Rosangpuia 15

ROSANGPUIA.. (15)

Ziaktu: Toni Rálte

Ka pa chu U ruata te nupain an han hruai haw ta a. Ka ngaihbel nge ka pa chu a cher kuam maiin ka hria. Ka lainat takzet a ni. Ka pa lo haw chuan, ka u te vanga kan boruak nuam lo pawh a tikiam ta deuh a, U ruata ten chaw an rawn ei phei a, Rami pawh a che thei tawh a, mahse, thawkrim vak chi a la ni lo thung. Ka pa pawn a ei ve teuh mai. Chaw eikhamah U Ruati te nupa an rawn lang ta bawk a. Chhungkaw inkhawm neiin, ka pa chu a ding a. 

"Hei, kan rin loh leh beisei phak hauh loin natna tihdam theih loh, khawvel doctor ten an beidawnpui Cancer natna chuan min rawn luhkhung ve ta tlat si a. Pathian laka vuivai mai te pawh a awl dawn lek lek mai. Mahse, engkim chunga roreltu a ni a, keini ngaihtuah ang hi a ngaihtuahna a ni si lo. Kei chu ka dam a, i nu mawlh hian a tuar thiam lo hle niin ka hria a. (Ka nu chu a melh a) ni e, nupa inngai leh inzui nasa kan ni ve a, ka kalsan hunah phei chuan a khua a har dawn hle a ni. Ka lainat lawk khawp mai. 

Hei tihi in unau chu inni mai a. Ruati hi chu pasal fanau duhawm tak a nei a, Ruatpuia lah an nu Remi avang hian ka ngaihtuah em em lo bawk. Lawma hi puitling ber tura ka ngaih i ni a, mahse, tun hnaiah i zia a dang chho hlek hlek mai a, Pari pawh kan famo i ni a, i rawn lawiluhna a la rei lo naa, Remi nen kan en dan che a danglam chuang lo tih hria la. Ka duh dan chuan ka kal dawn a nih rau rau pawhin ka fate hi ngaihtuahawma inawm ka duh lo va, Dingpuii pawh ngaihtuahawmin a awm lo turah ngai ila. Lawma te nupa hi eizawnna mumal tak inla nei lo va, School-a i inhlawhna ringawt hi chu nakinah chhungkaw chawm nan a la tawk zo dawn lo tih inhre tho ang a. Ka kalsan ta che u a nih pawhin huan saw i kutah ka dah dawn a, engkim saw a puitling vek tawh a, i thawhrim leh rim lohin i hlawk leh hlawk loh a hril dawn a ni. Dingpuii pawh nakinah pasal fanau te pawh i la nei ang a, mahse, i nuta te hi eizawnna mumal nei lem lo an ni tih i hrereng tur a ni. I thlahthlam hauh tur a ni lo. Ramteii pawh a fel a, ngaihtuahawmah ka ngai lo va, mahse, a la naupang deuh a, pasal thlan kawngah fimkhur turin ka duh che a ni. Bawihtea hi chu a pi a dam chhung chuan a rethei dawn hauh lo va, mahse, a pi pawn upat lam a hnaih tan tawh a, a pi awm loh huna tuamhlawm tur chu Lawma te nupa in ni. Bawihtea hi i fapa a ni tih englaimahin i theihnghilh tur a ni lo.. " a chau deuh aniang, a thu ta a. Khuh kharh kharh chungin, Tin, i nu hi ka awm loh hnuah pawh inlo zahin in lei pathian a ni tih inhre reng tur a ni" a ti a. Kan ngawi thap mai. Ka nu mittui hru fap fap chuan ka hnuk a tiulh. Kan ngui nghiai mai. 

Chutiang chuan ka pa chu a theih ang anga in lama enkawl tur chuan hma kan la ve a. Kan in piah lawka nurse, Marini kan hire ta bawk a. A felin a mawng a zang bawk a, a enkawl hneh viau mai. Sawi tawh ang khan a natna a lo rei tawh a, a rawn lan chhuah meuh chuan a hniam rawk rawk mai kha a ni si a, Hmuh theihin a taksa pawh a chhe chak a ni. Mahse, ka pa chuan kantu leh rawn lenchilhtu a ngah em em reng a, chhungkaw hung tak kan ni lo naa, veng chhungah ka pa hi a inhawlh lawr loh tehlul nen a dam loh thu hre tawh phawt chuan an rawn kan tihtheih a ni. An ngaihpawimawhna chuan ka hnuk a tiulh lek lek hial zel. 

Kei pawh class ka kal ve zel a, Rilrua ka pa a chen tlat avang hian hlim taka han nuih báwk báwk te hi a harsa ve thin. Ka thawhpuite pawn min lainatin ka pa kanna pawisa an thawhkhawmte chu min hlan hial a. Mi hi an va tha tehlul êm. 

Rosangpuia pawh a hotel din thar turah rilru pe tanin siam that ngai lai turte chu engineer te nen an bei chho ta a. Lan pawh a rawn lang tam hman lo. A hun awl erawh ka tan a zuah ve ngat ngat thin. Zan khat chu in leng kan nei leh nual a, Rami nen hian thingpui lumin kan phe buai deuh reng mai, U Remi leh URuati te rawn len chang chuan min chhawk ve bawk a. U pari chu phut pawh kan phut buai peih lo. Rooma tawm bak thiam a nei lo angah kan ngai tawh. U Ruati hian a ngei thin khawp a, mahse, ka nu hian a khap thin. Thingpui ka lum a, Rami erawh a hmeh a zawh tawh vangin lei turin a chhuak a. Dawr hi a hla hran lo. Phone ka khawih pah a, "Miss, i cool tawh e.. Hlim lohna riau nei i ang" Sama khan a rawn ti nawlh mai. Kan inbe ngai zen zen lo va, eng emaw chang zeuha han inbiak chu kan nei. 

"Chutia mi? Ka tha reng alawm" ka va ti a. 

"Aih, i rawn kal tirha i phur sarh ang kha a ni tawh miah lo.. I bialpa nen in inthen mi! " a rawn tih chuan ka khi sak. 

"Then lo ve. Tak taka ka pa a dam lo va, min tingui deuh a" ka ti ta a. 

"A va'n pawi em em. I hlim hmel kha hmuh nuam ka ti asin" a rawn tih chuan ka lai lek lek. 

"Engkim a tha leh vek mai ang" ka ti ta ringawt a. 

A hnu deuhah, "Tlangval puitling deuh nih ve ka chak" a rawn ti teh ngawt a. 

"Ngati maw? " ka lo ti hu. 

"Ka ngaizawng ve ngam dawn che a" a ti ta mai. Ka reply ta lo. Min en dan leh min biak danah hian eng emaw a awm hi chuan ka hre thin. Mahse, ka ngaihbel duh lo lui thin. Amah a felin a rintlak a, ka classah pawh attention pe tha ber a ni thin. Ngainatawm ka tia, a hmel pawh a tha. Mahse, he lam hawi zawnga inbiak erawh ka duh lo. Rosangpuia'n a hriat lek phei chuan College kal a remti tawh lo palh ang. A thu a tlang thei ropui si. Rami a rawn haw a, thingpui ka siam nghal. U pari chu sam hnawk niaih hian a rawn chhuk ve a, Thingpui hmeh chu a rawn ei tuam tuam. 

"A chang chuan inleng neih hi a hneawm ngawt ang" a ti a. 

Kan chhang lem hlei lo va. A phut pawh hi kan phut peih tawh lo a ni ber mai. U Lawma lahin a tir duh lo nge ka hre tawh lo. Ka pa dam loh atangin U lawma chuan zu a in ta loin ka hria a, ka chungah a inlek viau tawh lo bawk. 

"Khawi ka lo sem ang" tiin tray chu a chawi nawlh a. A va sem dan dan a, nem tak taka mi te chu biain, anni pawn an lo fak liam liam a. Ka ner sawk. That derna hi chuan rei a daih tak tak chuang lo e. Tray a rawn dah a, an roomah a chho leh daih. A kawngná hi a chhuanlam ziah a, mahse, a duhzawng thilah chuan a chhuak reng thei tho. 

"U, Mama awmdan hi ka hrethiam lo, tun lai chu" Rami chuan a ti sar sar a. 

"Engtin nge a awm? " ka ti vat. 

"Ih, a mak a ni tawp. A changin min be duh miah lo va, a changin min be leh huam a, awmdan tur ka hre lo. Bakah a rui zing riauin ka hria" a ti a. 

"A va buaithlak ve aw.. Ka lo be chhin dawn mi? " ka ti a. 

"Nia a pawi chuang lo. Nizan te khan mut tawh hnuah, 'Lo chhuak rawh' min rawn ti sek a, ka ngam tawh si lo va. Hei tun thlengin min la be duh lo" a ti a. 

"Mate, A fel ve viau emaw ka tia, ka lo duhpui ve deuh mai che a. Mahse, a awmdan vel chu a mumal lo e. Then dawn ta la i thei ang em? " ka ti ta a. 

"Theih loh tur a awm lo. Ka then thei reng" a ti nghat a. 

"Be hmasa bik miah suh. A lo biak hunah che min hrilh dawn nia" ka ti a. A bu nghat nghat mai. 

Mapuii nen khan whatsapp lamah kan inbe zeuh zeuh thin a. Mak takin kan inkawmngeih phian. Ka lakah rilru chhia a pu lo niin ka hria. 

"Khami kan tleirawl laia Sangpuia ka va hmu te kha ka pa remruat vek alawm. Ka pa hi mak ka ti thlawt. Sex kan hmang tih erawh kha chu a hre bik lo maithei. Kei khan kan han nih takah kha chuan Sangpuia kha ka duh ve ta lutuk bawk sia. Mahse, Tleirawl lai ngang a ni bawk a. A pa boral hnu lawka Dubaia min dah a tum te khan a ngaihtuahna ka hre si lo va, ka lo chak ve em em a. A thluak kha ka umpha meuh lo a ni e" a rawn ti.. Pu Thangluaia hi eng ang pa nge maw a nih le.. Sum leh pai vangin ama fanu ngei pawh hmanruaah a hmang duh chu a nia. 

"Bawihtea pa nen kan chen dun khan ka hmangaih tak tak ka tawng niin ka hria a, mahse, nau ka pai tih a hriat khan a thinrim ta em em sia, na ka tihzia kha aw" te a rawn ti ve thin. Ka khawngaih thin hle. Rosangpuia chu ngaihzawng enin a en ta lo niin ka hria a, ka thla pawh a muang ta deuh. 

Ka class bang chu min ngen angin Rosangpuia inah ka peng haw a, a rilru a hmang nasa aniang, a chauh hmel riau. A roomah kan chho leh a, eng dang mah sawi hmain min fawp vawng vawng a, kei pawn ka lo chhang let ve bawk. 

"Ding, ka nupui ni tawh la ka ti hle mai. " a ti sup a. 

"Kuminah chuan ka thei lo alawm" ka ti ve tlat si. Kum erawh a tawp dawn ruai chu a ni tawh mai a. 

"Mami pawn min rawn nawr sek tawh a, keimah maia hetia ka awm hi min lo khawngaih ve lehchhawng aniang" a ti a. A nui hak bawk. 

"Nakkumah remchang a awm mai ka ring" ka ti a. 

Ka pa dinhmun leh ka u te nen kan boruak min zawt a. Ka hrilh a. "Innei ta pawh ni ila, ka nu leh Rami te ka khawngaih. U pari sawn a hlau dawn hlek si lo va" ka ti a. Zep loh chuan saw nu vang sawn inneih ka huphurh phah vek. 

"Kan inthentir mai dawn em ni? " a ti nghut a. 

"U Lawma sawn pathian biakin a be lo chauh a nia, a then ngam awzawng lo vang" ka lo ti a. 

"Video kha en se chuan a ngaihdan a thlak ve mahna. Mahse, tul ka ti lo" a ti lawi a. 

"An inneih hlen chu ka ring vak chuang lo. U pari a thatchhe em a, U Lawma a che fel ve sia, inngeih loh hun an nei vat ang" ka ti a. U te nupa pawhthen tum ang ziazanga ka inngaihtuah chuan nuam ka ti vak lo. 

"Ni e, i pa natna te hian a inhmuhchhuahtir ve maithei asin" a ti a. Min kuah reng a ni mai e. Min ngai ve hle niin ka hria. 

"Rogera hi pawm ve thin ta che" ka ti a

"Aih, ka ngainat ka hlau" a ti hmuk. A sawi awmzia erawh ka hrethiamin ka inhria. Tlai deuha hawn a chi si loha, ka hawsan ta a. In ka lut chu thil thleng a awm leh ta tih ka hre mai. Ka nu chu Living roomah a lo thu tûm bar a, Rami'n eirawng a bawl. U Lawma leh U Pari te pawh ka nu epah an thu a, mi dang an awm lo. Ka pa roomah a mu bawk sia. 

"Tun kan harsat buai nak alaia dawr siam lo tih hi zawng a ngaihtuah tawithlak deuh a ni" ka nu chuan a ti nghat a. Kei pawh ka thu ve nghal. 

"Aw.. I hria alawm. Ka pa dinhmun heti hi a nia, tun atanga kan insawhngheh ve loh chuan.. Nakinah chuan a khirh vek dawn. I gp chu la chhuak la a ni mai.. Ka hlawh tlemzia i hrereng a, pari'n eng emaw zat a lo lakluh pawh manhla deuh tur a nia sin" U Lawma chuan a ti khur dat dat a. 

"A la hun lo ka tih chu mawle aw.. Tun ataka sum thawhchhuahna lo ngaihtuah vak kha a tul ber lo, i pa saw tha takin enkawl ila a tawk rih" ka nu chuan a ti chang ve rât a. 

"Aw le, anih chuan Pari chhungte kan pur mai aniang chu.. " U Lawma'n a ti nghat. Chutiang em em chu ka nu chuan a ngaingam dawn si lo. Awmhmunah ka lo insangruh ve vak. Pari idea leh bawk a niang. 

"Aw le, a tha e.. Induh ang chuan inti dawn nia. Engzat nge inmamawh dawn a? Eng dawr maw hawn intum? " ka nu chuan a ti ta nge nge a. 

U Pari chuan, "A tlem berah nuai 10 chu kan mamawhin ka ring. Bangkok leh China dawr ka duh ve sia, thawmhnaw a bikin mipa lam hi a hlawk deuh a, dawr luah tur pawh ka hmu tawh a.. Pawisa a awm chuan a fel a ni mai" a lo ti zat zat a. Ka nu a ner sak. 

"A tha alawm. Ka lo la chhuak dawn nia.. Nuai 10 em em chu a tam lu deuh e, nuai 6-in bul tan phawt rawh u.. " a ti ta a. Fate vang chuan a inhnukhniam lo thei ta lo a ni. 

U pari chu hriat mang loh hian a phun zui hlak a. Kan chhang tawh lo. 

Hmeichhe pakhatin hetiang taka chhungkua a chawkbuai thei hi, keimahni lam zir loh te pawh a ni mahna. Ka nu leh pate thiam loh pawh a ni thei, a chhan chu mi an hauin an ti ve bawrh bawrh ngai tlat lo va. An tha en ve ngawt zel a, an zuam telh telh a, a tawpah chuan hei… ti hi kan ni ta chu a ni mai e. Han kal zel se la kan hre chho zel mai ang chu.. 

Ka pa pawh a zia rih viau e. 'Pa' tih ruala a lo eih zel thei hrim hrim kha a hlu ber mai. Tichuan, a tawi zawngin ka nu chuan an dawr bultanna tur chu lak chhuahsakin an han tan ve ta chawt a. Bazarah dawr lian ve fu an luah a. Dawr luah man pawh a to angreng viau. U Pari chu a thiannu Puiteii a tih nen bungraw lain an zin ta vang vang a. A awm loh hian a nuam daih zawk. 

Zirtawp tlai a ni a, Rosangpuia hian dan khauh tak a siam thar pek a, "Ka zin te a nih loh chuan leh inchhungkaw rokhawlhna a awm loh chuan, Friday zan apiangin zanriah kan ei chhuak ang" a ti a. Ka zawm lo thei lo. 

A dawrah kan thu dun ta ran a. Hnathawk ten min ngaihsak tha kher mai. An pu ber a ni bawk a. Ka'n sawi belh leh duh lawk chu, a dawra thawkte hi hmelchhe tak, hmuh hrehawm khawp an awm lo. Hmel hlim sarhin tu pawh an hmachhawn a, Hei vangte hi a niang, A dawr a lun em em ni. 

Sea food a lo thleng thar bawk a. Kan ei thei dawn e. Ka duh tih a hre ve kar bawk a. Wine tlem a in a, kei erawh tuisik 😢.. Mi chawl renh reng chuan min hmu duh angreng khawp mai. Amah Rosangpuia hmu fo mah se, kei chu min la hmu tam lo ve bawk nen. A nuam vak lo. A bialnu te an chhe lo thei bik si. Kaikuang tui ti zeta ka ei mawlh mawlh laiin, "Sang" a rawn ti hawm hawm a. 

Ka en vat. Nula sang zeih zawih, cher lek lek tihtheih tur mah se, nalh tak tho hi a lo nia. A hmel erawh Julie aiin a tha lo. A pian erawh a nalh! Tin, ka hmu fo tawhin ka hria. Aw. Ni e, model a ni tak. Tu nge a hming kha aw.. 

"Miriam, nang maw? " Sangpuia'n a tih chuan ka hre chhuak chiah. 

"Tukinah ka rawn thleng chiah a. I dawrah ngei zanriah ka rawn ei leh thei ta.. I lo dam maw? " a ti sar sar a. Ka awm ve reng sia, min melh eih lo. 

"Aw ka lo dam alawm. I thang rei hle mai. Hei ka bialnu Dingpuii a nih hi, Ding, hei hi Miriami i hria ang.. Model lar tak kha" Tih pahin a nui sáng a. Miriami chuan thîp angreng tak hian min rawn melh a. 

"Bialnu a?! " a ti hlak a. 

"Yes.. Nakkum lamah inneih kan tintuah alawm. I rawn lang ve ang chu" Sangpuia'n a ti zawm zat a. Ka nuam veng veng mai. 

Miriami chuan min thik tih hai rual erawh a ni lo, Sangpuia nen chanchin an lo nei tawh a ni maithei. 

A thianten an rawn auh vangin, "Kan inhmu leh dawn nia" ka bialpa melh paha ti zauhin a phei ta hnalh hnalh a. 

"I lo mutpui leh tawh tih min hrilh hlek suh" ka ti hak a. 

A nui hawk. "A itawm loh e" a ti sup a. A sawi dan tehtawp chuan ka nuih a tiza leh deuh si. Rilru zau tak ka put a ngai dawn tih ka hria, ka bialpa hi a lar bakah a hausa a, a chhe lo bawk si, nula kei ka ni inti chin thenkhat tan chuan bawh ruak ruak a awl ve dawn tlat. Mipa a ni miau a, lo mutpui tawk pawh a nei ang. Kan inzawm hmaa a nun hman dan chu ka thununsak thei lo va, tum mah ila ka thei tawh lo. Chuvang chuan a nih anga pawm maia zau taka thlir tawp chu ka hahdamna tur a ni tih ka hria. 

Kan ei zo a, ka puar viau. 

"Haw tlai chi ka ni lo a nia" ka tih mek laiin, A staff te chu rawn kalin kan pahnih chuan min rawn din hual titih a, music mawi zet a rawn ri riai riai bawk. A ngaihna ka hre mang lo. Rosangpuia chu a ding a, a no chu a chemte ken laia vaw riin, "Khawngaihin min lo ngaithla teh u" a ti thum chhak a. Chaw ei ve ho chu an rawn hawi ta thap mai. Engtin emaw ka awm. 

"Ani hi (min rawn kawk a) ka bialnu, kum eng emaw zat chhung a ruka ka lo vei tawh, ka nupui ni tura Pathian hnenah pawh ka lo dil ruk thian hial kha a ni a. Vawiinah chuan ka bialnu a ni ve ta hial a. Ka hmangaih a, ani hi ka ta a ni bawk. Chuan, zaninah hian ngen duh ka nei a, nangni hian min hriatpui ula ka duh a ni" tiin a thingthi ta mai le.. Ka chiái vek. Ka hamhaih lutuk chuan ka hmui ka hup tawp a, ka ding hliai bawk. 

Min rawn melh chho a, thawm chu a reh dûk mai. Bawm kil li nei mawi zet hi rawn phawrhin, A hawng a, Diamond ring, simple tak si hi a lo inkual rám mai. Ka khur vek thei. 

"Dingpui, ka hmangaih che. Ka damchhunga ka kianga awma ka fate nu ni turin ka duh che a, a nuam leh a hrehawmah pawh vawn zel che ka duh a ni. Min nei duh ang em? " a ti hniam raih a. Ka thaw lo emaw ka ti! Thawm a ri ta huk. 

"Yes yes yes" tiin an lo au rual a. Ka zak, ka lai bawk si. Ka tah a chhuak tel bawk. Ka beisei loh lutuk thil thleng chuan min ţhawng na em a ni. Mittui tling pamin, "Aw.. Aw " ka ti tham ţiak a. A nui sak. A rawn ding chhuak a, zungbun chu min buntir ta a. Ka khur der der mai. Ani pawh tlem chuan a zám tih a lang. Kut an lo beng dur dur a, an hmel a hlim hlawm hle. Miriami hmel tur ngan mai tih loh chu hmuh an nuam vek. Mi zawng zawng hmuh laiin ka inrin hmain ka hmuiah a rawn kiss ta zeuh a. Au thawm a nasa hle. Kei pawh ka zak kual peih tawh lo. Rosangpuia nupui hual ka ni ta. Ka pa dam loh atanga a der tel lo va ka nuih leh hmasak berna a niawm e. 

Dawr atanga chhuakin Aizawl chu kan fang kual a, ka nu a va call vek tawh a lo nia. An phalna thlapin kan leng kual a nih mai chu. Hmun fianrial laiah dingin khua chu a vawt deuh tawh bawk a, inkuah dun rialin khua kan chuan a, ka hlim takzet. Hnai zeta min rawn melhin, "I biang pawh a tai têk mai. I duhawm takzet" a ti sup a. Min rawn fawp nghal. Ka lo chhang let ve zat. A duhthawh telh telh a, min pawm kangin motor back seat kawngkhar chu a hawng a, min nawr lut a. A lum nghal huk mai. Min rawn bawh leh nghal zat a, a danglam tlat. A wine in kha a thawk a ni mahna. Ka hnute te chu a tham tawn tawn a, ka lo chhing diar diar. Valpuia nen pawh khan a tawp kan thleng teuh thin fu mai. Mahse, virgin ngeia pasal neih ka duh a, ka insumthei. Rosangpuia erawh a danglam chiang, ka chakna te chu a hîp kang emaw tih mai tur a ni. Ka rilru tlemte erawh a la fim ve a, "Tunah ni lo" ka ti zawi sap a. A thaw hawk a. A tho ta vat. Hei hi a ni ka duhna em em chu. Hmeichhia tiluia nawrlui ngawng ngawng chi a ni ve tlat lo. Mipa a ni miau a. 

"A chang chuan a hun hmaa chet hi ka chak thin" a ti thawp sup a. 

"Ka hria.. A hun a thleng tep alawm " ka ti ve mai a. 

Dar 9 a rik dawn tawh vangin kan haw ve ta a. Ka phone ka en chu, ka nu leh U lawma miscall a lo awm nual. Ka nu chu ka call a, "Khaw nge inawm? " hlauhthawn hmel angreng tak hian a rawn ti a. 

"Hei kan rawn haw mek e" ka ti a. 

"Lawma a thinrim hle a ni" a ti zawi sap a. 

"Engvang chuan maw? "

"In inhual lai video kha a darh vek tawh alawm" a ti ta a. Ka chhing sawk. Tu phiangsen chuan nge maw lo tidarh leh ta ni.. 

"Aw ka rawn thleng phawt ang" ka ti ta ringawt a. Rosangpuia pawh ka hrilh ve a, a rum nghut. 

"I u hi misual a ni lo. A nupui hian a thluak a su a nih hi.. " a ti ta a. 

"A dik.. U Lawma hi kan unau zingah pawh rilru tluang bera kan ngaih a ni thin.. A mak khawp mai. Ti em ema a nupuiin a kai kual hi" ka ti a. 

"Hmeichhe fing kherek tawh laileng chuan mi hneh theihna riau an nei alawm" a ti ve mai a. Ngawi rengin kan tlan. Ka u hmachhawn dan tur te ka ngaihtuah lawk a, kut a thawh leh mai ang tih erawh ka hlau viau. A chhan chu Rosangpuia a insum zo leh dawn si lo va. 

In kan thleng a, kawngka ka hawn rual rualin, min rwn pan a. 

"Tenawmnu, i pa thi chhawnga a awm laiin tihian nuam i lo chen a maw? " tih leh ka sama keh a rual nghal a, zu rim a nam huam bawk. Chhuatah chuan min nawr thlu a, ka bawk thlawp mai. 

Ka nu a lo rak chul a, in leng kan nei lo hlauh chu ka va lawm tak em. Ka uin min rawn keh leh a tum lai takin, "Lawma, a tawk e. " tiin Rosangpuia'n a kut a rawn chelh a. A mitmeng a thim raih mai. 

"Nang mihring hi rawn inrawlh tawh suh. Ka duh lo che ka tih kha.. I hausakna, i sum i engmah saw ka duh lo. Chhuak rawh" a ti ram hmuk a. Ka nuin min kai tho a, a hlau tih ka hria. Hetianga inrikrapna hi a hmain kan in chhungah a thleng ngai lo. 

"I farnu hi kut i thlak leh dawn ai chuan, ka bulah awm rawh se" Rosangpuia aw chu a ring hran lo, a hlauhawm thung. 

"Kut ka thlak i duh tawh loh chuan hmu tawh suh. A nutapain ka duh lo che tih hrereng chungin engvangin nge hetiang hian i la hmuh ziah? Chapona pawh i nei ve lo em ni? " a ti ta khar khar a. 

Ka nuin, "Lawma, a tawk. A mualphothlak em mai. Pari, inpa hi chhohpui rawh" tiin U Pari a va melh a. 

"Dingpuii hian a zah lo em alawm. Ti nge he pa hi a hmuh ziah? An la inhual zui.. U te thu pawh awih lo chu sawisa hrep ang hmiang" a lo ti nia! Kal ka tum chu ka nuin min chelh tlat si. He hmeichhia hi ka khawih chak lutuk. 

U Ruata te rawn luh mek laiin U Lawma chu a che thut a, ka kut chu lain, "He zungbun thlahlel hian maw i lo chhuah a, khawi. " tih leh ka zungbun chu phawi a tum a, kan buai ta nuai mai. Hneh zetin U Lawma chu a kawr hnungah a rawn thawm a, chhuatah a theh thal thlawp,.. 

Ka banah a rawn chelh a, "I farnu nen hian kan inhmangaih tih vawi tam ka sawi tawh e. Ka nei dawn. Min nawr miah suh. Ka duh loh thleng thleng min nawr suh, Lawma" Rosangpuia chuan a ti vawt raih a. A khurh deuh danah a thinrim takzet tih ka hria. 

"Engvangin nge ka nupui kha i tihmualpho.. Mawh? Ka ngaidam thei lo che. Zak takin i siam asin" a rawn ti ţuau a. A rui lungpuam lungchhia a ni pek ang chu.. 

Rosangpuia chuan U Pari a pan a, a mitah tak melhin, "Thudik hrilh rawh. I hrilh lo a nih chuan, ka tih duh hauh loh ka ti dawn a nia" a ti ta mai a. U Pari mitmeng chavai leh buai niaih chu kan en thap. 

"Eng thudik maw? " khur lek lek hian a ti a. 

"Ka pindana thil thleng kha. Nangmah vanga i pasalin min hmelma en reng dawn ai chuan, hmeichhia mah nila ka dim dawn hauh lo che a nia" a ti hriam hraih a. Hlauhawm tak a ni. 

"Ka. Ih, engmah a thlen loh kha.. Lawma hi a rui a, a ruihchilh a nih hi. Ngaidam r'u, ka lo hrilh ang.. Lawma, hawh chho ang" a ti sawk sawk a. A pasal chu kuahin chhohpui a tum a. 

Rosangpuia bawk chuan, "Ka inrawlhna tur a awm hauh lo naa, ka hmangaihber chenna in chhung a nih miau avangin thil pakhat chiah ka hrilh ang che. Pari, pasal ni loin nupui i ni tihah hian chiang tawh ang che. I hrethiam, ka sawi chu" a ti ram hmuk a, u pari chuan a chhang ngam lo reng reng. U Lawma lah a rui sauh emaw ni a nawi zual sawt. An inkuah chho ta a. U Lawma phun hluk hluk erawh kan hre pha tawh lo. 

Ka nu chuan, "A pawi em mai. Video kha a lo hmu ve bawk sia.. Keimah thlengin min mawhpuh a. Engpawhnise, a pa hetianga a awm chhung chu nangni pawh lo insum u la.. Thikthu te hi a chhe hma ve bawk nen" a ti mawlh mawlh a. 

U Ruata thin a thawk nge, "Lawmawma hi inhnawtchhuak ngam lo mi? Buaina siam reng mai. A hmain hetiangin kan awm ngai lo. A nupuiin a fuih khaw lo vek tawh a nih hi" a lo ti ve hmuk hmuk a. Ka thu hnawk. 

"Keimah vang vek a nih hi.. Keimah vanga buaina hi chhuak zel a ni. Awm lo ila inhlim mai ang" ka ti ţiau a. Ka nuin min rawn kuah vat. Ka inngaihtuah lungpuam tlat! Ni e, Valpuia nen kan inthen atang khan buaina ka nei reng a, U Pari a rawn lut a, ka buaina a rawn belhchhah a. Engah nge maw Rosangpuia pawh ka uin a hua tih hrereng chunga ka zui luih tlat ni… chhungkaw boruak nuam tak ni thin kha hremhmunah ka chantir ta niin ka hria a. 

Ka á huih mai. Rosangpuia hi thlah ila, a hmaa kan boruak ang kha kan nei leh thei ang em? Kan neih lehna a nih dawn phawt chuan ka thlah ang. Ka chhungkua hi ka hmangaih alawm. Ka ding a, Sangpuia melhin, "Inthen ila engkim a dik vek mai ang. Ka thiam loh vek a ni. Ka zui lui tang tang che a, ka u-in a hua che tih hrereng chungin. Tihian mi dang pawh an hlim loh phah vek a. Keimah vang veka thleng a ni. Inthen ila, a hmaa kan boruak kha kan nei let leh mahna… ka tihpalh aw" tiin zungbun chu ka phawi a. Min melh ngawt ngawt ringawt. Mittui luang chungin ka lek a, a kut chu lain a kutphahah chuan ka dah a. Ka heh ka pet fan fan. Thuk zet hian min melh a.. Engkim chu a reh vek, ka chhungten min thlir thap tih erawh ka hria. Ka chet dan teh thut chuan a tihamhaih ve deuh a ni maithei. 

"I tihtawp theih a ni lo.. " Rosangpuia aw chu a chang beng bawng viau. 

"Maw" ka ti ha ringawt. 

"Ka ta i nih hi.. I hria" a ti leh nghut. 

Zungbun chu min buntir a tum a, "Aih.. Ka sawi kha.. Rosangpui" ka ti vin tuar. 

Ka nuin, "Mate" a lo ti ve thawt. Rosangpuia chu a rum nghut a, chak zetin ka kut chu a rawn pawt a, min bun luihtir hmiah. Ka sama tuai pahin, "Duatpui, thil i ngaihtuah tam lutuk a, i buai a nih kha.. Keimah leh i pa chiah ngaihtuah rawh. A tha em? Hahdam rawh le" tiin a awm nghengin min kuah thlawp a. Mi dang an awm ve tih ka hrechang tawh lo reng reng. Engtin nge he mihring, mi chak leh huaisen em em hi kei hian ka thlah theih tehreng ang? Ka chakna zawng zawng a hipkang vek tawh si a! 😢

Ka pa khum bulah kan ding a. Ka u Lawma te tih loh ka chhungte pawh an awm ve.. Ka pa chu a rawn meng diar diar a. A hawi kual a, a chauh hmel hle. Ka va lainat tak em. Pa chak leh taima tak kha engmah tithei tawh loin a mu ta reng mai chu a ni sia. 

"Ka pu, i mi ngaihdamna ka dil duh a ni. I hriatpuina leh i phalna ni miah loin i fanu hi inhualna zungbun ka buntir a.. " Rosangpuia chuan a ti sup a. Ka pa chuan min rawn melh a, a mitmeng erawh a dam hle. A kut chu ka zuk vuan vat a. 

"Ka fanu hi i nei duh takzet em ni? " a ti tham chhal a. 

Rosangpuia a bu nghut. 

Ka pa chu a thaw hawk a. Ka kut rawn hmer nat salh pahin, "Ka dam lai ngeia i neih a ngai a nih chu.. Ka fanu duat em em pasal neih niah chuan tel ve ka duh a ni" a ti ta a. Ka mittui a hnám sawk.. 

"Pa" ka ti tiau a. 

"Ni e, ka naute duat kha i nia, i pasal nei lai chu chiang taka hmuh ve ka duh a ni" a ti leh a. 

Rosangpuia chu a mitmenga phurna de sar sar nen a rawn kal hnai a.. 

"Ka lawm e. Ka tihlawhtling ang. Tin, i fanu hi hmeichhe hlim berah ka siam ngei ang. " a ti nghet charh a. Ka pa chu thei leh thei lo hian a nui a, a nui ri zo lo thung. 

"Ka fanu hian pasal neiin, ngaihngam takin a pasal inah lawi lut se, kei pawh thlamuang takin ka chawl tawh ang.. " tiin ka nu chu a va melh a. Ka nu erawh a no bawk a, a lo inhru leh chawt chawt tawh. 

"Mahse, Pa, Lawmawma te nupa hian an do tlat sia. Buaina a awm mai lawng maw! " U Ruata'n a rawn ti ve ta a. 

"Ka hria e, ka hre vek alawm.. Engkim hi ka hria. Chuvang chuan ka thurochhiah pawh ka tidanglam tawh a ni. Lawmawma pawh naktukah ka bia ang. He in luaha i nu te enkawl turin ka ring zo ta lo a ni. Chuvang chuan, nang pawh Ruatte, Ú chan i chan a la ngai mahna.. Lo inbuatsaih ang che" a ti ta a. Ka nu nen an sawi dun vek tawh a ni ngei ang. 

A car thleng ka va thlah a. 

Ka kut chu lain, ka zungbun chu a chelh a, "Ka'n phawi leh si mai ang e.. I duh si lo va" a ti phut a. A rang a rangin, "Kal teh" tiin ka la let vat a. A nuih a za kher mai. Kei pawh ka nui ve tho. Ka chalah a rawn fawp zauh a, "I period calender min rawn thawn ang che" a ti sup a. 

"Eng atan! " ka ti nghek. 

"Inneih zanah nupui thi pût ka mutpui duh lo"a ti nghut. 

"Hmela" tiin ka nui hak a. 

"I pa kha enkawl tha ang che. Kan inneih niah hlim taka a nui hmel hmuh ka duh a nia " a ti a.. Ka bu nghat. A tlan liam lai chu thlirin, "Ka vanneih ni a thleng ve dawn ta" tiin ka ngaihtuah a.. 

Ka pa nunna chunga thuneitu nih erawh ka va chák si em…!