BOSS AMANDA (S3)
Chapter - 1
Ziaktu: Toni Rálte
"Mama, inneih lam te hi inla tintuah lo deuh em ni le? Kei mo neih ka chak ve riau tawh a nia" ka nu chuan zanriah kan ei laiin a ti a. Ka chaw bar ka thulh daih.
"Ni ngawt mai. Amah hi a la inpeih lo deuh nge, in inzui nasa ve si a, mualpho mai te hi a hlauhawm riau a nia" ka pa pawh chuan a lo ti ve a.
"Aa.. Ka la zawt chiah lo a. Ka lo sawipui ang e" ka ti ve ta ringawt. Inneih chungchang han sawipui chu nuam ka ti chiah lo vang. A chhan chu pasal a mamawhin ka hre lo. Kan inngaizawng a ni mai a. Sex hial te chu lo hmang tawh mah ila; a aia thuk zawk thlenpui tur chuan ka tan a la zahawm deuh mah mah e. Mahse, sawipui ve tawp phawt ang. Zanriah ei khamah chuan tihtur em em a awm lo bawk a, Amanda va rim lah ka hreh deuh, a chhan pawh vawiinah Tlawng lamah an zuk che tla a, a chauhzia a sawi sia. Mut hahdamna hun ka pe a ni mai. Ka thianpa Chama'n, "I kawl em? Ka va mamawh ve" a rawn ti a. He pa lah hi..
"Lo kal la.. Tlem ka nei" ka ti ta nge nge a.
A rawn lawr rang kher mai. Ka roomah kan thli dun kerh kerh a. Ka nu te room leh ka room hi a inhlat hlauh a, a zia khawp mai.
"Tun lai chu case lian tham inkhawih vak lo ni maw? " a ti a.
"Umm, hei kan hahdam ve rih khawp mai" ka ti ve mai a.
"A lawmawm lamah ngai ang. Tualthahna hi a thleng reng a, a ninawm" a ti hluk hluk a. Ni e, tualthahna a thlen loh chuan kan hah a dam ve a, case naran te te bak kan khawih lo va, a zia viau zel.
Chama chu dar 10 rik hma deuhin a haw a. Kei pawh ka mu nghal daih. Ka lu a hai ve chhulh a, Chama lo thlen hma khan Amanda nen chuan kan inbe zuai a, "Ka mu hma mai teh ang. Muttui aw" tiin min rawn thlah kha a nia. Va biak leh kher ka tum lo. Tleirawl inngaizawng kan ni lo bawk a. Mahse, ka duhthusam hmeichhia ka ngaizawng a ni bawk a, rinawm ve ngat ngat tak chu ka ni. Lo pelhe ta pawh ni ila, ka bialnu hian min chhui chhuak rang dawn em a, ka tum buai peih lo. Amahah ka lawm a kim tho si a.
Ka va zung bu lûk lûk a. Dar 1 rik nan 3 mins chiah a awm tawh. Tui ka in leh khawlh khawlh a. Rizai sin thain ka inthawlh ta thán a. Mahse, ka phone a rawn nghawr dat dat. Pentawn nen ka ner sawk. Amanda a ni leh ta chiah! Ni e, tun ang hunah ani bakin min call ngai lo. Case thar kan nei tih ka hai lo.
"Aw.. " ka ti zawi nguai a.
"Pu Thawmliana, Kan Home minister a thi! " a rawn ti ta mai le! Ka thu chhuak chiang kher mai le.
"Eng a?! Engtin? " ka tih chuan, "Rawn phei rang la a ni mai" a rawn ti fiah kâk mai. Penţawn a sawi theih tawh loh. Ka inthlak sawk sawk a. Ka thawmah ka pa a lo harh nge, a rawn chhuak a. "Eng nge thleng a? " a ti chuar chuar a.
"Home minister a thi?! " ka ti hawk a. Mak a tiin a ţhawng ve hle niin ka hria.
"Engtia thi nge? " a ti a.
"Ka hre bik lo. Amandain min lo ko a, ka kal dawn" tih leh bike chabi lak ka rual a, ka chhuak nghal. Mizorama mi pawimawh ber tihtheih tur Pu Thawmliana thihna chuan boruak a siam nasa khawp ang le. Vawi tam case hrang hrang kan lo hmachhawn tawh a, tun ang renga min ţhawng leh ka lungphu tirang ka la hre ngai lo. Zarkawt ka tlan lai chuan mi vei vak leh motor vei nuk nuk ka tawk nasa. An phawklek hmel vek! An hre ve tawh a nih dawn hi. Pu Thawmliana te in chu ka thleng phei a, Khai! An lo tlim hmur tawh mai. Ţap thawm leh thinrim inhrosa thawm nen.. A rapthlak mang e. Ka ID vangin in chhung ka lut thei a, Police chauh luh theihna turah chuan ka va lut ve a. Amanda chuan ruang chu a lo bih vang vang mai. Pu Thawmliana chu a Private room-ah thah a ni! Dawhkan bawhin a mu a, a tarmit vuah pawh he buiin a la bun reng. Hmuh mai chuan muthlu te pawh a ang lek lek. Mahse, a thutna chair leh dawhkan hnuaia thisen far chu rapawm khawpa tam a ni. Ni e, a hrawk zai thler niin thisen far pawh a la tawp hleithei lo. Chhuata far erawh a khang ţan tawh a. Chu bak hliam engmah a nei niin a lang lo. Amanda chuan a duhtawk a ngah ta nge, "A lak theih tawh e" a ti sap a. Postmortem turin an zawn chhuak ta. Keini erawh kan la awm a, room chhung chu hmaih nei miah lo va endik a la ngai a ni. Lehkhabu a intiang erh urh a, a felfai viau bawk. Hnuhma leh sulhnu a váng ngang mai. Dawhkanah chuan file eng emaw zat a inthuah tup a, a then chu a inpharh bawk. Chungte chu Amanda chuan a mal malin a bih chhuak vek a. Hun pawh a hmang rei viau mai. Pu Thawma chair ke bulah chuan paper weight a lo let ngát a, pawimawhna a nei ang em le.. Amanda ka hrilh a, "Ka hmu tawh alawm. Kutze thla en ka duh vangin ka la khawih lo a nih kha" a ti mai a.
"Hei le.. " a ti sap a. Ka va hawi phei vat. Bible a lo keu daih!
"Eng nge? " ka ti hû a. A bible keu lai chu ka va bih a, lehkha them a lo inzep reng chu niin..
"1Samuela 15: 17-23 " tih tê mai hi a ni. Kutziak hraw zet, chhe pherh phurh deuh mai a ni a. Amanda chuan Pu Thawma kutziak nen a dah dun vat a, inang lo nasa tak a ni.
Bible chu a keu a, 1 Samuela chu keuin a bung leh chang duh lai chu a chhiar ta a. A hmel a thim deuh mák mai. Ka zuk bih ve leh a, Israel Lal Saula'n Amalek a do ţuma, Pathianin that chimit vek tura a tih laia halral thil hlan tur leh rallak sum a la te, Amalek lal a thah loh vanga Samuela'n Saula a hauhna lai kha a lo ni. Ka chhiar vawikhatna a la ni zui! Bangbo tak ka ni. Amanda erawh a mitmeng a phur leh sârh tawh. Ri si loin a nui sak a. Ka lo ngaihtha ve ringawt. Sulhnu dang kan hmu lem lo bawk a. A duhtawk ta a niang. Lehkhathem erawh a ak zauh. Paper weight chu sarangah a dah lut bawk. Pu Thawmliana chhung leh khat lo thu thap hmaah chuan a va ding a.
. "A harsa ang tih chu ka hria a. Mahse, ruang hmu hmasa bertu ka va be duh em" a ti thawp sat a.
Pu Thawmliana makpa niin ka hria, Palian leh thau lam, ngo vung mai chuan, "Keiman ania hmu hmasa ber" tiin a rawn ding a.
"Inbe lawk ang hmiang" tiin a ko hrang a. Ruang a hmuh dan chu a zawt ta a.
Chu pa hming chu Rempuia niin, ka sawi ang khan Pu Thawmliana fanu upa ber dawttu pasal a ni. Anmahni pawh hi Aizawl mi hausa pawl an ni bawk. A chil a lem khawlh a, "Chhungkaw chaw ei khawm neih an rawt tlat a, kan ei khawm a. Kan kim viau mai. Ka pu pawh engmah han ngaihbel theih tur thil a hmelah kan hmu lo. Tun hnaiah an buai ve deuh a, chauh erawh a chauh hmel angreng. Kan chaw ei kham hnu rei vak loah khan kan nu u fapa Mama tia kan koh hi a luak vak mai a, kan chawhmehah huat a nei aniang tiin damdawiinah an tlan chhohpui a. Kan nghak ve ta reng a. Anni lah chu in lama rawn kal tawh loin an lo haw tlang daih a, a hnua chanchin kan va zawhin an rawn sawi chauh. Dar 11 a ri thuak tawh. Kan nu chuan, "Riak mai ang hmiang. A tlai tawh si" a ti a. Kan fate pahnih lah an muhil daih tawh a, han kaihthawha hawnpui leh ai chuan tiin ni dangah pawh kan riak zeuh zeuh tho a ka tia. Kan riak ta a. Mikhual room thlang lam zawkah khuan kan mu a. Zanriah ei hma khan ka lem hlek a, a power a zo laklawh tawh si, ka muhil thei hlek lo mai a. Ka pu Driver in hnuaia riak chu ka zuk text a, a lo la muhil lo va, 'ka la kawl hlek, lo chhuk la' a tih vangin ka zuk chhuk a. Kan dawm dun leh a, kan phul ta hlut a. Ka pu driver Sangtea hi kawm nuam deuh, fel deuh mai a ni bawk a. Kan titi tui bawk a niang, ka chhoh meuh chuan dar 12:30 a pel tawh. Ka mu zui ve nghal a. Tiharhtu nei niawm takin ka harh hlawl ringawt a. Dar 1 a pel hlek. Ka zun a lo chhuak nasa mai a, kan roomah bathroom a awm si lo va, choka lam toiletah ka va zung a. Ka let leh lam chuan ka pu office hi a lo inhawng a, "A la meng a ni maw" ka ti mai a. Mahse, rooma ka luh dawn chuan ka va bih kher a, dawhkan bawha a mu chu ka va hmu ta a. Ka hriatna thazám te khan thil dik lo a awm niin min hrilh ka ti mai. A mak ve khawp mai. Ka va pan ta a, ka pu chu ka ko a, min chhang si lo. Ka va pan hnai a, ka han khawih chu a lo zawi hnawk mai si. Chutah thisen kha ka hmu zui ta a. Ka rak ta thawt a. An rawn tho ve hlawm a, ka rak ring bawk a niang. Mahse, Hei ka pu fapa, kan nu nau chiah hian, "Khawih che rih suu.. Police hrilh ang" a ti ta a. A rilru a fim khawp mai.. " a ti ta a. A tawng zawng pawh chuan a zu in rim chu a rawn nam huk huk reng a. A awm a nuam lo hle tih pawh a hriat theih.
"Khawiah nge a Personal Security? " Amanda chuan a ti a.
" A PS chu, niminah khan a pizawn a boral a, vawiin pawh thlan nghah ni a ni sia, ka pu hian chawlh a pe aniawm e. Ka pu sawi dan kha a nia. Chuan, guard dang pakhat gate-a duty saw khatia kan buai nuaih khan Driver sangtea khan a va en a. A lo chatthla a.. A rui khawp mai! Tunah pawh a la harh tha lo. " a ti ta a. A rui ve deuh naa, a kawm tlak viau mai. Mi dang Pu Thawma nupui fanaute erawh an ngui nghiai a. A changin an rawn ţap leh hawm hawm thin. A sarhu lai a ni sia, Amanda pawn a zawh belh ta rih lo. Kan inzui chhuak a, Duty post-ah chuan a va lut a. Zu um khat chu a lo let bal a, a bak thil dang hmuh tur a awm lem lo. A let leh vut a, ka zui ve leh vat bawk.
Rempuia chu va bekbawr lehin, "Ngaihtuah leh lawk teh, i pu ruang i hmuh khan kawngkapui hi a inkalh em? " a ti a. Rempuia chu rilru buai hmel zet hian a inngaihtuah a, a hre chhuak zo tawh lo niin a lang. Mahse, kan tawng hre pha tlangval pakhat chuan, "Ka lo inrawlh ve lawk mai. Khatia Rempuia te thawm ka hriat ruala ka tlan chhoh khan in chhung ka lut thei nghal. Kawngka a inkalh lo tihna anih chu" a lo ti var a. Ani chu Pu Thawmliana driver Sangtea chu a ni. A hmel a fai veng a, a hleitling viau bawk. Amanda a bu nghat. Kan chhuak leh ta a.
"Lo riak mai rawh" a ti sap a. Bike ka keng si, ka zui leh ta duan duan. In chhung kan luh chuan, "I rim kha.. " tiin a ner sak. Ka nam ve hak tih chu ka hre reng. Tihtheih awm tawh hek lo.
Coffee a lum a, "A harsa viau maithei a. A awlsam viau thei bawk" a ti leh nghat a.
"Ngaihdan ka nei lo" ka ti nghal táwng.
"Ngaihdan nei thei pawh i nih loh kha, i lu burah khan zu la chambang hek" a lo ti fak.
Ka nuih tlawn a. A nui duh thak lo lehnghal. Coffee kan in a, "Bible kara lehkhathem bak hmanrua kan nei miah lo chu a nia.. " a ti leh a.
"Awmzia a nei dawn mawni le.. " ka lo ti hluk.
"Kha thu khan engkim a pholang vek tawh alawm. Mahse, chuti maiin tualthattu hi man a awlsam dawn lo a ni" a lo ti nghet charh a. Ka thle buk ringawt. Coffee ka hawp hruih.
Kan in zawhah kan mu. Khum khatah kan mu naa, ka khawih lo. A thluak a hman lai chuan, hmeichhe vawt tak, phurna reng reng nei lo a nih avangin kei pawn chutiang hmeichhia chu ka khawih lui duh lo. Lehlam kan inhawisan hmak ve ve mai. Mut erawh a tui tho mai.
A tuk atangin kan buai nghal char char. Pu Thawmliana te chhungkaw chanchin pawh kan hre hnem viau. Pu Thawmliana nupui hi Pi Parteii niin, nu fel leh an pa support tha em emtu a ni a. Fa pali an nei a. An upa ber hmeichhia niin, a pasal fanaute nen Chaltlangah an awm a. A chhang chiah hmeichhia chu Rempuia nupui kha niin, Mapuii a ni. Mapuii nau chiah mipa hi Jerome niin, a pa ruang khawihsan phal lotu kha a ni. Kumin kumtirah khan nupui neiin fa an la nei lo thung. An pang ber hi mipa bawk niin, Alex-a a ni a. Ani erawh Bangalore-ah thil zirin a awm thung. A rawn haw dawn a niawm e. Pu Thawmliana hi Kum 64 niin, a thothang a la tha viau a. Kan ram hruaite zingah sawisep kai lo ber pawl niin, amah hi a nelawmin biak a nuam viau bawk a niawm e. Home minister a ni bawk a, a buai thei hle ang tih chu a rinawm. An sawrkar kum 3-na chiah niin, hna pawh a thawk tha angreng a. Opposition tan chuan sawi leh selna tur chu a tam tho awm e. Politics hi ka ngaihven ve vak lo va, he lam chu ka hre thui em em lo.
Amanda chuan a lu tuamna chu dah thlain a sam huh hliam chu a chhem ro a, keiin tukthuan tur ka siam thung. Pu Thawmliana thattu niawm ka ngaihtuah neuh neuh a, ka bangbo. Opposition lam hian an that ta mai em ni ang? Zoram hmun ralmuang kan lo tih thinah pawh tualthahna a thleng ta mawlh mawlh mai a. Kan ram hruaitu lu te pawh an bang ta lo ve. An thah dan lah kha huatna nasa tak vanga thah te pawh a ang. Hrawk zai thler hráwk mai chu! Ka ţim uai mai. Tukthuan kan ei chhung zawng a tawng lo. Ka be bik lo.
Ei khamah, "Ka va inthlak ve loh chuan" ka ti a.
"Thang rei suh ang che." a ti sap a. Ngawi rengin ka haw. Ka nute chuan min zawt nasa mai a, rinhlelh kan la neih loh thu bak sawi tur ka hre lo. Zoram pum chu a ngui nghiai hian ka hria. Zoram hruaitu lu a han boral takah chuan, tin, a thih dan a runthlak bawk nen. Mi nawlpui chu an tang hrû reng a. A thattu hre chakin an za sek hlawm ang chu.. Chhui chhuah lawk loh chuan, Police department an dem leh luih luih bawk ang.
Office ka va thlen chuan, Amanda chuan file niawm tak a lo sam kual a. En pawh min en loin, "Sam, ka ngaihdan sa kha paihthlak a ngai tlata ka hriat chu" a ti halh a.
"Eng ngaihdan maw! " ka ti leh hû!
"Nizana Bible kara lehkhathem atang khan ngaibtuahna ka sêng nasa a. Kan ram hian hel pawl kan khawi ta em mawni aw ka ti hman a, mahse, Sawrkarna an chan atanga ram pum huap issue ka chhut atangin, Hel pawl chu an din ka ring ngam lo leh si. He thil mi pakhat thiltih niin ka hria" a ti ta duah a. 'Hel pawl' a tih takah chuan, Bible chhung thu kan chhiar atang khan kei pawn ngaihdan ka nei thiam ve mai.
"Chuan" ka ti ringawt a.
"Gate vengtu kha kan va hmu ang, tunah Hospitalah a awm" a ti a.
"Zurui chatthla mai mai te ngati nge hospitalah an dah a? " ka ti sup a.
"Zing thleng khan a harh hleithei lo va, thil dik lo a awm nia ka hriat vangin Rempuia te kha hospitala dah turin ka va hrilh alawm. Zu rui chatthla satliah nise, harh a hun tawh alawm" a ti nem diai a.
"A tha lawm.. Va hmu ila. Tunah em ni! " ka ti a. A ding a. Kan chhuak zui nghal. Ngawi rengin kan tlan a. Hospital kan thlen chuan nurse senior tawh lam hian casualty khum no. 9-ah chuan min hruai phei a. Kan hmuh tum chu a lo mu a. A harh tawh thung. A mitmeng erawh a la dava hle.
"I tha deuh tawh em? Kawm che kan lo tum a, Amanda ka ni e" Amanda chuan a ti a. Nelawm takin a nui bawk.
Chauh hmel zet hian, "Ka tha chuan ka hria. Umm, ka hria che alawm" a lo ti ve a.
"Home minister thih thu kha i lo hre tawh ngei ang a. Nizanah khan eng nge thleng min han hrilh teh" Boss chuan a ti a. Chu pa chu a ngawi dat a, a chhing vang vang bawk. A ngaihtuah let a nih ka ring. He pa hming hi Ramchhana niin, Rama tiin an ko thin. Homeguard niin, nizan khan Home minister chenna hmunah a duty a nih kha.
Rama chuan, "Ni e, ka lo hre ve a. Hrehawm ka ti takzet a ni. Ka hna atanga suspend hial ka nih pawh ka ring. Mahse, thil thlen dan kha ka duh dan a ni bik miah lo a nia. Nizan kha ka vanduai em a ni. Zan dangah pawh ka duty fo a, nizan ber kher kha ka vanduai ai tur a ni ngei ang. Englo a nia, duty tura ka kal hma deuh khan kan nu u hian MC Rum a rawn keng a, peg 3 vel ka peg hnuah duty turin ka chhuak a. Duty post-ah khan ka thu ta char char a. Dar 10 velah khan ka thawhpui Lalrema hian, "Min lo con ve teh, lakna tur ka hria. Ka da lutuk" a rawn ti a. Ka in chak ve tho si. Amah lo kalin kan incon ta a. I hria ang a, zep thu a cheng lo, Zoram chu ram ralmuang tia kan hriat vangin duty te pawh kan inthlahdah thin a. Kan thiam loh vek chu a ni tho a. Lalrema nen duty post-ah chuan kan in dun ta a. Jerome-a pawh khan min rawn hmu a, mahse, min hau hran lo. Min hrethiam ve ni maiah ka ngai. Lalrema a haw ta a, dar 12 a ri thuak ta. Ka kai nuam tawk hle, khatiang mai maiah ka chatthla ngai lo. Mahse, 12 a pelh hnu lawkah chuan thil rimtui angreng tak, ka sawi thiam chiah lo, a hiar rim nam deuh bawk si hi a rawn nam chak chak mai a. Ka hawi kual nasa mai. Mahse, chu mi rim chu reivak loah a reh ve ta mai a. Mahse, namen loin ka mut a rawn chhuak ta a. Ka meng thei hlawl lo a ni ber. Ka muhil ta daih a. Ka hriat leh hmasak ber chu tuia min leih leh min koh vak vak kha a ni mai.. Chuan, hetah hian ka lo awm ta daih bawk. Kha zawng kha a ni e" a ti ta a. A khuh kharh kharh mai. Tuisik a in khawlh khawlh a.
"Lalrema i tih chu a address min pe ka tiraw? Chuan, in zu in khan zu dang an lohna neiin i hria em? Rim dang emaw a taste a dang deuh em? " Amanda chuan a ti a.
"Aih, danglam engmah ka hre lo. Tui ka neih tlem vangin kan in tak deuh tih mai a ni" a ti a. Amanda pawh a bu nghat. Zawh tur dang a awm ta rih lo bawk a. Kan chhuahsan leh ta rih a.
"Mitthi inah chuan va lawr rih lo ang. A sarhu lai hi chuan engmah a tih theih tak tak loh" a ti a. Office lamah kan let leh nghal. Pu Thawmliana vuina programme chu kan thlir dun a. A ropui kher mai. Mipui pawh an thahnem. A minister pui te leh chief minister, governor, hotu lu chu an kim vek mai. Social media lamah lah amah uina leh sunna hmuh tur a intlar ngei nguai bawk. Vawiin zet chu thil rapthlak tak kan tawng bawk a, mi zawng zawng chu kan ngui a ni ber mai. Amanda pawh a harhvang hrak lo. Chumini chu holam deuh takin kan hmang ta ringawt.
Pu Thawmliana vui atanga ni 2-na chiah a ni. Amanda chuan Pu Thawmliana chhung leh khat bakah a ministerpui zawng zawng te profile bakah an history zawng zawng a en chhuak vek a. Pu Thawmliana phone kha kan kawl a. Mahse, engmah hmuh tur a awm lo. A call list-ah lah han rinhlelh tur reng reng an awm lo va, msg ni se a pangngai vek. He tualthattu hi mi mawl tak a nih ka ring lo. Ruahmanna felfai tak nen he thil hi a duang tih a lang reng mai. Hnuhma min hnutchhiah a tum miah lo a ni. Bible kara lehkhathem lah kha awmzia a nei tak tak em tih lah kan hre si lo.
Amanda chu Chief Minister-in a bangla-ah a ko rap mai le..
"Sam, kan va phu lo em aw. Min rawn zui ang che" a ti a. A hlim ve hmel hle. Mizoram lalberin a ko ve miau si a. Kei tak pawn ka lo chhuang ve hliah hliah. Chief Minister zahawm tak Pu Sangbera bangla kan thlen chuan chawhnu dar 2 a ri tawh a. Min lo welcome tha hle. A chamber-ah min ko lut a. Ka lut ve zel mai. Amanda PA angah min ngai tawh a, tuman hnawk min ti lem lo.
"Hei le! Hna hautak leh zoram mipui te nghahfak inthawk dawn chu a nia. Ka ring zo lo che tihna ni miah loin, mamawh i nei a nih chuan engmah sawi hreh lo turin ka duh che a ni. Sipai i mamawh emaw pawisa i mamawh emaw engpawhni rawh se, tihsakin i awm zel ang. Thawma thattu hi kan hriat chhuah ngei ngei a ngai.. A chhan chu kan nunna thleng hian a derthawng tih i hrethiamin ka ring a" a ti dap dap a.
"Ka hria alawm sir, ka theihtawp ka chhuah ang" Amanda chuan inring tawk zetin a lo ti a.
"Hnu chhuina atan i tanhmun duh apiang pawh kan tihtheih a nih chuan tihsakin i awm em? A nih tunah hian, hmalakna i nei tawh em? " A ti ta a.
Amanda chuan thawk a la hawk a. Pu Sangbera melh ran chungin, "Forensic lam atangin Pu Thawmliana chair bula Paper weight tla-ah khan kutze thla lang a awm lo va. Pu Thawma kutzia chiah a lang a ni. Chumi awmzia chu he tualthattu hian fimkhur takin hnuhma hnutchhiah miah lo turin chet a la tih a lang a. Thil pakhat erawh min hnutchhiah a. Lehkhathem a ni a. Bible bung leh chang inziahna a ni. Mahse, kan rilru hruai pen a tumna angah ka ngai deuh. He thil hi a tirah kha chuan Bible thu nen zawng zawng khan 'Hel pawl' thiltih a nih ka ring a. Mizorama hel pawl an pian kan la hre lo va, tin, insawrkar atangin Issue lian tham pahnih chiah a la thleng a. Khata tanga a landan chuan, mizoram inrelbawlna duhkhawp loh vanga hel pawl hial an pian theihna tur khawp ka hmu lo. Chuvang chuan he thil titu hi mi pakhat emaw mi pahnih emaw an nih a rinawm a. Mi fing tak an ni bawk" a ti ta kalh kalh a. Chief Minister chuan a ngaithla uluk khawp mai.
"Bible chhung thu chu eng nge? "Inthlahrun hmel lek lek hian a ti a.
Amanda chuan a hrilh a. A hlauthawng deuh nge a keu nghal chawt chawt. A hmel chu a danglam deuh. Amanda chu rawn melhin, "He lai thu kher kher hi engtizia nge? " a ngaihna hre mang lo zet hian a ti a.
"Kei pawh kha khan min tibuai alawm. Nikumah Assam nen kan ramri buai issue a thleng a, khatah khan Firing order i pe a, an inkap ngei a. Assam lamin flag var an rawn zar a, kha issue-ah kha chuan sawrkar demna aiin fakna a tam zawk a. Kha lai Bible thu nena inhmu rem ber tur chu ni mah se, Asaam lamin ban an phar miau a. Hel pawl dinna khawp tlingin ka hre si lo.
Tichuan, kumin kumtirah Saiphaiah Bru hoin kan Mizo sipai pali lai an kaphlum a, mahse, khatah lah khan Bru ho hnawhkir niin, anmahni lamin ruang an senghawi tam fe zawk si a. Tun thlengin buaina an rawn nei ngam ta lo va, engvangin nge hel pawl chu an rawn din tak ang..? " a ti dap dap a.
"I va ngaihtuah kim em. Kei ka rilru a mang vek mai a, khalam reng reng ka ngaihtuah pha lo. Ka rin dan chuan Thawma dinhmun thika politics thil vanga inthahna hi thleng angah te ka lo ngai ringawt a. Mahse, rinhlelh tur erawh ka hre hauh si lo" a ti nghut nghut a.
"Sir, pu Thawma khan hna a thawk tha hle a ni lawm ni? In huang chhungah amah kalha kher deuh tur an awm lo niin ka hria a. A chhunga cheng i ni a, thu zep hun a ni lo bawk. Nangin chutiang mi niawma i rinhlelh te chu min hrilh thei alawm" a lo ti zat a.
Pu Sangbera chu a inngaihtuah vung vung a.
"Mi pakhat chu a awm. Mahse, ka ringhlel lo. Mahse, kil tin fan ve chu a ngai si a. Sawrkarna kan chan tirh khan Pu Lianmawia hian Pu Thawmliana dinhmun hi luah tumin hma chu a la a. Mahse, a personality hian a pha tawk lova hriain, mi dang zawng paw'n Pu Thawma kha an dah chungnung zawk a. A lungawi lo, a vuivaina te chu kan hria a. Mahse, hei tunah chuan a dinhmunah hian a lungawi ta viau niin ka hria" a ti ta a. Pu Lianmawia chu Health Department changtu a ni. Pa luruh ring leh ţawng thlahdah ve tak a ni a. A chhungril erawh a sual vakin ka ring lo. Hna pawh a thawk tha thawkhatin ka hria.
Amanda chuan, "Ka lo chhui deuh tawh a. Pu Lianmawia erawh ka la be lo va, Pu Thawma thih bawr leh a thih hmaa a call record check erawh kan tihmakmawh a ni ang. An thawhdunna a tha viau niin ka hre bawk a. Pu Thawma department chan a duh vang ringawta Pu Thawma a that a nih chuan a ngaihtuah tawi thlak hle ang. " a ti duah a. Ka lo hawi ka lo hawi ve ringawt.
"Ramri issue-ah khan demna thawm thangva kha chu oppision atangin kan dawng ve nual kha maw.. Amah kan home minister ngei pawh khan a dawn ve nual kha" Pu Sangbera chuan a ti a.
"Nikum lama thleng, thawm riva engmah nei lo va tun hnai têa Home minister nunna lak hi 'hel pawl' zia niin ka hre lo. Boruak eng emaw tak zawng an nei ngei tawh tur a ni a.. Saiphai lam kha mizo sipai pali an thih vang khan demna chu a nasa… ngawi teh, Sir, Khang sipai pali thi te kha an chanchin hriat ka duh e" a ti ta daih a. A chezia chu a pangngai lo, a phur nge a chiái pawh ka hrethiam lo. Chief minister pawh chuan mak a ti deuh hlekin ka hria.
"Aw le, khang sipai pali te chanchin ziahna file chu i office-ah ka rawn dahtir nghal ang" a ti nghet charh a.
"Sir, kan kal tawh ang e. Chanchin lawmwm lam kan neih vat beisei ang. Chuan, nang leh i naute hi lo fimkhur hle u la ka duh khawp mai" Amanda mitmeng vawt tak chu kan melh reng ringawt. Pu Sangbera pawh Amanda mitmeng vang chuan a hamhaih deuh tih a lang. Engmah sawi tawh loin kan chhuak nghal. Ngawi rengin office kan pan.
Rei kan thut hmain Amanda dawhkanah file a let ngát mai. Sipai pali thite profile a ni.
"Sam, lo en ve rawh le" tiin thupek min pe a. Pakhat chu ka keu ve ta a.
Saiphaiah boruak kha chu a reh leh daih tawh a, tun ataka chin thar leh chu a intuha lo deuha hriatna ka nei a, mahse, ka Boss leh ka bialnu ni bawk hian a kawng thlan a thlang sual ngai lo tih vawi tam ka lo hmu tawh a, a thu chu awih zel phawt mai teh ang. Ka en lai chu Lalrinpuia file niin, Theiriat, Lunglei khua niin, nupui fanau a nei tawh. Heng sipai thi te hi sawrkarin zangnadawmna thahnem tak a pe vek a ni. Amanda thlirna angin ka thlir ve lem si lo va, ka va hnemhnanpui lem lo tak. Ani erawh a bih uluk ngang mai.
"He lai hi le.. Sam, Lalnunmawia bik hi ngaihtuah ang aw.. MAP niin Bawngkawn Police station-ah attach-in dah a ni a. Mahse, Saiphaia buaina a awm khan, Koh zingah a tel a. Hm.. Hei chu thil pangngai tak chu a va ni si ve. Hei Lalrinsiama pawh hi chutiang tho chu a ni. Ani erawh traffic lamah a duty thung a, Saiphaiah koh a ni ve ta a. He mi te pahnih bik hi i hual phawt teh ang. Pahnih kha chu Saiphaia duty sa an ni a. An file kha khup bo rih ang" a ti zung zung a.
"I thluak hman dan hi ka hrethiam hrep lo e " ka ti nghut a. A mitmeng lian kelkawla min melhin, "Ka thluak i ring rei tawh lutuk a, engmah i ngaihtuah thiam tawh lo a nih kha.. Examnaa i entawn ţhan chuan i thiam sa reng pawh entawn lo chuan i ziak thiam tawh lo vang" a ti ta duah a. Ka ner suk ringawt.
"A nih eng nge a awmzia? " ka ti a.
Cofffee no tlang nuai kual pahin, hahdam hmel zetin a thu a. "Thlamuang taka an hna an thawh laiin koh an ni thut a, rálho silaimu va dawng pawlah an awm ta hlauh mai a.. A nat dan tur i hrethiam em? An chhungte tan" a ti ta a. Ka man ţan.
"Mahse, an hna a ni miau alawm. Hetiang hmachhawn tura training pek vek an ni alawm" ka ti a.
"Nih zawng a ni e. Mahse, kan station-ah ringawtah pawh attach an tamzia i hria em? Anni pahnih koh an nih danah thil felhhlel a awm a nih chuan, kan bawhzui lo thei lo vang. Hei bak hmanrua kan neih loh hi" a ti a. Hmabak a va kó tak. Ban ngawt theih lah a ni si lo.
Lalnunmawia leh Lalremsiama te chu kan chhui zui tan ta a. Lalnunmawia chu Aizawl mi leh sa niin, Thakthinga khawsa an ni. Nupui leh fa pahnih a nei. Kum 10 liam taah MAP a lut a ni. Lalremsiama pawh Aizawl mi leh sa tho niin, mahse, an khua atanga lo pem an ni. A nupui leh a fa pakhat nen Bawngkawnah an khawsa a, kum 7 liamta khan MAP-ah a lut ve bawk. Traffic -a duty tura attach a ni hi kum 2 liamta khan a ni bawk. Lalnunmawia erawh attach hian kum 5 zet a awm tawh thung. An address kan nei ta bawk a, an chhungte va hmuh a ngai tihna ni maiah ka ngai. Mahse, Amanda chuan a la remti mai lo. "Kan dai sual thei" a ti tlat.
Bawngkawn Police station-ah va kalin, an OC kan va bia a. Pu Hnema niin rei vak lo kan inhrawn ve hman a, pa nelawm tak a ni. Min lo dawngsawng tha khawp mai.
"Lalnunmawi leh Lalremsiama te koh an nih khan felhlel leh dik lo deuh awmin i hria em? " Amanda chuan a ti tlang nghal thâwr a. A zawh dan teh tawp chu tiin ka lo îp deuh.
A kut pahnih chu a suih a, khunkhan zet hian, "Lalnunmawia kha chu a vui nasa khawp mai a. Lalremsiama erawh chuan engmah a sawi lo. A thi pawlah an va ţang ta hlauh bawk si.. A nuam lo duh khawp mai" a ti phawt a.
"Khatih lai khan MAP leh IR an khawrh nasa tih thawm chu kan hre tho a, mahse, ka chhui chian hian koh loh, la naupang leh junior tak tak an awm nual tih ka hria. Chu vanga ngaihdan nei ta ka ni a.. Order kha Home Minister atangin a ni lawm ni inhmuh? " Amanda chuan a ti ta a.
"Ni e, Direct lehnghalin. A pawimawh viau a nih ka ring. Kan station atang chuan Lalnunmawia leh Lalremsiama chiah kha koh an ni a" a ti dam thlup a.
"Kei pawn mak ka ti deuh a, An aia junior kha pali lai an awm a, koh an ni ve lo kha.. Lalnunmawia phei chu a uai thla lam a ni ve tawh a, ka lo vuipui rilru ve viau, amah kha pa fel tak a ni lehnghal a" a ti ta a. A tawng zawih danah mi dang mitmei veng a ang hle. Mahse, tuman min rawn bengkhawn a rinawm loh. He laiah te chuan kan leng phei ve fo a.
"An thih thuin a den che u khan, thil danglam thleng a awm em? Ngaihbel theih tur pawn" boss chuan a ti leh a.
"Ka hre hauh lo. Kan buaiin kan saháwk leh tih mai loh chu. Attach ngang an nia, kan hmalakna tur a awm ve lo bawk a, mahse, a ui erawh kan ui tlang khawp mai" a lo ti a.
"A pawimawh ber, Lalnunmawia leh Lalremsiama hmun ruak kha tu ten nge rawn luah? " Amanda chuan a ti zawi ta sap a.
Pu Hnema chu a thu awn deuh a. "Constable Jerry Lalnunpuia leh MAP attach thoin Liansanga ten an rawn luah" a ti ta a. Amanda chuan a chhinchhiah nghal.
Lawmthu inhrilhin kan chhuak ta a.
Social mediaah police lam demna thawm a ri leh tan ta a. Mahse, Amanda thawhrimzia hria an awm lo. Kei hian ka hria. Zan hnih dawn chu a mu mang tawh lo. Jerry leh Liansanga te chanchin chhuiin a buai a. Kei erawh case tenau pakhatah kaih pen ka ni a. Ka ngaihven hman ta vak lo. Kan chinfel hnua Amanda ka va tlawh chuan, a study roomah a lo thu ngawi tlawk tlawk a. A mitmeng atang chuan mut a hmu tam lo tih a hriat ngawih ngawih. "I hah lutuk, chawl hahdam rawh. Zanin chu eirawng ka bawlsak ang che" ka ti a. Mipa ka nihna anga duat ve a ngaiin ka hria. Nawrna a nasat em vangin a hahdam hman lo a, ka khawngaih tlat.
"Zaninah Jerome a rawn kal dawn a. I awm ve chu a tha" a ti sap a. Jerome chu Pu Thawmliana fapa kha a ni. A thih atanga ni 3-naah khan Pu Thawma chhungte chu kan zu kawm tawh a. Engmah pawimawh em em kan hmuh chhuah loh vangin ka sawi ta lo kha a nia. An pain hmelma a neih sawi tur an hre lo, mahse, ram hruaitu a nia, lo haw ru em emtu chu a nei ang tih erawh an ring. An rilru a zau viau mai. Tin, Pu Thawma er ve deuhtu Pu Lianmawia kha chu Amanda hian a enthlain a chhui lo hrim hrim. A ngaihpawimawh loh danah a ringhlel lo a nih ka ring ve ringawt. Home minister thar puan a la ni lo va, Pu Lianmawia'n a hmun ruak a luah a nih chuan kan chhui zui mahna le..
. "Eng nge sawi tur a neih a? " ka ti a.
"A pa chungchang a nih ka ring ringawt a. He pa hi a tangkai maithei" a ti a.
A che chu a zawi hlein ka hria. A ding tur chu a taksa chau nimaw a lu hai thut chu a petek nawk a, ka lo kuah vat. Hnai takah kan inmelh a, "I chau a nih hi.. Thawkrim lutuk suh ka tih kha" ka ti sup a.
"Min fawp la" a rawn ti teh daih. Min tihamhaih thei. Ka fawp zauh a, ka pawm kang a, Living rooma sofaah chuan ka muttir a. "Tikhan lo mu la, energy drinks ka zuk lei lawk ang e.. Hahdam la aw" tiin a chalah ka fawp zauh. Tunah tak hi chuan hmeichhia angin a awm ve tlat! A chau ve thawkhat a niang. Ka chhuak zui nghal a. Eitur ka lam nual, ka eitirin ka intir a. Eirawng ka bawl zui a. Ani erawh a inbual a. Tihian nupa ni tawh mai ila a tha tur..
Zanriah kan ei a. Dar 8 velah Jerome chu a rawn lut ta a. A thut hnu reivak loah, "Eng chin nge inthlen tawh le! " a ti a. Mi inngaitlawm tak niin ka hria.
"A tawp khar hi a la har deuh a, kan theihtawp kan chhuah ve zel ania " Amanda chuan a ti a.
Jerome chuan File pakhat hi rawn lek kangin, "Hei hi lo chhiar la ka duh a ni. Home minister a nihna ang ni loin ka pa khan hmelma a nei niin ka hria. Kha kha ka pa office ka lepsena lama ka hmuh a nia. " a ti a. Ka lo phur ve sawt.
Amanda chuan a keu thuak thuak a, reivak loah, "Eheu! I pa chuan i nu ni lo nupui a lo nei a maw?! " a ti ta mai a!
Jerome chu za lo zeta nuiin, "Ka hrethiam lo, ka nu phei chu ka hrilh lo. Hre lo se ka duh a ni. Ka pa khan kan bula cheng chung khan a hmei leh a fa chu a lo chawm ru char char tih a lang " a ti a. A inthlahrun hmel kher mai.
"Heta a inziah dan chuan, In pawh a leisak a, thla tin sum a pe bawk. A hmei hian pasal a neih hma chuan a chawmna chu a pe zel dawn tih a chuang a. Mahse, buaina rim a va nam si lo ve.. " Amanda chuan a ti a.
"Chu tak chu ka hre lo. Mahse, sum kha a lo pe duh tawh loah ngai ta ila, kha hmeichhe thinrim khan a that ve thei mai lo'ng maw" a ti a.
"Ka lo zir chiang ang e.. A lawmawm hle mai. " Amanda chuan a ti a.
"Ka chhungte erawh chuan hre ve lo se ka duh a, tin, zoram khawvel pawn hre lo se ka duh takzet. Ka pa kha mihring ve mai a nia, tihsual a nei teuh ang. Mahse, a thih tawh hnua amah diriamna thu ngaihthlak chu ka theih ka ring lo" a ti ban chhalh a. Amanda a bu nghat. Rei awm loin a chhuak ta a. A ke pen a ritin, a pa thihna chuan a la nghawng hle tih a lang.
"Chuan, he nu hi kan chhui dawn em? " ka ti a.
"Nangman he nu hi chu i buaipui ang. Ka thil kalpui lai hi kei chuan a buk a rit zawk ka la ti fan. Thil tam tak ka hre tawh bawk" tiin Cigaratte a tan a. A hîp kawk. A inhmeh thei siah.
"Eng chen nge.. Min hrilh ve dawn lo mi? " ka lo ti a.
"Jerry kha Pu Thawmliana farnu pasal nau fapa a ni a. Liansanga erawh Party unit Secretary fapa a ni thung.. " tiin a nui sak a.
"Chuan"
"Lalnunmawia leh Lalremsiama te hmun ruak luahtute an ni bawk a. Tun thlengin an la thawk bawk. Khatih lai Saiphai buai lai khan Aizawl Police station hrang hrangah khan hmun ruak a awm lo va, Inthlakthleng a ngaih miau si avangin rinawm taka an hna lo thawk tawh Lalnunmawia leh Lalremsiama te chu Saiphaiah koh an ni ta a nih kha.. Tichuan, anmahni aia junior zawk pahnih ten an hmun ruak an va luah ta a.. I man em? " a ti ta a. Ka fiah ta uar mai.
"Mahse, Lalnunmawia leh Lalremsiama te thlarau chuan an rawn that awm chai si lo va" ka lo ti hmanhmawh. Min rawn melh kâwk. Ka nui ringawt.
"Lalnunmawia te hi chhungkuaa la khawsa an ni a. Unau pathum niin mipa awmchhun a ni. A nu leh pa leh a nupui fanaute nen an khawsa. Lalremsiama hi Sairang atanga rawn awm chho kan tih tawh kha, A nupui leh a fa pakhat nen an khawsa a. Sairangah a chhungte chu an awm. Unau panga lai an ni a. An upa ber chu Tripura-ah a awm. A dawt chiah hmeichhiain pasal neiin Sairangah an khawsa a, chumi nau chiah chu Remsiama hi a ni a, a naute pahnih erawh chuan nupui pasal an la nei lo thung. Chhungkaw harsa lutuk chu an ni lo va.. " a ti a.
"Remsiama chhungte tu emaw chuan phuba a la tihna a ni thei ang em? " ka ti a.
"Home minister meuh thata a in chhunga luhkhung tur khawpin an huaisen em tihah ka buai a ni. An nau thihna hi an tuar tlang hle a, mahse, mak deuh chu sawrkarin zángnadawmna a pek kha hmun thuma thena hmun hnih chan tumin hma an la mek a ni. A nupui hi a khawngaihthlak. Mahse, an hlawhtling lo vang. Ka beisei.. " a ti duah a. A lo va hre ril hman em em. A inkhung char char emaw ka tia. Boss nge nge.
"Mahse, Amanda, ngaihtuah teh, i kal vak ringawt a. Nunmawia leh Remsiama te kha thi turin an tir hleinem. An thi dawn tih kha Home minister pawn a hre bik nang. An vanduai ve a ni mai a" ka ti a.
A nui sak.
"Nang zawng i rilru hi a tluangin mi hriatthiamna te hi i ngah thin a. Ni e, Kan Home minister hian thi turin a tir hauh lo vang. Mahse, an hmun a tiruak hian tu emaw lusûn mek thinlung chu a tiso phut thei si a ni.. Thihna hi a na asin" a ti dam thlap a.
"Okay.. Sawi tawh lo vang. Mu ang" ka ti nghut. Awm dun ve apianga case chungchang sawi dun reng hi ka kham tawh.
Ka ba ban de de a, "Sam, i energy drink vang khan ka phur thut ring suh. A moodah ka awm lo" a ti fiah kák a. Ka kut ka va la rang tak. Lehlam hawiin tûm burin ka chhing ta daih a.
A tukah Pu Thawma hmei hmu turin ka chhuak ta a. A in leh lo pawh a nuamin a vantlang hle mai. Kawngka rawn hawngtu chu nu kum 40-45 bawr vel tur a ni a. A sam chu a dar thleng vel niin, a dum hlap a, a ngoin a vun a no nalh khawp mai. Tin, nu hmeltha tak, hmai hlai phuk mai a ni a.
"Eng nge i duh tak? " a ti a. A aw chu a thum lek lek.
"Samsona ka ni a.. Pu Thawmliana thihna chungchanga rawn be tur chein ka lo kal a ni" tiin ka ID ka hmuh a.
Mak ti hmel a pu zawk a, "Lo lut rawh" a ti a. Ka lut nghal. Sitting roomah min hruai phei a. Room atang chuan hmeichhe naupang ti ila tleirawl a ni mah tawh zawk ang, kum 15-17 bawr vel hmeltha zet mai hi a rawn chhuak a, min hmuh chuan mak a tih hmel hle. A nu chuan, "Duati, i roomah lo va awm rih rawh" a ti a. Thuawih zetin a lut lehnghal.
"Eng nge ni ta? " tiin min rawn en a. Ka chil ka lem khawlh.
"Pu Thawmliana nena in inlaichinna kha ka lo hria a. Engtia sawi tan tur nge ka hre chiah lo va, in inlaichinna kha thuk zawka hriat ka duh a," ka ti ta ngawt a. Ka kha a chih deuh tlat.
A aw a thian kharh a. "Ni e, ani nen khan tu hriatpui lohin inzawmna kan nei a. I hriat tawh angin fa kan nei a. Nichin ami kha a nia. Kei hi Aizawl khua ka ni lo va, tawnsabawp takmeuha intawnga chesual zui ta kha kan ni a. Nau kha ka paih ngam ta si lo va, a pa ka sawi ngam bawk si lo chu ka chhungten min hnawtchhuak ta a. Amah bak belh tur nei ta lo chu ka bel ta a. Mahse, mi tha tak a ni. Engkim min ngaihtuahsak ve a, a nupui erawh ka nih theih loh tur thu a sawi thung. Kei pawn an chhungkaw tihkehdarh ka duh lo va, tihian ka fanu nen chenna in min pe a, thla tin kan mamawh tawk sum min pe ziah bawk. Chu chu a tawk ka ti mai a.. A thi hi a tuar bertu ka ni maithei a ni" a ti ta a. Dawt sawi hmel a pu lo.
"Pasal neih i tum niin ka hria a" tiin ka han blough zauh a. A meng ráng nasa mai.
"A teuh lo. Ka fanu hian pa pakhat chiah a nei ang tiin ka intiam tawh a ni. Mahse, ani ber a thih takah hian kan nufa ringawt chuan ei hmuh a harsa chho dawn khawp mai" a ti a.
Ka lainat ru tlat pek.
"Engtik nge pawisa a rawn thun hnuhnunber? " ka ti a. A ac hi kan la check dawn tho a, "Thla tir ni 3-ah khan a rawn thun" a ti a.
"Engzat vel nge a rawn thun thin? " a va tul vak lo e.
"Aa.. A chang chuan nuai khat te pawh a nia. Mahse, tun tumah kha chuan, 'Buaina ka tawk deuh a' tiin 40000 a lo thun" a ti a.
"Eng buaina nge a hrilh che em? " ka beng a verh deuh.
"Hrilh lo. A mimal nun leh a hna lam chungchang ka zawt ngai lo. " a ti sap a.
"A pawi hle mai.. " ka'n ti ngawt a.
"Engtin nge kan inlaichinna inhriat chhuah theih? " a ti ta a.
"Jerome-a, a fapain a hmu chhuak a. In agreement siam kha" ka ti hmiah.. A hmel a danglam viau.
"Chuan, an hre vek tihna em ni? " hlauhthawn hmel zet hian a ti a.
"Aih, A chhungte dangin an hriat a duh bik lo. Hlauthawng suh" ka ti vat a.
Pu Thawma nen an intawndan ka zawt chak viau a, tul berin ka hre si lo. Mahse, Amanda sawi fo, "Kil tin dap tur.. Tangkai lo emaw kan tih hi hmanraw pawimawh ber ani thin" a tih kha hrechhuakin, "Sawi nuam lo a ni tho ang a, mahse, Pu Thawma nen hian engtin nge in intawn dan? " ka ti ta hmiah a.
A chil a lem khawlh a.
"An inah sawn lângin hna ka thawk ve thin tawh alawm. Ka vannei ka inti khawp a. Ta tang chuan ani mai. Ni e, sawi nuam ani lo va. Kan chetsual takah khan nuam lo ka ti em em a, man chhuah hlau renh renga awm kha ka thei ta ngang lo va, ka hna chu bansanin kan khaw lamah ka haw a. Mahse, sawi tawh ang khan nau ka pai ta si a.. " a ti a. A tawk viau mai. Thingpui tui tak ka in hnuah ka chhuahsan ta a. Rinhlelhna tur ka hre vak lo. Mahse, an thenawm lawka dawrah chuan kuhva lam pahin ka lut a, "Marini saw a thlawina a rei tawh em? Kan naua hian a atchilh tlat mai a" ka ti khawmawi a. Nula senior lam dawr nghaktu chuan, "He ta an rawn awm hian a thlawi tawh. A fanu pawh a la te khawp mai. " a ti ve mai a.
"Mipa lamah a hlei vak lo ni maw? A ngheh hmel riau mai" ka ti leh a. Nui har harin, "Hman deuh khan tlangval pakhatin a rawn lenchilh ve thin a, zan khat kha khawih a tum nge an rawn in umchhuak a, tlangvala zawk kha a thi phung mai.. U Marini te chu hnaih mai mai chi ani lo. A hmelthat nen sawn lerh lo tak a ni. " a ti ta a. Ka hriat duh chin chu hre kim thawkhatin ka inhria. Lungmuang takin Office ka pan ta a. Amanda erawh a chhuak daih. Eng thu tak rawn hawn ang maw..
A rawn hawn veleh Marini nen kan inbiakna te chu ka hrilh ta vek a.
"Pu Thawma chuan tun hnaiah buaina a neih thu a sawi tlat mai a.. A thihna nen a inzawm ang em ka hre lo " ka ti a.
"Rin dan ka nei a, chu ka rinhlelhna chu va finfiah tumin an inah ka va kal alawm. Mahse, an lo senghawi fel vek a.. A bawlhhlawh bawm paihtu erawh ka be thei hram a, 'Lehkha halralna vap chu a awm teuh mai' ati a. Lehkha hal ral te kha amah Pu Thawma blackmailna a nih ngei ka beisei tlat a ni.. " a ti ta daih a. Mahse, ka zawt thui duh lo. Min hau leh palh ang. Hhehe..
"Chuan, Sam, Jerry leh Liansanga te khan tun hnaiah thihna an pumpelh ve ve asin" phur zet hian a ti a. Ka lo phawk hrû mai.
"A awmzia? " ka ti vat.
"Jerry chuan, 'Ka duty haw lam hi ka car break fail vangin ko bang ka su tawp a, ka car pawh workshop-ah a la awm' a tia. Liansanga erawh chuan, Ka night duty tur LPK-in min su thawi thuak a, ka bike atanga hmanhmawh taka ka insaseng hman avangin ka bike a chhe ta zawk a, ka him hram.. Kha LPK lah kha a tlan tlang daih a, keia hamhaih lah chuan a number ka lo chhinchhiah lo. Ka mawl ngawt mai' a ti bawk. A awmzia chu kan veh mek hi Nunmawia emaw Remsiama lama tang tu emaw tak chu a ni" a ti nghet charh a.
"A va harsa dawn ve.. An chhungten an hriat ve loh chuan" ka ti a.
"Naktukah Sairangah kan kal ang. " a ti leh daih a. Remsiama chhungte biak a tum niin ka hria. Ka ning, chhui chhuak vat teh se.
Zanriah ka ei khamah Lateii dawrah kuhva ka zu lam a, ka ei chho mawlh mawlh a. Kawta ka awm lai chuan, ka nu hian thlabar awrawl zet hian, "Mama, Amanda a bo.. " a rawn ti mai a!
"Eng a? " ka ti tuar a. In chhungah ka tlan lut nghal.
Ka phone ka la nghal a, amanda ka call nghal. A ring ral thak..
"Eng tin nge inhriat? " ka ti nghek a.
" I phone-ah an lo call a, i pa hian a va la a.. In OC niin ka hria, 'Amanda awmna chin kan hre lo' a rawn tia" a ti ta a. Oc number ka hmet chhuak nghal, "Sir, eng nge a awmzia? " ka ti nghal thawr a.
"Sama, a pawi khawp mai. Report kan dawng a, hei ka naute a inah an va kal mek e. Nang pawh rawn lang ve mai ta che" a rawn ti dam dup a. Khur ru zawih zawihin ka insiam a, ka mang vek. He thil hi a thleng thei lo.
Amanda a bo thei lo. Tu phiangsenin nge ru bo ang a?!
Ka thleng phei rang khawp mai. OC chuan, "Delivery boy-in ania min rawn bia. A sawi danin zanriah tur a chah a, a va pe tur kha a kawngka a lo inkalh lo a, a lut a, tumah a hmu si lo. Tin, dawhkanah chuan zanriah ei bang niawm tak a lo inhung thluah bawk a. A room a en a, a study room te, bathroom te.. A hmu lo. Tin, Amanda phone chu living room dawhkanah a lo awm bawk. A hlauthawngin station a rawn be ta mai a ni" a ti ta a. Ka nghilh dup mai. Amanda in lamah ka tlan phei ve nghal a. An lo en dik mek a, engmah sulhnu hmuh tur a awm lo. A zanriah ei ban erawh endik turin an pack a, a dik lo reng reng. Zanriah a chah a, a chah zawk thlen hmain zanriah tur a dawng tlat.. Tu thiltih nge ni ta ang?
Amanda, khaw nge i awm?!
A room darthlalangah chuan ka inmelh vang vang a, Amanda sawi fo thin kha ka bengah a rawn ri ta dap dap mai.
"Sam, kei hi rukbo emaw thah emaw ni ta ila, min chhanchhuak emaw ka thih chhan i rawn chhui chhuak thei ngei tur a ni. Chumi avanga ka hnungzui tura thlan i ni.. " a tih kha.. Ka kut ka hum ruh a.
"Boss, khawiah pawh awm la, ka rawn zawng chhuak em em ang che" ka ti zawi raih a..
To be cont..
Comments
Post a Comment