Rosangpuia 10

ROSANGPUIA.. (10)

Ziaktu: Toni Râlte

Rosangpuia call ka dawng zui zat a. 

"Dingi, i lo hmu em? An che rang hle mai" a rawn ti nghal a. 

"Nakinah kan inbe dawn nia.. Ka dah rih aw" ka ti a. Ka dah. Ka pain min melh run tawh si a, chutihlaia Rosangpuia lo biak chiam kha ka thisenin a ngam meuh lo a ni e. 

"Pa, ka nu nen roomah ka be lawk thei che u ang em? " ka ti a. Inkhawm tura an insiam a hun tawh si. Mahse, ka pa chuan, "Nangni pitu chu va inkhawm u la, kei erawh a thusawi ka lo ngaithla ang e" tiin ka nu a bia a. Ka nu pawn a zawm leh thliam tawh. Mi dang zawng inkhawm tura an chhuah vek hnuah Sitting roomah ka pa nen kan inhmachhawn ta ran a, ka zám em em. Ka zah ngawih ngawih bawk. 

"Le.. Han sawi teh le" a ti nghut a. A thinrim tawh lo chuan ka hria. 

Ka aw ka thian te te a, Rosangpuia'n ka bula a sawi zawng zawng, hmaih nei miah loin ka hrilh fai ta leng a. A dinhmun khirhzia leh a pa thurochhiah vanga an buaina te a hriat chuan a rilru a nem mai ka beisei deuh a ni. 

"Buaina neih fo hi i duh dan em ni? Tun hnai lawka buaina i tawh tam tawhzia i hria em? " ka pa aw chu a chang mah mah a ni. Ka bu nghat a. 

"I u khan a sawi dik a ni. Mipa i ngaihven hma lua deuh a ni. Rosangpuia, buaina nei lai kher a lo ni bawk a. Mate, amah saw ka iaiin ka duh lo a ni lo. Mahse, buaina nei leh i mualpho theihna tur kawng chu zawh lo la ka duh a ni. Pathian ruat in ni ta a nih leh hun tha zawk a rawn inher chhuak ve mai ang. Tunah rih chuan bansan la ka duh" a ti ta fak fak a. Ka beiseina chu a chuai rawih rawih mai. Ni e, mipa ka lo ngaihven hma lu deuh a ni mahna le.. Ka lo fimkhur seng lo a, ka inpal hnawk leh dawn ta chu a nih hi. A chhan puh tur ber hre si loin ka thinrim ţûn a, ka chau hlauh hluah bawk. 

Ka ngawih reng vang chu ni maw.. Ka pa bawk chuan, "Rosangpuia hi hmu tawh lo la ka duh a, i zawm thei ngei ang tih ka ring. Ka fanu i ni a, ka hmangaih chein a chhuan pawh ka chhuang ve che. Mipa tha tak, i phutawk chu pekin i la awm em em ang. Buaina nena inhnimhnaih hi ka duh tawh lo a ni.. " a ti leh dap dap a. Ka pa hian Rosangpuia a huat vang ni loin ka hma hun min thlirsak bakah ka hmakhua a ngaih vang a ni tih ka hria. Mahhse, Rosangpuia chu ka bansan hlen thei ang em.. Ka hre lo. Amah hian luhlul taka min rawn chelh zui phei chuan, a lakah hian ka beisei phak aia nasain ka lo lut thuk tawh bawk si. Mahse, tun dinhmunah chuan ka pa thupek zawm chu ka tihmakmawh niin ka hria. 

"Aw le.. Pa, zawm ka lo tum ang. Mahse, amah Rosangpuia hi rawn kalin min hmuh rawn tum pawh nise, tawngkam tha taka i lo hrilhfiah ve erawh ka phut ang" ka ti ta a. A bu nghut. 

"Mipa puitling leh tum tlang tak a ni a. A hrethiamin ka ring. Ka haw lo tih pawh a hria ang" a ti a. Ka awm a nuam ta deuh. Rosangpuia'n finfiahna a neih theih hunah kawng chu a la kuak ka la beisei fan a, chu hun chu nghak turin ka dawhtheih deuh a ngai ang tih ka ring bawk. 

Ka pa nen kan inbiak zawhah Sangpuia chu ka call ta a. A lo chang reng emaw tihturin a lo la vat. 

"Ka pa nen kan inbe zo chiah a" ka ti a, sawi zawm ka hreh deuh. 

"Eng nge a sawi? " a ti dam thlup a. Ka chhing sawk. 

"Ih.. Bansan tur chein min ti a, chuan ka lo pawm ta mai" ka ti tlang ta hrâwk a. 

"Mahse, i thinlung chuan a pawm lo tiraw? A ni em? " a rawn tih nghut danah ani pawn beiseina a la nei tih ka hrethiam. 

" A dik alawm.. Mahse, tun dinhmunah chuan kan inhmuh tawh loh a tha rih. Engkim tawp vek anga kan lantir a ngai a ni" ka ti a. 

"Umm.. Ka hrethiam e. Hun tlem bak ka mamawhin ka ring lo. Media kal tlangin min bei a, media hmang bawkin ka bei ve dawn a ni. DNA test turin" a ti nghet charh a. Ka lo thaw deuh huai. 

"Ni e, i tithei ngei ang. Ka beisei tlat a ni" ka ti a. Inbiak rei pawh a buaithlak. Rilru a thlamuang lo si. 

"Nizan lawkah kan inhmu a, tukinah tikhan a rawn che nghal a, a rang ka ti lutuk. Eng emaw hriat a nei a ni lo maw! " ka ti ta nge nge a. Han ngaihbel tur erawh engmah ka hre lo. 

"Kei pawn mak ka ti! Ka haw hnu khan min rawn bia a, 'Bialnu nghet i nei a, in va inhmu dun a.. Ka ngenna che engahmah i ngai lo bawk. Min lo en dawn nia' a rawn tia. Engah tehvak ka ngai lo va, mahse, tikhan a che ta mai si a. Mahse, Ding, a tha zawk. Engkim i bula ka sawi hman kha ka lawm a ni" a ti a. 

"Ni e, engmah la hre lo chu ni ila ka na ngawt ang" ka ti ve a. A dik reng bawk. Ka na ang. Bum ka lo tawk tawh si a. Mahse, kan inhmu tih kha engtin nge Mapuii chuan a lo hriat? Tu chuan nge va hrilh ang? U Pari ka mitthlaah a rawn lang nghal. Mahse, Mapuii nen an inhre awm si lo. An lo inhre ru reng pawh a ni thei. Engpawhnise, a thleng vek tawh a, tihtheih vak ka nei rih lo. Rosangpuia kutah kan hmalam hun chu a innghat ta e. 

Miin an sawi zui dan vel chu ka chhiar mai mai a. Rosangpuia chu ka rin aiin miin an lo hria! A lar vak pawha ka hriat loh nen. Hmeichhe comment a tam zual. Rosangpuia la tan ve hram hram pawh a tam zawk mah an la niawm e. 

"Mi te pawn sawn an thlak fo a, an nei vek kher lo. Ani a nih vanga hetia intihmualpho kher" ti ang zawngin a thlavang an hauh ve a. A dikna chen pawh a awm awm e. Mahse, Rosangpuia te ang chuan a fa a lo ni tak tak anih chuan, a thlahthlam hauh lo vang. 

Kan thianho groupah pawh ka sawi a. Han sawi vak tur an hre bik lo, lehlamah boruak ka lo siam zauh zauh tawh si a, ka mualpho leh min hlauhpui ve tho si. Ni e, tihian ka ngawi tlawk tlawk mai a niang chu. 

Valpuia msg chuan min tiner sawk mai, "Kha i hmu maw? Kei aiin a bum chiang zawk che a nih kha. Ani phei chuan a fa ngei pawh a pawm ngam lo a nia.. Mipa dawihzep lutuk" a rawn ti a. Chhan tlakah pawh ka ngai lo. 

Mami'n min lo call mial a. "Dingpui, ka u chungchangah khan a thlavang hauh ka tum hran lo, mahse, hei erawh min lo hriatsak hrim hrim la ka duh khawp mai. Ka u hian a hmangaih chen ka hria. Nupui atan pawh a duh che, chuvanga khatiang chhungkaw thuruk pawh hrilh vek che a nih kha.. Khawngaihin a finfiah hun nghak hram rawh" a rawn ti mawlh mawlh a. 

"Ni e, engkim ka hre sa tawh a, na pawh ka ti hran lo a nia. Mahse, ka chhungte mitmei ka veng lo thei bik lo a" ka ti ve mai a. Ani pawn a hrethiam khawpin ka hria. Kan boruak nawm loh em vang chuan ka hnaa kal tawh turin thutlukna ka siam ta a. Ka pa chuan a remti meuh lo naa, ina awm mahni rilru kawm reng hi ka atpui takngial dawn. Ka ning tawh. Ngaihtuahna dang ka neih ve a hun tawh. Car ka la khalh thiam ve bawk si lo, Scooty ka khalh ngam chiah bawk si lo va, mahse, vanneih asiamin Kimi thawhna leh kan college a inhlat lo hlauh a, min thlah thei dawn a ni. Ka tan hian a va hlu tak em aw. Ka insiam mawlh mawlh a, ka inchei khat tawh bawk a, ka khawr ţut mai. Zakdawh tiang chu eng emaw thutah tiin ka keng tel hram a, bai suih suih chung chuan ka tei thei tho a, mahse, eng emaw a thleng thut thei tih thuah ka keng ve mai mai. 

College ka thleng a, min lo lawm ve hle. Kei pawh ka inthlahrung rei lo. Min duat bawk a, class pawh ka nei tam lo. Geography la an tam lutuk lo a, a zia viau mai. Ka va lut chu an lo phâwk ngang mai. An nui sang hlawm a, an hmel hmuh a nuam tak tak a ni. Kei pawh chuan thu hma te neiin, ka ke tliah dante chu ka han sawi a. Tlar laihawla thu mipa sang, cher lam, ngo ving veng chuan, "Miss, kan lo ngai tawh tawp che a. Lo kal ziah tawh rawh aw" a ti var a. Kei pawh ka bu nghat. Zirlai kan han zir a, lecturer ber kan tui viau hi chuan, naupangte pawn phurna an nei ve nghal mai zel a. Period khat chu ninawm lo takin kan hmang zo ve der mai. A tu amah an hminga koh theih ka la nei lo va, ka la hre chhawm ve zel mai ang chu maw. Banah kimi ka lo nghak leh mai a, kan inphur haw leh ta a. Ni 3 lai ka kal ta a, nuam pawh ka ti chho leh viau tawh. Hetiang a nih reng lai hian Sangpuia nen pawh a ruk titihin kan la inbe reng a, ruahmanna tha tak siam a ngaih vangin a buai em zawk a. A vanduai a siamin Lungleia a dawr tura a biak fel tawh lah kha mi dang an lo pe daih mai a, a laili kha a duh chhan ve ber a ni si. A thinrim viau nghe nghe. Tin, chanchin lawmawm nge lawmawm loh ka hrethiam chiah lo. Cindy pawn nau a nei a niawm e. Ka rin aiin a nei hma a, an lo chhut sual deuh emaw ni zawk ni. Fapa a nei a, fuke kima an nei ringawt pawh chu ka lawmpui mai e. Valpuia nen pawh an inhnaih deuh thei mahna le.. 

"U, Lalmama'n lenpuiah min sawm a, ih, anu ka dil hreh sia.. Min dilsak la" Rami'n a tih chuan ka khi sak. Ka nu leh pate hi a nu pa ve vek tawh a, kan chhungkaw mi leh sa ang chiah a ni tawh a ni. 

Ka nu bulah chuan ka sawisak a, "Aw.. Va leng khawthawng ve rawh se, inah a tawm reng a, a huih zo dawn" ka nu chuan a lo ti thën a. U Pari nail polish inhnawih lai chu rawn dak chhuakin, "Lalmama nuin Rami chu a lawm loh teh kha.. 'Mi awmpui mai mai' te a lo ti niawm tak a ni" a ti a. A chewing gum chu a thial ţáwlh ţâwlh a. 

Ka nu chuan, "A ve khanglang a, an fapa sual lai an theihnghilh ta mai em ni? " a ti hliai a. Rami thlavang hauh chu a tina ve khawp mai. 

"Dik tak chuan Rami hi a innocent si a, Mama hian a chhaih kual vel mai mai niin ka hria.. Fimkhur se a tha ngawt ang" a ti leh a. Kan chhang tawh lo. A bialnu anga Rami a lo hauh vak avang khan endan chin ka nei tawh a, a thusawi hi rin bur chiah ka ngai tawh meuh lo. Rami chu thawmhnaw ka thlansak a, a zám riauin ka hria. A dik ang, "Mama hi ka bialpa hmasa ve ber a nia. Ka duh ve lutuk.. Mahse, ka zak, ka zei lo si" a ti mial mial a. Ka nui hawk hawk. 

Awmdan tur te ka hrilh pah a, "Chuan, Ram, engtin emaw khawih che a tum chuan hnar fithla thak rawh aw. In chhuah dun vawikhatna a ni lehnghal a" ka ti a. A bu nghat. 

"Pathian hnenah ka intiam tawh alawm. Virgin ngeiin pasal ka nei ang tiin.. Ka hlen ngei ang" a ti sap a. Ka ring tawk khawp mai. Lalmama'n a rawn lam a, an tlan liam chu ka thlir vung vung. 

U Remi a rawn leng phei a, Holiday a ni bawk a, ka nu pawh vawiin chu a feh lo. Ka pa erawh zan hnih a riak leh tawh. Ka nu sawi ang khan incheckup turin ka han nawr ngial a, "Ka tha leh vek tawh" a ti tlat. Amah a chhel bawk si a, sawi that leh a ngai a ni. 

U Remi fate leh Bawihtea te chu toys roomah an infiam leh a. U Remi chuan zo chhang kan tur a rawn keng phei bawk. U Pari nen hian an la inkawm tam em em lo va, U Remi te rawn len ve chang hian roomah a tawm daih zel bawk nen. Amah tak phei hi chu U Remi te inah a la leng lo hrim hrim a ni. 

Ka nu chuan, "Ka sam tuak hi han pawt leh lawk teh. A thak reuh lutuk" tiin U Remi chu a tir a. 

"Ninawm, lo kal ve lah hian min tir reng mai" ti chung rengin ka nu sam chu a keu nghal puat a. Kei erawh chuan chhuat ka nawt mek a. 

"Remi, i eisiam hi a hlawk ve em? I hlep tha ve em? " U Pari chuan a ti a. Duhdah deuh takin a thu bawk. 

"A pangngai ani mai. Thawh loh ai chuan a tha tih mai a nia" U Remi'n a ti a. 

"Tih ve ka duh a ni. Class deuh hlekin siam i la, a to ve deuh bawk ang a. Hetia ina awm reng ringawt pawh a ninawm" U Pari chuan a ti a. Ka ner ru deuh, a thatchhiatzia ka ngaihtuahin a peih rei ka ring lem lo. 

"Ti ve rawh. I peih phawt chuan.. A tha ve lutuk.. Naupangho mamawh zualpui a lo tum ve thei a" U Remi chuan a ti siam siam a. 

"Mahse, Sangpuia hnenah khan hna kha ka lo dil tawh a, min pe ve hram se ka ti khawp mai. Dingpui, min lo zawhsak la" a ti a. 

"Aw le.. " ka tih rual rualin, "E.. Ni dawn tak, in inthen tawh tak e.. Aa.. A number min pe la, ka lo be mai ang i tan biak a nawm loh takin" a ti zung zung a. 

"Nakinah ka lo thawn ang che" ka ti ve mai a. Sawt deuh auh auh chungin chhuat chu ka nawt zel a. Lalmama nu Nu Sangi a rawn lut hlawl. Kan inlenpawh ve reng a, a mak em em hran lo. Bai deuh suih suih chunga ka chhuat nawt chu min thlir dauh dauh a, "Ke na chung chung te chuan i nawt peih e a.. Pari a awm hi, nawhtir ta che" a ti ta mai a. Nu Sangi hi nu hruanghrau ve tak, thil sawi bawrh mi, ngaihtuah zui lem lo ang chi kha a ni ve a. 

"Aa.. Hei ka nawt zo tep alawm " ka ti ve mai a. U Pari mitmei ka veng mah zawk. 

"An ni chuan in hnuai lam an chang a, keini nupain in chung lam.. Kan inkhawihpui vak lo va" U Pari chuan a lo ti fak a. 

"Nia, chutiang chu" tiin Nu Sangi chu ka va nuih a. Nimin piaha Rami'n in chung a tihfaisak te kha ka hrechhuak. Ka phut hran lo naa, Rami ruai tel kher lo va amaha in chung a tihfai ve hun hi engtikah tak ni ang maw? 

Ka nu chuan, "Parte, thingpui hang va lum la, hei i nu Sangi pawn a duh ang" a ti a. U Pari pawh a kal ve mai. 

Nu Sangi chuan, "Kha.. Kan Lalmama leh Rampuii te kha an inphur chhuak a, anni pahnih hi an lo inngaizawng ve reng a ni maw? " a ti leh phawng a. 

Zep reng a tulna awm hek lo. "Aw ni ve e" ka lo ti vat. A mitmei ka en vat bawk. Mahse, chutin a duh lohna leh han tui lohna hmuh tur reng a awm lo. 

"A that hlauh chu, Rami hi a fel bawk a, kan Lalmama hi a hruai tha thei ngei ang. Innei daih rawh se, mo hruaina a hnai ting a ni mai lawm" a ti ta mai a. Ka thaw buai mai. U Pari pawh chuan thingpui chu a rawn chawi phei a. 

Kei pawh ka nawt zo a, ka va thu ve a. 

"Remi hi chu aw.. Kan pa sawn a'n fak mai mai khawp che maw.. Sum thawh chhuah dan a hre si, a fate a ngaihtuah si, an pa lah a duat thiam si.. A ti deuh reng mai a. Vawiin chu i va siam lo ve.. " a ti leh bawrh bawrh a. U Pari tum bâr chu ka hmu ru reng. A nuam vak a niang. 

"Nia, chhiat an tawk a, ka pekna thinte khan.. Ka chawl ve a nih hi.. Leng rih rawh. Zochhang kan kang dawn nia" U Remi pawh chuan a ti ve vat a. 

U Pari chuan, "Zo chhang te lo la ei, thing em mai a. Momo siam zawk ang u" a lo ti a. 

Ka ngei ve deuh nen, "Zo chhang aia chhang tui ka hre lo, ka sawi zawng pawn ka chil a put " a ti a. Nghal min ti ve maithei a ni. 

Ka phone a rik takah chuan thlanglam tukverh bula ding chungin ka chhang a. 

"Mapuii te ina phei turin ka insiam mek a. Tihtheih eng emaw tal ka nei turah ngai ang" Rosangpuia chuan a ti a. 

"Umm ka ring che lawm. Hmanhmawh lo la, fimkhur takin " ka ti a. Tihian chanchin hi chu kan la inhrilh tawn reng a ni. Nia, kan inhmu rih lo a ni mai. Chutia inbansan hmak theih pawh a nih loh chu.. 

Bawihtea te chu an rawn inkai chhuak a, "Pawnah kan infiam duh" an ti a. Phalsak an ni. Kan in piaha inrel lam an pan dial dial a, an inngeih sia, hmuh hi an nuam thin a nia. 

Nu Sangi chuan, Pari melhin, "I ruak lo der tawh a ni maw? I hnute kawh dan atang khan ka hre mai" a ti leh pek a. Keinin engmah kan la hre lo. 

U Pari chuan, "Awihawm loh ee.. Ka la rai reng reng lo" a ti ta daih a. Nia, rai se chuan keini ho pawn kan hre tawh ang. 

U Remi chuan, " Inneih tawh hi chuan fa neih hi kan beisei hmasa ber zel tawh a. Nangni pawh inla pai ve thuai ang" a lo ti a. 

"Kei chu neih rih ka la duh lo,indanna ka la ei, kum khat vel tal hetia fa neih rih loh hi ka duh. Chhangchhiat ka peih lo" U Pari chuan a ti a. Ka nu mitmenga tawrhna lo lang zawk chu ka hmu reng. Chutiang taka zahpah lova fa neih a la duh loh thu a sawi chu, ngai kawi duh ila ngaihkawih theih mai te pawh niin a lang. Mahse, an pa nen an sawi dun tawhte pawh a ni thei a, keinin lo tih ve chiam kha a fuh lo thei. Chhun a ni hnai tawh a, U remi nen chhang kan kang a. U Pari erawh an roomah a chho leh tawh. Nu Sangi pawh a tunuin a rawn ko sek a, a va haw a. 

"U Pari hi chu aw.. Mil hi a har ve lek lek zel" ka ti a. U Remi pawh a nui ringawt, "Enliam theih a tha. U Lawma'n a duh ve bawk si a" a ti a. 

"Anni hi indang se, nangmahni lo lut daih ula" ka ti a. 

"Ka hre lo le, tiang hunte pawh chu a la awm mahna. Chuan Rosangpuia vel chu min hrilh ve tawh teh" a ti sar sar a. A hmain ka lo sawi thawi tawh a, min zawt nawn leh a ni. Kei pawh chuan ka hrilh ta vek a. 

"Mate, a chingfel vat mai ang. Lungngai suh. " a ti a. Tlemin ka awm pawh a nuam deuh e. 

Dar 4 a ri hnai tawh, Rami te an lo la haw si lo. Ka nu phei chuan a ngaihtuah tawh viau a, kan call tlang thei bawk si lo. Ka pa pawh a rawn theng tawh, ani pawh chuan a ngaihtuah ve khawp mai. U Pari lah chuan, "Bialpa nei ngai lo, nei ve thut a ni sia, an lo inru daih mawni le" a ti sek lehnghal a. Ka ning ta deuh a, "Inru lo tawp ang. Chutin Rami hi a easy hran lo vang" ka ti hmak a. Rami'n min lo call ve chiah bawk. 

"Aw.. Rami" ka tih rualin, a rawn ţap titih ta mai a. 

"U, buaina kan tawk a, ih, Mama an sawisa a. An intibuai a. Hei hetah Sateek kawngah kan awm.. " a rawn ti ta mai. Ka phawk viau. 

. "Khai aw! Aw.. Lo lungngai suh aw. Kan rawn hruai ang che u. Mama chhungte pawh ka'n hrilh ang e" ka ti sawk sawk a. A dah nghal. 

 

Ka nute chu thil awmzia ka hrilh a, an chek tlak tlak mai. Ka pain, "Mam, hmanhmawh takin va hruai r'u.. Mama chhungte pawh hrilh ula" tiin U Lawma a be nghal a. U Lawma pawn rang takin chabi a la a, ka zui ve nghal, U Pari pawh chuan, "Ka rawn kal ve ang" a ti a. Kan chhuak a, Mama chhungte chu ka va hrilh a, an phawk tlang hle. Mama te makpa leh a farnu ten min rawn zui ve nghal a. Kan tlan chak khawp mai. Rami nen kan inbe pah zeuh zeuh bawk. Kan va thlen chuan, Mama bike chu a lo let ngût a, Rami chuan Mama lu chu a mal chunga dahin thisen leh engilo te chu a lo hrufai vek tawh a, "Ti nge motor i phar mai loh? " ka tih chuan, "Rui chatthla emaw an ti zel a. Amah hian zu rim a lo nam ve bawk nen" a ti mai a. Mama chu chiang lo ruaiin a harh a, a chal dinglam a kak a, a kak nasa lem lo. Mahse, a nâk chu na a tiin a thaw a kalh tlat a niawm e. Rami sawi hmangin, "Bung hnuaia kan thu kha tlangval rual khat an rawn kal ve a. Kan piah lawkah zu an in a, kei chu min rawn fiam zauh zauh a. Engahmah ka ngai lo. A hnu deuhah an zinga palian ve deuh, hur hmel deuh kha a rawn kal a, 'Kan bulah lo kal ve daih la' tiin min kaih thawh a tum a. Mama thinrimin a lo pawt ve bawk a, an buai chho ta a ni. Tlangval panga lai chu ani tan hneh ngaihna a awm ngang si lo, teivak an awm mai bawk si lo… ka mangang lutuk a" a ti ţiau a. A thlaphan dan tur ka hrethiam mai. Mama chu kan bawihsawm nghal a, ka mit tikham thil ka hmu leh tawh. 

U pari chuan duat zetin a hmai leh a nak te chu a chul kual vel a, "Mam, i tha em? A zia lo hle mai. Chhuah loh hi a him ber asin mawle. Tlema tlemah i thi lo chauh a nih hi.. Rami, nang pawh eng nge tlangval zu rui ho chhaih mai mai theiha i awm.. Nangmah vangin Mama nunnain a tuar tep alawm" a ti kual a. Ka va ten tak. Rami lah rilru hrehawm sa tawh bawk si, mahse, Mama farnu khan, Mama chu rawn buaipui vatin, "U Lawm, U Zuia nen hian zawn lawk mai r'u, Rami, hrehawm ti reng reng suh aw.. I thiam loh engmah a awm lo a nia" a ti ta sawk sawk a. Ka thep suai suai mai. U Pari hrilhhai hmel chu nuam ti zeta ka thlir tak kha. Mama chu a u te chuan an phur hawng a, keinin Rami.. Damdawiinah kan tlang ve nghal a, Mama nu leh pate an lo awm sa bawk a, An han buaipui nghal sawk sawk a, Mama pawh admit niin, a tha leh vat turah kan ngai. Pa Sawma (Mama pa) chuan, "Ramte, chung tlangval ho motor no. Chu i nei mial em? " a tih chuan, "Aw.. Hei a thla ka la alawm.. " tiin a phone chu a hmet a. Hmm.. Misualho chu an man thei vat dawn e. Rami'n chhinchhiah nachang a lo hria chu ka lawm hle, fing ka ti bawk. Eng em em tihtheih ni hek lo, kan hawnsan a. Zanriah pawh kan ei tlai phah. 

Dar 8 a pel fel thuak tihin, ka nu chuan, "Aa.. Hei Rosangpuia chuan sawi a nei ve a nih hi" a rawn ti hluai a. Ka phone ka charge a, engmah ka la en ve hman lo. 

"Han chhiar teh" ka ti vat a. Ka pa mitmei chu ka veng ru tho. 

"Ama ziah chu a ni lo leh si a nih hi. A thian tu emaw ten an rawn post sak a ni maithei. Ka'n chhiar ang e.. 

"Rosangpuia, 'Zo choka' dawr neitu, tlangval hlawhtling tak chu dâwt hmanga puh niin tunah hian sawi a hlawh hle mai a. An sawi danin ani hian fa neiin a fa pawh a pawm duh lo anga sawi a ni. Mahse, Rosangpuia hrechiangtute hian he thu hi a dik tawk lo tih ka hriatpui thlap e. Mapuii nen hian an tleirawl chhuaha inngaizawng chu an ni ngei a, mahse, kum tam tak chhung Mapuii hi Dubai lamah khawsain, Rosangpuia pawh a sumdawnnna vangin phai lamah a awm kual nasa a. Mizorama a sumdawnnain hlawhtlinna a rawn chan tak hnu lawkah khan, Mapuii hi Mizoramah rawn hawin, Rosangpuia nen a dawrah zanriah an kil dun a, hei hi an inngaihzawn leh vang ni loin, Mapuii zawk hian a ngen vang a ni. He mi zan hian Sangpuia hi lu lam leh mawng lam pawh hre lo khawpin a rui a. Hei hi remchangah an hmang a ni maithei. He mi zana zanriah an ei dun hnu lawkah Mapuii hian a rai thu hrilhin a nau pai chu a fa niin a hrilh ta a. Rosangpuia tan chuan awih a harsa ve hle ang tih chu inhriatthiam ka ring. Tichuan, nau a lo pian khan DNA test a dil a, Mapuii te lam hian an phalsak lo a, tihian finfiahna awm miah loin an rawn timualpho leh ta si a ni. Tunah hian Rosangpuia hian report thehlutin, am buaina ber a fa nia Mapuiin a sawi, naute DNA test phalna a dil mek a. Thuneitu lam pawn an remtihsak ngei a rinawm a. Engkim a chiang tawh mai ang chu.. Sangpuia hian, a fa a lo nih ngei chuan thlahthlam a tum lohzia a sawi a, mahse, a fa a ni takzet em tih erawh hriat hmasak a duh a ni" tiin.. 

Ka ngawi vang vang ringawt. Media hmagin a bei let ve ta tih ka hrethiam mai. Ka nu chuan, "Test thei vat se a tha ngawt ang" a ti a. 

Ka pa chuan, "Kan fanu hminghliau theihna tur chi chu kei zawng ka hnawl fai vek tawh e" a lo ti hmuk. Ka thaw hawk ringawt. Ka pa hian inkawp tawh lo hmak se min duh niin ka hria. Thlentir a la har rih si a. 

College ka kal leh a. Mama kha a nak ruh tlem a lo khawlo deuh a, a zia lo tak tak a ni. Mahse, a pain FIR a thehlut a, khang misual ho kha an man tawh. An chawh ve khawp ang. Thuhretu Rami lahin a hmu chiang nasa mai si a. Insual rawn hi chu thil thing ve tak zawng a ni e. Class ka la leh mawlh mawlh a.. A nuam viau zel e. Lunch break-ah ka kawm ve ber Sir Atea nen kan college chhaka restaurant nuam ve deuhah kan han chawl a, an eisiam pawh a tui khawp mai. Sir Atea hi nupui a la nei bik lo va, a senior ve tawh lam chu a ni. Nui huah huah chi, titi tur hre tak a ni a. A bula awm a nuam hle. Ani hi chu a nghet tawh kha a nia, a hlawh pawh a tam tawh ngawt ang. Thil kan ei zo a, kan chhuak, Atea bike-a ka lawn tur chiah hi keimahni min tawk zawnga rawn tlan mek Rosangpuia ka va hmu thut! Min lo melh ve kar mai. Ka chuang ta tho a, Atea lahin engmah hre hek lo, a tlan zui nghal a. Rosangpuia mitmeng thipzia tak kha aw.. Ka awm a nuam lo ta vek mai. Min rawn be miah bawk si lo, keiin va biak lah kha insawi thiam tum angah min ngaih ka hlau si. Class lak pawh a nuam tehhrep lo ve. Kimi ka nghah laiin, Atea chuan, "In veng lamah ka kal dawn tho asin, ka rualin lo haw ve mai la"a ti a. Kimi'n min rawn call ve chiah bawk, "Awii, mate, taxi lak mai tur i hria ang em? Kan pu hian hna min pe leh a, zanah vel daih ka hawn hman ka ring" a rawn ti a. 

"Aw.. A pawi lo, hei hawna tur a awm e" ka ti ve ta mai. Atea sawmna chu hnar ta bik loin kan inphur leh ta a, Damdawiina Mama kana pen ka duh viau laiin Atea tihbuai tel kha ka hreh a, kan tlan tlang a. Mahse, kan veng kawn thlen hmain Rosangpuia nen bawk kan intawk leh. Ani phei chuan a motor a tiding a, min lo thlir tawp. A va nuam lo tak. A mitmenga tawrhna lo lang kha ka va hmu thiam reng mai si. Inla pa ve tak, induhtawk bawk si a ni a, chung a tawrhna leh a thikthute chu a sawi chhuah kher pawh ka ring lo. Mahse, ka sawifiah ngei a ngaiin ka hria. Atea chu a rawn peng kawi lo a, mahse, kan in a hre tawh a, "Ka lo la leng ang" a ti ta chiah. Min ngaizawng hran lo, mahse, mipa a ni miau a. Chutah kan thawhpui, nitina inhmu kan ni si. Rosangpuia tan chuan ngaihthat a har ve maithei a ni. 

Ka inbual sawk sawk a. Ka chau nghulh mai. Ka phone lain, Sangpuia chu ka call ta a. A ring ral thak. Vawi 3 a ring quit takah chuan ka tinawn duh ta lo va, chaw kan ei zui ve mai bawk nen. Chaw ei pawh a tui hrep lo ve. Zanah naupangho project siamsak tur ka en kual a, ka buai ve viau. 

Ka zawh meuh chuan dar 10 a ri dawn thuak. Ka inphihfai a, ka mu hmaih. Phone ka han en a, Sangpuia a la reh vung vung. Luhlul chhuahin ka call leh ta ngat a, Hmeichhiain a lo la..! 

"Khaw nge Sangpuia, ka lo be lawk teh ang a" ka ti a. 

"Hei a muhil a. A harh hunah lo be ta mai che"a ti a. A aw chu ka la hre ngai pawn ka hre lo. 

. "Khaw nge a awm reng reng a? " ka ti leh ngat. 

"Hei, Hotel Regency-ah.. Tu nge i nih? " lungawi vak lo awki hian a rawn ti a. 

"A nau" ka ti hmak. 

"Aw.. A ni maw.. A tirte khan sawi tur alawm.. I number hi a save si lo va. Aa. Hei a rui deuh a, a die a niang, a harh thei lo" a ti leh hliak hliak a. 

. "Tu nge i nih ve thung? A bialnu maw? " ka ti a. 

"Aw.. A bialnu ka nia.. Kan la inhmu vat dawn nia.. Ka inbual dawn a. Nih phawt aw" tiin a dah daih. Ka khur der der nia! Thuchiang pawh hriat a hmain tihian hmeichhia a lo kawp leh thei a maw? Chu pawh a thikthu vang ringawtin. Ka number a lo delete bawk. Engtin nge a theih? Thudik a hre phawt tur a ni dawn lawm ni? Thinrim zetin ka mu a, muthilh a har ngang ngang khawp mai. 

Dar 7 rik hma deuhin ka phone riin min tiharh a. Rosangpuia a lo ni! 

Ka off hmak. 

A rawn ti leh ngat. A ti leh reng dawn nia ka hriat vangin ka la ta nge nge a. 

"Nizan kha tihpalh. Ka lo rui deuh a" a ti a. A aw chu a zangkhai leh vah tawh. 

"Aw nia, i bialnu nen khan nuam chen leh ru. Ka bang aw" tiin ka dah hmak. A rawn call leh. Ka va ning tak. Zingkar atanga mood off ka duh lo asin le. 

"Eng nge? " ka ti vin hlar a. 

"Hriatsual hi nei fo thin suh. Tu hmeichhia mah ka riahpui lo" a ti nghut a. 

"Nizana ka biak aw sin mawi deuh kha tunah pawh i bulah saruakin a mu ngei ang" ka tih chuan, a nui hawk hawk. 

"Thinawrhnu, hmeichhia tumah ka riahpui lo, a chiang em? Chuan, vawiinah in class banah ka rawn lam dawn che. " a ti a. Amah zawk chuan a dah daih! Hriatsual a awm lo. Kha nu kha a riah loh reng ka ring lo. Hetia zingkara tha taka min rawn biak leh danah tihsual a nei a ni mai. Hmela hian.. 

(Vawiin chu mutchhuak in min zëm reng a. Ka ziak tam hman thlawt lo aw. Ka mu, ka tho, ka mu. Tiang reng chu 😌😢😒