Thinlung - 18

THINLUNG.. (18)

Ziaktu: Toni Rálte

Engtin nge Sanga kha ka rinhlelh theih? Johny thusawi atang khan ka zeldin kual a, kil tin ka dap a ni. A farnu te inneih dawn hnaiah engvangin nge zan rei tak tak thleng a chhuah? Hmeichhe phurin zan reiah an hmu bawk. Tin, a rui zeuh zeuh. Kan rin em emte pawh hi bumhmang an lo ni ve thin a. Thil kan chhui a nih chuan kan rin em em te pawh kan kawh ruk ve a ngai fo thin. Tin, Zuala nen an insual a, na takin unau thisen an inchhuah. A chhan reng reng an sawi lo. Zuala pawh a ngawi a, Sanga lahin engmah a sawi hek lo. An chhungte pawn an zawt chhuak thei lo chu a nih kha. Kha tak khan min mawlh a ni. An unau thisen inchhuahna khawp thuruk chu eng nge ni ta ang? Tiin. Ka zeldin kual a, kil tin ka dap a. Sanga mize dang thut chu ka notice lo thei lo a ni e. Tichuan, Bella punin Sanga zu ruih laia a phone hack sak turin ka ngen ta a. Mahse, password a lo dah ve kulh. Kan Isabella thluak a rawn lang a, "Ka phone camera a chhe sia, document thawn ka ngai si" a lo tia. Ani rui ngaihsam chuan a phone a lo pe ta mai a. A call chu kan hack sak thei ta chauh a nih kha. Kar loah a call thin number kan hre ta a. A vawikhatnaah kan hlawhtling ta bawk. Nunpuii'n a hming dik tak a lo sawi kha kan tan vaneihna a lo ni e. Ni e, misual te pawh hian hmanrua min hnutchhiah ve cháwk zel a. Thudik kan hre ta a nih kha. Mahse, engvangin nge Vanlalsanga hian he thil hi a tih tak ang? A chhan tur awm reng reng ka hre thei lo. 

Pu Thana'n thudik a han hre ta chu, a thinrim ngang a niang, an chelh laih laih e an tia. Aruati tak pawn mak a tih bakah a u Sanga chu a tawngkhum ve sak sak a niawm e. Zanah Pu Thana min koh angin ka va phei ta a. A nu leh Zuala erawh Damdawiinah an la riak thung. An lo ngui nghiai hlawm a. Sanga pawh a lo awm. Inthiam lo hmel pawh a pu lem lo. 

"Imanuel, a zia loin a zahthlak khawp mai. Ka han koh chhan che chu, Police i nih angin he case hi engtianga kalpui tur nge ka hre lo va, thurawn min pe thei ang em? Mualpho lo va kalpui dan te hi a awm ang em? A zahthlak takzet a ni" a ti khur dat dat a. A mitmeng atang pawn a thinrimzia chu a lang reng mai. 

"Aa.. Case anga a kal dawn chuan mualpho loh tawp chu a theihin ka ring lo. Thudik awmsa kha a chhan an chhui ringawt dawn a nia. Amah Nunpuii kha an han dâwp ang a, Sanga an ko bawk ang a. Zothana te lam pawn an hre lo thei dawn lo a" ka ti ringawt a. 

Sanga chu va melhin, "Vanlalsang, thudik sawi mai rawh. Heng hi engvanga ti nge i nih? jail tan i duh loh chuan i sawi a ngai ang. Ka tantir hreh reng reng lo che a nia. I farnu neihchhun tana a ni pawimawh berah engvangin nge he thil hi i thlentir? " a ti ta khur khur a. Kan ngawi dâk hlawm mai. Sanga chu a thu tha a, chhuat lam melh ran chungin, "Engmah a ni lo. Ka ruih vang a nih kha" a ti zum dûk a. Awih a harsa mang e. 

"Dawt ringawt min fah tawh suh. Zothana te hnenah ka sawi ang a, an nin an duh duh danin ti che se la a ni mai. Ka kham thawkhat tawh e. Kha i hmeichhe rawih nen khan zuk tâng vang vang mai rawh u" a ti ram hmuk hmuk a. 

"Pa, min ngaidam rawh. Khawngaihin.. Kawng dang ka nei lo a ni. Aruati leh Zothana inneih hi ka duh lo a ni mai. Imanuela nen hian innei se ka duh alawm" a ti ta a. Ka meng phawk kher mai. Chu chu a chhan a nih teh chuan ka va lawm lo rua em. 

"Sanga, kha lam kha chu sawi lo teh. Boruak tha tak hnuaia innei mai tur an nia, kei pawn ka lawmpui em em asin. Engtin nge chutiang chuan i sawi theih? " Ka ti bung nghut a. 

"Thianpa, min hrethiam teh u. Inla inhmangaih reng tura ka ngaih vang a ni. Aruati lah nangmah vangin rilru hrehawm takin a awm bawk si nen.. Tikhan ka ti ta mai a ni. Inlawm zawk lo em ni? " a tih rual chuan, Pa Thana chuan vin zet hian, "Vanlalsang, i rui a la reh na nge? I va tenawm ngai ve" a ti tuar a. A ngawi zui daih. 

Aruati chuan a aw a thian kharh a. "Pa, hau tawh suh. Ka thiam loh vek zawk a ni e. Ka u a nih angin min khawngaih a niang. Mahse, Au Sang, Zothana ten an hriat chuan an lungawi lo khawp ang. Kei pawh ka lungawi lo. Hetiang a nih dawn te chuan inneih hma zan khan sawi ta che" a ti ve a. Isabella nen erawh kan ngawi kar. 

"Ka tihpalh lutuk, naute, ka hmangaih leh khawngaih vang che a ni e. Imaa rilru ka lo hre lo bawk nen. Engkim a that leh ka beisei vang a ni" a ti sup sup a. 

An upa ber U mama a rawn tawng ve ta. "Engpawhnise, a zia lo a ni. Imanuela tan pawh a hrehawm khawp ang, a duh lo chung kan hnuktel ve zel si a, a inthlahrunawm khawp mai. Zothana te pawn hre ve rawh se; hetiang a nih takah chuan inneih leh theihte pawh a ni ang chu. Anmahni lamin min pawm theihte chuan" a ti charh charh a. Pu Thana chuan, "An duh tawh ka ring lo.. Zothana pa saw pa nghet tlet tlawt, thu duh rum ve thei tak a ni a. Chuti maia a lungawi ka ring lo. Mahse, ni e, Mama sawi ang khan thupha kan chawi pawh a ngai ang. Zuala te hi rawn chhuak fel se la; kawng ka dap ang. A nih chuan Imanuel, he kan buaina hi mi hrangah chuan nangmah chiahin i hria a, khawngaihin min tlangzarhsak lo hram la kan lawm ngawt ang" a ti ve ta a. A inbengdai ta nge, a tawngkam pawh a nem ta deuh e. 

"Ni e, Imaa, min hrethiam hram rawh. Khawngaihin sawi chhuak lo hram rawh. Zothana te pawh ngaihdam ka dil ang" Sanga chuan a ti ve lawi a. Awmdan tak pawh thiam a harsa. 

"Engpawhnise, kan thulh tawh laklawh a. Kei chu inrem leh dawn pawn tun tut tutah ka duh tawh lo. Bella bulah Lungleiah ka va awm rih phawt duh. Aizawl hi ka hne" Aruati chuan a rawn ti a. Ka lo îp deuh. 

"Ni e, boruak thar te va hip ve la, anmahni lam pawn chuti ut ut chuan an duh lo vang. Thil hi fel se va phei ang che u.. Tiraw Bella" Pu Thana chuan a ti a. Bella chuan,"Nia.. Umm a tha lawm" a lo ti bah nak a. 

Sanga chuan, "Kei pawh ka phei ve ang.. Nuam ka ti tawh lo" a lo ti ve a. 

"Ni e, awm bo rih mah la a pawi lo khawp ang" Mama'n a lo ti ve. Kei erawh sawi tur ka hre lo. An engmah ka ni lo chungin an chhungkaw buainaah ka tel ve a ngai zel si a, a zahthlak bakah mawhphurhna nei ang te pawn ka inhre deuh reuh a. Nuam ka ti hlawl lo. Ka haw tur chu Bella'n min lo thlah a. 

"Kei chuan Sanga kha ka ring lo. Chhan tha tak a awm ka ring" a ti hram a. 

"Kan inang a nih chu. A la langchhuak em em ang" ka ti sup. Kan infawp zuai a. Ka phei nghal. 

Mami leh Nuteii te an lo la meng a, min hmuh rual chuan, "Mam, Sarah chu a lo rai reng alawm le. Thla hnih lai a ni tawh. An inruk tak kha" Mami chuan a lo ti vat. 

"Rai ve bawk ang chu, an inti miau sia lawm" ka lo tih chuan za lo zetin an nui a. 

"Innei rawh se, a tha. An inhrawn thei ang e maw le" Mami chuan a ti a. 

"Ni e, innei se la, an tluang em em chuan ka ring lo" ka ti ve a. Ka rin dan tak tak pawh a ni. Mi nupa inkar tibuaia fate fahraha siamtu te hi an tluang mawh, chutin, nupui thlaka hmeichhe dang lakluh chingte pawh hian hremna an hmachhawn leh châwk zel. Chunglam kutah awm mai teh se. 

Ka mu nghal ta daih. Bella nen pawh kan inbe tam lo. Rin aia thil kan hrechhuak hma chu a lawmawm e. Lunglei pawh kan phei thei tawh ang chu. Bella nen tuma zarbuai loha zalen taka inngaihzawn ka chak tawh. Aizawlah chuan kan chep deuh hlek a ni. A tukah ka pa nen huanah kan feh a, balhla kan phun nual mai. 

"Bella nen chuan inboruak a la tha zel maw? " a ti a. 

"Pangngai" ka ti mai a. 

'Innei vat ula a tha. Sawtiang saw an boruak a ni sia, nakinah buaina a awm palh ang" a ti a. 

"Nia, a ngai. Amah a inhuam chuan" ka ti ve a. 

"Rosum leh in leh lo tih velah te khan inbuai ang e aw. Engkim tifel sa vek ang che u. Ka duh lo a nia, hetianga buai hi" a ti chuar chuar a. Ka pawmpui viau mai. Chawhnu herah in kan thleng a, ka hah ve riau mai. Bella pawn chanchin min rawn hrilh a, Zuala te pawh an rawn chhuak a. Zanah Zothana te inah thupha chawi an tum thu te a rawn sawi. Zothana bulah khan engkim ka sawi tawh naa, a chhungte bula la sawi lo tur khan ka ngen a. A tihlawhtling em ang chu maw. Ngaihdam an va dil dan tur pawh a buaithlak ru viau ang. Ka hming a rik leh ka hlau mang e. Nunpuii pawh an zawng chhuak tawh a, Sanga'n a rawih thu leh an dinhmun a harsat em vanga a lo pawm ve mai thu te a sawi a niawm e. Engzat chiah nge an inpek erawh a sawi lo thung. 

"U Imma, min hua em? " Aruati teh ngawt chu. 

"Engah maw! " ka va ti a. 

"Heng vel avang hian. I hming a lang ve zel sia" a rawn tih chuan a dik ka ti tho. 

"I duh vanga thleng a ni lo va, ka huatna chhan tur che a awm hleinem" ka ti mai a. 

"Ih maw, engmah a rem thei tawh lo tih pawm hi harsa ka la ti. Ka duh vang ni miah lo hian beiseina ka lo nei leh thin" a rawn ti a. 

"Hun a kal ang a, a zia mai ang" ka ti ve ringawt. Sawi thuipui vak ka tum lo. Beiseina a neih belhchhah palh ang. Zanah Johny nen Atea te inah kan zuk leng a. Johnya'n a lo nei ru pek a, Kuri hriat lohin kan in ru zeuh zeuh. Tawng a nuam hle. 

"I bialnu Aruati te lah chu an innei leh ta si lo va, an unau sawn phir deuh ţhawih la ni mai" Johny kamnam chuan a ti pek a. Kan nui nasa. 

"Thil thlen dan hi a mak ngawt mai. Vai film te pawh a ang deuh, I lo luck cher cher khawp mai. Thianpa chu" Atea chuan a ti a. 

"Ka tel ve lo bawk aw" ka ti hlur a. 

"Tel ve zel. Ruatdiki lahin a theihnghilh thei bawk si lo che a. Mi rawn be ve ziah lehnghal.. Zanah hian" Johny chuan a ti a. 

"Engtin? Ti nge a lo biak ve ngawt che" ka tih chuan, "I chanchin min rawn sawipui thin. I nghah chhunga i awmdan te" a ti sam ët a. 

"Engtin nge i lo sawipui? Hey, beiseina siamsak zawnga sawipui chi a ni miah lo nia aw" ka ti a. 

"Ka hre ve. Tian ka ti, 'Aruat, thianpa hi dem suh. A theihtawp a chhuah ve, nang pawh i demawm chuang loh, Pathian ruat in ni loah ngai mai rawh. " ka ti hmiah. " a ti a. Ka bu nghut mai. 

Atea tawng laiin Bella'n min lo call a. 

"Palai te an lo haw tawh a. Zothana pa a thinrim viau a niawm e. FIR thehluh te a tum mawni.. A pawi tawp" a rawn ti a. 

"Ka ring a ni. A dik lo ve bawk a ni. Sanga thil tih kha" ka ti a. 

"Nia, Keini lam chuan engmah sawi tur kan nei lo. Keini chu.. " a ti zawi sap. 

"I pa Thana ten engtin nge an ngaih ve" ka tih chuan, "Sanga an hau char char ringawt. Thinrim ve vak khan awmzia nei hek lo. " a ti a. 

'Hei Atea te nen kan la titi tui deuh a, hawn veleh ka lo bia ang che" ka ti a. 

"Nia, aw le.. Rui lutuk suh aw" a rawn tih chuan ka phawk hle. "I hria maw? " ka ti hu a. 

"Ka bialpa i nia, ka hrechiang che alawm" a rawn ti sap. Ka nui ve ringawt. A ruka ruih chu a har dawn a nih hi. 

Keini pawh thu dang dang sawiin kan meng ta erh a. In ka thlen meuh chuan dar 11 a ri thuak tawh. Ka mu nghal daih. Bella text a lo awm leh kiau mai. Tin, Aruati text msg pawh. 

"I va haw har tak. Zanin chu ka mut a chhuak hlawl lo. Engin emaw min mawlh" tih a rawn thawn a. Aruati thung chuan, "Zothana te lam an thinrim lutuk a. Au Sanga pawn a tuar maithei ni.. " tih a ni. 

Ka rin aiin ka kai a, phone ka bih rei hleithei lo. Ka hmu phê zel. Bella pawh ka mang tha ta ringawt. Mumang chhe zet ka la nei zui. Lungleia ka in kha an lo rawk a, ka document leh eng eng emaw an lo hai nasa mai a. Ka va luh chuan a lo hnawk nuai mai. A rawktu chuan a hmai a tuam tlat bawk si, ka man lawk a, a hmai tuamna chu ka phelhsak ta a. Sanga lek! An chhungkaw buaina ka mangphan a nih ngei dawn kha. Ka tuihal lutukin min kai harh zui a, ka in khawlh khawlh a, ka va zung leh hram bawk. Ka mu fel chiah tihin kan in piah deuha thinrim au thawm niawm tak chu ka hre zui nghal a. Mipa thinrim awrawl niin ka hria. Zan a rei tawh bawk a, a fiah viau. A bengkhawn loh theih si loh a, mu chungin ka ngaithla kur mai. A inhrosa nasa telh telh a, Ka chhungte pawh an harh ve nge, an thawm ka hre thei. 

"Tenawmpa, i thiltih rah hi i la hmu dawn khawp mai. Hre rawh. " tiin a au tuar tuar a. Zothana aw a ang ka ti riau. Ka ngaihbel vang em mawni. Ka inbeng kang a, ka'n ngaithla chiang leh deuh a, "I farnu i khawngaih vanga ti pawh i ni lo. I rilru chhiat vang a nih kha.. " a tih takah chuan, Zothana ngei niin ka hre ta. Ka tho ta nge nge a. Aruati te nen hian kan awmna a inep angreng a, thawm chu a hriat theih fu mai. Bella ka call ta nge nge a. 

"Lo call che ka tum deuh a, tihharh che ka hreh sia. Hei kan buai khawp mai.,zothana a rawn kal a. " a ti sawk sawk a. Phone atang pawn Zothana au thawm chu ka hre pha. 

"Sanga a awm em? " ka tih chuan, "Mama ten an chelhbet, hnek a tum a. Zothana lah rui ve bawk" a rawn ti a. 

"A va buaithlak ve aw. I Pa thana ten engtin nge an tih? " ka tih chuan, "Engtin vak mah. Zothana chu tha zaia hrilh pawn a pawr zel sia. A lo rui ve kher bawk nen, a pa te an be dawnin ka hria" a tih mek laiin, thawm a rawn awm deuh hrâwk a. Bella chuan hamhaih aw deuhin, "Khai aw.. " a ti tuar..phone a thi hmak bawk. Eng tak thleng ang maw. Va inlan ve lah chu tlawmah ka lak bakah zahthlak deuhin ka hre si. Ka nghak ve tawp a ni mai. 

Bella call dawng loin Aruati call zawk ka dawng ta a. Tap ţiau hian, "U Imma, min pui rawh., Zothana hian ka pa a that duh mai dawn" a rawn ti ta mai. Ka phei tho chu a va ngaih hmel em. Zothana chuan engtin teh daih nge Pu Thana chu a tihbuai aw.. Ani hi a rui buai viau mawni zawk le. 

"Aa.. Tihchi loh, inchhungkaw buaina ania. Ka inrawlh lo zawk ang" ka ti a. 

"Khawngaihin, Bella pawh hei an khawih a nia" a ti ta a. Ka tho zawt. Ka insangmar nghal vek thei mawle, "Eng a?! Bella an khawih a maw? " ka ti tuar a. 

"Va thelh a tumna lamah Zothana thianten an nam thlu a" a ti a. Ka inpeih der tawh. "Ka lo phei" tih leh phone dah ka rual. Bella nen kan inbiak laia ri huk kha a ni ngei ang. Zothana te mai mai chu aw.. Ka thleng phei rang ngei mai. Thenawm khawvengte pawh an lo awm nual tawh a. Zing dar 2 vel a ri tawh. 

Zothana leh a thian pathumte chu kawngpuiah an lo chelh bet laih a, an tal nasa hle bawk. Zothana chu a rak tuar tuar a. "Vanlalsang, rawn chhuak ta che. Rawn chhuak rawh. Mipa leh mipa chu inhmachhawn teh ang. Fair takin. Kan inneihna tibuai tur khawp hian i eng pawi nge ka sawi? Zawnga, i va dawihzep ve, rawn inlan ta che" a ti nghek nghek a. An chelh hneh lo lam a ni. Aruati te verandaah chuan anni ho chu an ding thap a, Pu Thana chu an nuin a lo chelh ve mek bawk, Mama pawh Bella leh Tei ten an vuan ve bawk a, Sanga leh Zuala ka hmu lo. Inchhung lamah an invuanbet a ni mahna. Zothana bulah chuan ka va phei a. Ka va thutchilh a. "Thianpa, a va zia lo ve. Engkim i hre sa vek a, zanin ataka hetia rawn chet hi a tul ber em ni? Insum teh. Haw rawh u, tiang chu a zahthlak em mai" ka ti luam a. 

Kei ka nih vang nge phei chu ka hre lo va. "U Imma, min hrethiam teh, ka sahal em a ni. Zanin ngaihdam an rawn dil hnuah amah Vanlalsanga ka va be ve e ka tia, inthiam loh a hnekin, 'Innei thei inni lo. Ka farnu hi i phu lo' a rawn ti khanglang a. Ka thinrim em a ni. Inneih an remtih loh chuan min lo hnar ang hmiang, engkim tihfel vek hnuah tiang hian ruahmanna an siam leh a. An chhungkaw ruahmnanna a ni ngei ang. Mi tenawm an nih hi" ti bawrh bawrh a. A thusawi tawp lam phei chu a pawr leh tawh viau. A darah ka va vuan a, "Chupawhnise, mipa nih chuan fim taka ngaihtuah a tha. Hetia che buan buan lo hian.. Tiangte chuan engtin nge rem pawh in inrem leh theih ang? " ka ti a. Kan thusawi erawh Pu Thana te chuan an hre pha vek kher lo maithei. 

Ka kuah tho a, a thiante pawh an rawn tho ve sap sap. Chuti lutuka rui hmel an pu lem lo. An insawi thinrim ve deuh te pawh a niang e. 

"Zothansang, hei hi hria ang che. Engtikah mah kan in hi rawn rap leh tawh ngai suh. Tikhan i mize dik tak ka hre chiah e. Ka pa hial pawh kutthlak duh mihring hi eng atanmah ka ti lo. I hria maw? Hmela" Aruati aw chu a fiak mai. Zothana chu a nui lui hawk. Aruati lam va hawiin, "Ka hria e. Ka hre mah mah. I unaupa rilru chhiat vangin kan damchhungin nang leh kei hi kan inzawm leh tawh lo vang. Kei pawn min hmusittute chhungkua nena inzawmna neih ka duh therte lo ve" a ti ve pap pap a. 

"Ka hriatna hloh lai hmang tangkaia min bumtu i nih kha. Ngawi hmak rawh. Ka lo nei hman lo che kha ka lawm takzet a ni. " Aruati'n a rawn tih chuan, nuam lo ka lo ti deuh. 

"A ve zawk zamah che chuan le.. Min duh huam huam vanga tun hun thleng hi kan ni zawk. I hriatna i nei let leh a, U Imma zawk i'n duh leh nghal huam huam a. I tenawmzia kha. Ka luak i tichhuak.. " Zothana chu khap hman a ni tawh der si lo. 

"Nangmah vangin anih hi U Imma pawh a nat.. Bumhmang i nih vangin" Aruati chuan a ti leh a. Ka insum thei ta lo. "Duhtawk teh u, inbuai apiang hian ka hming hi lam ri tawh lo hram teh u. Ka duh lo. " ka ti tuar. Ka rui kha chutin la reh fel vek bik hek lo le. Isabella ka va melh a, Aruati a lo melh daih thung. Bella mitmei ven pawh a na alawm le. 

Zothana te an kal tan chiah tihin, In chhung atangin Sanga aw hian, "Zawnga, i la hre khawp ang. Inhmuh leh hun a la awm ang" a rawn ti tuar a. Pu Thana'n, "Vanlalsang, ngawi hmak rawh" a ti nghal tuar. Zothana kal tawh a rawn let leh a, Aruati te chhungkaw hmaa dingin, "Ka pu, ka zah khawp mai che. Vanlalsanga vangin ka kut i tawrh phah a. Ka duh vang reng a ni lo tih chu i hriat ka ring. I fapa hi ka hua.. Ka zep lo, mualpho takin min siam a, zak takin min awmtir a. Chutah pawh la inthiam loh a hnekin dengkhawng takin min la tawngkhum a. Ka tuar thei ta lo a ni e. Ka damchhungin ani kha chu ka hmelma a ni tawh ang" a ti ta chhak chhak a. Pu Thana pawh chuan, "A zia lo khawp mai.. Ni e, va haw tawh rawh u. Rorel dan tur pawh hriatthiam a har a nih hi.. Inmi ngaihdamna kan dil mawlh mawlh e" a ti dam thlup a. He pa hi pa mak tak chu a ni ve alawm. Pi Dini'n, "Ngaihdam kan dilna chhan tur a awm awkawng lo. Tikhawp hian min rawn tibuaiin kan in chhung ngeiah buaina a rawn siam a nia. Kan makpa a ni hman lo va, a lawmawm daih zawk. Haw vang vang r'u.. Inhmel kan hmu peih tawh lo" a rawn ti ve a. Insum ve deuh tur a nia aw.. 

"Ka pi, kan kal dawn e. Mahni fate dik lohna pawh hmu thei lo makpa nih hi ka chak reng reng lo" Zothana pawh chuan a la chhang ve zel bawk si. Dikin ka hre ta lo va, ka kuah phei ta ringawt. Motora an luha an tlan thengin ka dinchilh a. Sehchilh nak hian, "U Imma, Ruatdiki saw i ta a ni tawh e. Inzawmna kan nei tawh lo" a ti a. Ka nuih a za zawk., "kal vat mai teh u" ka ti a. An kal ve thei hram e. Thenawmho pawh an kal kiang tan a. Verandaa ding Isabella chu ka pan vat. A lu chu ka dawm a, "An khawih na che em? I tha tiraw? " ka ti mawlh mawlh a. 

"Min khawih chiah lo, thelh ka tumna lamah Zothana thianpa khan min lo vai a, ka lo inring lo nen, ka tlu ta lawm.. Ka na lo, ka tha" a lo ti ve sawk sawk. 

"Hrim hrimin mipa intihbuai laia lo inrawlh ve sek kha a zah pawh i zak lawm ni? An khawih na lo ngawt zawk che lawm" Pi Dini'n a lo tih chuan mi run deuh. 

Mahse, ka insum a, Bella melh chungin, "I huaisen thin lutuk a.. Fimkhur tawh rawh aw.. " ka ti nghut a. 

A bu nghat nghat. Pu Thana chuan, "Thil kal dan chu ka va duh lo em aw.. Buaina hi a reh mai mai dawn lo a nih hi" biak bik pawh nei lo chuan a ti a. 

A tlai tawh nen, "Va lut tawj rawh. Kei pawh ka haw ang" Bella ngat chu ka be lui zel. Aruati leh a nuin min en reng tih pawh ka hria. Eng nge ka hriat pawh ka hre lo, an nufa chuan ka ngei deuh ringawt. Mipa tiha mawi lo chuan a.. 

Bella pawh thuawih zetin a lut ta a. Kei pawh tumah be tawh lem lo chuan ka phei nghal nal nal. Zothana thinrimna kha awm ka ti hle a, kei ni ila ka nasa ve en em tho ang tih ka ring. Vanlalsanga hi a dik hlawl lo a ni e. A bak a awm lo, sawifiaha chulmamsak tur awmin ka hre lo. Zothana duh loh chhan riau a lo nei a nih pawhin inneih hma khan sawi tur a nia.. Last minute-ah mualphothlak takin a rawn che leh roh si! A ngeiawm ve bawk em a ni. 

"U Imma, i lo danglam ta hle mai" Aruati msg chu ka melh vang vang. 

"Danglam ve bawk ang chu" tiin ka chhang a. 

Amah ka hmuha suai awm thin, a aw ka hriata ka thinlunga 'dawt' lo awm thin kha engtik lai khan nge a bo tak ka hre lo. Isabella vang nge hunin min thaibosak ka hre lo. Aizawla ka phei tirha zingkara an rawn len tum kha chuan, 'awm' kha a la awm ngei si a, ni tlemte hnua ka danglam ta viau hi kei tak pawn ka hrethiam lo. Ka nghah reng thin hun kha a lo thleng ta chêng a, lawm a hnekin buaina ka tawk zel ta si a, ka thinur hlur ta zawk chu a nih hi. 

"Khang kum 3 chhunga ka laka i lungawi lohna te kha Bella chungah i hrithla tiraw! " a la rawn ti hram. A nihna chen a awm ka tih hian ka demawm viau ang em chu ka hre lo va, mahse, a sawi dikna chen a awm ve miau si a. Bella aiawh hian tu emaw pawh awm se, Bella angin ka treat tho ang. 

"A dik lo.. I ngaihdan mai mai anih chu.. Ani nen chuan kan tha alawm. I lakah lungawi lohna ka nei lo" ka va ti a. 

"Nichin kha chuan min runluih deuh chu a nia alawm.. Tiraw! " a rawn ti leh a. Ka ner sawk. Pi Dini nen an tawng dan ka ngei deuh vangin Bella kha ka hnaih luih ve deuh ngawr ngawr bawk a. Mahse, "Runluih teh nang aw. I ngai dik lo a nih chu, runluih nachhan tur che ka nei hleinem. Engmah lungawi lohna ka nei lo" ka va ti a. 

Bella msg, "Sanga hian thup a nei a ni. Eng nge niang le.. " tih a ni thung. Hei hi min la kap rengtu a ni. Mahse, hriatchhuah tum talh kha ka mawhphurhna a ni lem lo bawk a. Ka tum lui duh ta lem lo kha a nia. 

"Nunpuii kha a rai hrim hrim em! " ka va ti teh daih a. 

"Teh daih a che, rai chu an tiin ka hria. Tu fa tak ni ang maw? " a rawn ti a. 

"Sanga fa te hi a ni thei ang em? Lo ni pawh nise, Hmanruaa tan te chu a duh awm tawp si lo" ka ti a. 

"Aruati chuan min ngei lehzual hle a niang, mut dawn khan rooma ka lut tur kha.., 'Hmanrua a tan chuan i uiawm mang e. U Imma inhrikthlakna hmanrua mai i ni sia' min tia. Ka chhang duh ta lo va" a rawn ti a. Ka then sak. Aruati rawn harh atang khan mikhual roomah a riak lut tawh a ni. 

"Engahmah ngai suh. A chauhthubarawh a nih kha. Khatiang zawnga a chet tlat vang khan ania a laka ka feelings a bo zawh tak ni" ka va ti hmiah. Hei kher hi chu ka sawi dik. Ni e, inthiam lo leh ka laka inthlahrung em emin awm ta se chuan, keia rilru that vena hian a nuailiam thei mai dawn lo sa, mahse, a letling zawngin a rawn awm ta daih a. Min tihel a ni ber mai. 

Dar 4 rik dawnah kan inmang tha thei hram. Aruati chu a msg ka chhang duh tawh lo law law mai. Huat hi chu ka duh lo, amaha duhawm ka tih thin a zia te kha a hloh mek zel a, tihnat duh lo viau mah ila, ka pehhel nasat poh leh a lo na si a, ka tan chuan awmdan thiam a har ve khawp mai. 

A tukah rit burin ka tho. Chaw min lo eisan a. Tui ti lo zetin ka ei ve rak rak. Ka pa in thil awmzia min zawt a, ka hrilh mual mual. 

"Mama, a rang lamin phei vat teh u. A dik dawn lo. I hming an lam tel teivet ziah lehnghal a. Ka duh miah lo a nia. Isabella pawh hi a theih chuan then tum mai ten. An ni nena inzawmna boruak neih leh hi ka hreh riau tawh a ni" ka pa chuan a ti a. A sawi chu ngaihtuah tithui a tling ve bawk. An inchhung hnai angreng sia, amah Bella tan tak pawh hian a nawm loh dan tur chu aw.. 

"Inthen ringawt chu a har ve e" ka ti ringawt. 

Kan rel angin, naktuah Lungleiah ka phei dawn a ni. Ka pa thutlukna a ni tlat. Bella ka va hrilh chuan, "I ruala phei ka lo tum ang. Remti lo mah se, ka kal lui ang" a rawn ti hmiah. A ning ve tawh pawh a niang e. 

Ka nu nen kan bazar a, a inlei duham thei sia, ka hah vek. Nu ho bazarpui hi chu sawi tur an hre thei ropui si. Chawhnu dar 2 velah in kan thleng tawk. Naktuk chaw ei khama phei tur tho ka ni bawk a, ka insiam lawk peih lo. Bella khan kan bazar lai khan, "Ka haw ve thei dawn e. Pa Thana pawn a remti a. Hei Sanga nen kan chhuak lawk dawn, ka thiante tumah tlawh ka la nei si lo va, Sanga'n ka kalpui ang che a ti teh tlat a. Kan kal dawn.. " a rawn ti kha a nia. Lawm a kim e. Ka ruala a phei ve theih chuan, Aizawl lam buaina chu mang tha vang vang tawh mai ang. 

Ka u room a te deuh a, kan zauh a, bungrua a ngah ve bawk nen, kan buai leh ta char char. Ka pentawng nen ka ni bûr mai. Dar 4 pelhah thingpui ka in ve chiah, bual pawh ka la inbual lo. In chunga an pangpar khawi ho lak thlaksak leh an ngai bawk a, ninawm. Pot ho ka sawn kualsak laiin Lydiain min lo au vak vak a, "Mama, an be duh che" a rawn ti. Ka va lut a, Aruati a lo nia! Phur fahran lo chuan ka la a. 

"U Imma, Bella a thi! " a rawn ti ta mai! Ka phone ka thlauh bawl! A awah leh tawngkamah fiamthu reng reng ka hmu si lo. 

Ka nuin ka awmdan a lo man thiam nghal ni tur a ni. Ka phone thlauh chu a chhar vat a. Amah chuan a be nghal,"Tunah khawiah maw a awm? " a tih ri te chu hla tak atangin ka hria ni maiin ka hria. Thil ni thei a ni lo. A dik lo reng reng. Chuti ringawtin Isabella a thi lo vang. 

Ka nu chuan, "Mama, inbual fai rawh. Ka va kalpui ang che" a ti a. Ka mawl huih mai. Chet lak nachang ka hre lo. Ka ding khawng tlat. 

Ka phone bawk chu a rawn ri leh, kei chuan ka en ngam lo. Ka nu bawk chuan a la leh a, "Hello, Pi Din, eng nge maw thil awmzia le? " a tih ri chu ka hria. 

Lydiain rooma min kaih luh lai te chuan tawng nachang ka hre lo. Mami a rawn lut ve a. "Mam, intipachang rawh. Mipa i nih kha" a ti a. Ka lo nui ringawt. Ka nu a rawn lut ve leh a, "Mam, a thi lo. A mar a la awm. Sanga pawh a ngaihtuahawm khawp mai. Inbual vat la, va kal ang" a rawn tih chuan, ka lo melh hû ringawt. 

Mami chuan, "Nu, eng nge awmzia a? " a lo ti a. 

"Kawng thlangah an tlan liam a, Tun lawk khan an la chhuak tawh. Sanga nen.. Chubak ka hre bik rih lo. An la dam ve ve tih chiah ka hria" a ti ta a. 

Ni e, Sanga nen an chhuak tak alawm. Vanlalsanga bawk chuan maw buaina dang rawn siam belh leh? A ni em em tawh lo. Buaina pakhat a reh a, a dang a awm leh zel a, he mi te chhungkua hian ka lakah eng nge an duh chiah le? Keimah vang em ni ang buaina hi a thlen fo le.. Ka inbual lai chuan ka inbual tih pawh hre lo lekin ka lo ding leh vung vung thin. Isabella a thi ang maw? Ni lo.. A teuh lo. Ka nu khan thu a khuh mai mai zawk mawni le.. Ka inthlak laiin Johnyan min lo bia a. "Ka lo kal ve ang. Whatsappah ka lo hmu a. Thianpa, rilru tihahdam hram hram rawh. Pathian zarah an dam chhuak em em ang" a rawn ti a. Chutia a rawn sawi danah Bella chu a la dam tak tak a nih dawn chu.. Ka thaw hawk. Ka nu nen hmanhmawh zetin Hospital kan pan ta vang vang mai. Aruati te chhungkua nen bawk kan inhmachhawn leh ta. Ka va hne tawh tak êm. Aizawlah hian lo phei lo ila heng zawng zawng hi kan tawng lo ang mawle. 

"Khaw nge? " ka ti nghal a. Min kawhhmuhna lam ka pan nghal. Sanga chu ICU-ah an dah. Bella erawh a lu an lo tuam bur a, a ban veilam an cher khawng tlat bawk. Ka melh ngawih ngawih a. Thil tam tak kan paltlang dun tawh a. Chuti maia min kalsan chu ka remti hauh lo. Ka lainat takzet a ni. Sanga nen khan inzui lo se tiang hi a tawng kher ang em le? Keiman lo kalpui mai ila tha tur.. 

Ka nuin min hawnsan a, kei erawh ka la thu ngat ngat. Johny pawh chaw eiin a haw ve a. Zanah a rawn kal leh ang. Zuala nen Kan awmpui ta a. Sanga dinhmun pawh a tha lo khawp mai a. Lehlamah chuan an chhungkua chu an lainatawm takzet. A zah pawh a zahthlak. 

Mei zu turin kan chhuak a. Bella lah a harh thei rih si lo va. 

"Imma, kan thil tihsual ang zel hian hremna kan hmu thin a nih hi tiraw? Sanga chungah pawh rulhletna a thleng nghal chu a nih hi" Zuala'n a tih chuan, "Chu lam zawng chuan ka lo ngaihtuah miah lo" ka ti a. 

"Chunglam kut a nih loh pawhin Isabella vang a ni ngei ang" a ti nghet charh a. A sawi awmzia reng rneg ka hre lo. 

"Eng nge a awmzia? " ka ti a. Ka melh vung vung bawk. A meizial khu chiai chiai kar atanga rawn hawiin, za lo zet hian a nui a. 

"Vanlalsanga hian tih takzetin Isabella hi a hmangaih a ni.. Tikhan i ngaihtuah zawm thiam em? " a ti ta a. Ka dinna lei leh ka ke chu a inchar emaw tih turin khawng zetin ka ding ta reng a.. 

A tawp ta han ti mai ilah 😂😂