Amanda 3

BOSS AMANDA (3)

Ziaktu: Toni Râlte

Ka inha sawk sawk a. Ka nu a rawn tho bawk. Ka landan chu dik meuhin a hre lo nge, "Mam, i tha maw? " a ti a. 

"Hmeichhe ruang an chhar" tih chiah ka sawi thei. 

"Amah a ni kher lo ve thei asin. Ti nge i hlauhthawn em em? " a ti sap a. 

"Nu, ka kal aw. " ka lo ti daih. Ka tlan chhuak nghal. Sir Buata chuan an quarterah min lo nghak a. Police motorin kan chhuk ta a. Ka landan avang chu nge, "Sama, eng pawh tawk ila, mipa kan ni alawm tiraw? " a ti dam thlup a. Ka chil ka lem khawlh. Constable pahnih an kal tel ve a, Pakhat zawk chuan, "Boss a ni ang tih ka hlau. A ruang an la khawih che ngam lo va, a hmel an la hmu lo an ti sia" a la rawn ti zui!a bula thuin a nghawk zawk chu ka mitsirin ka hmu reng. Ka khuh vak ringawt. Ka hnuk a ulh miau alawm le. Ka tawng lo tluan thak. Ka rilruin ka tawngtai mawlh mawlh thung. Phunchawng chu kan zu thleng thla a, mi pawh an tei suau suau mai. An hmel a pháwk hru bawk. Ruang an hmuhna chu petrol pump piah lawk side drain-ah a ni. A bawkkhup zawnga muin, Puan hlapin an lo khuh tawh a. Rim a nei tan bawk. Sir chuan puan hlap chu a hlip a, Chu hmeichhia chu a sam a dum hlap a, Amamda pawh a sam a dum. A hleitling viau bawk, kekawr dum tight lek lek a ha a, pheikhawk a bun lo. Tawnzau dum a ha a, a bra hrui lehlam chu a banah a tla liam nghe nghe. A ban dinglam chu a delh a, a veilam erawh a lu chungah a phar a. Sir chu a zâm ve deuh niin ka hria. Kei erawh ka ding khawng reng thung. Zawi muangin glove bun chungin chu hmeichhe ruang chu a zuk kuai zangthal ta a. Thawk pawh thaw tha ngam lo vin ka zuk melh a. Ka thaw hawk. Amanda a ni lo! 

A maimichhing a. Nula hmel tha tak a ni. A hnar ngul a sang vah a. A kamsir veilam erawh a kak nge, a thi khang chu a inhnawh khawm a. A bak hmelhemna dang a nei lo. Rang takin kan en dik ta a. A ban dinglam a delh kan han lak chhuah chuan, . A ban puamah chuan thisen ni ngei hian "G2524BK " tih chauh a inziak! awmzia erawh a nei thui khawp ang le. Chubak engmah a thawmhnaw atang pawn chuan lak chhuah tur a awm lo. Amah hriat theihna tur engmah a awm bawk si lo. Postmortem turin an phur chhuak ta a. A nam hlek tawh a, hnar kan hup far mai. Sir chuan, ", Tu nge ruang hmu hmasa bertu kha le" a ti ta a. 

Hnar ţawk angreng tak, zu in a ei let tawh tih hriat zet, dul kiar, mawng zuih ţut hi a rawn pen chhuak a. Kum 45-50 bawr vel tur a niawm e. A mitmengah pawh a harhfim chiah lo tih a lang reng. 

"Sir, keimah ka nia" a ti chhar chhar a. Ruang hmutu a ni chu intithei hmel a pu lek lek mai. 

"Engtin nge i hmuh dan han sawi teh le? " zaidawh zetin Sir chuan a ti a. 

"Aw nia, Sir, frank deuhin ka sawi mai ang.. " an ti phawt a. A meizial chu a'n fawp leh káwk a. "Saw lai saw kan in a nia" tiin in lo hnai ber chu a kawk a. 

"Thil an rawn lam a. Saw laiah sawn kan thukru thin a. Ka va la dawn a, chuan, ka hmu ta mai a ni. Mahse, Sir, dar 9 velah pawh khan ka va la reng a, a la awm miah lo. " a ti ta a. Nula ruang awmna bul maiah zu an thukru tihna a nih chu. 

"Sir, min mansak lo hram r'u aw" a la ti zui a. Sir pawh a khi ve suk. 

"I va hmuh hun chu dar engzat vel nge? " a ti a. 

"Dar 11 leh minute 10 vel a ni maithei. A zo laklawh sia, ka mu tawh kan nuin min rawn kai tho a, phun nuah nuah chungin alawm ka kal" a ti a. Dar 9 bawr velah pawh a la hmuh loh chuan, dar 10 leh 11 inkar velah kha hmeichhe ruang kha an dah tih a lang reng. Sir Buata ho chuan Petrol pump-a thawk te chu kan han bekbawr a. Engmah an hre ve lo. Kha ruang hmutu Pu Taia au thawm vanga va phei ve mai an nih thu an sawi a. 

"A nih Dar 10 leh 11 inkar velah khan motor ding a awm em? He lai hnaiah" Sir chuan a ti a. 

"Ding hi chu an awm zut reng a. Ngaihbel theih tur chuan chung lai bawrah chuan Bolero chu a ding zawk tak e. Mahse, kan lo chîk bik si lo va" pakhat chuan a lo ti a. Tihtheih vak a awm lo khawp mai. Hmeichhia lah tu nge a nih hria an awm si lo. Kan haw chho ta a, Amanda ruang a nih loh vang khan ka harh ta sawt a, Zep thu a cheng lo. Ka lawm a ni. Mahse, lawm anga lan erawh ka duh bik lo. Station atangin ka bike nen ka tlan haw ta vang vang a. Mut erawh ka mu tui lo. Ka vei luat vang nge, Amanda ka lo hmu nasa a. Ramhnuaiah thing lianpui rinchhanin an lo phuar bet a, a thawmhnaw te chu a lo ţet hrip hrep a, va pan ka tum chu, "Sam, lo kal suh. Thih i duh loh chuan" ti hian a rawn au tuar a. Ka harh zui nghal. Thlanin min lo bual huh vek mai. Ka thu chhuak a, tui ka in khawlh khawlh a. Ka thinphu a rang kher mai. Mangannain a vawrtawp a thleng a ni ber e. 

A tukah phak zetin ka tho a. Chaw ka ei tlem thei si, ka nu chuan min ngaihtuah deuh a niang. "Mama, kha bawngsa tui háng kha hawp teuh teh.. Chak taka i awm a ngai ka tih kha" a ti mawlh mawlh a. Ka nu hlutzia ka hrechiang kher mai. Ni e, ka bialnu chhanchhuak tur hian ka chak a ngai a ni. Taksa hrisel ka neih loh chuan ka rilru pawh duh angin ka hmang thei dawn lo. Ka theih ang angin soup chu ka hawp a. Ka chak sawta ka hriat chu. Vawiin chu Pu Khuma min pek, Remsiama nu te inah khan ka va kal dawn a ni. Hmeichhe ruang lam kha chu ka ngaihven hman rih lo, tuin nge a case la dawn tih pawh ka hre lo. A aia pawimawh ka nei tlat si a.

Khatla chu ka thleng phei a, khatla south lamah tlanin, step thui vak lo ka zawh hnuah Hrangchhunga tih inziak kalh lam chu panin, kawngka chu ka kik ta dat dat a. "Aw, lo nghak lawk" in chhung atangin a rawn ti lang lang a. Reiloteah a rawn hawng ta a. Civil dress-in ka kal bawk a, min hmuh chuan min hre ngai si lo chu mak a ti deuh nge, "Eng nge ni ta? Lo lut rawh" a ti a. Ka rin danin Remsiama nu nutapa nupui a nih hmel. A sam a tawi a, a kir bawk. Tarmit a vuah bawk a, nu lian lam, hmel hriam lam leh nelawm vak lo a ni. Kan inzui lut a. An in chu a lian vak lo. An chep mah mah niin ka hria. Thu rawh min tih hmain ka thu leh hmiah. Polite hi a har ve a nih hi a. 

"Ka pi, hei hi Pu Hrangchhunga fapa Lalrinawma chenna in a ni tiraw? " ka ti te te a. 

"Aw ni e, Rinawma nupui chu ka nia" a tih takah chuan, ka kal dik tih ka hre ta a. 

"Englo a nia, ka pi, Inpa chu a awm em le? " ka ti a. 

"Awm lo, a chhuak a. Eng lam nge ni ta? " a ti ta a. 

"A pawi lo, nangmah i awm tho a. Ka pi, hetah hian thu pawimawh deuh hriat duhin ka lo kal a ni. Hun i neih chuan ka lawm ngawt ang" ka ti a. Ka ep chiahah chuan a thu ve a. 

"Aw.. Ka hman tho alawm. Eng thu pawimawh nge ni ta le? " a ti a. Tlemin a hmel hmuh pawh a nuam ta deuh. Kei chuan a ngaite ang bawkin, Home minister bo atanga Lalremsiama thih dan chu a tul ka tih chin ka hrilh phawt a. A hrethiam chiah lo tih a lang reng mai. 

"Ka pi, Remsiama chu i hre hrim hrim em? " ka ti a. 

"Hria e, Kan pa u fapa a nia lawm" a ti ve mai a. Risk la takmeuhin, "A nih Remsiama phirpui kha khawiah nge a awm tak? " ka ti ta a. Chuta a mitmeng danglam nasatzia chu aw..! 

"Eng.. Eng thu nge i sawi? " a ti bah nuaih a. 

"Remsiama phirpui Tlansanga kha mawle" ka ti leh ta zel a. A chil a lem khawlh ringawt. 

"Engtin nge i hriat? " a ti ta daih a. 

"Ka hre ve tawp mai.. Ka hriat dan kha chu a pawimawh lo. Khawiah nge Tlansanga hi a awm ka hre duh a ni" ka ti a. 

"Ka hre lo. Kan hre lo. Aww.. He nauin min tihmanganzia hi e.. Tunah te hian khawiah nge a awm ang le? Kan hre lo tak tak a ni" a ti ta mawlh mawlh a. Mak ka ti hle. Mahse, ka kawng thlan chu kawng dik a nih rinna ka nei lian ta hle thung. Remsiama chuan phirpui a lo nei ngei a nih chu! Engtin nge Amanda khan a lo chhui chhuah leh hman bik le?! 

"Ka pi, a bul atangin khawngaihin min hrilh teh, Tlansanga pawh kan zawn hmuh phah thei a nia. Engvangin nge Remsiama'n phirpui a nei tih kha inzêp tlat? A pa te pawn an hre miah lo a nia. Chuan, Tlansanga chu engtik atangin inhmuh tawh loh tihte? " ka ti ta mawlh mawlh a. Tuisik a in te te a. Chutah thu thain, "Ni e, kan zêp chhan hi chu keima mualphona tur a ni tlat a tin ni. 

I hriat angin Siama nu Masangi kha an inthen hnuah a rai tih kan hre ta chauh a. Khatih lai khan Rinawma nen kum 2 kan innei tawh a. Fa kan nei thei lo renh reng a, Ka pa Hrangchhunga, Rinawma pa khan tupa a awt em em a. A chhan pawh Rinawma u mipa hian hmeichhia vek a nei a, Rinawma te nau ber mipa lah a boral ta hlauh si a. "Ka chi chhawmnung zel tur mipa fa ka duh a ni" a ti thin a. Keini lah chuan fa kan pai thei si lo. Mahse, Masangi rawn hawn hma khan vanneihthlak takin ka rai ve ta hlauh mai a. Keimahni ai mahin ka nu leh pate kha an lawm zawk awm e. Mahse, Masangi rawn hawn hnu lawk khan ka chhiat ta mai a. Chhunah a ni a, thisen a put ta vak a. A rukin kan pa ka bia a, kan mangang dun em em a. Ka pa rilru na lutuk tur leh a thinrim dan tur thlengin kan ngaihtuah a, Masangi hian a lo hawn tirh khan nau a pai thu hi a rukin min hrilh tawh a. Tichuan, kan pa nen Masangi chu kan be ta a. "I pai lai hi min pe hram mai rawh. Nang pawn pasal te i la duh ve ang a" tiin. A lo phal bik si lo. Tichuan, rilru hrehawm takin kan awm a. Mahse, a tuka Masangi va incheckup lo haw chuan, "Ka u, phir ka pai tih an sawi a. Ka lainat takzet che u a.. Hrisel taka an piang chhuak a nih chuan, pakhat zawk chu ka pe ang che u" a ti ta a. Ka lawmzia kha aw. Tichuan, rai ang chuan ka lang der ve ta zel a. Masangi'n nau a hring ta a. Ka pa te sumdawnna a tlakchhiat thut lai kha a nia, ka pa zin bo lai a ni bawk a. Mahse, Pu Khuma te lam khan naute chu an rawn beisei ve tlat mai a. Kei chuan ka chanpual tur ti tawh mai ang. Tlansanga zawk chu ka pawm tawh a. Ka pa te bulah chuan, phir a hring tih kan sawi lo hrim hrim. Kan nupa vekin Masangi kha kan buaipui a ni bawk a. An unau te pawn an hre bik lo. Kar khat hnu velah tih takzetin Pu Khuma te khan an rawn dil ta si a, Ka pa khan, "Kan sumdawnna a tla chhe ta si a, hei i naute lahin fa an nei ve bawk si, enkawltir rih mai ta che. Kan leikan deuh hunah kan la leh dawn nia" tiin Masangi kha a ngen ta a. Hrehawm leh rilru na deuhin a pasal hlui kutah chuan Remsiama kha a hlan ta a ni. Keiin Siama unau ka pawm chu min chuh an tum thut thut a. Mahse, "In khatah kan cheng ho tho alawm.. " tiin kan hneh a. Amah vekin ka pa te hriat lohin hnute pawh a pe thin. Tikhan kan intawm ta a ni mai. Mahse, Tlansanga chu ka ta neih bik a, ka hmangaih em em bawk. A pu pwn a duat khawp mai. A rawn thanglian zel a, "Anu" tia a koh chu keimah ka ni. A nu dik tak zawk erawh 'Ani' tiin a ko ta a. Masangi rilru kha a na thin tih ka hre reng, nuam lo pawh ka ti. Mahse, ka pe phal bik si lo. 

Vanneihthlak takin Masangi chuan rimtu a nei leh ta a. Ka pa ten an nawr ve deuh bawk a, a mipa lah khan a duh ve bawk nen.. An innei ta a. Ka thawveng huai mai. Fa erawh an nei ta lo. A pasal neih hi Pu khuma te lam chuan an hre kher lo vang. Ka nu leh pa te an boral a, Tlansanga pawh a rawn lian ve zel a. Kan duat sual titih ta a. Mahse, pawi kan ti lo. Mahse, kan pa hian, "Ani ringawt chu eng emaw thleng se thla a phang duh em mai" tiin fa lák a rawt ta a. Sanga farnu atan hmeichhe naupang kan la ta a. A tawi zawngin Masangi a boral khan Sanga hian thudik a hre chhuak ta tlat mai a. Masangi diary a lo chhiar chu niin.. Thil a pawi chho tan ta a. Keini nupa chu, "Ka nu lak atangin min ru bo a, ka nu kha min ngai leh min thlahlel reng rengin a thi a ni. Nangni hian inthat a ni" te a ti thin a. 

Theibtawpa hrilhfiah tum pawn a ngaithla duh ta lo va. Ruihhlo lamah a tlan ta a. A unaupa zawn chhuah a tum thu te a sawi thin. Thil a buai zual vek dawn tih a pa nen kan hrilh chamchi a. A chang chuan a tha riau zel a, a changin a sual leh em em a. Mangang leh thlamuang lo reng rengin min siam ta a ni. Tichuan, a nauin pasal a nei a, an pa he lamah hna a thawh bawk avangin kan bulah an khawsa zui ve ta a. Sanga chuan, hnawk a intiin leng lo angah te a inngai a. Zan riah bo te a ching chho ta a ni. Tichuan, Siama a thih khan thinrim em emin a inhrosa a. "Ka unaupa chunga hetiang titu hi ka zawng chhuak ang a, ka that ve ngei ang" tih ţan khan a ţang a. Kan ngen nasat em vangin A pa Pu Khuma te bulah erawh a la kal lo niin ka hria. Chutiang chu thil awmdan a ni e. Kar 3 liamta khan in atangin a chhuak a. Mahse, vawi 3 vel chu a rawn haw ve. Riah erawh a riak ngai lo.. Tihian kan tha en tawp mai a ni" a ti ta a. Ka kalna apiangah thawnthu danglam tak ka hre zel chu a nih hi a.. 

"Khawiah nge a chen ang? Han rin deuhte i nei em? " ka ti a. 

A ngawi dat a. "Rin dan neih thiam a har ve a. Mahse, a thian kawm ve ber Zoa hian, "Ngaihtuah lutuk suh u. A bialnute inah a riak aniang. A bialnu hi nuthlawi a nia" a ti mai zel a. Mahse, tu nge a nih pawh kan hre chuang lo.. " a ti a. 

"A rawn haw zeuh zeuh chang chuan eng emaw sawi a nei thin em? " ka ti a. 

"Nei lem lo. Pawisa pawh min dil chuang lo. 'Ka rawn tlawh lawk che u. In dam tha a. A tha.. Engkim a tha tep e" a ti ringawt a. Engmah a awmzia kan hre ve si lo va" a ti a. 

"A nih ka pi, Home minister thih hma khan nge thih hnuah in a chhuahsan? " ka tih chuan min rawn melh kâwk a. 

"Chu! Ka fapa chu tualthattua puh i tum elo! " a ti ta mai a. 

"Ni lo e, ka hre duh lawk mai mai, khawngaihin min hrilh teh" ka ti a. 

"A chhuak tawh. Pu Thawma thih kha chuan" a ti ve leh ta mai a. 

"A bialnu chu a veng hming takngial pawh inhre lo a maw? " ka tih chuan, "Zoa khan a sawi a, ka chiang ta hauh lo. Zoa zawt mai rawh" a ti ta a. Zoa number chu min pe zui ve bawk. Ka hriat duh ang chu hre kim thawkhatin ka inhre bawk a. Ka chhuahsan ta a. 

Tlansanga chu a ni ka umzui tur chu..! 

Mahse, khaw nge a awm tak ang? A thianpa Zoa chu Station phei hmaa biak law law ka duh vangin ka call ta a. 

"Hello" a rawn ti puam ţalh a. 

"Hello, Zoa i ni em aw? " ka ti a. 

"Aw ni e, eng nge ni ta? Tu nge aw? " a rawn ti a. 

"Samsona ka nia, Amanda Assistant kha.. " ka ti ta mai. Amanda vang hian mi hian min hre zawk miau a. 

"E aw, ka hria che lawm. Eng nge ni ta? " a rawn ti ve mai a. Mipa fel tak niin ka hria. 

"I thianpa Tlansanga chungchangah biak che ka duh a, khawiah nge i awm le? Ka rawn hmu lawk thei che ang em? " ka ti a. 

"Tunah chuan workshop-ah ka awm a. RTS workshop, Khata-ah" a ti a. Rts chu hmana ka bike pawh ka siamtirna kha a lo ni hlauh mai a. Vannei ka inti hle mai. "Aw le, ka rawn hmu lawk ang che aw. Ka rawn kal nghal" ka ti a. Ka tlan chhuak zui nghal. 

Zoa chu lubuk deuh, hmel bumro lam, thianghlimna ngaipawimawh tehchiam lo tih mai theih tur ang chi kha a ni a. Kan inrual vel mai thei. An workshop piah waiting shed-ah chuan kan phei dun a. Thil chu a hrethiam vak lo niin ka hria. 

"Sanga chuan pawi a khawih em ni? " a ti ta chiah a. 

"Khawih lo ve. Mahse, eng emaw thilah hmuha biak a ngai a. A awmna a chhungten an hre si lo va. Nang a thianpa ber hian i hriat an ring deuh a mawle" ka ti a. 

"Ka hre bik miah lo. Kan inbiak lohna pawh kar hnih vel lai a ni tawh. Ka call tlang thei tawh miah lo va. A bialnu kha a luhkhung ni turah ka ngai deuh ringawt" a ti bawrh bawrh a. 

"Chu chu a nia, a bialnu address chu i hre ve ngeiin ka ring a" ka tih mek laiin, "Ka hre miah lo. Sanga khan a sawi duh ngai lo va, chu chu nia kei pawn mak ka tih thin ni" a ti ta mai a. Ka hnual rawih mai. 

"Mahse, nuthlawi a nih thu chu i hria ni lawm ni? " ka ti a. 

"Umm, vawikhat kan ruih laiin a tum loh deuhin a sawi chhuak alawm.. " a ti mai a. 

"Chu! A bialnu chu a thiante pawn inhriatpui a duh vak lo tihna ni maw? " ka ti a. 

"A niang.. A hmaa a bialnute chu kan hriatpui ve vek. Tuna a kawp tak hi a thup tlat a. Nuthlawi a ni tih chiah kan hria.. " a ti a. 

"A nih in inbiak hnuhnunberin eng nge a sawi i la hre thei em? " ka ti a. 

"Hei, kan nu bulah ka awm a. Ka chhungte kha lo hrilhfiah rawh.. Ka tha a nia, a rawn tia.. A bak a sawi vak lo" a ti a. 

Zawi sup hian, "A nih Zoa, A bialnu bula a awm hma vel khan a awmdanah danglam eng emaw han ngaihbel theih tur awmin i hria em? " ka ti ta a. Zoa chu ka en ngun kher mai. 

A ngawi vang vang a, a chhui let ve niin ka hria. 

"Chutia han sawi chuan, danglam deuh chu a awmin ka hria, A kal bo hma khan vei ruk nei niawm deuh chuan a awm thin. Biak pawh a hre lo fo zel. Tin, zanah hian kan leng kan hawn hnu hian a lo chhuak leh ziah nge, anu mangang hian min lo be thin bawk" a ti ta a. 

"A lawmawm hle mai. Kawm i nuam khawp mai. Ka la rawn be leh ang che. Tin, Khawngaihin Sanga'n a rawn biak che chuan min lo hrilh ve hram dawn nia aw" ka ti a. Min melh vang vang a, "Amanda bo vang em ni Sanga chu i chhui? " a ti ta sup a. Ka phâwk deuh. 

"Ka hre lo. Thil hi a kal kual tam tawh lutuk a ni" ka ti ta ringawt. 

"Amanda hi damin hmu leh ula ka duh khawp mai. A fans ruhkawl ka ni ve a. Sanga chungchangah chuan ni e, ka lo hrilh ang che. Tin, ka thianpa ka phatsanna lam leh ka rinhlelhna lam ni lo se, Home Minister thihna a chhui tan lai khan Sanga khan Amanda hi a ngaihven thar khawp mai. "Chhui chhuak se ka va duh em" a ti thin a. Ni danga a case lak a ngaihven ngai vak loh nen.. Chungte chu i beng hawlh zawng a nih takin ka sawi mai mai" a ti ta sur sur a. Awmzia zawng a nei tehmeuh mai. 

"Fimkhur rawh aw.. Chuan, chanchin chu ngei ngeiin aw" tia inchahin ka kalsan ta a. 

Station ka thlen chuan, thiante chuan Nula ruang an chhar kha, Chhungte nei lo ti mai ang, a thiannu nen in luaha khawsa, KS an tih ang chi kha a nih thu min lo hrilh ve a. A thiannu sawi hmangin, "Kar hnih dawn a rawn haw tawh lo va, mahse, a zin thu a rawn sawi a, A zinna hmun erawh a sawi duh tlat lo thung. Ni 2 kal ta khan kan inbe thei ta lo va, ngaihthat lohna pawh ka neih loh laiin ruang chhar tih thawm ka hriat khan, a taksa lan dan leh pianphung velah ngaihthat lohna ka neih vangin ka rawn kal ta a ni" a ti. A thiannu a lo ni ngei a. Mitthi hming chu Mary a ni. An khaw lama thawn dawn pawn chhungte mumal sawi tur a nei si lo va, an in luahna vengah an phum ta ngawt a niawm e. Kan case kal lai nen inzawmna a neih ka rin lem loh vangin ka bengkhawn vak lo va, mahse, a thiannu thusawi, an sawi chhawn leh tak, "Mary nen kan inbiak hnuhnun ber ka ngaihtuah khan a ţap niin ka hria a, a zu rui hi a tap vak zel a, mahse, khami zan kha chuan, 'Thiannu, rawn haw tur pawh ka awm lo maithei. Sual hle mah ila, tu emaw tan chuan malsawmna ka ni ve thei maithei' a ti a. A awmzia ka hriatthiam hmain a dah ta daih a. Ka call lehin a tlang thei tawh si lo va" a tih chuan eng emaw ti zawngin ka rilru a kaihruai ta deuh. Mahse, suihzawm chat dan turah ka la buai tho. Mary thiannu Dami address chu ka la ta tho a. IO roomah lutin chair-ah ka thu vang vang a. Eng nge ka tih leh hmasak ber ang tih ka ngaihtuah. Ka bangbo angreng viau mai. 

Tlansanga bialnu chu hre thei ngat ila, meichher ka nei ni mai tur.. Nuthlawi lah Aizawl khawpuiah ringawt pawh an tam nasa si. Mahse, a bialnu bula chu chen chen a awm theih chuan a bialnu chu amaha awm a nih rinna ka nei. Remsiama chhungte leh a nupuite inkara thuthang eng emaw awm kha chu pawimawhna a neia ka rin tak loh vangin ka ngaihven ta lo law law. Teteii kha an sawi ang tak tak a nih chuan, a pasal chhungte lak atanga inlak hranna hmanrua atan khatiang thu kha a vawrhdarh ve thei bawk. Kha zawng an buaina ani. Kan case kal lai nen inzawmna a nei lo. 

"Sama, tu emawin a hmu duh che" Rsa'n a rawn tih chuan ka phu zuk. 

Ka va chhuak a, Pu Thawmliana fapa Jerome a ni! Kan office lamah ka luhpui a. Ka chairah ka thu a, ka bul chiah chair erawh a ruak ta. A bo atang khan kan office hi vawi khat chiah ka la lut. Hrehawm ka ti zel a, IO rooma hun hman ka duh zawk thin. 

"Teh hlawl che chuan.. A pawimawh viau a niang maw? " ka ti a. 

"Umm pawimawh tlatin ka hria a ni. " a tih takah chuan ka phur nasa mai a. 

"Han sawi teh" ka ti vat a. 

A thut dan a siamrem a. 

"Ka pa bialnu kha ka va chhui ve a. A rukin. Nangmahni ka rin zawh loh vang che u pawh ni loin.. A chhan chu ka pa note book pakhat, thil a chhinchhiahna ka hmuh chhuah thar leh vang a nia. Chutah chuan, a bialnu Marini hnena sum a thawn tawh loh thu a chuang tlat a ni. Kha i duh leh chhiar ve rawh" tih pahin note chu min rawn pe a. Ka lo en ve vat. 

"July thla atang hian Marini hnena ka sum pek a tawp ta.. Ka fanu erawh engpawh tawk se ka thlauhthla lo vang. " tih a lo inziak kulh mai. A bak engmah a inziak lo. 

Note book pek let pah chuan, "Chuan? " ka ti satliah a. 

"Marini khan mipa dang a kawp a ni. Mahse, ka pa hnen atanga sum a dawn tawh loh takah chuan ka pa kha a that ve thei ka tih tawh kha" a ti a. 

"Mahse, Ani hmeichhia khan a that ngam dawn em ni? Ka va hmuh pawh khan mi tha tak niin ka hria, mahse, dawt chu min lo hrilh tihna anih dawn kha" ka ti ve mai a.  

A chil a lem khawlh a. 

"Kei chuan he nu hi ka ringhlel tlat a ni. A chhan ka hre bik lo. Khawngaihin min enzui sak thei ula ka lawm ngawt ang" a ti a. 

"Amanda a bo tih chu i hria ang a, ni e, i pa case kha a la a. Ani ber a awm loh chuan kan tan kawng a ping titih ta ringawt mai si a, mahse, Marini chu ka lo enthla ve dawn nia" ka ti ta ringawt a. 

"Ni e, Amanda bo chhan hi ka pa case a lak vang a nih i ring em? " a ti zawi sup a. 

"Ka ring a, mahse, a tawp kan la thleng thei lo chu a nih si hi" ka ti a. A bu ve nghut ringawt. Rei awm loin min chhuahsan a. Tunah hmanraw thar kan nei leh ta phawt chu a nia. Pu Thawmliana bialnu Marini'n dawt min hrilh a, pawisa a dawn lohna thla thum a ni tawh. A ac kha kan check ta lo va, kan buai deuh avang khan. Engvangin nge dawt min hrilh ang? Bialpa chu a nei tak tak em ni ang? An thenawm nula kha chuan a lerh lo viau khan a sawi si a. Marini pawh chu enzui deuh a ngai dawnin ka hria. Target mumal tak erawh ka neih a ngaiin ka hria. 

A hmasa berah chuan Tlansanga zawnchhuah.. Amah kan zawn hmuh theih loh pawn a bialnu tal hriat a ni mai. Chu lah kawng a ping takzet si. Nge ni a.. Marini zawk hi ka va thlithlai phawt zawk ang aw.. Mary thiannu Dami thusawi kha ka hrechhuak zawk a. Chutah Mary kekawr ipte atanga lehkhathem kha ka hrechhuak ta phut bawk. Ka tho vat a. IO roomah lutin Sir Buatsaiha ka va hmu a. 

"Sir, Mary ban puama thil inziak kha a thlalak ka va en duh ve" ka ti a. 

Thlalak chu min rawn pe a. Ka thlek ngun kher mai. Hmanhmawh taka ziah niin a lang a, pentuisen ni loin thisen hmanga ziah niin a lang, a chhan chu a pherh bakah a fiah tawh lo hle bawk. Engvangin nge Mary banah a awm ang? He thu inziak hi code a ni thei ang em? Phatsantu han tih hian min tibuai zual. Mary khan tu nge a phatsan ang tih ka hre hauh si lo. Amanda bona nen inzawmna neihtir hram dan ka zawng a ni. Turtu ka nei tlat. Ka note-ah ka la kai a. Chawhnu pum maiin chu thuziak G2524BK tih ngawt chu ka buaipui ta a. A sáwt miah lo a nih phei chuan ka thinrim ngawt ang le. Chu code chu a mal tetein ka han rem a. G chu eng sawina nge ni ang? Kan case chhui tawh dan zawng zawng ka chhuikir a, hetiang code hmanga inbiakna ang hi a la tam vak lo. A tawpah Home minister thihnaah ka sawrbing a. Pu Thawmliana Bible kara lehkhathem kha code anga ngaih theih ve tur a ni a, khata tang khan ka ngaihtuah a, G chu Bible bu hming G atanga inţan ni turah ka ngai a. Genesi leh Galatia chiah G atanga intan a awm. Bible ka keu ta sawt sawt a. Genesis ka keu nghal chawt a. Number kha ka en leh phawt. 2524 tih chu a phek zat sawi tumna em ni ang tiin Ka keu a. Mahse, Holy Bible-ah phek 2524 a awm lo. Thuthlung thar chinah phek thar a intan daih si a. A nih chuan, number chu thensawm ta chhin i la.. 25 leh 24 chu ka dah hrang ta a. Bung 25:24 tihna a ni thei ang em? Ka keu ta phawt. Chhei le! "Tin, a nau hrin a hun chuan ngaiteh, a chhulah chuan phìr an lo awm a" tih a lo inziak nia. Genesis 25:24-ah ngei mai chuan. Rinhlelh thu hlaah Galatia chu ka keu ve tho a, mahse, Bung 25 a awm lo. Genesis atanga ka hmuh chuan Tlansanga a kawk ka ti lo thei lo. BK ve hi le? Eng nge a awmzia ni ta ang le? Bible bu atang thoa ngaihtuah tur a ni ang em? Bible bu hmingah B atanga intan ka hmu zo si lo. BK hi 'Bible keu rawh" a tihna mai em ni ang? Mahse, chumi ni lo awmzia a neih ka beisei tlat bawk si. He code hi Amanda ziah ni ta se, Phir chungchang chauh lo pawh min hrilh a tum ngei tur a ni. Chu chu eng nge ni ta ang? Ka bih ngur ngur laiin Canteen-a thawk Siamteii'n thingpui min rawn pe a. Siamteii hi la naupang mah se, fiam a dawl a, kan fiam nasa thin. Amah lah a nui duh si. Ka hmel ngui tak leh Amanda bo dan te a ngaihtuah ve nge, "U Sam, ka khawngaih che e" a ti zawi sap a. Ka nuih lui ringawt. 

"Siamte, nang nulaah tukverh kha min lo kharsak lawk mai" ka ti a. Khar tura a kal mek laiin a phone a ri a, "Aw hello" a ti a. 

Lehlam tawng ka hre lo. 

"Aw, Nia, Bawngkawnah lo dah mai r'u, Bethesda Hospital chhakah khan.. Aw le. " a tih lai mek chuan BK chu ka zuk melh leh kher a. Amanda hian a awmna veng hming min hrilh tum ta se. Ka tho uaih. Mahse, ka thu leh vat. Ka tha a khur der derin ka hria. BK chu Bawngkawn tihna angah ngai chhin teh ang. BK tih lam tawia dah theih tur Aizawlah veng dang a awmin ka hre lo. Ka ngaihtuah hman lo a ni ber zawk e. Siamteii chhuak tur chu, "Siamte, ka lawm e aw" ka ti a. A ngaihna hre mang lo zetin a bu ve nghat ringawt. 

Amanda thu thawn a ni emaw ni lo emaw he thil bak hi bawhzui tur neiin ka inhre leh ta lo va. Marini va thlithlai pawh a hun ka sawn ta rih mai. Bawngkawn ka hriat chhuah rualin Remsiama te veng a ni tih leh a nupui leh a fanu te chu an in fâl ve takah an khawsa tih ka hre chhuak nghal bawk. Tin, Phir chungchang Bible-a ka hmuh ang khan, Tlansanga a inrawlh tih pawh ka hre thei mai. Ka beisei ang hi thleng dik lul teh se. 

Ka nuin Bazarah a thil chah lamsak nghal tura min tih vangin ka zuk teithla a, A thil chah keng chunga ka let chhoh lamah Pu Thawmliana thih zana gate vengtu Rama kha ka hmu nawlh mai. Hnathawh thawmhnaw nen, hnam nen a nih vangin mutia a ni tih a hriat reng. Ka lainat angreng hle. Ani pawn min lo la hria a ni ngei ang. Min lo nuih ve a. Ka kalpel thei ta lo va, "I dam maw? " ka ti khawmawi a. 

"Umm dam ve tawk tawk e. Hei ka mutia kual ta vel mai mai a nih hi" holam deuh taka sawi tum nia lang siin a rilru chhungril tak a na tih ka feelpui thiam tlat. 

"A zia lo khawp mai. An ban ta nge nge che ni maw? " ka ti a. 

"Home minister kher ni lo se chuan min ban bik kher lo maithei a ni.. Taka! Amanda bo thu te kha ka lo hre ve a" a ti a. Ka nui tawi tak a. "Ni e" ka ti ringawt. 

"A pawi em mai. E chuan, ka thianpa Lalrema pawh kha nimin piah khan a boral asin" a tih chuan ka beng a verh ta zak mai. 

"Ehe! A va zia lo em! Eng nge a thih chhan? " ka ti vat a. 

"A zu chhe in mawle. Zu a tlan ve malh malh lutuk a, a taksain a zo ta lo a nih kha.. A luak vak a, damdawiin an thlenpui hmain a kal ta mai anih kha. A pawi khawp mai" a ti a. Zu chhe in, zu chhia vanga thi..! Thil pangngai tak anga lang siin, awmzia neihtir phet ka tum thung. 

"Nang pawn nghei daih rawh. Chuan, ka kalsan ang che. Kan inhmu leh dawn nia" ka ti a. Ka kalsan ta a. Lalrema khan pawimawhna a nei lutuk lo maithei, mahse, khami zan ber khera a thianpa, duty lai lehnghal zu inpui tura a sawm khan chhan a nei ve maithei. Kan bulah kha chuan, "Ka in chak tawh sia, mi dang sawm tur ka hre lo va" kha a ti mai tak naa, a phenah tu emaw a awm maithei asin. 

Zanriah ei laiin, "Zanin chu ka chhuak dawn a, kawngka inkalh dawn nia. Ka tlaivar maithei" ka ti a. 

Ka nu chuan, "Fimkhur rawh aw.. Amanda chungchang em ni! " a ti sap a. 

"Ka la hre lo. Risk ka la dawn" ka ti tawp. Sawi fiah vak kha ka peih rih lo. Tlaivar ka inrin deuh vangin chaw pawh chák vak lo chungin ka ei lui hram hram a. Tlaivar hi chuan ril a tam ve duh em a. Dar 8 velah ka insiam zo a. Silai pawh hman a ngaih thutah tiin ka pai bawk. Rilru tawngtai ru mawlh mawlh chungin ka tum ram lam chu ka pan ta a. Mask ka hreng bawk a, tu'n min hre vak lo turah ka ngai. Ka bike chu kawngpuiah dahin Remsiama in lam chu kein ka pan ta a. A mawng ve angreng sia, a hahthlak lek lek. Chhum a zing deuh a, tin, tlaiah khan ruah tlem a tla a, chu chuam boruak pawh a tivawt deuh. Mi ka tawk tam lo. Khaw nawm loh deuh vang nge chhuakvak an awm mang lo. Ka lawm daih zawk. Remsiama nupui chenna chu ka thleng ta a. An inkhar thap mai. Khawiah nge ka biruk ang aw tih ka ngaihtuah vang vang a ka hawi nasa bawk. An in veilamah chuan in rel, rei tawh hmel zet a awm a. Hnimin a bawh khat luai tawh nghe nghe. Chu lai hmun atang chuan an in chu a lang chiang deuh ang tiin ka chhuk thla a. Hnimhnah zâm karah chuan rem vak loin ka thu a. Ka awmna atang hian an in chu pen 50 bawr vel a nih hmel. Tin, Teteii te chuan in hnuai an lo siam ve reng a lo nia. Mahse, a thim khap danah eng emaw hnawmhnawk vel dah nan an hmang a nih ka ring. Ka thu ta ngat ngat mai, thla chu chhumin a hliah deuh a, mahse, pawi ka ti vak lo. Min rawn hmuh hlauh chuan engkim a pawi thei tlat. Meizial ka zu chák ngang mai. Meizu mi chuan inhrethiamin ka ring. Ka zu tawp mai dawn mawni te ka han ti thut thut a, mahse, a ling an hmuh vaih chuan ka chesual thei si. Insum a har thlawt. Kuhva ka ei sek ringawt. Dar 10 a pel tawh a. Thawm engmah a la awm lo. Ka va zung a, ka thu leh chiah tihin,. An fanu te kha a ni ngei a, a rawn ţap ta hawm hawm a. A ţap uar em em mai lehnghal a. A nuin, vin zet hian, "Ţap suh. Bang rawh ka tih chu.. Ka velh belhchhah dawn che mawni le" a ti ţhak ţhak a. A ţap chu a bang hmiah bawk. Engvanga ţap ni ang maw.. Chutah le, Kawngka a inhawng ri rak a. Phone flashlight nen mi pakhat hi a rawn chhuak ta a, Teteii niin ka hre deuh a, mahse, ka'n en chian deuh chuan a ruangam chu a lian mah mah. Mipa niin a lang leh zawk. Ka lungphu chu a rang ngei mai. In hnuaiah chuan a chhuk thla a, Store room atana an hman niawm tak kawngka chu a hawng a. A lut ta a. Chumi hnu lawkah light in on nghalin, In hnuai pindan lian vak lo chu a eng ta pap a. Va pawh mai ka rilruk hman a, mahse, engmah a lo ni lo ve thei tho. A thim leh a, amah chu rawn chhuak lehin.. Kanwgka chu tala -in a kalh niin ka hria. In chungah a chho leh ta a. An ţawng rin loh chuan an tawng ri ka hre pha si lo va. Va hnaih deuh ka rilruk ta a. In chhung a luh tawh hnu feah ka che chhuak a, bawkvak titihin ka phei a, ruah hmi a rawn tla seng seng lehnghal. An kawta Forget me not phenah chuan ka thu leh te te a, In hnuaiah chuan chhuk ve ta zawk ila, thingphel chhuat a ni tho a, an tawng pawh a hriat theih tho ka ring. Thawm dim zetin ka tawlh thla ta hriau hriau a. Ka fimkhur luat nge ni lei thil ka rap hrual a, ka tawlh thla ta pur pur mai a. Ka thawm pawh a ring deuh maithei. Ban ka zuk su deuh dawt bawk si, na hle mah se, kawngka hawng thawm ka hriat vangin hmanhmawh zetin ka insaseng a, In hnuai pindan hnuaiah ka tawlhthla puat a, a lo awih reuh riau lehnghal a, an insir lamah ar in hlui niawm tak lo awm phenah chuan ka petek ta zauh a. A rawn en pup pup a, ka awmna lai erawh a rawn thleng lo hlauh. A kawngka kalhna chu a rintlak em ti niawm takin tala te chu a endik niin ka hria. In chung tukverh rawn inhawngin, "Hmuh i nei em? " Teteii aw khan a rawn ti a. 

"Nei lo" zawi angreng tak hian a ti a. Ka vanneih asiamin Huan mawng lam atang chuan ui lian vak lo hi a rawn chho ta hlauh mai. Ka va lawm êm.. "Uicho lek a nih hi" a tih sup chu ka hre phak. Ui chu a vawm niin ka hria. A beleuh tuar a. In chung lamah a chho ta a. Ka thaw huai mai. Ka pilh hrut ngei ang.. Bana ka tauhna ka malpui veilam lah chu a na nget nget mai. Mahse, chutiang ngaihtuah hman ka ni lo tih inhriain thawm dim leh fimkhur takin ka awmna atang chuan ka chhuak a, an in hnuai pindan kawngka bul chu ka han thleng chho ta a, thawm ka ngaithla a, a reh vawng vawng. He pindanah hian ka nula chu a let reng mai thei asin. In chung thawm pawh tlem chuan a hriat theih ta deuh. Naupang khan ţap aw ţiau hian, "Anu, ka mu ngam lo" a ti a. 

Teteii aw khan, "Ngawi mai mai rawh. Naute i ni tawh lo. Nangmaha mut ngam zir ve rawh ka tih kha" a ti vin leh thak a. Ka ner sawk mai. A landana a fel hmela a zia a zawih hmel tehlul nen. A fanu aiin kha mipa kha a thlang a ni ngei mai. Naute ngik faih faih chu ngaihthlak a nuam fahran lo hle mai. Ka insehruh hman viau a ni. Khatiang hmeichhe naupang mahnia muttir reng reng, sap te chu nise ka la hrethiam. Thawm chu a reh ta vang vang a. Naute pawh chu a muhil zui ve ta nge ni a ngik faih faih pawh a reh ta a. Chet lak ngawt lah a tihchiin ka hre si lo. Tala lah chu a lian riau a, tihchhiat dawn chuan thawm ka nei ring dawn si. Engtin nge ka tih ang aw tiin ka ngaihtuah vang vang a, chutih lai tak chuan pindan atang chuan ri deuh tawk thawm ka hre ta a. Ka sawi thiam dan berin chairah min phuarbet se, thei leh thei loin chair chu chawikang ila.. Chutiang deuh chu a ni. Tin, ngaihdan sa ka lo nei bawk nen. Tawng ri ka hre thut. 

"A muhil tawh niang a" mipa aw a ni. 

"A niang.. Chuan, engtin nge ni zel dawn. Ka hlauthawng riau a nia.. Tukinah pawh Jenny pi a rawn kal a, 'Khawiah maw inpa thar chu' a rawn tia.. I fimkhur lo lutuk a, an hmuh vaih che chuan kan chhe der a ni mai" Teteii chuan a ti hlak hlak a. Mitmei ven tur nei lo anga inngaiin an tawng pawh a zawi lem lo. 

" A zo tep tawh alawm.. A ruang thehthangna tur ka ngaihtuah mek a nih hi.. " Mipain a tih chuan ka za vek thei. Tu ruang nge a sawi tak? Ka Amanda em ni ang? 

"Thah loh hram dan a awm lo mi? Amah tho hian min sawi fihlim vek thei dawn asin" Teteii aw pawh chu a khur deuh. 

"Mary bana tatoo emaw ka tih kha ka ngaihtuahin khatiang tatoo a neih ka hre ngai lo. Tunah hian kha thu inziak kha a awmze hriat tumin am buai mek ang. An hriat chhuah vaih chuan kan chhe der a ni mai. Chuvang chuan tihtheih a awm tawh lo. Tuman min chhui chhuak chuang lo vang" Mipa chuan a ti bawrh bawrh a. Ka chiang ta. Amanda chungchang ngei a ni an sawi ni. Ka hamhaih luatah chet lak dan tur ka hre lawk lo va. 

Mahse, pindan chhunga thawm rawn ri leh ţawk chuan min kai harh vat. In chung ami te pawn an hre pha a ni ngei ang. 

"Uicho bawk kha em mawni le.. Khaw maw phone kha. Ka zuk en leh lawk" Mipa chuan a ti ta mai. A fimkhur hle mai a.. Bihrukna tur ka melh nghal ruai a. Kawnga sir veilamah chuan alkatra barel ang kha lian vak lo a inhung a, chu chu her remin a phenah ka thu ta ringawt. A rawn thlek chuan min hmu ngei ang, mahse, kawngka chu hawng ngei se ka duh a ni. A nih nih kan ni tawh mai ang chu.. 

A rawn eng thla pup pup a, ka tum dan ka thlak leh si. Silai chu zawi muangin ka phawi a, ka hum nghet kher mai. Thawm ngaichangin kawngka bulah chuan a ding ve vung vung a, chet a hun tih hriain rang zeta dingin a tukhumah chuan silai ka hmehbel chat a, "Che tawh suh" ka ti vawt raih. A hamhaih kher aniang chu a ding khawng reng ringawt. A phone kenlai chu ka laksak a, a hmai tak chu ka en ta a. Remsiama hmel chiah chiah a ni. Ni e, he pa ngei hi a ni Tlansanga, Remsiama phirpui chu. 

"Kawngka kha hawng rawh" ka ti leh a. Teteii kha rawn chhukthlain ka hnunglam atangin min rawn bei ang tih ka hlauh vangin a saisir zawngin ka ding a. Ngawi rengin kawngka chu a hawng ta a. 

"Light on rawh" ka ti leh a. A on nghal. Pindan chu a lian lo bawk a. Hnawmhnawk chu a awm rum mai. Chumi karah chuan chhuatah Amanda ngei mai chu chairah phuarbehin a hmuia plaster belin a lo thu a! Ka melh ngawih ngawih. A mitmeng fim zet chuan min rawn melh ve a, a vawikhat nan Amanda mittui far ka hmu ve.. Ka thinrim lutuk insum zo lo chuan Tlansanga luah chuan silai káwm chuan ka chhu ta bur a. A petek nawk a, favai bag niawm tak a va bawh rawk rawk. Ka phone phawrhin Sir Buata ka call nghal a. Kan awmna ka hrilh sawk sawk. Tlansanga rawn tho leh chu ka va chhuih leh dawt, Amanda chuan min lo thlir reng ringawt. A biangah ka hnek bawk. A let hawl a. Ka thinrim engmah pawisak nei tawh lo kutthlak chu a na ve thawkhat turah ka ngai. 

Amanda chu ka phelh ta sawt sawt a. A hmuia an vuah plaster ka hlih thlak rual chuan, "Sam.. I hnung" tih leh amah zawk chu zuan zawk a rual a, kawngka a ri thuai. Teteii rak thawt thawminna zui bawk. Teteii nákah tak a va tlawh a lo nia. Teteii chuan a chemte hum pawh chu a thlauh chiang kher mai. In chungah lah naute kha a tap tuar tuar bawk. Tlansanga chu a rawn inbengkang leh a, Amanda chuan va panin, ka rin loh deuhin a hmaiah chuan a hnek ta siah a, a sama thamin a kuai dak a, A hnek ta zawt zawt mai. A hnek hlum thei takngial dawna hriain, "A tawk e.. A tawk e" tiin Amanda chu ka kuah bet a. A khurh danah a thinrim takzet tih a hriat. Tlansanga hmel chu hmuh tlak alawi pawh a awm lo. Thisenin a bual khat vek. Teteii lah Amandain a nâka a tlawhna kha a na thawkhat a niang, a zal der a, a rilru erawh a harh tih a lang. 

Kar loah Sir Buata te an rawn thleng a. An rawn luh rual rualin, Amanda chuan fiah fai zetin, "Inspector, he mite pahnih hi Home minister thattu te chu an ni e" a ti a.. Mi dangin Tlansanga leh Teteii chu an senghawi ta a, Teteii chu a nak ruh a tliak emaw a auh a ni mai thei. A aiah tuar tuar mai. In chungah chhoin hmeichhe naupang chu ka pawm vat a, Amanda a hmuh rual chuan Chu naute chuan a lo ban nghal nia! A pawm ta vat a. "A tha e.. Naute, a tha vek tawh e.. Misualpa kha a awm tawh lo" tiin a hnungzang a chulsak hliau hliau a, hmuhnawm ti zetin ka lo thlir vawng vawng mai. 

Hmeichhe naupang pawh chu kan chhohpui ve lo thei ta lo va. Kawngtluanin Amanda in a pawm. Mi dang tumah a duh si lo va. Amanda a chauh dawn tehlul nen aw. Station kan thleng chu ka rin loh deuhin mipui an lo tam nasa mai. Kan department lamin Home minister thattu an man tih leh Amanda hmuh a ni tih thu kha an lo sawi darh nge ni.. An tam ngang mai. Mahse, Police venna hnuaiah eng em ti loin Custody-ah kan hruai lut thei ta hram.. Amanda chu ka en chian takah chuan a kawr chu a thler hnu a, a kekawr lah a dinglam hi a thler kâwk bawk. Tin, a mitko a vung bâr a, a taksa lang thei chinah pawh hamna hnuhma niawm tak te, chemtea zaina niawm tak te a awm nuai mai. A kutphah veilam pawh a intuam. 

"Naktuk lamah engkim kan hailang dawn nia. Tunah chuan chawlh hahdam ka mamawh a ni" a tih vangin A in lamah ka phur phei a. Hmeichhe naupang kha constable Asawmi'n a buaipui ta rih a. A tap nasa nen, a tap muhil ta daih a. A lainatawm reuh ngawt mai. 

Tui ka lumsak a, chi tlem ka thlak bawk. "Inbual rawh aw" ka ti a. 

"Min bual la" a ti sap. Ka chak zawng tak a ni sia. Kan inkai lut a. Ka bialnu chu saruakin ka bual ta a. Mahse, a mak khawp mai. Kan hmangaih em em te, buaipui ngaia an awm lai chuan feelings a awm thei bik hauh lo. Khalam ngaihtuahna kha ka pu lo hrim hrim. Fai taka ka bual hnuah ka hru hul leh vek a, kawr hak nuam deuh tur ka haktir ta a. A sam pawh dryer in ka chhemrosak leh vek. A muthlu lek lek reng mai. A chau tawngkhawng viau a niang e. Ni 4 zet a bo kha a nia. Khumah chuan ka muttir a. Ka hlim lutuk chu ka lo khi hui reng a ni tehchêk ang chu.. 

"Ka lo kir leh huna lawm ber tur i ni tih ka hria alawm. Mahse, mi á ang maiin khi vur vur reng suh" a ti a. Ka nui uar sauh. 

"Engpawhnise, thla thar se kan innei tawh ang." ka ti hmiah. A nui ve ringawt. 

Ka hmuia rawn fawp zeuhin, "Amanda tel lohna hmuna Samsona chetla hi alawm hmuh ka lo chak em em thin. Tunah chuan Sama hi mipa dik tak a ni tih ka chiang tawh e.. " a ti sap a. Ka nuam veng veng. Ka kuah chawt a, "Ka hmangaih lutuk che" ka ti hawk a. 

Min rawn kuah let vein, "Kei pawhin.. " a ti sep a.. Hnai taka inmelhin kan mitmenga hlimna chu a de sar sar a..