Rosangpuia 11

ROSANGPUIA.. (11)

Ziaktu: Toni Râlte

Class kal tur chuan ka chhuak a, Kimi nen bawk kan inphur leh. Rosangpuia awm dan te chu ka hrilh ve a. "Lehlamah chuan zartu hi a ngah ve dawn sia maw, a tan pawh insum a har ve ngawt ang" a ti a. Ka ner sak ringawt. College ka thleng a, project buaipuiin ka bur leh ngar ngar. Class ka va la leh a, lecture ka pek mawlh mawlh laiin tlar hnunga thu hmeichhe pahnih chu an phun dun ser ser reng a. Ka ngei ta deuh hlek nen, "Nangni pahnih kha.. Lecture ka pek lai chuan, lo ngawi hram hram r'u aw" ka ti a. Ka aw pawh a nem hran lo maithei. Pakhat zawk mit hnawih nasa deuh chuan min rawn melh rum angreng khawp mai. Mahse, engmah an sawi lo va. 

Tlar laia thu mipa lian lam, la naupan hmel tak chuan, "Miss, Kan class picnic kan rel a, min lo telpui thei ang tiraw? Geography bik kan ni dawn " a ti a. An class monitor a lo nia. 

"Engtikah nge " ka tih chuan, "Friday-ah hian kan tum a. Principal pawh kan la dil chuang lo, vawiinah kan thehlut ang" a ti a. Vawiin hi nilaini a ni tawh. Ka kal lo rei tawh si a, inhmelhriat nan pawh tha dawna ka hriat vangin, "Aw le, ka lo tum dawn nia" ka ti a. Kut an beng dar dar mai. Tlar hnunga thu ka hauhte erawh an tum vuau a, ka hmu lo der thung. Intinula tlangval rual vek an ni tawh a, inhauh vak vak hi ka duh dan a ni bik lo. Mahse, thahnemngai taka din pawh ding tha thei lo chung chunga lecture ka pek laia lo ngaihsak miah lo hi chu palliam a har ve thin bawk a ni. 

Lunch chu Atea nen bawk kan ei dun leh a. Min la treat zui. 

Thutak deuhin, "I chanchin thenkhat te ka lo hre ve a, a zia lo khawp mai. Pasal neih leh pawh i ngam tawh lo vang a" a ti suam suam a. 

"Tisualtu ka ni lo bawk a, ka la ngam mai chu ka ring" tih pahin ka nui a. Ani pawh a nui ve hawk hawk. Ka eitui phian mai. Chawhnua class ka va la leh chu, laklawh deuhin kan zo a, period a la zo si lo. Chhuah tuma ka inpuahchah laiin, tlar hnunga ka hauh mit hnawih nasa deuhi khan, "Miss, i pasal hual kha i thiannuin a chhuhsak che an tia, tak tak ami? " inla innocent zet hian a rawn ti ta a. Ka phawk angreng. Nuam lo ve duh tak a ni. An vai mai chuan min melh thap bawk si. Ka chil ka lem khawlh a. 

"Tak tak ni e, chuvang alawm hei ka la nulat" fiamthu titihin ka chhang ta ringawt a. 

A bula thu chalsam neii chuan, "Hmanni khan facebookah te khan i lar tawp a, ih, i thlavang kan lo hauh ve nasa tawp. Mi pa chu i ngaizawng lo tiraw? Miss" min han ti leh ta ngat a. An hre vek tawh, mahse, min tihzah an tum ni berin ka hria. 

"Mi pasal ngaizawng tak tak ila, FIR ka thehlut ngam dawn em ni? " ka ti ve ta sak a. Mipa lam an lo bu nghut. Min chhang zui ta lo va, kei pawh dar rik hmain ka chhuak ta a. Ka insangmar nasa hle. Class ka nei tawh lo va, ka duh chuan ka haw thei. Mahse, kimi nghah a ngai si. Rosangpuia lah khan ka rawn lam ang che a ti bawk si. Nghak anga lang duh si loin ka rilruin ka lo nghak tho mai. Ka rin ang ngeiin min rawn call ta a. 

"Class i la nei em? " a ti a. 

"Nei tawh lo" ka ti mai a. 

"Ka lo kal.. Gate bulah lo awm la, 10mins velah ka rawn thleng ang" tih leh phone dah a rual. Atea chuan, "Class ka nei tawh bik lo, kan duh chuan kan haw thei" a rawn ti a. He pa hian min ngaina dawn tlatin ka hria. Amah lah hi a ngainatawm ropui si. Inven ve deuh ka ngai. 

"Ka thianpain min lo lam dawn a" ka ti a. A hmel chu ka ngaihbel emaw ni a ngui deuh tlata ka hriat. Mahse, ka ngaihsak zui ta lo va. Gate bulah chuan ka lo ding ta ran a. A sawi ang khan 10 mins bawr velah a rawn thleng ta chiah. Ngawi rengin ka thu lut a, ani pawh a tlan ve nghal. 

"Dawrah nge ka inah" a ti sup a. 

"Ka hria mi? " ka ti nghat. 

"Ka inah aw.. " tih leh a in lama tlan a rual a. Nu Madini te nupa an awm lo. 

"Sairangah an chhungte chhiat tawk an awm a, an zuk kal a nih kha. Beer i duh em? " tuin fridge a hawng a. 

"Aih" ka ti hmuk. 

Living roomah kan thu dun a. 

"Le.. Kha pa kha tu nge? " a ti leh nghut. Atea a sawina a ni tih ka hai lo. 

"Ka thawhpui a nih kha. Keimah thiam loh min chantir suh. Kha hmeichhia kha tu nge a nih? " ka ti ta a. Ka aw pawh a vin lam deuh a ni. 

"Hotela thawk hmeichhia a nih kha. " a tih chuan awih lo zetin ka ner sawk. 

"Hotela thawk chu i bulaha riak a maw? " tiel zet hian ka ti a. 

"Tumah ka bulah an riak lo." ka va duhkhawp lo thin tak. 

"Ka phone number te i lo delete a, heheh.. I che rang mah mah. Rosangpui" tim map loin ka ti a. Ka thin a rim leh ta viau. 

Min rawn melh vang vang a, dam thlup hian, "I phone number hi vawikhatmah ka la delete lo. Kha nu khan eng thu nge a lo fah che ka hre lo. Mahse, ka rui viau a, an hotelah ka riak lut tih leh hmeichhiain ka roomah min kuah lut tih ka hria. Mahse, ka bulah a riak lo. Riak pawh nise ka khawih peih lo" a ti charh charh a. 

"Hotela i luh hmaa ka call zozai te kha le" ka ti ve nghat. 

"Ka mood khan biak che a support rih lo a tin ni.. Ka thinrim tih i hre tho sia" a ti a. 

"A thuhrimin mipa kalpui ve dek dek tawh phawt thik hi a rilru zimthlak.. Azuali pawh i hnathawk a ni, ka sawi sek lo. Kei aiin i hmu zing daih zawk.. Khatiang kha chu enliam ve rawh" ka ti tân tân a. Hmeichhe chungchang kha chu a confi ropui sia, han sawi leh vak dan tur ka hre lo. Hunin dawt a sawi leh sawi loh chu a la rawn hril mai ang chu. Dam erawh ka dam famkim lo. 

"Mipa ka nih hi.. Mipa, ka mipatpui rilru chu an mitmeng leh landan atangin ka hriatthiam loh ring suh. A hnunga i chuang nuam a tihzia leh a inchhuanzia kha ka hmuh hmaih i ring em ni! " a ti ta hrâwk a. Ka ngawi hmak. 

Tui vawt a va la a, ka in khawlh khawlh. 

"Engpawhnise, kan inhmu tihte hi ka pain a hriat chuan ka nasa lo khawp ang. Mapuii te pawh chu chingfel ta vat che" ka ti a. A khi suk. 

"I rin aia hmain chinfel a ni dawn. Naktukah DNA kan test dawn" a tih chuan, ka lo ipik rukna te kha an bo duak mai. 

"I fa ni ta se.. " ka ti zawi sap a. 

"Ka enkawl ang. Ka bulah ka chentir ang. Ka fa vanga min kalsan i duh a nih chuan ka dang lo vang che" a ti nghet charh a. 

"Chu! Ka va pawimawh lo awm ve" ka ti nghat. 

"I pawimawh ber zawk a, mahse, i nunkhua tihnawm loh ka duh lo. " a ti leh mai a. 

"I fa ni lo hram se.. " naupangchhia zeta ka tih chuan min rawn thut hnaih a, ka sam a tuai a, "Naute saw pawisawilo a ni a. Kei min hnaihna hmanrua atana a nu sawn a hmang a nih chuan, ka lainat viau ang. Ka fa ni lo mah se" a ti dam thlup. Mi rilru chhe tak zawng a ni lo ve. 

Kan ngawi dun rauh rauh a, min rawn kuahin zawi muangin min kuai her a, min fawp ta a. A damin a fawh chu a nem hle. Kei pawn ka chhang let ve bawk. Mahse, rei kan infawp lo, amah a duhthawh tan dawn tihah a tawp leh daih. Hei tak hi mak ka ti! Min fawp reng se ka tihna lam ni loin a inlahrang vat zel hi.. 

Ka ngaihtuahna hria niawm takin, "Fawh pawh ka fawp tam lo che. A chhan chu a hun hmaa a tawp thlenpui mai che ka hlau thin. Min hîpna hi a chak em a, mipa ka nihzia a lang leh thin" a ti sup a. Ka hrethiam. Ka lawm ru viau bawk. 

"A tha daih zawk. Mahse, hmeichhia mutpui tawh suh" ka ti hap a. 

Min rawn melh hrâwk a, "A mak! Nang nen kan inzawm atangin tu hmeichhhia mah ka la khawih leh lo. I lakah pawh ka insumtheih chuan, hmeichhe dang lakah ka sihhnip ring duh suh" a ti hmuk a. A lungawi tehchiam lo a niang. 

Kimi ka call a, Rosangpuia ina ka awm thu leh min rawn lam kawi turin ka chah a. Amah Sangpuia'n min thlah chuan ka chhung ten min hmuh ka hlau a ni. Ani pawn hnialna a nei hran lo. Kimi pawh kan nghak rei lem lo. Rei pawh thu loin kan haw ta nghal a. Kimi'n, "Inchingfel vat r'u, A hun laia tihfel loh hi chuan a hnuah hnawk a tam duh" a tih kha a dik hlein ka hria. Rosangpuia chuan fiah vat teh se. 

Zanriah kan ei laiin, "Naktuk atangin Sangpuia dawrah chuan ka thawk ve dawn a. Mahse, kalna tur hi ka nei bawk si lo" U Pari chuan a ti a. Hmanni khan Rosangpuia number kha ka pe a, an lo inbia ani ngei ang. Sangpuia tan chuan a bialnu te monu ni bawk si chu lo chhan beidawn a nuam chiah lo a ni ngei ang. 

"Taxi a awm alawm" U Lawma'n a ti a. U Pari hnathawk tur chu lawm vak pawn ka hre lo. 

"Nitin taxi hmante chu a hautak dawn asin" a lo tih chuan, "Ka scooty saw i duh leh khalh rih la, ka khalh thei rih chuang lo" ka ti a. A beisei deuhin ka hre reng ah. 

"I phal chuan a lawmawm ngawt ang" a ti ve thliam a. Ka pa chuan, "Eng ber nge i va thawh dawn? Inah awm mai mai ula a tha zawk asin mawle" a ti chuar chuar a. 

"Aa.. Ina awm reng ringawt chu a ninawm. Ka hre lo engtin nge ka thawh dawn ni.. A la sawi si lo va, hlawh pawh a chhe lo vang.. " U Pari chuan a ti liam puat a. Ka nu erawh a tawng ve lo. Ina a awmin a thatchhe si a, Rami tan phut a na ve tho bawk nen, ina a awm lo kha a tha daih zawk. A thawk rei peih ang em tih zawk a ni. Lalmama chanchin kan sawi ta daih a, a zia chho viau a, a nâk ruh vang erawh kha chuan damdawiin a la chhuahsan thei lo thung. Rami pawn a han kan ve tawh a, a ngaihtuah hle niin ka hria. 

Dar 7 rik hma deuhin Cindy nuin min lo call mial a. 

"Dingpui, hei i thiannu pawn nau a nei dawn a. " a rawn ti a. Ka phu zawk. Hun a lo kal chak ve riau mai. Cindy pawn nau a nei dawn ta chu a nia. 

"A va lawmawm ve aw. Tluang takin nei rawh se aw" ka ti a. Ka rilru tak tak ka sawi. Ka thinlungah Valpuia a tlakhniam tawh em vangin Cindy chu han huat leh chuan vak ngaihna a awm tawh lo. Hrisel takin nau nei se ka duhsak khawp mai. Ka pa te pawh ka hrilh ve a, an sawi zui ve nak nak mai. 

"U pari kha hna i lo pe a ni maw! " tiin ka va text a. 

"Mi rawn be chhen sia, ka pe ta mai. Waitress pakhat hi an khaw lamah a haw thut a" a rawn ti a. Kan mo nu chuan waitress nih a duh dawn mawni le.. Enchhin phawt ang. 

"Kolasib-a ka dawr khar chhawn kha bungrua ka dah luh hnuah an lo rawk pek a.. Hei kanl buaipui mek" a rawn tih chuan, ka be zui ta rih lo. A buai thin lutuk hi amah ngaizawng chak hian ngaizawng ta chiah se an ngaihzawn rei peih ka ring meuh lo. 

"Ding, fapa ka nei asin" Valpuia msg chu ka reply lo thei ta bik lo a. 

"Ka va lawmpui che em aw. A nu a tha em? " ka ti a. 

"A tha turah ka ngai, ka la hmu lo ka fapa pawh" a rawn ti a. 

Ka chhan loh hnuah, "Nang nena kan fa ni zawk se ka ti" a la rawn ti leh. Ka reply ta chuang lo. 

Dar 11 velah Cindy nu status-ah nausen sen chik chek, hmeltha deuh hi a rawn lang ta kuau a, "Ka tupa" tiin a caption a ziak a. Ka va like ve kha. A lawmawm e. Tluang taka a nei thei chu. 

Zing ka harh rualin, "Vawiinah Rosangpuia ten DNA an test dawn" tih chu ka rilruah a rawn lang nghal. Phur takin ka tho a, ka inphih fai a. Rami hi a ngawichawi riau, Mama vang a nih ka ring deuh. Mahse, a taimak ngaiin a la taima reng tho. Bawihtea nen kawtah kan walk a. Darkar chanve hnuah ka inbual leh a. Tukthuan kan ei zui nghal. U pari pawh a vul khawp mai. Hna a thawk chho ve dawn chu a nia. A tha vek mai e. Kimi nen kan inphur phe leh lawp lawp a. Office ka luh rualin, Atea'n, "Ka birthday pawh min wish lo" a lo ti nghal a. Ka hawihai hman. 

"I birthday tih pawh ka hre hleinem" ka ti a. 

"Tak taka ka ring alawm. Ka hrilh bawk si lo che a. Chuvang chuan zanin chu dinner min kilpui a ngai aw" nelawm zet hian a ti a. Kei kher kher.. 

. "khawiah in inah maw? " ka ti ha a. 

"Aih, Zo Chokaah dawhkan ka hauh tawh.. Min kilpui ngei a ngai ang. " a ti ta mai a. Zo Choka ber kher chu aw.. Ka va za lo tak. 

"I bialnu te sawm zawk la, keite chu " tiin phat ka tum a. 

"Chu tak chu min puih a ngai a ni" a ti ta daih a. Eng nge awmzia le.. 

Ka hrilhhai hmel chu hmuin a kiai suk a, "Nakinah ka la hrilhfiah ang che" a ti a. Ka bu ve nghat ringawt. Class la turin ka chhuak nghal a. A nuam leh viau e. Mithnawihi leh Chalsami pawh an nghal vak lo. An hming hi ka hre dik thei thlawt lo hlawm a, kan picnic hunah kan innel lehzual ang chu maw.. 

Short break laiin Atea chuan msg-in, "In chung zawlah chho lawk ila" a rawn ti a. Ka va melh a, a lo nui hui mai. A sawi tur hi a pawimawh ve deuh a nih ka ring. Ka che ta vat a. Kan chho dun a,. 

"Ih, i hrethiam vak lo maithei a. Englo a nia. I rinngam ang tih ka ring a, ka sawi tawp dawn a nia. 

Ka pi ka nu nu hian min la dampui ve a, kan bulah a awm nghe nghe. Ka unau dangten nupui pasal an nei vek tawh a, kei hi ka la awl. Ka pi chuan, 'Ka dam lai ngei hian nupui nei tawh rawh' min ti chamchi a. A nawrin min nawr a ni ber mai. Mahse, harsatna ka nei a. Hei tak hi nia ka buaina chu. Sawi tawp ila, thla hnih kalta khan bialnu ka nei ve a, mahse, ka harsat rukna vangin kan inthen leh ta si a, ka chhungten chu chu an hre ve tawh si lo. Ka pi chuan, "I pianchamah hian zanriah ei turin rawn hruai ngei ngei ang che. Ka thih hma ngeia hmuh ka duh" a ti mauh mai a. Chhuanlam ka siam lahin a pawm duh si lo, ka pa te pawn, "Rawn hruai chu a har nang.. I pi hi a kal tep tawh a, a duhthusam hi tihhlawhtlintir ve rawh " min ti sek bawk si. Ka pi saw thawhah nei a nia, eng emaw chang phei chuan a kal mai anga tih chang kan nei thin. Tin, ka pi tana ka pawimawhna em em chu, ka nuin min hrin hlim hian ka nu hi santenin a na vak a, ka pi pawm seilen, ka nu dam hnuah pawh a tute zingah pawh a vohbik leh a chawi bik ka ni a, kei pawn ka pa nu leh pate ai chuan ka hnaih daih zawk. Chutiang vel chu a nia. Ka bialnu kha an la hmu lo va, kha ka bialnu hlui aiah khan min rawn kilpui hram la ka duh a ni" a ti ta a. A hmel a thutak ngang mai bawk si, ka khawngaih ta riau. 

"I bialnu hlui chu i sawm ve hrim hrim em? " ka ti a. 

Harsa tih hmel zet hian, "Ani chuan a tenin min ten tawh alawm.. Min block fai vek tawh" a ti hawk a. 

"Eng harsatna tak nei ang che maw.. Aw le.. A tha lawm, ka lo kal dawn nia. Thiante tan te chuan" ka ti ta a. A hmel hmuh a nuam sawt. 

Chiang deuha min rawn enin, "Ka lakah chuan hlauthawng suh. Hmeichhe tana siam ka ni ve lo. Ka tina lo vang che" a ti ta mai a. Ka phâwk ngei mai. 

"Eng nge a awmzia? " ka ti vak a. 

A nui lui a, inthlahrun hmel em em hian, "Harsatna namen lo tak ka nei a ni. Hmeichhia hi eng atan mah ka ti lo. Nang pawn min ten ang, mahse, tunah hian bialpa ka nei a ni" a ti ta a. Ka îp chawih mai. Ka chil ka lem khawlh bawk. Ka rin loh leh beisei loh lutuk thil chuan min deng dawt lo thei lo. 

"Ate.. " ka ti hliai a. 

"Aw. Ka hria alawm, rin a harsa ang tih chu. Mahse, vawiin thlenga nupui ka la neih loh chhan chu hmeichhe tana siam ka ni lo a ni. Mipa bakin ka feelings an tiche phak lo. Ka bialpa nen hian kum 5 chhung kan inkawp tawh a. Mahse, 'A ni thei ngang lo ve. Tawpsan ila, infiah dun teh ang' ka ti a. Hmeichhia kan kawp ve ve a, mahse, sawi tawh ang khan kan enjoy ve thei thlawt lo a ni. Ka bialnu chuan, 'Pa thei lo, mipa pawh a ni lo' min ti hial! Han insangmar ila a duh ang chu ka pe thei em em ang. Mahse, itna leh phurna neih miah loh chuan maw.. Engmah hi a lo nuam miah lo a. Ka tilui thei ta ngang lo va, ka tawpsan ta tawp a ni. 

I bulah ka inphawrh ta vek a nih chu, ka rin zawng tak i ni a. Khawngaihin min puanzar sak lo hram ang che" a ti ta mawlh mawlh a. Atea chu ka khawngaih ta em em mai. Hrehawm a tihzia ka hmu ve vek si. Hetiang mipa hi an lo awm tak tak a nih dawn hi. Kan society-ah an la chêp si, Kan sakhua nen lah a inkalh rapthlak bawk si. An chhungril nun a va ipik dawn tehlul em.. 

A kutah ka va chelh a, "Lungngai suh. Engkim a tha vek ang, ka theihtawp ka chhuah ang e.. " tiin ka hnem a. A nui ve var var mai. 

"Mahse, Min hmu ringawt se, nakin zelah engtin nge niang? " ka ti a. 

"Kha lam chu ka chingfel mai ang. Ka pi hian min kalsan tep tawh a, a kal hmaa a duhthusam tihhlawhtlinsak kha a ni mai. Ani ber a kal tawh chuan, ka harsatna hi ka nu leh pate la hrilh mai ang" a ti ta a. 

"Huaisen takin le" ka ti sap a. Kan inhnaih sawtin ka hria. Mi hi an pawnlam landan ang hi an va ni lo tak em.. 

Zo chokaah kan ei dawn miau vangin a changtupa ka hrilh loh chuan boruak a kal dik dawn lo va ka hriat avangin, Lunch break laiin in chung zawlah bawk ka chho a, ka call ta a. Damdawiinah an awm a, Mapuii te an nghak mek a niawm e. 

Tichuan, Atea min sawm dan leh a harsatna te chu ka sawi ta vek a. Atea khan sawi chhuak lo turin min ti naa, Rosangpuia'n boruak a tihchhiat ka hlauh em vangin amah ka rawn thlap vek a, a phalnain ka hrilh ta a nih hi. Rosangpuia chuan, "A tha alawm.. Engkim a tha vek ang. Buaina a awm lo vang" a ti a. Ka thaw huai e. 

Chawhnu class pawh tui takin ka la hleithei lo, Atea ringawt ka rilruah a awm. Amah anga harsat rukna nei hi engzat tak awm ve ang maw? Hmeichhiaah pawh kan bang bik lo. Thawk khat laia kan thiannu ni ve thin Láni te kha aw.. Mipa bulah hian a hlim thei thlawt lo. Bialnu te a nei chho ta tawp kha a nia. Tenawm rawng kai thin mah se, an bulhnaia khawsaa an tawrhna hmuhpui thiam chuan, kan ten ngawt thei lo. Hetiang ni lo, Mizo mipa nupui pawh nei ve tawh si, hurherh vang liau liaua mipatpui kawp chingte hi ka ten zawk. Anni leh Atea te chu an danglam leh tlat lawi si a ni. 

Class banah Atea'n min thlah a. Zanriah ei turin min lo lam leh dawn a ni. Ka nu te pawh thil awmdan a thuphungin ka hrilh a, an remti ve mai. Zo chokaah kan ei dawn tih erawh ka sawi lo. Ka pain a remtih loh ka hlau. Ka inbual vat vat a, ka inthlak mek laiin Atea a rawn thleng. Ka rin aiin a hma. Chhungkuaa ei tur an nih vang a nih ka ring. Kei pawh ka inpeih ta vat a. Kan chhuak dun nghal. 

"Ka nute chu ka pa te nen an kal tawh" a ti a. Ka rilru a hria a ni maithei. Zo choka ka bialpa dawr chu kan thleng ta a. Tun ang hunah chuan zanriah ei tur bak an awm tawh ngai lo va, mahse, ka rin aiin an lo tam. Hnathawkho pawh an vei suau suau a, kan dawhkan lam chu kan pan zui ve nghal. An lo thu thap tawh a. Atea nu leh pa leh a pi tar tawh tak bakah Atea farnu leh a pasal te an ni. Ka nui lui sáng a, confi taka hmachhawn ka duh a ni. Atea tan pawh ka tih a ngai. 

"Pi, hei hi Dingpui a ni a, ani nen hian thla 3 kan inzui tawh a" Atea'n a tih lai tak chuan, U Pari hian kan dawhkan bul chiahah Eitur a lo serve mek a. A form hak chu a inhmeh phian mai. Ka hming lamrik anih vang nge a rawn hawi a, kei pawn ka va hmu. Mahse, hre lo angin ka awm ta law law, thil a tikhawlo ang tih ka hlau ru viau. Atea pi chuan kut khur dar dar hian min rawn chibai a, a hlim hmel chuan ka lungte pawh a tichhe deuh e a. A nu leh pate pawh an felin an polite khawp mai. Kan thutnaah kan thu ta a. Atea farnu mimi chuan, "In inhmeh tawp. Khaw maw inthla kan la ang e" tih pahin a rawn click nghal mai a. Ka lo inring lo nasa. A tha vek tho e. Atea pi a hlim ber mai. A tupa chhungril nun a hre hauh si lo. Eitur pawh an rawn dah tan ta a. Ka ril a tam tawh bawk a, ka ei leh teuh ang. 

Chaw kan ei tan tih chuan kan hnunglamah an ri hak mai. Kan va hawi phei ve a, Nu valai Samkir chuat mai, hmeltha zet hian kan monu U Pari chu ben tumin a lo inlek uaih mai a. U Pari lah chuan dak vah hian, "I ngam chuan min beng rawh. Ka dawh mai mai lo vang che" a ti khar khar a. 

Manager a rawn lang ta vat a, "Eng nge buaina? Eng nge thleng? " a ti vin thak a. 

Samkiri chuan, "In waitress inthlahdah lutuk vang a nih kha. A thil serve hi mawihnai taka dah awm lo, thinrimna a nei emaw tih turin a rawn dah chawrh chawrh a, hei ka pawnfen hi en ta che.. A val kulh hi.. A mi tihbuakna a nih hi" a ti ta hlaih hlaih a. 

Manager rawn tawng leh hma chuan Rosangpuia aw kan hre ta a. Ka lungphu a rang hle. 

"Ka pi, i mi ngaihdamna ka dil e. Kan nau hi vawiina rawn thawk thar chauh a ni a. Training pe hmasa lo vin ka lo thawhtir a. Ka thiam loh a ni e. Inpawi kan sawi vangin in zanriah hi 50% in ka lo discount ang che u" Dam dup hian a ti a. Suit nena induang zaihin inngaitlawm takin chu nu hmaah chuan a ding a. Samkiri pawh chuan, "Discount kha chu a ngai pawh ka ti lo. Ngaihdam min dil se ka lungawi ang. Amah aia upa ka nihna ang pawn min zah lo deuh hlek a ni" nem zawk hian a ti a. 

Sangpuia chuan U pari chu a melh a, "Ani hi ngaihdam dil rawh" a ti nghut a. U Pari lah mahni tawka induhtawk ve tak a ni si. 

"Ka dilna chhan tur ka hre lo. Kei aia upa pawh nise, a lo per palh a ni mai a. Kut te min thlak a tum zawk asin" a ti hlawih hlawih a, mahse, Rosangpuia aw hlauhawm zet chuan, "Tunah ngaihdam dil rawh" a ti hriam hraih a. Tu han hnial ngam rual ni hek lo le.. Zawitein, "Ka tihpalh" U Pari chuan a ti a. Chu nu pawh chu a thu tha ve leh ta a. 

Rosangpuia chuan, Zawi fiah tak siin, "Ka pindanah min rawn hmu rawh" U pari chu a ti a. A kal nghal. Ka lo inhumruh ve vek. Kan monu awmdan tehchai chu aw.. Mahse, ka lainat ve tho bawk si. 

Boruak a han alh hluai tak naa, kal khawmte chuan kan awmdan pangngai kan zawm leh vek tawh a. Keini pawh titi kan vawrh ta daih. Atea makpa chu a felin sawi tur a lo hre viau mai a. A zia khawp mai. Atea nu chuan kan chhungkaw chanchinte min zawt zauh zauh bawk a, Chhan nuam tak a ni lo. An fapa nen inzawmna tak tak kan nei si lo. Mahse, tha tak chuan ka sawi ve zel mai. Kan ei kham dawn lamah, "Dingpui, in ei thei maw? " Rosangpuia aw hian a rawn ti a. Ka phu zuk. Atea tih loh mi dang chuan mak an tih hmel viau. 

"Umm a tui khawp mai. Ka ei teuh mai" ka ti a. Nui sáng chungin amah lo thlirtu te chu a melh kual a. "Ani hi ka thiannu a nia. Atea bialnu a lo ni bawk a, Atea piancham lawmpui nan inzanriah hi chu ka lo free ve ang che u. Ka pi, i ei tui ang chu maw? " tiin Atea pi chu a va en a. Pitari pawh chuan hlim em emin, "Awwiii aw. Tuaimam, i va fel em em ve.. Ka ei tui lutuk a, ka pum hian a zo leh dawn lo" a lo ti ve a. Boruak chu a nuam hle. Atea hamhaih zualpui pawh a bo ta duak mai. Rosangpuia hmelthazia leh a mi hriatthiamna chuan boruak chu a tinuam veng veng mai. A kal hnuah pawh an sawi zui sep sep a, "Zanriah infree ringawt chu. A half tal pe ang u" Atea pa chuan a ti a. 

"Aih, pe duh suh u. A la chuang lo vang, ani nen khan tette atanga inkawm tawh kan nia. Min lawmpui venaah ngaihsak tawp rawh u" ka lo ti a. Dik tak chuan khatianga a rawn chet kha ka ring bik hauh lo. 

Dessert kan ei laiin Atea pi chuan, "Dingpui, engtikah nge inneih hi intintuah ve ang le? Kei lah ka damrei tawh dawn si lo. Ka dam lai ngeia ka tupa te inneihna hman hi ka va duh em" a ti ta a. Chhan ngaihna a va vang tak em. Atea chuan, "Pi, lungngai suh. Dingpuii hian thil zir laklawh a nei a. A zawh velah palai kan tir dawn nia. Kan sawi vek tawh alawm" a ti ta sawk sawk. Ka thep suai suai e. Hawn lam kan hnaih ta a. 

Manager bulah kalin, Atea chuan, "Engzat.. " a tih mek laiin, Manager chuan, "Ka pu, nangni chu tikhan inkal thei e. Kan pu in lak a ngai lo a tia.. Tluang takin inhaw dawn nia" hlim sâng hian a ti a. Atea hmel pawh a hlim ve khawp mai. Chutiang na ná na chu tiin kan chhuak ta a. 

Mimi chuan, "U Dingpuii vangin zanriah tui lutuk a free in kan ei ringawt a nia. " tiin a nui hak hak a. An lawm ve hlein ka hria. Kei tak pawh ka lawm. Tluang tak chuan kan inthlah haw ta a. Inah erawh a rawn peng ta lo mai. A zak tlat! A mak! 

In chhung ka luh rualin U Pari ang thawm ka hre nghal. Tîm daiin ka lut a. U Pari chuan, "Dingpui, saw mihring sangha ang maia vawt saw i nei hman lo a, a lawmawm ngawt mai. Mi nunrawng a nih saw.. Ka haw lutuk" a ti hlak hlak a. 

"Eng nge thleng a? " ka ti a. 

"Aw. I hmuh ve vek kha.. A thuhrimin nang pawh Rosangpuia nen in inthen chiah a, mipa dang i kawp leh thei a nia. Thla 3 chhung kan inzui tawh te kha a tia.. Eng nge awmzia! " a ti ta a. Ka chil ka lem khawlh. 

"Ka thianpa a nih kha. Lem ka chansak lawk anih kha" ka ti a. A ner náwng a, "Awihawm loh ee, I ex Rosangpuia lah chuan min ban ringawt a. Engmah tihsual pawh ka nei tawp si lo" a ti a. 

"I hna kha i thawk tha lo a niang chu.. Ka hmu ve vek alawm" ka ti nghat a. 

Ka u chuan, "Traning pawh nei loin a va kal a, mi zawng zawng hmaah a tizak a, Eng ang mipa nge a nih a? Tenawm lutuk" a lo ti ve hluk a. Ka na zawk mai. Mahse, ka sawi vek chuan a hnawk mai mai ang tih ka hlau a, ka ngawihsan ta mai. Rooma ka lut tur chuan, ka u chuan, "Mipa i hre mah mah deuh e, nang pawh hi. I vanduai vangin kan en liam mai mai che a, tun atang chuan ka khirh thak tawh ang, hria ang che. Rosangpuia i hmu leh tih ka hriat chuan i u ka ni tih ka theihnghilh ang" a ti khur ta dat dat a. Ka ding chawt. Ka pa ka ngaichang a, engmah a sawi lo. Ka u chu a thlâwp tihna a niang maw. Engmah hrechang tawp si lo. Thinrim ţûnin ka inbual a. Rosangpuia reng reng pawh U Pari chu lo ban rih lo mai tur a nia. Thil a tikhirh leh vek. Ka u hi pal luih chi a ni miah lo lehnghal. U Ruata aiin a tih tawh loh lamah chuan a khirhin a sak tih ka hria. Ka pa lahin a khap dawn si lo. Ka lung a zing mang e. 

Ka inthlak laiin Rosangpuia'n a lo call a, "Aw.. Engkim i tichhe vek" ka ti nghal thâwr a. 

"Engtin? " a rawn ti dam thlup a. A aw zaidamte chuan ka thin a tirim vek tawh. 

"U Pari i ban kher kher a, ka u in a huat phah che. Nang nen kan inhmu leh tih a hriat chuan, engmah pawisak a neih loh tur thu a sawi" ka ti ta a. 

A rum nghut a. 

"Vawiin chanchin min zawt dawn lo em ni! " a rawn ti a. Ka lo theihnghilh daih. 

"Eng nge? " ka ti nghat a. 

"DNA test tir mualpho ai chuan tiin Mapuii a inpuang ta anih kha" a rawn ti ta a. Mahse, ka thinur a kal tluang laklawh tawh a, "Chuan" ka ti ro hak. 

"Dubai-a a bialpa fa a nih thu leh Mizorama a rawn hawn chhan pawh a pa remruat vek a nih thu a sawi" a ti a. Thil hi a sawi thui duh ngai reuh si lo va a.. He pa hi. 

"A pa a rawn kal ve lo em ni! " ka ti a. 

"Kal e. DNA test-a an dik lohna puanzara a awm ai chuan, keimah min be ta mai a nih kha. A awmzia chu, ka fihlim a, nang leh kei kan innei thei" a ti a. Ka thaw káwk. 

"Engkim a khirh leh vek tawh hi" ka ti vin thak a. 

A nui huk. 

"I thinchhe lutuk khan i thluak a tifim thei rih lo a nih kha. Naktukah i ngaihtuahna a danglam tawh mai ang. Zanin chu i mood a chhe em mai. Mu hahdam rawh. Kei pawh ka'n inbual ang e" tiin a dah daih. Ka bulah awm se ka chhuih tawk chak. U Pari chungchang a sawi thak lo lehnghal. He Pari lah hi a.. Engkimah a inrawlh a, thil a tikhaw lo vek. Ka hne. Indang daih se ka duh a ni. 

A tuk zinga Bawihtea nen kan walk laiin, Ani, ih maw.. Nizanah khan anu khan zu rim a nam" a ti ta mai a. 

"Engtin nge i hriat? " ka ti vat a. 

"Min pawm a. Min fawp vak vak a. A rim ka hria" a ti ta a. 

"Api te hrilh suh aw.. Bawihte" ka ti a. A hrilh chuan ka nu mi fekfawn ve tak chuan a ngaihthiam ka ring lo a ni. Bakah U Pari'n Bawihtea a hauh leh hrep phah ka hlau. Tukthuan ei dawn thleng pawn U pari chu a rawn chhuk lo. Ka u erawh a rawn tho a. 

"A kawng na a chhuak leh a, eisan mai ang u" a ti a. Kan ei nghal. Class kal loin kan picnic dawn a. Ka hmanhmawh over lo. Ka phur lo takzet a ni. Nizan kan boruak nen. Mahse, ka lo tiam ve laklawh tawh si. Rami'n, "Nu, Mama a lo chhuak dawn a, Nu Sangi'n min lo kalpui ve la a tia.. Ka kalpui ve dawn mawni le" a ti a. A inthlahrung hle tih a lang. 

"Aw han kal rawh. Engmah tihtur a awm chuan loh hi" ka nu chuan a ti a. 

Ka u chuan, "I U Dingi i chhun a, mipa i ngaihven riau mai. Mama saw mi tha a ni vak lo a nia. Fimkhur ang che" a lo ti leh hmuk a. Ka thinin a tuar ta bik lo va. "Nge maw kei pawh chu min hmer tel teivet le.. Innu hna atanga an ban avang a. Atea kha ka bialpa a ni lo, ka thawhpui a nia, a pi vangin a bialnu lema chang tura min sawm nasat em vangin ka va kalsak a nih kha. Mai mai a na.. Innu kha ban tlak a nih kha, a dik hlawl lo, kan hmu ve reng alawm. Aia upa zahna a neih loh bakah hnathawk a ni tih a inhre lo a nih kha. An ban kha a chawh khawp mai" ka ti hlawih hlawih a, ka duh dan a pelh hi chuan ka tawngkam pawh hi a hlawk ve viau zel. Ka pain, "Dingi" a lo ti that a. 

"Mipa hi maw ka hre viau lo. Ngaihzawngte chu ka nei ve bawk ang ch, nula ka la nih hi.. Mipa hre viau ila innu ang khan tleirawlte ka nih laiin min ru daih tawh ang chu mawle.. Ve khanglang che u hian.. Vawiin thleng hian mipa vawikhatpawh la mutpui lo, nula virgin ka nih hi.. " ka ti ta hrep a. Ka thawl huaiin ka hria. Ka nuin, "I vahpa a awm hi mawle aw" a rawn tih takah chuan ka insum ta a. Naupang awm laia inhauh hi ka duh bik lo. Ka insum thei tawh ngang lo a ni. 

Ka u chuan, "Rosangpuia chu i hnaih ka phal tawh dawn chuang lo. Ngaihzawng chu i duh duh nei rawh. Mahse, ka nupui tizaka timualphoa tinatu hi ka makpa a ni ngai lo vang" a ti ram ve hmak hmak a. Chaw ka ei lui thei tawh lo. Ka tho hmak a. Men par chungin roomah ka lut. Ka thin a tawt ut ut mai. Ka pain, "I farnu neihchhun a ni tawh a, khatia mei neia tawngkhum fek fek kha sim hmak ang che. Innu pawh ban ngaiin a awm a ni mai. Chutia Rosangpuia thleng thlenga va hmer tel a ngai lo" a tih chuan ka ipik zual chu a tithawl deuh e. Mahse, ka u zia ka hria, ka hlau ve tho si a. Rosangpuia chu awlsam taka a pawm leh theih ka ring lo. A pawi tak tak a ni. Lo ban loh ve mai tur a nia. Ngaihtuah loh hram hram tumin picnic tur chuan ka insiam a. 

Kan thawhpuiteah Sir Vala leh Miss Bti te an tel ve dawn a. Miss Bti nen hian kan la innel lutuk lo, mahse, a fel ang tih chu ka ring. Sir Vala'n min lo lam a, ngawi rengin ka chhuak. 

"I tho fuh vak na nge? " Sir Vala chuan a ti a. 

"Fuh e.. Ka tha reng" tiin ka nui lui hram hram a. Rosangpuia'n a lo call. 

"Aw" ka ti satliah a. 

"Engkim a tha vek em? " a rawn ti a. 

"Aih, a tha lo telh telh. Picnic turin ka chhuak a. Hei" ka ti a. 

"Eng a?! Min hrilh lohin maw? " a rawn ti rum ul a. 

"Hrilhna hman che a awm hleinem. Hei kan kal mek a, nakinah kan thlen hunah ka lo bia ang che" tiin ka dah a. Sir Vala a awm ve sia, inhauh ka duh lo. 

"Bialpa thikthu chhe deuh i nei chiang" a ti nghal chiah mai. 

Ka nui hawk a. "Ani hi zawng a dan a dang ve a" ka ti ve ringawt. A thinrim leh ngawt ang, Rosangpuia chu. Mahse, kei pawh ka ziaawm bik lo chu a nih hi. 

Picnic spot kan thleng a, tlem chuan ka insangmar a, kan chhuah lai ai kha chuan ka zia ta deuh e. 

Naupangho an felin an ri chel chul bawk a. Kan indah fel a, hunserh te kan hman hnuah tui cheng turin an kal sap sap a. Eirawngbawltu tur pawh spot ami te kan ruai nghal a. Miss Bti pawh tui a cheng ve daih a, Sir Vala lah camera nen a vei thauh thauh si. Kawm tur pawh ka nei lo. Spot chhim lama an sak thar thlamah chuan ka va phei a, rawng rim a la nam vat vat mai. A lo nuam phian a. Thlanglam bathlarah chuan chair hnuk pheiin ka thu a. Rosangpuia ka call ta a. 

"Min palzam miah suh.. Dingi" a rawn ti nghal tâwng. Kei pawh mood chhiat ve nak alai chuan a. 

"Naupangho nen alawm le kan kal le aw. Kan department bik.. I thikthu chhe bawrlawk zet kha ka ning" ka ti hlak hlak a. 

"Inboruak chu han sawi teh le" a ti daih. 

Engkim chu ka sawi ta vek a, ngawi rengin a lo ngaithla. Ka sawi zawh chuan, "Pari kha ban loh theih lohin a khawsa alawm" a ti hmuk a. 

"A ni khatna ania, hrethiam ve ta che. Ka u nupui a nih avang pawn" ka ti a. 

"I u nupui a nih vang alawm ka ban.. Engmah i hre lo" a ti nghut a. 

"Chu! Min lo va hmusit awm ve " ka ti daih pek a. 

"Khatiang tawngkam chhak chhuak tawh suh. Nakinah i hre mai ang.. I pa ten sawi an nei em? " a ti leh ta zawk a. Ka pa tawngkam chu ka hrilh a. 

"Chhungkaw pa berin min la haw chuang lo. Chance kan la nei tihna. Nei lo pawh ni ila ka kaltir dawn chuang lo che" a ti nghet charh a. 

"Ka u hi ka pallui ngam lo vang" ka ti a. 

"Keiman ka pallui ngam alawm" a ti hriam hraih. Ka lungphu a rang ve sawt. 

"Mapuii te chuan engmah an rawn sawi tawh lo mi! " ka tih chuan, "Sawi ngam tur an ni em ni? " a ti nghut a. 

"Miss, ti nge tuiah i chen ve loh? Ee.. Mi i bia law.. Sorry" ka hnunglam atanga rawn titu chu ka va melh a, An class-a ka hriat tlem zing ami Sama a lo ni a. A thianpa a rawn lut ve chiah bawk. Rosangpuia aw hriam zet chuan, "Rodingpui" a rawn ti hráwk a. 

"Aw.. Eih.. " ka ti bah nak a. 

"Min ngaihsak rawh" a ti sup a. 

"Hei naupang an lo kal a, ka dah rih ang aw.. I hna thawk rawh" ka ti a. 

"Khawi picnic spot nge inkalna kha" a rawn ti hram. Ka hrilh ve mai a. 

"Aw le.. dah rawh" a ti a. Ka dah ve mai. 

"Nangni pawh incheng peih tawh na nge? " Sama te melh chung chuan ka ti a. 

"Ni a rawn sa tan a, kan ut vek dawn" nui chungin a ti a. Sama hi an class mipaah chuan a lian pawl a ni ang, hetia en mai chuan naupang thuawih lo leh street boy ve tak a ni a. Mahse, Lecture ka pek laia ngaihsak tha ber pawl a ni ve tlat. Tin, thil min zawh peih em vang hian ka hre langsar lo thei lo va, a nel pawh kan innel tawh phian. 

Anni hi zu te an in duh aniang tiin, tiang huna lo strict uchuak kha ka duh bik lo va. Ka hnawk ang tih hlauin, "Eirawng ka han bawlpui ve ang e" tih leh thawh ka rual a. Sama chuan, "A ngai lo, Miss, awm ve rawh. Engmah kan ti dawn lo. Zu kan in dawn lo" a ti ta a. Kan inhrethiam lutuk chu kan nui tawp. A thianpa Hriata pawh chu a khi vur vur mai. 

Ka thu ve leh ta mai a. Ka bulah an rawn thu ve a. 

"Miss, kum engzat nge i nih? " a ti ta mai a. Ka nui. 

Ka sawi a. 

. "ka Rin aiin i la naupang.. Age is just a number tih hi i pawm ve em? " a ti ta khauh a. Hriata erawh chuan a phone a khawih daih a. 

"A ni mahna.. Ka hre bik lo. Awmzia chu a nei viau tho ang ka ring" ka ti ta ringawt. 

"Nghal min ti em? " a ti zawi sup a. 

"Engah maw? " ka ti hu a. 

"Khatiang zawhna te kha ka zawt che sia" a ti a. 

"A ho ee.. " ka ti ringawt. 

Carrom pool kan khel dun ta a. Ka hneh thei si lo, ka tang nasa mai si. A nuih a za khawp mai a. Kei lah ka serious nasa si. Vawi 5 kan khelhnaah min hlahthlem ta a, "I phakar, min hlahthlem bik suh" ka ti leh lawi si. 

"A va buaithlak" tih pahin a lut leh nghal a. 

"Tang ve ve ang aw" ka ti a. 

Tawng miah lo chuan kan khel dun ta a, ka ţang lutuk chu ka khur velin ka hria. Hei lo games ka khel ve ngai bawk si lo va.. 

Ka chak ta hlauh mai. Ka lawm lutuk chu ka kut ka beng a, ka au pah bawk. Sama pawh chuan kut min lo benpui a.. Ka mal chunga ka phone chu a pial palh a, a tla ta a. Chhar tura ka zuk kun chu kawngkapui bula mihring ding run chu ka va melh pah zauh a. Ka thu tha nghal awt. Rosangpuia chuan a kekawr ipte zen chungin min lo melh ngat ngat mai.. Ka hamhaih vek mai.. 

(Chaw ei tui u 😋