Rosangpuia - 1

ROSANGPUIA.. (1)

Ziaktu: Toni Râlte

Ka pasal hual chu ka melh tlawk tlawk ringawt. Ani erawh chuan tukverh lam a hawi daih thung. 

"Thil thleng hi a dik lo a ni. Engmah hi a dik lo" tiin ka thu hnawk a. Min rawn hnaih pawh a tum chuang lo. Hrehawm erawh a tih ve hmel deuh. Ni e, ti tur a ni alawm. Kum 2 kan inngaihzawn hnuah inneih zai rel tumin hma kan la ve a. Kan inneih hun tur thla khat lekin a dal tawh tihin, thu rapthlak tak ka hre ta anih kha. Aw a dik, ka pasal ni mai tur Valpuia chuan a nî fanu lakah fa a nei tlat a ni! Hei hi a mak lo a nih chuan kei chuan thilmak dang ka hre hauh lo. A ni fanu Cindy leh kei hi best friend kan la ni lehzel a! Thiana hman ka tum nghe nghe. A rapthlak tiraw? Valpuia nen hian Cindy atanga inhriaa inngaizawng chho ta kan ni. Amah hi class xii a pass hnuah phai lama hun hmang ta char char a nia, Kei leh Cindy erawh Mizoramah zirna chhunzawmin nikumah khan M. Sc(Geo) ka zo ve hlim hlawt a ni. Hna erawh ka la nei lo va, Valpuia erawh hna nghet nei a ni tawh a, keiin hna ka zawn ve chu a remti vak lo. A zirna a zawh hnua a rawn haw hlimin Cindy te inah chaw ka ei a, ani pawh rawn kal vein ka bula Cindy hian a hming a sawi zin em vang leh a chhuan ve em vangin a hming chauh zawng ka hre tawh. 

A taka kan han inhmuh takah chuan pa ka tiin, ka mipa duhzawng tak a ni tih ka hre nghal thlap. Kei aiin a sang viau a, thau ni si loin a palian. Hmeltha thlawt tia han sêp zui chiam chi chu a ni lo maithei. Mahse, min hîpna riau a nei, a bula awm a nawm piah lamah titi tur a hria a, kan sawi duhzawng a inang bawk. 

"Ding, Valpuia khan a star tlat chein ka hria. Ka bulah chuan a la sawi chuang lo naa" Cindy msg chu ka chhiar nui vur vur mai. Mahse, "Awihawm loh em mai" ka ti thung. Kei hi Rodingpuii ka ni a, Dingi emaw Dingpui tia koh ka ni thin. 5'4ft ka ni a, ka te chhe hran lo, mizo nula angah chuan. Ka ngo em em lo thung, háng tak erawh ka ni lem lo. Ka vun a rualin a mam a, an awt fo zawk. Ka sam a sei mawi tawk a, ka tidanglam ve tehchiam lo. Incheina lam hi ka ngaihthah rei angreng a, ka harh meuh chuan ka rualpuite chu an nalh tawh hle. Unau pali kara a naupang ber niin, ka u chiah mipa hi nupui neiin kan thenawm lawkah an indang ve a. Chumi û leh chiah mipa erawh an nu nen inthenin an fapa erawh kan bulah a khawsa thung. Kan upa ber chuan pasal a nei tawh a, kan veng thenawmah an khawsa. Ka nu hi Department pakhatah Director niin, ka pa erawh chuan hnathawh a nei lem lo. Mahse, Lungdai lamah huan a nei a, a feh tlut tlut mai a ni. Pa taima rumrut ang kha a nia, In lamah a hun a hmang tam lo khawp mai. Ka nu hi a hne nei zawk mah nise, ka pa hi a thaibawih lem lo. Ka nu fin vang a ni pakhat bawk ang, ka pa a zahthiamin a hlau thiam bawk a, a duat pawh a duat. Ka nu ang hi nih ve ka chak thei tawp. 

Ka'n peng thui deuh a. Ni e, Valpuia nen innei mai tawh tur kan nih laia ka thil tawn teh hrep chu âtpui tham a tlingin ka hria. Rinhlelh lawkna ka nei ngai miah lo kha ka mawl nge an fimkhur zawk? Palai a rawn tirh khan ka pa chuan min la ui ve a, naupang ber ka lo ni bawk nen. Mahse, ka nu zawkin, "An inzui nasa ve sia, mualpho a hlauhawm.. Bakah kan dampui reng dawn lo va, pasal tha tak a mamawh" tia a nawr vangin kan inrem ta kha a nia. Valpuia te chhungkua nen kan khawsak dinhmun a inang viau. Keini ai chuan an sang hlek mahna. Kan inneih ka huphurhna ber chu Valpuia farnu pahnihte leh a nu te an ni a. Nia, thiantha ten, "Ka huphurhpui che, a nu saw chu a zia maithei. A farnute saw an lal ve lutuk a, a nu saw an thu thuin an dah" tia a thim zawnga min sawipui thin vang a ni pakhat. Mahse, amah Valpuia ber hi chu an hlau thiam ve angreng a, chu chu ka inhnemna a ni mai e. Cindy rai thu ka hriat khan mak ka ti em em lo, bialpa nghet nei a ni miau a. Mahse, a fa paina ka hriat takah chuan ka kehdarh a ni mai e. Thla 3 zet a lo pai tawh vangin an lo inthup rei ngar ngar hle a niang e. Ka hriat ve meuh chuan mi zawng zawngin an lo hre tawh zawk a lo nia. Ka û leng lo hawin, "Cindy raina pa hi Valpuia an tia.. I hrechiang em? " a ti ta mai a! Kan phâwk hlawm viau mai. Kei chuan rinhlelh ngaihna ka la hre lo cheu! 

Ka nu chuan, "A va mak awm ve le! Unau an ni sia" a ti hliai a. 

Kei chuan Valpuia number ka hmet chhuak nghal. A ring ral thak. Cindy ka call leh. A la ta hram a. 

"Ka thu hriat hi a dik em? " ka ti nghal tâwng mai. A ngawi deuh dat. 

"Ding, min ngaidam rawh" a ti tham chhal a. 

"Thudik maw a lo nih a? " ka ti tuar a. 

"Aw.. Pawi ka ti lutuk" a ti hráwk a. Phone ka off nghal. Ka khur der der mai. Ka chhungte chuan min en thap. "A lo dik anih chu" ka ti zawi sap a. Roomah ka lut nghal. Ka pa leh Valpuia pa inbe thawm chu ka hre pha. Ka pain a va call nghal a ni ngei ang. 

"Hetianga intih chu a intham loh thlak mang e, amah Valpuia pawn thudik rawn sawi tur a nia, thupha te pawh a rawn chawi ve tur a nia. A inzah loh thlak khawp mai. Ka lung a awi lo takzet a ni. " ka pa thinrim hi chu a aw a dam thlup zawk thin. Lehlam thusawi ka hre lo. Valpuia call ka dawng a, harsa ti zetin ka pick up.. 

"I hre tawh maw? Ka tihpalh aw. Ka sawi ngam ngang lo a ni" a rawn ti a. 

"Zawnga" ka ti tuar.. Ka sa vek, ka tah pawh a chhuak lo, ka thinrim lutuk. Ka so bulh bulh a ni ber mai. Phone pawh ka dah zui nghal daih. Zankhuain ka muhil lo. Thil thlen dan chu mak ka ti ëm a ni. Awih harsa ka la ti tho. Cindy nen min prank a nih ka la ring fan a, "Kan tihder che nih kha" an rawn tih leh thut te ka beisei! Mahse, an reh tlawk tlawk si. A tukah Valpuia nen kan inhmachhawn ta a. Hmaichhana sawi dun a ngai tlat a ni. 

"Engtin nge? Engtikah nge? " tih chu ka zawhna a ni. 

"Kan tleirawl chhuah tirh hian tum loh deuhin kan chesual a. A virgin hawngtu ka nia. Mahse, inzawmna kan nei zui lem lo. Unau kan ni bawk a. Mahse, Cindy thinlungah ka lo la thi thei lo nge, nangmah nen kan inzawm atang khan ngaihbel theih tur hian a thikna che a tilang zeuh zeuh a. Ka bulah rêl ni chiah si lo, mahse, fakna lam ni lo tih hriat taka i chanchin sawi te a ching a. A bialpa aiin min dah pawimawhin ka sawm a nih tawh chuan a bialpa nen an awmdun lai pawn min zui nghal thei. Tichuan, inneih hial kan sawi takah khan a rilru put dan zawng zawng a rawn puang ta a. A thiantha ber i nih ve tho si avanga hrehawm a tihruk theihzia te, a û ka nih vanga a inthunun nasat theihzia te.. A tam mai. Thla thum liamta khan zan khat chu tap chungin min lo call a, a bialpa nen an inthen thu leh zu a in thu te a rawn sawi. Ka nau a nih anga ka mawhphurhnaa ka ngaih vangin ka va hruai a, a lo rui hle reng a. Hruai hawn ka tum chu motor tiding turin min ti a. Motor chhungah ngei chuan min nawr ta a ni. Mipa ka ni a, tleirawl laia kan sulhnute kha ka la theihnghilh bik lo nen, kan chesual ta a ni. 

I lakah ka inthiam lo a, amah Cindy tak pawh ka lainat. Chuvang chuan inthiarfihlim zel ka duh ta a. Mahse, a mak lutuk, Cindy chuan hun remchang a hmu thei hle a ni. Vawi hnih lai kan chesual leh ta a. Nau hial a pai ta kha a nia. Nau a pai tih a inhriat hma khan a bialpa nen pawh an tha leh ta a, mahse, engkim a buai leh ta vek chu a nih hi.. Ngaihdam tlak ka ni lo tih ka hria. Thil kha duh lo tak tak ni ila ka hnar thei, tihpalh thilthua thleng a ni lo bawk. I thutlukna apiang ka pawm e. Mahse, Cindy chu ka nei thei lo vang. Ding, ka zakin hrehawm ka ti ve takmeuh a nia.. Ka zah ngawih ngawih che. A theih chen chen thup ka tum a, mahse, Amah Cindy hian thudik a puangzar ta si a, ka khap thei ta lo a ni. Pawi ka ti lutuk" tih chu chhanna ka hmuh a ni. Thil tam tak ka hrechhuak nghal bawk. Ni e, Valpuia rawn lan atanga Cindy danglamna te kha a unaupa a nih vangah ka lo ngaihsak mai zel a. Valpuia nen kan chhuah apianga lo tel ve a tum ziah zelte, Vawikhat kan intihthiam loh tuma then mai tura min nawr te, a status-ah Valpuia a lan zin ziate.. A tam mai. Ngaihbel nachang ka lo hre ngai miah lo. Ngaihbel kha a har ve bawk a, cousin an ni miau si a. Tiang hi thleng thei pawha mawi lo a ni asin. A virgin hawngtu a unaupa chu a lo duh hle a nih dawn hi.. 

"Aw le, engpawhnise, tihian kan inkar chu tawp mai se la, inneih pawh thulh a ni mai.. Cindy avang pawn ka nei thei lo che. " ka ti ta a. A thaw hawk. Ka khawngaihna a ngen ngam lo va, mahse, ka thutlukna chu pawm harsa a ti tho si. Kan inngaihzawn chhung zawng khan hmeichhe laka han rinhlelhna tur ka hmu ngai lo, mipa lerh tak niin ka hre lo. Keimah zawk hi ka ex ten min rawn biak zeuh zeuh avangin a thinrim thin. A phone ka khawihsak pawhin rinhlelh tur ka hmu ngai lo. Cindy nen sex an lo hmang kha ka tana Pathian remruat zawk pawh a ni mahna le.. Lo innei ta tehreng pawh ni ila, Cindy hian bansan thei lo ta se; pasal uire ka nei dawn tihna a nia. Kan innei hman lo chu na teh mah se; ka tana chunglam rel a ni tih ka pawm a ngai tih ka hrethiam. Tunah erawh ka pawm thei rih lo. Ka nat chu thuhran, ka zak êm em a ni. Pasal hualin sâwn a thlaksan, a thiantha ber nena an thlim ruk thin hmeichhia nih chu tlawmah ka la nge, ka zak a, ka na a.. Ka thinrim bawk. Valpuia nen kan inkar chu ka titawp fel ta a. Inneih pawh kan thulh fel ta bawk. Ka thutlukna chu ka chhungte pawn min pawmpui thlap. Ka pa phei chu a la thinrim hle. 

Kar hnih chhung chu pawn ka chhuak ta lo. Khawm pawh ka inkhawm ngai lo. Tumah ka hmu ngam lo a ni ber. Ka tap thei ta bawk a, zan tin hian ka tap thin. Ka chhungte pawn min hrethiam hle, eitur erawh ei tha turin min fuih reng a. Valpuia te chanchin chu ka duh vang pawh ni loin ka hre leh thin. Valpuia chu phaiah a zin bo rih a niawm e. Cindy erawh rilru hrehawm takin a awm ve a ni ngei ang, a dam loh thute ka hria. Khawngaih ka tum pawn ka thei rih lo. Ka hua a nih ber chu. Ka hmangaih min laksak vang lam ai mahin, kan inthianthatna pawh zah der zo lo a ni chu ka hua. Min be ngam rih tur a ni lo bawk a, an reh dun khawp mai. Kei erawh thiantha dangten min rawn hnem liam liam zel a. A tu amah ka chhang ngai lem lo thung. Ka pain, "Hunin a la thawidam mai ang che. Nghah peih a ngai ve a nia" tiin min hnem a. Tawngtai takngial pawh ka thei lo. A la harsa rih em a ni. 

Hetiang boruak kan tawn mek laiin, Valpuia farnu upa zawk U Tpi lah chuan, "A hmangaih tawk lo tihna a nih hi. Mihring chu chetsual palh chang nei vek kan ni" a lo tih thu hriat phei chuan thinrimna a sosang duh viau. Tih tak êmah chuan thupha vawikhat pawh an rawn chawi lo, an fapa an nuta hian hetiang khawp hian min tinain zahna kawnah min dintir a nia. Mak ve tak chu an ni. Cindy pawh an ngaihsak viau a niawm e. Innei daih se a tha ang, karah fa an nei dawn tho si a. 

"Ding, chhuah harh i mamawh, lo insiam rawh. Lalsavung park lamah va inthehthil ang u.. " ka thiannu Kimi chuan a rawn ti a. Ka ner sak. Ka va chak zawk zawk lo tak. Mahse, kar 2 dawn ka inkhung tawh a, heti reng renga awm reng chu ka taksa tan pawh a tha dawn loin ka hria. Ka nu bula ka sawi chuan, "Va kal tak teh. I chhaw huih tawh ania.. A tisualtu zawk pawh ni hlei lo chu engah nge i tawm sen reng ang" a lo ti thliam a. Kei pawh chu phur fahran lo chuan ka insiam a. Chawhnu dar 2 bawr velah min rawn lam a. Kimi, kei, Zami leh Teteii kan ni. Kimi nen kan inphur a, an phur dan em em chu ka ngaihte pawh a tha lo zawk e a. An keh hui reng mai bawk si. Park kan thleng a, tlema fianrial deuhah kan chho dial a. An lo phur hurh chhan ka hre chiah, Beer an lo neih vang a lo nia! Cane 6 lai an rawn phawrh. Beer tak hi chu ka in ve nasa. Kan fridge-ah hian kan dah mai zel a, ka pa te pawn min hau ngai lem lo. A hard lam erawh ka ti ngai lo thung. Ka chungchang bawk an sawi leh a, "Bialpa i neih vat a ngai. Runluih nan hrim hrim pawh" an ti leh tawh. 

"Ninawm. Ka hmanhmawh lo. Bakah min bum leh ang" ka lo ti mai a. Nia, ngaihzawng neih pawh ka tum tawh lem lo, tun dinhmunah chuan. Min bum chiang ve em mai a, rin harsa ka ti rih dawn. 

"Ka hria.. I bialpa tur.. Awii tha dawn tawp. "Teteii chuan a lo ti hmanhmawh. Chutihlai tak chuan kan thlang deuh atangin mipa pathum leh hmeichhe pakhat an lo chho a. Kan ngawi deuh thap. Kan awmna an rawn thlen chuan, a hmasa bera lo kal chuan, "Kan tibuai che u em.. Hmun dang chu ni a la sa deuh a. " a ti a. A nui sâng bawk. Kan zinga harhvâng ber Zami chuan,"Buai lah lo ve.. Lo thu ve r'u" a lo ti sawk sawk a. Hmeichhe hnung chiaha kal chuan ka mit a la zak mai. A hmel ka hmuh rual khan engtin emaw ka awmin ka hria. Valpuia nen an inchen tawk viau ang a, a sam chu a kir lek lek, a khabe hmul chu inhmeh tak a ni. Amah a fresh vang bawk sia, a mitmeng chu a zim lek lek a, mahse, a inhmeh tho. Aaa.. Pasal nei tep tawh thulh lehin chutia mipa hmel landan ka lo sawi chiam chu a..! A la hma mah mah. Kan piah thutna awlah chuan an thu ve a. Hmeichhia chuan sunglass dum a vuah a, a hawi valh valh mai. A inlak ve hmel tawp, a hmel erawh a tha ngang mai. Ngaihsak lem lo chuan kan titi leh ta a. Ka chungchang erawh kan sawi tawh lo. Hna zawng mek vek kan ni a, chu lam daih chu kan sawi. 

Tlai nemah chuan fan kual kan duh vangin kan tho ta sap sap a. Kan kal dawn lai tak chuan, ka mi sawi ngei khan, "Kan la inhmu leh dawn nia u" a rawn ti a. A aw pawh a pa tawp.. Hmeichhe lo awm ve ner sak chu ka va hmu leh hram. Kimi'n a lo chhang a, kan chhuksan ta nghal. Kan tawng an hriat phak tawh loh chinah, "Awii a chhiat lohzia kha.. Kha nu kha a bialnu mi le? " Tetei'n a ti nghal zat. "Tu ber kha? " ka lo ti vat a. 

"Kan kalsan dawna rawn tawng kha.. Inlo hmu ve em? A class ngawih ngawih" a ti a. Kan nui ham ham ringawt. Ka sawi ve kher duh ta lo. Ka thiante chungah lawmthu sawi ka ba. Min chhuah harh pui a, ka záng hawkin ka hria. Zanah ka chau deuh bawk nen ka mu hma a. Dar 10 a ri tep tihin Valpuia'n min lo call a, ka la lo chiang kher mai. Mahse, a rawn tihnawn tlut tlut vangin ka laksak ta hram a. 

"Ka ngai lutuk che. Ka lo haw ang a, innei ang" a rawn ti teh ngawt a! A rui tih ka hre mai. 

"Min hai aniang. Sorry" tia dah ka tum mek laiin, "Dah suh, khawngaihin. Engkim ka siam tha leh ang. Mawh.. I tel lo chuan ka awm thei lo. Ka lo hmangaihzia che ka hrechhuak chiah" a rawn ti leh a. 

"Min lo call tawh suh. I ruih lai ngat phei chuan.. A inzah lohthlak mah mah.. Cindy ngaihtuah zawk rawh" ka ti a. Ka inpet ruh ţeuh mai. 

"Dingpui, chance vawikhat chiah ka dil leh ang che. Ngaihdam tlak ka ni lo ka hria. Mahse, ka inchhir takzet a ni. Vawikhatmah a thleng tawh lo ang" a rawn tih leh nawk nawk chuan ka ning ta deuh a. Ka off ta hmak. Awmhmunah ka insawh ka insawh mai. Ni e, min hmangaih a ni maithei. Hmeichhe dang lakah fa nei palh ta se, ti em em hi chuan ka tuar lo zawk maithei. Ka thiannu ngawih ngawih, chuta karah a cousin laka tenawm taka a che duh hi ngaihdam dan ka hre ngang lo a ni. 

Hun a kal ve zel a. Ti mai ang. Valpuia nen kan tawp atanga thla a liam leh meuh chuan ka pangngai chho tan ti ila, zantin ka ngaihtuahna erawh a la zo thei lo thung. Veng chhung mi te pawn min en hrek hrek tawh lo a, pawn pawh ka chhuak ve ta zeuh zeuh. College pakhatah Lecturer ka dil ve a. Ka hmuh pawh ka ring chiah lo. Mahse, Geography la hi kan tam lutuk lo va, chance chu a tha ve deuh. Ka vahpa nen kan infiam mek laiin call ka dawng a, Lecturer-a ka tlin thu a ni. A dera nui thin kha a tak taka ka nuih leh hmasakna ber a ni ngei ang. Ka nute pawh an lawm ve kher mai. Ka vanneihzia ka hrechiang, vanduai mah ila eizawnna tur Pathianin min pe ta chu a nia. Chutah hna azawnga hna zahawm ber pawl a ni bawk. Chumi zan chuan lawmpuina thu pawh ka dawng nasa a, Valpuia leh Cindy te pawh an tel ve. Cindy chu eng nge a an zel tih ka zawt ve ta hrim hrim a, rei tak thian kan lo ni tawh a. Chutia hmelma ena thlauhthlak kumkhua chu ka duh bik lo. 

"Ka tha ve zel ti ila, Ka zahna leh ka tihnatna che hian min la vaw chau thin a" a rawn ti. 

"Nau pai i nih kha, inngaihtuah hah vak vak suh. " ka va ti ve luam a. 

"Ni ve tho mai. Ka chhungte an fel em a, ka la dam ve hram hram a nih hi.. " a rawn ti leh a. Ni e, thil a thleng vek tawh a, a chhungte pawh zakin hrehawm ti viau mah se; tihtheih a awm chuang lo. Bakah an fel ve hrim hrim bawk. Cindy chu a vannei letling zawk e a. 

Ka hna ka zawm ni a lo her chhuak a. Ka zâm angreng hle. Mahse, staff te an felin min lo welcome thiam em em a, ka pangngai chho ve mai. Class lak erawh ngaia neih a har deuh maithei. An puitling thuau tawh mai si a, min chhaih lai rual te te an ni a, a nuam vak lo. Mi han hrawka han hauhte hi ka zia a ni vak bawk si lo nen. Ka inzir deuh chu a ngai dawn khawp mai. Kar khat ka kal hnu chuan nuam ka ti chho ta viau a. Ka subject ka tui ve bawk nen. Naupangte pawn min ngaina ve khat chuan ka hria. 

"Zanin kha ka lo kal lo mai ang. Putea dam lo riahpui a ngai sia" Kimi'n a rawn ti a. Nia, hla kan zir dawn a ni. Ka thiante zingah Kimi nen Kohhran khata awm dun kan ni a, thalai thiltihna reng rengah kan inzui zel thin. 

"Va nuam dawn lo ve. Ka kal lo ve mai dawn mawni" ka va tih chuan, "Kal rawh. A pawimawh tawh si.. " a rawn ti a. Thiante vanga han thulh ringawt pawh chu tiin ka insiam a. Biak in lam pana ka inkhalh phei chu kawng kawiah Scorpio nen kan intawk thut.. Kei ka lo lungmuang deuh nge, kan intai thuak mai a. Side drain-ah ka scooty nen kan tlu dun rial mai. Scorpio pawh chu a ding ve vat a, kei erawh na em em neia ka inhriat loh vangin thawh kan mai ka tum a. Khai aw! Ka tho thei ta tlat lo. Ka kerek chu a nat dan a ril ngawih ngawih, scooty lahin min la delh titih bawk si. 

"A va zia lo tak em.. I tha em? " Scooty chu a rawn chawi kang vat a, thawh ka tum leh a, ka hlawhchham. A nat dan chu a tliak niin ka hria. A sarhu lai a ni a, ka lungphu nen rilru a fim vak lo va, ke ruh tliak em chu ka beisei lo. 

Min rawn pawm tho a, ka ke chu ka rap ngam teuh lo. Ka rak thawt mai. Min melh haw a, kei pawn ka lo melh ve. Amah kha a ni. Park-a ka hmuh kha. 

"I ke hi a dik lo.. Engtin nge niang aw.. Damdawiin hnai ber pan phawt ang aw" tiin zo zet hian min pawm a, a motor back seat-ah chuan min dah lut a. Ka ner sak sak, ţah em chu ka hreh ve si. Mahse, a na thlawt a ni. Mi pawh an rawn pungkhawm tan a, thil awmzia a sawi niin ka hria. U Hruaia, kan conductor a lo tel ve hlauh a, "I chhungte ka'n be nghal ang e" a ti a. Ka nu te a call nghal. A hmanhmawhthlak tawh vangin kan zaipawl member tho Ahriati leh Sawmi ten min kalpui ve a, damdawiin lam kan pan ta vang vang mai. Ka zep lo, ka tap ta tawp mai. A na lutuk chu ka tuar thei ngang lo a ni. Kha pa bawk khan min pawm lutin engkim chu a ti zung zung a. Doctorin, "Zai nghal a ngaih hmel, a ruh hi a rawn pir chhuak sia.. Engtin a tawrh theih zawk ni.. A chhel khawp mai" a tih chu ka hre rei ruai, nachhawknain min jection a, a bak ka hre zawm ta lo. 

Ka harh chuan ka nu hmel ka hmu hmasa ber. Lainat hmel zet hian min rawn melh a, ka hit mum mum a ni mai. 

"An zai hlawhtling che a, hahdam takin awm rawh.. Ka naute, i ngal ruh a tliak a, i kerek ruh kha a khawih tel bawk nen.. Tunah chuan a tha vek e" a ti dam thlap a. Kan upa ber U Ruati pawh a lo awm ve a. Ka mittui a rawn luang ringawt. Ke tliak chu an bai thin tih ka hria. Bai lo an awm tho tih pawh. 

"Nu, ka ke a bai ang em? " ka ti sap a. Ka kut a rawn vuan vat. A lu a thing a, "Bai lo e le.. I dam vat ang. Mahse, ke ruh tliak hi chuan hun a duh rei ve deuh a" a ti a. Ka rilru a dam zo lo. Hna ka hmu thar ve chiah a, tihian enkawl ngai, mahni pawh insaseng thei loin ka awm leh dawn chu a ni sia. Ka thinte pawh a rim hlur mai. 

"Tu nge min sutu kha? " ka ti ram hmak a. 

"Rosangpuia a ni lawm ni kha.. " ka nu chuan ka u en chungin a ti a. Ka u chu a bu nghat, "Aw.. A fel khawp mai. Engkim a buaipui vek a, inenkawlna senso zawng zawng pawh a tum dawn.. A inthiam lo ve lutuk a nia. " a lo ti sawk sawk. Ka lungawi chuang lo. 

"Insengso ang hmiang, ka ke a bai hlen vaih chuan.. " tiin ka heh ka pet a. 

"Naute, chu lam ngaihtuah rih suh. I dam vat dawn ka tih kha. Damdawiin pawh kan awm rei lo turah ngai ang" ka nu chuan min thlamuan tum takin a ti a. Kawngkaah Rosangpuia chu a rawn lut mek. Min rawn pan nghal a. Ka lo melh reng ringawt. 

"Pawi ka ti hle mai. Mahse, hlawhtling takin an zai a, i dam vat ka beisei a nia. " a ti a. A aw a dam thlup. 

"Nangmah vang vek a nih hi" ka ti nghat a. Ka u-in min lo kheuh zauh. Ka pawisa duh lo. Ka hmuh hmasak ber nia danglam ka tihna kha a bo vek tawh. Ka hua a ni ber ang chu. 

Nachhawknain min chiu leh a. Ka mut a chhuak nghal.. Ka nu chuan min hawnsan a, ka u in min awmpui dawn a ni. Kimi pawn min riahpui a tum tho naa, a putea a zual leh deuh si a, zan dangah an ti ta a nih kha. Darkar engzat nge ka mutthilh ka hre lo, ka harh chuan ka ril a tam ngei mai. Rosangpuia chu chauh hmel fahran hian ka khum bawhin a lo thu a. Tlemin ka khawngaih deuh, a inthiam lo ve ropui si a. A darah ka zuk khawih a, a rawn dak chhuak vat. 

"Ka ril a tam" ka ti sap a. Ka u a rawn lawr ve vat bawk. Eitur chu min chhawp vat vat a, barh em chu ka duh bik lo. Ka a tui lem lo nen, ka ei tlem ngang mai. Mahse, ka puar ve tho mai e. 

"Haw rawh. Awm ve reng a ngai hleinem" Rosangpuia bulah chuan ka ti a. 

"Nia.. Ka haw tep e. Ka rawn tlawh ziah ang che.. Mamawh i neih chuan sawi hreh suh aw. " a ti sup a. 

"Dingpui" ka hawi rang teh e. Valpuia a lo nia! Ka khum lam a rawn pan mek. 

"Ekhai! Sangpui, nangmah law.. " Rosangpuia en chungin a ti hlut a. Ka lo melh tawn reng ringawt. 

"Valpui, i dam maw? Inhmuh lohna a va rei ta ve.. " Rosangpuia pawn a lo ti ve zat a. 

A ngaihna hre vak lo chuan ka lo melh tawn ve reng ringawt. Khawvel hi zawng a zim teh e maw..