Rosangpuia 3

ROSANGPUIA.. (3)

Ziaktu: Toni Râlte

"Eng nge keimah vang a nihna? " ka ti nghek. 

"A chhan chu i la hre mai ang" a ti hmuk. Tawng tawh loin kan tlan par par a. "Kei chu ka rawn kal dawn lo, taxi ka la mai ang" ka ti a. A nui suk. 

"Ka thu thu" a ti hmiah. Ngei zetin ka melh kawk. He mihring inlak pa velzia hi a. Damdawiin kan thleng a, tiang ka keng si lo, "Ka lo awm mai ang. Han chho rawh" ka ti a. A lu a thing nur nur.. Ka seat lam kawngkhar chu rawn hawngin min pawm chhuak lawp. Miin min hmu dawn si. "Rosangpui, mawla" ka ti tuar a. A nui suk duh chauh. Min pawm chungin Damdawiinah chuan min luhpui ta a, mi kan tawhte lah chuan min en duh ropui si, nuam lo ka va ti tak. Azuali khum kan thlen chuan zawitêin min nghat a, a khum bul khum ruakah chuan ka thu ta a. Azuali mitmeng zet chu aww.. A va hriam hreih hrawih tak. A lung a awi hlawl lo tih a lang. 

"Ti nge thih i tum leh tak a? Ka hnathawk i ni si a, ngaihtuah i ngai miau si. Hetiang hi chuan che tawh lo teh" Rosangpuia chuan a ti a. A aw lah chu a dam vak bawk si lo. Azuali chuan mittui tling pamin, "Engkim i hria alawm. A chhan te chu" a ti sap a. Khawngaihthla te pawh a la ve lek lek mai. 

"Ka hria a. Intihah duh tawh suh ka ti reng alawm. Chuan, hei ka bialnu thar.. I hriat tawh kha, Dingpuii a nih hi" tiin min han inhmelhriattir thar leh vel a. Awmngaihna vak ka hre lo, ka awm thiam lo. Azuali chuan a heh a pet fan fan a. 

"Kha nu min hmelhriattir tur ringawt khan maw i lo kal" a ti hmak a. 

"Ni chiah chuang lo e. Lo dam rawh. Vawikhatmah tiang thil hi ti tawh suh. " thupe aw deuh hian a ti a. Azuali chu inawhhlum a tum an lo hmu hman a lo nia. A huaisenthlak mang e. Rosangpuia a duhzia pawh ka hrechiang ngam ta. Ka tan a nuam lo khawp mai. Mahse, a tira kan indawr dan a fuh tawh lo ve bawk nen, ka runluih ve deuh bawk a ni. Rei kan awm lo, Azuali nu niawm tak a rawn lan takah chuan kan chhuak leh nghal. Azuali nu lah khan Rosangpuia a be tha ropui, a tlawnin a tlawn niin ka hria. A ngaite bawkin kan inpawm thla leh a, min zo bawk a, rit min ti hmel pawh a pu lo. In lam kan pan zui nghal a. In kan thlen chuan ka pa leh Rami an lo awm a, ka pa nen an titi ve luam kha. Ka pa hi zopa ve tak mai, thalai nun hrethiam lutuk lo chi a ni a. Mahse, Sangpuia chuan a kawm thiam phian. Thingpui kan in zawhah, "Dawr tlawh ka ngai sia" tiin a haw ve ta a. Thuthmunah Rami chawhmeh siam tur ka thenfaipui a, "In ni tawh ni maw? " a tih chuan ka nui rah rah. 

"Awii ni r'u, A hmeltha ee, bakah a hausa si" a ti leh har har a. 

"A la hma e. Pasal nei tep tawh kha ka nia" ka ti a. Ka rilru tak tak pawh a ni. Valpuia ka la duh vang leh ka la nghah vang ni loin, mi mitmei ka veng lo thei lo. Ka chhungte pawh an zahawm ka ti. Bakah Rosangpuia chu a hausak bakah a hmeltha a, kei aia tha leh nalh tak tak a hmu teuh dawn. Nakinah min la bum vein a thianpa ang tho khan min la tina ve ang tih ka hlau. Keimaha inhung bik rih hi ka duhdan a ni. Dam vata ka hna chhunzawm ka chak tawh mang e. Ka kal rei lo mai siah. Ka duh vang a ni bik lo bawk a, ka inthlahrung em em lo. 

Zanah Cindy'n min rawn call teh mial a, ka inngaihtuah rei tawp. A pawimawh ngang a niang tiin ka la ta a. 

"I tha zel em? " a rawn ti a. 

"Aw hei ka tha sáwt lutuk e. Nang zawk? " pangngai takin ka ti ve a. 

"Ka tha ti ila chaw ka ei hleithei lo va, ka cher tawp. Kan inhmuh lohna a rei tawh sia, min hai tawh maithei ni" tiin a nui a. Hmanah kha chuan hetiang polite tak hian kan inbe ngai lo asin le. Ka lungte pawh a leng ve deuh. 

"Vitamin te ei la, inenkawl tha rawh" ka ti a. A ngawih det hnuah, "Ka lo call chhan che chu maw.. Ih englo a nia, sawi nuam tak a ni lo naa, Valpuia nen kan innei dawn tih chu i hriat tawh ka ring a, nang chu ka beisei ngam lo che a, mahse, Kimi te ho tal hian min rawn telpui thei se ka duh ngawt mai. Ka bia a min be duh hlawm si lo va. " a ti ta a. Ka thin a na vawng vawng mai. Ani hi pasal ka neih huna ka bula ding tur kha a nia sin le. 

"Ka lo hrilh ang, kei chu nia ka dam hmanin ka ring lo a, dam pawh ni ila ka tan leh intan a nuam dawn lo em a. " ka ti a. Ka aw a khur deuh. 

"Ka lawm ngawt ang. Nangman i hrilh chuan an zawm ka ring. Ding, engkim hi ka siamtha chak" a rawn ti zawi raih a. Ka chhing sawk. 

"Chutiang sawi suh. I duh ber i hmu tawh a, lawm zawk ta che. Naute pawh hrisel takin nei ang che.. " mittui tling chungin ka lo ti a. 

"Amah Valpuia hi chuan inneih a duh lo a, mahse, a chhungten an nawr nasat vang chauhin ania kan inneih dawn.. Nupa hlim tak chu kan ni kher lo maithei a ni" a tih chuan a pasal tur thlavang a hauh piah lamah ka mitmei a veng tih ka hria. 

"Fa innei ang a, a danglam vek mai ang. Kan inkar lam chu theihnghilh daih rawh" ka ti a. 

Kan inbiak zawh chuan chunglam melhin ka inngaihtuah vang vang a. Valpuia nen kan sulhnu leh nunhlui te kha ka ngai thar riau. Min care zia te, min duat theih em vanga ka pangchang vek zel te, keimah vanga hmeichhia a hnawl zatte pawh ka hria. Min hmangaih lo ka ti thei lo. Ni e, dik tak chuan min hmangaih alawm. Cindy nen an lo khatih tawhna vang khan a tawlh leh hlauh a ni zawk. Hmeichhe dang chu nise a ngaihte pawh an ngaidam thei mahna. Cindy ngei vang hrim hrima nei lui pawh an awm maithei. Mahse, kei chu engmah ni hlek si lo va induhtawk ve chi, mahni tawka ka thei ve ti chi ka ni miau a; ka tilui thei ngang lo a ni. Ka phone a rawn rik chuan ka phu zawk. Rosangpuia a ni. 

" I muhil tawh em ni? " a rawn ti dut dut a. 

"La hil nang.. Tinge min lo call a? " ka ti hû! 

A chek hlak a, "Ka bialnu i ni tawh a, eng nge ka lo call loh ang che? " a rawn ti deuh ngei, ka nui hawk a. 

"Ti tak tak miah suh. Ka duh lo a nia." ka ti a. 

"Min huat hran loh kha huat chu" 

"Kan huat lohte hi kan duh tihna a ni vek hleinem" ka ti nghat. 

"Min duh dawn, nakinah chuan min atchilh ang" confi zeta a rawn tih chuan ka ner nawk. "Chhe em mai a" ka ti hlak hlak a. 

"Taka Valpuia'n min rawn bia a, thiana min hman a tum a niawm e" a rawn tih chuan, eng emaw min nghawk dettu a awm. Mahse, pangngai takin, "A tha lawm, ţang la.. " ka ti a. 

"Nia, a laka lawmthu sawina a ni mai" a tih chuan hrethiam vak lo hian, "Eng nge awmzia? " ka ti a. 

"Aw.. Innei ula ka bialnu i ni thei nang" a rawn tih chuan, vin zet hian, "Rosangpui" ka ti thawt. A rawn nui hawk hawk a. Kei pawh za vak loin ka nui. Zámi'n min lo call sek vangin ka dah ta a. 

"Aw.. Zam" ka tih rual rualin, "I va busy rei tak.. Lal Teteii te inruk thu kha i hre tawh em? " a rawn ti heu mai. 

"Hre nang.. Engtikah nge a inruk? " ka ti vat a. 

"Tlaiah khan an chhuak dun kha an rawn haw ta lo.. Ka ngei tlat, min hrilh lawk ve tur a nia. " a ti hmarh hmarh a. Teteii leh a bialpa Puia hi kum 4 an inzui tawh a ni. An chhungte ve veah harsatna an tawk pawh a ni si lo va, han inruk kher chu aw.. Zami nen kan inbiak zawhah Teteii chu ka call ve a, a ring ral thak. A buai a niang tiin ka call nawn ta lo. Anni chu tluang takin an innei em ang chu maw. Kei zawng ka vanduai deuh a ni e. 

Ka hun chu a ngaitein ka hmang chho ve zel a. Rosangpuia pawh a sumdawnna huang zauh turin a thawkrim bawk a niang, kan inbe khat khawp mai. A zin deuh reng bawk si.. A chang chuan kan awmdan chu a lem ka ti. Kan inngaizawng tak tak lo tih ka pawm a, mahse, a bialnu anga min sawia bialnu treat-a min treat ve si, min duh vak lem lo tih a hriat reng. Min biak khat bakah hmuh pawh kan la inhmu leh miah lo a nia. Lo inngaizawng tak tak ila ka ngei zawng tak, hmeichhia ka nihnaah ngaihsak hi ka phut hlur mai. Tin, min ngaihsak viautu chu kei pawn ka duat ve tho. Teteii te pawh an ko hawng tawh a, thla tharah an innei dawn a niawm e. An inruk chhan chu nau a lo pai vang lek alawm le.. A thiante bula engmah a sawi lo chu kan vui deuh a, "Ka ngam bik lo alawm." a ti ringawt. A zia kan hriat vangin mak kan ti lem lo. Kimi pawh hna a hmu thar a, rawn len pawh a rawn leng hleithei tawh lo. Ni khat ka inbual zo, phone khawiha ka thu chu msg dengkhawng zet ka dawng ta a. 

"A thianthaber lakah pawh a pasal hual venghim zo lo hmeichhia hian, Rosangpuia te ang i lo beisei ngam ve a maw?! Zahna pawh hi a zak zawk ta ve ang. Hrereng rawh, kei hi Rosangpuia nupui tur ka nih hi." tih thu a ni. Ka chhiar nawn sek mai. Valpuia nen kan chungchang thleng thleng a rawn sawi chuan min tihnual rawih rawih thei. A hming ka en a, Azuali a ni miah lo! Julie Sailo tih a ni. Ka la hre ngai lo, a dp ka hmu thei bawk si lo. Ka lung a phu dup dup mai. Ka thinrim viau dawn a, mahse, a hnuah mak ka ti zawk. Engtin nge Valpuia nen kan chungchang a hriat a? Rosangpuia nen kan chungchang pawh chu engtin nge a hriat? Kan inngaizawng lo naa, min thik tur khawpin eng thil fakau nge a lo hriat? Chhan let ka tum zet a, Rosangpuia zawk ka call ta a. Ka call vawikhatna a niawm e. 

"Julie Sailo hi tu nge? " ka ti nghal tâwng a. A ngawi dat. Ka sawi nawn leh a. 

"Ka bialnu hlui" tih chauhin min chhang. 

"Msg dengkhawng tak min rawn thawn tur khawpin nang leh kei hian inzawmna kan nei lo tih i lo hrilh dawn nia. " ka ti ve ngat a. 

"Eng msg maw? " a rawn ti vat. Ka sawi ta vek a. A rum nghut. 

"Engtin nge Valpuia nen inchungchang a hriat a? " a ti zawmah a. 

"Chu chu lawm zawh che ka tum. I hrilh em ni? " ka tih rualin, "Aih, mi dang chungchang ka ngaihven ngai lo. A sawi pawh ka sawi peih hek lo" a ti nghut a. 

"Min rawn tih leh chuan ka chhang let tawh ang. Nang pawn lo zilh la" ka ti leh hram a. 

"Ani nen inzawmna kan nei tawh lo.. Ka hrilh lo vang" a ti chang fak. Thinrim zetin ka dah daih. Zan tir deuhah Julie bawk chuan, "Pasal hual sáwn thlak neih chu a nuam em? I hmel ka hmuh hian khatia bum che kha i phu ve reng a nih hi.. Rosangpuia te ang lo beisei ve.. Haha.. Ka zak zawk" a rawn ti leh ta a. Ka sa ve ta phat. Rosangpuia ngawr ngawr chu rawn hauhin min hau rawh se, ka pawmzam thei ang. Ka pasal hual chungchang chu a sawi tur a awm tlat lo. 

"Enteh, ka hre ngai lo che. Hriat che pawh ka duh hek lo. Ka pasal hual nen kan chungchang sawi tur hian engmah i ni lo, i nun kha buaipui la a tawk. Rosangpuia hi ka beisei lo a, inzawmna kan nei hek lo. A bialnu hlui i nih vang khan thikthu rawn pe chhe viau suh. " ka ti ve ta a. 

"A bialnu hlui a?! " emoji nen a rawn dah tuar. 

"Aw. Ama sawi dan ania" ka ti ve zel a. 

Thlalak a rawn dah nghal. Zanriah an kil dunna niawm tak a ni. Rosangpuia nen chauh an ni bawk. "Tikhan a ex ka nih leh nih loh a chiang em? Tun lawka kan lak a nih kha" a rawn ti a. Chu thlalak ka hmuh chuan ka sawi thiam miah loh hian na veng veng ka nei. Zaninah pawh zanriah an kil dun chuan an inhnimhnai hle tihna a ni mai. 

"A engpawh chu lo ni la.. Kei ber kher min thik te chu! Min ngainep angin lang mah la, min ngaisang zawk a va nih hmel ve.. I hlauhthawn danah" ka ti ve ngat. 

"Zawngi, accident hmang tangkaiin i lama pawh hnaih i tum tih hi zep tum hlek suh. A khawngaih vang chauh chea a ngaihsak der che hi remchangah hman tum suh" a ti ta deuh deuh. Ti nge engkim a hriat le.. Ka accident tihte chu. Amah Rosangpuia lo chu hrilh thei tur an awm lo ang. Hmela mai mai chu. Julie chu ka chhang buai peih ta lo. Ka thin erawh a tawt ve deuh. Ka thiante pawh ka hrilh chuang lo. 

Valpuia leh Cindy te inneih ni pawh a rawn inher chhuak ta a. Ka thiante pawh ka tihluih nasat em vangin an va lang ve dawn a ni. Kei erawh nilengin ka mu leh mai mai. Zep thu a cheng lo awm chu a nuam lem lo. Ngaihtuahna an luah ve run a, Thil thleng lo se tunah te hian Valpuia nupui niin an inah ka mo ve tawh awm si a. Khawvel hi chu a mak a ni. Julie sawi ang deuh khan ka thianthaber lakah pawh ka venghim zo lo chu a nia! Nep ka inti ve tho, ka lo ring lutuk kha mak ka inti.. Hmangaihna vang khan ka mit chauh del loin ka beng pawh a lo ngawng tel a nih dawn kha. Mahse, kei ai mahin Cindy kha inthup thei ka ti. Hlim awm tak khan a awm thin sia, lehlamah chuan rilru na ru tak chunga kan pahniha ka hlim dun a hmu thinte kha a khawngaihthlak letling. Engkim hi Pathian remruata pawm mai a ngai a ni e. Tlai dar 4 a la ri lo deuh tihah Valpuia'n min lo call hlawl mai. Ka phawk hle nghe nghe. 

"Dingpui, nangmah nen ni zawk se ka va ti em" a rawn ti a. A tawng dan chu ruih nei a ang. 

"I rui elo?! Nupui neih ni nia ruihte chu a" ka lo ti vat a. 

"Harhfima ka hmachhawn theih i ring em ni? Lo thi law law zawk ila tha tur" a'n ti ngawt a. Ka thaw halh a, "Enteh, Valpui, thil a nih tur ang a ni vek tawh. Mipa takin hmachhawn rawh. Khatia i hel kual avang khan engmah a danglam phah dawn lo. I fa pai mektu kha tha takin enkawl rawh" ka ti a. Ka na miah lo.. 

"Ni e ni e, ani chu ka enkawl tha ang. Naute avang chauhin. Mahse, ka nupui anga ka en theih hun tur erawh ka hre lo" a ti hawk a. 

"Engkim a tha vek mai ang" ka ti ve ringawt. Cindy aw hian, "Khatah law i awm.. Saw thiante hoin an zawng che sin. Lo lang ve la" a rawn ti a. 

"Aw.. Ka rawn kal tep.. " Valpuia'n a tih mek laiin, "Kan inneih niah em em chuan tiang khan awm lo la.. Dingi mi i biak kha.. Nangni pahnih hi inlo la inbe ru reng a ni lo maw? Ka pa ka hrilh khawp ang" Cindy chuan a ti hlak hlak a. Hrehawm ka tih em vangin ka dah ta daih a. Engtin tak inbe chhunzawm ang maw.. 

Rosangpuia status-ah an inneih thlalak a lang kalh mai. Valpuia thianah chuan a lo tang tak tak a lo nia. Cindy erawh chuan a cousin Nghaki a hmang thung. Ka mit latu zawk erawh Sangpuia bula ding hmeichhia chu a ni. Azuali a ni lo chiang bang a. Julie chu a ni mai lo'ng maw? A sam chu a buang tháng a, a sei viau bawk. Kei aiin a u hlek maithei, a sangin a pian pawh a nalh zeih zawih viau, tin, A hmeltha takzet. A ngo ser sawr bawk si. Valpuia banah chelhin a nui sáng a. A hlim tih a hriat. Ka rin phak miah loh thìkna chuan ka thinlungah hmun a lo chang reng tawh chu niin.. Ka thlir rei ngang mai. Valpuia hmel erawh a hlim lo tih a hriat ngawih ngawih, ka ngaihbel vang lam ni loin mi dang pawn hmu se an hrethiam ang. Cindy erawh a dul puar ve ak tawh chungin a la nalh viau mai. Ani pawh hlim hmel a pu em em lo. Hlim taka nuih zawng an la harsat ve rih ang. Chunglam phuba a ni mai. 

Kimi te pawh an rawn peng haw a, Valpuia te ai mahin Rosangpuia leh kha hmeichhe chungchang kha an sawi tam zawk. Kha nu overzia leh Rosangpuia a hauh natzia vel te an sawi nuaih mai. Ka lo nui put put ringawt. A ruk tak chuan ka na ve tho.. 

"Cindy'n kan hmel a hmu a alawm hmel ka hmuh khan ka khawngaih tlat mawle" Zami chuan a ti a. Ka mitmei a veng hle tih erawh ka hria. 

"A lawm dawn em asin. Be tha tawh ru.. A khawngaihthlak" ka lo ti vat a. 

"Inkawm leh pawh ni ila, chhungrilah eng emaw a awm tawh a, a hma kha chu kan pha tawh lo vang" Kimi chuan a ti a. Hei zawng a dik e. Kei nen lek phei chuan pangngai taka inkawm leh chu a harsa ang. Ka dam fel hunah te chuan ka sawi thei chuang lo va. 

Zanah tv enin kan thu thap a. Ka û chuan, "Nupui hi ka nei leh tawh mai dawn mawni ka ti" inthlahrun hmel zet hian a ti a. Kan en thap. Bialnu a neih awm kan hre miah lo. 

"Tu nge i neih leh ang? " ka nu chuan a ti a. 

A chil a lem khulh, a zám hmel angreng. "Pu Lianzama fanu Pari nen sawn kan inzuina a rei ve tawh alawm. Kan inthup em a, inhre lo anih kha" a ti ta mai a. Pari chu ka mitthla nghal. Thawk khat lai khan an ru ve zuai tawh a, fa erawh an nei hman lo. A chhung ten a bialpa kha duh mawlh hek lo an inthen hlen ta a. Kei ai chuan kum 2 velin a upa maithei, sa nghet tlet tlawt, tawi ve lam, a hmel erawh chhe lem lo tak a ni. A nungchang erawh kan inkawm ngai loh vangin ka hre ve lem lo, Kohhran leh khawtlangah a inhmang ve viau tih erawh ka hria. 

Ka pa chuan, "A chhungte saw an khirh riau a, an remti dawn mawni le" a ti chuar chuar a. 

"Remti aniang, min be tha thei lutuk" ka u chuan a ti vat. Ka nuih a za deuh. 

Ka pa bawk chuan, "Chutia an rem te chuan kei ka pawiti hleinem. Bawihtea hi a lian ve zel ang a, nu a la awt dawn. Tuna nu anga a pawm thlap theih hun laia neih leh mai hi a tha zawkin ka hria.. " a ti a. Ka u hmel chu a hlim sawt mai. 

"Ni e, kei pawh han iaina tur ka hre lem lo e. Bawihtea avang pawh hian neih leh chu a tul hrim hrim. A khawngaihthlak, tun atangin nu a awt tawh a nia" ka nu chuan a ti ve a. Bawihtea hian kum 8-na a hmang ve mek a. Ka u te inthen khan kum 4 a ni. A nu hian a rawn ngaihsak meuh lo va, biak takngial pawh an rawn biak ngai loh vangin ka pa thinrim hian, "Tun hnuah pawh rawn biak tum se, ka remti tawh lo. Tianga ngaihthah lutuk" a ti hmiah a. A nu tak hi chuan pasal a nei leh daih tawh a, fa pawh pahnih an nei tawh. A nu chhungte tal pawh hian rawn ngaihven ve tur a nia. An mak chu ka ti ve deuh. Tihian keh thei dawma dawmin ka nu phei chu a tel lo hian a awm thei tawh lo a chha a ni. A pa hi chuan a khawih tam lo ber zawk ang. Ka ke tliah hma kha chuan ka mutpui thin a, mahse, ka ke a tliah takah chuan ani mangchhe ve si khan a tlawh na ang tih hlauin ka nu te roomah khum an hunsak ve a, amahin a mu ve ta ran a. Nuam pawh a ti daih zawk. Amah hi naupang fel deuh, inuluk leh che fel deuh a nia. Hauh ngai hian a khawsa meuh lo. Kei hi ka zaidam lem loh vangin han vin khar khar ka ching zawk a, lemziah a atchilh bur mai a. Thian pawh a kawm tam em em lo. Phone kan leisak a, khawih hunbi erawh kan siamsak thung. 

Mut hnuah Rosangpuia'n a rawn call a, ka la duh lo lui ve ngat. A rawn tihnawn sek pawn ka la duh thak lo. Ka titau ve ringawt chu nuam ka ti bik lo. Mahse, ka ngei tlat! Whatsapp-ah, "La ve mai la" a rawn ti a. Chu erawh, "Call chhang mood-ah ka awm lo" tiin ka reply. 

"Dangdai thei siah. I that leh that loh rawn hriat ka tum mai chauh a nia" a rawn ti leh a. 

"Ka tha mah mah" ka va ti leh kher. 

"Ex te inneih nia tha mah mah kha i ni tiraw? " a va ngeiawm tak. 

"Chiang e, ka duhthusam a thleng miau a" ka ti a. 

"Valpuia erawh a hlim lo hle mai" a rawn tih chuan, "Ka lo tihlim dawn nia" ka va ti a. 

"Rodingpui" hawrawppui ngatin a rawn ti. 

"Eih.. " ka va ti leh hram. 

"I chimawm ve hle mai maw.. I hlim miah lo va, i hlim derna avang khan i hah hle ang ka ring" a ti fak. 

"Ka mu dawn. Muttui.. Innu in min rawn hau leh palh ang" ka va ti a. A rawn call leh nghal.. Kei ka lo khawih laklawh lai a ni si, ka tum loh deuhin ka hmet hman si. Tui lo zetin, "Eng nge" ka ti a. 

"Tu nge kan nu chu? " 

"Julie sailo" ka ti ve hmak. A nui hawk a, mahse, a nuih a za miah lo tih ka hre thei tlat. 

"Sawifiah a ngai a.. Ka sawifiah thei" a tih rual rualin, "Ka lakah insawifiah i ba reng reng lo. I bialnu pawh ka ni lo, ka tan pawh engmah i ni lo. Mahse, a hman chang apianga a hauha tawngkam chhe zet zeta min rawn hau tawh lo turin i bialnu kha lo zilh ang che. Ka kham viau a nia.. Mang tha" ti duahin ka dah tau hmak. Ka insangmar nasa lutuk chu ka inzahpui zawk. Ka lungphu lah a rang leh hle. A rawn call zui miah lo. Ka beisei vang pawh ni loin ka thil sawi avang khan a lo call leh ka ring deuh a nia. Whatsapp-ah pawh a reh hmak. Pawi chai lo. 

Ka pa te chuan ka u nupui tur dil turin palai an tir ta a. An lo be tha viau a, ngaih a ngam e. Kei pawh ka ke ka rap ngam tan tawh a, tiang hmang lo pawn in chhungah chuan ka tei kual ve thei ta deuh. Rami pawh a la awm ve zel a, a rilru a hlim ve tawh bawk a, a hmel pawh a tha tulh tulh mai. Ka pa hian, "Tihian kan fanu naupangber i ni mai. Kan hnen atangin pasal pawh i nei ang" a ti mai a. Belh tur chuang a nei bik lo bawk a, ka nu leh pate chu a zahin a ngaisang em em a, Bawihtea te hi duat tak a ni. Bawihtea pawn a ngainain chhuahvah nikhuaah pawh an inzui kawi ve ta reng mai. Ka u palai te pawh an vawi hnih kalnaah an inrem ta a, a hun tur pawh an sawi thlap mai. Thla khat chiah inbuatsaihna hun kan nei. Kei pawh ka dam hman tawh turah ngai ang. Ka u phur surh surh lutuk chu a rukin kan nuih reng thin. An nu nen an inthen atang khan hmeichhia a ngaihsak ta mang lo va, mahse, hei Pari nen an lo ni ru ve reng sia. Ka lawmpui khawp mai. Pari pawh mi tha tak a nih ka beisei. 

Rosangpuia a reh vung vung mai. Khami zana ka tawngkhum chiam bak kha kan la inbe leh ta miah lo. Status a nei ngai lo va, a online leh online loh check chu tlawmah ka la ve tlat. Ka bialpa a ni lo va, amah vanga ke tliak ka ni tihah hian ka chiang tur a ni. Valpuia te nupa thawm pawh a reh rih. An hlim dun em em chu ka ring hran lo, mahse, fa an nei ang a, a dan a dang sawt chuan ka ring. 

Incheck up turin ka u nen kan chhuak a, Doctor pawn "Ka rin phak bak aiin i tha chak, i hmang thei thuai ang " tiin exer la turin min fuih sauh sauh a. Ka lawm ve khawp mai. Kan incheck up zo pawn ka va chhuak chiah tihin Rosangpuia leh Sambuangi rawn inzui phei ka va hmu a, kan la intawk dawn zui! Ka va duh lo ber tak. Ka tiang rinchhan chuan ka bai phei suih suih a, lei lam ka melh ran bawk. 

"Heii, kawng en ta che, min sut tep hi" A aw chu a thip lam a ni. Ka hawi chhuak a, rum zet hian min lo melh. A hmel chu a tha, mahse, a thinchhiat ve hmel. "Tihpalh" ka ti sap a, kal leh mai ka tum laiin, "Ngawi teh, Nang hi tiraw Rodingpuii kha.. Engtin nge ka hriat loh theih che aw.. " a ti ar ar a. Ka ding leh dat, Sangpuia erawh hmalam hawiin a ding khawng tlat. Min melh eih lo. 

"Kei chuan ka hre lo che. Tihpalh" nui lui chungin ka ti a, ka kal zui nghal. 

"Saw nu thik sawn maw ka lo thinrim ve em em.. " tia elsen zeta a tawng hnuah, "Thik tlak a ni lo tih vawitam ka hrilh che kha" Rosangpuia aw ngei maiin a tih chuan ka na zawk zawk. Ka hriat tur khera sawi a ni tih pawh ka chiang. Ka inpetruh a, ka u bulah hmel pangngai put hram hram ka tum. A harsa thlawt! Ni e, hei hi ka hria, ani ang mipa tan buaipui tak tak tlak ka ni lo miau a. A laka ka rilru put dan te chu ka ngei zawk,. Ka rilru te tein, "Ngawi tak rawh, Rosangpui, i hre viau ang. Nangni hmuhsit mai mai tur ka ni lo" ka ti ve ta ran a. Kan inngaizawng lo naa, khatiang tawngkam ama ka atang ngeia ka dawng erawh na ka ti, ka zep buai lo mai ang e. 

Doctor thurawn angin exer ka theih ang tawka lain ka ke pawh ka rap na ngam ve tial tial tawh a, dam vat vata class kala mi dang bula khawsak ve ka chak tawh. Rosangpuia leh Valpuia avangin ka na leh fo a, mahse, chung ka natna te chu tumruhna leh phuba lak chaknain a rawn khuhbo ve leh thin. Ka u te inneihna tur inbuatsaih a ngai bawk a, kan buai ve thei khawp mai. 

"U, mi pakhat a lo kal" room-a thawmhnaw ka thleh fel laiin Rami'n a rawn ti a. Ka chhungte dang erawh an chhuak vek thung. Ka va chhuah chuan ka rin loh lutukin Valpuia a lo nia! Ka hmu chu ka phawk hle. A chhan chu a inzuah bukin a pawr fap mai a, hmana Valpuia kha a ang tawh lo tawp. 

. "Teh hlawl che chuan.. Eng nge i duh? " ka ti a. 

"In ina rawn lut ngam tur pawh ka ni tawh lo naa, ka tuar thei tawh ngang lo va, ka rawn kal tawp" a ti a. A meng sen rûm bawk si, zu a in nasa a niang, a hmel bakah a taksaah pawh a lang. 

"Chuan.. Engtin" ka ti he haw a. 

"Ka thei tawh lo, Dingpui, Cindy saw ka chenpui thei tawh ngang lo. Khawngaih takin chance min pe leh rawh. Nang lo chu tumah ka ngaihtuah thei si lo va, a hrehawm em mai" tiin a hmai a hup a. Ka thinrim kher mai. 

"I va zak lo ve, eng hmuhin nge min hmuh a? I duh hun huna rawn let turah min ngai em ni? Khawngaihin min chhuahsan la, vawikhatmah rawn kal tawh suh" ka ti ta a. Nia, hrehawm te chu a tuar ve ang chu.. Kei khan ka tuar lo bik reng reng lo. Hmeichhe awmnem zawk ka ni lehnghal. 

"I hrethiam lo a ni. Cindy nen kan inneih chiah hian ka lo hmangaihzia che ka hrechhuak thar a. Ani saw ka then ang a, ka nghak dawn che. Chu chauh chu phal rawh aw.. Engtikah emaw i rawn let leh hi ka beisei tlat a ni" a la ti ta deuh deuh. A rui anih ka ring hial mai. 

"I beidawn hun a la thleng zawk dawn a nih chu. I nei tawh a, kei angin tumah tina ve tawh suh. Cindy saw i fa paitu a nih saw.. Aa.. Valpui, chhuak mai teh. Ka nu te an rawn hawn phei chuan a dik lo ang" mangang takin ka ti ta a. A thut tlat avang chuan la tihngaihna hre lo chu roomah luhsan mai ka tum a, mahse, "Ka thianpa Rosangpuia kha i duh tiraw? A dik em? Ani sawn nawmchen nan bak a ti lo che. Bialnu nghet a nei reng. Chu chu i lo hre ve mai mai dawn nia. Fimkhur hle rawh" a tih chuan ka ding dawt. Ka va lehhawi a. 

"Ani nen inzawmna kan nei lo e" ka ti ram hmak a. 

Ngeiawm taka nuiin, "I duh alawm.. A motor nen in insut vangin a buaipui che a, chu chu nang chuan lo ngai thutakin i lo bialpa chei ve ringawt an tia.. Ka hre vek alawm" a ti ta a. Mak ka ti ngang mai. 

"Eng a?! Chutiang chuan tuin nge sawi a? " ka ti nghek. 

"An sawi nasa alawm. Kan inneih ni pawh khan an sawi thawm ka hria. Ani ang saw chu i type a ni ve lo. " a ti a. Ka chhing sawk. 

"I rawn kal ngam pawh hi engtia tih thu loh, khatiang dawt thu phuahchawp lutuk i sawi ngam pawh kha i tenawm thlawt e. Chhuak rawh" ka ti tuar a. A ding a, min melh ran chungin, "Engpawhnise, hei hi hrereng rawh. Ka bansan dawn lo che. Min nei lo thei lo hian ka la siam dawn che. Vawi khat ka tisual a, min ngaidam thei lo va, mahse, lo ngai reng rawh. Engtikah emaw chuan min neih loh hi i la hlau zawk ang. "A ti nghut nghut a. A hmaia chil chhah ka chak mang e. Ka lo khawngaih rukna te kha an bo fai vek. Hetiang mihring tenawm lutuk hi ka lo hmangaih ve thin a nia leh! A chhuak tur chu rawn hawi let leh hramin, "I pasal hual nen in inthenna pawh a la rei lo va, mipa dang i ngaihsak leh nghal thei kha i tenawm ve tho" a rawn ti! 

"Chhuak rawh" a auin ka au a ni ber. Rami a rawn kal vat a, ka khur zawih zawih. Ka thinrim lutuk chu ka puakkeh mai dawnin ka hria. Ka engtih mah a tui nek tawh lo e. Rosangpuia chungchang a sawi kha tak tak mawni le.. Kei hian beisei angin ka thang tak tak em ni ang? Chutin kan inzui chhuak ngai si lo, Azuali kan va hmuh ni bak kha pawnah vawikhatmah kan kal dun lo. A tu chuan nge chutiang thu chu thehdarh ta ang? Kha Julie kha a ni ang em? Aa.. Ni mai mai teh se. Ka nih loh phawt a hnu. A ho em mai. Mahse, ho ka ti tak tak teuh lo. Chhungrilah ka nâ. Ka zak bawk. A chhan chu Rosangpuia hi ka lo ngaihtuah ve hman tlat a tin ni. Chu chu ka nat chhan pawh a ni mahna le.. 

Valpuia lo kal atanga ni 3-naah Cindy-in min rawn call a. 

"I bulah Valpuia a awm em? " a rawn ti nghal tâwng. Ka lawm vak lo bawk a, "Engvangin nge ka bulah a awm ang a? " ka ti ve hmak a. 

"Aw.. Intha leh tawh sia" a rawn tih chuan ka sa phat. 

"Dawt a nih chu. Ani nen hian eng inzawmna mah neih ka duh tawh lo" ka ti a. 

"Dingi, kan hre vek alawm. In inbiak dan zawng zawngte pawh. Hmanniah pawh a rawn leng tih kan hria. Hetiang tur si chu inneihte kha thulh loh mai tur a nia" a ti tán tán a. 

"Ngawi teh, Cindy, i hresual a nih chu. Inpa hi chhete pawn ka ngaihven lo e.. Bialpa chu ka nei ve tawh alawm" ka ti a. Ka insum nasatzia kha aw. 

"Ee.. Sangpuia kha maw.. A bawl mai mai che a nih kha. Tak tak emaw ti thin suh. Ka thian i lo nih tawhnaah ka hrilh che a nih chu.. A bawl theihin awm tawh suh" a rawn ti duah a. Ka va hne tak. Ti nge he thu hi an sawi reng a.. Ka ning. 

"Ani nen pawh inzawmna kan nei chuang lo" ka ti a. 

"Engpawhnise, kan pa hi lo hmuin lo be tawh lo la kan duh a ni. I duh tawh lo a, i ngaidam thei lo va, chuvang chuan tihian awmtir ve mai mai rawh. Nupa inkarah tlazep suh" a rawn tih leh takah chuan, "Ka va ning em.. Inpa kha eng atanmah ka ti lo. Hre rawh. " ka ti vak vak a. Ka dah nghal bawk. Thinrim zetin ka insawh ka insawh mai. 

Zanah Rosangpuia'n min block tih ka hre ta bawk a. Ka block ve hmak e. A tawk khat tawh e..