Ka pa Nupui

KA PA NUPUI..! 

Ziaktu: Toni Râlte

"Nu, ka rawn tlawh leh vat ang che.. " tiin ka nu thlan lung la thar tak mai chu ka melh zauh a. Ka nupui kaiin thlanmual chu kan chhuahsan ta a. 

Kan nu chuan, "Kan peng dawn em? Ka pa kha a damsam lo an ti sia" tiin min rawn melh zauh a. Ka rum nghut ringawt. A tarmit chawi chhoh pahin, "Ani chauh saw pa i nei asin. " a ti sap a. A sawi chhan leh a sawi awmzia ka hrechiang khawp mai. Mahse, he thinlung hi a la hel miau si a! Ni e, ka pa chu kum 65 lai a ni ve tawh a, upat lam hnaihin a pension hnu atang phei kha chuan a bawrhsawm chho riau mai a. Hna han thawha insawizawi lam a ngaihven vak lo nen, ka farnute pawn a that vak loh thu min rawn hrilh zauh zauh. Ka bengkhawn ru tho naa, ngaihven angin ka lang duh lem lo. Ka pa ka hrem emaw ka tih laiin keimah pawh ka inhrem tel tho mai. A chhan chu ka nupui sawi ang khan ka pa lo chu pa dang ka nei tawh dawn lo miau a. Ka theihnghilh thei lo bawk ang. 

. "A nih chuan peng zuai ila" ka ti ve ta nge nge a. Ka rilru min hnehsak vanga a lawm vang nimaw ka biang a rawn nul thuak a. 

Ka pa te in kan thlen chuan an lo inkhar thap a, kan nu chuan door bell a hmet ri tlang tlang. Kawngka chu reivak loah a rawn inhawng rak a, ka Nau Tei ni se ka tih tehlul nen, Jeneti a lo nia! Ni e, Ka pa nupui Jeneti.. A nui sáng a, "Awii! Ka rin loh deuhin. Inva fel em em, lo lut r'u" a ti chul a. Kan nu khan a bia a, kei erawh ka lut tlang a, ka pa room ka pan nghal daih. Ka pa chu tukverh lam hawiin a lo thu a, a hmalam a lo thlir vung vung. A sam tuak pheuh pheuh tawh leh a vun mar tawh lem lo, thuangvuakin a bawm chek chek te chu ka melh vung vung a. 

"Ka pa" ka ti zawi sup. 

A rawn inher a, min hmu chu mak a tih ka rin nen mak ti hmel a pu hauh lo. A tarmit phen atang chuan a mit fim kâk chuan min melh a. "Thu ta che" a ti a. Chair ka la a, ka thu ve mai bawk. 

"I nu thlanah inzuk kal a ni maw? " a ti a. Ka nu thihcham a ni tih tal a la hre ve a nih hmel e. 

"Aw.. Kei tal ka kal loh chuan" ka ti hul hak a. 

"Ni e, ni e, Kei chu zingah ka zu kal tawh alawm" a tih chuan mak ti zetin ka melh kal a. Ni dawn tak, pangpar bawr khat nalh zet kha a lo let ngát tak alawm. Ka farnu tu emaw ber dah a nih ka lo ring ve ringawt a nih kha. 

"I nu hi ka theihnghilh reng reng hleinem" a ti leh a. 

"Mahse, Jeneti.. " ka tih mek laiin, "Aw ani pawh ka nupui tho a ni. Ka fate nu erawh a ni lo" a ti nghut a. 

"Ka nu ni zawk se, pasal a nei awm si lo va" ka lo ti ve hmak. 

"Nei se ka duhpui ang. Mama, ka lakah i thinrim ka hria. Mahse, ka then dawn lo" a ti chang fak. 

"A neih chhan che kan hria. Hmeichhe pangngai tak ni se pawi ka ti lo.. Ka pa, i rosum chiah duh hmeichhia hi pawm a harsa a ni," ka ti ve ngat a. Chutianga dengkhawng chuan ka pa ka tawngkhum ngai lo. 

Kawngka a ri rak a, Tray chawiin Jeneti a rawn lut a. Dawhkanah nghatin thingpui a dah a, "Chaw ei ve nghal ula" a ti sap. 

"Aih" ka lo ti hmuk a. Ka pa a melh zauh a, "I nu thihcham a ni sia ka tia, i naute pawh ka lo sawm tawh asin" a ti leh a. Inlak phungthluk a tum lutuk te chu ka ngei tawk a tling. Mipa rilru zim ka ni ngai lo asin le. Mahse, thil thleng a awm tawh miau a ni. Thil thleng mak tak pawh a ni. 

A chhuah hnuah, ka pa chuan, "Engpawhnise, I pa ka ni a, mi mawl ka ni lo tih pawh i hria. Nupa chu nupa nge nge kan ni a, nupui ka mamawh a ni.. Ka bawrhsawm chang pawha min enkawla pasal anga min bawihsawmtu tur ka mamawh. Chu chu Jeneti hian a tlin khawp mai. Nunhlui chu liamtir tawh ila, kum 2 lai a ni tawh. Chhungkaw insuihkhawm hi a hun tawh, ka la dam lai ngei hian" a ti dap dap a. Chhang loin thingpui ka in. Mahse, ka ngaihtuahna erawh insual nasa tak a ni. Enhvanga ka pa hlimna hi tawmpui thei lo nge ka niha Jeneti hi ka nu aiawha pawm thei thlawt lo nge ka nih tih chu keimah leh Jeneti chauhin kan hria. Ka nupui pawn a hre lo. Ni e, a hre tur a ni hauh lo. 

Kum 3 liam taah khan Jeneti hi ka hre tawh a. Chutih lai chuan ka nu a boral tawh. Ka nu kha chuap cancer a ni a, kan hriat chhuah meuh chuan a tai darh nasa tawh lutuk a, chhan theih a ni tawh lo. Unau hi pali kan ni a, kei hi upa ber dawttu ka ni. Kan upa ber hi USA-ah a pasal hna vangin an khawsa a. Ka nau chiah hian pasal neiin an pa kutram lutuk tuar thei lovin a rawn let leh a. Fanu pakhat an nei hman. Kan te ber erawh Designer ni vein Aizawlah chuan mi hriat a hlawh ve viau tawh. Mipa ngaihsak map lo, hna chauh ngaihsak chi a ni a. Mahse, a dawra thawk tlangval amah aia naupang nen an lo inhmel duh ve hlauh ni hmiang. Innei vein ka pa te in hnuaiah an khawsa ve a. Kei hi ka nu thih hma kumah chiah nupui neiin kan nu hi Sangteii a ni a, Chaltlang nula fel leh nungchang thaa sawi a ni. MZU-a thawkin, Geography Department-ah Asst. Professor ka ni ve a,kan nu pawh hi a nulat lai khan College-ah a thawk ve a. Mahse, kan inneih takah khan house wife nih thlang ta zawkin kan fa te a enkawl hnehsawh viau. Fa hi pathum kan nei tawh a, a te ber hmeichhia a ni. Ka nu thih atangin ka pa nun chu hremhmunah a chang ka ti mai teh ang. A khua a har em em a, nupa inngai leh inzui chawt an ni bawk nen, kan manganpui khawp mai. A pension a, a tar bawih bawih mai bawk. Mahse, kum 2- liamtaah khan Jeneti hi tawngin nupuiah a nei ta a ni. Jeneti a neih lai hian hna vanga Chennai-a ka zin lai a ni a. Kan nuin min rawn hrilh a, ka lo lawmpui viau. Ka pa ka khawngaih leh lainat vangin. Ka haw ta a, in ka thlena ka pa nupui ka hmuh rual khan kan chhungkaw inlaichinna chu a keh ţan ta chiah a ni. Ni e, Jeneti ka hmuh khan ka â lo chauh! Ka melh tlawk tlawk ringawt. Ani erawh chuan nui sáng leh hawihhawm takin min dawngsawng a. Min hre ngai miah lo angin a awm nia! Kan inhrechiang nasa mai si a. Ka awmdan avangin kan nu hnen atang pawn zawhna ka dawng nasa a, chhanna dik tak erawh ka pe thei lo. Ka chhanna awmchhun chu,"Ka pa nupui atan a la naupang lutuk. Ka pa rosum chiah a duh" tih a ni tawp. A phêna thuruk awm ka puan chuan kan kehdarh zau sawt dawn.. 

Ka pa pawn ka lawm lo tih a hria. Zawi zawiin Jeneti avangin kan inhlat telh telh a, Chhungkaw boruak a nuam lo tial tial bawk. Sawi hmaih loh tur chu kan nuthlawi kawl ka nau chiah Hriati khan pasal a nei ve leh tawh a. A fanu erawh ka pa hian a duat em vangin kan inah chuan a la khawsa a. Hriati te nupa pawh kan vengah tho awmin, an pa patea te in an luah ve a. An pa hi Sawrkar hnathawk a ni bawk a, an khawsa thei ve viau. Tunah fa pahnih an nei tawh a. Hriati fanu Akimi pawh kum 12 a rawn tling ve tawh a, Hriati leh a pasal hmasa kha an inneih khan an naupang dun ve em bawk a, Akimi leh anu phei chu unau emaw tih mai tur an ni. Chutia boruak nuam lem lo tak hnuaia khawsak ho reng chu dikin ka hre ta lo va, Jeneti chu sawiselna tur a awm hran lo. Ka pa chu a hmangaih ve tak tak a niang e tihtheih turin a duatin a enkawl thiam a ni. An inneih tirh khan veng chhung sawi a tling hial reng a. An kum inthlauh luat vang kha a ni ber. Kan tan tak pawh a zahthlakna chen a awm ve a, ka nu chhungte lam lahin ka pa an lo dem ve mek bawk nen. Mahse, ka pa hi mi luhlul leh tlang tak, a kal tawhna lama kal ngat ngat mi a ni miau a, tu thusawi mah chu a bengkhawn duh lo. Chhungkaw pa ber a ni bawk a, keini tan lah han nêk vak ngam ni hek lo. Jeneti chuan fa a nei thei lo thung! A chhan erawh ka hre lo. Tin, amah hi a chanchin kan hre tam viau lo, Chhungte sawi tur a nei mumal lo. Ka pa nen an intawn dan pawh ka pa Zin haw, a motora rawn chuang ve, inkawm nel ta an ni awm e. Thingtlang khua atanga rawn chuang chhuak, mahnia ei in dap ve, mi in luaha khawsa niin a insawi a. A nu sawn niin a pa a hriat loh thu leh a nuin pasal a neihsan tak vanga a putea te chhungkaw bula khawsa, an tihduhdah vanga Aizawla rawn awm ve ta tawp mai niin a insawi. A bak tuman kan hre lo. A sawi ngai hek lo. Ka pa nun a hlim a, a hriselna pawh a tha. Kei ka rawih tial tial thung. Jeneti hmel ka hmuh apiangin ka danglam thin si a. Ka hmuh phak lohna hmuna ka awm loh chuan, kan la kehdarh tak tak ang tih hlauin in hrang chan ka rawt ta hmiah a. Ka pa rilru ka tina hle. Mahse, a tul ka ti tlat si a ni. Tichuan, kan veng thenawma ka pa in lei tharah kan insawn ta a. Kha ta tang khan ka tlawh leh ta lo. Kan nu hi chu a kal zeuh zeuh.. Kum 2 tawp inpui tlawh miah lo va ka khawsa thei chu ka farnu bakah kan chhungte pawn min dem khawp mai. Thiamthu ka sawi ngai lo. Ka pa a hlim chuan a tha mai tih tanin ka tang tlat thin. Mahse, hei vawiinah kan nu min ngenna ka hnar zo ta bik lo a nih hi.. 

Ka pate room atanga ka chhuah hnu lawkah Tei te nupa an rawn chho a, an ni hian fa pakhat an nei ve tawh a, mahse, vanduaithlak takin kum khat lek anihin Septicemia vangin a boral ta mai a. An la pai leh ta lo a ni. Fa an awh luatah Akimi hi naute cheibawl taka cheibawl an tum thin a, ani lah a tleirawl titih tawh si, an invin hlak hlak reng mai. Tei'n min hmuh chuan, "Khawvel a tawp tawh dawn ni maw? " a ti zauh a. Ani hi zawng nui miah si lo a awmze nei zeta thil sawi thiam chi ngang kha a nia. 

"I chhe mai e a" ka lo ti hluk. Hriati aw kan hre ve zat, "Awii! Mama hi.. A va'n mak! U Sangteii'n a rawn nawrkal ve ni chiang" a ti hlut a. Kan nu a lo nui var var mai. 

Chaw kan ei loh tur thu ka lo sawi tawh si, mahse, ka farnute an rawn thawkrip angreng si. Ka inthlahrung ta lek lek. Kan fate erawh ngaihtuahawm an ni lo, Sangteii te in lamah an leng a, zanah daih an rawn haw leh ang. Kan nu chuan zawi sap hian, "Ei ve mai ang, a nuam lo, ka tan pawh" a ti a. 

Nia, mo a ni a, mi dangin an ngaihdan turte pawh ngaihtuahpui chu a tha ve tho mai. Jeneti lam hawiin, "Chaw chu min chhumkep mai rawh" ka ti ta a. A lawm hmel chu hmuh nuam ka tih loh vangin ka hawisawn thuai. Mi dang zawng hi chuan Jeneti ka huat vanga inla hrangah min ngai ka tih tawh kha. Chutiang ang taka lan pawh ka tum rêng a ni. 

Dar 6-ah zanriah kan ei a. Ka farnute hi an fel em a, ti mai ang. Jeneti pawh thinlung takin an pawm thei vek tawh a ni. An titi bawrh bawrh a, kan nu lah a phur nasa. Rin ai tak chuan kan boruak a tha e. Chaw eikhamah naupang kan ngaihtuah deuh vangin kan haw phei ta a. 

"Leng zeuh zeuh tawh ang aw" kan nu chuan a ti sar sar a. 

"Kan tum dawn nia" ka ti ve mai. In kan thlen hnu lawkah naupangho pawh an rawn thlah a. Kei erawh hna lam thilah ka buai leh, ka mut meuh chuan dar 10 a pel thuak tawh. Kan nu pawh a lo muhil tawh a. Ka tiharh duh ta lo mai. Ka ngaihtuahna kawmin ka chhing vang vang a. Jeneti hmel chu ka mitthlaah a rawn lang leh ta. Ni e, Jeneti hi ka pa nupui a nih hma khan ka hre tawh ka tih kha. Kan inhriat dan a fuh loh vang nge a fuh lutuk vang zawk, ka nu aiawh atan ka phal mang hlek lo chu a nih hi. 

Kan fa pahnihna kum khatna kan lawm tum hian, vanduaithlak takin kan nu nutapa, Apuia leh a thianpa te an accident a, truck nen an insu a niawm e. Kei ni nupa pawh kan va phei ve nghal a. Bawiha birthday pawh mumalin kan lawm thei ta lo. Apuia zawk chu a helmetin a chhanhim ti mai ang, a ban erawh a tliak a. A thianpa erawh kan phei atanga rei vak loah a chatthla ta a. A zia lo takzet a ni. A thianpa hi nau anga ka en tho, Mapuia a ni a. Kan nu a awm tho a tiin a ruang ka zui haw ve a. Apuia ngaihtuahawm em em a ni lo bawk nen. Kan nu pawh rei awm loin Naupangho ngaihtuah ngai nen, a lo haw ve daih a lo nia. Mapuia ruang chu lumen a ngaih tak siah chuan dar 2 bawr vel thleng ka han awm ve ren rawn a. A tukah presentation nei tur ka ni sia, han tlaivar em chu tiin ral leh hisapin ka hawsan ta a. Hetah hian a nia Jeneti nen kan intawn ni. Kan in lam pana ka inkhalh phei chu Millinium centre pelh hlekah sawn amah chauhin a kal phei a. Zep nak emaw Ks ni turah ka ngai nghal. Mahse, min lo phar ding a. A hmel en chuan ruih nei leh chutia vak rawlai hmel a pu lem lo. "Khawngaih takin ka lo chuang ve thei ang em? Ka thiante nen kan inhloh a, keimaha haw chu ka zuam lo" a ti a. Chuti na na na chu tiin kan inphur phei ta a. An vengte pawh a sawi. A in luah pengah ka drop ta a. Lawmthu sawi pahin, "Lo leng lut la, thingpui te lo in ta che" a ti a. 

"Aa.. Hna ka la nei a, a tlai tawh em mai'tiin ka hnar a. Mahse, a kal mai lo. "Khawngaihin, a chhan chu ka in luahna nu hi a kher khiap lutuk a, eng emaw zawnga min ngaih ka hlau, nang chu i zahawm a, a thinrim lo vang" a ti tlat mai a. 

"An mu vek tawh ang.. An hre lo ang" ka tih paw'n, "ka hria alawm.. Ka haw hma a mu ngai lo" a ti miau si. Chuti na na na chu tiin, kua a lo ruak deuh bawk nen kan inzui thla ta a. A sawi ang tak tak chuan a in panna step kan zawh laiin in chung tukverh a rawn inhawng a. "I va tlai ve" a rawn ti chat mai. 

"Nia, kan thiannu nau a boral a, hei kan va kal ve a. Kan rawn haw chiah" a ti mai a. Min rawn melh vung vung, a ngaih a tha niang, engmah sawi lo chuan tukverh pawh a khar zui ve mai. A in luah chu a zim viau naa, a thianghlim phian. Thingpui a lum rak rak a. A lum tui em em lehnghal. Chanchinte kan han inhrilh nawk nawk a. Chanmari-ah Hardware dawr a nghah thu te a sawi a, kei pawh nupui fanau nei ka nih thute thlengin ka sawi. Dar 3 a pel ta a, ka hawsan ta a ni. A bultanna lek a lo nia! Khami hnu khan vawi hnih tum loh deuhin kan inhmu a, mahse, a rei lo. Hna vangin Gauhati-ah ka zu zin a. Mak takin Mizoram House-ah a lo lang ve leh nawlh. Chutah chuan a nia thil tam tak a thlen tak. An dawr thilah a pu nen an zin ve a lo nia. Innel sa ang takin kan inkawm bawrh bawrh a. Zanah ka roomah rawn lengin, Zu kan in dun ta a. Ka chak lohna a rawn lang ta chiah a, ani lahin min hnar hek suh. Tih sa loh loh kan ti dun ta a ni. Ka fimkhur avangin condom erawh ka hmang a. A chhan chu nula, mahnia in luah, chhungte sawi tur mumal nei ta lo chu rin ngawt a him lo ve thei a ni. Ni e, kan cham chhung zawng ka roomah ka khum min tawmpui a, inthiam lohna nei thin mah ila; Amah Jeneti chu a confi em em reng a, a hlimin a phur thei si. Kan nu laka ka la dawn ngai loh nawmna nasa zawk leh tihdan maksak tak tak min hlui reng a, ka tan hnar a harsa em a ni. Keimaha ka awm erawh chuan a dik lo tih ka hria, kan nu ka hmaizah ngawih ngawih. Mahse, Jeneti a rawn lan tawh chuan khum lam bak rilruah a leng thei meuh lo. Hmeichhe zei tak, khumlaizawla nawhchizuar ai pawha tenawm thiam zawk, mi hmuha Nu dim dem leh pawisawi lo tak anga lang thiam si a ni a, kar khat dawn kan inhrawn takah chuan ngainat namen loin kan inngaina tawh. Mahse, nupui thlak tumna leh Jeneti han belbul zui tumna ka nei lo. Kan enjoy ve satliahah ka ngai tawp. Ani erawh chuan eng nge a tum ka hre hauh lo, ka bulah, "Innei ang aw.. " ti lam a sawi ngai lo va. Ka nupui fanaute chanchin a sawi ngai hek lo. Kan inngaizawng miah lo bawk. An haw hmasa a. Kan inbe zui lem lo bawk. Mak ve tak chu a ni. 

Kei pawh ka haw a. Kan nu kha a va zahawm tak. Min ring si, ka inten ngawih ngawih mai. Chuvang chuan tiin a rukin Pastor ka pan a. Ka inpuang fai ta leng a. Pathian hnenah ngaihdam dilin tlukna suala tlu tawh lo turin ka intiam ta a. Rilru pawh a hahdam ta deuh, kan nu bulah erawh ka sawi ngam ta ngang lo. Jeneti number ka delete a, ka chhungkaw tana theihtawp chhuah ka tum zui ta a ni. Kha hun atang khan vawiin thlengin ka pelhe leh ta lo va, Zep thu a cheng lo. Kan zirlai naupang ngei ngei, nalh leh itawm tak tak min star ve a ni tih hriatchiante nen pwh remchang zawng a awm ve thin e. Mahse, ka tihsualin ka nun a vuak let natzia leh keima tawka hrehawm ka tihzia kha ka hrechhuak thin a. Tluk loh hram tumin ka insangmar hram hram thin. Tun lai huna pa tam tak, nu tam tak kan uire nasat tawhzia hi aw.. Ni e, thenkhat phei chu kan inenliam tawh a ni ber e. Thil mak leh zahthlakah pawh kan ngai tawh mang lo. Kawppui neiin kawppui ka nei ti bik hek suh, a nei lo ho lahin mi pawm lai a nia tia lo hnar tum bik hek suh. Mi tenawm leh mi tenawm hi kan inpel suau suau a nih tak ber hi a.. Kei chuan Jeneti ka demna aiin keimah ka indemna leh intenna a nasa zawk, Hnar thei tur ka ni a. Jeneti kha ka hmaah saruakin a intawktarh reng reng lo, kan zu rui luhai lungpuamin zahna bosalin bul ka tanpui zawk a ni. Chuvang tak chuan a nia hrehawm ka tiha kan nu pawh ka zah ngawih ngawih ni. Ka haw tirh phei kha chuan ka then mai dawn mawni aw tih te ka ngaihtuah hial. A tan ka tling zo tawh khan ka hre lo, hre ta se a nat turzia ka dawn thiam si.. Mahse, ka fate nu leh ka nupui tur atan ani tluka tling zo ka hre bawk si lo. Rinawm lohna khan min va bawhbet reiin ka nun kha hremhmunah a va chantir rei tak em.. Mahse, ka vannei a, inchhir nachang hriain ka suahsualna chu min tiharhtu a ni ta a. Kawng hlui zawh loin nupa hlim tak kan ni chho ta a, ka lawm veng veng thin. 

Hei hi a ni. Jeneti ka hmuhmawhna chhan leh ka pa nupui ni tura ka duh loh chhan chu. A chang phei chuan ka laka phuba lak a duh vangin ka pa a nei aniang tihte ka ngaihtuah thin. Ka pa, pa tar lam tawh, nupa nun pawh hmanpui hlei thei tawh lo tur a neih ngawt danah hian chhan tha tak a neih ka ring tlat a, chu chuan min phuarin min thunun a, ka huat phah ta mai a ni. Ka pa boral hunah a chhan dik tak zawng a rawn lang mai ang chu! 

Ka pa te ina chaw kan ei atang khan ni 3 a liam leh ta a. Office-ah project ka khawih mek a, ka buai ve viau. Kan nuin min lo call pawh chu ka ner lek lek. "Mam, Ka pa ten buaina an tawk. Akimi nikhaw hre loin a awm" a rawn ti ta mai a. Akimi chu ka farnu Hriati fanu ka tih tawh kha. Ka pa te bula khawsa a ni. Jeneti nen pawh an inngeih phian kha a nia. Kan nu thil sawi chuan, min ţhawng hle. 

"chuan, i kal em? " ka ti a. 

"Aw hei ka insiam mek. Ka rawn hrilh leh ang che" tiin a dah ta a. Rilru a la peng ve riau. Akimi hi chu kan hmuh hmasak ber a ni bawk a, kan rilru a la bikin a duat pawh kan duat tlang riau kha a nia. Awm a tinuam lo zo vek. Kan ban hma deuhin, kan nu chuan a lo call leh a. "A la harh thei lo, Doctor te chuan thil eng emaw ţhawng deuhtu leh hlauh deuh a nei a nih hi an tia.. A mak khawp mai" a rawn ti a. 

"Aw hei kan lo haw dawn hnai e. Ka rawn tlang ve ang" ka ti a. Ka sawi hmaih pakhat chu, kan te ber kan neih hnu lawkah kan nu hian zaipui a tawk a. Indim a ngaih bakah a bawrhsawm chho riau si a. Kan fate lah a harh leh ninhlei rual an ni si. Kan nu te chhung lam, Thingtlang ami Ruati, kum 24 bawr vel kan awmpui ta a. A felin a taima bawk a, kan nu hriselna pawh a tha chak hle. Kan nu a chak chhoh leh takah chuan Ruati pawh kan in piah lawkah puanthui a zir ve a. Kan chhuahvah nikhuain in lam a lo enkawl thei vek a, hah a dam hle. 

Damdawiinah chuan ka tlang a. Kan nu pawh a lo la awm. Ka pa leh Jeneti te pawh bangbo takin an lo hawi an lo hawi ve ringawt. Jeneti sawi danin, "A rawn haw kha,'Ka lu a na lutuk a, haw ka dil a' a tia. Damdawite ka eitir a. Mu turin a room a pan a. Thingpui ka va pe a, ka chhuak lehnghal. Chumi hnu chuan a rawn rak ta chiam a, a pu erawh thenawmte ina a awm lai a nia. A rooma ka va luh chuan nikhua a lo hre tawh lo. Engmah a taksaah hliam a awm bawk si lo" tiin. 

A mak mang e aw. Eng tak hmu ang maw? Khua a thim dawn mai si a, Jeneti'n a awmpui a, mi dang zawng chu kan haw ta a. Ka pa pawh kan inah chaw a ei mai aniang chu. Jeneti erawh Tei pasalin chaw a han pe thung ang. Kan chaw ei lai chuan, Ka pa chuan, "Nizan hmasa chu mang mak deuh ka mang a. Han sawi hluai atan chuan ho ka ti tho sia" a ti a. Kan nu chuan, "Sawi teh" a lo ti var a. 

"Englo a nia. Zing dar 2 velah ka harh a, Jeneti hi a lo awm miah lo va, mahse, ka mut chhuak lutuk kha ka muhil zawm leh ta mai a. Chuta ka muhil ka mumangah chuan ka lo harh leh a, Jeneti pawh chu a la awm ta chuang lo. Ka lo tho a, bathroom ka hawng a. A awm bawk si lo, room atangin ka chhuak a. Ka ko bawk. A reh hmiah sia, mahse, rooma let leh ka tum mek laiin Choka bathroom atangin a rawn chhuak a. Ka hmu chiah kha hlauhna namen lo hian min tuam ta mai a! Ni e, Jeneti ngei chu a nia, mahse, amah a ni lo. Ka sawi thiam lo, amah a ni lo tih kha ka hre thei. Verther zet hian min rawn nuih ver ver a, hlau zetin roomah ka luhsan a. Kawngka ka kalh nghal. Khumah chuan Jeneti tho chu a lo mu reng a nih chu! Mumanga thuchang patlinga pumpa ka khur chhe titih ta mai a. Ka ding ta reng ringawt mai. Mahse, chutia hlauhlawp deuha ka awm lai chuan, "Paa.. Paa.. " tiin Jeneti hian min rawn sawi nawk nawk a. Ka harh ta a. Ka hawi phawk nasa viau, amah Jeneti lah chuan ka manga ka hmuh ang kawr leh kekawr chiah a lo ha zui.. Ka awm a nuam lo ta riau a.. Mahse, khua a var a, ka ziaawm ta a.. Mak erawh ka ti angreng khawp mai" a ti ta dap dap a. Kan nu nen chuan kan inmelh hrek hrek. Ka pa mumang chu mak ka ti khawp mai, kei pawn. A dangdai riau. Mahse, mumang khel vak chu a naupangchhia kan ti nge kan sawi zawm ta lo. 

Ka pa chu kan in puiah amah chauha riahtir ai chuan tiin Sangteii chuan riakah a sawm a. Mahse, a duh lo. Ka va thlah ta nge nge a. "Awmpui la rawh u, intlem hrim hrim, a khawharthlak" ka ti a. 

"Tei te chhungkua an rawn lawr reng tho a, kan khua a har vak lo" a ti mai a. Rei ka thu lo, Meeting ka nei lehpek nen. Ka hawsan ta a. 

Kan nuin Jeneti a call a, chanchin a va zawt a. "A rawn harh zuai a, mahse, muthilhnain an jection a, a muhil zawm leh tawh e" a rawn ti a. Ngaihthat lohna zualpui a kiang ta deuh e. Kan meeting zawh meuh chuan dar 10 a pel tawh. Kan nu a lo la meng a. Kan intifai a, kan mu zui ve nghal. Mahse, zinga kan thu hriat chuan min va ţhawng si êm..! 

"Mam, tho teh.. Tho vat teh. Ka pa thichhawngin a awm a nia" titu ka nupui chu mitek kar atangin ka han hmu phe ruai a. A thlabar hmel takzet. 

Ka inperh tho nghal a. "Eng nge i sawi? " ka ti nghek a. 

"Ka pa an rawk, nizanah.. An rawk nge ka hre lo. Tei'n min lo call a, engmah a rawn sawi vak hman lo. Kal vat ang" a ti a. Kei pawh mut kawr nen hmai pawh phih lo chuan ka chhuak nghal. Ka pa te in kan zu thlen chuan an lo awm nual tawh a. Tei ţap hmel ka hmu nghal. Ka pa chu a mar a la awm avangin damdawiina phurh chhoh turin an lo bawihsawm fel diam tawh a. Awm khawmuang loin kan chho zui nghal. Rilru a mang hle mai. Jeneti'n min lo hmuak a. A hmel phelh phang leh mit bui lák atang chuan a lo tap hrep tawh a ni maithei. Doctor ten min ensak nghal zung zung a. Rilru a chawl lo mang e. Ka pa nat dan tak pawh ka hre ve lo, OT-ah an nawr lut rum rum bawk si. Mahse, Tei pasal chuan kan ziaawm deuh hnuah thil awmdan a sawi ta a. 

"Tei hian a ngaihtuah deuh vangin han riah chhoh kan tum a, mahse, amah ka pu khan, 'Inho mai mai. Naupang chhia pawj ka ni lo va. Mahnia riak ngam lo te pawh ka ang dawn alawm. " a tih tlat vangin kan riak ta lo a. Thawm engmah kan hre lo. Zinga Bawihtea te unau han chho kha an rawn tlan thla vat a. "Apa apu a thi nasa lutuk" an rawn ti ta mai a. Ni dangah pawh zingah hian an thawh veleh an chho thin, ka pu te nupa hi an tho hma thin bawk a. Thingpui an han in ziah thin a, Rang takin Tei nen kan chho nghal a. Ka pu chu an roomah khum bul chhuatah thisen nena inchiahpiah nuaiin a lo let reng mai a ni. Kan chiái nasa mai a, mahse, Bawihtea te tawng ri an lo hre ve nge thenawmte an rawn tlan lut nghal a. Tikhan kan inbuaipui zui ta a nih kha.. " a ti ta a. 

"Thil bo a awm em? " ka ti vat. 

"In rawn thlen hma deuh khan thenawm tlangval nen kan han en ve thuak thuak a, thil bo a awm awm ka hre lo, Safe pawh a la him vek. Mahse, ka pu phone erawh kan hmu zo lo" a ti a. 

"Bawihtea te chu engtin nge in chhungah an luh theih? Ka pa lah thichhawngin a let si.. A nih chuan kawngka a inhawng sa tihna a nia. " ka ti a. "Ka pu khawihtute hi engtin nge an luh theih zawk tih ka ngaihtuah" a lo ti a. Ni e, chu chu a mak! Ka pa hi pa fimkhur tak leh chimlim tak a ni a. Kan tet lai atang tawhin a mut dawn apiangin kawngka leh tukverh kan kalh tha em tih a enfiah leh vek thin. Tukverhah chuan bar kan kham vek a. Kawngkapui atang chauh lo chuan luhna tur a awm lo. Ka pa chuan kawngkapui a kalh theihnghilh dawn lo sa.. Lo theihnghilh ta tehreng pawh nise, amah chiahin a awm tih leh kawngka a kalh lo tih chu tuin nge hria ang? Ka rilruah mi pakhat chiah a awm. Jeneti! Ringhlel tur ka nih loh laiin ka ringhlel miau si a! Mahse, ka sawi chuan ka unaute ngei pawn amah puhchhiat ka tumna angah an ngai thei. Min hmuh dan a sirhe daih thei. Fiahna tak tak ka nei si lo va. 

Amah ka pa ka atanga kan hriat a ngai tihna a nih tawh mai chu.. 

Ka pa an zai chhungin Akimi kan va hmu a. Ani pawh a harh tawh a. A la meng á deuh ruai thung. A nu in a lo thutpui a. Jeneti erawh khaw nge a kal ka hre lo. Hriati chuan, "kan kal vek ringawt sia, in lam chinfel leh police lo dawnsawn te a ngai dawn sia, a haw ta mai a nih kha" a lo ti a. Akimi chu a rawn irh uk uk a, tui kan pe vat. A rawn tho kang deuh a. 

"Khaw nge Api? " a ti tham ţiak a. 

"A haw lawk a.. Engtin nge i awm. Bawihte" a nu chuan a lo ti vat a. 

. "ka hlau" a ti sap. A melh ngai a melh vung vung bawk. 

"Eng nge i hlauh, Duati.. Min han hrilh ve teh" tiin a kut ka vuan vat a. Min rawn melh vak ringawt. 

A nu pawh chuan, "Hlauh tur a awm tawh lo tunah chuan, niminah khan eng nge i hlauh han sawi teh" a lo ti dam diai a. 

Akimi hi engvangin nge A nu Hriati zawk hian a riahpui loh kan ti maithei. Hriati pasal pi, tar ve tawh tak mai hi menpui ngai khawpin thihsualin a awm tawh a. An mo te zingah Hriati hi a mawngzang ber leh a awlthawng ber a ni si a, Ka pa zawkin, "In pa te lam buaina a ni sia, a pi a awm tho a, va haw zawk mai rawh. I pawimawh zawk, He lam chu kan tha rih tho" a tih vangin a haw ta kha a nia. Amah zawk hi riak ta se, Ka pa chungah he thil hi a thleng tho ang em? 

Akimi chuan a mit a khap fak fak a. Min rawn en a. "Ih maw, pute.. " a ti hluai a. Ka lo bu nghut. 

"Ih, niminah khan ka lu a na lutuk a ka haw a. Api khan damdawi min eitir a. Ka mu ta a. Mahse, thingpui min rawn pe leh a, ka in a, ka in zawh hnu lawk khan ka zun a chhuak lutuk a.. Ka va zung a. Ka zung zo bathroom-a tanga ka chhuak chiah kha.. (A hmui a hup chawih a, a mitmeng pawh a danglam vek. Ka lo vuan vat a) ka khumah khan Api Jeneti kha a lo mu a, min lo nuih vur vur a. Mahse, api Jeneti a ang a, amah a ni lo.. Amah ka hmuh khan ka hlau ve tawp.. Ka sawi thiam lo. Ka hlau lutuk a ni mai. Ka rak vak a. Chuan, Api chu a rawn tho a, ka ka a rawn hup a, "Shhs.. Miin an hria ang' a ti a. A bak ka hre zui tawh lo. Ka harh chuan hetah ka lo mu a. Api Jeneti hian min lo awmpui a. Mahse, min awmpuitu kha chu ka hlau tawh miah lo" a ti khur ta dat dat a. Mak kan ti kher mai. Ka pa mumang ka hrechhuak nghal vang vang bawk. Jeneti -ah hian dik lo zawng a awm a ni ngei mai. 

Ka pa chu an zai zo ta a, a nak veilam leh a dulah vih a ni a. Chemte a sei vak lo nge a kawchhung lam a khawihchhe tam hman lo niawm tak a ni. Doctor chuan, "Kan zai hlawhtling thawkhat chuan ka hria a. Mahse, engkim hi chunglam thu thu a ni e" a ti dam thlup a. Thla a muang suai suai mai. Cabin kan hauhsak a, ka pa chu kan dah lut ta a. Kei pawh vawiin chu ka hnaah ka kal ta lo. Kan nu in ka pa chu a awmpui ta rih a, Hriati'n Akimi a awmpui rih a ngai si.. Kei erawh ka pa te in lamah ka chhuk ta a. Eng emaw en fel puite an ngai ve dawn a. Ka zu thlen thlak chuan, Police te pawh a lo la awm a. Jeneti nen an lo inbe mek. Thil engmah a hriat loh thu leh Tei'n a rawn biak thu bak sawi tur a hre lo. Ni e, damdawiinah a awm miau si a. Mahse, he nu hi rinngam lohna lian tak ka nei a ni. 

Police bakah mi dang ho an kal rem deuh hnu chuan, "Jenet, nizanah i rawn haw leh em? " ka ti ta hmiah a. Mak tih hmel taka min enin, "A teuh lo mai. Ka rin aiin ka mu tui a,Akimi harh leh harh loh pawh ka hre lo" a ti a. 

"Ka pa nen in inbe hrim hrim em? " ka ti leh a. 

"Bia e. A mut dawnah min rawn bia alawm.. Mak ka tih chu kawngka a kalh sia, engtin nge khang mite kha an luh theih ang? " a ti a. 

"Chu tak chu lawm ka buaina.. Ka pa phone lah a bo hmak bawk si" ka ti a. 

"Nia, Zinga ka harh pawh khan call ka tum a, a switch off tlat tawh" a ti ve mai a. 

Police ten dap vek tawh mah se, ngaihthat nan ka'n enkual ve leh renh reng a. Tukverh han tihchhiat emaw han luh rukna hnuhma engmah a awm lo. Thil bo a awm miah lo bawk. Jeneti lahin an pawisa kawl pakhatmah a bo loh thu a sawi bawk si. Thil mak tak chu a ni. Ka pa phone chu awm se hnuhma kan hre thei mahna le.. Engvanga ka pa nunna lak tum nge an nih ang? Ka pa hian mi pawi a sawi ka hre ngai lo, Pa tawng tam lo tak, sawi tur hre em em lo, Kohhranah pawh rawngbawltu ni lai, Khawtlang lamah erawh a phak tawka inhmang, nihna erawh nei lo a ni thung a. Pathian thu han sawi hluah te hi a thiam ve vak lo naa, mi chanhaite tanpuina kawngah a thawh hlawk ber pawl a ni thin. A nunna hialin a tawrh phah khawp eng thil tak ti ang maw?! 

Akimi a chhuak a, ka pa erawh a awm rei deuh ang. Mawlhtu ka neih miau avangin zanah pawh keimah ka pa chu riahpui ka tum a ni. Ka naute leh Jeneti ngei pawn an hrethiam chiah lo tih ka hria. A nupui awm ve reng a, a fapa in hrang chang tawh lehnghalin ka riahpui daih mai chu.. Mahse, Jeneti'n a riahpui chuan ka pa chu thi dawn tlatin ka hria a. Chu erawh sawi kher tulin ka hre lo. Tin, Jeneti hi chhui chian tha ka ti ta bawk. Kan khatih dun lai khan han chhui chiana hriatchian kha ka tum lem lo va, mahse, kan inhmuh hmasak bera a in luah kha chu ka la hria. Khata tanga bultana a dawr thawhna thinte pawh zawh kual ka tum rilru ta. Ka pa hi han ziaawm phawt se. Kan nu pawn ka pa riahpui ka tum chu a chhan min zawt reng a, "Akimi a chhuak ve chiah a, Jeneti'n a awmpui a ngai alawm.. " ka ti mai a. A hmin zan lo tih ka hria. Mahse, sawi thui ka hlau si a ni. 

Zanriah ei sain ka pa riahpui tur chuan ka thawk chhuak ta a. A la harh lo va, oxygen an pe bawk. An zai hlawhtlin vang khan a damkhawchhuah erawh ka beisei hle thung. Kha chen a lakah hel mah ila, ka pa a nihna a bo lo va, a hlutzia ka hrefiah thar khawp mai. Tihtur awm hek lo, phone ka khal ta mai mai a. Ka pa erawh a mu chiah chiah thung. Dar 11 velah ka va inthiar a. Mu turin ka intintuah ve ta a. Kawngka pawh ka en dik leh ngat. A inkalh e. Ka muhil siar siar tawh tihin, Ka pa nupui tia ka save that leh Jeneti number atangin, "A dawtah chuan nangmah" tih thu ka dawng ta a..! Ka chhiar nawn sek. Ka call nghal a. A ring quit thak. A awmzia ka hre lo mahse, rindan ka nei thiam.. Ka rilru te te chuan, "He hmeichhia hi ka hrechiang ngei tur a ni.. " tih ka ngaihtuah thung. 

A tukah kan nuin ka pa chu a awmpui thung. Hnaa ka kal hmain ka pa te inah chuan ka zuk peng a, Akimi chu a nuteii te inah a awm a. Jeneti chuan ei rawng a lo bawl a. 

"Nizana i msg kha eng nge a awmzia? " ka ti nghal thâwr a. 

Hrilhhai hmel zet hian, "Eng msg maw? " a ti ha a. 

"En la" tih pahin ka phone chu ka entir a. A tawlhhnung hrat a, a hmel a dâng lap mai. Hnuai lam melhin, "Ka hre lo.. Engmah" a ti hniam raih a. 

"Dawt sawi suh. Nang hian eng nge i tih tih hi ka la hre zel dawn. Eng nge tih leh i tum tihte thlengin" ka ti hmuk hmuk a. 

"Mam, engmah ka hre lo tak tak. Ka phoneah kha thil kha hmuh tur a awm lo" a ti nem thlap a. 

"Tihian pawisawi lo ang hian i lang a. Mize inthup thei lutuk hmeichhia i nih hi. I nihna dik tak ka hriat hunah chuan i nasa lo khawp ang" ka ti ram leh hmak a. 

Akimi a rawn luh vangin ka sawi zawm ta lo. 

"Pute, Apu chu a harh tawh em? " a ti a. 

"Harh lo deuh, school i chawlh tho chuan han kal ve rawh. A harh tawh maithei. I pi erawh hi chuan in nghak rawh se.. Mi sual an lo kal leh palh ang" tiel rawngkai lek lek hian ka ti a. Jeneti mitmenga tawrhna lang zawk pawh ka va hmu. Ka chhuak ta nal nal a. Chawhma chhung ngeiin ka tihfel tur te ka tifel zawk zawk a. Thil dang ka buaipui hman meuh lo. Chawhnuah ka tlan haw ta a. Jeneti in luahna veng lam ka pan ta a. Ka la hrechiang bawk a, An in luahna te pawh an lo awm hlauh e. An nu ber pawh a lo lang tar ve te viau mai. 

Min hre tawh dawn chuang lo bawk a, insawi khawmawi ka tum lem lo. "Jeneti cousin ka nia, ka rawn zawng a. He lai hi a luah thin tih ka hria a. A awm tawh si lo va" ti zawngin ka dawr ta a. 

Nu chuan min melh vang vang a. "A ni maw? A luah lohna a rei tawh alawm. Pasal a nei a, putar hausa deuh a nei alawm. " a ti ta a. Ka chhungril a ner sawk. Ka pa hi a hausa lem lo asin mawle. 

"Ih maw, Ka pi, Jeneti nen inboruak kha a tha hrim hrim em? Hman deuha kan inbiak chuan min hnawtchhuak te a rawn tia.. Eng nge maw a awmzia le? " ka ti ta ringawt a. 

Pitar chu a thle bak a, "A va mak mai mai e aw. Kan in chu luah lo se a mualpho daih tawh ang. A baihvaizia kan hriat vangin kan hrethiam hram hram zawk a nih kha. Jeneti kha chu hriatthiam a har em mai" a ti a. 

"Nia kei pawn ka hrethiam lo thin alawm. Pasal a neih tur thu pawh min hrilh miah lo va… ka be pawp thei tawh si lo a" ka ti a. Min awih ang em pawh ka hre tawh lo e a. 

An pa zawk chuan, khuh kharh kharh chung hian, "Aa.. Mi dangdai tak chu a ni. A chang khan a sual em em a, a changin tihnat hlauhawm khawpin a derdep leh bawk si. Hmanni lawkah pawh tlangval pakhatin a rawn zawng tho alawm. A bialpa ka nia a rawn tia.. Nang pawh i ni ve zawk lo maw? " a ti ta mai a. Ka nui hawk. 

"Kei chu ni lo e. Chu a bialpa chuan pasal a nei tih a hre na nge? A va rawn zawng har em em ve" ka ti a. 

"Nia mawle.. Hmun dangah hnathawkin a awm a niawm e. A rawn hawn khan a rawn ngaihven a. Ani lah pasal a nei tawh sia. A hrilhhai khawp mai" a ti chuar chuar a. Jeneti zia hre kilh kelh lo mah ila, hma ka sawn tho e. 

A la hma deuh tho tiin a thawhna dawr chanmari lam ka pan leh ta a. A thawh lai ai kha chuan a phuisui tawh viau. Hnathawkte ka han zawh chuan an bo he hu em a, an hotupa, Mizoram house-a a zinpuipa awmna ka zawt ta ringawt a. An dawr thlang lawk chu an in a lo nia. Ka zun pan nghal. A lo awm remchang hlauh lehnghal a. 

"Min hre kher lo vang a. Jeneti pasal fapa ka nia. Zep loin sawi ta mai ila, indawra lo thawk reng reng a ni a, kei ai chuan inhriatchian ka ring a. A chanchin min hrilh theih beiseiin ka lo kal tawp mai a ni" ka ti ta a. Min melh vung vung mai. A hriat hnu ka ang a ni ngei ang, ni e, Gauhati-ah khan min hmu ngei tawh alawm. An nuin thingpui min rawn pe a, an nu chu a la naupan ve hmel khawp mai. 

"Jeneti kha hmeichhe danglam tak tih bak chu han sawi tur em em ka hre lo. A chanchin ka hre tam lo, dawra hnathawh a rawn dil a, ka lo thawhtir ve mai kha a nia. Vawikhat erawh chhungte a neih tawh loh thu erawh a sawi. A bak ka zawt thui lem lo bawk a. Lei atanga rawn chawr chhuak tawp chu a nih hmel loh a, mahse, amaha in luah kha chu a ni. " a ti dam thlup a. 

"A nih ka pu, sawi nuam chu a ni lo maithei a. Mahse, kan tan a pawimawh angreng si a, indawra a thawh chhung khan han chet maksak deuh, mi dang tihnat emaw eng emaw danglamna deuhte a nei thin em? " ka ti tlang ta rawt a. 

Pu John-a chuan, "E aw.. Nei e. Chuvang alawm danglam ka tih. A rawn thawh atanga kum chanve vel a liam hnu khan ni khat chu min rawn dawrtu te nupa nen an inhau chiam mai a. Jeneti khan, kan customer nupui bulah khan, 'I pasal hi mi tenawm tak a ni. Hmeichhe dang a kawpsan thin che' a lo ti pek a niawm a. Chuvang chuan an inbakkaih ta a. Chutah chuan Jeneti thinrim chuan mipa bekah astray rit nelh nawlh hian a vawm ta a. Damdawiinah te kan han kalpui ta hial a. Mahse, mak deuh chu kan haw leh hnuah chuan engmah tisual lo ang maiin a awm leh daih. Chuan, zan khat bungrua a rawn thleng laklawh sia hnathawk ho an awm khawtlai a, hnathawk pakhat Valte kan ti mai a, a va inthiar tur kha a rawn rak nasa mai a. A la naupang ve hlek bawk a.'Jeneti'n min lo nuih sawng a, a hmel a rapawm. Huatna hlirin a khat' a ti a. Bathroom atangin Jeneti pawh a rawn chhuak ve mek bawk. Mahse, a hmel a pangngai vek si. Aa.. Sawi dawn chuan a awm nual. Thiante rawn leng lut te hian, Jeneti hi zan tlai tawh taka khawlaia an hmuh thute an sawi leh zauh thin a. Zu hi chu a in ve thin tih ka hria, a rui lai erawh ka la hmu lo. Ngaihzawng a neih ka hre ngai lo naa, Tlangval hawklak rualin an fiam hi chu ka hre zauh zauh. 

Tin, Vawi khat Gauhati-ah ka zinpui a, tah chuan nangmah ang deuh nen hian an inkawp chawt mai a. Ka mit pawh a kham hman hle.. I ni emaw ka ti hman a, mahse, nang ai chuan a cher hlek ang. In inang khawp mai. Tah khan zan khat chu ka muhil ka harh hlawl a, ka va zung a, ka let leh lam chu chu pa room atanga Jeneti lo chhuak lai ka va hmu a, kha ta a hmel lan dan kha Jeneti a ang lo. Amah niin ka hre lo. A danglam tawp, hlauhnain ka khat hman nghe nghe. Mahse, a bikbo thuai avangin eng em a thleng ta lo va. A tukah House-a thleng ve tho, An nu damlo kalpui pa pakhat kha thi-a chhar a ni a. An room bul balcony-ah a ruang chhar ani. Khata ka rilrua rawn lang hmasa ber chu Zana Jeneti kha a ni. Mahse, engmah ka sawi ngam lo.. " a ti ta dap dap a. Ni e, Kan awm lai khan Pa pakhat ruang kha an chhar tak e. Kei kha ka hna vangin engmah hre chiang mumal loin ka chhuak daih a. Jeneti vanga ka buai zual lai a ni nen, ka ngaihven zui ta lo kha a nia. Ka la chhui dawn thei e. 

"A nih ka pa nen an innei hi mak i ti em? " ka ti ta chawt a. A chal a chuar náng a. 

"Mak chu ka ti alawm. Jeneti kha sum duh leh sum lawm hrim hrim niin ka hre lo va, i pa hi a rosum vanga nei angah i ngai niin ka hria. Chu erawh ka ring mang tlat lo. I pa hi a hmangaih pawh a ni maithei, emaw chhungkua a nei lo va, inphenna tur leh chhungkaw neih ve a chak vang a ni thei bawk. Ka hrethiam lo. Jeneti kha a mize danglam kha chu dah tha ila, fakna tur a tam em em tho, mi dang puih nuam a tiin, mi pawisawi hlau em em a ni lawi a. A hna a tlinin vuivaina a nei ngai miah lo bawk. Chuvang a nia a ze mak deuh a chhuah chang pawha ka ngaihdama ka thawhtir lehzel ni" a ti ta a. Umm.. Hma chu ka sawn khawp e. Lawmthu hrilhin ka chhuahsan ta a. 

Ka pa chu riahpui ka tum leh bawk. Kan nu hi a lungawi chiah lo niin ka hria. A thinrim ai chuan tiin, "Jeneti hi ka ring zo lo a ni" ka ti ta a. Engmah min zawt zui lo. Ka pa bulah ka awm leh ta ran a. Chhunah khan a rawn harh an tia. Mahse, an chiu mu leh a ni. Phone khawihin ka mu zal ar ar a. 

Dar 9 velah nurse-in ka pa drip khai chu a rawn thlak a, a chhuak zui leh mai. Kei pawh ka va zung a. Mei ka zu leh zuai bawk. 5 mins vel chu ka ding awm e. Ka va luh chuan, ka pa chu ka va thlek zauh a. A mut dan chu dik lo riauin ka hre ta a. Ngaihthat lohnain min tuam nghal. Ka va sawi a, "Ka pa, ka pa" ka ti a. A zawi vek. A mar ka dek vat a. Ka hamhaih vang nge a mar a phut awm reng ka hre lo. Mangang zetin ka tlan chhuak a, nurse te ka ko chul. Anni pawh rang takin an rawn lut tak tak a. Ka pa chu an han bawihsawm a, thawktir tumin a awmah te an han nem a, an mangang hmel chu kil khat atangin ka lo thlir reng ringawt. Ka chiâi lutuk tlat. Doctor an koh lai te chuan ka lo thu sawp niah a. Mak ka ti hle ringawt. Doctorin a han en chuan, "Engkim a dik vek si a.. Ti nge hetia a awm aw.. " a ti nuah nuah a. Ka pa kawr nghawng chu keuin a nghawng bawr te chu a en thuak thuak a. A mangan ve hmel kher mai. Reitawk fang ka pa an endik hnuah, muangchangin a rawn hawi a. "Pawi ka ti khawp mai. I pa hi a chatthla tawh a ni" a ti ta a. Ţek tla ang maia ring a ni. Ka hrilhhaizia kha aw.. 

"Engvangin? " ka ti tuar a. 

"Ka hre lo. Ka hre lo takmeuh. Damdawi leh engkim a fel vek.. " a ti mauh mai si! 

"Doctor lungmawl tak i nih chu " ka ti nghek. 

"Khawngaihin i chhungte be rawh" a ti dam ruih a. Ka harh chhuak chiah. Khur dur dur chungin ka phone ka phawrh a. Ka nupui ka call a. "Ka pa a thi" tih chiah ka sawi. Phone chu nurse kutah dahin ka tlan chhuak a, Damdawiin tual leh a chhehvelah ka tlan thuak thuak mai. Tu nge ka zawn? Ka hria a ni. Ni e, Kha hmeichhia kha rawn kalin ka pa nunna hi a rawn chhat a ni. Ka chet dan chu mak ti zetin min hmu phak ho chuan min lo thlir reng ringawt. Ka duh ka hmu si lo.. 

Damdawiin chhungah lut lehin gate keeper bulah, "Hmeichhia lo luta chhuak leh nghal i hmu tiraw? " ka ti mawlh mawlh a. Ka hmel lan dan vang nge, a ţi kher mai. "Ka pu, hmeichhia chu an rawn lut nual alawm.. " a ti mai a. Engmah hetiang chuan ka hre dawn lo. Ka chho leh a, ka phone chu la lehin, Jeneti ngei chu ka call ta a. "Khaw nge i awm? " ka ti fiak thak a. 

"Damdawiin ka rawn thleng tep" tap tiau a. 

"Inah i awm lo maw? " ka ti nghek a. 

"Ka pasal boral laiin engtin nge inah ka awm theih ang? " a rawn ti a. Phone a dah nghal daih. Rei a ni lo, Jeneti a rawn thleng a. A hnu lawkah Hriati leh ka nupuite. Thil dik lo erawh a awm. Mahse, rilru fim ka put hram hram a ngai. 

Ka pa ruang chu kan hawnpui a. Sawi tur ka hre lo lutuk chu ka mangang. Tumah ring zo loin keimah ngeiin ka riahpui a. Mahse, ka rin loh lutukin ka pa chu a thi tho si! Engtin nge he thil hi a thlen theih? Ka farnute leh Jeneti bakah kan nu tap awrawl te chuan ka ngaihtuahna an luah zo lo. Ka pa thattu hi hriat ka duh. Khawvar hnaih lam khua a en deuh tawh hnuah Akimi ka ko a, Tei te inah ka chhukpui a. Roomah ka luhpui. A pu thihna chu a tuar hle tih a lang. "Bawihte, Fim takin ngaihtuah rawh. Zan dar 9-10 inkarah i pi hi inah a awm em? " ka ti a. Ka khur der der mai. 

Insut faih faihin, "Ka hre lo.. Dar 8 velah ka muhil daih alawm. Ka harh chuan apu thih thu ka hre nghal. Ateiin min lo kaitho a. Mi pawh an awm teuh tawh" a ti a. 

"Chutihlai chuan i pi i hmu em? " ka ti leh a. 

"Aih, Ateii'n damdawiinah a chhoh thu a sawi" a ti leh mai a. Tei kha chuan in a lo nghak a. Jeneti awm leh awm loh a ngaihtuah chang vak lo ang. Mahse, ka biak tho a ngai.

Tei chu ka kohtir ta nghal a. Mit bui lakin a rawn lut a. 

"Ka pa thih thu kha tuin nge hrilh che? " ka ti a. 

"U Sangteii'n min lo hrilh" a ti a. Kan nu chiah ka call kha a nia. Nia, a lo hrilh a ni ngei ang. 

"Ina i chhohin Jeneti a la awm em? " ka ti leh a. A ngaibtuah nge a ngawi vang vang a. 

"Aih awm tawh lo, Damdawiinah a chho tawh" a ti ta a. Hmm.. Jeneti chu tuman inah a hun lai khan an hmu lo. Anih chuan ka pa thih lai khan inah a awm tawh lo tihna. A rawn thlen hma dan atang pawh khan in atanga rawn chhuak a ni lo. Ka pa vuiliam phawt ila kawng chu ka la dap ngei ang. 

Ka rin phak bakin ka pa chu kan vui ropui e. Mahni inthiam lohna pai reng lo ila chuan mite thatna chu lawm takin ka dawngsawng thei ngei ang. Ka pa kan phum fel ta a. Keini chhung pawh kan inpui lamah kan táp ta chawt rih. Naupang ho lahin nuam an ti hlei hlei. Inleng kan nei rei angreng a. Ka pa thih sarhu lai chuan ka thil vei pawh ka la phawrh duh lo. Jeneti erawh ka enthla ru reng thung. Rinhlelhawma a awm ka hmu lo. Ka pa thi chu a tuar hle niawm in a lang tlat. A tap a tap mai a ni. 

Mahse, ka pa thihcham thlen hma zanah chuan tiharhtu awm ang maiin ka harh hlawl mai. Mikhual roomah kan chhungkuain kan mu mai a. A hmaa kan room thin kha ka pa te room nen an zawm vek tawh a, a zau hle nghe nghe. Ka tho ta nulh a. In riak te an inpu chhuak tawh a. Zan 3 bak kan riak ta ngai meuh lo chu a nih hi. Zawitein ka tho a, thawm dim takin kawngka chu ka hawng a. Dar 1: 23 chiah chiah a ni. 

Ka pa te room lam chu ka pan phei ta them them a, mahse, Akimi room lama thawm ri deuh sun sun ka hriat vangin chu lam chu ka pan leh ta a. Akimi hian Tei fapa a mutpui a ni. Kawngka chu a lo inkau sa deuh a, thawm ngaichangin ka ding leh vang vang, Thaw leh hawk thin niawm tak ka hriat vangin kawngka chu ka hawng zau a, dim zetin ka lut ta a. Light an off naa, tukverh bula mihring hlimthla ding chu ka va hmu thei. Akimi te muhil lai chu a lo thlir vung vung mai. Light ka on ta pup a. A rawn hawi chhuak rang kher mai. Jeneti a ni lo! Ni e, Jeneti chu a ni. A mitmeng erawh jeneti mitmeng a ni lo, a hmel chu a dáng vek a, huatna hlira khat mitmeng chuan a hmel dang zawng zawng chu a tichhe vek mai. Kan inmelh ta ran mai. 

"Eng nge i tih? " ka ti nghet charh a. 

Hnuailam melh vatin, "Thawm ka hria a. Ka va enfiah lawk" a ti a. A aw pawh chu Jeneti aw nem diai ang kha a ni lo, harsa ti zeta tawngchhuak a ang. 

"Jenet, i thiltih ka hre tawh" ka ti ta tawl a. Ka melh ran bawk. 

Min rawn melh a. A danglam leh vek tawh. Pawisawi lo hmel a ni a put leh tawh. "Eng nge a? Ti nge tah hian ka awm? " buai hmel deuh hian a ti niah a. Min tihamhaih ve deuh. Akimi te an rawn harh ta bawk si. Naupang bula khatiang thusawi kha ka duh si lo. A room lam pana a lut lai chu ka enliam ta ringawt. Rilru erawh a thlamuang fahran lo hle. Mahse, a tawp erawh thlen ngei ka tum a ni. 

A tukah mi an lo leng khawm a. Eng han sawina chi a ni lo. Tlai lamah chhungkua chaw kan ei khawm a. Chaw ei kham hnu lawkah Jeneti chu inbual turin a lut a. Rei a ni lo, a rawn rak chhuak tuar tuar mai. Bathroom kawngka chu a kalh bawk si, "Ka duh lo.. Ka duh tawh lo.. Khawngaihin" a ti tuar tuar mai. Mak ti zetin kawngka ben pahin kan ko nghek nghek a. 

"Min kalsan rawh. Ti tawh suh.. Ka duh tawh lo" a ti leh a. Kawngka chu kan tichhe ta ringawt. Bathroom chhuatah chuan saruak vekin a ban veilam thi nuai hian a lo mu a, a mit erawh a meng. A mittui a luang ngiai ngiai bawk. Towela tuamin ka pawm chhuak a. Khumah ka muttir a. Tupawn a awmdan chu mak kan ti. Chauh hmel zetin a thaw hle hle bawk si, a ban chu kan nuin a tuamsak a,thisen a chhuak nasa viau mai. 

Inleng an rawn lang tan si. A va buaithlak tak. Hriati te chu inleng dawngsawng turin ka tir phei a. Jeneti chu kan nu nen kan thutchilh ta ran a. 

"A awmzia min han hrilh teh.. Heng thil hi" ka ti a. 

"Amah vek alawm" a ti ringawt a. 

"Tu nge amah chu? " ka ti a. 

"Amah Zonuni vek" a ti leh ringawt a. Kan nu hmel pawh a buai nak mai. 

"Damdawiinah kal ang aw" Sangteii chuan a ti a. A lu a thing nar nar. "A sawt chuang lo ang. Tihian min awmtir mai mai ru" a ti tlat. 

"Jenet, ka pa kha i thah tiraw? " ka tih bawl chuan kan nuin min lo kheuh zawk. Ka insum thei tawh thlawt lo. 

"Aih, tumah ka that lo" a ti tiau a. A tap zui hlawp hlawp. Kan inzawt chhuak dawn lo tih ka hria. A ngawi ta tlat bawk nen. Hun a la tam alawm tiin ka chawlhsan ta rih. A thusawi mak tak, "Amah Zonuni vek" a tih khan awmzia a nei ang em? Nge a inti á der zawk? Ka buai a ni. 

Kan nuin in lama hawn a rawt deuh tawh naa, He ta kan la cham hi a ngai tlat. "Ka pa thih chhan dik tak hre phawt ang" tiin ka hmin thei hram. Ka farnute erawh chuan Jeneti chuan ka pa thihna a tawrh luatah a mumal vak lo niin an ngai. 

Class ka lak laiin kan nuin a lo call sek a. A pawimawh ngang a niang tiin ka chhuak a. Ka la ta nge nge a. "Lo haw vat teh. Ka hlau lutuk" a rawn ti tawl mai. Engmah han inhrilhfiahna hman pawh a awm lo. Chak zetin in lam ka pan ta a. Ka thlen chuan chhungkhat an lo awm thap mai. Kan nu a lo tho vat, ka banah a rawn chelh a, a hmel pawh a dik lo. "Jeneti hi ramhuai a nih hi" a ti ta hmiah mai. 

"Eng nge a awmzia? " khaw nge a amah? " ka ti a. Hriati pasalin,"Kan chiu muhil a. Roomah a awm" a lo ti vat a. Kan nu chu ka kuah a, rem taka thuttirin, "Engkim han sawi teh" ka ti a. 

A kut tin sik niap niapin, "Naupangho kal hnuah Ruati nen in lam kan va tlawh a. Ruati chu puanthuina lamah a tlang nghal a. Ka haw leh chuan Jeneti ka ko nghal a. A eih lo. Inleng an awm lo bawk a tiin ka inbual fai sawk sawk a, ka lu a nat deuh vangin ka mu ta a. Ka muhil lai chu ka thawk a sak thut a, ka thaw tha thei ta lo va, ka han men chuan Jeneti ngei mai hian ka hrawkah a lo rek nget nget mai a. A mitmeng hlauhawmzia kha.. (A insut hraih a) ka theihtawpin ka bei let a, a chak lutuk. Mahse, vanneihthlak deuhin Rina (Tei pasal) a lo lut a, min koh ri pawh ka hria, ka theihna zanwg zawng nen ka au ta a. A hre pha a niang a rawn lut a, min rawn hmu ta a. Jeneti chu a la hrang ta a. An fapa a rawn chhohpui Bawihtea chu kan inrin hmain kan room thlang lam den nan Jeneti chuan a hmang ta mai a. Bawihtea pawh a silawng rei maithei.. Chuan, Rina hian a hnek ta a.. A tlu hnawk a. A rawn harh leh chuan engmah hre lo angin a awm leh daih a, a mak ka ti lutuk.. Kan sawi fiah hnuah a tap chiam a. An chiu mu ta ringawt anih saw" a ti ta a. Mak ka ti ve lo. 

"Bawihtea chu tunah engtin nge a awm? " ka ti a. Rina chuan, "A ban dinglam kha a tina deuh a, a bakah hliam dang a nei lo. A vanneihthlak khawp mai. " a lo ti vat a. Ka thaw hawk. Ka chhungte ho chu melh kualin, "Jeneti hi a dik lo a ni. Eng emaw chu kan tih a ngai", ka ti ta a. An bu nghat hlawm. 

Akimi chuan, "Chuvang ania inhaw ka huphurh, api hi ka hlau. Zanah te hian ka harh hian min lo thlir reng zel hian ka hre thin.. " a ti a. Hriati'n a lo kuah vat. Engtia chet lak chi nge ni ang aw.. Hriatchhuah ka nei ta thut a. Ka thianpa nau Doctor Hmingsanga kha, ani hi psychiatrist a ni a. Jeneti hi he lam doctor ho enkawl chi a ni ang em? Nge pastor ho kawm chi zawk ni ang? Doctor chu koh phawt tha ka ti ta a. Zana lo kal turin kan inchah ta a nih kha. 

A dinhmun, a awmdan engkim ka hrilh sa vek a. A phur zawng tak a lo ni lehnghal a. Zanah a rawn kal dawn a ni. Zanriah kan ei lai chuan, Akimi chuan, "Chu! Api chu a tawng leh tawh. Tisawn amah sawn a tawng vak zel, apu damlai pawh khan" a ti ta mai a. Ka tho thut a, room kawngka bulah ka va ding a. 

"Kan tihzawh hma leh engkim a fel ani mai. Tichuan, thlamuang takin kan thi tawh ang. " a tih zawh rual chuan, "Sawi tawh suh. Ka duh lo. Ka ti dawn lo. Khawngaihin duhtawk tawh rawh " amah bawk chuan a ti leh a. A nui ar ar a, chu nui ri chu hriat tawhna ka nei chiang. Ni e, Gauhati-a ka rooma kan riah dun tuma phur taka a chet laia a nuih dan a ni. Ka chhing sawk. 

"Zonun, khawngaihin.. Hei hi titawp rawh" Khawngaihthla la hliah hliah hian a ti leh a. 

Aw fiak thak hian, "Ka hlen fel phawt ang. Lo awm mai mai rawh" a ti leh a. Ka kut ka hum ruh. Kan Jeneti chuan Multiple Personality Disorder nei maw a lo nih a?! Chu lo chu puh tur dang reng ka hre ta hauh lo mai. Chaw ka ei zawm lo chiang kher mai. Ka zawi ngawih ngawih. Dar 8-ah Hmingsanga a lo thleng a. Jeneti roomah kan lut dun a. Mi dang erawh rawn lut rih lo turin ka duh rih. 

"I tha em? " Hmingsanga chuan a han ti a. 

Chauh hmel angreng tak hian,"Ka tha alawm.. Mama thianpa em ni i nih? " a ti dam thlap a. Ka lo enchik kher mai. 

A be kual a be kual a. Jeneti hmel landan ringawt ka en vangin an sawi zawng zawng ka hre lo. A hmel landan inthlak leh zauh thin chu a nia hmuh ka duh ni. "I pasal kha thah kher a ngai lo asin. A hmangaih tehlul che nen" Hmingsanga'n a tih rual chuan, mitmeng de sar sar hian, "Putar hurherh a nih kha.. A chantawk a hmu" a ti hmak a. Ka che zawk hman, mahse, "Ka that lo. Ka that mawlh lo" A rawn ti leh lawi a. Chuta a mitmeng erawh lainatawm khawpa khawngaihthlak a ni thung. Hmingsanga a phur telh telh thung. 

"Jenet, Zonuni kha ka lo bia ang aw.. Khawngaihin" a ti dam thlup a. 

"Aih, ani biak a ngai lo. Keimah hi Jeneti ka ni. Tumah ka tina ngai lo" a ti hawk a. 

"Jeneti pasal khan thih a phu alawm.. He Jeneti taksa nalh tak hi ani putar khan a phu hlawl lo" Zonuni zawkin a rawn ti lehnghal. Insum a harsa khawp mai. 

"Chu! Jeneti chu i lo ui viau a ni maw.. Chuvang em ni? Jeneti remti lo chung i rehhlum tak? " Hmingsanga chuan a ti ta a. 

"Aw. Aw.. A ninawm mang e. Kha mihring nupui pawh min rehhlumtir law law tur alawm.. " a ti fiak thak. Hmingsanga'n ka kut vai tur a rawn man chawt. Ka insum hleithei lo chu a ni e. 

"Huatna chhan tur i nei miah si lo va, engvanga hetiang hi ti nge i nih? " Hminga chuan a ti leh a. 

"Engvangin nge ka tih loh ang? Nupui lakah pawh rinawm zo loin Jeneti taksa nawmchen nan a hmang a. A kalsan leh daih a, Phuba laksak ka duh ve a ni mai. Tihsual ka nei lo.. Mi tenawm ho nunna chu lak zel tur.. Kan tihthan loh pawh a ni lo a.. Tiraw Jenet" tiin a nui ar ar a. Mi râp takzet a ni! Hmingsanga pawn a chil a lem khawlh mai. 

"Jeneti avang zelin a ni maw pawi i khawih? Jeneti chu i va khawngaih awm ve.. Engvang nge? " a tih chuan, "Mi mawl, engmah hrethiam lo. Tumah beilet ngam lo khawpa dawihzep.. Mi tlaw lutuk a nih vang hian mawle" a ti leh khawl khawl a. 

Ka inrawlh ve chak lutuk chuan,"Gauhati-a ka mutpui kha tu zawk nge? " ka ti thut. Hmingsanga maktih tur pawh ka dawn zo tawh lo. 

"Keimah mawle.. Keimah.. Zonuni hi Jeneti taksa hmangin i mutpui.. Nuam i tih hlawrh hlawrh em kha. Ani ve tehchai hi chuan a tilawm thiam awkawng lo ang che.. Mi tlaw ka tih tawh kha" a rawn ti har har a. Ka heh ka pet tawp.. Ka ipik vek mai. 

"Jenet, Zonuni thiltihte hi i hriatpui em? Engkim? " Hminga chuan thunei aw zet hian a ti a. 

Harsa zeta thawk la hawkin, "Hriat loh tam tak ka nei. Tun hnaia thil thleng erawh ka hre ve nual.. " a rawn ti ta a. 

"Ka pa pawh kha maw? " ka ti nghek. 

"I pa kha tihnat ka duh reng reng hleinem. Ka theihtawp chhuahin dan ve ka tum asin.. Ka thei ngang lo a nih kha.. I nupui erawh ka tihnat lai ka hre miah lo.. " a ti a. A insut zui hlawp hlawp. Ka heh ka liak leh zuah ringawt. Engtia han tih chi nge maw anih le.. 

"Jenet, Zonuni hi tu nge a nih? " Hmingsanga aw chu a fiah khawp mai. 

"Keimah.. Keimah tho a ni. Mahse, ani chuan phuba lak a duh a. Keiin ka duh lo thung.. " a ti bah nak a. 

"Phuba chu tu laka phuba maw? Engkim han sawi vek teh" Nem zawk hian a ti a. 

Meng á deuh riai hian a hawi kual hrek hrek a. "Kum 17 liam taa thil thleng atanga ka sawi a ngai dawn a ni.. " a ti zawi sap a. A chhing sawk a. "Sawi a tulna a awm lo. Ka phumbosak vek tawh che. Khang mi tenawm te thlarau kha chu hremhmunah ka nawrliam vek tawh" Zonuni aw phawiin a rawn ti a. Mahse, Jeneti chuan, "Kan thuruk hi sawi chhuah a hun tawh alawm.. I phuba lak dan pawh sawi vek rawh. " a ti ve ta tlat a. 

Min rawn melh a… "In chhungkaw chunga thil a thlen hma hian mi pathum ka thawt tawh asin" a ti ta a. Zonuni nge Jeneti a nih ka hrethiam hauh lo. 

Hmingsanga chu a thu tha sauh sauh a. 

"A bul rat atangin han sawi vek teh u le.. Kan inpeih e. " a ti ta a. 

(To be cont..