Thinlung - 21

THINLUNG.. (21)

Ziaktu : Toni Rálte

Ka zawi nguai mai. Ka mood a chhe ngawih ngawih bawk. Thin lah chu a rim ţûn reng bawk si. Ka rilruin ka be tawh lo vang ka ti mawlh mawlh a. Hetiang taka min ngaipawimawh lo leh min chungtlak hmeichhia ka la tawng lo. Lateii kha a teuh ber ang, mahse, a hun lai khan ka duh ve em a, mahse, ka ngaihdan chin a pelh kha chuan ka then ta mai reng kha a nia. Isabella erawh tihtak zeta ngaihdam min dil turin ka la beisei tlat! Ni e, mipa hi a lo pa reng theih loh a niang e. Thinlung ka nei ve miau si a. Ka duh dan chuan ka lakah tlawm zawr hnáp se, ka thu zawmin min zah se ka duh a. Mahse, Mka ka thik tih leh amah vangin kan inhnial tawh tih hrereng chunga min kalpah ngam hi ka hua. Amah ka haw lo, a awmdan hi ka duh thlawt lo a ni ber. Hmeichhe induhtawk leh lunglian lutuk hian ka chapona a cho chhuak lo thei bik lo. 

Whatsapp msg a rik sek vangin ka lut nge nge a. Ruatdiki lek! Ka en lo thei lo va. Ka hlauh ang ngeiin, Isabella leh Mka te thlalak, inneihna lama an lak dun niawm tak pathum lai min lo thawn. Isabella chu a nui lo va, a tûm lem lo bawk. Ka ner sawk mai. Aruati chuan, "An lo tha leh tawh nge nge a ni maw? Hrilh che ka tum thin a. Eng emaw zawnga i ngaih ka hlau a" a rawn ti zui! Ani pawn a lo hre ve tho anih dawn hi. 

"Tu nge lo thawn che a! " ka ti a. 

"Mka status a nih hi. A hlim hmel vur vur khawp mai" a ti a. 

Isabella status erawh a ruak. Min hide ni maithei. 

"Bella'n a hmang ve em? " ka ti lo thei lo. Tlawm inti viau mah ila. 

"Hmang lo. A hmang ngam rih lo vang. Pride a ngah a, a ex nena renew leh anga miin an hriat a duh dawn lo" a rawn ti a. Bella zia hre tawh tan a mak lo. 

"Mka hi i hre ve mi? " zawh zui ka chak tlat. 

"Hriat loh ten. An inzui rei ve em alawm" a rawn ti a. 

"Bella chu mak ka ti khawp mai" ka tih chuan, "Ka ti ve lo. A hmangaih em alawm. Mka nen an inthen atangin nangmah chiah bialpa a la nei ania" a rawn ti a. 

"Hetianga nghet lo a nih hi ka ring lo a. A rinawm ka ring a" ka ti duah. 

"Kei pawn ka la hmangaih reng che a. Chutiang chuan ngai mai rawh" a rawn tih chuan ka chhang duh tawh rih lo. Insawi luh a tum dawna ka hriat avangin. 

Isabella lam ringawt ngaihtuah chu tiin Bena ka call a, Tluanga te fapa bo chungchang chu ka sawipui a. Ka rin ang ngeiin aman Case a la dawn a niawm e. Tluanga te nupa an be tawh a, hmelma an neih awm hriat a ni lo. Tun hnaiah naupang ruk emaw bo report a awm lo va, ruk bo anih ngat chuan kan chet vat a tha khawp ang. Kan man vat loh chuan an huangtau thei tlat. Human trafficking hi Mizoramah hi chuan a la hluar lutuk lo a, vai ram angah chuan nitin case a awm deuh zel chu a nih khu.. Sangtea chu an zawng kal reng tho naa, thehmeh ang maiinna reh vung vung mai si. Seni a ni ka khawngaih ni, a pasal leplerh bawk, a fapa bo bawk. A rilru buai dan tur leh mangan dan tur hi aw. Tluanga pawh inhmuhchhuah phah se ka duh khawp mai. A police department ang zawng pawn kan hmingchhiat phah ve thei, kan thawhpuite chetphelhna vanga a ram pum huapa kan mualpho changte pawh a awm thin. Thin hi a rim ngawih ngawih zel. Police hi chu mi nawlpui ngaihdanah zu in thei, inlek ve thei tak, lerh tak kan ni miau a. A chhunga cheng tan lo chuan kan pawnlam lan dan atang hi chuan min thlir dan hi a mak lem lo. Thawhpui thenkhat lo tladah leh lo inleka lo inlak vung ching an lo awm ve thin bawk si. A dik a dik chuan tawng mawi lo ni lo se, Civil mi te laka lal hrawta invaivung ching hi chu han chhui deuh ila political fitness vanga lut hi an ni duh riau! Hei zawng ka sawi thui lo mai ang e. 

Tihtur ka nei lem si lo va, Tluanga te in lamah ka va phei ta ringawt. An lo awm deuh niaih a, Seni mit a bui lák mai. A tap nasa tih a lang reng. Tluanga pa, Pu Lianvela chuan, "Kidnap nise a rutute hian min rawn biak pawh a hun tawh. Kei phai lama hralh tur hian an khung bo tawh anih ka ring rum rum e a.. " a ti chuar chuar a. 

"Lungngai mah ta che ka pu, chutiang anih an rin vangin ramri lama kan hotute pawh kan be pawp tawh e. Zin veivak an lo endik zel dawn alawm. " ka ti ve luam a. 

"Damin kan hmu leh ang em? Bawihte, min ngaidam rawh aw.. I nu hian ka ngaihsak tha tawk lo che aniang" Seni chuan inhnit faih faih chungin a ti a. Tluanga nu chuan,"Akhaih! Sente, khati lam hawi kha chuan sawi tawh teh suh, nang tluka fate ngaihsak leh ngaihven hi an awm kher lo vang. I thiam loh a ni reng reng lo" a lo ti dam thliam a. An pangngai khawp mai. 

Thingpui ka in mek laiin Mami'n min lo call a. 

"Tun mai khan Sanga chu a chatthla an ti.. Chawhma lam khan a zual deuh a, phurh chhoh an tum mek laiin a kal ta a niawm e" a rawn ti a. Min ţhawng angreng khawp mai. Aruati nen kan inbiak lai khan a la tha tihna mawni le, engmah kha a sawi si lo. 

Mami phone dah rualin Bella'n a lo call ve chiah bawk. "Sanga a thih kha i hre tawh em? " a rawn ti a. 

"Hre chiah" ka ti ringawt. 

"Phei i tum em? " a rawn tih chuan, "Phei vena chhan tur ka nei hleinem" ka ti leh hmuk a. Ka tum lo bawk. 

"Phei ka tum a" a tih chuan, "Mka kha inhruaitir la.. Honeymoon a ni nghal mai lawm" ka ti a, ka dah nghal. Thingpui ka in zo a. Ka haw thla ve ta bawk. Sanga thihna, Sangte bona, Isabella.. Rilru a va chawl lo kher em. Sanga chu a kal tawh a, ngaihtuah zui em em ngaiin ka hre lo. Isabella vang khan ka ngei rilru deuh naa, thihna hial a thlen takah chuan rilru a tinuam lo ve deuh. Thihna hi zawng a tawp chiang ve em a. Ka in luah khawhar zetah chuan mahniin ka tei ruk ruk a, tihtur a va váng tak. Hnaah te kal tawh ila a tha tur. 

Movie ka en ta ngawt a. Ka entui leh ta phian a. Ka en zawh meuh chuan khua a lo thim chhulh tawh nia! Eirawng ka la bawl der si lo. Whatsappah ka lut zuai a. Aruati pawn chanchin a rawn sawi ve a nih hi.. Isabella msg a awm bawk. 

"Ka niin min lo bia a. Keimah vanga Sanga a thih thu leh a vahnu ang pawha min ngaih theih tawh loh tur thu a rawn sawi a. Phei pawh ka tum buai ta lo mai. " a rawn ti. Pi Dini zia chu a mak mang e aw. 

Ka reply lo. 

Eirawng ka bawl a. Ka khua a har thut. Aizawl lama insawn leh dan zawn a ngai a ni ka ti rilru a. Isabella vanga ka suangtuahna te chu a thleng dawna ka hriat tak loh vangin awm bosan leh law law mai ka duh. Pathianin ka tana a ruat hmeichhia chu ka la tawng ve mai ang. Isabella laka tlawma hetia a awm chhan zawhkual vel ai chuan hetia ngawi renga bansan mai ka tum a ni. Zep nák emaw ka na lo hauh lo, chhungrilah hian min mawlh a, min kap run mai. Ka na veng veng ti mai ang. Tin, Ruatdiki laka ka beidawn tuma ka mood ang kha ka la nei lo. Ka la beidawng tak tak lo niin ka hria. Eng emaw rawn thleng leh tur leh amah rawn insawifiah tura ngaihna ka nei tlat. Chu chu tihbo duh viau mah ila, ka thei rih tlat lo. 

Dar 7 velah chaw ei ka peih ve hram e. Tui ti lem lo chuan ka ei ve mai mai. Thleng ka sil lai takin kawngka an rawn kik a, kut phuan buah chungin ka va hawng. Ka rin loh deuhin a lo ding vang mai. Ka mitah a la en kal zui. Inah a la haw lo a niang, puan a la bih zaih a, a nalh hi zawng a nalh a ni. 

"Eng nge i lo tih dawn? " ka ti chang fak. 

"Ka rawn leng dawn" a ti ve mai a. Ka sawm miah loin a rawn lut. 

"Khaw nge Mka" ka ti a. 

"Ka hre nang. Eng atan nge i tih? " a ti nghat a. 

"Enteh, Bella, tawp mai hi a thain ka hria. Hetia inpal hi ka duh ve lo kei chuan" ka ti ta a. Thleng ka sil zawm leh nghal. Ka bulah a rawn ding a. Min en tih ka hria, ka en ve duh lo. 

"Ni e, i titawp dawn tih ka hria alawm. Mahse, hrereng chungin hetia ka chet hi a ngai miau sia" a ti dam thlap a. 

"Khatin i rinawm lohna kha awmzia neihtir tum suh. Mka i la duh a, sawi kual vak a ngai lo.. " ka ti a. 

 Ka kut hru hulin sitting roomah ka va thu ta daih. A rawn phei ve zel bawk a. 

"Ka inchhir mek niin ka hria" a ti a. Ka nui hawk. 

"I duhthlanna i hrechiang alawm" ka ti a. 

"Remruata chu ni lo la, ka pal lui lo zawk ang che. Remruata i ni tlat a. Ka duh loh dan bera ka hmachhawn che a ngai miau a ni" a ti leh a. A awmzia ka bo tulh tulh. 

"Khatia sawi kual vak a ngai em ni? I duh chu sawi la, kal rawh" ka ti a. 

"Ka duh chu hriatthiamna. " a ti vat. 

"Inzahtawnna tel lo hriatthiamna maw? Mka bula i awm ka phal lo chungin i kal lui a, chu chu hrethiam tur chein min duh a maw? " ka ti a. Ka thin a rim lek lek. He nu hian min hrechiang tawk lo a ni. Amah duh ngawih ngawiah then thei lo turah min ngai em ni? Kum 3 chhung ka nghah Ruatdiki pawh ka kaltir theih chuan ani hmanni lawka inlaichinna ka neihpui chu ka chapona vang pawn ka kalsan thei lutuk tlat ang. 

"Mka leh Aruati ten min blackmail ti ta ila.. I rilru a dang deuh ang em? " a tih chuan ka phu zawk. Ka va melh káwk a, a fiamthu hauh si lo. Ka ngaihtuah loh lam lutuk a ni. 

"Ka hre lo. Blackmail theih hmeichhia hi hmeichhe tha tak a ni lo ang" ka ti chang fak. Ka la luhlul ve rih tlat. 

"Chuvang tak chuan alawm Mka bulah ka kal.. Khatiang ngaihdan i neih ka rinsa vang khan ania ka tihnat che" a ti lehzel a. 

"A tirah sawi mai la.. Awmzia a nei mai tur.. Eng hmangin nge an blackmail che a? I sex video maw?nge thlalak? " hre chak ru tho siin ka ti a. 

"Inneihnaah khan ka kal lo anih chuan video pakhat an thawn tur thu che an sawi a. Chu thil i hmuh ai chuan tiin inneihnaah ka kal. Inneihnaa ka kal avang khan Mka bulah ka let leh tihna a ni lo. Mahse, an duhthusam ang ngeiin Mka bula ka kal vangin nang chuan thu tawp i siam a. An duh chu i thlentir ta a nih hi.. Demna che erawh ka nei lo. Engtikah emaw i lo kir beiseiin ka lo nghak ang che" a ti dap dap a. A tho va, chhuah a tum. Ka tho zawk mai. A banah ka va chelh a, "Eng nge chu chu sawi rawh. Video chu eng video nge? " ka ti a. 

"Thutawp i siam phah tawh a. I hriat kher tulin ka hre lo. Video hmu la i kal tho ang. Awmzia a awm lo. Rawn kal lo tawp tur ka nia, hetia i rilru rawn tihbuai leh kual hi ka duh dan a ni bik lo, mahse, turtu ka nei a. Thutawp i la siam loh beiseiin ka lo kal a.. Ka hlawhchham a nih hi,? " a ti a. 

Zaidawh deuh ngaiin ka hre ta. Isabella hian hun khirh a hmachhawn ve mek a ni thei. Video ka en dawn ai chuan Mka bula kal a thlang a, thutawp ka siam loh hram beisei chungin a ni a kal ni. Kei lahin engmah hre si loin ka lo titawp ta mai si a. Laklawh deuhin ka dintir niin ka hria. 

"Sawi ang. " tiin ka pawt thu a. A mitah chiang takin ka melh a. 

"Video chu eng nge a nih? Ka hriat chuan chance kan la nei. Tin, nakin zelah pawh an la tibuai zel thei che. Police ka nihna ang pawn chingfel ang" ka ti ta a. 

A ngawi ran a. A thaw leh halh thin. A rilru a hah tih chu a lang mai. 

"Mka nen kan inthen tirh khan mumalin ka khawsa lo va. Mi á ang maiin ka awm a ni. Ka tih loh tawp tur ka ti a. A pawi khawp mai" a ti a. Ka hre chak telh telh. 

"Mipa i mutpui em ni? " ka ti sup a. Lo mutpui pawh nise, Mka pawh a mutpui tho a, ka tel ve hmaa a nun chu a ta a ni a, sawi theih ka nei hlek lo. He lamah chuan ka zau angreng. Mahse, ka lakah zepin a hnuah hrechhuak leh ta si ila ka ngaihdan erawh a dang thung ang. Lateii ka ngaihdan ang khan. 

"Mipa ni loin hmeichhia ka mutpui a" a ti ta a. Ka meng lian ngawt ang. Mak ka ti tih chu zep kher ngaiin ka hre lo. 

"Chuan.. " ka ti hmuk a. 

"Mi tenawm ber angin ka khawsa alawm. Shillongah khan ka roommate nen video tenawm tak kan siam a. Chu chu Aruati hian ka laptop atangin a lo la ru a, a nei tih a hnuah chuan min hrilh tho. Tun thlenga a la kawl erawh ka ring tawh lo. Mahse, i bialnu ka nih takah khan Mka nen tangrualin chu video chu thehdarhsakah min vau ta a ni. I hriat si loha ka rilru hah thinzia leh ka buai theihzia kha.. Mahse, ka pal lui zel a. Lunglei ka thlen takah chuan Mka hmangin kan inkar pawh chah an tum uar ta sauh a. I pride cho chhuaha nangman thutawp i siam theih nan tihian min kai kual ta a nih hi" a ti ta a. Sawi tur a va váng tak. Ka bialnu chuan hmeichhia sex hmanpuiin video hial an lo siam anih awm chu! Mipa pangngai tan chuan chu tluka tenawm leh namnul harsa chu a tam lo vang. Video chu ka hmu chak hlek lo bawk. 

"I lo les tih reng ka hre hleinem" ka ti a. 

"Hmeichhia hmun thuma thena hmun khat hi chu bisexual kan ni alawm. Hun tawn azirin kan insiamrem mai zawk a ni" a ti a. Hei hi chu a dik maithei. Ka rin loh pui pui an hmeichhiatpui te nena nuamchen ka hre nual. Tin, Mizo ten kan hriatpawlh deuh chu Tomboy leh Lesbian hi. Tom boy hi chu langsar takin an pa a, patil kan tih ang hi a ni. Ngaihzawng nei lem lo te pawh an awm. An pa ve tawp mai. Ngaihzawng an neih pawhin Mipa ang chiahin an treat a, hmeichhe thenkhatte phei chuan an then mai mai thei tawh ngai lo. Chutiang ni lo a langah pawh nu zêm mai, Tihnat awlsam hmel tak, bialpa ngaihsak lo, hmeichhiatpui te nena sex hmanga indawr thei 

an awm a, hetiang hi Lesbian kan tihte chu an ni. Rin loh tak tak an awm nual. Bisexual erawh mipa leh hmeichhia kawp thei ve ve kha an ni mai. Ka bialnu chu a lo bisexual reng chu a nia! Lem duak duak a har ve khawp mai. Tenna a awm lo thei si lo va. 

"Video chu tuin nge kawl? " ka ti a. 

"An pahnihin" a ti tawi ták. 

" Delete tir an ngai anih chu. A nih loh chuan an tlangzarh thut thei" ka ti a. 

"Engtin" a ti hap. 

"Keiman ka lo buaipui mai dawn nia. " ka ti a. Buaipui ka chak em em vang ni loin, blackmail hi ka hua. Tupawn rights kan nei a, chumi zah lo va dan pela invauna leh inhnuaichhiahna hi ka pawmzam thei lo. Bella pawh a rilru baihvai laiin awmze nei loin a tal a, thil tenawm tak a ti a ni mai. A duhthlanna a ni miau a. Kan sawi theih a awm lo. A duhthlanna a hmansual vanga rahbeh kher erawh kan thuneihna bak a ni a, a chetsualna remchanga hmanga kan thuhnuaia dah theihna kan nei lo a ni. 

"Chuan, kan inkar hi"a ti zawi sap a. Tun ang reng renga Bella thuhnuairawlh hmel ka la hmu ngai lo. Mahni inringtawk leh induhtawk takin min hmachhawn thin. Tualthattua puh a nih lai pawh khan a zám hmel kan hmu ngai lo a nih kha. Tun tum erawh a pal hnawkah a awk ve miau a, chapo takin a dawngsawng thei bik lo a ni mahna. 

. "Ka hre lo. Hun ka mamawh ang" ka ti a. 

"Eng thutlukna pawh siam la, ka dem lo ang che. Ka at man chu ka tel tur alawm" a ti a. 

"Ruatdiki pawh nasa takin ka hliam a. I kawng zawh ang hi a zawh ve kher lo asin" ka inrin hmain ka ti a. Ka inthiam lo leh deuh naa, ka sawi hman tawh si. 

"A dik alawm. Ka tluk lo khawp mai" a ti sap a. A ding a, min rawn melh vawng vawng. "Keimah hian khawvel hmachhawn ila tumah ka tina lo ang a. A tha zawk maithei. Vanlalsanga lah keimah vangin a thi bawk sia. Buaina thlentu ka nih hi, ka chhungkua ka chân a, khang zawng zawng pawh kha keimah vang vek a ni ngei ang. Ka nuhrawn leh ka patea nupui te jail-ah an tang a, hetah pawh a phenah ka lang ve zel.. Buaina ka nih hi.. Keimah hian ka tha ber ang.. Inenkawl tha ang che" a ti dam thlap a. Koh zui hman lohin a tlan chhuak zui nghal. Ka thu ngawi tlawk tlawk ringawt. Ka ruak vek. Ka rilruah engmah a awm lo. 

Bena a rawn luh lai pawh chuan ka thut ngaiin ka la thu reng. Mak min ti deuh nge.. "Eng nge thleng a" a ti hu mai. 

Za lo zetin ka nui a. "A tam mai" ka ti ringawt. 

"Thluak min senpui deuh la ka duh asin. Tluanga fapa chungchangah hian" a ti a. 

"Engti zawngin" ka lo ti ve mai. 

"Ka hre lo, chu tak chu. Tun thlengin call an la dawng lo. Hralh an tum nge ni ang a? Naupang hi a thi tawh zawk ni ang? " a ti a. 

"Engmah ka ngaihtuah thei rih lo.. " mangang zetin ka ti thlawt a. 

"Ruatdiki nge Isabella" min hrechiang zet hian a ti a. 

"An pahnihin" ka ti leh lawi si. A nui tawp ringawt. 

"Duhthlan turah i buai mi? Tun hunah chuan Isabella ka duhpui che. Hmeichhe invawng tak a nih kha mawle. Ruatdiki chu hnawk a tam tawh, pasal nei lo mah se; rilru nuam tak leh a hma anga in awm dun theih ka ring tawh lo" hrethiam lo tih hriat zet hian a ti a. Bena bulah hian Ruatdiki hriatna neih leh te, kan hun tawn zawng zawng kha ka hrilh ve vek a ni. 

"Isabella hi a invawng lo" ka ti nghut a. Duh aia thui sawi ka hlau leh si. Ka thian tha tak pawh ni mah se; Isabella chet dan kha a hriat ka duh lo. Hmeichhia chuan inpalzam leh thei mai mahna. Mipa tana hetiang relationship tenawmzia hi inhrethiam pha lo vang. Mawngkawhur te nen angkhatah kan ngai. Rilru a zau viau thei tlat lo, kan ngaihdan hi a dang hlawk thei. Chu tak chu kei pawn hun ka mamawhna a ni. Isabella hi ka bialnu angin ka pawm leh thei ang em tih chu hunin a hril ang. Mahse, a kal dawna a thusawi kha chuan min khawih viau! A dinhmun hretu ka ni a, ka khawngaihin ka lainat.. Khatiang ngaihdan a neih vang khan tih loh lohte a ti ang tih hlau ber erawh ka ni leh tho. Huiham.. Mi vanduai tak hi chu ka lo ni e. 

Mka number ka nei ta a. Keimah ngeiin ka chinfelsak loh chuan a mualpho ka hlau si. Aruati zawk biak ka tum a, mahse, Sanga thihna velah an buai ka ring si. Mka zawk chu ka call ta a, a number hi Isabella ka va dil kha a nia. Min lo pe ve mai. A ring ral tep tihin a rawn la a, an ri deuh nuai nuai mai. Inneihna lamah a la awm a ni maithei. 

"Mk, keimah Remruata, Isabella thianpa" ka ti te te a. 

"Aw eng nge ni ta? " a rawn ti duam a. 

"A video inkawl a, inblackmail tih ka lo hria a, delete ula ka duh a ni. A nih loh chuan, case kan file mai dawn a.. " ka ti ta a. A ngawi vung vung. 

"Ka sawi chu i hrethiam em! " ka ti leh fak a. 

"Chu chu Isabella sawi em ni? " a rawn ti a. 

"Aw.. Hetianga chet hi thing i ti ve lo em ni? A tlawmthlak ngawih ngawih. Mipa angin awm rawh" ka thinrim dawn tlat. 

"Ruatdiki ruahmanna vek zawk alawm ni a.. Hetianga tih hi ka duh dan a ni bik lo" a rawn ti tálh a. 

"Inhlawhtling dawn chuang lo. Video kha a darh anih chuan innasa lo khawp ang. I hrethiam ang ka ring, mi pangngai i nih chuan" ka ti leh ngat. 

"Ka hrethiam alawm. Tihdarh ka tum hran lo. " a ti ve a. 

"A tha.. Chuan, Isabella hi tibuai tawh lo la ka duh bawk." ka ti leh a. He thu sawi hi chu nuam ka ti chiah lo. A hmeichhe thuhla deuha ka hriat vangin. 

"A tha lawm.. Hlim takin awm ru" a rawn ti ve leh thluam. A á lo tih a hriat khawp mai. Aruati erawh an buai zawh lamah ka be mai ang chu. Mutnaah ka inngaihtuah nasa viau. Isabella nena kan hun kal zel dan tur.. Mi dang tuman a thiltih kha hre lo mah se, ka thinlungah a riak tlat ang em? Nakinah vanduai palh vangin video kha darh ta se, A lamah ka dingin ka zahpui lo thei ang em? Inthen hlen ta ila engtin nge hringnun a hman zel ang? Ka tel loin a awm thei dawn tih chu ka hria. Mahse, a nun te holam zetin a hmang ang a, mipa tha lo a neih rosum chiah duh te a tawng ang tih ka hlauhpui bawk si.. Ruatdiki hnawl phah nana ka hman a ni a, ka tan mi naran a ni thei ngai dawn lo. Venghim tur khan ka intiam tawh a, a nunhluia a tihsual pakhat vangin ka kalsan mai dawn em ni? Ka inthiam thei zel ang em? Ngaihtuah tur a va tam em.. 

Tlai tawkah ka tho a. Ka insu leh te te phawt. Chaw ei khamah chawhmeh leh mamawh lam khawmin ka chhuak a, Mamawii ka hruai ve bawk. Chawhmeh zawrhnaa kan awm laiin, Mamawii'n min kheuh zeuh. A hawina lam ka va hawi chuan, Tluanga leh hmeichhe pakhat, hleitling ve tak, hmel pawh chhe lem lo hi damdawi dawr bulah an lo ding dun a, Hmeichhia chu a thinrim hmel viau. A fapa bo laia chutiang hmeichhia nena an chhuak dun chu a pawimawh viau a nih ka ring. Ka ngaihven zui duh lo. Mahse, Purunvar min buksak laiin kha hmeichhia kha kan bulah a rawn kal a, Zikhlum a rawn en ve a. A phone a ri zui bawk. "Aw.. Engmah a tha lo, ka lo haw ang a, chet lak dan tur kan rel dawn nia. A tha em? A muhil mi? " a ti mawlh mawlh a. Tluanga hmuh hmeichhia chu ni lo se, ka bengkhawn kher lo maithei. Kan bul maia ding a ni bawk a, a tawng hriat loh theih loh a n bawk a. Hmana Isabella case kan buaipui laia ka rilrua eng emaw rawn awm thin kha a rawn lang leh zawk. Tihpalh niawm takin ka inher rual chuan ka su lui nghek a, a phone chu a thlauh ta a, ka chharsak vat, "Valpuia" tih nen an inbe mek tih ka hre phawt. Ngaihdam ka dil mawlh mawlh a. A phone a chhe lo bawk nen, ani pawh a ngawi zui ve mai. Phone chu chharin, "Lo jection leh mai rawh. Inchung nu a rawn kal chuan, chhan dan tur i hriat kha, a rawn chhuk tep ang" a ti leh zung zung a. A dah nghal. Ka ngaihtuahna chu a darhsarh ta nuai mai. Ka mawhphurhna a nihna chen a awm ve bawk a, chu hmeichhia chu hriatchian ka chak tlat! Tluanga ka biak a ngai a ni. Mahse, ngaih loh lamah lo ngai ta se emaw ka ruahman ruk dan ang loin thil kalpui ta se.. Mamawii bulah, "Mate, auto hmang haw mai ta che, ka chawhmeh ho pawh hi lo hawn mai la, kalna tur ka nei a" ka ti a. Ani pawn a hnial lem lo. Chawhmeh dawr piahah sa zawrhnaah hmeichhia chu ka lo cháng a, inkhai bawr deuhin a lo chhuak. Stepah a chhuk thla zui nghal a, ka zui ve chat. Electric venga khawsa an ni maithei. A kal thla zel a, a hnung deuh atangin ka zui ve zel bawk. Veivak an awm ve neuh neuh bakah hnunglam a rawn hawi lem lo va min hmu lo a nih hmel. Electric veng mawng thlengin kan inzui ta zel. An awmna pawh chu a va mawng angreng ve aw. Tuikhur piah atang phei chuan veivak an awm tawh mang si lo va, ka fimkhur a ngai. A mawng phe hmu hman tawkin ka kal ve zel a. A tawpa tawpah chuan building hlui ve tawh lam, patêkin a bawm deuh nuai tawh hnuaia stepah chuan a chhuk a, a hnuai ber dawttu niin ka hria, chutah chuan a lut ta a. A rawn chhuah tawh loh vangin an chenna a nih ka ring nghet ta. An in luahna neitu hming chu Lalthangmawia a ni. Ka let leh lamah in lo awm hmasa berah ka lut ta râwih. Pitar lam tawh leh mipa kum 45 bawr vel tur hi an lo awm a. Kawtah naupang pathum an awm bawk. 

"Ka pi, thil ka lo zawt lawk che u.. Pu Thangmawia in awmna lai hi min hrilh thei em le" ka ti a. 

Mipa chuan, "Saw laia in lo awm hmasa ber saw a ni e. " a lo ti fel thlap. 

. "A in hnuai saw a ruak em le? Luah tur ka zawng a, min kawhhmuh a" ka ti ta zaih a. 

Pitar chuan, "Aa. A hnuai ber saw chu a ruakin ka hria. Thla hnih kalta vel mawni khan a hnuai ber dawttu saw an rawn luah a. A nuam reuh asin le, a hnuai ber saw chu a tet bakah a tawp riauin ka hria" a lo ti luam a. 

"Min luah khalh a ni maw.. A va pawi em.. " ka ti a. 

Mipa chuan, "Kan thenawm lawkah pawh sawn in ruak chu a awmin ka hria.. Va zawt chhin teh" a lo ti a. Lawmthu sawiin ka chhuahsan ta a. Ka zawh duh tak ka zawt ta lo va, an ngaih a that loh ka hlauh deuh vang a ni. 

Ka hawn kawngah Bena ka call a, "Thianpa, tlaiah rawn peng teh aw" ka ti a. 

Ka hah ngang mai. Ka fit vak lo anih dawn hi. In lam ka pan zui nghal a. Ka theih ang angin in leh a vel chu ka tifai ve a. Rilru ngaihtuahna a chawl lo va a zia deuh. Tluanga te case vangin Isabella pawh ka hrechhuak tam lo. Ka rilruah erawh a thi lo thung. Eirawng ka bawl laiin Bena a rawn thleng a. Chaw eiah ka sawm ve nghal.

"Tluanga bialnu hluite ho hi i hre vek em? " ka ti a. Ka zawhna chu mak a tih hmel viau. 

"Hre vek nang. Kawp ngheh em em a nei mawni le" a ti a. 

Chhuna ka thil tawn chu ka sawi ta a. A ngaihtuah zui ve aniang, a ngawi vung vung mai. 

"I rilru ka hrethiam, Tluanga vangin a bialnu hlui tu emawin a fapa a rukbosak angin.. A dik em? " a ti a. Ka bu nghut. 

"Tluanga leplerhna hian a tawngbua a ni ve thei, hmeichhe pawisak nei tawh lo chuan engmah tih an hreh ngai lo. Amah Tluanga zawk hi dáwp fiam deuh a ngaiin ka hre tlat. " ka ti a. A bu ve nghut nghut mai. 

"A ex te ho profile nei vek thei ila; chhui chiang vek ila kawng chu a awm mai ang. " a ti a. 

Thil thleng thei zawng zawng kan dapa kan chip a ngai ve tlat a ni. Kha nu ka rinhlelhna chhan chu a phone biak dan kha.. Engmah chinfel a nih loh thu a sawi hnuah tu emaw muthilh leh hilh lohte, mi hrang an kala sawifiah ngai thilte kha a ni. Tluanga nen khan hmu dun lo ila ka ngaithla liam ang. Tluanga nen an inbiak khan hmeichhe hmel kha a nur a, a lungawi tehchiam tlat lo. Tin, amah kha nula a nih chuan nula senior lam a nih a rinawm. Nuthlawi a nih ka ring deuh. Mi invawng tak pawh a ni ngei ang, a inchei dan atang kha chuan. 

Chaw kan ei dun hnuah Lucy rim a duh sia, min sawm ve naa, ka hnar ta mai. Chhuahvaha thenrual kawm ka chak tlat lo. Mahnia awma inngaihtuah rauh ruah ka duh. Ka intihfel zawhah wooferah zai ka play a, uluk zeta mei zu chungin ka rilru ka vahkualtir mai mai. Isabella a reh a, Aruati pawh a la reh rih. Sanga thihna chu an tuar viauin ka ring, an enkawl rei hman vak lo bawk nen. A pawi ngawt mai. Kan hmangaih loh tur kan hmangaih hi natna a lo ni. 

Shania Twain-in , "You're still the one" a sak vawng vawng lai chuan, Isabellain a kal dawna a thusawi,"Buaina chu keimah ka ni. Keimah chauhin khawvel hmachhawn ila tumah an na lo mai ang" a tih kha ka hrechhuak a. Ka tho thut. Kha thu a sawi lai khan thinrimna leh lungawi lohna khan min la bual â a, engmah rilru ka nei thei rih lo kha a nia. A rilru na hmel leh tlawm taka a kal zui te kha ka mitthlaah a rawn lang a. Hlauhthawnna mak takin min tuam tlat. Nilengin a chanchin ka ngaihven lo va, ani lah a ngawi ngat ngat bawk. Whatsapp ka lut mang lo bawk nen.. Ka phone ka ban vat a, whatsapp chu ka'n lut tha leh.. A online lo. A dp a bo bawk. Min block zawk em mawni. Aruati msg a lo awm leh hman tawh. A va mak tak. 

"U Imma, Bella chunga kan thiltih kha i tana tha tur a nih vang a nih kha. I duh leh min haw rawh" tih a ni. Nakinah ka la bia ang chu. Ani aia pawimawh a awm rih. Bella chu ka call ta a. A switch off! Mawlhtu ka nei a, min nawr et et reng lehnghal. Ka insiam sawk sawk a. Bella in lam panin ka inkhalh phei ta vuk vuk mai. Ka tlawm ta tihna a ni lo. Hmeichhe rilru lian zet hian tawrhna tam tak a lo hmachhawn tawh a, tunah a hmachhawn leh mek a, buaina naran tak a ni lo bawk. Amah hnaih bertu keiin ka hlat lehzel chuan a beidawng hian thil tha lo a tih ka hlau a ni. Ka pawimawh ta viau e ka tihna lam ni loin a chhungteah belh tlak a neih lohzia ka hriat tawh vang a nia.. Thinphu dup dupin a in kawng chu ka zawh thla a. A thim khup mai. Kawngka chu ka kik dat dat a, chhawntu reng ka tawng lo. Thawm ngaichangin ka ding ren rawn a, a reh vawng vawng mai.Hnuai lam ka'n en chu Kawngka chu talain a inkalh lo va, mahse, pawn lamah a lo inhawlh kalh reng a lo nia! Ngaihthat lohnain min tuam hlup hlup bawk. Ka let vut a, Pu Rinawma te in lam ka pan ta a. An lo awm thap.. "Bella saw khaw nge a kal inhre mial em? " ka ti ta chawt. 

"A awm na nge? " Pu Rinawma chuan a lo ti vut a. Ka lu ka thing.. 

"A nite inah a riak phei dawn a niang" a ti a. "Khawngaihin min biaksak teh.. An in ka hre si lo va, Bella ka hmuh ngei ngei a ngai" ka ti sawk sakw. 

Mak tih hmel angreng tak hian min melh a, a phone a hmet zui nghal. "Aw.. Bella a lo riak dawn mi? " a ti zui zat a. 

"Maw.. Khaw nge a kal le.. Hei a thianpa hian hmuh a ngai a. Inhria em? " a ti a. Ka lo insangruh nasa ngang mai. 

"A ni te inah pwh a kal lo. Khaw nge maw a kal le aw" tiin min rawn melh a. Engmah sawi lo chuan ka chhuak vut. Chak zetin Pukpui lam ka pan ta nghal. He lai hmun hi Isabella nen kan tan a pawimawh thin reng a ni. Risk lain ka kal tih erawh ka'n sawi hram a nge. Dik tak chuan ka rilru hah leh mangang chuan dem tur ka zawng chiam a, Pu rinawma leh Bella ni te pawh ka dem. An fanu, an vahnu a nia. Amahin a khawsa tih an hria, ngaihsaka ngaihven tur a nia. Tawng thu chhe loah boral ta se, hmangaihber leh ngaihsak ber angin an lang leh tho ang. Pukpui ka thlen chhoh chuan dar 11 a ri thuak tawh. Veivak pawh an awm tawh mang lo. Arsi a pe uar a, boruak a nuam phian thung. A hmaa a lo awmna thin lam ka pan nghal sawk sawk a. Thawm neih hmasak pawh ka tum lem lo. Ka rilruin ka tawngtai bawk. 

Thingbul nghengin a thu a. A bike pawh a bul lawkah a awm. Thla eng hnuaiah a hmel chu fiah lo ruai hian ka va hmu a, a maimichhing niin ka hria. Ding meuin ka melh ngawih ngawih ringawt. Ka thinrimna leh a laka ka lungawi lohna te kha ka lainatna leh khawngaihnain a rawn thlak vek.. Hmeichhe vanduai, baihvai leh khawhar tak, a chhung leh khat ten an thlahthlam, a chhungkua ten amah chauha khawhar taka an hnutchhiat hmeichhia chuan damkhawchhuah a la tum ve hram hram a. A nunhluia a thil lo tih tawh vanga ka kalsan a hlauh vangin hrehawm ti chung chungin a duh miah loh thil a ti a, Keiin a insawifiahna ka hriat hmain thutawp ka lo siam hnan ta bawk si. Beiseina zakzum tak nen ka in hial a rawn lut a, engkim a sawi a. Mahse, ngeng takin ka lo dawngsawng a, tha zaia inthlah pawh awm lo vin a kal lai ka thlir liam ringawt anih kha.. Amah chauha hun harsa lo paltlang tawh tawrhna a tan chuan a tam tawh mah mah e. 

"Bella" ka ti sup a. A rawn meng diar diar. Min melh ngawih ngawih a, Harsa ti zetin a nui lui sak. A bulah ka thu nghal a. "Min timangang hman alawm" ka ti a. 

"Ka thi dawn hleinem" a ti sap a. 

"Mahse, hetia awm hi a tha ber lo" ka ti a. 

"Hun harsa vawitam lo paltlang tawh hi mi pakhat vangin ka no zo ta vek a nih hi.. " a ti leh daih. Hma lam a melh ran a. 

"Haw ang. " ka ti a. 

"Ka duh lo" a ti nghat. 

"Tah hian kal tawh lo la ka duh, misual te pawh i tawng thei. A hlauh pawh i hlau lo em ni? " ka ti a. 

"Hlauh chu pakhat chiah ka nei" a tih laiin a mittui a lo tling pam a. A khap sak sak. 

"Ka hria.. Ka kalsan lo vang che" tiin a kut ka va vuan a. Min rawn melh, "Tak tak em? " a ti ţiau a. 

"Umm.. Ka tiam tawh che a.. Ka sút thei hleinem" ka ti nghet charh a. 

"I awm chuan engpawh ka hmachhawnin ka paltlang thei. I awm loh chuan ka chak tawk lo. " a ti a. Nuam ka ti veng veng mai. Ka kuah a, ka tel lohna hmunah mipa ang maia paukhauh leh chakin awm thin mah se; ka tel tawh chuan hmeichhia a nihzia a lantir thin. Hei hi ania min hîp em em thintu chu. 

"Mka te pawh ka hrilh tawh kha. A rawn tibuai leh tawh ngai lo vang che" ka ti a. 

"A tir khan lo sawi vek ila kan na lo mai tur. Mahse, ka ngam ngang lo a ni" a ti a. 

"Ni e, mahse, engkim a fel vek tawh alawm. Chuan, buaina i ni lo, buaina tikiangtu zawk i ni.. Kan innei vat bawk ang" ka ti duah a. 

"Engkim i thu vek aw.. Boss" a ti sar sar, ka tuar thei ta lo va, ka fawp ta a. Thil inbat fuh lo, inhmu rem lo laklawh vanga natna hi thudik zawn chhuah tuma kan beiha kan huaisen phawt chuan a fel leh thluam thin. Ani hi ka ta chauh a ni reng tawh ang. 

"Video kha i en ve duh hrim hrim em" a ti a. 

Ka ner sawk. "Ka duh i ring mi? " ka ti hlur a. 

"Kei pawn ka en ngam chuang lo. Ka rui em a. Khatih lai khan" a ti a. 

"Sawi tawh suh. Kha thil kha ka thinlung atangin min nawhrehsak la ka duh ber.. Mipa tana siam i ni, Bella.. Chu mipa chu keimah chauh. Chu chu hrereng ang che" ka ti a. 

"Umm ka hrereng ang.. Chuan, ka nunhlui vanga i natna leh zahna zawng zawngte kha ka tuamdam vek ang. Ka tiam a che" inringtawk zet hian a ti a. Isabella dik tak ka kuah leh thei ta.. 

Kan hawn dawn chuan dar 12 a pel tawh a. Bike-a a lawn tur chu, "Ka thak sep sep mai.. Khumah lo chuan ka duh tawh lo.. Ni lo, inneih hma chuan ka duh tawh lo" a rawn ti zauh a. Ka lo nui hawk hawk.. 

😄😄😄