Rosangpuia 4

ROSANGPUIA.. (4)

Ziaktu: Toni Râlte

(Adds kha aw 😍

Ka û te inneih a hnai zel a, kei ka dam ve telh telh bawk. Pawn lamah pawh ka kal su ve buk buk thei ta a. Doctor te khan an zawm fuh ve bawk em a ni. Tibuaitu erawh a khat tawkin ka nei chamchi a, Cindy lah hian a pasal hauh a tinain Valpuia nena inkawp leh ang riaka min puh a rawn tum thin. Valpuia'n msg min rawn thawn zeuh zeuh bawk. Seen loa delete pawp changte ka nei. Tunah chuan a huatin ka haw tawh. Rosangpuia erawh a reh vang vang mai. A bialnu pawn min rawn ankhum ngai ta lo. An innei ta pawh a niang e. 

Kimi hna bang a rawn peng haw a, ka roomah kan awm dun a. Chaw ei ve nghal turin ka ti tlat a, ani hi zawng sawm a awlsam bawk a. A chhungte a va hrilh a, a tawk der. 

"E taka! Vawiinah Rosangpuia ka hmu asin. Enteh, a inzuah buk tawp. Amah kha a ang lo. A bawrchhawr si" a ti siam siam a. Engvanga chu thu chu nge min hrilh a nih le? 

"A ho ee.. Ka hre chak lo" ka ti nghat a. Min rawn melh ralh, "Tlem chuan i duh ve deuh hmanin ka hria" tiin a nui kiai sak a. Melh ráw pahin, "Awm mai mai teh.. Khatiang mihring chapo kha ka ngaina lo" ka ti leh hmiah. 

"E chuan, thil dang daih. Ka sawi tur chu a awm miah lo a, mahse, pawimawh ka ti sia. In monu tur hi maw.. An sawi danin a tha vak lo an ti! An thenawm dawr neitu saw ka nu thiantha lutuk a nia, hmanni a rawn kal tumin a sawi a. "Lawma (ka u) ania ka neih dawn. A chhungte leh a fapa te ka nei tel dawn hleinem. Ka indanpui vat ang" a ti a tia. An inthenawm bawk a, a hrechiang viau a niang, 'Pari te ang hi chu pawn lamah an nui huah huah a, an thain an fel a. An in chhungah saw chuan e.. Awihawm loh khawpin a sual. Tumah saw a hlau si lo va, an tlawn zawk ni berin ka hria, Lawma nen hian an inneih hlen pawh ka ring lo, Lawma chhungte an pangngai sia, an dawm thiam viau loh chuan a awm rei peih lo tawp ang' a ti hmiah mawle.. Mak ka ti ve tawp a. I bul a nia ka sawi ve mai mai" Kimi chuan a ti leh sar sar a. Ka lo ngai thutak viau thung. Ni e, kan veng a inhlat deuh a, ka hrechiang ve vak lo. Kohhran leh khawtlangah a inhmang ve hle tih bak chu.. Chutianga tawngkam a lo neihte chuan ka lungawi lo viau ang. Bawihtea tan nu nih a duh loh chuan, ka u tak pawh hian a mil reiin ka ring chuang lo. Mahse, thil hi sawi a tam ve a, ngawih phawt rih mai chu tha ka ti a. A lo fel phian thei bawk. 

Kimi awm laiin Cindy'n a lo call leh a. Speaker ka on a, ka tawng hma hmain, "Khaw nge inawm a? " thinrim hmel zet hian a rawn ti a. 

Kimi a meng phawk teh e. 

"Inah ka awm. Ti nge? " pangngai thei ang berin ka ti a. 

"Daw hle lo mai teh. Valpuia nen khawi hotel nge inbook? Nuam inchen leh tawh mi? " a rawn ti bawrh bawrh mai. Kimi thin a sa phat aniang, "Cindy, i va tenawm tak. Ka bulah a awm. " a lo ti ve vak a. Cindy pawh a ngawi dat. 

"Dingi, hei hi hria ang che. Nangmah vangin ka thiante pawn min huat phah a, i fuih khawlo vek a, Tunah Valpuia kaihpen i tum leh a, Valpuia chhungte an lungawi tawh lo a nia. Palai an rawn thlak maithei a ni" Thinrim aw khur der der hian a rawn ti leh ta a. Ka nuih lam a za zawk. Ka thinrim thei meuh lo. 

"I duhtawk tawh chuan dah teh. Hei ka thiantha ber, ka bialpa min ruksak ve ngai lo tur Kimi nen kan titi duh.. Nih phawt" tiin keimah zawk chuan ka dah ta a. Kimi chuan insehruh chungin, "Zawngi kha a va zam lo em em ve. Engmah i sawi ngai lo va, eng nge a awmzia sawi teh" tiin min melh a. Kei pawn zep reng a tulna ka hre tawh lo bawk a, Valpuia rawn lan leh dan leh min tawngkhum dan engkim chu ka hrilh ta vek a. A chek tlak tlak mai. 

"Tihsual tawh hnu pawha inchhir chu sawi loh, chutiang zawnga a rawn che leh ngam chu.. Awiii, i lo nei hman lo kha lawm hle rawh" a ti hlak hlak mai. Kei ai mahin a thinrim zawk. Kan boruak tehhrep chu aw. Kei hian engmah ka ti a zeng pawh ni si loin min lo haw ve em em chu a ni sia.. 

Ka u suit tur enpui a ngai si a, min ring pherh ve hrep bawk nen. Ka va kalpui ta a. A duhthusam ang zánin kan thuitir a, thawktute an felin biak an nuam khawp mai. Dawra kan la awm mek laiin ka beisei loh lutukin Rosangpuia a rawn lut hlawl mai. Kimi sawi ang chiahin a bawrchhawr. Ramhnuai vela khawsa te pawh a ang. Min melh zauh bak kha chu a awm chhungin vawi khat mah min rawn melh tawh lo. Ka u mitmei ka lo veng zawk mah. Mak a ti ru ve ngawt ang. Suit a lo thuitir ve tho a lo nia, chu chu a rawn khul dawn a lo ni. A chhuah hnuah dawra thawk nula fel deuh mai khan, "A nu thih hnu atang khan a la inmet miah lo mawni le" a ti sap a. Ka lo phawk deuh. Rosangpuia nu a thi a maw?! Engmah ka hre ve lo. Ka hriat a tulna a awm lo pawh a nia nge. Mahse, nu meuh han chân chu ka khawngaih ve deuh. A tuar na hle a niang khati khawp khan a bawrchhawr a nia. Kan haw kawngah ka u-in, "Sangpuia nen khan in inhua mi? " a ti ta chiah a. 

"Haw hran lo e" ka ti mai a. 

"In inbe si lo va" a ti leh a. 

"Nia, kan inbe vak lo a" ka ti leh tawp. Min zawh thui zel hlauin Pari chungchang ka sawipui ta daih a. A phur leh hurh mai. A duh ve hlein ka hria. Kimi thusawite kha chu hrilh chi-ah ka ngai rih lo. Thudik a nih chuan a la lang chhuak dawn tho a. Kan veng thlen hma káwnah chuan an lo zi deuh lat lat a, ka u chuan, "Ti nge mawni le.. Insu an awm aniang" tiin a va thlek dûk dûk a. Mi chu an zi hut hut a, chutah pa pakhat hian ring angreng tak hian, "Chhohpui phawt mai ang u.. Hei thisen a chhuak nasa riau mai" a ti a, motor atanga an zawn chhuah ka va hmuh chuan ka thin a phu zawih zawih. Rosangpuia chu a hmai thisena khat hnuang hian an zawn a nih chu! Ka u pawh a phawk ve hle. 

"Ehe! Sangpuia a nih saw" a ti hlut a. Kei erawh ka ngawi tawp. Sangpuia chu damdawiin lamah an phur chho a, a motor pawh chu tlangval pakhatin khalhsakin a zui chho ve nghal bawk. Keini pawh kan haw zui a, ngaihtuahnaah erawh Sangpuia hlir a awm. Ka ngei viau naa, Damdawiina ka awm chhunga ka chunga a thatna leh a thiltih tam takte kha ka theihnghilh bik lo. Amah chauhin a khawsa si a, tuin nge buaipui ang? A nu a thi an ti bawk si. A bialnu khan a buaipui em ang chu maw. Mahse, rilru a nuam thei chuang lo. 

Zanah pawh ka ngaihtuahna vang nge ka chau nghulh reng a, ka vahpa titi pawh ka ngaithla fumfe lo, ka mu hma ngang mai. Ka mitthlaah Sangpuia hmel a cham tlat! Engti tiha insu thei nge maw an nih le? A vanduai thei hle mai. Kan thianho groupah ka sawi a, Kimi'n, "Naktukah va kan ve ang u.. " a rawn ti ta chat. 

Ka tan ngeiawm viau mah se, a chhe ber an han thlen takah chuan kei pawn inhnuhhniam ka hreh bik lo va. Va kan ve reng reng chu ka pawiti bik lo e. A nat hmel angreng si a, a nunna atan a hlauhawm ang tih ka hlau. Ka hriat loh karin ka lo muhil ve ta a niang. 

A tukah chuan Kimi pawh hnaah kal bik loin, Zami te nen kan pathumin kan chhuak ho a. Scooty hi ka khalh leh ngam ang em ka hre lo va, Pathian zarah nakkum lamah chuan car lei ve daih mai te ka rilruk. Damdawiin kan thleng a. Ward pangngaiah kan va zawng a, a lo awm si lo. Nurse pakhat kan zawt ta tawp a, Cabin-ah a lo awm a lo nia. Chimbuai a ngaithei vak lo a, a awm tho mai. Tu takin awmpui ang maw? A cabin lam chu kan pan ta ţhám ţhâm a. Kawngka chu a lo inkhar phui lo., zep loh chuan ka tha a khur, kha sambuangi kha lo awm ta se min hmusit leh dawn si.. Mahse, thiante vangin ka intipachang a, ka lut ve ta a. Ka hmuh tum loh deuh ka va hmu thung. Sangpuia chu a lo mu a, a chal chu an lo tuam a, a bak hliam dang a nei lo niin a lang. A bul lawka chair-ah chuan amah aia naupang deuh tur tlangval hmel fel tak a lo thu a, magazine niawm tak a lo chhiar mek. A awmpuitu a ni ngei ang. Kan thawm a hriat rual chuan chu pa chu a rawn tho vat a, "Lo kal r'u.. Lo thu r'u" a ti sawk sawk a. Keini pawh zum dâk chuan kan thu ve a. Rosangpuia chu a rawn meng duar duar a. Kan pathum lam chu a rawn hawi a, makti hmel a pu ve deuh. Kimi chuan, "Eng nge i an? I tha em? " a ti ta vat a. Tlangvala lah kha a tawng zui bawk si lo. Sangpuia chu a rum deuh nghut a, zawite hian, "Ka tha e" a ti a. 

Tlangvala chuan min rawn melh kualin, "A thiante in ni ngei ang chu tiraw? Infel khawp mai. " a ti ve mial a. Zâmi chuan, "Umm kan inkawm ve thin a, chuan nangmah hi a nau i niang chu ka lo ti tawp" a lo ti ve sawk sawk a. 

"Aw a nau ang ka ni mai ang chu. A dawrah sawn manager-in ka awm ve a" a lo ti a. A fel hmel ka ti reng a ni. Sawi tur a váng angreng. Nurse a rawn lut a, damdawi a eitir a, a chhuak lehnghal. Rosangpuia pawh a rawn harh ta deuh a, a lukham chu a kamsantir a, min hmachhawn zawngin a thu a. 

"In va fel ve. Min rawn kan duh a" a ti zawi sup a. Tlangvala lam hawiin, "Mapui, coffee zuk lam ta che.. Khawngaihin" a ti zauh a. Mapuia pawh chu rang takin a kal nghal. Kan hmatáwng ber Kimi chuan, "A zia lo e, in lo insu chu.. Kan hriat rualin kan ngaihtuah che sia, kan rawn kal nghal alawm. Dingpuii laka i thatna te kha kan la hre ve reng a" a ti duah a. Kei chu kan luh atangin ka la tawng lo. Sawi tur ka hre hlawl lo. 

Min rawn melh a, a mitmeng a thîp lam hret a ni. 

"Ani kha chu keimah vanga thleng a nia, ka buaipui tur a nia lawm" a ti chang rût a. Min haw ve ringawt hi mak ka ti. A chhan ka hre hauh lo. 

"Chu pawhnise, dik tak chuan nangmahin i khawsa bawk sia, buaipuitu i neih loh kan hlau a" Zâmi'n a lo ti a. Za vak lo hian Sangpuia chu a nui suk. 

"Ka lawm e. Ni e, ka mal viau mai" a ti a, a mitmeng chu a khawhar hmel ngawih ngawih. Sawi ve tur ka ngaihtuah lai mekin, "Dingi, i tha zel em? I ke chu rin aiin i rap ngam hma " a rawn ti ta a. 

"Ni.. Nia, umm ka tha tawh lutuk hei" ka lo ti bah nak. 

"I englai nge i sawh? I chal chauh h mi? " Kimi chuan a ti a. 

"An sawi dan chu a nia lawm. Na dang ka nei lem lo, awm pawh ka awm rei lo vang. " a lo ti a. Ka lo thaw huai mai. 

Zami chuan, "Ih.. I bialnu khan a awmpui che kan ring a.. " a ti ban chhalh a. A bialnu kha an ei vak lo ve bawk a, a lo awm ang tih mawlh an hlau reng a ni. 

Rosangpuia chu a nui hawk a, a hmalam melh run chungin, "Ani kha ka bialnu a ni ngai reng reng lo" a ti sup a. A rukin ka lo ner.. 

Mapuia'n kawngkhar a rawn hawng ri rak a, tray hian no a rawn chawi bawk. Amah chauh a ni lo. Kan hlauh ruk ang ngeiin sambuangi a rawn tel nia! Ka va huphurh tak em. Kan lo thu thap chu min melh kual ralh ralh a, intineitu zet hian khumah a va thu tharh. Sangpuia biang leh chal vel chu chulsakin, "I that chak em hi.. I khua pawh sik tawh lo nih hi" a ti hiam hiam a. Ka hriat loh hlanin ka insangruh vak. Coffee chu kan in a, kan ngawi dâk tawh mai. 

Keimah min rawn melh leh chat a, nui sâwng chungin, "A ke bai chung chung pawn i la rawn kan ve duh a, a lawmawm thin.. " a ti a. Kimi tawng tur ka khap vat. 

"Nia, ka ba rulhna a nih hi" ka ti sap a. 

"Oh..! Chhuanlam tha tak a nih chu.. A bak chu beisei zui tawh lo la" a tih mek laiin, Rosangpuia aw chang zet hian, "Julie, a tawk.. Min ngaipawimawha min rawn kantute chunga buaina siam tura thupek i ni lo" a ti ta a. Julie pawh a tim dai mai. Mapuia chuan kan boruak rit zet chu a hrethiam ve nge, "Kan dawrah sawn inrawn chawl ve tawh em?lo la chawl ve r'u aw" a ti a. Kimi'n chhan a tum mek laiin, Julie bawk chuan, "Sawtiang dawra thil ei saw an afford ve lo" a lo ti hmak. 

Zâmi tuar thei ta lo chuan, "I va chapo tak.. I nasa ve hle mai. In hausa viau pawh a ni maithei, mahse, i nunphung mawl thing zet avang khan kan awt reng reng lo che" a ti ta zêk a. Rosangpuia pawh chauh hmel zeta rawn tawngin, "Mapui, he hmeichhia hi chhuahpui teh. Ka thisen a tivâwt dawn" a ti ta a. Julie a meng phawk teh e. Mapuia chuan thuawih zetin, "Hawh le" tih leh kaih a rual a. 

Julie chuan Sangpuia lam hawiin, "Ka fiam ve mai mai a nih kha. Ka fiamthu an hrethiam lo zawk a nih hi" a ti lawm lawm a. Rosangpuia chuan melh pawh a melh eih lo. A rukin ka lo lawm veng veng. An chhuah hnuah, "Thupha ka chawi e.. " a ti sup a. 

"A pawi lo, a ho lutuk" Kimi'n a lo ti vat. Zawitein hawn ka rawt a. Nuam tawh hek lo. Bakah Sangpuia chu a chauh hmel riau a, chimbuai a ngaithei lo ang tih ka hlau. Zami chuan, "Kan hawnsan tawh ang che. Lo dam tha zel rawh aw" tiin a ding a. Hmel zaidam zet hian, "Ka lawm e.. Infel lutuk.. Ka tha vat ang" a ti a. Kan chhuah dawn mek laiin, "Dingi, Cindy laka i phuba lakna kha duhtawk tawh rawh" a rawn ti a. Ka ding chat. Ka thiante pawn mak an ti hle. 

"Eng nge i sawi awmzia? " ka ti hâ a. A nui suk duh chauh. Mapuia a rawn lut ta bawk si, kalh kim lo zetin kan chhuak ta a. Ka ngaihtuah zui ta reng mai. Cindy lakah phuba ka la reng reng si lo va, engtin nge khatiang thu kha a sawi theih. Kimi te chuan, "Cindy hian a va be vel a niang. Valpuia nena inkawp leh angin" an ti a. A dik pawh ka ring. Thil thlen dan hi ka duh hauh lo mai. 

Zanah te chuan ka va call mai dawn mawni te ka ti rum rum a, mahse, a dam lo ve bawk si a. Va biak buai kha ka hreh ve bawk si. Cindy va chhuahchhalh mai tur nge ni ang.. Ka hrethiam tawh lo. Ka ning hetiang boruak teh hrep hi a. A tuk zing ka thawh hmain bawihtea'n, "Ani, tho tawh rawh. Ih, mi an lo leng" a rawn ti a. Tu tak ni maw. Lu na burin ka tho a, Sitting roomah chuan pa pakhat sa tha lam, thutak zet hi a lo thu run a, ka nu leh pate an tel ve bawk. Ka pa chuan, "Mate, lo thu ve nghal lawk mai teh. Hei palai hmel kan hmu tlat mai a. A zia lo khawp mai. Cindy te rawn tirh a nia, Valpuia nen chanchin innei leh em ni? An lungawi lo an rawn zualko a nih hi" a ti ta mai. Ka va harh chiang tak. Thinrimna chuan min bual hlup hlup a ni ber e. 

A tawng pawh ka tawng thei lawk lo. "Pa, a teuh lo lutuk, he thil hi ka duh miah lo a nia. FIR thehluh ka duh. Hetia inpuh hmingchhiatna hi.. Valpuia nen pawh kan inbe tawh lo. Ni e, amah chuan kir leh turin min ngen nasa a, mahse, ka thei tawh lo. An inneih hnuah kan inah rawn kalin min vau kual vel a, khata tang khan mumalin kan inbe tawh lo. Dawt chuan min puh suh se.. Cindy lahin a duh hun hunah min rawn ankhum a. Ka tuar thei ta bik lo e.. " ka ti ve ta chiam a. Kan inlengpa pawh a hawihai kher asin. Chutia palai thlak meuha an rawn kal chu mak ka ti! Valpuia hian ni lo lo ten a lo sawi zawk mawni aw ka ti hial. Ka lawm lo, lawm lo tak ka ni. 

Ka nu chuan, "Inbengdai rawh. Fim taka ngaihtuah tur. Nupaah chuan thikthu te hi a chhe hma a, in chanchin lah khati kha a nia. Cindy chuan phone vela in inbiakna a hmu fuh ang a, a zeldinte pawh a ni thei" a lo ti dam thlap a. Hetiang hunah hian a inthunun thei leh tlat zel. Ka pa erawh a dang leh ta zak. 

"Khanglang hlawm chuan a.. Ka fanu hetia an bawlzan kual hi ka duh bau lo mai. Khati khawp khan min lo zah lo tawh a, thupha chawi chu sawi loh an inneih thulh chungchangah lah Mateii zawk te an la puhmawh khanglang a. Ka lawm hlek lo mai. Hetianga min la chai min la chai a nih takah chuan keini lam pawh kan ngawi tawh lo vang. Pu Ruat, chu chu i lo hrilh dawn nia. FIR kan thehlut lo a nih pawhin kawng dang kan zawng ang. Ngaihdam min rawn dil ngei ngei rawh se" a ti ta rap mai le. Ka pa chu ka thlawp chiang kher mai. Pu Ruata pawh chuan, "Ni e, thu chiang taka hriat va ni suh. A dik adik chu rawn len te hi ka hreh ve lutuk a nia, amah Valpuia nuin min ngen nasat em vang chauha rawn kal ka nia. Cindy lah a ţap par reng mai bawk si.. Kan Valpuia saw tun hnaiah a che bawnra deuh a ni mahna le.. Ni e, engpawhnise, ka va haw phei ang a. Nangni pawn lung lohah lo la lo hram zawk teh u, a puitling zawk innih kha.. In thu leh hlate pawh ka rawn sawi ve dawn nia" a ti chuar chuar a. A chhuak tur chu ka nuin a va thlah. 

"Nu, Pa, ka lawm lo. Ka duh tawh lo, hetianga inpuh kual reng hi. Ka kham ve tawh. Zah pawh a zahthlak, eng emaw tal chu ti ve ang u, kan ngawi reng a, min zuam a nih hi" ka ti tân tân a. 

Ka nu chuan, "Ni e, a zozai ve tawh bawk alawm. Hei i u te inneih hi han zo fel phawt se la, chet kan la ve dawn nia. Ngaihdam min rawn dil lem loh phei chuan kan che ngei ngei ang" a lo ti ve a. Ka pa erawh a thinrim deuh nge a ngawi hmuk mai. Chaw ei pawh a tui nek lo ve. Ka thil tawn chu ka thiante ka hrilh ve a, an sa hlawm kher mai. Cindy chu va biak nghal hial an náp a. Mahse, ka khap rih. Rin dan ka nei tlat. Hetiang em ema confi-a Cindy'n min ringhlel ngam hi a pasal hian eng emaw a sawi a nih ka ring tlat. Valpuia vang veka thleng ni zawkin ka hria. Chutiang pawh chu lo ni tehreng se, Cindy leh Valpuia chhungte chu ka la ngei tho. Ka va han ngawi mai mai tawh dawn lo chiang tak. 

Chanchin a reh rih. Cindy pawn engmah a rawn sawi lo. Valpuia lah a la reh tluang zel bawk. Rosangpuia chanchin pawh ka hre hek lo. Thudik erawh hre ve se ka duh khawp mai. 

Chawhnu lamah ka inbual zo, Rami ka puih laiin Zami a rawn lut hlawl. Ani hi zawng a buai ve thin a, a rawn lang tam hman lo. Ka bulah rawn thu nghalin, "Awii thil ka hre teuh, ka sawi chak tawh" a ti bawrh bawrh a. A eng tak chu ni maw.. Rami'n thingpui a lo lumsak leh vat. 

"Sawi teh.. Eng nge? " ka ti sawk sawk a. 

"Cindy te zawk kan sawi phawt ang e. Valpuia te awmpui, lánga kal thin saw ka naute nen an inkawm ve thin a. Cindy leh Valpuia vel pawh a hre khawp mai. An inneih atang khan Valpuia hi a la riakchhuak deuh zat zat a niawm e. Chuan, a rui reng bawk a. Hnaah pawh a kal lo. Vawi khat chawhnu lama a rawn haw chu Cindy nen an inhau a. Valpuia chuan, "Ka laka i thiltih tenawm tak phuba ka la ve a nih hi. Ka nupui i ni tawh a, lawm hle rawh. Ka ngaihsak che phut suh. Chuan, Dingi nen bul kan tan leh tawh a, naute i neih veleh i chhuak ang a, ani saw ka nei ang" a ti a. Chu chu ania Cindy hian a rinhlelh chhan che. Amah Valpuia lahin a sawi zing si che a, Chu an awmpui Siami bawk chuan, 'Eirawng ka bawl laiin Cindy chuan Valpuia a call a, 'Khaw nge i riah leh dawn' a tih chuan.. Valpuia khan engtin emaw a lo ti nge.. Phone a dah kha, "Kan Rodingpuii chu aw.. A va chak dawn lo tak. Hetiang hi maw a remruat dan lo ni a" tiin a ang hrep a.. A tia. Valpuia vek hi a ni mawhphurtu chu. A farnu te leh a nu te lahin nangmah an ringhlel vek che a, a huatin an hua che, 'Hetiang leh tur si chu inneih kha thulh loh mai tur a nia' te an ti thin.. " a ti ta mawlh mawlh a. Ka lo thaw hawk. Ka rinsa deuh a nih vangin mak erawh ka ti em em lo. Valpuia chu hmuh ka duh hle mai. 

"Chuan, a dang chu? " ka ti ta zawk a. 

Thingpui a in khalh a, "Rosangpuia chanchin hi i hrechiang ve reng reng tawh em? " a ti ta daih a. 

"Chiang nang. Ti nge? " ka ti vat. 

" Ka hre nual.. Sangpuia hian pa a nei tawh lo tih chu i hre tawh ang a, a pa a boral khan a la tlangval chiah lo a. Chuan a pa thih atanga kum khatah a nu hian pasal dang neiin pahrawn a hrawn ta a. Farnu pakhat a nei bawk. A pahrawn chu a tha vak lo a ni maithei. An sawi danin Sangpuia farnu hi khawih a lo tum a niawm e. Chu chu Sangpuia a thinrim em em a, a nu hnenah inthen turin a ti a. Mahse, a nu chuan an unau aiin a thlang zawk a niang. A farnu nen chuan in an chhuahsan a, a pain a hnutchhiah an in dang, tuna Ama awmnaah sawn an awm ta a. Chutiang vel chu.. Tin, a nu chu hmanni lawk khan stroke vangin a boral ta a, chu chu Sangpuia hian a tuar na lutuk an ti. A nu nen rei tak chhung an inbiak tawh loh hnuah an inrem ve leh a, an boruak te pawh a tha leh tan tihin tihian a nu a thi leh ta mai sia. Tin, a nu khan in leh lo zawng zawng Sangpuia hmingin a lo dah ve thlap bawk. Mahse, Sangpuia chuan a pahrawn chu ngei viau mah se, sum tlem azawng a pe ve a, in atangin a chhuahtir an tia. A pahrawn hian fa bik a nei ve tho a, chu pawh chu a chhuak tel bawk an ti. Mahse, Sangpuia sum pek kha a zat hre chiah lo mah se; a tam thawkhat viau ang an ti. I hriat chak deuh tur chu maw.. Julie kha Sangpuia bialnu a ni reng reng lo. A ex a nih kha. Julie zawkin phai lama Sangpuia awm bo hlanin ngaihzawng dang a lo neihsan a, pasal te pawh a um hman aniang. Chuvanga inthen an nia.. 

Hetia Sangpuia a rawn hlawhtlin hnu hian Julie chuan rawn beisei thar lehin a bialpa ang chiahin a cheibawl a, Sangpuia hian a be chhe bik lo a ni maithei. Julie nen an inthen atangin hmeichhe han kawp lawp lawp nei thin mah se, bialnu nghet a la nei lo an ti bawk.. Julie kha a zak lo tiraw? A bialpa anga han chei vel chiam kha.. Sangpuia hi chu ni ila ka ten ngawt ang" a ti ta dap dap a. Ka ngaithla uluk deuh nge ka lo ngaihtuah zawm vel.. 

"Hmannia min tih dan teh ngawt kha chu, thudik hi hre ve se ka duh ngawt mai" ka ti a. 

"A la hre vat mai ang. Valpuia thianpa a nia" a ti a. Ni e, hre vat teh se. Rosangpuia nun kalkawng, a farnu nena an khawsak dun lai vel chu ka hrechiang chak. A farnu a hmangaih khawp mai. A nu pawh ka dem deuh, fate aia pasal han thlan deuh tawp mai chu.. 

Dar 9 a pel hlek tihin Rosangpuia call ka dawng ta a. Mak ka ti deuh. 

"Thianpa hian ruk chhuah che a tum a, ka rawn kal dawn asin" a rawn ti thâwr mai. Ka va bangbo tak em. 

"I chhuak tawh mi? Damdawiin atangin" ka ti daih a. 

"Chhuak tawh. Ka tha tawh. Valpuia hian ru chhuak tur chein min ngen a, rawn kal chi em? " min biak dan chu Valpuia bialnu ang chiahin min bia. Ka na zawk zawk mai. 

"A tawk viau e. Ani nen khan eng inzawmna mah kan nei lo a, kan nei ngai hek lo ang. Chuan, nang pawn lo hre rawh, ka hne tawh. Hetiang boruak hi. FIR ka thehlut dawn a, amah Valpuia khan a tuar dawn.. Tenawma kha" ka ti ta zawt zawt a. Ka thinrim lutuk hian ka tap tawp zel a, tunah pawh ka men leh piai tawh. 

"Aw le, ka lo hrilh ang e. Muttui le" tiin a dah nghal. Ka hrilhhai zawk. He pa mizia hi a va mak tak. Min rawn tawng elsen leh vel turah ka lo ngai a. A ti si lo. Zawng Valpuia chu aw. Keh nawk nawk ka va chak ngai ve le. Ka inlet ka inlet mai. Engtin nge hetiang hian min treat theih? Mi ho hian mi pasal ngaizawngah min lo ngai ru thup tawh ang em? Rosangpuia hnenah ngei ruk min tum thu a sawi ngam a nia. Engtin nge a theih zawk? 

A tukah ka chhungte hriat si lohin thuhretu ka zawng kual ta a. Cindy ka be hmasa ber, "FIR thehluh ka tum a, i pasal lakah khan. I bula min sawi dan zawng zawng kha sawi vek la ka duh a ni" tiin. 

A ngawih vang vang hnuah, "Ding, khawngaihin thehlut lo hram mai rawh. Ka lo hau ang. Ka nute pawh ka lo hrilh ang… kan mualpho dawn em mai" a rawn ti ţiau a. 

"Cindy, ka lungawi hlawl lo a ni e. Lawm lo tak ka ni. Ngaihdam min dil se la, tichuan, ka thehlut lo vang" ka ti ta a. 

"Ka lo hrilh ang. Aw.. Lo nghak hram rawh" tun tum zet chu ka lakah dawl zawrin a zawr alawm le. 

Rosangpuia ka call leh dawn lai takin, Kimi'n min rawn call a. Ka la vat. 

"Facebook-ah lut vat teh. Valpuia nen inthlalak a darh nasa a nia. Fake ac atangin a rawn post a, "Mi pasal ngaizawngtu leh nupui nei chunga ngaihzawng neih ching" tih a hmang a nia" a rawn ti ta! Ka alh ta. Tun tum zet zawng ka puakkeh a ni ber e. Khur zawih zawih chungin post chu ka va en ve ta a. Karei! Comment -ah chuan keimah min demna leh ka hmelhriatte ngei pawn, "Kan veng nula a nia.. A bialpa a ni thin a, a bialpa hian sawn a thlaksan vangin inneih an thulh a, mahse, a sawn thlakna nu nen an inneih meuh chuan a tuar zo leh lo a niang. Ka rindan tawk vel a ni e" an tihte, min hre ngai eih lo ten, "A nasa ngawt ang, a hur pawh a hur ang. Mi pasal ngaihzawn ching chu vuakhlum tlak" tihte, "A hmel a pangngai viau sia.. Mi pasal ta kher han cheh duh chu.. " aaa.. A tam. Ka chhiar vek ngam lo. A vawrtawp a thleng ta e. 

Ka pa te ka ko tuar tuar a, an rawn kal chuan ka lo entir a. Ka nu a chek tlawk tlawk. Kei erawh ka la khur reng a, ka ţap pur bawk. Ka pa chuan, Kimi a call a, "Kimbawih, a posttu bakah comment lama nasa zualho kha lo screen shot rawh aw.. Nakinah kan la mamawh ang" a ti a. 

Min rawn melh a, "Ka fanu,zám mah ta che. I pa ka la dam ve alawm. Ka fanu duatlai heti taka ching phara timualphotu te hi ka palzam mai mai lo vang. Insiam rawh. Police station kan pan ang" a ti nghut nghut a. Ka pa thu chu thu tawp a ni. A ti ngei ang. 

Kan pan mek laiin, Rosangpuia'n min lo call a, "Dingpui, facebook- saw.. " a rawn tih rualin, "Police station kan pan mek e" ka ti nghet charh a. 

A thaw hawk a. "Huaisen takin le.. " a rawn ti ve lawi a. Ka dah daih. Ka rilru a buai rih a. Engmah ka ngaihtuah bing tak tak thei lo. 

Police hmaah kan thu ran a. Ka pa chuan nghet cherh chawrh hian, "Sir, ka fanu timualphoa na taka siamtu hi hremna na thei ang ber pek ka phût a ni" a ti a. 

Police chuan min rawn melhin nelawm taka nui chungin, "Zâm reng reng suh. Kan theihtawp kan chhuah ang" a ti dam thlup a. Ka vanneihna ni lo thleng tur chu a rim pawh ka hre ve ţan ta e..