Rosangpuia 6

ROSANGPUIA.. (6)

Ziaktu: Toni Râlte

"Ka pasal hual lo ni tawh thin a nih saw" ka ti sap a. Min melh ngawt ngawt, kei chuan ka melh tha ngam vak lo. Nem deuh zawk hian, "Kut ka thlak dawn hleinem. Hlauthawng suh. Tikhan lo thu rawh. " a ti sup a. A chhuak nghal. Kei pawh chu ka thu a, ka phone ka en mai mai. An thawm erawh ka ngaichang pah reng. 

"Thianpa, sawi dun ang tih dawnin i fim lo mah mah. Tunah chuan mu hahdam la, i rawn harh veleh hemi chungchang chu kan sawi dawn nia. A tha em? " zaidam zeta Rosangpuia tih ri ka hriat chuan, amah ka duhna leh ngainatna a pung sawt mai. 

Valpuia erawh hriat theih mang loh hian a phun nuah nuah reng a, sawtiang taka rui sawn ka la hmu ngai lo va, mak pawh ka ti. Amah leh amah a intichhe zel chu a ni si a. Rosangpuia chuan a kuah nge, a pawm pawh ka hre lo, room lehlama an inhruai lut chu ka hria a. Valpuia pawh a thinrim tehlul nen, Rosangpuia meuh chu a cho zawk zawk lem lo a nih hmel e. 3 mins velah Sangpuia chu a rawn lut a, hmel dam thlup hian, "Zanriah an peih dawn hnai a, chhuk ila" a ti a. Kei pawh ka tho vat. 

A chek hluk a, "I ke hi la dim a ngai.. Tikhan che phut zel suh" a ti a, ka kawngah a rawn kuah nghal zat. Ka lo îp zawr mai. Muangchangin in hnuai lamah chuan kan chhuk a, Valpuia chungchang ka sawi ngam tawh lo. Buaina a awm ka hlau. Nu Madini pasal Pa zuia pawh a rawn thleng a, Nu Madini aiin a hniam zawk, mahse, a nelawmin an nu ang maia ngainatawm a ni. Engti tiha Sangpuia te nen inchhar nge maw an nih dawn le.. Nu Madini chu puih ka tum pawn a phal der lo va, "Kan mikhual i nia, lo thlir tawp rawh" a ti mai a. Kei pawn tihluih ka tum bik lo. Kan zanriah chu ka beisei ai daihin a pui. Bawngsa hem hmin, Vawk kawchhung siambawl, Thlai chi hrang hrang.. aa a tam mai. Ka duhzawng hlir lehnghal. Pathian zarah nula chaw heh tak ka ni ve a, ka ke han khaw loh tirha ka ka tui lo deuh tih loh kha chu ka la ei tui tluang zel mai. Lui lam sa ka duh em em, Kaikuang fry sen thap a la awm zui. Chu erawh Sangpuia chuan min khehsak vek a, ka thlengah a rawn dah. Ka mipa suangtuah dan ang apianga a awm hi ka ngei zawk e a. Nu Madini a titi siam siam a, "Innei vat r'u.. Kan hulhar rei tawh a, naute ka awm chak tawh" a tih chuan ka lo lai tawp. Rosangpuia erawh chaw a ei mawlh mawlh ringawt. 

Pa Zaia chuan, "Ka rawn haw lamin Julie kha ka hmu nawlh mai a. An lo bail tawh a ni maw? " a tih chuan, an nu chuan mitmeiin a lo khap nasa mai a. Nuam lo ka tih a hlau a ni maithei. 

"Ka hre ve miah lo, an lo bail a niang" ka ti ve ringawt a. Ukil lam an tang thiam deuh pawh a niang e. Mahse, jail chhunga hun a zu hmang hrim hrim kha ka lawm tawk tawh. Rosangpuia ngawi ngul reng chuan ka awm a tinuam lo lek lek. Valpuia vangah ka ngai deuh ringawt. Mahse, chaw ka ei puar loh phah lo.. Puar tak ka ni. Chaw eikhamah a phal lo chung Nu Madini ka pui ve a, Rosangpuia'n, "Chaw ei turin alawm ka sawm che. Tifai tur ni loin" min tih fak takah chuan, ka dah leh ta a. Mi inthlahrung chi ka ni a, chaw eia sawm te hi ka harsa, A hranpaa khawi hmun emawa chaw kan ei chhuak a nih loh chuan. Tun tum erawh kan inlaichinna boruak tihngheh nan ka zui ve mai chauh kha a nia. Valpuia'n kan boruak a rawn tichhe zawk mai pawha. Chaw ka ei kham meuh chuan dar 8 a ri lek lek tawh a. Ka chhungten min ngaihtuah ka hlau ve bawk nen, inthlahrung ru deuhin, "Haw mai ka duh. Ka nuten min ngaihtuah ang. Duh leh taxi ka la haw mai ang" ka ti a. Min rawn melh zauh a, a sikret zuk lai chu a fawp leh vawng vawng. Nuam a tih hmel dar dar ngei mai. 

"Ka thlah haw ang che" a ti nghet charh a. Ka nghak ve tawp. Ka rilru a hrethiam ni maw a che ve ta vut a, Nu Madini te ka mangtha zet a, kan chhuak ta a. Pawn boruak chu a vawt lek lek mai. Car-a kan thut luh hnuah tlan mai ta lo chuan hmalam a melh ran a. "Buaina a nasat hma ngeiin inhualna neih a ngai aw" a ti leh hmiah. Ka hawihai leh deuh.. Eng buaina nge a sawi ziah mai le aw.. 

"Buaina a awm mi? Nge nangma lamah zawk? " ka ti a. 

"I ex hi a beidawn a hun tawh. Tin, ni e, keima lamah ka nu khan thil mak deuh a hnutchhiah a.. " tiin a tawng tawp thut. 

"Eng chu? " ka ti vat a

"A ho.. "Tih pahin seat belt min rawn hrentir a. A tlan chhuak ta nghal a. Ti nge thil hi hriat chakawm zet zet hian a tihtawp ziah ni.. A nu chuan eng nge a hnutchhiah tak ang? Ngawi rengin kan tlan mawp mawp a, ka nuin min lo call a, ka haw mek thu ka sawi chuan a dah ve nghal mai. 

"Sangpui, District danga i dawr te kha engtin nge ni zel a? " ngaihtuahna lak pen nan ka ti a. 

"Mi rintlak nia ka ngaih ten an buaipui mek e.. " a ti nghut a. 

Sawi leh tur mai ka hre tawh lo. Kan in pawh kan thleng chawpchilh nghal a. 

"Ka rawn lut kawi tawh lo mai ang. Chinfel tur ka la nei a.. " a ti a. Pawi ka ti lem lo. Ka luh hma chuan, "Inhualna kha lo ngaihtuah leh la aw" tiin ka chalah a fawp zauh a. A kal nghal nal nal. A che maksak thei. Ka hmuiah pawh min fawp miah lo. Hmm.. Naupangchhia lutuk. 

Ka u te inneih vuakvet boruak a reh chho a, chhungkaw bila chawhlui kan kil takah chuan thawventhlak ka ti. Pari chu, "U Par" tiin ka koh ve a ngai a, ka ko ve mai. A fel thar thar viau mai a, Bawihtea pawn a ngaina hlein ka hria. Tin, Ka nu leh pate pawh a ko mawlh mawlh reng a, a hmaa ka thu lo hriat tawhte kha a dik lo a nih hi ka ti hmak tawh. Amahah sawisel tur em em ka hre tlat lo, lehlamah thla khat em pawh kan la inkawl lo ve bawk a. Ka u hlimna pawh a sang a niang, a phur sarh reng mai a, hmuh an nuam dun takzet. Chutih mek laiin kei pawh ka ke chu ka rap ve ngam deuh tawh tho bawk a tiin hna lam kal te ka han ngaihtuah tan a. Ka pa chuan a la remti chiah lo. Chetsual palh thut a la awm thei a tih vangin. Ni e, eng emaw thleng leh se buaina a tam leh dawn lutuk. Rosangpuia nen a khat tawkin kan inbe reng a, khami zan a haw phei hnu khan Valpuia pawh a lo harh deuh tawh bawk a. Kan chungchang a lo sawipui ta vek a lo nia. Amah Valpuia nen kan inngaihzawn hma daiha min lo duh tawh thu leh tun hun remchang bawhpelh a tum loh thu te a sawi ta hmiah a, inhualna kan neih tur thu thlengin a sawi bawk. Valpuia pawh chuan msg-in min lawmpui thu leh hlim reng tura min duh thu a rawn thawn ve ngei a, ka chhang lem lo. Inbiak tawh loh tawp tluk awmin ka hre lo, ani nen kher chuan. Ka biak ve hlekin beiseina a nei nghal zel si a. Nakin zel atan a that loh ka hlau a ni. Ka ngaihtuahna mawlhtu pakhat erawh a la awm, Sangpuia nu khan eng nge a hnutchhiah tih kha ka la buai reng mai. Ka zawt ngam si lo, eng emaw tak chinfel tur, khirh angreng tak eng emaw a nih ka ring ringawt. Thil ngaihven chûk hi ka zia a ni lo va, mahse, tun tum erawh ngaihven loh harsa ka ti deuh. Tin, a ni telin Rosangpuia pawh chu ka duhin ka ngaina ve tial tial a, mahse, ka duhkhawp meuh lo thin. A buai tih chu ka hre tho a, inngaizawng nisi kan inbe tam tawk lo tih chang ka nei a, ka sawi tawh nghe nghe. Chumi tuma min chhanna chu lawm tur nge lungngaih tur tih pawh ka hre lo. "Ka ringtawk che a, tleirawl ang maia biaka vil che ka tum lo" a ti.. Hmeichhia ka ni tih a hrethiam lo nge a zei lo ve hrim hrim ka hrethiam lo. Lehlamah a hnaah hian a buai ve tawk em bawk a ni. 

Ka nu office bang chu a rawn ang lut bawrh bawrh a, "Ruata (ka u chiah nupui neia indang) mai mai chu aw.. An nu a lo titlan pek a nih chu, min hrilh ngam lo va, ka rawn peng haw a, ka hre chiah" a ti a. Ka pa awm ve lai a ni a, a lo bengkhawn viau. 

"Engtikah nge Remi chu a tlan a? A va mak dawn ve" A lo ti ve vut a. 

"Chawhma lam khan a niawm e. A chhan ka zawh lahin a sawi tha duh der lo va, amah Remi reng reng pawn ti nge maw kei tal min rawn biak loh ni? " ka nu chuan a ti a. U Remi chu damdawiinah pawh min riahpui tawhtu, ka nel leh ngainat em em kha a ni. An pa ai hian a û zawk a, mahse, an inthlauhna a tam lem lo, a felin ka nu nen pawh nufa ang tak tak an ni. An indan chhan pawh kha ka u Ruata puitling tawk lo kha ka pa khan zirtirna pek a duh a, chuvanga in hrang chantir ve a ni. Kan in piah lawkah tho an awm a, kan inlenpawh reng tho. U Ruata hi PHE Department-ah hian MR-in a thawk ve a, U Remi erawh in lamah ei siamin a ei siamte chu kan veng thingpui dawrah te a pe chhawng ve leh a, fa pahnih an nei tawh a, an khawsa thei reuh phian. U Remi a fel em a, sum khawl leh renchem dan a hre bawk nen.. Chutia kan monu rangkachak a tlan daih chuan min ţhawng viau hlawm mai. Ka pa chuan, U Ruata a call nghal a, "Lo phei teh" a ti a. A dah leh nghal. Ka pa chu kan zah tlang bawk a, U ruata pawh kar loaha rawn thleng nghal a. Vawiin hnaah a kal lo a ni maithei. An fate erawh schoolah an la awm ang. 

"Eng nge inbuaina ni reng reng a? Chutia nupa intihtlan tur a ni hleinem" ka pa chuan a lo ti nghal a. 

U Ruata chu a ngawi reng. Ka nu chuan, "I pain thu a zawh che chu, chhang ta che" a ti vin thak a. U Pari leh U Lawma te erawh in chungah an awm a, an hre ve lo. Rami erawh a awm ve. 

U Ruata chuan muang ban chhalh hian, "Ka thiam loh vek a ni. Zu ka in ve zeuh zeuh a, nizan khan ka zu rui sualin kut ka thlak pek a. A la na viau aniang, Bawiha te School kal a thlah hnuah a haw ta mai a ni" a ti ta a. A inthiam loh hmel khawp mai. Nia, ani hi chu nupui a neih hma pawha kan chhungkaw black sheep kha a ni ve reng reng a. Mahse, U Remi hian a kaihruai tha nasa a, zu pawh a nghei reng emaw kan lo ti zawk a. 

"Engah nge zu te chu i lo in leh a? Nupui fanau nei tawh i nih saw.. Remi phei chu i phu hlawl lo. Zan a riah hmaa kan koh vat a ngai anih chu. Mi dang tirh pawh a ngai lo, i pa nen kan kal mai ang chu. Mahse, hetah zanriah chu in ei mai dawn nia, Rami, i U te chhungkua lo bawl kep mai r'u aw" ka nu chuan a ti ta zung zung a. U Ruata erawh chuan hnialna a nei lo nge a ngawi reng. Ka nu leh pa te chu insiamin an chhuak zui ta nghal a. U Pari te nupa pawh an rawn chhuk ve mek bawk. U Lawma chuan chanchin min zawt a, ka hriat ang ang ka lo hrilh ve a. U Pari chuan, "Pasal kutthlak vawikhat tuara tlan mai te chu.. A chhel lohthlak mang e. Ti ila mihring kan inang lo va" a ti niah niah a. 

U Lawma thung chuan, U Ruata melhin, "Ruih sual eng emaw chang chu a awm ang. Mahse, hmeichhia hi kutthlak loh hram a tha. A zahthlak" tiin a zilh ve hlak a. U Ruata a ngawi tluang zel. U Pari nen Rami kan pui a, Rami hi zawng a mawng a zang a, ei leh in siam a thiam si, kan chhungkaw tan hian a hlu ve thlawt. A hlim reng thei bawk sia. 

U Pari nen antam kan thian a, "Rami, inkhuaah hian hawn tumna i nei ngai em? " a ti hlawl mai. Nuam lo ka lo tihpui angreng khawp mai a. Mahse, felfai takin, "Hawna tur ka nei chuang lo va, hetah hian ka awm reng ang" a lo ti sam ët a. Ka va nuih sak. 

"Pasal tha deuh ka zawnsak ang che. I hmel chhe lo va, bakah i felin i taima si.. " U Pari chuan a ti a. 

Rami chuan nuih seih pahin, "Star ka nei ve reng a'h" a ti sap a. Ka va melh hû! A inhmeh lo lutuk chu. U pari pawh a nui har har a, "Sawi vat teh" kan ti chul a. 

Ani pawisawi lo tih takah, "Ih, kan thenawm tlangval saw a nia" a ti ta mai a. Lalmama a sawina a ni tih ka man thiam mai. U pari chuan, "Ka ring rengah. Lalmama te chu a chhe lo lawm. Ani pawn a biak chhiat loh em che hi" a ti a. 

"Mahse, min duh ve awm lo em mai. Mi awmpui te chu" a hmel chu a ngui rawih mai. Ka lainat deuh a, "Awmpui i ni lo, ka nau i nih kha. Ka pa pawn kan in atangin pasal i nei ang a tih kha. Khatin nangmah indahhniam tawh suh" ka ti vat a. A hmel a hlim leh deuh. 

Ka nu te pawn U Remi chu an rawn hruai haw thei a. An fate pawh an rawn phei tawh. Bawihtea te nen a toys roomah an inkhualtelem a, an unaua an awm hi chuan in hi a fel tak tak hman lo thin. U Ruati fate an la awm lo mah mah. Kan bawl tlai deuh vangin zanriah pawh dar 7 velah kan peih ta chauh a. Zanriah ei laiin ka pa chuan U Ruata leh U Remi chu a zilh malh malh a, an ngawi reng thung. Chaw ei khamah chhung inkhawm kan nei leh a, U Remi te pawh an haw phei ve ta nghal a. 

Tv an en a, kei erawh phone khawihin ka thu mai mai. Rami'n, "Aa! Khi.. U, i bialpa" a rawn tih hlutah chuan ka hawi chhuak vat. Rosangpuia an lo kawm a lo nia! Hei vang a nih hi chhunah programme ka nei a lo tih ni. 

U Pari chuan, "Dingpui, i bialpa maw?! " maktih hmel angreng zet hian a ti a. Ka bu ve nghat. A hre lo pawh a awm tho, an inneih atangin Sangpuia a la rawn leng tlat lo va. 

"Wow! Inva inhmeh reuh ve. A chhiat loh khi.. A dawr hi chu ka hre fo a, amah ka lo la hmu ngai lo a. " a ti chul a. A dawr hi zawng a lar ve bawk a ni. Ka nu te pawn an thlir thap mai. Nula puitling ka ni tawh a, ka zak em em lo. Amah kawmtunu Evelyn chuan ka duh aiin a melh no mah mah zel, haha.. Ka thikthu hi thunun a har ve thin mang e. 

"Tlangval i la niin kan hria a, kawppui te i nei hnai em? Nge i la zawng kal reng zawk? " tia a zawhna chu nui suk chungin, "Ka la nghak chu a nih hi.. A inpeih hun" a ti a. Ka lo hlim ru ve veng veng mai. 

"Engtikah nge amah kan hriat ang aw.. Tiang khawpa mizo tlangval chhuanawm meuhin kawppui atana a thlan hmeichhe vannei tak chu" tih hi a zawt leh kher.. A va tul lo tak. 

"Aa.. Amah hian public-a tlangzarh hi a la remti chiah lo va. A hunah chuan inla hre em em ang" tih chhanna a pe chu a tawk tiu teu viau e. Keimah min sawina ni turah ka ngai ve ringawt a, Bum ka lo nih tawhna khan min rawn tihharh leh fo avangin, mi dang tu emaw a sawina ni ta se tih thuin min rawn tibuai lehnghal. A mimal nun a zawt thui lo hlauh a, ka lawm zawk. 

Ka mut hma deuhin a lo call a. "Ka interview chu ka titha ve tho em? " a rawn ti a. 

"Tha khawp mai. Mi lar i ni ta" ka ti uang a. 

"I hming sawi mai ka chakzia kha" a tih chuan ka hlim veng veng. Mahse, lawm hiam anga lan ka duh lo. 

"Sawi loh kha a tha rih. Mitmei ven tur a tam sia" ka ti a. 

"Chuan, naktukah Champhaiah ka zin dawn a. Kar khat vel ka han thang dawn a. Ngaihtuahawmin lo awm miah suh ang che. " a ti leh tâwng mai. A va no lo thin tak. 

"Rei dawn ve" ka ti ve ngial a. 

"Ka lo hawn veleh ka dawrah zanriah kan kil dawn nia" a ti leh thlup. Mi buai tak ngaihzawn hi chu a khawharthlak thin hle mai. 

Rami men deuh puau chu melh chungin, "Eng nge thil dik lo a awm em ni? Rami" ka ti sap a. Ka tho ve chiah a, chokaa ka luh rualin Rami hmel dik lo chu ka hrethiam nghal. 

A lu a thing nar nar a, "Engmah dik lo a awm lo, ti nge? " a ti zaw mah a. 

"Kha.. I mitmeng a dik hleinem. Sawi teh, eng nge thleng? " ka ti leh a. 

A ngawih vang vang hnuah, "Ih.. U, U Pari ka ngei " a ti ta mai a. 

"Engvang ringawt chuan? " ka ti leh a. Mi dangho zawng chu anmahni room lamah an la buai a ni maithei. 

"Ih, nimina Lalmama ka star vel kha Lalmama a lo va hrilh a, Lalmama bialnuin min rawn hau hrep alawm" a ti ta a. Rami chu ka melh reng ringawt. A va zia lo tak em. 

"Khaw maw a hauhna che chu" ka ti ta vat a. A phone chu min entir ta a, "Nang, mi chhiahhlawh, ek in hawlhfai mai mai khan ka bialpa hi lo melh ve tawh suh. I phutawk hre rawh. Engtikah mah Lalmama chu i ta a ni dawn chuang lo" tih angreng, tawngkam chhe pui puia a hauhna chu ka chhiar ta vek a. A nasa ka va ti tak. A number chu ka phone-ah ka save ta hmak a. La biak ve reng reng ka tum, Rami an hmuhsita an nuihsawh hi ka phal renh reng lo. U Pari pawh lo hrilh thawt thawt, ka khak ang ka ti rilru a. Rami chu ka thiam ang tawka hnemin mi hlim thei tih takah a nui leh thei mai. Ka nu leh pate leh ka u Lawma kal hnu chuan U pari bulah, "U Pari chu Rami vel kha Lalmama i lo hrilh thawt thawt a, Lalmama bialnuin a rawn hauh hrep phah a, a chi loh em mai" ka ti ta a. Thinrim pawn ka sawi hran lo. 

"Ehe! A rawn hau maw? A va pawi ve. Lalmama bulah a thuphungin ka sawi ve mai mai a nih kha. Chutia a ngaih serious pawh ka lo ring lo va, a va zia lo em.. " a ti chul a. Hrehawm a tih hmel em vang chuan ka sawi zui duh tawh lo. College lama ka thawhpuite nen kan inbia a, ka hna ka tan ve tep tawh thu an hriat chuan an lawm ve hlein ka hria. Kan thawkho rei hman lo naa, an felin an puitling bawk a, an bula thawh a nuam khawp ang. Rami a insu a, U Pari erawh a nu te in lamah a leng phei. An inneih atangin ni hnih chiah kan inah a la awm, a bak chu a nute in lamah a phei zel. Kan sawisel ngai lo va, a leng ve chakah kan ngai mai. Mahse, Rami a hah zual hlein ka hria, Vawiin pawh min rawn ko a, "Lo chho ve hrim hrim teh" tiin. Bai titihin in chungah chuan ka chho a, In chung hi a zau lem lo va, thutkhawmna pindan zimte bakah ka u te room a awm leh tawp a. Mikhual room lian vak lo, a hmaa U Ruata room ni thin a awm leh bawk. Ka han thlen chhoh chuan in chung chu a lo hnawk niaih mai a. Ka ke khaw loh a tangin in chung ka chho tawh ngai lo va, vei vel a harsat vang hian. Thutkhawmna pindan bawlhhlawh bawmte chu a lo khat tûn mai, meizial bung leh vap a tla darh nuaih bawk. Ka u te room kawngka ka va hawng chu.. Ka ner sawk. Khum pawh chu siam lohin a lo chuar tun a, thosilen erawh a inzial fel ve a, rizaite chu thleh lohin a lo la awm. Tin, thawmhnaw an báng nghek nghuk a, an room chhuat lah a bal si.. In chungah hian bathroom pakhat a awm a, chhuat nawhna leh eng emaw bawlhlo a awm sa vek. Washing machine pawh a awm. Rami chu enin, "An inneih atangin i tifai tawh em? " ka ti a. 

"Aw.. Vawi khat kha ka han tifai a, U Pari'n a chhunzawm mai turah ka ngai a. Bakah in chung chu a hma pawh khan ka khawih ngai si lo a" a ti tha mai a. U Lawma hi bal hnawk ngaithei ngai lo a ni a, in chunga amaha a awm hnu pawn a hnawk ngai lo, Rami lo awm hma khan kar khatah vawi khat te ka han tihfaisak ve thin. Amah hian a tifai hnehsawh em em a, tihfai vak a ngai ngai lo. Tunah nupui a nei ta cheng a, bal leh hnawk a ngaithei ta viau tihna nge Rami te tihfai hun a nghak zawk. U Pari chu mak ka va ti tak. Che fel awm tê si. Ka nu hi mi che fel, fekfawn lam rawngkai mah a ni a, tette atangin kan unau kan che ţwp ngai lo. Kan in pawh a fel thlarh reng zel. Thawmhnaw ban nghek nghuk te, khum chuar ten tunte hi kan ngaithei ngai lo. 

"Tun tum chu tihfaisak la, a bak chu an kutah dah tawh rawh.. " ka ti a. Phur takin a tifai ve mai. A nu te inah nitin a leng a, an room a tawpin a bal si. U Remi nen ka khaikhin lo thei lo a ni e. An danglamna a lang tan miau a. Mahse, U Pari chu an pain a la hrilh mai turah ngai ang. 

Rosangpuia pawh champhai lamah chuan a zin ta chu a nia, a sumdawnna hi zauh belh zel a tum mai siah. Heti taka a hlawhtlinna kawng hi a ngaihnawm ve hian ka ring a, engtikah emaw min la hrilh ve ngei ang chu. Valpuia leh Cindy te pawh an inthen fel ta niawm tak a ni. Cindy bungrua pawh an la tawh a niawm e. Thla khat tling lo an innei ve tihna anih chu! Cindy tan chuan a tlawmthlak vawng vawng teh e. A chhungte leh Valpuia chhungte inlaichinna pawn a tawrh phah hial a rinawm. An thiltih hi a pawi takzet a ni. Tlai eirawngbawl laiin U Pari a rawn haw a, an pa nen bawk. An pa school bang nang tur tawk hian a rawn haw thin niin ka hria. Kan lo be lem lo va, "Rami, thingpui min lo lum teh. Ka chau riau" a ti a. Rami'n ngawi rengin a lum a. Ka u erawh room lamah a chho nghal. Rami'n thingpui a siam mek laiin ka u chu rawn chhuk thlain, "Ka kamiz leh kekawr te hi i va su har ve.. I su daih tawh turah ka ngai a" tiin an nu a en a. U pari chuan Rami melh pahin, "I lo la su lo mi? " a ti let hlauh. Rami a lo hawihai thung. 

"Rami suk turin ka dah hleinem. I suk turin alawm ka dah. In chung thil chu Rami'n a khawih ngai lo" ka u chuan lawm vak lo aw hian a ti ta a. 

"Ka hre hleinem. Rami vek hi a che sia, a ti vek dawn maw ka lo tia. Ka su dawn nia.. Naktukah.. Chuan, Rami, naktuk chu room vel khi min tihfaisak rawh aw" zak map lo hian a ti hawr hawr a. 

Rami chuan awki sang lam deuh hian, "Vawiinah ka tifai vek tawh. A hnawk khawp mai" a ti ve ngat. U Lawma ka va melh zauh a, nuam lo ti hmel ka hmu. 

"Hnawk ve ang chu.. I tifai khát em alawm" U Pari'n a tih chuan, "Ih.. Ka u sawi ang khan, in chung khi chu in nupa leh mikhual room a nia, kan khawih ve vak lo a, in inneih hma pawn ka u hian a tifai mai zel. Machine pawh a awm a, innupa thawmhnaw pawh in nupa bawkin insu zel mai dawn nia. Eng emaw laklawhte chu thuhran a nia. Kan lo tihthan tawh a nia.. " ka ti ve ta hmiah a. Mahse, thinrimin ka sawi hran lo. 

"E.. A lo nih chu! Ka lo hre tawh ang e.. Chhungkua kan nih angin engkim kan inkhawihsak tawn turah ka lo ngai a" mei nei fe hian a ti a. 

"A dik alawm. Chhungkua kan nia, eng emaw i peih loh leh hman loh nikhuaah chuan inroom tihfaite chu kan tihtur alawm.. Mahse, chutiang anih lem loh chuan nupa room ngat phei chu mi dang khawihtir hi a zia vak lo" ka ti ve leh mai a. 

Ka u chuan, "A ho.. Sawi sawi suu.. Keima thiam loh a ni. Ka lo hrilh lawk lo a. Tun chinah chuan in chung khi i kutah a awm tawh. Dingpuii a ke vangin a che hleithei si lo va, in pum tifai tur chuan Rami a khawngaihthlak.. Bakah eirawng a bawl a ngai lehzel a. Nangte chuan ei rawng pawh i la bawl meuh emaw ni.. " a ti a. U Pari lawm lo hmel chu hmuh hrehawm ka lo ti. Ka u khan a sawi dik ve bawk a, a mo tirh tlai hnih khat bak eirawng a bawl ka la hre lo. Keimah hian Rami ei siam tur lo thensak changte ka nei a, chutiang hunah chuan a inthlahrung ve nge min rawn puih ve zawk chang chu a nei. Mahse, Rami a awm a, eirawngbawl turin kan phut hran lo. Amah Rami pawn eisiam hi chu a kutah a dah hmak a, bazarna sum pawh ka nu hian kartin a hlawmin a pe mai a, a hman ban leh a ta a ni mai. 

Zanriah ei tura koh chawp ngai khawpin U Pari chu an roomah a han tawm ta reng a. Kan tlai boruak vang kha a ni ngei ang. A hrethiam chho ve mai zel ang chu maw. 

"Vawiin chu Cindy te inentir zo nen kan intawk hlawl mai a. A lo tha lo riau a nih dawn saw. A nau pai pawh siam nasat a ngai aniawm e. Amah lah chu a dawldang nasa mai si a, a lainatawm reuh " ka nu chuan a ti mawlh mawlh a. Cindy chungchang kan sawi khat nen.. 

"A rilru a hah ve bawk anih saw.. A khawngaihthlak ngawt mai" ka pa pawh chuan a ti ve a. 

U Pari chuan, "Dingi'n lo haw lo se, a pasal hi ka ngei kei chu.. An innei tawh ber a hnu awm tha ve hle hle se.. A sual ka ti em mai" a ti ve bawrh bawrh a. 

"Dik chiah. A tenawm hlawm tawp. " ka lo ti vat. U Pari chuan min rawn melhin, "Sawi duh tawk che u hi an la awm reng lehnghal a, min zawt leh nawlh zel bawk a. Ka ning a nia. " a ti a. 

Tlai lam kan boruak nuam vak lo kha a bo ta deuh a, ka lawm khawp mai. U Pari pawh rin dan leh beisei dan sa ka lo nei ve tumhrang a, mihring ve tho a nia, sawisel vak turin engmah ka ni bik lo. 

Rosangpuia nen kan inbe rei viau. Zanin chu a lem hlek nge mawni, a tawng duh ve riau mai. Hotelah a thlen thu leh an eisiam tui lohzia te a rawn sawi.. A hahthlak. Ei in a duhtui ve bawk a ni. 

"Chuan, Inhual kha i ngaihtuah rei tawk tawh bawkin ka hria" thutak zawka a rawn tih chuan, "Lo haw phawt la, hmaichhanah kan sawi dun dawn nia" ka ti ve ta a. Kei pawn pawi ka ti vak tawh lo. Phatsan ka nih vanga mi mitmei ka ven reng hi ka nun tihchëpna mai mai niin ka hria. Aizawl mipa zinga luck pawl leh mahnia eizawnna nei, ngaihtuahawm loh tak hi ka hnawl phal bik lo a ni. Mahse, min bum leh ang th erawh ka hlau. Ka inveng ru ran reng bawk. Zingah exer lak pahin Rami ka bazarpui a, chawhmeh lei pawh a hnehsawh e, kan chhungkaw duhzawng a hre hnehsawh tawh bawk a. Ka tluk lo viau zawk mai. Kan in thlen hmain Lalmama kan tawk a, ka ngei deuh ringawt. Rami chunga a bialnu thiltih avang khan. 

Lalmama chuan, "In va inkhai bawr ve" a lo ti a. 

"Nia hei kan bazar a" Rami chuan thatein a lo chhang leh thliam. He nau tak hi chu aw. 

"I va induh ve tun lai hi.. Biak pawn min chhang duh si lo" Rami a melh a. Rami a sen ap ap, "Aa.. I bialnu kha a hlauhawm em mai. Min lo be tawh lo mai rawh" a ti ta ngawt a. A tawngkam thiam loh vangin a frank mah mah a ni. Mama makti hmel chu kei pawn ka hmu reng, "Ka bialnu maw?! Tu? " a ti ta hû a. 

"Kha.. Min lo betu kha. Min lo hau hrep alawm.. "Rami chuan a ti a. 

Mama chuan a lu dawm vung vungin, "A va'n mak em em.. Ka hre ve lo reng reng chutiang. Zanah kan inbe dawn nia.. Hei min lo call leh tawh sia, thianpa te vawk kan talhpui dawn a" tih leh kal a rual a. 

"A lo la be thin che mi? " ka tih chuan, "Be ziah e. Ka seen a, ka reply lo tawp zel a" a ti a. 

"Ngawi teh. Thil dik lo a awmin ka hria.. Mama makti hmelte kha a tider miah lo. A bialnu kha ka be chhin ang" ka ti ta a. Ani erawh a bangbo viau mai. Inrinni a nih vangin ka nu leh pate chu zing tawkah huan lamah an kal daih tawh a, Kan kal kha chuan ka ute pawh an la tho lo. Kawngkapui pawh a lo la inkhar thap a, ka hawng chiah tihin Bawihtea tap ri ka hre nghal. "A naa.. Anu.. Ka duh tawh lo" a tih ri nen.. Rami ka pawt let a, thawm ngaihchan chu ka duh rih zawk tlat. Ka chhungrilah hian mawlhtu ka nei tlat a tin ni. 

"I pi leh pu te leh i ni te bula i sawi chuan ka rukbo tir daih ang che. I hria em? Vawikhatmah kan bula riak turin i pa dil tawh suh.. " U Pari chuan a ti vin thak thak a. Ka hnuk a lo ulh. Ka vahpa kehtheidawma kan dawm hi kut hmawr pawn tuman kan la vel lo. Ka va hmu phak chiah lo va, Bawihtea chuan na a tuar tih ka hre thei. Ka insum zo ta lo va. Ka lut ta a. An thawm pawh a reh zui hmak. Bawihtea erawh ka hmel a hmuh takah chuan a lungchhiat a zual nge a men piai a, a mittui a sur zung zung mai. U Pari hamhaih leh zahzel chuan, "Thu a awih lo a, ka hrem lawk anih hi" a ti a. Ka zah der peih lo. 

"Kan hre vek e. U Par, inbula zan hnih lek a riah vang khan i lo hmumawh em em a. I lo mak hle mai. A ngaina che a, anu anu a ti reng a, i fa hrin tlukin i hmangaih thei lo anih pawhin naupang pawisawi lo anihna hi zahsak ve rawh. Hawh, bawihte, lo kal teh" tiin ka ban a. Min rawn pan vat. Lungchhe zetin a tap ta hlawp hlawp a. 

"Kan bula a riak kha ka pawiti a ni lo. Kawng na nei ka ni si a, naupang a nia a tal velna lamah min khak fuh palh thin a, muthilh ka harsat phah alawm. Chutia ka en hran vang a ni awzawng lo" U Pari chuan thinrim awrawl lek lek hian a ti a. 

"Aw a tha a nih chu. Inbulah a riak tawh ngai lo vang. A tawk, bawihte, bang tawh rawh le.. " tiin ka vahpa chu ka thlemsan ta daih a. Ani U Pari chu ka u bulah a han zualko chu niin ka u rawn chhukthla chuan, "I u nupui a nia, zah ve ta che. Bawihtea pawh nu leh pa bula mu rual a ni tawh lo, khum a nei ve reng a. Amah Pari hi kawng na benvawn nei a ni si a, A khawngaihthlak ve alawm" a ti nghal hmarh hmarh a. A fapa thlavang pawh hauh ngam lo ka u chu na zetin ka melh a, "Engmah sawi a ngai tawh lo, I fapa hian innupa inkar a tihbuai dawn ai chuan keima ta ni mai rawh se.. Mai mai a" ka ti ve ta sak sak a. A inthiam lo leh deuh si, "Chulam a ni lo. Nang pawh i ke nat hnuah i mutpui theih loh kha.. Tiang kha a ni mai" a ti a. 

"Engpawhnise, ni e, Bawihtea chuan a nu hi a ngaina chhunzawm zel theiin ka ring tawh lo. Chu chu pawi i ti lo mi? " Bawihtea a awm tawh lo bawk a, chu thu chu ka sawi ta mai. 

"Ni e, a nu ka ni tawh a. Ka enkawl danah inlo buai leh bawk si. A nu tak tak ni lo mahila, ka duhdana ka enkawl te phal ve u la, ka hrem a nih chuan lo chhan kual a ngai lo. Ka kuta indah dawn chuan dah law law ula, indah thei lo anih chuan enkawl law law ru" Pari rawn kal thla mek chuan a ti zat zat a. 

"Hrem a ngaihna ka hre lo. Tha takin a sawi theih. Tihnat kher kha a tulna ka hre lo ve. Tin, i enkawlna em em sawi tur kan la hre lo. A school kal tur i buaipui ngai lo va, a tiffin i la siamsak lo va, a school bang i la hruai hek lo. A chhuah chang pawn vawikhatmah thil cheng 5 man i rawn hawnsak ka la hre lo. A lang apaua mi hmuha tih huam huam lam a ni lo.. " ka ti ve ta phiar phiar a. Ka zahpah vak peih lo. 

"Hei hi lawm U lawm, ka buai rukna chu, i fapa an hmangaih a, amah vang hian kan la buai ang ka tih fo thin kha.. Tikhan mi bulah nuhrawn sual nih ka hlawh ang a.. Tiang reng anih dawn ai chuan kei chu ka peih reng dawn lo a nia" a ti leh a. Ka nute an awm lo bawk a, thu a ngam sarh sarh hle. 

"I peih loh leh in dang daih ula ti nia. Fapa a nei tih hresaa nei i nia, a zawng zawnga ti turin kan phut lo che. Kut i thlak erawh kei hian ka phal ngai lo vang. I lo hre tawh dawn nia" tiin buai thui ai chuan ka room lam ka pansan ta daih a. Kan boruak a tha lo takzet a ni. Nilengin an nupain Pari chhungte inah an va leng a, zanriah pawh an ei nghal dawn aniawm e. A bul chu ka u nep vang vek a ni. Ka nute lo haw chuan engkim hmaih nei loin ka sawi a, a vawikhatna a ni bawk a tiin an rawn haw pawn tha takin an lo dawngsawng. Mahse, a tupa duatlai kutthlaktu chu a ngaina lutuk tawhin ka ring lo.. Ka nu chuan. 

Bawihtea kha a bengah na deuhin a pawt a, a sen tut nghe nghe. Tin, kan tho vuaknain a kutphahah a lo hlap bawk. Kha chen duat taka ka chul tawrh atan chuan a holam miah lo a ni. 

A rawn khuh kharh kharh a, a nawmsam loh hmel riau mai. A aw pawh a chhang deuh lek lek, "I nuamsam lo mi? " ka ti ta reng a. 

"Umm.. zep loh chuan.. " a ti nghut a. 

"Engtik atangin nge? " ka ti vat. 

"Nizan atang khan. Vawiinah ka chhuak leh bawk sia. " a rawn ti tham tuak a. 

"Lo haw rawh. Malaria te i chhar a ni lo maw? Lo haw rih mai la, dam tha lo chunga mi khuaa awm chu a nuam lo" ka ti a. Ka ngauhtuah ve hle. 

"Min ngaihtuah ve tak tak em? " a rawn ti sup a. 

"Ka ngaihtuah loh chein.. I a mi? " ka ti vin leh thak. 

A chek hluk a, "I thintê hi chu aw.. Nia, naktukah eng ka an loh chuan lo hawn mai ka duh. Mahse, min enkawl ka phût thei ang tiraw? " a rawn ti a. 

"Rawn chhuk phawt la tihdan kan ngaihtuah ang chu.. Dah rih rawh. I chau ang, muthilh tum la" ka ti a. Ani pawh a chau ve ngang aniang. A hnial lo. Kan inmangtha hnu thleng pawn ka ngaihtuah zui char char mai. 

Ka mumangah Rosangpuia nen ka pa huanah kan lo kal dun a, kan hlim dun takzet. Kan lo inum kawi nasa mai.. Ka phone riin min tiharh ta a. Meng chiang hlei loin ka la a, "Hello, Dingi tiraw? Rosangpuia driver ka nia. Ih, ka pu hi a chau thut a, hei Champhai Civil hospitalah kan lut chiah e" a rawn ti ta mai. Ka thu chhuak hlawl. Ka lung a phu dup dup mai. 

"A va mak ve.. Tunah eng nge a an? " ka ti a. Zing dar 4 a ri lek lek tawh. 

"Aa.. A la harh chiah lo a, hei doctor ten an buaipui mek a. A zia lo khawp mai. Chanchin ka rawn hrilh leh ang che. Anih phawt aw" tih leh phone dah a rual a. Ka mang vek. Mi khuaah engtin nge?! A chau hle khan ka hre reng a ni. A va pawi tak em aw.. Hlauhthawnnain min tuam hlup hlup mai. Ka tawngtai nasa khawp mai. 

Muhil tawh lo vin ka meng tlang a. Zing dar 7:13-ah Driver kha ka call ta tawp a. "Hei a harh deuh a, Aizawl lama chhuk a duh rum rum sia, kan rawn chhukpui dawn e. " a rawn ti a. Ka thaw hawk. Kalkawng a thui tham si, ka va ngaihtuah tak e aw.. 

(Chhungkaw chanchin leh a behbawm ka zehtel zauh zauh hian awmzia a nei ve vek zel tih chu inhriat thin kha.. Ning tawk lo awm mah ula, ka sim dawn lo 😂😂 chuan, ka tha e aw. 😍