Thinlung 17

THINLUNG (17)

Ziaktu: Toni Râlte

Ka nu te pawh hrilh lem loin hmanhmawh takin ka phei ta nghal a. Ka va thlen chuan, Ruatdiki room bulah an lo ding thap mai. Room chhung atang chuan Aruati chu a rak tuar tuar a. Mi â ang tak takin a khawsa niin ka hria. Mangang zetin min lo melh hlawm a. Bella pawh rilru hah hmel zetin a lo ding ve ran bawk. Pu Thana chuan, "Tihngaihna kan hre lo. A chhan kan hre bawk si lo, i hming a lam ngun deuh vangin zah pawh dawn lovin kan rawn ko ngawt mai che a ni" a lo ti a. Kei pawh chuan tihtheih ka nei awm lo mang e. 

Kawngka chu ka kik dat dat a. "Aruat, keimah, Immaa, khawngaihin lo hawng teh. Inbia ang" ka ti a. Thawm chu a reh diak mai. Ka auh vawi thumna velah a rawn hawng ta mial a. A sam a tuai thur bâm a, a meng sen rûm bawk. A ţap nasa tih a lang reng mai. Roomah chuan kan lut ta huk a. Khumah ka nem thu a, chhuat lam a melh ran mai. 

"Ti nge hetia i awm tak mai? Engkim a tha leh vek dawn alawm. " ka ti a. 

Min rawn melh a, "Khawvelah hian ka tan tumah an awm tak tak lo a nih hi. Zothana'n min phatsan a, nang pawn min kalsan bawk" a ti ţiau a. 

"Enteh, hahdam rawh. Zothana rilru pawh a hrehawm asin. Sawn a thlak hi kei chuan ka ring miah lo asin" ka ti a. Min rawn melh kâwk. 

"Khati khawpa chianga sawi ngamtu khan dawt a sawi lo vang' a ti sap a. 

Pu Thana a rawn kal hnai a. "Naute, thudik a la lang mai dawn alawm. Engpawhnise, i chhungte min timangang em mai, tiang kha chuan awm tawh lo hram rawh aw" duat takin a rawn ti a. 

"Ka rilru hi a pik em a ni.. Pa, eng nge ka tih ang ka hre lo, ka zak bawk si. Ka hawina lam apiangah lungngaihna chiah ka hmu" tiin a mittui a hru zauh a. Bella'n tuisik a rawn laksak a, a bulah a thu ve nghal bawk. "Mate, thudik a lang vat dawn alawm. Zothana hi kei chu ka ringhlel lo. Ani pawh a rilru a hrehawm viau ang" a ti ve siam siam a. 

"Nangte chuan Zothana hian sawn thlak lo se i duh ngawih ngawih ang chu.. A ni lawm ni? " a lo ti chang fak. Isabella a meng hnual raih mai. Ka lo lainat deuh, tawng tuma ka an ziau laiin Aruati u chiah Sanga'n, "Khatin i u hi ti thin suh. Hrehawm a tih ve em hi. He thilah hian tumah mawhpuh a ngai lo, Zothana pawn sawn a thlak lo a nih pawhin a dikna a rawn lang mai ang. A lo thlak a nih tak leh neih tlak a ni lo tihna a ni mai.. " a lo ti ve a. Zuala erawh ka hmu miah lo. 

A ziaawm tak deuh hnu chuan khumah kan muttir a, Lehlamah a chhungte leh ama mitmei ven a ngai a, lehlamah Isabella mitmei. Tuboh leh dolung inkarah ka awm a ni ber mai. Aruati chu ka hrethiam tho, thil thleng khan a shock ve hle tih a lang reng mai a, ani derthawng sa ni bawk si chu a inngaihtuah lungpuam ang a, awmngaihna hre lo khawpin a tal buai tihna a ni mai. 

A mut tawh hnuah mi dang ho chu an kal kiang deuh a. Isabella nen erawh kan la awm. Sanga pawh khum mawng lamah a ding a. 

"Ih maw. Teteii hnena i thusawi kha ka lo hmu ve a. Ka na em a ni. Nang lehzel pawn min phatsan hi" a ti ta mai a. A buai hma lawka Teteii nen kan inbiak dan kha ka hrechhuak nghal. Ni e, ka hnar fithla kha a nia. Teteii chuan lo hrilh leh kher a ngai lo asin le. 

"Aruat, thil hi i hriatthiam a ngai a ni. A la sarhu em a, i tan chuan a harsa ang tih ka ring. Mahse, tlema i insiamrem deuh a ngai ang.. " ka ti ta ringawt a. Bella nuam ti lo chu a chhuak daih. Sanga chuan zawi sup hian, "Imma, hrethiam hram rawh aw. Ka naute dinhmun hi a hahthlak a nih hi.. Nang tak pawh i rilru a hrehawm thin ngawt ang. Bella tan pawh hian a nuam dawn bawk si lo.. Aruati pawh, thil i hriatthiam a ngai.. Imma hi i thlah hlen a ngai tawh a ni" a ti a. Ka kutah Aruati chuan a rawn vuan a. Mittui tling piau chung hian, "Isabella kher kher.. Mi dang te chu nise ka hrethiam ang. Ka hmu reng a, ka hmuh apiangin ka na asin" a ti ta a. A ni thei dawn lutuk. Mahse, a dam loh tirha zan tin deuhthaw ka len thin laia kei min thlima Zothana bula hlim taka a nuih thin lai nen chuan khaikhin thamah ka ngai bik lo. Hun kal tawh mah nise, fair lo taka Isabella thlah phahna tur khawpin Aruati hi ka nunah a chak tawk tawh lo a ni ber. 

"Isabella a nih vang alawm ka thlan. Ani hi hmeichhr tha tak a ni asin" ka ti sup a. A na ang tih hre chunga sawi ngat ka ni. Ka lakah hian beidawng se, a rilru hi phir tawh lo se ka duh. Ka thinrim et et bawk, Zothana chungah khatiang kha thleng lo se engkim hi a tha vek mai tur. 

"U Imma, min hmangaihna zawng zawng kha a bo vek tawh em ni? " a ti zawi sap a. Khawngaihthla la deuh hian min melh bawk. 

"A bo ta vek a ni lo. Nang leh kei chu a rem lo tih ka pawm tawh a, ka danglam tawh a ni zawk. Englai pawha i thian niha puih che erawh ka inhuam reng a ni" ka ti ta a. Ka insangmar ve deuh bawk. 

"Isabella vang tiraw? Ani mitmei i ven vang hi tiraw? A dik em? " a ti vin hlak hlak a. Tlemin a thisen a sang chu ka ti. Ka Aruati hriat thin ang kha a ni tawh meuh lo. Ni e, mihring kan mangana a kawtawpa kan tan tawh hi chuan pawisak neih hi a har khawp ania. 

"Ni lo, Isabella hi tel ve lo mah se; ka rilru hi a danglam tho ang. A chhan chu kum 3 chuang ka lo vakvai tawh a, tawrh leh vak ngaihna pawh a awm tawh lo. Hmalam pan ka thlang tawh a, i lakah ka beidawng tawh a ni" ka ti nghet charh a. Amah ka huat vanga sawi emaw min ti mah se; pawi ka ti rih lo. Beiseina siamsaka mumal lo taka a nun hmantir ka duh lo. 

"Aw le.. Ni e, tumah hi rintlak inlo awm lo a nih hi.. Zothana lah tenawm lutuk.. Ani hi chuan min phatsan ka ring ngai lo asin" a ti leh ta tiau a. A tah a chhuak zel mai. Chuvang chuan ka kalsan vat a ngai a ni. 

"Mutthilh tum phawt rawh. I chau lutuk ang. Inngaihtuah vak vak tawh lo la aw.. " tiin a sam chu ka huikiansak a. A che chang lo. Ka ding a, Sanga bulah, "Ka va haw phei ang e. A tha tawhin ka hria.. " ka ti a. 

Min zui chhuak ve nghal. Sitting roomah an lo la thu thap mai. A zamawm rum rum. 

"Ka va haw tawh ang e, a muhil ve mai ang chu maw" tih bik pawh nei lo chuan ka melh kual a. Pu Thana a ding vut, "A lawmawm hle mai. Chhungkuaa chinfel theih mai turah kan lo ko buangbar che a. Min hrethiam thin a, kan lawm lutuk.. Imanuel, Nang pawn Aruati hi farnu angin enzui thei la ka duh khawp mai. " a ti chuar chuar a. 

"Tehlul e a. Bakah inthlahrunna tur a awm lo a nia. Min lo ko hreh reng reng suh u. A theih chuan naktukah incheck up ula ka ti. A natna saw a rawn lang leh deuh mawni ka tia.. Thil thleng a tam ve bawk nen" ka ti deuh duah a. 

"Nia, a nu nen pawh kan lo sawi dun a. Kan fanu neihchhun a ni a, kan thla a phang hma ve thin nen.. Eng emaw zawngah min ngaihsak suh aw.. Nangin i thunun thei deuh tih kan hriat vang zawk a nia.. Bella lakah pawh a inthlahrunawm tho" a ti a. Bella chuan, "Chutin ngai suh. Ka nau a nia, a hlim chu ka duh em em ania" a lo ti vat. Pi Dini erawh a ngawi reng. Lungawi hmel a pu lem lo bawk. Isabella chuan kawngka bul thleng min rawn zui a, "Tuar hram hram rawh aw.. Engkim a tha tep ang," ka ti sup a. 

Mawi zeta min rawn melh chungin, "Min ngaihtuah suh, ka tha. Min vengthawng miah suh.. Ka hrechiang che a, ka ringtawk bawk che" a ti fiah kalh a. Ka va fawp chak tak. A rem si lo. Kan inmang tha ta a. Pawn ka thlen chuan Sanga a lo ding run a. Ka motor dahna thleng min zui a. 

"I hrethiam thin a, ka lawm. Ka pa hi alawm a mang a ang hma thin lutuk a. Sawtiangte saw chu a tawrh ve tur pawh a nia, Aruati pawn. A la tuar dam ve mai ang. Chua, Zothana hian sawn a thlak chu i ring bik lo tak tak em ni? " a ti a. 

"Umm.. Rin harsa ka ti khawp mai.," tawng tam hlau takin ka lo ti a. 

"Kan inang a nih chu.. Kha nu kha kawm chian ka chak khawp mai. Engkim a rawn tibuai vek sia" a ti rum hawk a. A darah va bensak thuakin,"Engkim a tha turah ngai ang. Aruati saw lo enkawl tha ula.. Chuan, sawi chu a nuam vak lo naa, Bella tan hian a nuam lo ve dawn lutuk a, nangni ho tal hian in lo hriatthiam ka ngen ve a nia" ka ti a. 

"E..! Kha lamah chuan ngaihtuah suh. U Zuala nen phei chuan a thlavang kan hauh char char e, Ka nu ber hi lawm.. Nauteii a khawngaih luatah a rilru a kawi vek alawm.. A tha vek mai ang" a ti ve sup sup a. Ngaih a ngam ta deuh e. Kei pawh muangchangin ka inkhalh haw ta a. 

Bella nen kan intext leh zuai. "Pa Thana khan a lo call ta mai si che a, engmah ka rawn sawi ta lo law law a nih kha.. Kei chu hawn ka duh " a rawn ti ta chiah a. A rilru tur ka hrethiam lutuk tlat. 

"Naktukah haw mai ta che. I hreh em? " ka ti a. 

"Hreh lo ve. Mahse, Aruati min hruai pheitir an tum sia. Chutak chu lawm" a ti a. 

"Kei ka haw phei rih dawn chuang lo va, Aruati pawn phei a la duh lo maithei sin" awmze nei deuhin ka ti a. 

"Ni e.. " a rawn ti tawi tâk. A ngaihtuah ka hria. 

"Mahse, ka hnaih dawn hleinem. Bella, i tan ber hian a hrehawm ka ring. Ka khawngaih che. Min hua em? " ka ti ta thlawt a. 

"I tan fe hian a hrehawm ang. Kei min vengthawng bawk, an ni vengthawng bawk.. Ka khawngaih fe che" a rawn ti daih. Rilru kawi engmah a pu ve lo leh a tlang lutuk hi ka duh telh telh mai. 

"Hawn chu i thu thu aw. Zothana hi ka chinfelsak veleh kei pawh ka rawn phei ang. Tin, maw ka rindan chuan Aruati Lunglei lama awmtir an duh chhante hi thil dang vang a nih vak ka ring lo. Ka sual nge ka rilru a kawi pawh ka hre lo.. " ka ti ta duah a. 

"Kha chu hriatsa alawm. Aruati hian theihtawpa neih let leh che hi a tum alawm.. Chuvang a nia inthiarfihlim ka duh" a rawn ti a. 

" Sawi tawh suh. " ka ti hmuk. 

"Hnawksak nih ai chuan, tawrh thlang zawk thin ka nia" A rawn ti. 

"I hnawksak lo. Muhil tawh rawh. A tlai tawh si" ka ti a. Sawi thui ka duh lo a ni. Kan inmang tha zui a, kei pawh ka muhil zui ve mai. 

Mami te bungraw zuk la rawn haw chu ka nuteii leh pa Hmuna nupui an âng nasa mai. Mama chhungte lam an lo nasa deuh emaw ni, Nuteii chuan, "Ve khanglang hian a. I chawma an inchhung i tihphuisui tehlul nen, a putea tawngkam kha kei ka lawm hlawl lo. 'Mipa te chu han lerh ziai ziai chang te pawh a awm ve tur alawm. Amah Mami pawh hian insiamthatna tur a nei nual ang. Mipa an uire thei lo' an ti khanglang a nih kha. Ka ten lutuk. Ka tawng tep a, ka uin min kheuh a, ka insum hram a ni" a ti hlaih hlaih a. Ka pa chuan, "Aa.. Inbakkaih lo va inzuk la thei chu a lawmawmah ngai ang, tikhan engmah sawi zui tawh suh u.. " a lo ti duam a. 

Pa Hmuna nupui Nu Rengi chuan, "Mai mai ana.. Tih tak emah te chuan Mami lama tanga lo chelh khawmawi tur an ni ve a, an â em mai. An fapa leplerh thupmawi an tum zawk hlauh ania, i nei rei lo a, a lawmawm hlauh zawk e. " a lo ti ve bawrh bawrh a. Mami erawh a ngawi reng. A rilru a hrehawm dawn tih ka hria. Nulat lai pawha invawng, nungchang mawi kha a nia, nuthlawi dinhmuna a han ding chu a tan chuan rilru natna a tling ve ang. Nuthlawi ka hmuhsitna lam ni loin, Pasal pakhat bak ka nei dawn lo ti ve thin kha a nia. Mahse, inphatsanna hi chuan dawhtheihna ramri pawh a lo kham thei khawp a, a tuar thei tawh lo a ni mai. Khawvel lama eizawnna kawngah chuan ngaihtuahawm ni lo mah se, Lydia atangin pa tel lo va naupang enkawl seilen harsatzia kan hre tawh a. A fapa pawh pa tel loin tihian a chawi lian daen chu a nia, hei ber hi a rilru hrehawmna chu a nih ka ring. 

Isabella nen kan inbe zuai a, "Phei ka sawi a. An remti rih lo. Min chelh tlat" a ti a. Tih vak ngaihna ka hre lo hle. Kei pawh Venghlui lamah thiante tlawh paha Nunpuii va zawn ka rilruk deuh. Bella chu hun a neih tho chuan hruai ve pawh pawi ka ti lo. Hman a tum tur thu a lo sawi a, ka thaw huai e. Tukthuan kan ei tlai deuh a, eikham meuh chuan 11 a pel tawh. Awm khawmuang loin ka inbual a, ka insiam nghal mawlh mawlh. 

Isabellain min lo call a, "Rawn peng suh aw. Keimah ka rawn chhuak ang" a rawn ti a. Ka khi sak. Tleirawl inngaizawng te pawh kan ang alawm le. Ka insiam zo a, Zothana ka be leh zuai. Ka chhuak ta a. Kan sawi lawk angin An in piah deuhah Bella chuan min lo nghak ran a. Hmanhmawh deuhin a lo lut. Mahse, rei kan tlan hmain a phone a rawn ri a. 

"Ka ni" a ti sap. 

"Hello.. Ni" a ti zawm zat a. 

Speaker a on vangin a ni tawng chu ka hre vek thei. 

"Khatia a ruk arala inhmuh a ngai em ni? Amah Imanuela pawh rawn leng ang hmiang. Inawmdan hi ka duh hauh lo mai. " a rawn ti ta mai a. Kawngsir zau laiah ka ding ta ringawt. 

"Chhuahna tur kan nei a. Chuvang a ni e. Tin, a tan rawn len a nawm loh bakah min rim tura rawn len ngat phei chu ka tan pawh a nuam chuang lo. " Bella chuan zâm hauh lo hian a ti let ve hmak a. 

"I lo mak ka ti khawp mai. I nau heti khawp hian rilru baihvaiin a awm a. Chuta karah a bialpa ruksak tum reng rengin i lo hmanhlel a. Rawn haw la, tlai sumo-ah Lungleiah phei ang che" a rawn ti ram hmak. An rilru a mak ka ti tan khawp mai. 

"Tehreng mai. Ka lawm ngawt zawk ang. Mitmei veng reng renga khawsak a ngaihna hmun kha nuam ka ti reng reng lo. I fanu bialpa ka ruksak lo, i fanu khan ka bialpa hi min ruksak a tum zawk mek a ni" a ti ve leh sak sak. Ka rin aiin tawngkam pawh a lo thiam. Awmhmunah ka lo tang ve em em ringawt. 

Pi Dini chuan a off ta hmak a. Hmalam melh ran chungin, "Eng nge kan tih tak ang? " a ti sap a. Thinrim mah se, insum a tum hle tih a lang. A biang erawh a tai hlar mai. 

"I phei mai ang chu.. Ticket kan book nghal dawn nia" ka ti a. 

"Mahse, Zothana dikna hi kan hre chhuak thei tho ang em? " a ti a. 

"Keiman ka lo bei mai ang. Kawng a awm ve mai ang. Hrehawm reng renga i awm ka duh tawh lo" ka lo ti a. Thawk la hawkin a thu tha a. 

"Pa Thana hi ka enthla uluk ber a. Mahse, rinhlelh tur awm ka la hmu lo. A tira ka ngaihdan kha sawhsawnin Ruatdiki leh ka ni thiltih saw a ni maithei.. A nih lohna chhan tur a awm miah lo" a ti chang fak a. Motor ka start a. Kan tlan lehnghal. 

"I remtih chuan Ruatdiki ka hnaih a ngai dawn a ni. Thudik hre tur chuan" ka ti a. 

A nui ro hak, " A lo eizo si che ang e" a ti a. Hlauhthawnna a la nei lo thei bik lo. Ka hrethiam lutuk tlat. 

"Chuti maia tawlh ruak ruak tur khawpin ka derthawng bik lo ania" ka ti let ve a. 

"Rin che ka tum ang. Hnaih la, thudik hi hriatchhuah tum ngei teh" a ti ta a. Ticket kan book te te a, Venghlui lama kal tum mah ni ila, a phei dawn sia, Hmun dangah ka lenpui ta mai. Dik tak chuan kan zin phei atangin hun thawl kan la nei mang lo reng reng a, ka thlahlel ve tawh a ni. Khaw chuanna nuam deuhah ka kalpui a. Boruak a nuam bawk a, a thinrimna te pawh a theihnghilh chho ve a niang, a nui leh sen sen tawh. Insi rialin kan thu dun a. A sam chhawlleng thliin a len chuan ka hmai a rawn zar thin a, ka ning chuan ka scarfin ka tawnsak ta a. Ka zei lo si, a nui hak hak reng mai. 

"Kei hi min tawng lo la chuan, Aruati bulah i let leh tawh ngei ang" a ti sap a. 

"I va confi thin ve" ka lo ti fiamthu a. 

"Ka sawi awmzia zawk chu, kei chu Aruati te nen kan awmho tlat a, min hmu ve zel si a, i tan let leh kha a harsa alawm.. " a ti a. A dikna chen a awm ve tho mai. 

"Aruati rilru buai lutuk hi a tha lo zawngin a kal a. A zia lo khawp mai" ka ti a. 

"Nia, a pawi. Nizana a rak dan phei chu maw.. 'Kan inngaihzawn lai atangin Isabella hian a duh tawh a. A rukin a lo be thin a. Lungleia U Imma awm chhan pawh an lo inbiak ruk thin vang a nia. Kei min rel char char a, tihian a duh chu a hmu ta a nih hi' te a ti mawle. Ka ngaihtuah phak bak a ngaihtuah thiam. Thil a ngaihtuah nasa lutuk a, a zeldin a, tak tak emaw a ti niin ka hre ber. A khawngaihthlak letling" a ti ve a. 

"Ni e, Bella, ngaih loh lamah ngai lo la, kan dawma kan dawhtheih deuh te pawh a ngai ang. I nau ve tho ania.. I hrethiam ang" ka ti a. Min rawn melh ralh. "A sawi dik ve tho. I thlalak ka hmuh hmasak ber khan keimahah eng emaw chu a awm. Mahse, tibuaitu ka ni duh lo a, ka ngawi. Chhiatna kha tawk lo ila kan inngaizawng reng reng lo vang" a ti sar sar a. Ka kuai dak a, ka fawp thut. Kan uar dun tân tân khawp mai. Kan awmna a fianrial ve deuh bawk nen.. Mitmei veng reng renga inhmuh chang pawha inbe ngam táwk kan ni a, kan hun thawl neih chu âm taka hman kan duh a ni. Motorah ka pawm lut a, rem vak loin ka zalh a. A thaw a rang sâwt hle, a mitmeng pawh a vai ve riai mai. Kan infawp leh ngawt ngawt a, a hnute pawh a rim viau.. A tawp thlen ka rilruk titih tawh.. Mahse "Kan sawi tawh kha.. Tunah ni lo" ka beng bulah a tifiah kâk a. A zahawm duh viau. A virgin tawh chuang lo tia han namnul chi lah ni hek lo, ka thawhsan ta a. Ani pawh a insiamtha sawk sawk. 

Rei tawk fang kan awm hnuin amah insiam te a la ngai dawn sia tiin hawn lam kan hnaih ta a. Lungleia a awmin ka ngaih a ngam zawk ang. Ka khawngaih thin si. Kan hawn lamin a phone a ri a. "Aw Mk" a tih danah Kha Mka khan a lo call tih ka hre mai. Ka beng ka chhi nasa. 

"Aih, tlai sumo-ah hawn phei ka tum a. Umm.. Ka hawng thut mai mai" a ti a. 

"Nia.. Umm.. Aw i lo la leng dawn nia" tiin a dah a. 

"In va inbe nasa awm ve," ka ti khauh. 

"Aizawl kan phei atanga min rawn biak vawi thumna" a ti sap a. 

"Whatsappah insawi ril thin awm" ka ti leh kher. 

"Whatsappah hian Imanuel Lalremruata bak chu biak ka nei lem lo. Amah vangin ka khawih a ni ber mai" a ti lang lang a. Ka lo nui. 

"A haw tawh em ni? "

"Haw bik lo. An lo admit sia" a ti a. 

"A that chu" ka ti leh hmuk. 

"Ve che, kei pawn thikthu ka thunun theih chuan, lo enliam ve mai teh.. Ni lo se ka thlah tawh ang che" a ti nghat nghat a. 

"Ka thik lo bawk" ka ti a. 

"I thikzia chu i mitmeng lianpuiah khan a inziak kuau mai" a rawn tih chuan ka nui nghek. Ani pawh a nui ve a. Hlim tak chuan kan inphur haw ve leh thei ta. Kei pawh kan in lam ka pan zui a. Kha nu zawn chhuah chu tha viau mah se, Aruati te chhung lam belhchian chuan kan hriatchhuah theih mai rinna ka nei deuh. An phone te hi hack sak thei ila tha tur.. A chi bawk si loh. Kan chhungkua kan pung leh ta bawk a, kan khua a har lutuk lo. Lydia leh Bawiha inzui kual reng erawh kan khak deuh reng, an tei peih si. 

Tihtur awm hek lo Hminga te inah ka zuk leng thla mai mai. Amah chu hnathawkin a chhuak a, Awmteii nen kan inkawm ta ringawt. Ruatdiki leh isabella vel te kan sawi a, Zothana thlengin. 

"Zothana hi ka khawngaih ta ber mai. A rilru a hrehawm dawn em mai. A pa hi a timak ka ti tawp. Vai rilru a pu ka ti mai, mualpho hlauh vanga khatia han sezawl chhuah tawp mai kha. A rinhlelhawm rum rum alawm le" a ti ve bawrh bawrh a. 

"Tak ana Awmte, Jio-ah khan i thawk ve tawh tiraw?" ka ti hluai a. 

"Thawk ve tawh e. Ngati tehdaih nge? " a ti ha a. 

"Call kha a hack theih tiraw.. Awlsam deuh khan," ka tih chuan,, " Whatsapp te pawh a hack theih alawm.. Mahse, man chhuah a awlsam a." a ti a. 

"Nia, whatsapp hack dan kha chu ka hre tho a. Mahse, sawi ang khan notification tangin man chhuah a awlsam lutuk. Jio chu engmah a lan ve loh kha. Call ringawt kha chu," ka ti a. 

"Tu nge hack sak i tum reng reng? " a tih chuan,"Ka bialnu hi a ex in a lo be ve ziah a. An inbe nasa em tih ka hre duh mai mai" ka tih chuan, "Awii.. Police i nih kha.. Chhui ve mai ta che" a ti hlar a. Kan han nui leh rih. 

"Sawi tha teh aw. A tihdan kha" thutak deuh zawk hian ka ti a. 

"Mahse, i hack sak tur phone setting kha khawih ve a ngai alawm" a tih chuan, "Tihdan a awm mai ang" ka ti ringawt. A sawi ta a. A awlsam angreng. A sawi anga ka tihtheih chuan, an call log ka en thei dawn a. A zia viau ang. Hlawhtling inti takin ka haw chho ta a. 

In ka thlen hma deuhin Isabellain min lo call a, "Buaina bawk. Ka hne.. Sanga leh U Zuala an insual a, U zuala a na deuh a, damdawiinah kan kal dawn. Ka phei leh dawn lo" a rawn ti ta mai. Ka ner sawk. A va mak bawk e aw. Mahse, kei chu va lan ve kher ka tum lo, an makpa pawh ka ni lo va, inrawlh ve sek kha a tulna ka hre lo e a. Ka nu te pawn chanchin an lo hre ve tawh a. Buaina chhuah dan erawh tuman kan hre lo. Unau inngeih tak kha an ni thin si a, Zuala hi a tlangval chhuah hlima han sual ve zauh tih bak han nghal zuina a neihawm kan hre si lo. An chhungkua chu an khawngaihthlak letling zawk e a.. Zanriah ei khamah Bella chu ka be ta a. An ni pawh an lo hman ta deuh bawk nen, thil thlen dan ka zawt ta a. 

"An buaina bul ka hre bik lo, ka insiam mawlh mawlh laiin an ri thut ringawt. U Zuala kha a thinrim em em tawp a ni mai. Sanga khan a dawh deuh zawk a, mahse, U zuala khan, khawih a tum zel si a. A dawh thei ta lo nge an inpawmchilh a, an thin rim telh telh bawk nen, Sanga khan duh aiin a lo khawih na a, U Zuala chu a hnar leh ka vel a thi bakah Sanga khan a dulah a tum a, kha khan a thawk a tisak a, hei an lo admit. A zahthlak khawp mai. An buaina kan hre ve der bawk si lo" a ti niah niah a. Mak ka ti hle. 

"A harh em? Zuala chu" ka ti a. 

"Nachhawknain an chiu a, a muhil.." 

"Tu nge riahpui dawn? "

"Ka ni aniang." a ti a. 

"A zia lo hle mai. Sanga chu inah em ni a awm? " ka tih chuan, "Umm, a rawn kal ve lo. Aruati pawh inah a awm" a ti a. 

"I hawn hunah thil min tihsak la ka duh khawp mai.. Aruati phone kha i khawihsak thei ang em? " ka ti a. 

"A password ka hre lo" a ti a. 

"Pa Thana tal" ka ti leh hram. 

"Thei ang ani chu.. Password a dah ve loin ka hria.. Hack sak i tum deuh em ni? " a ti ta a. Thil a man chak viau. 

"I ni phone kha keiin hack ta ila, i Pa Thana nangin.. Kawng chu a kuak ka ring. Mahse, i ni phone i khawih thei awm si lo va" ka ti a. 

"Thei lo, hnaih pawh ka hnaih vak peih lo. A rilru a thîp em mai" a ti hmiah. Ni ngawt mai, Pi Dini mizia inthlak chak lutuk hi a mak ve deuh. 

"Aw.. Chanchin kan inhrilh dawn nia. Kei pawh rawn len phei ka tum ang. Mitmei veng lo law law tawh mai teh ang" ka ti a. A lo pawm ve leh thliam e. 

Johny a rawn leng hlawl mai a. Sanga leh Zuala te buaina vel chu a lo hre ve a, kan sawi dun mai mai. "Sanga zawk a dik lo a nih ka ring tlat. He pa hi tun lai chu a rui ve zeuh zeuh tlat, Aruati te inneih dawn zanah te khan zan rei tawkah kan in chhak kawngpuiah khan kawmthlang tlangval nen an intibuai deuh alawm. Mahse, an thelh thei hram a. Tuman an sawi zui lo aniang. Chuan, nizan pawh khan putea nen kan lui kal hawin dar 1 bawr vela nula phura a rawn tlan phei kan tawk a. Bialnu a nei fuh lo nge mawni. Hmana a zia kha a ang tawh lo" a ti bawrh bawrh a. Ka lo ngaihven loh lam tak a ni a, ka tan chuan thil thar a ni. 

"U Zuala pawh hi a thin a ram ve deuh thin a, a zia a la thlah lo ve pawh a ni maithei sin" ka ti a. 

A lu a thing mut mut, "A nun hi a sim chiang ka ti hle zawk. A bialnu inawhhlum atang phei kha chuan a chhuak ngai bawk si lo, a awm mual mual ni maiin ka hria" a ti a. A hnuah chuan a bialnu chungchang kan sawi ta daih. 

A bialnu rim turin min kalsan a. Kei pawh dar 8 vel ni tawh mah se; Aruati te in lama phei turin ka insiam ta tho a.. Bella in a lo text bawk. "Pa Thana phone ka hack chiah e. " a rawn ti. Tih dan tur ka hrilh lawk vek a, a harsa vak lo a nih hmel. Ka phei tih ka hrilh a, "Kan boruak ti hi a ni sia. In chungah ka lo awm ang. Lo tlang mai rawh. " a rawn ti a. Ka phei nghal. In chung zawlah chuan a lo awm vâg a. 

"Aruati a tha em? " ka ti a. 

"Kan la inbe miah lo. A tha turah ka ngai. Roomah a tawm deuh reng a. Mahse, ka niin, 'Lo kal ve mai teh. Ka khua a har' a tih vangin Damdawiinah a chho ve ta anih kha" a ti a. 

"Kan va free ve" ka ti sup a. A ner sak. A hnunglam atangin ka kuah a, khua kan chuan mai mai. Pa Thana a rinhlelh loh thu bawk a sawi leh, ani phone hack sak dan tur chu kan rel a. Zingah chaw a han pek hunah tih dan kawng zawng turin kan inti ta a. Kan titi mawlh mawlh laiin, hnung lamah aw a rawn thian kharh. Kan hawi let rang kher mai. 

Sanga a lo nia. A nui lui deuh naa, an vawiin boruak vang khan a lung chu a la awi chiah lo tih a lang reng mai. 

"Inchhungah inkawm ve mai ula.. " a ti a. Nui chunga sawi anih vangin huata lak tur awmin ka hre lo. 

"Ka inthlahrung a" ka ti ve mai a. 

"Ka nu leh Aruati an awm chuang hleinem. Tak taka ka hrethiam tho che u.. Kei pawh ka chhuak lawk dawn.. Bella, chanchin eng emaw a awm chuan min lo call rawh aw" a ti a. A kal leh nghal daih. 

"I phei atangin a rui i hmu tawh em? " Bella bulah ka ti a. 

"Umm zu rim hi chu a nam ve deuh reng. Mahse, U Zuala nen ka lamtang an nia, ka tan chuan an hlu tawp" a ti mai a. 

Thil dang kan sawi. Ka haw phei hmain kan infawh leh hrep kha. 

Ka harh rualin phone ka ban a. Isabella. Msg chuan min tinui sak. "A fel e" a rawn ti a. 

"I him em? " emoji nui lai lem dah chungin ka va ti a. 

"Him" tiin a rawn sen tuar mai. Ka nui hawk. Ka mood a fuh riau. Ka chhungrila nawrtu khan ke min pentir a, kan hlawhtling ang em ka hre lo thung. Vawiin chu Zothana nen Venghlui lam va hrut kan tum a. Ka phur angreng. Ani pawh a hma ai chuan a hmel hmuh a nuam ta deuh. Aruati nen an inbiak tawh thu te, engkim a that leh a beisei thute a sawi ve nuah nuah a. Ka lawmpui. Venghlui kan thleng a, kan rin zawn ngawt ta mai chu a nia. A hmel kha kan hrechiang em em tawh bawk si lo, Nunpuii tiin kan phek zawn a. Nunpuii chu an lo tam nasa, Panga chu kan va hmu hman. Mahse, kha nu Biak ina rawn kal hmel kha tuman an pu lo. Ril a tam ta deuh a, kawng kama dawr te takteah lutin eitur kan lam a. 

Bella ka call nghal bawk. 

"Lo call che ka tum chiah a, Number pakhat nen an inbe zo deuh chiah a. Ka lo thawn dawn mi? " a rawn ti var a. He nu tak hi chu aw. 

Number chu a rawn thawn a, ka save nghal. Whatsapp a khawih lo nge.. engmah a lang thei lo. Jio number a ni. Ka call ta a, "Hello" hmeichhe aw tham chhil chhel hian a rawn ti a. 

"Hello, Nunpui, i dam em? " ka tih chuan, "Aw dam e. Tu nge aw? " hlauhthawn hmel deuh hian a ti a. 

"Keimah i fa paina pa Zothana mawle" ka tih chuan, Zothana chu a rawn meng phawk hle. 

Ka lo nuih ringawt. 

"Eng a?! Tu nge i nih a? " a rawn ti tuar. 

"Pawi deuh chu i hming dik tak Police bula i lo sawi kha.. Kan inhmu vat dawn nia. Ka fa paitu chu neih ngei ka duh alawm" ka ti hmawk hmawk a. A off hmak. Ka call leh a, a busy. Tu emaw chu a va be ngei e. Zothana chu engkim ka hrilh ve ta vek a. Mak a tihzia a hmelah a lang chiang ngei mai. Kan ineipuar zawhah Jio office kan pan ding nghal a, kan number kawl lai chu pein a booktu address kan zawt a. Lalnunpuii, Ramhlun South a ni daih! Hehe.. A veng hming kha chu a dik ka ring chiah lo reng a ni. 

Thil thlen zel dan tur ngaihtuah chungin Zothana nen kan inthen ta rih phawt. Ke pen a zang duh hle. Zanriah kan la ei lo deuh tihin, Bella bawkin min lo call leh a. 

"Pa Thana te safe-a pawisa 30000 vel a bo a. Hei kan buai leh mek e. Buai zo law law ang" a rawn ti ta a. Ka khi suk. 

"A bo tih engtikah nge an hriat? "Ka ti a. 

"Ka ni rawn inbual khan ken tur lak a tum a. A hre chhuak chiah. A tek khawp mai. " a ti a. 

"Tu nge an rinhlelh? "

"Rinhlelh an la nei thiam lo.. U Tei te an ringhlel deuh mawni" a ti a. Ka nui hawk hawk. 

"Anih kan sa chan lai chu a che buai viau em? Vawiin chawhnu lam te" ka tih chuan, "A phi sek a. A chuak a. A lo lut leh thul. Tunah pawh inah a awm lo" a rawn ti a. 

"Bella, kan hlawhtling dawn e. Zaninah engkim a chiang ang" ka ti nghet charh a. Kan dah ta rih. Aruati te chhungkaw buaina chu a tuartu tan hrehawm viau mah se, keini a chhuitute tan hmanrua a ni zel si a. Buaina hi zo se, Isabella nen Lungleia zalen taka inchhai ka duh tawh. 

Dar 8 velah bawk ka phei leh a, Bella nen Damdawiin lam kan pan. Zuala pawh a lo tha viau tawh a. Pi Dini erawh chuan min lawm vak lo. An pawisa lo bo bawk nen, a mood chu a fuh vak a rinawm loh. Aruati erawh in lamah a awm thung a. 

Zuala bulah chuan ka va thu hnai a, "Engkim sawi vek law law mai tur alawm. " ka ti sup a. 

Min rawn melh hû,"I hria em ni? " a ti a. 

"Umm.. Ka hriain ka hria" ka ti chang rut. Pi Dini pawh a rawn meng relh relh. Bella erawh a ngawi ran a. 

Zuala chu a insehruh a. "Zawnga kha tenawm lutuk, ka nau a nih vang ania ka zep.. A mualphothlak em alawm. Mahse, in hrechhuak chu a pawi chuang lo e. " a ti rum hak a. 

Pi Dini chuan, "Eng maw? Eng nge insawi? " a ti nghat a. A meng rum al bawk. 

"I fapa Sanga ngeiin I fanu Aruati te inneih a kham thu mawle" ka lo ti hriam hraih. Ka zah duh tawh bik lo. 

A meng phawk kher mai. 

"Dawt a nih chu" a ti hlak a. Mahse, a a awm a nawm hmel loh. 

"A chhan diktak erawh kan la hre lo. Zaninah kan hria ang chu maw.. " ka tih laiin, Zuala chuan, "A chhan chu kei pawn ka hre chak khawp mai" a lo ti ve a. 

Zuala ka atang ngeiin Sanga chet dan kan hre ta bawk a. Kalh a kim ta. Ni e, Zuala khan Sanga leh Nunpuii inbe ru lai bakah An inphur lai a lo hmu a. A nau chu dawpin Sanga lah chu a lo inpuang mai bawk a. Mahse, Zuala chuan a nau thuruk puansak a hreh em vangin kut a tawrh phah ta hial anih kha.. Thil hi a lo mak thei khawp mai. 

A farnu neihchhun pasal nei tur tibuaia inneih thulhtir hial khawpa a chet chhan erawh tuman kan hre lo.. Pawisa bo pawh kha Nunpuii a pe ngei ang tih ka ring. Engvang nge? Eng tin nge he thil hi a thlen theih?! Amah Vanlalsanga chauhin a sawi thei ang chu.. 

(Ka dah. Ka tai a na)