Rosangpuia 16

ROSANGPUIA (16)

Ziaktu: Toni Râlte

Hunpui pawh a hnai chho ta a, ka pa erawh a tlahniam telh telh thung. Sawi hmaih loh tur chu U Pari dawr hawn ve kha nitin a nghak a, an pa pawh a hna atanga bangin an nupain an buaipui ta a. Nilenga dawr lama hun an hman tak vangin lehlamah chuan a thawventhlak huai zawk awm e. Rosangpuia nen pawh kan la tluang ve zel a. Hotel kha chu kum thar law lawa luah luh a tum a, siam leh thawm that ngai a awm nual a ni maithei. Tleirawl anga inhmua inbe sek ni lo mah ila; kan nghet dun ve khawp mai. Valpuia leh Cindy pawh an inhruai fel leh ta a, an fapa pawn duat a hlawh viau a niawm e. Cindy nen kan inbe ngai lo va, Valpuia lah ka be peih chai si lo. An chanchin ka hre tam lo viau mai. Rami leh Mama pawh kar hnih dawn an inbe ta lo va, Mahse, zan khat chu Mama chu a rawn leng lut hlawl mai a. Inleng ho thingpui lumin Rami nen chokaah kan awm a. A lo phei ve a, Rami a lai hle. 

Rami bulah a thu a, "I va reh ve" ka lo ti khawmawi a. 

"Nia, rawn len chu ka chak thei lutuk, mahse, ka ngam lo va" a ti a. 

"Eng nge ngam lohna tur awm a? " ka ti há a. 

"Rami hian min be duh tawh si lo va" a ti a. 

"Nang pawn min be bik hleinem" Rami chuan a lo ti ve zauh a. 

"Bialpa nei hek che. Ka lo biak ngam che i ring mi? " a ti ta mai a. Rami nen kan inmelh zawk. 

"A va awihawm loh tak.. I nei zawk a nih kha" Rami chuan a ti a. 

"Ka nei teuh lo mai a. Tak taka bialpa dang i nei emaw ka tia" a ti bah nak a. A awmdan chu ruih nei a ang. A mumal vak lo. Thingpui ka lum san a, Rami kut chu a vuan a, "Leng ila" a ti a. Rami'n a kut a la rang kher mai. 

"I ti ang lo em mai a" a ti hmak a. 

"Min duh tak tak lo a nih kha" a ti nghut a. 

"I ngaihdan dan le" Rami'n a tih ve hmak chu ka lo lawm hle. 

Mama chuan call a dawng ta a. "Aw, zanin chu ka lo phei peih lo.. Aw.. Ka mu hma dawn" a ti a. A dah nghal daih. 

"Va leng rawh, i bialnu bulah chuan" Rami'n a ti a. 

Mama chuan a nuih tlawn a, mahse, tîm rukna a nei tih ka hai lo khawp mai. Rami'n thingpui a va sem lai chuan, "Lalmama chu ka lo rin ve che nen, Rami hi hetia i chhaih kual mai mai atan ka phal hleinem" ka ti a. Tawngkam nem ka hmang hram hram. A hmai a hup a, "U Ding, kei pawn hrehawm ka ti. Ka inhua.. Mahse, Rami hi ka fiam kual mai mai lo asin. Ka duh lutuk. Mahse… "a ti a. A ngawi daih. 

"Eng nge mah se" ka ti vat. 

"Thian ten min hmusit thei lutuk a, maid bialpa ti ten mim au nawmnah vak vak zel a, Rami hi an hmusit tlat alawm" a ti ta a. Ka na ve zawk mai. Thinrim lek lekin, "Chuvang chuan a ni maw.. I danglam.. Rami chu nang pawn i hmusit ve ta hial a ni maw? I thianten an hmuhsit pawn a thlavang hauh tur zawk i nia sin" ka ti ta a. Rami a rawn let leh chiah. 

"Nia, min hau rawh. Ka thinrim lo ang. Nia, khatia min chhaih reng vang khan hrehawm ka tia, rawn len te kha ka hreh phah vek a. Chutihlai karin U Pari'n a nau min lo tihpui ve sek a, a nau lah khan min duh sia, pawisa te hi min pe reng zel a. Ka duh hun hunah ka hruai chhuak thei bawk sia.. Ka che buai ta vek a nih hi" a ti ta mawlh mawlh a. A la puitling lo va, ka hrethiam lutuk tho. Mahse, Rami tan erawh ka duhpui tawh hlawl lo. Rami a rawn thut ve takah chuan nuam lo a ti nge, a haw ta daih a. Rami bulah nem thei ang bera sawiin, Mama chu be tawh lo tur leh ngaihdam a dil pawha kir tawh lo turin ka hrilh a. Rami hi rin aiin a luhlul a, a thei em em ang tih ka ring a ni. 

Ka mu deuh chiah tihin Rosangpuia'n min lo call a, "Mapuii a tlanbo" a rawn ti ta mai a! Ka meng káwk. 

"Eng a?! Engtin? " ka ti nghek. 

"Kan dawr safe a rawk bawk a, pawisa a la fai vek, tunah khawiah nge a awm kan hre lo" a ti a. Ka chhing sawk! Engtin nge a nih theih? Kan inbe ve zeuh zeuh reng a, ka ngaina hman hle kha a ni sia. 

"A fapa a hruai em? " ka ti vat a. 

"Aih, kan bulah a awm" a ti nghut a. 

"A va'n mak ngai ve.. Mapuii chu ka rin a va ang lo em em" ka ti ta ringawt. 

"Nia, mi i ring hma mah mah zel a. Kei chuan ka ring pumhlum duh lo reng a ni. Aizawl khawi lai hmunah emaw chuan a la awm ang. Mahse, a theih veleh phaiah a chhuk ka ring" a ti a. 

"Engtia chet lak nge i tum? " ka tih chuan, "Ka report ta lo mai. A duh a, a zawng a, hlawhtling mai rawh se.. Pawisa bo kha a tam em em lo bawk a" a ti mai a. 

"Mahse, Rogera kha" ka ti a. 

"Nia, Mami'n, 'Kan fa a ni mai' a ti a. Remchangah an rawn hruai ang" a ti ta a. He pa rilru hi ka hrethiam thin lo. Naute chu Nu Madini te chuan an ngai ngawt ang le. Mapuii mawlh chu a ni. Engvangin nge he thil hi a tih le?! A lo tum ruk sa em ni ang? Nge a pa hi a inrawlh leh ang em? Ka hrethiam lo khawp mai. 

Mapuii bo atanga ni 2-naah Rosangpuia inah ka peng haw a. Naute lawm tur chi ka leisak ve nghe nghe. Nu Madini nen an lo inawm a. Sangpuia erawh a roomah a awm. 'Ka awm a nuam chiah lo va, ka chawl' kha a ti reng a. Naute ka pawma ka lawm hnuah Sangpuia pindanah chuan ka chho ta a. A lo mu a, a muhil lo thung. 

"Eng nge i an? " tiin a chal ka dek a. A dai diak mai. Ka kut chu rawn vuanin, "ka tha e.. I ril a tam em? " a ti a. Ka lu ka thing a. 

"Pa Siama ka bia a, Christmas hma hian palai rawn tir ila, kum thar lama innei thei turin kan tia" a ti sup a. Ka lo lai deuh. 

"Nia, kha chu i thu thu" ka ti mai a. 

"I pa dinhmun a hniam zel sia.. Hrehawm ti lo la, i pa chin saw kan hre si lo va" a ti a. A sawi awmzia ka hria. 

"Nia, ka hrethiam alawm. " ka ti a. 

Ka biangah rawn piai zauhin, "Bakah ka bulah hian awm reng tawh la ka duh a ni" a ti a. Ka nui ringawt. Chutih lai tak chuan thinrim awrawl niawm tak kan hre ta a, Nu Madini mangang aw in, "Sangpui.. " a rawn ti tial ruan bawk. Kan tho vat a. In hnuai lamah kan chhuk nghal a. Living roomah chuan mipa pahnih an lo awm a. Pafa an ni maithei. A upa zawk chu a meng rum ul mai bawk. Rosangpuia chuan dam thlup hian, "Pa Thang" a ti a. Thil ka hrechhuak zawk. Chu pa chu Pu Thangluaia a ni mai ang em? 

Rosangpuia a hmuh rual rual chuan, "Khawiah nge i dah sawi vat rawh" a ti vin ta thak a. 

"Hahdam teh. Thu phawt teh u" Sangpuia chuan a ti leh mai a. 

"Khawiah nge i dah sawi phawt rawh. Ka lawm lo a nia" Putara chuan ti leh a. 

"Mapuii i sawina em ni? " Rosangpuia chuan nuihzat hmel lek lek hian a ti a. 

"Ni chiang e, ka fanu kha khawihah nge i thuhruk? " a ti ta mai a. Ka chiang ngam ta. Nu Madini chu naute paw chungin kil khatah a lo ding ngawi ve reng bawk a. 

"I fanu awmna ka hre hauh lo mai" Sangpuia chuan hahdam hmel zet hian a ti a. 

"Nau, min tham lo hle suh. Ka fanu kha i hralh tih hi pha hlek suh" a ti pawr hlur a. 

"Nangmah ang ka ni ve tlat lo mai. I fanu hralh duh tur khawpin sum lamah ka pa chhe em em rih lo" Rosangpuia chuan a ti a. Pu Thanga chuan min rawn melh zawk a. A mitmeng a thip kher mai. 

"Engkim hi ka hai ring suh.He hmeichhia nen inneih i duh vangin ka fanu khan buaina a siam i hlau a, i dahbo a nih kha.. Police kuta thlen kher che ngai loin thudik sawi rawh" a ti leh bawrh bawrh a. An sawi ang tak takin chu putar chu a thisen a sang ve hlein ka hria. 

"I hnawtchhuak tawh a ni lawm ni? Ti nge i rawn ngaihven leh tak? I duh lo va, i paih a, keiin hna ka pe a. Lawm viau zawk ta che. Tichung chuan ka insumtheihna hi rawn nek pawp suh" Rosangpuia hmel pawh a rum lam hret a ni. A fapa niawm tak chuan, "Nia ka pa, i haw teh ang. Sangpuia hian engmah a hriat ka ring lo. " a lo ti ve sup a. 

"Lo ngawi rawh. Rosangpui, hre rawh ka lawm hlek lo a nia. Ka fanu i lo buaipui chhante kha hre lo turah min ngai em ni? Tum ruk i neih vang a ni mai. Police hmel i hmuh duh loh chuan, ka fanu min pe rawh. A nih loh chuan, i dawr atanga bo a nih ang ngeiin zângnadawmna ka phut e" a ti ta a. A va vertherin sum a va duh tehlul em.. A fanu neihchhun chu a tan hmanrua a lo ni tak tak a nih hi. 

A nui hul hak a. "Sum bawk maw? Eng chen nge i duhám zel dawn le. I fanu khan ka dawr a rawk a, cheng nuai 3 lain a tlanbo asin. Chu chu min pe let zawk dawn em? " a ti ta khalh khalh a. 

Pu Thanga chu a ter leh at, 'Chutin min bum tum suh. Ka fanu khan ruk a ru ngai lo. Tin, hei hi hre rawh. Ka fanu fapa pawh hei in kutah a awm a. I buai telh telh dawn a nia. Ka sawi ang chuan ti mai rawh" a ti a. 

"Huh, tunah te hian i inah i lo thukru leh reng zawk lo maw? I fanu, i uite, i hmanrua ni thin kha.. Pawisa i duh luatah i fanu hlutna pawh i hmuthiam tawh lo a nih kha. Sal nih reng kha a peih ta lo ang a, a tlanbo ta a niang. Chuvang ania zawn hmuh tum lo va ka ngawih tak. Ka pawisa a kalpui kha chu ka pe ni mai rawh se. A fapa chungah erawh engmah tihtheih i nei tlat lo. A chhan chu he naute i duh loh vang hian ania Mapuii khan in a chhuahsan ni" Rosangpuia chuan a ti ta a. Thawm chu a reh deuh dûk a. 

Mahse, a la beidawng lo nge, "Ka tupa hi chu ka la ang. Ka fanu ka hmuh kir hma chu ka kutah awm rawh se.. Hei chu ka thuneihna a ni tlat" a ti ta mai a. Nu Madini'n naute a kuah nghet sawt chu ka va hmu reng. 

Rosangpuia mitmeng vawt raih chuan a hmaa putar chu melhin, "I ngam phawt chuan le" a ti hriam hraih a. Buaina a hnai tih ka chiang ngang mai. 

"Ka pa, i kal teh ang. A zahthlak em mai. " A fapa chuan a ti a. A pa chu a pwt a. A pa chuan a lo thing thla thuai. Nu Madini lam panin, "Khawi, naute kha" a ti rum nghut a. 

"Aih, ka phal lo.. " Nu madini chu a tawlhhnung a. 

"Rawn la vat rawh" a ti chhur chhur a. 

Mangang zetin Nu Madini chu a tawlh zel thung. Rogera lah chuan buaina chu a hrethiam ve nge ni, a ţap ta a. A rit ru ta kher mai le.. 

"Ding rawh" Rosangpuia aw chang zet chuan a ti a. Pu Thanga pawh a ding chawt. 

"I kut hmawr pawn naute kha khawih suh. I ta a ni lo. " a ti leh fak a. 

"Ka fanu fapa a ni tlat. A awmzia chu ka tupa a ni. Lo inrawlh hlek suh" Pu Thanga chuan a ti a. Nu Madini puak lai Naute chu a va ban a, naute lah a tap uar sauh. Rosangpuia a pen sau pawk pawk a. Putara chu a kuai her sawk, a hnek ta bur mai le.. Chhuatah a let hawl a. A fapa che zawk chu va melhin, "Rinchhan, min hrethiam la, i pa hi chhuahpui vat rawh. Anih loh chuan ka dim dawn hlek lo a nia" a ti hniam ruih a. Rinchhana a tih chuan a pa chu kai thoin chhuahpui a tum a. A pa chuan Rinchhana hmaiah a beng pawp mai. 

"Laktlak lohpa, i pa pawh i chhan ngam lo a maw? Tuai em ni i nih? Rosangpui, kut mi thlak a maw? I pa rual zet ka nih hi i hria em? " khur dar dar chungin a ti a. 

Khawng taka ding run chungin, "Ka tan chuan putar duhâm leh tenawm tak i ni tlat. I phu tawk a ni" a ti hmiah mai. Rinchhana chuan a pa chu a kai lawk a, "Min tizak tam ta.. Putar duham chu i lo ni ngei e,. " tiin a pawt chhuak a. 

"Rosangpui, i hre dawn khawp aw. Police hmel hmuh inring ang che " Pu Thanga chuan a rawn tizui ţawk ţawk a. A khi suk duh chauh. Naute tap chu thlemin Nu Madini chuan a awi hliau hliau a, a mittui te a tla phung mai. Naute chu a hmangaih takzet tawh tih a lang reng. 

"Kan awmdun ve apianga buaina awm ziah hi ka kham thawkhat hle ani" Min rawn melhin a ti a. 

"Kan duh vang a ni hleinem" ka ti sap a. A lo tlai ve ta bawk nen, ka haw phei ve ta a. 

Thla thar kan chuangkai a. Tukthuan ei laiin U Lawma chuan, "Ka nu, dawr luah man saw chu min peksak a ngai ang aw. Thla hmasa luah man nen Vawiinah pek a ngai dawn a" a ti a. Ka nuin a melh kâwk mai. 

"Engvangin nge ka peksak ang che u. Nuai ruk ka pe tawh che u a, inthawmhnaw lak kha nuai ruk man a ni lo tih ka hrechiang viau. Nangmahni ngeiin pe rawh u" a ti chang fak mai. Ka nu ngaihdan a pelh tawh chuan, a tawngkam hi a kha ve fak zel. 

"Aw.. Dawr hawng tir kan nia, hlep pawh kan la nei mang lo va.. Pawisa te kha chu eng emaw ti tiin a ral ve zel alawm. Kan thawmhnaw lak saw a man a tlawm lo tih i hriat kha" U Lawma chuan a ti a. 

"Chu pawh nise, in pe thei ngei tur a ni. Induh leh ba mai rawh u" ka nu chuan a ti hmiah a. U Pari a kham nalh, a kal pahin, "Ninawm a. Eng ang chhungkua nge maw in nih le? In intihrang kual a. Hetiang chu ka peih ve lo" a ti hmak hmak a. 

"I peih loh leh chhuak daih la ni mai lawm" ka nu bawk. A tawpkhawk ve ta niin ka hria. Ka dem hauh lo. 

"Kha.. U Lawm, i lo hria em? I nu ngeiin min hnawtchhuak a nih kha.. Ka chhuak khawp ang" Pari chuan a ti hlawih hlawih a. U Lawma pawh a kham ve hmak, "Inlo va mak em em ve, kei hi min en hrang bik em ni? Ruata te zawk chu nise i peksak vek ang? Eng nge i hriat? " a ti hrep a. Ka nu erawh chuan dam raih hian, "Ruata te nupa hian vawikhatmah min la tibuai ve lo e. " a ti sap a. 

"I fapa ka nia dawr luahman min peksak thei lo a maw? Eng ang nu nge i nih? " U Lawma chuan a ti leh a. 

"Engkim ka hria alawm. In dawr bungraw lakna receipt kha ka hmu miau a. A vaiin cheng nuai 37000 man a ni. Dawr luahman saw thla khatah 15000 a nia, In hman ban zawng zawng kha khawiah nge? Engtin nge inhman ral theih? Ka hriat ruk danin Pari nute saw tun hnaiah an awm theiin thawmhnaw leh puan thar manto tak tak an inbel deuh reng niin ka hria a. Tin, Pari thil chah sing chuang man dawn dawnte hi an rawm deliver deuh reng bawk. Chuvanga dawr luah man chu peksak tum lo che u ka ni e. Nang ka fapa hian thil thar pakhatmah tun hnaiah i neih loh laiin i nupui chhungte erawh an vul hle a, i nupui ngei pawh tlereuh sing chuang man inbelin, a pasal zawkin thing leh satliah takin i zui duan duan a. I nupui awmdan hi ka kham thawkhat tawh e. Lawma, hei hi hre rawh. I siamtha thei dawn lo a nih chuan, in dang rawh u. Chu chu i pa nen kan thutlukna a ni" a ti ta hmiah hmiah mai. Ka nu chu ka va ţan si êm. 

Ka u chu a hawihai deuh lek lek a. Ka nu chu a melh deuh tlawk tlawk. Harh chhuak thut niawm takin.. 

"Maw?! Bungraw man chu chuti zat chauh chu maw ni a? Pari'n 'ka indaih lo va, ka nute ta ka puk belh' a ti sia" a ti ta mai a. U pari ka va melh, hlauthawng hmel a pu. Mahse, intihuaisen lui niawm takin, "Dawt ka sawi reng hleinem. Ka nute ta ka puk alawm. Chuan, ka chhungte thil thar neihah chuan lo buai vak duh suh u. Tun hnaiah ka nau sawn sum a thawk chhuak nasa a, an lei ve a ni mai. A chhe zawnga inpuh kual chhen hi ka ning tawh.. Ni e, Lawma, i nu sawi ang khan ka sual em a ni kei chu. Chuvang chuan ka chhuak mai ang" a ti ta a. Ka nu erawh a ngawi leh hmak tawh thung. 

"Ka nu sawi kha a dik nge dik lo sawi rawh. Ka nu, receipt chu khawiah nge i hmuh? " Ka u chuan ka nu a melh a, a aw pawh a nem lek lek. 

"A zin a rawn hawn zan khan a thiannu khan, "Hei ka bagah a lo awm a. Kan inthleng a niang. A pawimawh a tih takin, a bungraw lakna receipt a nih kha" tiin min rawn pe alawm" a ti a. U Lawma a sen ţawn ţawn mai. U Pari pawh a hawi champ ta lo viau. 

"Zothanpar, dawt min lo hrilh char char a maw? Thla hmasaa dawr luahman pek ka sawi pawn, "Kan hlep hi chuan ka nute pawisa ka puk kha rul phawt ang " i tih vangin dawr luah man kan ba a. Kan hlep zawng zawng i pe vek bawk. I pasal hi min lo bum a maw? " tiin a nam sawk a. U pari chu a petek nawk mai. 

"Ka nu hmuhte kha chu dawr pakhata ka lakna receipt a nia, dawr danga ka lakna te nen belhkhawm chuan nuai 6 khan min daih hleinem. Tiang khan mi ti mai mai suh. Lawmawm, i nu thusawi maw i rin zwk dawn? " a la ti hram hram nia! Ngaihdam dil chu kaha se.. He hmeichhia hi planet dang atanga lo kal a niang. 

"Sum chungchangah kher kher chuan mi palzam lo vang. I nute i pui duh a nih chuan sawi la, ka hrethiam em em ang che. Mahse, dawt hmanga min bum kuala ka chhungte thlenga i bum duh hi ka lawm lo." Ka u chuan a ti a. U pari chuan engmah a sawi tawh lo. Chutiang chuan an nupa inkar pawh a buai ve tan niin ka hria. U pari thiltih dan chu a lawmawm loh ve em a ni. Ka nu sawi ang khan, Online-in thil a chah deuh reng a, kei pawn vawi hnih ka lam hawnsak tawh. A man a sang thei si. An dawr hlep hi chu ka nu pawn, "Tihian an nupa mamawh a lo phuhruk ve kha a tha. Fa te an nei ang a, an buai loh nan khawl ve rawh se" a ti diam a. Kan chuhpui lo nasa. Chuti chung pawha min la bum duh fo chu ngei loh theih a ni lo ve bawk a ni. 

Ka pa ka hruk laiin Cindy in min lo call mial a. Ka nuin ka pa chu min rawn hruk chhawk a. 

"Cindy" ka ti sap a. 

"Ding" tap pur chungin a rawn ti ta mai. 

"I tha em? " ka ti vat a. 

"Ding, ka beidawng. A hrehawm em mai. Valpuia'n nichin mai khan nupui a rawn hruai hawn dawn vangin chhuak turin min rawn ti a" a ti ta a. Ka thaw hawk. A va rapthlak thin em. 

"A va ti ang lo ve. A chhungten eng nge an sawi? " ka tih chuan, "Chu chu lawm mak ka tih chu. An vah tho ka ni a, inchhungkhat vek. Kan inneih theih loh hlaua min nawr sek si kha, tunah chuan tumah ka lam an tang tawh lo ti ila ka pa hi chuan min la tan der ve a. 'I zir lo aniang, heti em ema pasal khawi ngam loh chu' te min tihkhum a. 'I thiannu i luahlan a, hei hi i chantawk a ni reng a ni' ti ten. Ni e, Ding, min la haw reng ang tih pawh ka ring. Mahse, nangma hnenah lo chuan inbunruahna tur ka hre ngang si lo va, zah leh tlawm pawh sawi loin ka rawn be tawp che a ni" a ti a. A insut zui hlap hlap. Ka hnuk a ulh, ka mittui pawh a hnám ve sawk mai. Cindy chu ka lainat takzet a ni. 

"A va pawi tak em. I chhungte i be tawh em? Chhuahsan mai rawh. Cindy, tihngaihna ngang a awm lo a nih kha. I thiam loh a awm lo, haw la, fa pakhat mai mai te chu i enkawl thei dawn lutuk.. Tuar reng tawh suh" ka ti ta tawp a. Ka rilru dik tak pawh a ni. 

"Nia, ka nu ka bia a, tun tum chu an thinrim ve tawh bawk aniang, ka nauin min lo hruai dawn. Ka insiam hmain ka lo bia che. Kan hawn hnuah ka rawn be leh ang che. Chuan, i pa chu eng nge a an zel? " a rawn ti a. Ka pa dam loh thute a la hriat ve danah min la ngaihven ve tih chu a hriat mai. 

"Aw hei a pangngai a ni mai. Ni e, min lo be leh dawn nia. Tawlh tawh miah suh aw" ka ti a. A dah ta a. 

Cindy tan khan a thiantha ber kha ka ni ve tho tlat a, hrehawm ti chung chunga min rawn bia kha ka dem lo. Ka khawngaih takzet bawk. Tunah chuan kei chuan kha hremhmun kha ka chhuahsan tawh a, pasal hual ka nei tawh. Chuvangin Cindy pawh ka haw reng reng tawh lo. Inthen daih se, mi tenawm Valpuia hi la inchhir tlawk tlawk se ka duh a ni. A la thleng ngei bawk ang. 

Inleng ka nei ta a. Ni e, Rosangpuia palai te an ni. Ka chhungte ka hrilh sa tawh a, U Lawma chuan, "Kan awm ve kher a ngaiin ka hre lo" tiin Pari te inah an leng phei a. U Ruata te nupa leh ka ni te nupa bakah ka pu (ka nu u) ten an lo dawngsawng a ni. Kei erawh roomah ka tawm daih. Ka zak ve deuh bawk a. Vawi khatna a ni a, mizo dan angin, "Kan lo inrawn khawm ve ang e" tiin an thlah a. An vawi hnih rawn len hnuah an inrem ta a. Ka pa pawh an sawi ho laiin a rawn thu chhuak peih ve a. A taksa rawp telh telh mah se, a mitmengah lungawina ka hmu a. Ka thla a muang. Kan inneih hmain a kal ang tih hlauhna erawh chuan min kiansan ngai lo. Kan inneih hun atan chuan 17th, January an ruat ta a. Inbuatsaihna hun ka nei tlem viau naa, ka pa dinhmun ngaihtuah chunga rel a ngai ve miau si a. A hmingin hlawh ka nei ve tawh a, ka nuin min pui thei bawk ang a, thuam chhawm pawh chuti taka lei harsa turah ka ngai lem lo. Pasal vawi hnih nei tur ang ziazangin Biak inah pawh lehkha an tar leh ta vah mai. A hria apiangin min lawmpui a, mak ti tawk zawng an awm tho ang. Kimi sawi leh danin U Pari te veng lamah erawh, "A u phal lo chung a nei lui dawn a. A nu leh pate a kar thiam sia, mipa a lo duh reuh em mai. A pasal neih thulhna pawh a la rei em em si lo. " ti ang zawngin ka thang thung. Pawi ka ti lo nasa. An sawi peih chhung chu lo sawi ve mai mai teh se a. Rosangpuia nen kan inhmangaih phawt a hnu. 

Tin, thu thang pakhat ka hre leh bawk a, chu erawh chuan min deng ve deuh, "A pasal tur hian hmeichhe dang a la kawpin a la fawrpui reng si a, a rethei awm mang e" tih a ni. Rosangpuia pawh ka be nghal a, a nui hawk hawk. 

"Duatpui, i dinhmun luah ve chakte thu leh hla bak a nih ring suh. Hmeichhe dang kawp chu sawi loh, nangmah hmu tur pawn hun ka nei hlawl lo a nih hi" a ti a. Rinluih phawt mai loh chu tihtheih ka nei lo. Nia, lalbuaia kha a ni reng a. Tin, Pu Thanga khan police a lo pun tak tak a, Social Media lamah pawh an sawi deuh,. Mahse issue lian tham dang a awm ta hlauh a. An sawi zui lo. Police stationah a va inlan zak zak a, mahse, Rosangpuia hian thil a lo ngaihtuah thui khawp mai a. Keini pawn kan hriatpui miah lohin Mapuii kha agreement a lo siampui a lo nia. 

"Ka fapa Roger hi Dubaiah emaw khawi hmunah emaw sum tam zawk thawk chhuak tura ka kalsan hunah chuan, Ani hi Rosangpuia ta niin, ka let leh hma chu a bulah khawsain tuman an chuhpui thei lo vang" tiin signature an pe dun thlap a. Chu chu Police ho a han hmuhtir takah chuan buaina a nei zui ta lo va. Mahse, Pu Thanga kha beidawng mai loin Mapuii chu Rosangpuia rukbotir emaw hralh emaw angin kaltir talh a la tum a. Finfiahna a nei miau si lo, chutih a hnekin Mapuii khan Sangpuia pawisa a la ru zui bawk nen, Police lam lu pawh a hai ve viau hman a. Hmalak vak dan a awm lo, Mapuii erawh an zawng ta tho a. Tuman a awmna chin kan hre rih lo a nih hi. 

Khatia sum chungchanga an nupa an inkhak takah kha chuan U Pari pawn an pa chu a palzam ngam ta bik lo nge, dawr luah man te chu eng tin tin emaw a pe ve ta hram a. Ka nu lahin peka tum lo bur mai si. Dawr chu an la nghak dun lawp lawp zel a. Sundayah hian ngei ngeiin Pari te in lamah an va awm nileng tihtheih a ni. Zankhat zanriah kan ei laiin ka nu ngaihdan ni ta vak lo chu nge a âng leh ta a. "Pari hi chu kan mo a nia, ka la hrethiam. Nang, a fapa u zawk si hian i pa hi i thlahthlam lu deuh a ni. 'Ka pa chu eng nge a an? Vawiin lam te " tia a chanchin i ngaihven ve te hi ka lo ring thin a. I ti ngai lo. Sunday in awl niah lah inkhawm chu sawi loh, in nute in lamah inphei hmak zel a, i pa hi a kal tep tawh, Lawma, i la inchhir ang e aw.. Ngaihsak ve rawh. Nangmah chawma enkawl seiliantu che a nih hi. " a ti ta khak khak a. Ka u pawh chu a inthiam lo ve deuh nge a ngawi reng. Chumi kar sundayah chuan an leng phei ta lo a, ka pa pawh a va thutpui ve tak hruah hruah kha. Lehlamah ka u hi chu a thiam lohnaa han hauh hian thiam chan a tum talh ngai bik lo va, thu a awih a, a insiam tha ve thuai zel a. Chuvang ania U Pari pawn a hneha a duh duh dana a awmtir theih ni. Mahse, kha sum chungchangah te pawh a duh loh dan zawng deuha thil a thlen erawh chuan U Pari pawn a pallui ngam ngai hlek lo. Mahse, a nem em a, an nu thusawi a kip a kawia a awih thin erawh a pawi a nih hi. Ka awm loh huna an khawsak dan tur ka ngaihtuah chang chuan ka mang a ang thin. Tihtheih em em nei lo mah ila, ka nu fahrin ka ni a, ka awm ve khan ka nu tan pawh a thlamuanthlakin u pari lal hrawtna tur daltu ka ni ve thei dawn a. Rami lahin U pari a hlau si. Ka hrethiam reng. Chuvang chuan ania ka pa dam laia inneih chu duh tho mah ila, ka huphurh ruk em em tho ni. 

 Ka nu pawh hian min ui ru hle tih ka hria. Ka khawngaih. Mo kan nei e tiin an hlim ve em em a, an rin loh lamah thil a buai ta zawk si a. U pari hi felin, U Remi ang nise chuan ngaihngam takin ka kal thei ngei ang. Heta tang hian chhungkaw nun hi ka hriatchian phah ta viau. U Pari pawh mo a ni a, a nunzia leh a mizia zawng zawng thlaka danglam turin kan phut ngawt thei lo. Keini pawh a duh anga awmtirin min phut ngawt thei bik lo. Inhriatthiam tawna innawrkal tawn tur kan nih laiin, kan enliamna leh kan hriatthiamna kha ani chuan min zuam phah nan a hmang ta daih a. Ka nu leh paten an khak ngai loh vangin a duh tawkin nuam a leng ta chu a nia. A pasal ka u lah uite ang chauh, nupui thununa siamthat a hnehin an nu thu a lem duak duak a, lehlamah ka u pawh dem lohna chin ka nei ve deuh, U pari hian a tilawm hneh em a ni. Han inbakkaih chang nei mah se, an han awmdun tawh chuan tlawm zawr hnêpin, a pák huam a, ka u tan chuan lo hmangaih ve bawk si chuan an nu lamah a ţang lo thei bik lo a ni. Hmeichhia te hi kan va pawimawh tak êm aw. Ka nu hian a rukin min zilh fo a, "Pari pawh i mil lo tih ka hria. Ni e, mil a harsa ve bawk a. Mahse, kei leh i pa kan awm tawh loh hunah mak chhiat tawkin dinhmun harsa takah i la ding thei. I belh tur chu i nuta te an ni a, chuvang chuan Pari lakah pawh that chhuah hram hram a tha" tiin. Mahse, Rosangpuia laka a chetdan leh ka u thluak thlenga a suk sak takah kha chuan, ani belh ai chuan U Remi te belh emaw keimaha awm hran pawh ka thlang zawk. In dan duh hle awm si hi, in dan chu a duh lo bur thung! A chhan chu a duh duh danin a awm thei tlat a. Khak ila an pain a tan nghal zel bawk nen. A tan kan in chu a nuam em a ni. Kei a huphurh leh amah ter ngam ber ka chhuah hunah phei chuan nuam a ti zual ngawt ang. Mahse, ka nu hi nu mawl a ni lo va, officer ni pha chin ngat kha chuan ngaihtuahna a hmang thiam ve turah ngai ila, chuti mai chuan nuam a leng bik kher lo maithei a ni. 

Cindy kha a haw ta a. Valpuia pawn a nupui ruk a hruai haw ta bawk. Kimi sawi danin an nu chu tleirawltê, hmel chhe lem lo, mahse, nun loose ve tak mai a ni a. An phur kual nasa thin a ti. Zu pawh a in duh a niawm e. Cindy aia a thlan zawk kha a ni ve tlat bawk si. Khawvel hi chu aw. 

Ka beisei loh deuhin sunday chawhnuah Cindy leh a fapa an rawn leng hlawl mai. Kan inhmu thut chu kan inmelh vawng vawng mai. A cher kuam a, a nu hnek bawk. Kan inhmuh lohna a rei ve viau tawh a ni. A fapa lah chu a hmeltha em em lehnghal a, "I pa kan lo kan dawn a" Cindy chuan a ti a. Ka hamhaih atalangin biak nachang pawh ka lo hre pek lo. 

"Awii, i va fel tak, lo lut ru" ka ti ta sawk sawk a. An rawn lut a. Ka pa nen hian kan inkawm thin lai khan an innelin, an infiam nasa thin a. Cindy pawh hian a la theihnghilh lo a ni ngei ang. Ka pa chu a va hmu a, a muhil si a, reivak loah a rawn chhuak a. A fapa chu ka lo pawm thung. Bawihtea lah chuan, "Ani, a van hmeltha.. Khawi ka lo chuks" a ti deuh reng lehnghal. A tlei reuh bawk sia. Cindy chu ka bulah a lo thu a. 

"I ke chu i hmang thei tawh maw? " a ti a. 

"Umm, hei mahse, dim hlek chu a la ngai ve deuh a.. " ka ti a. 

Ka nu a rawn haw a, Cindy chu a be ve hlut a. 

"Lo len hi ka chak thin lutuk, kan khatih avang khan ka ngam ngang si lo va. Mahse, Pa muana dam loh ka hriat kha chuan engpawhnise rawn lan hrim hrim ka tuma, mahse, Valpuia nen kan inhruai leh ta si. Veng kar a lo hla a, nau pawm nen ka chhuak hleithei lo va.. Tunah ka rawn thei ve ta chiah a nih hi" a ti siam siam a. Hmana Cindy tho kha a la ni. 

"I fel lutuk, keimah zawk hi lawm.. I nau neih te pawh khan rawn en ve ka chak reng a, mahse, ka vengthawng si che a, naute thil tur pawh kimi te ka rawn thawn ringawt a nih kha" ka ti ve a. 

"Nia, i thil lo thawn kha ka la hmang phal lo. Ka dah tha reng asin" a ti sep a. Ka hnuk a tiulh. 

Rosangpuia a rawn lut ve zan zan a. Sunday hi chuan a awl ve a, a rawn lang ve deuh ziah thin. Naute pawma ka thu chu min rawn melh a, ka ep chiahah a thu. Cindy chuan, "In inneih hun chu min sawm ve dawn em? " kan pahniha min melh tawnin a ti a. 

"Sawm loh ten.. I rawn kal ngei ngei a ngai aw" ka ti vat a. Rosangpuia awm dan chu ka va duh lo tak. A thu ngawi run a, biak a chakawm loh takzet. Cindy lo awm ve vang nge mawni dawn ni. U pari a rawn chhuk thla a, a mit a bui chak mai. A mu nasa aniang. Cindy a rawn hmuh chuan, "Kan thisen hi a sang thin teh e" a ti sap a. Ka lo îp zawr mai. Choka lamah a luh phei daih vangin kan sawi zui lo va. Cindy erawh chuan nuam a ti tawh lo tih a lang reng mai. Sangpuia lah a tawng si lo. Naute chu ka lawm a, ka chhaih nui iar iar mai.. Cute lutuk mai. 

Rami'n thingpui a rawn dah a, Thingpui ka in chhungin Rami'n naute chu a lo la a, nau a lawm bawk a, a chhawnchhaih nasa mai. U pari pawh kan bulah a rawn thu ve a. Cindy melh pahin, "I pasal chuan nupui a neihsan che maw? " a ti a. A tawngkam chu a dengkhawng mah mah a ni. 

Cindy chuan, "A nih kha" a ti ringawt a. 

"A awm ve tho lawm. Nang pawn Dingi pasal tur i ruksak ve tho a" a ti nghat a. "U par" ka lo ti thawt. 

Nui chungin,"Ka sawi ve mai mai nih chu.. Thaba leh saihlum a ngêt thei lo' an tih kha.. Ho lutuk" a ti hawr hawr a. A chhipsamah sawn ka va kek chak tak. Cindy hrehawm ti chu a kun daih a 

Sangpuia lam hawiin, "Kan makpa i nih dawn takah chuan, i dawrah kan pa hi chhawr ve la, mahse, ban ve lo la.. " a ti ham ham a. Awii he nu hian phuihnam a mamawh a ni. 

Sangpuia chuan, "Pawi hleinem. Ani chuan min beisei ve dawn lo va" a lo ti hmuk. U pari a meng ráng teh e. Ngeiawm zeta nuiin, "Nia, ka u te chu gay a ni chuang lo va. Ban a ngai ve nang" ka lo ti ve salh. Mi dang a tawngkhum ang hian tawngkhum ve sak sak ila, kan tukzal thei ber. Thingpui pawh a in zawh hmain, "Ka phone a riin ka hria" tiin an roomah a chho ta a. Ka thaw huai mai. 

"In monu chu ka hriat hnu a ang ka ti reng a. " Sawi zawm tum nei niawm takin Cindy chuan a ti sap a. 

"Aw.. U pari, sawtah IB vengah khan an awm kha" ka ti a. 

"Nia.. Aa.. Ka sawi lo mai ang. Chuan, hawn mai ka duh. Ka niin lo peng teh a tia, kan tlai lutuk ang.. " tiin a tho a. Chelh duh mah ila, nuam a ti lo tih ka hriat vangin ka chelh duh lo. Naute chu ka chuk mawlh mawlh a. Kan inthlah liam ta a. Rosangpuia bulah chuan ka va thu a, ka si chât bawk. 

"I mood a chhia mi! " ka ti a. 

"Aw" a ti hmuk. 

"Ngati" 

"Valpuia fapa kha vawikhatmah pawm tawh suh" a ti nghut a. Awiii kha vang kha maw lo ni. A va hahthlak tak. 

"Em em a che. I thikthu hi i tilui a niang" ka ti nghek. 

"Mapuii fapa pawh ka khawih ngai bik lo" a ti leh sup a. 

"Pawm ve rawh ka tih che kha, ka thik ve lo" ka ti a. 

"Aih, i thik ang" a ti deuh tlat. Ka nuih a za deuh bawk si, ka thinrim deuh bawk si. A bengah ka pawt a, "Aiiah.. Rodingpui, i kut hi thawh ziah suh aw" a ti a. Dëk ka hua tih hriain ka nâkah a rawn dek zauh a, ka nui nghal uar uar.. Boruak a nuam leh ta a. 

"I kawr tur chu tuesdayah va thuitir ila, i duh dan i sawi a ngai dawn sia.. Tmi pawh ka hrilh tawh kha" a ti a. 

"Hawh mai kha pawi ka ti vak lo asin. Thuitir chu a hautak dawn e" ka ti nghat a. 

"Aw.. Kawl that rengah pawh a tha ve alawm. Thuitir ang" a ti leh hmiah. Thu lah hi a nei sia e. 

"Mami te chu engtik nge an lo chhoh dawn? " ka ti a. 

"Christmas an rawn hmang dawn a. Kar leh tawp lamah chuan an rawn chhoh theih ka ring. E taka! Thiana ka hman tur Malsawma hi i la hmu lo tak tiraw? " a ti hlut a. Ka lu ka thing. Thian kawm hmanin a khawsa lo va, a thiante tu vak mah ka la hre ve lo. Bakah a sawi hmangin Mizoramah an awm hlawm lo a. 

"Ka la rawn lenpui ang. Nimin piah khan a rawn haw ve chiah a. A la buai deuh bawk a. Ani hi ka thian tha tia ka chhal ngam a nia. Mi tha tak a ni. " a ti duah a. 

"Eng nge a thawh? " ka ti a. 

"Software engineer a nia. Delhi-ah a thawk a, nikum khan an nu nen an inthen a, a thlawi ve rih" a ti a. 

"A chhe lo em? " chimawm chhuahin ka ti a. 

"A tul lo" a ti daih. 

. "mawh.. A chhe lo em? Tu nge luck zawk che u" ka ti kual a. Ka nui bawk. 

Mitmeng nur nanga min rawn melhin, "Keimah lo mipa mitah tumah en ngai suh. Ka remti lo. I hrethiam em? " a ti fiah kâk a. A thutak avang chuan ka uang zui ngam tawh lo. He pa em em hi chu a.. 

Ka u a lo haw a, Sangpuia chu hmu mah se, buaina a siam tawh ngai lo. Biak erawh an la inbe hleithei lo chu a ni. Nakinah an la inngainat ngei ka beisei ve tawp. 

Ka nu room atanga rawn tlan chhuakin, "Mate, i pa awm dan hi a dik lo.. " a rawn ti tuar a. Sangpuia nen kan tho rual thawt. Kan va tlan lut a, ka pa thaw chu a lo hah hle mai a, a thaw hlawi hlawi mai. Kei chu ka hamhaih leh tawh, chet lak dan tur pawh ka hre lo. Sangpuia chuan ka pa awm chu a nem a, a lu a kam sang deuh bawk. 

"Ding, oxygen kha lo fit rawh" a ti vat a. Ka che ve chiah. Ka nu erawh kil khatah a ding reng ringawt. Oxygen chu hnukin Sangpuia chuan a siamrem sawk sawk a, ka pa hnarah chuan a zuk vuahsak ta a. Ka pa thaw pawh zawi zawiin a ziaawm ta deuh. Khuma thuin ka pa kut chu a vuan ran a. Chhuat lam bihin.. 

"Pathianin chelh mawlh teh se.. " a ti sup a.