Rosangpuia 2

ROSANGPUIA.. (2)

Ziaktu: Toni Râlte

(Adds kha ti leh ţan ang aw 😘

"In inhria maw? " ka ti sap a. 

Valpuia chuan, "Pune-ah khan kan inkawm nasa alawm. In inhre zawk law? " a ti a. 

Sangpuia chuan, "Keimah nen alawm kan chetsual, a zia lo tak tak a ni. Ka hrechhuak zawk, Dingpuii hi ni lawm ni i nupui tur kha? " a ti ta a. Ka lo inseh ruh deuh. 

Valpuia chuan laih hmel deuh hian, "Aa.. Ni tawh lo.. Kan thulh tih kha ka la hrilh lo che a ni maw? " a ti a. Rosangpuia makti hmel chu ner nâwng chungin ka lo thlir tawp. 

"A va zia lo ve aw. Aa.. Engpawhnise, thianpa, kan inhmu leh chu a lawmawm e" Rosangpuia chuan a ti nghut a. Valpuia chuan min rawn melh a, "I tha em? A la na viau em? " a ti a. 

"Ka tha alawm.. Hei" ka ti nghat a. Sangpuia chuan nuam a ti chiah lo nge, "Ka va chhuak rih ang e" tih leh thawh a rual a. 

"A tul kher lo" ka lo ti ram hmak. 

Min rawn melh haw a. 

"Inbe r'u" a ti sup a. A chhuak zui nghal. 

"Pawi hle mai. I ke ber kher a tliak chu" Valpuia chuan a ti a. 

"Nia.. " tih bak chhanna ka pe thei lo. 

"Min hmu hi i lawm vak lo tih chu ka hre tho a, mahse, rawn kan hram che ka duh si a" tîm deuh hian a ti a. 

"Inhnimhnaih fo loh a tha. Cindy ngaihtuah rawh" ka ti a. 

"Ani pawh a tha alawm. Taka ka nu te chuan nei turin min tia.. " ban chalh hian a ti a. Ka nui hawk. 

"Nei rawh. Nei lo la, i demawm zawk. Inmualpho vek tawh" ka ti a. Na erawh tlem a la awm. 

"Ka theih ka ring lo, ka farnu a ni sia. " a ti dek dek a, "I farnu i rai a nih chu" ka lo ti nghek. 

"Ding, engtikah emaw i hriatthiam beiseiin nghak ta che ila, ka hlawhtling ang em? " ngenngawl zet hian a ti a. 

"I hlawhchham ang" ka ti hmak. Ka kut ka hum ruh bawk. Ni e, he pa hi ka hmangaih, mahse, ka ring thei tawh lo bur. Min bum dan hi a chiangkuang mah mah em mai. 

"Mahse, Cindy chu ka nei chuang lo vang. Pasal i neih hma chuan nupui ka nei lo mai ang" a tih chuan, rum zetin ka melh a. "I thisen a sang mah mah a ni" ka ti sak. Lehlam ka hawisan ta daih a. Keimahin ka saisir thei si lo. Ring a kham duh ngei mai. Ka ngawih tak reng avang chuan a beidawng nge a kal ta hnu hnu a. Khawngaihna ka nei lo. Ani pawn Cindy a mutpui khan min khawngaihna a nei bik hleinem. 

"In inthen chhan chu engpawh nise, a pawi ka tihpui hle mai che u" Rosangpuia a ni. Ka lehhawi vat a. A ipte zen chungin a lo ding run mai. 

"Nang pawh hi lo kal reng a ngai lo. Nangmah vanga hetia awm ka nih hi. Ka hmu chak hran lo che" ka lo ti tâwn tâwn a. A khi suk duh chauh. Nurse a rawn kal a, drip a rawn khai a. A rawn kalpuinu chuan Rosangpuia chu a melh zawk zawk, an phei leh lamah an inhrilh ru a, an nui ar ar mai. An star chiang. A ho em mai a. 

"Vawiin chu ka rawn awm thei dawn lo che a nih hi.. Lo tha la aw.. " tiin ka biang a rawn chul thuak a, ka lo thle sawn vat. Rum zetin ka melh a, ka thinte hi a chhe hlur tawh mai. Valpuia'n ka mood a tichhe bawk nen. Ka u chiah nupui U Remi'n min rawn awmpui dawn a. Ani nen hian kum khat lekin kan inthlau a, nelawm leh nuih heh zet, huat lem nei lo, kan ina a awm lai pawha ka nu nen pawh invin phar nasa thin, an ina len luihtir ngai khawpa kan in nuamti a ni ve a. Min awmpui thei tur chu ka lawm ngei mai. 

Rosangpuia chanchin chu a lo hre zet mai. "A pa chu a boral tawh a, a nu hian pasal dang a nei a, Sangpuia hian a farnu a indanpui a ni. A farnu pawn pasal a nei tawh. Tunah chuan amahin a khawsa a nih chu.. Chuan, Zarkawta Gym lar zet saw a ta a nia, Aizawl mai ni lo, Mizoramah pawh a changkang ber ang tih theih tur 'Zo choka' Restaurant hi a ta a ni bawk. Tourist hip nan a tha tawp. Chutiang vel chu a nia, a luck ngawt ang luck pawh" a ti zat zat a. Mi naran ringawt a nih kha chu ka ring vak lo sa a, mahse, Zo choka neitu a ni tih ka hre miah lo. Gym phei chu ka ngaihven loh lam a nia, a nei thawkhat viau chuan ka ring. 

"Nupui a la nei lo mi? " ka tih chuan, "Nei lo chu a nih saw, amahin a awm an ti sia. " a ti mai a. Mak takin chu chuan ka awm a tinuam ve ringawt. Min enkawlna senso a tum tur pawh kha a tan chuan a na hran lo vang. U Remi vangin khawhar lo takin ka nileng thei ta a, zanah erawh U Ruati bawkin min riahpui ang. Ka nu han tih dawnin zingah khawsak rel a ngai si a, U Ruati erawh an hulhar tawh bakah an pa a fel em em a, kan dinhmun hriain min riahpui a remti a ni. Chaw pawh ka rin aia tam ka ei thei ta e. A na a rawn chhuak a nih ngawt loh chuan awm mai mai chuan a na lem lo va, zunram thiar pawh zakdawh tiang leh Ka u rinchhanin ka la ti ve thei zel a. Indian type comode ni se a buaithlak ve ngawt ang. Zana Doctorin ward a rawn fan hma siin, Sangpuia leh parka hmeichhia kha an rawn lang leh a. He nu nen hian an ni mawni le.. 

"Lo fimkhur deuh la chuan, nula pumpa ke tliak i ni lo mai tur a nia. A pawi ngawt mai" nula chuan a ti nghal ngawt. Ka û hmel nûr deuh chu mitmeiin ka khap a. 

"Ani hi fimkhur zawk se a tha tur" ka ti ve ngat. Sangpuia chuan, "Azuali a nih hi,. " a lo ti nghut. Ngaihpawimawh loh hmel zetin hmun dang ka lo hawisan daih. 

"In rawn lang leh thei a, a lawmawm. Hei amah pawh a tha tawh lutuk" Ka u chuan a lo ti vat a. 

"Nia, tihtheih kan nei lo bawk sia.. intha zel a, a lawmawm" Sangpuia chuan a ti a. Azuali chuan, "Tihtheih te chu i nei reng alawm.. Engkim i chawi vek dawn a nia" a lo ti rum ál a. A tawngkam mei nei hlek hlek zel chu ka ngaithei tehchiam lo. 

"Enkawlna man a tum loh ten" ka ti a. Ka zun a chhuak nen, ka u chu ka hrilh a, ka tiang chu a rawn dah hnai vat. Rosangpuia chuan, "Khawi keiman" tih leh min kuah a rual a. Hnial ka duh viau naa, Azuali mitmenga thikna ka hmuh avang khan ka hnial lui duh ta bik lo. Toilet lam panin kan inkuah phei a, kawngka a hawng a, ka zun mek laiin, "I thinchhe ve hlek hlek ngawt mai" a ti sup a. 

"I bialnu saw a cheap si" ka'n ti tâwng mai a. A nui huk chu ka hria, "Bialnu a?! Ni lo hram teh se aw" a ti duh lekfang a. A bialnu anga a sawi lo pawh chu a nuam ve deuh. 

Kan inkuah luha khuma min muttir mek laiin, "Kal tawh mai ila, kan tlai ang. Hei a that reng hi" Azuali chuan a ti a. An chhuak tur chu ka u chuan a va thlah ve a. Ruak huaia ka inhriat tlat ni. Ka tenawm roh mang e. 

Mut chhuak a bo deuh a, ka phone ka khawih mai mai. Whatsapp-ah, "Lo dam tha zel rawh aw. Thinchhenu" tih ka dawng hlawl. Ka ner sak. Rosangpuia a lo nia! A dp-ah naute duhawm deuh mai a hmang a, a va cute tak. 

"I dp hi i fapa mi? A va cute ve" ka va ti tha ve mai a. 

"Ka nau fapa a nih hi.. Duhawm a nia. A pu a chhun a, a hmeltha" a rawn ti duah. 

"I chhe em mai a" ka ti leh hmiah. Chutiang chuan thu ho mai mai sawi chuan kan inbetui ve hrep mai. Khawhar pawh ka hrechang vak lo. Valpuia msg pawh a awm a, mahse, ka seen ta lo law law. 

Kar khat kan awm tling lo deuh tihin, in lama inenkawl kan dil a. A buaithlak ve em a ni. Ka u te tihbuai reng an ngai sia, a inthlahrunawm. Inah chuan ka vahpa bakah ka u pawn min buaipui thei ang a, ka nu pawn zan lamah te min vil thei ang. Kan chhuah ni chuan Rosangpuia pawh a rawn lang a. Bill a rawn pe ta vek. Ka nu inthlahrung chuan zat leh zat talin a ti naa, tihluih chi a ni lo. Ka awm man bill a sang viau lehnghal. Mahse, a hausa tho lawm ti tawh mai ang. Kan inphur tur chu min rawn vuan a, "In lamah pawh ka rawn kan thin ang che" a ti nghut a. Ka nu te ka hmaizah ve deuh nen, "Aw le.. Nia" ka ti liam puat. Tikhan ka hawnsan ang a, kan inhriatzui ka ring tawh lem lo. Ama lam a buai ve thei bawk nen.. Kei lah awm ve tawp tawp, mi va ngaihsaka va ngaihven hurh chi ka ni lem bawk si lo va. Mahse, a lo leng leh tak tak tho maithei ni. In han thlen chu a nuam angreng. Mahse, ka che thei si lo lai chuan min intithlahrung dawn dawn a. Tiang rinchhan chuan ka sawt boh boh thei naa, han chetpui ngam a la ni meuh si lo. Ka nu lah nitin office a ngai a, ka u hi kan veng chhungah tho, Schoolah a inhlawh ve bawk si. Ka vahpa lah school a kal nen, ka pa chu a hna ngai ram lamah a liam nitin leh bawk. Ka nu chuan min ngaihtuah ta deuh nge, ka chhuah atanga ni 3-na tlai a rawn bang chu awmpui a rawn la ta ringawt. Tleirawltê mai, hmel fel ving veng, ngo angreng tak a ni a. A hming chu Rami a ti mai a. Ka nute office-a thawk ve tho a thiannu hian a thenawmte awmpui retheihzia leh an tihduhdahzia, awmpui atana la tu dang awm se a duhzia a lo sawi fo a niawm e. Ka nu chuan lo ngaihvenin, awlsamtêin tihian an va inhruai chhuak thei ta mai a ni. Chhim tawp lamah daih an khua a awm a. Pa a la nei naa, nuthlawi zu zuar a luhkhungsan tak avangin chhungkhat belh tur nei ta lo chu a pa thian pakhat hian Aizawla a thiante awmpui atan a biaksak a. Ani khawpuia awm chak ve nafam chuan a lo aw ve hmiah mai bawk nen, A pa lahin zu bak ngaihtuah a nei si lo va. A nau mipa leh a nu hi kum zawn deuhthawin an boral a niawm e. Chutiang teh nuaih an nih avang chuan Aizawlah chuan mi awmpuiah a rawn tang ta a. A beisei leh duhthusamte erawh an thamral zo ta. A awmna te chu ama sawi danin, "Pa ber zu ngawlvei niin an nu lah chu inchei chiah atchilh, an fate la te ve tak tak pawh ngaihsaktu nei lem lo va mahnia tal ve tawp tawp an niawm e. Chung karah chuan hlawh mumal pawh inpe thei loin an inhrawn ta a. A pi chu mi tirh a hrat leh a thinchhe deuh tih mai loh chu sawiselna tur vak a hre lo a. A thatchhe em em tih a ni mai. Pa ber erawh zu a ruih tawh chuan âng reng mai, a hmuh hmasak apiang khawih tum mai chi a niawm a. Amah Rami ngei pawn vawiduailo a kut a lo tuar tawh a niawm e. Chuvang chuan mi dang ina awm chu a chak ngawih ngawih mai a ni. "

A tangkai kher mai. A mawng a zangin tihtur hrilh hranpa a ngai lo reng reng. A eisiam pawh a tui reuh phian a. Kei nen phei chuan nitin inawm ta na ná na chu kan innelin, a chanchinte min hrilh ve keuh keuh thin. Ka thawmhnaw hak tawh loh te ka han pe khawm a, a mittui te a tla! Rami atang hian ka vanneihzia ka hre thar. Chhungkaw pangngai atanga ka piang leh seilian hi.. 

"U, Mi pakhat a lo kal a" chawhnu fehrehsan awm vel, ka inbual zawh hlim deuh chauh a ni. Tiang nen ka sawt phei auh auh a. Living roomah chuan Rosangpuia a lo thu khar mai. Rose par senduk bawr nalh zet a keng ran bawk. Pangpar ka ngaina tih a hria nge a rawn keng risk ve tawp ni. 

"I lo kal law? " ka ti ringawt a. Ka chhuah hnuah pangngai taka a hrana han inbiak kan nei leh ta lo va, amah a online vak ngai lo nen, tin, va biak hmasak ka tum lo hul hual. 

"Aw.. I chhuah ni tukah khan ka zin thut alawm. Ka buai ve deuh a, biak pawh ka rawn be tha hman lo che a nih kha" a ti ve luam a. 

"Hna thilah mi? " sawi tur ka hre vak lo. 

"Umm.. District dangah inbun ka tum ve leh sia.. Chung vel chu" a ti ve mai a. 

"I va'n hausa" ka tih chuan min rawn melh nghek. 

"I va chimawm e aw.. " a ti hmuk a. Ka nuih a za thung. Rami chuan thingpui a rawn dah vat a, he nau hi chu a fel a ni. 

"I dam veleh zanriah kan ei dun dawn nia" a ti a. 

"I restaurant-ah maw.. Vawikhat mah ka la chawl lo a. Ka ei ve chak" ka lo ti hmanhmawh. 

"Hmm.. Ka eisiam ngei zawk le, ka inah " a lo ti thlup. 

"Ka zak e a" 

"I kum milin khawsa ve teh" 

"Ka kum i hre lo"

"Ka hria.. " tih pahin min rawn melh váwt vâwt a, a melh chu na siin a thúk riau. 

"Tak taka nia.. Dam phawt ila" ka ti a. 

"Dam har tawh lo vang.. Mahse, ke hi chu enkawl uluk a ngai em a.mahse maw, dik tak chuan… " a tih mek laiin a phone a ri a. A zu bih chu a ner sak, a la ta tho a. 

"Aw.. " a ti nghet churh a. Lehlam tawng ka hre thei lo. 

"Ka hman lo ka tih kha. Bakah ka hne rih.. Keimaha awm ka duh" a ti nghut a. A dah daih. Ka lo melh reng a, min rawn melh zawk chungin, "Mipa hi chuan hun thawl kan mamawh ve thin a" a ti a. 

"Ka zawt che mi? " ka nghal a chhuak leh tlat. 

"Mahse, i bula awm chu nuam ka ti.. " a mi chhan dan chu ka rin loh lam lutuk a nih vang nge ka thingpui in ka hak phah. Ka khuh thawt thawt a, tui a va la vat. Min intir a. Ka zak angreng. 

"Mak i va tiawm ve.. " a tih chuan, "Mak e. A mak lo mi? " ka ti nghek. 

"I va thinchhe tak" a ti hluk a. Ka lo ner khum. Mak ve deuh chu, mi dang tan chuan a uap a na viau ang a, a zahawm riau bawk ang. Mahse, kan intawn danin a zir lo nge a bulah ka danglam lem lo, ka sawi awmzia chu a pawisawi hlau run emaw a mitmei veng run emaw ang khan ka awm lo. Ka vin hrep ringawt zel a, ka ngam ve em em tawp chu ka ngeiawm ve ngawt ang. Mahse, min ngei em em lo chuan ka hria. 

"A mak hleinem. Mipain hmeichhe bula a sawi tur ka sawi ve a ni mai a" a ti a. 

"Tak taka ti daih ila, Valpuia te nen khan in inkawm tam em? " tiin topic thlak ka tum a. Valpuia hming ka sawi ruala a mitmeng inthlak chu ka hmu thei. 

"Tam ve thawkhat, ka in luaha a rawn riah hi a tam zawk ang" a ti tha ve mai a. 

"A lerh em? Chung lai chuan" ka ti leh hram. 

"Lerh hran nang. Hmeichhia a ngaihsak vak lo kha mak kan ti zawk. In inzui hnua i thlalak hial kan thianho groupa a rawn dahte khan mak kan lo ti ve tawp, a serious ngai si lo va" a ti ta duah a. Ka thlalak a lo hmu daih tawh tihna a nih chu. 

"Kan inthen chhan kha i hre tawh ang tiraw? " ka ti dat a. 

Nuam ti vak lo hmel hian, "Umm hre nel nual.. A zia lo khawp mai" a ti sup a. 

"Aa.. Pathian ruat a ni mai. A tha vek.. Sawi tawh lo ang" ka ti sawk sawk. A rum nghut, "Nangman alawm sawi hmasa" a ti a. Ka nuih tlawn titih. 

Thingpui a in zo a, Rose par kha ka lamah rawn dah hnaiin, "I ngainat ngei ka beisei" a ti a. Lawm takin ka lo dawng. A rimte chu ka hnim vang vang mai. 

"Ka lawm e" ka ti sap a. Sana a bih zauh, a ding hluai a. "Meeting ka nei a, dar 4-ah.. Ka kal phawt mai ang. Lo tha zel rawh. Chanchin ka rawn zawt thin ang che. " tiin min chhuk melh run a. Ka lo bu ve nghat. 

Rami'n kawngka thleng a va thlah a. Ka bula a awm hnua a kal chiah hian ruak riaua inhriatna ka nei ve ziah. A mak tak tak a ni. Rami chuan no rawn seng pahin, "Ka hria, kha pa kha.. Ka hmuh tawh hnu a ang ka ti reng a" a ti a. 

"Khaw nge i hmuh? " ka lo ti var. 

"Ka awmna hmasate kawmthlanga an nula a rawn thlah lai ka hmu thin. An inhmeh ka lo ti thei tawp.. An hmeltha dun sia" a ti ta a. Ka lo na ve ringawt! 

"Tu nge chu nu chu? " ka ti vat a. Ka rin aiin ka tawng chak. 

"Tu nge kha aw.. Ih.. E aw.. Azuali an tiin ka hria. A hmeltha a, mahse, an awmpui ve tho nen vawi khat ration kan lak dun tumin a rel hrep tawh, sual si, chapo si, thatchhe si a ti zêk a. Mak ka ti rap" a ti leh mawlh mawlh a. Nia, mi inngaitlawm tak zawng niin ka hre lo kei pawn. Rami kal hnu chuan thutthlengah duhdah deuha muin phone ka khawih a. Kimi hnen atanga ka msg dawn chuan min la tina ve zawk thei, "Mate, Valpuia leh Cindy chu an innei dawn ta a niawm e. A tha daih zawk. Ka rawn leng hman tep.. Kan buai ve rih em a ni" a rawn ti a. Nia, Damdawiinah khan zan khat chiah min riahpui hman. Vanduaithlak takin a putea kha a boral ta si a, chu lamah chuan a buai a ngai ve bawk nen, kei pawn ka phut hran lo, ka pui ve thei lo chu hrehawm ka ti mah zawk. Valpuia leh Cindy an innei dawn.. Innei tura ka duh tehlul nen, a taka an tihhlawhtlin dawnah meuh chuan, tawrhna bawk ka hmachhawn leh ta. Ni e, hmangaihna hi vawi leh khatah a bo thut thei si lo va. Valpuia ka lo duhna leh hmangaihna te kha zawi zawia hunin a liampui tur a ni si a, thîkna rilru bakah mahni inkhawngaihna thlengin ka nei lo thei lo. Ka chan chu chhia ka tiin tlawm ka inti a, an inneih leh ngat phei chuan mi dangte pawn min nuihzat turah ka ngai tawp. Ka zak a ni. 

Cindy status tum loh deuhin ka view-sak zui a. Valpuia nen an inselfie-na chu hmangin, "A tawpa tawpah chuan, mualpho man a awm nge nge dawn e" tih caption-ah a hmang a ni. Hmeichhe nasa tak chu ni ila zak thei lo ka tiin chutia statusa a hmang ngam chu ka deusawh maithei. Mahse, Cindy nen hian kum eng emaw zat kan lo inzui kual ve tawh a, hmeichhe zak thei lo leh pawisak nei miah lo a nih lohzia ka hre ve tlat. Mi luhlul tak, a duh tawh chu neih tum bur ang chi kha a nia. Vawi khat pheikhawk a ngen a, 7500 man lai a ni si. A chhungten an pe phal meuh si lo, a nu chabi kawl lai ru chhuakin an safe a hawng a, pheikhawk man ngawr ngawr chu a ru chhuak hmiah. Chutiang taka mi tumlum a nih avang chuan, Valpuia neih a tum ngar ngar pawh hi a mak hran lo. Thiante tana inpe zo leh thil phal tak, rualkawm thiam tak a ni bawk. Ka thiantha a lo nih tawhna chuan amah bei let thei lo turin min phuar ka ti dawn nge.. Ka tana a hlutna leh thatna zawng zawngte kha chuti maiin ka nem liam thei bik lo. Ani chuan zah leh tlangrel bakah mualphona, kei a thiannu ngei mai pawhin hmelma anga a en kumkhua theihna tur thilah tum tlang takin a kal a. A hmangah Valpuia chu a hlawh chhuak ta reng a nih hi. Lawmpuitlak a ni. Mahse, ka lawmpui lo vang. Valpuia pawn msg min lo hnutchhiah leh a. An innei dawn tho a tiin ka chhiarsak hram, "Ka beidawng ta sia.. I duh dan ang takin Cindy chu ka nei mai ang e. Lo hlim zel ang che" tih a ni. Min dek ve deuh.. Mahse, intihpaukhauh hun lai a ni a., ka reply duh lem lo thung. 

Zanriah kan ei laiin an inneih tur thu ka sawi chhuak a. Ka u pui roh chuan, "I tuar viau em? " a ti a. Ka nui hawk. 

"Innei law law se ka tan a nuam zawk" ka ti a. Ka nu chuan, "I hliamte han dam felin han chak thar leh la, i pute khuaah i han zin khawthawng daih dawn nia" a ti a. Min khawngaih lo se ka duh. A nuam lo zawk. Rami pawn ka hrilh vangin engkim a hre vek tawh a, min khawngaih hmel thei lutuk. Dar 8 velah room lam ka pan a. Ka khawvel a la zim viau naa, damdawiin ai chuan nuam ka ti tho mai. Rami a awm tawh bawk si. 

Rosangpuia'n min lo call.. Ka pick up rualin, "I mu mi? " a ti a. 

"Mu angreng" ka ti ringawt. 

"A va buaithlak. E taka! Valpuia te kha an innei dawn asin" a ti a. A sawi chu a inchhir deuh nge.. Ka tawng hma hmain, "Aa.. Ka sawi ve mai mai. " a ti a. 

"Ka hre tawh alawm. A ho em mai. Innei rawh se" ka ti a. 

"I tha tiraw? " min ngaihtuah hmel deuha a tih chuan ka no deuh tlat! 

"Ka tha alawm. Min ngaihtuah suh" ka ti a. 

"Naktukah eng nge ka lo ken ang? Ei chak i nei em? " a ti leh daih. 

"I lo kal leh dawn mi? A ngai lo" ka ti vat. 

"Tihtur em em ka nei lo alawm. Kan hna kal lai hi nghah a la ngai sia.. Ee.. Ka hria, ka vah harhpui ang che. I tawm rei tawh sia, i ning ang" a ti hluai a. A naupangchhia thuta ka hriat chu.. 

"Hmm.. A ngai lo.. Ka peih lo" ka tih chuan, "I peih. Chawhnu lamah ka lo kal ang" a ti nghet charh. Hmeichhe aw hian, "Ee.. Khatah law i lo awm.. Tu nge i biak a? " a rawn ti a. Ka ner sak. 

"Tun ang huna ka biak chu a pawimawh tihna a nia.. Min nghak thei ngang lo em ni? " Sangpuia'n a tih hráwk chuan nuam lo ka ti lutuk a, ka dah ringawt. A rawn call leh ka ring a, mahse, a rawn call leh miah lo, ka hrilhhai lek lek. Tu tak ni ang maw? Khawiah nge maw an kal reng reng ni.. Aa ka ngaihtuah tur a awm lo chiang e. Ka laka a inthiam loh vanga min ngaihtuahtu lo ngaihven chiam chu ka tlawmlak zawng tak a ni. Chuvang chuan Groupah kan thianhoin kan nawi leh vak vak a. Cindy te inneih tur vel an sawi leh bawk, "Kal ve ang u aw.. Dingi chu a thei dawn lo a. Keini tal va lang ve ang u" Teteii chuan a rawn ti a. A tha ka ti. Thianho vek kan nia, ngaihthah ringawt kha a mawi lo. Amah Cindy tak pawh a lainatawm. Kimi chuan a hreh viau naa, kan nawr tlat a, a pawm ve thei hram. Rosangpuia chungchang an sawi leh a, Min rawn kan khan an hre ve vek a. A chanchin pawh kei aiin an hre thui mah zawk awm e. "Ding, nihpui la, mi hausanu i ni mai. Tumah hrawn an ngai dawn bawk si lo. Hlep hlang "Zami'n a rawn tih chuan nuam lo ka ti nasa. 

"In va á tak, bialnu class deuh a nei alawm. " ka ti a. Mahse, IG velah an lo follow ve thup a, single anga a lan tlat vangin ka sawi an awih lo. Kei atak pawh chuan a dik leh dik loh ka hre lem lo. A chungchang sawi hluai hi keimahah inthlahrunna a awm thin. Valpuia nen kan inthen fel hlawt a, mipa dang ngaihsak vût anga lan kha ka zak.. 

A tukah ka inbual hma deuhin Rosangpuia chu a rawn kal tak tak.. A va á tak. "Ehe! I la inbual na nge? Ka chhuahpui dawn che ka tih kha" tlangnel zet hian a ti a. 

Ka lo melh run run ringawt. 

"Va inbual la.. Ka lo nghak ang che" a ti a. 

"Khaw nge kan chhuah ang a? " ka ti hlar a. 

"A tam mai. Khua kan chuan dawn nia" a ti awlsam ët a. A lo kal tak siah chuan han hnar hlawl kha nuam ka ti chiah si lo va. Ka inbual ta a. Rami puihna ka la mamawh zel a, ka ke veilam tliak lam chu ka la rap ngam lo hrim hrim a, ding lam hmang hian ka bai auh auh thin. A chak tha viau mai. Thawmhnaw pawh simple të ka ha a. Ka inchei vur peih lo. Veranda-a kan din laiin, "Rami, a tiang kha chu a tangkai dawn lo. Car kawngkhar saw va hawng la a tawk" tih leh min pawm a rual. Ka phu uih mai. Min zo hnehsawh nasa si. Tuman min hmu lo chu ka lawm ngei mai. Kan tlan mawp mawp a, A dawrah a peng zuai a. Kan tlan lehnghal. Durtlang lamah min chhohpui a, boruak pawh a dai sawng sawng mai. Ka la kal ngai miah lohna hmunah a ding a. Phul hmun zau vak lo a ni a, thlifim a thaw heuh heuh a, nuam reuh lutuk. Min pawm chhuakin rem takin min thuttir a. Aizawl veng hrang hrang chu a lang iar mai. Ni a sa lem lo bawk a. A tawk khawp mai. 

"A va'n nuam reuh" ka ti hlawl a. 

"Ka sawi reng kha.. He lai hmunah hian ka nawmsam loh leh inthlahdul ka mamawh chang apiangin ka kal thin" a ti sup a. Ka va melh a, a thutak viau mai. 

Sawi mai tur ka hre lo. Amah tho chuan, "Nizan khan ti nge i dah kher a? " a ti nghut a. 

"I buai hmel em a" ka ti a. Ka tawng elsen miah lo. 

"I pawimawh a, ka bia che alawm. Ka buai chuan ka reh thin" a ti a. Lungawi vak lo te pawh a ang. 

"A ho em mai. I bialnu khan min thik ka hlau alawm" ka inrin hmain ka ti thawt thawt a. Ka phut zawkna tur thil a rawn thleng ta a, hmalam hawia ka thu lai chu min kuai her sawk a, ka hmuiah tak a rawn fawp siah mai. Ka meng phawk kher mai. Rei erawh a ni lo. 

"Bialnu nei lo mipa i fawp zo chiah" a ti nghut a. 

Rum zeta melhin, "I va zak lo ve a. Nge min fawh ve ngawt a. Hmela, ka damdawiin awm man i chawi avang khan ka lakah thei ta viauah inngai suh. Haw ang" ka ti hlak hlak a. Ka thinrim tak tak. Min ngai easy niin ka hre tlat. 

"Tihpalh. Ka tum lawk a ni lo. Vawikhatmah i hming a nih loh chuan bialnu tih thu sawi tawh ngai suh. " harsa tih hmel zet hian a ti a. Hmalam a thlir vang vang. 

"Ka haw dawn" tih leh thawh ka rual a, karei! Ke tliak ka ni tih ka intheihnghilh nia! Ka rap a nih chu! Ka thu hnawk a, ka rak thawt. Min rawn pawm chawt a, "Mawl lutuk.. Thinchhiat vang a nih kha.. Khaw maw" tih leh ka ke en a rual nghal. A zut pah bawk. A kut dam thlupin a na lai a zuk tawh chuan a sa hat hat mai. Ka mittui tling pam chu min melh chungin, "I phalna lo chuan ka fawp tawh miah lo ang che. Khati taka i thinrim ka ring lo a. Ka tihpalh.. Ih.. Englo.. Valpuia" a tih mek laiin, phone call a dawng leh.. Phun hluk chungin a la a. "Aw tihbuai ka duh lo ka tih kha.. " a ti ram hmuk a. Ka lo en reng ringawt. 

"Eng a?! " a tih haw lai chuan ka lo hlauthawng ve ringawt. 

A phone dahin min pawm lawp a, carah min dah lut. Ka hrilhhai takzet. A rawn thut luh hnuah hmalam melha thaw hawkin, "Azuali'n thih a tum a" a ti sup a. A mitmeng atang chuan Azuali chu a lainat nge a ngei tih hriatthiam a har khawp mai. 

"Engvangin nge thih a tum a? " ka ti a. 

Min rawn melh vung vung a. 

"Nangmah vangin" a ti ro hulh. Ka lo melh haw ringawt..