Rosangpuia 17

ROSANGPUIA (17)

Ziaktu: Toni Râlte

Ka pa dinhmun hniam zel chuan min káp ţûn ren a, pasal nei tur e ti lo chuan ka hlim tluantling hleithei lo. Ka nu bulah phei chuan, "Tawng thu chhe loah ka pa hi kan inneih hmain kal ta se, pasal hi neih pawh ka hreh vek tawh ang" ka ti hial nghe nghe. 

Ani chuan, dam thlapin, "I pa duhthusam hnuhnungber a ni tawh a. I nei tho ang chu le.. Van atangin a lo thlir dawn che alawm" a ti sap a. A fate bulah hi chuan ka nu hi a chhel viau zel a. Mahse, ka pa nen an awmduna ka pa hmel a hmuh hian a buai thin. Christmas thlen hma karah chuan, Sangpuia nen kan bazar ve a. Naupangchhia kan ni tawh lem lo va, lei tur em em pawh ka hre lo. Mo kawr lah kha thuitir a ti tlat si a, u Tmi, designer lar ber pawl kan thuitir ta kha a nia. Inneih hunah an peih hman êm ang chu maw. Kan bazar dun chu mi hian min en duh riauin ka hria. Nuam ka ti vak lo. Pheikhawk dawrah kan lut a. Ka han bun chhin a, ka ke tliak lam kha an thuina lai vel kha a ser ang deuh hian a awm a, a kawi hlek bawk. Zep loh chuan a mawi vak lo ve bawk a. An dawr nghaktunu, make up inbel chhah zet chuan ka bun lai chu melhin, "I ke nen khan a inrem vak loin ka hria. Kan ep dawrah sawn an sale nasa asin. I inhmeh tur chu" a ti a. Hetihlai hian Rosangpuia chu thenawm dawrah pawimawhah a lut lawk a, a rawn lang ve tep tawh a. 

Ka ngawi reng a. Nalh ka tihzawng chu ka en kual lui zel bawk. Ka ngei ve deuh reng reng a, ka lei dawn lo a nih pawhin bun chhin vek chu ka tum hmiah. Min viltunu lung chu a awi zan tawh lo tih ka hria. Chimawm ka chhuah ve tlat mai si. Pakhat a heel sin leh sang ve angreng tak, a var, a kaihna sintê, sexy ru zet chu inneihnia bun atan ka awt ru ta riau pek a. Ka lek kan lai chuan, "7600 man a nia. I afford chiah loin ka hria. He lam hi en la, heng ho 2500-3500 man bawr vel a nia" tiin a kawk a. Ka melh duh eih bik si lo. Ka thu a, ka bun chhin ta a, ka tawk chiah. Sawi tawh angin ka ke bul lam kha an zaina a ni si a, a lang tel lo thei lo, tin, vun ngo tak ka ni lo ka tih tawh kha. Mahse, ka kethiah a mawi a, ka inhmeh ve tho chuan ka hria. 

"Ka pi, i lei theih loh tur chu bun chhin tawh lo teh. Customer kan ngah si a, ka vil reng hman lo che nia" a tih mek laiin Sangpuia a rawn kal ta a. Ka thaw huai mai. 

"Wow! A va nalh em.. I inhmeh lutuk. Inneih nia bun atan i ti em ni! " a rawn ti nghal hmiah. Thil hi a man chak thei. Ka bu nghat a. Nula pawh a la ding ve reng. Nula thusawi kha a hre pha nge, "Hetiang chiah a size pawh inang pakhat dang rawn pack tel rawh. Duatpui, a dang saw i en tawh hlawm em? " a ti zui zat a. 

Nula makti hmel chu ka melh kar a, "An dawr nghaktu hian lei a phal chiah lo niin ka hria a" ka ti sap a. 

A mitmeng a danglam chak kher mai. Sangpuia chuan a melh kur a, "Ka pi, ka sawi kha i hre lo em ni? Khawngaihin pheikhawk hi pahnih lo pack rawh. A dang hi kan lo en ang" a ti fiah kawk a. Nuam hi ka'n ti khawp a! Chu nu zak leh inthiam lo chu hmuh a nuam miau alawm. A pack chhungin a dang kan en a, "Pahnih hnih ngatan nge?" ka ti a. 

"Aw. Kimi tan. Thianah i hmang dawn ni lawm ni? " a ti ta a. A va ngaihtuah kim reuh tak. Kimi pawh a lawm ngawt ang. A dang pahnih ka lak belh a, a vaia belhkhawm chu tam far far tak a ni. Mahse, Pathian zarah hlawh ka nei ve a, ka nuin ka ac-ah min thunsak nual bawk. Ka phâng lutuk lem lo. Nula kha dawhkan bulah a lo ding a, ka Card lek vâin "Kha le" ka ti hmak a. Rosangpuia'n min rawn chhuh vat. 

"Ni lo e. " a ti sup a. A card zawk a pe. Chu erawh ka beisei miah lo. "A ngai lo" ka ti. Kan inhnial titih. An manager chuan hmuhnawm tih hmel zetin min lo thlir a, a tawpah phei chuan, "Inva hmuhnawm em em" a ti ta hial a. A lian zawk a, a upa zawk a, a chak zawk bawk si, Rosangpuia chuan a card a pe ta nge nge a. Kan chhuah hmain, Nula hmaichhhahi lam kha va hawiin, "Thiannu, Thliar nei chunga i sumdawn chuan i hlawhtling ngai lo vang. Hre reng ang che " ka ti ve ta sak a. Khak kha ka duh ve tlat a ni. Manager chuan, "Inpawi a lo sawi anih chuan ngaihdam ka dil e. Min dawr hnem si, ka lawm em mai. Kha couple tshirt hi ka lo present ang che u" a ti sawk sawk a. Lawm takin kan dawng a, kan chhuak ta a. Dawr nghak tur pawh hian a dik a dik chuan lehkhathiam leh lehkhathiam lo hi chu an zia chu a dang deuh hlek chu a ni. Kei mi inthlahrung mi ka ni thin a. Dawra ka kala ka hak chhina ka bun chhin tawh chu leisak loh hi nuam ka ti thin lo va, vawiin erawh a ngeiawm em a, ka chimawm ve lawk a nih kha. Vai ho hi he lamah chuan an fakawm. Kan tibuaiin kan phar buaitir fe chung pawn dawr lo mah ila, "I lo kal leh hunah chuan min lo dawr tawh rawh aw" hlim hmel takin an la ti hram zel a. Dawr hi an chakawm hliah hliah zel. Mizo thenkhat hi chu tûm burin an rawn dah a, han leisak lo ila, "Lei loh tur te chu.. Chuti khati" tih ching an awm. A zia lo em mai, a hlawk pawh an hlawk ngût lo vang. 

Thlasik lai mah nise, kan tei hah ve bawk nen, a lum ta riau a. Ice cream kan lei a, kal chungin kan ei dun a. Mi an tam tawh a, kan innek suau suau a ni ber mai. Israel Point kan pel fel chiah tihin lungte ka rap hrual pek a, ka hmaa rawn kal mek, mipa tshirt hma lamah tak chuan ka ice cream chu ka va tat pek a! Hnar a va lian duh tak em. Amah chu palian ve tak, hmel pawh chhe vak lo a ni a. 

"Awiii, ka tihpalh takzet.. Min ngaidam rawh. Ka inchhuih palh a" ka ti sawk sawk a. Ka romol phawrhin ka hru sawk sawk, a tshirt kha a dum a ni a, ka hruk fai hnu chuan a lang vak lo. 

"A pawi lo a pawi lo, accident a ni tih ka hria alawm" a lo ti ve thlup a. 

A bialnu niawm tak pawh chuan, "Inthiam lo duh suh. I tihluih a nih loh kha" a lo ti ve mawlh mawlh a. An va fel dun e aw. Rosangpuia'n, "Ka bialnu hi chu chetsual a ching lutuk a, lo hrethiam hram r'u" a rawn ti ve leh kher. An nui ve hawk hawk a. Hmeichia nen kan han inen chiang chu kan nui tawp chawt. 

"Dingpui" a tih rualin, "Láni" ka ti nghek. Awiii! Láni, hmana kan thiannu, mipa a kawp hleihtheih loh vanga hmeichhia kawp ta, Delhi-a chhuka call center-a thawk ta kha a lo ni reng mai. Kan inpawm chuk chuk a. Mipa pahnihte erawh an lo ding tlawn ve reng ringawt. Sawi tur kan ngah mai si. 

Rosangpuia chuan, "Aw le.. Aw le, sawi tur inngah si a, thianpa hian rem a tih chuan ril a tam tawh tho a, khi lai Restaurant-ah khian chawl mai ang u hmiang" a ti ta a. Lani nen inkaiin kan kal nghal. Lani kalpui mipain, "Hmeichhe ho tak hi chu aw" a tih sup leh, Sangpuia'n, "Dik chiah" a lo tih ve chu kan hre pha. 

Eitur kan chah chhung zanwg kan tawng dun char char. Mipa pahnih an ngawi kur thung. Lani thianpa chu Ropuia a ni. Lani chuan, "Thla hmasa khan ka rawn haw chiah alawm. Delhi-ah kum 3 dawn ka awm a nih chu. In number ka nei tawh bawk si lo va, mahse, Fb vela i lar chiam kha ka lo hmu ve a. Valpuia nen in lo inthen tih pawh ka hre ve chiah. Pawi ka lo ti lo nasa.. Chuan, i lawm ve ngawt ang. Ka les tawh lo" a ti ham ham a. Ropuia khi suk chu ka melh a, "Aw.. Ani hian min chhanchhuak ka ti mai. Inneihte pawh kan tum ve hnai tawh alawm. Chuan, in inneih ni chu ka rawn vul ngawt ang" a ti leh mawlh mawlh a. Boruak chu a va nuam tak. 

"Innei ve vat ru. Chuan, lo leng ru aw. " tiin ka pa chanchinte ka hrilh ve a. Pawi a ti ve hle. Eitur a rawn thleng a, ka tawng laklawh si, Rosangpuia chuan souce leh hmarcha min pawlhsakin a lo mix fel thlap a. Lani'n a hmuh chuan, "Awii i bialpa smart zia saw" a rawn ti ru sap a. Ka nui hawk. Ni e, ka bialpa hi chu tha deuh mai asin a nih. Kan ei ve thei hram. Kan tawng pah tho. 

"Sangpui, enteh, Delhi-ah ka chhuk tawh dawn si lo. Khawngaihin hna min pe ve rawh. Ropuia pawh hi pe ve la.. Thiante tan chuan.. " Lani mize ngai bawk. Tupawh hi a nelin a ngaina em em vek zel a, huat theih pawh a ni ngai lo. Ropuia chuan a mitmei naa, "A ho! Innei ila eizawnna kan neih mumal loh hi.. Khatia inlak pa vak a ngai lo" a ti leh hmawk hmawk. Kan nui tawp. 

Sangpuia chuan, "Hotel saw ka run tep a. Inthawh duhte chuan inthawk anga a ni mai lawm.. " a ti ve mai a. 

"Awiii, a lawmawm dawn e. Ropuia hi Manager tir la.. Kei chu Receptionist ang pawn a pawi lo" a ti leh hmiah hmiah a. Sangpuia pawh a nui ve suk. Kan ei zawhah number inpe tawnin kan inthen ta hram a. Ka kutah a rawn chelh a, "Chesual tawh suh" a ti sup a.Ka bu nghat. Ka u te dawr tlawh ve hrim hrim ka duh vangin kan lut kawi a.U Lawma chiah a lo awm a. 

"Khaw nge, u pari " ka ti a. 

"A thiante nen an bazar ve a nih kha" a ti mai a. Dawra thawk a nei si lo, customer neuh neuh a nei ve si, a buai hle mai a ka'n pui ve zawk zawk a, Sangpuia erawh phone biain thlang lamah a va awm daih. 

"Tun hunpui bawrah chuan hnathawk inlak a ngai a nih hi" ka ti a. 

"Nia, Pari kha chuan, Rami hian min pui mai se a tia"a ti a. 

"In nghaktu an awm nang. Ti ila, kei pawh class kan kal tawh dawn lo va, ka thawh theih loh pawn in ka nghak thei tho. Kan sawi tha dawn nia" ka ti a. Ka u chu a zei lo ve bawk si, ka khawngaih deuh tlat. Han inhauh chang leh kut thawh chang awm mah se; unau kan ni miau a, a inbiak chhiat rei theih tak tak loh. U Pari pawh a rawn lang ve ta hram a. Eng em em nge maw a lei ni, a bawr viau mai. Keini pawh rei awm ta lo chuan, kan chhuak ve ta a. Dar 3 velah min thlah haw a. Ka chau nghulh mai. 

Zanriah kan ei kham atanga rei vak loah Bawihtea chu a luak ta vak mai a. Ka nu a mangang leh hle. U Lawma nen Casualty-ah kan han chhohpui a. A chau reuh sia, ka khawngaih tawp. Ei sual a nei anih ka ring. Mushroom (pa) leh chakai kan hmeh kawp a, a duh ve si a, kha kha a zo lo a ni maithei. Luak dannain an chiu a. Damdawi ei tur min chawh bawk a, kan haw leh nghal. In kan thlen hma deuhin U Lawma chu U Pari'n a rawn call a. Speaker a on a. 

A rawn vin hlawk hlawk mai. "In va rei em em ve, ka nauin min lo call reng tawh a nia" a rawn ti a. 

Ka u chuan, "Engti turin maw? " a ti nghut a. 

"Aw.. Mawla, i va hre thei lo tak, zaninah advance Christmas hmang ho ang u kan tih kha.. A thiante ho nen" a rawn tih chuan a ner sawk. 

"Nangmahin va kal rawh. Ka peih ve lo. Chuan hei bawihtea an admit a, ka rawn haw thei lo" a ti ta hmiah a. Mak ka lo ti deuh. An admit si lo va. 

"Hmela, i va tenawm tak. Kan sawi sa vek tawh. Ani kha a ni emaw Rami pawn an awmpui thei. " a rawn ti leh bawrh bawh a. Nuam lo ka ti takzet. 

"Ka fapa a dam loh laiin hlimhlawp ka bawl thei lo. I zak ve lo mi? I pasal fapa a nih hi" ka u chuan a ti leh a. Motor pawh a tiding daih. Bawihtea chu a chauh reuh em vangin a muhil nge ka áwmah a bei tlan a. 

"Ani vang mai mai khan ka programme ka thulh awzawng lo vang. Keimahin ka kal mai ang. " a rawn ti ta a. 

"Aw le, riak la, rawn haw leh tawh suh ang che" ka u chu a chang kher mai. A off hmiah bawk. A hmel chu a rum em em a, hmalam a melh ngur bawk. 

"Ti nge khatia i tih? Bawihtea an admit loh hi, va kalpui rawh" ka ti a. 

"Programme an siam tih pawh tunah alawm ka hriat chiah. Min hrilh lai ka hre lo. Chuan, ka fapa hetia a awm laiin chhete pawn a der tal pawn a ngaihven eih lo hi ka lawm hlawl lo" a ti ta a. Ka dem hran lo. 

"A zia i hriat kha.. Enliam mai mai rawh" ka tih chuan, "Ka lungawi lohna chu chhunah khan a intan daih tawh. Nia, Pari hian min hneh viau angah inngai thin a. A dikna chen pawh a awm. Mahse, keimaha ka awm hian thil tam tak ka ngaihtuah ve thin. Mo leh nupui tha tak a ni lo tih hi nangni ai pawn ka hre chiang zawk ang. Ka pa thichhawnga a leh reng lai lahin chhete mahin a ngaihsak lo va, a thi leh a dam hi a ngaipawimawh lo tawp. Pawisa chiah a duh, a chhungte vura nawmchen chiah a duh. Chuvang chuan inhlauhthawn ang kha a thleng tawh dawn lo. He hmeichhia hian min kai phar mai mai tawh dawn lo. Zaninah pawh min rawn bia a, Bawihtea chanchin pakhatmah min rawn zawt lo a nih kha.. A duh leh chhuak se a pawi ka ti tawh lo. Dawr lah nise ka tan phurrit a ni tawh" a ti ta mawlh mawlh a. A ipik ve hle tawh a niang. Mi tawng tam lo tak kha a ang ve ta buan buan chu a ni si a. 

U pari chuan a rawn call leh a, a reject hmak. In kan thlen chuan U Pari chu a lo awm tawh lo. Ka nu sawi danin Lalmama a va inthlahtir a ti. Bawihtea chu kan muttir nghal a. A zia ve mai ang chu maw. Ka u chu ka pa roomah a lut a, a bulah a va thu ta reng a. Ka pa pawh a lo harh ve deuh a, eng emaw an sawi dun anih ka ring. Ka nu chuan mak a ti deuh a, engkim ka hrilh ta vek a. 

"Hman deuha i niin an thenawmte mo sualzia a sawi khan,"Chutiang mi chu an awm thei dawn em ni" ka lo ti a. Mahse, a tak ngeia han tawn takah chuan, mo sual hi zawng an lo awm ngei a nih hi.. I u berin a ngama a zuam a nih phawt chuan, inthen se ka duh tawh mai.. Fa an la nei lo bawk a" a ti ve ta hmiah a. 

Mo pahnih kan kawl tawh a, kan treat dan a inang reng chungin an danglam ve ve si. Keini han siamthat phak pawh niin ka hre tawh lo. U pari ai chuan U Remi hian ka nu hauh a tuar zing zawk. Mahse, U remi lo dawnsawn dan khan a zir tlat a. U remi rawn mo tirh khan mi tawngmawh ve tak, awm mual mual chi a ni a. Tin, Hmarcha kan ngam loh em em laiin hmarcha a ngam si, a eisiam zawng zawng tihtheih deuhthawah hmarcha a telh thin. Ka nuin, "Sim then ve deuh rawh. Kan ei hleithei dawn lo" a tih te khan, "Bai ah chuan ka telh zel dawn tho" a ti mai a. Ka nu te an lawm daih zawk. A chhungkua ang tak takin min en a. A tih peih loh deuh tumin, "Ka peih lo. Vawiin chu" a ti mai a. Ka pa lah hi in tihfai lai taka eng eng emaw lak luha han tihhnawk leh te hi a chinga, chungte chu, "I a siah. Ka tihfai ve reng hi" a ti hlar zel a. Ka pa pawh nui vur vur chungin a insaseng ve mai zel. Khatiang kha chhungkua chu a ni. U pari chu a rawn mo tirh laite ni 3 vel kha chu a fel viau a, ka nute pawh a ko mawlh mawlh reng a. Ka nute pawh an lawm hle a nih kha. Mahse, a rei a, a zia a chhuah telh telh a. Han khak vea han hauh ve deuhin a hua a, an pa hnenah a zualko nghal zel a. Tirh pawh ngamawm loh, ama mawhphurhnaa ngaih an room tihfai chena kan tihpui a ngai ta fo zawk a. Bakah Sum changchangte, Rosangpuia leh keima inkarah te, Bawihtea a treat danah te hian fakna tur a váng ve em a. Chuti chung chung pawn kan tha en a, engmah ti loin mawn hmetin thu mah se, enliam a tha kan ti a. Inhauh buai ai chuan tiin. Mahse, kan thatvena te min zuamin a huangtau ta tlat a, a tawpah tihian chhungkua pawh kan hlim hleithei lo chu a nih tak ber hi. In dan a duh bawk si lo. Hmeichhe pakhat chu a tling ve khawp mai. Nulat laia mi fak hlawh leh hriat nazawng hi chenpui tak tak chuan an lo tha reng bik lo a nih hi maw.. Kan kawl thiam ve lo pawh a ni mahna le.. 

Ka u a rawn chhuak a, "Nu, ka pain a ko che" a ti a. An roomah a chho zui daih. Ka nu pawh a lut vat a. Kei leh Rami'n TV kan en thung. Mama nen an inthen hlen ta niin ka hria.

Lehkha zir a duh tawh lo va, thil dang zir se kan tih laiin U Pari hetiang a ni ta si a, innghaktu a ni lo thei ta lo va. "Ram, in nghah reng hi i ning em" ka ti ta tawp a. 

"Teuh lo. Nuam ka ti, ka hah lo si" a ti mai a. 

"Nakkum lamah chuan eng emaw i la zir ve dawn nia" ka ti a. 

"Aa.. Bawihtea school bang a hrilhhai ang" a ti daih. Ka rin aiin Bawihtea hi a hmangaih a. Ka lawm takzet. 

"Pasal i neihsan hunah a ngai awm che" ka tih chuan, "Ka nei peih lo. Anu ka khawngaih.. Apa a dam reng loh phei chuan" a ti a. Ka hnuk a ulh deuh. Kan chhungkaw dam that lai ka ngai mang e aw.. 

U Lawma chhuah lai kan hre miah lo. Mahse, dar 1 bawr velah Lalmama'n min lo call hlawl mai a. Mangan hmel zet hian, "U Dingpui, lo kal vat teh. U Lawma hian U Pari hi a sawisa hlum mai dawn" a rawn ti ta mai. Ka thu chhuak chiang teh e. Ka lung a phu dup dup bawk. 

Ka nu ka va kai tho a, Rami pawh a rawn tho ve. U Ruata ka call bawk a. "Ka pa leh Bawihtea te lo awmpui mai ru, U Ruata nen kan va phei ang e" ka ti a. U Ruata nen kan inphur phei nghal. Lalmama ka call a, an awmna lai tak a rawn sawi a. WR lamah kan tlan nghal. A vawt si a, ka khur hleuh hleuh mai. Kan tlan chak bawk aniang.. Kan zu thlen thlak chuan, Lalmama, Pari nau nula bakah tlangval pahnih leh ka la hmuh ngai loh tleirawl pakhat an lo awm tel ve a. U Lawma chu an lo chelh thap. U pari chu hnar thi nuaiin a lo thu sawp niaih a, a sam pawh a hnawk viau. A nau chuan a lo bawihsawm a. 

"Eng nge awmzia? U lawm" ka ti a. Thinur tih hriat lutuk khur dawt dawt chungin, "Saw hmeichhe tenawm saw zawt r'u" a ti a. Kan bangbo si. 

U pari chuan ţap pur chungin, "Lawmawm, zawnga, thisen min chhuah a maw? I hre dawn e. I hre khawp ang. Ka then vang vang dawn che" a ti tâwn tâwn a. 

Ka u chuan amah chelhtu te kut dah thlak pahin, "Min then dawn lo pawh ni ila, ka namchhuak tho ang che. A tawp chiang ta khawp mai. Pari, nang anga hmeichia lemchan thiam leh tenawm hi ka damchhungin ka la tawng ngai lo ve" a ti ta piap piap a. Engmah an thu bulbal kan hre ve bawk si lo. A va manganthlak tak ëm.. 

"Haw ang aw.. Haw phawt ang u. Khaw nge i car chabi" ka ti a. U Ruata'n a lo chelh bawk. 

A carah kan nam lut a, front seatah chuan ka chuang lut ve nghal. 

"I khalh haw thei ang em? " ka ti a. 

Hmalam enin, "Thei ang" a ti a. A la khur nasa viau. Hetiang taka ka u thinrim hi ka la hmu ngai lo. A rui miah lo niin ka hre bawk. 

Kan tlan chhuah hma chuan u pari chu rawn tlan pheiin, "Lawmawm, Police hmel hmuh inring ang che. I kut hi a thlawnin ka tuar dawn reng reng lo a nia. I hria em? Naktukah sum kan rawn chhuah ang. " tiin U Lawma hmai chu a rawn ham pah a. A kut phih thlak dawrh pahin, Pari, theihnghilh ngai suh aw.. Ka nupui hi i damchhungin i ni leh tawh dawn lo tih hi.. " a ti nghut a. A tlan chhuak nghal. Ka thu hriat chuan min deng ve dawt mai. U pari a uire maw?! Engtin?! Ka u chuan a zu man em ni ang? Amah lah chu zawh chi a ni rih si lo. U ruata chuan kan hnungah min rawn zui ve zel a. Kar loah in pwh kan thleng zui ve mai. 

U Remi pawh kan inah chuan a lo awm a. Kan va luh chuan an lo thu thap. 

Ka nu chuan, "Lawma, eng nge a awmzia? " a lo ti vat a. Thutthlengah chuan chauh hmel zetin a thu hnawk a. A hmai hupin a kun ngar ngar. Kan lo ngaichang thap thung. 

Zawi muanga rawn dak chhuakin, "Nu, ka tlawm ta a ni. Ka tlawm chiang ber awm e. Engtin nge khatih chhung zawng khan ka mit a lo del theih le? Nangni thleng pawn ka tina tel che u a. Ka va zak tak em.. Eng ang fapa leh nuta chauh nge maw ka lo nih le? " tiin a thaw hawk a. A hmelah chuan tawrhna leh inthiam lohna, zahna te chu an inlar chhawk zut zut mai. 

Ka nu chuan a hnunga va chulin, "Ekhai! Khati zawngin ngai mah ta che. Kan fapa upa ber i ni a, keini chuan kan hmangaih em em che alawm. Engthil chiah nge i tawn han sawi teh" a ti dam diai a. Ka la hmuh ngai reng reng loh U Lawma, mipa inti ve tak biangah chuan mittui a luang a. Ka nu awmah chuan lungchhe zetin a bei a, a khur ngat ngat mai. Rami nen kan mittui kan lo hru ve hmanhmawh. Zanina a thil tawn hi a naran lo tih chu a lang reng mai. 

U Lawma chu a inhruhul a. Pachang taka a hmui pet fan fanin, "Ni e, Pari avanga kan in chhung hlim tawh lohzia te, kan buai ruk thinzia te hi ka hai reng reng lo. Kan inneih hma khan a chhungte khan kan inneih loh hlau takin min nawr huam huam reng a, Min duh ve tak tak nia ka hriat vang leh Bawihtea'n nu a mamawh ve tawh em vang pawn ka nei ta kha a nia. Ka beisei pawh a san loh tehlul nen, ka rin ang a ni ta hlek lo va. Kan lo innei tawh si a, pathlawi ka ni tawh a. Han then leh kha ka tan pawh a zahthlak ve si a, inhriat si loha in chunga ka chet dan zawng zawngte hi aw.. A thatchhe si a, kan room bakah in chung thutkhawmna te khi keiman ka tihfel a tam zawk. Eirawng nise bawl a tum ngai si lo va, ka zak ru ve thin lutuk. A nawr pawh ka nawr nasa thin. Mahse, a tih duh miau loh chuan tihngaihna a awm si lo va. Enliam chin ka nei ve ta ringawt kha a nia. Tin, min tihlawm a thiam a, ka nupui a lo ni ve bwk nen. Dingpuii chungchangte hi mi sawi ka hria a, tiin pehhel deuh deuh leh leila deuh siin min hrilh reng zel a. Rosangpuia'n a ban te khan, "Mi zawng zawng hmaah kut min thlak a, min tizak a, ka na bawk" a tih avangin Sangpuia kha ka ngei a. Ka haw bawk. Mahse, Video chungchangte insawi khan ka zep lo, ka hlau a, ka zak. Kha video hmuh kha ka chak lo. Ka thangtlawm dawn lutuka ka inhriat vangin. Zu pawh ka ngheina a rei ve tawh ania. An in lama kan len hian a nau thian mipa te rawn leng hian an rawn keng thin a,Pari chuan ka in loh a hlau zawk emaw tih turin in turin min nawr zawk thin. Amah pawn a in a. A in ve vang khan ka in loh a hlau ni berin ka hria. Ka chhungte rel ni si loin thiam taka nangmahni huatna tur thil hi a sawi thiam em em a. In dan ka sawi rik te hian, nangmahni hmangaih ber angin a awm leh lawi a! In dan a duh lo. "In leh lo hi i pa hian i hmingin a dah em? Zawt teh" min tih lai te khan ka ngaihtuahna a kal thui khawp mai. A tum leh a rilru hi ka chiang em em. Mahse, sawi tawh ang khan siamthat theih a nih takin leh pathlawi leh ka hreh em vang chauhin ka dawh hram hram a ni. Dawr kan han hawng ve a, Hlep zawng zawng a nu te a pe a. Khata tang phei kha chuan ka ngaihdan a ni lo chho tak tak ta a. Mahse, ka hau duh miah lo. Dawr nghak tura kan chhuah hian keiman ka nghak tlangpui. Ani chu a nau te emaw a thiante nen an chhuak daih zel. Ka sawi duh lo a nih kha. Nupui ka nei fuh lo tih ka hria a. Ka lo hmangaih ve tawh bawk si a, nangmahni thlenga hlim lohna thlentu nih ai chuan tia in danpui te ka han rilruk a. A duh bau si lo. 

Tichuan, Zaninah khan Lalmama hi ka va bia a. Khawnge an awm ka zawt a, Pari awmna ka zawt bawk. Mama chuan, "U lawm, ka sawi phak chu a awm lo, mahse, u anga ka lo en ve thin che avangin ka zep thei tawh lo, U Pari awmdan hi a dik lo. Lo hruai haw la ka duh khawp mai. A mualpho mai ang" a rawn ti ta a. Ka chhuak ta a. Ka zuk thlen chuan hmun hran hranah a inkawp khan an lo thu a. Enthlak ka duh ta tlat a, Pari te thutna chhakah chuan thawm dim tak in ka thu ve ta a.. 

Pari chuan, "Fa neih hi chu ka tum lo bur. Nakinah a nu leh pate boral hnuah tisawn in leh lo ka chan theih loh pawn a sum pai ang zawnga chhuahpui teuh ka tum ang. Chuvang ania fa neih ka duh loh. Then leh mai tur laka fa neih ka duh lo.. " a lo ti a. Ka thinlung natzia chu aw. Kha lai hmuna ka puakkeh lo kha a mak zawk. Chu pa nen chuan an infawp a, kha pa kha ka hmuh fo, Pari nau thiante zing ami Jamesa a ni nghe nghe. Kan inbe tha viau asin mawle. Pari chu a rui viau bawk. 

"Kan pa chuan riak rawh min tia.. Zingah ka haw ang a, ka'n ti leh hiam hiam anga, a nem leh suai suai mai ang" a ti hawr hawr a. Ka insum zo ta ngang lo va, ka zuk tham chho a, ka hnek a, ka beng bawk. Inthunun thei kha ka ni tlat lo a ni. Inchhirna ka nei miah lo bawk… naktukah bungrua an rawn la maithei a. Lo dang hlek suh ang che u.. A nih nih kan ni tawh mai ang chu.. " a ti ta a. Kan thaw sang sang mai. 

Ka nu chuan, "Mahse, i lungte a lengin i va zai leh mai lo vang maw! " a ti sap a. A lu a thing nur nur a, "Mipain ka tiam tawh a. Ka kir tawh dawn lo bur.. Duh leh nupui nei tawh loin Bawihtea hi ka chawi lian mai ang" a ti nghet charh a. A tumruh hmel khawp mai. 

A tukah dar 8 velah U Pari te chhung chu an rawn intrip phei ta a. Kan lo dang miah lo bawk. Bungrua chu an la sawk sawk a. An inneihnaa U Lawma thianten an present zawng zawngte pawh a khawm vek mai. Mahse, pawi kan ti lo. U pari chu a áng hlawk hlawk reng a, tuman kan chhang lo. A biang dinglam chu a duk ve ruih mai. Ka u sulhnu a nih saw. 

An kal dawn chuan, U Lawma dinchilhin, "Dawr saw chu ka ta aw. Bungrua saw ka lak vek a nia. Chabi min pe rawh. " a ti a. Ka lo nui tawp! 

Ka u pawh a hmui hupin a nui a. 

"Tu pawisain nge dawr bungrua saw i lak! " a ti a. 

"Kan inneih laia min pek tawh a nia. Keiman ka buaipui vek.. Chuvang chuan ka ta tur a ni. "u Pari chuan a ti a. 

Ka u chuan, U Pari sawi nawkin, "Kal vat mai teh. I hmel ka hmuh hian ka luak mai dawn.. Kal teh" tiin a nam chhuak dawt dawt. Chutiang em ema pasalin a duh tawh loh hmeichhia nih chu a zahthlak ngawt ang. Pari nu leh a nau tleirawl lah chu an lo rak ve chhen a, ka hming pawh an chham teivet. Ka nuin chhan a phal si lo va, ka va tawng ve chak tak. "Mo te rel reng chhungkua, mo tih leh thawh ve pawh lawm lo, mo enhrang, mo chhawr rim chhungkua kan lo ni reng a! Haha.. Kan u pari chu a zualko thiam zet mai. Amah ber a chhuak dawn bawk a, min sawina chu engahmah kan ngai ta lo law law mai. Amah ber a chhuah khan a tawk reng e. Police chu an ruai ngam ta lo aniang e. 

Tichuan, kan chhungkaw bilin kan khawsa ho leh ta a. Bawihtea chu a pa roomah a insawn ta a. Tin, Ka u chuan an dawr chu a nghah zawm ta bawk. Rami nen kan va nghahchhawk chang pawh a awm. 

Urlawk zan pawh kan thleng ve ta reng mai. Rosangpuia ka lo nghak a. Rin ai takin ka pa pawh a zia ve a. Ka lawm tak tak a ni. Doorbell a ri tlang tlang a, ka va hawn chuan, Rosangpuia leh mi pakhat amah tiat thuak an lo ding dun ran mai. Over coat dum ve ve an ha bawk si, an inang lek lek. 

"Malsawma chu.. Mal, hei Dingi chu" tiin a thianpa nen chuan min hmelhriattir ta a. Rawn hruai a tumna a rei tawh naa, Malsawma hian thil buaipui a la nei ve si a, a hman remchang thin lo a ni. An lo lut a. 

Ka pa chanchin min zawt nghal. A tha deuh tih ka sawi chuan a lawm ve hmel hle. Malsawma chuan, "Rosangpuia hmui leh Dingpuii tih a inhmeh tawh lutuk hi a mak lo a nih hi. A hmeichhe duhzawng tak i ni tih ka hmuh che khan ka hre nghal" a ti sup a. Ka lai chem chem. 

"I u chu a leng chhuak em? " Sangpuia chuan a ti a. 

"Aw, Bawihtea leh Rami te nen kawn chei en turin an chhuak ve a nih kha" ka ti a. 

"Chuan, zanin chu i chhuak thei ang chu tiraw? " inthlahrun hmel lek lek hian a ti a. 

"Umm thei ang. Mahse, thingpui in phawt ru aw" ka ti a. An bu nghut. Ka nu te ka dil vek tawh a. An phal ve mai. Tin, ka pa duhdanin U Ruata te chhung an rawn phei a, kum thar lamah phei chuan an rawn awm tak tak tawh maithei a ni. Thingpui an in zawhah ka pa ka va hmu zuai a. Kan chhuahsan ta a. A vawt vur mai. 

Kimi kan sawm phei a. 

Kawn chei an sawi lar deuhte chu kan en pah a. Malsawma leh Kimi pawh an inkawm thei phian e. Kimi hi kan thiampuinu a ni thin bawk a, a hmelhriat loh han kawm pawh hi a hnehsawh khawp mai. Sikulpuikawnah dingin coffee in pahin an kawn chei chu kan thlek a, a mawi dangdaiin a simple bawk si. Kimi nen thla kan la sek mai. Kan hlima kan nuih har har lai chuan, kan piah atang chuan, "Saw nu vang sawn lawm kan inthen. Uipuinu vang sawn" U Pari awin a rawn tih chuan kan hawi rang kher mai. U pari chu hmeichhe pahnih leh mipa pathum nen an lo ding a, a mitmeng chu a fim lo viau. A nuam viau tawh a nih hmel. "Chhang suh" kimi chuan a ti sap a. Thla kan lak zawm leh nghal. 

U pari te hnungchhawn zawnga kan inselfie lai tak chuan min rawn deng dawt, ka phone pawh ka thlauh tawp.. A bawkkhup zawngin ka tlu a, ka ke tliahna laiah tak khan a rawn pet ri thlawrh mai. Ka rak tuar.. A natzia chu aw.. A na fik thak a ni ber. Khaw vawt nen.. Kimi rak tuar ri leh, "Hmela, i va zak lo ve a" a tih chu ka hre zui a. Rosangpuia te lah coffee zawrhna bulah an ding si. Mahse, Kimi'n a au ta a. Mi pawh an rawn pung khawm tan.. Chutia min rawn nama ka ke naa chhuih zuitu chu thei leh thei loin ka han thlek a, ka rin loh lutukin Valpuia a lo ni! Min ţhawng takzet. 

Kut dam zetin min rawn kai tho a, ka ke chu ka rap tha ngam lo. Rosangpuia a lo ni. 

"Nang kha " Valpuia chuan a rawn ti fiak thak a. 

"Hetah ni lo.. " Rosangpuia chuan a ti sup. Mahse, ring zet zet hian, "He mi te pahnih hi mi tenawm an ni. Hmeichhia hi ka nupui hual a ni a, mipa hi ka thianpa a ni. Tichuan, ni 17,january-ah an innei dawn. Mak inti em? Rodingpui, mi hurnu, i hur man i tel ta. I lawm em? " a ti nghek nghek a. Ka hmai ka hup a, ka tap tawp. Rosangpuia va pen phei lai pawh ka hre lo, Valpuia biang ri dawt leh a rak tuar ka hria a, ka va hawi phei a. Valpuia chu leiah a lo tlu a, Rosangpuia chuan a kut a hum ruh hle, a ding khawng lah a. 

"I duh loha i phatsan tawh hnu, keiin ka lo tuamhlawm chu i lawm meuh na nge? Thianpa.. " a ti nghut a. Valpuia chu rawn tho lehin a inhum sek ve a. "Kuttumin aw kan chinfel ang" a ti a. Posi a la nghal zat. 

Rosangpuia chu a che chang lo, a nui hak ringawt. Valpuia'n hnek tuma a va ban lai takin Rosangpuia chuan a kut chu lo mansakin a herhsak a, a ri thawt mai. A banrek chu a tliak a ni ngei ang, Valpuia rak chhiat danah. 

A bana la chelh reng chungin hnai set sawtah Rosangpuia chuan, "Ka nupui ni mai tur, Rodingpuii hming hi vawikhatmah i lamri tawh tur a ni lo.. Hrereng ang che" a ti vawt raih a. Valpuia chu thlahin ka bulah a rawn phei a, "Haw ang aw.. " tih leh min pawm a rual a, a car lam min panpui nghal. Kimi'n kawngka a lo hawng vat a. Malsawma pawh a rawn kal ve zat. Ka hnuk a ulh piah lamah ka ke a na lutuk a, ka mittui a tla fap fap mai. 

In kan thleng a, Kimi leh Malsawma chhuah hnuah chuan, "Ka hmangaih che a, tumahin an tihnat che ka phal ngai lo vang" Tiin ka biang a rawn chul a. Ka lo maimichhing vang vang…