Duatpui!

DUATPUI..! 

Ziaktu: Toni Râlte

"I then ngei ngei tur a ni. Hetiang i chin vang hian lawm i lenrei. Nula senior i ni tawh. Nang aia naupang ngaihzawn i chin vang alawm i senior.. Then ang che" ka nu chuan a ti hlak hlak a. Ka ngawi kur. Ka pa ve thung chuan, "Hna nghet hi hmu phawt la, pasal lam chu i ngaihtuah dawn nia, i nu hi chuan tihian a ti tak naa, nei dawn tak tak la a phal leh dawn chuang lo" a ti chuar chuar a. Ka u, kan upa ber mipa chuan, "Aman a chawm tawh mai ang chu, mahni aia naupang ngaizawng ve ziah mai" a lo ti ve hluk hluk. 

Ka vahpa hian min ţan thung a, "Ani, an sual ee tiraw? " a lo ti ve sek! Nuih lam a za. Tumah kan thinrim hran lo bawk a. Ka nu hi chu a zia a ni ve reng reng a. A sawi kha dik lo a awm lem lo bawk. A fanu hi min hrechiang em a ni. Ni e, a dik, ngaihzawng hi ka nei ve nual ta a, kei aia upa chu pathum chiah an la ni. A bak chu kei aia nau, nau satliah ni mai lo kum 10 dawn dawna kei aia nau te an ni fur! Hei hi nu leh pate ngaihtuahna atang chuan a zia lo lam deuh chu a ni. Kei lah kum 30 ka ni der tawh. Hun lah hi a kal chak phian si, kan khua angah phei chuan nula senior kan ni der tawh a. A ka kaw nazawngin, "Pasal nei ve tawh rawh" an ti zen bawk si. Thiante ho lah fate nen an inkai kawi diah diah tawh a, thenkhat an lo thlawi leh mek bawk. Titi pawh a rual mawh tawh viau. Chutiang karah chuan ka lehkha zir ve tang tangna kha hmang tangkaiin khaw dangah Zirtirtu hnathawkin ka awm a. Keimahin in ka luah ve ran a, In ni ve emaw chu, upat tawh lamah hian sum ngaihtuah a na phian a. Kan uikawm fun tawh mai. Mahse, thalai la nih ve miau chuan ngaihzawng neih loh ngawt kha a lo boring ve bawk sia 😁 Ngaihzawng neih ka thulh ngai lo. Nau ka awm thin.. He thu hi mahni aia naupang ngaizawng thinte chuan sawi fiah ngai loin kan hre vek awm e. Nau awm hi nuam ka ti ta viau mai. 

Unau-a naupang ber nih chuan rilru te hi a puitling mawh deuh a, kum lam pung thur thur mah se; rilru lam mit hi a la naupang miau si a. Tin, ka mizia hi a dang ve deuh bawk a. Ka tleirawl lai pawha thian naupang te te hruai kual thin kha ka nia. Mahni aia naupangho bula awma inlak boss viau kha ka nuam tih ber a ni. Kha zia kha ka la chhawm zel a ni tehchêk ang chu.. Min lo be vetu thenkhat zingah pawh tlema a un lam ai chuan, gamer emaw an dp-ah pawh animation hmang deuh ngat ho te kha biak nuam ka tih, nawipui nuam ka tih an ni zawk zel a! Pasal la nei tur ka ni tih intheihnghilhin kei aia nau fë te zunah ka uai ka uai ta mai. Anni lah an lo nghal ve bawk a, 'Age is just a number' ti chung zelin min lo iai ngai bik si lo va, whatsapp atanga inbe chhoin kan inkawm nel zel a, kei lah tawnhriat lo ngah tawh na na ná chuan an zeizia ka lo man ve tum hrang tawh si. An sawi duhzawng lam ka'n phulpui chiam tawh hi chuan min biak loha khawhar tur hian ka siam ve fahran hman zel a😂 a nuam ve riau asin. Kar thum bak hi thian anga han inbiak kan nei mang lo. 

An lakah feelings kan nei tawh tih inhre ru deuh, confi taka sawi ngam si lo, kan lakah pawh feelings an neih tawh hnu, kei lahin lo hriat loh dera a nawi zawnga lak luih tum, thikthu awm ve ve tawh si, tihlan ngawt dawna kan inkara thian nihna bak la awm si lo, he lai boruak aia nuam leh hrehawm hi inngaihzawnna kailawnah a awmin ka hre lo. A tawpah a pa zawk na ná na chuan dawhtheih zo tawh loin an rilru an rawn puang a, lawm takin ka lo pawm ta thin a. A hlimawm thin. A chang chuan infiamna anga ngaia ne ne kual chang ka nei. Mahse, Duatpuia erawh a danglam bik! A hming dik tak erawh ka sawi lo mai teh ang. Rei kan inbe hman lo, kan feelings nasa lutuk khan a nawrin min nawr a, awlsam takin kan inngaizawng ti mai teh ang. Kei aiin kum 12-in a naupang a ni. 

A rualpui te nen inngaizawng se chuan boring an ti viau ang. A chhan chu gamer a ni miau a! Pubg leh ML atchilh bur kha a nia. Amah vang liau liauin pubg pawh ka khel ve ngawt! Zaidam zeta min zirtir lai te, min nuihzat hreh si, a ruka a nuih khur char char te, a thiam ang tawka min care ve te kha ka tan chuan sugar hlang a ni. A kum ang rilru a pu a, inlak puitlin a tum kual ve lo a, han ât phawng phawngte pawh a nei fo. Kan inkara duhawm em em zawk erawh, "Inzahtawnna " kha a ni. Kei aia a naupan tam vang ngawtin ka zah lo miah lo. A hunah chuan hlaua zahthiam ve tak ka ni. Vawikhat pawh groupah zahmawh sawiin kan nawi leh chiam chiam a, Amah pawh a awm ve kur! A ngawi reng thung. Private-in, "A tawk tawh viau e. Zahmawh hi kar khat chhung i sawi tawh tur a ni lo" a ti hmak. Ni e, kar khat zet ka nawi lo ve mai. Tin, ani pawn upa zawk ka nih miau vangin min zah thiam a, Zawhna a ngah bawk thin. Kei ka rilru hi he lamah chuan a zau hlek zawk a, thikthu erawh chhe tak ka ni thung. Ka tilang zen zen lo zawk a. Chu chu hriain miin an mention a nih loh chuan a hranpain tumah a va be ngai lem lo. Ani chuan kan relationship hi tlangzarh a duh a, kan inhauh tamna pawh a ni. Keiin amah aia ka upat em vangin an nuihzat ka hlau a. Ka khap hram hram thung. A ruka inlaichinna kha a hlu bik, mipa tan erawh a famkim lo maithei. 

"Min ko ve renh reng teh" zan khat chu ka ti a. 

Nia, ka hmingin vawikhat mah min la ko lo. "Anu' min tih loh leh 'mama" "U Duat " ti ten min ko thin! 

Ka hming pum ngatin min rawn ko ta a. A tithang ta lutuk mah mah a, a hnuah ka hau leh hrep. Routine kan nei thlap bawk. Bawhpelh kan tum lo ve ve. Gamer a ni miau a, khel tawh suh intih ngawt theih a ni lo va, games a khelh chhungin groupah ka lo nawi a, a zawh rualin ka out nghal. 1min -a ka reply har hlek chuan min rawn call nghal zel. Chuvang chuan a inkhelh chhunga status te pawh view zawh hman a ngai thin. A msg a chana chan tawp a ngai. Ani erawh sawiselna tur a awm ve ngai lo reng reng, status up dawn se, min dil thlap zel! A over mah mah pawh a ni maithei. "Hei hi nalh ka ti sia, a hla hi.. I lo thik ka hlau bawk sia" tih te, "Hei hi hmang ila ka kum angah a mawi lo ang em? " tihte.. Inrawn derna hian min tilawm vek. Inhria e. Dp-ah erawh a thu zawk zel. Couple dp lo chu hman a phal chai lo. Ka pic ka hman ngai loh luatah thiante pawn min kap zeuh zeuh thin. 

 A ngaihzawng pathumna ka ni a. A ex te chu a rualpui leh a aia naupang an ni. A vawikhatnaah chuan a lai chhe quit thak. Ka huháng kha a zo lo ve a ni maithei. Ka lai ru ve em em tho naa, upa zawk ka lo nihnaah lai anga awm ka tum hauh lo. Kiss hmasak erawh ka duh bik lo.. Ka ngam bik lo. Min fawp dawn lo emaw ka tih hnuah kan hawn dawnah zám tih hriat ngawih ngawihin min kuah a, min fawp ve! A rei lo. Mahse, min deh dan a dang viau. Vawi thumnaah te chuan kei aiin a zak lo tawh zawk. Keimaha awm ka ni bawk a, kan free angreng sia, tih loh loh kan ti ang tih erawh ka hlau a. Ka inveng ve. Tin, a chhungte bakah mi dang pawn an hriat ka duh lo va, a lo len pawn a thiante a rawn hruai thin. A thiante lahin nuam an lo ti ve bawk a, an duh duhin an awm a. Ka mutsan chang pawn thingpui an in lum tawp a, hawn a hunah min kai tho a, chutiang vel chu.. Kei hi vanduai a siamin ruhseh ka nei a, ka khup hi kal hleihtheih miah lova a nat chang a awm thin a. Tui a tling bawk a niawm a, ka tuam lum hlun thin. Chutiang avang chuan an thianho han thutpui peih loh changte ka nei ve thin a, Roomah kan pahnihin kan mu mai mai a, a thiante pawn eng ah teh vak an ngai tawh lo. An vaiin, "Mama" min la ti vek zui! Mamawh nei se min dil a, ka mamawh hunah an tlanchhe ngai bik lo bawk. 

Ni khat kan school ban hma deuhin khua a rawn dur nasa mai a, ka khupin a hre leh chat. A na et et tawh a, a tuamna ka keng si lo. A rukin ka dawm ka dawm a. Hawn ka huphurh kher mai. A hla tham ve angreng sia. 

"Maa, i khup a na em? " a rawn ti ta chat a. 

"Umm.. Na ve deuh" ka ti a. 

"Ka lo hruai ang che. Inbang dawn tawh em? " a rawn ti nghal a. 

"Last kan kal dawn lo a niang" ka ti a. 

. "ka lo chho nghal" a ti a. A reh nghal. Pawi ka ti vak lo, chhuk zawng a ni bawk si a, kal a hrehawm dawn em mai. A rawn thleng hma angreng. Ka thawhpuite hian kan ni tih an la hre lo, an lo len nasatzia erawh an hria. Chuvang ni turah an ngai maithei. Kan inhruai haw a, ka in panna stepah ka chhuk hleithei si lo, "Hawh" tih leh min puak a rual nghal a. Kei 5'1ft, ani 5'9 ft lawih a ni bawk a. Min zo nel nel khawp mai. Aman kawngka pawh a hawng vek a, khumah min muttir a, "I kekawr thlak ila, mu lum daih rawh" a ti sawk sawk a. 

"Ka inbual phawt ang" ka tih chuan, "Tui ka va lum ang e.. Kha lo tuam lum rih la" a ti a. Ka lo tuam ve mai. Tui chu a va lum a, chawhmeh bel a hawng ri ka hria. Tukinah chawhmeh thing ka ring a, siam thar vek a ngai ang. 

"Chawhmeh chu siam thar vek a ngai a nih saw.. Chaw ka ei ve mai ang, duh leh Hriatpuia ka sawm ang a, zahzelah. Ka bawl ang" a ti leh zung zung a. Hei vang hian a nia ka duh em em, a hunah mipa a ni tlat zel alawm. 

"Ngai kher lo, ka bawl thei mai ang" ka lo ti ve lawi a. 

"Thei ang, mahse, na i ti reng dawn asin. Mu mai mai rawh" a ti awlsam ët a. Hriatpuia a call nghal, a best friend a nia. Ani lah eng lai pawha koh theih kha a ni ve bawk a. Ka'n sawi leh lawk, Duatpuia te hi college an kal ve tawh a, mahse, an la tan chiah lo. An tan ve tep tawh ang. 

A nu a call a, "Nu, hetah Miss inah chaw kan ei dawn. A dam tha lo va, eirawngbawlsak a ngai a" a ti a. Ka lo îp deuh. A nu te nen hian kan innel em em, mahse, thil hrechiang se min lawm vak ka ring lo a ni. A lo remti ve mai a niang chu, lehlamah an thianho ka duatzia an hre ve bawk a, mak an ti vak lo pawh a ni maithei. Tui a lum hnuah inbual turin min kuah phei a, ruah a rawn sur tan tawh bawk. Bathroomah chuan ka inphelh a, ruak vek lo chuan ka inbual thiam chai si lo. Ka inbual vat vat a, ka khup vang pawn tui khawih rei chi ka ni vak lo. Ka inbual zo towel bana ka ding chu ka khup a dursuih thut, ka tlu ta hnawk a. Ka rak thawt bawk. Kawngka kha ka kalh lo hrim hrim bawk a, a rawn hawng nghal vat. Chiái miah lo chuan towel a ban a, min tuam nghal vat, min kai tho a, kan chhuak a, khumah min thuttir a. Min hru hul leh thlap. Ka zak ve deuh. Min hmu vek sia! Ka ngawi reng chu a hrethiam nge.. "I nalh kha le.. " a ti sup a. 

"I zak lo" ka lo ti nghek. A nui hek hek a. 

"Kha " tiin ka underpant chu min pe a. "Sawtah phei rawh" ka ti a. A chechang eih lo. "A mak" ka ti leh nghat a. 

"Ha rih lo teh.. " tih pahin min bawh thlu a, towel a phelh nghal bawk. 

"Hmela" ka ti tuar a. Mahse, ka hmuiah a rawn fawp nghal. Ruah lah chu a sur tam si.. Ka lo chhang let lo thei lo va. Ka taksa ruak vek chu a dap kual ruai a, a mitmeng pawh dik lo tak a ni. A tha dawn lo tih ka hria. "Duatpui, insum ang. Bakah ka khup a na alawm" ka ti ta a. A tho vat. A sam a tuai puat a. "Kha inthlak vat vat rawh" tiin ka thawmhnaw chu ka bulah a rawn dah a, choka lamah a phei nghal. Ka inthlak sawk sawk a. Ka khup pawh ka tuam nghal. Bai auh auh chungin ka va phei ve a. A thiam ve chhun artui kan tur a lo chhu keh mek a. Dal a chhum bawk. 

"Vawksa a la awm kha.. Siam ila" ka ti a. 

"Ka thiam si lo alawm. Lalhriata kan siamtir dawn nia" a ti a. 

"Nep ve siah" ka ti hlak. 

"Eirawngbawl tura piang ka ni hleinem.. Hna nei zawk pawh ni mah la, i bawl tho ang" a ti hluk a. 

"Nau i awm tal ang" ka lo ti. 

"Ka thiam kha chu.. Hnute i pe ang a, abak ka ti vek ang" a ti.. Nau hi pathum lai a nei a, an te ber phei chu a la lian lo bawk. Naupang chhawnchhaih chu a thiam tawp. 

Hriata a lo thleng a, a rawn nui lut leh heu mai. Sa chu kan siamtir nghal a. Kan pahniha inngheng chiala kan thu chu min rawn thlekin, "Ruah kha a sur nasa sia, inpahnih chiahin inawm bawk sia" awmze nei zet hian a ti a. 

"Kan duh leh" a lo ti vat. Kan nui vak vak ringawt. Hlim takin zanriah chu kan ei a. Ka khup na erawh a zia hleithei lo. Nachhawkna pawh ka ei tawh. Ka mu kawm ngal renh a. Ruah a sur reng vangin thian dangte pawh an rawn lang lo. Hriata lah a muhil daih. Ear phone a vuah a, a hnâr bur bur mai. Khumah inkuah chialin kan mu dun a, ka khup chu a hmet pah bawk. 

"Tuar zawk ila, ka tuar thei deuh zawk ang a" a ti a. 

"Na lutuk a ni tawh hleinem" ka lo ti a. 

"Ka riak ve mai ang aw" a ti ta a. Zan tin riah min dil thin. Ka remti ngai lo. Mualpho a awl bakah sawisep a tam thin si. 

"Ruah hi bang se, haw r'u.. Ka sawi tawh kha. " ka ti a. A ner sak. 

"Riah dun hian intih kher tur a ni lo" a ti nghut a. 

"Chu lam pawh a ni lo, mi an tawng duh em hi" ka ti a. A ngawi leh ngul tawh a, a titau tih ka hria a. A biangah ka va muah a, "Tunah ka duatpuia a lo nui ang.. Hmm.. Ehe.. A va insum thei" tiin tihnuih leh phet ka tum a, a tawp a tawpah a khi ve leh suk. 

"Suali" a ti sup a. Min rawn kuah bet a, "Apa te hian min hau hrep se, ka luhkhung daih chak che" a ti lehpek. 

"Ka nupui i ni dawn tihna a nih chu" ka lo ti a. 

" Pawi lo.. Kan inneih phawt chuan a tha vek"a ti a. A phone a rawn ri. 

"Aw hello" a ti a. Speaker a on nghal. Remy tia a save a ni a. 

"Lo lut vat ta che. Kan indaih lo" a rawn ti a. Ml a khelhpui thin a ni tih ka hria. Phone hi kan inkawl thleng zeuh zeuh. 

"Ka hman lo zanin chu.. Kan nu a dam lo a, awmpui a ngai" an tiah! 

"Hmm.. Pitar kha maw.. Duh ve siah a.. Dawi a thiam a ni lo maw? " a rawn ti khanglang a. A hmel a dur nghal vek. 

"Ve vak vak a che a. Nang ang 7 ai pawn ka thlang aw" tih leh phone dah a rual. 

Nuam ti vak lo hian min lo melh a, "Tihpalh. A mawl thei lutuk a" a ti a. 

"I khelhpui leh chuan kan inthen ang" ka lo ti hmak. 

A ML-ah a lut nghal a, ka hmuh lai ngeiin Remy chu a unfriend nghal. "Chiang em? " a ti a. Ka bu nghat. 

"Tak taka Duatpui, a sawi dik alawm. Kei chu ka tar tawh a" ka tih chuan, "Ninawm a.. I tar loh kha.. Vawiin i nalhzia kha" a ti nghut a. Ka nui hawk. A va buaithlak. 

Ruah a han ta deuh a, haw tura ka tih tlat vangin Hriata a kai tho a, an haw ta a. A thinrim lem loin ka hria. 

Hun chu a kal ve zel a. Han inhauh zeuh zeuh chu kan nei. Kei ai maha a thikthu chhe chho chu a mak! Min lo biaa min ngaizawng deuh anga lang chu a lo block tawp zel a. Ka unblock ve leh mai zel a. Chutiang avanga inhauh hrep chang kan nei thin. Zan khat chu ML kan khel ho a, kei hi ka lut ve zeuh zeuh chauh, match khat bak ka khel ve peih meuh lo. Gusion a hmang a, keiin Lolita tank ka hmang thung. Kan chak vak lo, min nawr deuh bawk nen.. Bot-ah Mm ka zui a, ani mid-ah Franco nen an inzui thung. An gank laiin kan han lut ve a, Enemy lancelot-in a rawn ulti a, a thi lek lek tawh, ka mm zui kha an rawn um sia, ka va chhan thei hram.. Mahse, chu chu a tan mit tikham lutuk a lo nia. Kan thut dun reng laiin ka phone chu min chhuhsak lawk a, enemy turrets-ah lutin min va thihtir ringawt. MM chu a thik tihna. A hmai a sen vek bawk. A tawng hek lo. Kei pawh chuan khelh zawm loin ka out ta a. A thiante erawh chuan pubg an khel thung. Kan boruak chu a nuam lo tawp. Chutiang karah ka ex A thik em em thin, Mapuia'n min lo la call zuk! Awiii.. Awmdan thiam a va har tak. 

"La rawh. I ngam chuan" a ti hmuk mai si. Ka la ta lo. A rawn tinawn sek si, a pawimawh a nih ringin ka pick ta nge nge a. Ani erawh a ding hluai a, "Ka haw dawn.. " tih leh chhuah a rual. A thiante nen kan inmelh hrek hrek ringawt. 

Ka rin aiin a lo thinrim a. Min be duh miah lo. Thlem a sawt bawk si lo. Ngaihdam pawh ka dil. A ngawi reng si. A online reng tho bawk si. Keia thinin diar hek lo, "Inthen i duhna chhuanlam i hmu ta alawm. Kal rawh. Mang tha" ka va ti hmak a. Data ka off a, ka phone ka dah bawk. Ka na up up, hei hi ania ka puitlin lohna em em chu. Ka thinrim laiin thutlukna siam ka ching a, kei aia naupang zawkte hian min khalh ngil zawk fo. Tin, ka luhlul ve tumhrang bawk si. Tûm burin ka mu a, mut a chhuak der si lo. Dar 12 a ri tep tihin information atangin chhiat tawh thu an rawn puang a. Tlangval thalai, zu in ve zeuh zeuh, ka inah pawh rawn chuangkai ve zauh zauh, Lalnunpuia thih thu a ni. Ka va tho rang tak. Ka thin a phu dup dup mai. Chak lohna lian tak ka nei a, Ramhuai leh mitthi hi ka hlau ngawih ngawih. Lalnunpuia phei chu thalai a la ni bawk si. A hrán loh reng ka ring lo. Ka phone ka la a, kal pui tur sawm ka tum. Mahse, Duatpuia'n a rawn call. Ka pick lo thei lo. 

"I hlau em? " a rawn ti ta chiah a. 

"Aw" ka ti hmuk. 

"Ka lo chho ang" a ti a. A dah daih. A rawn thleng har ka tihzia kha. Kan veng bawrah thian hmeichhia tur an váng em em a, awm tho mah se;hei mize inmil bik kan awm ve hi. Chuvang chuan Schoola ka thawhpuite bak thian tia han sawi em em tur ka nei lem lo. Anni lah kan veng a inang si lo. 

Kawngka a rawn kik dat dat a, ka va hawng ta vat. A rawn lut a, "I dáng vek alawm le.. " a ti sup a. Ka thinrim leh thut. 

"Ngati nge i rawn kal.. Biak pawh min biak duh loh kha" ka ti chang fal a. A khi suk. 

Kawngka a va kalh a, roomah min nawr lut. 

"An rawn au rual khan ka hrechhuak nghal che. I hlau leh dawn sia" a ti a. 

"Kal pui tur ka hre lo a" ka lo ti daih. 

"Kal lo mai rawh. In veng a inang chuang lo. Mu ang" tiin khumah min nam thlu a. 

"Phakar ee," ka ti hlak. 

"Tikhan ka chhungte chuan tlaivar turah min ngai ang. " a ti a. A idea ka hre ve reng. Ka kal chak em em lo bawk a, kan mu ta mai. A hmaa kan inrem lohna te kha chu lak bo ang huai a ni leh tawh. Kan inkuah chial a. 

"Nakkumah kan innei ang" a ti a. 

"I chhungte" ka tih mek laiin nimin tlaia ka nu nen kan inbiak dan ka hre chhuak nghal. Kan chanchin ka hrilh ve a, then turin min ti a nih kha. 

"Ka chhung ten an nei dawn hleinem che" a ti mai a. Mipa ho ngaihsamzia hi chu a. 

A tlai tawh bawk sia, kan muhil zui. Fawhte chu fawp ve nasa e. Mahse, a bak kan pel lo. A mood-ah kan cheng lo bawk. Zinga ka harh ruala min lo kuah chialtu ka hmuh chuan ka mood a fuh veng veng mai. 

Kan rinawm dun tlat avangin thikthu vanga kan buaina te chu chinfel theih loh a awm ngai lo. Class an kal tep tawh erawh kan lungngai dun. Kei pawh hmeichhe thu dawn tih nei zoin, college a kal ang a, kei aia tha leh nalh, a rualpuite a han hmu ang a. A danglam dawn niin ka hria. Ani pawn, keimaha in ka luah vangin tu te emaw an lo leng ang a, ka lo duh mai ang tih a hlau ve tho. An kal hma chawlhni tlaiah a thiante nen inthlahna chawhlui kan ei ho a. Kan ngui nghiai mai. Mahse, upa zawk ka nih angin ka fuih ve nasa a, chawlh apianga rawn haw a intiam bawk. Zanah pawh dar 2 thleng ka bulah a awm. Kan chesual teuh ther ther khawp mai. Mahse, ka duatpuia hi a insum thei thlawt… ka ta ni reng se ka ti a, mahse, chu chu engtikah emaw a la tawp dawn tih ka hria.. Ka ngaihtuah thleng ngam lo thin. 

College an tan ta a. Kan awm hrang ta. Ka lunglenzia chu aw.. Zan khat phei chu ka tap tawp! Mipa vanga ka tah ngai loh nen. Kan inbe nasa zual a. Games pawh a khelh tlem phah. Min biak kha a duh zawk zel si a. Lehlamah a tha phian. Hostelah an awm a, sual kawng a zawh ang tihte pawh ka hlau. Ka fuih ve reng. Zan khat zu an lo in ve tumin ka hau hrep a, "Ka in ve dawn. Ka chah mek e" ka ti pek a. 

Ka chah tak tak hran lo, tihhlauhthawn kha ka duh mai chauh a ni. Chumi zan chu friday zan a ni a. Dar 10 velah, Lalhriata'n min lo call a. " misualnu, zu in ve kher a ngai mi? A rawn haw phah kha aw. Zan reiah amah chauhin a rawn tlan dawn a nia" a rawn ti ta mai! Mak ka va ti tak. Engtin nge? Em em a na. Amah lah chuan phone a la thei tawh si lo. Zing dar 3 rik hma deuhin kawngka a rawn kik a, min lo call bawk. Ka va hawng a. A lo ding ran mai. Min rawn kuah chawt a. 

"Ti nge? " ka lo ti tuar. 

"Nangmahin zu in la, tu emaw rawn kal se, an khawih che ka hlau alawm" a ti! A va á tak e aw. A inbual a, ka lo ngjak. Mut chhuak a reh vek. Inhau miah lo chuan kan mu dun leh ta ran a. Ni e, zep si se lo mai teh ang.. Mipa leh hmeichhia, inthlahlel leh induhtawn ngawih ngawih nafam chu taksa a lo insiin a lo innáwk reng si a.. Insum chu a har ve a ni e. A vawikhat nan ani leh kei chuan Pathian duh loh zawng tiin hmangaihna chu kan chen dun ta a nih kha.. Inchhir loh hram ka duh khawp mai. A tuk nilengin ka bulah a awm. Kawngka kan kalh tlat reng bawk. An in pawh tlawh loin zanah bawk a chhuk leh nghal. Hringnun kha khatihlai khan kan pahnih tan a vulin a vul chûk a, mi dang an leng ve lo. Rinawm loh kha thil harsa tak a ni zawk awm e. Sex hial kan hman tawh avangin kan inhnaih zual lo thei lo va, mahse, ngaihtha tawh awm tak si kha kan thikthu a nasa zual sauh zawk a. Eng emaw hlekah thik tur kan dap a ni ber. Mahse, kan la chingfel ve zel chu a nia. 

Mahse, chhum dum chuan min hnaih tan ta a. Kan school bang in ka thleng chiah tihin a thianpa Arema'n min lo call a, "Miss, Duatpuia te an accident a.. Civil hospitalah kan awm mek.. A na angreng a. A la harh lo" a rawn ti ta mai! Ka thu hnawk mai. Ka khur zawih zawih bawk. Tihtur reng reng ka hre lo. Ka harh fim chuan khua a lo thim chhulh tawh. Arema chu ka call leh a. "Hei a la harh lo.. Miss, eng pawh thleng se.. Nang chu i chhel kha.. " a rawn tih takah chuan, ka duatpuia chu beisei tlak a ni ta lo tih ka hria. 

"A chhungte" ka tih mek laiin, "Aw hei an lo kal mek a.. An lo thleng tep ang"

"Engtin nge a accident theih? "

"Hriata pum a na a, damdawi a va leisakna lamah LPK nen an insu a.. A tlan chak ve deuh bawk a niang.. " a ti a. 

"Arem, a thi ang em? " ka la ti hram. 

"Miss, ka hre lo.. Pathian thu thu aw.. " a rawn ti chuai raih a. 

Chaw pawh ka ei lo. Inleng ka nei lo a. Ka lawm. Bual pawh ka inbual lo. Ka tei ka tei ringawt. Awmngaihna ka hre lo. Zuk call sek lah kha an buai ve dawn si. Ka tawngtaina lah a hul ngang mai. Ka tap thei lo bawk. Dar 9 a rik chuan ka pum ruahzia ka hre ta a. Thingpui tal in ang tiin ka va lum a. Ka thlit mek laiin kawngka an rawn kik, ka phu chiang kher mai. 

Ka va hawn chuan tumah ka hmu lo. Ka khar leh mai a. Thingpui leh biscuit tlem ka ei. Tui ka ti fahran lo hle. Ka in zawhah ka ha ka nawt a, ka luakte hi a chhuak ut ut mai. Khumah chuan ka han mu tak naa, ka ngaihtuahna chu damdawiin khuma mu mek ka Duatpuia bulah a awm thung. Min ngai ve ang em? Engmah a hre awm si lo. "Lalpa, i damtir dawn tiraw? " te ka han ti ngawt a! Keimah pawn ka tawngtaina chu ka awih lo. Phone ka khawih tha ngam lo, "Duatpuia a awm ta lo" an rawn tih ka hlau. 

Ka lo chhing sek nge, ka chalah a rawn fawp zauh a. Ka meng kawk. Nui sen sen chungin min lo en reng a. "Ehe! Duatpui, i dam maw? Ka va lawm tak" tiin ka lo kuah chung chung a. Nui hawk hawk chungin, "Ka kalsan phal che i ring mi! " a ti nghut a. 

"Mahse, engtin nge i lo kal theih? Bike-in maw! " ka ti hu a. 

"Ka hmangaih che" tih chiahin min chhang. 

"Hello.. Hello.. Khawtlang mipuite lo hriat atan chhiat tawh thu kan han puang ang e" tia au ri avangin ka harh zawk. Ka thu chiang ngei mai. Phone ka en a. Dar 11:20 chiah chiah. Ka beng ka hup.. Call ka dawng zui bawk si. Arema bawk a ni. "Miss, a kal chiah.. Pawi ka ti lutuk" a rawn tih chuan phone chu ka paih nghal. Khum kilah bang nghengin ka thu tung a. Ka khur zawih zawih bawk. Awmngaihna ka hre lo tih hian ka awmdan sawifiah thei se ka duh ber. Zing dar 4 bawr velah kawngka an rawn kik a. Mawlmang takin ka va hawng a. Hriata leh Arema leh Sawma te an lo ding.. 

  takin, "Khaw nge Duatpuia" ka lo ti a. Hriata'n a hmui pet ruh chungin min rawn kuah thawk. Thil awmzia ka hrechhuak leh si, Hriata awm ngheng chuan ka tap khur ta ngat ngat a. An pathum chuan min kuah a, kan tap ho ta. Duatpuia a awm tawh lo. A fair hlawl lo, hmabak tam tak a la nei asin. Tinge a thiante pawh an la dam hi.. A thih bik? Aih, ni lo.. Thi tur a la ni lo. Weekend hman a rawn tum vanga kan plan zawng zawngte kha.. 

"Miss, va kal ve la.. " Arema'n a ti a. 

An pathum chuan Min siam a ni mai. Puan min bihtir a, ka sam an siam, ka hmai te.. Duatpui, i thiante hi an va fel tak em.. Mahse, nangma min siam kha ka duh ber asin. An rualin ka pen ve pawk pawk a. Sawma chuan, "Insum a ngai lo aw.. Tun bak i hmu tawh dawn lo.. Miss, Duatpuia khan a ngai che sin le.. " tiin kawngah a thu hnawk a, a hmai hupin a khur ngat ngat. Mittui tling vekin.. Arema'n a kai tho a. Min rawn chelh bawk. Mi an lo tam tawh khawp mai. Mahse, tu te nge ka hre lo. Tumah ka hmu thei lo. Min luhpui a, Duatpuia mutna lam min panpui a. Khumah chuan a lo mu a, a hmelte chu a va tha tak ëm.. A lu erawh an tuam a. Muhil a ang. Min lo en thup tih ka hria.. Eng nge maw ka han pawisak vak ang le.. Ani hi ka hmangaih, ka duat em em kha a ni asin.. Ka puakkeh a ni ber e.. Ka zuk bawh a. "Dawt a nih hi" ka ti nghek. A nu a rawn tap ve nghal, "Bawihte, mama, In miss a lo kal hi.. Lo be ta che. " tiin.. A thiante awrawl chhuahin an tap bawk. Aww.. Kha hun kha ka hringnun atanga paihbo theih nise ka va duh em.. Zankhuaain ka Duatpuia chu ka kalsan lo. Ka thlir ngawih ngawih ringawt mai a ni. A hmel te chu a tha sin.. Ti nge hetia a mut reng le? 

Khawvar dawn hnaiah a nu a rawn tap leh a, "Bawihte, hei khua a var dawn.. Tho tawh rawh le.. Exer i la leh dawn lo mi? " a han ti chiah chu.. Ka insum zo leh ta lo. Ka puak leh ta rawi rawi mai. Tumah ka zahpah peih tawh lo. Lehlamah ka inleng thang an ni a, mak an ti em em lo ang. 

Duatpuia thih sarhu chhung chu a thianten min awmpui chawt a ni mai e. A chanchin lo chu ka sawi peih thlawt lo. Anni pawn Duatpuia'n min ngaih thinzia, vawi khat an hostela awm ve thoin a phone-a ka thlalak, "I nuteii mi? " a lo tih tuma a thinrim an insual dan te, ka thlavang hauh a tihnatzia.. Sex kan hman dun thu a thiante a hrilh dan te.. "Ka ta a ni tawh a. Ka hlimzia chu e.. A rai theih nan zantin ka la tawngtai" a tih thu te.. A tam mai. Amah lo startu te an awm ve nual thu leh, "Nupui hual ka nei tawh" tia a lo chhan zel dan te.. Aw.. Ka duatpui, i chanchin hi ka ngaithla ning thei thlawt lo. 

Sex kan hman chungchang kan sawi takah chuan, "Ka la period miah lo " ka ti a. Ka phâwk nghal viau bawk. Anni pawh an meng lian ngang mai. A tukah Hriata'n Pregnancy test kit a rawn keng zui! Thinphu dep depin ka va test a. Kan thlir thap. Rin pakhat a rawn lang va a, rei vak loah a chungah rin fiah lutuk lo a rawn inrin leh nia! Ehe!! Kan vai mai chuan kan au nghek nghek. Kan ţap pah bawk. 

"Lalpa, Duatpuia sulhnu min hnutchhiah a.. Ka lawm e" ka ti thei ta. Kei ai mahin a thiante chu an lawm niin ka hria. Ni e, an thianpa kha an hmangaih em a ni. 

Ka chhungte leh a chhungten ka rai thu an hriata an lawm dan erawh a dang deuh. Ka chhungte chu han lawm viau chi an ni bik lo va. Mahse.. Duatpuia thihna ka tawrhzia kha hmun dang atang pawn an hre ve a. Ka nu phei chu rawn phei a tum hial nghe nghe.. Ka phal lo zawk a. Chuvang chuan a fa ka lo pai pawh thinrima min hau vak ngam chi an ni rih lo a ni. Duatpuia chhungte erawh a thawng viau. Kan inngaibzawn an lo rin ruk thu leh a fiahna tak an la neih loh vanga an sawi ngai loh thu erawh an sawi. Tin, Duatpuia fa ka pai erawh an lawm takzet thung. Lo piang pawh nise kei ai mahin an duat maithei. Mahse, ka ta a ni a, ka fa chu ka bulah a seilian thung ang. 

Ka rai chhung zawng ka nuin min rawn awmpui ta a. Duatpuia avangin ka chhel a, ka chak khawp mai. Pathianin ka chunga rem a ruat dan hi hriatthiam a har pawh a ni maithei, mahse, pawm thiam erawh ka tum khawp mai. 

Naute tak ngak ngak chuan ka beng a verh zar mai. Ka meng diar diar a.. Ka nu ka hmu hmasa ber, A dawtah Duatpuia nu.. Ka mit ka khap fak fak a. Lalhriata'n naute a rawn pawm a, "Miss, Duatpuia chiah chiah.. I fapa hi" a tih chuan naute chu ka lo melh vat. A hmelah chuan ka duatpuia chiah ka zuk hmu.. Ka khi sak a. Mittui tling pam chungin, "Duatpui, ka lawm e" ka ti sap a. 

Min hualtu Duatpuia thiante, ka nu leh Duatpuia nu te mita mittui chu ka melh kual a. 

"Amah kha ka ngai lutuk" ka ti ţiau a. Ka nu leh Duatpuia nu an puakkeh nghal.. Pawnah an tlan chhuak a. Hriata leh Arema'n ka kut an vuan a. Sawma'n naute a pawm bawk.. 

.

"Kan fapa duat a nih hi.. Kan damchhung chuan a rethei lo ang. Duatpui, kan hmangaih che aw.. " Sawma chuan a ti sup sup a. 

Sawma bula Duatpuia hmel hlim tak, naute lo thlek ngawih ngawih, chumi hnua ka lam hawia nui sen sen chu tuman an hmu ve lo.. 

Ka hmangaih, Ka va ngai tehlul che êm…! 

(A tawp leh ta 😀😂