Thinlung - 22

THINLUNG.. (22)

Ziaktu: Toni Râlte

Engkim a that leh tak avangin nun pawh a pangngai chho leh ta chu a nia. Mahse, Tluanga te case hian rilru chu a kap deuh. Bena'n a chingfel em ang chu maw. Aruati pawh call loin msg-in tha takin ka hrilhfiah tawh a, a la rawn tang na viau lehnghal. 

"I tan mi tha a ni lo alawm. Ka cousin mah nise; ka duhpui lo che. Engtin nge i pawm leh theih? I intihpa ve tehreng nen" ti lam hawiin min rawn chhang. 

"Ni e, pawm dam chu har tak a ni. Mahse, a inchhir a, a zak a. A thiltih kha a tenawm tih leh a dik lo tih a pawm thlap a. Phumbo pawh a tum ve, chuvang chuan ka puih a ngai zawk a ni" ka ti ta a nih kha. 

"Mipa tenawm tak i ni" min ti tawl lehnghal. A lusun sarhu lai a ni bawk a, a rilru a na hma ang tih ka ring. Ka khawngaih tho. Mahse, kan inkarah inrawlh tawh lo se ka duh a ni. 

"Ka tenawm alawm" ka ti ve mai a. 

"I tenawm ka tihna zawk chu, engtin nge min phatsan theih ka ti. Kei chu ni ila hriatna i neih let leh hma zawng ka nghak ang che" a ti! Ka nui ringawt. 

"Zothana min duh ngawih ngawihtu pawh ka hnawl phah thak a nia. Nang erawh chuan mi dang i lo kawp hman a, chuta karah ka cousin a la ni zui" a rawn tih leh takah chuan, "Aruat, mipa leh hmeichhia kan danglam a ni maithei. Ka hrethiam lo le. Kei chuan nghak rei ka inti. Ka single reiin hmeichhe dang ka ngaihven miah loh chhung kha rei ve tak a ni. Mahse, i duh ang ang chuan min ngai mai rawh. Kei pawn mak tih ka nei a. I hriatna bo chhunga I hmangaih leh pasal hial pawha neih i duh, i hriatna a lo kir tak avanga i hnawl hmak thei hi.. " ka ti ve ngat. 

"Neih ka tum reng kha. Ka u vangin a sukuk zawk anih kha" a rawn ti lawi a. 

"Chu! I hnawl chuan loh chu.. Engpawhnise, ka'n dah tawh ang e, Isabella hi neih ka tum a, khawngaihin lo inrawlh tawh lo la ka duh a ni. " ka ti ta a. Biak rei leh inhnialna a tam zel. A ninawm. 

Hnaah ka kal ve leh ta bawk a. A zia e. Case ka khawih loh lai a nih bawk avangin Bena ka ngaihvenpui thei a. Sangtea bo atangin ni 5 a liam ta. Lunglei mipuite pawn titi berah an nei a, an veng chhungah phei chuan lainattu an tam hle. Ramri lamah zin vei vak check kal reng a ni a, naupang bo hmuh report a la awm lo. Khawiah tak awm ang maw. Tluanga chu Bena'n a kawp tawh ho a zawt tawh a, a sawi tha duh vak lo lehnghal. Mahse, mak deuhin a nupui Seni'n hma a rawn la ta hlauh. A pasal bialnu hlui leh a lo kawp zuai tawhte chu a rawn sawi ta par par mai le. A lo hre deuh vek chu mak kan ti viau. Hre vek chung sia a pasal a la vuan hram hram pawh chu a chhel kan ti kher mai. Beiseina a la nei tihna a ni mai a, a pasal insiamthat hun nghaka a hun khawhral zozai te chu a uiawm zawk mang e. Mahse, tun hun hian kan Tluanga pawh a rawn beng harh ve mial mahna. 

Tluanga ex te profile chu kan chip char char a, rinhlelh list 4 kan nei ta phawt. A kawp ngheh deuh chin lo chu kan reject ta mai. Heng mi pali te hi nghet ve deuh taka a kawp an ni a. Pakhat hian pasal nei tawhin, pakhat erawh Aizawl lamah a khawsa a. Pahnih hi chu Lungleiah an awm ve ve. Pakhat zawk phei hi chu ka lo target ruk kha a ni nghe nghe. Pakhat zawk Lâni an tih mai chu kan belchiang hmasa phawt a. Lunglei Lunglawna khawsa niin, nuthlawi a ni a, a fate erawh a pa bulah an awm. A nu leh pate bulah a la khawsa a, tunah chuan bialpa nghet, tleirawlte a nei tawh. Tin, amah hrechiangtu te sawi hmangin pawikhawih chi a ni vak lo a nih hmel, chak lohna a nei ve a, a pasal nen an inthen a tuar thiam ta lo khan zu leh sa nawmchenna lamah a hruai peng a. Pawisak nei vak loin a tal ve a, chuvanga Tluanga pawh kha han kawp ve ziai ziai a niawm e. Tluanga a va duh em em vang lam ai mahin zu a in duhna khan a hnaihtirah an ngai hlawm. Mahse, mi pasal a ni tih a hriat khan a inla hrang zui a, a tuar pawh a tuar na hran lo anih hmel. Tuna a bialpa nen hian inkawp chho lehin ani tleirawlte hian a siamtha ta deuh zawk niin an sawi. Chuvang chuan Láni chu kan thlurbing ta rih lo. Aizawl lama awm Tluanga kawp ngheh ber thin Sawmi pwh kan en thli thlai reng a. Ani hi lehlam zawng tak chuan a khawngaihthlak. A fahrah ve a, a nu hian pasal neiin pahrawn a hrawn a, a pa a boral tawh bawk. A pahrawn fate nen an inngeih vak lo a nih hmel a. A pa farnu a ni te bulah a va khawsa ta a niawm e. Zu leh sa lam a ti ve lem lo va, mahse, ngaihzawng a duhtui vak lo an ti! Tunah pawh kawp ngheh nei em em loin mi pasal tho a kawp lawr nia sawi a ni. Tluanga nen an inthen chhan pawh amah zawk hian Tluanga hmelhriat tho pathlawi hausa ve deuh tak a lo kawp hlauh a, Tluanga hian hre chhuakin an inbakkaih zui a. An inthen fel a niawm e. Thla 6 dawn an inzui an ti.. Amah Sawmi zawk hian Tluanga nupui Seni te pawh biain, "Then mai rawh. Inneih kan duh" ti hial te pawn a lo vau a niawm e. Mahse, an tawp khan an tawp chiang ta a niang, han rinhlelh tur thil thleng a awm tawh lo. Pasal nei tawh hi chu chhui chian vak ngaiah kan ruat ta lo. A tawp ber atan ka rinhlleh ruk ngei chu kan bitum ta a. 

A hming chu Sangsangi an ti mai a. Zosangpuii a ni. Sangi tia ko te pawh an awm. Lunglei khaw pangngai an ni lo va, an khua tak hi Tluanga pawn a hre lo! A hma chuan Venghlunah in an luah a, a nu hoin. Tin, amah hi pasal sûn a niawm e. A pa a boral tawh bawk. Fa pahnih a nei a, a u zawk chu an pa farnu ten fa angin an la a, a nau zawk a enkawl a. Nuta pahnih neiin a u chuan nupui a nei a. Fa erawh an la nei lo. Venghluna an awm lai hian ania Tluanga nen an inkawp. Tluanga sawi danin, Damdawiina an fanu a awm laiin Sangi hian a fapa a lo awmpui ve chiah a. Ta tanga inhriaa inbe chho an niawm e. Mi pasal tih hresa vek chunga kawp a ni bawk. Thla 3 an inzui hnuah Sangi hian innei turin a nawr nasa a, chutihlai chu Tluanga te chhungkaw buai lai, a nu nerve tha lo vanga an buai lai a niawm e. Sum leh paiah an inseng nasa ve bawk si a, ani mi nghet lo tih takah chutia a nawr sek chu ngaithei loin a then ta a ni. Thudik a nih leh nih loh hriat a ni lo thung a, amah Tluanga sawi dan a ni mai. Khami hnu atang khan biak pawh an inbiak tawh ngai loh thu leh hmuh pawh a hmuh tawh ngai loh thu a sawi. Thla 5 dawn an inhmu lo tihna ang a nih chu. Tluanglerha chuan a lerh sim thei hek lo, hmeichhia kawp nghet si lo va han ck pui zuai zuai ang a nei zui zel a. Sangi pawh chu a lo hrechang tawh lo a ni. 

"A nih bazara damdawi dawr bulah khan eng nge insawi? " tia ka zawh chuan, 

" A hma Sangtea bo hma daih khan min rawn be tawh alawm. Kan inhmu a, "I fa ka chhiat a, ka inseng nasa khawp mai. In kan luah thar bawk nen.. I fa ka chhiat vanga ka insensona kha min rul rawh" tiin min nawr a. A rai tih pawh ka hre lo hrim hrim. Ka duh ta bik lo va. Thinrim deuhin kan inthlah a. Chuan, hmanni khan min rawn be leh a, ka va phei khan, "Damdawi man min pek loh chuan in nu bulah engkim ka sawi ang. I insen hreh viau chuan min nei rawh" a ti leh a, Sangi kha chuan min neih hi a tum em em tawp.. Zah pawh a zak ngai eih lo reng a. Kei Ka fapa bo vanga mangan ve nak alaia khatia min nawr sek kha ka hua a, ka hnial ta hrep a, a lungawi lo viau bawk. A rai tih pawh ka hre lo va, tuna sum lo thehchhuah kha ka duh lo tawp" a ti a. 

A nih si chuan, Sangi chu a rinhlelhawm ta mang lo riau. Sum mamawh nise, a fapa a ruk bo chuan pawisa a ngiat ngei awm si a. Chutiang zawnga inbiakna an neih loh bakah Seni te pawn call an dawng miah bawk si lo. Ngaihtuahna a phir ta deuh. Mahse, kan ti ta sa sa a, Sangi chu luhchilh hrim hrim a thain ka hria. 

"Chaw rawn ei rawh aw. Bawngsa ka lei teuh a, Mateii a zin bawk sia, eipui tur ka nei lo" Bella msg chu ka chhiar nui vur vur. Amah a in singsak lamah a buai ve bawk a, kei hnaah. Zanah lah Tluanga te case vangin ka leng ziah si lo va. Zanin chu a nuam dawn e. Ban rualin ka haw vanh vang a. Ka inbual sawk sawk. Ka chhuah hma deuhin call ka dawng a, Bena a lo ni. 

"Seni'n call a dawng a, pawisa an rawn phût chiah e.. Mipain a lo bia" a rawn tih chuan, "Sangi nuta chu a ni mai lawng maw? " ka lo ti a. 

"Maithei. Mahse, an rawn sawi ang hian awmtir phawt tha ka tia. Zaninah Saikut Hall hnuaiah dar 12:30-ah Rs. 500000 pe turin an rawn phût a. Rin aiin a awlsam dawn ni hmiang ka ti. Ka zui ve mai ang chu" A ti a. 

"Ka rawn tawiawm thei maithei che. Bella in atanga ka haw hnuah" ka ti a. Inhrilh nawn leh turin kan inchah. 

A va awlsam hmel si ve. Mahse, khati zawng hun awma engvanga ngawi reng nge maw an nih le? A chanchin kan chhui tih a hria a ni maithei. Mahse, tuin nge hrilh ang? Tluanga maw? A ni thei dawn em ni? A fapa bo a lungngaihpui ve em em laia kan chhui ruk mek a zuk bekbawr chu ka rinh si lo. Aa.. Zaninah engkim a hriat ang chu maw.. 

Phur fahranin Isabella in lam ka pan a. Lunglei hi chu a la thawl bawk a, tlan vel pawh hi nuam tak a ni. Ka thleng thla a, in pawh ka rin aiin an lo singsa thui tawh. A hnuai ber phei chu luah theih a ni nghal tawh reng mai. Amah Bella chenna bika choka cabinet vel tlemin peih a la ni lo deuh a, a chung ber erawh ka han hmu lo. A lo inbual zo ve deuh chiah a, a fresh leh kher mai. Eirawng pawh a lo bawl peih diam tawh a. A la hma deuh bawk a, veranda thlang lamah ni tla tur kan thlir mai mai. 

"Pahnihin min rawn be tawh a. In luah tur chu" a ti a. 

"Hrechiang phawt rawh ka tih kha aw.. Eng mi nge an nih? " ka ti a. 

"Pakhat hi chhungkaw pangngai, fa pathum nei an nia. An pa hi PHE-ah a thawk a, an pangngai hmel. An fate pawh an la lian lo. Pakhat erawh unau lehkhazir an nia, ka hrethiam chiah lo" a ti a. 

. "a chung ber chu an la rawn en lo mi? " ka ti a. 

"Umn.bakah kan la peih fel chiah lo a" a ti a. 

Tluanga te case vel kan sawi dun a. "Seni hi ka khawngaih takzet. Kei chu ni ila ka chhuahsanna a rei tawh ang" a ti nghat nghat a. 

"Innei ta ila, lerh ve ta ila" ka tih chuan, "Hmangaih viau che mah ila, kei min duhkhawp loh chu thuhran nupui fanau i nei tih inhre renga min rinawm lohsan thei anih chuan, ka chhuahsan tho ang che. Rinhlelhna hnuaia fate seilentir ka duh lo" a ti hmak mai. 

"Ka lerhsan dawn si lo che a" ka ti ringawt. 

"Ruatdiki hian pasal nei phawt se, kan innei chauh ang. A neih hma chu ka thlamuan theih ka ring lo" a ti tawl mai. 

"Ani chu ka phumbo tawh. Engmah tihtheih a nei lo" ka ti a. 

"In la inbe reng tho alawm. Mihrinh chu inbiak tam chuan inngainat a awl. " a ti a. 

"Ka be tawh dawn hleinem. Amah hian chhan loh theih loh hian min rawn be ve thin bawk sia lawm" ka ti nur náng a. 

"A beiseina hi a la tawp tak tak thei lo a nih hi. Lehlamah ka hrethiam tho. A tleirawl chhuah phat atanga nungchang tha leh dik, rinawm em em kha a ni ve a. A duhthlan ni miah loin ti khan a awm a. A tlai tawh hnuah a hrechhuak leh lawi si.. Lainatawm deuh a ni. Min haw viau mah se, ka haw ve tak tak thei lo. A chang chuan keimah zawk kal mai hi ka duh thin. Ka ngaihtuahawm lo zawk dawna ka hriat vangin" a ti dat dat a. A thutak si, buaithlak. 

"Ni e, a dik reng. Last minute-a a inhrechhuak kha a pawi ber.. Nang nen bul lo tan hman lo ni ila chuan kawng dang a awm mahna.. Nang i awm tawh a, chutimaia inlaichinna titawp hmak thei ka ni bik lo alawm.. " ka ti ringawt. 

"Chu tak chu lawm.. Ka hnawksakna.. I khawhar lai remchanga hmanga kai hrang angah che min ngaih phah a. Dik tak chuan kei pawn risk ka la ve tho, Aruati'n a hriatna a neih let leh loh ka rin vanga inzawmna neihpui che ka nia.. Thil hi a pawi a ni" a ti halh a. Ni tla tur sen phût chu a thlir vawng vawng. 

"Sawi tawh lo ang.. A hnena let leh chák hian min siam lo a ni. A chet dan tam tak hian min tihel tlat zawk a. Amah hi ka khawngaih lo a ni lo, Zothana nen khan lo innei se a hlim chuan ka lawm lutuk dawn.. A buaithlak a ni. Vanlalsanga vang vek" ka ti nghut nghut a. 

"A bul berah keimah bawk ka lang zel" a ti sap. Ka va hawi a, a ngui vek. A ngaihtuahna ka hria. Vanlalsanga khan lo atchilh phiangsen lo se tiang buaina hi kan tawk lo ni mai tur. 

"Sanga sawi takah chuan a hma velah ngaihbel turin i lakah a awm tawh reng reng em? " ka ti ta daih a. 

A ngawih vang vang hnuah, "Tun hnua ka ngaihtuah let hi chuan ngaihbel theih tur chuan a awm. Ka zin apiangin min chhuahpui thin a, min duat bertu leh hmanni thil thlengah pawh ka thavang hauhtu a ni. Mahse, Sanga ka huat theih miah loh chhan chu kut thawha min han fiam leh a ruih chang pawha tisa taka min dawr ngai miah lo kha.. A zak pawh a ni maithei.. Bakah a inzep ve nasa dawn a" a ti siam siam a. 

"Ani pawh a khawngaihthlak tho. A nunna hialin a tawrh phan lehnghal" ka ti a. Ka rilru tak tak ka sawi. 

"E taka! I sawi takah chuan a ho viau naa, a thih zan khan min rawn tlawh asin" a ti hluai a. Ka lo meng phawk ngang mai. A ngaih thutak vk hmel bawk si loh. 

"Maw? Engtin? " ka ti vat. 

"Nuam ka tih chiah loh vangin Mateii ka riahpui a. A kil lamah a mu a. Dar 3 bawr vel aniang, ka rooma bathroom saw tui a rawn inherh haw a, min rawn tlawh kha ka rin lutuk vang aniang, min thawng hran lo. Mateii zawk khan a hria ang tih ka hlau a. Ka va herh tawp vat. Ka mu leh chiah tihin Muani roomah a rawn vei kual ta a. Chuan, mikhual room kawngkhar te saw a hawng niin ka hria. A tak chu ka hmu lo. Thawm chu ka hria" a ti ta zung zung a. 

"I hlau miah lo mi! " ka ti hû ringawt. 

'Nuam lo chu ka tia. Mahse, ka hlau em em lo. Amah a hmuh theih chuang loh a" a ti a. Huaisen ka va ti tak. 

"Mateii a zin daih sia, zanin chu riahpui i ngai anih chu" ka tih chuan, "Lawma a rawn riak maithei. Ka ni fapa kha. Tun lai an boruak a tha vak lo va, a rawn awm ve rih maithei. Mahse, hei engmah a la rawn sawi leh lo" a ti a. 

. "A tul lo" ka lo ti bung nghut. Mak ti zetin min melh a. "Engvang" a ti ha. 

"Mipa hrim hrim riahpuia chenpui ka remti lo. Cousin pawh an inrai pawp pawp tawh hi" ka ti hlur a. A nui hawk hawk. 

. "Ka Lawma sawite chuan bialnu nghet a nei alawm. Chuvanga an chhungkua buai an nia, a bialnu hi ka ni ten an duh si lo, an inhau reng mai" a ti a. Tlemin ka nuam deuh. 

.. "ngati nge an duh loh? "

"A bialnute hi zu zuar an nia. Kan vengah chuan an lian ber ang. Ka nite pawh ka thiam ve tho, mahse, zu zuar fanu a ni ve ani mai a. Aman a zuar ve pawh a ni lo" a ti a. 

Khua a thim tawh bawk a. Muangmarin zanriah pawh chu kan ei ve ta a. Ka eitui leh viau e. 

Thingpui sen hang kan dawm dun leh a, nupa te pawh kan ang deuh e a. 

. "Chhungkua te zawk chu luahtir rawh. Hetia nangmaha i awm reng hi ka tan a hrehawm" ka ti a. 

"Nia, min rawn biak leh hunah ka lo comfirm dawn nia " a ti a. Sawi tur tam tak karah kan infawp mawlh mawlh reng a. Thutthleng seiah chep zeta muin Tv kan en dun a. A nuam veng veng mai. 

"Mka hi a reh ta mi? " ka ti a. 

"Umm.. Min rawn be tawh miah lo" a ti mai a. Kawngka an rawn kik dat dat. A tho a, kei pawh ka thu tha nghal vat. A va hawn chuan, "Ehe! Min lo hrilh lawk si lo va" Bella chuan a ti chul a. Mipa leh hmeichhia an ni. 

Lawma leh a bialnu te chu an lo nia! 

"Kan rawn inru dawn. Ka pa tawngkam hriam lutuk saw ka kham tawh. Ka ru hmiah" Lawma chuan ka awm ve tih pawh ngaihtuah chang lo chuan a ti nghut a. A bialnu chu zum zetin a bulah a thu ve khar bawk. 

"Ringawt a che. An thinrim zual dawn sin" Bella chuan a ti a. 

"A pawi lo. Hetah kan awm ve rih ang a a ni mai. " a lo ti hmiah. Kei chuan pawi ka lo ti lo nasa. Amah chauha khawsaktir reng hi a bialpa tan chuan nuam lo ve deuh mai hi a nia. A hnuah kan han inhmelhriat leh hnuhnawh a. Lawma bialnu Dingi a ni. A hmelchhe lo viau. Bakah an chhungkaw eizawnna vanga hnualsuat ngawt chi niin ka hre lo. A landan atang ringawt kha chuan hmeichhe zakzum leh pawisawi lo tak niin ka hre ve tlat. Lawma a bumro tehlul nen. An rawn inru ve miau si a. Tihngaihna awm hek lo. Mikhual room lamah an insuan phei ta a. Kei pawh Bena nen kan inbe zeuh zeuh. Bella pawn kan tihtur a hre ve bawk a. A in atangin ka va pawh mai ang chu. 

Kan infawha kan kal thui deuh dawn chuan a inla hrang zel tawh. Ka lo tem vir laklawh si a, ka ui thei. "Kan lo tih tawh kha chu kan tih tawh nise, a dik lo tih hrereng chunga tihnawn leh sek hi chu ngaihdam pawh a har ang. Insum hram tawh ang. " a ti mai zel a. Ka pawmpui lo thei bik lo. Mahse, ka fit mah mah zel hi chu kei pawn ka ning. Ka duatpuia thinrim hma thei lutuk hi. 

Dar 12 pelh hlekah Bena lo awmna tur lamah ka tlan phei ve ta a. Seni leh Tluanga pa te nen an lo awm. Hun tiam kan nghak dawn a nih hmel. Thil a kal sual ang tih a hlauhawm khawp mai. Kan thu ta ran hlawm a. Dar 12:28-ah Seni leh a pa chu Saikut Hall hnuai lamah chuan an chhuk ta chhat chhat mai. Keini erawh a chung lamah kan tawlh chho thung. Zan a rei tawh bawk a, vei vak an awm tawh mang lo. Bike pahnih khat rawn tlan leh zauh tih mai loh chu. Seni te pafa chuan an nghak ren rawn a, chunglam atangin kan thlir ru ran bawk. Seni phone a ri ta tlang tlang a. A la vat. An sawi kan hre pha lo. Seni te chu an let leh ta daih mai. Keini pawh kan chhuk leh ta a. Kan han inhmuh khawm hnu chuan, "Police i pun a, kan hrilh ang chein i ti lo va, kan rawn kal thei lo. I fapa hi nungdama i hmu duh a nih chuan, kan rawn biak leh hunah che police pun tawh suh" min ti " Seni chuan a ti ta a. Kan ngawi dâk mai. A tu phiangsenin nge Police an tel tih lo hrilh ang? Kan hmachhawn mek te hi mi naran an ni lo tihna em ni ang le? 

A va ho e aw. 

A tukah Bena nen Sangi te in luah lam kan pan ta a. Zuk luhchilh ve hrim hrim thaa kan hriat vang a ni. Mipain kawngka a lo hawng a. Mak ti hmel a pu lo. Sangi chu room atangin a rawn chhuak chiah a, a inchei duhdah angreng mang e. 

"Eng nge induh tak mial? " a ti no thliam a. Bena chuan, "I bialpa hlui Tluanga fapa bo chungchangah rinhlelh i kai a. Kan rawn hmu lawk che" a ti nghal tawp mai. 

. "A va mak dawn ve. Chanchin kha ka lo hre ve a. A pawi ka lo tihpui ve asin. Kei daih daih chu eng nge ka rinhlelhawmna ni a? " a nem ngaiin a la nem reng nia! A inthunun thei hle a nih hmel. 

"Tluanga hnenah pawisa i dil niin kan lo hria a" Bena chuan a ti leh a. 

"Aw a dik, engvangin nge ka dil loh ang? Min neih a intiam a, ka engkim ka hlan a. A fa hial ka pai a. Vanduai asiamin ka chhiat ta hlauh a, ka insensona man kha chu min rulh ve a ngai alawm.. Tah chuan tihsual ka nei em ni? " a ti ta piap piap a. A hmel landan pawh a dang ta deuh. 

"Aw kha lam chu eng pawh nise, Tluanga nen in inbe leh tawh em? " a ti a. 

"Be lo. Min pek a tum loh thu a sawi a. A fapa a bo bawk si nen, ka la ngawi rih a" a ti ve mai a. An in chu a lian lem lo hle, sitting room leh choka a inzawm a, Room pakhat a awm leh tawp bawk. 

"Hetah hian engzat nge cheng che u? " ka ti a. 

"Hei ka nau nen hian ni mai. Ka fanu hi a rawn riak zeuh zeuh bawk a, a pi ten an ngai sia, a awm tam zawk mah" a ti ve mai a. 

Han hawi reng reng pawn naupang han thuhrukna tur awm a váng riau. An room lam lah luh ngawt chi a ni chiah si lo. Warrant lak erawh a la ngai mahna. Bena nen kan haw lamah an in luahna te inah kan peng ta a. Nu ber leh an fanu tleirawl lek lek tawh chiah an lo awm. 

"Thla hnih kalta khan an rawn luah vr chauh a, mi fel tak niin ka hria. An sawi hmangin an mo nen an inngeih vak lo va, chuvanga indang ta mai niin a insawi a. An sum lakluh dan erawh ka hre vak lo, Sangi hi nitin a chhuak a, a sumdawng ni hmiang ka ti mai a. " In neitu chuan a ti a. 

"A nih ka pi, Naupang thawm emaw mipa naupang hmuh te innei ngai em? " ka ti a. 

"A fanu hi ni mai kan hmuh chu. An in chung chiahte khuan an hre zawk ang ka ring. " a ti a. Sangi te in chung chiahte erawh an awm lo. A inkalh. Engpawhnise, a hmel kan hmuin kan be thei a, kan ringhlel tih an hre tawh bawk a. Seni rawn call tu te hi anmahni an nih leh nih loh chu a hriat chhoh mai ang chu. 

A bo atanga ni 7 ni a ni tawh a. Mizo danah mitthi anga vuiliam a hun tawh dawn a ni. Seni a tap a tap mai a. Tluanga pawh a bawrchhawrin zu a in nasa tih a lang. Ka chhngte hi an awmna chin hriat lohin bo ta se, ka tuar thiam lo viau ang. An ruang tal hmu ila chuan tawrh dan dan te pawh a la awm ang a. Call lah an la dawng leh bawk si lo. Manganthlak tak a ni. An rawn callna number kha kan chhui tho a, mahse,kha simcard neitu dik tak kha Patling pui niin a phone a tibo daih bawk. Number dang a hmang leh daih tawh. Chuti a nih chuan a phone an ruksak tihna a ni mai. 

"Lawma te chu an la hlim zel em? " Bella bulah ka va ti a. 

"Umm.. Hei Dingi phei chu a fel tawp. A che zung zung mai" a rawn ti a

" An chhung ten an rawn ngaihven lo mi? " ka tih chuan, "Ka ni te chu an la thinrim a, Dingi chhungte erawh ka hre lo. " a rawn ti. 

Lam vat lo se ka duh mah zawk. Ka tan an awm ve khan a ngaihthatthlak miau a. 

Sangtea an vuiliam ta. Nu leh pa tan chuan a va na dawn em ve aw. An nupa hlim loh tawh sa nak alaiin. Seni tawrh hi a na chuang bik ngawt ang. Zanah ka va phei ve a. Bena pawh a rawn lang ve. Tluanga chu kawm hleihtheih pawh a ni lo. A mumal vak lo, "Keimah vang a ni.. " tih thu bak sawi tur a hre meuh lo. A inchhir hle a niang e. Pathian remruat pawh a ni mahna. Dar 9 velah hawn kan tum lai takin Seni'n call a dawng leh ta tlat. 

'Invui liam tawh a, mitthi anga inngaih tawh infapa hi hmuh let induh tak tak chuan, Naktuk zanah a hun leh a hmun kan rawn sawi leh ang a. Kan pawisa tur nen i rawn kal leh dawn nia. Mi dang an tel leh anih chuan, i fapa hi i damchhungin i hmu tawh lo vang" a rawn ti leh ta a. Seni a khur ngawt ngawt ringawt. 

Bena'n, "Seni, intipachang teh khai. Chanchin min hrilh a ngai tih i hriat kha" a ti a. 

"Khawngaihin tel tawh lo mai ru. Ka fapa ka hmu tawh lo palh ang" a ti tiau a. 

Nu dinhmun atanga thlir chuan a awm ka ti. 

Tluanga chuan, "Misual hi man i duh lo em ni? " a lo ti vat. 

"Duh e duh te chu, mahse, police an tel khan ka fapa min tihhlumsak ta si se.. Eng ge ka tih ang? Ka hrethiam lo. Engkim an lo hre zel bawk si" a ti a. A inhnit hlawp hlawp. Tluanga pawh chuan, "Ni e, Thiante u, kei pawh police tho ka nia.. Misual hi man ka duh. Mahse, kan fapa hi hmu let ta lo ila.. Ka damchhungin ka inthiam thei tawh dawn lo. " a lo ti ve a. 

Bena nen sawi tur kan haihchham viau mai. Nawr chi an ni bawk si lo. 

"Fimkhur taka kan chet a ngai anih hi. Seni, i fapa hmuhlet i duhzia ka hria. Mahse, i hmu let tak tak kher ang em tih pawh a hriat loh.. Misual kha call la, i fapa. Biak dil teh" ka ti ta a. Nidangah chuan call let hian a switch off zel thin. Bei nge sei run dung ti ang. Seni chuan number chu a dial ta a. A ring ve mial e. 

"Ka fapa ka be duh. " a ti nghal tawp. A ri deuh rak rak a. 

"Kha.. I nu be rawh.. " tih ri chu mipa naupang awin, "Anu" a rawn tih chuan a zui ta nghal a. 

Seni mittui a dir nghal zawih. "Bawihte, i tha em? Khaw nge i awm? " a ti mawlh mawlh mai. 

"Ka hre lo, nu, ka ngai lutuk che. " 

. "Thil an eitir che em? "

. "aw.. Sa kan hmeh char char a. Nu, min lo hruai vat ru"

Mipa awin, "A tawk" a ti tuar a. "Tikhan a chiang em? Police rim nam hriat ka duh lo aw. A hun leh a hmun chu ka rawn hrilh leh ang che. I pasal nen inrawn kal dawn nia" a rawn ti a. A dah nghal. A hrilhhaithlak mang e. 

Kan haw ta phawt. 

A tukah Bella in hnuai chu a sawi chhungkua te khan an luah lut ta bawk a. Kei pawh banah ka va phei ve zuai. Chhun lamah thil thleng lian tham a awm hran lo. Chaw eiah min sawm naa, Lawma te nupa an la awm sia, nuam ka ti chiah lo. Bella pawh a khua a har lo sawt tawh ang, naupang chhawnchhaih tur an awm ta bawk a. In ka thleng chiah tihin Tluanga'n min lo bia. Eirawng ka bawl zui nghal a. Bena ka be pah bawk. 

Ka chaw ei khamah ka chhungte ka be ve leh zuai a, sawi tur em em pawh a awm lo. Mami te an la tha a, a lung pawh a leng vak lo a nih hmel e. A lawmawm lamah ngai ang. Bena a rawn thleng a, Tluanga te in lamah kan phei dun a. Inleng an la nei nual. Tluanga te nupa pawh ngui nghiain an lo thu dun ral a. Fa hi pathum neiin, Sangtea nauah hmeichhe pahnih an la awm a ni. An fel ve tawh viau mai. 

Call an la dawng lo va, keini tan eng han tihtheih a la ni lo. Dar 10 thleng kan nghak a. Thawm riva a awm lo. Kan hawsan rih ta mai. Kei ka phur thut chuan Bella ka call a, "Ka lo lenh dawn" ka ti a. 

"Tunah hian maw? " a rawn ti hlar. 

"Umm i room lam kawngka kha lo kalh suh. Ka lo phei" tih leh dah ka rual. Confi zetin ka phei a. A in chhung lut loin room panna stepah ka chho a, kawngka a lo kalh lo bawk. Muani room leh a room inpindanna an thiat tawh a, zau tha hek hawk tak a ni. Khumah a lo thu a, movie a lo en. Kawngka ka kalh hmak a. Ka va thu ve nghal. 

. "Eng nge i hriat? " a ti a. 

"Ka ngai thut che lawm" ka ti mai a. 

Khum lu lamah lukham nghengin kan thu mu a, movie kan en zauh zauh chauh. "Ka riak dawn" ka ti leh thawr a. A nui hak. 

"I insum zankhua theih chuan.. Aw" a ti mai a. 

"Min fiah la" ka ti nghut. 

A phone a rik vangin a ngawi a, a phone rawn lek vain, "Aruati" a ti sap. A la zui nghal a. 

"Ehe! Ni maw.. A va zia lo ve. Nia, lo phei rawh. Mahse, ka ni a khawngaihthlak ee.. Aih chu lam a ni lo, ka khua a har mah naka" a tih danah Aruati'n rawn zin a tum a nih ka ring. Ka hnual rawih thei. A dah hnuah, "Pa Thana nen an inhau a ni awm e. Sanga thi hi Pa Thana hian a tuar thiam lo lutuk a, Aruati chungah a tuan ta deuh a niang. Chu chu lo zin daih rih ka duh a rawn ti anih kha" a ti sep sep a. 

"A va buaithlak tak" ka ti sup a. 

"Hmm.. I derthawng ta mai e lo? " awmze nei zeta min melh chung hian a ti a. Ka lo nui hawk. A sam a benga zehsak pahin, "Bella, hmeichhe tha táwp chu i ni vein ka hria. Tikhawp khan i chungah thil dik lo a ti a, i va awm chhung lahin hrehawm takin a siam che a. I haw let ve miah lo hi a mak! " ka ti ta thlawt a. A nui sak, "Chhungkua ka chán tawh a, ka chhungkhatte lehzel ka hlat chuan ka thih hunah sûntu ka nei nang.. " a ti a. 

"Nge.. Thunun theihna che hi a nei zawk mawni " ka tum loh deuhin ka ti a. 

Min rawn melh zawk. "Aih, ka hlau lo. Engpawh ti se, anmahni zawkin min beih chhung chu hnehtu zawk ka nihzia a lang tihna a nia. Keiman ka beih ve a ngaih chinah chuan ka chak lo zawk tihna a ni thung ang" a ti dam thlap a. A induhtawk vanga haw duh lo a nih ka ring ta hial mai. 

"Lo zin ta se, ka rawn leng tho dawn nia" ka ti a. 

"Kha chu i thu thu boss" a ti sap. Ka fawp a, Ka kut lehlamin laptop ka dahsawn. Kan inbuan leh thial thial mai. Lawma te thawm hriat phak a ni lo bawk a. Kan free helh helh viau. Mahse, ka beih nasat poh leh Isabella chu a chak! Tem ve tawh si chuti em ema a tang na chu ka ngei letling. Mahse, Mi duh lo chung sual awrh awrh tur khawpa mipa nep nih ka duh lo a. Ka inthunun ve mai. Ka riak ve leh ta ringawt chu a nia. Ka motor lah kha an in pengah ka park ringawt lehnghal. 

"Tho rawh.. Hnaah i kal dawn lo mi? " ka beng bulah a rawn ti sap a. Ka meng zawk. Ka awmna ka hai thelh a ni. Ka khi suk mai. Ka inphihfai laiin Lawma te pawh an rawn tho a. Mak min tih hmel vak loh, kan innuih tet tet ringawt. Rei awm loin ka haw phei ta nghal a. Hna kal a ngai si a. 

Vawiin chu Ramtharah inrawkna a thleng lehpek a. Kan va en thlithlai. Rinhlelh neihsa a ni bawk a, chinfel a harsa lutuk lovang chu. Tluanga te case hi rilruah a lian lo thei si lo anih hi.. Zanah Bella ina len ka tum mek laiin Bena'n min lo call a. Ka tum ka thulh nghal. Chhungrilah ka za zek zek mai. Seni an rawn be leh tawh a, Zaninah dar 11-ah Polytechnic pengah an inhlan fel dawn a niawm e. Kan man tawh ngei tur a ni. 

Dar 10-ah chuan kan tanhmunah kan biru ran tawh. A peng lai tak chu chiang takin a hmuh theih a. Kan birukna erawh zawn ve fe a ngai thung ang. Phone hmeh en a rem chiah si lo va, a ninawm duh angreng. 

Ka beng bulah, "Lucy a rai a" a rawn ti thut pek a! Ka phu zuk. Min la nuih vur vur zui. 

. "Ka lawmpui che.. Bro" ka ti ve sup. Isabella rai ve se tih ka rilruah a rawn lang nghal. Fa kan neih hun tur ka lo suangtuah daih a, min rawn nghawk sawk takah chuan ka phu leh zuk..peng lai takah chuan, 800 maruti a ding váng a, mahse, tumah an rawn chhuak lo. Number plate kan hmu pha lo thung. 10 mins velah Tluanga te nupa an rawn thlenh ve ta chiah. Seni chuan bag a khai. Car atang chuan hmai tuam a rawn chhuak a, a hleitling thawkhat viau,. A hnung seat atangin Mipakhat hian Sangtea chu a rawn hruai chhuak bawk. 

"Nu" tiin a tlan phei nghal chawn chawn a. Seni nen an inkuah vawng vawng mai. "Che ang le" Bena'n a rawn tih rual chuan, kan dawk chhuak nghal zawk. An hnunglam atanga chhuak kan ni a, thawm kan dim bawk nen, "Che tawh suh u" Bena'n a tih rual chuan an rawn hawi rual ţhawih mai. An hamhaih tih a lang reng mai. 

Seni hnaiha ding pa chuan, "Min bum e lo! " a ti ţeng chhuai a. 

"Aih, engmah ka sawi lo" Seni chuan a lo ti khur dat. Tluanga erawh chu a hamhaih ve mang lo, a rawn pen phei a. Seni bula ding chu vawi leh khatah a hnek let tawp. Tumah kan che chang lo. Thinrim zetin chu pa hmai tuamna chu a hlihsak ta a. A hmel a hmuh rual chuan, "Ekhai! " tiin a per dawrh mai. Keini pawn mak kan ti! Kan melh tlawk tlawk ringawt.. 

"Ka sawifiah thei" a rawn ti tham ţuak a. 

"Apa, kha pa khan alawm min rubo" Sangtea'n a lo ti khur hlak hlak bawk. 

Bena a che hleithei si lo va, ka pen chhuak a. "Thianpa, man i ni" tiin ka handcuff nghal rap.. Chutia ka tih rual chuan, A thianpa tlanchhiat tuma che hrut chu, Tluanga'n a lo manbet chawt. Bena'n a rawn hling ve ta nghal bawk. 

"Engtin nge a nih theih? " Tluanga aw-a mak tihna chu a langsar kher mai.. Ni e, engtin nge hei hi a nih theih?! 

😊😊😊