Thinlung - Last

THINGLUNG.. (LAST)

Ziaktu: Toni Rálte

(Adds kha aw 😁😘

"Eng nge i tih hi? Engtin nge? " Bena aw chu a khur dat dat mai. Mak tihna bakah thinrimna a tel bawk. Tluanga erawh a hamhaih luatah engmah a ka atangin a la chhak chhuak lo. 

Ni e, Kan thawhpui Tluanga fapa Sangtea rubotu leh pawisa phûttu chu kan thianpa tho Zuia lek a lo ni! Hei hi a mak i ti lo a nih chuan, mihring nun i pawh pha lo a ni ngei ang. Engvangin nge a mak loh ang? Sangtea bo zan khan ka inah Zuia te nen chuan chaw kan ei khawm a, Zuia phei chuan Mamawii a belbul nghe nghe a nih kha mawle.. A mi rawihpa erawh kan hre mai lo. Amah ngeiin a la sawi ang chu. 

Zuia chu a rawn hawi chhuak a, zám tih hriat zet hian, "A bul chu Tluanga a ni" a han ti dat a. Tluanga a lo mengphawk viau. 

Chutah a aw a thian kharh a. "A nupui khawhar taka daha uiresan rengtu, Tluanga avang hian Seni leh kei hi kan inzawm ta a ni" a ti ta a. Seni chu ka va melh káwk. A lo kun tlat thung. Tluanga a che zawk a, mahse, Bena'n a lo dang hman. Sangtea tak pawh naupang a la ni a, a hrilhhaithlak lutuk. A nu leh pa a entawn sek mai si. 

"A dik dawn lo e. Inphur phei phawt teh ang u. He thil hi tlangzarh chi pawh a nih hrep loh hi" ka ti nghut nghut a. Theih ang angin kan inphur ta a. Bena'n Seni te nufa a phur a, keiin mi dang zawng. Tluanga chu insum rih tur leh kut thawh rih lo turin ka fuih a. A la hamhaih em vang ni maw, chet lak zai a rel bik lo. 

"Engtin nge inawm tih kan hriat loh theih le? "Zuia'n a tih chuan ka khi suk. Motor kan thuhrukna a hla bawk a ni. Kan bihrukna lah a fianrial si a. 

"Chuan, zaninah pawisa kan inpe dawn tih hi tuin nge hrilh che u" a ti leh a. 

"Keiman mawle.. A chhan chu Seni ka ringhlel tawh a. Ka hriat hlau taka phone a khawih leh a bia hi ka hmu zauh zauh a. Police ka nih angin ka nupui chu ka veh a ngai miau si a. Mahse, Zuia, nang kher hi chu ka ring pha lo asin" Tluanga chuan ka chhan hmain a lo ti vat a. Ni e, nimin piah tlaia Tluanga nen kan inbiak khan an nu chungchang a rawn sawi a. Sangtea bo atanga a phone a khawih nasatzia leh tuar anga a lanna phena a fimkhurzia te chu ani Tluanga chuan a haider seng ta lo va, "Kan nu hian thurualpui a nei a ni mai lo maw? " tiin ngaihdan a rawn nei a. Bena nen kan bawhzui nghal a. Amah Tluanga chu kan tan spy a ni zui lo thei ta lo a ni. Tin, Nizana an rawn call khan, Seni chuan Police hrilhhriat a duh tawh loh thu a sawi tak kha. Tluanga pawhin a derin a lo pawmpui ta vat a. Thil a kal tluang dawn emaw tiin Zuia te lam an rawn che ta kha a nia. Tluanga an lo ring ve kha an tisual ta a ni. Kan Tluanga chu a leplerh ang chiahin lemchan pawh a lo hnehsawh e. A tira amah kan lo ringhlel te kha a nuam lo letling. Mahse, a ngai haw lem lo turah ngai ang. 

Station kan thlen chuan a tlai tawh angreng a. Mahse, thil thlen dan hre chak bawk si chu mut mai kan tum lo. Zuia leh Seni te nen kan inhmachhawn ta ran a. Zuia pwh Police ve tho a ni a. Kan indawr dan a hre tawh bawk nen, dâwp vak an ngai lo. Engkim a chiang tawh bawk a. 

"Tluanga nen hian ni e, thian inzui reng reng, zu pawh in duna inkawp chawt kan ni a. An inah pawh ka tlangnel. Ngaihzawng a neih pawn hre hmasa ber ka ni ziah awm e. A tha lo tiin vawi tam ka zilh ve fo, mahse, a zawm lem lo va. An ina chuangkai ta reng na na na chu Seni nen pawh kan innel lo thei lo va. Seni ka khawngaih rualin Tluanga thuruk pawh ka zepsak a tam zawk. Zan khat chu Seni hian msg-in an pa awmna min rawn zawt a. Chumi tum chuan Tluanga leh Sangi inkawp lai an riahdun tum a ni a. Tluanga ka call nghal nghe ghe. Mahse, a haw ta chuang lo va. Khata tang khan Seni nen chuan a pasal chungchangah kan inbe chho ta a. Rawn tah zawih zawih changte a nei thin. Ka khawngaih thin khawp mai. 

Hun a kal zel a. Inbiak tam na na na chuan kan lo inngaina chho a, an ina len luh te pawh a nuam chho viau. Ni e, a dik lo, a tenawm tih hre mah ila sual a chak si a. Seni ka khawngaihna leh ka nun khawhar lai lo innangchin nen, amah lah pasal vanga khawhar leh tuihal a ni bawk a. Mitmei kan inhmuh ta zauh zauh a ni. Kei chuan Seni hi demna ka nei lo. Keimah hi ka demawm zawk. Ani chu hmeichhia a ni a, a derthawng a, a chak lo bawk. Zahawm leh thianghlim taka lo fuihtu tur zawkin a ni lo lamah ka hruai peng ta si a. Mawhphurtu ka ni. 

Seni te dinhmun chu inhriat angin a harsa ve em em a. A nu hmeithai niin, a u te chhungkua nen an khawsa a, an khawsak a harsat bakah Seni leh a u hi pa hrang an nih vangin boruak eng emaw a awm lo thei lo va, A pasal hi thenin va fin dawn se a chan chhe tur a ni si. Chuvanga tuar hram hram pawh a ni ve. Mahse, Tluanga hian lerh a bansan thei ngang si lo va, keini kan kal thui ve zel bawk a. Rem kan ruat ta a ni. Seni hian a pasal hi then ta se, Sum pawh chhuah se engmah hlawkna leh han chan tur a nei dawn si lo va, sum tlem azawng chhuahpui a tum ve tlat si a. Chuvang chuan loh theih loh vangin Sangtea kha kan ru bo ta a ni. A tirah khan rawn puanzara pawisa inpek tir mai kha ka tum ve reng a, mahse, Police ve tho ka ni a, rinhlelh ka kai ang tih hlauin an in lamah te pawh ka va lang tam ta zawk a. Sangtea pawh tha takin ka enkawl, kan inhriatsa tawh vangin a tirah mak a ti lo. Ka mirawih hi ka nuteii fapa a ni. Khami tlai khan Seni pawn dawt a sawi lo thei lo va, Sangtea kha a pite ina kal turin a tir zawk a, kan lo remruat tawh angin Rama hian a lo chang a, a ru bo ta a ni. Ka in luahah (Zuia hi Lunglei khua a ni lo) kan thukru ta a. Sawi tawh angin kan inhre sa a, a tirah chuan hrehawm pawh a tih hmel loh. "I nuten an rawn lam dawn che" ka ti a. A awih mai. Mahse, a rei ta telh telh a. A dinhmun a hrethiam chho ta a. Thawm a neih loh nan ka chiu mu thin. Eitur pawh ka pe tha. Rin aia rei kan inkawl tawh si a, Police leh chhungkhatte beidawn hun kan nghak ve deuh bawk nen.. Kan tum dan chuan khang sum kha ka dawn hunah, Seni pawn a pasal a then ang a, kei pawh transfer ka khel ve mek bawk a, ka insawn chhuah fel hunah Seni nen inneih kan tum a ni. Amah Seni hian sum kha chhuahpui tum ve tlat lo se heng buaina hi kan tawh a rinawm loh a. Mahse, a rikru ka hrethiam ve tho. "Kha chen an tan ka thawkrim a, tlin takin ka enkawl ve a. Ka bungrua ringawt chhuahpui chu ka duh bik lo, Tluanga sum tlem azawng hi chu ka chanpual a ni, tin, Ngaihzawng min neihsan reng reng a, ka then ngai lo. Tunah kawp bik a nei si lo va, amah thiam loh anga lantirna remchang leh chhuanlam kan dap ve a ngai alawm " a ti ve tlat a. A dikna chen pawh a awm ve a. Mahse, hei kan hlawhchham ta chu a nia. A zahthlak viau naa,sawi loh theih a ni ta lo a nih hi. " Zuia inpuanna chu a ni. 

Sawi tur a vâng duh khawp mai. Tluanga lah a kut a nuai a nuai ringawt. 

Zuia bawk chuan Tluanga melhin, "Thianpa, min haw viau ang tih ka ring. A zah pawh ka zah ru khawp mai che. Mahse, i nupui nen hian vawikhatmah kan la mudun lo tih erawh Pathian nung hming chhalin ka'n sawi hram ang e" a ti nghet charh a. Chu erawh mak ka ti. Awih lo ngawt dawn ila Zuia hmel thutakzia chu a fiah si. Kan buaina tur a ni lem lo bawk. 

Seni erawh chuan thu kamkhat mah a chhak chhuak lo thung. Tlangval thalai ngatin fa pathum nei tawh mi nu a lo duh hi a mak viau em? A mak lohna a awm ve theihna chu Seni hi sawi tawh angin pasal a neih hian a la naupang a, tunah fa pathum nei mah se, kum 40 pawh a la tling lo. An hulhar chho nen, a no suk mai a, a nalh zeih zawih viau bawk. Fiamthuin Tluanga bulah pawh, "Innu hi engtin nge i lerhsan theih zawk" kan ti fo mai.. Amah Tluanga tak pawh hian, "A tawpah hi chuan kan nu lo chu ka ti leh nge nge tho.. Han thlak tur em chuan a uiawm ka ti" a ti uang ve fo. Mahse, a bul chu Zuia sawi kha ka pawm. Tluanga leplerhnain a hrinchhuah buaina a ni. Mang a ana, khua a har a, nupa nuna tuihalna namên lo a thlen tawh hi chuan pawisak neih a har viau tia an sawi ka hre tawh. Seni ka dem lo ni loin, hetiang rilru puttira khawhar tawpkhawka siamtu Tluanga mawhphurhna pawh ka hmuhhmaih lo. An inkara tlazep, Zuia hi chuan a dik lohna a pawm thiam viau mai. Tin, ka en ka enin, Seni hi a hmangaih tak tak ni te pawn ka hria. Han iaina a neih loh piahlamah Seni avang chauhin tih loh tawp tur a tih phah bawk a. Zuia pawh han huata han dem rawn chiam tur chu niin ka hre chuang lo. 

Chhungkaw mualphona thlen thei a ni bawk a. A tu amah chuan tlangzarh loh kan ti ta a. Kan department huangah pawh hre lo an awm tho. IO ber a ngawih tlat chuan, hre tur chin bakin an hre lo. Sangtea ber an hmu kir ta bawk a. Tluanga nu leh pate lam eraeh chuan thudik an hre lo thei lo va. Mahse, mak ka tih em em chu, Tluanga pa chuan, "Ka fapa dik loh zar kan zo a nih mai mai hi. Chhungkaw pa a nih inhria nise tiang buaina zahthlak tak kan tawk lo vang. Seni hi ka mo a nih piahlamah ka tute hringtu a ni a. Amah bak ka tute enkawl tur hian ka ring zo lo. Mahse, a pasal thutlukna erawh ka palzam lo vang" a ti hmiah mai. Tluanga tan an nu chu awlsam taka han neiha han pawm leh a harsa ve bawk ang a, an han inthen ta ren rawn a. An fate erawh Tluanga nu te in lamah an awm thung. An kal zel dan tur erawh hunin a hril ang chu.. 

Isabella sawi angin Aruati pawh a rawn zin a niawm e. Tin, Lawma te pawh an ko hawng tawh a, inneih an tintuah ve mek e. Tluang takin innei teh se. Aruati chu ka la hmu ve lo va, Tluanga te vangin buaina neuh neuh kan la nei ve bawk nen. Zuia bail theih dan kawng kan dapsak ve a, kan thianpa tho a ni a. Kan hawisan ngawt thei lo a ni e. Tin, Bena bialnu Lucy lo rai ve bawk nen.. Ka chhehvel boruakah ka tal buai pherh ve erh mai. Kan Bena dek duk lah chu Lucy a rai tih a chhungte a'n hrilh ngam lo ngei ah! A va hahthlak tak. Kei man ka hrilhsak ta a. An in an la sa zo chiah si lo va, Lucy an pawm lo ni loin an zawh hunah law law insuih an rel ta a nih kha.. 

"Bella hi rai ve tawp rawh" Bena'n a ti pek a. Kan nui nasa. A rai ve lo ang tih a sawi theih miah lo. Kan englo ve tho sia. 

Ka hunawl neih hmasak berah ka va leng phei ta nge nge a. Ruatdiki lo zin vanga han hel ve deuh ka nia.. Nuam ka ti chiah lo a ni. An lo awm dun rial a. Aruati chu a cher kuam mai, a lainatawm reuh mang e. Tv enin kan thu thap a. Bella chuan in chung luah a nih thu a sawi a. "Tuin? " ka ti hu. 

" Rinpuia a nia, DC office-ah a thawk ve a niawm e. Kan la inhrechang vak lo. " a ti mai a. 

"A nih in hnuaite nen chuan in inpawh tha em? " ka tih chuan, "Aawii, an fa te ber phei chuan min ngen tawh vel" tiin a nui har har a. Ka ngaih a ngam sawt mai. 

Aruati lam hawiin, "Inei thau i ngai anih kha.. Chuan, i nute an dam tha em? " ka ti luam a. 

"Umm dam e. Nia, ka inei thau dawn. Bella hian min chawm dawn alawm.. Chuan, i in luahah pawh chaw kan la eikhawm ang chu" a ti ve sar sar a. Han en mai chuan, Bella nen kan relationship chu a pawm thiam ve tawhah a ngaih theih. Mahse, kan boruak erawh a la ni he hu tho. Nuam lo tih chin a awm ka tihna a nih chu. 

Ka leng rei lem lo. Mut hahdam te pawh ka chak ve bawk a. Bella in min rawn thlah a, "Fimkhur la, eng emaw chetsualna tur lakah " ka ti sup a. Mawlhtu ka neih vang ni maw. 

"Umm.. Ka hria lawm. Engmah a thleng lo vang. Bakah amah saw a lainatawm. A rilru a rit viau anih ka ring" a ti a

"Inboruak a that chuan ka tan pawh a nuam.. I fel kha" ka ti leh a. Ka kalsan. 

In ka thlen rualin Mamawii a rawn lut ve chawt. Dar 10 a ri tep tawh. A rui deuhin ka hria. Thutthlengah a thu hnawk a. Ţap tiau chungin, "Tinge Alexa hi ka ta a nih theih loh? " a ti ta mai a. 

"Eng nge thleng? " ka ti vat. 

"A bialnu a rai" a ti sep a. 

"Chuan, an innei dawn em ni! " ka ti a. Rai pawh chu an va tam ve mawle aw. 

"Umm.. Alexa chhungten neih loh an phal lo" a ti a. A hmai a hup a, a inhnip hlap hlap. A bulah ka thu thla a, "Mate, thil hi rem ngang lo a awm ve alawm" ka ti a. 

"Alexa ka dem thei miah lo hi ka mawl tiraw? Ka nu vang a ni. Ka nu hi ka hua" a ti nghat a. 

"Chutin nu te an dem ngai lo. I tana tha an duh vang alawm" ka ti vat. 

"Ka hmangaih hi nei ila ka hlim ang a, nunphung tha takin ka nung thei bawk ang" a ti a. A tap nghal zel bawk si. Mamawii, mi nawi, ho ve tak, thawveng tak kha a na ve takzet a nih hi. Ka khawngaih a, tih vak ngaihna ka hre si lo. 

A phone a rik vangin insut hlawp hlawp chungin a en a. Alexa'n a lo call! 

"Alex" a ti zawi sap a. 

"Inhmu ang. " a rawn ti a. Min rawn melh vat. Ka lo bu nghut ringawt. 

"U Imma inah ka awm" a ti a. Alex chuan a dah nghal. Rei pawh kan nghah hmain Alex chu a rawn thleng nia. Mamawii nu te an rawn chhuk teh chuan aw.. 

A hmel a phelh phang a, ruih chu a nei loin ka hria. A hmel landan a hlim lo tawp a ni mai. Min zah zo loin an pahnih an inhmu chiah chu an inpawm vawng vawng mai. Hmuhnawm ti zetin ka lo thlir vung vung thung. 

"U Imma, min hrethiam rawh aw. Ka ngai em a ni" Alexa chuan a ti a. Ka bu ringawt. 

"Duatte, min en teh.. Zanin hi kan inhmuh tawpna ni rawh se aw.. Khatin tap suh. Nupui ka nei tawh dawn a. Nang pawh tha deuhin awm la, i nute thuawih la, pasal tha tak i nei dawn nia" harsa ti taka Alexa'n Mamawii bek tawna vuan chunga a sawi lai chu hmuh hrehawm ka tih deuh vangin chokaah ka phei daih. Ka cool ruih mai. Naupangte chu an la ni, mahse, Dinhmun khawsak vang mai maiin an innei thei ta dawn lo chu a nia. 

"Lex, nei suh.. Khawngaihin.. Nei lo mai rawh.. Umm.. Nghak ang. Ka nu rilru ka hmin thei ang" Mamawii'n a tih lai chuan ka lo inhumruh ve vak ringawt. He hmeichhia hi dem chi pawh a ni lo. 

"Duatte, khati zawng chuan min nawr lo hram rawh. Pa tel loin ka seilian tawh a, ka fa hi chuan pa a nei tur a ni. Ka ngai dawn lutuk che, mahse, a rem thlawt lo a nih hi.. Min hrethiam rawh aw. A harsa zawng chuan indawr lo hram ang. Kan hun tawp a nih hi" Alexa chuan a ti sup sup a. Puitling ka ti ru kher mai. Ka ngaisang letling e a. 

"Ka virgin i hawn kha.. Ka taksa hi mi dang tan i phal mi? Mawh" Mamawii lah a tap hek hek tawh si.. Alexa tan chuan dawnsawn a hrehawm ve ngawt ang. 

"Mi dang tan ka phal vang che ni loin, kan insiamrem a ngai tawh anih hi. Keimah vanga i chhiat ka duh lo. I nu leh pate tan ka tling ve ngang si lo va. Engtikah emaw chuan min la theihnghilh mai ang" Alexa chuan hnukulh teuh chungin a ti a. Ka va khawngaih dun tak. Ka va phei a. 

"Ka mutsan ang che u aw. Mamawi, i nute an rawn chhuk chuan min lo kaitho dawn nia" ka ti a. Ngawi rengin room lam ka pansan. Ngaihtuah zui pawh ka duh rih lo. Mamawii chhungte ka dem. 

"Bella, i period tawh em? " Bella nen kan inbe ta daih a. Rai ve se ka duh deuh tlat pek a nih chu. 

"Period mek" a rawn ti zui! Ka ner sawk. 

"Ngati nge? " awmze nei lo zetin ka va ti a. 

"Ka period lohin.. Ngati nge? " a rawn ti a. 

"Rai ta che" ka va ti tháwr. 

"Kan la inneih loh hi" a rawn ti thung. 

"I mikhual chu khaw nge a mut? " ka va tih chuan, "Kan mu dun, a mu hrang ngam lo va. " a rawn ti a. 

"Ka khawngaih" ka inrin hmain ka ti a. 

"Kan inang. Bialpa tha deuh nei se" a rawn ti a. Kha chen ka lo duh tawh chungchang sawi sek hi nawm pawh a nuam lo. Kan sawi lo thei thin si lo. 

Dar 4-velah Alexa a haw a. Mamawii erawh a riak zui nghal. An inhneh ta nge, zinga a haw dawn chuan mitmeng hnual raih hian, "Bangalore-ah ka chhuk leh mai ang. Ka move on hma chu ka lo haw tawh lo vang" a ti nghat a. 

"Ka nau, chhel takin aw" tiin ka thlah ta a nih kha.. Tuarchhuak hram se ka duh ngawt mai. 

Haulawngah zin a ngai thut a, hna thilah. Zan 2 kan riah a ngai dawn lehnghal. Boruak thar hipna chance a ni mai. Bella nen pawh kan inthlah tha hman lo. Kan thlenna hmun a nuam a, a zia viau e. Tleirawl lai ang mai mai kan ni tawh lo va, ngaihzawngte nena han inbiak hiam hiam hun lai kan pel tawh bawk a. Thiante nen kan titi mai mai. Duty hunah kan duty leh mai a. 

Zan khatna chu ka mu hleithei lo, mut than lohna hi chu a buaithlak a ni. 

Hawn dawn zan tirah, "Bathroomah ka tawlhthlu a, ka kerek hi ka tina deuh a, ka kal thei der lo" a rawn ti a. 

"A va pawi e aw. Damdawi te i ei em? Hnawih chi te" ka ti a. 

"Umm.. Hei kan tuam a. A tur ve deuh a, ka tha reng. Rinpuia khan chaw a lo ei dawn a" a ti a. 

"I sawm mi? " ka tih chuan, "Sawm chiah lo, amah zawkin sa a rawn lei nual a, ei ho ang u, a tam sia a tia" a ti a. 

"A tha lawm.. Aruati nen khan tihpui daih la" ka tih chuan a nui hak a. "I va ui lo ve" a ti kher. 

"Kan tan a nuam sawt dawn alawm.. Min la mawlh ve run sia" ka ti a. 

"Eirawng an bawl dun a, an inpawh viauin ka hria.. Chuan, lo haw vat teh.. Ka pangchang chak" a rawn ti a. 

"Naktuk zanah ka lo riak ang.. " ka ti ve zat. 

Thian ten an lo nei remchang lehpek a. Kan han lem leh hlak kha. Tam phei chu a ni lo. Dar 11 velah Bella ka call a, a ring quit thak vangin ani hi a nachhawkna ei nen, a muh a nih ka ring. Kei pawh ka thil in khan min tinguai ve deuh nen, ka mu zui ve ta mai. Ka mumangah Lydia leh Ka nu te hian, ka muhil hi min kaihthawh an lo tum nasa mai a, ka hmu reng, ka harh thei reng reng lo. Ka nuin ka bengah a rawt pawt nghek a, ka harh zawk mai. A va ho e aw. Mut leh mai ka tum laiin ka phone a rawn ri dut dut a, ka phu zawk nghe nghe. Isabella a ni tlat! Dar 2 a ri thuak tawh sia. Ngaihtha vak loin ka la a. Hello ka tih rual chuan, thil ri deuh sawk leh, hmui hup chunga rak chhuah tum ang deuh hi ka hre ta a. Ka thu hlawl, Bella ka ti nghek a, ri sawk sawk leh ri thlawrh thawm bak ka hre lo. Ngaihthat lohna hlirin min bual. Ka tho vat a, tih ber tur hre loin ka'n ding ren rawn a. Phone lah chu ka off ngam der si lo. Koh pawh ka ko ngam tawh lo. Thiante pawh ka thawmah an rawn tho ve a, "Ka hawn a ngai" ka ti nghut a. Ka insiam mawlh mawlh

"Eng nge thleng? " an tih lahin sawi tur ka hre bawk si lo. Chutah ka hrechhuak thut.. Aruati ka call ta nghal a, a ring quit thak. Vawi 5 tal chu ka call hman ang. A la thei thak lo. Eng nge an chungah thleng ang le.. Thiante ka tihrilhhai hle tih ka hria.. Sawi tur ber ka hre bik si lo chu a buaithlak a ni. Ka insiam zawh chuan.. Ngawi rengin ka chhuak nal nal. Ka â ta thut emaw an tih loh chuan a mak ang. Mahse, chulam chu ka dawn si se peih lo. Ka Bella hian buaina a tawk niin ka thinlung hian min hrilh a ni. Chak zetin Haulawng chu ka chhuahsan ta a. Aruati leh Isabella ka call chhawk. Isabella chu ka call tlang thei tawh lo va, Aruati lahin a la thei si lo. Ka sahal a ni ber. Ka tlan chak zia kha min hmutu awm se, Accident a phu e min tih ka ring. Motor tawh tur an awm tawh lo bawk a, Lunglei pawh ka thleng hma viau e. Bella in chhak kawngpuiah motor ka dah a, a tlanin ka tlan thla nghal. Kawngkapui an kalh si avangin a room lam kawngka ka pan a. Chu pawh a inkalh. Parda a inzar vek si a, chhunglam ka hmu thei si lo. Auh nghek ngjek lah ka ngaih ang thleng lo se mi ka tiralkhel ang tih ka hlau si. Kawng dang ka nei ta si lo va, tukverh darthlalang chu ka hnek keh ta rawp a. Bar an la dah tho a, luh ngaihna chu a la awm chuang lo. Mahse, room chhung ka va hmu thei ta.. Ka thil hmuhin min thawn nasatzia chu aw.. 

Ka Bella chu khum-a a lu nghatin a dul vel thi nuaiin a lo thu mu a, a harh lo tih a lang. A piah lawk chhuatah Mipa ka la hmuh loh hi a nak atanga thisen baw nuai bawkin a lo thal reng bawk. Ka sahal a ni e. Tin, ka duh loh tawp bawk chu Ka Bella chu a kawr a thler nuai a, kekawrte nen chauh a ni a awm ni.. Ka duh loh thil ber ka hmu chu engtia chet tur nge a hre lawk lo. Mahse, Training chhuak tawh nge nge chu ka chiái rei lo ve. Hmanhmawh zetin Bella in hnuai luahtu te ka zuk kai tho ta a. Pa ber a rawn tho a, engmah ka hrilhfiah hman tawh lo, ka thianpa Bena ka call bawk. Police ni mah ila, report ka pek ve a ngai tho. Kawngkhar kha keimah maia tihchhiat ngaihna a awm loh vang ania in hnuaipa pawh ka zun pun ni.. Hreipui nen kan hmachhawn ta a. Vawi li vel kan cheh hnuah a chhe ta hram. Kan thawm dim hleihtheih a ni ta lo va, thenawm khawvengte pawh an rawn tho ve sap sap e. Kan luh rualin parda ka pawtthla lawp a. Bella chu ka tuam nghal vat. Midangin an hmuh ve ka phal lo. 

Kan che ta mawlh mawlh ti mai ang. Bella leh Mipa chu a rang thei ang berin damdawiin lam kan panpui ta a. Ruatdiki ka rilruah a rawn lang zawk. Ka lo hrechang tawh lo va, ani pawh dinhmun hlauhawmah a ding ve thei. Damdawiina kan dah hnu, Doctor ten an en mek laiin ka let leh vang vang a, An lo la awm nual, Bena te an lo thleng tawh bawk a. Mikhual room ka pan nghal, a lo inkalh lo a. Ka lut nghal. Ruatdiki chu khumah saruak vekin a lo mu anih chu! Ka thinlung hi a na zawk zawk nia! Nikhua a hre miah lo bawk a nih hmel. Rang takin ka tuam tha sawk sawk a, Bena te an rawn lut ve bawk. Ruatdiki chu ka tuam lai pawh khan a taksa kha a khawng ka ti reng a. Bena'n, "Thianpa, a mar ka hmu zo miah lo mai" a tih chuan, Ruatdiki a thi tih ka hre thei. Ni lo.. Ka thu hnawk a. Eng nge thleng hi.. Engtin nge he thil hi a thlen theih? Ni lo, mumang mai ni zawk rawh se. Ruatdiki a thi maw? Hei kher hi chu ka ngaihtuah phak lo asin. Ni e, ka hmangaih hmasa, ka khawihchhiat phal ngai loh, a kuma kum ka nghah, harsatna tam tak ka paldunpui a duh vang ni miah lo va min thlauhthla ta, tuna ka hmangaihna ngena pawisak nei lova che ta mai.. Hmeichhia kha a thi maw?! Mak ka tihna leh ka awih lohna a inzat thuak awm e. Postmortem tura an phurh dawn te chuan chechang loin ka ding khawng reng. Bena'n min hrethiam takin, "Ka lo buaipui vek ang. A la dama te buaipui zawk rawh. Ka thian, a mak khawp mai. Mahse, he thil titu hi chuan a phutawk hremna a hmu ngei ang" a ti nghet charh a. Ka melh ngai ka melh reng thung. 

"A chhungte i hrilh a ngai a nia" a tih chuan ka phu uih. Hmanni lawkah an fapa an chán a. Tunah an fanu neihchhun chu saruak ngalngatin thia hmuh a ni tih hrilh turin ka chak tawk lo aniang e. Bena ka pawt a, ka phone ka pe tawp. A bu nghut a. A lo buaipui tawh mai ang chu. Engkim chu mumang ang ruaia ka hriat avangin chiang takin ka hre lo. Ka sawi thei hek lo. Damdawiinah ka chho leh a. Ka tei ka tei ringawt. 

Khua a rawn var a. Lunglei khuaah chuan chanchin dang reng sawi tur a leng lo. Isabella leh a mikhual, a cousin te chanchin chauh lo chu. Ruatdiki postmortem result pawh kan hre thei ta. A kawchhungah Alprozolam leh phynetoin hmuh a ni. Mi dang tana mutthilhna leh muang siaia an awm theihna damdawi kha Aruati tan thihpui tham a lo ni si a! Tin, pawngsual a ni a. Mipa chi hmuh a ni bawk. Kha mipa lo awm ve kha, Bella in hnuai luahtu khan Rinpuia a nih thu a sawi. Bella in chung luahtu kha. Harh chhuak zo loin a thi ang tih ka hlau ber awm e. Ni e, a thi tur a ni lo. A thih chuan a nuamsa lutuk dawn. Ka phal teuh lo. 

Aruati ruang pawh tha taka siamfel niin, an chhungkhat ten an hlawm ta a. Aizawl atangin an rawn phei dawn bawk. He lai taka ka dinhmun hi min han ngaihtuahpui teh u. A harsatzia hi sawi ngaihna a váng hle. Bella ngaihtuah ngai, rilru kil khatah Aruati awm bawk. Thinrimna leh tawrhna hlirin ka khat bawk.. Ka â daih lo kha a mak! Ni lo, ka â huih chuan ka ring. Aruati ruang an kalpui hnu chuan, thianten min fuih liam liam bawk a. A la dam Isabella lama rilru pe turin ka inhumruh ta a. Ka phone pawh Bena'n a kawl daih a, tumah be theiin ka khawsa rih lo bawk. Ka chhungte pawn min hrethiam tho ang. 

Chawhnu lam tlai dar 3 bawrah Bella chu a rawn harh ta. A meng á hu mai a. Kan lo kil thap lah tak a.. Mahse, a hrechhuak leh ta nge.. Tap chhuak si loin a mittui a luang a. A hmui a phun sep. 

"Aruati" a ti niin ka hria. Aw.. Ka Bella duhtak, eng ang hmeichhia nge maw i nih le.. 

Doctor ten tawng an la phal rih lo bawk a. Ka khap vat. Aruati chanchin pawh ka hrilh duh lo. Tunah tak chuan ka rilrua awm chu, "I dam veleh kan innei ang" tih chiah. Amahin ka awmtir tawh dawn lo a ni tawp. 

Zan dar 9 velah Rinpuia pawh a rawn harh ve ta a. Police ten kan dinchilh thap sia, a zám ve khawp ang. Hmuihmul tlem a nei a, khabe hmul a nei bawk. A mitmeng chu a zim lam deuh a ni a, pa ngo vung mai, palian ve tawk tak a ni bawk. A biang dinglamah hian ser a inrinthla ruak a, chu chuan a tilang nunrawng deuh bawk. A tuk nghah phawt a ngai. 

Bella te chunga thil duhawm lo a thlen atanga ni 4-naah daih thudik kan hre thei ta a. Bella sawi dan hi sawi hmasa ta ila.. 

"Chaw a lo ei a, sa a rawn lei nual a. Kei chu ka ke ka tihnat vangin ka mu a, Aruati nen rawng an bawl a. Zanriah kha dar 7 velah kan ei ang. Kan ei kham chuan tv te kan en ve leh a. Kei erawh ka kerek nat vang khan muta movie en daih ka duh a. Ka mutsan ta mai a. Movie pawh ka en ta lo, namen loin ka mut a rawn chhuak a, ka muhil ta daih. Min khawih nawk nawktu an awm vangin ka harh a, Rinpuia hi ka khumah lo thuin ka kekawr a lo phelh mek a, ka rak tuarh. Mahse, min rawn hnek chawrh a, ka ka a hup nghal. Kan inchai ta a, ka ke a nat vangin ka che tha thei si lo. Bakah ka zawi em em bawk. Min hneh ngei dawna ka hriat vangin ka mangang tawh takzet a, ka theihtawpin ka tlawh a, ka tlawh thla ta a. Remruata ka call ta ngjal a, a ring mek laiin Rinpuia chuan min rawn chhuhsak a, chhuatah a thehthla ta a. Kan inchai leh nghal. A chak nasa si a, ka tlawm mai dawn a nih hi ka ti hman tawh. Ka rilru la fim ve tlemte chuan pawhdawhah chemte ka dah tih a hrechhuak ta a. Theihtawp chhuahin ka ban ta a, ka ke na pawh ka hrechang tawh lo. 

Hetih laia ka au chhuak lo hi kei pawn ka inhrethiam lo. Ka mangang tawngkhawng lutuk kha au nachang ka hre lo anih ka ring ber. Ka tum ber chu Rinpuia thah kha a ni! Chemte a hmuh rual chuan ka kut a herh nghek a, min chhuhsak nghal, min beng a, ka tal ve nasa bawk nen, min rawn vit ta zawt a. A thip zawk mai. Mahse, tlawm ai chuan ka thi dawn tho a, ka thihchilh ve mai ang ka ti ta tawp a.. Min rawn bawhbeh rual chuan a kapah na theihtawpin ka tlawh leh ta a, a let tawp mai. Chemte pawh a thlauh nghal a, rang takin ka chhar a, a nakah khan ka vit ve ta a ni. Mahse, a tang thei khawp mai. Min la pawt tang tang a, ka thisen ka hloh hnem si a, lo zawi sa nen ka khawhmuh a thim tan a. Ani pawh thisen a chhuak nasa a, a che na thei ta lo, a ban phak lohah ka bawkvak a. A bak kha ka hrechiang ta lo.. A thim riai riai mai.. Ka rilru a mang vek bawk. Ka harh leh chuan tah hian ka lo mu a" tiin. A sawi chhung zawng ka lo insehruh. Ka taksa a na vek thei mawle.. Ka hmeichhia, ka duatlai chu rawng taka tharum hmanga nêk leh nghaisakin a awm a nih chu! Chu mai duhtawk loin, ama tawka rilru hrehawm ngawih ngawih, hlimna zawnga rawn zin phei Aruati nunna in a tawrh phah bawk. Bena ten ka insum zawh loh an hlauh em vangin min veng reng zWk a. Chuti ni lose saw mi rilru piangsualpa hrawk hrawl saw ka zai thler tawh ang. Ka nuna mi pawimawh tak nunna a chhat asin, Aruati kha thi kher lose heti em em hian ka âtpui lo vang. A thih chiah khan ka tan a lo pawimawhzia ka hre chiang hle bawk. 

Rinpuia inpuanna ve thung.. 

"Eng hna thawk mah ka ni lo. Mi hausa nupui te mutpuia an sum hmanga ei hmu ka ni. Aizawlah min hretu an awm nual tak avangin Lungleiah awmhmun ka rawn khuar a. Bella chanchin hi ka hre tawh a, a thlalak ka hmuh phat atangin ka vei tawh. A in kha luah theih a ni tih pawj ka hre lo va, mahse, ka hmelhriatpain, 'A in luah la, i bem daih ang a. I neih chuan pa hausa i ni mai' a tih takah chuan a in chu luah ka dil ta a. A lo phal ve mai bawk a. A invengin a fimkhur hle tih pawh ka hre thei. Min rinngam theih nan chet lak phawt ka duh a, mahse, Bialpa nghet a nei tih ka hriat takah kha chuan, 'Vawikhat tal chu ka mutpui ang" tiin remchang ka dap ta a. A bialpa a zin tih ka hre ta a. Tichuan, chawhmeh leiin chaw eikhawm ka rawt ta a. Chawhmehah Alprozolam leh Phynetoin ka pawlh sa vek chu ka pawlh ta a. Kei chuan ka pawlhna chawhmeh chu ka ei ve ta lo. Bella pawn a ei tam lo, Aruati kha chuan a lo duh viau aniang, a ei teuh mai. Chuvang anih kha harh zo lo va a mutthilh hlen tak ni. Ka pawngsual lai khan a harh lo hrim hrim. Bella a mut hnu lawkah Ariati pawh a damdawi ei khan a hneh ta a niang, a muthlu ta a. A roomah ka pawm lut a. Ka nghak leh hlek a. Ka che ta a ni. Tichuan, Bella ka va pan ve leh ta a. Suangtuahna ka nei a, Mize khawng leh tlang tak nei a nih vangin ka mutpui a nih ngat chuan a bialpa a then ang a, ka nei daih ang tih ka ngaihtuah ani. Mahse, ka rin loh takin a rawn harh a, a tlawm mai duh ta si lo va, vih kha ka tum a ni lo, a talna lamah a lo intawk fuh a nih kha.. Aruati thihna chu pawi ka ti.. Damdawiin a hneh vang a nih kha.. " tiin.. A sawi zawh rualin a bek a ri chhawk. Ka insum a tul rengna chhan tur ka hre lo. Ka sawisa hlum thak dawn.. Mahse, min lo chelh hneh si.. 

"Ruatdiki khan thih a phu hleinem. A thi asin. A khawvel kha a hrehawmsa tawh tehlul nen, engvangin nge a nunna i lak.. Ngawi teh u, a nunna ka lak loh chuan Aruati thlarau a vakvai dawn tlat.. " tia rak tuar tuar chungin ka va bawh leh a. Rei tawk fang ka rek hman, a meng pual vek hman tawh. Bena'n hneh zetin min rawn pawt sawn nawlh a. Ka bek tawn tawna vuan chungin, "Thianpa, mihring i ni. Ramsa i ni lo. Inthunun rawh… hremna pek a ni dawn.. I kutzala thah kha dan bawhchhiatna tho a ni. " a ti khak khak a. Mittui tling pum leh nasa taka insum chungin, "Kei pawn ka tihnat tawk tawh tehlul nen, ani khan thih a phu lo asin" ka ti ţuak a. Min rawn kuah vat. Mipa pawh hi a vawrtawpah chuan insum a va har êm.. 

Bella'n Aruati thih thu a'n hre ve ta chu.. A ngawi tawp mai. Eng thu mah a chhak chhuak thei lo. A melh ngai a melh ngawt ngawt ringawt mai a ni. A hnu ni khatnaah, "Ka venghim thei lo va, kei pawh hi dam reng tlak ka ni lo anih hi" tih thu a rawn sawi chhuak. A mittui a dir zung zung a. A kut ka humsak ngawt ngawt ringawt. 

A bianga mittui luang chunga min rawn enin, "Nang leh kei hi bo daih ila, tumah an thiin an na lo tur. Ni lo, kei hi lo piang lo tawp tur ka nia sin. Tinge piantir ka nih ve. Engkim hi ka bultan vek a nih hi.. Aw… isabella, tinge i thih ve mai loh? Kha lai hmunah khan engvangin nge min thihtir ve mai loh? Tinge min damtir? Mawh.. " tiin ka awm a rawn chum a. Mit ka khap fak fak mai. Awrawl chhuaha a han ţap rawi rawi chu pachan a va har tehlul em. Ka thian awmvete leh a chhungte pawh mittui tla lo reng an awm lo. Kan chanchin an hre ve vek tawh bawk si.. 

"Anchhia ka nih hi.. Anchhia.. Min tihlum mai rawh" a ti tham tiak a. 

"Bella,.. Ka hmangaih che" tih bak ka ka atangin a chhuak thei lo. 

Thla hnih zet chu Bella nunphung a mumal ta lo. Kei atak pawh Bena hian min vil chawt mai. A bul atanga ka tel vena tawh phawta chhiatna a thleng chuan min vaw chau a. Thihna chu ka ngaihtuah lo naa, dam nuam ka ti hauh lo mai. Khawiah pawh kal ila, Aruati thihna leh Isabella mi â ang maia ngawi reng ka mitthlaah an lang a. Ka chhungte mangang pawh ka nu leh pate an rawn zin tawp mai. Min khawngaihzia ka hai lo, mahse, keimaha awm fo ka duh zawk a. Ka mumanga Aruati ka hmuh tum phei chuan ka tap chhuak hial mai.. Ni e, ka khawngaih ngawih ngawih. A thiltih tawhte chu engpawh ni rawh se, mitthi ni tur em chuan ka phal thlawt lo a ni. Pasal tha tak neiin hlim takin awm se tiin duhthu ka sampui thin asin. Bella erawh a ni faten an awmpui a. Min hmu duh miau si lo va, ka va inlan duh rih lo. Min hua a ni lo, min hmuh khan a phurrit a zual. Amah inthiam lohna nasa lutuk avang chuan mi chhel tak Isabella chuan vawi hnih ngawt intihhlum a tum nghe nghe. A zan mu lah kha hun thim tak avang khan mangang takin a thangharh fo a, mangchhiain a chaih buai reng bawk. Doctor in a tlawh reng a, tlem tlem chuan a zia chho e. 

Thla thumna velah Aruati nu Pi Dini'n min lo call hlawl mai a. Ka va la hreh tehlul em. 

"Hello, Imanuel, i tha em? " a rawn ti dam diai a. 

"Aw ka tha ni mai e. Nangni zawk? " ka ti ve mai a. 

"That tak tak chu a har a. Mahse, mateii chungchangah thil sawi ka duh a. " a rawn ti a. Huphurh chung chungin, "Aw sawi ta che" ka ti a. 

A aw a thian kharh a, "A.. Ih e, Mateii nen khan kan hma kan lo sial dun em a, Bella nena innun tinuam lo rawk khawp khan kan lo awm a. Pawi ka ti. Tunah ka fanu neihchhun chu khawvelah a awm ta lo va.. (A hnukulh nge a ngawi det a).. Tawrhthiam chu a har khawp mai. Mahse, Inchanchinte kan lo hre ve a. Kal tawhte vanga Bella nena innun intichhe ve kha ka duh lo a ni. Bella pawh ka vahnu a ni a. Nang pawh Mateij avang pawhin mi hrang angin ka en thei ngai lo che.. 

Engpawhnise, Mateii hetia a awm ta lo hi Pathian remruatah ka pawm thiam tawh a ni. A nun kha a hrehawm em a, a hriatna neih let hma kha chuan hlim takin a nun a hmang a, a hriatna a neih let hnua a nun kha a pumpui khan hremhmun ang mai a ni. A tawrh leh nat reng phal lotu Pathianin natna awm tawh lohnaah a hruai taah ka ngai a.. Ka lawm chu ka tithei lo va, ka tuar thiam viau tawh e. Chuvang chuan nang pawh i inthiam lohnate kha dah bo tawh la, ka vahnu nangmah mamawh em emtu hi tha takin min enkawlsak la ka duh a ni" a rawn ti ta a. Ka thin tawt ţeuh, ipik em em kha a thawl huai huai thei nia. Ngaihthlak a va nuam em.. 

Chumi zan la la chuan Bella in lam ka pan ta a. A roomah a lo tawm leh tawh. Ka va lut a. Min melh hu ringawt. Ka kai tho a. "Insiam rawh. " ka ti sup a. 

"Eng atan " a ti sep. 

"Kalna tur kan nei" ka ti a. 

A kekawr hak tur ka va hai sak a. Ka pe a. Bangbo zet hian a lo ha ve mai. Ka kai chhuak a, Mateii te bulah,"Ka hruai chhuak lawk dawn" ka ti a. Tuman min hnial lo. Muangchangin Pukpui lam ka panpui ta a. Hmalam a melh ran ringawt. 

A hmun kan thleng a, motor atangin ka kai chhuak a. Boruak chu a nuamin a thiang hle. Thli a thaw heuh heuh bawk. Ka lam hawiin ka kuai her a, a mita chiang taka enin,"Kan tawrhna hi titawp ang.. Bella.., Aruati pawh natna awm tawh lohnaah a chawl tawh tih hi pawm tum ang aw. He vanduaina rapthlak tak hi kan pahnih thlentir ani lo va, Kan thunun theih loh thilthleng ani. I hrethiam tiraw? Kan pahnih inlaichinna hi tichhe lo hram ang. Mihring kan ni a, hmabak kan la nei ve asin.. " ka ti ta a. Mittui tling pam chungin, "Pathian hi a awm takzet em? " a ti sap a. 

. "Aw.. A awm. Engkim chunga roreltu Pathian hi a awm a ni. Nang pawh i pian ve a phalsak che a, ka sawi kha i la hria em? Mipa tana siam i ni a. Chu mipa ni tur chuan Pathianin min piantir a ni. I ring em? " ka ti nghet charh a. A bu nghat nghat a. 

"Remruat" a ti ţiau a. Ka kuah bet thlawp. Chunglam ka melh a, arsi de sep sep te chuan min lo nuih ver ver niin ka hria.. Isabella chu ka hmu let leh ta. A bek tawn tawnah ka vuan a, hmai thal hain min rawn en chho bawk, a va hmel tha tak em.. 

"Ka hmangaih che. Ka nupui i ni dawn" ka ti a. 

"Englai pawhin" a ti ve sap. A hmuiah ka fawp ta vawng vawng a. He khawvelah hian hlim taka nun ka duh ve tawh aw.. Lalpa.. 

Kan haw tur motor chhunga kan luh hnuah a phone a ri a. Min rawn melh zawk chungin a la a. A volume a hmeh hniam sawk sawk chu ka hmu reng. 

. "Hello" 

Lehlam thusawi ka hre pha lo. Phone a dah a. Mi rawn melh a, a mitmenga phurna mak tak leh der sar sar chu ka lo melh let ve sak a.. 

"Rinpuia a thi.. A inawkhlum" a ti vawt raih a. A mitmeng chu a ni kei chuan ka lo melh ngawt ngawt ni.. 

A TAWP TA.