " ka ti vat a. Bawihtea chu a pu kapkarah ţi dek hian a lo tawm chaih chaih a, ka nu erawh chuan u Pari chu kai thoin a thut thattir a, Rami erawh kil khatah hlauhthawn hmel zetin a lo ding khur zawih zawih bawk. 

"Kut min thlak a maw? Lawmawm, i va zak thei lo ve. Chu pawh inawmpuinu vangin.. Zawnga, i hre khawp ang. Uichopa" U Pari chuan a ti tâwn tâwn a. Rami chu ka va melh a, a hmai a lo hup tawp. Thil awmzia engmah ka hre der si lo. 

"Eng nge thil awmzia sawi ta che u.. " ka ti vin thak a. Ka u lah a tûm bûr a, a thinrim takzet tih a lang. 

Ka nu chuan, "Rami leh Lalmama te chungchang a nia" a ti ta daih a. Ka bo hman. Mahse, ka man thiam leh vat. 

"Rami, eng nge sawifiah teh" ka ti a. Rami chuan aw khur hlak hlak hian, "Ih, U Mama a lo leng a. Chuan, Mama chuan, U pari bulah, "Rami chungchang vel kha min hrilh si lo va, min hrilh angin an sawi sia. Ka hrethiam lo " a tia. 

U Pari chuan, keimah hi min hau ta hrep a. "Ka hrilh ka ti mi? Engtikah nge ka hrilh ka tih? " a tia. Ka sawi thei mai bik si lo. Chuan U lawma a lo chhuk ve a, thil awmzia min zawt ve a. Mama bialnu inti in min lo biak dan velte chu ka sawi ta a. Chuan, kha nu number kha ka entir a, "Hei chu Pari number pakhat zawk a nih hi" a ti ta mai a. U Pari hi chu a ţang ve tlat a, mahse, U Lawma hian a hrechiang sia. Tichuan, kan buai ta nuai a nih hi. Mama khan, "U Pari chu i ti ang lo hle mai, bakah pasal nei tawh i nia, min lo be tawh suh. Biak pawh. " a tia. U Lawma hian a thik aniang. Engmah ka hrethiam tawh lo" a ti kawkalh ta nuai a. A sawi chu buh deuh nuaih mah se, ka man thiam mai e. Ka nu te erawh chuan an hrethiam hlek lo vang. 

Mahse, U Pari thlavang hauh chu tul ka ti rih si a, "Ka u pawh i va timak ve. Chutiang vang mai maia kut te i thawh a? U ruata'n U Remi kut a thlak pawh i duh lo hle kha a ni sia.. I va timak ve" ka ti kalh kalh a. 

A ding hluai a, "Engmah inhre lo. Engmah. Ka thinrim a nih chuan chhan tha tak a awm a ni mai" a ti nghut a. An roomah a chho daih. Kan hrilhhai tlang hle. U Pari chu a tap faih faih a, "U Par, hrehawm ti suh. Engpawhnise, in nupaa inchinfel chi niin ka hria. Lo inrawlh ve vak pawh a nuam lo" ka ti a. 

Ka pa chuan, "Ni e, Pari, han chho rawh. Tun tum zawng hrethiam hram mai teh. Ani hi zawng a thin thawk hi a naute pawh hian an tuar zo ngai meuh lo a nia" a lo ti dam thlup a. 

Rami chu inthlahrung tih hriat ngawih ngawih hian a rawn phei a, "U Par, ka tihpalh aw.. Keimah vang a ni. Hrehawm ka ti em mai. Mama khan khatia a sawi kha ka ring miah lo asin" a ti a. Ka lo lainat, a inthlahrung lutuk chu. 

Pari pawh chu tum bârin roomah a chho ve a. Engtin tak han inthlem ang maw.. Inthlak rih lem loin sitting roomah chuan ka thu ve a. Bawihtea ka pawm nghal chat bawk. 

"Ani, apa khaa thinrim tiraw? " a ti a. 

A sama chul pahin, "Umm, nia apa kha a thinrim hle a nih kha. Tihbuai chi rih loh aw" ka ti a. A bu nghat nghat mai. Ka nu chuan, "Rami, mama nen hian in ni ve reng reng em ni? " a ti a. 

Zah hmel deuh hian, "Umn, ih, nu, ka duh ve lutuk a" a ti ta tawp a. Ka nu a kiai sak. 

Ka pa chuan, "In thu bulbal engmah hre ve lo tan chuan i ù thinthawk thut kha hriatthiam a har mang e. Mama kha a thik tihna em ni zawk le" a ti chuar chuar a. 

"Ih maw.. U Pari khan a number pakhat zawk hmangin Mama bialnu angin Rami hi a rawn hau hrep mai a. Hmusit deuh deuh ten.. Mahse, Mama bula kan sawi chuan engmah a lo hre ve si lo, tichuan, zaninah khan Mama khan U Pari chu a chhuahchhal ta a nih kha. Mak ka tih zawk chu U Pari khan ti nge Mama bialnu anga Rami hi a lo hauh hrep kher le? " ka ti ta dap dap a. An hriatthiam hmel ta deuh. 

Ka nu chuan zawi sapin, "I u thinrimna tur awm chu ka hre mai e. Mama a biak danah lawm lohna a nei tihna a nih chu" a ti sap a. Ka lo bu ve nghat. An nupa inkar thil a nia, lo ngaihven teh ruai kha a nuam bik si lo. Rami tak pawh a khawngaihthlak letling. 

Ka mu chiah tihin Rosangpuia'n a lo call a. Ka la ve mai. Kan buaina chungchang chu min zawt eih lo. Mi chhungkaw buainaa inrawlh tum lo a ni chu ka lawm viau zawk. Mipa diktak zia a nei miau a. 

"I nute chu engtik nge i sawipui ang? " a ti leh ta. A hmanhmawh dan hian ngaih a titha lo. 

"Naktukah a remchan chuan sawipui ka lo tum ang e" ka ti a. 

"A that chu.. Chuan, naktuk chu inah hna thil ka khawih dawn a, ka buai deuh ang. A tuk lehah Mami te an haw ang a. Sunday chawhnuah inhmuh kan tum mai dawn mi? " a ti nuah nuah a. 

"Ka hman ang em ka hre lo. Sunday hi chu programme neuh neuh a awm ve sia" ka tih chuan, "Okay, Saturday tlaiah ka dawrah zanriah min kilpui theih chuan ka lawm ngawt ang" a ti leh a. Chaw eia chhuah reng hi a ke na ber si, ka inthlahrung ve deuh tawh viau. Mahse, ka nute hian hetiang kawngah hian min hrethiam ve riau zel a, tin, Sangpuia'n sawi duh a nei bawk nen. Ka pawm leh ta phawt a. Ka pa dil erawh ka inthlahrung deuh. Ka nu hi chu a la namnul theih deuh a. 

A tuk Holiday a ni bawk a. Ka nu pawh a awm ve a. Ka pain feh a rawt naa, khua a nuam vak lo va, "kal lo mai rawh u" kan tih avangin inah an awm ve dawn a nih hmel. Tukthuan chu ka u te nupa chuan an rawn kil ta lo phawt. Innei tir siah chuan buaina an nei hma mang e. Chaw eina vel kan sengfela kan tihfel hnuah ka nute thingpui háng lumsakin ka va pe a. Ka thu ve nghal a. Ka zam ve khawp mai. Ka hmelah a lo lang deuh nge, "Sawi duh nei hmel i pu" ka nu chuan a lo ti leh chat. Min chîk awm thin mang e. 

Ka kut ka tiche sek a, "Aa.. Ih, ka nei a. Ih, englo a nia. Rosangpuia hian inhual a duh a. I chhungte sawipui rawh a tia, ka sawi ve tawp" ka ti liam ta puat a. Ka zam luat vangin ka sawi rang khawp mai. Ka pa chuan min melh vung vung a, "Ani hi i duh ve tak tak em ni? " a ti ta khauh a. 

"Ka duh chuan ka hria. Mahse, tihsual leh erawh ka hlau khawp mai" ka ti a. Ka chil ka lem khawlh. 

"Kan fate hi induhzawngah chuan engmah sawibuai ka tum ngai lo. Induhthlanna ka zahsak che u a. Mahse, inthlan sual leh inthu a ni tawh mai a. Rosangpuia hi ka hrechiang tehchiam lo va, mipa hlawhtling tak a ni tih chu ka hria a. A chhungkaw chungchang hi hriat ve erawh ka duh viau mai" ka pa bawk chuan a ti a. Ka nu pawh chuan, "Ni e, inhriatchian tluk a awm lo a" a lo ti ve a. 

"Aa.. Ka hrechiang lutuk bik lo. Mi sawi dan chuan a pa a boral tawh a, a nuin pasal a neih leh vangin a farnu nen an indang tih bak chu" ka ti a. 

"Umm.. A zinkawng a bumboh ve dawn a ni maw? Valpuia thianpa kha a ni a, hei hian min titîm deuh zawng a ni" ka pa chuan a ti a. Ka hrethiam khawp mai. Valpuia hian kawng dang hmangin kua a hreuh ang tih hi a rinhlelhawm ve tlat a. 

"Mahse, Pa, Sangpuia chuan Valpuia bulah pawh a sawi vek asin" ka ti hram a. 

"Ni e, nula puitling, pasal nei rual i ni tawh a. Khati khan a vawikhatna kha a han flop ta kha a nia. A vawi hnihna chu a hlawhtling tawh turah ngai ila.. " ka nu chuan a ti a. 

"Chuan, inhual tihah engtia han inhual nge intum dan? " ka pa chuan a ti a. 

"Ka hre bik lo, ama remruat leh ruahmanna vek a nia. A sawi hmangah chuan amah hretute hian a nupui hual ka ni tih hi hria se a duh a" ka ti a. 

"Keimahni lamah chuan han rem loh viauna a awm lo va. Inhual te hi in han tia, sap style hi inla lutuk a. A tul ber pawn ka hre lo. Mahse, thalai in nia, induhdan erawh hnawl vek ka tum hran lo e" Ka pa chuan a ti ta a. A awmzia chu an remti tihna.. Ka thaw huai mai. 

Rami nen tukverh darthlalang kan nawhfai laiin ka u te chu an rawn inzui thla a, an inngeih tawh a nih hmel. Chaw an ei dun a, ka melh zeuh zeuh. Ka u hmel pawh hmuh a nuam ta deuh e. U Pari pawh a tawng ve leh siam siam tawh alawm. Ni e, inngeih teh se. A ninawm. 

Rosangpuia chuan chhun chawlh laiin a lo call a, "I sawipui tawh em? " hmanhmawha hi a. 

"Aw.. An remti" ka ti teh tawp a. 

"Ka lawm e.. Ka chak sawt mai" a ti vel. 

"I damkawr rih sia, hna kha thawk ngawrh lutuk lo la" ka tih chuan, "Champhai kha ka zo hman si lo va, hun ka nei tlem riau a. Hei ka zo tep e. " a ti mai a. Keini pawh thingpui kan in a. Bawihtea a rawn tap lut. Kan phawk hrâ mai. 

A chapal lehlam a bun bawk si lo va. A bal nian reuh bawk nen. Api chuan, "Ngati nge? Ka duat.. Khaw nge i chapal khing? " tiin a lo thlem vat a. 

"Sawmsawma ten an tanky-ah min thlaksak anih kha" tiin a tap uar sauh a. Ka nu hmel rum sawt ka hmuh chuan, a tupa tan a dik a dawk thlu miah loin mi a va hau leh dawn tih ka hre nghal a. Ka tho vat. Ka va chhuak a, kan in piah lawka in relah chuan Sawmsawma te ho chu an lo awm a. Ka va pan phei a. 

. "Sawm sawm, Bawihtea chapal khing inpaihsak ami? " dam dap hian ka ti a. 

Sawmsawma chu Lalmama te in luahtu Saihminga te fapa upa ber a ni a. He lai vengah chuan a rualpui zingah a lianin a huai ber a ni. 

"Aw.. Tanky-ah khuan a tla lut daih a" a lo ti a. 

"Engtin nge a tlak theih? " ka tih chuan, Bawihtea kawmngeih ve ber Pektea chuan, "Ih, Ani, U Sawmsawma hian a thlaksak alawm" a lo ti zum dâk a. Sawmsawma chuan, "Peka, i zak em? Ka hnek mai ang che aw" tih leh a kut lek khum a rual nghal a. Ka inrawlh vat. 

"Engvangin Bawihtea chapal chu i thlaksak a? " ka aw pawh a nem vak tawh lo. 

"A eitur min pe ve duh lo nih kha" a ti ta a. Naupang buaina hi chu aw. Pektea bawk chuan, "Mawina, Bawiha khan a pe teuh tawh a, a dil belh zel a, a pe phal tawh bik lo alawm" a lo ti ve leh zat a. A thianpa thlavang hauh chu a tina ve khawp mai. 

Sawma chu ka en a, "Zuk chhar rawh. Chapal chu" ka ti ta a. A meng zak zak mai. In rel sirah tanky tur an lai a, cement te pawn an zut vek tawh. A thuk phian bawk. "Ka chhar awm lo e mai" tih leh tlan chhiat a rual a, an inah a tlan lut ta daih. Ka va hem chak reuh tak. Naupang dangte chuan, "U Sawmsawma chu kawm tawh lo ang u, a sual si, min tiduhdah thei si" an ti sap sap a. Mahse, a hunah chuan an kawm lo ngam leh lo vang. An boss ve kha a ni miau a. Inah pheiin ka u chu Bawihtea chapal chharsak tur chuan ka va ti a. A ding ve mai bawk a. Pari chuan, "Sawmsawma chuan chhar mai se la, a paihtu a nia. Ngawi rawh, keiman ka va tihtir ang e" tih leh thawh a rual a. Ka pain, "A ngai kher lo e. Ka va chharsak ang e. Naupang an ni sia, a buaithlak. Sawma nute an rapthlak si, buaina a awm palh ang" a ti vat a. A va phei nghal a, reivak loah chapal khaiin a rawn phei a. 

"Saw nau saw a sual riau mai a, a huai bawk si. Engtia han tih chi nge mawni dawn ni? " ka nu chuan a ti a. 

"Bawihte, i eitur i pe ve phal lo mi? " tiin ka vahpa chu ka en a. 

. "ka pe teuh a, a eizo zel anih kha.. Ka ui ve tawh tho lawm" a ti a. 

Pari chuan, "Thiante nen inkawm laiin eitur neih bik loh tur.. A inlak eng emaw thlak, ka nu te pawn pawisa pe tawh suh u" a ti a. A sawi dikna chen a awm ve reng mai. 

Ka nu chuan, "Chutin a hranin ka pe bik lo. Amah hi a rawn haw a, 'Ka thianten eitur an lei sup sup a, leina min pe ve rawh' a tia, ka lo pe ve mai kha a nia" a lo ti hram a. 

"Bawihte, tun chinah chuan i thianten eitur an lei pawn lo haw la, hetah i eitur chu i ei zel tawh dawn nia.. Chuti lo chu an sual sia, an chhuhsak leh vek ang che" Pari chuan a ti a. Bawihtea pawh hlauh hmel deuhin a bu nghat nghat. Pari zilhna chu ka pawm zawng a ni ve tho a, hnial ka tum hran lo. A pasal fapa chu a ngaina ve ta deuh pawh a ni mahna le.. A lawmawm khawp ang. 

Eirawng kan bawl hma a, chaw chhum chiah a ngai tawh tihin Rami nen walk turin kan chhuak ta a. Ka ke exer lakpui a ngai thin si a, Rami hi chuan, "Ka thau" a tih vanga walk ve a ni thung. A thau pawh ka hre lo. A mawi tawk viau. Mama'n min lo zui ve a lo nia. Nizan khan khatia ka u te nupa an inhauh takah khan a nuamti lo kha a lo haw daih a lo nia. A awm ve tho mai. 

"U Dingpui, nuam lo ka ti lutuk, U Lawma'n min haw ngawt ang" a ti a. 

"Nge maw a huat ngawt ang che aw.. I ho lutuk" ka ti a. 

"Aih, ka mawl em alawm. Ti nge khatia U pari kha ka zawh ve ringawt ni.. Min lo be tawh suh te kha ka ti ringawt a. I U tan chuan ka ngeiawm dawn eee" a ti leh a, a rilru a nawm loh hmel tak tak. 

"Hrim hrimin Mam, U Pari chuan a lo be thin che mi? " ka ti a. 

"Be ve thin e. Mahse, Rami vel a sawi ngai miah lo, an ina a len phei dawnte hian 'min lo thlah' a ti ve ziah zel a. Mi nu a ni tawh a, khatia inbiak reng kha ka duh lo a, bakah U Lawma'n a lo hriat hunah a thinrim ka hlau sia, nizan khan amah U Pari kha ka ngei ve deuh reng reng a, khatianga ka bialnu anga Rami a lo be kual kha.. Kha vang khan tikhan ka sawi a nih kha" a ti ta mawlh mawlh a. Ka hrethiam tho mai. 

"Engpawhnise, tun hnaiah chuan rawn lang rih lo la, inthenawm tho kan nia, Rami nen pawh inhmuhna chance chu a tam tho alawm" ka ti ta ringawt a. 

"Ka ngam tawh teuh lo, U Lawma ka zah" a ti ve bawk. Ni e, a nuam rih lo vang. Amah vangin kut hial an inthlak si a. Mahse, U Lawma khati taka a thinrim chhan kha Mama a biak thin vang a nih ka ring chiah lo, a phenah eng emaw a awm ka ring. Chu zawng kan hriat ve tur a awm lo thung. Thim dawnah in kan thleng a, Ka nu chuan a chaw chhum a lo suan mek a, "Khaw nge U pari te" ka tih chuan, "An in lamah chaw an ei phei dawn a nih kha. Pari nau fanu birthday an lawm dawn a niawm e" a ti a. Keini pawh kan inbual a, zanriah kan ei zui ve nghal. 

Mami te pawh Kolasib lamah an haw ta a. An naute lak thar thlalak chu min lo thawn a, mipa niin a duhawm takzet. Engtin nge a nu hian hnuchham inah a dah phal zawk ni? Mahse, an dinhmun kan va hre ve si lo va, lo sawisela lo dem chiam chi pawh a ni lo. Mahse, ngaihdan nghet tak ka nei ve a. Thenkhat tan chuan pawm a har maithei. Hmeichhiain nau a pai a, a fa painain neih duh lohin a kalbosan a. Amahin a hnutchhiah a, a dinhmun pawh a chhe viau maithei, a chhungte pawn an hnawtchhuak pawh a ni thei. Chutiang hunah chuan thenkhat chuan, "Sex an hman ngam chuan a pai ngam tur a ni" tih ngaihdan an neihsak thin a. A dik reng mai. Mahse, kha naute kha a hrin hnu lawka khawlai emaw tu te emaw in kawmkar vela a paih leh mai mai dawn ai chuan, hring loin thisen mai a nih lai khan paih mai se tih ngaihdan ka nei ve tlat! A christian rilru lo viau maithei. Mahse, pawisawilo naute chavai lutuk, khawlaia tlu hlum tura paih leh dawn ai chuan, hrin loh kha a tha zawkin ka hria. Engpawhnise, kan rama sâwn tam lutuk te hi hmeichhe mawhphurhnaa ngai an tam hle. A phena mipa mawhphurhna pawm duh miah lo hi an kat nuk. Ka sawi tam dawn chuan ka thinrim dawn zel.. Sawi thui lo zawk teh ang. 

Rosangpuia nen saturdaya inhmuh kan tum thu leh thu pawimawh tak min hrilh a tum thute ka nu te ka hrilh chuan an remti ve mai a. Mahse, Ka U Lawma a rawn inrawlh ve ta tlat! 

"Ka duh aiin a chhuak tamin a lenglam tlat. Hmanni lawkah a pasal neihna thulh a ni a. Tunah mipa dang buaipuiin a chhuak leh ta zeuh zeuh a, ka mit a kham deuh. Mi sawi dan tur te ngaihchan ve a tha" a ti hmak mai le.. Nuam lo ka va ti tak. 

"A hrim hrimin inhualna chungchangte chu kei a nuta pawh ka awm ve a, min rawn ve ta che u. Tih tak emah chuan nangni inboral hnuah kei lo belh tur a nei dawn lo, a chungah hian thuneihna nei ve tur ka ni" a la ti zui! A sawi dik ve reng bawk si. Ka inthlahrung ngawh ngawih. Thil hi a sawi zen zen lo va, a sawi ve chhun erawh ka pa te hian an ngaipawimawhin an bengkhawn hle thin. 

"A dik alawm.. Kan lo tidik lo a ni. Engpawhnise, ani hi kan fanu neihchhun a ni tawh a. A hmalam hun pawh thui tak kan thlirpui ve a, Pathian zarah hna te a han nei a, ngaihtuahawma a awm chu ka ring lem lo a.. A nuta i ni a, Rosangpuia hi i duhpui lo anih chuan keini chuan hnial che kan tum hran lo a nia" Ka pa chuan a ti ta a. Ka lung a phu dawt dawt mai. 

"Ka duh loh pawh ka hre lo. Mipa hmu tura a chhuak zen hi ka lawm lo a ni mai. Rosangpuia te chu iaina chhan tur a awm hran hleinem, mi hlawhtling tak a ni a. Mahse, pawn lamah inhmu tam lo se, hetah kan inah pawh a rawn kal thei tho a" a ti a. Ka nuta hian min enliam mai mai lo tih ka hriat phah a, ka lawm viau zawk mai. Ka hmingchhiat leh mualphona tur min lo dawnpui ve vek tihna a nia. Hetianga nuta min ngaihtuahtu neih hi ka inchhuang letling. 

Ka nu chuan, "A ni tak e, Mate, i u thusawi chu i hrethiam ang tiraw? " a ti dam thliam a. 

"Hrethiam tehreng mai. A sawi dik alawm. Zep loh chuan kei pawh ka inthlahrung ve tho alawm. Mi an tawng duh ve bawk nen" ka ti ve a. U Lawma pawh chuan, "Kan neihchhun i ni tawh a, I U Ruata pawh sawn a ngaihtuah teh mai che nia, i chhuak tih a hriatte hian chanchin a ngaihven ve vat zel ania. I mualphoa i nat leh hi kan hlau em a ni. Nula puitling i ni tawh a, a awm tawk leh a mawi tawk chu i hria ang" a ti dap dap a. Ka lung a dam khawp mai. Nuţa ten an enliam mai mai, zilh pawh an zilh peih loh farnu satliah nih hi ka duh reng reng hleinem. 

"Aw ka hria e. Rosangpuia pawh ka lo be dawn nia. Ani pawn a hrethiam em em ang" ka ti a. 

Rosangpuia pawh ka be nghal a. Ka hrilh ve vek a, "Nuţa fel tak i nei a nih chu.. A lawmawm lamah ngai ang. Saturday zanah chuan ka rawn leng dawn nia" a ti ta a. Ka hlim veng veng mai. 

Saturday chhunah U Pari chuan kan veng thenawma awm Diktea beutician, tuai ve deuh hi a rawn hruai lut a. Kan lo melh hû mai. 

"Dingpui, facial te i tihtir ve duh lo mi? Ka ko a, ka facial dawn a" U Pari chuan a ti a. Ka nat atang khan ka la khawhtir miah lo. A lo kal takah chuan ka duh ve tho mai. U Pari chu a facial hmasa a, a titi suam suam a, Rami nen a titi kan lo ngaithla a, a sawi thiam sia kan nui leh awr awr thin. 

"Awiii, kei chu ka tuai ve ringawt a, ka mawngkua hi a hur thlawt lo.. Mi hian bialpa nei turah te hian min ngai a, dik tak chuan ka aw a tuai sia, ka chet phung a nu bawk sia, ka tuai ve tawp a ni mai. Chutin mipa ngaihzawn hi ka duh lo hrim hrim.. Hman deuh khan amah pawh inhre maithei, a lar ve a. Chupa chuan min beisei ta tlat a nih chu! Awiii ka tenzia chu maw.. Kei chu tiang hi ka duh lo hrim hrim.. Juno te, Zualbawiha te ho ang hi ka ten ve tho.. Ka chêkin a mil hlawl lo" a ti suam suam a. Ka ngaihtuahna a tikalthui viau mai. Diktea te ang hi an awm nualin ka ring. Anni hi chu a langsarin an tuai ta law law a, an mawngkua a hur miah lo thei ve tlat! 

Chutihlaiin nikum lawkah ka thiannu Kimi u pasal kha ka ngaihtuah a, kum khat an inneih hnuah Kimi u beidawng kha a haw leh tawp kha a nia. A chhan chu a pasal kha mawngkawhur a lo ni reng mai! Hmeichhia a mutpui theih tho rualin a mipatpui lakah feelings a nei nasa zawk mah a. Kimi u khan a man chhuak ta si, a tilui thei ta ngang lo kha a nia. Khatiang mihring ang, Kohhran leh khawtlangah pawh langsar tawk vela inhmang, mi pangngai leh zahawm ena mi pawn an en, A ruka an mipatpui mawngkuaa bei hreh lo, HIV hrik thehdarh kawnga thawh hlawk tak hi an inphum ru ţûn mai. An lan danah mipa pangngai tak an ni si. Kei mi râp, ka ten. Tuai tih hriat hliah hliah, Heng Juno, Zualbawiha te ang hi chu lehlamah an nihna an zahpui lo va, an lang chhuak ngam ta law law a. Hmeichhia an ngaizawng dawn miah lo tih a lang reng mai a. Chutiang ni lo, ka sawi ang mi inthup, hmeichhia pawh duh, mipa pawh duh ang chi ho hi an rapthlak ka ti zual. Justice for Zothansanga tia kan au rualna te khan rah chhuah a nei har riauin ka hria.. 

 Diktea facial chu a nuam kher mai. Rami pawh ka tihtir ve a, mithmul te pawh ka pawhtir nghal a. A inchhiar to vak bawk si lo va, a manhla khawp mai. A haw hnuah eirawng kan bawl zui a, ka nute pawh an lo haw ve nghal. U Pari erawh an room lamah a tawm leh a, hetiang buai deuh hunah hian zep loh chuan ka phut ve thin. Rooma tawm tlat reng hi eng nge awmzia pawh ka hre lo e a. Chaw a ei duh tho si. 

Ka pa inbual hlan chuan, ka nu chuan, "I pa awmdan hi ka ngaih a tha vak lo. Chaw a helh reng mai leh tui takngial pawh lem harsa tih chang a nei hi. Incheckup tura ka tih lahin engmah a ni lo ang a ti leh ringawt zel a. Lo la hrilh ve teh, i thu hi chu a pawm ve deuh" a ti mial mial a. Ni e, ka pa hian chaw helh a chin bakah a thin thip vung vung te, zana a muhil a dangro lutuk thinte ka ngaihtuahin ka ngaih a tha vak lo. Amah lah zo pa tih takah chhel ve tawka inngai hi a ni bawk si. A buaithlak. 

Zanriah kan ei a. Saah pawh hian sa thin hrim hrim hi ka nu leh Bawihtea chanpuala hman ata tawh kan dah a ni a, tuman kan khawihpui ngai lo. An duh pitu ve em a. Kan vawksa chhum thin tlang lian tha lerh lawrh chu U Pari chuan suak thatin amah chauh chuan a pumbilh ta mai a. Puitling chuan engmah kan sawi lo. Bawihtea chuan a nu thlenga sa thin melh vung vung pahin, "Api, saw kan sa a la daih" a ti ta mai a. A piin a nghawk sawk lai chu ka va hmu reng, "A ei ve chak a nih saw.. Hei.. A ril phiar hi a tui daih zawk. Kha le" tiin a pi chuan a suahsak a. Mahse, Sa thin ngaina tawh ta reng reng chu, naupanga thuchang a nu thleng ami chu a ngen ta tlat. U Lawma chuan U Pari thlenga Sa thin chu a laiah phelin a fapa thlengah chuan a va dah a, "Kha le.. I sa chu.. Ei tawh rawh le.. Chaw kha bar tun tun la" a ti a. Mahse, an nu chu a tho ta hmak mai le.. Boruak a nuam leh dawn ta lo. A va ninawm tak. 

"I puar tawh mi? I va ei tlem ve" U Lawma chuan a ti a. 

"Mahnia sa pual bik neihna in chhungah hian ka awm ve thiam lo e" a ti hmuk mai. Ka nu tawng tum chu ka pa chuan mitmeiin a khap vat a. 

"A va ho thin e aw.. Lo ei rawh. I naupangchhia em mai. I fapa nen in inkhing tawk lek alawm.. Va ei rawh va ei rawh" a ti duam a. U Pari erawh Living roomah a thu tum bur thung. Bawihtea lah chuan a pa sa pek kha tui ti zetin a ei mial mial a. A pi pawh chuan engmah a sawi zui lo. U Pari mizia chu aw.. 

Engmah sawi tawh lem loin kan kham tlang a, kan tifel sawk sawk. Rosangpuia a rawn kal dawn si a, inpeih hma a tha. Kan intihfel zawhah kan thu khawm thap a, Tawngtai inkhawmna hun kan hmang leh dawn a ni. U Pari erawh kan intihfel lai khan roomah a chho daih a, Kan tawngtai dawn chuan an pa chuan a han ko a. Mahse, a rawn chhuk duh si lo, ka pa te inkhawm an tlai ang tih a hlauhawm si. Kan hmansan ta ringawt. 

Kan tawngtai hmain ka pain, "Lawma, mipa fa i ni a. Nupui i nei a, i nupui i thunun dan azirin he in hi a nuamin a nuam lo thei tih hria la, Chhungkaw tawngtai em pawha tel duh lo mo hi ka ngaina lo a nia. Nu leh pate min palzam ngam chhan hi nangma zir loh a ni ngei bawk ang. I tihtur i hria e. " a ti fak fak a, U Lawma pawh a thu ngawi kur mai. Ka ngaihdan a ni vak lo kei pawh. Kan tawngtai zo a, ka pate chu inkhawm turin an insiam zui nghal a. Ka ke ka tihkhaw loh atang khan zan lam hi ka off ta rih a, ka thatchhe zo ta vek mai. 

Dar 8 rik hma deuhin Rosangpuia chu a rawn thleng ta a. A damkawr hmel reng a lang tawh lo. Eitur a rawn lei nual a, Bawihtea leh Rami'n an insem vek.. Haha.. Bawihtea lah chuan a nel khawp a, a inpawmtir hlu hlu nghal thei nia! Mi hrang a nel loh theih tehlul nen. Rami chu a bengvar bawk a, "Bawihte, hawh Roomah movie en ang" tiin a kai hrang ta daih a. Weekend-ah chuan Bawihtea hian lehkha a zir ngai bik lo a ni. Rami rooma an luh hnuah min rawn thut hnaih a, ka kut a rawn vuan chat. 

"Ka sawi tur thawnthu hi hetah em ni ka sawi dawn? " a ti sup a. Ka nute an la bang lo. 

"Ka hre nang, khaw nge i sawi duh" ka ti hu a. A nui hak, "I nute rawn haw se, nuam ka ti hleinem.. "A tih mek laiin U Pari a rawn chhuk thla hnang hnang a. Kawrfual bahna sin zet hain a hnute hmur thla a lang kulh lehnghal, a sam chu a thlah a, nui sáng chungin Rosangpuia lam chu a rawn hawi a. "I va fel ve i lo leng a" a ti sap a. 

"Nia, a tul tlat sia" a ti ve mai a. 

"Lo thu r'u, thingpui sial tawk ka lo lum ang che u" a ti a, chokaah a lut phei ta a. A chetdan chu mak ka ti viau. A thinrim kha a ni sia, tunah lem a hlim hmel leh viau si.. 

"In monu chu a fel hle mai" Sangpuia chuan a ti a. 

"Umm nia a fel" ka ti ringawt. Ka nute an rawn bang zui ta bawk si, a rawn len chhan a flop dawn a ang hle mai. U Pari chuan tray-in thingpui a rawn chawi a, ka nu hmela mak tihna chu ka va hmu thei. Nelawm taka tawng siam siamin kan bulah a rawn thu ve a, a thingpui lum chu kan in ta a. 

"Sangpui, i dawrah sawn hna ruak te a awm lo maw? Ina awm ringawt hi chu a ninawm ve a.. " a ti a. 

"Awm mahna le.. Ka lo en dawn nia" Sangpuia chuan a ti a. 

"Ka lawm ngawt ang. In lam hi chu kan indaih tho a, sum tlem azawng thawh chhuah hi ka duh ve a" U Pari chuan a ti leh sar sar a. Kan en reng ringawt. Ka pa pawh a ngawi hmuk. 

"A tha lawm. A awm maithei" Sangpuia pawn a ti leh a. Thingpui kan in zawh chuan, Rosangpuia chuan, "Ka pu, ka lo len chhan hi Dingpuii bulah thil pawimawh deuh hrilh ka duh vang a nia. Khawngaihin in chung zawlah khian kan inkawm thei ang em?" a ti ta chawt a. Ka kut ka hum ruh nasa. Ka lo lai ve em em ringawt. 

Ka pa chuan lawm hmel deuh hian, "Thei tehlul e. Mi puitling inni tawh a, ka ringtawk che u alawm. Han chho rawh u" a ti thliam a. Sangpuia chuan min kai a, kan tho a. 

"Hetah pawh a inkawm theih tho sia" U Pari tih ri chu ka hre reng, ka pain, "Ka hriat ve loh tur thil a ni mahna" a ti nghut a. Keini chuan chhang tawh loin in chung lam kan pan a. Stepah chuan min pawm leh nawlh. Ka nui ar ar a, ani pawh a khi suk. Thutthleng kan dahah chuan insi rialin kan thu dun a. Boruak a nuam takzet. 

"Ka sawi tur hi a sei hlek dawn a. Ngun taka i ngaihthlak ka duh a ni. " a ti hmasa te te a. 

"Tehreng mai. Ka ngaithla e" tiin ka beng ka dawh ha a. 

Min rawn melh a, "Chumi hma chuan" tiin ka hmuiah chuan a rawn fawp a. Ka lo maimichhing vang vang. Nem leh dam takin kan infawp zel a, valpuia angin a hmanhmawh ve ruai lo khawp mai. A hmui lasawnin a thaw ham ham a. 

"Hawh le.. Ka'n sawi ang aw" tiin.. 

An chhungkaw hringnun mak tak chu a bultê atangin a sawi ta a. 

(Next-ah aw 😂