Rosangpuia 12

ROSANGPUIA.. (12)

Ziaktu: Toni Rálte

(Adds mawlh kha ka duatte u) 

Sama te pawh chuan an va hmu a, an hamhaih ve hmel hle. Rosangpuia hmel lah chu a mûk em em mai si. Muangchangin a rawn phei a, "I hawn a ngai. Ka be tlang thei lo che a. Inmonu-in buaina a tawk a" a ti thum chhak a. A hmel ka en a, dawt sawi hmel a pu hlek si lo. Nge a inthup thei viau zawk? 

"Eng buaina maw! " ka ti nghat a. 

"Accident" a ti ta mai a. Ka phâwk hru mai. Mahse, ka la ringhlel tho, chutiang tawk se ka nu emaw ka u emawin min lo biak a hun tawh. 

"Tho rawh le, kal ang" a ti nghut a. Kal loh theih loh ni hek lo, ka zui chhuak ta a. Pool sira lo thute chuan kan inzui chu min en duh nasa mai. Sir Vala a rawn lang vat a. Rosangpuia chuan, "Miss Dingpuii hi ka rawn hruai haw dawn a. An monuin buaina a tawk thut a, ka be tlang thei si lo va, ka rawn kal ta mai" a ti leh zung zung. Kei erawh sawi tur ka hre ve lo. Dawt nge thudik ka hre si lo va. 

Sir Vala chuan, " A va zia lo ve mawle.. Kan lo kal ve mai dawn em ni! " a ti a. 

"A ngai lo vang. Chutia derthawng lutuk a ni lo ve. Kan kal phawt ang e" tiin min rawn kai a, ka zui ve dawt dawt. Hmeichheho phun sep sep thawm pawh ka hre pha. 'A man tawp. " "Zo choka neitu kha.. Awiii a taka ka hmuh vawikhatna".. "A chhiat lohzia saw" tih vel a ni. Hmm, ani lah chuan hre awm pawn a lang lo. A pen pawk pawk ringawt. Ka bag ka va la a, rilru nuam vak lo chuan motorah ka thu lut a, Sir Vala chuan, "Chanchin min lo hrilh ve rawh aw.. Tluang deuhin inkal dawn nia" a ti luam a. Ka bu nghat ringawt. Keimah kha ka chhaw huih mai. Engtia awm tur nge ka hrethiam lo. A tlan chhuak nghal a. Hmalam a melh run ringawt. Ka dawhthei ta ngang lo va. 

"Eng thil phiangsen nge i tih hi? Dawt tiraw i sawi kha.. " ka ti ta hluai a. A nui suk duh chauh. Ka va haw tak. 

"Ka u ka'n bia ang e, dawt nge thutak hriat nan" tiin ka phone ka hmet a. A kut lehlamin a rawn hup bo nghal chut. 

"Dawt a nih kha" a ti nghut a. 

"Eng a?! Hmela, eng nge i tih hi! " ka ti nghek. 

"Mipa bula i awm ka remti lo" a ti nia! Khai aw.. He pa hi a á tawh a ni ngei ngei ang. Hetiang em emte chu leh.. 

"I va han sual tak, kan student te an nih kha. An ngaihzawn rual pawh ka ni lo. I lo mak khawp mai. I rilru tet vang a nih hi" ka ti hrep a. A haw duh eih si lo. 

"Tunlai thalaiah kum bithliah a awm tawh lo. An bula awm nuam i tih em kha.. " a ti a. 

"Ka pawi an sawi lo a, a nuam ve bawk ang chu" ka ti a. 

"Chu pawh nise, vawiin ka free a, ka bulah i awm nileng dawn" a ti hmiah mai. Chhan vakin awmzia a nei lo tih ka hria. Lungawi lo leh bet lo zet chuan ka thu ngawi ta hle hle a. 

A tlan chak bawk a, kan thleng hma khawp mai. A inah kan kal nghal a. Nu Madini chhuah tum nen kan intawk chiah. "Ka thiante nen inhmuhkhawm kan tum a" a ti a. Rei pawh kan inbiak hmain a chhuak. Rosangpuia roomah kan chho nghal a. Lungawi loh vakin awmzia a nei lo bawk a. Ka lungawi chawpchilh ve mai. Hun thawl kan nei khat ve tawh bawk si nen. Khumah chuan kan thu dun a. 

"Kar lehah ka zin dawn a. Chuvang a nia ka thlakhlelh che" a ti a. 

"Ninawm, zin reng mai" ka ti hlak a. A nui hawk hawk. 

"I tan vek alawm. Kan inneih hunah i hna i bansan dawn sia, rethei deuha i awm loh nan tunah ka thawkrim anih hi" a ti a. 

"Kan inneih pawh hi ka ring lo. Ka u saw" ka ti chuai raih a. 

"Taka.. Pari chungchang kha.. Nia, ban loh theih lohin a khawsa a tin ni" a ti a. A tho a, a laptop a va on a. Pendrive a thun nghal bawk. 

"En la.. Ban lo ila i lawm lo zawk maithei" tiin a rawn hung hnai a. A dawra a room chhung a lo lang a, U Pari chu a va lut a. An inbe ri a hriat theih loh thung. Eng emaw an sawi dun niin ka hria. Chutah U Pari chu a ding a, Sangpuia bulah va thuin, a nek sawt sawt a, a lu-ah te chulsakin a hnungzangte chu a chul a. Sangpuia'n a kut chu a dahthlaksak nghe nghe. U pari chu a inhup a, a ţap deuh mawni.. Insiamrem leh in Rosangpuia biangah chuan a va nul thuak a, ani a lo thle sawn thung. U Pari chuan a va kuah ta chawt a, ani Rosangpuia inla hrang nghalin eng emaw a sawi a. A hnu lawkah manager rawn lutin Pari chu a hruai chhuak ta a ni. Ka en kher kher chu ka inchhir. U pari tenawmzia ka hmuh chuan ka u ka lainat lo thei lo. Engtin nge a theih zawk? 

"Zawngi chu leh.. " ka inrin hmain ka ti hlak a. 

"Insum rawh. I u erawh i hrilh thei lo vang" a ti a. 

"Ka hrilh vek dawn. An nu vangin kei thlengin ka tawrh phah a, kan inkar pawh an nu vangin alawm a khirh vek ni" ka ti tán tán a. 

"Mahse, i u sawn a hmangaih hle a ni lawm ni! " a ti zawi sup. Chu chuan min dek viau bawk si. 

"Mahse, engtin nge pari hi tiang hian a awm theih? Eng nge a sawi? I bulah hian" ka ti a. 

"A hma atanga min lo star thinzia leh ka hmei nih pawh a hreh loh thu a sawi" a ti bung nghut a. Ka uak tep. 

"Tiangte chuan ka u hi a la uiresan ka hlau. A lo rapthlak em mai" ka ti a. 

"Mahse, i u hrilh ta la, nang leh keia inkar hi a khirh zual zawk ang em? " a ti a. Ka buai vek. Ka u mi tumlum lutuk hian ka thusawi pawh a awih duh kher dawn mawni le.. Video hi entir pawh ni ila, Rosangpuia nen an inkarah ser a awm reng tawh dawn bawk si. Ka rilru a buai khawp mai. 

"Pari ka ban tak vanga i lungawi loh em vangin ka entir mai che a ni. Theihnghilh rih ang. Tunah chuan, hmalam hun sawi ang" tiin khumah chuan min kuai mu a. A zangthal zawngin kan mu a. Chunglam kan melh vang vang. 

"Hmalam hun sawi tur kan nei mi? " ka ti a. 

"Kuminah chuan kan innei thei dawn lo va, mahse, inhualna kan nei thei. Nakkum kum lai hawl velah ka sumdawnna hi ka peih fel hman vek tawhin a rinawm a. I chhungte rilru pawh a nem tawh beisei ila, ka inah i awm tawh ang" a ti sup sup a. 

"Ka hrethiam lo. Kha lam chu.. Ka rilru a buai" ka ti ringawt. 

Min rawn kuah thawk a, "Ka hmanhmawh i tih chuan sawi hreh suh. Ka nghak thei che" a ti a. Min rawn fawp zui nghal.. Tun tum chu a duhthawh ve riau, a khumah kan awm bawk nen.. Kei erawh inveng ru ranin ka awm a, a dawnsawn erawh ka phur ve viau. Ka hnute pawh kawr chhanah ringawt a duh tawk lo, hun dang zawng zawng aiin kan kal thui. Ka kawng hnuai lam erawh a khawih ka remti lo va, a kut ka lasawn zel thung. A insangmar nasa tawh si a, a thaw pawh a dik lo tan.. Min bawh uaih a, ka beng bul vela a rawn thaw lum hiam chu tawrh a harsa ve det mai. 

Hnai zetah min melhin, "Ka fa pai rawh aw" a ti zawi raih a. 

"Tunah ni lo, nakinah" ka lo ti vat. 

"Tunah" a ti thám ţuak a. Mahse, ka theihtawpin ka nam kiang a, ka chung atang chuan a tla thla a, a che zui bik lo. 

"Kan thei rih lo tih i hria" thaw ham ham chungin ka ti a. 

"Umn ka tihpalh.. Chaw bel bula riltam reng hi ka ning tawh"a ti nghut a. A inla hrang zui ta nghal a. 

"I ril a em? " a ti ta daih a. A tam ve tho mai. Chokaah chhukin a eitur siam lai chu ka lo thlir reng a. A siam chhungin ice cream ka lo ei bawk. A che renng reng chu a fel thlarh mai a, tin, a eisiam a uluk bawk. 

Ka phone a rawn ri a, Sir Vala a ni. "Aw sir" ka tih rual chuan, "Eng nge inchanchin? " a rawn ti vat a. 

"Aa.. Hei engkim a tha vek e. Kan tha aw. Min lo ngaihtuah suh u" ka ti ta ringawt a. Rosangpuia'n nui suk chungin min rawn melh a, ka lo chhiatkhum nghek. 

"Nangmah vangin dawt ka sawi reng dawn a nih hi" ka ti a. 

"A ho" a ti hmuk. 

"U pari chu thawhtir leh la" tiel lek lek hian ka ti a. 

"Ka hlau e a" naupangchhia zetin a ti a. Kan nui hawk hawk. A eisiam tui ti zeta kan ei laiin, Doorbell a rawn ri ta tlat. "Tun ang hunah inleng neih ka beisei lo asin" ti chungin a va pan a, a hawn chuan Valpuia a lo nia! He pa hian kan awmdun thin tih a hria nge, a rawn tisukuk ve ziah. Hneawm lutuk. Rosangpuia pawh a lawm vak lo niin ka hria. Mahse, a rawn lut ta tho a. 

"Ka tibuai che u em? Ka fapa va hmuh ve ka tum a, kalpuia rawn sawm che ka tum a" a ti a. 

"Ka thei lo " Sangpuia' a ti hmuk. 

" ka hria e.. "valpuia pwh chuan a ti ro hak a, mahse, chhuah mai a tum chuang lo. 

"Dingi, i tha maw? " a ti a. Ka lo bu nghat. Ka be chak hlawl lo. Bakah hmana Valpuia hmel kha hmuh tur a awm tawh lo, a ţawpin a bawrchhawr si, zu a heh tih a hriat mgawih ngawih. Heti taka a danglam ta hi keimah vanga puh a tum anih chuan ka lawm lo khawp ang. Ama insiamchawp natna a ni si a. 

"Thianpa, engtik nge i hman ang? Keimah chauh chuan ka hmu hreh a ni" A ti a. 

Sangpuia chuan, "Sunday chawhnuah ka hman ka ring. Chutah chuan kan va hmu mai dawn em ni! " a lo ti ve a. 

"A pawi hran lo. Ka hmu ve chak em a.. Fapa han neih meuh chuan rilru pawh a dang zak mai" a ti a. Ka rindan vel kha a nia. Fa han neih meuh hi chuan thinlung sak te hi a nem vek thei. Fate hi an hlu bawk a niang e. 

"Inhruai leh dan ngaihtuah rawh u. Fa innei tawh a, nang pawh danglam tawh la" Sangpuia chuan a ti a. 

"Tunah chuan a buaithlak vek tawh. Cindy hian rawn let a duh pawhin ka ring tawh lo. Ka tina ve em a" a ti ve leh lawi a. A inchhir tan niin ka hria. Chawh hi ka ti khawp a. 

"A pawi ngawt mai. I dai sual ve deuh a ni. Mahse, fate pa na ná na chu a hawisan rei lo vang che" Rosangpuia chuan a ti a. Valpuia chuan kan pahnih hmai a zah ve deuh a niang. "A nih ka chhuahsan ang che u aw.. Hlim deuhin le" ti nghat chungin a chhuak ta a. 

"Thil hi a mak ngawt mai. Valpuia thianpa i lo ni kher kher hi a" ka ti a. 

"Hmeichhe ngaihtuahna tak hi chu a " a ti sup. 

Kan puar ta peng pawng maw tihah tih leh chuan tur a váng riau. Han titi hlut dawnin a tawngmawh nasa si. 

"Engtikah nge ka hawn dawn. " ka ti a. 

"Dar 6-ah ka thlah ang che. Hetah chaw i ei ang. " a ti a. 

"Nih chuan, ka inbual dawn" ka ti a. Ka tho a, min chelh vat. 

"Puar laiin inbual loh tur. Hahdam rih phawt rawh. Chuan, hei min zirtir ve rawh le" tiin a phone-a carrom pool a download chu a kawk vâ a, ka melh nghek ringawt. 

"Ti nge i download ve ringawt a! " ka ti a. 

"Nuam i ti sia, mipa dang bula i khelh ai chuan ka zir ve ang ka ti" a tih chuan, ka lawm nge ka phur thut zawk, a biangah ka fawp zauh a. A nui huk. 

"Thil ka zawt ang che aw" ka ti sat sat a. 

"Umm" thatchhiat hmel zet hian a thu a. 

"Hmeichhe engzat nge i mutpui tawh" ka ti sap a. A nui hawk, "I va á mai mai tak. Chutiang hriat a tulna a awm lo" a ti a. 

"Nih Julie kha vawi engzat? " ka ti leh hram. Hmeichhia ka nih angin thil ka hre chak tlat zel. 

"A ho! Dingi.. Thu dang sawi rawh" a ti tlat! 

"Hmm.. Julie chu i va ţan ve. " titau derin ka ti nghat a. 

"Ka hmeichhe mutpuite sawi zut zut ching hmel ka pu em ni? " thutak angreng tak hian a ti a. 

"Ka sawi dawn chuang lo nem.. " pangchang zeta ka tih chuan, "Lo nem mizo ţawngah a awm lo. Hleinem ti rawh" a ti khauh. Ka ner khum sawk. Engah he hu a ngai lo. 

"E.. A nih thil dang, Nu Madini te nupa nen hian in inchhung a mi? " ka ti ta a. 

A thu tha a. "Thisenah chuan inzawmna kan nei lo. Kan thenawmte in hnuai saw an luah thin a. An vanduai a, fa pahnih an nei a, a nau zawk hi tuiah tlahlumin, a u zawk hi sipai a ni a, mahse, nupui a nei a, a nupui hian a hruai hrang ta daih a. Tunah phei chuan biak pawh an inbe tawh ngai loin ka hria. Sumdawnna bul ka tan tirh khan Pa Zuia hi thih ngamin a na a, an mangangin an harsa nasa mai si a, an in luahnate lahin in luah man an lo thing ve reng bawk nen, kei phei chu ka zin deuh reng vangin an harsatna chu ka lo hre mang lo va. Mami in nghak khan a lo hre ve deuh a, a khawngaih thute min rawn hrilh thin a. Chuan, ka zin hlan thoin Mami chuan kan inah a lo hruai phei a, Pa Zuia pawh damdawiinah dah lutin, an in luah man pawh a lo peksak ta vek a. Ka hawn khan keini unau chauh chu kan khua a har bawk nen, 'Kan bulah khawsa mai r'u, a tul tul min thawhpui ang a" ka ti ta a. Duhthlan tur dang an nei bik lo nen.. Lawm takin an pawm a. Nu Madini lah eisiam a thiam bakah a mawng a zangin a che peih em em a, ka lo inthlahrung hial zawk thin. Pa Zuia chu motor a khalh thiam si lo va, tihian bungraw la tur emaw a tul tul ka thawhtir a. Engmah tih loh kha nuam an ti lo zawk sia, an lo awm lo vang tih hi ka hlau a nia" a ti ta mawlh mawlh a. Ngaihnawm ka lo ti hle. 

Chutah ka va melh vung vung a, a hmuihmul rawn to deuh siar siar tawh chu ka ngaimawh riau. "I hmuihmul kha met ang" ka ti pek a. 

"Tihian a pa zawk" a la ti zui! 

"Ka duh lo. Inkiss-in min chhun thin" ka tih chuan, za deuhin a nui hawk hawk a. "Pi berin met rawh i tih chuan ka met mai aniang chu.. " a ti a. Ka bulah a rawn thu thurh a, "Infawh lahin ka fit si.. Hetia kan taksa a insik ringawt pawh hian ka danglam thei" a ti sur sur a. 

"Enteh, ka laka i insum thei viau hi a chhan eng nge? Hmeichhe dang chu i mutpui tho sia" ka ti a. Min mutpui se ka tih vang ni loin, 'Ka hmangaih vang che alawm' tiin min chhang se ka duh vang a ni. 

"A chhan i hria alawm" a ti leh tawp. Hmm.. Ka duhkhawp lo thei ee.. A lum ta deuh bawk a, inbual ka chak tawh nen, inbual turin bathroomah ka luhsan ta a. A rooma han chhoh kher kha step a ni sia, ka peih lo. Shower-a ka inphuh seng seng lai chuan, door bell ri tlang tlang ka hre thei. Nu Madini a nih ka ring. 

Ţawng thawm ka hre zui nghal a. Ka beng ka chhi kar mai. 

"Eng nge hetah i rawn tih dawn? " Rosangpuia aw khal ngeng ngawng avang chuan rawn lut chu mi dang an ni tih ka hrethiam nghal. 

"Enteh, ka dinhmun khirhzia hi hrethiam teh. Ka hlawhchham vangin ka pain min hnawtchhuak asin" Hmeichhe aw tliang tak a ni. Rindan ka nei sa bawk. Living room lama an inzui phei vang nge, an tawng chu ka hre zui ta lo. Eng emaw hian min mawlh et et mai. Ka chhuak ang nge chhuak lo ang tih ka hrethiam lo. Nupa kan la ni lo va, chutia va inlan teh bawrh pawh chu ka zak ve deuh bawk si. Ka inngaihtuah vung vung laiin, Rosangpuia aw hian, "Babe, i la zo lo em ni? Towel i ken luh theihnghilh a, zo rawh. I hritlang ang e" tiin kawngka chu a rawn kik ta a. Ka phu zuk. Towel ka keng lut reng sia. Mahse, ka va hawng ta tho a, towel min pek pahin, "Rawn chhuak vat rawh" a ti zawi sap a. Ka inhru vat vat a, bathroom chhunga inhruka inhak vel hi ka thiam thin lo. Mahse, a tul ve bawk si. Ka inthlak fel a, ka lu ka tuam a, ka va chhuak ta a. Min hmachhawn zawngin hmeichhe lian lam, sam dum hlap, hmeltha zet hi a lo thu a. Naute a pawm bawk. Mapuii a ni tih ka hrethiam nghal. 

Min en chîk ngang mai. A mitmeng pawh a thip angreng khawp mai. Rosangpuia chuan, "Dingpuii a nih hi. Ka nupui hual" a ti nghet charh a. Chu nu mitmenga tawrhna lo lang zawk chu ka hmuh hmaih bik lo. A lang apau chuan, "I va vannei ve aw.. " a ti a. A nui sak bawk. 

"Tichuan, eng buaina maw i tawh chiah a? " Sangpuia chuan a ti a. 

"Ka sawi ang kha a ni mai. Nizanah nasa takin kan inhau a, 'Hnam dang fa ka inah a seilian thei lo vang" a ti a. Ka nu leh ka u ten an hnial ngam lo. 'Naute nen kan bulah i khawsa thei lo' a ti miau si a, naute hi ka thehthang emaw keimah hi kan in atanga ka chhuah a ngai a ni" Mapuii chuan a ti a. Ka awm ve tih hre tho mah se, a dinhmun a khirh em vang chuan sawi hreh leh i a nei bik lo niin ka ngai. 

"Tichuan.. Engtia awm nge i tum? " Sangpuia chuan a ti a. 

"Ka hre lo. Dubaia chhuk leh ka duh a. Mahse, naute hi.. " a ti sap a. A fa chu a tan a hnawksak ta mai chu a nia! 

"I pa uite i nih man a nih kha.. A kai kual che a, a hmanrua chauh i ni. Tichuan, i tangkai tak loah chuan i hnawksak ta a nih kha.. " Rosangpuia aw chu a khal ngeng ngawng viau. 

"A dik, ka pa sawn ka nun a tichhe vek. Sawtiang taka mi duhám a nih saw ka ring bik lo asin. Tunah pawh hman sen loh sum a nei tawh, mahse, a dang hmuhbelh tumin a la hahdam thei lo a nih saw.. Ka patea pafa pawh a chhuahtir dawn kha.. " a ti a. Sangpuia hmel a danglam kâwk.. 

"Pa siama te pafa a chhuahtir dawn a maw?! I chiang em? " a ti hluai a. 

"Aw.. Vawiinah an chhuak maithei. Court-ah engkim a tifel vek tawh. Hmelhriat a nei tha a, thuneitu sang chelhte hi a thian tha tak tak vek an nia.. Awlsam takin in in leh lo chu a nei tawh" Mapuii chuan a ti a. 

"Kan Thangluai mai mai chu'h! Umm.. A pawi lo ve. Ka la dam ve alawm. A unaupa ngei pawh tibuai duh chuan tibuai mawlh teh se.. I pa mahnise, ani saw mi tha a ni lo" Sangpuia chuan a ti ram hmak a. Mapuii pawh chuan, "Kan lo â rei em ani. Ka nu pawh rilru hrehawm reng rengin a awm tawh asin. Ka pa sawn pawisa bak ngaihtuah a nei lo. A thih hnu thlenga chhawm a tum a niang" a ti ve a. A pa chu a ţan vak lo khawp mai. 

A nau pawm lai chu a muhil a rawn harh aniang, a che set set a, a ngik fuih fuih a, Mapuii chuan a mawng a beng thek thek a, hnute a pe zui nghal. A hmeltha reuh khawp mai. Ka awmdan a laih em vangin, "Thingpui ka'n lum ang e" ka ti a. Ka phei nghal. Ka rilru a lo buai ve em em tawp. Mapuii chu ka lainat angreng. A pa uite mai mai a lo ni sia. 

"Naute hi home-ah ka dah rih ang a. Sum ka zu thawk chhuak ang a, ka inpeipun hunah ka rawn la leh mai dawn mawni ka tia" Mapuii chuan a ti a. Ka rilru a lo na ve tawp. 

"A chhan chu nau pawm chung chuan tuman hnathawk atan min duh dawn lo va" a tih zawm zat a. 

"He naute hian tu pawimah a sawi lo asin. Hmanrua atan chuan a lainatawm takzet. Mapui, tuna i lo kal pawh hi rinna chhete mah ka nei lo che. I pain a rawn tir leh che ani lo maw? " Rosangpuia chuan a ti duah a. 

Mapuii a thaw hawk. 

"Tiang taka tlawm hian i hmaah ka awm i ring em ni? Ka mangang tawh a, min hua tih hrereng chungin ka rawn pan che a nih hi. He khawpuiah hian thian tia sawi tur ka nei lo.. I hria" lungawi vak lo hian a ti a. Thingpui ka chawi phei a, ka pe a. Ngawi rengin a lo la ve mai. 

Sangpuia chuan, "Engvangin nge min rawn pan? Ka khawngaih vang chein nupuiah ka lo nei turah che i ngai deuh em ni? " a ti a. Ka lo mitmei a, a pawisa lem hlei lo va. 

Mapuii chuan lungchhiat hmel zetin, "Dubai chhukna tur ka neih theih nan i dawrah min thawhtir ve la ka duh a ni" a ti ta a. A inthlahrun hmel ngawih ngawih. 

Rosangpuia chuan hnuai lam a melh ran a, a rilru a buai ve hle niin ka hra. 

"Ka dawra i thawh chuan tuin nge i naute kha enkawl dawn? " a ti sup a. 

"Ka sawi tawh kha, Home-ah ka dah rih ang ka tih kha.. " a ti a. 

"A tawk.. A nu i la dam a, i fapa i thisen ngei chu hnuchham inah i dah ang maw?! Eng hmeichhia nge i nih? " a lo ti hriam hraih a. Mapuii tawng tum pawh a ngawi dâk mai. Ka inrawlhna tur a ni miah lo naa, Inthlahrung chung chungin, "Ih, ka inrawlhna tur chu a awm miah lo va, Hnuchham ina dah ai chuan, i naute chu kan lo awmpui rih mai dawn em ni? Kan nula saw a khuahar thin lutuk a, a lawm ngawt ang" ka ti tîm dui a. Rosangpuia'n na zeta min rawn melh chuan ka zahzelah ka kuttin ka sik niap niap ringawt. 

"He hmeichhia leh a fapa vanga i lo buaina tur a awm lo. I mawhphurhna pawh a ni hek lo" a ti hmuk a. 

"Khawhgaihin i dawrah chuan min thawhtir ve hram mai rawh. Ka ac-a ka sum dah ve zawng zawng lah ka pain a ac-ah a dah lut vek a. Ac hawn nana ka deposit chiah ka nei tawh. Enteh, Sangpui, hetia i hnena tlawm taka inphahhniam hi ka chapona chuan a duh bik lo a nia. Mahse, ka chan hian maian chan pawh a tluk tawh lo. Ka fapa vang pawh hian min khawngaih a ngai a ni" Mapuii chuan inhnit faih faih chungin a ti a. Ka va khawngaih em aw. Hmeichhe sual tak chu a ni lo vang, a pain a thluak a suksak hneh em a, tiang khan a che ta mai a nih a rinawm. 

"Tu nge a pa? Ka zawng chhuak ang" Rosangpuia chuan a ti nghut a. 

"An ramah a haw tawh. Engtikahmah kan inhmu tawh lo vang" a lo ti si. 

"Khawi home-ah nge dah i tum? "Rilru buai hmel zetin a ti leh a. Naute chu a lainat tih ka hre ve thei mai. 

"Salvation army te hnuaiah hian enkawlna a tha an ti a, ka dah mai dawn mawni ka ti" Mapuii chuan a ti a. 

"Chuan, nangmah khaw nge khawsak i tum? " a mitmeng na zeta zuk melh chung chuan a ti leh a. 

Mapuii chuan zawi sap hian, "Ih.. Ka.. I dawrah ka thawh theih chuan ka awm chilh thei mai ang ka lo tia" inthlahrung tih hriat ngawih ngawih hian a ti a. Sangpuia a rum nghut. 

"Heti hian ti ang. I naute chu ka bulah awm se, nang erawh i duh ang chuan dawrah i riahchilh dawn nia. Hetia i laka that ka chhuah vang hian ka lakah thil dang engmah i beisei tur a ni lo. He thil ka tihchhan chu, i pa laka phuba i la lak theih nan chauh a ni. I damkhawchhuah a ngai si a" A ti ta a. Mapuii hmel eng sawt sawt chu hmuh nuam ka lo ti ve tawp. 

"Ka lawm e. Ka lawm lutuk, ka chunga i thatna hi ka damchhungin ka theihnghilh lo vang. I tana tihtheih ka nei a nih chuan ka tlanchhe lo bawk ang" Mapuii chuan a ti mawlh mawlh a. 

"I bungrua te i rawn keng em? " a lo ti daih. 

"Aih, nau paw chung chuan ka inkeng hleithei lo va. Tin, in ka chhuahsan dawn tih ka la sawi lo bawk. Rawn hmuh phawt che ka duh sia" a lo ti ve a. 

"Tlaiah Mapuia nen inva la dawn nia. I pain i chunga a thiltih hi i hrereng tur a ni" a lo ti vawt raih a. 

"Ka hrereng ang. Ka tleirawl tirh ata a hmanrua ka ni char char a, a fanu ka ni ve lo aniang tih hial chang ka nei thin. Heti taka ka laka a nunrawng hi.. Ka pa hlauhna nen ka seilian a, a duh angin nang ka thlemthlu che a, i pa a boral a, mahse, kei chu Dubaiah min kaltirin sum thawk chhuak turin min nawr leh a, kum tam tak ka awm bo hnuah nau ka pai tih hriain, nang i hlawhtlin takah chuan min hruai chho leh a, ka fa pai chu i faa puh theih beiseiin mutpui tur chein thupek min pe leh a. Mahse, hmana Rosangpuia, mipa naupang kha ni tawh loin mipa puitling tak kan hmachhawn tawh si che a, engmah i lakah tihtheih a nei tawh lo tih inhriain, kei chu a tan hnawksak ka lo ni ta a.. Sangpui, ka pa hi ngam ni ila ka tihlum tawh ang. A sal ka ni a, keima thuin vawikhatmah min nuntir a phal ngai lo. Tunah chuan, ka zalen ve tawh dawn a.. I zarah.. Ka lawm e. Tha takin ka nung ang" Mapuii chuan a thusawi chu a ti mai mai lo tih a mitmeng atang chuan a chiang khawp mai. Ka lo melh ve ngawih ngawih. 

Nu Madini a rawn haw ta bawk a. Sangpuia chuan thil awmzia a sawi a. Ani lawmah a lo tla, "Awii.. Khawmaw, ka naute thar chu… a va hmeltha kher em.. Awii a nuam dawn lutuk, khawhar takin ka awm tawh dawn lo e" a ti chul mai a. Mapuii pawh a hlim ve ta hle mai. 

Rosangpuia'n Mapuia a biaksak a, Mapuii bungrua chu an va la dawn a ni. 

"Tikhan ka inah rawn tlang tawh loin dawrah i lut nghal dawn nia, i fapa hi mangtha rawh le" a ti a. Mapuii chuan Nu Madini pawm lai a fapa chu mittui tling teuha melh vawng vawngin, "Bawihte, ka rawn hruai leh vat ang che. Lo hrisel la, lo dam tha ang che aw. I nu hian kan nufa tan hna ka thawk dawn a ni" tiin a fawp ngawih ngawih a. A fapa lah a tlei mual mual a, engmah a la hrethiam lo bawk a. A lo nui sen sen thung. An nufa inthlah lai chu hmuh hrehawm ka tih vangin phone ka khawih daih. 

An chhuah hnuah eirawng bawl a hun ta bawk a. Sangpuia chuan, "Kan pahnihin bawl ang aw" tiin min rawn kai a. Kan bawl dun ta a. Zep loh chuan chawhmeh siam hi ka thiam tehchiam lo va, a awlsam sam hi ka siam mai zel a. Sangpuia erawh kha chen training a ni bawk a, a hnehsawhin a hmuhnawm takzet. Arsa kan hem hmin a, thlai lam erawh siam vak a lo ngai lo. Dar 5 velah kan peih thei ta mai a. Naute pawh a muhil leh tawh. Sangpuia'n Pa Zuia tirin, naute mamawh, diaper, bawnghnute, leh eng eng emaw a leitir teuh a. Mapuia khan naute thawmhnaw a rawn dah bawk. A nu a ngai dawn ngei sia, ka lo khawngaih lawk tawp. Pu Thangluaia chu eng ang pa tak ni ang maw? Ka pa a nu lo va, ka lawm takzet. 

Zanriah puar zeta kan ei hnuah dar 6 a ri hnai tawh si a, thut pawh thu muangmar loin Sangpuia nen kan chhuak nghal. Chhungte mitmei ven a ngai tawh miau si a. Kan in piah deuhah a ding a, ka chhuah hmain ka kutah a rawn vuan a. "Ka thiltih kha tul lo i tih chuan, ka sût leh thei a nia" a ti sup a. 

"Aih, i titha ka ti lutuk.. I fel " ka lo ti vat. A nui a, a va hmeltha tak. Ka hnar rawn tuai zauhin, "A nih aw.. Zanah ka lo bia ang che.. Love u" a ti a. Kei pawh ka chhuak nghal. Rilru a hlim veng veng nia. Sangpuia hi ka hmangaih ta pawh a ni mahna. Mahse, vawikhatmah ka la sawi lo. 

Kawngka chu a lo inkhar thap a. Ka hawng dek dek a, sitting roomah an lo thu thap mai. Chhungkaw inkhawm an hmang mawni. Mahse, tumah an ding si lo. Ngawi rengin ka lut a. Ka room lam ka pan tur chu ka u hian, "Ding rawh. Chuti taka mipa mamawh chu va luhkhung law law ta che" a ti ta mai. Ka ding chiang kher asin le.. Ka va melh a, a meng rum kher mai, U Pari chu dak deuh vah hian a lo thu bawk a. Rami erawh min khawngaih hmel deuhin min lo melh a. Bawihtea ka hmu lo. Ka nu erawh chuan hmun dang a en daih. 

"Eng nge i sawi awmzia? " ka ti a. 

"I hria ang chu.. I zahpuiawm khawp mai. In thawhpuite bulah lah i u pari i lo accident tir ringawt a. I tlangvalpa i duh luatah" a ti ta a. Engkim an hrechhuak tih ka hrethiam ta. Ni tak e, Sir Vala kha ka hrilhfiah leh miah lo tak lawm. Kan in a hre si a, ani phungthlu hian a va tlawh tih hriat reng. A va pawi vawng vawng tak êm.. 

"Ka sawifiah thei" ka tih rual chuan, "Dingi, i mak ve bawk em a ni. I u in tikhawp khan hmu tawh lo tur chein a ti che a. Kei i u nupui mualpho taka min siamtu, hna atanga min ban hmaktu chu i va pan leh ngat a nia. I tenawm mah mah" U Pari'n a tih chuan, ka insum a tulna reng ka hre ta lo. Ka bag khai lai chu thutthlengah ka thehphei a. 

"Ni e, vawiina Rosangpuia nen kan inhmu kha ka tidik lo a nih chuan inngaihdan a ni e. Amah ngei Spot-ah rawn kalin kan monuin buaina a tawh thu leh min biak tlang theih loh thu ka thawhpuite bulah a rawn sawi a. Engvangin nge ka zui mai loh ang? Ka hre lawk bik reng reng lo. Chuan, aw ni e, ka then dawn lo. Ka then ngai lo vang" ka ti ve ta nghat nghat a. 

Ka u a ding a, ka nuin a lo chelh vat. "Rodingpui, i va zak thei lo pung pung ve a. Ka nupui tizaka tinatu hi engti kawng mahin ka makpa a ni dawn lo ka tih tawh kha. Mipa i va râwp awm ve, hmanni lawkah i pasal tur nen inneih inthulh a, tunah mipa dang.. Chu pawh mi dang laka fa nei.. " a ti bawrh bawrh a. 

"Kha thil kha an chingfel vek tawh. Rosangpuia fa a ni lo tih pawh an inpuang vek tawh e. Inawih leh chuang lo vang. Ni e, mipa ka lo ráwp aniang,.. Inngaihdan dan le.. " rilru na zetin ka ti a. Ka hnuk a ulh titih a, ka tawng tha thei lo. 

U pari chuan, "Sawtiang mipa leplerh, hmeichhe hrang hrang kawp kual thin saw a eng saw nge i duh a? A hausakna saw mi? " a lo ti khanglang a. 

"Nang phiangsen kha. Lo tawng ve sek suh. I thlem thluk zawh loh mipa a nih vang em ni? I huat em em a.. A room-a i thlem kual dan kha ka hmu vek e. Chuvanga ban che a nih kha.. Mahse, ka u rilru nat a hlauh em vangin sawi chhuak lo turin min ngen zawk. Mahse, ka insum a tulna ka hre lo. Nang ka u nupui khan Rosangpuia kha a roomah mutpui tumin i thlem vel a nih kha.. " ka tih rualin ka biang a ri thawk. Ka lo ding nghet lo nen, ka tlu sawp niah a. Ka u Lawma'n a ni min beng. A mitmeng chu a sen rum a, a khur der der bawk. A thinrim hle tih ka hria. Hetianga chhungkua kan buai hi ka la hre ngai lo, tin, ka nuta ten kut min thlak vawikhatna a ni bawk. Ka thinlung chu na tak a ni. Na tak.. 

"Khatiang khan ka nupui hi han puh chhe leh teh.. Ka sawisa hlum deuhthaw ang che. I bialpa duh huam huam vangin ka nupui thlengin i hmertel a, i lo va tenawm reuh ve.. I duh chuan va luhkhung rawh, kan dang lo vang che" a ti a. Tah hawm hawm ka chak takzet. Mahse, ka mittui tla chu hru hulin.. Ka inbeng tho a, ka pa pawhin a khap miah lo leh ka nu pawh a chechang miah lo chuan min tina zual.. Ka nui lui sak a. 

"Aw le.. Umm.. Ka kal ang e" ka ti ve ngat a. Ka roomah lutin Rosangpuia ka call nghal. Hmeichhia ka nih piah lamah naupangber, kehthei dawma an dawm thin ka lo ni ve a, ka no em em a, ka lung a chhe ngawih ngawih. Engpawh ka huam chu a ni ta ringawt mai. 

"Aw.. Duatpui" a rawn tih leh lek phei chuan ka keh a ni ber. A bula pangchan ka chak ngawih ngawih. 

"Ih.. Min lo hruai rawh.. Inru ang" ka ti ţiau a. 

"Eng nge thleng? I tha em? " a ti vat a. 

"Ka tha lo… lo kal rawh" tiin ka insut hlawp hlawp a. 

"Ka lo kal nghal" tiin a dah a. Khumah ka bawk thlawp, ka tap khur ngat ngat. Na ka ti lutuk.. A tawngkam tina mipa râwp, mipa duh min ti fo leh ka thusawi aia a nupui sawi a ring zawk te chuan ka thin a khei zawk zawk. Chu zawng ai chuan, ka nu leh pa ngawi reng, che chang duh eih lo khan min tina zual. Ka thlavang hauh tura ka ngaihte an ni asin. Thil awmzia hrechiang miah lo va, hetia tawrhtir ka ni hi ka lung a dam thlawt lo a ni. Mittui far chungin ka bag-ah ka thawmhnaw thenkhat ka khung a. Kal tak tak ka tum.. Engkim ka huam vek. Ka thinrim leh rilru na chuan min ti â vek a ni ber e. 

10 mins pawh a liam lo vang tih turah kawngkapui chu a rawn inhawng rawp. Room atangin ka chhuak nghal. Rosangpuia ngei mai chu mangan hmel zetin a rawn lut ta a, kan chhungkua chuan kan thlir thap. Min rawn melh a, ka mittui a hmuh vang nge chak zeta min rawn panin, a lamah min pawt phei lawp a, a awm nghengin min kuah thlawp.. 

Ka u leh ka pa an ding rual thawih a, an mitmeng chu rum el ul tak a ni. 

"Ani hi ka hruai dawn a ni. " a ti nghet charh a. 

(Bty low.. Current ni 2 kan nei tawh lo 😢