Rosangpuia 5

ROSANGPUIA.. (5)

Ziaktu: Toni Rálte

Police te pawh chuan hma an han la ţan ta a. Cyber crime lamin, ka chungchang posttu chu tu fake account nge a nih an han chhui tan ta a. Kha fake ac pawh kha a hlauthawng nge, a Ac a deactivate nghal a niawm a. Mahse, screenshot kan ngah viau hman a. Mi thiam tak tak ten an han chhui chuan, a kal a kal a, ka rin loh leh beisei loh lamah a kal ta daih! Valpuia emaw Cindy emaw an nih loh reng ka ring lo a. Mahse, ni khat hnua chu fake account neitu min han hrilh chuan tupawn mak kan ti! Julie a ni daih! Ka chhungte tak pawn mak an ti ve hlein ka hria. Julie chu a lo fimkhur zo seng bik lo a, a number pakhat zawk, officiala a hman loh zawk hmangin a lo hawng a. Only me-ah dah mah se; Cyber lamin an luh chhuak thei vek si. A number atang chuan tu nge a nih an han chhui leh a, Julie-ah a tawp ta a ni. Ka thinrimna leh rilru natna erawh a pung sauh zawk. Cindy emaw Valpuia emaw ni se awm tihna chen ka nei ang a, hremna erawh ka pe tho ang. A pawi ka sawi ka hriat miah loh, Rosangpuia ngaizawngtu a nih vang ringawta chutia media-lama theihtawpa a chhe bera min puh hmingchhiatna chu ka paidam awzawng lo vang. Julie chu an va hling ta chat a. A ţang na ngang mai. A number chu a hman ngai loh thu sawi mah se, a hminga book a ni a, Police hial kan pun tih a hriat takah khan a sim card a paih emaw a tichhia emaw tihna a ni mai. Station lamah kan inhmachhawn ta ran a. Mi pawh a en ngam lo. An han kawm vel a. A tirah ţang viau mah se, an dai khalh hneh ngang mai si a. 

"Aw.. Ni e, Dingi hi ka hua alawm. Valpuia nen an chungchang hi ka lo ralkhat hriat tawh a. Ka mipa duh em em Rosangpuia'n a ngaihsak leh ngaihven tih ka hriat takah khan tihchhiat dan ka zawng ta char char a. Valpuia nen hian a hmain Rosangpuia atangin kan lo inhre sa tawh bawk a, Valpuia'n a la duhzia te ka hria. Chuvang chuan Valpuia ka kawmngeih a, ka sawipui ta zeuh zeuh a. Dingi'n Rosangpuia a duh tia a rilru tinain, pawh then dan ngaihtuah ang ka ti chho tan ta a. Valpuia pawn lehlam zawngin tan a lo la ve a, Sangpuia bulah, Dingi nen an that leh tawh thu leh Dingi chuan Cindy laka phuba lak nan an inneih hnua kawp leh a tum hrim hrim thu te a sawi thin a. Sangpuia pawn a awih ta viau. Dingi pawh a be tha duh ta lo va. Mahse, Keimah ber hi Sangpuia lakah eng ka ang thei si lo a, tin, ka rilru tina zual turin damdawiinah He Dingi vang hian min chhuahtir a. Khatah khan ka na em a ni. Tlawm ka inti a, engmah pawisak ka nei tawh lo. Facebook-ah account hi pahnih ka nei sa a, pakhat hi chu tu'n an hre vak lo. Chuta tang ngei chuan an pahnih thlalak kha dah kawpin ka post ta a nih kha. Sangpuia'n a lo hmuh ve chuan a rilru te pawh a danglam ka beisei bakah mi dang pawn Dingi chu diriam se ka duh a ni. Tianga thui hi Dingi te hian an kal ngam ka ring lo bawk nen.. Pawi ka ti khawp mai. Min ngaihdam theih chuan ka lawm ngawt ang" tiin a inpuang ta a. Ka tho lawk a, ka insum hman hmain a hmaiah ka beng ta siah a. Ka khur der der bawk. Rosangpuia vang mai maiin zoram khawvelah ka hming a tidarh a, chuta karah hmingchhiatna duhawm lo ber mi pasal kawp ching angin. Tichuan, ngaihdam min dil leh si a maw?! Ka nat tur angin ka na vek tawh. Ka ngaidam awzawng lo vang. 

Police te chuan ka thutlukna an ngaichang a. Hetiang case hi a awm ve leh zauh thin a, thenkhat chuan Social media-ah ngaihdam dilna an post tir a, an duhtawk mai thin. Ka ni ve tlat lo mai. Ngaihdam dilna post pawh tul ka ti lo va, a tihsual ang ngeiin hremna a hmu tur a ni. Min tihhmingchhiat avangin pawisa fai Rs. 10000 a chawi ang a, thla thum chhung jail-ah a tang dawn a ni. A chhungte leh amah ngei pawhin ngaihdam min dil nasa. Ka tawlh thei lo. Kan inngaidam leh ringawt zel hi kan sakhuana nen chuan a inhmeh pawh a ni mahna.,mahse, sual vulh lenna, pawisak neih lohna a hring zawk. Chuvang chuan a duhthlanna hmanga a tihsual rah chu amah ngeiin a tuar ngam tur a ni tih hi ka ngaihdan kumkhua tur a ni. Nghet takin ka ding lui a, ka hmeichhiatpui tlawm taka ka hmaa ding chu dan hmangin hremna ka hmachhawntir ta a ni. Thenkhat chuan min dem leh viau awm e, engahmah ka ngai lo. Ka hmingchhe vek tawh a, ka thlalak a darh nasa tawh bawk. Mi thenkhat rilrua ka tlak dan kha a reh hlen tawh dawn lo. Chuvang chuan ka chunga a thil tih tenawm tak hi a hremna a pumpelh ngawt thei bik lo ve. 

Ka chhungte erawh ka lamah an tang a. Ka pa phei chuan min support viau. Ka thiante an hlu em em, ka thutlukna avanga ka inchhir loh nan min fuihin min nawrkal char char mai a ni. Kan chungchang thu chu facebook lamah pawh an rawn post leh ta ngei a, thenkhat inla fel leh ka tawn ang tawng se a la na leh rapthlak ber ber tur ten, "Ngaihdamna thinlung pai lo, Christian chu a inti ve awm si a" tiin min dem em em a. Ka rin sa a nia, ka enliam mai. Mi tam zawk erawh ka lamah an tang ve tlat! "Hetiang thak tur hi a ni. Kan inngaihdama kan inenliam zel vang hian alawm pawisak kan neih loh tak em em" an rawn ti ve hlawm. Thenkhat thu chiang hre tawh si lo ho lahin inbox lamah, "Mi pasal ta chu a lian bik ami? Ka ta hi i chep duh zawk em? " tih angrengin thing leh tenghneng fe fein min lo be bawk. Ka dil ni miah loin an englo pic te chu ka dawng leh nulh nulh zel a. A lang lamah tha leh patling, inla ringtu awm fea lang si, lang lo ruama hur khu ruai.. Remchang melh zuk zuk duh mipa ka hriat phah ta nual a. A lawmawm lamah ngai mai teh ang. 

Khatia kan buai chhung khan Valpuia leh Cindy thawm erawh a reh hmak thung a, an hlau ve deuh pawh a ni mahna le. Rosangpuia erawh chuan Julie thiltih a nih thu a hriat khan min lo call a, "Keimah vanga thleng a ni a. Min ngaidam la ka duh. Khatiang rilru thlenga a put ka lo beisei lo va" tiin thupha a rawn chawi a. Ni e, amah vang veka thleng a ni a, keia khaw hmu tawh lo laklawh khan, "A dik e. Chuvang chuan nang leh kei chu la inhre ngai miah lo angin awm tawh ang. Nangmah vanga buaina neih leh ka duh tawh lo" ka ti ve ta hmak a. Bo vang vang se ka duh a ni. Amah vang tehhrepa ka tawrh hi a namai lo ve bawk a. 

"Aw le, i tih tlat chuan le. Ka lo tum ang. Engkimah ka tihpalh" tiin kan inbiakna a ti tawp a. A reh ta vang vang a ni. Pawi ka ti lo. Julie pawh beiseina a siamsak ting tang a, a kawp leh duh tak tak mang si lo va, kha vang khan Julie rilru pawh a khawlo ta vek si a. Lehlam zawng tak chuan Julie pawh a lainatawm. Rosangpuia inchuh ang ziazanga hetiang thleng thleng kan kal hi a zah te pawh a zahthlak ka ti. 

Boruak pawh a reh chho tan a. Ka u te inneih pawh a hnai chho tan ta. Amah a phur lutuk hi Kimi thusawi zawng zawng nen ka khawngaih thut zel. Eng han sawina chi a ni si lo. Pari pawh chaw a rawn ei a, a lan dan mai chuan nula hawiharh leh fing fel tak zawng a ni e. Bawihtea te chu a chhawnchhaih thiam riau a, ka u ni se a duat thiam hmel bawk. Han sawiselna tur ka hre lo. Kimi thu hriat kha a lo dik lo ve thei tho tiin ka inhnem a, mo kan nei leh dawn a, lo huphurh emaw lo eng emaw sa nghal run kha tha ka ti lo. A pasal leh Bawihtea tana a that chuan a tawk ka ti mai. Ka vahpa hian nu a awt ve em mai a, "Anu" a tih theih tur a nei tur kha ka lawm tho tho e. 

"Dingi, Cindy ka chhuahsan" Valpuia msg.. Ve leh tawp a! Ka zawt tawp si lo va, min rawn hrilha tulna ka hre lo. Ka chhang lo. 

Cindy msg ka dawng ve leh, "Ka thil tih rah ka tuar mek chu a nih hi. Na takin ka hliam che a, i tawn ang kha ka tawng ve ta mek e. I lawm em? " tih a ni thung. Ka lawm pawh ka hre hran lo. Ka lawm loh em em pawh ka hre chuang lo. Chunglam hian hun a tihah kut a lek mai zel a, tunah chuan Valpuia avang ngat phei chuan nâ em em ka nei tawh mang lo. Theihnghilh tawp chu a har ve a, khati khawp kha kan lo nih tawh vangin. Mahse, amah ngaia lunglen tih vel ka nei ngai ta lo. Ka huat ngawih ngawihna pawh kha mi satliaha ngaihnain a rawn thlak chho a, ka tan mi naran a ni chho tawh tihna a nih mai chu.. Ka beisei aia hmain khuarei ka thleng hma. 

"sawi tur ka hre lo" Cindy chu ka reply a. 

"Hei, kan in lamah ka phei dawn kei pawh.. Kan inneih atang khan vawikhatmah hlimna ka la tem lo. Ka beidawng ta e" A rawn ti thlawt mai. Innei ta chêng a, an heti leh si hi chu aw.. Valpuia khawloh dan em em hi. 

"A pawi ngawt mai" tih bak sawi tur ka hre leh chuang lo. 

"Tuna a hmeichhe buaipui hi tu nge a nih ka hre chiah lo. Chuan, i laka ka chetdan leh ka lo tawngkhum tawh dan che avang khan ngaihdam ka dil a che. " a rawn ti a. Ka reply ta lo. 

Ka u te inneihna ni 2 lekin a dal tawh tihah Kimi'n incheckup nei turin min kalpui a. Doctor nen pawh kan innel tawh bawk a, kan titi luam mai. Engkim a la tha zel a, a beisei aia ka that thu leh ka fitzia mawlh a sawi thin a. Dawnsawn a nuam thin mang e. Kimi kawr thui tir kan va lam leh zuai a, a lo la peih fel chiah lo va, nghah hlek a ngaih vangin kan thu a. Coffee kan in pah bawk. Chutia kan thut lai chuan Rosangpuia leh Azuali te kha an rawn lut ve hlawl mai a. Han inhmuh thut takah chuan eng emaw min nghawk dattu chu a la awm ve e. Ani erawh chuan min melh eih lo va, a hmelhriat ka ni tawh thin tih engmah a lantir lo. Kimi bulah engkim ka lo sawi lawk tawh vangin ani pawn eng a sawi bik lo. Azuali kawr thuitir an rawn lam ve tho a lo nia. Azuali chu a hlim hmel viau. Min melh zauh zauh a, ka lo melh tha duh mang si lo. An inzui ta nge nge ah ka ngai deuh. Tikhawp khan a duh ve bawk a, lawmpui ngawt mai ang. Dawr neitunu chuan, "Engtikah maw i zin leh ang? " tiin Sangpuia chu a bia a. 

"Kar tawpah a niang.. " a lo ti sup a. 

"Thang rei i tum angreng sia, i dawr te i ngaihtuah lo mi? " Pi Feli chuan a ti leh a. 

"Mi rintlak kutah ka dah dawn alawm. " a lo ti leh hmuk. 

Chutia zin vel an sawi lai chuan Azuali chu a ngui sawt hian ka lo hria a. A hruai ve dawn lo a nih hmel. Khawiah tak zin tum ang maw. Azuali kawr an peih a, an chhuak tur chu Rosangpuia chuan chiang lutukin min rawn melh a. A mitmeng ka chhiar thiam chiah lo. A thúk hle tih erawh ka hria. Ka hriat lohin ka lo insangruh vak lehnghal. 

Pi Feli hnuaia thawk Kimi kawr khawih mektu Muani chuan, "Azuali hi chuan a va duh hleuh hleuh tak. Sangpuia hian khawngaih neih ve tawp mai awm" a rawn ti hlawl a! Ka coffee in lai ka phuh thelh. 

Pi Feli pawh chuan, "Ni ngawt mai. A beidawng hleithei lo chu a nih hi. Kan Rosangpuia lah hian a tu chu nge maw a nghah ni.. Hmeichhia tih tak taka a zui lohna hi a rei tawh viau mai" a lo ti ve a. An inhriatchian hmel fu mai. Eng emaw lo sawi ve erawh ka tum hran lo. 

Muani chuan, "Anu boral hi a tuar ve riauin ka hria. Nu te nge nge hi chu an lo hlu bawk nen" puitling zetin a ti a. 

"Tuar lo thei nang, a nu tan khan duhthlan a har ve bawk alawm. Tun hnuah Sangpuia hian a hrethiam ve ta chiah a, a nu thihna pawh a tuar reng alawm" Pi Feli'n a tih lai chuan, Kimi kawr chu Muani chuan a pack fel a. Pawisa inpein kan chhuak zui nghal. Rosangpuia hmel ka mitthlaa a rawn lang leh thin chu ka duh lo viau mai, ka tibo thei chuang si lo. Khawpui chhuahsanin rei tak a awm bo dawn a, khatiang thu hmang khan inthlah mah ila, eng emaw changa han intawn fuh palh zauhte kha a nuam ve viau asin le aw. Engpawhnise, hmeichhe tha tak, amah puibawma nawrkal thei tur nei mawlh teh se.. 

Ka u te inneih ni pawh a rawn thleng ta. Mi tinte chu kan phur em em mai. Mahni buai buaiin kan buai a. Ka sawi hmaih loh tur chu ka u hi pathlawi mah nise, Tunah hian Dan thianghlimin an innei dawn a ni. Ka pain vawi tam an chetsual tawh leh tawh loh a zawt a, 'Mi te pawh tlin lo chungin an ti ve tho. A rai pawh a ni lo a' a tih danah an chesual tawh tih a lang reng a. Ka pain in tlin tawk Dan hnihnain ti zawk mai ang u a tih lahin, "Pari tan a zahthlak alawm. Kohhranah a inhmang sia" a ti deuh tlat. Rilru nuam zan loin tlin si lo kha tlang kan bum dawn chu a nia. Ka u tak hi chuan Dan hnihna kha pawi a ti hran lo, tlangval a lo ni tawh lem lo bawk a. Mahse, Pari leh a nu an ţang deuh tlat si a, ka pa lungsi zan loin pawnlam hmuh theiha ropui, Dan khatna hmangin an innei dawn a ni. Ka u hi tawng tlem tak, thian pawh kawm tam vak lo mah nise, mi ngainat a hlawh riau a. Mi dang han tanpui leh a neih ang ang han sem te hi a ching roh a, chuvangte pawh chu a ni ang e, an inneih niah pawh tawiawmtu leh ngaipawimawha rawn kal ve vang vang an thahnem hle. Pari lah Kohhran leh khawtlanga a langsar chin a lo ni bawk a. Lawmpuitu an tam khawp mai. Biak in khat tlatin kan inkhawm a ni. Bawihtea pawh a pa suit design-a kan thuitir suit nen nalh takin a inkhawm ve a. A hmel hmuh a nuam kher mai. Inneih lawmna programme kan hman laiin ka ke chu a rawn vung tan a, pheikhawk sang ka bun lo naa, kan din deuh chhen vangte pawh a ni maithei. A sen vual tût mai. A nat pawh a na tan ta a. Kimi ka bekbawr a, kan thianhoin kan chhuak a. Kimi'n kan in lamah min va dah ta a. An inneih lawmna pawh ka hmang zo ve ta lo. Roomah duhdah deuh takin ka mu a, nachhawkna ka ei naa, min chhawk hleithei si lo. Jection mai ka ngaih tak vangin ka nu ka be ta a, thenawm nurse koin min chiu a. Ka zia ta huai huai mai. Mo pawh ka hruai ve thei ta lo. Thiante an fel em zawk a, ka tih ai zawng zawng an ti a ni mai e. Rami pawh a ngaite bawkin a mawng a zangin a hmel a hlim siah a, mi fak pawh a hlawh viau aniawm e. Tichuan, a tawi zawngin inneih chu kan zo ta a. Pari pawh kan inah a rawn lawilut ta. Zanah chuan ka zia deuh tawh bawk a, ka tho harh ve ta a. Ka inbual fai a, an la ri nuai nuai mai. Ka inbual zo, ka lu tuamna towel ka zar chhuak tur, tukverh ka hawng chu ka hmazawn chiah kawngpuia car pakhat lo ding atanga min rawn thlir rengtu chu ka va hmu ta a. Ka ding chawt. Ka hmu tih a hriat rual chuan a inher a, a tlan liam nghal daih. Tu dang an ni lo, Rosangpuia ngei a ni e. Mak ka va ti e, eng nge a lo tih ve? Inneih a rawn hmang ve mi le.. Inneih ber a zo tawh bawk si. Tunah chuan present hawngin an buai laih laih chauh a nia. Engvanga khalai hmuna ding kha nge a nih a.? Ka hmuh ruala tlanliam leh nghal nge a nih ang? A ngaihna reng ka hrethiam lo. 

Ka inthlak zawhah ka va phei ve a. An hlim dar dar viau e. Kei erawh ka ngaihtuahna ka kawm mual mual. 

"Heyy.. Ti nge khatia i melh ngai i melh reng? " Kimi chuan ka beng bulah a rawn ti sar sar a. 

"Kim, enteh, Ka hawn hnu khan Rosangpuia a lo kal ve em? " ka ti ta tawp a. A meng â deuh, "Ka hmu miah lo, ti nge? " a ti hâ a. Ka thil hmuhte chu ka hrilh a. Ka kut rawn hum pahin, "Mate, rin dan ka nei, a zin bo dawn sia. A tawp nan rawn hmuh leh hram che a tum aniang" a ti sap a. Thil ni thei a ni ve tho mai. Mahse, kan inthlah dan khati kha a nia. Ani ang mipa induhtawk lutukin chutianga a rawn tih chu rinngam a har. Kan awmdan tehnuai kha khatiang kha a nia. Khatia min lo be duh lo leh tawngkam na taka min khei fak fak chhan pawh Valpuia'n a bula kan tha leh anga a sawi vang kha a ni thei. Aa.. Engpawhnise, a tan engmah ka ni thei ngai chuang lo vang. Ka tan a sang deuh e. 

Kimi ka bulaha riak a, a hnar barh barh mai. Kei erawh ka inlet chhen a, chawhnu lamah khan tlem ka lo muhil bawk nen, zan a rei telh telh a, ka harh tulh tulh. Ka phone ka khawih a, ka lu lah a na bûr tawh bawk si. Ka ning ngei mai. Ka tihtur hre loin status ka up ngawt.. "Mut a va har ve" tiin. View pawh an tlem pharh mai. An mu vek tawh a niang. Mahse, ka status comment tu ka nei tlat! 

"Min ngai a nih kha" Rosangpuia'n a rawn ti nia! A lo online ve kur mai. Mak ka ti viau. 

"Ti nge zanin kha? " ka ti ta hmiah a. 

"Last wish a nih kha.. " a ti mai a. 

"I kal bo dawn tak tak em ni? " 

"Aw.. Kum 2 vel"

"Engvang? "

"Ka hre lo" hmm.. Hmela mai mai chu a.. 

"Aw le. Muhil tawh rawh. Kan la inhriat ngai loh kha" ka va ti kher a. 

A rawn call a, Kimi a harh ka hlau sia. Ka pick duh lo. Msg-in, "Eng emaw rem lo riau awm hi a ho viau si a, engvangin nge ka chinfel hi i remtih tlat loh a? " a rawn ti daih! Ka va bo tak. 

"I sawi awmzia ka hre lo" ka ti a. 

"Inhmu ang. Ka lo kal dawn" a rawn ti leh hmiah. A va atthlak tak. 

"Ka mu tawh. Tun ang zanreiah ka peih lo"

"Dingi, min duh a. Kei pawhin ka duh che. Inrem ka duh,. Chu chu i thlentir thei lo a nih chuan naktukah ka kal bo tawh dawn. Hun kan ngah tawk lo a nia" a rawn tih takah chuan, "Engmah ka hrethiam lo. Rem lo a awm pawh ka hre lo" ka ti hram a. 

"Ka lo phei" a ti a. A offline nghal. A rawn kal tak tak dawn tih ka hria. Ni e, kei pawn ka hmu ang. Kan inhmu tur a ni. Kan inkar eng emaw mak deuh, sawi fiah hleihtheih loh awm hi chinfel a ngai. Confi taka ka duh ve thu a sawi mai danah khan kei pawh ka lo inthunun seng lo tih ka hrethiam.. Valpuia vangin tu mitmei mah ka veng tawh dawn lo. 

"In inkawtah ka awm" 

Ka tho them them a, thawm dim zetin ka chhuak ta a. Ka u te chu hotelah an riak daih a, ka nu leh pate lah mut duh chi an ni ve bawk a, an hre lo ang ka ring. A carah ka thu lut vat a. Hmalam a melh ran mai. 

"Tawng ta si che" 3 mins vel kan ngawih hnuah ka ti hrâwk a. A rum hawk. 

"Ka duh che" a ti nghut ringawt. 

"Chu ringawt chu maw? "Dawhthei lo zet hian ka ti a. 

"Chu chu kum 5 liam taah khan a ni tawh. Valpuia'n min hmakhalh tak avangin ka ngawi ta zawk a.. " a tih chuan ka melh ngawt ngawt. Dawt sawi hmel a pu miah lo. 

"Inneih hial intum tih ka hria a. Tuar zo dawna ka inhriat loh vangin phaiah ka chhuk leh a. Mahse, Cindy vangin inchhe leh tih ka lo hre ve zel a. Ka rawn chhuak chho leh a, tihpalh thilthu takmeuhin kan intawng leh ta a nih kha.. Mahse.. " a ti a, a ngawi dat. 

"Eng nge mah se? " ka lo ti hmanhmawh. 

"Valpuia'n bul intan leh thu a sawi takah khan ka ta tur i ni thei ngang lo angah ngaiin, englai pawha ka hmeia tan hreh lo Julie ka kawp leh ta a. Keimah vangin hmingchhiatna namen lo i tawh phah ta bawk anih kha.. Pawi ka ti a, min haw ngawih ngawih kha ka dem lo che. Ka nu a boral ve leh zel bawk nen..i hriat miah loh hian thil tam tak ka tuar ve a. Ka hmeichhe nghah thin kha ka ta a nih theih dawn loh rau rau chuan tiin kalbo ka tum ta hial a nih hi.. Mipa laka i thiltih hi i hrethiam ngai lo vang" a ti nghut nghut a. Ani ang mi tawngtlem takin chutia a han sawi duah chu a khat liam ve hle niin ka hria. 

"Dawihzep taka kal bo i tum a? " ka ti sap a. Min rawn melh kâwk.. "I pasal hual kha i la hmangaih reng tlat alawm" a ti hawk a. A aw chu ani leh ni lo angin a khur lek lek. Ka nui tawp mai. 

"Hmangaih a?! ka hmangaih a maw? " ka ti hû a. Min rawn melh a, a mitmeng thim lam deuh chu phurnain a khat vek. 

Dam thlup hian, "Engkim ka siamthat phal la" a ti a. 

"Siamthat ngai a la awm cheu elo? " inla eng emaw fahran chuan ka ti a. 

"Ka bialnu niin ka ta chauh ni la, inneih vat pawh ka duh a ni" a ti ta a. 

"I kal bo dawn sia" tiel rawngkai hian ka ti a. 

"Min chelh dawn lo em ni? " a ti thawp sup. Ka lo lai ve tawp. Ka kut a rawn hum a, "Va lut tawh rawh. Kan him tawh e.. Naktukah ka in i rawn tlawh ang" a ti sup a. Kawngka min hawnsakin, min kiss pawh a tum lo. A engvang kher nge mawni ka sihhnip riau. A inpuan tak vangte pawh a ni mahna. Thudik a nih ngai chuan lawm takin ka pawmsak e. Ka muhil thei lo ka leh reng chhan kha a chhanna ka hmu ta nge tui zetin ka mutthilh tak kha.. 

Inneih tuk a la ni bawk a, inleng neuh neuh bakah buaina tur a la awm ve neuh neuh a. Kimi pawh ka la chelh. Zan lama thil thleng chu ka hrilh vek a, "Bialpa nghet atan ani tluk an awm lo. Mahse, a awlsam leh lutuk a, ka ngaih a tha lo" a tih chu ka pawm ruk dan a ni. Valpuia thianpa a lo ni ve kher bawk si. Mahse, kan ti tawh a, kan kal tlang ang. Chhel ve tawkah ka inngai tawh bawk a. Chawhnuah a sawi ang ngeiin min rawn tlawh ta a. Inneih thilpek ka u te chu a pe bawk. Amah vanga hmingchhe hrep ka nih avang khan ka pa te mitmei ka veng deuh a, mahse, hawihhawm taka an lo dawnsawn takah chuan ka lawm ru vur vur khawp mai. Kimi pawn min pheisan ta a. He nu hi chu ka tan a va hlu tak em.. Buaina a awm ta rih lo bawk a, a ina zanriah eipuia min sawmna chu pawmin ka insiam mek a ni. Ka u te nupa nen pawh kan la inkawm thathum hman lo. Hun a la tam alawm le. Simple taka incheiin kan chhuak ta a. 

"Engtik nge i hna i zawm ang? " a ti a. 

"Ka damchian hunah" ka lo ti var a. 

"Dam chiang lo reng la ka va ti" a tih chuan ka melh nghek. 

"Ina i tawm khan i him alawm" a ti sup a. Ka chhang tawh lo. A in kan thleng a, amaha awm nan chuan a lian mah mah a ni. A la chhawng zui! Engkim chu a faiin a thianghlim hlarh mai a. Enkawltu tha tak an awm a ni ngei mai. Living room-ah kan thu dun a, Choka atang chuan nu valai samkir, hmel hmuh nuam tak hi a rawn phei a. 

"Dingpuii maw? I va hmeltha ve" tih leh min chibai a rual a. 

Ka lo then ve sak. 

Rosangpuia chuan, "Ka in enkawltu a nih hi, Nu Madin tiin i ko thei ang. Nu Madin, khaw nge Pa zuia" a ti zawm zat a. 

"I plants order kha a va ngaihven a niawm e. Thingpui nge coffee induh ang? " nelawm zetin a ti a. A bula awm a hahdamthlak riau mai. 

"Kan in lo ve ve ang. Ka roomah hruai lawk ka duh a" tiin a khi suk a. Nu Madini pawh a bu nghat mai. 

A room lam panna stepah chuan, "I tan chhoh a harsat takin" tiin min pawm leh nawlh a. Ka hnial duh bik lo. A room zet chu'h! Hmeithai in tiat zet a ni ta ve ang. A khum ep chiah sofaah kan thu dun a. 

"Engzat nge cheng che u? " ka ti sap a. 

"Kan pathumin a ni mai. Nu Madini pasal Pa zuia leh kei" a ti a. Tui a va thli a, min pe a. Ka lo in ve mai. 

Ka zâm riau. A huhang a na tlat. Ka bulah a rawn thu thla leh a, "I hmuh ang hian he inah hian kim lo pakhat chiah a awm tawh a.. " tiin min melh a. A sawi awmzia ka hria. Ka lo melh vak ringawt. 

"A la hma" ka ti a. A khi suk. 

"Ka hria. Ka nghak thei alawm. Mahse, thil pakhat duh ka nei" tiin ka mitah tak a melh a. Ka lo lai deuh. 

"Sawi la"

"I hna hi bansan la ka duh a ni" a ti ta a. Ka rin loh lam daih. 

"Engvangin? Harsa taka ka neih ania sin" ka ti hluai a. 

"Ka pa dam lai atang khan suangtuahna ka nei thin a. Nupui leh nu chuan in lam enkawl se, pasal leh pa chuan eizawng rawh se tiin.. Ka nupui chu pawn lamah chhuaka sum thawk chhuak turin ka phal lo" a ti ta a. A mitmengah natna a lang zawk. A chhungkaw chanchin a sawi tel vang a nih ka lo ring deuh. 

"Ka hre lo.. Mahse, inthen thut ila hna ka nei dawn lo asin" naupangchhia zetin ka lo ti a. 

"Hmeichhia, inthen thu tun atangin i sawi a maw? " a aw chuan min deng dawt! Thuk taka thinrimna pai awka a ang tlat. Ka va melh a, a mitmeng a thim raih tih loh a hmel a danglam lo. 

"Ka.. Ih, ka sawi awmzia chu.. Hmalam hun kan hre lo va" ka ti niah niah a

"Enteh, I bialpa, i pasal hual nen min compare tawh lo hram rawh. Ani leh kei chu mi hrang hlak, inanna nei lo kan ni" a ti chang bâwng a. 

"Ka compare lo che u" ka ti vat. 

"Goof girl.. Ani chungchang chu sawi… " kawngka a rawn kik dat dat a. Sawi zo hman loin a va hawng a. 

Kawngka bula pawr fapa ding bu lûk lûk Valpuia chu ka va hmu a.. Ka insangmar nghal ţeuh.. Ani pawn min rawn hmu. Sehchilh nak hian, "Ka rin ang chiah. Tenawm dun lutuk" a ti bawrh bawrh a. 

"Ka buai rih a, in hnuaiah min nghak thei ang" tih leh Rosangpuia chuan kawngkhar khar a rual nghal. Tîm daia ka lo melh chu min melh let vein, "Ka mood a rawn thlak leh ta vek mai. Hrep taka.. " a ti hawk a. Ka lo chhing sawk ringawt. Kawngka chu a rawn chum bawrh bawrh, "Rosangpui, rawn hawng rawh.. Rawn hawng nghal rawh.. Tenawmho, Rodingpui, nang hmeichhe tenawm.. I nihna kha hre rawh" tiin Valpuia chu a au nghek nghek mai. A kut hum ruhin a inthunun hle tih ka hre thei.. "Tilhan lo awm rawh. Ka va chingfel lawk ang e" tih leh kal a rual a. Kut an inthlak dawna ka hriat avangin, "Ni lo, ti suh. Khawngaihin" ka ti dat. A ding dat a, min rawn lehhawi a. 

"Ani saw i tan eng nge a nih? " a ti hriam hraih a. Ka chil ka lem khawlh. 

(Hei covid a hrang nasa mai a. 1st contact ka ni a, kan inkharkhip mek. Rilru a nuam loin a hrehawm a. Thawnthu pawh a ziah sei theih loh aw)