Rosangpuia 20

ROSANGPUIA (20)

Ziaktu: Toni Râlte

"Chuan?" Tiin ka zawt var a.

"Malsawma leh Valpuia'n alawm min lo setup le" a ti ta mai a. Mak ka tih luat vangin ka thu chhuak hlawl. "Malsawma a?!" Ka ti nghek.

"Ka ringhlel daih tawh alawm. Naktukah ka rawn kal ang a,kan sawi tha dawn nia. Muhil leh rawh. Ka ngai che aw, chuan ka hmangaih che" a ti a. A dah nghal daih. Ka harh leh tingtang si, mak ka va ti tak êm! Malsawma ber kher chu! Engtin nge a nih theih? A thianpa a phatsan a maw?!

Valpuia msg ka dawng zui. Zan a rei tawh tehlul nen.

"Engkim ka thiam loh a ni e. Min ngaidam rawh aw" a a rawn ti. Ka block ta mai. Ka ngaidam nguar ang. Min timualpho malh malh tawh em mai.

Ka tho tlai viau. Inkhawm a ngai bawk si. Ka pa chuan,"Kuminah vawiin bak inkhawmna hun ka neih ve tawh loh takin" tiin inkhawm a duh ve a. Amah a harh tha ve riau bawk a. Chaw kan ei sawk sawk a, kan insiam ta a. Ka pa inkhawm an hmuh chuan an lo chibai sap sap mai. A hmel hmuh a nuam bawk a,Kei erawh miin min en hrek hrekin ka hria. Ka pawisa lo lui ve tlat! Nge maw le,ka thiam loh pawh a ni bik hleinem. Inkhawm banah ka inthlak laiin Sangpuia a rawn lut ta a. Sawi tur tam tak a nei ngei ang. Kan chhungkua kan awmkim vek a,thingpui in pahin a thiante pahnihin an phatsan dan chu a sawi ta a.

"Case pawh an lakir tawh e. Buaina ka nei tawh lo. Malsawma ka rinhlelhna chhan chu khami zan kan haw khan min fuihpawrh char char a, 'In inneihna thlengin a tibuai hreh lo vang che,khawih zal deuh a ngai a nih hi' ti ten. Mahse, call pawimawh tak ka dawng ta a. Amah Malsawma awm laiin a ni nghe nghe. Tu nge min betu chu a hre lo naa, ka chhuah tur thu a hria a ni. A chhan chu ka roomah a riak miau a. Ka chhuahsan a. Ka mi hmuh tum nen kan inhmuh mek laiin,Valpuia call ka dawng ta a. 'Thianpa,i pawi ka sawi a; khawngaihin inhmu ila ngaihdam dil che ka duh' a rawn ti a. Mahse, ka hmuh chuan ka insum zawh loh ka hlauh vangin ka ngawihsan ta a. Chutah tak chuan, " Khawi lai takah nge i awm? Ka rawn hmu ang che" a la rawn ti hram a. Ka in awmna a hria, mahse, inah ka awm lo tih kha engtin nge a hriat? Dik lo a awm tanin ka hria a. Ngawihsan lehin ka hawnsan ta a. Malsawma chu a lo awm hauh lo mai a. Mahse,a hnu lawkah msg-in, 'Kan nu nen kan inhmu lawk' a rawn ti a. A bialnu thar nia a sawi Rempuii ka be ve ta hmiah a. Keinahah khan dik lo eng emaw a awmin ka hre tlat a ni. A mak ve khawp mai.

"Rempui, Malsawma kha ka lo be lawk. Call a chhang thei lo' tiin.

" Ka bulah a awm reng reng lo. Hmela hi ka ngeizia " a rawn ti a. Malsawma chuan dawt a sawi tihna. Mahse, tu emaw hmeichhe bulah pawh a awm thei tho.

Malsawma chu a rawn hawng ta lo va. A tukah khan Malsawma'n ,Valpuia nikhaw hre lo va a awm thu min rawn hrilh a, chumi hnu lawkah Valpuia pain Valpuia awmna chin ka hriat leh hriat loh min rawn zawt thung. A inkalh dan atang chuan eng emaw tak a thleng dawn tih ka chiang thei ta a. Mahse, engmah ka sawi duh rih lo. Tichuan, Valpuia an zu hmuh takah khan Kei chu mawhphurtuah min ngaiin min rawn man ta a nih kha..ka nuihte pawh a za lek lek zawk mai. Police ho bulah khan chiang takin thil awmdan ka sawi ta vek a. Min chhuahtirin ka chet an phal ta a ni. Tichuan, Malsawma chu ka enthla tan a. Ka bulah a chetla mang lo va, mahse, Valpuia vanga ka tawrhna chu pawi a tih thu erawh min rawn thawn. Tichuan, Valpuia, damdawiin atanga a chhuah hma zanah khan Doctor Remsanga ka ruai ta a. Malsawma'n a va tlawh thu a sawi ta ngei a. Engvanga min set up nge an nih tih lam aiin Malsawma chuan engvangin nge Valpuia a puih tihah erawh ka buai ta a. Mahse,Nizanah khan ka zui ru ta a. Engkim ka va hre chhuak ta a ni.

Malsawma hi inhrechiang lo maithei. Software engineer niin sum a lalut ve reng..mahse, mi duhám tak a ni a. A duham luatah vai pitar hausa nupuiah a nei nghe nghe. A nupui chu step atanga lumin a thi a, a pasal Malsawma berin report a thehluh loh vangin an chhui zui ta lo kha a nia. Pitari sum rochun a zahve chu a chang a,a zahve dang a faten. Vai rama hun hman reng chu a ning ve ta a. Mizoramah rawn haw dawn ta se,a zik a bul ve a. Amah hi a pa Bengali niin,a nu erawh Mizo a ni. Mahse, pa chuan an tet laiin an ramah a hawnsan a, a nu chu vai a neih vangin a chhungten an tuithlar bawk si. Rethei takin a seilian ve a. A nuin pasal dang neiin a pahrawn sual tak vangin in chhuahsanin a pa a zuk zawng chhuak ta a. A pa pawh a hausa lo naa, a zirna senso chu a lo tumsak thei ta a. Tihian a lo puitling ta kha a nia. Mizorama awma in leh lo neihte a duh ve hle a ni. Chuvang taka Valpuia nen inremna nei an ni ta a ni. Valpuia hi a pain ram a leisak a, Durtlangah khian a ni nghe nghe. A hmun a that bakah boruak a nuam bawk. Chu ram zau tak chu Valpuia chuan a lo offer a lo nia! Malsawma tan hnar phal chi ni hek lo le. Kei leh Dingi inneihna an kham theih phawt chuan,Ram hmun thum athena hmun hnih chu Malsawma'n a chang dawn a ni. Urlawk zana buaina pawh kha an plan vek a ni. Video-a covertu pawh Malsawma ngei a ni. Ding,ngaihtuah let la; Malsawma a chetchan ve eih loh kha..Valpuia laka ka thinrimin amah thah tum anga min lantir tumin tikhan Valpuia chu a haw ta lo va, ka hming a lam ta bawk a nih kha..min sawisaktir tak tak pawh a tum nghe nghe a nih kha..mahse, Police-in min lak hnuah pawh buaina a awm tak si loah chuan an mangang ta a..nizanah khan plan dang neih tumin an inhmu ta a. An sawi zawng zawng ka hria tih leh ka hmu vek tih pawh an hre ta a. Tunah hian Police in an zawng mek maithei. " a ti ta dap dap a. Ngaihnawm kan ti kher mai.

Ka nu chuan, "A lawmawm hlauh chu..tikhan buaina dang nei tawh lo hram ang che u" a lo ti a. Ka nui ringawt. Ka hlim viau mai. 

"Pa Siama te pafa chaw eiah kan sawm sia , ka leng rei hman lo" tiin a haw hma a. Mahse, engkim a tha ta a. Ka lawm tho mai. 

Ka u leh Rami mawlh hi, an music ka man thiam ve tawh tho si. Ka nuih a za thin. Zanah ka inkhawm lo va,Rami erawh ka nu nen an insiam a. BAwihtea'n a ngen bawk. Ka u,a rooma awm reng chu a rawn chhuk a, a insiam bik lo. Rami te insiam chu a va hmu si. A tawi a tawi a.

"Kumthar zana inkhawm loh chu a..ka han insiam ve mai teh ang" a ti ta a. Ka khi sak. A han insiam a, an inzui chhuah leh tak kha. Innei daih se ka duhthusam a kim a ni mai. Mahse, pari te thawm a na ngawt ang le. A ho em mai.

Zanah Rosangpuia chu a rawn phei leh a. Malsawma leh Valpuia an man tawh thu a rawn sawi. Kum thar zana lockup-a hun hman chu a nuam vak lo vang. An sual man a ni mai. Sikri aiin kan inngheng chial a.

"Duatpui,thil ka zawt ang che aw" a ti sup a. A thutak riauin ka hria.

"Umm" ka ti ve mai a.

"Rogera saw enkawl dawn ta ila, pawi tihna i nei em?" A ti ta a.

"Ngati nge? Mapuii hi a rawn let i ring tawh lo em ni?" Ka ti a.

"Aw. A lo let tawh dawn lo a ni" a ti nghut a.

"I va chiang awm ve" 

"Rogera chu enkawl pawi i ti em?" A ti leh daih a. 

"Kan fa angin maw?" Ka ti ha a.

A bu nghut. 

"Aih,ka thei lo" ka ti ta nghat a. A hmel a thim deuh.

"A nih chuan, Home-a dah a ngai dawn a nih chu" a ti a.

"I bialnu hlui fa a nih chu thuhran, buaina lian tak i tawh phah a, Mualphona leh hmingchhiatna nen..chuti chunga enkawl chu ka thei lo" ka ti ta bawrh bawrh a. Ka awrawl pawh a nem vak lo. 

"Umm,ka hrethiam alawm. Ka hre vek e. Ni e, nang berin i pawm theih loh chuan home-ah awm rawh se" a ti hriam hraih a. A lungawi vak lo niin ka hria a, mak ka ti deuh.

"Mami te paw'n an enkawl thei ang chu. Fa an awh em kha" ka ti hram a.

"A neitu hian a remti bik lo vang" a ti daih. Mak ti zeta melhin," Chu! Mapuii chu i care hle a ni maw? A fapa awt ngawih ngawih chu engvangin nge i neih mai loh ang?" Ka ti nghek. 

"Ka hmangaih hleinem" a ti tawi tak.

"A nih tak chu! Naute saw ka lainat lo a ni lo. Buaina tam tak a thlen tawh che a, mapuii pa te lahin an huat phah che a. Anni a pute zawk pawn enkawl lo va nangin i lo enkawl leh daih kha ka pawm lo" ka ti fithla hmak a. 

Ka kut a rawn vuan a. "Umm,sawi tawh lo vang. Kan enkawl lo vang. A tha em?" A ti dam thlup a.

"Aw a tha. Home-ah chuan dah vat rawh. " ka ti khawng fak. Ka thinrim ringawt chu ka hrethiam lo.

Amah va melhin," Chuan,urlawk zana i va hmuh kha tu nge?" Ka ti leh nghat a.

"Mi pawimawh tak a ni mai. Min zawt tawh suh khawngaihin" a ti tlat. Chungte chuan ka thin a tirim zual sauh.

"Mapuii em ni?" Ka ti sap a. 

A kun tlat. Min chhang duh thak lo. 

Ka ngei a ni. A dawr a rawksak a, a tlanbo a. A kalsan a fapa enkawl a tum hi mihring rilru thatna vang pawh ni zozaiin ka hre lo. Ka lakah hian thup a nei a ni ngei ang. Mahse, ka zawt lui lo vang. Ka hriat avanga ka natna tur a nih phei chuan hriat ka chak lo e. 

"Chuan, tu nge thianah i hman dawn tak? Malsawma lah ti kha a ni sia" ka ti a. Kan awmdun khat sia, thinrima inhnial ka duh lo.

"Mapuia ka hmang ang. Ka manager" a ti sup a.

"Rosangpui, ka lakah i lungawi lo ve ringawt elo? Rogera enkawl ka duh loh vang chuan" ka ti hrâwk a. Thuk zetin min rawn melh a. 

"Ka hmangaih che" a ti daih. Ka lo ner nak ringawt. Zanin zet chu kan topicin a zir lo a ni bawk a. Kan nui dun mang lo. A haw hmain ka pa a va hmu zuai a, a haw phei ta a. Kim lo riauin ka inhria. 

A tuk ruaitheh tur chuan U lawma leh Rami bakah bawihtea te nen kan kal ve a. Uremi te pawh an chhungkuain an kal ve bawk a. Chaw kan ei kham a , tiang ruaithehnaah hian ka ei tam ve thei ngai lo. Kan ei kham kan haw phei dawn mek laiin U pari te thianho an rawn lang ve leh hlawl a. Buaina a awm ang tih hlauin carah chuan ka lut vat a,mahse ,ka u kuhva lam rawn phei mek chu Pari chuan a dinchilh ta ran mai. A harhfim leh lo tih a hriat khawp mai. 

"Lallawmawm, dawr saw ka ta a ni ka ti a ni lawm ni? Engvangin nge i ta anga ngaia i la nghah zui zel a" a ti ta ham ham a. Ruaitheh zo mi tam vanglai a ni bawk si ,a va zia lo tak.

"Kal teh a" tiin ka u chu rawn phei a tum a.

Mahse, a lo pawt tlat. 

"Zawnga, min neih loh hlaua min zar huam huamtuin hetiang hian min ti khanglang suh. Kan inneih chhung zawnga ka thil leisakna che man zawng zawng kha min pe leh vek rawh." A ti a. Ka nuih a za. A sum duh dan em em chu.

"Nang hian engmah min lei lo, e..kha sana hi min chahsak ve tak, kha la rawh. Hralh mai rawh" tiin ka u chuan a sana bun lai chu a phelh sawk sawk a. 

"Chuan, min sawisakna man kha le..thisen min chhuahna man kha?" Tiin ka u chu dak vah hian a melh a. Ka u insumthei lo hian a khawih leh duh mai ang tih hlauin,"Kal ang u. Lo kalsan rawh" ka va ti a. Rami leh bawihtea erawh carah an thu lut tawh a,Rami'n Bawihtea chu a pawm bet tlat. 

"Kut thawh ngai hial khawpa i chetna man kha min pe ve la" Ka u chuan a ti ve khauh. Pari chuan ka lo tawng ve avanga min rawn melhin,"Nang mipa lawmnu kha lo ngawi hmak rawh. I unaupa phal lo chung pawh pasal neih luih tum,mipa râwp i nih kha" tiin min rawn khei ve hlak a ka nuihsan. Ka chhang peih lo. A tihtheih tawk saw a nep tawh em mai. A khawngaihthlak letling tawh zawk.

Ka u pawh chu a rawn phei ve leh a, mahse, ring zet hian,"Lallawmawm, i fa ka pai tih pawh i hre lo tiraw? Tunah hian ka rai asin" a ti ta tuar a. Ka u pawh a ding chawt. Kei pawn mak ti zetin Pari chu ka va melh a. Mi lah chu an pungkhawm chak phian a. A zahthlak thin teh e maw..ti nge mawni ziah le..

"I rai a maw?" Ka u chuan a ti a.

"Rai e. Kan inthen hnuah ka hre chhuak ve chauh" nem deuh zawk hian pari chuan a ti a.

Ka u chuan a va pan leh ngat a,ka lo thir reng ringawt. Nui pah deuh hian," Engtin nge i rai theih? Indanna i ei char char thu i bialpa bulah khan i sawi si a..ngawi teh,i bialpa fa kha a niang. Lo piang phawt se kan hre mai ang" a ti ta a. 

"Chutia i pawm lohte chuan ka titla dawn ania" pari chu leh!

"A paitu i nia..i thu vek alawm" ka u chuan a tihsan hmiah. Engmah sawi tawh loin carah a rawn lut a. Pari rak chul pawh hre lo ang mapin chak zetin a tlan ta a. 

"Pa, anu pari khan a hau che mi?" A fapa khan a hmu ve vek si a ni.

"Hau lo e. Kan infiam mai mai a nih kha" a lo ti vat a. Thudang kan sawipui ta daih a. In kan thlen hnuah ka nu bulah ka sawi a.

"Chutia fa a pai te chuan Lawma fate pawh chu a ni ve thei tho asin..engtia tih chi nge niang aw" a ti a.

Ka u lah chuan,"Ka ring lo. Nuhah pawh ka nuhah lo.bakah kan inthen veleh a hrechhuak a, min neih leh theih nana a tactic a niang" a ti a. Kan sawi vak duh lo. Rilru a zing mai mai. 

Kum thar lawmna programme a zo ta bawk a. Kei pawh ka pasal neihna atan ka inbuatsaih pah a, Mami te hawn hma tlaiah chaw ka va ei phei a. Rosangpuia cher kuam mai hi enh nge a chhan ni ang aw.. Hlim tak anga lang siin a chhungril a hlim lo tlata hriatna ka nei thin. Ka ngaihbel pawh a ni maithei. Mami erawh a that ngaiin a la tha reng a. Inneih nia a vul dan tur bak a sawi vak lo. Rogera pawh ka pawm ve reng a, a duhawm thlawt a ni. A hmel ka hmuh chang chuan a laka ka thutlukna kha a râwng lua niin ka hre ve tho. Mahse, Mapuii leh a pa te ka ngei em vangin chu ka inchhirna chu ka hnawhbo leh thin. Dik tak chuan anmahni vangin a buai nasa si a. Ka ngei a ni. Ka haw tur min thlah a, "Ka rawn lut kawi lo mai ang." A ti a.

Thaw hawkin,"Rosangpui,i hlim lo tiraw?" Ka ti ta a.

"Ngati maw?ka hlim reng. Ka chau ve deuh a". ati a. A nui lui bawk.

" Dawt sawi i thiam lo em mai a. Sawi la, Roger vang em ni? " ka ti a. 

"Ka tha..ka hlim. Inenkawl tha la a tawk." A ti hluk a.

Hmana Rosangpuia kha a ang tawh lo.

"I hlim lo. Ka hria. Rogera chu enkawl la , innei lo mai ang" hmeichhe rilru tak hi chu aw..min rawn pawt dawrh a, hnai zeta min melhin,"Ka thlah che ring suh. Inneihna atan inbuatsaih tha hle ang che" a ti vawt raih a. Ka hlau lek lek . ka tal vak a, ka chhuk nghal daih. Ti nge a danglam tak riau le..?! Urlawk zana a mi hmuh atang khan a zia a hloh tan. Ka hriat ve loha a thup hi ka hriat chhuah a ngai?kei tak pawh min tihlim thei lo. Pasal nei mai tur ka ni a,chuta karah ka pasal tur lahin ka lakah thup a nei tlat bawk si! Ka lungawi thlawt lo. Inneih thulh dawnin ka pa bakah mipui mimir mitmei ven a na tawh dawn lutuk. Ngaihtuah loh ka tum lahin ka vei ngur bawk si. Ka ning.

Zanah Mami'n min lo text a. 

"Ka u-in a rilru a thlak a, rogera kan hruai thei dawn. Ka lawmzia hi" a rawn ti a.

"A va lawmawm ve. Home-a dah ai chuan a tha" ka va ti a. Ka inthiam chiah lo thung. Mami hian ka enkawl duh lo tih a hre ve tho awm sia..ka zah ru riau.

"Nia, a duhawm sia, Bawihtea nen lah an inngeih si..tihi chuan kan kim a ni tawh mai" a rawn ti a. 

Cindy-in min lo call a, "Aw cindy" ka ti sap a.

"Awii,Valpuia leh Malsawma te chetdan kha ka lo hre ve a.ka ten lutuk. An rilru a va chhe tak" a rawn ti nghal bawrh bawrh a. Ka nui ringawt.

"Ding, buaina engmah tawk tawh lo la ka duh, hlim ve hi i phu tawh. In inneih ni chu ka rawn nalh ngawt ang" a ti a.

"Nia, i lo kal loh chuan ka lungawi lo viau ang" ka ti ve a.

"Valpuia ka lo hmangaih kha ka inchhir ngawih ngawih. Huatnain ka khat tawh. A nupui ruk ve pawh a haw leh tawh kha" a ti a . A thinlung tak chuan a pasal chu a la theihnghilh bik lo tih ka hria. Ka khawngaih ve leh chhawng khawp mai. 

Thuam chhawm te kan theih ang angin kan lei ve tan a. Ka pa hi a zopa bawk a, man ei pawh a ei tur dik tak te tih loh kan eitir lo va. Tin,"Chumi khami chu min leisak rawh" va tih ang kha an remti lo bur! "Anmahniin an rawn pek ang ang che kha lawm takin pawm ang che. I chhawm tur chu kan lei ve mai ang" an ti hmiah. Mahse, ka ni leh ka pu (ka nuta) bulah erawh a rukin Dressing table ka ngen a. An incontri dawn a ni. Ka ac -a ka sum khawl ve pawh a hek malh malh hle. Mahse, ka rin loh deuhin ka nuin Nuai hnih a rawn thun ta mai a. "Pasal neia mi ina awm chuan, mamawh leina tur pasal te dil reng te hi a nuam lo,inhlawh lah a tam si lo" a ti a. Mi va hrawn tur ka ni lo hlauh zwk a. Mi ina va moa an chhungte hrawn phei chuan mamawh tak tak pawh pasal chhungte dil chu a nuam em em miah lo vang. Rosangpuia pawh a inbuatsaih ve zel a, chanchin min rawn hrilh thin. A hmaa kan boruak uap churh kha a bo tan mek niin ka hria. Tin,Malsawma te kha a ngaidam a, case siamsak loin an zalen a. Mahse,"Ka damchhungin ka thian inni leh thei tawh lo vang" a ti hmiah mai. A pawi ngawt mai, inthianthatna a hlut tehlul nen. Valpuia hmasial vang vek a ni. Kei hi min duh leh hmangaih vang a nih pawh ka ring lo. A thianpa berin kei min nei tur hi tlawmthlak a tiin a thinrim zawk ni berin ka hria. Ka block ta bawk a, a thawventhlak khawp mai. Ruahmanna dang chu an nei tawh em lo vang chu maw..

"Rami, ka room hi lo tifai lawk mai" ka u a rawn au lang lang a. Rami chuan min rawn melh zawk. Ka lo melh ve chiah bawk si,lai zet hian.."A ninawm siah. U lawma hi" a ti ringawt. Nuihza insum deuh hian, "Ning tak tak maw?" Ka ti a.

"Nang hi..ninawm" a ti hlak a. A nui ve ta ringawt. Ka nuin a ngaihna hre lo zetin min lo melh dun a; "eng nge a?" A ti hlak a.

Rami chuan, "Engmah. A u hi lawm " a'n ti ngawt a!

"Eng nge ka tih?" Ka lo ti si..

" I chhia" tih leh in chunga chhoh a rual nghal a. Ka nuin a mitmengin zawhna min zawt. A thawi tham deuhin ka hrilh ta a. 

"Awiiihaaa! A tak tak nise ka va duh em..Ka va lawm dawn tak em" a ti ve chul mai. Rami leh ka u hi kan beisei angin awm tak tak se lungmuang takin pasal pawh ka nei ang mawle. Ka pa pawh a lawm ve ngawtin ka ring. Mahse , ka u hian u pari laka a lunglen khawhar hnem nan mai mai te hian a lo hmang ang tih ka hlau deuh. Chutianga rilru tha lo erawh a ni loin ka hre tho.

Hun chu a kal chak riauin ka hria. Inneih a hnai telh telh a, ka huphurh tial tial bawk. Valpuia nen kan inneih dawn kha chuan hetiang em em hian ka zám lem lo asin le. Kan thulh leh mai hlauhna chuan min uap run niin ka hria a, ka tawngtai nasa thin khawp mai. Ka pa pawh ka beisei phak bakin a tha a. Kan lawm takzet a ni.

U pari kha a lo rai tak tak em mawni. Sawi a awm ta tlat a. Ka nu lah hian a ngaihven ru deuh tlat bawk si. Ka u tak hi chuan ngaihven angin a lang lo,a ruk chuan a lo buai ve maithei a. Kan inneih hma ni 3-naah U pari te chuan an thenawmpa pu Hrima an rawn tir a.

"Hei, infa kan pai leh ta si a. Dan angin in lo inthen tawh si. Hetiang thil hi mizo danah an zam hmuh tur a awm lo va,sawn han tih dawnin a ni chiah si lo va, Mahse, Pari te lam hian a birth certificate-ah a pa Lawmawma hming dah an duh laiin,amah Lawmawma hian a lo remti chiah lo niin kan lo hria a. Chu lai tak chu sawiho a tul niin a lang" a rawn ti a. Ka pa a rawn thu chhuak ve a. A tawng erawh a thamin a zawi raih tawh thung. 

"A nih chu mawle aw. Ni e, Kan fa, kan tu a nih tak takte chuan engah nge maw kan han pawm loh tehlul ang le? Lawma hi chu a la thinrim rih vang mai mai a niang e. An inhruai leh hruai leh loh erawh a thu nise" a ti ta a. Ka u ka va melh a, chhuat bihin a thu reng a, ka bula thu Rami ka melh zauh. A hmel ngui zetah chuan tawrhna pwh hmu telin ka inhria.

Ka nu chuan," Lawma, inngaihtuah rawh. Fate tihfahrah hi Bawihtea atang pawn a hrehawmzia i hmu tawhin ka ring. Inhruai leh i tihte chuan kan dal lo che. Fa te hial inneih te chuan amah Pari pawn a nunte pawh a sim chho turah ngai ila" a ti dap dap a. Rami mitmei ka lo veng tawh zawk. Ka khawngaih lutuk.

A insum zo lo nge, "Ka zun a chhuak lutuk" tih leh bathrooma tlan luh a rual nghal a. A din paha a mittui tling teuh kha ka hmu hman si, ka lainat hle mai. 

Ka u chu muangchanga rawn dak chhuakin, "Aih, pari hi ka nupui ni turin ka duh tawh lo a ni. Ka fa ngei a lo pai a nih erawh chuan a pa nih te chu ka hreh hran hleinem. Mahse,ka nei thei tawh lo" a ti ta a. Chu chu thutawp a ni. Dik tak chuan U Pari te hian inneih leh an duh vangin palai an rawn tir khawmawi mai mai a ni. Mahse, an beisei ang an hmu ta si lo va . An thinrim leh ngawt ang. Palai chhuah hnuah ka u bawk chuan, "Ka fa a nih hi rin harsa ka ti a ni. Lo piang phawt se a hriat ang chu" a ti a. Kei chu ka ngawi reng. Tukthuan kan ei lai erawh chuan Rami hmel chu a hlim leh ta deuh. An la inpuang ve mai ang chu maw.

Mo kawr la turin kan chhuak a. Kimi a lo tel thei a,a lawmawm. Zami lah Lungleiah a zin a, inneih erawh a rawn nang hman ang chu. Mo kawr chu ka duhdan taka ka thuitir a ni bawk a. Ka inhmeh ve reuh khawp mai. Rosangpuia suit pawh a mawi e. 

Helhhawlh leh zám tak chunga kan nghah Inneihna ni chu a lo her chhuak ve ta luau mai le..ka zing thawh hlima ka ngaihtuahnaa lo lut hmasa ber chu ," Rosangpuia nupui ka ni dawn" tih a ni. Ka pa dam nan leh buaina a awm tawh loh nan ka tawngtai nghal bawk. Phur takin ka tho a. Rosangpuia'n min rawn wish paha, "Ka nupui duhtak..ni hman nuam" a rawn tihte chuan ka lo nui ar ar a. Khawvel hi a mawi riauin ka hria. Rosangpuia remtihna leh ka pa duhdan a nih angin kan Kohhran Biak inah kan inkutsuih dawn a ni. Ka pa pawh suit kan haktir a. A nalh khawp mai. Ka unau te leh ka then leh rualte pawh an vul khawp mai..

Biak in hulhliapah chuan ka pa nen kan ding dun ran a. Amah ngeiin min kaih luh a duh miau si a, chak lo chung chungin zakdawh tiang nen kan lut dawn a ni. Ka pa hlim hmel chuan ka hnuk a tiulh lek lek. Mi dang kan chhungte erawh an lut vek tawh a. Pastorin min koh chuan zawi muangin ka pa nen chuan kan pen phei chhat chhat a. Ka pa a kal chak thei lo bawk a,kan kal chhung kha a rei khawp mai. Ka mitsirin inkhawm ho tam zawkin an mit an hru fap fap chu ka hmu phei zel a. Ka nute thutna ka va thlek zauh a, ka nu chuan mittui tla zawih zawihin min lo thlir a, U Ruati leh U Remi lah an lo inhup bawk. Kei pawh ka mittui a tling pam mai. Ni e, Vawi tam mualphona tawka Zoram mipuiten an chaih luih luih, lar dan zahpuiawm taka lara diriamna tuartu, A pasal hualin a thianthaber laka sawn a thlaksan Dingpuii kha a pa Chuap cancer vanga khumbeta na reng tawh khan Rosangpuia lam panin a kai lut mek miau a ni. Rosangpuia bul kan thlen chuan ka pa chu a hah lutuk a, a thaw hlawi hlawi mai. U Lawma'n a rawn kuah vat a. An thutna lam a panpui ta a. Rosangpuia chuan mitmeng thuk leh hmangaihnaa khat hian min lo melh ngawih ngawih a. Ka tuiral a ni ber e. A hmelthain a mawi lutuk a ni.

Thutiam kan chham laia kan tihtak dunzia chu inkhawmte hrilhfak a tling hial mai. 

Inneihna programme leh a behbawm chu sawi vek chuan a thui dawn lutuk a, rek bung mai teh ang. Cindy pawh nalh takin a rawn lang ve a, thla kan la ho nghe nghe. U pari'n buaina a rawn siam lo va, Valpuia leh Malsawma an reh bawk a. Pathianin min veng ka ti .. Tichuan, tlai dar 3 bawr velah Rosangpuia inah chuan ka lawi lut ta a. A in chu ka in a ni ta. Mami'n a mittui a hru zauh zauh,a nu leh pate a ngai a ni ngei ang. A awm ve reng e. Rogera leh Mami te fapa Bawihpuia te pawh an nalh kher mai. Ka vahpa Bawihtea pawh A nite Rami nen an inkuah chawt a, mawi dun tak an ni.Tin,Atea leh Johny te pawh suit nen an rawn kal dun ve ral ral mai. Ka thawhpui dangte pawh..aa,mi ka lawm loh nen min lawmpuitu te chu ka beisei phak lohin an tam a ni. Ka lawm e. Lalpa.. Ka pa chhungte leh ka nu chhungte duhsakna ka dawng nasa a,thuamchhawm pawh a zahpuiawm lo tawk vel a ni. Ka lawm ve khawp mai.

Ka kal dawnin ka roomah ka nu leh pa an rawn lut a. Ka nu chuan min kuah a,a tap! Ka hrethiam. Kan inngai nufa ve a, a fanu a hrin awmchhun ka ni ve tawh bawk nen . ka pa chuan min zilh malh malh a, Pasal laka awmdan mawi leh thu tha tinreng min hrilh a,a hlu takzet. Ka nu erawh chuan,"Mate, ka ngai dawn che em mai. Lo leng ziah ang che" a ti. A bak sawi turin a tawng tam thei lo. A tap zel. Kei pawh ka tap..U Remi leh Rami lahin mittui min hrukkhum reng a, kal mai kha a harsa ve khawp mai. Ka pa hlim hmel hmu chunga ka kal erawh ka va lawm em..

Inneih zan pawh Rosangpuia roomah kan riak dun dawn. Riah chhuah kual vel kha kan duh lo dun ve ve bawk a. Kimi leh Mami ten kan khum an siam mawlh mawlh a. An titi pah nasa. Kimi'n a hawn dawnah min rawn kuah a. "Ka thian, tuman tibuai tawh lo che u se ka ti..hlim i phu ve tawh. Hlim dun reng ang che u" a tih te chu a va hlu tak ëm..

Inneih zan chu kan hmachhawn ve ta reng mai..

Kan inbual fai phawt a. Khua a la vawt bawk a, tuilum mah nise, a vawt viau. Mahse, a/c kan on ta vat a. Khum zau puiah chuan insi rialin kan mu ta a. Ka biang a chul neuh neuh a, hlimnaa khat mitmenga min melh sar sarin," Ka ta liau liau, ka nupui i ni ta. Kei aia mipa hlim hi an awm leh thei ang em le?!" A ti sar sar a. 

"Ka hmangaih che" ka lo ti sap a.

"I zâm em?" Awmze nei zetin min melh a.

"Umm" ka ti.

"Rosangpuia bulah zâm suh. I hlauhna leh zahna zawng zawng kha ka tibo vek ang..lo hnai teh..ka fawp chak tawh lutuk che" tiin min pawt hnai a..dim leh uar em em siin min rawn fawp ta a...a chet lak zel dan erawh sawi zahthlak khawpa nuam leh famkim ni si a ni a, a sawi ang khan ka zahna leh hlauhna te chu an bo zo a, inpumkhat tura puan hnuaia ka ngenna te chu ngaihtuah let loh ka duh zawk..ni e, Rosangpuia ta chu ka lo ni. A ta liau liau 😍 

( Dar 6-ah ka ziak hman chiah a. Ka chau ve em mai...duhtawk rih ang aw..ka 2nd dose la hi ka tuar dawn mawni ka ti 🥺