Rinhlua Aurawl

RINHLUA UR WL..!

(Fiction)

Ziaktu: Toni Râlte

(PC Hrasa Piancham lawmpui nana ka ziahsak a ni e..Happy Birthday ,Apa Hras , dam reng ang che 😇

"Mapui, i pain a zawng che. Engtin nge ni dawn?" Ruati thlabar hmel chu kan lo en reng ringawt. Mapuii chuan mangang zetin min rawn melh a. A mitmeng thlaphanzia chu ka hmu chiang khawp mai. Ni e,a pain a rawn hruai chuan duk vek khawpin a sawisa leh dawn tih ka hming ka hriatchian tlukin ka chiang. A chhan chu Mapuii pa chu a pahrawn a ni miau a, chuta chhapah a nu lah nu azawnga derthawng leh a fanu thlavang hauh ngam miah lo khawpa dawihzep leh a pasal hlau a ni tlat. 

"Rem, engtin nge kan tih dawn?" A ti zawi sap a. Ruati chuan," A lo thleng tep ang. Inru mai r'u" a ti ta a. Sawi ka tum lai tak a ni. Mipa ka ni alawm le, ka bialnu hlauhlawpa siam reng hi ka phal tawh lo. Mapuii chu ka kai lawk a ,Ruati te tukverh thlang lam atang chuan kan chhuak ta a. Ruati chu va melhin," An inru i ti tawp mai dawn nia" ka ti nghut a. Mapuii chu nghet zeta kuahin kan in lam ka panpui ta a. Kan in chhung kan va luh chuan, ka nu leh paten Bible ralchhan an lo chhang dun mek a. Kan va lut thut chu mak tih hmel zetin min rawn melh rual thawih a. 

"Pa, kan rawn inru ve tawp" ka ti sup a. Ka zam ve takzet tho. Ka pa chuan a tarmit lakthlak pahin," Remlalmuan, nupui ka ru i ti elo?! Engtia chawm nge i tum a?!" A ti ta mai a.

"Aa, kan laklawh tawh em a ni. Mapuii hi a pain a zawng mek a" ka ti ta ringawt a. Mapuii erawh zum zetin a ding ngawi ran a.

Ka nu chuan, "Engah nge zan zanah te in inhmuh reng ni? Hmeichhia zana chhuah chhuahte chu tu pa nge lawm ang?" A lo ti bawrh bawrh a. Ka rin loh dan deuha min lo dawnsawn avang chuan ka hrilhhai takzet. Mahse, ka ti tawh ta sa sa, ka rooma luhpui ka tum lai chuan, ka pa bawk chuan.."Remlallian, va dah let leh vat rawh. Buaina neih ka duh lo a nia. Nanga rui phur hian mi pal mai mai suh. Mapui, nang pawh va haw rawh. Innei rual pawh inla ni lo" a ti chhum hmak hmak a. 

"Zu ka in lohna a rei tawh mai. Chuan,ka dah let lo bawk ang. " ka ti ve sak a.

"Min va zah lo bawk ve mawle..mapuii pa chu ka'n bia ang e" tih leh a phone ban a rual a. Ka che zawk mai. "Pa, ti suh. Mapuii hi a sawisa leh hrep dawn asin. Khatianga intih dawn ai chuan ka chhuahpui zawk mai ang e" ka ti a. 

Ka nu chuan," Thawhchhuah pawh la nei mang si lo hian nupui pasal te hi neih ngawt loh tur..mapuii phei chu i la naupang lutuk " a lo ti leh a. Ka thinrim takzet. Tha zaia min lo dawnsawna an duh vak lo a nih pawhin kan dinhmun laklawhzia hriaa min lo hum tura ka ngaih ber ten chutia min tawngkhum chu na ka ti,min vilh ngut ngut a ni ber mai. 

Ka pa chuan,"I dah let dawn loh chuan, Mapuii pa chu ka be dawn ania.." A ti leh a. Mapuii chuan tap tiau hian," Rem, ka haw mai ang. A pawi lo.." A ti a. A mitmeng pawisawi lo zeta min rawn melh kiau chuan ka kehchhia a ni ber mai. Ka lainat lutuk. Thinrim insehruh tunin,"Aw le, Pa, i biak dawn ai chuan kan chhuak mai ang. Ka va dah let ang e. Chuan, in piangthar emaw ka lo tia, inlo mak hle mai. Ka hrereng ang" ka ti nghat nghat a. Mapuii chu kai lehin ka chhuahpui a, ka nuin min rawn auzui naa, ka hawilet duh lo. Ka thin a so a ni e. A ngaihna hre lo zetin Mapuii pawh chuan min zui ve zel a, mi kawmkarah kan kal dun zel a, Ruati te in hnuaiah ka thutpui a. Ruati chu ka text a, Rei vak loah a rawn chhuk ta a. Hlauthawng zet hian,"Nichin lawk khan a chhuak a. An inru ka ti tawp a,a thinrim khawp mai. 'Ruathlui chu ka hmuhna hmun hmunah ka satsawm ang' a ti mawle" tiin a awm a dawm vawng vawng a. Ka nuten min lo dawnsawn dan chu ka hrilh thuak thuak a, "Ka rinsa reng a ni." A ti sap.

"Ruat, i puih kan ngai a ni. Buhfai leh pawnthuah pahnih khat min kentir theih chuan a lawmawm viau ang. E chuan, chempui pawh.Ramhnuaiah kan tlan bo dawn sia" ka tih chuan,makti fe hian "Awiii! Ramhnuai kher chu!a hlauhawm e" a ti a. Duhthlan tur dang kan nei miau si lo va.

"Hlauthawng suh. Ka ni te thlamah lawm kan kal dawn. Mahse, an puanthuah vel an hawn vek a, buhfai pawh a awm ka ring tawh lo va..chuvang a nia" ka ti a. 

"Lo nghak lawk ru aw" tiin inah a tlan chho a. A fel ngawt mai. Mapuii best friend a ni bawk a. Rei vak loah polythen-in buhfai chu a rawn pawm thla a, Bangla blanket uk hi a rawn kengtel bawk. Blanket chuan chemtum a rawn tuam bawk.

"Ka chhungten min hmuh ka hlau ve bawk sia,hei bak ka rawn keng thei lo" a ti sar sar a. 

"Kan lawm lutuk..hei bak bak..kan kal ang aw..ka chhungten an zawh che chuan," An kalna tur ka hre lo" i ti tlat dawn nia" ka ti a. Mapuii nen an inkuah zauh a. Hmanhmawh takin an kawmthlangah chhukthlain tuikhur kan zuk pawh a, Tuikhur mawng chu zawhthla lehin kawng peng a lo awm a. A hnim viau naa, kan kal ta tho a. Dar 10 a ri tep tawh. Ka la thinrim bawk a, Ka tawng thei lo. Mapuii pawh ngawi rengin a kal ve sauh sauh a. Thla a eng a, flashlight on pawh a ngai mang lo. Ka ni te thlam kha ka han ti ngawt a! Thlam an neihna pawh ka hre lo. A rem remna hmuna awm ve tawp mai chu a ni ka tum. Mapuii erawh a hlauh ka hlauh vangin ka hrilh duh lo.

Kum 25 ka ni ve tawh a. Mapuii erawh kum 19 a rawn tling ve awrh chauh. Kan khua hi in 270 bawr vel kan ni a. Khawpui kan hlat deuh vangin kan nunphung erawh a la changkang em em lo. Kei pawh pawl 10 ka fail a, ka bang zui ta daih a. Ka patea hi mistiri niin, a hnung ka zui chho ve a. Ka tihmi tak a lo ni ve a. Tunah chuan helper ni tawh loin mistiri pangngai ka ni tawh a ni. Ka pa te khan thawhchhuah nei lo min ti a, ni e, kum 2 liamta khan zu bawihah ka tang ve hlauh mai a. Chu chuan nasa takin ka hna a tithuanawp nasa a. Thawk chhuak ziah mah ila, ka zu manah ka hman nasat vangin thehluh tur ka nei mang thin lo. Unau panga kan ni a, kei hi a milai ka ni. Kan upa berin pasal a nei tawh a,ka u chiah pawh hian nupui nei tawhin in hrang an chang ve tawh a. Ka nau chiah hmeichhia hi mi ai Schoolah a thawk ve a. Kan te ber mipa erawh Aizawlah zirna chhunzawmin a awm ve a ni. Chhungkaw khawsak pangngai ve tak, a vantlang chin kan ni ve a. Kan huan hi kan chhawr ve tan tawh bawk nen. Ka pa hi pa taima tak a ni ve a, A thawhrah kan seng ve a ni mai e. Mapuii te erawh zu zuar an ni a! Tin, a nu fabik a ni bawk. A naute pathum chu a pahrawn fate an ni. A pa bulah kum 12 a nih thlengin a awm a. A pa nu , a pa a boral tak vangin a nu a bel lo thei ta lo va. A pahrawn chuan a hmumawh ta reng a. A rawn tleirawl chhuak a, a hmelthain kan khuaah chuan a tha ber pawl a rawn ni chho a, Inlengte a nei ve tan a. Mahse,a pahrawn vangin tumah an leng nawn tawh ngai lo. A pa berin a treat dan a dik loh miau avangin khawtlang mi te pawn an hmuhniam lo thei lo va. Hmuhsitna te pawh a dawng zeuh zeuh. Amah ertu lah an lo awm ve rawl nen. Chutiang karah chuan rawn thanglian ve zelin, an thenawmte in kan sak tum atanga innel ve tanin ka duhzawng tak a ni a. Kan inngaizawng chho ta kha a nia. Mahse,a pahrawnin ngaihzawng chu sawi loh mipa bulah takngial pawh awm a phal loh vangin kan inhmu zen zen thei lo. A chang chuan a pahrawn thikthu chhe lutuk hi ,"A nu nen sawn a phir a niang." An ti ru fo thin. Kei pawn ka ringhlel lek lek thin. Ka zawt ngam chiah si lo. Tichuan, kum khat dawn a ruk aral takmeuha kan inzui ruk hnuah khawtlangin an hre ve ta a. Ka chhungten then turin min ti nghal. A chhan pawh Mapuii te chu kohhran chhuahsana Israel hnam bo inti an nih vang a ni. Ka nu leh pa lah Kohhran rawngbawl chi, a kul ataia inhmang,ka pa pawh Upa, ka nu lah Hmeichhe pawla hruaitu kumhlun ni bawk si a ni. Chu chu an duh loh chhan awmchhun a ni lo, Zu zuar an ni tlat! Zu ka in ve vanga zu haw ngawih ngawih ka pa chuan zu zuar fanu chu a hmusit zet mai! Ka chhungten Mapuii an duh loh tluk zetin a pahrawnin min duh lo ve bawk nen. Hnawk leh buai tam tak karah pawh a rukin kan la inthlunzawm ve zel a. Ruati hmangin kan la inhmu zeuh zeuh. MApuii chu a phone pawh a pain a paih chhiatsak hmak a. A harsa zual khawp mai. Zaninah khan Ruati'n khawhar kalpuiah va sawmin, keiin ka lo char ta kha a nia. Chubak chance kan nei ve thei ngang lo a ni. Tikhan kan buai ta chu a nia..a nih nih ni turin kan tlan bo dawn ta. Tin,Mapuii vang liau liau hian zu hi tha thum zet ka nghei ve tawh a ni. ANi hi ka hmangaih a, nupui atan pawh ka duh.

"Rem, ka hah tawh e..a la hla em?" A ti a. Ka ngaihtuahna atangin ka harh hlawl.

Kan kal thui tawh viau. Lui kawr lian vak lo kan zawh mek a ni.

"Kan thleng tep" ka ti ringawt a. Dar 12 a ri thuak tawh. Hetiang thim tham hnuaia ramhnuaiah lehnghal min zui duhtu hian min hmangaih ve viauah ka ngai.

Kan kal leh hlek a. Vanneih asiamin riahbuk hlui kan pawh ta hlawl a. A lo chhe ve deuh tawh naa, kan chau dun ve tawh bawk nen.."tah hian zanin chu riak phawt ang aw" ka ti a. A hawi hrek hrek a,a hlau deuh niin ka hria. Mahse, "Nia pawi lo" a ti ve mai a. Bukah chuan lutin changel hnah inphah chungah chuan kan inruk zan chu kan hmang dun ta a. Khua a la vawt vak lo va, a zia angreng. Mahse, rannung seh thei apui a tam a, a ninawm angreng. Mi ramvachal tak ka ni hran lo va. Mahse, lui han kala len han den te hi chu nuam ka ti ve viau. Tin, Intipa ve tak, huai leh hrang intihlau lo ve tak ka ni bawk. Mapuii chu a chau bawk aniang, ka awma bei chungin a muhil sák sák a, ka bula thlamuang taka a muhil thei chuan min tilawm khawp mai. Ka nu leh pate min tawngkhum dan kha ka la lawm thei lo. Mahse,ngaihtuah vak ka duh lo. Hmuh tur kan awm dawn si lo va, an buai ve maithei a ni. Zing lamah ka lo chhing ve sek a, ka mumangah kan riahna atanga mel hnih bawr velah hian lui kawr khawkrawk tak atanga tlema va penhlehah hian puk angreng deuh hi a lo awm a. A chhung chu a lo thim deuh muk mai. Puk pawnah chuan ka lo ding reng a, chutia ka din reng lai chuan puk atang chuan, Mapuii aw hian," Rem..hei Rem" tiin min rawn ko lauh lauh a. Ka harh zawk. A lo eng uar tawh a. Mapuii chuan min lo kaitho a lo nia. Ka thu chhuak vat. Mei ka chhem a, Kan piah lawka mau chu va satin mautheiah chaw chu ka chhum a. Mapuii erawh tih ber tur hre lem loin min lo thlir reng ringawt. Chawhmeh a vang angreng si a, Tumbu khaileng pathum lek ka rawh a, chu chu tukthuan atan kan hmang! Chi tel lo va eitur lo tui loh dan ka hrechiang hle. Chi kha Ruati kha lo dil tur a nia. Ka mangnghilh chiang em a ni. Tukthuan kan ei khamah lui dung chu kan zawh chho leh ta ngat ngat a. Mel hnih dawn kan kal hnuah lengkir sang vak lo hi a lo awm a. Thil ka hrechhuak nghal. Nizana ka mumang kha. Ka mumanga ka kalna chiah chiah kha niin ka hre ta tlat a. Ka hawi vak vak mai. Ka dinglam ka va en chu ka meng phawk ngang mai. Ni e, Ka mumangah khan lengkir thlang dinglamah khan Lawng thing lianpui a ding luah a, a sir veilamah saisu a awm bawk anih kha. Tunah chu chu ka hmachhawn mek. Ka lungphu a rang kher mai le. Mapuii chuan hrethiam lo zetin,"Nge awmzia?" A ti hâ a. Ngawi rengin Lawng thing lam chu ka pan sawk sawk,min zui ve mai a. Lawng thing piah lawkah Luite penhleh lui kawr tui awm lohna a lo awm thla zui a. Chumi chu kan lehin a letliamah chuan Puk a lo awm reng mai le! 

" A va mak ve!" Ka ti nghek a. Mapuii erawh a hrilhhai hmel khawp mai. Puk lam chu ka pan vat a. Mak tak maiin chu puk chu a hnúm viau tlat! Chen tawhna ni awm takin a bel riau., lung lian tak pathum inchher chhuanin a siam ni maiin ka hria. Mahse, ruah lakah erawh a tawmhul theih viau ang. A chhung ka va lut a, a chung chu a hniam angreng viau naa, a len zawng chu 12ft bial vel a ni maithei. Tin, mak deuhin bel te ung zet hi a khaikhup zawngin a lo awm a. A bul mai chu mei chhemna niawm takin tap ang deuhin lung pathum a lo inkual raih bawk. 

"Hetah hian kan him ang" ka ti sup a. 

"Mahse, i ni te thlamah kan kal dawn ni lawm ni?" A ti a.

"Dawt ka sawi anih kha. Ka ni ten thlam an neih pawh ka hre lo. Tah hian khawsa rih mai ang. Ni 3 hnu velah khaw lam kan pan ang a, min lo pawm thei tawh em em ang" ka ti ta ringawt a. Awmze nei lo va vah vak vak kha tul ka ti lo ber a ni mai. Chem ka nei a, engtin tin emaw kan khawsak theih ka ring tlat. A muang zan lo tih chu ka hria. Mahse, "Duat, tihtheih kan nei rih lo a ni. Hlauthawng suh. Ka awm alawm" tiin ka hnem ve ngawt a. A la naupang a, ka hrethiam ve tho mai. Tu te emaw lui kal te pawh kan tawng mial maithei a. Chi mawlh kha ka rilruah a awm a, Dil tur te pawh an awm maithei asin. Mahse, Kan awmna an hriat chuan a pawi thei bawk si. Ka phone chu ka han en a. Signal chhetemah a awm lo. Battery pawh 32 chiah a awm tawh. A tangkai chuang lo. Bet vak lo chuan Mapuii pawh a awm ve ta a. Changel hnah ka va sat nual a, puk chhhuatah chuan ka phah a. Han phah mai tur dang awm hek lo le. Thuk tur ka siam leh a, mei ka chhem zui nghal. Chawhmeh hi engtin nge ka ngaihtuah ang aw..

"chakai zu man ila" Mapuii chuan ka ngaihtuahna hria niawm takin a ti a. 

" Pawi hleinem" tiin lui kawr lamah kan inzui phei leh ta a. Chakai tak chu a vang angreng. Mahse, kaikuang a awm nual. Mauthel te chu kan hup a. Zanriah hmeh tur khawp chu kan man ve mai. Inthlakna engmah kan keng si lo va, "Ruakin inbual mai ang" ka ti a. A zak ngang mai. Tuiah a thu tlat ,Sahbawn pawh kan nei chuang lo va,mahse, kan han intihhuh takah chuan kan harh ve sawt chuan ka hria. Puk lamah chuan kan phei leh ta a. A la hma deuh naa rawng kan bawl zui nghal. Kan awmdan chu film te pawh a ang lek lek. Chhungte inhal tak kara hmangaihna a pian ve miau chuan, kawng dang zawh tur a awm bik tlat lo a tin ni. Ramhnuaia vahvaih hi ka duhdan a ni bik lo. Ka thinrim em a, kan awmna chin hre lo se buaiin mangang ve se ka duh vang a ni mah zawk awm e. Zanriah chu khaw thim hmain kan ei a. Chi a awm lo naa, kaikuang a lo ni bawk a. Kan ei ve nual tho mai. Sava chiar nak nak thawm kan hre tan a. Khua pawh a thim chho tan. Puk chu rin ai takin a uap reuh a. Mei pawh ka chhem tho, vanneihthlak takin puk piah lawkah thing tlu ro a awm hlauh a,a tang ka fawm nual. Rannung pawh an rawn tam tawh lo deuh ang chu maw..

"Khaw nge ka inthiar dawn." mapuii chuan a ti sap a. 

Meichher ka siam a, Puk dinglam kawr tui awm tawh lohna lam chu ka panpui a. Kawr laiah meichher dahin a kam lehlam ve veah chuan kan inthiar ta a. Inauh phak lek chu ni mah se; Meichher a eng zau lo va,kan inhmu thei lo thung. 

"Ka lo han chho ang" Mapuii awin a ti a. Ka rilruin,"I ngam mawni le?" Ka ti rilru a. 

"Aw meichher bulah khan lo awm mai rawh" ka ti a. Lehlam atang chuan,"Eng nge i sawi?" A rawn ti a. A la zo lo tih a hriat mai. Ka inthiar zo a,meichher bulah ka lo nghak a. 

Reivak loah ani pawh chu a rawn phei ve a. " I chho maw ka tia" a ti a.

"Nang pawh ka chho dawn kha i ti sia" ka tia. Maktih hmel deuh hian,"Nangman anih kha ti" a ti ve daih. Mahse, thu dang ka sawipui ta daih a. 

Kan mu hma viau. Kan chhungte buai dan tur te kan sawi a. Kan muhil zui ve mai. Ka nak rawn kheuh zeuhtu an awm vangin ka harh ta hlawl a. A rawn sik leh váwt. Mapuii a lo ni. A lo meng kiau a. Mitmei hian pawn lam chu min kawhhmuh a. Ka hawi vat. Puk pawn lung phek lian vak lo chungah chuan a thu thim hmuk a, tu tak ni ang maw? A che bawk si lo. Inbengkang titihin ka va melh leh a, mihring ni ngeiin ka hria. Thla eng chuan a rawn chhun fuh lutuk bawk si lo. Hlauhna erawh ka nei hran lo . Mihring a nih rinna ka neih vangin. Ka aw ka thian kharh a. A chechang chuang lo. Ka phone ka ban a, flashlight ka on ta a, ka va chhun ta a. Ka phone ka thlauh thelh a ni. Mapuii pawh a rak nghal tuarh mai. Mihring nia ka ngaih min hnungchhawn zawnga thu kha a lu chiah a rawn inher kual ta mai a. A hmai chanve a dinglam zawng chu hmuh tlak a awm lo,a mit mu a chhuak pur a,a hek bui mai. Rapthlak tak a ni. Kei lah ka hamhaih nen ka la en reng lehnghal. Mapuii'n min rawn bawh uaih takah chuan ka harh chiah. MApui chu a thidang zui ta a. Ka chiái vek. Ka nunah tun ang reng renga hmel rapthlak kha ka la hmu ngai lo. Mapuii ka zuk khawih chhung chuan a lo bo daih! Mihring a ni lo tih ka chiang khawp mai. Mapuii chu ka ko mawlh mawlh a, ka aw a lawi vek mai. Ka khur nasa bawk. Beltea tui kan dah chuan ka theh that that a. A rawn harh ve mial mai. Mahse,a mitmeng chu a dava vek. A hlauin a thlabar ngawih ngawih tih a lang reng mai. Ka tawngtai ru mawlh mawlh . Sual hle mah ila, Pathianin min puih a duh ve em em ang chu..darkar chanve pawh a la liam lo vang tihin, Thla ai thawm kan hre leh ta a. Mapuii hnem ngai bawk, kei atak pawh ka kha a chih a, ka tukhum a hit mam mam mai. A râwl lah chu a'n ring tha khawp a! "Min pui r'u , thih ka la duh lo. " a ti tuar tuar mai. Mipa aw lian pawl tak a ni ngei ang. Chutah le Lawng thing lian tak ding kha a'n insawi ta tak tak mai a! Kan puk kawtah chuan a tak hmuh tur awm si loin ke pen thawm a ri tlat tlat reng bawk. A chang leh thaw ri bawrh bawrh thawm te, nui uar uar thawm te a ri nuai nuai a. Mapuii a vawihnih nan a thidang leh ta. Khatah kha chuan ka mipa rilru a chhun ka ti mai . Chempui chu ka hum ran a.

"Tu nge i nih? Eng nge i duh?" Ka ti ve ta hráwk a. Thawm chu a reh nghal dúk a. A reh lutuk chu a rapawm lek lek zawk. Lung phek chungah bawk khan hlimthla fiah vak lo a rawn ding leh ta a. Mahse, min hmachhawn zawngin a niin ka hria. Ka hlauh em vangin ka en reng ringawt. Khaw dang ka hawisan chhungin a bo leh daih ang tih ka hlau a ni. Chu hlimthla chu a rawn hnai zel niin ka hria. Ka bula Mapuii tlu reng pawh chu ka ngaihsak hleithei lo. Puk luhna dal tak chuan a rawn ding ta a .ka mei chhem kha a rem lam tawh a ni si,A la vam naa va chhem tha leh turin ka thisen a ngam tlat lo. Chu hlimthla chu thla eng chuan fiah lo ruai hian a rawn en a. Lukhum hmathlawk a khum a, Kamiz tial lam niin ka hria a ha a. A hnuaia a kawr hak rawng erawh a dum lam a ni. A kekawr erawh a var lam rawng deuh a ni. A lukhum chuan a hmel tak a hliah thim si,. Ka huaisenna zawng zawng sawm khawmin ,"Tu nge i nih?" Ka ti tuar a. Ka chempui pawh ka hum nghet kher mai.

"Min hlau suh" a rawn ti ta a. Mihring aw pangngai a nih vangin ka hlauhna chu a reh duak ni maiin ka hria. Mahse,a hmaa kan lo tawn tawh thil rapthlak tak avang khan ka tiril khur erawh chuan min kiansan chuang lo. 

"Eng nge i duh?" Ka ti leh a.

"Chhanna pakhat chiah ka duh" a ti zawi sup a. Amah chu a chechang eih si lo. Ka phone chu ngam leh ngam loin ka dap a, A hmel ka hmu tur a ni ka ti ve tlat. Ka dap fuh a, ka la kang vat a, Flashlight chu a ka on nghal. Nichin khan ka off lai ka hre miah lo. Insehruh chungin chu pa hmaiah tak chuan ka va ēn ta a. Ka phone ka thlauh bawl..

Chu pa, ka hmaa ding chu kum 2 liam taa a sa chang,a tlukna lama ama silaia inkap palh , U Rinhlua a ni tlat! A hmai ka va ēn khan, a hmaa kan lo hmuh tawha hmai chanve hek huam kha ka hmu chiang lehzual em a ni. Ka khur ta hleuh hleuh a. A ding reng bawk si.

"Ka thih chhan ka hre duh a ni" a aw chu a fiahin zanreiah phei chuan a ring kher mai.

"Min kalsan rawh..khawngahin" tih pahin puk kilah chuan ka hnungtawlh a . Mipa hi a lo pa vak theih miah lo. Ka bulah ka bialnu lah thidangin a let reng mai si.

"Thianpa Khuma bulah khan ka thihchhan,min thah chhan dik tak kha min zawhsak rawh. Chu chu ka hriat hunah thlamuang takin ka chawl thei tawh ang" a ti leh a. Chu a thusawi chuan ka hlauhna nasa lutuk chu ngaihtuahna dang hmangin a rawn thlak tan ta a. La khur ru der der chungin, "A that che a maw?!" Ka ti a.

"Aw..ka sa chang lai kha ka hmaiah min kap a ni. A chhan ka hre duh. Engvangin ka thiantha ber khan ka chungah khatiang thil kha a tih?" A aw-ah chuan natna thuk tak a inphum tel tlat! 

"I tlukna lama in kap palh ang che angin an sawi asin" ka ti a.

"Min kah khan chiang takin keimah ka ni tih a hria a ni. Min kahna silai pawh a paih nghal a, Kha pukah khan a phum bo a ni" a ti ta mai a. Mak ka ti ta hle. A hmel rapthlak tak ka hmu thei chuang lo va, he thlarau vakvai hian thudik a zawng tak tak niin ka hria. 

"Chuan, U Khuma chu ka zawt ang maw?" Ka ti a.

"Aw min zawhsak la ka duh a ni. Chuan, mi dang hrilha puanzar erawh tul ka ti lo. Ani kha ka thianthaber, engkima ka engkim a ni a. Hremna hmachhawn leh turin ka phal lo. Mahse, ka nunna a lak chhan kha ka hre duh a ni" a ti sak sak a. 

Ralkhatah ramar a rawn khuang al al a. A che hrut a.

"Naktukah..naktukah ngei ngeiin" hmanhmawh zeta tiin a bo nghal. Ka lo thaw mang lo a ni chëk ang chu! A bo takah chuan thawk ka la ham ham mai. Mapuii chu ka buaipui zui nghal a. A rum tiah tiah mai. A hnuah a rawn harh ve tan a. Min kuahbet tlat mai. A la khur der der bawk. A awm bawk e, Hmeichhiaah pawh kum 19 lek kha a ni miau a. Ka khawngaih khawp mai. Kei chu ka tlaivar ta thak a. Kawl a rawn en chuan ka zuk inphih harh a. Thim leh eng lo danglamzia hi chu aw. Hlauhna chambang pawh a awm tawh lo. Puka ka han chhoh chuan Mapuii pawh a lo tho tawh a.

"Haw ang" a lo ti nghal vat.

"Aw kan haw dawn" ka lo ti ve chat a.

Tukthuan erawh kaikuang la bang kha hmehin kan ei ve leh hram. Ei khamah Puk chhuat chu chem chuan ka hai tan ta a. MApuii chuan mak a tiin a hrethiam lo kher mai. Ka hai chiar dup a, chem nen ringawt chuan a sâwt mawh hle. "Mapui,i theih ang angin lo hai ve ta che" ka ti a. Engmah min zawt bik lo chuan a hai ve ta mial mial a. Rei fe kan hai hnuah eng emaw chu ka zuk khawih fuh ta a. Thahnemngai zeta hai lehin silai ka hai chhuak ta hlawl mai. UT silai kan tih ang kha a ni a. A hluiin a tawng tawh viau mai. A mu pawh a awm chuang lo. 

"Eng nge a awmzia?" mapuii chuan a ti a.

Ka thiam ang tawkin a thihdan hlana U RInhlua nen kan inbiak dan chu ka hrilh ta vek a . Rinhlua'n amah thattu nia a sawi, U Khuma chu Mapuii te thenawm lawk a ni nghe nghe. Mapuii pawh chuan mak a tih ve hmel hle..

"Mahse, mi khan a tlukna lamah a silai load sa kha a tipuak palh aniang an ti sia" a ti ve ta chiah a. Ni e, chu chu RInhlua thih dana thuthang chu a ni. A thih lai khan khaw thenawmah ka pate puzawnte in kan sa daih a, ka awm ve lo a. Mahse, thuthang erawh ka hrria. Ka thianpa Tluanga pawh RInhlua ruang zuk hlawm zingah a awm ve a,Khatia Sa chang tura a kal, ni hnih hnuah pawh a rawn haw tak loah chuan a nu chuan a ngaihtuah ta a, thenawm khawveng inpunin an zuk zawng ta kha a nia. Lui kawr tui ti chep chep awmnaah a bawkkhuk zawngin a lo tlu a. A silai chu a bawh tel bawk. A ruang rapthlakzia chu sawifak a tling hial a ni. Chuvang chuan a chhungte hmuh pawh an phal lo va, a lo nam tan tawh vangin an hmuh tlaiah an phum ta chuk chuk a ni. U Rinhlua hi a nu leh a farnu te nen an khawsa a, tlangval senior ve tawh lam niin a farnu chu pasal neiin a let leh a, fa pakhat neiin a fa chu a awmpui bawk. Hmeithai mah nise, Amah U RInhlua a taimak em vang hian rualawt em emin an awm bik lo. Mi ramvachal tak a ni ve bawk . A nun pawh a thain pawisawilo tak, tawngtam lo tak a ni. Keini rual ho leh rawltharho pawn kan zah ve pawl tak a ni. U Khuma hi a thianthaber niin, U Khuma pawn an inneihin thianah a hmang nghe nghe. U khuma chu annu nen in hrang chang ve tawhin, fa pahnih an nei a, kum zawna piang an ni bawk a,an chhangchhe ve hle. U RInhlua hian a kep nasa a, Sa a kah pawn U Khuma'n zui lo mah se; sa bawp a mantir a, buh nise phur li nga vel chu a pe ve ziah bawk. U khuma hi pa taima tak a ni bik lo naa, amah U RInhlua hian a hruai hrat chho a, an inzui nasa thin khawp mai. A thih pawh khan U Khuma kha a tuar ber pawl niin an sawi si a! Engtin nge a thianpa nunna chu a lak theih?engvang nge ni ta ang? U khuma hi a vanduai hle, kumin kumtir khan a nupui chu an kawmthlang huana maian a sih laiin rulngánin a chu hlauh mai a! Damdawiin thlenpui hmain a boral ta a ni. A fate pahnih an la upa vak bawk si lo va, Tunah hi chuan an pafaa awm theih ni hek lo,a nute an fin leh tawh a ni. Zu a in nasa a, a nupui kha a duhin a duat ve hliau hliau em a, a lungleng khawhar chu mi pawn an lainatin zu lama a tlan ta vak pawh chu an hrethiam ve tho niin ka hria.

Silai chu ka ak a, Blanket chu Mapuii'n a bat thung a. Khaw lam panin kan haw chho ta hnak hnak a. Kan lo kal thui hle niawm tak a ni. Khua kan thlen meuh chuan khua a thim chhulh tawh a, unau hmelhai bawr vel niin a lang. Kan in lama phei chu a hreh ngang mai si. Mahse, an inah haw ringawt se a pahrawn kut a tawrh dan tur ka hre si, "Ka chhungte rilru pawh a nem tawh ang. Ka awm alawm" tia hnemin kan in lam ka panpui ta a. Zanriah an lo ei mek a, kan va lut chu chu an phawk kher mai. Ka nu chuan,"Awii Mama, khawiah nge inkal daih a?" A ti chul a. 

"Kan tlanbo a. Tihtur pawimawh tak kan neih vangin kan lo kir leh a ni" ka ti a. Ka pa chuan ngun zeta min enin,"Kha! Tu silai nge ni a?" A ti a.

"A tam mai..nakinah" ka ti ringawt. Ka nu chuan,"Chhungkhat te sawmkhawmin kan zawng nasa che u asin. Khatiang kha chuan awm tawh suh u. Kan lo tisual a ni e. Chaw hi va ei r'u, Mami, thenawmte chaw thing va puk lawk mai rawh" a ti zung zung a. Ril a tam tawh bawk a. Mapuii chu sawmin dawhkan chu ka kilpui nghal a. A zakin a inthlahrung ngawih ngawih tih a hriat. Chaw ei pah chuan, U Rinhlua chungchang chu ka sawi ta a. Ka pa chuan a ngaithla uluk kher mai.

" A va mak dawn ve aw" a ti chuar chuar a.

Ka nu chuan,"Awii a rapthlak em mai. Chutiangte chu inzuk tawng a niang. A pawi em mai" a lo ti ve chul a. AN rilru a nem tan tawh tih ka hria. Ka lawm viau bawk. Chaw eikhamah kan inbual leh a, Mami chuan Mapuii chu a thawmhnaw a haktir ve a. Anni hi chu hnatlan nikhua velah pawh inzui ve thin tho an nia. Chutin an inenhrang hran lo. 

"Zaninah em ni ?khuma chu i va hmuh dawn?" Ka pa chuan a ti a.

"Ni mai. A hmahmawh em mai. U rinhlua kha" ka ti a.

"An ina va kal chilh ai chuan hetah ko mai ila..mi pawn an hre vak lo ang a,a zia zawk lawng maw?" A ti a. A tha viau ang. Ka pa chuan, U Khuma te upa ber Rotluanga a be nghal a. "Ee..Roa, Khuma kha biak duhna pawimawh deuh ka nei a, kan in lamah a rawn kal lawk thei ang em le?a pawimawh viau mai a" a ti charh charh a. Rotluanga chuan ka lo hrilh dawn nia a rawn ti a.

Dar 8 leh a chanve a ri tep tihin U Khuma chu harhfim vak lo tih hriat zet hian a rawn lut ta a. Kan ko chu a ngaihna a hriat vak hmel loh. 

"Pa Ngur,min ko em ni?" A ti a.

"Aw..lo thu rawh..khuma, vawiin lam te eng nge i thawh a?" Tiin a lo be luam a.

"Kan monu pate lo-ah ka inhlawh a, Chuan, eng nge min biak duhna chu le?" A hmanhmawh hmel angreng. Kei chuan silai bang thlang lama ka tun chu ka va la a, "U Khum, he silai hi a i hre tawh em? Han enchiang teh" ka ti ta a. A tirah chuan a enliam mai a, mahse, hnai set sawta ka va dah chuan a meng phar nasa mai . Thlabar zetin min rawn melh a. Ka lo en ngun kher mai. Kawngka chu ka va kalh te te a.

"U khum,i thiltih rapthlak tak khan a rawn umzui ta che a nih hi..U RInhlua thlarau nen kan inbia asin. Engkim ka hre vek tawh. U Rinhlua chuan hriat duh pakhat chiah a nei a, ENgvangin nge i thiantha ber kha i thah tih hi" ka ti ta dap dap a. A rui zawng zawng chu a reh nghal ni maiin ka hria. A khur ta hlawk hlawk mai a.

"I..i hmu maw?Rina i hmu maw? Khawiah?" A ti nawk nawk a.

Kan inhmuh dan zawng zawng chu ka hrilh ta vek a. Chutah a hlauhna chu thinrimnaah a chang ta nge..a insehruh a, a chang leh a tap lek lek bawk. 

"Ani khan thih a phu alawm" a ti phawt a. Makti zetin kan lo thlir thap a.

" A chhan chu ka thiantha ber ni chung khan ka nupui chungah thil tenawm tak a ti thin a ni. Ni e, Zan khat ka leng haw kha kan nu hi phelh phang hian a lo awm a. A awmdan chu a dik loin hlauh nei niawm tak hian a awm a. A hnuah phei chuan a tap ta a. A chhan ka zawt a. A tap ta zawih zawih a.

"I thianpa RInhlua hian vawi khat tuikhura keimah chauha ka insuk laiin a thlang luiah min hruai thla a, min sual ta a. Ka ka a hup hneh si,tharumah ka hneh bawk si lo va, ka tang zo ta ngang lo va. 'I sawi chhuah rualin nang leh i pasal nunnain a tuar nghal ang' tiin min vau a. In inzui nasa si a,ka sawi chhuah chuan, i nunnain a tuar ka hlau si. Khami hnu khan vawi hnih lai min sual leh a, Zaninah pawh Khawhar ina i kal chiah kha a rawn lut a, naupang ho lah a pute inah an leng daih sia, min sual leh a ni" a ti ta mai a. Mak ka tiin ka thinlung a na vawng vawng mai a ni. Ka ngaihtuah letin , kan nu nen kan inngaihzawn laia 'Nei suh, nupui tur atan em chuan ka iai pui che' tia kan inneih loh dan ringawt a sawi thinte kha kan nu a lo ngaihzawn ruk ve vangah ka ngai ta hmak a. Ka thinrimin RIna chu ka haw hluah hluah a ni. Kan nu chu ka lainat bawk, hrehawm ti em ema nun a lo hmang thin chu..

Khami zan khan ramah a riak dawn nia ka hriat vangin khawhar ina kal turin ka kalsan kha a nia. Remchang a lo zawng reng a nih dawn chu..tichuan,remchang ka zawng ve ta ran a. Mahse, ka hmu thei mai lo. Ka hlat telh telh chu mak a ti a, a vuite pawh a vui thin. Kan ina a rawn teiluh changa kan nu hlauthawng hmel ka hmuhte chuan thawh lawka Rina chu vuakhlum tak ka nâp thin. Mahse, emah ka ti a. Tichuan, khamini khan sa chanpuiah min sawm a. Chhuanlam siamin ka hnar a. Mahse, a kal hnu lawkah khaw thenawma kan nu ni pasal silai ka kawlsak chu akin ka zui ru ta a. Sa changa a thut muan em em laiin a hmaah ka va ding a, eng sawi set set loin ka kap ta a ni. A thi nghal a. A ruang chu lui kawrah pawtthlain amaha inkap palh anga lantirin ka siamrem ta a ni. Ka silai ah chhuah erawh ka hawn lamah miin min hmu se min rinhlelh ka hlauh vangin puk pakhatah ka phum ta a ni. Tichuan,kan kal tawhna lam kawng lo zawkah ka haw ta a. Tikhan an zuk zawn khan an zuk hmu ta a nih kha. Kan nu bulah ," Tunah chuan engmah hlauh tur i nei tawh lo ve" ka ti nghe nghe. Tihsual neiin ka inhre lo. Thiantha hming chhala ka nupui laka tenawm taka a khawsak vang khan khatianga ka che kha inchhirna ka nei lo. " a ti ta a. Chil pawh lem tha ngam loin kan lo ngaithla thap. Mak kan tiin U Rinhlua kan lo ngaihdan nen a inpersan hlein ka hria. U khuma hawn hnu chuan," Kei eng emaw dik lo a awm ngeiin ka la ring fan mai. Rina kha chutiang ti duh tur chi niin ka hre lo" ka pa chuan a ti a. Kei chuan sawi tur engmah ka nei lo.

Ka mumangah Kan zuk tawmna puka U Rinhlua bawkkhupa tap hawm hawm ka hmu. Mak ka tiin a ngaihna ka hre lo kher mai. A tukah chuan kan hawn thu chu engtin nge an lo hriat ka hre lo, U khuma khan a sawi a niang. Mapuii pahrawn Pu Chunga leh Pu Sawma te an rawn kal a. Mapuii chu an rawn hruai a. Ka pain,"Palai kan rawn tir dawn e aw..inrem hi a tha e" a tih chuan, "Ni e, an mualpho tawh a, inhnar chi pawh a nih tawh loh hi" a ti ve mai a. Ngaihtha takin kan thlir liam a ni. Mahse, An thenawm ten Mapuii a sawisak nasatzia leh tawngkam bawlhhlawh zet zeta a ankhum nasatzia min rawn hrilh leh a. Ka patea leh ka pa te an va kal ta ngawt mai. Mapuii chu a hnar te thiin, a kamsir te pawh a pilh nasa a, a biang pawh a vung bar bawk. Ka patea thinrimin, "Police ka ko mai ang aw..hetiang hian fate an sawisa thei lo. I fa tak pawh ni lo lehnghal chunga i chetdan hi a rapthlak mah mah tawh e, Jail tan i duh loh chuan duhtawk rawh" tiin a vau ve ta a. Mapuii nu erawh chuan engmah a sawi lo! Eng ang nu nge maw a nih ngai le! Mapuii chu a thawmhnaw thenkhat nen a pa u , a papuia te inah a invawm lut ta tawp a. A papuia nupui hi a tha vak lo naa, ka pain," lo tuar hram hram rawh. A ranglamin inneih kan tintuah dawn nia" a ti a. Kei chuan lakluh nghal mai kha ka pawiti miah lo asin le..khuaah kan lar viau mai. Ka pa pawn ,"Heti taka Mapuii laka a thikthu chhia hi thil dangte hi a awm a ni lo maw?" A ti ve hial!

"Ka hre lo,engmah a sawi duh tlat lo a ni" ka ti mai a. Ka rinhlelh ruk ve tho a ni. Pu Chunga hi U Khuma te nena inrualkhat vel an ni a, mapuii nu hi amah aiin kum 6 vel dawnin a upa a ni. 

Chumi zan chuan thil mak tak a thleng ta a. Pu Chunga chu mangang taka a au ruai ruai vangin an nu chuan a kai tho a, hlauh nei tih hriat zet hian khum kilah a tawm a, a khur nasa hle niin an sawi. Eng nge a hmuh lah an hre ve der si lo. Chuta tang chuan a mumal lo chho ta a, a zu in vangah an han puhsak naa, zu hi zu zuar e ti loin a in thiam riau a, a bawraw khawpin a in ngai meuh lo. ani. Ni li hnuah phei chuan a mitmeng pawh a vai ruai a, an nu pawn a hlau hial a,riahpuite pawh a sawm ta hial mai. A chhan chu an mut lai reng ten thoin hnai zetah a nupuite chu a lo melh run zel a, a chang leh an ceilingah te lutin a kua atangte hian a rawn dak luau zel a, a muhil reng emaw tih lai ten a insiamchhe bawih bawih zel a, hmeichhe tan phei chuan hlauh loh chi pawh a ni lo vang. Thenawm khawvengte buaipui ngai hial khawpa a bawraw tak avang chuan damdawiin panpui an tum ta a. An kal dawnte chuan," Min kaltir rawh. Min rawn hnaih tawh suh..i thih daih tawh kha..ka duh lo..kal bo rawh " tiin a au ruai ruai aniawm e. Khawngaihna chhetemah kan neih loh chu a!

Damdawiinah chuan an indah kut a, Damdawiin hi kan khaw thenawm lawk a ni a, khaw inhnaih te kan ni. Drip te khaiin an han buaipui a. Eng a ang thei chuang lo. Damdawiina zan hnih hun an hman hnuin, Zing dar 2 bawr velah fim zetin a rawn meng ta a. A nupui bulah, "Thudik ka puan a ngai a ni" a ti a niawm e. An nu lah chuan engmah a hrethiam si lo. Tichuan,a duhthlannain an rawn hawnpui a. Keini chhungkua leh Mapuii bakah U Khuma te chhungkua a ko a. Phur vak loin kan va kal a. Chhuatah chuan a thu a. A cher kuam mai. Chaw mumal ei lo leh mu tha mang lo kha a ni bawk a. Pu Chunga, chapo leh intivei tak kha a ang ta lo kher mai.

"Vawiinah he thudik hi ka sawi chhuah loh chuan, RInhlua thlarau hian min kiansan dawn hauh lo mai. Hreh chung chunga ka sawi a ngai ta a ni." a ti phawt a. U RInhlua hming a sawi vang chuan kan lo phawk hle. A aw a thian kharh a.

"Ni e, Rema leh Mapuii te tlan khan Rinhlua thla an hmu tih thawm Khuma hnen atangin ka lo hre thawi ve a. A rui lungpuam sawi mai mai emaw ka tih laiin, Mapuii chhuah zan khan amah RInhlua ngei chuan min rawn tlawh ta tlat mai a. A hmel lah chu a rapawmin thinrim em emin min kawk a, thudik puang turin min vau chamchi a. Tikhan nitin zantin a thinrimin min rawn luhkhung ta thin a ni.

Aw le, thudik chu hei hi a ni. Khuma nupui Hmingi nen khan a nulat lai atangin a rukin kan inngaizawng tawh a. Kan tum ruk danin kan nu hi a boral veleh a in hi ka rochun nghal ang a, kan innei ang tiin. Mahse, Hmingi chu Khuma'n a rim ve ta tlat si a. A nute lahin an lo duhpui si. Rem kan ruat leh a,Khuma te nen inthenawm hnai kan ni bawk a, an indan pawn an in bula an ramah tho in hrang an chan kan rin vangin," Khawtlang miten min rinhlelha min hriat chhuah loh nan innei ula, kan la inhmu reng thei zawk dawn alawm. Tun ai hian kan zalen zawk ang. Kan nu awm loh veleh Khuma i then ang a, kan innei mai dawn ni" tiin. Tikhan an innei ta a. Inthenawm hnai ta na na na chu kan inhmu zing thei ta reng a. Mahse, Zan khat erawh kan lo fimkhur lo deuh nge ,kawngka kan kalh theihnghilh a. Kei lah ka lo rui deuh bawk nen. Khuma thianpa RInhlua khan Khuma rawn sawm a tum chuan min rawn phawk ta a ni. A tirah chuan a thinrimin ,"In inneih hma pawha ka rinhlelh ruk kha a nia. Thianpa bulah engkim ka sawi ang" a ti a.

Chutah chuan Hmingi nen ngaihdam kan dil ta chiam a. "Kan lo rui deuh a, khawngaihtakin Khuma bulah sawi lo hram rawh. Kan sim hmak ang. Rinhlelhawma kan awm vaih chuan i duh duh i ti dawn nia. Khuma rilru a na dawn em mai. I thianpa rilru nat chu i duh bik lo vang , chance min pe leh hram rawh" tiin ngen taktein kan ngen ta a. Ani mi rilru tluang tih takah kan inchhir tak tak emaw tiin "A nih leh ka hrilh lo vang. A rilru a nat dawn em vangi tun tum chu ka ngawi rih ang. A lehpek a awm anih chuan keimah ngei pawn hremna ka pe ang che u" a ti ta a. A chhuah hnuah rem kan ruat dun ta a. Khuma bula an nuin Rinhlua'n amah pawngsual anga a sawite kha kan ruahmanna a ni. A thianpa chu hmumawhin a thinrimin a thusawi a rin loh nan kan ti a ni. Mahse, kan rin aiin Khuma chu a lo na a, a thinrim bawk. Tichuan,thil rapthlak tak kha a lo thleng ta a nih kha. RInhlua a thih khan thah a nih rinna ka nei nghal a, mahse, ka sawi duh bik lo. Hmingi nena kan buaina ber chu Khuma'n a rawn tikiang ta a ni..hlauh tur kan nei ta lo. Mahse, Hmingi rulin a chuk hlum atang kha chuan kei pawh dam ka thlahlel lo va, Ka thinrim leh rilru tawt hi ka fahrawn chungah tuanin a hma pawn ka lo hmumawh fo tawh naa, khang ka huatna kha a hma aiin a rawn nasa a. Amah Mapuii lah a hmeltha in an duh si a, chungte chu ka thik a. Anu lah a upa ve tawhin itawmna a nei tawh si lo, Mapuii chu eng emaw ti taka thlemthluka a nu aiawhtir ka tum rilru a, mahse, Rema nen an inhmangaih hle tih ka hriat khan tihduhdah lamah ka ramtang ta a nih kha..khuma, ngaihdam tlak ka ni lo tih ka hria. Pawi ka ti em em a ni..tunah chuan Rinhlua chu a chawl hahdam thei tawh ngei ang" tiin.

Engtik laiin nge U khuma chu a rawn chet ka hre hman lo. Pu Chunga bawhthluk rawp pahin ," Zawng, ani kha ka thianthaber a nia sin. Kei hian pawisawilo ka that a sin..tenawmpa, thi ve rawh. Thi rawh" tiin a hrawkah a rek bet tlat mai .kan pawt laih laih a, mahse, U Khuma chakzia chu a mak zawk. Pu Chunga chu a meng pual awrh awrh a, a taksa chak lo sa nen ,U Khuma lah chuan a rek nget nget si. Ka pa nen intiam rualin theihtawpin a ban chu kan pwt ta vak a. A thlah ta hram . Pu Chunga chu a khuh bawrh bawrh mai..a rapthlak mang e aw..

Zanah U Khuma chu a chhungten an veng tawp a. Pu Chunga pawh an veng tho bawk. Mahse, zinga an thawh chuan U Khuma chu an hmu ta hauh lo mai..an buai ta naui nuai a. Pu Chunga erawh a tha. Khawtlang hriattir loh theih ni tawh hek lo le ,kan zawng ta mup mup a. A tira zawn nachang kan hriat loh thlanmualah tlai dar 4 bawr velah U Khuma chu a thianpa U Rinhlua thlan chungah thia chhar a ni ta a ni. A ban veilam vein a zai chat niin a lang. Thlan chungah a saisir zawngin a lo mu bal a ni. Thil nihna dik tak hriate chu mittui tla lo reng kan awm lo. U RInhlua leh U khuma thawnthu chu he thlan chungah hian a tawp ta a ni.

U khuma ruang kan lumennah ka lo muthlu zauh a niang. 

Kha lai puk bula Lawng thing bulah khan U RInhlua leh U khuma te chu inkai dun rialin an lo ding a. An hmel hmuh pawh a hahdam hle. Chutah ban rawn vai lap lapin puk lam chu an pan dun ta ral ral a. 

"Zung ang.." ka beng bula Mapuii rawn tih sep vangin ka harh ta hlawl a. Ka ipikna leh helhkam neia ka inhriatna zawng zawngte chu a bo ta duak a..Zung turin Mapuii nen kan inzui chhuak ta a..

A tawp ta.