Amanda 4

BOSS AMANDA (4)

Ziaktu: Toni Ralte

A muhil lai hi vawi hnih vel chu a rawn phu leh zawk thin a. Mahse, a harh chuang lo. Ka meng kar thung. A thil tawn khan a la shock ve tih ka hria. Eng ang chiahin nge Kha Tlansanga khan a nghaisak ka hre si lo. A tal neuh neuh a. A tawngvai ta a. Ka en reng ringawt. "Ani khan i pawi a sawi lo asin. Ti nge i thah?" a ti! Tu a sawina nge ni ang? Ka kuah a, ka darah a lu nghatin a muhil ta sâk sák a. Kei pawh zing lamah chuan ka muhil ve sek. Ka harh erawh chuan AManda chu a tho tawh a. Ka lu chu a rit deuh naa, Amanda a awm tawh tih ka hriatna chuan phur takin min thawhtir a. Ka va tho chhuak ve a. Coffee a lo thli mek a, min hmuh chuan min thlit kep nghal a. A harh ve deuh tawh niin ka hria. Nizana ka bual lai khan a taksa lang thei lo lamah hliam neuh neuh a lo nei nual tih ka hmu a, ka rilru a na kher mai. Mahse, "An na vak tawh lo. Tawrh dam theih an ni" a ti leh tlat a. A malpui dinglam phei chu a duk chhuak vek a ni ber. Hmeichhe thenkhat chu nise damdawiina luhpui tham hliam a nei a ni. A tawrhchhelna leh a luhlulnain a tawrh damtir mai mai niin ka hria. Tukthuan tur chu siamchawp a ngaih dawn vangin Ruattea te dawr ami kan va chah a. Ruattea ngeiin a rawn dah a. An han inhmu chu an inkuah chawt mai. Ruattea hian a ngaina ve bawk a.

"I lo dam tha em?" Amanda chuan a ti a.

"Umm, Mahse, ka rilru a hah thei lutuk a, i lo haw leh hi ka van lawm tak" Ruattea chuan a ti a. A lawm tak tak tih pawh a hriat. Hmuhnawm ti zetin ka lo thlir a, Amanda uia lo kir leh se ti an tam chu mak ka ti lo. A lar vak lo emaw ka tih laiin miin an lo ngaihven ru hle tih ka hre ve mai. Tukthuan chu kan ei a. Ka thawmhnaw thenkhat hi a inah a awmsa ve tho bawk a. Ka inbual a, kan insiam zui nghal. Vawiinah thudik puanchhuahna an nei dawn si a.

Kan chhuah dawn chuan, "Sam, mihring nun tichhe thei thil tenawm i tih pathum han sawi teh" a ti sap a.

Ka ngaihtuah leh fe hnuah ," Ruihhlo, sakhua, Sum" ka ti a.

"Kei chuan pawisa, hur sualna leh sakhua ka ti ang. " a ti sep a. Eng dang sawi tawh loin kan chhuak a. A kut a la tihnat deuh vangin car chu keiman ka khalh a. Station kan thleng phei chu ..Amanda hmuh chak an lo zi huai huai chu niin. Traffic te pawh a lo jam phah hial! Reporter ho lah chuan an lo nghak thap bawk a. 

"A va buaithlak" a ti sap a. Hetianga rik hluai hluai hi a ngaina ve vak lo bawk a. Bakah a taksa a la chak vak lo nen, Sir Buata ka call a, Amanda vengtur mi pahnih rawn tir turin ka ngen a. Constable pahnih an rawn chhuak nghal zat mai. Car atanga kan chhuak chiah chu media ho chu an rawn inhawr khawm ta tup tup mai le..

"Madam, engtin nge Kan home minister thattu hi i rehchhuah theih?" tih te, "An kidnap chhan kha anmahni i chhui tih an hriat vang em ni!" 

"An rukbo che khan khawiah nge an dah che" 

Aa..a tam mai. Zawhna inang lo tak tak chu ani tan pawh chhan vek sen ni hek lo le. Fiah fai takin, "Tunah hian ka lut dawn a. Ka thawhpuite leh Home Minister chhungte bulah inzawhna chhanna chu ka sawi dawn a, kan media lamin an rawn puangzar leh mai ang. Tunah chuan chu chu ka chhanna awmchhun a ni e, ka lawm e" a ti ta a. Constable pahnihte chuan an karcheh a, Kei pawn ka zui a. Keite chu , "Sir, Amanda i chhanchhuah dan kha min hrilh thei em?" tih te ,"Sir, Amanda nen hian thawkdun satliah inni lo tiraw?" tihte min zawt ve a. Nia, kan relationship hi official taka puanzarna kan la nei lo a. Hre lo an kat nuk ang tih a rinawm. A engahmah ka chhang bik lo. Station kan luh hnu 5 mins velah , Kan DGP chuan, "Chief Minister a rawn kal dawn e" a rawn ti ta mai a. A ngaihpawimawhna hi a hluin Pu Thawmliana chhungte tan pawh vuivaina a vang ve khawp ang. Kan lo nghak ta a. Ani zawng guard a ngah bawk a, awlsamtein a rawn lut ta a. 

Tlansanga leh Teteii te pahnih chu an va hruai chhuak a. Teteii hi chu a fanu nen kan thawhpui Masiami te inah an riak a. Ven reng erawh an ni. A fanu chu tunah Pu Khuma nupui Pi Hlimi kha rawn chhoin an chhungte inah a awmpui ta rih a. A lainatawm reuh ngawt mai. Dawhkan sei pui kilin kan thu ta thap a. Amanda chu a inpeih tawh niin ka hria. Tlansanga leh Teteii chu an thu dun a. Tlansanga chu a hmai a vung bur mai , a lu pawh a tuam var luk bawk. Ka khawihna bakah AManda hnekna kha a ni ve bawk ang. Mipui kut a tuar lo hlauh a, vannei lel lawl tak a ni. Teteii pawh a nak kha a na a tih em vangin nachhawknaa jection a ni.

Amanda chuan, "Khai le! Tlansang, He laia i thu leh hla ngaithla duha lo kal khawmte hnenah hian thudik chu han puangzar teh le, Pi Tete, nang pawn i lo pui ve zeuh zeuh dawn nia.." a ti dam thlap a. Tlansanga inpuanna ngaichang chuan kan reh ta thuap a. A chil a lem khawlh a, a zâm tih a hriat ngawih ngawih. Khawngaihna thinlung erawh ka pu thei meuh lo a ni e. 

Tuisik chu in leh khawlhin ,a aw a thian kharh a.

"Aw..ni e, Home minister kha ka thah a ni. A chhan chu ka unaupa min thahsak a ni" a tih lai tak chuan, Amanda chuan,"Ekhai! He tah lehzel chuan dawt chu infah lo teh ang.. Thiam inchantir hram tuma i beihna kha ka nuaimit vek dawn. Thudik chauh sawi rawh. Pu Thawmliana kha pawisa i duh vang chauha that i nih kha le..".a lo ti fiak thak a. Tlansanga chu a chhing sawk. A hmui a liak zauh a, "Mahse, khatiang rilru ka put chhan bul chu ka unaupa thi tura a tirh liam vang khan a nia laawm. Ni e, aw inhre vek dawn tho a. Ka'n sawi vek ang e.

Ka nu dik takin min boralsan hma khan ka putea leh ka piteii te saw ka nu leh pa dik tak anga ngaiin thlamuang takin an bulah ka lo khawsa ve thin. Nikhat chu thil mak deuh ka tawng ta a. A hma pawn mi hian min hai nasa thin a, hmel inang ve deuh deuh hi kan lo awm ve bawk a tiin ka ngaithla liam mai zel a. Chumini pawh chuan Bawngkawnah kan workshop mamawh lamin min tir a, Bawngkawn hi kan veng nen a inhlat avangin pawimawh feah lo chuan ka kal zen zen lo. Ka mamawh lam khawma ka haw leh tur chiah chu ka lam pan hian mi pahnih an lo phei a, Traffic police ve ve an ni. Pakhat hmel ka hmuh chuan ka melh ta ngawih ngawih a. Keimah nen danglamna reng reng a nei lo. Kan inang lutuk tih chu ka chiang hliah hliah. Ani erawh chuan helmet ka khum bakah min rawn melh ve lem lo va, min kalpelh hnuah pawh chuan ka la enzui tawk tawk a ni. Miin min hai fo chhan kha kha pa ngei kha a nih ka ring ta a. Ka rilru a buai chho tan ta a ni. Ka nunah hian pawisa a pawimawh ber a. A chhan chu nawmsakna hi ka thlahlel a ni.Ka nu leh pa te hian sum an nei vak lo a. Kei ah workshopa thawk ve mai ka ni bawk si. Chuta karah ka farnu te nupa kan awmpui bawk si. Chutia rilru buai angreng taka ka awm hun lai vel chu ka nî nia ka lo hriat thin chuan min boralsan ta a. Min duat thin em vangin ka tuar thiam lo viau nghe nghe . A pasal pawh khan min ngaina vein ka chungah a tha thin hle a ni. A thih hnu ni 3-naah ka ni diary chu a pasal chuan ka kutah a dah ta a. Ka chhiar ta a. 

Chu diary-ah chuan ka ni chu ka nu dik tak a nihzia leh putea te nen an inremsiamna te chu ka chhiar ta zel a, phirpui ka neih thu leh ka nu chuan ka pa te pawh zawng chhuaka ka unaupa pawh zawng chhuaka inhriattir turin min lo ngen a. Ka rilru tibuai ru em em thin chhanna chu ka hmu ta a ni. Tichuan, ka putea te bulah pawh chuan ka sawi ta vek a. Anni erawh chuan ka pa diktak te chu zawng chhuak lo tur leh thil a kal buai vek dawn sia tiin min ngen a. Mahse, a rukin ka zawng chhuak tho. Mahse,anmahni bulah ka la inhriattir lo thung. Ka unaupa pawh kar loah ka zawng chhuak ta a. Remsiama niin Traffic-ah attach-in a awm mek tihte ka hre ta a. Kei ai chuan sum a lalut hnem zawk tihte thlengin ka hre ta a..Unau ka awh bakah ka nu kha min ngai leh thlahlel, engmah sawi ngam tawh si loin hun a lo hmang thin tih ka hriatna khan min vaw na em em a. Ka nu leh pa anga ka lo ngaih,Putea leh piteii te rilru pawh ka tihahin khang lai khan ka mumal ta vak lo a. Tichuan, Remsiama chu ka be pawp ta a, mak a ti ve viau mai. Kan inhmu ta a, Rinhlelhna a nei ta lo. An inah te pawh lengin an nu nen pawh kan inhre ta a. Remsiama min ngenna angin Ka pa te bulah erawh ka inhriattir duh ta lo a ni. Remsiama kha a pa te nen intihthiam loh vanga he lama rawn awm an lo ni a, ka unaupa rilru tihrehawmtute chu ka hnaih duh ta bik lo a ni. 

Tichuan, Vanduaithlaktakin Siama chu Saiphaiah khan tirh niin a vanduai pawlah a han tang ta kha a nia. Kan inhmu chhuak thar ve chauh a, min kalsan leh si chu ka tuar thiam lo khawp mai. Mahse, ka pa te chhungkaw awm lai chuan ka zuk inlan duh lo va. Siama thihna vang khan mawhpuh turte ka dap kual a, Engvangin nge mi dang tirh tur tam tak an awm laia ka unaupa kher an tirh ti ang zawng ten ka ngaihtuah a. Mahse, han mawhpuh fak tur erawh ka hre lo. Siama kan vui atanga thla khat hnu velah hmeichhe pakhat hi ka tawng ve ta a. Nuthlawi a ni a, fanu tleirawlte a nei tawh a. Marini a ni. Ka hmuh phat atangin ka bei thlawp a ni ber mai. Mak tak a ni. Ka rim ve ta thin a, ani pawn min be chhe em em lo. Mahse, zan khat chu ka lo rui deuh nge ni ka lo huangtau deuh a niang, kan inhau hrep a, khawih ka tum a, a lo kawlh zëk a, min hlau hlek lo bawk. A in atang chuan min um chhuak ta a. Ka thinrimin tlawmthlak ka ti ta em em a. Engtin emaw taka rulhlet ka tum ta ran a. Tin, hei Teteii nen hian kan la inbepawp reng thin a, A pasal u ka nihnaah min ngaina ve a, kei pawn ka unaupa a awm tak loah chuan ka ngaihtuah ve tur an ni tih ka hre ve reng bawk a, ka zuk tlawh zeuh zeuh. ANi chuan, "Siama pa te hian nakin zelah min rawn belbulin ka pasal ralna sumte hi min la chhuhsak vek ang tih ka hlau" tiin a chhungte nena an inkar a hlata an rawn dikdak duh miah lohna turin ruahmanna a siam ta a. A pasal ralna tur sum, Sawrkarin pek a tum kha chuhpui ve anga lantir tumin kei chuan office ka dawr ta a. Dik tak chuan Siama te nupa khan ka pa te tihdik loh leh an laka an sualzia te min fah nasa a, ka hel ve hle ringawt mai a ni. Ka office dawrte pawh chuan Siama unaupa ka ni tih chu an lo ringhlel hauh lo va, Tikhan ka pa te chuan zángnadawmna chuhpui ve angin an than phah ta a nih kha. A nihna takah chuan inrawlhna an nei lo va, Kei leh Teteii remruatna vek a ni. A beisei ang ngeiin an rawn dik tak ta miah lo va. An nufain free takin an khawsa ta a. Ka ruih sual chang leh ina ka hawn peih loh chang hian ka zuk riak ve zeuh zeuh bawk. Chutia inhmu ngun ta leh a pasal nena inang ta bawk si chu a awmdan a danglam chho tan a, kei lah MArini laka ka rilru nat lai leh ka nunphung ka hloh lai a lo ni bawk nen. Ka nau mitmu pawh a la keh em hmain a nupui chu ka mutpui ta a ni. Nupa ang maiin kan khawsa chho tan a. An in a fal deuh vang leh inleng a neih zen zen loh vangin tuman min hmu ngai lo. A fanu pawh khan a pa nen kan inan em vangin a pa angah min ngai ni hmiang, min ngaina em em a ni. 

Zan khat ka zu rui sual chu Marini va rikrap a lang ta tlat mai a! Zan dar 9 velah an veng lamah ka phei ta a. Chet lak tum dan pawh ka nei sa lo. An kawt ka thleng tihin an in inkalh tih ka va hmu a, let leh ka tum lai takin car pakhat hi a rawn ding ve chat a. Kei erawh a sirah tlan pheiin a rukin ka thlir ta a. Marini chu a rawn chhuak a, Hawi zuk zuk chungin kan home minister ngei mai hi a rawn chhuak ve ta a nih chu! In chhungah chuan an lut ta a. Marini fanu Kuri a awm lo a ni maithei. Mak ka ti ta riau a, ka rui pawh ka harh deuh sawt mai. Chutah Marini te in hnuaiah chuan ka chhuk thla a, mahse, eng thawm mah a hriat theih si loh. Home minister rawn chhuah leh thleng chuan ka awm ta a. A haw hnuah pawh rei tawk fang ka la awm. Marini leh Pu Thawma chu an inkawp tihna em ni ang? Mak ka ti a, tin, Marini hian bazarah sawn cosmetic dawr lian vak lo a nei ve a. Hlawk tak tur pawh niin ka hre lo. A fanu Kuri hi Aizawla school tha ber pawla sawiah a luhtir thei a, a in chhung bungrua leh a in hrim hrim pawh vantlang chunglam deuh vek an ni bawk. Home minister hian a chawm a ni mai lo maw tih ngaihdan ka neih takah chuan ngaihtuahna tha lo tak ka nei chho ta a. Marini hian sum a ngah riauin ka ring a, tin, tlawm taka min siamna rulhlet nan hrim hrim pawn eng emaw tia hrem ve ka duh ta a. 

Ka enthla chho tan ta a. Khami hnu kar hnihnaah Home minister bawk chu zan rei tawhah a kal leh ta a. Eng emaw a awm ngei tih chu ka hre ta a, mahse, a fanu pa a ni tih ka hre bik lo. Risk lain Marini chu ka vau tan ta a. "Ram hruaitu Home minister hmei i nih thu hi zoram khawvelin an hriat i duh loh chuan, Pawisa chuti zah chu min pe rawh" tiin pawisa pawh a tir a ni bawk a tiin , Cheng nuai khat chiah ka dil a. Tu nge ka nih a hre mai lo. A mangang tan niin ka hre ta a. Mahse, awlsamtëin nuai khat chu dahna hmun tur ka sawiah a lo dah ta mai a. Ka fanghmano ei ta hmiah mai. Marini kha mualpho hlau, a fanu himna duh em emtu a ni a, hmeichhe tha lo tak a ni lo tih ka chiang khawp mai. Teteii'n a beng chhu ngawng se, min nei duh se neih ngei pawh ka duh a ni. Mahse, min hnar miau si a. Tichuan, a khat tawkin ka dil ka dil ta a. Mahse, vawi thumnaah chuan a tuar zo ta lo nge ,"I duh leh min timualpho mai rawh. Pawisa ka nei tawh lo" a ti ta a. Kei chuan Home minister ka belbul ve leh ta thung a. Hemi chhung hian Marini inah chuan ka leng leh ta zeuh zeuh a, Blackmail thintu ka ni tih a hre lo hrim hrim. A lo mangang vein a thil tawn chuan a lo tihrehawm ve deuh bawk nen, kei pawh chu min be tha chho ve ta a. Pu Thawmliana kha ka blackmail chho tan ta a, A hausa a, Ka damchhunga hnathawh ngai tawh lo tura chen theih tura ka ngaih Cheng nuai 20 ka dil ta a. He pawisa hi ka neih theih chuan in atanga chhuakin in ka luah ang a, pangngai takin ka khawsa ve ang ka ti a ni. Mahse, Pu Thawmliana khan min pawisa hlek lo chu niin, Min pe duh ta awzawng lo mai a. Tin, marini nen an inhmu tawh ngai lo bawk. Sawi darh ta ila, miin an awih ang em? Pu Thawma career hi ka tichhe pha ang em tihte ka ngaihtuah ve a, min hlauh loh danah ka tichhe pha dawn lo niin la hre ta a. Min hlauh loh chu thuhran, "Min mantir vat tur thu" min hrilh a ni. Tu nge ka nih a chhui mek thute nen lam..Lehkhathawn hmanga va vau thin ka ni a, Ka number a hre lo. Min chhui chhuah mai ka rin loh laiin, Zan khat Marini te ina ka leng chu ka phone ka tibo ta hlauh mai a. An in thlen hmaa ka thlauh a nih ka rin vangin Marini phone atang chuan ka call ta a, Ka number hman tlanglawn zawk chu a tlang thei ta hauh lo mai a. Ka number pakhat zawk, Bazara tleirawl pakhat phone ka ruksak, Marini vau nana ka hman zawk kha ngaihtuah chiang hlei lo chuan ka call ta a,a tlang ta bawk. Mahse,a pawi zo ta vek mai. MArini chuan chu ka number chu a lo la save khiau mai. Keia rui dawntawi tawh khan ka phone hmuh let ka duh luatah ka inphawrh ta vek a nih ber mai chu! Marini chu a hlauthawng ta hle a, Kawng dang ka nei ta si lo va, "Mi dang i hrilh tih ka hriat rualin in nufa hian ka chansawm barh ang che u" tiin ka vau ta a. Amah hi chu mi huaisen tak zawng a ni. Mahse, a fanu hi a hmangaih em a, a fanu vang chauhin ka thu pawh a zawm ka beisei a ni. Mahse, ka hawnsan rualin mi dang a hrilh nghal ka rin vangin ka fimkhur tho. Lehlamah mualpho a hlau em a, Police hrilh ta se a inpuan vek a ngai dawn a, police chu a hrilh ngam ka ring chiah lo. Mahse,a fanu pa Pu Thawmliana erawh a hrilh loh reng ka ring ta lo. Ka rin ang ngeiin Ni 2 chhung chu zui rutu ka nei ta a. Keimah hian ka hre ve tawp. Police hrilhbuai lo va min dahbo hmak an tum niin ka hre ta a. Chet lak hmasak mai loh chu, ani home minister meuh chu ka tlanbosan theia ka rin loh vangin ruahmanna ka siam chho ta a.

Bible kara lehkhathem kha chu inrilru tihbuai nan leh amah Pu Thawma chhaihbuai nana ka thawn a ni. Hel ho thiltihah ngai se ka duh vangin. Ramri chungchang avanga hel pawl din angin..Tichuan, khami zan khan zing dar rik hma velah khan Pu Thawma dahtha tur chuan ka chhuak ta a. Gate duty kha ka hriat a nia, A thianpa pawh ka hmelhriat tho a ni. Min lo hmuh chuan dik dawna ka hriat loh vangin Lalrema kha zu inconpui turin ka sawmtir a, Zu-ah khan muthilhna damdawi ka pawlh nual a. Lalrema chu vengthawng mah ila, ka buaipui theih mai ka inring a. Zu kha an in ta a. Khami thil rimtui deuh tia gate vengtuin a sawi kha chu nangmahni bum nan bawka ka tih a ni. Rama kha a chatthla ta a. Awlsam takin ka kal tlang a. Cctv kha chu a hmain ka thianpa fitnaah ka zui ve tawh vangin a tihchhiat dan chiang takin ka lo hre tawh a, ka vanneih asiamin pawn lam leh chhung lam chu a lo inzawm vek a, ka tichhe thei ta phawt. Ka buaina erawh kawngkapui kha engtin nge ka hawn ang tih a ni..Workshop lama kan hmanraw tangkai awm deuha ka rin chu ka paisa nual tho a. Kawngkapui bulah ka ding ren rawn a, ka pawt ta a, mak deuh maiin a lo inkalh hlek lo chu niin! Ramhuaiin min pui a ni ngei ang. In chhung chu thawm dim takin ka lut ta a. Khawi lai nge an room awmna pawh ka hre lo. Mahse, ama office bik kha a lo la eng a. A la awm aniang tiin kawngka chu zawitein ka va hawng a, dawhkanah thuin rilru hah hmel zetin a lo thu a. File pawh a chap nual mai. Ka lut ta thâwr a. Min hmuh rual chuan a ding hluai a, au a tum lai takin a ka ka va hup ta nghal a. Ka chet vat loh chuan man ka ni a, jail ka tang dawn tih ka chiang. Tin, min zui ru tura a mi tirhte khan khawi lai hmunah emaw min hnutchhiahin ka ruang an chhar hun a la awm dawn tih ka hre bawk. Ka kekawr kawnga ka chemte pai chu ka phawrh a, A hrawkah chuan ka zai ta hrâwk a ni. Tichuan, rem deuhin a thi a ni tih an hriat lawk loh nan chairah thuttirin dawhkanah khan ka bawhtir ta a ni. Pawisa a kawl em tih ka en thuak thuak a, a pawhdawha cheng 2000 tlang lo awm chu lain a dang zawng ngam tawh loin ka chhuak ta a ni. Kha kawngkapui kha engvangin nge an kalh loh ka hre miah lo. Ka vannei nge an vanduai ka hrethiam tawh lo. (Hei chu a hnua Rempuia sawi danin, 'Ka kalh ngeiin ka hria. Ka kai ve deuh a, kalh ngei chuan ka inhria ' a ti ve. Zu rui ngang a nia, kalg anga inngaiin a lo kalh kim lo a ni maithei. A inthiam lo hle nghe nghe)

Mahse, Pu Thawmliana in ka chhuahsan hnu kawngpui ka chuang chhuak chu ka chemte kha ka la keng reng a, thisen erawh amah pu Thawma kawrah khan ka tat fai a. Hmeichhe pakhatin min lo hmu ta tlat mai a! MAry kha a ni. Ani a inzuar haw lam a lo nia ..min hmuh rualin a tlanchhe nghe nghe. Mahse, ka umzui ta lo. Ka hmel a chhinchhiah hman ka rin loh vangin.

Tikhan thil chu a thleng a ni mai. A tukah kha chuan inchhir namen loin ka inchhir tawh a, ka hlauthawng em em bawk. Engvangin nge kha thil kha ka tih le tiin ka indem a, ka mangan em vangin inah pawh ka haw ngam ta lo va. Teteii inah ka kal ta a. Ani bulah chuan kawng dang ka nei ta si lo va, thudik ka sawi ta vek a. Mahse, a pasal u ka nih angin min hum ta a. A in hnuai store room atana a hmanah min awmtir a. Zanreiah erawh ka han riak chho thin. Samsona lo len lai pawh khan in hnuaiah ka awm reng a ni. 

Min hriatchhuah tak lawk loh avang khan ka intizalen deuh a, Thim thet theta ka chhuak chu Mary khan min lo hmu ta chat mai a. Mi dang an awm ve vangin engmah chu a sawi lo. Mahse, min hria tih chiang takin ka hre ta a. Ka hlauthawng leh ta a ni. Tin,Amanda in he case hi a la tih ka hriat khan ka awm a nuam ta vak lo bawk a. Workshop lamah pawh ka va kal ve leh zeuh zel a, inthup zo loin amanda chungchang ka sawi palh nghe nghe. Mahse, an hriatthiam loh ka beisei. Mary khan engkim a sawi chuan kei chu thisa ka ni dawn si a, ka chhui ru ta a. Ks a ni tih ka hriat vangin a agent hriat ka tum a. Taxi driver a lo ni a. Chu pa chu belbulin Mary chu dawr ka tum ta a. Tichuan, Zanah kan indawr thei dawn ta a, mask ka vuah a, min hmuh ruala a tlanchhiat loh nan. Taxi-ah chuang dunin "Veng mawng lamah in ka luah ve a, hotel hman ai chuan a tha zawk" tiin ka hmin ta a. Teteii in lam ka panpui ta a. A beisei loh ang thil a thleng ta a nih kha. Thah mai ka duh laiin Teteii erawh chuan,"Amanda hnena engmah a la hrilh loh chuan thah kher a ngai lo. An hriatchhuah phah zawk ang che. Driver khan engkim a la hre ve thei" a ti ta tlat a. A dik bawk si. MAry pawh chuan, "Tuma bulah engmah ka la sawi lo. Amanda chu hrilh ka tum a, mahse, ka be tlang thei lo. ENgmah ka hrilh lo,khawngaihin min that lo hram rawh" tiin min ngen nasa mai a. In hnuaiah chuan kan khung ta rih. A chhan chu chhuah leh vat chi a ni tlat lo a ni. 

Mahse, Amanda khan Remsiama leh a Nunmawia chungchang atangin a chhui tih ka hriat khan kar loah min rawn chhui chhuak dawn tih ka hai ta lo. Phirpui a nei tih a hriat chuan, eng emaw vang pawn min hmuh a duh dawn. Chutiang a thlen loh hram dan ka ngaihtuah leh ta a. Ka che buai vek tawh a ni ber mai. Chutih laiin Marini lah chuan Pu Thawma chu ka thahah ngaiin min rinhlelh thu a lo sawi bawk. Mahse,ani hi chu mualpho a hlauhna hmangin ka hmetmit thei a. Tin, fiahna a nei bik lo bawk a, intibuai tawn tawh lo turin kan inthlah liam a ni ber mai. 

Kawng ka dap ta ngat ngat a. Amanda chu ka hnaih chho ta a. Ani chuan Remsiama'n phirpui a nei tih a lo hre tawh a,a hriat dan erawh ka hre lo. Khami tlai khan a ina luh chilha thah mai kha ka tum a. Chaw a chah lai khan ka zui ruk tlat avangin a tawng hre phain ka awm a. Tichuan, Hmun dang ami chaw chu Sama angin ka va chah ta a. Amanda hnen a thlen hmain ka lo dangchat ta a nih kha. A zanriahah khan Alprozalam ka lei khawl chu ka telh ta teuh a. Ka kutin that lo mah ila he damdawi hian a mut hlentir tho ang ka ti hial nghe nghe. Tirh mai tur ka hre lo va, tin, mi dang ka tir a nih chuan hnuhma ka hnutchhiah ringawt dawn tihna a nia. Keimah ngeiin a kawngka bulah ka va dah a, ka let zui daih. Ka nghak ta ran a. A ei kham tawh awma ka rin hun velah ka han chho leh a, chaw ka dah lai pawh khan kawngka a kalh tawh lo a, A fimkhur tawk lo nge ka han chhoh leh pawh chuan a lo kalh leh lo va, Ka va nangching ta a. Cctv kha ka tihchhiat hman tawh loh vangin ka kutin ka her ta ngawt a nih kha..Amanda chu luhaiin a lo tal buai mek a, ka rilru ka thlak ta thut a. Ani hian HM case a lakna kawngah hian min sawi fihlim thei dawn tih hi..vau ila, HM chu helho thah a ni tihtir ila, kei chu zalen takin ka leng leh thei dawn tihna a nia..chu ka ngaihtuahna chu zuiin Amanda chu ka kuah a, a zawi hniang mai. Corridor-a ka kalpui lai chuan mi ka tawk ang tih ka hlau khawp mai. Zanriah ei hun lai a ni tawh a, a thim thet thet tawh bawk. Miin min lo hmuh chuan a fel lo vang tih hlauin ka mask hren lai chu ka hrentir a, Zu rui buaipui angin ka tawng ta a. Mi pahnih bak ka tawk lo. Pakhat phei chu vai a ni. Ka sawi hmaih chu Mary kan rukbo hnu lawk khan kan teivak reng sia, mi motor hman reng chu tiin Teteii hnenah Siama ralna sum thenkhat kha ka lak chhuahtir a, a hmelhriatte taxi hlui kan leisak ta a, keimah hi a driver angin ka awm zui ta a. Taxi chuan AMamda ka phur hawng ta a ni.

Khatiang kha a nia thil awmdan. Nia, Min sawi fihlim tura ka vauna chu engahmah a ngai lo va, a khawih pawh ka khawih ve deuh. Zanah hian kan chiu mu zel bawk. Mary pawh Amanda ka rukbo tak siah chuan ka chhuahntir leh ngam ta lo va. Tikhan an awmdun a. Au chhuak thei lo tura an ka kan hnawhphui miau vangin thawm an nei thei lo va. Teteii hian inleng a nei ngai bawk si lo. Sama lo kal ni te khan intawng thawm kha kan hre vek..mahse, an pahnih khan ka veng tlat a, eng thawm mah an siam thei lo. Tichuan, zan khat chu Mary khan Amanda chu tlanchhuahtir tumin kan phuarna chu engtin tin emaw phelh a lo tum a, ruahmanna ka nei ta a ni. He nula ruang hian Police ho chu deng ta se, an rilru pawh HM lak atangin a thle sawnin Amanda bo chungchangah pawh rilru an pe vak thei lo ang a tiin. Tangkaina a nei loh mai bakah a chhuah hunah ka tana hlauhawm zel tur a nih vangin ka rekhlum ta a. Mahse, A ruang thehthangna tur ka ngaihtuah chhungin ni khat a liam hman a. A ruang pawh a nam tan deuh nghe nghe kha. Amanda bul maiah a ruang chu ka zalh a, a hrehawm ve khawpin ka ring. Tikhan Phunchawngah ruang chu ka dah ta a nih kha..a bak chu inhriat ang hi a ni mai.." Tlansanga inpuanna chu..

Jerome ding tur chu an lo pawtthu hman a. A thinrim hle tih a mitmeng alh phat phat atang chuan a hriat. Tlansanga'n pu Thawma a thah chhan dik tak chu mak ka ti viau mai kei pawn..

Inthlahrung ru angreng takin ," Anih Lalrema kha le? I that tiraw?" ka lo ti ve a. Tlansanga chuan chiang zeta min rawn melhin," Lalrema kha ni e, Pu Thawma a thih khan a mangang khawp mai a. A za ruai a ni ber. Mahse, chiang takin ka hrilhfiah a, 'I ka i an rualin tualthattua puh theihna che hmanrua i siamsak a ni mai. Police hoin thu an rawn zawh che pawn ka sawi angin i chhang dawn nia. Engmah lungkham suh" tiin ka vau a. A hlauthawng em a, a sawi ngam ka ring lo hrim hrim. Tikhan a ngawi ve ngar ngar, Amanda a bo takah khan a mangang leh ta a, zu a in nasat phah a, kei lahin ka leisak hmiah hmiah mai si. Chaw kawpuar ei loa a han tlan tak tak khan a taksain a zo ta lo va, a thihpui ta a nih kha. Ka hming hi khawiah emaw sawi ri mah se, a chhungte leh thian dangten min hre chuang lo va, ka hlauthawng vak lo. Lalrema lakah kha chuan" a ti ta a.

Amanda chu a thaw halh a. Hahdam hmel zeta thu thain, "Min daikhalh emaw tia hlawhtling inti taka taxi-a min phurh lai khan kei pawn khatiang chen chen min khung bo dawn tih ka hre hauh lo. ..

Aw le, ni e, thiante u, Remsiama bik kha ka chhui fal a, Nunmawia te lamah rinhlelh tur ka hriat loh avangin. Remsiama te chhungkaw boruak tlem azawng ka hre ve a, Siama pa pawh ka bo hma khan ka zuk be nghe nghe. Siama hian phirpui a nei tih a tawng danaah a la hre miah lo tih ka hriat avangin he thil hi a ril deuha ka hriat vangin Sama ngei pawh ka hrilh lo. Siama'n phirpui a nei tih ka hriat dan chu..A nau Valtea khu chuan a u phuba a laksak dawn lo hulhual tih ka hria. A chhan pawh Siama nupui Teteii hian Siama nen an inneih hlimchhawn bawrah Valtea hi a ngaizawng deuh a, khatin lo ner suh..tete, Valtea chuan ngaithei loin A u Siama a hrilh a, Siama lah an nu hian a tithiam khawp mai si a, Valtea zawk chu mawhchhiatin Teteii chu ngaizawng zawkah a puh ta lel a. An chhungkua an buai zo ta a ni. Chuvanga he lama rawn pem chho an ni ta reng a. Chuvang chuan Valtea chuan siama phuba a la lul lo ang. Chuvang chuan Siama hian unau ai pawha unau zawk thian tha a nei em tih ka chhui leh vek a. A phuba la ngam tur khawp thian a nei lo. Ni khat chu ka vanneih asiamin He Tlansanga hi workshop pakhat bula ka din laiin ka hmu ta hlauh mai. Remsiama chiah chiah a ni. Ngaihdan ka nei ta a. Remsiama birth Certificate-a a landanin Civil Hospitala piang a nih angin ka doctor hmelhriatte atangin Siama te pian hun laia an chhinchhiahna ka hmu thei ta a. Remsiama te nu Vanlalsangi khan phir a lo hring ngei a lo nia! Tlansanga chu ka bitum tur a ni tih ka hai ta lo. MAhse, min rukbo a tum hial ang tih kha kei pawn ka ngaihruat lawk thiam bik lo. Khami tlaia ka kawngka bula zanriah a lo dah atang chauh lo kha chuan. Khatiang hunah zanriah ka dawng ngai lo phawt. Tin, Tlansanga fin ziktluak lohna chu a zanriah min rawn pekna man dawng lo va a kal nulh leh zanriah rawn siamtute signature a pawtthla lo kha. Ka hmuh khan dik lo a awm tih ka hre ta nghal a. Zanriah pawh chu tlem chu ka eisak. Ka thihpui khawp ka ei lo vang tih ka ring a, mahse, ka lu kha chu a hai ve deuh. Min rawn nangching ta kha a nia. Khatih lai khan man thei reng ka ni a, mahse, kei pawh ka lo duhám deuh a,a thurualpui hriat ka duh vangin ka zui lui ta kha a nia. Tin, lehlamah hling ta ngawt ila, finfiahna chiang tak ka la kawl hauh lo mai a, Finfiahna hmuh chhuah tumin ka inrukbotir a nih kha. Ka rin loh lutukin A unaupa nupui Teteii hnen min hruai thleng ta a. Hei chuan min thawng ve deuh. Teteii khan a pasal a sûn nasain zangnadawmna boruak vel avangte khan ka lo lainat ve viau kha a nia. Tin,ka beisei loh thil dang ka hmu tel bawk. Mary kha..

Ka nuna ka hriatreng tawh tur leh hmuh leh tawh ka duh ngai loh chu Tlansanga hian ka mithmuh ngeiah a ti a. Ni e, he ramsa tenawm hian Mary kha ka hmuh lai ngeiin saruak ngal ngatin a pawngsual thin. Mipa ai pawha thinlung sak nei tia ka lo inlak khauhna te kha he mihring piangsual hian a hnawtbo vek a ni. Mittui tla zawih zawih chungin Mary hrehawm tuar hmel chu ka thlir thin. Kei pawh min khawih chu a tum ve ngei alawm..mahse, kei chu ka lo inveng thei twh a, thawm a rin dawn vangin a tum lui ta lo. A tirah khan ka tlan chhuak thei mai turah ka ngai a, Tin, ka ina min that tawh lo kha chu min thah a duh bik lo tih ka chiang ve tlat a. Ka rin dan ang ngeiin Home minister thihna chungchang chu Hel pawl pakhat thiltih a nih thu puang chhuak turin min vau ta a. Ka rilru a thlak theih si loh vangin a kut pawh ka tuar ve hlak nghe nghe. Zanah muthilhna damdawia min jection zel vangin Mary nen chuan chet la thei kan ni ngai lo va. Chhuah erawh ka tum ru reng tho. Pawn lam atanga min kalhhnan zel vangin kawngka atang chuan ka chhuak dawn lo tih hriain zawi zawiin thlang lam bang chu ka hnaih thin a. Tawngthei miah lo tura kan hmui a plaster miau vangin Mary nen chuan zaizirin kan inbe thin. Ni khat chu a sawi ang khan Mary chu a tal a tal a, pawngsual zawh hnu khan a lo phuar nghet lo deuh nge a tal chhuak ta mai a. Ka hmui tuamna a rawn hlip vat a.kei chuan,"Min phelh vat la, Tukverh thlang lam atang khuan chhuah dan ka zawng dawn nia.." ka ti a. Hmanhmawh taka min phelh laiin Tlansanga hi a rawn kal ta si a. Ka hmuh lai ngeiin MAry chu a rekhlum ta a ni..(A mittui a khap per sak a..a ngawi dat bawk. Dawhkan hnuai atangin a kut chu ka va hmersak a. Insangmarin..

Mary chu a chhohsan a, A ruang thehthangna tur a ngaihtuah dawn tih ka hria. MAry kha hruai tel ka duh takzet a ni. Mahse, ka thei ta si lo va..kha lai hmunah khan finfiahna ka duh luatah zuk inrukbotir lo ila a thi kher lo maithei asin..(A kun a, a khur ngat ngat. Amanda hi a tap ngai lo asin le..a na hle a niang maw..a inhnit faih a. Kan vaia hmaah mittui luang chungin a nui lui a..a bu nghat a, Ni e, mary kha hmeichhe tha tak a ni lo pawh a ni maithei. Mahse, thinlung a nei a ni. Vawi khat a pawngsual zawha a thiannuin a lo call sek vanga sawifel turin a thiannu a biaktir a, chutah chuan,"Tu emaw tan malsawmna ka ni maithei a ni" a tih kha keimah min sawina a ni tih ka hria..a thilsawi vang khan Tlansanga'n a hnar a hnek thi zawih zawih phah. Mary kha awm ta lo se, kei hi Tlansanga hurherh inhrikthlakna tur ka ni maithei. A tira dangzo mah ila, taksa chak loh nen tlawm hun ka nei maithei . mary khan ka tan a tuar a ni. Chuvang chuan he mihring rapthlak hi khaihlum ngei ni se ka duh a ni. Chumi a thlen theih nan chuan ka theihtawp ka chhuah bawk ang.

Tichuan, Mary thi tawh taksaah khan eng emaw hnutchhiah a ngai tih ka hria a, Zan reiah ka theihtawpa talin Mary ruang bulah chuan ka va tawlh phei thei ta a. Pen ka nei lo, rilru buai takin ka hawi kual a. Light a off vek si a, thla a eng hlauh a, chu chuan tlem a rawn en thei hlauh zawk a. Ka vanneih asiamin perek tuiek tawh, la zum tha tak hi Mary a phuarna thin chair bulah ka dap fuh ta a. Ka kut a phuarna a nghet si, chu perek chu seh kawhin ka kut phah chu ka zuk chhun ta a. 20 mins vel zet ka thisen chhuak tur khan hun ka hmang a ni. Thisen chu a chhuak ta a. Thir zum lai chu thisena zuk chiahin seh kawh chung bawkin chair chawikang chungin Mary ban rawn phar chhuahah chuan in chhiar tawh thu kha ka ziak ta a nih kha..thwm dim ngai bawk, ka taksa chak lo nen. Min phuarna vanga taksa na nen..thawk pawh a har takzet. Darkar thum dawn kha thu tlem ziak tur khan hun ka hmang a ni. A tuka ruang a rawn lak dawn khan a hmu lo nge a hmu ang a,a awmzia a hre lo ka hre lo..engmah a sawi lo. Khami tum kha ka tawngtai nasat ber a ni ngei ang. A tira ka lo inrintawkna leh tumruhna ka lo ring kha ka tisual ve ta tlat si a. Ka bo reiin Mary nunna hialin a tawrh phah ta bawk si a. He thilah hian kei pawh thiam loh chantir theih ka ni. Mahse, risk lain khalai hmunah khan kal ta lo ila, Tlansanga hian Home minister a that ngei tih finfiahna ka nei thei dawn si lo va..Ka hmai hmaah ngei offer chhawp chhuaka Home minister a that tih leh sawi fihlimsak tura min ngenna kha ka tan chuan finfiahna tha tak a tling ta a ni..

Aw le..kha zawng kha a ni. A tawp ber atan Sama awm lo se heng zawng zawng mumang ang lek a ni ngei ang. Sama hian a hna tha takin a thawk a, ani hi Home Minister thattu mantu a ni " a ti nghet ta charh a. Kan thaw huai hlawmin ka hria. 

A behbawm vel chu a sawi pawh ka sawi chak lo. Teteii leh Tlansanga chu central jail lamah an phur thla ta phawt a. Nakinah court-in an chungchang an la rel leh ang chu...Teteii fanu erawh Pu Khuma ten an enkawl zui dawn ta a ni. 

Amanda inhliam neuh neuh leh amah checkup hrim hrim a ngaih vangin Doctor kan va hmu a. Doctor Malsawm a ni nghe nghe. A neawm suah suah hle. Amanda chu a check a, kei erawh chairah ka thu a. 

"Pu Sawm, thla hmasa kha ka period lo va. Damdawi min chawh nghal teh aw. Miss hi ka duh vak lo a" Amanda chuan a ti sar sar a.

"I lo ruak lo te hi a ni lo maw?" Nui huah huah chungin pu Sawma chuan a ti a. Amanda a rawn tho thut, "Sam.." a ti nghek a. Ka va melh hû..

"Test kit va lei rawh..hmanhmawhin" a ti ta. Doctor chuan a lo kawl mai lo nge mawni. Ka chhuak ve vut bawk a, ka va lei a. Ka pek rualin Bathroomah a tlan lut chan chan a. Dr Sawma chuan, "Pa i ni maithei ni" a rawn ti sup lehnghal.

Amanda chu 3 mins hnu velah a rawn chhuak ta a. A hmel lanndan chu ka sawi thiam chiah lo. Test kit chu a lek va a, chaira ka thu chu min rawn bawh titih a, ka mitah chiang zeta melhin ,"Sama , ka rai" a ti ta mai a! Ka hamhaih vek. Minute khat vel kha ka ngawi reng. Ka harh thut a, Doctor a awm ve tih hre miah loin ka pawm thlawp a, Rei vak lo ka virpui. 

"Khaih khaih..fimkhur teh u, a la damsam loh em kha" Pu Sawma chuan a ti a.

Ka thlah a, kan pahnih chuan inmelhin ring zetin kan au rual a, kan va hlim tehreng ēm..vawi tam a sawi thin kha ka bengah a lo ri a. "Sam, fa ka hrinsak thei tawh lo maithei che. Ka nunhlui chu i hriat kha.." a ti thin. Ka pawisa duh ngai lo a nih kha. MAhse, hei vawiinah a rai! A va nuam si em. Amanda in ka fa a pai, Samsona hi pa ka ni ve dawn..ka za ruai a, ka phi cheng bawk ..khawvel hi a nuam thar hle mai a..

A in lam pana kan inkhalh phei laiin, A phone a ri ral ral a. Keiman motor ka khalh zawk a. Muangchangin a la a.

"Hello" 

"Aw le..kan lo kal nghal e" a ti sap a.

"Sam, Inher leh lawk mai ta che. Kan Pu Sailova leh a nupui ruang an hmu tlat mai " A ti ta a. Ka ding hrâwk. Pu Sailova hre lo chu Aizawlah an tamin ka ring lo. Aizawl pa hausa tawntaw leh India ram mi hausa top tenah pawh 7-naa lang pha ngat a ni. Mahse, chu chu ka ngaihtuah ber a ni lo.

"Nau i pai kha..case hi i la dawn lo..a chiang em?" ka ti ta tawl a. Min rawn melh káwk..a nui sak a, "Thla hnih chauh alawm..thla khat pawh hun kan hmang nang.." a ti a. A thinrim hran lo.

"Aih, keiman ka la ang" ka inrin hmain ka ti a.

"I chiang maw?" a ti sap a.

"Aw..i pasal ni mai tur i hnung zui duan duan reng pawh hi a zahthlak ve alawm" ka tih chuan a nui hak hak a..

"A tha alawm..kal rawh le..i assistant ka ni tawh mai aniang chu..Detective Sam, hmalam pan rawh le" a ti fiah kâk a. Kei pawh ka tlan zui ve nghal. Ka inringtawk sawt a, thei ve leh fing ta riauah ka inngai bawk. Amanda puihna tel lo va he case hi ka chingfel anih chuan, zoram khawvel hian, "Sama nupui chu Amanda a nia" an ti tawh ang. Ka hlawhchham erawh chuan, "Amanda pasal chu Samsona" an ti leh thung ang. Hmm..battle ril tak a va ni ëm..ka chak ngei tur a ni..