Thinlung- 19

THINLUNG.. (19)

Ziaktu: Toni Râlte

"Chu chu engtin nge a nih theih? A first cousin a nih hi" ka ti hráwk a. 

Hma lam a melh ran a, "An tleirawl lai atangin ka hre tawh. Amah Sanga hian a zep char char a, mahse, a awmdan atangin ka man thiam. Hrehawm a tih hlauin ka zawt duh ngai lo. Mahse, Nauteii te inneih dawnah zet kha chuan a insum thei ta lo va, A tum dan dik tak chu maw.. Aruati te inneih thulhtira nang leh Aruati te boruak siam that leh kha a nia. A chhan chu Isabella nen inlo inzawm ve miau si a, kawng dang a nei bik lo a nih kha.. Kei chuan ka nau a nih angin khawngaihna chin ka nei, mahse, a thiltih kha a tha ber lo tih erawh ka hria" a ti ta dap dap a. Ka chil ka lem khawlh. He lam hawi zawngin ngaihtuahna ka la hmang ngai lo va, ka rin loh leh beisei loh lutuk chuan min tihamhaih lo thei lo a ni e. 

"Bella chuan a hre ve a maw? " ka ti a. 

"Hre lo. A hriat ka ring lo. Hria nise i bulah a sawi tawh ang. A hriat lohna tak hi tuna an nat chhan pawh a ni mahna" a ti leh duah a. Ka lo bo leh deuh. 

"Mahse, an accident nen chuan a inkaihhnawih thei dawn em ni?" ka ti a. 

"Maithei.. Bella a rawn harh phawt a ngai anih hi.. I lakah hian inthlahrun a na hle a ni. Nangmah nen engkim hi a la inzawm zel mai si a" a ti a. Min rawn melh bawk. 

"Aa.. Kha lam zawng chuan inthlahrun a ngai chuang lo. Mahse, min thawng khawp mai. Sanga rilru chuan" ka ti a. Ka mang rih, fim takin engmah ka la ngaihtuah hleithei lo. 

"Lungleiah phei vat thei ula a tha ber.. Buaina thenkhat hi chu kan tlanchhiatsan a ngaih chang a awm ve a nia" a tih chu ka pawm khawp mai. 

"A nih Nunpuii kha i hre ve renh reng em? " ka ti ta daih a. 

"Hre lo. Sanga hmanrua ni duh khawp chu an inzawmna a thuk hle a nih loh pawn a rethei viau anih ka ring" a ti a. 

"Engtin nge Sanga kha i hriatchhuah hrim hrim? " ka ti leh hram. 

"An inbe ru lai ka hria mawle.. Bakah rinhlelh rukna ka nei sa ve deuh bawk a. Isabella a atchilhzia ka hriat vang leh inneih dawn hnaia a awmdan danglam thut thut avang khan ngaihdan ka lo nei ru sa deuh a. Ka lo ring dik ta chiah bawk a nih hi" a ti a. Ka bu nghut ringawt.. 

"A khawngaihthlak letling zawk e a" ka ti zawi sup a. 

Chumi zan chuan Bella chu a rawn harh lo. Kei pawh ka chhing ve sek e. Zingah ka nu ten chaw min lo kensak a. Lehlamah Aruati te lam lahin Sanga an ngaihtuah a ngai ve bawk si. Sanga pawh chawhnu lamah a zia deuh tak avangin ICU atangin an la chhuak ta a. Bella chu vil deuh chawt ka duh vangin cabin ka book sak ta mai. A malin a fahrah si a, A ni te lahin an fapa ngaihtuah ve tho a ngai si, kei lo chu enkawltu tur a nei lo a ni. Ka mawhphurhnaah ka ngai hmak mai. Ka chhungte pawn sawisel leh i an nei lem lo bawk. Ka inbual chhung chu a nîin a lo awmpui a. Ka inbual sawk sawk a, ka chho lehnghal. Ka chawlh lak pawh ka dil belh ta mai. Engchen nge a awm dawn ka hre si lo va. Doctor te kha chuan a lu sawhna kha chu a dam thuai tur thu an sawi a, a kawchhung lam hi test mumal tak an la nei chiah lo va, a ban veilam erawh a tliak. Hei hian hun a duh rei deuh maithei a ni. Damdawiin ka thlen chuan a lo harh ve a lo nia. A niin tui a lo tulh mek. A harh tih ka hria chu ka lawm takzet a ni. A bulah ka va thu a, chau zetin min rawn melh hram hram. Ka lo nui ringawt. 

Tui an intulh zawhah pi Dini chu Sanga awmna lamah a va kal ve leh thung a. A indaih lo khawp mai ani pawh. 

"I tha vat mai ang. Hahdam deuhin awm rawh aw" ka ti a. Ka rin loh deuhin a mittui a rawn luang. Ka hruksak vat a. Chunglam melhin a hmui a pet fan fan mai. 

Tawng a tum a, a aw a chhuak thei lo nge a thulh leh daih. "Engmah sawi rih suh. I chau rih em mai. Engkim a tha vek aw" ka ti ve ngial a. Dam lo enkawl hi ka thiam chi a ni hauh lo. Mahse, a tul miau si a. 

Ka thiante ho an rawn lang ve bawk a, Bella erawh a muhil leh daih. Ka thiante hi an felin min tawiawm tha thei khawp mai. Kan awmho laiin Aruati a rawn lut ve a, Bella khum bulah a va ding a a chal chu a dek a. "Lo tha vat rawh aw" a ti sap a. Kan bulah a rawn phei ve a. 

"I chau tawh awm sia, zanin chu ka lo riahchhawk dawn che mi? " tiin min rawn en a. 

"Ka chau lo.. A ngai lo.. " ka lo ti vat. 

"Hmm.. I hlauhthawn vang a nih kha" a ti a. A sawi awmzia ka hrethiam chiah lo. 

Johny chuan, "Hlauthawng ve bawk ang chu.. " a lo ti khauh a. 

"U Sanga ka riahpui dawn a, min mamawh chuan min lo ko mai dawn nia aw" Aruati chuan a ti a. A chhuak zui nghal. Atea pek chuan, "Thianpa, vil tlat ang che. Kei chu an chhungkua hi ka ţih tlat. Tihhreh an nei lo si.. " a ti ta a. Ka nui hawk hawk ringawt. 

"Aruati chu i ringhlel tihna mi? " ka ti a. 

"Umm.. Nangmah a neih duh luatah che hian Bella chungah eng emaw tak pawh a ti duh thei" a ti ram hmuk a. Zothana te nen chhungkhat an ni a, Aruati te chhungkua a haw ta viau pawh chu awm ka tihpui tho mai. Nuteii leh Lydia ten chaw an rawn dah a. Bellain a la ei thei si lo va, tui ti lo deuhin mahniin ka ei. 

Zanah Doctorin a rawn tlawh chuan, "A that chak riau hi a. A ban hi a ni deuh mai. A lu pawh a dam sawt tawh khawp alawm" a ti a. A lawmawm thin e. Sanga erawh vanduaithlak takin a spinal chord lamah harsatna a nei a, kein a kal thei tawh lo maithei a ni. Engtin nge maw an accident theih reng reng ni. 

Dar 9 velah, "Remruat" a rawn ti tham tiak a. Ka hawi rang kher mai. "Ka tui a hal ee" a ti a. Rang takin tui ka la a, ka tulh nghal vat vat. A in tam thei chuang lo thung. 

"Na i nei em? " ka tih chuan, "Ka bek dinglam hi a phu ut utin ka hria" a ti a. Nurse ka va ko nghal a, nachhawknain an chiu a. 

"Ka tibuai che ee" a ti a. Min rawn melh hram hram. A chau tih erawh a lang khawp mai. 

"Tibuai teh nang.. Nuam ka ti zawk, hetia i bula awm hi" ka ti a. A nui sak. 

"Sanga chu eng nge a an? " a ti a. 

"A tha deuh e, mahse, a ke a hmang thei tawh lo maithei.. A pawi khawp mai" ka lo ti a. 

"Pawi tak a ni. Mahni inthunun theih loh rah a seng dawn a nih chu" zawi sap hian a ti a. 

"Zawh tur che tam tak ka nei a. Mahse, i chau rih sia, muhil rih phawt rawh. I that deuh hunah ka zawhna chhanna chu min la pe vek dawn nia" ka ti a. Zep loh chuan thil thlen dan ka hre chak et et a ni. 

"Min zawt la" a ti tak naa, a mitmeng leh hmelah a chauhzia a lang si. Ka tilui duh lo. Nachhawknaah khan mutthilhna a tel bawk a, kar loah a muhil ve leh ta mai. Kei pawh phone khawihin ka mu zal mai mai. Sanga pawh va kan ve a that viau rualin, Aruati'n a awmpui sia, ka hmu chak rih lo. 

Mahse, whatsappah min rawn be ta tho. 

"Bella chu a harh tawh em? " a rawn ti a. 

"Harh zuai a, a muhil leh tawh. Sanga eng nge a an? " ka ti ve a. 

"Ani pawh a muhil.. Thil ka zawt ang che aw" a rawn ti a. Eng tak ni ang maw.. 

"Ih maw, hmana ka nat lai khan Bella i enkawl ang khan min enkawl ve em? " a rawn ti ta a. 

"Enkawl theih i ni ve lo alawm. I rawn harh rual khan tu nge ka nih i hre si lo va, ka tan chuan enkawl che kha a inthlahrunawm em a ni" tiin ka chhang. Ka sawi dik thawkhatin ka hria. Enkawla duat kha ka chak takzet, mahse, hmelhriat loh anga min en tlattu chu han enkawl vak dan a awm lo a ni. 

"Ka ring alwm. Keimah hi ka inhua" a rawn ti a. 

"Tihsual i nei lo. Khatin nangmah inthiam lo tawh suh," ka ti a. 

"Accident kha tawk lo ila chuan, kan innei tawh awm sia" a rawn ti a. Ni e, kan innei tawh ngei ang. Chunglam remruat dan hi kan hrethiam si lo. 

"Ni e" ti chauhin ka chhang thung. 

"Isabella hi i hmangaih em? " a rawn ti leh khauh. A va mak tak. 

"Aw hmangaih e" tiin ka chhang leh hmiah. 

"Umm.. A tha. Kei chuan Zothana hi ka hmangaih lo a niang, tunah pawh ngaihna ka nei miah lo" a rawn ti a. 

"Ka hrethiam bik lo.. Aruat, i huat vang a niang" ka ti ta ringawt. Movie ka ensan ta daih a. Biak tam loh a him rihin ka hria. Beiseina a nei zel ang tih ka hlau. Bella natna khuma a awm laia hmeichhe dang lo biak vak kha nuam ka ti lem lo bawk. 

Ka mutui viau mai. Rin ai tak chuan. Ka harh chuan Bella chu a lo mu meng kar mai a. "Ti nge min kaihthawh loh? " ka ti a. 

"I mutui sia, i muhil lai kha thlir a nuam" a ti a. A aw pawh a zangkhai deuh. 

"I va ho tak e aw.. I tui a hal em? " ka ti a. 

"Keimahin ka in thei tawh e. Chuan, ka zun an siakna hi la tawh se ka ti.. A na ee" a ti ta a. 

"An lo kal veleh kan lo sawi dawn nia. Chaw pangngai ei thei tawh la aw" ka ti a. 

"Ka inbual chak, chuan ka ha te hi ka nawt chak" a ti daih. Hmeichhe ho tak hi chu aw. 

Nuteii ten chaw min lo kensak leh a. Bella pawh an be ve luam mai. Amah Bella a rawn harh tha ve tawh bawk a. Nuteii te awm chhungin Sanga te pawh ka va tlawh ve a. A lo harh tawh. Mahse, biak a hre lo nge a hawi á ruai maiin ka hria. 

"U Imma, keimaha chaw ei ka peih lo e, ei dun ang" Aruati'n a tih chuan, "A tha alawm.. Kei pawh mahni chuan ka eitui thei lo" ka ti ve vat. Cabin lamah a rawn kal mai ang chu. Sanga lah vil em em a ngai rih lo bawk a. 

Kan chaw ei lai chuan, Bella pawh a harh a, a mitmei veng ru deuh chungin ka ei. A rilru a zau a, a puitling bawk a, a thinrim chu ka ring chuang lo. 

"Zothana nen in inbia em? " ka tih chuan a ner sak a. "Ka be duh lo. Min rawn be lo bawk. Tihian kan tawp a ni mai" a ti a. 

"Lungngai suh. Pasal tha deuh i hmu leh mai ang. Zothana nen chuan a rem lo a nih hi" ka ti a. Min rawn melh kâwk, "Engtin nge tiang thu kha awlsam deuha i sawi theih? " a ti ta a. 

Bella ka va melh zawk, min lo melh ve chiah, thinrim hmel a pu lo. 

. "Aa.. Aruat, thil hi a khirh zawngin ngai zel lo la. Thian kan nia, i hmakhua ka ngai a, ka sawi ve mai mai" ka ti ta ringawt. A tûm bâr a, mahse, "Nia a dik alawm. Keimah hi a ni dik lo chu" a ta nghat a. Chaw ei oawh a tui leh ta lo e a. 

Bella chuan hma a sawn chak angreng a, Sanga pawh a rawn harh ve hret hret e. Kei pawh ka la vei tawn zak zak reng a, hrehawm ka ti hran lo. Aruati leh Pi Dini ten sanga chu an inawmpui chhawk thung a. Ka awmpui vang em mawni Bella chu ka beisei angin an ngaihsak tha tawk lo ka ti. Rawn ngaihven chang nei tho mah se, ka kutah an dah mah mah zawk nge, an pawnlang thei riau. Hei tak hian Bella min lainattir zual. A chhungkua a chán tawh a, chuta chhapah a patea te ngeiin buaina an thlensak a, amah maiin a ding a, a nî te ngei ngei pawn a tawpkhawkah chuan an mal dintir hreh leh si lo, a in leh lo, a rosum te chu sem dawn nise an ngaihsak tha hurh awm si a. Chuvang chuan kei hi chuan ka kalsan thiang lo. Hmeichhia a ni a, amah chauha khawvel hmachhawntir ka phal lo. Tin, ka chhungte ka fak thlawt. Ka nupui a la ni lo chungin tikhawp hian an ngaihven a, engmah an sawisel ngai lo. Chanchin min rawn zawt reng bawk a, tawngtainaah lah an theihnghilh ngai hek lo. Ka chhungte hi ka chhungte chu ni lo se ti tak hian ka buaipui theih ka ring lo. 

Bella ban ruh tliak pawh a zia hret hret tawh a, a lu lam phei chu a dam titih tawh. Inbual a chak ngang si a, a zia deuh laiin tuilumin ka hru ta a, nuam a ti hle. Hetah hian lawm a taksa chiang taka ka hmuh tak ni.. A nalhzia kha! A dam lo chung pawn nalh tak a ni. A hnute te pawh ka hru vek si a, a hnute khal mum nalh lutuk chuan min tidik lo tep.. Fit lutuk pawh hi a 😂 amah pawn a hrethiam deuh aniang, "I va mak tak" a ti hlak a, a nui ve tho. 

A kawng hnuai lam erawh aman a hru naw naw a, a mal pui leh chawn vel ka hru leh thung. A ha pawh a nawt ta thlap e. Dam loh hi chuan kan rimchhe hma ve bawk a ni. A harh tha ta deuh bawk a. Thil thlen dan zawh a hun ta viauin ka hria a. Ani pawh a inpeih tawhin ka hria. 

"Lem.. Sawi tawh ang hmiang, thil thlen dan vel chu" ka ti a. A khi sak. Nuam thei ang berin a mu te te a. Ka kut a rawn vuan chat, min melh kiau chungin, "Nang pawn mak i ti ve tho ang.. " a ti tete a. Ka hre tawh tih erawh ka sawi duh lo. 

"Ih maw.. Vanlalsanga hian min lo duh a nih chu! Rinhlelh nachang ka lo hre ngai miah lo kha kei pawh mawl ka inti. Khamini kan chhuah khan ka thiannu Linda leh Mathani te ka tlawh a, kan tlawh zawh khan, 'Falkawnah kal lawk ang, pawimawh tawp a' a ti deuh tlat a. Tihtur pawimawh em em ka nei lo bawk a ka tia, kan kal ta a. Tah chuan a rilru a sawi ta alawm. 

'Bella, ka atchilh che. Ka duhin ka hmangaih em em che. Unau kan ni sia, ka sawi ngam ngang lo a ni. Tunah ka sawi ta tawp a nih hi.. Aruati te inneih ka thulhtir chhan pawh nangmah vang a ni. An inneih chuan Imanuela nen in inzui zel ka hlau sia, tikhan ka ti ta mai a nih kha.. Min dem lo hram rawh' a ti ta mai a. Ka hamhaih vek. 

"Khawngaih takin min duh ve rawh. Tun laiah cousin inneihte chu a mak tawh lo. Ka tihlim ngawt ang che.. Khawngaihin" a ti mawlh mawlh a. Ka ngawi reng. Engmah sawi tur ka hre lo. Mak ka ti lutuk kha. Chuan, min nawr et et vangin, "Sanga, unau kan ni. Ka tan chuan unau i ni reng ang. Ima hi ka hmangaih tawh a, ka kalsan thei lo" ka ti ta a. Khata a hmel landan kha ka theihnghilh tawh pawn ka ring lo, a rapthlak tawp a ni mai. A nunrawn hmel hliah hliah. Tah chuan, kham lam pan khan min tlanpui a. 

"Min duh lo a nih chuan thi dun law law ang.. Nang pawh dam bik suh. Duh thlang rawh" a ti ta a. Ka mangang ve reng, mahse, thutiam chu thutiam a nia, Beiseina siamsak ta ila nakina kan buaina kal zel tur a la ni dawn tih ka hre bawk. Tin, amah hi ka unau a nihna ang bak chuan ka en thei thlawt lo a ni. 

"Sanga, a tawk.. Ka rilru a danglam lo vang," ka tih rualin a tlan chak sauh a. Thih loh reng ka inring tawh lo, lo call tur chein ka hamhaih ve vek tawh bawk si a.. Tichuan, a tlan liam ta a, a bak ka hre zui tawh lo.. " a ti ta a. A zawng zawnga thil ka han hriat takah chuan rapthlak ka ti. Vanlalsanga chuan Isabella hi a hmangaih ni pawhin ka hre lo. A atchilh zawk ni berin ka hria. Ka rilru kap deuh rengtu ka sawi ta a. "A nih nuam lo ti lo la, chutiang a thlen hma chuan a khawih che em? " ka ti a. Min rawn melh zawk. 

"Khawih miah lo.. Tun hnaiah boruak tha lo a thleng renh sia, ani pawh kha a fim hlawl lo" a ti a. Ka thaw huai mai. Vanlalsanga hian a kut hmawr pawha a lo khawih anih chuan ka rulhlet dan tur ka sawi lawk thei lo. 

"A nih heng thil hi mi dang hian hria se i duh em? " ka tih chuan a lu a thing a, "Keimah vek min burbun leh tho ang.. An rilru ka hre tawh alawm.. Engmah hre lo se ka duh. Chuan, Lunglei ka ngai tawh.. Remruat" pangchang aw zet hian a rawn ti a. Ka lairil a fan raih mai. A kut ka humsak vat a,"I dam veleh i chhuah ni la lain kan phei ang" ka ti nghet charh. A thlamuang hmel chu a hmuhnawm hle. 

Tlaiah zanriah ei hma deuhin Pi Dini'n min lo call a, "Hetah Sanga roomah lo phei lawk mai teh a" a rawn ti a. Bella mutthilh lai a ni bawk a tiin ka va phei a. 

"Imma, sawi nuam chu a ni hauh lo va, mahse, min kap reng a. Nizan zan lai pelh deuh khan Sanga hi a rawn harh a, tui ka intir hnuah, 'Bella a la dam tiraw? " a rawn ti a. Ka chhan hnuah,, 'Nu, thi law law zawk se a tha tur. Amah vang veka buaina hi awm a ni sia. Dam hi a phu lo a ni' a ti ta mai a. A ngaihna reng ka hre lo. 

'Aruati te inneih thulh chhan pawh amah vang a nia. Kan accident chhan pawh amah vang' a ti leh a. A ngawi zui leh ta daih sia.. Mak ka tiin min mawlh reng mai a. Nang, Bella atangin eng emaw hriatte i lo nei tawh mial em? Bella hi ka u fanu a ni a, kan chhungkaw tana buaina liantham a thlentir duh bik chu ka ring si lo" a ti ta a. Ka inhumruh hman hle. 

Engkim ka hrilh mai dawn emawni ka ti hial. Mahse, an awih duh leh kher ang em? Sanga hi rawn harh chhuakin dawt ngialngan takin Bella hi puh ta se, an awihsak leh vek dawn si. Ka rilru a buai riau. Mahse, Pi Dini te lo awm tawh dan ka ngaihtuah letin Bella hi tunah pawh burbun an tum deuh nia ka hriat vangin thudik sawi mai ka thlang leh ta zawk a. Bella min hrilh ang thlap khan engkim ka sawi ta vek a. A chek hlak hlak mai. 

"Ka rin loh lam daih a nih chu a! A va mak ngai em. Sanga hian a lo duh thin a maw? " a ti vawng vawng ringawt. A thawng ve viauin ka ring reng a. 

"Bella hian engmah thiam lohna a nei lo. Hrehawm a ti ve lutuk a nia" ka ti leh hram. 

"Ni e, a dik ang. Zep thu a cheng lo, ka ril arah ka fanu neihchhun hmangaih em em nen an lo inzawm tak siah kha chuan rilru kawi te ka han pu ringawt a. Ka chhungrilah erawh ka dem tak tak ngam chuang lo. Aruati lah a rilru ngaihtuahna buai ve zelah thil ni lo lo te a ngaihtuah ve reng bawk si a. Ka fanu a nih miau vangin ka lainat lo thei si lo. A pawi tak tak a ni. I tan tak pawh hian a nuam daen lo sia" a ti ve thei ta a. Ka ngaih a ngam huai mai. 

. "Aruati hi a khawngaihthlak khawp mai. A innghahna ve ber Zothana nen lah ti hi an ni sia, Sanga inthunun zo lo thiltih hian pawi a khawih hnem ta khawp mai" ka ti a. 

"Ni e, Sanga insum theih loh zar kan zo a nih ber hi. Nauteii chu lainatawm tak a ni. A zakin hrehawm a ti si, Nang lah a beisei phakah i awm tawh si lo. A nun laklawh kual lutuk hi a pa nen pawh kan sawi kan sawi thin. Tihngaihna kan hre bawk si lo" a ti a. 

"Pathian zarah pasal tha tak, amah hmangaih em emtu a tawng leh mai ang. Zothana pawh hian a la hmangaih reng.. Mahse, inbuaina hi a namai si lo va" ka tih chuan, "Aa.. Zothana nen chuan a rem thei tawh lo alawm. A pa pawn a remti tawh lo ang.. ' a ti nghat a. 

'Ni e, Zothana nen hi chuan a buaithlak tawh ang" ka ti ve ringawt. 

"Bella hi neih i tum em? " a ti ta khawl a. Ka thaw deuh hawk. 

"A rem chuan tum e" ka ti nghut. 

"Ni e, a rem lohna tur a awm hleinem" a ti ve leh thliam a. Bella ka ngaihtuah deuh vangin ka phei leh ta a. A lo la muhil. 

Kar khat dawn kan inbuaipui hnuah Doctorin a chhuah theih thu a rawn sawi ta a. Kan lawm dun khawp mai. Sanga erawh phai lam an refer a, in lamah an inla chhuak phawt ang a, phai lama kal dan tur chu an la rel ang chu. Ka tel ve tawh lo. Isabella chiah ka ngaihtuah tawh dawn. 

Damkawr viau mah se; Aizawla awm reng chu buaina kan tawh leh hlauin Lunglei phei kan tintuah ta a. A chhuah zanah erawh Aruati te inah a riak ve leh rih. Ka ngaihtuah viau rualin eng em a thleng tawh lo vang chu. Thlamuang mang lo zetin ka mu. Tin, thu lawmawm pakhat Sanga phai lamah an refer bawk nen, Aruati pawh Lungleiah a rawn phei dawn rih lo a niawm e. Ka tan a thawventhlak e. 

Zing ni chhuak chuan ka room a rawn chhun eng sût a, ham bai bai chungin ka tho chhuak. Phone ka hmet nghal zat. Bella, "A tawpa tawpah chuan Lunglei kan pan dawn ta" a rawn ti a. Ka khi suk mai. Mood tha zet nen ka tho chhuak a, ka fit zaih mai. Tukthuan ei khamah kan chhuak dawn a. Hmanhmawh taka tlanpui chi a ni lo a, muangchan lutuk chi pawh a ni lo. Nuteii leh Mami ten min insiampui a. Mami chuan, "I ngaihawm dawn, mahse, i tan phei vat a tha bawk si, nakinah Lunglei lamah sumdawnna huang zauh theih hunah kan la rawn zin ang" a ti mawkh mawlh a. 

"Nia, Nuteii hi ka hruai phei mai dawn mawni.. Mahnia eirawng bawl a ninawm riau a ni" ka tih laiin, Lydia chuan, "Keimah zawk min hruai rawh. Eirawng ka bawl thiam vek" a lo ti ve sek bawk. Ka ngai ngawt ang. 

Tukthuan ka ei puar peng pawng hnuah Isabella chu ka va lam a. Ani pawh chaw a lo eikham deuh chiah. Siam chu a insiam vek tawh thung. Pu Thana chuan, "Va phei teh poh teh u, buaina hlir buaina hlir.. A hahthlak a nih hi" a ti dap dap a. 

Mama paw'n, "Ni ngawt mai. Bella pawh a duh aia rei a cham phah chu a nih hi. Tluang deuhin inkal dawn nia" a lo ti ve bawk a. Zuala erawh ka hmu lo. Bella inthlak lai chuan Aruati'n, "U Imma, lo kal lawk.. " tiin min rawn kai a. A chhungten min hmu vek sia, mak ka deuh. Ka kal ve mai bawk a. A roomah min kai lut a, kawngka a khar rual rualin min rawn kuah thlawp. 

Ka hamhaih deuh. A ngik faih faih a. A rawn dah chhuah chuan a mit a sên ram bakah a mittui a tling pam mai. 

"Aruat" ka ti sup a. 

"U Imma, ka tihpalh aw,. Ka insum zo ngang lo a ni. Ka ngai dawn lutuk che. I phei ang a, Bella nen hun thawl innei reng tawh ang a, kei chu min theihnghilh mai dawn sia.. Ka rilru a na.. " a ti ta a. Ka ngaihtuahna chu a kal thui ve deuh. 

"Khati zawngin ngaihtuah suh. Rem ngang lo thil hi a awm ve asin. Chu chu kan hriatthiam a ngai a ni. Hrethiam ang aw" ka ti a. 

A heh a pet a, "Tinge? Isabella kher? Hmeichhe dang chu nise ka tuar thei ang. Innei pawh ni ula ka hmu dun reng dawn si che u a.. Ka chan hi min ngaihtuahpui ve em? " a ti a. 

"Nang pawn pasal tha deuh i nei vat dawn alawm.. Tin, Bella nen kan innei ngei ngei dawn tih pawh a sawi lawk theih hleinem. Fel deuhin awm la, inenkawl tha rawh aw" ka ti duah a. 

"U Imma, min hmangaih tawh miah lo hi a mak ka ti.. Hmangaihna hi a bo vek thei mi? " a tih chuan tlemin nuam ka ti lo deuh. Ni e, khati khawpa ka hmangaih, khawih pawh ka khawih chhiat phal loh kha tunah ka hnawl mek chu a ni si a! Kha chen ka nghah, hmeichhe dang ngaihsak miah lo va hun ka hman thinna kha tunah ka hmaah a tap mek a, kei ka hul thung si. Thil kal dan hi a mak em a, a tawngtu ka ni pawh hi mak ka ti ve tho. Aruati ka hmangaihna te kha a bo fai vek em tih chu ka hre lo. Amah ka duhna leh thlakhlelhna te kha engtin nge a bo theih? Isabella hian a hîp kang ta vek em ni zawk? Nge Zothana zawkin.. Engmah ka hre lo. Pathian chauhin a hria ang chu.. 

"Aruat, engmah hi ka hrethiam tawh bik lo. Min hrethiam mai teh. Isabella hi ka mawhphurhna a ni tawh a, tunah chuan ka phatsan thei tawh lo a ni. Khawngaihin pawm thiam tum rawh aw" ka ti ta ngawt mai. Chuan, ka chhuahsan nghal bawk. Rilru erawh a kal thui duh viau. Bella pawh a inpeih thawkhat tawh a. Kal dawn chuan, Pa Thana'n, "Bella, va inenkawltha la aw.. I rawn zin ve chhunah i buai phah ta hrep mai si a, a zia lo tak tak a ni. Tluang deuhin inkal dawn nia" a ti a. A patling thin khawp mai. 

Falkawn kan pel fel tihin a muthlu deuh ar ar a. Nizan lamah a mu tha vak lo mawni dawn ni. Ka tibuai duh ta lo va. Mahse, a rawn harh leh hma angreng. 

Min rawn en a, "Kan haw thei chu ka thaw huai mai. Ka zin khât tawh ngawt ang" a ti sap a. Ka lo nui. 

"Nakkumah innei ang" ka lo ti deuh tawp a. Min rawn melh hû, "Teh tawp a che" a ti a. 

"Sumdawnna pawh hi tiral teh. Awm der der rawh. Pawisa chu i ngah tawk tawh. Kan inneih hunah pawh in nghah a ni mai a, sumdawnna i khawih thei dawn lo a nia" ka ti a. 

"Hei hi sawi chian a tha.. Sumdawnna lam chu nia i sawi ang khan beih vak ka tum lem lo. Mahse, inneih kha chu buaina a awm ka hlau" a ti a. 

"Awm lo turah ngai ang.. Umm" ka lo ti duam. 

Thutak deuh hian, "Ih, Aruati nen khan eng nge insawi dun? Zingah khan" a ti ta a. 

Ka sawi ta vek mai. A thaw halh a, "A dinhmuna ka indintir hian a natna hi ka hriatthiampui a. Mahse, inthleng ka phal tawh bik si lo. " a ti zawi raih a. 

"Inthleng tih chu eng nge awmzia? " 

"Keimah hi kalboa in pahniha nun bul intan leh mawle" a tih chuan, "Bella, mihring ve tho ka nih hi. Chutia induh hun huna intihkuala mi dang tana inhlan mai mai theih ka ni lo a nia. " ka ti khak khak a. Ka lawm lo lek lek a ni. 

"Ka sawi awmzia chu, in tha leh thei lo a nih pawhin kha lam chu inthu a nia. Keimah zawk hi kal bo ila, Aruati tawrhna hi a nep deuh zawk ang em ka ti mawle" a ti a. 

"Ani chu ka nunhlui a ni. Ka tun hun chu nangmah. Kan tihdanglam theih loh thil hi chu a awm ang anga enliam ve mai a tha fo, Hmeichhe dang pawh nei ila a na tho ang. Tin, engmah thiam lohna i nei lo.. " ka ti charh charh a. Ka beisei phak hauh lohin ka biangah a rawn fawp zauh. 

"Ka ta i nih hi" a ti sap a. Kan nui dun. Kan tlan tluang angreng viau mai. Dar 4 pelh hlekah Lunglei kan lut a, Eirawngbawltu nei lo ve ve ta chu, Hotelah inhnawh puar kan tum a. Amah chu ka drop ta phawt. Han inbawl chawp leh kha kan peih lo deuh a ni. Kei pawh ka in luah ka thleng ve leh thei ta. Mamawii ten an lo tifai zeuh zeuh bawk a. Engmah han hnawk a awm lem lo. Ka indah fel a, ka inbual nghal. Hah a dam khawp mai. 

Ka intihfel zawhah Bella ka va lam leh a. Ani erawh hmeichhia tih takah a lo la inbual lo. Ka nghak leh ta ran e. A inbual zo, bathrobe nena a lo chhuak chu ka lo melh vung vung. A roomah ka zui lut ve zel, "Tinge? I lo luh ve zel a? " a tih pawh chuan, "Ka duh ni mai" ka lo ti hmuk. A nui rah rah a. A inhruk hul lai chuan eng sawi set set loin a bathrobe chu a phelhsak huai a. Min melh kawk ringawt. Panty dum sexy zet a ha a, bra a la hreng lo. A va nalh tak. Ka chil ka lem khawlh ringawt. 

"Remruat.. " a ti nghek a. 

Ka zuk bawh rawp, khumah ka bawh thlu a, a tal lem lo. Eng nge maw ka hriat tehreng ni.. Ka fawp nghal mawlh mawlh. Min fawp let ve lo naa, min dang si lo. Ka che na deuh nge, "Ka ban hi" a rawn ti tuar a. A ban a la hmang tha ngam lo tih ka hrechhuak zawk. Ka tho vut a, "Tihpalh.. Inthlak vat rawh" ka ti hrawk a.Room atangin Ka chhuahsan. A insiam rei lem lo. Make up a hman vak loh hian a tha zawk. Dar 7 velah zanriah chu kan ei thei ta a. Enghelh reng reng nei lova han ei takah chuan ei hnem a awl khawp mai. 

Ka thlah leh a. Ka leng khawmuang zui nghal. Insi chetin kan thu dun a. "I riak ngam ami? Nangmahin.. " awmze nei zetin ka ti a. 

"Ngam" a ti hmuk. 

"I ngam tak tak lo" ka lo ti a, "Ka ngam reng, lo riah i chak vang a nih kha" a ti ta a. Ka nui hawk hawk. 

"Ka riak ve dawn. Ka veng dawn che" ka ti a. 

A phone a rawn rik takah chuan min chhang hman lo. Mka a lo nia. Ka inlahrang nghal. 

"Aw.. Vawiinah ka haw.. Ka awm mai mai.. Hehe., nia, hun remchang a awm mai ang. Umn ka tha tawh lutuk alawm. " a tih lai chuan phone ka khawih ve daih. Ka ngaithla ru kur thung. 

"Aw le.. Nia, kan tum dawn nia. " a tih zawh hnu lawkah a dah ta a. 

"A naute an innei dawn a, naktuk tuk lehah.. Min rawn sawm anih kha" a ti a. 

"Lo len pawh a tum" ka lo ti zat. 

"Tum e.. Tumte chu" a ti mai a. 

"Chuan.. " ka lo ti vat. 

"Inleng an hnar ngai lo. Lo leng ve se la, a ho e" a ti a

"Nia, hnar rawh ka ti hleinem. Mahse, a rawn biak leh danah che beisei a nei tih a lang reng a.. I hnar lo bawk" ka ti hmuk hmuk a. 

"Awihawm loh e, chutin nang angin beiseina ka siamsak ve lo e a. Min lo biaa ka chhang a ni mai" a ti nghat. 

"Chu! Tu nge beiseina ka lo pek bik a? " ka lo ti hu a. 

"Ruatdiki mawle.. Beiseina siamsak fo lo la a hnaih a hnaih lo ang che. Tukinah pawh a chhungte awm lai rengin a roomah a pawtlut ngam che a nia. I hnar lo, i hnar thlawt lo" a ti ta chiam mai a. Mak ka ti deuh. 

"I ngai haw lo emaw ka lo tia" ka ti ringawt. 

"Engmah ka sawi ve ngai loh avang hian ka na lo bik lo. Hriatthiamna neih hram hram ka tum ve a, ka hrethiam reng bawk che. Mahse, Mka ka treat dan leh Aruati i treat dan a inang lo. Chu chu hrereng rawh" a ti ta a. 

"A nih chuan, Mka chu ka thik ve thei lo tihna em ni? " ka ti nghut. 

"Thik awm a nih chuan i thik ve bawk ang chu.. Mahse, kan inbiak hlekin i hmel hmai a danglam nghal a. Ka duh lo" a ti a. 

"Ka thiam loh a nih chu. Mipa ka nih angin mipa rilru ka hrethiam a, Mka rilru ka hriatthiam vangin ka thik mai a ni. Ka thik tawh lo vang.. Zaninah pawh lengah sawm la, riak law law rawh se. Ka haw ang. Nih phawt" tiin ka ding uaih a. Mak ti zetin min melh reng ringawt. Thlah pawh min thlah lo nia! Dik tak chuan a thinrimna kha a awm ka ti ve tho, keimah zawk ka insawi thinrim chawp mai mai a ni. Damdawiina a awm lai khan Mka chuan a rawn call ngun angreng a, a chanchinna rawn ngaihven ve ni maiah ka ngai. Thikna tura an inbiak ka hre lem lo. Mahse, hetah Lungleiah amah chauha khawsa Isabella hi a la lenchilh ngei dawn a, kei lah hna avangin ka buai chho leh dawn si, ka rilru a hah lawk a ni ber. Tin, Bella laka ka lawm loh ve deuhna chu, Mka a be chhe ngai miah lo hi a ni. Be duh lo tawp se tih chu ka duh chuang lo, mahse, an inbiak laia a nui te, engkim a sawi fel thliam zel te hi ka ngai thei lo a ni ber. Tau burin in chhung ka lut a. Ha ka nawt sawk sawk a. Ka mu daih. Mutthilh chu khawilamah. Kan Isabella han luhlulzia leh khauhzia hi chu aw.. Min thlah chu sawi loh, phone-ah pawh min rawn be zui eih lo mawle.. Ka be hmasa awm bik lo ee. 

Ka mut a chhuak hlawl bawk si lo. Tihtur a vâng ngei mai. Bella chuan status a rawn up a. 

"Ka hah a dam ta.. Home sweet home" tih a ni. Kei nen a inkungkaih der bawk si lo, engtin nge ka thinrim tih hrereng chunga hetia engmah hre lo anga a awm theih le?! 

"Aizawl ka ngai deuh" tih ka up ve hmiah. A va naupangchhia e aw. Ka runluih a nih ber chu. Aruati'n a rawn comment nghal, ka chhang tha peih leh chuang bawk si lo. Bella pawn a hnu feah a rawn comment ta ngei e. "I ngai ngawt ang. Ni e.. " tiin. Ka khi suk. 

"Mka tuallenna Lunglei chu i tan a nuam ang " ka va ti. 

"I chhe mai e a" tiin a rawn reply a. 

"A rawn leng ta em? "

"Leng se i duh ami? Ka'n ko ang e" a rawn tih chuan, "I ngam chuan ko la" ka ti lawi si! 

"Awmze nei lo lutuka thinrim ching rual i nih tawh loh kha. " a rawn tih chu dik ka ti khawp mai. 

"Mka i la duh alawm" ka ti leh hram. 

"Aruati i duhna aiin a la tlem" a rawn tih chuan ka na deuh. "Ka duh bawk lo" te a rawn tih ka beisei ve a. 

"Aruati ka duh tawh hleinem" ka va ti a. "I duh tawh loh chuan Mka phei chu eng atanmah ka ti lo tihna a nih chu" a rawn ti daih. Hmeli mai mai chu! Ka nui huk. 

"Ka lo phei dawn.. Ka muhil thei lo" ka ti ta thlawt a. 

"Khum hi a zau mah mah a ni" a rawn ti vel. Ka ngei ka lawm tho bawk si. 

. "ka lo phei nghal" ka tih rualin ka inthlak sawk sawk. Ka khi hui reng lehnghal…

Zan dar 12 a ri tep tih chuan, Isabella chenna hmun lam panin ka inkhalh phei ta vawn vawn a. Rilru a va hlimin mut a va chhuak si lo êm..