Rosangpuia 14

ROSANGPUIA.. (14)

Ziaktu: Toni Râlte

(Adds inclick khan maw, 10 sec vel nghak ve lawk r'u aw. Hrethiam lo inawm takin ka rawn sawi leh lawk. Min click sak zel thin hi ka va lawm thin tak em 😍😘

Rosangpuia ka call a, a la thei lo zui. Ka awmdan chu a pangngai hlawl lo. U Remi ka bia a, "Engtin chiah nge ka pa chu a awm? " ka ti a. 

"Hei kan lo chhohpui dawn e. A thawk a hah a,. " a aw chu a pangngai bik lo. Rami ka hrilh ve a, ani pawh hmuh theih khawpin a danglam nghal. Ka nute lo chho chu ka lo nghak tawp mai. Ka vei sek a, ka mangang a ni. Rosangpuia'n a lo call a, "Ka pa a buai a, a thaw thei lo" ka ti nghal tâwng. 

"Aw le, hahdam rawh. Duatpui, ka lo kal nghal e" a ti dam thlup a. Hna thawh tur kha a nei sia, va tihbuai sek pawh hi ka duh bik lo asin le. 

Ka nute chu an rawn thleng rang viau. A men par a, a ţap tih chiang takin ka hria. Ka pa chu an en nghal zung zung a, a thaw a zawi em em a, kei phei chuan thaw ang pawn ka hmu lo. Chet ve dan tur reng reng ka hre lo. U Ruata leh U Remi ten an buaipui a ni ber mai. 

Ka darah a rawn vuan a, "Engkim a tha vek ang. Hlauthawng suh aw" a rawn ti dam dup. Ka hawi let vat a, a lo ding leh reng tawh. He pa hi chu aw. Amah ka hmuh chuan ka lung a no zual a, ka ţah a chhuak ngawih ngawih. A chauh ve dawn tehlul nen, keimahni vangin hah pawh a hahchawl hman si lo. 

Doctor chuan, "Naktukah biopsy kan la ang. A chuap lam niin ka hria" a ti a. Ka pa chu oxygen an pe a, a harh lo hrim hrim. Ka va khawngaih tak, pa chhel tak kha a nia. A hmaa incheckup ka sawite khan duh ve ni se tiangte hi kan tawng kher lo tur a nia. Zo pa tih takah a luhlul em a ni. Ka nuin ka pa chu a riahpui dawn a. U Lawma te lah an haw tawh nge haw lo pawh kan hre si lo. A chhan fak sawi tur nei mang loin an nupa chu ka haw riau.. Eng han tihtheih em em ni hek lo le.. U Ruata te nupa pawh chuan min hawnsan a, Rosangpuia erawh a la awm. Coffee a zuk lam a, Ka pa awmna ward pawn lamah kan in dun a, ka nu erawh ka pa bulah a thu thung. 

"Buaina hi ti nge maw ka tawh reng bik le.. Ka vanduai tiraw? " ka ti hap a. 

Van lam melhin, "Nangmah i nih vang a ni kher hleinem, mihring chungah chuan tiang hun hi a thleng ve reng alawm" a ti a. 

"I chau awm sia, va haw tawh rawh. Eng emaw a thlen chuan ka rawn hrilh ang che" ka ti a. 

"Ngaihtuah vak vak suh aw. Nang tal i intihchak a ngai a ni. I nu thlamuan tur pawn" tiin ka sam a rawn chul a. Ka bu nghat nghat. 

"Ka chauh vang ni loin hna laklawh ka nei a, ni e, ka va phei dawn hnai ang e. Tihtheih a awm rih chuang lo a. Tui taka i muthilh ka duh a nia aw" a ti sup a. Ka lung a chhia. Gate thleng ka zu thlah a. Mitmeng thuk deuha min melhin, "Ka awm reng aw" a ti leh nghut a. Kan inthlah liam ta a. Ka ruak huaiin ka hria. Ka nu bulah ka va thu ve a. 

"Incheckup rawh ka ti ka tia.. A duh tlat si lo va.. A pawi ngawt mai" a lo ti a. 

"Ni ngawt mai. A thu hi a duh ve lutuk a" ka ti a. 

"Bawihtea ka ngaihtuah mang e aw. Ka lo hruai ve mai lo ni.. " a ti leh daih a. A tupa hi chuan a ngaihtuahna a chhuahsan ngai meuh lo a ni. 

"A pa te an haw tawhte chuan an lo ngaihtuah ve mai ang chu" ka ti a. 

"A pa a ngainatna hi a tlahniam tawh em a.. Hei hi a pawi ka ti" a ti sap a. A pa nupui vang vek a ni tih ka hria. Ka thinrim lek lek zel. 

"U Remi te bulah pawh a awm thei mai ang, ngaihtuah lutuk suh" ka ti a. 

"Nang pawh va phei tawh rawh. Rami'n hrehawm a ti lutuk ang" a ti a. Nia, Rami a inthlahrun sa tawh nak laiin.. Ka pheisan ta a. Ka rilruin ka tawngtai bang lo a ni ber mai. Mahse, Pathian hruainain harsatna em em tawk loin zan chu kan tlingtla thei ta mai a. Zing ka thawh rualin ka pa chu ka va tlawh ve nghal. A lo la harh lo a, ka nu pawh a lo tho tawh. 

Dar 8 a pel hlek tawh tihin, U Remi'n min lo bia a, "Chaw hi Ruata ka rawn dahtir ang, Bawihtea hian a pi a ngai lutuk a, ka rawn hruaitir ve ta mai aw. A khawngaihthlak em mai" a rawn ti a. 

"Inbulah elaw a riah" ka ti ha a. 

"Umm, a pa te bula riah duh hek lo. Mahse, a mu tui lutuk a nia" a ti a. 

"Chaw te chu U lawma ten min lo pe dawn emaw ka tia" ka ti a. 

"An la tho si lo va, tunah dar 8 a pel tawh sia, ka chhum kep ta mai che u" a rawn tih chuan ka sa zak mai. Ka pa nikhua pawh hre loin a awm a, an la mu thei chu a nia. U Lawma ka hmuh dan pawh hi a dang ta riau mai. Ka pa hian min awm lohsan phei chuan, an nu hian a on thiam si a, ka chan a chhe hle dawnin ka hre tlat! Chuvang chuan ka pa hi a dam reng tur a ni. 

U Ruata leh Bawihtea pawh an rawn thleng chho thuai a. Bawihtea chuan a pi a bawh nghal. 

"Pipi, Pupu hi a va mu rei tawh em em? " a ti ve nuah nuah a. 

"A harh tep ang. Chaw i ei puar em? " a pi chuan a lo ti vat a. A bu nghauh nghauh mai. 

U Ruata chuan, "Nu, hetia mi dang zinga awm reng chu a thaw te a ipik ang e, cabin kan book mai lo va"a ti a. 

"Kan chang tawh lo pek alawm. A full vek' ka nu chuan a ti a. 

Chaw chu ka nu nen kan ei zui nghal a. Rami ka awmpui lai, Ka pa hetia a awm hma pawh khan ka nu hlirin eirawng a bawl a ni. Kei leh Rami kan awm loh chuan ka nu a hah ting a ni mai. Rami pawh a zia ta bawk a, kan harsatna hrilhin Doctor pawn a discharge thei ta a. Kan lawm hle. Mahse, Rami pawh a la inenkawl zui a ngai dawn tho. 

U Ruata chuan, "U Lawma te chu va rel lam ni loin nizan an rawn hawn te khan an la thinrim zawk mah a, tumah inlo awm lo kha.. An rui nupa hle lehnghalin ka hria.. An zahpuiawm ngawt mai" a ti ve suk suk a. 

"Ni e, ka ngaihdan a ni lo ve ta zeuh zeuh mai. I pa hi han dam fel se, in dang mai se a tha ang. Hetiang chuan chhungkaw boruak thlengin a tha dawn lo tlat" ka nu pawh chuan a lo ti ve a. A lung a awi vak tawh lo a ni. 

Rami leh ka nu te chu an haw ta a. Kei erawh ka pa ka awmpui zui nghal. Damdawiin lamah ka tâp rei ve ta hle mai. A tul miau si a. Rosangpuia nen pawh kan inbia a, Vawiinah a hotel lei chhawn tur kha a va en tha leh dawn a, "Min telpui ve thei la a tha a nia, 

Mahse, i pa kha tha takin enkawl la, hahdam tak khan awm ang che" a ti a. Buaina chu nei lo ila kalpui te pawh a chakawm ve reng mai. 

Ka pa chu a rawn harh ve tan a, a luhai zia bak insawiselna a nei ta rih lo. A thaw pawh a ziaawm tawh a, oxygen pawh an phawi ta rih. Biopsy an la dawn a, tin test neuh neuh an nei bawk ang. Hlauhthawnna hlirin ka khat. Ka pa hi a cancer vaih chuan kan hmabak a eng lo ngawt ang. Chawhma lamah test tur ang ang chu kan ti zo a, ani pawh a mu hahdam leh thei ta a. Chawhnuah ka nute ka bia a, U Pari emaw U Lawma emaw khan min lo chhawk zuai se, intihfai lawk ka duh tih ka sawi a. 

Ka nuin, "An intifai a, Pari u te an lo zin a niang. Chhungkaw chaw eikhawm an tia, hei chhuah an tum leh" a rawn tih chuan ka ling hlar mai. 

"Tenawm lutuk.. Lo haw tawh suh se" ka ti piap a. 

"Ka rilru a na ve deuh a, kei pawh. I pa hetia a awm laia chaw eikhawm lo tih ve sek mai" a ti ve a. Ka nu dawhtheih loh chin an thlen chuan an chawh ve ngawt ang. U Pari chu mo a nia, ka la hrethiam. Ka u mawlh chu a ni. Ka pa dam loh laia lo intihhlim tum ve sek.. A zia hi a dang sawt tawh khawp mai. Hei hi alawm nupa na nâ na chu a rei a, an zia a inang telh telh zel. Ka hriatchian deuh nupa pawh hi an pa hi pa fel leh thilphal tawpkhawk, mi dang tana malsawmna nih nuam ti em em thin a ni. A nupui erawh duham, uikawm em em, mi lêm lo leh mi chungtlak ching zet mai a nia. A rei a, an pa pawh a hneh daih, chu pa chuan an nu zia kaiin, tunah chuan an nu ai aiin a uikawmin mi hmuhsit a tina tawh zawk nia! Kan chenpuite azir hian kan nun pawh hi a lo danglam thei viau mai. "Hmeichhia chu a tlakna leilung azir" an lo ti mathlawn lo va. A dik reng bawk a. Mahse, anmahni thununa zilhhautu tur ber an pasal ten engmah an tih si loh chuan, an nupui zia kaiin an nupui ten an thunun ta daih zawk zel a. Chutiang nupui chu an tawrhhlelhawm ta em em thin a ni. Mipa mawhphurhna hi sang tak a ni. Chutihrualin thununa nawrkal ngai hmeichhia nih pawh a tha hlek chuang lo, hmeichhe tha tak nih hi a harsa lutuk pawh a ni lo. U Remi pawn a pasal a tha zawngin a kaihruai thei daih a nia. Kan U Pari ve tehlam hi chu a.. Ka zep lo, fakna tur hi a váng ka ti em mai a. 

Ka pa chuan, "Ka tha alawm. Ka ngaihtuahawm loh, zu haw rawh. " a ti a. Intihfai ka chak ve tawh bawk si, ngaihtuah ru tak chungin ka haw san ta a. Eng em a ti lo vang chu maw. U Remi tihbuai chhen lah nuam ka ti si lo, U Ruati lah vanduai asiamin a pasal nu enkawl ngaiin a awm ve mek a, a duh ang pawn min tawiawm ve thei lo. 

Ka nuin, "I awm zawn ve si a, i pa lahin min ngai si, ka han riahpui ang e" a ti a. Bawihtea'n, "Ka kal ve duh" a lo ti nghal vat. 

"Ka chau hran lo, Nu, ka riak thei tho alawm" ka tih pawh chuan, "Aa.. I pa hi zawng fate lakah pawh inthlahrung mi a nia, amah pawn min beisei ru tho ang. Bawihtea hi lo mutpui mai rawh" a ti tlat a. Nupa inngai tak an ni ve bawk nen, ka pawm ve ta mai. Bawihtea ka thlem nghal a, naupang tihmawh tak a ni lem lo bawk a, a ngen zui bik lo. Ka nu chu U Ruata'n a han thlah leh a. Keini pawh chaw kan ei zui ve nghal. U Lawma te erawh an la rawn haw lo. Rosangpuia'n, "Ka lo phei ang" a ti a. A khawharthlak lo deuh ang chu. 

Rami leh Bawihtea te chuan movie an en leh ta daih a. An inngai tawh bawk a ni. Kei pawn Rosangpuia nghah pahin tv ka en ve mai mai. A rawn thang rei lo. Ka bulah a rawn thu chat a, a rimtui viau. 

"Eng nge inhotel va en chu? " ka ti a. 

"A tha thawkhat viau a, mahse, sawi danglam hlek ka duh. Room tam tak nuam si lo ai chuan, tlem tak, class tak si awm se ka duhdan a nia" a ti a. A tha viau ang. 

"Rogera a la tlei ve zel maw? " ka tih chuan, "Tlei aniang, a ţap ngai pawn ka hre lo. Nu Madini sawn a vil hneh khawp a" a ti mai a. 

"E! Taka.. Nu Madini fate buaina siam vel chu eng nge? " kan buai atalángin zawh nachang ka lo hre miah lo va. 

"Umm, Loan an lo puk nasa deuh a, an harsa viau a niang. An rawn pûr a, an fapa khan zu a rui bawk nen. Chutiang vel chu.. " a ti mai a. Sawi thui hreh thei siah. Ka zawt zui duh ta lo. Duhdah zetin kan thu dun rial a, news kan ngaithla pah bawk. A changin kan infawp leh zauh bawk. Tun anga hun zalen leh inthlahdulna hun hi kan ngah lo va, kei pawh ka hlimin ka thla a muang hle. 

Kawngkhar a rawn inhawng rawp a. Kan phu dun zawk. Kan thu tha vat a. U Lawma te nupa chu an rawn lut a. Min rawn hmuh dun chuan a mitmeng a danglam nghal. Kan ep chiahah an rawn thu ve chat a. An mitmeng chu a dik lo, ruih nei an ang. Ka ngaihbel pawh a ni maithei. 

"Inthisen hi a sang dun ve ngawt mai tiraw? "u lawma chuan a ti ta a. 

Ka chhang lo. 

"Ka pa khum beta a nat laiin tiang hian mipa i lo awmpui a maw? Han riahpui tur i nia sin.. " a ti zawk mah a. Rosangpuia'n min thunun tum viau mah se, ka thinchhe bawk sia, ka chhang lo thei lo. 

"Nangni tak kha alawm le.. Vawikhat pawh ka pa inhan hmu tawh mi? Chhete pawn inngaihsak lo chu a nih kha" ka ti ve hmak a. 

"Mi chhang suh. Rodingpui.. Keini chu pawimawhah kan chhuak.. Nang ve kha mipa tawmpuiin i lo nui har har thei a nia" a ti leh tûn tûn a. Umm a rui chiang mai. A tawng sehchilh danah pawh. 

An room lamah an chho duh mai si lo, U Pari lah chu a thu ve tlat. 

Zawi sup hian, "Ka va phei ang aw" nuam lo a ti tih ka hria. 

"Ngai lo" ka ti ve hmak. A la hma bawk a. 

U Lawma min melh run run reng chu ka kham takzet. Mahse, chuti maia hlauha tlawm erawh ka tum bik lo. Thil sual kan ti pawh a ni lo va. U Pari chuan, "Kei chu ni ila, ka hawtirna a rei tawh ang. Nuta te duh loh bialpa ka nei ngai lo" a lo ti a. 

"I rui a nih kha.. " ka lo ti hmiah. 

"Rui te min tia law? I va dawthei tak.. " a ti naa, a hmel erawh a pha dui mai. 

"Aw, innupa khan inrui.. " ka ti leh fak. Sangpuia'n ka kut a rawn hmer zauh. Ani tan tawng ngam ve chi a ni si lo. 

"Kan duh leh kan rui ang a, kan duh dan danin kan awm ang. I lo sawi ve tur pakhatmah a awm lo ve.. He in chhungah hian thuneihna engmah i nei ve lo aw" U Lawma tawngkam chu a va na fak fak ve le.. 

"A nih chuan, ka awmdanah sawi theih innei bik lo a nih chu.. " ka ti ve sap a. 

A rawn ding hluai a, "Nangtê reuh hi min va zah lo ve mawle" tih leh min ben tumin a kut a lek uaih a, Rosangpuia a che zawk mai. Ka u Banah chuan a chelh ran a, an inhmachhawn ta ran mai. 

"Zawnga, min lo dang ngam elo? Tu nge i nih a? I va huaisar ve a" u Lawma lah chuan a ti tawh si. 

Zaidam zet hian, "Tharum tel lo hian a chinfel theih.. Ka bialnu hi i kut hmawr pawn khawih rawh. A let i tuar zel ang" a ti ta a. A aw chu dam thlup mah se, a mitmeng hlauhawmzia erawh ka hmu chiang kher mai. 

"Ve khanglang che chuan, ka farnu a nih hi.. Ka duh duh danin ka ti thei.. Lo inrawlh ve suh. Chhuak rawh. " U Lawma chuan a ti pawr huam a, Rami te an lo chhuak a, "Ram, Bawihtea hruai la, U Ruata va ko lawk ru" ka lo ti zawi sap a. 

"I inchhungah ngei mipa dangin an cho ngam che a nia, he ina i lal lohzia entirna a nih kha" U Pari tawngkam zet chu.. 

"Nang zit zet vang veka thleng a nih hi.. Lo ngawi hmak rawh. I nau pawh ka ni lo. " ka ti tuar. Ka hua, ka haw lutuk. 

U Lawma chuan, "Rodingpui, i u nupui tikhan i tawngkhum a maw? " tih leh a che phut a, Sangpuia'n a lo chelh hman lo a niang, mi rawn beng thawi fua a, a na lutuk lo. Rosangpuia chu a vir zawk a ni ber, U Lawma biang a ri sawk mai. A let hawl mai. A biangah a hnek.. U Pari'n a zuk bawh a, "Awiii, i va han zak thei lo em em, ka pasal kut i thlak a maw? Ka report khawp ang che. Zawngsenpa.. " a ti tuar tuar a. U Ruata a rawn lut ve chiah, Mahse, U lawma rawn tho chuan Sangpuia chu a rawn cho ta a, a pawmchilh titih a, tihnat erawh a tina hleithei lo. 

U Ruata nen chuan kan thelh a, Rosangpuia ka pawt tang tang a, Anin U Lawma. U Lawma chu a rak nasa khawp mai, "Zawnga, i va chak dawn lo tak.. Ka farnu hi ka damchhung chuan i nei lo vang.. Hre rawh. Chhuak rawh. Ka thah hma che hian" a ti a. Ngaipawimawh lo zetin Rosangpuia chuan min rawn hnaih a, ka biang chu a chul a, "I tha em? " a ti sup a. Ka bu nghat. 

"Haw mai rawh. Thil a buai vek dawn " ka ti a. 

Min ngaihtuah hmel zetin, "I U so phut hi reh se ka haw ang. Engtin nge ka hawsan ngam ang che" a ti tlat si. 

Ka u lah a ang nasa. U Pari lah lo rak ve chhen. Police phone te a tum a, U Ruata'n a phone chu a laksak a. 

"A tawk, duhtawk r'u, Ka u, nang pawh duhtawk rawh. Innupa hi indik hlawl lo. Buaina incho reng a, buaina siam intum reng. Ka hre vek" a ti ta bawh bawrh a. Ka thaw hawk. 

"Lalruatsang, nang ve khan mi zilh khanglang suh. He inah pawh i awm tawh lo. Thuneihna engmah i nei tawh lo" a lo ti tuar tuar a. 

U pari chuan, "Ni e, pawnlam mi kha chu rawn inrawlh duh lo mai r'u, kan inchingfel ve thei" a lo ti nia! Ka va kek chak tak. 

"Pawn lam mi chu ka ni lo deuh ang a, ve mai mai a che. Pasalte ina zu ruia lut ngam hmeichhia hi ek tlukah pawh ka ngai lo che" U Ruata chuan a lo ti ta nek a. 

U Lawma chuan a kutsaipira Rosangpuia kawk chungin, "Hre rawh, zawnga, kut min thlak a, ka in chhung ngeiah. Tichuan, ka farnu hi neih i la tum ve a maw? Zak rawh. Tunah hian chhuak la, vawikhatmah rawn kal leh tawh suh. Ka nupui i tihzahna man pawh hi ka la thing ang che" a ti ta a. Rosangpuia chu a khi suk. A kekawr ipte zen chungin U Lawma hmaah chuan a va ding a. 

"Ka nupui hual û i nih vangin ka zah che. Ka nupui hual kutthlaktu i nih ang erawh chuan, Dingpuii u i nih ka theihnghilh ang. Tin, i farnu hi i phal emaw phal lo emaw ka nei dawn. Chunglamin chu chu min hriatpui rawh se. Tin, vawikhat pawh Dingi hi kut thlak tawh ngai suh ang che. Nuţa i nih angin nuţa ni mai rawh. I nupui kaih kual theih pasal nep tak ang ni loin.. A tha em? I makpa zawng ka la ni dawn khawp e" Tiin U Lawma darah chuan a hmer zauh a. Min rawn buk khum nghut a, ngawi rengin a chhuak ta a. U Ruata vangin a ngaih a ngam aniang, emaw a insum zawh loh a hlau a niang. 

U Lawma chu a ang leh ta nghek nghek a, hmeichhe an thei ang chiah hi a ni. Ti em em hian a ni maw mihring hi an lo danglam theih le? A nupui hian magic a hmang a niang, ti em ema a pasal han bual át theih chu. U Ruata te chu a cho leh vel a, mahse, rui lo hai lo zawk na ná na chu a insum hram hram a. U Pari bulah, "I pasal hi inroomah chhohpui vat rawh. Ka u a ni tih ka theihnghilh hma hian.. Min hneh dawn chai lo a nia. Kal pui rang rawh" a tih chang fak takah chuan U Pari chuan a hlau ve deuh nge, a pasal chu a hruai chho ta a. A fapain engmah a hmu vak hman lo zawk a, a lawmawm. Ka u chu nep ka ti ngawh ngawih tawh a ni ber. Ka haw tel bawk. 

U Ruata chuan, "In lo riak mai dawn nge? " a ti a. 

"Aih, tikhian an chatthla mai ang. Rami te pawh rawn pheitir rawh" ka ti a. 

"Ka pa hi dam vat se ka ti khawp mai. Pari hian chhungkua min leng darh lo chauh tawh a nih hi, hlau reng reng suh ang che. U Lawma rilru thatna zawng zawng a hipkang vek tawh.,zu te an in dun thei a nia.. Nep dun lutuk" a ti hluk hluk a. A haw phei ta nghal a. Kan boruak chu ka nu hrilh kher tul ka ti lo. A rilru a hah tawh sa nak alaia tihnat belh kha ka duh lo. Ka thin erawh rim tak a ni. 

Rosangpuia pawn min lo be leh a. Engkim a that thu ka hrilh. Min ngaihtuah hle tih ka hria. Zingah Rami nen rawng kan bawl a, kan chhungkaw boruak chu ka ngaihtuah rauh ruah a, kan hlim tawh lohzia te leh Rami tak pawh a zalen tawh lohzia te. Hetiang taka thaibawih hi a nih ka lo ring ngai lo, ka u hi. Keimahni lam pawn dik lohna kan nei ve teuh ang, mahse, U Pari mizia hi mil a harsa ve em a ni. Sangpuia a thlemna video kha Ka u hi hmuhtir mai chi em mawni aw ka ti rilru hial. Mahse, Ka pa dam phawt se, in dang se la, a kal dik leh mahna le. 

Ka nute chaw tur ka siam mawlh mawlh a, Scooty-in ka han dah a. Bawihtea pawh chaw kan ei hmasaktir a, a pi leh pu a ngaih em vangin ka hruai tel bawk. Ka pa chu rin aiin a lo zia a, ka lawm hle. Zan lam boruak erawh engmah ka sawi ta lo. Vawiinah ka pa test result kan hre dawn a, ka rilruin ka tawngtai mawlh mawlh mai. Rei ka awm lo, ka haw thla leh deuh mai a. Sunday a ni naa, inkhawm pawh ka tum buangbar ta lo mai. Kan boruak a hahthlak si. In ka thleng a, ka va luh chuan buaina bawk.. Ka va hne tawh tak êm.. 

Rami tap pur chu melhin, Parkebali chuan, "He inah hian awmpui mai i ni tih hria la, ka sawi apiang chu ti zat zat rawh. Mi te hi i lo phût ang e, engmah ka ti dawn hlek lo a nia" a lo ti bawrh bawrh a. Ka aw ka thian kharh a, an rawn hawi nghal. Mahse, Pari chu tîm hmel a pu eih lo. 

"Eng nge a? " ka ti a. 

"He chhiahhlawhnu hi thingpui min siam turin ka tir a, a'n peih loh khanglan chu" Parkebali chuan a ti hlaih hlaih a. Rami'n, "A ni lo, ú, ka buai laklawh lutuk a, ka la buai lawk. Ka tia, kut min rawn thlak nghal a nih kha" a ti ţiau a. A ni ngei ang. Rami'n tirh a hnial ngai lo. Tin, peih lo pawh nise, He pari hian engmah sawi theih a nei lo. Mood a fuh lo chho ta bawk a. Ka alh ta a ni e. 

"Kut i nei ve lo mi? Thingpui chu i siam ve thei na nge? I va thatchhe em em ve" Pari melh chungin ka ti ve ta hlawk hlawk a. A meng phawk hrá mai. Ka hlauh a ring a ni tehchêk ang chu.. 

"He nu hi i tan amaw? Chhiahhlawhnu hi" a ti leh kher a! 

"Khanglang a che. I lo awm hma pawha lo awm tawh, kan unau a nih hi.. Chhiahhlawh tih tawngkam kha han hmang leh teh.. I ngam chuan.. Ve mai mai che hian a. " ka ti ta a. Ka thinrim hian ka pa ka chhun a, ka aw hi a vin lam aiin a nem lam a ni mah zel. 

"I u ka hrilh khawp ang. Min zah lo páng páng bawk a" a ti nghat a. "Hrilh rawh.. " ka lo ti ve hmak. An roomah a chho a. Rami chu ka hnem a. 

"I lo hawn hma phei chuan, 'Lalmama te saw i ngaizawng ve a, a duh tak tak lo che. Ka nau ka tihpui dawn. Lo inrawlh ve tawh suh ang che' te min tia" a ti. Kan U Pari zet chu aw.. 

Kar loah ka u nen an rawn chhuk a, ka u chuan meng sen rum chungin, "Inpahnih khan chhuak r'u, ka hmu peih lo che u" a ti ta mai a. 

"Nanga mi hnawhchhuah thei kan ni tlat lo mai" ka ti hmak. Kut min thlak leh mah se, pawi ka ti lo. A tawp thlen law law ka duh tawh. 

"I va zak thei lo e.. Rami, nang pawh ti nge i u tirh i hnial a. Pari hi ka nupui a nia, zah hle ang che. " a ti a. Rami a ngawi reng. 

An nupain an ang zui char char a, chhang rih loin chaw ei kan siam mawlh mawlh a, kan ei hmiah. Chaw ei erawh a tui mawh viau. 

"Eirawng inbawl te hi inchhuang ve mawni.. Engmah ti lo ka ni lo a nia. In chung zawng khi ka kut a nih khi.. " U Pari'n a tih chuan, "I lo mo atangin vawi hnih tal i tifai ve tawh em? Rami hian vawi li a tifai tawh a, keiin vawi hnih.. In room takngial pawh i enkawl fai thei lo a nia. Zep loh chuan maw, U par, i thatchhe ve thlawt, i ţawp ropui bawk si.. I nulat laia i hmai a fai theih theih nen.. Nang anga thatchhia hi ka la hre ngai lo reng reng" ka'n ti ta phiar phiar a nih kha.. Ka u a ngawi daih. Ka sawi dik a ti a niang. U Pari chuan ka u melhin, "Tikhawp khan i farnuin min tawngkhum a, i khap ngam lo a maw? Nepa" a ti tân tân a. 

"Rodingpui, i tawng tam mah mah e. He ina awm ve i la duh chuan, ngawi rengin i hna thawk mai rawh" a ti hnuhnawh a. A va duap tak. Mipa pawh a ni lo a nih hi a. 

Chaw eikhamah Rami nen U Remi te inah kan phei daih. Inkhawm a tum pawh kan thulhtir ringawt. U Pari kan han rel tak tak mai a nih kha.. A hahchhiau nasa ngawt ang.  

Chawhnu dar 2 bawrah ka nuin min lo call a. 

"Mate, i pa chu.. " a ti a. A ngawi vang vang a. 

"A lo cancer tak tak a. A stage a sang tawh a, Doctor te chuan tihngaihna a awm tawh lo an tia" a rawn ti ta a. Cancer a nih rin rukna kha nei mah ila, a taka ka han hre chiah chu ka na vawng vawng mai. Ka pa chu a chuap a cancer anih chu.. Chu pawh enkawl dam theih tawh loh. Ka tliak hnawp a ni mai e. 

"Nu, sawi tur pawh ka hre lo" ka ti ringawt. 

"Zanin hi kan riak leh ang a, naktukah kan chhuak ang. In lama inenkawl a duh zawk sia.. I pain" a ti a. 

Engmah sawi tur reng reng ka hre lo. Phone ka dah chu ka ţap tawp. U Remi'n min buaipui vat a. Ka pa chungchang an han hriat chuan, U Ruata pawh a ngui nghal rawih mai. A va hrehawm em.. 

Kan haw phei a, An nupain roomah an tawm leh tawh a niang. Ka nu khan a call lo nge mawni dawn ni. Rami nen eirawng bawl a ngai lo bawk a tiin rilru tihharh nan kawtah kan walk a. Ka rilru chuan arbo a zawng a ni ber e. Rosangpuia pawh kha ka va hrilh ve vat a, "A pawi hle mai. Duatpui,. Tihtheih nei ila ka va ti ve aw" tih bak sawi tur a hre bik lo. Ka pa tak chu aw.. Kan walk zo ina kan luh chuan, U Pari hian noodles a lo chhum a. U Lawma pawh tv a lo en. 

"Rawngbawl intum lo mi? Nge in vah daw daw? " a lo ti leh nghal a. Mahni lo maha rilru buai nak alaia. 

"Ka pa cancer thu te kha i hre ve tawh em? " ka ti nghat a. Min rawn melh phawk viau. 

"Enga?! Tak tak em ni? " a ti nghal chul a. A nghawng ve dawt chu a nih hmel. 

"Tak tak ni e,Doctor te an beidawng tawh bawk" ka ti sep a. 

"A va pawi em. Ka pa chu aw.. " tiin a hmai a hup a.. A tuar ve deuh chuan ka hria. 

Kan U Pari chuan noodles rawn ken phei pahin, "Thihna hi chu kan pumpelh thei hleinem.. Ka pa cancer te chu a zia zawk alawm, accident-a inthihsan te hi a na dawn asin" a ti hawr hawr a. U Lawma a ding zawk, "Ka pa cancer chu i lawm a maw? Zothanpar,.. " a ti vin thak mai. Ka inrawlh duh thak lo. 

"Ka lawm ka ti lo, ka pa chu kan enkawl thei dawn a, entir nan, ka pawh chhawn lo va inthihsan te hi a nat tur zia chu.. " U Pari chuan a ti ve mai a. A sawi chu a dik ve reng, mahse, a sawi hun vak lo a ni. U Lawma pawh inbengdaiin a thu ve leh mai a. A rilru a hah hmel kher mai. Pa chan chang a ni ve tawh bawk nen, a awm viau e. 

Zanriah pawh tihtham ka ei lo. Ka ril chu a tam, engmah ka kaah a tui hlawl lo a ni. Tawngtai dan tur pawh ka hre tawh lo. Ka nu ka lainat zual, ka paa innghat ve tak, engkima inrawn tawna thil ti dun thin an ni si a. 

Dar 8 a ri tep tihin Rosangpuia pawh a rawn thleng a, "Vah harh i duh em? Khawi hmunah emaw" a ti dam thlup a. 

"Ka u ten an hria ang a sin" ka lo ti daih. 

"Rami kan hruai tel ve ang a" a ti lehzel a. 

"Aa.. Kan buai leh vak ang. Tihian inkawm mai ang. Ka tha alawm" ka ti a. Bathlarah kan thu chhuak a, juice kan in a. Khua chu a thiang viau. 

"Ka pa kha cancer ni zawk se ka ti fo mai. " a ti sup a. Ni e, a pa kha a muhil an kaitho zo lo tawp kha a nia. 

"Enkawl vea, ka kut ngeia dawmhlum kha ka chák thin.. " a ti leh a. A rilru chu ka hrethiam tawp. 

Ka kut a rawn vuan a, "Hmeichhe chak tak i ni a, i pa phei chu ngui takin hmachhawn reng reng suh. A duh vanga cancer a ni bik lo va, a hrehawm tizual turin awm ngai suh.. " a ti sup sup a. 

"Umm.. Nia, mahse, ka pa hi awm ta lo se, ka nu ka khawngaih. Ka u te nupa lah ti hi an nia" ka ti a. Ni e, thil thui tak ka thlir a, ka pa a awm loh chuan Pari hian lal a hrawt dawn tih ka hai lo. Chu chu thlentir ka duh thlawt lo. 

"Lungngai miah suh. I pa dam lai ngeia inneih kan tum ang a, I u te chu keiman ka hmachhawn ang" a ti nghet charh a. A hmel ka en a, min lainatzia leh min khawngaihzia ka hmu thei. He pa hi ka nei lo a nih chuan, ka damchhungin ka inthiam thei ngai pawhin ka ring lo.. 

Min kuah a, min fawp a. Dam thlapin.. 

"Ka ta liau liau i nih hi.. " ka mita en chungin a ti hniam raih a.. A ta liau liau ka ni hi ka lawm em em tih ka la hrilh mawlh ang. 

…