U MAPUIA..

“U MAPUIA”

- Toni Râlte

B iakin dar ri val val chu chhungrila nui ru ver ver chungin ka ngaithla a, ka damchhunga a vawikhatna atan ka tan liau liau chu dar chu vuak rik a ni. Ni e, vawiin hian “Tiam Tlat e” tiin U mapuia nupui ka ni tawh dawn a ni. Min cheitute chuan nui sang chungin min en a, darthlalanga ka hmel chu keimah ka ni tih awih a har! a chhan chu ka hmel\ha lutuk tlat! Chung zawng ai chuan ka hmela hlimna inlar leh ka mitmeng de sawr sawrte chuan keimah ka ni tih min awihloh tir hial a ni. Ka kawrfual var sar chu ka u design a ni a; a simple thei ang bera \hui a ni, ka veil khim chu ka han siam\ha deuh a; veil khim tlak khawpa nula thianghlim ka ni lo tih erawh ka inhrechiang hle, a rukin ka zak a! ka virgin tawh loh vangin chu veil thianghlim leh mawi tak chu khim tlak niin ka inhre lo, mahse, min khimtir miau si a le..

Ka nu\apa chuan zawimuangin Biakin ah chuan min luhpui a, music ri riai riai karah chuan ka mitsirin mipui lo \hu khat hmur chu ka hmu thei a, ka zam hle mai. Mo neitu bula ka din chuan ani chuan min lo melh a, mawi ka tihber chiin a nui sang bawk a! ava han hmel\ha tak em..

“Pathianin a zawm tawh chu mihringin \hen suh se” tia kan Pastorin a sawi lai chuan ka lo maimichhing a, “Kei chuan ka \hen ngai lovang” tiin ka intiam tluk tluk a. Kan chhuah dawnah chuan, ka beng bulah zawi sap hian, “I nalh lutuk, bawihte” a rawn ti a..ka pasal a ni tawh tih ka hriatna chuan min tihlim hle.

“Ly, pasal neih hi thil satliah a nilo a, i pasal i hmangaih ang bawkin, a chhungte pawh i hmangaih tur a ni; i chhungte anni tawh tih hria la; chhungkaw \ha tak din turin nangman bul\an ang che” ka nu thuchah a ni.

“Bawihte, nupa inkarah chuan inhmangaihna piahlamah tisa taka intih lungawi te hi thil pawimawh tawpkhawk a ni, i pasal chu Lal angin cheibawl la, nangpawh lalnu i ni tihna a ni mai; hmeichhe lu chu mipa a ni tih hrereng la; i pasal rorelna chu zah tak chungin ilo thlifim \hin dawn nia, engkimah Pathian hi dah sangber fo la, tichuan chhungkaw vanram chu i chen thei ang” ka pa a ni.

“Awiii Ly, i han mo anga, i nep ve ropui sia, inthlahrun tina mi i ni bawk si, i tha kha chhawr an tum nasa dawn tih hria la; a \antirah chuan tawrh hram hram a ngai ve ania” ka u hmeichhia, pasal nei tawh thusawi ve thung a ni. 

“A nu leh pate kha ka nu, ka pa han ti seuh seuh la, a dik vek mai ang” ka \hiannu, ngaihsam ve tak thurawn a ni.

Kum 26 lai ka ni ve tawh a, ka rilru erawh ala puitling hran lo; unau zinga naupangber ka nih vangin duat rawn ka ni a, ka pangchang rei bawk; pasal neih chu ka puitlin loh vang zawk nge ka huphurh hauh lova, ka hmangaihber bula ka cheng tur chu ka lawm hliah hliah zawk a ni. 

“Make-up tello hian i nalh zawk, lalduhawm lutuknu” ti ham ham chungin khumah chuan min bawh a, ka mawng chu a sawk tawn tawn a, ka \hiannu min leisak underwear dum chu awlsam takin a phelh mawlh mawlh a. Keipawh ka awm mai mai bik lo; nupuiin a pasal chu a sawngbawl ve bawk tur a lawm..kan inneih zan chu nawmna leh phurna hlirin kan hmang dun a; mipa zei lo tak a ni lem lo a, keilah zahpuiawm khawpa zeilo ka ni bik hek lo. Ka zep lo; zing dar 2 ah te chuan kan la inlawm nui iar iar a, eng nge..kan inneih zan a ni miau a lawm..

“U Mapui, pawi ka ti lutuk, hrilh che ka duh a, mahse, ka ngam ngang thin lo a ni; nupui atan min duh tih ka hriat khan hrilh tur chein ka infuih char char a ni” ka ti a.

“Chuan, chumi hnu chuan vawi engzat nge in hman leh?”

“Vawi hnih chiah ka la hmang, engmah a nawmna pawh ka hre lo hrim hrim” mawl mang takin ka ti a. 

Nia, ani nen kan intawn hma khan lehpek awm theilo tur khawpa hmangaih ka lo tawng ve tawh a; kan inhmangaih tih hi inringtawk takin ka sawi ngam a ni. Kan inngaihzawn atanga thla 6 hnuah inthlahlel leh inmamawh tawn na na na chu insum zo ta bik lovin sex kan hmang a; pawi tihna leh inchhirna ka nei miah lo! Pathian phalloh a ni tih hre mahila; ka pasal tur ang hiala ka ngaih tawh avangin pawi ka tilo zo tawh a ni. Ani pawn min hmuhsit nan a hman ka hre lo a, ka hmangaihber hnena ka thianghlimna leh zahawmna ka hlan thei chu ka lawm zawk!! Nawmchenna satliah ang leka ngai a, rui chung leh kalpah taka sex hmang \hinte ai chuan ka la indahsang ve fan a! vawi hnih kan hmang leh a, mahse, na ka ti thei em em a, ani lah ka rualpui mai a ni a, mi han play kual vel kha a thiam bik lo, a nawm leh nawm lohna ai chuan inhmangaih tak chunga kan inzawmna tinghet tura kan hmanna khan min tihlim tho! 

Hna a hmuh veleh inneih kan tiam a, a thawkrim a, vawikhatmah ka lak atangin a pelhe ngai lo. Keipawh a tan ka rinawm tluan parh a ni. Mahse, hringnunah hian kan thunun theih loh thil a thleng ve thin. An class an picnic haw lam chu an chuanna motor leh truck insuin a lu-ah hliam a tuar a, damdwiin ka thlen ve hmain min lo kalsan ta a. Amah leh a \hiante pahnihin nunna an chan a ni. Chumi ni chuan min ngai em em a, “Ka lo kal ta kher kher a! i bulah lo awm daih ila \ha zawk tur” a rawn ti a. Min ngai tak chunga lo haw chuan a ngaih em em pawh min nghak zo lovin khawvel hi a chhuahsan ta. Khatihlai hun khan ka nung ta bik lo niin ka hria.

Ka tawrhna avangin ka zirlaiah pawh ka tlahniam em em a, ka chhunzawm theilo ta hial a! BA 2nd year ka zir kum a ni a, ka kal tluan ta lo ringawt mai a ni. Ka chhungte chuan an remti lo, mahse, engmah ka ngaihtuah thei ngang silo a. Tichuan ka pa in dawr min siamsak ve ta a, Bazarah pheikhawk dawr neiin ka hun chu ka hmang chho ta ngawt mai a . Kum 20 ka nih kuma thleng kha a ni a, kum thum chhung chu mipa reng reng ngaihsak lovin ka awm awmin ka awm ve tawp a, a kum 4-na ah U Mapuia hi ka tawng ta a ni.

“I VIRGIN LOH VANG khan ka hnawl phah lo che, keipawh ka virgin tawh chuang silo a; nang aiin ka hmang nasa daih tawh lehnghal! Tu emaw nupui virgin kha ka hawnsak a ni ve tho a, nupui virgin neih hi ka phu bik lo e, Ly, ka iai lo che a, ka tan chuan ila thianghlim a ni. Virginity avangin hmangaihna a piang hleinem; I virgin tawh loh vanga ka hmangaihna che hi a bo ta a nih chuan hmangaihna hlu lo leh mahni hmasial tak a ni dawn tihna a nia, tin, maw kan nunhlui chu nunhlui a ni, kan intawn hma thil chu kan thunun phak a ni lo a, hahdam takin tun hun hi thunun i tum zawk ang aw..” U mapuia hi mipa a ni, ka hmangaih takzet.  

Kum hnih leh a chanve dawn kan inzui hnuah inneih a rawt ta thut a, ka hamhaih luatah ka lu ka lo bu nghut a, ka remti tihnaah a ngai a ni ngei ang. A tuk zanah palai hmel kan hmu ta nghal a nih khaa..mahse, engkim kha a hlimawm a, ka damchhung kawppui ni tura ka duhthusam chu ani hi a ni, ka 1st love pawh a mah vangin ka theihnghilh ve thin; mahse, sulhnu kan ngah dun em avangin ka nawtreh hlen thei lo.

“Bawhi, theihnghilh tum suh; i hriatrengna a\ang khan nawhreh tumbuai duh suh, tikhan chentir ve la, amah i hriatrengna kha damkhawchhuah nan hman tum zawk rawh, i thinlung ka luah tam zawk tih leh min hmangaih tih ka hre tho a, ka duhkhawp em em a lawm” a ti \hin, ka tan chuan a zau mah mah \hin. Kan inneih khan kum 32 a ni tawh a, MZU-ah khuan Department of Political Science-ah Asst. Proffessor ani a, kan ineih hma pawh khan a luck zia leh keilo pawh a hmuh zawh zia ka hria; engvanga kei kher min thlang nge anih ka hrethiam lo fo! Ka hmel hi chu a chhe lem lo viau tih chu ka inhre ve, ka mizia leh nungchang pawh mi aia ka nasat bikna ka hre lo bawk, mahse, BA pawh pass lo, dawr nghak ve satliah, ani hna \ha tak nei, duh duh thlang theiin min han thlang chat kha chu a mak ve tlat alawm! 

“Ka hmangaihna chhan che min zawt tawh suh, ka hre bik lo; nangmah hi nangmah ni lo ta la chuan Lily hi ka hmangaih lovang” a ti ringawt zel..

Kan inneih atanga thla 5-na ah nau ka pai ve ta a! aruk tak chuan rai har ka inti \hin a, fa neih vat vat kha ka chak a ni. Ka nu leh pa (U mapuia nu leh pa) te chu an \ha em em a, min dawm thiamin, mo angin min en lo ni berin ka hria, U mapuia farnu nula chu hrawn hrehawm ber tura mite ngaih anih laiin ka chungah chuan a fel em em a, keiaiin a upa hlek a, a zin changte hian ka thil tur hi alo hawn hnem ber \hin. Ani pawh hi sumdawng a ni a, nuthlawi ani tih erawh kan sawi hram ang nge..an naupangber tlangval erawh biak loh chuan a \awng ngai mang lova, engmah a sawisel lova, a fak hek lo, a u thawhna University-ah class a kal nitin a, kan inbe tam lem lo khawp, mahse, misual a ni lo. Chuan, awmpui pahnih lai kan nei a, khawchhak mi ve ve an ni. U Hmingi (U mapuia farnu) sumdawnna ah hian pakhat chuan a pui \hin a, pakhat erawh inchhung enkawlnaah min pui thung.

U mapuia pa hi kan veng Kulikawn M/S-ah Headmaster a ni a, ka nu erawh Health Worker a ni thung. Heta tang hian kan chhungkaw dinhmun chu a hniam hran lovang tih in hriat ka ring. In nghaktu ka ni a, kan awmpuinu pawh hian ka awm atang chuan nuam a ti ve sawt niin ka hria; inchhungkhur chet chu mi chekngei tih takah keiman tih vek ka duh a, bungraw tihfai leh chhuat nawh, thil tihfai hrim hrim chu ka duhdanin ka ti vek thin. Eirawngbawl erawh ka thiam tehchiam lova, ka pui zauh zauh ringawt \hin .

Ka rai tih ka hriatni chuan bath room-ah ka zuang vak vak a! ka pasal hrilh hlan ka nghakhlel tawh kher mai. Kan awmpui Siami chu ka pasal chawhmeh duhber bawngsa roast ka siamtir a, ka inbualfai a, uluk takin ka inchei a, U hmingteii zinbo lai ani chu pawi ka tiru hle mai, min lawmpui ve dawn lutuk tih ka hria.

“I va nalh ve, ka chau tawp” ka biangah a rawn fawp zauh a. A thawmhnaw chu ka lo phelhpui a, a inbual hlan chuan a phone ka ensak a, Whatsapp message ka en a, a bialnu hlui hoin mei nei deuh deuha an biakna chu ka hmu a, mahse, ani chuan fiamthu hlirin a chhang a! ka lawmru hle. Ka thikthu chhe lutuk hi a manganpui thin a, a fimkhur phah ve hle thin.

A inbual zo a, a inthlak zawh hnu chuan, “Thil hrilh duh che ka nei a”

“Sawi ta che, a \ha lam a nih ka ring, i hlim hmel e mai”

“Ih..pa i ni ve tawh dawn a”

“Maw?!! tak tak em? ka van lawm tak, ka hmangaih che, bawihte,” tih pahin min rawn kuah a, min pawm kang a, min fawp bawk a. Ka pasal hlim hmel chu hmuh nuam ka ti takzet. 

Ka dul vel chul pah chuan, “Mipa a ni dawn tih ka hria” a ti sur sur a.

“Hmeichhia pawh nise a \ha vek a lawm”

“Nia, fapa ka awt a, fanu pawh ka duh hlei hlei” a ti dam thluam a, hepa hi Pathian ang hialin ka belo chauh \\hin, ka tan hian a \ha lutuk em a ni.

Zanriah kan ei lai chuan a sawichhuak ta a, ka nu leh pate pawh an lawm kher mai, U hmingi khan fa pakhat a nei hman a, mahse, nikum hmasa khan septicemia avangin alo boral tawh a, tu hmel hmuh chak reng rengin an ring an lo fan ve tawh a, an duat ngawt ang. 

“Rinte, patea i ni ve tawh dawn sia, i lawm ve lo mi?” ka fiam ve chak hrim hrim a.

“Lawm ve tho e, football ka khelhpui \hin ang” a ti ve sap a, min rawn en a, umapuia nen hian an in ang lo hle in ka hria, an hmel leh mizia pawh.

Ka dul pawh a lian ve ta viau mai. Engmah ka tih an phal tawh lova, zing leh tlaiah erawh ka walk \hin a, mi vannei tak ka ni chu nuam ka ti. Ka pasal chuan min duat a, zan lamah pawh loh theih lohah chuan chhuah loh hram a tum \hin; ka pa lah chuan mipa naupang toys a rawn lei chhen lehnghal! U hmingi pawh chuan min lawmpui kher mai, damdawi atana \ha nia mi sawi chu min lo hawnsak fo \hin. Ka hrisel a, ka inzo ve hle, ka raino tirh khan kan awmpuinu pakhat zawk chu ka haw tlat a! a khawngaihthlak zawk, a hmel ka hmuh chuan ka uak thawt thawt zel a, min pumpelh hram hram \hin, chubak chu raino huat ka neih pawh ka hre lo.

Ka nau vei chu ka vial ngawlh ngawlh a, anat dan chu ka hrilhfiah thiam ngang lo; ka tap thei silo a, ka mittui hi a far zung zung mai..ka nu leh ka u hmeichhia te pawh an lo kal ve a, hringtu nu bulah meuh chuan ka na pawh a zia huaiin ka hria, Umapuia awmngaihna hrelo pawh a vei a vei a, ka kumkuruh akau that loh vangin, min zai ta a. Nurse leh Doctor che vel chu ka thlir reng a, ka kawng chin hnuailam chuan na engmah a hre tawh lova; ka rilru erawh a harh kur roh a!

“Awii a van hmel\ha em em, Cute reuh tawp” an tih ri chu ka lo ngaithla a. Puan var thianghlim takin an tuam a, ka bulah chuan an rawn mut a, ka zawh hmain, “Mipa i nei e” a rawn ti sap a, englaiin nge ka mittui chu a rawn luan ka hre bik lo, mahse, lawmna mittui ani tih ka hria. 

Thla thum lai alo ni ve ta..ka fapa chu ka en a, ka ennawn leh \hin, a aia hmel\ha hi an awm theih ka ring lo a, Umapuia tetlai nen danglamna an awm lo tiin an sawi \hin a, apa a chhun bik chu ka thik hial! Afapa chu atchilh taktein a atchilh a, a hnathawk rawn bangte hi a pawm chuk chuk anga, a dim thiam silo a, ka lo vin leh tuar tuar thin, ka dimdawih lutuk chu min hau zaw mah \hin. A patea pawhin thiam leh thiamloin a lawm nui ve iar iar \hin. Kan inchhung boruak tinuamtu ber chu Mampuia chu a ni ngei ang. A pi leh pute lahin hnute a nghei veleh mutpui nghal an tum thu an sawichhuak chhen a, ka nu leh pate pawhin an rawn len chhan fo mai. 

“Zanin chu Mampuia hi a sirah muttir i la”

“Ti nge?”

“I hawih lo ve sia, ka kuah chak tawh che lawm” ka pasalin a tih chuan lai zetin ka hmui ka lo ti pawrh a. Nupa nun kan hman khat deuh vangin a rawp ve tawh pawh a niang, Mampuia ringawt kan buaipuina lamah kan nupa inzawmna tinghettu pawimawh tak kha kan lo mangnghilh deuh a ni. 

“Ly, sex hman hi nuam i tih loh hmel thei ka ti”

“Awihawm loh ee”

“I ngawi reng zel a”

“Ka rak ve thiam lo alawm, bakah ka zak e a”

“Rak ve tawh rawh..umm” 

Ka nute inlamah hian ka leng phei khat viau a, ka pa hian “Rawn leng zut suh, a mawi ngailo” a ti \hin a, mahse, tihtur ka neih loh chang chuan Mampuia ka lenpui \hin, ka pasal chhungte chu rel na tur ka hre lova, a chhe zawngin ka sawi ngailo, vawikhat erawh ka nu in ka chawhmeh siam a sawisel chungchang hi pangchang deuhin ka nu ka hrilh a, min vuipui a hnekin, “I thiamlo ve em bawk a ni, zir rawh ka ti ka ti che lawm, lehkhabute rawn la, eisiam thiam hi nu nih chuan thil pawimawh tawpkhawk a ni a sin” min ti ta zek a! ka vui leh tawh ngailo.

Mampuia kum khat tlinna kan lawmni chuan ka nunah thil danglam a rawn thleng ta a! mite chu an hlimin an phur em em, ka nute pawh an lo thleng tawh a, mahse, keimah ber chu ka chhungril a nuam hlawllo a ni. A chhan chu ka pasalin alo hruai ve hmeichhe hmel\ha tak chu ka pasal nunhluia mibik ani tih ka hriat avangin. A pian a nalhin, a hmel\ha em em a, ka pasal nen an han dingdun te chu an inhmeh hliah hliah hian ka lo hria a; Umapuia hi palian tak, thau lam deuh, ngo deuh mai a ni a, a mithmul sei leh er tan chuan a mitmu dum fiak kak chu a cheimawi lehzual ni hian alang a, a hmui chhah lam lek lek te, a khabe hmul tlemte leh a vei nuih sak thin te chu hmeltha ti zet leh chhuang takin ka lo thlir thin. Mahse, engvangin nge ka fapa pianchamah a bialnu hlui, bialnu hluiah pawh mibik kha a lo hruai kher? Ka rilru a zau ve lova, ex te nena inthian\hat leh hnuhnawh chiam hi \ul ka ti ve lem lo. Inhuat zui erawh \ha ka ti a ni chuang lo.

“Ly, Mali ania, inchibai ru” a tih lai chuan, Mali nen chuan chhungrilah kan indo mek ni hian ka hria a, alang apau chuan kan nui dun sang a, kut pawh kan invuan nghet chat chat khawp mai. He nu nen hian kum 2 chhung zet an lo inngaizawng ve tawh a, an in \hen chhan chu ka hre lo; Mali hi Delhi-ah a chhuk ta daih a, Umapuia chuan an in\hen chu a tuar hle tih mi \awngkam a\angin ka lo hre tawh a ni. Tichuan, tunah hei an lo intawng leh ta a..

“I fapa hian a chhun fuh ve ngawt mai che” a aw tliang ral chuan ngaihno a bei ngawtin ka ring. 

“Pa te chu chhun tur a lawm” Umapuia chuan nui chungin a chhang a. A nihdan tur ang leh ka beisei dan anga Mampuia b’day ka hmang theilo chuan min tichau hluah hluah mai. Ka ngawichawi riau a, nuih luih chu ka hne takzet.

“I damsam lo mi? ti nge i ngawi chawi riau?” mut hmunah chuan a ti a.

“Ka \ha lawm, ka chau deuh a” ka saisir hmak a, ka muhil der ta ngawt a.Fiahna engmah awm lova thikthu tihchhiat hlur hi ka sim ve deuh tawh a, ka sim pawh a ni chiah lo; ka tilang ngam vak tawh lo a ni zawk. Vawikhat chu a student pakhat ka thik tawh a, zanah an ina ava len avang ringawtin..chumi\um chuan chu nula chu lo kalin ka pasal nen an inkawm nachhan min rawn hrilh a, a bialpa vanga a rilru hrehawm lai anih vangin intihhlum te hial a lo tum a, chu chu ka pasal hian venhim alo tum zawk alo ni; chutia a rawn tih takah chuan ka zak khawp mai a, \ul hlei loa inhrem leh rinhlelh vak chu sim ka tum a, ka thei ve viau, mahse, vawiinah kha chuan ka hlawhchham a ni.

“Eee, Mali lo leng rawh, hmanni lah khan kan inbe lumlam hman ta mang silo a” ka nu chuan alo be \ha hawrh hawrh a. 

“Nia, rawn lenna hun pawh ka nei lo a nih hi; vawiin pawh Mapuia nen chhuah lawk kan tum a, ka rawn sawm anih hi” ka phu zawk a!

“Eng thilah nge chhuah in tum a”

“Kan \hianpa Zorama kha ila hria ang em aw..kha khan nupui a nei dawn a; kan \hianzaho a kal thei tur ang kha chu inhmuhkhawmna nipah fawmin kal kan tum a mawle”

Room-ah ka tlan chho nghal a, “Khu Mali’n a nghak tawh che” ka ti hmak a, uluk fahrana alo inchei chu ka melh rawm rawm a. 

“Ka inpeih \ep tih lo hrilh lawk rawh”

“Ka hrilh lovang”

“Ti nge? i thinrim a mi?” min rawn en a.

“Inneihnaah i kal dawn tih ka lo hre lova, thawmhnaw te ka lo thlansak tur che ania” elsen deuhin ka ti a.

“Ka lo hrilh lo tak che nimaw? Tihpalh lutuk, \hianhlui inhmuh khawmna a ni dawn sia, ilo tel ve peih ka ring lova” a ti daih a!

“Min sawm mahla, ka kal nguar ang” tih pahin bath room-ah ka luhsan ta daih a. Ka \ah hi a chhuak ut ut a ni. Khanu phiangsen nen khan chhuak dun fo lo se ka duh takzet; a hmel\ha si, a changkang si, ka el phak niin ka hre lova, ka pasal chu min chhuhsak a tum ni ngei hian ka hria a ni.

Nilengin ka awm a nuam lo a, ka call duh bawk silo, Mampuia lah apiin a lenpui daih a, khawhar takin in ka nghak ta ringawt.Zanriah pawh an ei nghal dawn vangin kan nghak lova, ka chaw ei pawh a tui mai mai lo e. Dar 9 ah pawh a lo haw loh avangin, thinrim insum chungin ka va call ta a, “Hei Mali ka thlah lawk a, ka lo haw tep e” a rawn ti a! ka mu tau ngut a, alo haw huna sawi tur ka ngaihtuah a. Kawngka a ri rak a, ka hnar fing tak chuan, zu rim rawn nam hak chu ka hai lo chiang kher mai.

“Ka van chau ve, ilo muhil tawh em?” 

“A nuam bawk maw? i rim pawh a danglam hle mai” 

“|hianten min hnawn nasa lutuk a, no khat chu ka insak ve ringawt anih kha” 

“Hmm..ka ring”

“Titeh, thinrim lo teh, chauh nak alaiin”

“Awle, hei hi ka sawi duh a, lo ngaithla ang che, Mali nen hian in inhmuh ka remti tawh lo; hmeichhe dang ang a nih ve loh vangin..ka ngena che hi i pawm theilo anih chuan ka hlim hmel hmuh inring suh” ka ti ta phiar phiar a! mi zaidam ka nih loh vangin an hlek hlek hi chu ka hrat viau; mahse, a dawhthei \hin hle, ngawi reng in min ngaithla a, ngawi reng na na na chu ankhum reng hi har tak a ni. Zaninah erawh chuan, “Ngenna pawh a nih loh chu..thupek anih chu” a ti bul hmuk a.

“Mali hi i thik ngei ang tih chu ka ring, mahse, \hian kan ni tawh, engmah a awm tawh lo; ani pawn bialpa a nei reng a lawm, thik tawh suh; ummm” ati leh a.

“|hian nih vanga inzui reng te, inbiak rengte a ngai lo” ka lo ti ve a. 

Thla khat aliam a, thil thleng chu a awm tawh lem lo; ka rinhlelhna pawh a bo titih tawh a, mahse, Sunday zanah chuan, a inkhawm hlanin a phone theihnghilh chu ka check sak ta a. 

“Ka ngai che”

“Keipawn i ngaihawm ka ti”

“A mak ee..kan inhmu leh ta hi”

“Nia”

“Nupui i neih dawn khan ka awih lo a, mahse, ka lo haw a, tak tak a lo ni sia, hehe”

“Nangpawh pasal i nei tep tawh a lawm”

“Ka nei chak viau lo; in nu hi i hmangaih em?”

“Tu aiin maw? hehe”

“I phakar e mai a..taka nizan i haw hnu khan maw; ka nauin ‘in ni leh dawn chiang’ a tia, ka nuih a za tawp” 

“ A sawi dik maithei a sin ..hehe”

Phone chu ka thlauh tawp! Delete nachang a hrelo nge ka en a ringlo zawk! Ka buai nuaih a, ka luak te a chhuak ut ut mai. Nizanah khan “Ka thawhpuinu pa a damlo serious deuh a, ka va tlawh ve ang e’ tiin a chhuak kha a ni sia!! Zan dangah pawh hman ang kha ni tawh lovin a chhuak fo tih ka hrechhuak nghal a, khang zanahte khan Mali te inah a leng \hin tih ka hrethiam nghal vek..ana hi ka van ti tak em..

Alo haw a, a tim deuh dai hian ka hria, ka ngaihbel vang pawh a nimahna. A phone chu a la hmasa ber a, ka ngawi reng, ka \awng chhuak thei lo; ka \ah ka hlau a ni. A ni pawh a mu a, a phone chu a hmet malh malh a, thil hriatchhuah ka nei, a hma kha chuan fb-ah A/c kan in\awm \hin a, mahse, a ni chu a lut ngai tawh lo, whatsapp erawh a khawih ngun hle tih ka hria, ka hmuhsak vek thei tawh silo a. Chumi zan chuan ka muhil mang lo; eng nge ka tih ang tih ka ngaihtuah a; ngawi renga enthlak chu ka tum ta a, a harsa dawn hle in ka hria.

Nikhat chu ka online mai mai a, ka inbox kan check chuan, kan inneih nia \hiana ka hman, Tluangi message a lo awm a, “Ly, Sp Sailo tih saw inpa a nilo maw? va check teh; hmeichhe pakhat nen sawn an in close hmel tawp” tih hi..

K’n en mai chu aw!! Ka reiii!! Amah ngei a lo ni; mahse, Mampuia thlalak hi propic-ah a hmang a, a wall-ah chuan ‘ Mali khawlhring Mcf ‘ ngei mai khan, “Nunhlui ngai reng reng tura khuanu duan kan lo ni em ni le?” tih hi a lo post kalh mai! Comment ka en leh a, kan pa chuan, “Nunhlui chu liam tawh mah se, nghilh zai reng ka rel thei lo” a lo ti vel..awii ka sawi senglo, an comment na tam zawkah chuan inngaizawng ang chiah hian an in duat a, an in muah a!! ka hriatchhuah loh a ring tihna nge? Hrechhuak mahila pawi a tilo zawk? Hrechhuak se min duh anga..chuan keihian then se min duh tihna em ni ang? Ka khur zawih zawih a, au vak vak ka chak, ka thinrim na leh zahna chu a inzat thuak awm e. Midang pawn an lo hmu ve ngei awm sia; mak an va ti dawn em..

Zanah chuan ka inthunun hram hram a, diktak chuan a danglam chak zia hi ka lo hrelo zawk a ni. A hnathawk lo haw apianga ka bianga a fawp zeuh \hinte kha alo bansan daih tawh a, Mampuia ka sira mu \hin pawh kha alaiah a mut \hinna a rei tawh mai, Mampuia avangin ka buai a, kan nupa nun khi chat mek pawh ka lo hrechang lo a, chuibakah khami zana ka ankhum a\ang khan Mali chu a hmu ta ngailo nia ka hriat vangin ka ngaih ka lo ti\ha ve ringawt a ni. 

“Chhuah lawk ka ngai a,” a ti a, a chhuak zui nghal a ni mai! Mampuia leh apatea infiam lai chuhin ka chhuak ve nghal a, U hmingi Scooty chahbi hi ka kawl ve tho thin a, pawimawhah chuan ka hmansak \hin. Rilru mang deuhin ka inkhalhchhuak a, ka tlan zel a, Khatla kawnah ka ding a, scooty ka hun \hat lai chuan, ka piaha Scorpio pawl lo ding chu a number ka en nghal a, ka \ek sawk a ni ber e. Kawng pengah kein ka chhuk a, ka kal hlawk hlawk a ni ber; Buillding lian tak, rawng hring dal raiha hnawih zawnah chuan ka ding a; Kawngka chu a inkhar tlat vangin inchhungah chuan tute nge awm ka hre lo, mahse, vanneihthlak nge vanduaithlak zawk, kawngka chu alo inhawng a, nula tleirawl hi alo chhuak a, amah ai chuan inchhunga mipakhat leh hmeichhe pakhat inhnaih taka lo \hudun chuan ka mit a la zawk..hmm..a chiang ta; a tawp ta vek e..

Tleirawl chuan min hria ang tih hlauin, rang takin ka tlan chho ta hlawk hlawk a,. Khumah mampuia ka mutpui a, vuak hrep ang maiin ka sil thum mai, ka na a ni, ka thinlung hi a kehsawm mek a ni. Khawvela ka mirin ber leh ka hmangaihber chuan a nunhlui tharthawh leh in a nula nen min phatsan ta chu a nia!! Awih harsa ka ti lutuk; nupa tamtak in\henna chhan buaina khan min pumpelh ta bik lo. 

A tukah chuan tuemaw hmu turin ka chhuak a, ka chhia leh \ha hriatna chu fim takin ka hmang thei tawh a, ka mize diktak ka lanchhuahtir dawn ta. Ka chhuah dawn chuan, ka pasal chu ka text a, “Vawiin chu Mali nen inhmuh kan tum a” ka va ti a.

“Ka hria lawm, min hrilh a, ti nge hmuh i duh a?”

“Alo hrilh tawh che ka ring reng a; ka hmuh duhna chhan maw..ka neih ve loh thil eng nge a neih bik tih en turin”

“Ly, Naupangchhia tak khan khawsa suh, engmah kan inkarah a awm lo ka tih khaaa”

“Chu chu ka hre dawn a lawm”

Coffee kan in dun a, a mitmeng chu a zam deuhin ka hria, tukina ka chhuah dawn khan Rintea bulah “ Mali nge hmel\ha kei?” ka ti a.

“Nang fee, Umali saw chu a hur hmel ka ti” a ti nih kha..nia, ka hmeltha zawk tho tho.

“Sawi \an dan tur pawh ka hre lo, ih..mi fel tak niin ka hria che a, i fing bawk, U mapuia chungchangah hian i thurawn lak ka duh a,nang chuan i hrechiang tawh a, kei aiin” tiin bul ka \an a. 

“Aw eng nge ni ta? ka hrechiang ve thawkhat khawp mai”

  “Ih..englo a nia, tunlai chu a awmdan hi a danglam lutuk a, nimin piah khan a \hianpa in min rawn bia a, a student pakhat nen an inngaizawng tih min rawn hrilh a! ka rilru hi a na lutuk, a bialnu chu Dinthar veng ami a nia; a zak thei lo ka ti khawp mai, nupui nei lai ani tih a hre ve reng sia” ka sawi laia a makti mengphawk chu ka nuihzat hle mai.

“Ava mak em em..!! an hresual a nilo maw?”

“Nizanah khan a bialnu nena an inbiakna chu ka hmuru vek a lawm! A hming chu Rindiki a nia, a hmelchhe lo, an lo inhmuhruk na arei tawh aniang, ka pasal hi ka ringhlel ngailo a, mahse, nizan a\ang khan ka rinna hi a chhe ta vek a ni, eng nge ka tih ang ka hre thiam lo; fa kan lo nei tawh a, in\hen hi chu ka duh lo bur, min puih ngaihna te i hre mial em?” ka aw chu a khur deuh a! dawt chiang tak ka sawi vang a ni mahna. Ka mize pakhat chu ka thinrim leh nat tawpkhawkah chuan ka danglam thawk \hin, ka rilru nu but reh hnuah chet lak dan tur hi nasa takin ka ngaihtuah \hin a, inthunun pawh awlsam ka ti sawt tawh \hin, mi luhlul ve tak ka ni a, hnunglam a\anga min vih tumte hi chance pek ka tum loh chu thuhran, an rinloh lam daiha khalhluh ka tum \hin.

“A mak hle mai, Mapuia chu ka rin ang a nilo khawp mai, ka lo hau dawn nia”

“Nilo e, kan inbiakna hi engmah hre lo se ka duh a, engtin nge ka pasal thinlung hi ka neih let leh ang tih chauh ka hre duh a ni, chu chu nang aia hre tur an awm ka ring lo”

“Umm..anih chuan zaninah sawipui la, duhthlang turin ti ang che; tlawm duh miah lo la, chhuak tura a tih che pawn i chhuak hmak dawn nia, hetiang mipa rinawm lo lutuk hi chu hrem an ngai a lawm”

“Ka lo hria ang e, ka lawm lutuk e, ka kal phawt ang, mampuia ka ngaihtuah tawh a” tiin ka tho a, nui sang chungin, chu hmeichhe lemchan thiami chu ka kalsan ta a, a diktak chuan keipawn lem ka chang ve tho a, tu nge thiam zawk tiin kan inel a ni mai.

“Engvangin nge Mali bulah dawt ilo sawi chiam a?!” thinrim takin min melh a. Kan inneih a\angin hetianga a thinrim hi ka vawihnih hmuhna chiah a ni, a vawikhatna chu mampuia suakbak, ka thinrimin ka hrem a, chumi \um chuan kut min thlak \helh a ni. 

“Eng dawt maw?” ka melh ve kal a.

“Tu nge Rindiki pawh ka hre lo, bialnu ka nei hek lo”

“Mali chauh lo chu a mi?”

“Lily, hetiang zawnga indawr hi ka duh miah lo tih ka hrilh ang che, Mali min hmuh dan tur ngaihtuah ve ta che”

“Wow!! A ropui e! mali hmuh dan tur che i ngaihtuaha i buai a ni maw? engvanga khatiang a che kha nge ka nih tih chu i ngaihtuah duh miah lo a ni maw?”

“Ka hria asin, khatiang i tih chhan kha..ni e, mali nen min ringhlel a, a awm pawh ka ti ve tho! Mahse, \hian kan ni tawh ka tih kha” a aw chu tlemin a zawi deuh a, dawt a sawi tih chiang takin ka hria.

“|hian a? \hian maw? mi mawl ka ni em ni? i fb a/c thar te, i inbox te, zantin i leng chhuak te..engkim hi in\hian\hatna vanga thleng vek maw a nih a? chutiang a nih chuan kei chuan in in\hian\hatna chu ka hnawl e, bialnu hlui a nih vanga \hian\ha tak a siam kher a \ul na ka hre ve lo e,”

“I rilru a zim em a lawm”

“Hmangaihnaah hian rilru zau tak put kher hi a \hatna ka hre lo”

“Ok, engpawhnise, Mali chu lo hrilhfiah leh la, i rinhlelhna kha a dik loh zia ilo sawipui leh dawn nia”

“Ka ti lo zawk ange, ka lawm e” a\awng leh hmain bath room-ah ka luhsan a, tui ka herh haw a, ka \ap ta zawih zawih a. Ka pasal thinlung chu ka luah tlem tawh tih ka hria, chung zawng ai chuan kei aia Malsawmi a pawimawh ta zawk chu a ni. Ka \hu reng a, ka en ngai ka en tlawk tlawk a; ka pasal lak a\ang chuan ka kalbo dawn nge? A thinlung neih let leh tumin ka bei dawn? Ka \awng\ai thei lo! Chham tur ka hre lo.

A ni telin ka thinlung na chu a zual telh telh a, tuma bulah ka inbunruak ngam lo; pasalin a duhkhawp loh nupui nih chu ka zak a, ka tihhlim zawh loh pasal ka neih avang chuan ka insit a, siam\hat dan tur ka hre lova, ka tuar tlawk tlawk ringawt mai a ni. Ka taksa in a tawrh hun alo thleng a, chaw ka ei thei lova, ka tla kuam mai, chhete pawhin Umapuia chuan min ngaihsak lo niin ka hria, chhungte hmuh lai chuan min be ve luam thin, kan room-ah erawh chuan insi reng chungin kan inhlat ta..chutiang taka mihring danglam thei chu mak ka ti a, hmeichhe pakhat vanga a nupui leh a fapa theihnghilh hmak thei pasal ka lo nei chu pawi ka ti a, ka in haw hluah hluah thin.

“Rinte, i u leh Mali kha ti nge an in\hen a?”

“Ih..u mali khan ka u fa a titla nia sawi thawm a awm a; chu chu ka u in alo hriat khan a thinrim lutuk a, a \hen ta a, mahse, a hnuah u mali \hiannuin naute kha a titla lova, a chhiat tih thu a rawn hrilh a, umali hnena ngaihdam va dil a tum laiin umali chuan bialpa a lo nei hman tawh tih a hre ta a, tichuan a bansan ve ta a ni”

Ka ngawih reng avang chuan, “U lily, tunlai in nupa boruak hi ka hre ve a lawm, a hrehawm ngawt ang, hmanni tlaiah pawh Regency-ah ka sas Dinner ka kilpui a, ka ute chu an lo kal ve a, ka bialnu chuan, ‘ I u sawn nupui a nei tawh sia’ a ti lehnghal a, ka zak asin aww…umali hi ka ngei zawng tak, ala duh anih pawn nupui a nei tawh tih a hre ve tho sia”

“Rinte, zep loh chuan maw..a hrehawm chu ka ti khawp mai, chhuah mai te hi ka duh rum rum \hin a”

“A ngailo, chhuak reng reng suh, ila tuarchhuak mai ang, nizanah ka nu leh pate ka hrilh tawh a, hauh an tum kha” 

Ka nu leh pate chuan ka pasal chu an zilh a, ka pa phei chu a thinrim hmel khawp mai, Umapuia chu a ngawi reng a, a hnuah, “Hmm, mali nen sawn \hian bak kan ni lo” a ti a, a tho a, roomah a chho ta daih a. Ti nge dawt ala sawi reng chu le…

“Umapui, \ha takin zanin chu sawidun teh ang, i mit ka tlun lohna lai leh insiam\hat ka ngaihna laite min hrilh la, keipawh ka lo insiam\ha ang, i rilru diktak hi min hrilh rawh, khawngaihin”

“Engmah sawi tur ka nei lo”

“Chhuak turin min duh em ni?”

“Duh lo”

“A nih si chuan ka ngenna che hi ngaipawimawh ve hram la; khawngaihin mali nen hian inkawm tawh suh u”

“I thikthu chhiat vang mai khan ani nena kan in\hian\hatna hi a chhiat phah dawn chuang lo, kan inkawm i ngaitheilo viau a nih chuan i duh duh danin awm rawh, i thu thu a ni e” ka thinlung chu chemte zum taka vih sawk sawk ang mai hian a na a ni. Na tak a ni.

Ka tan chuan hun chu mumang ang ruaiin a liam a, ka chhuak ngai lova, ka nu ka ngai em em, mahse, ka hmuh chuan ka insum zo dawn lo tih ka hria, ka pasalin bialnu a nei tih an hriat chuan min lachhuak anga, ka pasal hi ka chan hlen ang tih ka hlau a ni. Tikhawp hian ka lo hmangaih tih ka hre ngailo, Pathian leh Kohhran hmaah “Tiam tlat e” kan tih ni a, kan thutiamte kha zahawm ka ti a, venhim ka tum \awk \awk a ni, mahse, ka bei ava dawng ta em… 

Ka khawhar hnem nan ka hunawl chu lehkhabu chhiar nan te, online nan te ka hmang ral \hin a, \hian ka kawm nasa bawk, Mampuia chu ka lainat \hin hle; U hmingi hian min fuih fo a, a thinrim chang phei chuan Mali chu va hmuh a, va hauh a chak thu a sawi thin. Mahse, ka pasal a mualpho tel dawn vangin ka khap hram hram \hin a, ka chhungte fel vang chauha he ina la awm hi niin ka inhre thin.

|hian danglam tak ka tawng thar a, mipa a ni! pathlawi fa pahnih nei tawh a ni a, mak tak maiin min rawn be ve tawp mai a ni. Kan inkawm chho a, fiamthu min thawhsak a, a chang chuan ka natna theihnghilhin ka nui \hin. Number kan inpek hnu phei chuan min lo be fo thin a; keipawn insum zo lovin ka dinhmun chu ka hrilh ve ta hial a! ka han inbunruah takah chuan ka thawl hawk mai. Ani pawh a nupuiin a uire san alo ni a, kan natna leh tawrhna te kan in share tawn a, kan inhnem tawn ve \hin. Inngaihzawnna rawngkaiin kan inbe ngai hauh lo; ka dinhmun a hria a, mi pawmlai ka ni tih te, Pathian thu min hrilh fo a, thuziak \ha tak tak min lo thawn \hin. 

A hming chu Zuala a ni a, ala upa lutuk lova, a hmel pawh a chhe hran lo, chutiang chuan kan pa leplerh azarah \hian\ha tak ka tawn phah a, amah vangin ka khawharna te pawh a zia chho a, thla khat dawn kan han inbiak tak hnuah phei chuan, ka ngai em em thin, nikhat lek pawh inbe loin kanawm thei tawh lo; ka nuna thil thleng mek chu ka hrethiam, a diklo tan tih pawh. Mahse, ka inhnemna neih ve chhun a ni a, ka tawp phal lo; mahni inthiamlo ru chungin ka kawm a, kan inkawm chhung na na na chuan ka hlim tlat zel, nia, ka nui ve fo thin.

Ka fapa pawh a leikang chho zel a; apa pawhin ala duat reng, kan fapa vangin kan la inzawm hram hram a ni. Nikhat chu mampuia ka pua a, ka \hiannu te inah kan leng a, ka haw dawn chuan Zuala hian min lo bia a, ka awmna ka han sawi chuan, an office bul lawk a nih vangin inhmuh a rawt ta a, Gypsy ah min phurin Restaurant-ah thil ei turin kan lut a, mampuia pawh alo harh tawh a, Zuala chuan a pawm nghe nghe. Kan \hu chiah tihin Umapuia leh Mali chu an rawn lut ve hlawl mai! Min hmuh chuan a ding chawt a! maktih hmel zetin min en a,.

“He tah eng nge i tih?” a ti chang rut a.

“Thil ka ei dawn” ka lo ti bul hmak a. Zuala chu angaihna hre lo deuhin alo hawi a lo hawi a. A hnuah ka pasal anih thu ka hrilh a, an inchibai nghe nghe. Nuamti vak lovin thil kan ei a, Mampuia lah chuan Zuala chu ngaina riau lehnghal a, chungte chu thik hmel deuhin Umapuia chuan alo thlir a, mali chu a phun leh sur sur \hin a, ka chungchang a sawi a nih hmel.

“Khapa kha i eng nge anih? Sawi nghal rawh”

“Ele..ka \hian”

A ngawi hmak mai. A thinrim tih ka hria, ka lawm zawk, ka laka thikthu ala nei chu!! Chubakah ka tawrhna hi hrethiam se ka duh a ni. A mu tau ngut a, a inngaihtuah buai hmel kher mai. A tukah pawh chuan nalh zeta incheiin ka chhuak a, mampuia erawh ka nu ten zingkara an lak phei kha an lo la dah lova, lo awmpui hrih turin ka ti a, an lo chak sakhai bawk nen. Zuala nen chaw chhun kan eidun a, hnathawh tur an company-a min lo zawnsak turin ka ti a, ka la mamawh dawn tlata hriatna ka nei a ni.

Zanah chuan, “vawiiinah khaw nge i chhuah a? khapa nen khan in inhmu leh a mi?”

“Aw, hna min lo zawnpui turin ka ti a”

“Eng atan maw?”

“Ka la mamawh dawn a lawm, kan in\hen hunah”

“In\hen chu i va chak awm ve a, “

“Chak deuh tawh e”

“Eng a?!”

“Pasal nei ka ni tih pawh ka lo inhre tawh mang hleinem, sex hman te pawh ka chak ve tawh riau!”

“Lalduhsak” tih pahin ka biangah a beng thuai a! ka pai deuh khut khut a..mahse, ka nui lui \ang \ang a.

“Mali hian min luahlan a tum nasa si a, ka seat hi ken mai ka duh tawh a ni; ka pasal khan min duat \hin a, mahse, min thlahthlam tawh, duattu ka mamawh a ni” ka ti ram hmak a. Khatihlai kha chuan a tawp thlen mai kha pawi ka ti miah lo; ka tuar rei tawh a, inphenna tur mipa \hian ka lo nei ve tawh a, ka pasal chu ka thlahlel em em tawh lo tlat!

“Mahse, khapa i thik deuh kha ka \hian anih kha; i awih na nge? A awihawmlo i ti a nih chuan, i bialnu hlui Mali nen \hian\hatak in ni hi a awihawmloh hmasa zawk ang”

Khumah a \hu a, a chal a dawm vung vung a; ka inbualsan a, ka chhuah chuan alo awm tawh lova, a bialnu te inah a leng leh niin ka ngai. 

“Awiii, Ly, hrilh tur che ka nei, ka thinrim zia chu..vawiinah mali leh a \hiannu kha dawrah an lo kal a, thawmhnaw an en pah chuan an ti ti a, mali chuan, “Mapuia b’day a thleng \ep tawh sia, eng nge ka leisak ang aw” a tia, a hiannu chuan, “Nangni pahnih hi in inkawp leh tak tak a ni maw?” a tia, nuih har har pahin “ First love can never die..” te a ti vel a..

Ka insum theilo \ep a ni, inpa kha \hen rawh, ka ngei ania” ka \hiannu Dingi chuan phone a\angin min rawn hau titih a. Ka maimichhing ta ngawt a.

Ka pasal hi ka \hen dawn anih pawhin vawikhat chauh tal hriatreng tlak hlimna siamsak ka duh a ni. Zuala nen min rinhlelh a\ang khan a mizia chu a dang ve deuh a, ahma ai kha chuan min ngaihsak a, ka chhungte pawn boruak a \ha tawh angah an ngai hman hial a ni. Mahse, nupa nun erawh kan hmang ngai chuang lo. A b’day zanah chuan a tawp nan tal pawh sulhnu \ha tak hnutchhiah ve ka duh a, kan inneih hlen hi ka ring tawh lo a ni. Amah hneh nan hian ka tlawm tawk tawh ve bawk a lawm..engmah thleng lo angin ka enliam a, engmah a ni chuang lo; Eitur ka siamsak a, theihtawp chhuahin, mahse, min fakderna \awngka pakhat pawh a chhuah lo. Sex a tih lawm erawh ka tum ngam ngang lova, mahse, a b’day ah chuan a tawp nan nawmna vawrtawp pek ka duh a ni. Hei hi Zuala thurawn min pek a ni.

Room-a a lo luh chuan, mampuia nen khumah kan lo \hu , ka va pan vat a, a neck tie ka phelhsak a, a kamiz ka hlih pui bawk a, mak a tiru hle tih ka hre mai, ka nui deuh a. Inbual turin bath room-ah ka nawr lut a, ka tih ang ang chuan a awm ve hmiah hmiah a, a taksa ruak kangah chuan sahbawn ka hnawih a, ka nuai sak a, min en reng a, a hriatthiam loh hmel kher mai. Ka bual zo a, towel in ka hruhul leh thlap a, huaisen hi ka va inti tak em.. ka zak lutuk chu ka khur der der thei hial ani. A inthlak zawh chuan zanriah ei turin kan chhuk thla ta a. Ei hma chuan dawhkana cake ka khuh chu ka hawng a..

“Happy BirthDay” ka ti a, midang pawh chuan an lo ti ve a, tun \um chu a nui hmel dik tak ka hmu leh ta..min rawn en a, “Ka lawm e” a ti sap a. A fapa nen cake chu an zai dun a, keini kan lo zai a, chumizawhah zanriah tuitak chu kan kil ho ta a. Min rawn melh zauh zauh \hin a; ka lo nuih sen sen zel a, nupa hlim tak kan ni leh ni hian ka hria a ni.

Room-a kan awm hnu chuan, a phone a ri a, ala a, balcony lamah chhuahpuiin ava bia a. Mali a nih ka ring..A rawn luh leh chuan tim deuh hian, “ Ka va chhuak lawk ang aw; a pawimawh lutuk a”

“Awle, a pawimawh lutuk a nih ka ring” ka ti nghat a.

“Thinrim suh, ka rei lovang, Mampuia kha lo timu la aw” ka sama chul pahin a ti a, inthlak chuang lovin a chhuak ta a. Tunah chuan ka mal leh ta! Ka hlim ve hun chhung hi ava reilo tak em..ka hneh hman \ep tawh asin le..ka phurna zawng zawng kha a tlahniam vek; ka \ah a chhuak, kei aia pawimawh chu mipakhat a awm, Malsawmi kha..ka thinrim thut a! ka pasal duhlai chu a bialpa hlui anih vang maiin a duh duhin a kaikual ang maw? hmana dawt ka hrilh a\ang khan inbiak pangngaiin kan inbe tawh ngai lo a, ka hmu fo bik lo bawk nen. Kha ka dawt sawi vang khan Umapuia kha a mangang anih kha..achhan chu Mali nen an inhauh phah a ni ngei ang, mahse, umapuia chuan engtiangin nge a hrilhfiah ka hre lo, kha ka tactic kha chu a hlawhtling zo ta lo a nih kha..

“U hming, zanin chu ka insum thei tawh lo, mali te inah ka kal dawn” uhmingi rooma luh pah chuan ka ti lawng lawng a.

“Aw, ka lo kal ve ang” a rawn ti ta mai a. Rintea kan va inhruaitir a, ka nute pawh kan hrilh chuang lo. 

“Umapui, lo haw tawh la” ka ti nghal tawng a! mali nen chuan sofa-ah inhnaih zetin an lo \hu a. Mali nu chu living roomah tv enin a lo \hu bawk a.

“Ti nge in lo kal a?” u hmingi nen chuan makti takin min en a.

“I lengrei tawh lutuk a, kan lo ko dawn che; i b’day te ani sia, hun hmandun ka duh a lawm” zam lo zetin ka ti phar phar a! mali chuan min ngei hmel khawp mai.

“In pa hi a b’day anih chu ka hre ve tho alawm..hetia a lenna thleng thlenga lo umzui hi a zahthlak hle mai” a ti a. A nu pawh chu a rawn phei ve a.

“Nia, Umal, zanin chu min lo hrethiam rawh, kan pa hi ka ngai lutuk a; zan dangah alo leng leh dawn tho a lawm”

“In pa hian i bula awm a chak ve vak lo a ni zawk lo maw?”

“A chak aniang, zaninah pawh khan i rawn ko kher a, rawn ko loh ve mai tur a nia” inti mawl deuh hian ka ti ve zel a, Umapuia kut chu ka la a, chhuahpui ka tum a, mahse, mali chuan alo chelh ve a, Umapuia awmngaihna hrelo chu ka hmusit ru kher mai!

“Lily, i pasal nen hian min ringhlel tiraw?”

“Aw ringhlel e, in inngaizawng tih pawh ka hria, mahse, vanduaithlak takin pasal pakhat chauh neih ka tum a ni, khawngaihin ka pasal duhlai hi lo zarbuai tawh lo mai rawh aw” ka tum lawk pawh a ni bik lo, ka sawi nghal bawrh bawrh ringawt mai a ni.

“I va zak thei lo ee, ani nen hian \hian kan ni tih lo hre rawh, duh ila chuan ka luahlan thei var var che” 

“I zak lo fe zawk, ka unaupa hi nupui neilai ani tih hrereng chunga \hian\haber anga lo kawm sek pawh hi nula pangngai i nih loh zia lanna a ni e” U hmingi ling ve phat chu nuam ka tih phah hle.

“Duhtawk tawh ru..ka va haw ange, mali ilo hrethiam dawn nia” umapuia chuan a ti a.

“Inpa hi ka \hian a ni” ala ti hram a.

“Mi nupa inkar tichhe tur khawp in\hian\hatna hi a tenawm ka ti kei chuan, a nupuiin a thik tih hrereng chunga \hian nih pui \alh tum tlat hi a rilru chhiat thlak, \hian tamtak ka nei ve, a kawppuite thik tur khawpin ka kawm ve ngailo, \hian\ha tak tak chu nila, nangmah vanga ka pasal laka ka rilru nat leh kan nupa inkar khik hi i phal ngai lovang, ka pasal hi ila duh a, ila hmangaih a ni, ani pawh hian ala duh ve che a, mahse, pawi tak maiin a nupui hi tuman an luahlan dawn lo, a nupui thlak duh tur khawpin ka pasal hi a mawl lo a, a fapa ti fahrah duh tur khawpa pasal tlaktlailo a nilo, nang hian \hian \ak tak angin en nila chuan, ka pasal hi a inthunun thei tih ka hria, mahse, hope i pe miau a! mipa a ni a, a bialnu hlui i ni bawk, a insum zolo a ni mai..duhtawk tawh ang che..” inringtawk takin chungthu chu ka sawi a ni.

Mali chu a ngawi reng a, kan chhuak ta a. Ka pasal hmel chu inthiamlohna hian a khat a ni. Ka mawng ka hlim tih ka hria, ka pasal thunun tur zawk ka nih laiin ka pasal bialnu ka ankhum a, zak takin ka siam a, mahse, eng thildang nge ka tih chuan ang? A rawn lan hma kha chuan mi pasal ani tih hre chunga lo duh ve tho tu an awm pawn a hnar \hin, khanu rawn lan a\ang chiah khan engkim a buai zo ta a nih kha..

Kan room-a kan luh rual chuan, ka suit case ka la chhuak a, ka thawmhnaw ka khung a, angaihna hre lo takin min en a..

“Eng nge tih i tum?”

“Ka chhuak dawn”

“A ngai lo”

“A \ul tlat a ni”

“Lily” min rawn kuah thlawp a, \ap lo turin ka insum \ang \ang a, a awmah chuan ka bei thlawp a, nghet zet hian min pawmbet a, ka pasal angchhung a ka tluk luh lohna chin pawh a rei tawh a sin.

“Min kalsan suh, khawngaihin”

“I hria em? Nunhlui chu nunhlui a ni..i tih \hin kha..keichuan ka nunhlui te kha nangmah vangin ka nawtreh tawh a, nang chuan i thei ve lo” \ap \iau in ka ti a, pangchan ka chak ngawih ngawih, mahse, ka pride vangin ka thei silo.

“Ka hria, ka hria lawm, min ngaidam rawh aw, engkim ka sawi vek ang, thu teh” tiin khumah min namthu a, ka bulah alo \hu a, ka kut vuan chungin, “Mali hi ka hmangaih \hin tih chu ka zep lo, mahse, nang ka tawn a\ang che khan mali aia hmangaih ka nei tih ka hria, i rinawmna te, i rilru pawisawilo takte kha mali chuan a nei ve lo. A rawn lan leh pawh khan kei chuan \hianhlui angin ka kawm a, ani pawn a tir kha chuan bialpa a neih thu te pawh min hrilh.

Mahse, kan inbiak tak fo hnu khan a bialpa chu a \hen thu leh min theihnghilh ngai loh thu te a sawi \hin a, keichuan insum tak chungin ka chhang hram hram zel a, zankhat chu leng turin min sawm a, ka va len chuan a chhungte an lo awmlo a, inneihnaah an lo kal vek alo ni a, a roomah min hruailut a, tumloh deuhin kan chesual ta ringawt mai a ni! hrehawm ka ti a, zahawm ka ti che a, kha thil kha i hriat ka hlau em em a, mali hi hmeichhe nasa ve tak a nih vangin i bulah a lo sawi mai ang tih ka hlau bawk. 

Zep thu a cheng lo; sex hial kan hman dun leh takah chuan keipawn satliah taka en har ka ti \an a, hunawl kan neih dun a piangin kan chesual ta ziah a! ka awmdan tenawm tak avang khan ka hnaih ngam lo che a, mahse, englaimahin ka theihnghilh ngailo che. Zuala nena in awmdun ka hmuh ni atang khan ka tihsual rah in min rawn nghawng ta ni ah ka ngai a, ka rilru ana a, mahse, demna che ka neilo, i uire dawn lo tih chu ka hrechiang, ilo khawhar \hin zia leh i nat dan turte ka hrethiam a, ka nun pawh sim ka tum a.

Mali pawh engkim ka hrilh, min \ah khum a, keilo chu midang neih a tum loh thu te a sawi a, mahse, ani ai chuan ka thlang zawk che, vawikhatmah nupui thlak hi ka la ngaihtuah ngailo. Zuala khan min rawn be ta thut a! i dinhmun zawng zawng leh i tawrhna te min hrilh a, \hian\ha tak angin bul\an \ha leh turin min rawn ngen a, a zahawm ka ti sin aw..

Chuan, zanin khan ka phur em em a, mahse, mali khan min lo bia a, a damloh thu leh thil min sawipui tur a neih thu a rawn sawi a, hnial ka tum a, mahse, min ngen nasat em vangin reilote hun pek chu \ha ka tia, ka kal a nih kha; in lo kal kha pawi tihna ka nei lo” 

A \awngkam dam thlup te avang chuan ka lung a chhia a, ka inpet fan fan a, “Ly, min la pawm thei anih chuan, engtikahmah i lak a\angin ka pel he tawh lovang, khawngaihin min pawm leh hram rawh” ka kut a hum a, ngenngawl takin min melh a, a inchhir zia chu hmuh theihin a langchhuak a ni.

“Pasal pakhat bak neih ka tum lo ka tih kha” ka ti sap a.

“Ka hmangaih che, nupui zawng zawngah i \ha ber” rei tak a fawh tawh loh ka hmui chu a rawn fawp a. 

Pasal rinawm lo hi nupui rinawm hian hmangaihna vangin rinngam ni turin ka siam leh thei tih hi huai takin ka sawi ngam a ni. Mahse, ka thinlung na te kha enkawl dam tur chuan hun a mamawh ve hlek ang..chu pawh hmangaihna vang chauhin thinlung hliam kha thinlung thar hlakin a thlak thei ang…

Chumi zan ang renga Umapuia chet nat chu ka la hre ngailo reng reng..kan laklawh laia mampuia harh pawh kha hit lo viau mah se..a awm hliah hliah mai...hihi..