Amanda 2

BOSS AMANDA (2)

Ziaktu: Toni Rálte

Amanda ai ka awh a ngai dawn ta tih ka hai lo va. Huphurhna rilru pu mah ila; Amanda chhan chhuak tur chuan hlauh reng reng ka nei hauh lo. A awm lai kha chuan min uap hneh êm a, a thla phenah lungmuangin ka awm mai a, a hnung ka zui ve dat dat ringawt kha a nia. Tunah amah ber a awmna chin hriat a nih tak loah chuan ka theihtawp chhuah a ngai tih ka hai lo khawp mai. Ka thinlung a na em em bawk a, ka thinrim tel bawk. Pu Thawmliana thihna kal zel rawn hrin a nih loh reng ka ring lo bawk. Ni e, Ka Amanda chu nung damin kan hmu leh ang em? Tunah te hian misual kutah awmin pawngsual rapthlak tak te a tawk leh ang em? Ni lo, chutiang ka ngaihtuah phei chuan ka sahal a ni ber mai. Mumalin ka khawsa mang lo. A tukah chuan Amanda bo thu chu official taka puanzar a ni ta. Mipui pawh a ţhawng ve takzet a nih hmel. Engtin chiah nge an sawi zui chu ka hre lo va; ka en peih lo bawk. Mahse, an ui em em ang tih ringtu erawh ka ni. Ni e, hmeichhia mah nise, Mizorama case lian tham chu ama chinfel vek a ni thin miau a. Kan department pawhin kan chân ropui khawp mai. 

"Mama, khati ringawta nghah kha i tum em ni? Che chhuak ta che. I phone pawh a ri tawp hlei thei lo chu a nih saw" ka nu chuan min rawn ti a. Ka harh zawk. Rilru mang tak chungin ka insiam a. Chak zetin station lam ka pan. Amanda case latu ber pawh an la ruat lo va, tu pawh Case IO ni se, kei hian ka zui dawn tihah ka chiang mai. Inspector Buatsaiha chuan IO roomah min ko lut a. Amanda ina cctv footage a lo en mek a lo nia. Taka! Bung hmasa lamah khan kan buai atalángin cctv lam kha ka sawi lang miah lo va, Home minister inah meuh chuan an vuah turah ngaih a ni a. An vuah reng bawk. Mahse, Amanda leh Pu Remsanga'n en an han tum kha thiam taka hersawn a ni tih an hmu ta a, kha lamah khan rilru an pe lo zui ta a ni. An in kawt leh an in ami chu en tlak a awm hauh lo a ni tawp. 

Amanda ina cvtv pawh chu zanriah a ei lai vel chu a lang a. Zanriah a ei kham, a kam a thuah lai takin a dul a dawm a, a kut lehlamin a lu a dawm bawk.. Chutah living room chu thei leh thei lo va panin a phone chu a la hman awrh.., mipa lian leh sang lam hian, cctv chu a kut lianpuiin a rawn her sawn a, A thim daih. Mask a vuah a, a lang chiang hman lo hrim hrim. He kan mihring hian Amanda ina cctv pawh a khawih danglam tih a lang reng. A bak engmah hmuh tur a awm tawh lo. Amanda phone kha ka kawl a, a call hnuhnun ber chu 'Remsiama pa' tiin a save a. Ka miscall pawh a lang kulh mai. Msg lamah engmah kan chhuizuina tur thil a awm lo. Tin, Amanda thenawm ti ila, An Buildinga cheng ve te kan han bekbawr a, tuman an hmu lo. A awm tho, he Buildinga chengte hi a tu amai pawh inkharkhip reng mai, pawn pawh chhuak zen zen lo an ni a. Corridor leh kailawn hmuh theihna turin cctv dah a ni bawk si lo. A beidawnthlak kher mai. 

"Sir, nangman em ni a case hi la dawn? " ka ti a. A khabe hmul tuai puat pahin, "Maithei. Ka sawi awmzia chu Amanda zawn chhuah zawk hi a nia, Pu Thawmliana case erawh tuman kan khawih chhunzawm rih lovang. " a ti sup a. 

"A kal kawp vek ang. Pu Thawma thattu te khan Amanda hi an rubo tih a hriat reng alawm" ka ti hawk a. 

Min rawn melh a, "I chiang maw? " a ti hniam raih a. 

"Ka chiang ngam lo naa, Home minister thihna a chhui mek a, tu dang nge inrawlh se i tih? " dengthawng angreng zet hian ka ti a. Ka mood a chhe em a ni. Ka inthiam lo leh deuh naa, ka sawi vek tawh si. 

Mahse, min hrethiam ve a niang, a bu nghut a. 

"Ka beisei. Amanda kan hmuh theih phawt chuan, he case pawh hi chinfel a ni ngei ang" a ti ta a. 

Ka lo thaw hawk ringawt. Amanda inah keimah chauhin ka va phei leh a. A in chhung ka luh chuan ka hnuk a ulh lek lek mai! A reh dûk mai si. He in chhungah hian kan pahnih chauhin hun kan lo hmang dun tam tawh asin. A study roomah ka lut a, Engkim chu a fel thlarh vek. A in an lepse khan a safe a him a, engmah bo a awm lo niin an sawi. Inrawkna zawng a ni mawlh lo alawm. Ruahmanna fel tak nena Amanda kha hruai luih a ni. 

A chair ngainat em emah chuan thuin a thil chhinchhiahna thin note book lian vak lo chu ka keu a. Han hnemhnanpui tur em em ka hmu lo. Aman min hrilh chin bak kha chu a lo ziak vak lo. Mahse, khup leh ka tum mek laiin a kawm hnung lama thil inziak chu ka zuk melh fuh hlauh a. Ka bih chiang vak. 

"Tlansanga , Khatla.. Twins" tih ringawt a ni. Awmzia a nei ang em le? Khatlaah Ramsanga chu an awm nual awm si a. Twins chu engvanga ziak tel kher nge a nih ang? Awmzia a nei ngei tur a ni. Ka ngaihtuah buai mek laiin ka phone a rawn ri a. Inspector Buatsaiha ani. 

"Aw sir" ka ti zawi sup a. 

"Hei Amanda zanriah eiah khan Alprazolam thahnem tham tak hmuh chhuah a ni ta e. Ka lo rindan chiah a ni e. He lai tualchhunga an hman theih tur tlanglawn a ni tlat. Chuan, Saron& Emily Kitchen te siam a ni bawk. Chawhnu lamah hian ka kal dawn a. I duh chuan rawn kal ve la" a rawn ti a. 

"Tehreng mai" ka ti ro halh. A dah a. 

Note book chu ka ak ta a, tangkaina a nei maithei asin. Ka chhuah hmain a roomah ka lut leh zuai a. Engkim chu a la ngai vek mai. Saw a khum zau zetah sawn hlim taka titi dunin kan lo mudun fo tawh asin mawle.. Ka sahal leh tlat dawn tlat! Sama hi lungchhia leh no hman ka ni lo. Amanda tan ka penchhuah a ngai tlat. 

Pu Buata nen chuan Saron&Emily kitchen chu kan pan ta vang vang a. Amah Pu Buata hi tawngtam lo ve tak, hmeichhe hoin, "A pa e" an tih tur ang chi kha a ni a. Nupui hmeltha zet neiin fa pawh pahnih an nei tawh a ni. Kan department-ah chuan Amanda nen hian kan hawlh lawr ber an ni nghe nghe. Thil uluk leh mi fimkhur tak a ni. Dawr chu kan thleng a, a lo hrilh lawk tawh vangin min lo dawngsawng tah viau mai. 

"Hun kan khawhral tam loh nan, Zawhna chu inzawt nghal pawp pawp mai ila; Nimin tlaia Amanda zanriah rawn ordertu kha amah a ni ngei em? " tiin an manager chu a melh ran a. Manager chu hmai sin lam, dawihzep hmel zet, ha kuh lam lek lek a ni a. 

Meng zawk zawk chungin, "Amah a ni lo.. Nia, englo a nia.. Min rawn call a, mipa hian.. "Sama ka nia, zanriah va pe lawk mai ta che u. A assistant kha ka nia' a rawn ti a. Kan lo ring ve mai a. Dar 6 rik hmaa dah tura min tih vangin kan siam zui nghal a. Amanda meuhin chaw a rawn order chu kan lawm viau a, uluk pawh kan uluk khawp asin" a ti ta a. Ka lo meng phawk nasa. Ka hmingin Amanda chu chaw an order anih chu! Hrep tak chuan a.. 

"Chuan, tu maw va petu kha" Pu Buata chu a hawi kual a. Rawlthar ria thil thel, hmai dâng lam lek lek hi a rawn pen chhuak a, "Keimah ka nia ka pu" a ti a. A aw chu a khur lek lekin ka hria. 

"I va pek dan kalkawng han sawi teh le. Engkim zep nei loin" a ti ta a. A heh a liak zauh a, "Ih, ka pu, Pi Amanda in thlen hma khan mi pakhat hian min lo phar ding a, 'Amanda chaw tur em ni? " a ti a. 'Aw ' ka ti a. 

"Hei Home minister thihna a chhui vangin a dinhmun a hlauhawm a. Kei hi amah venga thlithlai tura tirh ka nia. Keiman chaw pawh ka ei chhin a, ka test vek a ngai dawn a. Ka lo pe mai ang' tiin pawisa pawh min pe ta a. Ka let leh ta mai a ni" a ti ta a. Ka thaw tha thei lo tep a ni. 

"Chu pa hmel lan dan chu han sawi teh le.. " a ti a. 

A ngawih vang vang hnuah, "Mask a hreng a, a mitmeng chiah ka hmu thei a, a mitmu a dum a, a meng rum deuh bawk. Palian lam, tlema thau lek lek a nia. A ngo vak lo bawk. Cotton kekawr dum a ha a, a tshirt kha a grey ni tain ka hria.. Chu zawng chu a ni mai" a ti a. A hriatna chu a la tha zêk mai. 

Manager lo call tu number chu kan la a, Sir chuan a han call nghal a. A tlang lo chiang khawp mai. Ni e, chu sim card chu a hmang tawh lo. Mahse, tu hminga book nge a nih erawh kan hre thei ngei ang. Airtel a ni nghe nghe. Kan chhuahsan hnuah Airtel office-ah kan peng kawi nghal a. Sim card chu tu hminga book nge a nih kan han zir chiang a, 'Hmingthanpuii, Kulikawn' hminga book a ni. A tuk lama bawhzui atan kan khek ta rih a. 

 Amanda chaw chahna dik tak zawk T&R Restaurant lam kan pan leh ta a. He Restaurant hi Amanda khan a ngaina em em thin a, chaw a chahna ber ani thin. Ka lung a leng ringawt. An manager chu kan bia a, pawi an ti ve takzet tih a lang reng mai. 

"Dar 7 hmaa a lo thlen chuan a tawk aw. Bawng thin kha rawn titam deuh ula" a rawn ti a. Ni dangah pawh a ina kal ber thin Ruattea hi kan tir leh a, ani hi Amanda nen pawh an inhre tha tawh a, a nel pawh an innel khawp mai. Mahse, tiang kha a ni ta si a, a pawi takzet a ni" a ti ve a. A hmelah pawh pawi a tihzia a lang. Ruattea chu kei pawn ka hmu fo tawh a, a rawn kal a. Min hmuh chuan lungchhe hmel a pu.

"U Sam, khaw nge a awm ang le? "A ti sup a. Ka nghilh dup mai. 

Sir chuan, "Ruatte, thil thlen dan kha chiang takin han sawi leh teh" a ti a. 

Ruattea chuan, "Dar 6:40 velah ka phei a, Kawngka kha a inkalh lo. Mak ka ti deuh tawh rêng a, ka lut a. Dawhkanah khan chaw eina vel kha a lo awm nuai sia.. Ka ko a, a reh hmak bawk si. A inbual aniang tiin bathroom ka pan a, a awm bawk si lo, a study room ka en leh a, a awm lo. A roomah a awm bawk si lo va, a phone lah dawhkanah khan a awm bawk si.. Keimahah khan hlauhthawnna a awm ve tawp..chuan, police ka phone ta tawp mai a ni" a ti ta a. A lung a chhiat hmel khawp mai. 

Ka hah a dam thlawt lo. Zanah chuan a note book kha ka chhiar leh a. Ka hriat hnu deuh vek a ni. A lehkhabu kawma, "Tlansanga, khatla twins' tih bak chu thil thar a awm si lo. Tlansanga chu zawn chhuah mai tur em ni ang? Nge kha pa mask vuah, Amanda vengtu anga insawi kha ka pawng zawn vak zawk mai dawn.. Amanda khan a thluak tal min hnutchhiah se tha tur. Thinlung zìng nen chuan ngaihtuahna fim hman a har kher mai. Zing dar 2 velah chuan ka tho ta hlawl a. Amanda note book keng chungin ka dawhkanah chuan paper ka inchhawp a. Pu Thawmliana case-a kan rinhlelh leh an inlaichin dan zawng zawng chu ka lakai ta vek a. Amanda pawhin a lo chhui bing ngar ngar, Lalnunmawia leh Lalremsiama te chu ka khalh fal ta a. Lalremsiama chhungte hi Sairangah an awm a, a nupui erawh Bawngkawnah a awm. A nupui hi va hmu phawt ila tih rilru ka pu a. Lalnunmawia hi chu Remsiama ai chuan ka ringhlel nep deuh. Amah mipa awmchhun a ni a, phuba anga he thil hi a kal dawn anih pawhin phuba laksak thei tur dang an awmin ka hre lo. A pa lah upa lam a ni tawh ngei dawn a, Remsiama ai chuan ka hmu nep deuh ti mai ang. Remsiama erawh chuan nau mipa a la nei a, tin, amah a la thalai a, thian thalai tak tak pawh a neih ngei ka ring. Tin, A thih hmaa traffic lama a thawhpuite pawh hmaih thiang loah ka inngai a ni. Amanda chhinchhiah bik Tlansanga hian pawimawhna a nei ngei ang a, hmalak dan tur erawh ka hre lo hle. Twins a ziah danah phirpui a nei tihna a ni ngei ang a, Lalnunmawia phirpui emaw Remsiama phirpui.. Hmm, tlem chuan ka thluak a fim ta deuh e. Mutchhuakin min rawn zem ve chiai chiai a, ka muthilh loh chuan, ka rilru a fim thei lo ang tih hlauin khum lam ka pan ta vat a. Tibuaitu nei miah loin ka muhil thei. Ka tawngtai nasa bawk a. Ka harh meuh chuan, dar 7 a lo pel tawh. 

Vawiin chu Hmingthanpuii hmu turin kan chhuak leh ta a. Kulikawn veng mawng lamah an lo awm a, kan hah phah angreng. Hmingthanpuii chu nu niin, a naupan vak tawh loh hmel. Sir chuan a han zawt fiah nghal zung zung a, Pi Hmingthanpuii chuan, "Aw.. Khami number kha, khami sim card kha ka fanu tana ka book a nia. ID a la nei si lo va, ka hmingin ka book a. Hman pawh a hmang rei lo, an bazarnaah a phone a tibo daih a, kan report naa, an zawng hmu thei lo nge, tihian kan ngawi zui ta mai a. Sim card kha a number ngai hmang ta loin, a u -in bazara black-a an zawrh a rawn leisak a. " a ti a. 

Ka rin dan sa ani. A fanu phone ru botu chu Amamda chaw ordersaktu kha a ni ngei ang tih pawh ka ringhlel lo e. Mak leh deuh bawk chu Amanda khan bawng thin kha a chah tam deuh kha a nia, A zanriah ni lo zawk a eiah khan bawng thin a awm nual mai. He kan mi umzuia hian Amanda chu a hnaih viau emaw a zir nasa hle emaw a ni thei mai ang em? Thluak hi a va buai tak êm.. 

Station-a kan let hnuah kei chu Remsiama nupui hmu turin ka tlan chhuak leh ta nghal a. Hetia mi hnungzui lo va, keima phak tawka chet hi ka duh dan a ni rih. Mi mitmei ka veng peih rih lo. Bawngkawn chhim vengah an awm a, chu lam pan chuan ka inkhalh zel a. Mi ka zawt pah zel bawk. Hria an lo tam vak lo lehnghal. A tawpa tawpah step thui ve tak ka zawh hnuah Assam type lian vak lo, thenawm te nen inhnaih vak lo kawtah chuan ka ding ta ran a. Kawngka chu a inkhar a, mahse, a inkhar phui lo. Ka kik a, reivak loah a rawn hawng a. Uniform nen ka ni bawk nen, a meng phawk deuh a. 

"Ka lo lut thei ang em? " ka ti sup a. A ngaihna hre mang lo zet hian a bu nghat a. Ka lut ta a. Choka leh sitting room chu a inzawm nghal a, chhuatah chuan hmeichhe naupang fel ve tawh tak tur leh amah aia nau hlek tur hmeichhia hian barbie an lo khal a. Min hmuh chuan an tawng lai an tawp chawt. Nia, naupang hian police uniform hi an hlau ve thin a. 

Remsiama nupui chuan, "Eng nge i duh le? " a ti a. 

Thu rawh min tih hmain ka thu ta hmiah. 

"Zawh duh che ka nei a. Min hlau lo ula, ka zawhna chhanna hre turin ania ka lo kal" nelawm thei ang berin ka ti a. 

A fanute chu melhin, "Bawihte, jenny te inah va phei rih ta che u" a ti a. Rang taka thoin an chhuak nal nal. 

Ka hmaa thu chu nu te lam, mahse, sa nghet angreng tak a ni a. A háng lam a pawl a, a hmelhmai erawh a chhe hran lo. A zia a zawih hmelin rual a pawl vak loh hmel bawk. Inthlahrung dêk chi ang zia kha a nei niin ka hria. 

"Engtin nge ka koh dawn che ka hre lo va, pi Tete, ka ti mai ang che. Englo a nia. Ka hriat duh chu, inpa te chungchang daih a nia. I pasal boral ta Remsiama khan phirpui a nei tiraw? " ka ti ta chawt mai. Chutia ka zawh mai loh chuan, Home minister thihna chungchang bakah hetah Saiphai thleng kha sawi kai a ngai dawn si a. 

Mak tih hmel zeta min melhin, a lu a thing a. "Aih, a nei miah lo. A neih awm ka hre miah lo" a ti tham ţiak a. 

"I chiang maw? " ka ti leh ngat. 

"Umm chiang e. Phirpui nei nise engah nge ka hriat loh ang? " a ti a. 

"A nih Remsiama te chhung lam khan i pasal boral avanga zangnadawmna kha an beisei ve niin ka hria a, a dik reng em? " ka ti a. 

"Ka pu, engvangin nge heng thil hi min zawh vak? Hemi chungchang hi sawi vak ka duh lo asin. Ka pasal boral mah tih tawh nak alaiin" a ti nghat a. A mittui a parawl nghal. A pasal chu a ngai hle a ni ngei ang. 

"Aa, ni e, buaina ka tawk a, chuvang mai chu a nia. I lo hre tawh em ka hre lo va, Detective Amanda bo thu kha. Khami buaina kal zelah nang hi ka rawn hmu ta che a ni" ka ti ta a. A meng phawk kher mai. 

"Ani bo thuah chuan inhnamhnawihna kan nei em ni? A va mak tehdaih ve" a ti hliai a. 

Ka lu ka thing a. "Aih, nei lo e. Mahse, Home Minister thihna chungchanga case la tu a ni a, ani khan i pasal leh Lalnunmawia boral ta atang khan a chhui si a, thil hi a kual ta vak a ni ber mai" ka ti ta nge nge a. 

"Engmah ka hrethiam lo. " a ti a. Ka ring, a tan hriatthiam ngaihna a awm lo a ni. Tichuan, a bul atangin engkim ka hrilh ta vek law law mai. Mahse, sawi tur chin leh chin loh erawh ka thliar ve hram hram a. Ka'n sawi takah chuan a hrethiam ve ta deuh niin a lang. 

"A lo nih chu aw.. Ni e, ka pasal, Saiphaia tirh a nih khan ka rilru a hahin hrehawm ka ti a. Aizawla kan awm tirh deuh kha a ni bawk nen, amah khan min hnem reng zawk a. Tikhan a vanduai pawlah han tangin, a boral zui ta nen. Mawhpuh loh tur tur te ka mawhpuh ve tho alawm.. Mahse, tunah chuan mi dang mawhpuh khan awmzia a nei lem lo tih ka hria a. Home minister a inrawlh tih pawh ka hre hran lo va, keia ngaihdan mawlmang tak kha chuan an OC te kha ka lo haw daih a" a ti ve ta mawlh mawlh a. 

"Chu chu a nia. Engkim hi a buaithlak vek tawh. Amanda ber a awm rih si lo. Amanda ru botu hi kan home minister thattu ngei hi a nih ka ring a. Chuvanga i pasal te chhungkaw chanchin pawh zawt che ka ni" ka ti ta a. 

"Ni e, ka pasal ralna sum pawh kha min rawn laksak deuh vek alawm. Mi duhám chhungkua an nia. Mahse, sawrkarin zángnadawmna a pek erawh ka theihtawp chhuaha hum ve ka tum a, hotu liante ka hmu ve ta chawt a, anni'n ka dinhmun hriain min lo lainat khawp mai a. An kutah ka innghat ngam ta a, ka pa te pawh chuan min rawn tibuai zui ta lo chu a nih hi" a ti ve a. 

"Han ngaihtuah la, i pasal boral vanga phuba la duh tur chi i pasal te chi leh kuangah an awmin i hria em? " ka ti a. Ka en ngun kher mai. 

A ngawi vang vang a. "Chutia i sawi takah chuan ngaihbel theih tur thil a awmin ka hria. Aizawla kan rawn awm tirh hian kan pa khan zan reiah tu emaw hi a be thin a, ka hriat hlau deuh hian bathroomah te a lut thin. Ka ringhlel a, ngaihzawng a nei a nih ringin. Mahse, a hnuah an inhau niin ka hria. Kan pa khan, 'Min rawn be tawh suh. I rilru a dik lo em mai. ' a ti a. Ta tang khan a reh zui ta a, kei pawn ka ringhlel zui ta lo. Mahse, kan pa boral sarhu bawr khan zan 4 lai mai hi kan in piah Theihai kung hnuaiah sawn mi pakhat hi a ding reng thin. Ka hlauh deuh vangin ka pawh ngam si lo va.. I hriat angin kan in hi a fal a, thenawmte nen kan inhnaih vak lo. Nuam lo ka ti thei lutuk a, mahse, a hnuah kha chuan a kalbo ve ta mai a. Chu pa nen chuan kan pa kha inzawmna eng emaw tak chu an nei a ni maithei" a ti ta a. Ka rin loh lam daih a ni. 

"A nih Remsiama nau mipa khan a u thihna kha a tuar em? " ka ti leh kher a. A nui hawk, mak ka ti deuh a. 

"Ih maw, ka pasal chhungte ka huat vang ni miah loin ka pasal thihna kha thinlung taka tuartu chu keimah chiah ka nih ka ring. A langah chuan tuar ber leh sun ber angin an lang naa, a ruang thlak zan atangin a ralna sumah an buai tan nghal kha a nia. A nau mipa phei chu a ruang a rawn kil tawk, zan khat pawh riak loin a haw leh nghal. Kan pa nen Aizawla kan awm chhan pawh dik tak chuan, kan pa nu hi a nuhrawn a ni a, kan inngeih loh vanga chhuak kan ni deuh ber mai. Kan pa naute hi chu a nuhrawn fate an ni tawh a. " a ti ta a. A lo ni daih a nih chu a. Amanda khan heng hi a hre ve ang em le.. 

Kan innel ta deuh bawk a. An Album en ka dil ta ringawt a. Phal takin min entir ve mai. Remsiama chu palian leh háng lam, hmel pawh chhe lo tak mai a ni a. An inneih thlalak deuh vek a ni bawk. Mi dang, an chhungkaw kim laia an lak erawh pakhat chiah a awm. Thingpui a lum hlanin Remsiama lan chianna pakhat chu ka ak ru ta zauh a. Thingpuite ka in zawh hnuah chuan, 

"A lawmawm hle mai, tha takin min lo dawngsawng a. Chuan, eng emaw thil thleng danglam bik i tawng emaw i hria emaw a nih chuan, khawngaihin min lo be rawh aw" tiin ka number ka pe a. Tha takin kan inthlah ta a. Thil pakhat chu a awm ta phawt. Remsiama biak thin, a nupui hriatpui loha a biak ruk thin leh theihai kung hnuaia ding thin chu mi thuhmun an ni turah ngai ila. Chu pa chu tu nge a nih hre thei ila chuan thil hi a fel duak mai tur. 

Lalnunmawia te in lam ka pan leh ta a. Vanduai asiamin ka hrilh sa lo nen, an lo inkalh thap mai si. Ka tihngaihna hre lo chu an thenawmah ka lut ta ngawt a. An lo fel khawp lehnghal. An pa ber chu a kawm tlak riaua ka hriat vangin a thuphungin, "Pu Nunmawia khan unau mipa a nei miah lo a ni maw? " ka ti a. 

"Aw nei lo chu a nih hi, a nu sawi danin a nau chiah tur hi mipa a nia, mahse, a pian atanga reivak loah a thi ta mai a niawm e" a ti chuar chuar a. 

"Anih Amah Lalnunmawia a boral ta si a, a nupui fanaute engtin nge an awm tak? " ka ti a. 

"Hei an la khawsa ho zel chu a nia. An nu Ziri hi a fel khawp a, mawia nu leh pate pawh ama nu leh pa ang tak takin a en a. Bakah Mawia chhungte lam pawn chhuahtir an phal lo nasa.. Thla hmasa khan Ziri chhungten rawn hruai an tum a, an remti lo nasa. Amah Ziri'n, 'Pasal dang neih ka tum tawh chuang lo va, ka pate hi ka enkawl zawk mai ang' a ti bawk sia. Mawia farnu te lah an fel bawk a, engkimah an rawn peizawn a, Mawia pa hian in leh lo pawh Ziri tan alawm a dah vek" a ti mawlh mawlh a. Ngaihnawm ka lo ti hle. 

"Chu! Ziri chuan pasal neih leh lam a ngaihtuah lo tawp a ni maw? " ka ti a. Thingpui min rawn Pek chu ka ban nghal zat. 

"A nih saw.. Bakah a uaithla lam han ti ila, kum 48 bawr vel a ni tawh a, a fate lah an lian ve tawh bawk a, a ngaihtuah lo niin ka hria" a ti ve a. 

Lalnunmawia te chhungkua atang chuan eng em em han hriatthar tur kha a awm ka ring vak lo reng a. Thingpui ka in zo a, lawmthu te sawiin ka chhuahsan ta a. Tunah chuan Sairang lamin ka lung min len ta ber mai. Mahse, a tlai deuh tawh vangin naktuk lamah ka kal mai aniang chu.. 

Tlai ni tla tur sen no phût chu ka melh vawng vawng a. Amanda chu tunah tak hian engtin nge a awm ang? A riltam ang em? Nge nunna nei tawh loin khawi hmunah emaw a let reng zawk? Ka rilru a na ngawih ngawih. Thihna ka ngaibtuah zawng pawn ka thin a na vawng vawng thei. Ka lo hmangaih takzet a nih ka ring. Tin, ka ngaihsan tel bawk vangin a awm ta lo hian ka nunphung min hlohtir lo thei lo a ni. Ka haw a. Zanriah pawh tihtham ka ei lo. Ka chhungte pawn min hrethiam viau. Zanah pawh chhuak peih loin ka roomah ka tawm a, zu pawh ka in peih chuang lo. Ka thluk fim loh mawlh ka hlau a ni ber. Ka theihtawpin kil tin ka dap kual a, Hmaih ka nei em tih te, Tlansanga, Khatla chu va zawn chhuah tawp mai tur em ni ang tihte ka ngaihtuah.Tin, Remsiama thlalak ka ruk leh Amanda ina footage -a lo lang mipa hmel lang chiang mang lo kha ka en kawp bawk. Mask a vuah miau avangin an inanna hmuh tur a váng riau thung. Saron&Emily kitchena an chhawr, Amanda chaw pe tura kal kha entir ka rilruk a. Engpawhnise, Sairangah kalin eng emaw tal hriat thar neih tum ila, chumi hnuah Pu Thawmliana thihna atanga chhui letin engkim chu thual nawn leh vek ka tum ta ringawt mai a ni. Ka ţawngţai a, "Lalpa, ani kha i damtir ta lo a nih chuan, sawi tur ka nei lo e. Mahse, a la dama a la nung ve a nih ngai chuan, chhanchhuak thei turin chakna min pe ang che. I khawngaihna ka ngen takzet a ni" tiin. Chhanin awm hram se ka va ti tehlul êm.. 

A tukah Station ka be pawp sa a,Saron& Emily Kitchen-ah ka peng kawi a, mahse, an lo inkalh bám mai. An inhawng dawn lo a nih ka ring. Sairang lam panin ka inkhalh zui ta nghal. Ka tlan chak deuh nge ka thleng hma angreng phian mai. Harsa lo takin Remsiama pa te in chu ka zawng hmu a. Min hmuh chuan an phawk deuh. 

"Eng nge i duh tak mial? " nu ber niawm tak chuan a ti a. A aw chu a chher lam deuh a ni. 

Thuthmun ka rem fel te te a, "Thil zawh duh eng emaw ka nei a. " ka ti sup a. 

Pa ber niawm tak chu pindan atangin a rawn chhuak a, an nupa bak ka hmu lo. 

. "Khaw nge mi dang hi an awm le? " ka ti a. 

"Valtea chu thenawmah sawn a leng aniang, Mami erawh an hnatlang a" nu ber chuan a ti leh a. A landanah chuan a fel hmel viau mai. 

Eng eng emaw kan sawi hnuah, "Ka pu, Remsiama khan phirpui a nei tiraw? " ka ti ta phawng a. A meng phawk ngang mai. 

"Nei nang.. Ngati nge? " a ti hluai a. 

"Aa, amah ang deuh ka hmu a, chuvang mai mai mawle.. " ka ti ta ringawt a. 

"A va mak awm ve aw" a ti ve hmuk a. 

"A nih ka pu, Remsiama thih vanga phuba la duh tur awm chi in chhungkuaah inawm em? " ka tih chuan an nupa chuan phawk zetin min melh leh.. A ţhawng viau a ni ngei ang. 

"Awm lo, phuba lak chi pawh niin ka hre lo. Tu thiam loh mah ni hek lo" pa ber chuan a ti a. An lungawi zan tawh lo tih ka hria. Mahse, chhaih rih ka la duh. 

"Nimin khan an nu ka va kawm a. Remsiama nen an inneih vangin in hnawtchhuak tihte ka lo hre ve a.. " ka ti hman chiah, Nu ber chuan, "A va mak ngai ve. Eng ti tur berin nge i lo kal? " a ti ta thlawt a. Kei pawh chuan engkim sawi hun a ni tih ka hai lo. Saiphai atanga Home minister thih dan thleng chuan ka sawi ta a. A tawpah,"Amanda khan Remsiama leh Nunmawia phuba laksak an duh vanga Home minister kha thah niin a ngai a. A chhui reng bawk a, mahse, a chhui tam hmain rukbo a ni ta a" ka ti ta ta dap dap a. An ngaithla uluk viau mai. 

Pa ber Pu Khuma chuan, "A tir khan sawi tur alawm. A pawi hle mai. Ni e, Amanda bo thute kha chu kan lo hre ve a, a bo hma khan min rawn be nghe nghe asin. Kan fapa thihna chungchang nen chuan a inkaihhnawih kher lo ve thei tho" a ti a. 

"Ni e, engkim hi risk takmeuh a ni. Nangmahni lamah rinhlelh kan nei tihna ni loin, zawhna han neih kha kan duh mai a nia" ka ti ve mai a. 

"Siama kha ka ui ngawt asin. Ka rilru pawh a na. Mahse, i rawn sawi dan ang khan ngaihtuahna ka la seng ngai miah lo" Pi Hlimi chuan a ti a. 

"Keini pawn kan hrechiang chuang lo. Mahse, Amanda'n Remsiama leh Nunmawia chungchang a tharthawh takah khan, rukbo a ni ta mai si a, chuvang chuan kan rinhlelhna kha a lo dik mai em ni ang? Tiin ngaihdan kan siam ta mai a ni" ka ti a. 

Pu Khuma melhin, "Ka pu, thup nei loin khawngaihin min chhang la, he thil hi in chhungkaw tan pawh a pawimawh hle tih i hria. Remsiama te nu hi khawiah nge a awm? A la dam em" ka ti ta a. A meng ngui lup mai. 

"Khatlaah an khawsa a, mahse, Siama nu chu nikum july thla khan a boral tawh a. Tunah chuan Siama putea te an ni tawh mai" a ti a. 

"Sawi nuam a ni lo ang a, mahse, kan ti ta sa sa, sawi ho zel mai ila. Anih Siama nu nen in inthen khan Siama hi kum engzat nge a nih tawh? " ka ti a. 

"Kan inthenin Siama hi a la piang lo. Ni e, sawi nuam tak a ni lo. Mahse, ka'n sawi vek law law ang e. Siama nu nen fa pahnih kan nei a, Siama u te pahnih hi an ni a. Khatih lai khan Ka hna vangin Mamit lamah ka awm a. Siama nu erawh hetah Sairangah ka nute bulah a awm thung a. Kan nu hian a beng lo chhu ngawng se la, Mamita nupui fanaute tel lo va ka han awm takah khan ka khua a lo har ve bawk nen, hei kan nu nen hian kan inkawp ta a. Ani pawh fa pakhat neiin a thlawi a, vanduaithlak takin a fanu erawh a boral a. Kan inkawp tih chu Siama nuin a lo hre ta a, kan buai chho ta a. Keini lah kan lo kal thui tawh angreng si. Mahse, ka pain hetiang zawng a tha lo ve tiin hotulu te biain Mamit atang chuan min la chhuak a. Siama nu te nen chuan kan khawsa ho leh ta a. Siama u chiah hi kum 3 a ni ve tawh. Tikhan nupa ang chuan kan khawsa ve leh mai a. Mahse, hei Hlimi hi ka ngai thei em em a, Siama nu hi kei aia upa a lo nih bakah chhangchhiat nen kan inneih tirh a pha tawh lo bawk si a. Ka iai tan ta a. Mahse, nupa nun erawh kan la hmang reng thung. Hlimi hi Aizawlah rawn awmin puanthui a rawn zir ta a, kan inkawp leh ta a. Siama nu chuan min man chhuak lehin a tuar thei ta lo va, min chhuahsan ta a ni. An chhungkua kha khatih lai kha chuan an awm thei a, inthen pawh a cho angreng viau. Bungrua rawn lain kan inthen chu a ni ta mai a. Ka fate pahnih erawh a hruai lo. "I nupui thar nen tibuai ve renh reng che u rawh se" a ti a. Mahse, a pi leh pute khan am duat a, ka khawih ve vak lo. Hlimi nen thla hnih kan inneih hnuah, "Ka rai" tiin Siama nu hian min rawn bia a. Keia ngaihsam chuan, "Nei mai rawh" ka ti a. Thla 5 lai a lo pai tawh a lo nia. A sawi leh danin kan inthen tirh pawh khan a rai tih a inhre reng a, mahse, a thinrim em vang leh ka laka a lungawi loh vang khan a chhuak lui a, ka rai tih a hriat chuan a rilru a danglam mahna tiin min hrilh duh lo reng a. Mahse, kan inthen atanga rei loteah Hlimi ka nei ta mai sia, a nau pai thu pawh chu a lo sawi duh ta bik lo va, mahse, a rawn lan takah khan a chhungten hrilh tura an nawr nsat em vangin min rawn hrilh a ni. 

Tichuan, ka ngaihsak lem lo va, nuam erawh ka ti chiah lo. Nau chu a nei ta a, Hetih lai hian Hlimi inentir kha Doctor khan, "I chi kawngah bawk a awm a. Fa nei lo la a tha" tiin a lo hrilh a. Zai turin an inti bawk. Siama nuin nau a neih takah khan, Hlimi nau awt lutuk khan, "La mai rawh. A pa i nia, ka pwm vek ang" tiin min nawr sek mai a. Fa nei thei tawh lo tura inngaiin a lungngai em em a ni. Siama nu te chu ka bia a, Khatih lai bawr khan an sumdawnna chu a tlachhe thut a, an khawsak a harsa chho dawn si a, tiin kan fa pianghlim chu kar khat lek a nih laiin min rawn pe ta a. Hlimi hian a chawi seilian ta a ni.. Siama hian Hlimi hi a nu dik tak a ni lo tih a hriatna a la rei lo. Chuan, Siama'n kum 3 a rawn tlin khan kan nu chu a inentir leh a, a chikawnga bawk awm pawh a awm tawh lo va, nau a pai ngam e an tih avangin Siama nau te pahnih hi a nei ve leh ta a ni" a ti ta dap dap a. Ngaihnawm ka ti kher mai. Pu Khuma chu a lerh ve hle mai ka ti rilru a. Mahse, Teteii, Siama nupui khan Siama chu a nuhrawnin a ngeih lo ang khan a sawi si a. Pi Hlimi lah chu a fel hmelin Siama lah chu a chawi len a lo ni daih si. Thil dik lo eng emaw chu a awm niin ka hria. 

Siama nu te address chu ka la a. 

"Siama nupui khi eng ang mi nge a nih? A fel em? " ka ti khawmawi a. An inmelh ralh mai. Sawi hreh an nei niin ka hria. 

Pi Hlimi chuan, "Aa.. A fel viau a, marwhchu, Siama nu tak ka ni lo tih a hriat hnu khan a danglam ta deuh a" a ti charh charh a. 

"Engtia danglamin" ka ti a. 

"Aa.. Chutia han sawi hluai tur chu a awm hran lo. A naute nen ka en dan a danglam loh nen, an pa kha a fuih khaw lo ka ti dawn nge, Aizawla chhohpui dan mawlh kha a zawng a. An hotute a va biaksak thul. Tin, ka thinrim vena em em chu, Siama a borala Sawrkarin zángnadawmna a pek tur kan chuhpui ve anga a lo sawi te kha, kan pa hian min khap hle lo se chuan han chhal kha ka náp a, Siama ralna sum zawng zawng, ka hnena Sairang khaw mi ten min pek pawh a bo abang awm loin ka pe vek a nia. Zángnadawmna phei kha chu ngaihtuah pawh kan ngaihtuah phak lo. Khatiang tel lo khan Pathian zarah kan la awm ve thei a, amah Siama uia sûn nak alaia khatiang thu thang kan hre zet kha chu rilru a na duh teh mai asin" a ti ta a. Mak ti angreng takin, "Chu! In chuhpui miah lo maw?! " ka ti hû a. 

"A teuh lo nasa lutuk. Pathianin engkim a hria e. Amah Teteii fing chalák lutuk thiltih vek. Lo ngai reng rawh. Tikhian a hmeithai ang a, reiloteah a chhungte a awmpui ang a, a pasal ralna hmangin a chhungte a chawm ham ham mai ang" a ti ta zêk a. 

"He mi khua tho hi em ni? " ka ti a. 

"Tuirial lam a nia. Zep thu a cheng lo, zu zuar chhungkua an nia. An pa ber hi zu sehin a boral tawh a. An zu innna lamah alawm Siama nen pawh an intawn ni. Tunah hian a nu hian pasal deuh reuh a nei a, Teteii nau nula leh an te ber mipa an la awm bawk a. A rawn mo tirh kha chuan a fel viau asin mawle"a ti bawrh bawrh a. Thil chu a mak riau. Teteii thusawi leh Pi Hlimi thusawi a inkalh tlat lai chu.. Hmm.. Hriat chhuah dan a la awm chêk ang chu.. Thingpui te ka in zawha chhuah ka tum lai takin an fapa niawm tak chu a rawn lut a. Valtea an tiin ka hria. Siama nen khan an inang ve lek lek, a cher zawk a, tin, a sang zawk bawkin ka hria. Kan inbe lem lo a. Mahse, an rilru hriat nan, "A nih ka'n haw chho dawn ang e. Engpawhnise, Teteii khi inngaihven ve deuh chu a tha ka ti mang e.. An nufa chauhin an awm sia" ka ti zauh a. Valtea chu ka chîk ru viau, a ner sak chu ka hmu ngei e. Pi Hlimi chuan, "Ni e mawle.. Mami hian 'Ka rawn awmpui dawn che mi? ' a han tih lahin, "A ngai lo" a ti deuh tlat sia. Khatiang khan sum chungchangah kan lo thang mawi tawh lo nen, han ngaihven hurh kha kan inthlahrun phah vek alawm mawle" a lo ti mawlh mawlh a. Ka chhuahsan ta a. Rilru a buai ve zëk mai a! Teteii hmel ka mitthla a, a pasal chhungte chanchin a sawi lai te, dawt sawi hmel kha a pu si lo. Pi Hlimi lah khan titak deuh leh thinrim takin pawisa chungchang kha a sawi bawk si. Aa.. Amanda awm se chuan an hmelhmai lan dan zawng zawng nen kaikawpin, a tu zawkin nge dawt sawi a hre leh thei awm si a.. Mahse, a awm si lo. Ka thaw hawk. 

Station ka thlen chuan, a lo tlai ve duai tawh a. IO roomah lutin Sir Buata ka va bekbawr a. Ka kalna report ka pe a. 

"Sam, kan rin dan hi kan kalpui thui ve thei tho a nia. Amanda bo dan hi Home Minister thihna nen a inzawm kher lo ve thei ania" a ti sup a. 

"Ka hria alawm, sir, mahse, rinhlelh tur kan hre si lo chu a nih hi" ka ti nghut a. 

"Record hlui ka en a, Amanda case chinfel tawh te, Thla tir khan hmana a chinfel, A awmpuinu thata pawngsualtu ni bawk kha bail-in a rawn chhuak tih ka hria a. Kha pa te pawh kha mitmei deuh chu a ngai maithei. Amah kha pawisak vak nei lo, hmeichhiat mipatna lama chak lo tak kha a nia. A phuba la duh hian Amanda hi ru bo te pawh a ni ve thei tlat! " a tih chuan ka khur ringawt. 

"Ni lo, Sir, an pawngsual tur a ni lo. An tithei lo vang. An pawngsual tur a ni lo" ka ti nghek a. Min melh vung vung mai. Ka insum zo thlawt lo a ni ber e. 

"Ka hrethiam che alawm. Tihdan ka hria, nangin i kalpui chin kha bawhzui la, keiin kawng dang ka lo dap ve thung ang. Report kan inpe zel dawn nia" a ti dam ta thlup a. Ka bu nghut. 

Pu Khuma min pek, Remsiama nu te address chu ka ak ran a. Naktuk lamah lo chuan hun ka nei tawh rih si lo. He mi te hi va hmu phawt ila, kawng dang ka neih tawh ngang loh chuan, Amanda hi ka pawng zawn tawh chiam mai ang chu.. 

Zan dar 11 a pel tawh a. Cigaratte zuin tukverh bulah ka la thu veng veng. Khua chu a thiang kuk a, arsi pawh a pe uar mai. Tunah tak te hian khawiah nge a awm ang le? Min ngaihtuah ve ang em? A rawn tlan chhuah thutte ka beisei a. Chuvang ania ka phone pawh ka off duh loh. Keimah min rawn be hmasa ber dawn tlat tih ka hria a ni. Ka phone rawn ri tak tak chuan min tiphu zawk mai. 

Thinphu dup dupin ka ban a, Pu Buatsaiha a ni tlat! Hlauthawng angreng takin ka la a. 

"Sama, Phunchawngah hmeichhe ruang an chhar a.. I zuk kal ang hmiang" a rawn tih rual chuan, "Amah a ni tih sawi miah suh. Amah a ni lo.. A ni lo" ka ti tuar tuar a..