Rosangpuia 13

ROSANGPUIA.. (13)

Ziaktu: Toni Râlte

"Engtin i rawn kal ngam zawk a? " ka u a ni. 

"Keiman ka ko a nih kha.. A hnena kal tur hian min ti a ni lawm ni? " ka ti a. 

Ka pa chuan, "Rodingpui, min va zah lo ngai ve. Hetiang hian min palzam ngam tawh a maw? Chu pawh kha i bialpa, buainin a umzui reng vang khan maw? " ka pa thinrim hi chu a aw a nem daih zel ka tih tawh kha. 

Rosangpuia chuan, ka kut rawn hum pahin, "Ka pu, inbengdai rawh. Ani hi nupui atan ka duh a ni. Mahse, thil hriatsual innei a ni, ka sawifiah thei" a ti a. 

"Engmah i sawi fiah a ngai lo vang. Nang hian ka nupui hi mi hmaah zak tak leh na takin i siam a, ka farnu neih i tum ngam a maw? Chhuak vat rawh. Ka insum theih lai hian" U Lawma chuan a ti vin thak thak a. An palian dun sia, insual ta se thelh an har dun khawp ang le. 

"I farnu a nih hi, ani hi.. I nupui lam chauh en suh. I nupui vangin i farnu thinlung hi tina suh. A tul ber lo ve" Rosangpuia aw chu a la dam thlup reng mai. 

Ka nu chuan min rawn pawt a, "Lo kal rawh. Nula ve uaih tawh si, engtin nge tiang hian i awm theih zawk? Min tizak lutuk. Thenawm khawvengte hian hre ve ta se, engtin nge min ngaih ang? " a ti hlaih hlaih a. A kut chu ka thing thla a. 

"Ka u in kut min thlak lai khan ka thlavang inhauh em? Engmah hre chiang loin kut min thlak a, mipa râwp, mipa duh min ti chamchi a, kam khat pawn ka thlavang inhauh em? Ka na lo bik lo. " ka ti ve ta phiar phiar a. Rosangpuia'n min rawn pawt dawh a, ka biang tawn tawna vuanin, "Kut a thlak che a maw? Engtin? " a hmel rum sawt chu ka hmu thei. A thinrim tih ka hre mai. Ka u a va melh vawt raih a, "Kut i thlak a maw? Chu pawh keimah vangin.. Dingpuii u i nihna angin ka zah hle che a, mahse, i tidik lo hulhual a ni. Kut thlak ngai an awm anih chuan, i nupui kha a ni ngei ang" a ti ve ta hmiah mai. A inhumruh danah ka u in kut min thlak chu a la na hle tih a lang. 

U Pari a rawn ding ve zat a, kutzungchala Sangpuia kawkin, "Enteh, nang hi ka ngaisang che emaw i ti ang e, engahmah ka ngai lo che. Khatin ka pasal hi tawng khum reng reng suh. " a ti tán tân a. 

Dak vah hian, "Video kha i lo keng lo a ni.. Engkim hi an zavaia hmaah sawn pholang ila a tha tur.. Kan monuin mutpui tura a sawmna che video kha" ka ti ta hmiah a. Buaina a awm tawh ta sa sa, ka tlawm mai dawn bik lo. 

Video ka sawi rik chuan U Pari chu a tawlhhnung deuh a, a hmel a pha nghal dai bawk. Chawh hi ka'n ti khawp a. Ka u erawh chuan min rawn pan a, "Rodingpui, heti taka hmeichhe nasa i nih hi ka lo ring ngai lo asin. Ka farnu niawm pawha mawi lo i ni. I u nupui i zah loh dan leh kan inkar tihchhiat i tum dan zawng zawngte hi ka hai reng reng lo. I duh phawt chuan zui haw rawh. He mipa tenawm, mi nu pawh thlem duh hi i duh chuan zui rawh. Nakinah i la inchhir khawp ang" a ti ta a. Ka ţawng leh tur chu Rosangpuia'n min khap a, "I bag va la rawh. Kal ang" a ti nghut. Ka á vek tawh bawk a, ka bag ka siamsa diam chu ka va khai a, ka chhuah leh chuan, ka pa chuan, "Lawma, inroomah chho rawh u. A tawk viau e. Pa ber ka awm a, min va palzam ve. Rodingpui, nang pawh i roomah lut nghal rawh. I bialpa hi ka lo bia ang e.. " khal ngeng ngawng zet hian a ti ta a. A hun tawh reng a ni. Ngawi thei leh lutuk. Ka nu chuan roomah min nawr lut a, Rosangpuia erawh a kekawr ipte zen chungin a la ding khawng luh thung. Rami a rawn lut ve bawk a. 

Khumah ka nu te nen kan thu a. "I thinrim hian pawisak i nei lo mah mah thin. A dik lo. Rosangpuia hi zui haw ta la, i mualpho dan tur leh keini thleng pawha mi min tih dan tur i hria " ka nu chuan a ti mawlh mawlh a. 

"Ti nge min ţan si loh? " lungchhe zetin ka ti a. 

"I u a thinrim em a, lo inrawlh ila, kan buai zual dawn. Kan tan lo reng reng lo che. I nuta a ni a, i chungah thu a nei ve tawk bawk nen, tin, Pari a lo ban kher kher kha Pari lah a zualko thiam si a, kha khan a rilru a tibuai vek a nih kha" a ti a. Ka thaw hawk ringawt. Ka pa leh Rosangpuia chu an inbe mek a ni maithei. Eng tak sawi ang maw.. 

"Nu, u Pari hi a tenawm lutuk, video-ah ka hmu vek alawm. Rosangpuia fawhte a tum a, a chul kual vel a, khang vang khan alawm Sangpuia pawn a ban" ka ti ta tawp a. Zep reng tulin ka hre tawh lo. 

"Umm.. Nia, ka ring alawm. Mahse, kut man leh fiahna tha tak kan nei lo va, i u thluak hi a su hneh si a, tihngaihna a awm rih lo a nih hi" a ti ve mai a. 

"Indang tir u la, U Remi te zawk lo lut mai rawh se" ka ti a. 

"Thlente pawh a la thleng mahna" a ti sap. 

Darkar chanve dawn rooma kan tawm hnuah ka pain min rawn ko a, ka va chhuah chuan Rosangpuia pawh a lo thu. An hmel hmuh a hrehawm em em loh. Mipa leh mipa an inbia a ni bawk a. 

"Engkim ka hre tawh a. Ni e, inlo inhmangaih ve ngang anih chuan kei chuan dalna ka nei lo. Chhungkaw pa ka ni a, ka thutlukna chu ka thutlukna a ni mai. Mahse, Kuminah i pasal neih tur kan thulh a, tin, i U in nupui a nei bawk nen.. Kuminah chuan engmah kan thlentir thei tawh lo. Innghak u la, in inhmangaih tak tak a nih chuan inneih hun a la thleng em em ang" ka pa chuan a ti ta dap dap a. Ngaihthlak a hrehawm lem loh. 

"Mahse, I U hi a la hel rih dawn a, ka hria. A rilru hnehte pawh a tul ve ang. That i chhuah hram hramte, a nupui i tihlawm ve te pawh a ngai ang" a ti leh zat a. 

"That chhuah hleihtheih pawh a ni hleinem. Ka tlawn hiam hiam lo vang" ka ti a. 

"Tlawn a ngai kher lo, a pawisawi lo la, tikhian awm tir ve mai mai rawh. A la harhchhuak ve mai ang. An pa thunun tur a ni a, an pa aia kan lo chet hmasak kha a tul lo. An insiamtha zo lo a nih leh a pasal tawrh tur tho a ni" a ti a. A dik ka ti viau mai. A pawi ka sawi lo turah ngai ang. Rami thingpui lum kan in zawhah Rosangpuia pawh a haw phei a. Ka thlah a, "I pa chu ka pa ang mai a ni. A zahawm khawp mai" a ti sup a. 

"Engkim i hrilh maw! " ka tih chuan, "Umm, hrilh ta vek mai. Nang chân che ka duh si lo va" a ti a. Ka nui lui sak. Ka biangah a rawn nul thuak a. A kal ta a. Zanin zet chu kan va buai tehlul êm.. 

Boruak neuh neuh a awm tak siah chuan ka u te nupa nen chuan kan inpawh thei ta mang lo va. An nupain an tawm deuh tlawk tlawk reng a, u pari nute in lamah an phei deuh reng bawk. An lamah hian ka u hi a peng thuk tawh khawp mai. Mahse, ka pain enliam zel rih tur a ti miau a, engmah kan sawi ngai lo. Kei pawh class ka kal nitin a, Rosangpuia pawh a hna lamah a buaiin kan inhmu hman meuh lo. Tlai khat erawh ka peng haw a, Naute kha ka hmu leh chak em a ni. Kha naute kha a hming chu, Roger Vanlalsanga a ni a. Nu Madini te nupa tan hlimna thlentu a ni ringawt mai. Ka va pen pawh chuan chhuatah toys nen a lo awm hnawk khawp mai a, a tlei mual mual lutuk hi a lainatawm zawk te an ti mai mai. Duh loh vak pawh a nei lo a niawm e. Ka pawm a, ka lawm a, a nui ver ver mai. A chum si, a ngo phek bawk si. A pa pawh hi a hmelchhe lo hle ang tih ka ring mai. 

"Rosangpuia hian a pawm ve ngai em?" ka ti a. 

"Aih.. Vawikhatmah a la pawm lo" Nu Madini'n a tih chuan, ka nuih a za hle. Nau han sawngbawl thiam vak tur a ni lo ve bawk a. 

"A nih a nu hian a la rawn hmu leh ta miah lo mi? " ka tih chuan, "Umm, Sangpuia'n ina rawn kal phalsak hek lo. A ngai ve tawh ngawt ang" a ti a. Ka khawngaih deuh. A dinhmun chhe lutuk chu, a nu leh pate vanga a duh vang ni miah lo va hetianga a nun a hmang ta hi ka lainat. A pa mawlh hi a ni, eng ang pa nge maw anih le.. Rapthlak ka ti lutuk. 

Rosangpuia zin a la rawn hawng lo va, a buai zual hi zia tawh se ka ti ngawt mai. Ka lo ning ve thin. Min ngaihsak tha hman ngai si lo. Mahse, ka ring thlap mai hi kei pawn mak ka ti. Thikthu tihchhiat vak dan pawh ka hre lo e a. Ningani tlai kan bang chu Atea a lo peng haw ve a. A felin a tawng dun bawk a, ka pa nen pawh an inkawm thei fu mai. An titi mawlh mawlh laiin U Pari a rawn chhuk a, Atea a hmuh rual chuan, "Dingpuii bialpa lem lem kha i ni chiang.. Tak tak emaw ka lo ti hman a, ka lawm ve nen" a ti nghal chul a. Mi hrang an awm apianga a inla fel thin hi chu ngaiah ka nei tawh. 

"Nia, haha, bialnu lem ka neih kha a ngai tlat sia nih kha.. " a lo ti ve vat a. Pari chu a en duh hle, khami tlaia buaina chawk chhuaktu a ni tih kha a la hre ve a ni maithei e. Mahse, engmah a sawi lo hlauh, a haw tur ka va thlah chuan, "In monu a ni tih ka hre chiah" a ti suk a. Ka nui ringawt. Atea hi ka tan a hlauhawm lo bawk a, Rosangpuia pawn mipa thian kawm min phalsak awmchhun a ni. A felin a nelawm si, fiamthu a duh tho bawk si. Ka pa pawn a fak ve luam kha.. 

Ka inbual zawhah Rami ka pui a. Bawihtea in tur bawnghnute a chhuan chu suan tumin a tho a, a luhai thut nge ni dawn ni a pai awt awt a, a kut pharna lamah bawnghnute bel chu a va vai per a, a malpuiah a rawn buak ta mai a. A rak thawt. A sa ti lutuk chu awmngaihna a hre lo, kei lah ka lo hamhaih ve bawk si, a hnu deuhah bathroomah a tlan lut a, chawhtawlh lian kan hunah chuan a thu ta tawp mai. A mittui a tla pur a, ka khawngaih kher mai. Bawnghnute so phei chu a kan hi a na zual lehnghal a. A na a tih em vangin nachhawkna a ei a, mu turin ka ti a. Keiman ei rawng chu ka bawl zawm ta a. Zanriah ei dawna ka va ko chu, a khua a lo sik hluah mai a, a lo ţap par bawk. A pang a sa bawk si. Ka nu ka ko vat a. A mal chu kan ensak a, mi râp zawk. A lo durh pep pup mai a, a tui hluam bawk. A na dawn hian ka va hre em. Ka pain, "Ramte, chaw hi i u te hian ei sawk sawk se, Damdawiinah an chhohpui dawn che nia aw.. " a ti a. Kan ei ta sawk sawk a, Ei kham veleh U Lawma nen chuan chhohpui kan tum a, la inbe em em lo mah ila, unau kan nihnaah kan inhaw zui em em hran lo. U Pari chuan, "Sawtiang lekte chu a tawrh dam theih asin. A zuau ve bawk a nih saw.. " a lo ti khanglang a, ka nu ngaihdan a ni ta bik lo nge.. "Ka lo leih ve chhin dawn che mi? " a ti hmiah. U Pari pawh a ngawi hmak mai. Rami chu kal pawh a kal hleithei lo va, Ka u nen chuan kan kuah a, U Remi ka sawm ve bawk. U pari chuan tangkaina a nei leh dawn chuang lo va, kal ve a ngai lo. Damdawiin kan thleng a, an lo ensak a, an admit ta hmak mai. A lo nasa em a lo ni. Nachhawknain an chiu vat a. Kekawr pawh a ha thei lo, a bet zel sia. Underpant nen a awm a. Zaha lak theih pawh a ni tawh lo. Kar loah Lalmama pawh a rawn thleng ve a, a lainat hmel khawp mai. Kan han insingsa vel a, keiman ka riahpui mai a ngai dawn a ni. Kan insiam lawk sa vek bawk a, hawn leh kher pawh a ngai lo. 

Min hawnsan hnu, dar 8 a pel tawh tihin ka nuin min lo call a. "Hei a muhil rih a, a zia rih e" ka ti a. 

"Ka khawngaih reuh em mai. Chaw pawh a ei si lo, a ei theih tur ang kha leisak rawh aw.. Canteenah khan a awm ang" a rawn ti a. 

"Drip an khai maithei a.. Nia, ka lo leisak dawn nia" ka ti ve mai a. 

"Awii, mate, sawi chuan rel chan ka chang dawn sia, mahse, hei chaw eina thleng pawh kha a sil lo.. I u pari chuan, kei lah nimina ka kut ka tih-ahna kha tihhuh chi a ni rih si lo va, i pain a sil mek" a rawn tih chuan, ka ner sawk. 

"Hnawtchhuak ru" ka'n ti ngawt a. 

"I a thei siah.. " a rawn ti nghek. Ka va ngei tak. Ti nge ti em ema a thatchhiat mai le.. Ka pa em emin thleng a sil chu a nia! Thenawmten an hmu ang tih a hlauhawm mang e. An nupa hian indang ta se, ka u a hah thei ngawt ang. Ka nu sawi ka hriat reng chu, "Thiam thil kan ngah lo a nih pawhin, thatchhe lo phawt mai ila, mi thatchhe reng reng khawiah mah an tlangtla tak tak thei lo" a tih hi a ni. Hman lai angin ram lama cheta hah taka thawh bawrh bawrh a awm tawh lo zawk a. Ina awma in chhung enkawl kha a ni mai a. Chu pawh an room zimte pawh a tifai peih lo chu a ni sia! A nulat laia kohhran leh khawtlanga a chettlat nasat nen.. Em em a na.. 

Rosangpuia pawh Rami chanchin ka hrilh ve a, a khawngaih viau mai. Ani pawh Inrinniah chuan a lo haw thei turah ngai ang. Chuan, a hna chu a zo thawkhat tawh dawn a. A tum dan chuan, Restaurant bakah Hotel changtlung ve tawk tak siam a ni a, Aizawlah hian hotel hmun tur a váng angreng a, biak mek erawh a nei. A tumruhna hi a ngaihsanawm khawp mai. Tin, sawi hmaih loh tur chu a pahrawn Pa Siama te pafa kha in a leisak leh hmiah. An in leh lo kha an chân ta si a, a intibuai kual peih ta lo va, in thar, in mal ding a leisak tawp mai a ni. Pa Siama pawh a lawmin a fapa pawh a mittui a tla hial a niawm e. Ka bialpa hi mi rilru chhia chu a ni hauh lo mai. 

Rami khum bulah thutthleng ka dawhzawm a, khua a vawt tan ve tawh nen, ka mu lum zo mang lo. A ruh mai bawk sia. Rami chu zan laiah a rawn harh a, ka tho ve vat. A riltam thu a sawi a, eitur ka leisak chu a dai deuh tawh naa, ka eitir a. A khawsik pawh a awm tawh rih lo. A muhil zui ve leh ta a. Kei pawh phone dahin ka mu a, zing lamah ka muhil ve thei hram. 

Class kal ka ngai si a, Zing karah U Pari'n min rawn chhawk ta a. A tum bur mai. Rami ka khawngaih lawk. A tir ngam dawn chai si lo. U Remi lah zingkar chu a buai hun a ni ve bawk si. Ka haw thla a, U Remi bulah, "Chhunah chuan han awmpui mai teh. A khawngaihthlak em mai. Vawiin i eisiam chu chawl mai rawh" ka ti ta ngawt a. Mi tha ta ngang a ni bawk a. A lo pawm ve leh thliam. He nu hi chu khawi hmunah pawh mo se, tuman mo sual an tih ka ring lo. Rilru that tel hi a lo pawimawh hle dawn a nih hi. 

Ka ke a zia ta deuh bawk a, Scooty ka keng chhuak ve thei tawh a. Keimahin ka kal tawh. Class lak pawh a nuam lo hran lo e. Sama bik hi ka ngaihbel nge kan picnic atang khan min zah hmelin ka lakah a inlahrang ta riau a, zawhna pawh min zawt tawh ngai lo. Boruak tinuamtu ber kha a ni asin le.. Rosangpuia vang vek a ni. 

"Vawiin chu ka bialpa i hmu ve duh em? Lunch kan ei ho dawn nia" Atea msg chu ka hmuh chuan ka khi sak. 

A sawi ang chuan kan han chho a, tlangval lian thelhthawlh, Atea nen an inchen thuak ang, hmelchhe lo tak, zahzum hmel lek lek chu a lo thu ran a. Kan han inchibai a. Engkim ka hre vek tawh tih a hre bawk a, a inthup em em bik lo. Kan hlim reuh tawp. Amah chu Sangtea a ni a, Chanmari-ah sawn dawr a nei ve a, leng tur ten min sawm ve kha. Atea chuan, "Rosangpuia bialnu anih hi" a tih chuan, a phawk hmel hle. 

"Tak tak em? " a ti a. A nui a. 

Ka bu ve ringawt. 

"Rosangpuia te chu ka hre lutuk alawm, Ka naute hian an star bawk a, an sawi reng zel.. Ka hnathawkte ka tihna a nia" a ti a. A nuam ve mai mai. "Kan pahnihin kan lo la leng dawn nia" ka ti a. Kan inpawh sawt mai. 

Ka sawi chhuak lo thei lo, "Tihian hmabak innei lo ve ee" ka ti leh phawng a. 

"Umm a dik.. Atea hi nupui tha deuh zawnsak daih rawh" nui huah huah chungin a ti a. Atea pawh a khi suk. 

"A zei loh hmel teng tung si.. Nangmah zawk hian i hmu ang. " ka ti a. Atea nuih a za ngang mai. 

"Umm ani hi chu a luck a nia aw. Miss Mizoram-a incontest te ngatin ania bem thin.. " a ti ta a. Sangtea a nui char char. 

"Awiii, nei ta che.. I a mi? " ka'n tih leh ngawt kha.. 

"A harsa a nih hi.. Bawihte" a lo ti a. Min ngai naupangchhia khawp mai. Ka khawngaih dun leh thut thin. An hmeltha dun si, eizawnna ni se an nei tha dun si.. Hmeichhe tan chuan ngaihzawn tlak an ni chiang alawm. An mamawh miau bawk si lo. 

Kan ban hma deuhin Number save loh atangin call ka dawng a. 

"Dingpui, keimah Mapuii ka nia. Class i kal em? " a rawn ti a. 

"Aw kal e.. Ngati nge? " ka ti vat a. 

"Awii, khawngaihtakin dawrah lo peng haw hram teh a. Bawihtea pheikhawk ka leisak a, chu chu min lo peksak la ka duh e" a ti a. 

"Aw.. Rosangpuia a awm chuang hleinem, nangmah ngeiin han hmu la han pe la. " ka ti a. Ka peih loh vang ni loin a fapa a hmu ve chak dawn ema ka hriat vang a ni. 

"Cctv a dah vek alawm.. Ka ngam lo a ni" a ti zawi sap a. Ka lainat khawp mai. 

"Aw le, ka lo peng dawn nia aw.. A pawi hle mai" ka ti ta ringawt. Rosangpuia palluih lah hi a ngam awm bik si lo. 

"Ka lawm lutuk" a rawn ti a. A number pawh ka save ve nghal. Mi sual niin ka hre lo. Julie leh Azuali te anga ngampa leh huaisar niin a lang ve tlat lo. Azuali pawh ka hmu khât ta hle mai. Banah chuan Zo chokaah chuan ka peng ta a, Mapuia nen chuan kan inhre tawh a, min lo nuih var var. Mapuii chu a roomah ka va hmu a, a room pawh a nuam viau mai. Eisiamho hi an riak ve bawk a, a hlauhawm hran loh. A fapa pheikhawk a lei thar chu a pack mawlh mawlh a, a cher riauin ka hria. "I rilru i tihah lutuk a ni lo maw? I cher tlat" ka ti a. 

"Sawi tur a tam lutuk. Nakinah hun thawl kan neih hunah ka la hrilh vek ang che. Sangpuia hriat lohin" a ti sar sar a. Eng tak ni ang maw.. 

Lassi ka in zuai a, ka chhuahsan ta nghal. Rosangpuia in lam panin ka tlan a. Pa Zuia zawkin Rogera chu a lo awi durh durh a, nu Madini chu a huante-ah a lo awm daih a. Rogera a lo muhil bawk si, pheikhawk chu dahin ka kal leh ta nghal mai. Scooty ka start dawn lai takin, "Dingi" a rawn ti a. Valpuia a lo ni! Ka ner ru sak. Ka va ning reuh e. 

"Amah pawh a awm si lo va, eng nge i tih a? " a ti a. 

. "Nia, thil ka dah lawk a" ka ti ve mai a. 

"Kan naute pawh i rawn en duh si lo va" a tih chuan, "Nia, hun ka nei lo lutuk a, hman veleh kan rawn en ang. In inhruai leh ta mi? " ka ti khawmawi ve a. 

"Hruai rih lo. Cindy hliamte han dam fel phawt se an ti a nih kha" a ti a. A inmet fai vang tawh a, a fa neih chuan a tha zawngin a hruai dawn a ni ngei ang, ka lawmpui e. Ka tlan dawn chuan, "Dingi, ka la ngjak reng tho che nia aw" a rawn ti leh hram a. Ka chhang tawh lo. A va zakthei lo tak e aw. 

Zanah Rami ka riahpui leh dawn sia, eirawng ka bawl sawk sawk a. Ka nu te lah an meeting a, a la rawn haw lo. Ka buai ve viau. Bawihtea Assignment enpui ngai bawk si. Ka u lo chhuk chu, "Bawihtea assignment saw va enpui ve teh" ka lo ti a. A va phei ve mai. An pafa inzirtir lai chuan U Pari chu inbual zo tih hriat deuh hian a rawn chhuk a, a lu pawh a la tuam. Bawihtea te thutna piahah a thu a, "Bawihte, I Pi Baby te dawrah nail polish hmannia anuin a lei ang kha ka lo lei dawn va ti la, va lei lawk teh" a ti a. Bawihtea chuan mathematics a chawk mek a ni. 

"Lehkha a zir hi" a pa chuan a lo ti a. 

"Aw a hla chuang lo va, va kal lawk se la" a ti a. 

"Nangmah va kal rawh. Engmah i tih loh kha" ka u chuan a ti ve hmuk a. 

"Tikha in nia, naupang tirh theih reng reng loh, an tih awm tawk chu tihtir ve tur" a ti hmarh hmarh a. 

"Eirawngte saw va bawlpui rawh. Khatia phun reng lo khan.. Kan buai em hi" ka u hi a changin ngei viau mah ila, a chang hi chuan annu hi a ngam ve leh viau lawi si. 

"Mi phût lah hi intina sia a, ka kawng na vangin vawiin pawh ka mut char char kha" a ti hlak hlak a. Engmah ka sawi ve duh lo. Ka nu car park thawm a hriat rualin rang tawkin choka lamah a rawn phei a, ka bai chhuan lai chu a chawk rawk rawk a, ka nu lo lut chu, "Nu, inva tlai vawiin chu" a lo ti sawk sawk a. Ka nui tawp. 

"Nia, meeting an ti leh hnuhnawh a. Ka duat, kha aw. " tiin Bawihtea thil a hawnsak chu a pe a. An roomah a lut zui nghal. 

Chutiang vel chu a nia kan U pari nunphung chu. Mo te rel ching pawh min ti ula, enliam tawp hi a har ve thin êm a ni. A mizia a mak si. Zanriah kan ei a, ei kham rualin, "U Par, lo tifel mai rawh aw. Rami'n hrehawm a ti tawh ang" tiin ka inthlak sawk sawk a. Rami chaw tur ka dah a, Damdawiinah ka chho nghal. A taksa durh kha a lo keh tan a, a tui hluam a, na a lo ti hle mai. A la naupang ve bawk si, nachhawknaa chiu turin ka va ngen ta tawp a. A durh keh hi a hil deuh hunah chuan a zia chho mai ang. Ser erawh a nei dawn a ni. Chaw a ei a, a ei tam lo viau mai. A ka a tui lem lo a niang. Mama a rawn lang ve leh hlawl. An inkawm duh ringin ka chhuak ta daih a. Rosangpuia nen kan inbia a. 

"Mapuii a fa hmuh i phalsak lo hi chu i ti lutuk deuh lo maw? " ka ti a. 

"A lung a leng mai mai" a ti sup ringawt. 

"A fa a rilarah a nia, hmuh ve zawk te chu phalsak la mawle" ka ti leh hram a. 

"Dubai-ah a chhuksan dawn a, Tikhan nu nei lo ang khan awm law law zawk rawh se" a ti mai a. 

"I dawrah hian chhawr reng la, nakinah in te an la luah ve ang a, Dubai chhuk kher ngai loin" ka ti a. 

"A chhel tawk lo ang, chutiang tur chuan.. Nau awmtu a la mamawh cheu dawn a, a rethei dawn lutuk" a ti a. Mapuii chu a ngaihtuah ve tho tih ka hrethiam. Ka thik lem lo. 

"Rami chu eng nge a an zel? " 

"Aw a zia ti ila, a durh kha a keh a, na a ti khawp mai" ka ti a. 

"Taka Azuali kha an ru daih asin" a rawn tih chuan ka phawk hle. 

"Ehe! A van mak.. Tuin" ka ti a. 

"Gym-a thawk tho a nia. A lawmawm tak tak" a ti a. Ka lo lawm ve ringawt. Thu ho mai mai sawiin kan inbe rei ta phian a. Lo haw vat tura inchah mawlh mawlhin kan titawp ta a. Ka va luh chuan Mama pawh hawn a lo tum ve mek a. An inhmeh dun reuh ngawt mai. 

"U, Mama khan, 'I dam veleh innei ang' a tia" a ti sap a. Ka lo nui hawk. 

"Inla naupang si" ka ti a. 

"Ih maw, bialpa ka neih hmasak ber a nia. Engkim hi ka tan thil thar vek a nia. Nuam ka ti" a ti sep sep a. 

"Mahse, ka sawi ziah thin kha aw.. Sex hmanpui loh tur inneih hma chuan" ka ti a. 

A bu nghat. "U, inbulah hian ka awm lo vang tih ka hlau ngawih ngawih. Anu leh apa an fel bawk si, Pathian hian min hmangaih lo emaw ka ti thin a, mahse, inbula ka awm atang hian min hmangaihzia ka hre chiang sawt. U Lawma pawh a fel, u pari pawh hi nakinah chuan a la fel ve mai ang. Mahse, nangmah hian pasal nei daih ta la, hrehawm chu ka ti ve maithei. Anu leh apa inah an awm khat sia" a ti ta a. 

"Chutiang sawi suh. Keite chuan engmah ka tihsak ve loh che hi.. Chuan, i pa chanchin hi la ngaihven ve hrim hrim pawh a tha ka ti.. A thi nge a dam pawh kan hre si lo va" ka tih chuan, a hnuk a ulh niin ka hria.. "Nia, ka pa khan zu a duh em a, zu vang khan kan inkar a hla ta vek a. Min theihnghilh bik chu ka ring lo. Nakinah kan la zawng chhuak dawn nia" a ti a. A mut a chhuak deuh aniang, mu turin ka ti a. Kei pawh mutna ka siam ve nghal. 

Khua a lo var a, Rami pawh a hma ai chuan a zia ve zel a. Vawiinah Rosangpuia a lo haw dawn a, kei pawh phurna nen ka tho a. Chawhnuah ka zuk inbual ve zuai a, amah Rami pawh puan huhin ka hru bawk. In ka lut chu U Remi'n in a lo tifai a! 

"Ehe! Ti nge a? " ka ti nghal tâwng. 

"Ka nu te thawhpui pasal a boral a, a kal ve a ngai sia, ka pa lah huanah a kal leh daih sia, ka nuin, 'Min va tihfaisak teh' a tia" a ti mai a. 

"Khaw nge U Pari te" ka tih chuan.. 

"Zingkarah kan thianho kan picnic dawn tiin an chhuak daih a.. Chaw pawh kan inah ei mai ru.. I bawl hman dawn si lo va. " a ti a. 

U Remi hi chu aw.. Ka pawm nawk nawk chak. U Ruati nen ka endan hi a danglam tehchiam lo. Ka ngaina ngawih ngawih a ni mai. Ka inbual sawk sawk a. Rami hi zun ram thiar velah a la kal tha thei chiah lo va, buaipui angai deuh sia, kalsan rei chi pawh a ni lo. Bawihtea a lo lut a, "Ani, Aniteii bulah ka kal ve duh, ka ngai" a rawn ti lut a. Rami hi 'Anite" tiin a ko thin a ni. 

Ani pawh U Remi'n a lo bual fai vang tawh a. Min ngen tlat sia, Chaw rawn dah pahin kan hruai mai dawn nia tiin U Remi chuan hruai ve mai rawh a ti a. Kan chho dun a. An han inhmu chu an inngheng chial reng mai. Rami lahin a lo ngai ve bawk si. Hmuh an nuam khawp mai. Dar 4 a la ri lo deuh tihin Rosangpuia a rawn lut ta zan zan mai. Rami eitur thei leh eng emaw a rawn lei teuh lehnghal. 

"Kan nula hmeltha chu i lo dam loh mai mai.. Dam vat rawh" a ti a. 

"Nia, ka dam tep. I van fel em em" a lo ti ve a. Kei pawn a rawn kal ka beisei hran lo. A zin haw a chauh dawn tehlul nen.. 

Nurse- hian Rami chu a rawn jection a, Rosangpuia a hmuh chuan a melh vung vung a. 

"Sangpui, min la hria em? " a ti ta a. 

Rosangpuia pawh chuan a lo melh ve vang vang a. 

Chu nu bawk chuan, "Mali thiannu Senteii kha.. " a ti leh a. Sangpuia pawh chuan phur zetin, "Ni tak.. I danglam tawh em alawm. I dam maw! " a ti ve hlut a. Kan lo en reng ringawt. 

An inchibai zawhah, "Mali pawh a la nulat reng kha aw" Senteii chuan a ti sap a. Rosangpuia chuan min rawn melh zawkin, "Aa.. Kei chu nupui ka nei tep" a ti a. Ka lo lai ve ringawt. 

"Tu ber maw? Julie nge Asawmi.. Lal luck" Senteii lah chuan a ti har har a. 

Ka lo thinrim ve ringawt. 

"Hei, Dingpuii hi ka nupui tur chu a nia" tiin min rawn kawk ta mai. Senteii min rawn melhna mitmengah chuan mak tihna bakah min ngaihnepna niawm tak ka va hmu thei. Ni e, a ex te ho an chhe lo thei em a ni. A langah chuan, "A ni maw? I va phu lo ve" a ti naa, min ngaihnepna mitmeng chu a thup thei meuh lo chu a nia. 

"Lecturer ngat hi nei ila, fate enkawltu atan an tlak nge nge" Sangpuia'n a tih ve ngat danah Sehteii mitmeng chu a hrethiam ve a nih ka ring. Lecturer ka ni tih a hriat hnua a mitmeng erawh dang tawh tak a ni. Kan landan anga inteh ngawt hi a dik ber lo thin reng a ni. 

A kal hnuah, "Ex ngahpa" ka ti hlak a. 

"Ka ex i ni ve lo tur hi lawm hle rawh" a la ti zui. 

"I chhe lutuk" ka ti a. 

"Hei ai hian chhiat belh ila i thlamuang chauh ang" a va nghal e aw. 

"Hmela" ka ti nghek. Call a dawng a, a va bia a. A rawn luh leh chuan, "Nu Madini te fapa leh an nu ten ka inah buaina an siam a niawm e. Ka va haw phawt ange aw. Zanah ka lo bia ang che. Inenkawl tha la, Rami, lo dam vat rawh aw.. Chuan, Bawihte, nang pawh" tiin ka vahpa chu a piai zauh a. Kawngka thleng ka va thlah. Ka let leh lama nurse duty na lam ka va melh chu min sawi mek nge ni min lo melh ve vek a, an phun sep sep bawk. A ho em mai a. 

Zanah rin ai takin a mu tha thei a, Doctor phei chuan, "Thawhtanah chuan inchhuak thei mai ang" a ti nghe nghe. A lawmawm thin e. 

Dar 10 a la ri lo deuh tihah, Ka nu in min lo call a. 

"Aw nu" ka tih rualin.. 

"I pa hi.. Mate.. " tiin a ţap ta nghal mai a. 

"Eng nge awmzia? Nu.. " ka ti tuar a. Min lo en thup nghe nghe. Pawnah ka chhuak a. 

"I u te an lo la haw bawk si lo.. I pa thawk dan hi a dik lo. Bawihtea'n a patea te a va ko mek.. Kei zanwg ka duh lo mate" a tap nghal hlawp hlawp. Ka khur nghal zawih zawih mai le.. Ni lo, Lalpa, khawngaihin… 

(Youtube lamah story ka chhiar ve a. Mi dang story ngaihnawm tak tak ka rawn chhiar thin dawn a. Khawngaih taka min subcribe a, like leh comment nena min tanpui ve turin ka sawm vek a che u. Ka thawnthu ziah a tibuai dawn lo a. Inkhawngaihna ka rawn ngen leh e. 😍😊 groupah zanah a link ka rawn dah leh ang.