Rosangpuia 18

ROSANGPUIA (18)

Ziaktu: Toni Rálte

(Adds hi inclick tha vak lo mi le? 😢 a pung mawh tawp.. 

In chhung kan luh chuan, Kimi chuan thil awmzia a sawi a. Ka u te pahnih chu an thinrim viau mai. Mahse, ka nuin a khap a. Ka ke pawh chu min zutsakin an tuam lum a, tlem chuan a zia ta deuh. Valpuia nunrawnzia ka chiang thar ta khawp mai. Ka lo nei ta lo kha ka lawm hliah hliah mai. Kan tum loh deuha buaina kan tawh vangin kan inah urlawk zan chu kan hmang ta ringawt. Mahse, kan hlim ve tho mai. Ar kan kang ve a, U Lawma pawh a leng bik lo va, U Remi'n naupang a tihmut zawhah min rawn fin ve bawk a. Kan hlim ve dar dar lutuk. Malsawma lah chu a hrehawm a tih ka rin nen a hlim leh nuam ti ber berah a tang a, Kimi lahin a kawm thiam si. Rosangpuia erawh Valpuia vang khan a la dam thei tak tak lo nge, a nuihna phenah chuan thinrimna ka hmu thei. Han tih vak ngaihna ka hre bik si lo. Mahse, mi dang hlimna tithuanawp tur khawpin a mood a tilang lo thung. Zing dar 1 a ri chiah a, Arsa kan chu kan ei ve a, U Remi siam a ni bawk a, a tui leh hle. Chutia tui ti taka kan ei lai chuan, pawn lam atangin U Pari aw ngei mai hian, "Lawmawm, zawnga,. " a rawn ti tuar mai. Kan phawk hru. U lawma a tho vut a, kawngkapui chu a va hawng a. Kawtah chuan U Pari leh a kalpui ho kha an lo ding thap. A ding ngil hleithei lo a ni ber e. 

"Eng nge i rawn tih dawn a? " Ka u chuan a ti a. A aw pawh a nelawm vak loh. 

"Lawma, tenawmpa, mualpho takin min hnawtchhuak a, ka lawm lo. I hria em? " a zurui tawng lah chu a.. 

"Hawnpui teh u.. A hmel pawh hi ka hmu peih lo" Ka u chuan a thiante chu a melh a. 

Pari nau tleirawl khan, "Mipa tenawm tak i ni. Neih loh hlauin i rawn zar huam huam a, tunah i thlauhthla leh hmak a. Ka u rilru hi i tina khawp mai aw" a rawn ti pang pang a. 

Ka u a nui huk, "Aw.. A enga pawh chu nise, haw teh u. Kan laklawh " tiin kawngka a khar a. U pari'n, ring zetin tap chung hian, "Lawma, Lallawmawm, min hmangaih tawh lo maw! " a tih ri chu kan hre pha. Ka u chu ka va melh zawk a. A mitmenga tawrhna lang zawk chu ka va hmu thei. A hmangaihna te kha a la reh vek dawn hauh si lo va. Ka lainat khawp mai. 

Tlaivar em loin kan inthlah liam ta hlawm a. Sangpuia nen pawh chance kan nei lem lo. Innei mai tawh tur kan ni bawk a. Chance neih talh kha a tulna ka hre lem lo. Christmas pawh a rawn thleng ta a. Chhungkaw kima kan la hmang thei chu ka lawm hle. Nakkumah chuan pasal ka nei tawh awm si a. U Ruati te chhungkua pawh an rawn phei a. Ka ke a la nawm loh em vangin flat nen ka inkhawm ta mai. Tuman mak min tih hmel vak lo chuan ka hria. Inkhawm bana ka haw ka inthlak lai chuan, "Ehe! Mate, video hi i hmu tawh em? " U Ruati a rawn tlan lut a. A phawk em vang chuan ka lo hawihai viau. 

Video chu min entir ta a, Nizana Valpuia'n min khawih lai leh Valpuia tawngkam te, Rosangpuia'n a khawih lai te chu a lang vek mai. Mak hi ka'n ti khawp a! 

"Hei hi khawi atangin nge i neih? " ka ti a. 

"A darh vek tawh. Kan pate chhungkaw groupah kan pa nauin a lo post a" a ti a. Ka phone lain Rosangpuia ka call nghal. 

Chauh hmel angreng tak hian a lo la a, "Ti nge i mu law? " ka ti a.,Zingah kha chuan min lo wish ngei a, kan buai ta neuh neuh sia, kan inbe zui lo. 

"Umm mu mai mai.. " a ti a. 

Video chungchang chu ka sawi ta a. Ka lo thawn ve ang che tiin ka dah leh lawk a. Ka va thawn ve a. Kimi'n min lo call ve leh chiah bawk. 

"Ding, i lar leh tawh. A mak eee, tu phiangsenin nge video khan lo cover le" a rawn ti hlak hlak a. 

"Ka hre lo" ka ti ringawt. 

"Fb lamah pawh an post a, comment chu chhiar lo mai rawh. I rilru a na ang. " a ti nghat a. 

"Engtin nge an comment" ka ti hram. 

"Zawng Valpuia khan a sawi chiang vel sia, kha mi kha ni tak tak turah an ngai a. Rosangpuia nen an dem khawp mai che u" a ti a. Ka thaw hawk a. Engahmah ngaih loh hram ka duh. Mahse, ti nge hetiang buaina hi ka hmachhawn fo bik le? Ka vanduai em mai. Hlim ve hi ka phu tawh asin.. 

Kimi nen kan inbiak laiin Rosangpuia'n a lo call sia, Kimi ka hrilh a, a dah a. Call chu ka pick nghal. 

"A darh vek tawh a. I lo hrehawm phah ang e. Awm lo angah ngai mai rawh. Mi rilru thlaksak kher a ngai lo a nia" a rawn ti dam thlup a. 

"Ka ning tawh e.. Hetiang buaina hi" ka ţap lek lek a ni. 

"Ni e, ka khawngaih che. Valpuia vanga thleng a nia.. Mahse, a tibuai leh tawh ngai lo vang che.. Min ring rawh" a ti a, a tawng a sehchilh lek lek. A chauh hmel lutuk chu, "I tha em? I mut a chhuah hmel ee.. Muhil lawk la" ka ti ta daih a. 

"Umm, nia muthilh ka'n tu ang e. Lo tha rawh aw.. " a ti a. Kan dah. 

U Ruati leh U Remi an ang hlak hlak a, Valpuia an ngei thu a ni an sawi ni. Cindyin min lo call ve leh ta. Ka la lo ţep a ni. Ka lung a zing ve bawk sia. 

"Ding, video kha ka lo hmu a, pawi ka ti tawp.. Tu te thehdarh tak ni ang maw? " a rawn ti a. 

"Ka hre bik lo, nia a zia lo khawp mai" ka ti ve mai a. 

"An sawi dan che lah saw ka lo ngei. Engmah an hrechiang tawp si lo va. Ka sawifiah vek dawn mawni ka tia" a tih chuan, "A ngai lo, Cindy, ka lawm.. Ngawi reng tawp phawt ang u.. Mi rilru kan thlaksak vek thei dawn chuang lo" ka ti a. 

"E.. Chuan, Valpuia nuin min lo bia a, nizan a chhuak a la haw lo va, an nu a mangang viau aniang. An be tlang thei bawk si lo va" a rawn ti a. 

"A va pawi lehzel ve aw. Cindy, kan lo nei lo hi a lawmawm ka ti.. Nang pawn i then hi nakinah tifuh i la inti ngawt ang" ka ti hmiah. 

"I sawi dik chiah, tunah phei chuan huatnain ka khat tawh.. Chuan, i u te kha an inthen a ni maw? " a rawn ti teh daih a. 

"Aw.. Inthen ta a nih kha" ka tih chuan, "an inthen tawh chuan ka sawi ve mai mai ang.. Ka lo lena ka hmuh khan kan in hnuai te tlangval Chhana nen an inzui ka hmu fo a, Chhana hian an ina rawn hruai changte a nei a, a farnu nen chiah an awm sia, a farnu lah a hna vangin a zin chhuak fo sia.. Chu chu a nia ka hmuh khan mak ka tih em em ni. An inthen chu a lawmawm lutuk" a ti ta a. Parikebali zet chu aw.. Mahse, ka u ka hrilh lo vang. A nat belh chhah dawn sia. 

Chawhnu lamah eirawng kan bawl luih luih a, in pawh a fel hleithei lo. U Ruati fate leh U Remi fate bakah Bawihtea lo ni bawk. Kan ri nuai nuai mai. Ka inngaihtuah muk lutuk tur pawh a zia deuh zawk. Ka pawh sitting roomah a rawn thu chhuak ve peih hlauh mai. Naupang ho chu in chungah kan awmtir ta daih a. 

Dar 5:30 velah ka inbual a. Video chungchang pawn min kap ta vak lo. Valpuia chet dan erawh thing ka tiin a hnam mawlzia ka ti mai.. Kha laia awm ve te khan engtin tak min sawi zui ang maw?! 

Ka inthlak laiin Sangpuia nau Mami'n min lo call a. Ka la vat. Insût hraih chungin, "Ka an rawn la, police ten" a ti ta mai a. 

"Engvangin? " ka ti tuar. 

"Valpuia kha thi chhawngin Phunchawngah an chhar a, nizana invideo vel vang khan an ringhlel aniang. " a ti a. Ka mang vek. A va mak dawn ve aw. Ka chhuak a, ka chhungte pawh chu ka hrilh ve a. Mak an ti ve hle. Rosangpuia chuan chutiang thil a tih ka ring lo hul hual. Chaw kan ei a, ka ril a tam nen ka ei tam thei lo. Ka nu chuan min lainat hmel kher mai. Chaw ei khamah kan tawngtai a, ka pa chuan thei leh thei lo chungin, "Mate, i vanduai em a ni. Ti nge maw buaina hi i tawh reng mai le.. Pathian pawi te hi i sawi a ni lo maw? " a ti chuar chuar a. A aw hi a tham chhalh tawh. 

"Ka hre lo, pa, hrehawm ka ti em mai.. Mahse, Rosangpuia thiltih anih ka ring hlawl lo" ka ti ta thlawt a. Ni e, A khawih zui duh tawh ka ring lo. Mahse, Valpuia chhungte tan pawh a rinhlelhawm ve bawk tih chu ka hria. U Lawma bawkin min hruaiin Rosangpuia an kalpuina station lam chu kan pan dun ta a. 

"Valpuia chu hmu ila kei pawn ka khawih ang" a ti sup a. 

Ka ngawi reng. 

Station kan thlen chuan Lockup-ah Rosangpuia chu a lo thu ran a, min hmuh rual chuan a rawn tho nghal a. A mitmeng chu a hriam hle. 

"An riahtir dawn che mi! " ka ti a. 

"Ka hre lo, ka ukil a rawn thleng tep tawh ang. Tu te emaw chuan min set up a ni maithei. " a ti a. 

"Nizan inhaw hnu khan i chhuak leh reng reng ami? Chhunah te khan i mut a chhuah hmel sia" ka ti a. Ka ringhlel pawh a ni lo. 

"Chhuak leh e. Mi pakhat ka va hmu a. Mahse, chu chu ka sawi thei lo" a ti ta tlat a. 

"Tu nge? A va pawimawh awm ve" ka ti nghat a. 

"Ka hrilh thei lo che a ni.. Duatpui, mahse, Valpuia ka hmu lo tih hi chu ring rawh. Khawngaihin" a ti thawp sup a. 

"I kalna i sawi theih tlat loh chuan police tan pawh rinhlelh loh theih loh che a ni dawn lo a nih chu" ka ti a. 

"Ka hria, an bulah chuan ka chhuah loh thu ka sawi alawm.. Mahse, ka chhuak kha min hmutu an lo awm ve a. Valpuia hmelhriatte an lo ni hlauh bawk nen.. Mahse, fiahna engmah an nei hleinem" a ti a. A zâm vak loh hmel. Kei ka lo zâm si. 

"Video vangin tikhawp hian kan mualpho tawh a. Nang lehzel hetiang i nih chuan neih pawh kan innei thei dawn mi? " ka ti a. A chhan sawi tur awm si lo hian ka lungawi lo ve ringawt. A va hmuh mihring ka hriat chak vang a ni maithei. 

"Innei dawn tehreng mai. Valpuia ka khawih tih fiahna an nei hleinem. Ka khawih lo reng bawk a" a ti a. 

"Buaina hi ka ning tawh a ni. Valpuia chu tu ten nge maw lo khawih reng reng ang le? " ka ti zawi raih a. 

Ka ipik hluah hluah. 

"Hmelma dang a nei ve pawh a ni maithei a ni. Engpawhnise, va haw ula, ngaihtha takin lo awm r'u, inenkawltha la.. Kha.. I hmai a dáng vek. Hlau suh, engmah a thleng dawn lo" tiin ka kut a rawn vuan a. Rei inbiak theih ni hek lo le.. Kan kalsan ta a. Ka khawngaih hle mai. Mahse, ka rilru kap tlattu a awm. Tu nge zanreia a va hmuh chu ni ta ang? Hmeichhia em ni? Ni ta se.. Ka lung a rawn phu rang nghal. 

Dar 10 velah Sangpuia chuan min lo biain, "Hei ka chhuak aw.. Bail-in ka chhuak rih a, Court lamah chinfel thuai a la ni ang. " a rawn ti a. Ka thaw huai e. 

A tuk ruaithehni pawh chu ka kal peih lo. Ka lar leh tawh sia, tumah ka hmu chak lo. Ka nu leh pate nen in kan nghak. Rosangpuia nen kan inbe miah lo bawk. A buai hlauin ka be duh lo va, ani pawn min be bik lo bawk. Cindy nen kan intext a, "Valpuia chu a na vak lo an ti. A banrek kha a tliak a, kha chu Sangpuia khawihna kha a nia. A bak a taksa dangah hliam na lutuk a nei lo aniang.. Case pawh an lakir maithei" tiin min rawn thlamuan a. Ka zia ve deuh. Kimi leh zami ten min hnem ve reng bawk. Thiantha hi chu an hlu a ni. Ka thlavang pawh an hauh nasa khawp mai. An engmah ka tihsak ngai loh tehlul nen. 

Zanah a rawn phei ta a. Malsawma pawh a rawn tel ve leh. Ka pa a va hmu zuai a, eng tak va sawi ang maw.. Thlanglam bathlarah kan thu chhuak a, sikri kan inchhawp bawk. 

"Inneihna inthulh kha ka lo hlau angreng lutuk a" Malsawma chuan a ti a. 

"Chutimaia thulh chi pawh a ni tawh lo alawm" tiin ka nui a. 

"Nia, mahse, mi thenkhat hi an inla puithu ve thin a, i nu leh pate an fel ka ti khawp mai" a ti a. Rosangpuia chuan, "Valpuia chu a na vak lo an tih kha.. An insual ang a, ani hi a die zui daih aniang" a lo ti ve a. 

"Nih pawh aniang, kan thiana hi zawng a lo ţâwng ta em a ni.. Pawi ngawt mai. Dingi pawn a nei hman lo kha ka lawmpui" a ti a. Sangpuia mitmei a veng deuh tih chu ka hre tho. Rami a rawn thu chhuak ve a, Sangpuia bulah, "Nakkumah i dawrah min thawhtir ve la" a ti a. 

"I hman ve dawn mi? I hman te chuan thawk tuk e" a ti ve mai a. 

"Ka hre lo, ka hman kher lo maithei. Mahse, Au Remi te an lo awm phei chuan Anuin i duh leh i thawk ve dawn nia a tia.. " a ti niah niah a. 

"I bialpa hlui chuan a rawn zar leh che em? " Sangpuia bawk chuan a ti a. 

"Zar ngam tawh lo. Aa.. A sual em mai, bakah u pari te an rapthlak si, min hau leh hrep ang" a ti a. Kan nui dar dar. Nia, Pari khan Mama chu a nau nen a lo tihpui a. Mama bulah Rami a sawichhe char char bawk. Chutiang kual vel chu kan nia. A buaithlak thin teh e.  

"Rami, thingpui lum lawk la.. Kei chu a sen háng aw" U Lawma'n a rawn ti lang lang a. Ner sakin, "Ninawm.. Au Lawma lah hi min tir reng mai" a ti nghat a. A va lum ta tho a. Rosangpuia chuan ka ke na lam chu chawi kangin, a mal chungah a hlang chho a. A hmet niap niap a, Malsawma phone chu a ri a, a tho vut. 

"Ka sava hual lai ani tlat.. Sangpui, ka lo va haw mai ang aw.. Zanin chu ka rawn riak maithei. Ka rawn sawi leh mai ang" tiin a chhuak ta nghal a. 

"Tu nge a bialnu? " ka ti vat a. 

Arsi melh vang vangin, "Ka hre miah lo" a ti ve mai a. 

"Chuan, nizan hmasaa i hmuh chu tu nge a nih min hrilh i tum lo maw? " ka ti ngher ngher a. Ka kut a rawn vuan chat. 

"Ka intiam tawh a, khawiahmah sawi chhuak tawh lo turin.. Ka sawi thei lo a ni" a ti ta tlat! 

"A tha lawm.. I bialnu hlui a ni lehpek ang chu" ka ti nghat a. Ka tau nghal. Ka biang rawn chulin,, "Han tûm leh deuh hlek teh. Naa, kha i la nui deuh.. Umm tikhan, i duhawm reuh tawp" a ti vel a. Ka ngei si, nuihza bawk si chuan a malah ka chum chawrh. "Aiahh.. Kut thawh ziah suh ka tih khaa" a tih mek laiin a phone a rawn ri ve leh.. A ukil pu Hmuna a lo nia. 

"Aw Sir" a ti a. Speaker a on bawk. 

"Valpuia a rawn harh tawh a, i hming a sawi tlat mai" a rawn ti a. Ka phu zawk. 

"A va mak dawn ve aw. " Sangpuia chuan a ti nghut. 

"Chu chu nia, amah ngeiin 'Rosangpuia'n min thah a tum a, mahse, thawm a hriat vangin rang takin a insaseng leh ta a nih kha" a ti che a.. Keini lam tan sawi tur a váng rih riau. Mahse, kawng kan zawng ve zel ang a" beidawn hmel angreng tak hian a tu a. 

"Sir, he thil phenah hian tu emaw a awmin ka hria.. Tu nge a nih hriat chhuah a har loin ka ring" a ti ta sup a. 

Lehlam ami chuan, "Maithei. I nupui neihna thengin a nghawng thei dawnin ka hria" a ti ve a. 

"Ka hrechhuak ngei ang. Hetiang ka chunga ti hi" a ti nghet charh a. An dah ta a. Min melh zauh.. 

"Attempt to murder case min awrhtir maithei a. Chuti chung chuan min la nei duh ang em? " zawi tak leh fiah tak siin a ti ta a. Ka chil ka lem khawlh. Ka pa ka ngaihtuahnaah a lang hmasa ber. A rilru nat turzia leh a fanu pasal tur tualthah tumtua puh anih vanga a zah dan tur te ka ngaihtuah a. Hrehawm ka ti takzet. Ka pa mawlh chuan min kap mai. 

"Ka hre lo.. Ka pa hi. " ka ti zawi sap a. 

"Ani chu ka hrilhfiah tawh alawm. Nichinah khan.. Nangmah zawk hian min dintlangpui ngam dawn em? " a ti ta a. Min melh ran bawk. 

"Ngam" ka ti ro hak a. 

Ka kut a hum nghet sauh. 

"Ka lawm e. Chhui chhuah a nih hma chuan jail-ah pawh ka lut thla ve maithei. Mahse, chumi hma ngeia engkim hriatfiah ka tum ang. Chuvang chuan i tan pawh hun ka nei tam tawh dawn lo va.. Min hrethiam ang che aw" a ti a. Ka bu nghat nghat. Amahah rinna ka lo nghat takzet tih hi ka chiang khawp mai. Tin, Valpuia kha a khawih a nih ka la ring thei chuang lo. Valpuia khan a huat em vangin dawt a sawi anih ka ring. Tin, a sawi angin Valpuia leh tu emaw tangrualinn an set up a ni thei. Zan laia a chhuak kha an hmu ve kher bawk nen. Rilru a thlamuang lo khawp mai. Media lamin an han hria ang a, Rosangpuia chu a lar dawn tih ka chiang, a lar dan lah chu ka duh hauh si lo. Harsatna hi tawk tawh lo ila ka va ti em.. 

Kum tawp hunpui pawh chu nuamin ka hmang ta lo va, kimi te an rawn lang zauh zauh zawk a. Chhuah pawh ka phur lo. Sangpuia pawh a sawi ang khan a chhui ru deuh nge a reh rih a. Phone-ah erawh kan inbe kal reng thung. Ka khawngaih ve lehchhawng. A mal tawh si, a nu leh pa an thih piahlamah unaupa han pur tur anei ve bawk si lo. Tu phiangsen chuan nge maw lo set up ang le.. 

Kum hlui thlah ni, ni 31-ah chuan U Lawma zing tho chu, "Ka lu a hai deuh riau. Vawiin chu Ding, min va nghahsak ve mai dawn mawni le" a ti a. Hreh ru deuh mah ila ka hnial ta lo va. Ina ka tawm lutuk pawh chu ka harh vang lo riau. Tin, ka sawi hmaih, Khatia ka han lar leh tak vakah khan Ka student thenkhatte leh Atea leh a bialpa Johny ten min rawn be ve zauh zauh thin a. Ka lama tang chu chhiar tham lek an ni. Mahse, ka lawm em em tho. Tin, sawi hmaih miah loh tur Láni khan comment na lamah ka thlavang a lo hauh nasa ve bawk, min rawn biak phei chuan a thinrim lutuk chu inbengdai turin ka hrilh hial a ni. Ka chhungten min support a, Rosangpuia an puhna te pawh an hre vek tawh nain, kan lamah an tang ve zel rih a, lehlam zawng tak chuan ka vannei letling e. Ka u Dawr nghahsak tur chuan ka chhuak ta a. A thawmhnaw lak hi a class ve bawk a, a lun ve viau thin. A hlawkna pawh a tel ve tan tawh a ni. Annu khan a tichingpen nasa em mai pawh a.. 

Ka theih ang angin customer te chu ka lo chiau au ve a, kei sumdawng chi vak ka ni lo.miin min dawn hian ka hniam zel.. Mi ka tihrilhhai hreh thin.Sangpuia pawh dawr ka nghah thu ka hrilh a, rawn kal zawk a tum thu a sawi kha. Eitur ka chah a, ka ei mek laiin nula pahnih leh mipa pahnih an rawn lut a, mipa te pahnih kawr tur an rawn en a. A hnu deuha hmeichhe pakhat zawk chuan min rawn melh chiang deuh nge, "Ehe! Nangmah hi tiraw? I pasal hual thianpa ngaizawng daih kha" tiin min kawk ta mai a! Ka nghilh dup mai. A thiante pawh chuan min rawn en ve a. 

A thiannu chuan, "A tirah lo hria ila, rawn kal lek loh tur a nia. Nangni ang ho hian alawm hmeichhia timualpho thin chu.. Diriam mawlh mawlh tlak inni, i pasal hual khawngaihthlakzia kha. I bualpa lah khan thah te a la tum zui" a ti ta bawrh bawrh mai. Chhan ngaihna ka hre thak lo.

Mipa lian zawk chuan, "Hmanah pawh a lar tawh. He nu hi.. Ih, mi pasal a ngaihzawn vangin a lar vak tawh kha.. Aw. Amah a ni chiang lutuk" tiin hmuhsit hmel zet hian an pali chuan min melh a. 

"Thiante u, thil inhriatsual palh a ni" ka tih mek laiin.. 

Hmeichhe pakhat chuan, "Insawifiah kan ngaih tawh chinah chuan thil dik lo a awm ani mai. I tenawm em mai. Hnam dang nei ai pawn ka ten zawk che.. " a ti leh hlawih hlawih a. An tawng duh dan em em chu aw.. Ka rilru a na ve ta khawp mai. 

Mipa la tawng ve lo kha rawn tawng vein, "Mi pasal ta chu a lian bik ami? Mi pasal kawp theih hmeichhia hi chu inhur tlangpui. I nei loose tawh ngawt lo maw? " nuihsawh tih hriat zet hian min ti leh a, mahse, "Naupang, han sawi nawn leh teh" Rosangpuia aw thum chhak leh hlauhawm zet chuan a rawn ti ta mai a. Chu pa kawr awmah chuan a tham nghal bawk. An insan hleih viau. 

"Sawi leh rawh.. " a ti leh sup a. 

"Tu nge i nih a? "A lo ti ve khar khar a. 

"A pasal hual.. Tu nge i nih zawk? " tiin a thing nawk a. A per nawlh mai. Hmeichhe pakhat chuan, "Awiii, mipa kawp a va'n ngah awm em em ve. Tunah mi dang" a lo ti hluai a. Video-ah khan Rosangpuia hmel a lang lo miau a, tin, Valpuia case kal laiah a hming chauh tarlan niin a thlalak an tilang lo bawk. Chuvanga hre lo an ni maithei. Mahse, Aizawla cheng thalai, Rosangpuia hre lo chu mi hawiharh leh vengva tak an nih a rinawm loh. 

"Hmeichhia, i ka kha chip hmak rawh. Ka nupui hual tawngkhum tur hian tu te nge in nih? Indamchhung pawha intluk ngai loh tur hmeichhia a nih hi" Rosangpuia chuan a ti nghut a. 

"Chhuak rawh u" a ti nghal zat. Ngawi rengin an chhuak ta a. Rosangpuia mitmeng leh cheziaah khan nawrluih ngam chi niin an hre bik lo a ni ngei ang. Kei erawh ka zak a, hrehawm ka ti takzet. Ti nge hetiang hi ka tawn reng bik?! 

"Zanin chiah min lo nghak la, Chumi hnuah Zoram hian thudik an hre tawh ang. " a ti hriam hraih a. A thil chhuinaah a hlawhtling emawni ka ti. 

"Valpuia chu a chhuak tawh em? " ka ti a. 

"Ni 2 bak a awm hleinem. Chu pawh a na der. " a ti hmuk a. 

"Case lakkir an tum si lo ami? "

"Tum lo, kan inneihna hi tihbuai ngei an tum alawm.. Tu nge a thurualpui tih pawh zaninah ngei hian ka hria ang" a ti nghet charh a. Ka bialpa chu ka ring tawk kher mai. Ka thawveng sawt bawk. Eitur kan chah belh a, a ei ve a. A cher ve kuamin ka hria. A thawkrimin mut a hmu mang lo a ni ngei ang. 

"Naute a tha zel em? " ka ti ta daih a. 

"Umm, Mami te fa nen an inchhaih nasa thei lutuk. An hmuhnawm" a lo ti nuah nuah a. 

"Mapuii hi a reh ta vang vang mai a ni maw? " ka tih chuan, a mitmeng danglam zawk chu ka hmu hman. 

"A nih hmel" a ti ringawt. 

"Taka! Naktuk tlaiah Chaw i rawn ei a ngai" a ti leh thut a. 

"Chi loh, U Ruati te leh U remi te chhungkua nen kan ei leh dawn a" ka ti a. 

"Ni dawn tak e. Nih chuan, a tuk lehah a ni mai lawm" a ti a. 

"Chuan, Zanin chu i lo phei lo vang maw? " ka ti a. Min rawn melh a. 

"Hrethiam hram rawh aw. Zan tirah chuan rawn lan hram ka tum ang. Ka thil chhui lai hi zaninah a hmawrbawk ka tum si a" a ti a. Ka hrethiam lutuk. 

"Nia, kha kha a pawimawh ber.. Engkim hi fel vat vat se ka duh" ka ti a. 

Rei pawh a awm lo,. Thil a ei zawhah a chhuak leh nghal. A kal liam lai chu ka thlir reng a, keimah vangin buaina a tawk a tawk chu a ni sia. Ka khawngaihin ka inthlahrung ru hle. 

Ka inkhar hma ta mai. Ka inhralh tha ve tho mai. Tuilum sa ver vawrin ka inbual a. Ka harh hawkin ka hria. Ka nuin, "Kan parda hlui ho kha i niin min dil a, han ensak lawk teh" tiin in chungah min tir a. Ka chho nghal. Almira ka hai lai chuan, Ka u room atang chuan, Rami a rawn chhuak a. Min hmuh chuan a phu zawkin ka hria. A hmel a pha dai bawk. 

"I tifai mi? " ka lo ti vat a. 

"A.. Aw.. Tifai chiah lo" a ti bah niaih a. Ka u a rawn chhuak ve chiah bawk. Ka en dun vang vang a, mahse, engmah ka sawi lo. Rami lai lutuk chuan ka nuih a tiza ngang mai. Anni pahnih hi eng nge roomah an tih le? Ka u lah chu a hawi vual vual a, "Rami, ka sawi ang khan aw" a ti a. 

Rami lah chuan a man vak lo nge.. "Eng.. E aw.. Aw le" a ti nawk nawk. Ka nui khur dat. Mahse, ka insum. Hemi te pahnih inkarah hian eng emaw tak a awm chiang mai. U Lawma'n a chhuahpui zinzia te, a tirh zinzia te.. Rami'n Bawihtea a duat zia te leh in chung a tihfai ngunzia te.. Khai! Ka ngaihtuah ang tak tak hian thil awm thei se ka va ti êm… an kal hnuah ka nui ta hawk hawk a. Parda pawm thla chung chuan ka chhuk thla a. 

U Remi rawn lut mek chuan, "Zanin chu zo chhang kang ang u. Ka hertir kha an lei zo mang si lo va.. A uiawm" a rawn ti lut a. 

"Yes" ka lo ti vat. Zo chhang hi ka duh em a ni. 

Zanriah pawh ka ei hnem leh viau. Rami leh ka u chu ka melh ru leh zauh thin a. Min rawn en ve chiah zel lehnghal a. Rami lai lutuk ber chu a ni. Tawng pawh a tawng lo. Ka nu pawn, "Ramte, ti nge zanin hi i va ngawichawi ve? I titau deuh mi? " a ti nghe nghe. Chimawm ka chhuah a, "Tau lo nasa.. Englo te te " ka ti a. 

Ka u nen, "Hey.. Engmah a ni lo" an rawn ti rual ţhawt. Mi dang chuan a ngaihna hre lo zetin an melh a, an zak leh si.. Ka nui chhuak lo thei lo. Mahse, mi dang chuan an la hrethiam chiah lo tih a lang reng mai. A nuam dawn e. 

A sawi ang khan zan tirah Rosangpuia chu a rawn kal a. Helhkam nei hmel a pu a, tawng pawh a tawng tam lo. 

"Min hrilh ve la, eng chen nge i thlen tawh tihte chu" ka ti a. 

"Risk a la ni sia, ka sawi mai thei rih bik lo alawm.. A chian vek hunah chuan nang aia hre hmasa tur an awm lo" a ti sup a. 

"Fimkhur rawh aw" ka ti ringawt. 

Ka kut a vuan chawt reng a. Zawite tein tlaia Rami leh ka u te awmdan chu ka hrilh ve a, a khi ve suk suk mai. "An inhmeh em hi" a ti ve a. 

"Taka! Cindy'n min rawn bia a, i laka a inthiam loh thu a rawn sawi teuh. 'Ka be reng ngam si lo a' a tia. " a ti a. 

"Ka ngaidam vek tawh" ka ti ringawt. 

Ka bianga rawn piain, "Good Girl.. Ngaihdamna tel lo nun hi a ho lutuk asin. Kei pawn ka chunga hetiang titu hi ngaihdam hram chu ka tum ang. " a ti thawp sat a. 

"Chu! I hriatreng tawh chu.. Sawi ve mai la" ka ti a. 

"Zaninah a chiang dawn ka tih kha.. Dawhthei ve la, duatpui, ka rin loh vang che a ni lo." a ti a. Ka zawt nawn tawh nguar ang. 

Dar 9 velah a haw phei ta a. Min fawp duhthawh kher mai. A chhan pawh ka hre lo e a. Kei ni pawh chhang kan kang a. U Lawma hi kum danga leng chhuak ziah si, inah a tawlh hrat hrat reng mai. Zanin pawh a chhuak lo. A pa zawk U Ruata a leng zawk a nia. Chhan a awm ngei ang. Dar 10 velah chhang chu kan ei a. Menrei ve vakna chhan tur ka nei lo bawk a. Bakah ka chhang ei hnem lutuk khan ka kua a tipuar nge, ka pum a nuam lo. Ka inthiar a, dar 11 velah ka mu daih. U Lawma leh Rami erawh kawn chei kan en dawn tiin an chhuak, Bawihtea ka mutpui.. Hmm.. A tha vek e. 

Ka mutui viau mai. Bawihtea'n min rawn khan harh leh zauh thin zawk a. Ka phone nghawr dat dat chuan min kai harh a. Meng mang loin ka la a, Sangpui a ni. 

Dar 3 a pel tawh. 

"Duatpui, engkim a tha vek e. Ka hmangaih che. " a rawn ti sup a.. 

(Ka kut hi a aikhirh mai dawn..