Rosangpuia 7

ROSANGPUIA.. (7)

Ziaktu: Toni Rálte

(Min duhsak taka chhiar rih chuang lo va adds min click-sak hram te leh chhiar paha click thinte chungah ka lawm em em e. Hmangaih in ni.) 

Rosangpuia te chu an rawn tlan chak viau naa, amah dam tha lo ni bawk nen, tlai dar 6 bawr velah an rawn thleng thei ţawk a. Nileng khan awm nuam lo leh phi cheng ang khan ka awm tluan zak a ni. Ka chhungte pawn an hre ve a, hrehawm an tih ve hmel viau. Ani reng reng pawh champhai lamah inenkawl ve mai tur hi a nia. Mahse, ka khawih phaka a awm tur chu ka lawm tho mai. Ka rin phak aia nasain Rosangpuia hi ka lo ngainain ka lo lut thuk tawh a nih awm hi. Driverin an thlen dawnah min rawn biak vangin, U Remi nen scooty-in kan han hmuak a. U Remi hi chu aw.. A va felin min va hrethiam tak. Min nghahpui ve ngat ngat mai. Nu Madini leh Pa Zuia te pawh an rawn lang a, thla a muang ta viau e. An rawn thlen lai chuan Sangpuia chuan nikhua a hre tawh mang lo va, a khawsik a sang hle bawk. Cabin kan book sakah chuan an nawr lut nghal a, Doctorin a han check zung zung a, nachhawknaa chiuin, drip an khaisak bawk a. A thisen an la a, result erawh naktuk lamah kan hre thei maiin a rinawm. Puan huhin a taksa lang thei chin chu hruksak turin min ti a, ka hru mawlh mawlh. A harh thei rih lo. Chaw ei saa kal ka ni a, U Remi chuan min hawnsan a, kei chuan ka riahpui mai dawn a ni. Ka pa te ka dil lawk sa vek tawh bawk a, a dik adik chuan inneih hmaa chutia inchenchilh viau chu ka pa ngaihdan a ni lem lo a. A dik bawk, hmanni lawkah kan inneihna thulh a nih laia mipa dang buaipuia hetia han buai leh chiam hi mi mitmei ven a na ve bawk a ni. Mahse, ka damdawiin awm lai pawha tlaivar titiha min awmpui ve thak dan te ka ngaihtuahin, keimah vanga na ni lo mah se; min mamawh tih ka hre tlat si a. Ka nuin ka rilru min hriatthiampuiin, "Riahpui rawh se.. Sangpuia lah a mal si a, buaipuitu pawh a nei dawn lo a.. A lainatawm" a lo tih takah chuan, ka pa pawh chuan a hnial ta bik lo kha a nia. Nu Madini te pawh rei mawi tawk an awm hnuah haw tura ka tih vangin an haw a, Sangpuia Driver Puia pawh a chau hle tih a hmel atangin ka hre mai. Hawa mu hahdam tura ka nawr fe hnuah a haw ve thei hram. Mipa tlawmngai tak zawng a ni e. Sangpuia pawh a chungah a lawm ngawtin ka ring. Mak tih ruk erawh ka nei, Rosangpuia'n a farnu a hmangaihzia leh amah vanga in a chhuahsan hial dante ka ngaihtuahin a farnu te hmel reng reng rawn lang ve lo chu! Inhmuh thiam lohna an nei zawk em mawni? Hmanni accident a tawh pawh khan a farnu hmel ka hmuh awm ka hre miah lo. Nge Aizawlah an awm lo zawk? Ka buaina tur ni lo mah se, Sangpuia ka lainat vang zawkin ka lo ngaihtuah leh thin. 

Dar 11 vel bawrah a thaw a rawn sa ta a, a tal a tal a. Ka va phei vat. A rawn meng ta diar diar a, a thlan pawh a tla nasa hle. Min rawn hmuh chuan a mit a khap sak sak a. 

"Ka mumang a ni em? " a ti ta a. A kut ka va vuan vat, "A tak tak vek aw.. Chuan, i dam vat a ngai a nia" ka ti sawk sawk a. Ka kut chu dam lo e ti lo chuan a hum nghet kher mai. A thaw sák sák a. A thlamuang hmel chu hmuh a nuam takzet. 

"I riak dawn tiraw. " a ti leh a. Ka bu nghat. 

"Ka lawm e.. Ka tui a hal a" a ti a, tui ka thlitsak vat a, ka tulh nghal a. A khawsik chu a awm ta rih lo niin ka hria. Mahse, thil a ei lo nen, a la chau hle mai. 

"I zun a chhuak em? " ka ti a. A bu nghut. Tho chi a la nih loh vangin zun bur ka va laksak a, ka pe a, "Min zuntir la" a ti sup. Ka nui a, "Aih.. Nangman ti rawh" ka tih chuan ani pawh a khi ve suk mai. Puan hnuaiah a che rawk rawk a, a zung ta huau huau a. Mipa hi chu a awlsam thin bik teh e. A zun ka va paihsak leh a, puan fai tihuh lehin a thlan nasa lutuk chu ka hruchhuak leh vek a. An damdawi jection khan a hneh bawk a niang, a chau tih loh a khawsik chu lak bo ang mai a ni rih. 

"Muthilh tum la.. I chau sia" ka ti a. A meng hnual raih a, min rawn melh chungin, "Khaw nge i mut ve dawn? " a ti thám ţuak a. 

Thutthleng sei kawh pahin, "Tah sawn.. A hrehawm loh.. Buaina i neih chuan min ko vat dawn nia, ka harh vang lutuk" ka ti duah a. 

A maimichhing ta vang vang a. A hmel chiang taka ka hmuh theih takah chuan ka thlek vawng vawng mai. Mipa hmeltha ngawih ngawih tia sawi tur zawng a ni hran lo. Mahse, amah en hian Pathianin mihring a siam a, mipa leh hmeichhiaah a siam a, tiha "Mipa" tih hian a hmel chu a sawifiah ber awm e. Tuai a ni lo tih hi en thuak pawn a hriat hliah hliah. A sam erawh a buk lek lek tawh a, a hmuihmul pawh a rawn to deuh siar siar tawh, mahse, chung chuan an tihmelhem pha meuh lo. A khabe hmul pawh chu naktukah ka cut sak ang ka ti rilru a. A kutphah lian leh hrawl zette chuan thla an timuang viau mai. A muhil tawh nia ka hriat hnuah thawm dim takin ka mu phei ve ta a. Ka nute pawh chanchin ka hrilh ve.. Ka rin ai takin ka mutui phian mai. 

Dar 5 velah min rawn ko a, "Ka zun a chhuak" a ti a. Ka inperh tho at. Zun bur ka pe a, tui ka lum nghal bawk. A lu a rawn na leh a, a khawsik a rawn intan leh a nih ka ring, nurse ka ko ta vat a. Nachhawknain an chiu leh a, Nurse chuan Sangpuia chu a en duh viau. Ka lo chik bawk aniang. A chhuah hnuah, "In inhria mi? " ka ti a. A lu a thing nur nur. 

"A star che a nih chu" ka ti nghat a. A lo khi suk. Tuilum kan in dun a, ani erawh a luak a chhuah deuh vangin a in tam thei lo. Kua a ruak duh viau mai. Thingpui ka zuk lam a, chhang an la siam hman si lo. Rosangpuia chu a mut a chhuak tih ka hre mai, maimichhing duar duar chungin, "Lo haw suh aw. Ka harh rualin i hmel hmuh ka duh a nia" a ti sup a. A muhil zui daih. Han muthilh leh dawnin a tlai laklawh vek tawh bawk si. Phone ka khawih char char ringawt. Sangpuia phone ka charge chu a rawn ri ta ral ral a, tîm angreng takin ka va en a, Dear Sis tih a nih takah chuan a farnu a nih ngei dawn hi tiin ka pick ta a. 

"Ka u chu eng nge a an le? " a rawn ti puam ţalh a. A aw a dam hle. 

"Hei a muhil mek a, a zia zel turah ka ngai" ka ti ve mai a. 

"Ka lawm lutuk aw.. I lo awmpui a, Nu Madini'n a rawn sawi a. Vawiinah keini pawh kan rawn chho dawn a, i hah awm sia" a ti siam siam a. Aizawla an awm loh vang a nih chu an rawn lan loh. Ka thaw huai mai. 

"Ka hah hran lo, lo ngaihtuah lutuk suh u. Test neuh neuh an nei ang a, a tha vat mai ang" ka ti ve luam a. 

"A harh hunah ka lo call tih hi min lo hrilhsak dawn nia aw.. " tiin kan inbiakna kan titawp a. 

Call a dawng zui leh zat, a va mak tak. Number hlang a ni a, ka la ta tho. 

Hmeichhe aw ngaihnobei zet hian, "Sangpuia a awm na nge? " a rawn ti a. 

"A muhil rih a" ka ti ve mai a. 

"A maid kha em ni i nih? " a rawn ti kher a. 

"Ni lo ve, a bialnu ka nia" ka ti ve ngat. 

A thaw hak a. "A harh veleh Mapuii'n a lo bia che tih min lo hrilhsak dawn nia.. " a ti a. A dah nghal daih. A msg te chu ka check sak dawn mawni le.. Aa.. A cheap ka tia, ka dah leh daih. Dar 8:30 velah Pa Zuia'n chaw a rawn dah a. Chawhmeh a thahnem leh viau. Sangpuia'n a ei thei awm der si lo. Amah pawh chu a rawn harh a. 

"Ka ril a tam" a ti tuak mai. Dar 9 velah tukthuan chu kan ei ta a. A tho harh peih a, a zia viau. Tam erawh a ei thei lo, soup erawh ka hawp luihtir a. Kei erawh ka ei leh nghek mai. Nge mawle.. Nula chaw heh nih ka zak lo ve. Ka insengfel hnuah Doctorin ward a rawn fang a, vawiinah a thisen an test ang a. An thisen lak result pawh kan hre thei ang chu.. Doctor chhuah hnuah a farnuin a lo call thu ka sawi a, tin, Mapuii inti in a rawn biak thu nen.. Mapuii ka sawi chuan a phawk deuh hlein ka hria. Ka ngaihbel pawh a ni maithei. 

"Eng nge thil dang sawi a nei em? " a ti ta chiah a. 

"Nei hran lo e" ka ti a. Ka lungawi zan lo. 

"I eng nge a nih a? " ka ti ta tawp a. 

"Ka engmah a ni lo" a ti ram hmak. A mood a dik leh dawn lo va ka hriat vangin, "I naute kha Aizawlah an awm reng emaw ka tia.. " ka ti vat a. 

"An pa kha Kolasib-ah an sawn a, an zu awmthla ve mawle.. " a ti ve mai a. Ka nuin min lo call vangin ka chhuak ta daih a. 

"Aw nu" ka tih rualin, "Engtia awm nge i tum? I rawn haw dawn em? " a ti a. 

"Aw.. Inbual te pawh ka duh ang. Nu Madini a rawn phei dawn a, ka rawn haw ang. Zan lam erawh ka hre tawh lo, ka pa mitmei ka veng ve deuh sia" ka ti a

"Nia, bakah miin an hriat tam chuan thil kan sawi peih si a, rawn haw phawt la kan ngaihtuah tha dawn nia. E.. Taka! Tukinah I U Pari pawh a tlan daih " a ti ta mai a. Ka thaw hawk. 

"Ngati nge? " ka tih chuan, "An nupa chungchang vang a nia, i U hian engmah a sawi tha duh si lo va, nangman la zawt rawh" a ti mai a. Mak ka ti ru viau. An inneihna a la rei lo ropui si. 

Ka va luh leh chuan hahdam hmel zet hian a lo mu awn a. Min melh vawng vawng chu ka lai lek lek. 

"Nu Madini rawn phei se, ka zuk hawng ve ange.. Zanin chu ka rawn riah theih pawh ka ring tawh lo" ka ti nghal sawk sawk a. A rum nghut. 

"Nupa kan la ni si lo va, ka hrethiam che. Mami pawn min riahpui thei mai ang" a ti ve mai a. Mami a tih chu a farnu a ni. 

"I dam vat ang, i result hria se.. " ka ti a. 

Ngenngawl zeta min melhin, "Engpawh thleng se min thlah lo vang tiraw? " a ti hniam ruih a. Makti deuh takin ka melh a, "Teh daih a che.. Eng nge thleng se i tih? " ka ti a. 

Hmalam melhin, "Ka dam veleh kan inhual ang" a ti nghet charh a. Ka dar ka san ák ringawt. 

Tul vak lo va nurse rawn lut sek leh rawn polite over lutuk chu ka lo chhang kham hman. Ka hmelah a lang nge ni Sangpuia chuan, "Tul loah intihah vak suh.. " a ti nghut a. 

"A star che lawm" naupangchhia zetin ka ti a. A nui hawk, a va hmeltha tak. 

"Ka star ve hleinem" a ti thluam a. Nu Madini pawh a rawn thleng ve ta thuai a, a thaw hluam hluam mai. 

"A nih ka zu haw tawh ang e aw.. Lo dam tha zel ang che. Eng emaw a thleng anih chuan, Nu Madin, min lo be dawn nia" tiin ka chah a. Ka kut a rawn vuan a, ka ban puamah nghet zeta humin, "Ka lawm e.. " a ti sup a. A lawm tak tak tih a mitmeng atangin hai rual a ni lo. Ka nuih sak a. Ka chhuahsan ta a. Taxi ka la a, kan tlan haw ta vang vang mai. 

In ka thlen chuan Rami'n in a lo tifai mek a. Ka pa leh ka u an awm. Bawihtea erawh a kal tawh a nih hmel. 

. "Ti nge a tlan a, innu chu? " kalpah deuhin ka ti a. Khun khan deuha han zawh vel kha ka zak deuh tlat. 

"Ka hre mai mai lo, a zing tho fuh lo a niang" a ti mai a. 

"Ka awih lo ee.. Engtin emaw i ti a niang" ka ti hram a. 

"Ka thawmhnaw suk tura ka tih kha su loin a la dah a. Ka khak ve deuh a, 'Awmpui kan nei reng a. Suktir ve mai ta che' a tia, keiin, "Ka nupui i nia. Engmah i ti ngai azeng pawh a ni lo va, suk chu a har viau em ni? " ka ti ve si. Rami a thik ta vel a, i ngaizawng anih kha.. Chuti khati a ti kual a. 'Hmm.. Ka peih ve lo khatiang' ka tia, in hnuaiah ka chhuksan kha.. A haw ta ringawt a nih kha" a ti ta a. Chhan zawng a awm ngei e. 

"Aww.. Chutia a thinrim dawn ai te chuan Rami suktir ve mai tur che lawm nang pawn" ka ti a. 

"A ho! Ka nupui a nia. Engmah a ti ngai lo. A pasal thawmhnaw pawh a suk peih loh chuan nupui tha a ni lo tihna a ni mai" a ti nghet tlut. Ka pa zia hi a kai ve a, a thu a rum lam hret thin. 

"Tlaiah Ka nu ten va ko rawh se.. A zah pawh a zahthlak. In inneihna a la rei lo si" ka tih chuan, "Chhuak rawh pawh ka ti lo va, engah nge kan koh ang a? A duh hunah rawn haw se a ni mai. Engemaw hleka mahni in lama tlan nghal ngawt ching hi ka ngei hrim hrim" a ti leh hmiah. U Pari pawh chu aww, ka u pawn a sawina a rei tawh nen, a suksak daih tawh turah ka ngai a. Ama thawmhnaw thenkhat hi chu Rami'n a su tel zauh zauh a, a zak chuang lem lo bawk. Hmeichhe taima tak chu a ni bik loin ka hria. Ka u rilru a lian si a, an khaw lo zui ang tih a hlauhawm. 

Kei pawh ka inbual fai hiar a, Rosangpuia chanchin ka han zawt a. A lo typhoid ve a lo nia. A zia lo tak tak. Mahse, a taksa a la chak tha a, enkawl dam vat a beiseiawm. Chawhnu lamah Rami eirawngbawl ka pui a, "Awii, ih maw.. U, lalmama khan min bem asin" a ti ta reuh a. Kan buai ve ta deuh nen, a bialnu anga insawi pawh kha ka la be ta miah lo va, ka lo mangnghilh ve deuh bawk a ni. 

"Chuan i chhang em? " nui chungin ka ti a. 

"Aih, bialnu i neih kha ka ti tlat a. Ka nei lo a ti ve bawk si. A bialnuin min lo biakna te kha ka ss a, ka va thawn a.' Ka hre ngai miah lo, a number pawh ka save lo' a ti tlat.. Ka hrethiam tawh lo" a ti ta a. 

" Thil dik lo eng emaw chu a awmin ka hre reng a ni. Zanah a bialnu anga insawi kha ka be dawn nia. " ka ti a. 

"Lalmama chuan, 'Ka call tlang thei lo, msg pawh a tlang lo' a tia. A lo try ve tho a niang. Chuan, ' U Pari'n a lo hrilh che vang khan i bialnuin min hau ' ka tia. 'U Pari'n engmah min hrilh lo reng reng" a ti tlat.. Mak i ti ve em? " a ti a. Ka ngaihtuahna a buai lem lo. Thil awmzia ka man thiam nghal ruak mai. Pari hi mi tha a ni lo tih pawm a hun ta hlein ka hria. Mahse, ka u hmangaih a ni miau a, keinin lo ngaihtheih loh viau kha a inthlahrunawm ve bawk si. Lalmama te hi kan thenawm chiaha awm an ni a, keini ai mahin an khawsa thei zawk awm e. A nu leh pa ten sawrkar hna an thawk ve ve a, Lalmama hi an te ber ani ve a, kei aiin a nau hlek. Mahse, an chhungkaw black sheep a ni ve a, zirna pawh a chawlhsan a, music lam a tui a, class a kal thin. A u te ho an felin an duat a, an upa ber hian nupui neiin a indang tawh a, a dawt chiah a la tlangval a. Lalmama u chiah hmeichhia erawh phaiah a awm thung. Chu zawng chu an chhungkaw chanchin ka hriat theih a ni. Kei aia a nau hlek avang hian kan inkawm meuh lo va, min zah der ve bawk nen. Mahse, a len te chu kan inlenpawh ve reng tho. Rami hi a duh vein ka hre reng a ni. Awmpui angin miin ngai mah se, keiniin kan chhungkaw chei miau avangin thenawm khawvengte pawn kan chhungkaw zing ami angah an ngai tawh a, A eisiam a tui si a, kan suah ve thin. An fak tliar tliar zel. Tin, Rami hi sawi tawh ang khan a hmelthain, a rilru a han hlim hnuah phei chuan a than belh a, a vun a noin amah mi hlim thei a ni bawk nen hmuh a nuam ve em em a ni. Chuvanga Lalmama pawn duh niin ka hria. Tin, Mama hi an khawsak ngaihtuaha chapo lo ve tak, ruihhlo a tih lai pawha mi khawngaih thei leh mi dang tanpui nuam ti chi kha a ni ve a, an inhmeh riauin ka hria. Mama lah a fel chho tawh bawk si. 

Tlaia ka nu a rawn haw chuan, ka pa nen U Pari va ko turin ka ti a, ka u a rawn lawr nghal. "A tul awkawng lo, ka tlawm lo ang. Ka hnawtchhuak lo, ama duhthua chhuak a nia. Koh a ngai lo" intipa takin a ti bur mai si a. Pal luih chi ni nghal lo chuan, kan ko ta lo chu a nia. Bawihtea pawn a nu awm leh awm loh chu a hre lo nge zawhna a nei miah lo. A ngaina ta vak lo a nih ka ring. 

Dar 9 velah number hlang atangin call ka dawng a, "Hello, Sangpuia nau ka nia.. Mami" a rawn tih chuan ka khi sak. 

"Aw.. A ni maw.. I riahpui em ni? " ka ti vat a. 

"Aw.. Nu Madini saw lamah a buai thin sia, ka riahpui ta mai. " a ti a. 

"Eng nge a an? " ka tih chuan, "Hei a muhil leh tawh a, damdawi a ei tha bawk a, a khawsik pawh a awm leh tawh rih lo. A lawmawm tak tak.. Chuan, ka rawn biak chhan che chu kan haw leh hma ngeiin hmuh ve che ka duh a" a ti a. 

"Aw.. Nia, inhmuh kan tum dawn nia. Kei pawn ka hmu chak che lawm" ka ti ve mai a. A nelawm bakah a u nen an inhmangaihzia ka hria a, tihchhiat ka duh bik hauh lo. Sangpuia dinhmun a tha rih chu ka lawm ve hle. 

Groupa kan nawi laiin, Kimi msg a rawn thleng a. 

"In monu thar a tlan a ni maw? In ko lo mi? " a rawn ti a. 

 Ka û-in koh a phal loh thu vel ka sawi chuan, "An monu pakhat zawk a tlan chuan a rang a rangin an ko nghal a. Kei chu an reh hmak" a ti an tia.. Chuvang chuan ka lo zawt mai mai che" a rawn ti a. Ka nui ringawt. A va buaithlak e aw. 

"Ka u hi lawm. A inla pa ve tlat a" ka ti a. 

"Mahse, chutin tuman an dem lo che u. An hrechiang ve a maw.. Haha" a rawn ti a. Thil dang kan sawi ta daih. 

Ka mutui lehpek hle. Bawihtea'n min lo kai tho a, ani hi zawng kan thawh khalh thei meuh lo a ni e. Rami ka pui mawlh mawlh a, taka nizan khan Lalmama bialnu inti kha ka call a, a tlang lo. Whatsappah ka hmu zo lo bawk. Eng emaw thil dik lo chu a awm a ni. Chaw kan ei khamah ka room ka chingfel a, Rami pawh thawmhnaw ka pe leh nual. Kei hi neih that aia neih tam duh mi ka ni pek a, ka nei nghek a, ka ha rei leh peih si lo. Pheikhawk pawh ka pek leh nual kha. A lawm thiam thei sia, nuam ka ti veng veng zel. Mami'n min lo call a, "Chawhnu lamah chhuah theih kan inbeisei deuh a, i remchan chuan tlaiah chawhlui min kilpui la ka duh mang e" a rawn ti. Remtih lohna ka nei hran lo bawk a, ka hnial lem lo. 

Dar 2-velah fai mangtara-in ka inbual a. Ka inbual laiin an ri hlut thawm ka hria, tu te nge ka hre thei lo. Ka inbual zo ka inthlak laiin, U Pari aw ka hre ta a. Ka khi sak. Ka u nen an inhnial niin ka hria. Ka va pawh duh rih lo. Ka inthlak zo, ka insiam fel vek hnuah ka va chhuak a, U pari chu tum burin a lo thu a, a piahah ka u a thu bawk. Rami erawh a inbual ve nge ka hmu lo. 

"Bawihtea lam a hun, ka kal dawn" ka u chuan a ti a, a tho nulh. Pari chuan, "Kei pawh ka phei leh nghal ang. Hetianga inpalzam hi ka lawm lo" a ti hmak a. Ka bangbo deuh. 

Ka u lah chuan, "I duha i chhuak a nia, ka ko awm lo che em mai, i duh hunah lo haw ve mai rawh.. " tih leh chhuah a rual ta mai a. 

Pari chuan vin thak hian, "Lawmawm, min va hmusit ve a. Aw.. Naktukah bungrua kan rawn la ang" a ti a. Ka inrawlh lo thei ta lo. 

"Akhai! U Par, hrethiam hram teh, ka u hi chu a zia hi a dang ve a. A luhlul bawk nen, tikhan haw tawh lo la, a tha leh vek mai ang. Bungraw lak phei chu ka nu te pawn an remti dawn lo nasa" ka ti ve ta tawp a. 

A thaw hak a, a thu hnawk. 

"Nizanah pawh min lo hruai la ka ti reng a, a duh thak lo. I u hian min lo hmangaih tak tak lo a niang" a ti a. Ka khawngaih ve deuh. 

"Thil nihphung hi a hre lo ve lutuk a, i hriatthiam hram hram a ngai. Koh che pawh kan tum a, ka nute rawn kal an tum. Ka u kha a thinrim tlat sia, 'A duh a a chhuak a. Amahin lo haw rawh se' a ti tlat sia" ka ti mawlh mawlh a. A ner sak. 

"Tikhan han mu hahdam rawh. Kei pawh chaw ka ei chhuak dawn a.. Ka nute pawh an rawn haw tep ang.. Haw tawh miah suh aw" ka ti ve ta bawrh bawrh a. Ani pawh ngawi rengin an room lamah a chho ta a, tikhan a fel mai. Inthen tih vel hi a ninawm. 

Rami bulah ka kalna tur ka sawi a. Ka nu chu nakinah ka be mai ang ka tia. Ka pa chu a feh leh tawh a, a rawn haw tlai ang. Scooty ka la khalh ngam si lo va, taxi ka chang a, a reh viau lehnghal. 

"U Dingpui, chhuah i tum mi? " Lalmama'n a rawn tih chuan, ka bu nghat a. "Taxi a vang tawp" ka ti a. 

"Ka va thlah dawn che mi? " tih leh rawn inher a rual a. A bike hi a la thar leh a ni ngei ang, a la thar tha em mai. Taxi nghah chu ninawm ka ti sia, ka hnar ta lo mai. Mami'n min rawn call leh chiah bawk a, an chhuah thu leh Sangpuia pawh a inbual mek thu a rawn sawi. Kei pawh chuan ka phei tur thu ka hrilh a, Mama bike hnungah chuan ka thu ta váng a. Kan in kan pelh chiah chuan, "Mama, i bialnu anga insawi kha tu nge i hre thei tawh em? " ka ti ta a. 

"Aih, a mak ka ti lutuk kha kha.. Tu nge niang le ka ti" a ti mai a. Dawt a sawi ka ring lo. 

"Nia mak ka tia kei pawn. Chuan, kan monu khan Rami vel kha a rawn sawi lo tak tak mi? " ka ti leh ngat a. 

"Sawi nang. U Pari hi chuan a nulat lai atang khan min nau cheibawl ve a, min biak a ching ve zeuh zeuh, mahse, Rami vel engmah a la sawi miah lo" a ti ta a. Ka khi sak. Rin dan ka nei thiam mai. 

"U Dingpui, min nuihzat lo la, Rami hi ka duh tak tak asin, a mizia a nungchang hian min hîp.. Lo len te hi ka chak a, ka zak ve bawk sia" a ti a. A lai hle tih ka hre thei. 

"A ho lutuk lo leng rawh. Kan seh lo vang che. Ani pawn dik tak chuan a duh ve lutuk che alawm" ka ti ta rawih a. Induh ve ve chu inngaizawng mai se tih hi ka duhdan a nia. A lawm hle a niang, a nui in ka hria. 

Rosangpuia te in kawtah a ding a. In chu a melh vang vang a, "Ka hria.. He pa hi.. Ehe! U Dingpui, in ni chiang " a ti hlut a. Chutihlai tak chuan Rosangpuia leh Mi pakhat hi verandaah an rawn inzui chhuak a, min rawn hmu ve. 

"I ho lutuk, chuan ka lawm lutuk aw.. Zanah i lo leng dawn nia" tiin Mama chu ka thlah a. A tlan liam hnuah Bai saih saih chungin In lam chu ka pan phei a. Min lo thlir reng avang chuan ka zam deuh. A bula thu lah chu ka la hre ve bawk si lo. Ka va lawn kai takah chuan a bula thu chuan, "Dingpuii maw.. Opa ka nia, Mami pasal.. Rawn hruai tur chein min tia, mahse, kha i rawn thleng ta sia" a ti hlut a. A nui var var chu a nelawm kher mai. Kan inchibai a. Rosangpuia erawh a melh pawh min melh lo. Mak ka ti ru viau. In chhung atangin hmeichhe pakhat sam sei zet a lo chhuak a, "Ehe! I lo thleng tawh maw? I va fel tak.. Mami ka nia" tiin a kut a rawn lek ta va a. Ka melh reng tawp, Rosangpuia nen inannna pakhatmah an nei lo. Mami chu a hmai a sin bakah a hriam a, hmeltha tihtur chi a ni hauh lo. Chutihrualin a nuih sáng reng avang chuan a hmel hmuh a nuam hle thung. 

"Tir'u, in chhungah lut ang u" Opa chuan a ti a, kan zui dial a. Sangpuia erawh a la thu tlat. Thinrim hmel a pu lo va, hlim hmel a pu hek lo. Nu Madini pawh rawngbawlin a lo buai hle mai a. Pa. zuia erawh ka hmu lo. Living room zau hek hawkah chuan kan thu khawm a, "In fate khaw nge? " ka tih chuan, hnual rawih hian, "Fa kan la nei hleinem" Mami chuan a ti ta a. Mak ka ti. Hmana Rosangpuia Dp-a naute kha a farnu fa niin a sawi si a. Tunah fa an la neih loh thu an sawi leh bawk si. 

"Ti nge ka u chu le.. Lawm lohna a nei mawni le" Mami chuan ngaihtuah hmel tak hian a ti a. 

Ka tho a, "Ka va bia ang e" ka ti sap a. Ka chhuak nghal. A thutna ngaiah a lo la thu a. Ka va thu ve a, min rawn en lo. 

"I thinrim mi? " ka ti a. 

Hmalam a melh tlawk tlawk ringawt. 

"A nuam lo a nia. Ka haw leh mai dawn mi? Anih chuan " ka ti ve ta ngat a. 

"I thu thu lawm" a ti ro hak. Ka na zawk mai. Mak ka ti, hetia a mood inthlak thut zel hi lawm hriatthiam harsa ka tih chu.. 

"Okay, a tha lawm.. Ka haw leh mai ang. Chutia min be tha peih lotu te ina awm reng ka peih bik hleinem" tiin ka tho a. Min chelh eih lo. Ka rilru a no a, ka na ngawih ngawih.. Ka bag ka va la a, "Eng nge awmzia? " Mami'n a lo ti vat. Inthunun hram hramin, "Ka haw dawn. " ka ti a. Ka hnuk a ulh titih. Mami chu tumruh hmel zetin a chhuak a, a u bulah chuan, "Nangmah vangin he lai hmun thlenh thleng ke na chung chungin a rawn kal a. I lo be duh lo kual a. Tu nge i nih a? Damdawiina riahpuitu che leh ngaihtuah em emtu che a nih hi.. Eng nge maw i hriat ni? " a ti ta zêk a. Rosangpuia chu muangchangin a rawn hawi chhuak a, ka mitah tak melhin, "Tu nge a nih? " a ti chang fak a. Ka hrilhhai kher mai. 

"Tu.. Tu chu? " ka ti niah niah a. 

"Kha pa kha.. Tu nge a nih? Rawn thlahtu che kha" a ti hriam hraih a. Ka harh zawk. Lalmama a lo thil a nih chu!mawla hi..mahse, ka thaw huai zawk mai. 

"Lalmama kha maw? Kan thenawm nau a nih kha.. Rami bialpa" ka ti ta duah a. A hmel hmuh a nuam ta sawt. Mami chuan awmze nei zeta min rawn melhin, "Hmm.. Ka rin ang vel a ni.. Chingfel r'u" a ti a. An nupa chuan an lut daih. A bulah chuan ka va thu a. 

"I thik a maw? " nuihzat lek lek hian ka ti a. 

"Teuh lo" a ti hmuk a. Ka nuih a za. 

"I thik kha.. Ehh.. Thik lo awmtê chuan i awm ve a" ka tih lai chuan, ka lu a rawn kuai thut a, min fawp ta mai.. Kawngpui atangin min hmu vek thei si.. Ka nam sawn vat a. "I a mi?" ka ti nghek. 

"Damdawiinah khan fawh che ka duh a. Ka ha ka nawt si lo va, ka inthlahrung a" a la tizui. A hmaa kan boruak uap zet kha a bo ta vek mai. Ka kut a khal niap niap a, "Rosangpui, i farnu ten fa an la nei si lo va, hmana i dp ami naute kha engvangin nge ka farnu fa a nia i tih? " ka ti ta a. Min rawn chhuk melh run a, "Ka hming hi hawrawppuia lam a nuam viau em ni? "A ti sup. 

"Aw a mawi ka tia.. Chuan ka zawhna kha.. " ka tih chuan a thaw hawk a. Nghet zeta ka kut humin, "Kha kha alawm ka nu sulhnu min hnutchhiah ka tih chu.. I hriat tul tak, hre lo tura ka duh si che chu.. " a ti ta a. Hriat chakin ka za vek thei. 

"Sawi teh.. " ka ti thawt thawt a. 

"Aih, tunah chuan he kan boruak nuam tak hi tihchhiat ka duh rih lo.. " a ti tlat. Ka hre chak si.. Ka ngei em mai a.. 

Nuihzat hmel deuha min rawn melhin, "Ka ta i ni ta mai hi ka lawm" a ti sup a. Nuam ka lo ti veng veng.. Mahse, a nu sulhnu mawlh chu a ni.. 

(Vawiin chu ka ziak tam thei ngang lo.. Chhan tam tak vangin.. Sorry 😊