Ka pa Nupui

KA PA NUPUI..! 

Ziaktu: Toni Rálte

JENETI

"Khawthlang lam Thingtlang khaw lian ve pangngai takah ka lo piang a. Ka pa ka hre lo. Ni e, sáwn ka ni a, ka nuin ka pa puh tur ber a hre lo. A chhan chu vawi tam pawngsual a tawh vanga tu fa ber nge a pai tih hriat a nih loh vang a ni. He thu hi ka nu sawi a ni lo va, ka putea nupui ka piteii thinrim anhla atanga ka hriat a ni. Ka nu chu nu azawnga derthawng ber leh ţi ngawih ngawih thin, engmah sawi ve ngam ngai lo, min duat ve a duh pawha a ruka min duat duh zawk khawpa mi inthlahrung a ni. Ka pi leh pute an la dam a, ka nu nau ka nuteii leh ka putea te nen kan khawsa ve a. Kum 2 ka nihin ka putea chuan nupui a nei a. Kan la khawsa ho vek a ni. Kum 7 ka nihin ka pu a boral a, zep thu a cheng lo, ka pu boral kha ka tan hnara hlit phawi ang huai a ni. A chhan chu falak ka nih avangin ka pu anchhe lawh phurtu ka ni a, a zah vanga a thinrim inhrikthlakna ka ni thin. Ka tet zual lai phei chuan bang den nan te min hmang fo a, ka pu vang khan ka chhel bawk. Ka tap mai mai ngai lo. Ka nuin min chhan ngam ngai lo. Ka pu ngaihdanah chuan ka nu chu mi hur herh, pawngsual phu ve rengah a ngai a ni mahna. Ka nu leh ka pi kha ka neihchhun an ni mai. Ka pi lah ka nu ang tho va inthlahrung, ka pu hlau em emtu a ni a. Min duatna pawh a tilang tha ngam ngai lo. Mi vanduai ni tura piantir ka ni hi a chang chuan ka nu ka dem lek lek zel. Min piantir loh mai tur a nia.. 

Ka pu kha a nunrawn vang nimaw thih tha pawn a thi lo reng a. Kan lo -a a thlam sa kha a chetsual dan tuman kan hre lo naa, a ruang an zu hmuh chuan mau zum taka a dula thil tlang niin a mit veilamah hmawlh zuma chhun a ni bawk. A rápawm hle niin an sawi. Mahse, tun hnua ka ngaihtuah hian, khamini khan ka nu hian thing a phur a, ka pu a thi tih hre lo niawm takin a rawn haw naa, kan kawmchara a inthlak sawk sawk laiin a puan lukhuma thisen kai nuaih kha ka hmu ru ve tlat! Chu thisen kaina lai chu a pawtthler kawk kawk a, a hlum nawk nawk a, a paih ta daih kha a nia. Mahse, a hun lai khan kha lam zawnga ngaihtuahna chang ka hre lo. Tun hnuah ka pu kha ka nu leh ka laka a sual em vangin ka nu thintawt khan a that ta mai em ni ang tih ka ngaihtuah thin. 

School ka kal ve a. Lehkha ka thiam thei lutuk chu zirtirtute duhsak ka hlawh chho ve ta a. Ka nun pawh a nuam ve ta deuh. Ka putea nupui piteii pawn fa pahnih a kum chhirin a nei a. Kan chhangchhe angreng. Piteii chuan kan nufa chu min hmumawh tih kha naupangte mah ni ila ka hai bik lo. Mahse, a fate erawh ka duat em em thung a. A thinrim apianga ka hming a lam tel ziah chu ngaithei loin ka pi hian a khak ve thin a, putea'n a nupui thlavang hauhin an inhau leh nge nge thin. Pawl 7 ka zir kum hian thanthi ka nei ve ta a. Ka taksa pawh a dawk chho zawk. Ka hmeltha a, ni e, kan khaw tleirawlah kei aia hmel tha an awm lo ka ti ngam sak. Chu chu mi dang sawi dan pawh a ni. Ka vun a buang thâng a, ka langsarin ka mitmeng lah a lian kel kawl si. Kan Madam pakhat phei chuan, ka nu hnenah a fa atan min dil tawp nghe nghe. Min duat em em zel a, kan sir te pawn min duhsak ve hle thin. Chutiang taka ka vannei ve ta chu vanduainain a rawn thik ta vat a. Ka classmate ten min diriam tan ta a. Ka nihna, falak hmang chuan min tawngkhum fek fek thin. Falak awmzia ka hriat hma chuan ka bangbo a, huat dan tur pawh ka hre lo. Mahse, a awmzia ka hriat takah chuan na ka tiin ka nu hnenah zawhna ka ngah thin. Chhanna ka dawng ngai hauh lo thung. 

Ka hming hi ka nuteii phuah a ni a. Jenet Zonunmawii tiin a phuah ve a. "Sap hming ka nei e te a tia.. Falak mai mai. A rukin miin an nuihzat tih a hre si lo va, a inchhuang ve em em a" tih thu te chu min sawi duhdan a nia. Ka falak nihna bak min beihna tur an hre lem lo. Ka leplerh lo va, tu pawi mah ka sawi ngai hek lo. Thu ka awih a, Home work ka tithain in lamah ni se ka che nasa, ka kum ngaihtuahin thiam ka ngah hle. Ram hna erawh ka pi hian ka thawh a phal lo ve tlat a. Zirlai ka la ni bawk nen, ka vannei ve phian mai. Kum tawp November thla tawp lamah ka chungah thil duhawm lo tak a thleng ta a. Ka sawi leh hram duh chu love letter te hi ka dawng nasa ve thei em em a. Mahse, tumah ka chhang let ngai lo. Math subject-ah ka chak loh deuh avangin Kan Mathematics sir hian, "Board exam-ah topper i nih kan duh si a. Ka subj-ah hian tan hlek i ngai a. Zing dar 6-7 ah tuition rawn kal rawh. Ka free vek ang che. "A ti a. Ka pite bulah pawh a sawi a, ka rin loh deuhin putea chuan, "A va lawmawm teh hlauh ve. Kal ngei ngei rawh se.. Topper anihte phei chuan scholarship te pawh a dawng ve ang a, a zir leh zelna atan sum sen pawh a tlem deuh ang" a lo ti thliam a. Ka thaw huai mai. Tiang chuan Sir Mama hnenah chuan tuition chu ka kal ta a. Kar khat vel ka kal chuan hma ka sawn ta hle. Sir hi Aizawl khua a ni a, Kan school piah lawkah in a luah ve a. Hman deuh kha chuan a nupui leh fapa te a rawn awm ve thin a, mahse, an hawsan nen, a khua a har ve thei hlein ka hria. 

Zirtawpni zing a ni a, khua a vawt deuh tawh nen, shawl bat hlun chungin Sir in lam chu ka pan a. Kawngka a rawn hawn chuan kekawrte leh tawnzau nen chauh a lo ding to mai a. Mahse, nula rilru ka la pu lo va, Putea ka hmuh dan nen a danglam lem lo. "Ka awm a nuam vak lo va, roomah lo phei mai rawh aw" a ti a. Ka zui lut vr mai bawk. Khumah a mu a, a khum bul chairah ka thu thung. Zir tur a sawi zung zung a, ka lo keu thung. Mahse, min rawn chelh thut a, "Jenet, ka bulah lo awm daih ta che. Ka fanu i ni mai tihian. Eirawngte min bawlsak thin ang a, i chhungte sawn an duat lo si che a" a ti ta mai a. 

"Aa.. Sir, anu ten an phal lo vang" ka ti ringawt a. A tho vut a. Tui a va in niin ka hria. Ka ziah mawlh mawlh laiin ka hnung lam atangin ka nghawng hi a lo khawih a, tuman hetiangin ka taksa an la tawk ngai lo. Ka phu uih a. Thawh ka tum chu min nem bet tlat a, ka ka a rawn hup nghal bawk. Sir hi a palianin thahrui pawh a ngah hle a, kei ang hmeichhe naupang, puitlin lam pan ve mek chu hnehsawh zeta min pawmin a khumah chuan min mut ta a, ka tal nasa ve lutuk, mahse, a kut lianpui chuan ka ka a hup bakah a lehlamin ka ban pahnih chu a hmer kawp a, ka chungah a bawk ta run mai. Ka hau takzet a ni. "Che suh, tal tawh suh. Ka itna che a rei tawh, tun atang chuan ka ta i ni tawh ang" tiin ka kekawr a hlip sawk sawk a, ka hlauh leh hamhaih em vangin tal vak ngaihna pawh ka hre lo. Ka mittui a luang zung zung thung. A na em em a, na tak a ni. A zawh fel hnu chuan thawmhnawte chu min hak thattir a, "Mi bula i sawi vaih chuan, 'Amah zawk hian min sawm a' ka ti ang. I thusawi ai chuan ka thusawi an awih vek ang. Tin, i nunna atan a pawi bawk ang. Tikhan ka duh hun apiangin kan ti ziah tawh ang" a ti mawlh mawlh a. Ka khur char char ringawt. Khamini atang khan nguina chuan ka nun a tuam tan a. Mi piangsual, hlu ve lo, mi hur angah ka inngai a. Tuition kal loh ka tumin putea chuan min tir zel bawk si. Ka sawi ngam bawk si lo. Huaisenna tlem tal kha chu lo nei ni ila chuan, Vawiinah hian hmeichhe pangngai tak ka ni ve mai tur. Pawl 7 chu ka pass a, Topper pawh ka ni. Mahse, ka hlim miau si lo va. Sir Mama khan vawi 6 min mutpui hman a. Ka inten a, miin an hria ang tih ka hlau bawk. Sex chu thil rapthlak leh tenawm takah ka ngai bawk. Mahse, khatih lai khan huaisenna tlemte pawh ka nei lo va, puangzar mah ila kei falak thusawi ai chuan Thingtlang khuaa zirtirtu thusawi chu an awih dawn tih ka hria, Kan in chhungah ka mi chuan tawh nak alaiin ka putea te nupain min tan dawn hlek lo bawk. Piteii phei chu a lawm viau zawk maithei. Chuvang chuan High school ka kal ve thei dawn tho a, Sir chuan min tibuai thei tawh lo vang tiin ka thuruk chu zep ral ka tum ta tawp mai a ni. High school ka kal ve ta a, Piteii chuan ka tha a it tih ka hre naa, Lehkha zir zel ka duh. Kan chhungkaw eizawnna chu lo neih a ni mai a. Putea hian thingfak a hralh thin bawk. Ka nu a hah ber thin. Nuteii khan pasal a um a, tlan inkoh angin an innei zui ve a. Pathlawi fa pahnih nei a um. Ani hi chu ka nunah pawimawhna teh vak a nei lo, min duat ve vak lo va, min hau em em lo bawk. Ka nu chu a hah luat vangin High school ka kaltirh kumah a bawksawp ta a. A rilru lama a phurritin a uai nasa bawk nen, englai mahin a hlim hmel leh a phur hmel ka hmu ngai lo. A thau ve ngai lo bawk. Mahse, ka nu a ni a, a bulah him berin ka inhre thin. A bawrhsawm chhoh tak em vangin kan khaw thenawm PHC-ah kan va inentir nghe nghe a, Doctor chuan hmunpui lam pan turin a lo refer a.Pumpui Cancer a nih a rin thu te nen lam a lo sawi a nih kha.. Mahse, piteii'n Hmunpui pan a remti lo. "Mi mah retheih nak alaiin va insenso vak kha a tul ber lo, a lo cancer tak tak a nih phei chuan a dam thei chuang lo va, in lama inenkawl mai a tha zawk" a tih kha ka bengah a la cham thin. Cancer hlauhawmzia chu ka hria, ka nu khan a vei a nih chuan a dam rei dawn lo tih pawh. Mahse, mihring kan nih chhungin beiseina kan nei thiang lo em ni? Min la dampuia a la thawk ve tek tek chhung chuan kei hian hlimna chhan tur ka la nei ve tihna a ni. Chutia rethei bakberh kan ni lo, Kan huan atang pawn kan lalut ve mawlh mawlh reng. Vantlang chin kan ni ve. Putea chuan a nupui ngam hek lo, ka nu chu thi turin an hnutchhiah ka ti mai teh ang. Kei leh ka piin tihtheih kan nei si lo. Dik tak chuan ka nu unau dangte pawh ka hua, ka nu hi engvanga hnualsuata thlahthlam em em bik nge an nih? Pawngsual a tawh vang khan maw? A duh vang a ni em ni? Mipa rual pathum te chu engtin nge ka nu chak lo tak hian a hneh ang? Ka ngaihtuah ve fo, ngati nge ka nu pawngsualtu te kha hremna pek an nih loh? Ka nu lah a ngawi reng si. Heng zawhna chhanna hi chu keimah ngeiin ka la zawng chhuak ang tiin ka intiam thin. Tichuan, ka nu chu a awm nawm deuh changa feh reng thoin inenkawlna em em pawh awm loin hun a hmang ta a. Ka la naupang em a, ka nu rillru retheih dan tur tun hnua ka ngaihtuah hian ka thin hi a tawt ngawih ngawih zel. A duh leh mamawh pawh sawi ngam ngai lo, chaw ei lai pawha inthlahrung dêka eia thawh hunah pawh an sawi ang ang thawk tawrh thin, mamawh ka neih changa ka putea dil tura min ti thinte, pawisa a kawl ve ngai miah lo te kha aw.. Engtin nge khatiang em ema inhnuaichhiahna kha an laichin ka nu chungah an thlentir theih ka ti thin. Na ka ti.. 

A tawi zawngin ka nu chu cancer a lo ni ngei aniang. Thla tam a liam hmain a bawksawp ta a. Thawh pawh a tho kang peih ta lo. A nat tak tak hnu, nikhua pawh a hriat tawh mang loh hnuah thenawm khawvengte'n, "Hmunpui inpanpui ve renh reng lo va.. " an tih luai luai takah an inthiam lo nge an hmai phih fai nan ka nu chu hruai an tum ta a. Mahse, chumi tuma ka nu thusawi ka la hriatreng chu, "Rama, A tul tawh lo e. Ka kal mek tawh a. Chhan hman ka ni tawh lo vang. Hei erawh ka thihpui dawn a nih hi.. Cancer vanga thi ka ni lo va, ka thisen zawmpuite ngeiin ka nunna hi min chhahsak zawk a ni. Ka thatlai ka nulat lai zawng zawnga ka thiltih leh ka thawhrim vena zawng zawngte hnuaichhiaha ka tihsual pawh ni lo ka vanduai vanga heti em ema min hlamchhiah thei nangni ho hi chunglamin inchungah ro a la rel ve ang a, inchungah kut a la lek ve ang. Ka fanu hi awm lo se chuan hman hmanah khan ka thi tawh ang. Tunah erawh ka tlin ta ngang lo a ni e.. Rama, hei hi theihnghilh ngai suh aw.. I farnu chunga i thiltih hi i fanu te hian an la tawk ve thei tih hi.. Pathian hnenah ngaihdam dil mawlh mawlh ang che.. " tiin. Kha thu a rawn sawi hnu lawk khan chau em emin min hui a, ka va kal hnai a, ka beng bulah, "I damkhawchhuak ngei ngei tur a ni. Ka fanu i ni a, pa tia koh tur nei lo mah la, chunga bawkkhupa min thlirtu pa azawnga pa tha ber Pathian i nei a nia.. I nu ang hian rawn vanduai ve miah suh. Bawihte, ka hmangaih che, chu takngial pawh lantir thei lo khawpa ka nun a han chêp hi chu aw… " tiin a heh a pet fan fan a, a khur ngat ngat bawk. Ka melh ngawt ngawt ringawt. A mitmeng a rawn buai a, ka piin a be mawlh mawlh a, mahse, a rawn thaw hawk a. A zal ta raih raih a. A zal hlen ta. Ka nu a thi ta.. Ka piin tap chunga ka nu hming a lam lai kha kei pawh ka danglam ta chiah a ni. Ka thinlung rethei leh baihvai, dawihzep leh thlabar em em thin kha a kiang duak a. Huatna leh phuba lak chakna hlira khat thinlungin min tuam ta hlup hlup a ni. 

Ka mittui far khat pawh a tla lo. Ka nu kut erawh kuanga an khung hma zawng ka chelh tlat thung. Ka rilruin, "Ka nu, i chunga thil dik lo titu te hi hremna ka la pe vek ang. I fanu hi ka damkhawchhuak ang. Ka tiam a che" a ti mawlh mawlh mai. Ka nu chu kan vuiliam ta. A sarhu lai ngang a ni a, thenrual tha te a lo leng khawm let let bawk a. Piteii pawn that a chhuah ve ngial e. A tenin ka ten. Tu fanu nge a niha heti taka kan nufa chunga a inlek ni? Vawi khat phei chu thei ka vel laiin an pindana a nui hawr hawr chuan min dek ngang a niang, a thinhnuna chemte zuma va vih tlum pawk tumin ka pen hman a. Mahse, ka pi a rawn lut ta hlauh a. Ka thulh leh hram. Chutiang taka huatna thinlung nen chuan ka nu thih kum chu ka hmang liam ta a. 

Pawl 9 ka zir kum lai hawlah ka pi a boral ve leh bawk. A tar tawh a, chawl rawh se. Ka nu ang thoa thuneihna nei lo, a moin a tihduhdah reng kha a nia, thih kha a tan a nuam zawk. 

Lehkha erawh ka la thiam thei zel a. Ka mizia, ka nu thihlaia ka neih erawh ka nei reng hauh lo. Mahse, zan khat ka lehkhazir laiin current a rawn thim thut mai a. Kei hi dawihzep deuh mai ka ni a, thim te hi ka hlau em em thin. Hmanhmawh deuhin bati ka dap a, ka hmu mial. Mut tumin ka intintuah nghal a. Bathrooma ka va zung chu, bathroom kawngka bulah hian darthlalang kan dah a, tah chuan ka inen ziah thin. Ka inen chu ka rak thawt. Ka thla chuan min lo nuih nia! A hmel chu a rapawm ka ti mai. Huatna hlirin a khat a ni. Bati lah chu a thi leh hmiah si. Hlau zetin ka rak a, putea a rawn tho vat. "Eng nge a? " a ti tuar a. 

"Ka.. Ih, engmah.. " ka ti ringawt. Ka sawi chuan an awih leh dawn lo. Piteii'n, "Dawihzep lutuk, min tiharh vek alawm.. Pir per che hian" a tih hlak hlak chu ka hria. Ka mu chu ka let ka let a. Current erawh a rawn awm tawh a. Ka hlau telh telh thung. Ka hmuh sual lo chiang mai si. Ka hriat loh karin ka lo muhil a niang. Maimizialin ka awm a. Ka khum mawngah hian darthlalanga ka thla ka hmuh ngei mai kha a lo ding a, min melh reng ringawt. Hlau takin ka lo melh ve reng a, a rawn tawlh hret hret a, hlauhna namen lo chuan min tuam lehin harh chhuah ka tum a. Ka thei si lo, ka hmai bul chetah rawn kunin, "Hlau mah ta che. Ka veng him zel ang che" a rawn ti a. Ka harh zui nghal. Ka lo thlan hluam mai. Kha ta tang khan mang lamah ka thla chuan min zui ka ti mai. A changin a thinrim a, a changin a nui vak vak thin. Ka awmdan chu a dik lo tih ka hria. Tihkian dan ka hre hauh lo thung. Schoolah erawh ka nungchang a la ngai reng a. Thian kawm em em pawh nei loin tu pawi mah sawi loin ka la tal ve zel. Mahse, rei a ni ta lo a. September thla chawhnu lam niin, Lunch break laiin chawhnu lama kan zir tur Science textbook chu ka bih leh mai mai a. Ka tih fo dan a ni. Thian tha tak ka neih loh vangin keimaha khatia awma lehkhazir kha nuam ka ti tawh zawk. Ka rin ang ngeiin Sawmzuali leh a thiante ho rawn lut chuan, "Inla feli, inla lehkhathiami" an ti leh fak fak a. Hetiang tawngkam hi chu ngaiah ka nei tawh. Ka ngai haw peih tawh lo. Ka piteii nau fanu Zuali hian, "Sial rángin sial rang a hring an tia sia.. Jeneti chuan falak a la pai ve dawn anih kha.. " fiamthu titak deuh hian a rawn ti leh kher a. Zep loh chuan piteii lam hnai ho hi ka ngeih em em bik lo bawk nen, ka thin a dek ve zak mai. Mahse, chhan let dan la hre hauh lo. Ka tah a chhuak leh hle ringawt. 

Ka tho a, lehkhabu ka khup tih chiah ka hria. Ka hriat leh hmasak ber chu chhuata Zuali kawr tet phung leh thi nuaiha a tlu chu a ni. Min hual thup bawk. Mak ti zeta ka en lai chuan, kan sir Peka hian, "Jenet, eng thil nge i tih hi? Rang takin office-ah min rawn hmu rawh" a ti khauh fang a. Ka hawihai hle. Zuali chu a tap par a, a hnar leh ka a thi! A thianten an bawihsawm ta a, Sawmzuali khan, "I lo va rapthlak ngai ve leh" a ti a. Ka chhang lo. Office lam ka pan a. Sir Peka hmaah ka va ding tau ringawt. 

"Tinge khatia mi i sual ve a. I khawih na bawk si, eng nge inbuaina bul ni reng reng? " nem deuh zawk hian a ti a. 

"Sir, ka khawih reng reng lo. Khawih tumna pawh ka nei lo" ka lo tih chuan thinrim hmel deuha min enin, "Dawt sawi suh. Naupang zawng zanwgin an hmu che. Kha.. I sam pawh a phelh nuaih kha.. " a ti a. Zirtirtu dangte pawh chuan min lo zilh nauh nauh. Ka buai tlat. Engmah ka hre miah si lo va. Mak ka ti ngawih ngawih mai. Ka khawih lai ka hre miau si lo,.. Mahse, min hmu an tam si. Ka tan tihngaihna awm tawh hek lo le.. "Min hmusit em a ni " ka ti ta tawp a. Ka dinhmun leh nihna vangin min diriam thin tih hi Zirtirtute pawn an hre ve vek a. Mak an ti hran lo. Lehkhathiam ber ka ni bawk si a, "A lehpek a awm leh a nih chuan a pawi thei tawh ang. Insum hram hram ang che" tiin min kaltir a ni. Min duhsak ve zia ka hai lo. 

Ina ka haw chu piteiin min lo beng nghal thuai a. Ka pai awt awt mai. Zuali nu bakah an chhungkhat an lo awm nual bawk. Nasa theihtawpa min ankhumin anchhia min lawh a. Sawi tur engmah ka hre si lo va, ka ngawi tawp mai. Ni e, ni dangah pawh a mi ankhumna hi chu ka tuar dai ziah a lawm. Putea tunu ka nih vang chauhin an kal thui ta lo niin an sawi. Zuali erawh chuan min hlauh phah ta a, ka hriat miah loh thil ka tihna chuan rah tha a chhuah phah ve pawh a ni mahna. Sawmzuali leh a thiante tawngkam mei nei tak ka hre ngai ta lo ringawt pawh chu thawk lakna chance a ni ve a. Ka lawm ru hle tho. Mahse, ka thiltih engmah ka hre lo erawh palzam chi niin ka hre lo a, keima tawkah ka buai ru ve thei viau. Ka thinrim luatah engmah ka hre lo a nih ka ring ve ta ringawt. Inhnemna dang nei hek lo i.. 

Inrinniah insuk tur phur teuh chungin kan kawmthlang kawrte lam ka pan a. Inrinni apianga ka tih dan a ni. Ka kal than tawh vangin ka hlau lem lo, in atangin a hla em em lo bawk a. Sir Mama ka hmu thut chu ka ding chawih mai. Hlauhna hlirin ka khat leh tawh. Chemte humin a kut lehlamin mau sei vak lo a hum bawk a. "I insu dawn ni maw? Kan va inhmu khat ta ve aw"a ti duam a. 

"Nia.. " ka ti ringawt. Ka insuk tur chu ka thingpharh a. Ka bulah a rawn thu a, ka lo ip chawih mai. "Tumah an awm lo a nia. Ka ngai tawh lutuk che. I lo leng duh tawh si lo.. " a ti sur sur a. Ka vanneih asiamin kan exam zawh hnu lawkah a haw a, a rawn let leh khan an nu a rawn tel ve tawh a. Kan awmna a inhlat bakah ka tawmîm êm a, School kal bak ka chhuak meuh lo nen, hun remchang a hmu tawh lo ani. Mahse, chumini chuan a tum leh ngei dawn niin ka hria a. Ka hlauthawng hle. 

"Eng nge i tih a? " ka ti a. 

"Khu lai lawkah khuan VC ten ram min pe ve a, balhla leh lakhuih ka ching ve a. Ka feh tlut tlut alawm. I insu thin tih lo hre daih tawh ila a tha tur" a ti sur sur a. Ka va ten ber tak. 

Min rawn kuah a, ka lo ţang nasa. Ka au mai ang tih ka ngaihtuah bawk. Mahse, a chemte ken sei riang ruang chuan ka hrawk a tin a, "Au hlek suh. Ka that hreh miah lo che nia" a ti ta mai a. Ka tawm chawih mai. Ka kawr hak lai a rawn hlim lai chu ka hria. Thil a thleng leh ta a ni ngei ang. Ka harh chuan Balhhla kung bula Sir mama let reng leh ka kut leh kawra thisen kai nuai chu ka hmu ta a. Ka hamhaihzia tak kha aw. Sir mama hrawk chu a thler huau a, a dul atangin thisen a rawn chhuak reng bawk. A mutna bul lawkah chemte a let bawk a. Hei hi ka tih a nih loh chuan tu tih nge ni ta ang. Ka huh pur a, ani Sir pawh chu a thawmhnaw a huh bakah a bal nuau mai. Ka insukna hmun a ni si lo. Mangang takin ka hawi kual a. Thawm ka hre lo a, tumah ka hmu hek lo. Hmanhmawh zetin chhak lam hawiin ka tlan ta a, rei ka tlan lo. Ka insukna hmun ka thleng a. Thawmhnaw pawh a lo la let phung mai. Ka rilru a fim chho ta nge ka kawr ka hlip sawk sawk a. Thawmhnaw bal suk tur zing ami ka kawr chu lain ka ha ta a. Ka kekawr erawh thisen kai ka hmu lo va, ka thlak lo. Ka kawr thisen kai nuai chu ka sir lawka tiauvut chu hai khuarin ka phum ta a. Thinphu dep dep chungin ka insuk tur chu ka khung hmawk hmawk a. Mahse, ka tawp thut. Rang taka Sir Mama ruang awmna chu pan lehin chemte chu ka la lawk a, a chhak deuh mau hmunah hnim hnuaiah ka thukru ta a. Ka ngaih a ngam thei ngang lo va. Lei lai khuar lehin ka phum leh ta a ni. Tichuan, in lam panin hmanhmawh takin ka haw ta a, in ka thlen hmain thenawm te kawta patling pathum lo thute bulah chuan, "Kawrah khuan patling au ruai ruai ka hria. Ka hlau lutuk a ka rawn tlan haw" ka ti a. Ka thaw hliam hliam bawk. Makti zetin an inmelh kual a, "Khawi laiah tak nge? " an ti a. Ka sawi chuan rang takin an che nghal. Inah ka lut a, piteii a leng a niang, a lo awm lo. Ka insu ta si lo va, a thinrim leh ngawt ang. Mahse, insu hman ka ni tlat lo ani. Pa ho zu chhuk chuan Sir Mama ruang chu an zu hmu ta a niang. Khaw pumah a darh nghal huk. Piteii rawn haw pawh ka rin ang em emin a thinrim lo. An thuhriatin a thawng ve bawk nen. Mahse, a áng tho. An thawm hre tur bera min ngaih vangin Police te pawn thu min zawt a. "Ka insu tan vel tihin a rawn au ruai ruai a. A tirah chuan an uang emaw ka tia. Mahse, 'Ka duh lo.. " ti velte kha a sawi a. Mipa thinrim inhrosa thawm ka hre bawk nen, ka hlau em a ka tlan haw ta mai a ni" ka ti a. Tuman kei tleirawlte, derthawng em em mai chu tualthattu a nih rin ngaihna an hre lo. Kei pawn ka thah lai ka hre teuh si lo. Ka manganna erawh a zual telh telh. A zirlai naupang khuaikhema pawngsual ching Sir Mama chungah hunin ro a relsak ve ta chu a nia. Lehlamah chuan ka thaw hawk tho. Amah vanga ka nunphung tam zawk ka hloh nasatzia leh ka kimkitzia, ngaihzawng pawh ka neih ve ngam lohzia ka ngaihtuah chuan thi tlakah ka ngai tho. Mahse, keima kut zala a thi erawh rin harsa ka la ti tho mai.. Mak tihna hlirin ka khat tho a ni. 

Sir Mama thihna runthlak tak avangin rei tak chhung chu titi dang a leng lo a ni. Kei erawh muthmunah mangang takin ka tal thin. Zan khat putea lui kal a rawn haw har deuh a, Piteii chuan a lo nghak a. Kei erawh ka mu tawh. Ka mut reng laiin tur et ettu ka nei a, ka thu hlawl mai. Mahse, piteii au tuar tuar ka hre zui. Khumah ka thu emaw ka tih laiin Sitting roomah ka lo ding reng a, Piteii chuan min hlauh hmel zetin min lo kawk a, thenawm te an rawn lang bawk. 

. "He nu hian thah min tum ani. Ka hlau lutuk. Awii. Ka khur nasa lutuk" a ti ta mai a. Ka ner sawk. A thusawi chu ka awih, thah ka tum a ni ngei ang. Mahse, engmah ka hre lo. 

. "I sawi awmzia ka hre lo reng reng.. Pite, ka mu reng sia" ka ti a. 

"Dawt sawi suh. Tv ka en reng laiin ka hnungah i rawn ding a, chemtea min tin uaih laiin ka rawn hmu che a, ka tlan chhuak a nih kha.. Khaw nge chemte te kha i dah. " a ti hlawih hlawih a. Ka kutah engmah ka keng si lo. Chemte chu kan dahna hmunah a lo awm kiau si.. 

"I hre sual a nih chu.. I au ri ka hria a, ka rawn chhuak zawk a nih kha" ka ti a. Fiahna engmah a nei si lo, min ngeih lohzia thenawm ten an hre ve tho si a. Min puh hmingchhiat a tum angah an ngaih phah ta daih! Ka tan chuan a lawmawm letling.. Ta tang khan piteii chu ka hlatah zel a awm tawh. Min ankhum dan pawh a nep ta deuh. Min hlau miau a. Min hnawtchhuak fo naa, ka chhuak duh si lo.. Engpawhnise, ka laka a inlek zualpui a zia phah a, a lawmawm lamah ka ngai. 

Pawl 10 ka zir ve dawn ta. Ka pass leh chuan hmun danga ka zir a ngai tawh dawn a. Piteii chuan, "Nangmah i inchawm theih leh theih loh a ni mai" a ti hmiah. Zir zawm erawh ka tum khawp mai. Ka inchawm theih mai kha ka ring ve bawk a. Nula ang en kan ni titih tawh a, Inleng pawh ka nei ve zauh zauh. Piteii mitmei vangin an rawn leng nawn khát hle thung. Pawi ka ti lem lo. Zirna lama insawrbin ka duh em vangin ngaihzawng neih loh ka duh.. Tin, ka nei ngam ang em ka hre lo. Sir Mama vangin mipa hi ka nel hlawl lo a ni ber e. Sir Mama case kha a la kal reng naa, a zuihral mai ka ring. 

Hun a liam ve zel a. July thla ruahsur hun lai kan thlen chuan, kan thenawm ti ila kan in leh an in inkarah in li a awm a, chuta an pathlawi chu tuiah a tla hlum a, kei pawh thenawm hnai na na na chu tiin ka va pui ve a. Ruah a sur deuh reng bawk sia, a hahthlak angreng. Thi hi Pu Maa kan ti mai a. An nu hi khaw thenawm niin fa pakhat an neih hnu lawkah an inthen a, koh leh a tum lo nge tihian a thlawi chho ta ringawt a. Pa tawngkam thiam leh phul ve hlut chi, kut thawha mi fiam hrat tak a ni a. Kei nen tak hi chuan kan innel lem lo va, min fiam ve ngai lo. Ka ngaina tehchiam lo. An zan len deng an haw har deuh a, a kalpuipain khawvar tawh hnuah tuia a tlak hlum thu a rawn sawi a ni. Tui a lian ve deuh reng reng bawk a, amah Pu Maa kha tui thiam lo a lo ni bawk nen, a kalpuipa hian a zawng rei viau niawm a ni. Amah pawh a chau kher mai. A tuk nilengin an zu zawng a, a tlakna li tak an hre fuh chiah si lo. Chawhnu lamah an zawng hmu hram a. Lumen a ngai dawn a ni. A ruang a la chhe em em lo bawk a. Puam erawh a puam ûk tawh. Kei leh an nau pakhat Tlani nen an sawhchiar siam kan pui ve a. Mitthi-ina la kal ngai lo ve ve kan ni. Tlani nen kan va zung chu, kan piah deuha thukhawm te titi chuan ka beng a verh ta zak mai. "Thih thaa an thih hi a rinawm vak loh alawm.. U Siami chunga a thiltih a vang pawh khan" a ti bul bul a. Siami chu ka nu hming a ni. A bula thu chuan, "Ngawi rawh. Chutiang sawi hun a nih loh chu. An hria ang e" a lo ti vat a. 

Mahse, chupa bawk chuan, "Hria ang hmiang. A ho em mai. Mi dang chunga nunrawn lutuk chu Pathianin a khawngaih ngai lo" a ti hmiah. Ka va en chiang leh kher a, Dawrkai Pu Rila fapa Zu ngawlvei Pa Rina a lo ni. Zu ngawl a vei vang nge nupui a nei lo. Zan khuain an thusawi chuan min mawlh ta a. Tihdan tur ka ngaihtuah ta ngat ngat mai. Ka nu chungchang bak a nih ka ring lo. A vawi tam takna atan putea chu ka nu chunga thil titute ka zawt leh a, meng rum ul chungin, "Eng atan nge i tih? " a ti nghut a. 

"Ka hre ve duh. A fanu ka ni a, tu nge ka pa pawh ka hre hleinem" ka ti a. 

"I hriat kher a tulna ka hre lo" a ti hmuk a. 

"Pu Maa kha an zinga pakhat a ni ngei mai a.. A dik em? " ka tih chuan makti em em hian min melh a. 

"Engtin nge i hriat? " a ti ta a. 

"Ka hre ve tawp mai. Mi dang chu min hrilh tawh teh, tin, ka nu chunga an chetdan leh engvanga hremna hmu lo nge an nih tihte pawh hriat ka duh" ka ti ta tawl mai a. Piteii awm lai a ni lo bawk a, a ngawi vung vung hnuah.. "Umm, ni e, i nu lakah khan tihsual ka nei nasa em a. Amah ka zah em vangin ka'n sawi tawh mai ang e… " a ti te te a. Ka lo ner sawk. A dam laia zah mang si lo. 

Putea chuan, "I nu kha nula hmel tha deuh mai a nia. A chhuan pawh kan chhuang ve thin. Mahse, ka pa ten a pasal tura an hual ruksak ve, mi tha fa, kan khuaa hausa ber pawla an sawi fapa Lalawma chu hnawlin Pu Riliana fapa Rina saw a thlang mauh mai a. Rina lah chu amah aiin a la naupang zawk lehnghal. Kan rilru a tina hle. Mahse, innei tur em an la ni lo va tiin kan hau vak duh lo. Zan khat tu thih zan emawni hian Rina nen Kumara te bawng ina an tawm dun an lo phawk niawm tak a ni. An chesual ngei em tih pawh kan hre lo, amah I nu phei chuan engtinmah kan awm lo a ti naa, ka pa kha pa rorum tak a nih vangin a awih therte lo va. I nu chu a vaw ta hrep a, tin, pawn chhuah a phal ta lo bawk. Hun a kal a, Rina nen pawh an inkawm zui tawh lo tura ngaiin i nu pawh ram lamah a chhuak ve leh tan a. Buh seng a hun a, kan riak lut ta a. Lalawma te pawn i nu chu an rawn rim ve zeuh zeuh, ka pa a hlauh em vangin a be tha ve ni maiin ka hria. Kan buh seng hlanin kan khaw pa, Pu Lianhnawla a boral hlauh mai a. In lama awm an tlem si, kei leh i nuteii te kan haw a. Kan haw hlan khan a nia i nu chungah thil a thlen tak ni. I pi sawi danin "A buh seng zo kawra a zuk inbual kha a rei ta sia, i pa nen kan ngaihtha ta lo chuan kan zuk zawng a, kan zu hmuh chuan ruak vekin a lo mu a, a lo berh luai bawk. A kap atangin thisen pawh a chhuak nghe nghe.. 'Lalawma leh a thianten min sual' a lo ti a. A tap zawih zawih bawk. Thlamah kan chhohpui a. I pa khan eng rilru tak pu ang maw.. I u chu a hau ta hrep zawk a. 'Hmeichhia i ni a, an hmuh laiin i inbual vel a. I phutawk a nih kha. I hurherh man i hmu anih kha. Tumah hrilh a ngai lo, kan mualpho zau mai mai.. ' a ti ta mai a. Ka ngaihdan a ni lo em em, mahse, i pa ka hlau si" tiin a sawi a ni. A sarhu lai khan kei pawh ka thinrim a, Lalawma te chu khawih pawh ka duh, mahse, ka pa khan min khap zel si a. Thup bo kan tum em em laiin i nu khan nau a pai ta mai si. Kan mualpho lo thei ta lo va, Lalawma te lah an lo uang deuh nge, an zu innaah an lo sawi thawi deuh a niang.. Pawngsual ang pawn an sawi lo.. Kan rilru a na a, ka pa vangin engmah kan sawi lo zo tawh si. I nu lah mi a ang zo ta lo va, a rilru a mang vek a, tikhan a tuar ta tlawk tlawk mai a ni. 

I nu chunga thil dik lo titute chu Saw Lalawma, Kima pa te, Maa hmannia boral leh Liantluanga, Sawtah Dinpuii pa te saw an ni.. " a ti ta dap dap a. Ka thin hnûn a na vawng vawng mai. 

"A nih Pute, Pa Rina leh ka nu chuan eng chanchin mah an nei zui ta lo em ni? " ka ti a. 

. "Rina rilru kha a na khawp a. I pian hma pawh khan i nu kha a la rawn hel tho. Mahse, i nu khan mihring a tling ta lo ti mai ang. A á vek tawh a. Tisawn Rina pawh zu bak hnaah a nei thei ta lo hial a nih saw.. A khawngaihthlak khawp mai" a ti a. Pa Rina zu rui hmel ka mitthlaaha rawn lang nghal. Inhmuh changa min thlek vung vung thinte khan chhan tha tak a lo nei a nih dawn kha. Ka nu chunga dik lo taka chete ka hre ta a, tu nge ka pa ni ta ber erawh ka hre lo. Hriat ka chak hek lo. 

Board exam kan hmachhawn dawn vangin Study camp kan nei a. Kei pawh mal tak chuan ka camp ve zel a. Thian hi ka mamawh em em lo bawk a. Zan khat ruah a rawn sur thut mai a. Mut a chawh bawk nen, kan mu ta a. Zing dar 2 velah ka bul lawka mu Hluteii a rawn rak ta chiam mai a. Kan harh vek. Min kawk a, "Ka hlau che" min ti ta mai a. Bo huin ka lo melh. 

"Amah leh amah a inbia a, a inhau bawk.. Inhre ve lo em ni? Mi râp lutuk. " a ti ta a. Ni e, ka mangah ka thla nen khan kan inkawm tak alawm. 

"Tawngvaih ka hrat lutuk a. Chu chu a niang" ka ti ta tawp. Mi dang hria awm ve hek lo le.. An ngawi zui ta a. Hluteii erawh ka hnaihah a awm leh tawh ngai lo. Ni e, mi hlauhawm tak ka ni tlat. Tual ka that tawh si a. Christmas kan thleng hnai a, ni 23 zanah inkhawm turin ka chhuak a. Inkhawm hi ka thulh ngai mang lo. Biak inah tumah misual kan awm ngai loh vangin. Kan bang ka haw lamah pu Lalawma leh Pu Liantluanga te inkhawm bang ka tawk a. Kan kohhran a inang lo anni nen. Inah ka haw a. Ka mu a, ka muhil lo. Ka let ka let a. 

"Ti mai ang.. Kal ang" ka ngaihtuahna chuan a rawn ti niin ka hria a. Ka beng te ka hup thul. "Jenet, i nu an pawngsual a, an that.. Hrereng rawh. Kal ang.. I va tihlum ang" ka beng bulah a rawn rak reng a. Lukham ten ka beng chu ka hup a. "Aih.. Ka duh lo" tiin ka rak nawk nawk. Ka zawi hnawk ni maiin ka hria. Engmah ka hre zui lo. Ka harh leh chuan, Pu Lalawma te kawmthlang, Lamkhuang kung bulah ka lo ding a. Thirzai sin zet mai ka hum ran bawk. Lamkhuang kung ngheng chuan Pu Lalawma chu a lo thu a. Mahse, a meng kuau thung. A thi tih ka hria. Ka lungphu ri chu ring tak a ni. Mi ka that leh ta tih ka hriat rualin thirzai chu ka paih rawk a, hmanhmawh zetin ka tlan haw ta a. Kawngka chu a lo inkau a, thawm a reh vek. Khuma ka mut hmain dar zat ka en a. Zing dar 3:48 chiah chiah a ni. A tuk zinga ka thu hriat hmasak ber chu, "Pu Lalawma ruang an chhar " tih a ni. Engtin nge an kawmthlangah khan Lalawma kha ka hruai thlaka, ka thah theih? Kei chuan engmah ka hre lo. Zonuni'n a hria ang.. 

Rinhlelh an nei thiam lo a niang chu maw.. An nu sawi hmangin, "Kan zaikhawm bang kha School venga pi Zari dam lo a zual an tih vangin kan pa te chhungkhat a ni bawk sia, 'Ka han menpui ve leh rih ang e' tiin a kal a. A lo haw lai ka hre lo. Tihian a thih thuin min deng ta ngawt mai a ni" a ti. Sawi ruk sep sep ka hria, "Siami thlarau a rawn che a ni mai lo maw" an ti! 

Siami thlarau ni loin a fanuin phuba ka la a ni reng sia. Mahse, Jeneti chuan a la lo. A duh ve ngai lo ang.. Pakhat chiah a dam ta. Kumthar kan chuangkai ta a. Study camp luh hma zanah chiah chuan, Information centre atangin, "Pu Liantluanga a boral" tih thu an rawn puang leh ta a. Thim lam hawiin ka thaw hawk. Putea hian min ringhlel deuh niin ka hria. Mahse, ka ngawi reng mai si. 

Chhunah khan Piteii nen huanah kan kal a, kan huan ep chiah hi Pu Liantluanga puzawnte huan a ni a. Pu Liantluanga a lo feh ve! Lak tur ang ang kan lak zawhah Piteii chuan, "Hnathawh thawmhnaw ho kha zu nawp lawk teh. I putea hian rawn hawn nachang a hre si lo, a bal em mai" a tih vangin huan tuikhurah ka zu su a, ka insuk laiin Pu Liantluanga insil tur a rawn kal ve a. Tuikhur hi kan intawm ti ila, anmahni lam siam zawk mah a niawm e. Inbe mang lo chuan kan che dun mawlh mawlh a. Dar 3 a pel tawh a, ni pawh a duai deuh tan. Ka insuk zawha ka thawmhnaw phelha kekawrte nen chauha ka inbual lai kha ka hre rei ruai.. Pu Liantluanga'n it hmel zeta min melh dauh dauh lai nen.. Ka hriat chhuah leh chuan, Pu Liantluanga chu tuikhurah a hmai phumin a lo bawk a. A sam kekin ka kuai dak a. A thi fel reng tawh. Thawmhnaw ka inbel sawk sawk a, Piteii lahin min rawn ko sek lehnghal. Thil kha a thleng rang viau anih ka ring. Hmanhmawh zetin ka insuk nen ka chho a, ka zar leh thlap hnuah kan hawng chho ta kha a nia. Amah maia feh a nih vangin Pu Liantluanga a thi tih erawh zan tirah an hre chauh a nih kha.. Piteii'n, "Tuikhurah a lu inphumin an hmu a niawm e. Jenet, i insuk lai khan a lo kal em? " a tih chuan, ka lu ka thing a. 

"Aih, kal miah lo. A van mak em em" ka ti a. Ka meng buai viau bawk. Putea'n chik zeta min melh tih erawh ka hre ve kar. Hlenin a awm ta. Phuba chu. Ka chawl hahdam ve tawh ang chu ka tih laiin, Zonuni zia chu a rawn lian zel a. Ka hneh lo lek lek ta fo mai. Kan exam lai te khan mawi lo taka a chet changte a awm. Ka sawi vek tawh lo mai ang. Keimahah mi dang an awm tih ka hrethiam tawh a. Keimah tho nia ka hriat avangin tihreh dan ka hre lo. Ka ze tha zawk hi ka duh a, chenpui pawh ka duh. Mahse, Zonuni hian min chhuahsan duh si lo. 

Pawl 10 ka pass a. Zir zawm lehzel ka duh a. Mahse, Putea leh piteii ten an remti thei ta tlat lo mai. Keimah ka inchawm ang ka tih pawhinn an remti thei si lo. Hnathawk turin min duh tih ka hai lo. Hetiang turte chu lehkha min zirtir loh mai tur a nia. Putea hian an nu a hlau em a ni. A bak a awm lo. Kum chanve dawn ram hna thawka ka tul hnuah Zan khat chu Putea te fa naupang ber a luak vak mai a. Kan buaipui rei viau. A zia ve deuh ta a, kei pawh ka mu zui ve nghal. Ka chau bawk a. Ka muhil nghal deuh mai.. Mahse, ka nak a rawn na zawk a. Ka harh chiang hle. Putea te pindan thlang lam ngheng hian ka lo thu a, an chhungkua chuan min lo thlir thap. Putea chuan a kut a lek uaih a, "Mi rapthlak tak i nih hi.. Ka ril arah ka fa ngei rehhlum i tum a nia. Ka rinhlelhna che kha a lo dik ngei e. Mahse, ka u fanu i nih angin i chungah zahngaihna ka lantir ang. Ka in hi chhuahsan nal nal la, vawikhatmah rawn rap leh tawh ngai suh ang che. Zaninah hian kan inzawmna a chat tawh e. Khua hi chhuahsan ang che. I chhungte kan ni tih theihnghilh ang che" a ti ta fak fak a. Piteii tawng tur chu khapin, "Nang pawn he thuruk hi i sawi chhuak anih chuan i tan pawh a pawi ang.. Hria ang che. Kan buaina hi hetah tawp rawh se" a ti chang fak a. A thinrim em vangin piteii chuan engmah a sawi ngam ta lo. A tukah ka thawmhnaw nen, Aizawl ka rawn pan ve ta chawt a. Aizawla ka awm chhung hun chanve zet chu keimah ka ni lo. Eng nge ka tih a, engtin nge ka awm ka hre mumal lo, zirna ka chhunzawm tawh lo tih erawh ka hria. Tin, Hardware dawra ka thawh atang khan tlemin ka hrechiang chho leh ta bawk. A bak chu Zonuni'n a hria ang. Zonuni hi Zonuni ka ti mai a, aman Zonuni ka ni a tih vang a nia. I pa kha ka hmangaih vanga nei ka ni lo. Amahah khan himna ka hmu a, chhungkua ka mamawh a, ka bel a nih kha. I pa nen nupa nun kan hman ka hre lo. Ka damchhunga sex ka hman ka hriat chhun chu Sir Mama min pawngsual kha a ni mai. Ka hre lo hi pawi ka ti lo. Mahse, i pa kha ka tan a hlu a, ka pa ang thoin ka ngai a ni. Rosum chungchangah buaina ka nei lo. Chhungkua nei ve ila, zahawm takin nung ve ila, nunphung pangngai pawh ve ila tih chiah ka duh. Mahse, Zonuni'n a tichhe zel a, ka hneh si lo.. " 

Jeneti chu a hah hmel hle. A sawi chhung khan kan nuin thingpui a rawn dah a, mahse, ka kaltir lehnghal. Dar 1 a ri tawh.. Hmingsanga pawh a ngawi vung vung ringawt. Sawi tur a vâng mang e aw. 

"Jenet, i tawrhna chu pawi ka ti khawp mai. Engtia awm zel nge i duh? " ka ti ta ringawt a. 

"Ka hre lo. Tumah tihnat ka duh tawh lo va. Chutiang hmunah chuan awm ka. Duh" a ti halh a. 

Hmingsanga'n, "Ka hria e.. " a lo ti vat. 

"Ka muhil thei tawh ang em? " a ti sap a. Ka khawngaih riau. Hmingsanga chuan, "Zonuni khan phuba a lak dan leh Aizawla a chet tlat dan min hrilh leh se kan va lawm dawn em" a ti nghut a. 

A reh vawng vawng. 

"Zonun, Zonun" Hmingsanga chuan a ti thum dut dut a. Jeneti chu a chhing tlat a. Thawm engmah a chhuah lo. Kan inmelh hrek hrek a, "Aw le.. Naktuk lamah kan chhunzawm dawn nia.. " Hminga chuan a ti sup a. Syringe la chhuakin, "Ka jection leh lawk ang che" a ti a, a ban bulah a chiu zui nghal. Kar loah Jeneti chu a muhil ta bawrh bawrh a. 

A tuka thil nih dan dik tak ka farnute leh ka nupui bula ka sawi chuan, mak an tiin an ráp hle tih a lang. Jeneti dahna tur chu Hmingsanga'n a ngaihtuah dawn a, a kutah ka dah ta mai. Enkawl rei a ngai viauin ka ring. 

Chawhnuah Hminga a rawn lang leh a. Jeneti roomah kan thu leh ta ran mai. A jection leh a, Zonuni biak a tum ngat ngat. Mahse, Zonuni thawm reng reng kan hre thei ta lo. Chawhnu pum chuan kan beidawng ta thak a. A mak mang e aw. Jeneti erawh chuan tha takin min chhang tho si. Zanah Chhungkuain tawngtaina hun kan hmang a. Jeneti pawh tawngtai ve turin ka hrilh bawk. 

Zan dar 9-ah motor a rawn ding dat a, Hminga leh a thuihhruaite an rawn lang a. Jeneti chu insiam fel sa thlapin room atangin a rawn chhuak a. A dawldang hle naa, hlimna mak tak nei ang maiin a mitmeng chu a nung sârh mai. Kan inchibai liam liam a, "I dam veleh i rawn let dawn nia. He inah hian englai pawhin kan lawm che tih hria la" ka ti a. 

"Ka damchhunga ka pasal awmchhun lu nghahna hmun hi ka chhuahsan hlen lo vang. Ka dam veleh ka rawn kir dawn nia" a ti ve a. A nui sáng bawk. Akimi nen an inkuah a, "Api, ka hlau che ka tih kha ka ti tak tak lo a nia.. Ka ngai ngawt ang che" Akimi chuan a ti tiau a. Akimi sama chulin, "Ka naute duhawm deuh hi ka kalsan hlen phal renh reng lo.. Lo hmeltha zel rawh aw.. " a ti a. Ka farnute leh kan nu mittui a lo tla fap fap. Tuna kan hmachhawn hi ka pa nupui Jeneti kha a ni miau a, demna leh selna tur awm lo, ka pa nupui kha.. 

Motora a luh dawn chuan a kut a rawn vai lap lap a, hrehawm ti hmel reng a pu lo. Ngui nghiain kan lo thlir thap thung. Motor a tlan liam a. Kan chhungkua kan inmelh kual hrek hrek ringawt. 

"Ka pa chu la dam se, a khawngaih ve ngawt ang" Tei chuan a ti sap a. Ka lo thaw hulh ringawt. 

Thla khat a liam tawh a, Hminga nen kan inbe reng bawk. Hma an sawn em em lo. Zonuni an be thei miah lo chu a mak a ni! Ka pa a thah dan kha ka hre duh asin le.. Hriat kher a tulna chu a awm lo naa, hriat chakna a awm lo thei si lo. 

Kan inpuiah Tei te chhungkua an insawn chho ta rih a. Hun pawh a kal ve zel e. Kei pawh hnaah ka tluang ve zel bawk. Jeneti pawh a reh ta vang vang rih mai. Kum khat zet a liam ta. Ka u, USA -a awm te pawh Christmas hmang turin an rawn haw ve a. Chhungkua kan han inhmu khawm chu nuam kan tiin kan hlim kher mai. Nu leh pate ngaih erawh a na duh khawp mai. 

Ni 30 zanah Hmingsanga'n min lo call a, dar 12 a ri thuak tawh awm e. 

"Jeneti chu a dam tawh niin ka hria" a rawn ti ta a.  

"Thu lawmawm tak a nih chu.. Engtikah nge a rawn chhuah theih ang. " ka ti hlut a. 

"Ka kawm zo chiah a. Kumtharah law law ni rawh se a tia" a ti a. 

" A tha alawm. Kan lo inring ang e" ka ti a. 

Ngaihtha takin ka muhil thei ta. 

A tuka Jeneti chungchang ka sawi chu an hlim ve kher mai. Kan lo lainat tlang hle a nih ka ring. Ni 31 a liam a, Zan lai inkhawm kal turin ka insiam mawlh mawlh a. 

"Ka mutchhuak em mai. Ka rawn zui ve lo mai ang che" kan nu chuan a ti a. Ka kalsan ta a. Kan inkhawm rei lem lo. Ka inkhalh haw mek laiin, Ka phone a rawn ri a. Hmingsanga a ni. 

"Mam, Jeneti a tlan chhuak" a rawn ti ta mai a. Ka ding chawt. 

"Eng a?! Engtin? " ka ti nghek a. 

"A roomah kan hmu zo lo. Ventilation atangin a chhuak a nih hmel" a ti a. Phone ka dah a, ka inher kual pup pup, ka pa te in lamah ka tlan thla nghal a. A lo reh thiap. An mu tawh a ni maithei. Thinphu dep depin ka inkhalh let leh a, in ka thlen pawh chuan ka thakhur a reh hleithei lo. Hminga ka call leh a, a la thei bawk si lo. 

Kawngka an rawk kik a, ka va phu chiang tak. Hmanhmawh zetin ka va hawng a, Ka tawlhhnung dawrh. 

Shawl-a inkhun hlunin a lo ding a, nui sâng chungin, "Ka lo let leh ta e. " a ti sap a. Ka melh tlawk tlawk ringawt. Chutah a nui a.. A nuih zawnga a mitmeng chu rapthlak ti zetin ka lo melh kâwk a, "Keimah ka ni.. Keimah" a ti vawt raih a. A rawn pen lut ta a. 

"Zonun.. " ka lo ti tuar a. 

"Jeneti zawk" a ti hap a. A shawl bah chu hlipin, chiang taka mn enin, "Ka dam tawh alawm. Ka dam vek tawh" a ti a. 

"Mahse, engvangin nge i rawn tlan chhuah? " ka ti a. 

"Pawngsual tawh nawn leh ai chuan, thih pawh ka duh zawk" a ti nghat a. Ka hrethiam thlawt lo. 

"Eng maw? A awmzia ka hre lo" ka ti a. Kan tawng ring deuh nge, kan nu a rawn tho ve. Jeneti a hmuh chuan mak a tih ve hmel hle. 

"Tumah hi rintlak an awm lo. I pa tih loh kha chu. " a ti leh mai a. 

Thut hnawk pahin, "Ka chau takzet a ni. Khawngaihin mut ka duh… " a ti a. Kan nu nen kan inmelh zauh. 

Mikhual rooma a luh hnuah bathroomah ka lut a, Hmingsanga ka call.. 

"Kan inah a awm" ka ti a. 

Room-a kan luh hnuah, "I ring em? " kan nu chuan a ti a. 

"Engmah ka hrethiam lo" ka ti sup a. 

Zing dar 2 bawrah kan kawtah motor a rawn ding dawt. 

Kawngka ka va hawng vat a, Hmingsanga leh tlangval pahnih an rawn lut a. Mikhual room lam ka panpui a. Kawngka ka hawng chu ka ding cháwih. Jeneti awzawng a lo awm lo! Khum chu a ruak hiai mai. Hrilhhai zetin kan inmelh a. Tukverh thlanglam chu a inhawng a. Mahse, zuanthlak nan chuan a sang deuh chu a ni. Kan zuk dak vung vung ringawt. 

"Hei " Tlangval pakhat chuan lehkha them hi a rawn lek va a. Khum atanga a lak a niawm e. Ka lo la vat a. Kutziak mawi zet hian, "Hmanah ka thi tawh a. Thih nawn leh ka duh tawh lo e.. Pawngsual hi ka tan thihna ang a ni. I pa rual khan lo kal ve ni ila a tha tur.. Mang tha le" tih thu a ni. 

Hmingsanga ka melh kar, a nui hawk a. "Zawngi mai mai chu'h! Khati zawnga mi puh le.. Ngawi tak rawh.. A hre khawp ang. Jeneti ni loin Zonuni zawk a ni kan lo kawl zawk.. Lemchan thiam lutuk" a ti nghut nghut a. An chhuah hnua kawngka ka kalh hnu chuan, lehkha chu melh leh vang vangin.. Ka hriat tawk lekin ka phun sup a. 

"Jeneti nge i nih Zonuni ka hre lo a ni. Min ngaidam rawh aw" tiin. 

A TAWP TA.