vantirhkoh

VANTIRHKOH.. 

Ziaktu : Toni Râlte

"Vantirhkoh hi an awm tak tak i ring em? "

"Ka ring"

"Anih chuan, nangmah venghima enkawltu vantirhkoh nih duh ta ila… "

"Vantirhkoh te chu leiah an awm ngai hleinem"

"A awmchhun ka ni mai dawn alawm"

Ka tahna mit bui lâk chu thup ka duh viau, ka sam te chuan ka han hliahtir thul. Min enchiktu tana hai rual lohin a langsar mai si. Va buaithlak e aw.  

"Ma, Apiin lo chhuk rawh se a ti" ka fanuin a rawn tih chuan ka ngui nghal rawih a. An sawi tur ka hre nghal. Ka zâm hle bawk. In hnuaiah chuan ka chhuk a, an lo thu thap. Ka nu leh pa leh ka nuta pahnihte. 

Thuthmun ka rem chiah tihin, "Bawihi, a zahthlak hle mai. Thil thleng hi, engtia tih nge i tum le? " ka pa chuan a ti dam thlup a. Ka pa hi chu aw khawvel paah hian a zaidam lawtlakin ka ring. Ka chil ka lem khalh a, "Ka hrethiam lo. Mahse, ka kalsan ang.. Ka tum" ka ti hrâwk a. Ka aw ka thian zui nghal a. 

"An rapthlakzia kha, kan in chhungah ngei min rawn luhkhung ngam a nia. A nu te kha MHIP hruaitu te kha a ni ve in ka hre sia, pawisak a neih loh hmel khawp mai" ka nu ve thung. Ani erawh ka pa letling hlauh, nu tè thinchhia a ni. 

"Nia, keipawh ka zak khawp mai. Ka thiam loh vek a ni" ka ti sap a. Ka mittui chu a rawn tling leh nghal pum mai a. 

"Engpawhnise, nangin kalsan duh mahla, amah hian a rawn zar leh chhèn chein ka ring a, chuvang chuan naktukah I nite bulah han zin hrih la a tha ang, kan mualpho thui hmain" ka pa. 

Ka pawm lo ngam lo. Ka tana tha tur a nih ve tho ka ring bawk. Mahse, a awlsam hauh lo vang.. 

Ni e, nuthlawi fa pahnih nei, a pasalin ngaihzawng a neihsan vanga mahni inlama let leh ka ni a.. Ka pasal chu vawi tam ka ngaihdam hnuah a tawp chin a cho chhuak a, ka haw a, sum kan chhuah nghal. Let leh tumna ka nei lo. Ka rilru a let hlauh a ni mai e. Ani erawh a rawn inchhirin ngaihdam min dil leh nasa a, a lemchan thiamzia ka man tawh em vangin mènah ka thlak a, hei kum 2 chu ka thlawi ve ta chu a nia. 

Ka fanu Kimpuii hi kan inthen khan kum 2 a tling ve tawh a. A nau bawihpuia erawh thla 5 awrh a la ni. Keiman ka awmpui a. Kei aimahin ka chhungten an duat zawk a, Unau zinga hmeichhe awmchhun ka lo ni bawk a, ka kir leh pawh chu a hrehawm hran lo. Mo kan la nei lo bawk a, ka fate avang hian kan hlim zual sawt ni maiin ka hria. 

Kum 30-na ka hmang mek a. Ka cher lem lo naa mawi lo khawpa thau erawh ka ni hran lo. Ngo ve deuh tak ka ni a. Ka hmel erawh a tha lua lo, a thlirtu mit azir aniang chu. Ka te chhe lem lo bawk. Ka thlawi tak hnu hian duh dertu ka tawng ve zeuh zeuh a. Nuthlawi ka nih tak avanga min pawngzuam mai pawh ka haihchham lo. Kohhran upa fanu ka nihna hian ka nun a vawng ve deuhin ka hria, ka nuthlawipui thenkhat te anga zalènna hmang thiam lo leh a zuamawm zawnga ka khawsak ka hre bik lo. Mahse, nula two kan nihna vang hrim hrim hian nula hnahkhat ai chuan kan hniam tawh sa hrim hrim a. Hei zawng ka pawmzam ve thei mai. Ka vak chhuak meuh lo va, inkhawm leh bazar zeuh zeuh a ni mai. Bawihpuia a la lian lo bawk a, ka awm nileng deuh tawp. Kimpuii erawh school a kal ve tawh a, a putea te schoola a kal avangin a rawn hruai thei zel a. A zangkhai angreng. Chhungkaw khawsak harsa em em lo, mi te anga hausa ni si lo kan ni. A vantlang tawk a nih ber chu. 

Kum 2 ka nuthlawi hnuin tihtakzeta min ngaizawngtu ka tawng ta a. A hmaa min duh vetu te ai chuan a danglam hlek. A chhan chu keipawh hian ngaihtuah ka ching tlat miau a! Dik tak chuan khang min duh der vetu ho kha chu ka duhzawng an nih loh piahlamah sex ngawr ngawr an duh niin ka hre thin a. Ka thinlung an chhun thleng phak lo a ni ber. Tuna mi erawh a danglam tawp a ni mai. Mahse, kei aiin kum 9-in a naupang thung! Rapthlak hian.. 

Whatsappa fiamthu group atanga inhria kan nia. Fiamthu a thawh peih khawp a, ka lo nuihpui ve ziah bawk nen, min rawn pvt nawlh a. "Chumi chu i ang tawp.. Ka hmu tawh chein ka hria" tih ang velin bul a rawn tan a. Keipawn ka lo chhang liam ve mai zel a. Kan inbe reng hran lo, mahse, zing leh zanah min wish theihnghilh ngai lo thung. Keipawh hian min wish hun ka nghak deuh tawh niin ka hria. Mahse, inngaihzawnna lam engmah kan sawi ngai lo. 

Zan khat chu.. "ih maw, U hma, min pui duh ang em? " a rawn ti nawlh a. 

"Eng thilah"

"Ka sawi zak ee"

"Sawi la"

"Umm.. Ih maw, ka bialnu lakah hian ka ngaih a tha tawh thlawt lo, min ngaihsak tawh lo reng reng, tumah a thik tawh ngai bawk si lo va, chung vel chu"

"Chuan.. "

"Ih, a thikthu cho chhuah nan min pui thei ang em? Amah hi fiah ka duh bawk a"

"I sawi awmzia? "

"Inngaizawng ang typein inbe thin ila, ka phone a en hunah engtin nge a awm a, eng nge a rilru ka hre duh a 🙈"

"Awii ka thiam awm lo"

"Chutia inbiak duat vak pawh a ngai lo, hei inbiak satliah mah se, inbe regu ve deuh, thiltih engkim inhrilh tawn zel ang kha a ni mai"

"Ok"

"I duh loh chuan a pawi lo ania, ka tilui lo che. Mi dang ka ti ngam lo va, ka zak ve tho sia" 

"Kan tum dawn nia. Mahse, i bialnu chuan min ankhum ang nge aw. Ka hlau ania"

"Engahmah a ngaih loh chuan ka then ang" 

Chu chu kan bultanna a ni ta. Ka nuih a za ru hle chungin a idea chu a aia tha ka hre bik chuang lo va. Inkhualtelem kan ang dawn hlein ka hria. 

A tuk zan atangin kan inbe chho tan ta a. Phone bih chungin ka lo khi leh vur vur zel a, ka nu phei chuan min lo ngei leh hmanhmawh pek. 

"Ei kham chiah, ei dawn tawh em"

"Mu tawh la, i last seen ka check leh dawn nia" tih angreng vel chuan kan inbe nitin ve ta a 😂 a hlimawm phian. A lem a ni tih ka hre kur erawh chuan ka nuih a tiza nasa thei. Kar khat dawn chutianga kan inbiak hnu chuan inbiak loh kar hlekah chuan khua a har veng veng tan ta. Mahse, ngaihzawn enin ka en lo hrim hrim. A bialnu pawh hian a la hmu lo nge mawni le. Call hialin kan inbe chho a, fiamthu a thawh uang thiam sia, kan nui dun awr awr reng mai. Venghlunah an awm a, keini Tuikualah. Min hmu turin a rawn kal ve ngei a, a takah a lian zawk. Ka lian ve hle ania, ka la chhoh en thei. A kum a thansan ve deuh a nih hi. A ngo veng reuh a, a hairstyle chu ka ngei chi. A inhmeh phian bawk si. A cool reuh tawp, a takah chuan keimah ka tawng tam zawk, a zak ve aniang. 

Khatia kan inhmuh hnu atang phei kha chuan inngaizawng ni miah si lo vin engkim kan inhrilhtawn a, report hi kan pe thlap thlap a ni mai. Tihtauh te thlengin kan ching chho tan. A bialnu lam reng kan sawi ngai lo. Mahse, inrinni zan khat chu, ph call ka dawng ta a. 

"Hello"

"Hello, Tu nge aw? "

"Tu nge i biak duh? "

"Tu nge i nih? " a aw chu a nelawm tehchiam loh. 

"I biak duh chu sawi la.. "

"Ih maw, ka bialpa Zothanpuia hi lo be tawh suh aw.. " ka nghing ve dawt thei. 

"Aw le" ka lo ti mawl tawp. 

Chumi zan chuan kan inbe ta lo. Kan thawnthu chu a tawp dawn ta anih hmel e. 

Zinga ka ph ka en chuan, "Morning, Hmangaih" min ú lohna a rei tawh. A zak lo siah. 

"Inbiak tawh loh a that ka ring" ka va ti a. Ka thinrim tún ringawt anih chu. 

"Inbe zel ang"

"I bialnuin a hriat tawh kha. Tikhan tawp tawh rawh se"

"Aih, nizanah kan inthen"

"Eng a?! "

"Aw a dik alawm. Ka tan engmah a ni tawh lo. Ka lo hmangaih emaw ka lo ti mai mai alawm le"

"Eng nge i hriat a? "

"Ka hriat chhun chu maw.. Nangmah be lo hian ka awm thei tawh lo"

"Mawla"

😘😘😘😘 a rawn dah tuar. Ka sa hut hut mai. Ka rilru a buai tlat. A status lah chu, "Tunah chuan ka duhthusam tihlawhtling turin zalèn takin ke ka pen thei ta. Hmangaihi tih hi hmangaih an lo awlsam anih dawn hi" tih chu.. 

Chawhnu inkhawm tlanboin a rawn leng nghal mawle. Min bialnu chei vek tawh. Sawi tur a vâng duh hle mai. 

"Ih maw, kan inbiak tirh kha chuan ka be liam ve tho che. A rei telh telh a, biak loh che ka thei tawh lo. I msg hmu lo va awm hi ka thiam tawh lo. Ka zak ve lutuk tho, mahse, ka duh che" a ti ta a. A tawngkam thiam theihtawp a ni tih ka hria. Ka chhungril lawm tlat chu ka hrethiam lo. Ani hi ka bialpa a ni ang maw..! 

"I â lutuk, kum 9in kan inthlau a, nuthlawi fa pahnih nei ka ni bawk. Harsatna a tam dawn lutuk. Thil theih loh tawp a ni" ka ti mial mial a. 

"Min duh ve phawt chuan ka hmachhawn ngam" a hmela tumruhna chu hmuh hmaih a harsa mang e. 

Ka thaw hawk a. Ka rilru a buai tawh lo. Ka duh ve em em tih ka chiang tlat a. Mahse, hmalam hun ka ngaihtuah a, ka buai zel. 

"Thil i ngaituah nasa lutuk anih kha, mi te pawn an nu rualte pawh an nei alawm. Kan la inthlau lo e, fa pahnih tih vel a ho lutuk, ka pawm thei vek"

"I sawi awlsam bawk siah" ka ti ringawt. A nui a, ka biangah a rawn piai a, "I va'n hmel tha" a ti teh ngawt a. Ka sen tan tanin ka hria. 

Ka hnar nat bik miau loh vangin kan inngaizawng ta chu a ni mai a. Ka zawr hneh khawpin ka hria. Ka inzahpui chang a awm fô! Ka insih vawt vawt chang te, ka lei ka chhuah zuk zuk chang te a awm. Ka naupang tha leh ni mai ten ka hre bawk thin. Engkim chu a nuam a, hmalam hun ngaihtuahna chauh lo chuan kan hlimna an pawlhbuai ngai lo. 

Class a la kal ve si avangin kan inhmu tam vak thei lo. A thikthu a chhe lawtlak a, ka ph a check apiangin thik tur a hmu zel! Kei lah betu ka nei ve reng si. Thenkhat kha chu a block hmak hmak te pawh an awm. A thu vet vet bawk siah. A ph ka check ve pawn thik tur ka hmu ve ngai lo. A bialnu hlui khan a lo be zeuh zeuh a. A reply ngai lem lo. 

Chance kan nei khát a, kan neih ve chhunah kan duhthawh. Virginity pawimawhzia hi aw. Ka virgin tawh chuang lo tih rilru nen amah duhna leh thlakhlelhna nen vawi 3 kan awm falnaah sex kan hmang! Nuam tak a ni 🙈 ka pasalin min pek theih loh a vawrtawp an tih te hi ani chuan min pe a, a bulah ka zakin ka tím miah lo. Kan inpawh a, sex kan hman laia ka nuamti hmel te a zir thin. Kan nui dun awr awr zel a. Rai erawh ka la duh chiah loh avangin damdawi ka ei thin. Upa fanu ka nihna chuan min venghim zo ta bik lo a ni e. Ka inchhir miah lo lehnghal!  

Zan khat a cousin thiin a luak a, hospital an panpui a. Chhuanlam remchang tak a ni. Ka thiannu Puiteii a dam loh ve tho vangin kan turin ka chhuak a, kan inah hi chuan a rawn leng tam lo. Keimah hian ka phal vak lo. Ka chhungte ka zah. 

Dar 8 velah a thianpa Rema in luahah kan chhuk thla a. Khumah kan inkawm a. 

"Nakkumah innei ila"

"I zak em? "

"Zak e" 

"Inneih chu hmanhmawh suh. Zir chhuak phawt rawh"

"Ka nupui i nih hun chu ka inchhuang thei ngawt ang" Chutianga min zah dera nula hnahkhat ka nih lohna haider thei mipa chu ka tan pawh thlakhlelh loh theih a ni lo. 

Duhthawh zetin kan inkeih leh mial mial tawh a, ka hnute chu a tham tâwn tâwn a. Ka chhing diar diar a, kan thawmhnaw kan phelh vek hnu chuan light a off a. Kan tum ram thleng turin thahnemngai em emin hmangaihna lipui chu kan luhchilh dun leh a. A nuam a ni tawp mai. 

"Damdawi ei tawh suh aw"

"Ngati"

"Rai rawh. I rai hma loh chuan min neih i tum lo".. 

"Fa nei rual pawh i la nih loh kha"

"Ti ve ziah suh. Ka chi a puitling tawh a, nei rual ka ni a ni mai"

"Tak takin i chhungte hi ka hlau"

"An seh lo vang che"

Nitin mai hian kan induhna a pung deuh deuh zel a. Ka chhungte pawn an hre tawh. Ka nuin min kam khat hlak. Ka pa erawh a ngawi thung. Chhuak dawn ila kan chhuak dun zel a, min hretu pawh an tam tawh khawp mai. Whatsapp dp-ah kan inhmang tawn a, hetiang em ema luanliam hi ka neih ka hre ngai lo. 

"Zothanpuia hian kan vengah sas a nei reng sia" ka thiannu Lawmi a ni. Ka phu chiang kher mai. 

"Tu nge chu chu"

"Seni a nia, ka naute nen an inkawm ve thin alawm. Zantin a leng ziah"

Ka kehsawm mai dawnin ka hria. Ka so bulh bulh mai. A mak ka ti lutuk. Ka call nghal a, a ring quit thak. Ka mittui a rawn tla ngjal, mi derthawng tak ka ni si a. 

Min lo call back a, a aw zangkhai vahte chu ka hua. 

"Zawnga, min lo kawp reng a maw? I bialnu Seni te inah i leng leh tawh mi? " ka ti nghal hlawih hlawih a. 

"Maw.. Eng nge awmzia? Tu nge Seni"

"Zep suh. Engkim ka hre vek tawh"

"Ka rawn kal" tih leh ph dah a rual a. Ka tap thawthang a ni mai. Kan ina a lo luh lai chuan roomah ka awm a. Ka nauin min lo ko a. Ngui deuhin a lo thu a. Ka nute an awm lem lo bawk a. Ka fate lah an muhil tawh bawk si, ka nau bulah chhuanlam siamin kan chhuak a. Car ah kan thu vang vang a. Ka la insut feih feih reng a. 

"Khawiah i ph" a ti a. Ka pe. 

A check a. A hmel rum tial tial chu ka lo en reng a. Min rawn en a, zaidam deuh hian, "Thudik a ni lo. I thiannu hian a hriatsual anih hi. Seni hian min ngaizawng thin a, an inah pawh ka leng ngai lo hrim hrim. A msg zawng zawng ka lo clear thin a, i thik ka hlauh vangin ka tihsual a ni. Kan inngaizawng lo takzet"

"I dâwt sawi ngaithla turin helaiah hian ka rawn kal lo"

"Kal lo e. Ka hruai chhuak che lawm"

"Fiamthu thawh suh"

Ngawi rengin a ph a hmet a, tu emaw a call a, speaker a on nghal zat a. Hmeichhe awin hello a rawn tih rual chuan, "Seni, ka bialnu i ni lo tih hi sawi rawh. Hei ka bialnu in a lo hriat sual a, kan inngaizawng emaw a tia, a rilru a na lutuk. Kan inkarah engmah a awm lo tih rawn sawi teh" a ti mial mial a. 

"Ih.. Aa.. Nia a awm lo. Tu nge i bialnu chu" 

"Hmangaihzuali, khawvela hmeichhe hmeltha ber leh min tihlim thiam ber" 

"Nih tak chu.. Hlim deuhin le" a ti nghat a. A dah daih. 

"Tikhan a chiang em? "

"Chiang lo, a lungawi loh em kha". 

"Anih chuan hawh an inah va kal ang" car a tinung ta mai. 

"Ka duh lo" ka ti mawlh mawlh a. A tithi leh ta a. Min rawn kuah a, mitmeng tak ngal hian, "Ih maw, duati, ka hmangaih che. Mi dang hi ka ngaihzawnsan phal lo hrim hrim che. Ka neih theih nan che hian thih thlengin ka bei ang" a ti a. Ka thinlung chu tui ang maiin a nèm leh vek. Ka hmangaih a ni he pa hi. 

Tichuan, kan tha leh ta phawt a. Mahse, hoteah ka ringhlel zel tawh. Amah pawn chu chu a hriat avangin zan khat phei chu ph min hman thleng tawp. Seni chuan a rawn text reng lehnghal. Hmeichhe nasa te anga chhan hrep ka chak ve tho naa ka insúm. 

"Khatiang nuthlawi ai kha chuan engtikah emaw chuan min la thlang tho ang" tih angreng vel a ni. 

"Beiseina ka siamsak si lo che a, min lo biak reng hi sim tawh rawh" ka va ti ve tawp. 

"Ka hmangaihna che hi i la hrethiam mai ang" a rawn ti talh. Ka bialpa hi a luck ve thawkhat a nih hi. A ex te reng an chhe lo thei em mai. 

Kan pahnih inkar a fel leh ta tihin vanduaina dangin thla a rawn zar ta a. Zirtawp zing kar a ni a, zan lama ka menrei deuh vangin ka tho hma lem lo. Thinrim ang thawm avang chuan phak zetin ka chhuk thla a. 

Zothanpuia nu ngei mai chuan ka lei pathian ka nu leh pa te chu kawkin a lo ankhum phiar phiar mai le.. 

"In fanu hi in zuar anih ngawt loh chuan ka fapa hi rawn zar tawh suh se. Kan fapa hian nula hnahkhat a hmu zo lutuk. Engtikahmah in fanu hi ka in chhungah a rawn lut ngai lo vang". A tih mek laiin ka hmel a hmu chu a ling leh phat a, "Tlangval, i phu tawk an tam tehlul dawn nen ka fapa ber kher i lo bum hi maw ka ngaihdan a ni lo ania. I phu lo. Nang nuthlawi fa pawm tawh kha chuan tlangval upa lam emaw pathlawi emaw zawng zawk rawh. Vawi khatmah ka fapa hi lo hmu tawh ngai suh ang che" a ti ta siah siah a. Sawi tur reng ka hre lo. A chhuak leh vut bawk si. Rapthlak tizetin kan inmelh kual hrek hrek ringawt. Chaw pWh k ei ta lo. Ni lengin ka tap. 

Zothanpuia ka va hrilh chuan a aw khurh danah a thinrim tih ka hria. Ka va zak tak em. Ni e, nuthlawi ka ni tih ka hai bik lo asin. Nuthlawi ka nih vang maiin ka hmangaih pawh ka hmangaih thiang lo bik ang maw.. Ka duh vang renga thlawi ka ni miah lo asin. Fate pa berin kei aia thlan zawk a neih miau chuan kiansan mai loh chu tihtheih ka nei si lo a ni. 

Ka pa remruat angin ka nite khua Biate-ah ka zin dawn ta a. Zothanpuia chu engmah ka hrilh lo. Min dang dawn tih ka hriat avangin. Ka fate erawh ka chhungten an enkawl hnehsawh lutuk,ka hruai ve ta lo. 

Biate ka thlen zan chuan mitthi an lo la nei zui. Ka chauh deuh avangin ka mu hma a. Ka ph ka off char char chu ka on a. Awiii msg chu a maka maka tam a lo thleng zut zut a. Chhiar lo vin ka delete nghal vek. Ka chhiar chuan ka nem leh mai ka hlau a ni. 

Min rawn call ta bawk. Lak loh theih loh khawp a nih tak vangin ka la ta hram a. 

"Khawiah tehlul chuan nge i awm a? " a rawn ti hrâwk a. A aw a lian si, ka hlau hman tep. 

"Ka sawi thei lo" 

"I va dawihzep ve. Harsatna pawh lo thelng se kan pahniha hmachhawn turin kan intiam tawh a ni lawm ni? "

"Ka thei lo a ni"

"Ka thei alawm. Khaw nge i awm sawi rawh. Ka rawn hruai ang che" 

"Ka thleng ve chiah a nih hi" 

"Mawh, sawi teh. Ka ngai lutuk che. "

Signal a chhe thut. Remchangah hmangin ka off nghal. A lakah ka thinrim lo, mahse, ka na. Ka zak bawk. Kalsan hlen tur anga ka inngaihtuah chuan ka kehchhe zel. A na lutuk. A mi kuah te, a mi duatna te kha ka la kham mawlh lo asin. Ka ngai lutuk keipawn. ka tap tlaivar leh ta ngawt mai. 

Ni 3 lai ka cham ta a. Whatsapp leh face book ka delete vek a, amah chu ka block bawk. A va harsa em. Zothanpui.. Mipa naupangtè, ka ngai takzet che a ni. 

Ka pain min lo call a, "Bawihi, thil hi ka rin aiin a lo khirh. Tap miah suh aw. Tun mai khan Zothanpuia bo thu an rawn sawi a"

Ka ph ka thlauh tawp. Ka tlu hnawk a, min hnawhtu a awm vangin ka tap thei lo va, ka thaw tha thei hek lo. ka ni ten min bawihsawm tih chu ka hria. a thim vek. Ka ni leh ka pa inbe lawng lawng chu ka mang hriat ruai ruai. Zothanpui, ka duat, eng thil nge i tih le.. 

A tukah ka haw vang vang. In ka thlen chuan tupawh mai chu an ngui. Zah ka hre tawh lo, an ina kal ka tum a. Ka pain min dang. Kan inchai buai laiin zothanpuia nu leh pa an rawn lut a. Eng sawi set set lo vin a nu chu ka kawk a, "Khawiah nge i dah? Sawi rawh. Nangmah vang vek anih hi" ka ti tuar tuar a. Ka normal lo tih a chiang reng. 

"Ka hre lo, khaw nge a kal ka hre lo a ni. I bulah a awm ka lo ring zawk asin" a tap pur a. Ka haw hluah hlauh. 

" Zawng chhuak rawh u. Khawiah nge a awm ang, eng nge a tih ang" tiin chhuatah ka nuar a. Engmah ka ngaihtuah chang lo. Zothanpuia tih chauh lo chu.. 

Kar khat a liam, ka mu chawrh chawrh ringawt. Ka hmangaih erawh ka bulah a awm si lo. Khaw nge a kal ang. Khawtlangin an zawng a, a thi tawh anih pawhin a ruang tal hmuh an la inbeisei fan a. Kei chuan a thih ka ring lo. Khawiah emaw min nghak aniang. A ph a off bawk si. A zan leng chhuak a haw lo tawp a ni mai. Ka inthiam lohna chuan min vit ngut ngut reng a, na theihtawpin min hliam nawn ut ut reng mai. 

"Ka tan vantirhkoh nih i intiam a. I awm si lo" tiin ka phun sep sep a. Ka kaah hian engmah a lut thei bawk si lo. 

Ni 7 an zawn hnuah pawh an hmuh theih si loh vangin an vui liam a ngai ta. A va na em.. A mak a ni. Khawiah emaw chuan a lo tlu reng maithei asin. Vawt tiin a lo khur beuh beuh thei a, rilrtam dngcharin a lo let reng thei asin. Ka fate pawh ka ngaihsak hlei thei lo. Ka fate tana pa tha tak nih tum, ka fate pawhin an ngainat em em kha engvanga tlanbosan tum nge maw ka nih le.. 

Thla a liam a, thla hnihna kan chuangkai tihah "Zothanpuia an hmu" tih thawm kan hre ta. Ka khur zawih zawih reng mai. Ka lawm nge ka hlim. Ka pa nen rang takin an in lamah kan va phei ve a. Karei, a sam buk lutuk te, a mitmeng sen rim rem, rum ul te chu aw. A bawrchhawr takzet. A ngawi reng bawk si. A mitmeng â ruai chu ka melh tlawk tlawk a. 

"Zo.. " min rawn en a. Min melh run run a. 

"Zo"

"Tu nge i nih? " a ti ta. A aw chu a la ngai, a thusawi erawh a danglam ta. Ka leng vawn vawn ni maiin ka hria. Insawi fiah tuma ka ka ka an laiin ka pain min rawn kai chhuak a. Ka biang tawn tawna dawm chungin, "Pathianin engkim a rel fel thin. Hei hi i tana kawng a ruatsak che a ni maithei asin. Bawihte" ka mittui luang zet kha aw.. 

Ka hmangaih hmel chu ka hmu thei, mahse, a tan mikhual ka ni ta. A bo lai ai mah khan tawrh a hrehawm zawk. Ka chhungte chuan min hrethiam em em, min lainat tih ka hre bawk. Ka taksa pawh a chhe chak khawp mai. Hmalam pana infuih turin chakna ka nei thlawt lo a ni. 

Thla 6 a liam a. Kum tawp a lo thleng leh dawn ta. Tlem chuan ka pangngai tan a. Mahse, hmana Lalhmangaihi kha ka ni ta lo emaw tih turin ka mize ngainatawm zawng zawng kha a bo ta vek a. Mi thinram, kawlhsen tak ka ni ta. Ka fate ngei pawh ka uap lum ta meuh lo. Mahse, an nu nih reng erawh ka tum. Mipa pakhat vanga ka chhungkua tihchhiat eraeh ka la tum lo ve fan chu anih hi. 

Christmas bazar turin kan chhuak dam dam a. Ka hah hle. Ka dawhtheih loh tak em vangin ka ning lutuk. Israel point a kan din thap laiin Zothanpuia leh tleirawlte pakhat hi an rawn kal phei a. Tunah chuan Zothanpuia pawh a hmel pangngai a pu leh ta. En harsa ka tih em vangin hnuailam ka melh reng a. Bawihpuia ta pek chuan, "Apa Zo" a ti ta mai! Rang zetin a ka ka hup a. A rawn hawi phei a. Makti hmel a pu. Kan mit a intawng tek chhawk. An kal leh nghal mai a. A rawn lehhawi leh hram chu ka hmu thei. 

Zanah whatsapp statusah, "Tunah chuan a hlim tawh a min mamawh tawh loh tih ka hria. Ka kal ve tawh ang e" tih thu ka up a. 

Ka contact list-ah a la awm reng vangin a lo view ve a. A hrethiam awm si lo. 

"Tikhan dawihzep taka inkalbosan hrehawmzia leh kan mamawh ngawih ngawih ten min hnungchhawna a natzia chu i hrethiam tawh em? " tih thu hi a hnen atangin ka dawng anih chu! Ka thlawk lo chauh. 

"I sawi awmzia ka hre lo" ka va ti a. 

"Tuin nge a hmangaih ber theihnghilh hlen thei ang? Mahse, a hmangaih chu a thunun thiang alawm" a rawn ti leh. 

"Zothanpui"

"Hmangaihzual. Ka hmangaihzual"

Ka awmdan ka theihnghilh vek. Chutah thil awmzia ka hrechhuak thut… 

"Zawnga 😡😡😡😡" tih ka va thawn a. 

"Biate nu.. "

"Hei hi maw.. Thil nih dan"

"Ngawi rawh. Hei in kawtah ka awm. Lo chhuak teh. Ka fawh chak tawhzia che hi i hrethiam leh pek lo vang"

Engvanga min hrem nge anih? A rei zia kha. Phuba zawng ka la ve mawlh ang le.. 

(Vawiin chu in chawh lo aw. 

Ka chawh zawk 😥